لبوة على شفا الثار

بارت الستون

لبوة على شفا الثأر

                                       بقلمي:leo Alfatlawi

Ins:le_m3r
بارت الستون

بارتين سوه♥️

***ناي***

اني احجي وغسق خبصتني بالاتصالات رديت ها ولج  شكووو

--ناااي لحگي

--خير مصيبه غردي

--ولج تعرفين واين انييي

--وين

--بزفت رويدا

هيه كالتها واني شلت راسي اباوع لكرم الي كاعد  يلعب ويه عاشق ويضحگ

--وين انتي واشلون رضت هالثوله

--ابوها مطلوب هواي وجاين عليه الشرطه ياخذو وجانت هيه المقابل حتى يتنازل عن الشكوى

--لعددد ماحجت ماصخمت باعت روحها هيج اشلووون 

غيث. شصاير يولي

غسق. هذا غيث يمج فدوه ناي كليله خلي يجينا ولج ماضل للزفه هواي وهاي قانعه اتكول  دربنه مسدود من البدايه خلوني اتزوج وخلص من القهر

--وينكم احجيي

--بالبيت اجيت صدفه اشوفها وتفاجات بيها كاعده بالبدله ناي فدوه هاي متبنجه ماتعرف شدتسوي ابوها مترجيها وخالها تقبل بدون وعي هسه كاعده بس دموعها تنزل واني عجرت مابيدي شي

--حاولي اتعطليها اشكد ماتكدرين جايه بالطريق دااشوف شسوي روحي

--ماكدررر ناي اجتت الزفه استعجليييي وين كرررم خبرييي بسرعه

جر الفون من ايدي غيث وطلع بره يحجي وكرم كام كال شكو

--رويدا زفوها

باوعلي بكسره همس لاتكوليها  رويدا ماتغدر بيه

--موبكيفها ابوها جبرها كرم الحكها قبل لاياخذها زوجها

ضحك بستهزاء ورجع ليورا مثل الاختل توازنه كعد كامش راسه

--شبيك كرم كوم يمعود ماكو وقت

--وين اكوم  وانتي اتكولين اتزوجت

--لاتلحك  خلينه نروح كرم رويدا منتظرتك اتخلصها لاتخذلها

--شسولها اكثر من السويته  امبين مالنه نصيب

هو كالها واركان دمغه وشاله من باخته نكثه كاله اصحى يووول هذا الكلام مايكولو بس الحريم

--اركان اتگلك اتزوجت

--وان تزوجت موش هاي حرمتك لولااا انجيبها من نص بيت ابوها وغصبا عن اكبر واحد بعشيرتها

--ماكدرلهم اني وابوها كلب ابن كلب لوابوس رجله مينطيها الي

--يخسى انعل ابو شواربو وهذا الحجي تحجي  بس من نگون  حدر التراب

--راح توكفون وياي تدري ماعندي غير الله وانتم

--انت تأمر موش تطلب هذا شاربي موش عليه اذا حرمتك مابيتت اليله بحضنك امشي يول

دفعه وطلعو بسرعه  صعدو سيارتهم غيث طلع قبلهم حتى فوني عنده مارجعه وذوله طلعو وراهم باوعت لحن على وكفتها صافنه

--ناي راح يجيبوها

--والله شكلج اذا انتي غبيه فهاي اتفوقج بالثول اضعاف

--يجوز خطيه هم ماخذين فونها مثل ماجانو يسون وياي بس لاميلحگون وتتزوج

--والله اركان مفول ويريد بس واحد يطلع غله بي واجته عدله من الله ماعنده مانع ياخذها هيه ورجلها على الحدود يحصرهم بزاويه ويعلمهم على دينهم

--هاج الفون اتصلي بغسق كليلها خلي اتشردها

ضمت وجهي مأيسه

اخذت نفس واخذت الفون اتصلت بغسق مشغول عرفت غيث مستمر بالمكالمه وياها

رجعت فتحت الباب وكفت محتاره شسوي مرت الساعه كلما اتصل ومغلق

تعبت كعدت وعاشق وعلي كدامي يلعبون ويه الجهال طوبه

اتعدت  الساعتين والثلاثه وماكو اي خبر احس حتى تفكيري تعب ولاواحد يرد على جهازه
خفت ماكو غير صارلهم مصيبه وراحو للحجز

عمتي كامشه ركن الشارع واني روح واجي  اديه بجيوبي

صرخ عاشق اجوووي  ناااي

اخذت نفس دخلت سيارت زفه واليسوقها  غيث كالعاده  بخبال شحط كدام البيت اشرلي فتحي الباب

ركضت فتحت السلقي وسحبت الباب دخل السياره باوعلي كال  استر بحريم العالم وحرمتي مفرعه بعدي يولي ونتننن حدرن للبيت  بسرعه

--عززه بعينك بايگ العروس هيه وسيارتها

--راد واعلمج اشلون الحجي ناطري ماتاخر اذا ماطلعت شكو مصيبه من عيونج ماتسمى عالزلم هينه وانتننننن فضنهااا

نزلت غسق وراها رويدا عيونها حمر تبجي

رجع طلع السياره وداسها  شحطها يمشي بسرعه
دخلت عمتي اتسد بالباب رحت لرويدا حضنتها شهكت
--ولج ناي راح ينسجن كررم

--ليش شسوي

غسق. كلشي ماسوو بس اركان وجود  سحلو العريس كدام العالم وغيث طلع السايق شمره وصعد مكانا غير مسار السياره بدل مابيت العريس على بيتج

--وكرم وينه

--كرم اتكول خفاش ولطش بعيون تلمع متسلق على ابو رويدا  بأدي ورجلي يردون يفتحو ماكو قفل

--حييبل ماكتله

--ولج ناااي دخلنا ابأكشن اوووي اتخبل فاتتج مغامره والنبي اتموت اركان واكف اتكول مصارع شارد من حلبه مايحجي بس يأشر والي بي حظ يروح يمه

اماارجلج يشتغل عالخفيف خرب غيرته على ذيج الخفه بلمح البصر عكس سيارته كدام سيارتنا ونزل سحل السايق شمره وصعد مكانه شحط بينا  ييي حسيت روحي فد شخصيه وانخطفنا

--رويدا وره هاي السالفه راح يدخلون بمشكله تره وهسه احتمال بالمركز

رويدا. يعني شسوي كولي والله عقلي متشوش وكلبي راح يوكف

--اتصلي ابأبوج كليله لايروح ويشتكي افضله لان انتي داخله سن القانوني وراح اتجذبي وهم تقدمين عليه دعوه بالعنف الاسري انو يعنفج وغصبج بالزاوج

--اخاف ينجلط ولج

--لعد الولد راح ينسجنون بتهمه الخطف وكرم راح ينحكم بسبب اختلاف دينا لان هويته مامتغيره وابوج راح يستغل هالشي لصالحه

--بابا راح ينسجن

--على راحتج سوي التردي بس وكتها راح تخسرين كلشي موبس كرم العلينه سويناه وعرضنه روحنه للخطر حتى لاتكولين قصرنه

--لالا انطيني فونج

فتحت الرمز وانطيتها ادري صعبه عليها تشتكي على ابوها بس ماكو طريقه تخلص منه بغير هالشي

اتصل ودموعها تنزل بكتمه دك اول مره فصل ردت اتصلت رد كالت بابا وشهكت

--وينج رويدا بابا وين اخذوج ذوله رحنه للمركز اشتكينه وهسه يطلعون يدوروهم لاتخافين

--بابا اتنازل عن الدعوه اني رحت وياهم بأرادتي

--رويدااااا وين انتي لاتخليني اغضب عليج

--كافي بابا ظلمتني هواي وقسيت عليه اكثر دمرت حياتي من اني وطفله خليني اكمل باقي عمري براحه بلكي الحك على مستقبلي

--هذا موكلامج رويدا كولي وين انتي تره قدمت شكوه على كرم وجود وراح يجيبوهم واذبهم بالسجن

--ماتكدر اني اروح واكلهم ماصار هالحجي رحت بأردتي وياهم وانت الي غصبتني بابا اسفه بس اذا ماتنازلت عن القضيه اني اروح اشتكي عليك بالعنف الاسري

--هاي تاليتج ياابنيتي تاليه تعبي تشتكين

--ماكدر بابا والله احبه فدوه اروحلك

--روحي لااني ابوج ولاعرفج ليوم الدين وبس احصلج راح اموتج 

جريته منه كلتله اسمع عمو الصوت متسجل وراح اقدمه دليل واشمرك بالسجن عشرين سنه بتهمت التهديت التشريع بالقتل بالاضافه للعنف وزواج بنت بالغه بالاجبار من غير صار فتره تعنف بيها وحابسها وعندي شهود على هذا الشي

--الله ينتقم منج عرفت بنتي مربيها ماعدها هيج شي

--بس ماعرفت الدوله بيها قانون لبالك بعدك عايش بالعصر الحجري عمو من الاخير خلال ربع ساعه مانسحبت الشكو اعذرني ماخذتها ورايحه للمركز

--حسبي الله ونعم الوكيل بيج وانتي رويدا من هالساعه لاانتي بنتي ولااعرفج حتى على جنازتي لاتوكفين روحي عساج ماشفتي خير ولالبالج اسكت راح ابلغ عمامج وخوالج اي واحد يشوفج يكتلج

--روح سوي التريده بس قبل كلشي رويدا راح تعقد هسه عقد قانوني واي تعرض منكم ويه الادله راح اضيعكم بي 

--راح نگاومه عشاير

--ماتكدر كلشي تسوي لان عمرها جبير ومنفصله بالاضافه ماراحت غصبا عنك راحت كدامك وماسوت شي غلط اتزوجت بعقد قانوني وهو اصلا مسيحي حتى عشيره ماعنده يعني اختصر التعب وبارك البنتك

--اذا ماضيعتج انتي وياها مااطلع ابوها تتزوج من مسحي وهي مسلمه

--حيل اشكد قديم اسلم  صار قرن وين اكو مومن يزوج مسلمه لمسيحي دنحجي على واحد مرخص مو سيد من باب الشرجي

--حسبي الله ونعم الوكيل ماراح اسكت وهاي اذا ماكتلتها مانحسب عالرباجيل

شهكت رويدا  سديت الفون كمشتها عمتي دخلتها جوه فتنا وياها كعدتها تحجي وياها وتايدها بالسوته المثل ابوها مايستاهل اتضحي علمود
لليل واحنه نشجع بيها ونهدء اندكت الباب راحت ماما مانسمع غير  صاحو يالله طررريق

دخلت ماما تركض  كالت جايبن الشيخ وياهم

باوعتلي اشرتلها اي

--ناي خايفه

--كرم راح يسعدج لاتخافين ماطولح انتي بأسمه اسنين انتظرتو هالحظه لاتخربيها بخوف ماله وجود

--اخاف اندم ماريد استعجل

--على شنو اتندمين  الندم الوحيد التفكرين بي هو الجنتي عايشه تحت امر مرة ابوج وهيه تبيع وتشتري بيج

غسق. رويدا لاتتخبلين بروح امج ماعونه نوصل لهاي النقطه ياندم تحجين عنه الزواج المبكر الي ماشفتي منه بس الاهانه والكتل لوشهادتج الي مركونه مالج حق حتى تباوعيلها

--خليجن وياي لاتركني

كعدت كمشت اديها همست افديج بروحي انجان انتي اكثر من اختي وكفتيلي وكفات اهلي ماوكفوهن الي وكرم هذا مواخ لاتوئم روحي

دك الباب وصوت غيث كال يابه وينكم

كمت رحت وره الباب كلتله حاضره رويدا

--بس معلوماتها ورقم هويتها حافضتو لان ابوها مارضه يعطيهن

رويدا. اي حافظتهن

--دحگي خويه راح نعقدكم عقد صح موش رسمي بس حلال وابحيل الله بس تحصلين الهويه تعيدو وتسجلو محكمه

--عندي صوره لجواز سفري بفون غسق اتفيدك

--اييي وينج متكليلي من الضهر لسه انعل ابو اصلنا وحنه ندور واحد يرضه يملجكم بهيج ظروف وينو جيبو بسرعه تايسجل المعلومات

راحت غسق تركض جابت فونها طلعت الصوره فتحت الباب اخذه وهمس حضري روحج بعدها

--لويموت صاحبك مااخذه

--موهيه بكيفج اشو غصبا على ابوج واعقدج الو لشوف اشلون تعترضين

--هه لبالك ناي اني وهيج سهله

--بس صوتج يولي لايصدكون  فوتي جوه لاهفج دفره اردج بحضنها تاتكملن سوادينجن

نترت براسها عض شفته شال ايده ضمت وجهه بسرعه جر الباب سدها  كمشتني الضحكه دنكت خفت ترد عليه اعرفها خبله

لحن جابت كرسي خلينا لرويدا وكفنا يمها منتظرين اشويه واسمع المومن يكله يله ابني انطق الشهاده

كرم. اشهد ان لااله الالله واشهد ان محمد رسول  الله

همه يصلون على محمد ويهنو بدخوله للاسلام  واني لزمتني الرجفه  شي يقشعر البدن  

كمشت ايدي باوعتلها نزلت دمعتها دنكت بست راسها همست حتى اتعرفين اشكد يحبج

ضل المومن بالنص ساعه يشرحله ويعلمه على اصول الدين واحنه ننتظر لمن صاح بأسمها  ردت عليه سالها كم سوال وبده يعقد

احس فرحه ماسايعتني حسيته صدك اخوي يمر شريطه من اول دقيقه لكيته بالسياره لحنيته وياي باصعب الاوقات لبلوزه وعرنوصه ومجاكرنه لهاي وكفته واسمع صوته اشلون يجاوب برجفه

شعور ماعرف اوصفه  رغم مخالفه اهلهم واختلاف دينهم بس ربي كتبلهم ينجمعون

كمل السيد واسمع صوت بجيه كرم  وضحك الولد وهمه يهنو

كامت حضنتها خليت راسها على متني بجت

--مبروك يعمري زواجت الدهر

--اتمنيت امي وياي بهيج وقت

ام غيث. عجل يالصگعه  احنه موش امهاتج

--لاخاله والله اعز وذني ربي عوضني بيهن بمحنة الخوات واكثر

--عجل انتكتمي وانتي يالهتره تزنحي عالغرفه جيبي العده مال العثره عدلي مكياجها تايخش العريس ماينصدم بهالجهره ويرد لدينو

اخذناها عالغرفه كعدنها غسق اتعدل بمكايجها واني عيني بالحن الي وجهه اصفر خاله راسها عالحايط رحت يمها كعدت اشرت اشبيج

--ناي الدنيا تفتر ومعدتي متخربطه

--من السم الجانن امشبعاتج بي هاي لان تركتي وانتي متعوده اكيد هيج يصير بيج باجر اخذج للمستشفى

--لامااريد اخاف يطلع بيه فد مرض خليني هيج بلكي كم يوم وتروح مني هالحاله

--كومي غيري ملابسج حتى تجين ويانه اكيد هسه يزفو

--ماريد اشوف اركان

--مويمج بس كومي لبسي حجاب حتى لايضل يتحجج

كامت غيرت ملابسها اباوعلها لوخالتها على لبسها افضل قميصها ضاگ صدرها والبنطلون امقسمها وهيه ولايمها  اذا الميز حس هيه اتحس وكفت خلت مكياج

رحت لكيتها بعدها اتعدل باوعت وجهي ضال مكياج من الدوام بس عدلته اشويه وصوت غيث يستعجلنا طلعناها وطلعنه لكيناهم واكفين بالباب كامشين كرم

شافوها وبدت الصلوات والكفلات عمتي اتهلهل وطش جكليت  وهمه يهوسون

دخل يرجف وفرحان بنفس الوقت كمش راسها دنگ باسها وهمس شي ماسمعنا بس هيه ضحكت

كمش ايدها طلعو السياره جان مدخلها جود صعدو وماما وعلي وياهم بالكدام

وحنه ويه اركان صعدنه دنصعد وكمش لحن كالها وين يولي

--شنو وين داروح وياكم

--اي ماختلفنا بس هذا لبسج مقتنعه بي

--اي مقتنعه واروح وحتى الحجاب حذبه

--دخيييل محمد اشلون اتخليني افلع راسها لحنننن فوتي غيري

--مااغير وانت مالك دخل اشوكت تقتنع احنه انفصلنا وبعد مالك سلطه عليه

--عدل خوش حجي

كالها عصر وجهه اخذها للبيت دفع شمرها وسد الباب صاح غيث اتوكل خويه

--كل عقلك لك خبببل منهو يدحگ جهرتها بهاليل

--ابوييي وخبل على روحي اخذ الحريم وولي

--وانت يالفهيم تجي ورانا متزنح

--ضال هينه بالباب  مناطركم

فتحت الباب لحن تفرك بوجها صاحت انت مالك دخل اني حره

بس اندار حتى ماحجاي سدت الباب

غيث. فتحي الباب خويه تعالي

--غيث كله خلي يخلي عنده كرامه ويروح من بابنا

--سمع يخوي بس من فقد عقلو راحت الكرامه وياها بعد مايفيد

--ناي روحي اشتكي عليه

--خويه اشويه افهه هيج صوتج ينجرح من كثر ماعالي خرب بالحظ ولجن ناي متاكده هاي اختج

اشرت والله

--اركان استهي بالرحمن خويه خطيه كرم مناطر   راح تخرب زفتو

--خلي تغير وتجي هيج ماتطلع

--لحن خويه غيري ملابس

--لااا مااغير واطلع غصبآ عليه واذا رجال يحجي

اباوع لاركان يمسح بوجهه وغيث كوه كاتم ضحكته كالها عجل خليج كد كلماج وهفي الحجاب من الباب

--هسه
كالتها شمرته

--ذيبه اخيتي كليله انت موش زلمه وماتخوف جلبي

--اي مورجال ومايخوف حتى البزونه

--ولج موش بفهاوه حييل خليج نجره من تحجين

--يي وبس تطلع العده اتزوج

هيه تحجي وماشفنه غير  اركان اتشلبه الباب بخفه وطفره اسمع صرختها اتصيح ماما لحكيني

دك الباب غيث حيل كله ولك الجوارين فزعت يالخبل

فتح الباب كامشها من ياختها وهيه ضامه وجهه تبجي  ركضت عمتي خذتها منه كالتله لاموش عاگل وروح ابوي

--عمه خليها تغير

--مال اتفل بوجهك على هذا عگلك جاتلها يمكسور الركبه

كمش راسه يباوعلها بحيره وهيه تحلف ماتبدل

لفتها عمتي بعباتها وطلعت دخلتها السياره صعد خليت غيث يهدي بي

سديت اذاني واني اسمع ركع الباب دفره

--ارتاحيتي موكلتلج لبسج اوفر

--ماله دخل خلي يروح يتشرط على سهيله ذيج مرته

--اشش اجه انوب حتى العرس يخربه

غسق. كفووو انتي ذيبه هيج دوم خليج لاتتنازلين ابد

--كتلج

--لا بس خفت لان عصر وجهي حيل

غسق. باسج ولج اخذ منج عضه احجيي شسوه

--هاا

سكتنا لان صعدو باوعلها بالمرايه كالب خلقته برطمت ودارت وجهه

استغفر وشغل سيارته دگ هورن لجود طلع كدامه وهو ورا

غيث شغل ساجده عبيد وطلع عاشق من الجام وعمتي وغسق انطلقن بالهوسه

***لحن.***

على طول الطريق همه يهوسون واني نفسي مغموته وعيني اترف فركتها حيل اريدها تبطل ماكو

اباوعلهم كلهم يهوسون وفرحانين ناي اتلكف بتها وغيث بعاشق واركان مشاركه يكله عطي السلاح  خلي يرميي

  لميت رجليه وخليت راسي على الكشن  غمضت كلماافتح عيني الكي يباوع لعاشق ويضحك  اشلون يطفر 

بالساعتين يفترون وغيث طلع سلاحه سحب اقسام وخله ادين عاشق عليه يضربون من الجام ابتسمت  على ضحكت عاشق اشلون فرحان ولايخاف

فرو شوارع بغداد ونزلو عالجسر اخذولهم اشويه يهوسون بكرم لمن عمتي صاحت بيهم لان زودوها باصواتهم والعالم اتصور او احتمال خافت عليهم من العين  لان واكفه وتصلي على محد وكل دقيقه رشتهم بالماي

رجعنه تالي وقت للبيت نزل اركان فتح الباب ودخل سيارتنا نزلت دخل جوه غسلت وجهي بلكي عيني تبطل رف

اسمعهم دخلو للصاله انداريت من الباب المطبخ فتحته وطلع للحديقه

روحي مخنوگه  شي بكلبي يكلي راح اتفقدين شخص

رحت للمرجيحه كعد رفعت راسي باوعت للسما نزلت دمعتي
همست ربي دخيلك عديها على خير وديم الفرحه  خليت راسي بين اديه اسمع رجلين يمي من عطره عرفته

كعد نص كعده كدمي كمش اديه وخرهن عن وجهي كال شبيج يولي مريضه

--شتكول انت

--انجعل اضعافو بكلبي اخذج للمستشفى

--اركان انت اشوكت تحس صدك احنه افترقنا

--من اكون حدر التراب بيش احلفلج ماادري بيها رايحه ويانه

--لاتحلف لان ماعاد يهمني

--وحگ راعي الخيمه الزرگه ماكربتلها ولاشفت النوم من يوم البعدتي عني

--اجيت اموت بسببك وجنت مستعده افقد حياتي مولان احبك وماتحملت لااا لان اكتشفت روحي غبيه وكل غلطه مثل الثوله ارد واني مغمضه اثق بيك

--البارحه ٤بهذا الشهر  هذا التاريخ هو اول مره اشوفج بي اول مره ينبض كلبي و  احس اني بشر عندي مشاعر ومن حگي اعيش

--اسوء يوم بحياتي جان لو اعرف هيج راح يصير بيه ماطلبت منكم ولاباوعت بوجهك

دنك خله راسه على رجليه همس ماكدر بدونج كلبي ماعاد يدگ ولاكدرت اتنفس

جمر العشك اذاني انده بأسمج صاحي ونايم
لحن تدرين ماكو بكلبي غيرج  شكو عشگ الله نزلو عالبشر عشكتج بي

شال راسه خله ايده على رجلي  دكدك بطرف اصبعه

--هيج دكين بكلبي
احبج واشهگج قبل النفس

--واني كرهتك

--اليخطر على بالج عملي بيه احمل اي شي منج اصبر فوك العمر عمر اناطرج لااخر ثانيه بروحي بس لاتكولين اكرهك وماردلك

--واني اكلك ماارجعلك روح لزوجتك اركان الله يرزقك بالطفل الي تتمناه كمل وياها احنه قصتنا خلصت لهنا

رجع راسه بحضني حجه بصوت مخنوگ
رحميني

--جان رحمتني قبل لاتخذلني  قبل لاتخليهم يباوعولي  بنظرة الشماته بعد ماجنت  اوكف متباهيه بيك كدامهم

--ماخنتج موش لان خفت منج لاوحگ رب العباد بس خفت من ربي يعاقبني ويحرمني منج لحن مواحبج ولااعشگج لاااا عبرتي  هالمرحله من دهر  صرتي روح الي مجرد تفكرين تبتعدين اموت

--ماتموت بس اتشوف الطفل كدام عينك راح تنساني اواصلا ماتذكرني نهائيآ

كمش ايده اخذها باسها وخلاها على كلبه

--عجزت وانتي اتوسل واعتذر 
سمعي نبضو ودحگي حالو اشلونو من بعدج بلكي يرف كلبج عليه

--مستعد اطلگ سهيله

--وانعل ابوها بس عطيني وقت اشويه وداعت عيونج گبل لاتطلبين تلكيني منفذ الرايدتو

--هالكد ماعشت وياكم ونوجعت منك بعد ماصدك بيك اركان اتصل بيها هسه وطلكها كدامي

--وراس ابوي اطلكها ومستعد هسه بس راح اذي غيث وادمر العملو واضيع تعبو يولي عطيتي كم يوم واني اقسملج بكتاب الله من هالحضه حتى عيني ماتصل حدها موش بس لساني يخاطب لسانها

--ماراح اطلكها وناوي اترجعني لنفس وضعي وارجع اعيش نفس الضلم والوجع بعد ماارتاحيت بيت ابوي واني مامستعده ارجع لهل شي روح اركان 

--خلصت عمري اتزنح بين النار عمري ماغمضت عيني براحه ولاعرفت شنهو هالجلمه اگضي وكتي  واواصل النهار باليل واني مناطر الموت ناذر روحي للمنيه بس حتى احمي اخواتي مادحگت ولاحسيت الي قيمه غير واني بحضنج وادحگ ضحكتج بروح اخيج لاتصيرين انتي والزمن عليه

--انت حياتك مخربطه واني تعبت بعد ماعندي طاقه اتحمل واكمل واعيد الماضي استوني بيدت احس روحي عايشه اركان--

--لاتكملين بس عطيني فرصه وحده  اذا مانفذت كل الطالبتي وحگ ابو الخيمه الزرکه اني الي اكلج روحي بطريجج ماخليج اطلبين هالشي

--واني مامستعده اعيد الالم من جديد لان انت ماراح تتعدل حياتك وخر اركان اخذت قرار ماراح اتراجع عنه

-- ترسي صدري بارود  ولاتحجين هيج  وروح اخيتي  الموت اهون اخر فرصه الج چلمه بالقران ارمي روحي گبل لاتنزل دمعتج

هزيت راسي لااا

وخرته وكمت وكف بوجهي  بعدته عني رحت ليجوه كلبي نغزني درت وجهي لكيته خال اديه ورا راسه ورافعه للسما

كملت طريقي دخلت لكيتهم كلهم كاعدين ردت ادخل للغرفه صاحتلي عمتي كالت لاتخشين ليجوه بحدج كعدي هينه يمنا

--تعبانه اريد انام

--بعد وكت حدري كعدي يم امج وانتي ناي عطيني هيا بردت ادفيها

كعدت يم ماما واسمع انفتح باب البيت اشويه وشتغلت السياره وصوت شحطتها باوعلي غيث عگد حاجبه كال وين وله هذا

--ماعرف يمكن طلع

--يابه وين يطلع غير مفتاح سيارتي يمو خويه جود خبرو قبل لايبعد

ام غيث. يمه باتو هينه اليوم

جود. بيت العامر عمه بس والله اهلنا متانينه لازم انرد وهم لازم انحضر  روحنا للسفر

--عجل عازمتكم على غده الجمعه تجون

كرم. خالتي ام عاشق اكيد راح اتسويلي مباركه

--يمه انت ماتمل من الدولمه شبلاك

--راد لتركيا راح يگطعني الجوع اضل عالاندومي وبتيته جود المعجنه

--لاصار عندك حرمه راح تطبخلك

--اي والله نسيت

غيث. مايتعتب ابو رويدا من رگعك دبه وزوج بنتو لغيرك يعرف موكفو مايأمنك على دجاجه موش حرمه

جود. هذا اركان رد هاك

اخذه غيث كله هاا يول سويجي يمك ضال --وين وصلت --يله موش بعيد رد تانروح وياك انوصل الولد ونطلع لهلنا --تمام يله مناطرك

سد الفون وشمره على جود كالتله عمتي ها وينو

--كال اشرب جاي بالكهوه وارد ماتاخر

-- صدك ماصار عندو جاهل

--اي صارو عشره

جود. صدك غيث  هذا البيت الطابقين  براس الشارع معروض للبيع اذا يفيدك

غيث. اي اني واركان ناخذو بالنص تانهدو ونبني عالحديث

--كلت لاركان كال  من شيب ابوي اشتري ولادينار

عمه. عش ماعطتو  حصتو جدتك

غيث.  ههه حتى العدو سحبتهن حرام بطرك السلاح ضل

--وانتي  خذيت حصتك

--.وروح اخوتي ولاگشه  بس افتر حالي حال الريشه بريح  بس كلت ابيع عمار من تركيا واخذو

جود. اخذه والبناء على اركان لان حرمات يروح منك خوش موقع وخوش مساحه

--خوش حجي باجر شوف الزلمه صاحبو حتى لوتعطي عربون والباقي لمن تبيع

ام غيث. عش يمه راح تعيش بغداد

--لاللمستقبل يضل بلكي الله يعوضنا بحاتات   مجان المصايب الي حاسبات روحن حريم ويتمندلن وحنه وحدتهن اتكول جدي جلمود

--اي يمه واني اندعليكم ربي ارزقهم على كد نيتهم وطيبت كلبهم

--هااااا يمه كولي يالله. بطلنا  اشبيهن حريمنا اقلها انخفظ ذنوبنا بيهن كومي يولي لحن سويلنا جاي

كمت للمطبخ لكيته مهدر صبيت دخلت غسق كالت اني اودي

--اتباتين يمنا مو

--اي ناي خبرت بابا ورضه اليوم للصبح نضل كاعدين نحتفل بس خلي يرحون يله وخري خلي اروح راح يبرد الجاي

اخذت الصنيه طلعت وزعت وصلت لجود عبرته كملت توزيع شال غيث استكانه انطاه لجود وانتجه  كملت خلت الصنيه بالنص كالها بت مضايف ونعم من اصلج يولي

--طبعا

--عجل ماطول هيج وين جايي يبت الاجاويد

--انطيتك ماكايلتلك صير حاتم الطائي

--دحگي يولي ورب العباد اذا ماكمتي وعطيتي جود جاي احسبي حسابج الخميس شارب جايو بمضيفكم وغصبا على خشمج

--ماتكدر

--حلو خليج مثبته على كلامج وانت اتهير يخوي

كامت گالبه خلقتها شالت جاي خلت كدام جود ورجعت جاي غيث ردت كعدت

جود ضحك وغيث شال استكانه كالها هم اتهيرو تانشوفكم تعرفون تضيفون خطاركم

--لامانعرف وماعدنه استقبال اصلا واني نويت احول ديني واصير راهبه

--حلووو عزلت الكنيسه ماطولج نويتي يعني رفيجتج وياج سلملي

--ليش احسك مستهزء المفروض تفتخرون بروحكم متعرفين على بنات مثلنا

--اي لاه عندج حگ بهاي وين اكو مثلجن قافلات ملف  الاعناد والرعونه  ايقونة النكد والتفاها

ناي.  النكد الصح  من تحب واحد معقد مثل جود والتفاها من اتباوع بوجه مث---

بعدها تحجي وكام مالحكت تكمل طفرت طلعت بره كالها لاتفوتين خليج بره افضلج وانت يول تاخذ حرمتك وياك

كرم. لاخليها يم ناي لمن احصل جوازها حتى اخذها هيه واهلي انروح هناك اعلن زواجنا

--براحتك بس لاتخاف اذا تريد تعلن زواجك هينه اعلن   اهلك بحمايتنا محد يكرب صوبهم

--لاماريد مشاكل واني ماعندي شي هنا هيه امي واختي اخذهن واروح شعندي ضال هنا بعد

طلع فونه رد اتصل بجود خلاها على اذانه اول رنه عگد حاجبه نزل الفون رد عاد الاتصال هم ماكو اندار لجود كله هذا ماكو مغلق

--اخاف خلص شحنه هسه يرد مايتاخر

--عندو وصله بالسياره مايخلي جهازو فاضي وهو شغلو بي

--قابل شصاير يمعود لاتقلقنا

رد اتصل وكام طلع بره  اخذله اشويه مبين هم ماكو اسمع فتح باب البيت القلق واضح  عليه  كام جود طلع ورا وكفو بره

عمتي نيمت الجهال بالغرفه ضلينه كاعدين وناي وغسق طلعن اوراق يتراين بقضيه ويقرن ورويدا تساعدهن اتمنيت اني اشارك وياهن منظرهن حلو ونفس الوقت اشوفهن ثقتهن عاليه بنفسهن

كلمن تطرح رايها بثقافه متمكنه اهنا حسيت الشهاده الها اهميه للابنيه وهيه سلاحه وقوتها بهالوكت

كلتها ناي اريد اكمل دراسه

غسق. واخيرا عقلج كام يشتغل

رويدا. اني اساعدج بالدراسه كاعده ماعندي شي

ناي. واني اسجلج بمعهد استضافه حتى تسيطرين عالماده ماتعبين مثلي

--لاماريد اخسرج

--اشلون اكوم الطمها على وجهه بنتي المن دااشتغل غير الكم وعود من اتكملين وتشتغلين صرفي عليه لان وقتها اكبر بعد مابيه حيل

--لوعمري كله اشتغل ماوفيج السويتي وياي

--اموت على الادراما من حلگ الفاهيه تركي التفاهه وحضري نفسج هالايام اسجلج بس لوكايله قبل منو يكول اتلحكين هسه

--لاالحك اقره كل الفايتني بس سجليلي واني احاول اقره وياهم الباقي 

غسق. من باجر اشتريلج كتب ودفاتر

رويدا. واني ماطولني يمكن ابلش وياج دروس مكثفه

--اكدر انجح اذا قدمت السنه

رويدا. بس خلي عندج اصرار وثقه بنفسج راح تكدرين والسنه الخ بالجامعه ان شاء الله

دخل غيث وجود كعدو عالقنفات بعيد عنه وهنه مستمرات يأيدني بالقرار ويشجعني

مرت الساعه والثانيه واركان ماكو نامن البنات وغيث يروح ويجي اديه على راسه محتار عينه بالساعه والباب

مسح وجهه كال مايرد هذا

جود. يجوز راح لهلو

--مايروح اذا مايخبرني اتصل بأهلو ولاتبين اني يمك

اتصل جود طلع بره يخبر اشويه ورد كال ماواصل

--عرفتو خذو راح اركان

--منهو اخذه يمعود كول يالله يجوز عطلت سيارته يجوز سوه مخالفه واخذه للحجز

--جان خابر كرم خويه تعال وياي وانت ضل يم البنات لاتخلهن وحدهن واكو سلاح يم ناي اخذو منها  بين ماخبر الازلام يجوكم

--شكوو غيث

--ماكو شي بس الحذر واجب لاتتحرك وخلك على اتصال ويانا

اخذ كرم وطلع بسرعه  وجود راح للحديقه وكف

اريد اوكف رجليه ماتن بس مجرد سمعت بي ماهو كمشتني ناي كالت يرجع ماعليه

--ناي منو خذو وليش

--ماعرف واحتمال مو صدك لاتخافين هسه تلكي مثگل بالشرب مثل كل مره وكاعد مايندل دربه

--اركان بطل مايشرب من زمان

--بعد شوفتي اله من طلع موبس يشرب حتى يسوي حادث وهو مايدري بروحه

--بسببي مو بس والله ماجنت قاصده اذي ردته يحسم الامر  لا يضل ينطيني وعود ويكسر بيه  لان ماكدر ارجع على شريجه  ولاعيش ويه اهله

--ادري

شهكت
--لاااا ناي ماتدرين ماتدرين امه من جانت اطلعني للحلال وتحبسني ويه الحيوانات وتضربني اذا كلت وماتدرين من مرته تعيرني ماعندي اهل وتخليني اشتغل من الصبح لليل بذل وقهر بس حتى اضل وياهم لان ماكدر اوكف بوجها اخاف انطرد وعرف ماكو مكان اروحله 

-- لاتبجين واحسن قرار اخذتي هذا

--ناي حرموني حتى من الامومه كلشي اتحملت منهم حتى العقم بس ماتحملت اشوف بعينه لهفته للطفل واني عاجزه اجيبله ولاكدرت اشوفه ويه زوجته  واشوف ابنه بحضنه من غيري

--انتو من البدايه غلط جان زواجكم لاهو يكدر يترك اهله وعاداته ولاانتي اتكدرين اتعيشين وياهم وتصيرن مثلهم 

--بطلت اتحمل كلشي بس لايموت ناي بطلت خلي يرجع والله اتحمل ورجعله

--اسم الله على كلبه لاتحجين هيج

--ولج هسه جان بحضني يتوسل بيه ارجعله لو موافقه مجان طلع ناي اموت بدونه والله جنت اجذب من كلتله اكرهك وروح اخوي اجذب ماكو يوم نمت اذا اتخيله يمي واخلي راسي بحضنه

--لحن يروحي ماعليه اركان سبع محد يكدر عليه هسه يجي

--لاغيث جان قلق ولج اخاف رجعو اهل الناس الكتل منهم عمي ابو شاهين واخذو

--لا صح ردو بتفاقهم من طلعو غيث بس ميتجرون ياخذو واحد من احفاد ال---- يعرفون وراهم بحر دم تصير  

--عزه بعيني ذوله يكتلو يمه دخيل ربي من الصبح كلبي ناغزني حاسه افقد عزيز معقوله هيج تنتهي بينه بهالسرعه اي فولتله كلتله انتهت قصتنا

كعدت لميت رجليه احس خدر بجسمي حتى ادموعي ماترضه تنزل

وناي كدامي مواقل مني احس تعرف شي وضامه

مر الوقت وناي تروح وترجع كل اشويه تطلع تحجي ويه جود عالكيف وترجع للصبح كعدت عمتي للصلاه طلعت شافتني بعدها ماسأله ودخل غيث يركض صاح يمممه لمي الجهال وعلى بيت عمي ابو اركان بسررررعه

--يمه دخيل ربي شصاير

--خذو اركان ورادين علينااا استعجلي  جودد خويه اخذهم ودهم لبيت عمي وانت كرم اخذ عمتي ام عاشق وريدا لبيت غسق

ام غيث. اخيك بعدو عايش لولا غيث لاتجذب

--يمه دخيلج جهالي وحرمتي امانه يمج اخذيهم وروحي

--ولك غيييث اخيك وينووو

--ماعرف يمه ماعرف روحي من هينه لك جوددددد اخذهم وروح

ركضت عمتي دنكت شالت عاشق وجود علي وهيا طلع بيها غيث كدامهم يركض خلاهم بالسياره  واشرلي  ويلا

كمت رجليه مثل الشلل حتى مالحكت اودع ماما دخل غيث جرني بسرعه دفعني للسياره سد الباب ودك عالبنيد شغل جود وطلع بينا ---

***ناي ***

جنت حاسه واعرف راح يصير هيج من يوم الدخلت البيت بس ماتوقعت راح توكع بأركان

طلعت ماما ويه غسق هيه ورويدا صعدن ويه كرم كال غيث وياهن روحي

--ماروح اضل وياك واعرف منو الاخذه

--ناي لاتعلين كلبي روحي المجان خطر

--ماروح اني الفتحت القضيه واني الاسدها

--موش همه اهل السبعاوي الخذو وطالبين راسي وهذا الشي مايكدروله اذا ماخذو واحد منكم بالمقابل

--واني اجيبلك اركان واثبتلك موهمه هاي الخطف دكه ناقصه مال نسوان مو زلم اهل السبعاوي زلم يدخلون البيت وياخذون ثارهم كدام الكل وهسه اثبتلك

--ماكو وقت يبه افتهمييي شلغث

--اروح بالوجبه الثانيه من تروح انت  بس خليني احجي وياك اشويه بلكي نوصل لشي

اخذ نفس دك عالسياره البيها عمتي والجهال  اتحركت دخلنه للبيت رن فونه رد ها عمي

بيت ام عاشق -- لاالعيال دزيتهم لبيتك والباقي لبيت رفيجت ناي --لالحد الان بس سيارتو لكيناها --صح راميها بس ماكو اثر دم --ماعرف الشباب يمته يوصلون  لهينه -حسام  خلو يرد ويه جود والبيت احمو زين موش بعيد يدخل دخلت حريم وياخذ واحد من العيال -- لاتخاف مودع الله يالجبير

رجع الفون وكعد نص كعده خله راسه بين اديه كعدت يمه كمشت راسه رفعه عيونه حمر

--ماعليه يرجع لاتخاف

--هذا عضيدي  ماضلي غيرو

--ولاهو عنده غيرك  اذا مارد لخاطرك يرد لخاطر لحن يعرفها ثوله وماتكدر بدونه

--اول مره احس روحي عاجز ماكدر اروح اخليكم وراي ولاكدر اضل واخلي بحدو

--شنو الخلاك تتاكد همه

--ماعلينه ثار غير الهم وذوله اذا كضبو يرود وصل مايرحمو

--يعني ماخبروكم

--لا بس دزيت شباب يتأكدون تانروح ناي اعشگج  بالقران وجهالي عندي بروحي بس ماكدر اخلي اخوي عينو وراي مناطرني

--لو جانت لحن نفسي الشي جان سويت غيث احنه انخلقنه مو حتى انحب لاحتى نحمي النحبهم لاتخاف علينا كوم روح لاخوك وجهالك ابأمانتي وراح ترجعلهم نربيهم سوه

كام كمت ويا كمش راسه باسه واخذني لحضنه --ماگلج عشكتج ولااحبج بس انتي بالنسبه الي الهوا لريتي

--ماراح امنعك اتروح  بس اگلك مااقبل منك اي عذر ارجعلي اذا مولخاطري لخاطر هيا  لاتخليها مكسوره وراك  تره الابنيه اكنوز الدنيا وحنيت العالم ماتعوضها حضن ابوها ولاسنده

--راجع عينج بيهم اريدج  اتسندين ضهري مثل كل مره  اللبوة دمعتها ماتنزل تنهش كل اليفكر يكرب  حدره رجليها

وخرت راسي
--قويه بوجودك ضعيفه وراك غيث ارجعلي

سمعنه سيارات وكفن عصرني بحضنه واخذ نفس طويل باسني وبعدني

--الازلام وصلوا وياهم حسام يله يبه روحي وياهم تايوصلوج لبيت عمي اني ماكدر اروح لازم اضل كريب من المقر بلكي احصل شي

هزيت راسي اي
-- غيث

--عيونه

--رجع اركان بأي وسيله

--هه كاعد ادحگ بدعه جدامي وهيه تزتني للموت بقوه گلب

--لومااعرفك كداها وراح ترجعلي ماخليتك تتحرك

رد حضني حيل حسيت يريد يدخلني بروحه باس ركبي وخر عالسريع  عيونه صارن دم  اشر يلا

طلعنه هو صعد بسياره واني ويه حسام بسياره اتحركنه كلمن من جهه بس عبرت الشارع  اتأكدت بعد كلت لحسام  اوكف

--خيرج مره خالي

--ارجع للبيت بسرعه نسيت شغله مهمه 

--اخاف احد يسبگلنه

--افا زلمه  فرخ اطراح صدك خايف

--ولو هاي جبيره بحگي بس اعبرها الج وموش اني الي اخاف بس خايف عليج

--ماعليه والمنطقه امان يخافون يوصلون لان اكو بشارعنه واحد يشتغل بالمخابرات يله ولك لايتصل غيث ويسويها هوسه

رد لاف السياره رجعنه وصلت فتحت الباب ونزلت دخلنه للبيت ركضت للغرفه  طلعت فون عمتي  لكيته مصفر شحن

غمضت كلش مووقتك  خليته عالشحن ورجعت يم حسام   كال ها

--انتظر خابرت صديقتي هسه تجي ماتتاخر  حتى ناخذها ويانه هاي محاميه شاطره بلكي تفيدنا

اشر اي خله سلاحه وكعد اشويه عني واني كعدت يم الحايط

غمضت احسبها عدل واعيد بالاحداث عدل من يوم الدخلت بي لبيت غيث واقيس كل حدث وشنو طريقه ثارهم لحد هاي الحظه

للضهر  وحسام كل اشويه يسال وين صارت واني اخدره بگلمه لمن اندكت الباب راح فتحه دخل جود شافني كال صدك تحجين ليش بعدج هنا

--لان الخطفه خالي بس غيث مايصدك

--وانتي شتكدرين اتسوين

--منتظره خبر من غيث حتى اتأكد همه صدك وره الشغله

--اي وتأكدتي شراح يتغير

--شغله كلش بسيطه بتلفون واحد اني وحسام نخلصها

--منو يكول حسام يرضه يعرض روحه للخطر

--مابيها خطر داكلك تنحل بمكالمه واحد واذا صدك يخاف عادي خلي يروح اني وياك 

حسام. افااا فداج النفس  گبل هلي الراح عمي وانتي حرمة خالي عجل المن رايدها الروح

--كفوو لعد خليك مگابل الفون  وشوفلي خالك وين يوصل حتى نتأكد اكثر همه

ضلينه على كعدتنا وجود وحسام مسلحين كلمن كامش فونه ويروح يجي يتصل بغيث بس ماكو اي خبر 

الوقت يمر واحنه ضالين بس نتصفن للعصر اتصل غيث كال موش يمهم

هو يحجي ويه جود واني دخلت جوه اخذت فوني من الشحن  فتحت  صفحتي القديمه دخلت على  سامر شلت الحضر لكيته متصل فرحت اتصلت بسرعه  بدون لاافكر لو يخطر ابالي برامجي مربوطه بجهاز غيث رد سامر نااي  اشذكرج بينه

--هلو سامر شخبارك

--بخير ماطولج بخير وين صفه الدهر اشلونج ويه هذه الساق---- الماخذته

-- انفصلت عنه  ورجعت لبيت اهلي كعدت بي صار فتره

--ليش انفصلتي

--مشكله زغيره بس شفت روحي ماكدر اكمل ويا مليت من عيشته الماوراها بس وجع الكلب والموت

--مشتكيه على ابوي ناي

--راح اتنازل  واسافر وتصلت اگلك حتى لاتضل شايل غل بكلبك عليه

--ليش اتسافرين موتكولين رجعت لبيت اهلي

--ماشفت من العراق شي زين حتى اطفالي  وديتهم لهلهم من غير ابوهم واكع بمشكله احتمال يموت بيها مايرد المهم ضليت بروحي اروح هناك بلكي ارجع ابني حياتي من جديد

--وليش اتصلتي

--ههه ماتصد لواكلك كاعده بالحديقه واتذكرت من شفتك اول مره جاي ويه ابوك واخذتونه مشه الشريط بيه لاول مره اعترفنه واحد للثاني بحبه للسطح والختلات حتى نسولف  لاخر لحضه من بعدنه ابوك

--صح غدرتي بيه واخذتي غيري بس ضل حبج بكلبي

--ماكلك  نسيتك نهائيا بس ماعرف يمكن جربت احبك غيرك وماكدرت اشكد مااحاول  فجأه الكي روحي راجعه اشتاق لذيج الايام

--جذابه

--اي اجذب تدري ليش لان كاعده من كثر الفراغ الي داعيشه والوحده الي اني بيها ماعرف شسوي مالكيت غير اتصل بيك واشكيلك مثل قبل

--كل يوم اصعد للسطح وباوع لمكانه الجنه نگعد بي واذكر اول مره ابوسج بيها

--هههه جانت اتفه شي انسوي مستعجلين نكبر مادرينه الايام الجنه نحسبها حتى يتقدم عمرنه نفسها الراح تبعدنه واتخلينا نحجي مثل الاغراب

--لسه عطرج  بحضني اتمنى ترجع ذيج الايام من جنت ارد من الشغل متلهف حتى اخذج لصدري واشم العطرج

--ماضل عطر ولالهفه راحت ويه وكتها

--لاماراحت واعرفج تحبيني بعدج بس انتي طموحج احلامج اكبر من مستواي تركتيني مولان نسيتيني لا لان عرفتي ماكدر انفذ طلباتج

--يمكن التكوله صح ماادري او يمكن ماريد اعترف لنفسي بهالشي حتى لايرد كلبي ينكسر او ماضل بي مكان للكسر اصلا

--ناي صدك انفصلتي

--تعرف زواجي جان اتفاق واني مليت من هالعيشه بس الجذب والركض اريد ارتاح كافي 

اخذت نفس سكتت اشويه ورديت كلتله حبيت اسلم عليك قبل لااروح والله اعلم نلتقي بعد لولا

--ناي ابيت اهلج هسه

--مم ليش

--اشوكت ترحين

--حجزت الفجر اروح 

--اريد اشوفج لاطلعين جايج

--سامر استوني خلصت من المشاكل مالي خلگ ارد اتمشكل ويه اهلك احنه من البدايه طريقنه مسدود

--ناااي جايج يلا روحي ولاطلعين من البيت مسافه الطريق

سد الفون خليته على كلبي اسفه سامر بس ماعندي حل غيرك

طلعت لجود كلتله سد الباب وانت حسام بيك وگفه ونخوه

--ابشري من هذا الشارب

--اسمع راح يجي واحد من طرفي هسه اراويك صورته اريدك تتلكاه بدايه الشارع وتشوف جاي وحده لو اكو   واحد ويا حتى اتخبرني

--تمام منهو هذا

--الي خطف اركان

--بعزه الله تحجين صدگ

--مثل مااگلك بس احنه وحدنه واخاف ويا واحد  هو جاي بالطريق لازم انكون حذرين حتى ماننفضح بالشارع 

جود. انخبر الشرطه احسن

--مانكدر مامتأكده اله ايد ونوب تفر علينه السالفه تتحول قضيه خطف نروح عشرين سنه بالسجن

--واذا وياهم احد انوب يكتلونه

--يخافون وهذا خنيث محد يعرفه بگدي   ومايجازف  هيج بعز النهار   بالاخص منطقتنا هواي صاير بيها ناس تشتغل بالدوله وهمه مراقبين اصلا جاي بدون لايدرون اهله   بس للامان هم  لازم انكون حذرين

حسام. ام عاشق راح اكضب الطريج اذا اكو احد ويا اخبر اطفرون من البيت واني احميكم بروحي  بس اذا بحده عطيج الامان فجي الباب

--عليها صح تربيتك عوجه و بس يضل دمك نضيف ومخول بالشهامه  افتح جهازك داحولك الصفحه مالته حتى تتاكد من صوره وشكله يله جاي بالطريق تره

سويت سكرين لصفحته وحولتها اله طلع سد الباب جود وباوعلي متخصر ضحكت

--صايره طبقه الاصل من جدت غيث

--من عاشر القوم اربعين يوما

--لاتضحگين علينه من اول دقيقه عرفناج بيها انتي فاقده عقلج

--جود روح منا لاتتاذه

--واتركج وحدج كل عقلج لعد ماعرفتيني لحد الان ولاعرفتي شنو انتي الي

--اختك ومرت صاحبك

--وبنتي الخبله وصديقتي المشاكسه وعدوتي الي تنافسني معزت اخويه عليه

اجه خربط شعري وخله ايده ورا ضهري دخلنه

--اخر شي جنت اتخيله اموت بسبب شيطنتج  بنفس المكان وياج

--امن اجتازينه مرحله الموت من زمان حتى  عزرائيل مل منه وبطل يوصلنا هالكد مادخلنه بمشاكل وطلعنه مثل العارات

--بنتي الفاضج اشوكت تتعدل

--من اترقه واصير قاضيه

--لادخيلج خرب الوضع

--فنگ اول شغله اسويها من اصير قاضيه شنو

--تسجنين شكو رجال بالكره الارضيه وتنطين الحريه لشكول خبله اتمارس شيطنتها بالحياه

باوعتله عصر خدودي وضحگ

دخلنه سديت الباب رحنه يم الدرج حتى الطفره سهله علينه ساعتين واحنه نحجي احلامنا واحد للثاني اتكول جاي انودع نصفن علي روحنه نضحك ونرد نسولف

باوعتله اشوف بعيونه نضره تختلف بيها لمعه على شوگ بيها اسوالف هواي مدفونه 

--هم حبيت بعمرك

عدل كعدته اتجتف وانتجه

--هيج السوال صعب

--لاصعب الكلام بي الحب موكلمه سهله وتنحجي بساطه الحب شي مقدس يدخل بكلب الشخص مثل الايمان لاتكدر تجتازه ولاتغيره

--اشلون يعني

--ماتعرفه منين يجي ولااشوكت يدخل ولااصلا ليش حبيت هالشخص بالتحديد فجأه تلكي روحك ماتكدر تفكر غير بي وكلبك مايدك غير اله

--يعني حبيت

--ماعرف او يمكن فضلت حب الاخوه اكثر لهيج احتفظت بي بداخلي ورفضت اعترف بي

--غسق شنو تعنيلك

--الضحكه والحياة الهادئه نور الجانب المظلم  بفتره قليله كدرت تاخذ حيز بروحي وتحتل عقلي بخفتها وسوالفها البريئه

--اتحبها لولا

--ماگلج اي بس ماشوف حياتي بدونها احسها القطعه التكمل النقص البروحي

--هيه اتحبك

--ادري واني هم  بس اخوج طمامه بهيج مواضيع ماعرف اشلون اعترف ولااشلون اطلب منها نتقرب من بعض ومنتظر من اختي الشاطره توكفلي وتقنعها بطريقتها الخاصه

--ماخليت لاختك طريق تمشي بي

--لعد اختك واختك وقبل لاتطلب تلكيني يمك وينج طلعتي بس تهترين على كولت غيث

--بس نطلع من هالمصيبه روح اطلب واني اجيبها الك لبيتك بس يجود اذا زعلتها بيوم لو سمعتها كلام يجرحه اتخارب وياك وانسى الخوه واول واحده تلكيني واكفه بوجهك

--راح اخليها داخل عيوني وحافظ عليها اكثر من نضري واراقبها مثل الفراشه وهيه تطير ماخلي احد يتعرضلها حتى لا تنخدش او يعيق حريتها

رن فوني شلته لكيت حسام رديت ها يول

--اجة بتكسي صفره بس وحدو

--تمام خليك ورا لاتتحرك لحد ماادخله واخبرك

--اتوكلي يالذيبه لاتخافين  راح تلكيني بضهرج

سديت الفون خليته عالدرج و طلعت وكفت ورا الباب سمعته نزل واجه قبل لايدك الباب فتحتها باوعلي وضحك كسر كلبي فقير وكع بأعمال ابو

سحبت الباب دخل سديته وكف كال مامتغيره بالعكس زايد جمالج

--ادخل سامر

--مبروك كالو صايره محاميه

--الشهاده بالعراق مثل عدمها فوت لاتضل واكف ماكو احد

دخل جوه راد يضل بالحديقه دفعته بشقى للداخل ضحك فرحان دخل للاستقبال كعد استوني اكعد واسمع طفره بالبيت

كمنه ردنه نطلع دخل حسام رافع سلاحه كال جوه

سامر. منو هذا

--فوت يوووول ولانفس

--ناي شكو

--ماكو شي سامر سايره لايكتلك

حسام. ناي حببببل وانت حدر حد الباب ابسرررعه

طلعت تركته يدخله بعالم الرعب حتى اكدر احجي ويا جبت حبل رجعنه اني وجود اخذ الحبل مني

حسام خال السلاح على راسه وجود ربطه كعده

كعدت كدامه

--غدرتي بيه ناي

--لاماغدرت لاتخاف مواني الي اسوي هيج سامر اسألك سؤال جاوب عنه بصدك وروح بدربك

--شكو غير اعرف

--ابوك وين

--ماعرف وداعتج--

بعد مامكمل ودفره حسام كله لاتجيب طاريها على لسانك

--وين خاتل

--ابوي منهزم من الحكومه صار فتره ماندري وينه

--سامر اذا اگلك احميك اجذب عليك بس اكدر اكلك احتمال اكدر اطلعك منا بالسلامه قبل لايجي غيث  بالمقابل اتكول تكول ابوك وين

--ماادري انتي تدرين بي مايكلنا

هزيت راسي  وكمت طلعت ردت اتصل ونفتحت الباب دخل غيث باوعلي وكال لا عبرتي كل المراحل ماخليتي جدامي غير اوكف استعداد واضرب  تحيه للربتج

--غيث ماتأذي

--لافااا اشلون غير هذا الماضي  وصاحب اول دكت گلب لو اول حضن شتكولين بعددددي  من جدامي

--غيث لاتخليني اتندم

--انعل ابو غيث  لابو الجابج عليه لابو اليوم الشافج  بي بعددددددي لابالقران ارميج

دفعني ودخل دخلت ورا شمر سلاحه راحله رفعه  من قمصه
-- كم مره نبهتك وعطيتك فرصه

--والله كالت انفصلت

--انفصلت حلو واني شكلتلك يول

--هاا

--شقندررررت

--حتى لو اندفنت لاتوكف على جنازتها

--عجل عش ماتسمع الجلمه

--وو والله وهيه و

بجه
ماشوف غير غيث صگ على اسنونه وهفه كله كعده مكانه

كمشت  من ايده دفعني دفعه لطمني بالحايط وكال لحسام علگو

--لاغييث اني اترجيته يجي بس حتى يخبرني مكان ابو

طلع فونه وداس دكمه رد صوتي بالمكالمه رفع حاجبه

--اتبلعمت

شمر الفون كمشني من شعري شمرني بزاويه الغرفه وطلع ردت اكوم رجعني حسام كال لاتتحركين

--ولك يكتتتله ويروح بيهاااا

--صوتج يولييي

جود. ناي لاتدخلين هو يعرف شغله ويا

دخل غيث بيده صونده وكلبيه امي شمر الصونده شك الكلبيه راح يمه زحف سامر كمشه كله وينو

--و

--لاتحلف يول كول وينو والك چلمه احررك

--ماادي اسال ناي هيه جانت عايشه ويانا وتدري باابوي مايكلنا على شي

--اخر مره اسالك

--ماعرف وراس ابوي وداعت عافيه امي

هز راسه كعد نص كعده جره من راسه دخل قطعه اقماش بحلكه لمن خنگه ولف الباقي كتمه

كام سحب الصونده طبكها اول ضربه غمضت لميت روحي

سديت اذاناتي واني اسمع الضرب ونت سامر كل ضربه يشيل جلده بيها

فتحت عيوني لكيته يتمرغل بالكاع وغيث مستلمه بدون رحمه يضرب

ماتحملت منظره اخذ كلبي كمت ركضت كمشته اندارلي يباوعلي بحرگه

--فدوه اروحلك راح يموت مايعرف لويدري جان كال

--خايفه عليه يولي

--لا بس حرام يموت ماله ذنب

--حسسسسام

--غييث اذا ماعفته اني اشتكي عليك واكلهم كتله حتى المكالمات مسجله

وكف حگ خشمه باوعلي خفت من نظرته رجعت ليورا

كمشني من شعري سحلني بره شمرني كال روحي اشتكي قبل لايجي دورج

سد الباب وصوت جود كله  لاتتخبل

--جود بعد لاخليك يمو

--يخووي شبيك تخبلت مهما يكول مره وكلبها ضعيف ماتتحمل هيج منظر وهذا راح يموت ليش اتشيل ذنبه

--ههه هسه اثبتلك اشلون مايعرف وذيج خليها تختفي وترحم روحها

مااسمع غير صوت صلخه الصونده ردت

كعدت لميت رجليه ابجي اتندمت اشلون سويت هيج ربع ساعه وعلى نفس الصوت لمن كال حسسسام ابلايس

جود. لاغيث لاهنا اني اوكف بوجهك

--انكتم وانت ويننننك

طلع حسام يركض لميت روحي رجعت يم الحايط خايفه مو غيث اتحول  حيوان بدون رحمه

دخل حسام بيده بلايس اخذها وسد الباب

كمت ردت ادخل خفت خليت اذني عالباب  غمضت واني اسمع صوت صرخته المكتومه احسه دخلت بگلبي شلعته من مكانه

فتحت الباب ردت احجي لكيته يفتح بالثام
كعدت كوه يسحب النفس ماسيطر يكعد وكع

--وين ابوك

--ماا اعر ف

--حلو حسسسام شوف شغلك

--لااا لا اكو م مكان ينضم بي

--وينو

--بال----

--اركان بعده عايش لوجتلتو

بجه وباوع لغيث بترجي

--احجيييي يول

--مالي شغل اني والله ---

***لحن***.

وصلنا لبيت عمي نزلت عمتي قبلي اخذت الجهال شلت هيا ونزلت وراها دخلنه اتلكتنا ام اركان كالت ارتاحتي ريحتي ابنييي

ام غيث. وهيه شدخلها بعدي من جدامي

--عجل شوداه غادي ولخاطر ابوي سكن بغداد

-- بس لمي حلگج النكس وهو بخير بعدي عن طريجي

--اني بيتي نضيف يتعذر دخلتج

هيه تحجي ودخل عمي ابو اركان صاح صوت بعمتي من يمي انغلست

ام غيث. اتركها يخوي حگها ابنيها الوحيد كلنا فاگدين ونعرف لوعة الگلب

--فوتي خويه لاهيه تسودنت من زمان بس خلي احصل خبر لاركان واني اعرف اشلون اردها لعگلها

دخلنا بغرفه بيبي لكيتها كاعده بالكاع فاتحه شيلتها شالت راسها شافتني نزلت دموعها حجت بصوت مبحوح راح زلمتج ييمه راح  وكلبو مجسور وراج

ركضت لحضنها شبكتني وبجت بحرگه گلب
--راح هيبتي  راح الماتهنه بيوم اني ضلمتو يجده اني  السمعتهم يشرطون وسكتت اني والوجعت  كلبو بفراكج

--لابيبي لاتكولين هيج فدوه بلكي عايش

--ولج كلبي موجر من امده كلبي واني ادحگو بليل يفتر مثل المسودن يدور ذكراج بكل مجان وساكته

--هو كال مااتركج

--عجل وينو عش هيج كلبي ماچلني عليه

ام غيث. كولي يالله عمه انخي عم الساده مايرد طالب

وخرتني عنها فتحت شيلتها وصاحت دخيلك يابووو فاضل اول مره انخاك  لاتردنييي اريد اوليدي منك تردو لحضن حرمتو

صرخت هيا  مسحت ادموعي اخذتها وكمت طلعت بره اسكت بيها لكيتهن كلهن مجموعات كاعدات بالفصحه مال البيت

رنو واكفه على جهه متبهذله مونفس ترتيبها مبين ام اركان ساحلتها باوعتلي عفست وجهه  كالت ها وجه الفكر كمعتي الزلمه

--اسم الله على كلبه من عمري على عمره

--انتي بس بعدي وهو ماعليه شحلاتنا وانتي ماكو طاير بخالتي ليل نهار ساكن غرفتها مامصدگ افتك من جهرتج

سهيله. بومه على كلبنا مانخلص شردج متكليلي

--لاتخافين خاله بس يرد يطردها هذا خالي غيث ردها بس اليوم ماعندو مجان لجدتي وتردين هيه حالها حال اللقيطه لااهل ولاعزوه اجت وياها

--بشرتيها لو ابشرها اني

--ههههه لاخليها لاتنصدم وطگج بعين تعرفين عينها تفلج الصخر تالي يروح جاهلج خلو يجي بالسلامه وعزميها بطهرو

ام اركان. روحي خشي يم عمتج دخيل ربي عبنهن نفس الخياس اشلون التمن وصارن حبايب

سهيله. عطينا مجال ابوي كال بس نصفي مشاكلنا ويه اخوتها ندفن عارنا

--من حلگج لباب السما كون هيج ويجسر عيونهن الگويه ونخلص منهن

--هو ضل بس غيث ان شاء الله يطلگ العرمه وناخذ جهالنا وهم يجوز يلحكو ورا اركان ياخذو مايخلو عايش

تركتهن يحجن رجعت لغرفه بيبي كعدت مابيه حتى اسمع مواريد

للضهر وماكو اي خبر حتى الغده الجابو محد اكل غير الجهال حسيت راسي افتر كمشته سحبتني عمتي ام غيث خلته بحضنها وغطتني بعباتها كالت لاتخافين يعمه يرد وعلي

--ان شاء الله عمه فدوه اندعي والله كلبي خلص ماكدر حتى اندعي

ام اركان. شبيها عش وجهه اصفر ودايخه

ردت احجي عصرت ايدي عمتي كالتها خيه صخنت وراها بيوم كضبها النزف وصار اسبوع على هاي الحاله

--عجل ماتاخذوها للمستشفى هيه موش رحمها تعبان اشيلو عش هيج ضاله كل فتره تتكاون ويه الموت

--اي هو عالاساس هالاسبوع عمليتها بس صارت هالسالفه

--اخذها لهاي المستشفى العصر ندخلها على حسابنا احنه مصايبنه ماتخلص خو موش انخليها تموت

--اردها لامها وتعملها الها اني مااحمل خطيتها

--وهيه وينها امها اشو مسودنه ماتعرف منهو هنه ولا الله وين زاتهن

--خافي الله بس غاب ابنج اشويه تخبلتي شحال هيه ذبحو وحيدها جدام عينها الله يساعد كلبها 

--عجل ذبحو من اشويه موش نغل وماعندو دين مثل ابو من تزوج بدون لايغير دينو وبزر كلهم نغوله

---استغفر الله ربي صبرك يارب

--الحمد الله ابني صحى اخر وكتو وطلگ بتهم ماتورط بجاهل منها جان فضيحتنا ماتتسولف

غمضت ماكدرلها ولاعندي طاقه اتجادل  كلبي يم اركان لساني مابي غير الدعاء

من الدوخه والتفكير احس الدنيا تفتر والدنيا صارت سوده خليت ايدي على رجل بيبي باوعتلي وسحبت راسي خلته بحضنها وضلت تمشي ايدها وتقره عليه

اليل مانايمته وتعب  واني بهيج اوقات اشرد بالنوم حتى اخلص من الواقع  غمضت رحت بالنوم ماكعدت غير على صوت فوني يرن فتحت عيوني

بيبي على كعدتها منتجيه وايدها على راسي وعمتي ام غيث  ماخذه الجهال ورايحه للمزرعه

كمت شلت الفون  غسق تتصل رديت اجاني صوتها كالت ها ولج اشلونج

--زينه  صاير شي

--لابس امج دتسال عنج اشلونج

--زينه كليلها خلي تندعيله يرجعلي

--ربي يرجعه سالم ويجمعكم من جديد والله مايستاهل اركان خوش ولد

شهكت
--والله اتندمت كلمااتذكر اشلون جان يتوسل ويترجاني واني اصده اكال بروحي ندم

--انتي هم حقج لعد شعرفج هيج راح يصير صدك ناي ضلت هناك ماقبلت تجي ويانا

--يمه انوب اختي ليش ضلت

--يمها غيث ماعليها كلبنا يمج اخاف عيالج يأذوج

--لاكاعده يم بيبي  يخافن يتقربن

--لحن مهما حجن لاتردين اخاف يوصل خبر الكم دخلي بالغرفه وسدي الباب لان احتمال خالج الخاطف اركان

--عزه بعينه ليش

--ينتقم من غيث وناي لحن مااوصيج اول مايعرفون دخلي الغرفه وقفليها تره بحجه خالج يسون عاهه مستديمه بيج

باوعت لعمتي ام اركان كدامي اتبلعمت خفت عرف بسرعه سلمت ونهيت المكالمه كالت شكوو منهو هذا التسالين عنو عش عمل هيج

--ابو الاسواق اليمنا ماخذ من ماما افلوس ومايرضه يرد الباقي خال ماما اتشوط

--شاطت عليه العافيه كولي امين

دخلت هناء سلمت كامت سماهر كالتها شكو جايه

--والله بيت عمي ادخل واطلع بكيفي ماتكدرين تحجين نص جلمه

--عساها بختج وبعافيتج عساج مارتاحيتي ولاشفتي الخير حوبت اخوي تلاحگج ليوم الدين

--عش يمه شمالو اخوج 

--كل العملتي وتگولين شمالو سوده عليه ماطلع من غرفتو من يوم عملتج الناگصه

--ماكو ناگص غيرو الي يحب اخت مرتو ويتمعشگ من وراها

--عجل ماتركتي وليتي عش حرمتيها عليه خليتي لاطايل لاسما ولاكاع وانوب حتى حلالو لهفتي ورحتى عرستي بالحرام

--وعش بالحرام حلال بعقد سيد واركان وغيث سندوني ربي يحميهم الي ماگصرو عطوني لزلمه صدرو يسد عين الشمس عوضني عن كل الشفتو وياكم

--عساج ماتهنيتي ودمعت اخوي لاحكتج ليوم الدين

--والله ماريد اصدمج بس عايشه بخير اخوج ويه زلمتي بسبع سعادات ودافتح روضه اباقي الفلوس تعويض عن الخذيتو من عمري

دخلت وسهيله عضت ايدها بحرگه كعدتها عمتي ام اركان كالتها فرخج

هناء.  هههههههههه ضحكتوني واني ضايجه خليها تبدل كلبيتها تاتكمل جذبتها عدل

اجت سلمت على بيبي  واجت يمي كعدت كالت اشلونج

--الحمد الله

--حياتكم اشلونها بغداد

--ماشيه ماعدنه شي مرتاحين بيت بابا ناي بشغلها واحنه بالبيت

رنو. عش ناي مابطلت شغلها

--لابالعكس راح اتكمل دراسه حتى منصبها يكبر

سهيله.  الحمد الله غيث عگل وماعقدها محكمه تاياخذ الجهال براحتو

هناء.  ترگج من ناي صدك السمعتو

سهيله.  شنهو خير جثير الحجي

--حسام مامكرب لحرمتو وكل يوم يتهدد يريد يطلگ

--لاجذب ماكو هيج حجي

--عجل صدك من كالو هيه موش بت ولهيج يريد يردها

رنو. اكص لسان اليكول عني هيج لاهو موش زلمه وماكربلي

سهيله.  انتي ولاجلمه انكتمي ابني موش زلمه لو انتي الجنج. زلمه تكش روحو منج

--فاقده الانوثه ولاالكرامه اقلها محترمه نفسي مااروح للغرفه بتوالي اليل ابوس رجلين بس حتى يرضه يخليني انام حدر رجلي  وهو يتفل بوجهي ويطلعني بره

--انجبييي وكضبي لسانج لاابترو الج تربيت عواهر

--هسه صارت عاهره امي من رحتي تبجين وتكليلها دبريني وخليتها تحجزلج ودزج بسكوت على اركان ويانا للشمال جانت خوش بس حيييل من ماعبرج ولادحگ بجهرتج

--بالقران يرد ابني اخلي يسحل بيج الكيعان وطلاك ماراح تشوفي بعينج اذا ماذليتج وسحكت جهامتج ماتسمى عالحريم

--تخسين انتي وابنج موش اني الي ينداس راسي

كامت سهيله جرتها وطلعت بره وصار المصايح والكتل بينهن اباوع لبيبي منتجيه سبحتها بيدها وتباوعلهن بستهزاء اكثر من ربع ساعه لمن وحده ملخت شعر الثانيه اشرلتي بيبي عالعصه

جريتها اخليتها كدامها كامت هناء كمشتها ساعدتها كامت طلعت بره  مااسمع غير الضرب وصوت دخيلج جده

ردت اكوم دخلت هنا تركض كمشتني كالت كعدي

--عزه راح تموتهن

--يطبهن اطويحيل دحگي من بعيد اشلون اطگ بيهن وهنه حدر رجليها  مثل الهوش الي تتجرء وترد عليها  بجلمه وحده منها تطلگ مثل ماالله واحد

اباوع صدك بيبي كامشه العوده وتضرب من غير وجع كلب وام اركان ادافع

هناء.هسه عرفتي بي مضلوم وماخانج

--لوماعارفه احسن احترك كلبي اكثر

--سوده عليه التمو عليه ولاخلو يرتاح تخبلو اتكول اول واحد ياخذ غريبه

--تدرين البارحه للصبح يتوسل بيه ارجعله

--اووف خيه كافي وجعتي كلبي خيه همه ولدنا مامحضوضين گبلو شاهين هم هيج راح وهو كلبو ملجوم

دخلت بيبي تنفت كامت هناء كمشتها كعدتها  جابت المي شربتها خلت المخده انتجت  كالتها ندهيلي عمج ابو اركان

--ماهو جده طلع ويه الزلم من دخلت

--هينه ياام اركان اذا ماخليتو يسحك فجج

دخلت شايطه صاحت عشش يابه يسحگ فجي لان دافعت عن جنايني

--انجعلج بالمرض بس حكج حصلتي مجال وكمتي تهترين براحتج هينه يمه ماضل جثير

--والله هذا الحجي يمج اني هذا بيتي كافي حامله ضلمج انوب احمل خطارج عجل اشوكت ارتاح ويصيرلي مجان خاص جننت وبعدني تعاملوني جنه

--هذا الحجي الزين والج ماطلبتي

--مارايده شي بس هاي هيه وعمتها ماتخش بيتي بعد وحربم ولدي مالج دخل بيهن ويرد اركان واخليلو حد رضاتي مقابل طردت هاي وهالمره موش حجي اخلي كلام الله جدامو واحلف بي اطلع من البيت واغضب عليه ليوم الدين لو يطرد هاي ويحسب سهيله حرمه

-- هزت راسها اي واشرت لهناء

-- على شنهو اتأشرين تاتخابر ويجون يطگونه  بسج خراب رجليج خطن الكبر مره مطالبج  الموت اشوكت تركدين وتهجعين

اباوع لبيبي ولاحجت على كعدتها اتباوع وتبتسم بمكر مثل نضرت غيث بشيطنه  احسها فاتحه المجال حتى ذيج اطلع كل الجواها  وام اركان صدك  مستمر ادعي وتحجي ماخلت شي

وهناء من جهه اتراسل احد وكوه كامشه ضحكتها خلصت شالت راسها ابتسمت لبيبي وبيبي اشرت عفيه

دخلت عمتي ام غيث عكدت حاجبها اشرت شكو

--ماكو سلامتج بس الخراب من جوه راسج انتي وابنج ماخذ خيرنا كلنا بحضنو

--بالعافيه عليه وعلى حرمتو

--كونه بالمرض مادحگ الخير

--من زيجج لريجج تندار ماتعبر وتخش ماتطع وتلف بالجفن خناگه

--دعين عليه يالمهزمه بس هيه حظ صنه زلمنا اسنين نخدم ومحد راضي تاليت عمرنه مثل شكولجن يجن يخربن تعبنا

--اووف يمه يلحن ربج دحگ بحالج وخلصج منها

--انجعل يخلصني منها الجفن

ضحكت واجت كعدت يمي همست وين جهال ناي

--طكيتهم ونيمتهم اجباري بغرفتج كومي يمهم لاتخش وحده تأذيهم عندي حجي ويه جدتج

كمت  طلعت تركت وعمتي  ام اركان تتهدد بس يرد عمي يخلي حد الهن

صعدت لغرفتي فتحت بابها واجاني عطر اركان اخذ كلبي صارت دشداشته كدامي معلكه نزلت دموعي دخلت سديت الباب

رحت يمها كمشتها اخذتها لحضني بستها هيج انطاك كلبك تتركني وراك بس ارجعلي واحلفلك راح اعتذر منك وبعد مااوجع كلبك

كعدت عالجربايه مشيت ايدي على مخدته انفتحت الباب دخلت هناء كالت بس لاتفاولين

--هم يرد الي واعوضه عالسويته بي

--كولي ان شاء الله واذا الله كاتبله مايرد ماتوكف الدنيا ورا راح اتمر الايام ويصير ذكرى

--لادخيلج لاتحجين هيج ولج اموت

--اليشوفج هسه مايكول انتي نفسج گاضبه  السجينه واكفه تردي يطلگج

--ماعرف اشلون وكتها جنت امر بس اسودت الدنيا كدامي

--لعبنها صح بس ربج ردها بيهن بهذلهن حييل بيهن سوده عليه اشلون وكفلي وكفه بيوم زواجي

--صدك اشوكت اتزوجتي ومنين اتعرفتي عليه

--ماعرفو غيث جابو يصير اخو رفيجو ناس فقره بس اوادم متوسط مرته متوفيه وعندو طفل واحد حجه وياي قبل لايرد اركان من السفر يومين وراواني صورتو وحجالي ضروفو

--وعمامي ميدرون

--لاوره العقد كاللهم صح زعلو بعدين سكتو من وكف عمي ابو اركان وياي كال حكها عامر موش زلمه

--وعامر اشسوه

--انجن اتخبل بالبدايه لباله بس عقد راد يطلكني بس من عرف دخل بيه اهنا انجن رسمي بعد مايعرف شيعمل خش غرفتو ومن يومها ماطالع

--وسجى

--هههههه افترت  من بيت لبيت محد تستقبلها من خواتي يخافن على زلمهن منها ردت لبيت عمي تخدم جوه رجلين بناتي الكبار  حالها حال الخدم

--يعني بناتج ضلن

--عمي انطاني الزغار وضلن الاكبار يمهم ذنيج نسوان مايرضن يجن بس استلمن سجى كلما يشتاقلي يسحلنها يطلعن ضيمهن بيها

--مرتاحه ويه هذا لوبعدج اتحبين عامر

--اجذب عليج اذا اكلج نسيته لعامر بس من اذكر اشلون جان يطلع من غرفت اختي سابح كدامي وهيه ورا بملابس النوم اتمنى اكدر اسوي اكثر من السويته

--ضل بلااملاك كلها خذتيها منه

--اي وسجلت مزرعته بأسم رجلي الجديد خليته ينجلط ورجلي بدل مافلاح صار صاحب املاك براس الزواج

--ماجنت اعرف بيج هيج قويه

--خيه ياقويه كلو اسوالف غيث اني لاهش ولانش واركان سندني غيث يعطي الاوامر واركان بلمح البصر يحول الاملاك من اسم عامر لاسمي

--اذا عرفن شراح يسون بيج

--ههههه ام اركان هسه بدعه حركت ورقتها خلي اتخلص روحها والباگي مامطولات التتجاوز ينبتر لسانها لالبالج بدعه هينه رب الگضبت كل هذا ومسيطره واكفه بهيبتها ماتكدر ادوس فج ذني الخايسات

--صدك المن خبرتي  من اشرتلج بيبي شسويتي ولج

--انطري لاتستعجلين تاتعرفين الي يطاول على بدعه اشلون ينسحگ راسو

هيه تحجي واجه عطرها يمي  كوه كاعده مسيطره صار العصر واحنه بعدنه كاعدين هيه تحجي واني عيني بغراض اركان كدامي عالميز لهفانه اتمنه اكوم احضن شي شي وابوسه

كامت اتريد اتعدل نومت هيا  اجه عطرها بخشمي  كلبت معدتي كمت للحمام غسلت وجهي اريد اخذ النفس ماكدرت لمن كلبت معدتي

احس روحي تطلع كوه وكفت غسلت وجهي اخذت اشويه اتنفست سحبت المنشفه مالته مسحت وجهي وشتميت عطره

طلعت لكيت هناء واكفه تباوعلي وتضحك

--شبيج

--صار اشكد ولج فايتتلج

--ليش ماعرف

-- ربي شهالفهاوه حتى هاي ماضابطتها شو تعالي كعدي لشوف

رحت كعدت مامفتهمه شتحجي فتحت عيني جرتها ليجوه وكالت صلوات ولج حبله انتي

خليت ايدي على كلبي باوعتلها مامصدكه

--ولج خيه علاماتها واضحه اشلون ماتعرفين نفسج

--الله عليج صدك حامل

--ههههه ربي بجاهك بكد طيبت كلبها وفطاريتها ترزقها وتترس حضنها - بالمبارك عليج  خيه

شهكت 

--هههه عش تبجين

--راح يصير عدنه طفل

بعدني احجي

واسمع صوت صرخت ام اركان رجت البيت ----

لاتنسون التصويت ♥️