لبوة على شفا الثار

بارت الرابع والخمسون

لبوة على شفا الثأر

بقلمي:leo lAfatlawi

Ins:le_m3r

بارت الرابع والخمسون

بارتين سوه♥️

اصبحت لاادري هل اغيب عنك ام ابقى معك؟

اذا بقيت زاد همي"

واذا ابتعدت زاد اشتياقي"

***لحن ***

كمت وكفت واني اشوف اركان دخل ودفع حسام كدامه حيل

اجه يوكع كوه عدل وكفته ركضت سهيله كمشته كالت شصايرعش اطكو

ابو غيث. لانو هتر وناگص تربيه سود وجوهنا جدام العالم

--عش شعمل ابنيي

--تركج من الصار خلج بالخميس اتهيري دخلتو على حرمتو

--يمه سودن بوجهي عقدتوها لابنيييي

سماهر. شنو بنتي تاخذ هذا الهتر المابي خير لويموت ماعطي

ابوغيث. نص جلمه اذا سمعت منج ادفنج انتي وبنتج رحنه وطلبناها من الاوادم وهمه كدرونه وعطونه جبتها تااتجهزيها موش ناخذ رايج

حسام. جدي ماخذها

--وعش يجدي شبيها ماتاخذها

--خاف ربك جنها حصان شرطه هم حرمه هاي

--انجب انعل ابو شاربك ناگص تربيه البت صارت بأسمك تاخذها غصبا عنك

--ماخذها وراح اطلكها وانهزم واذا بيكم زلمه يطلع بوجهي

اباوع لاركان طبك رداناته واجه يمه قبل لايلحك حتى يحجي فتح اديه اثنينهن وظربهن من الكترين على وجهه

دفع اركان ورجع ليورا

جره من ياخته ضربه راجدي من يمي طك راسي من قوة الضربه

كعده بمكانه دنك عليه كله طرني يول مو لازلمه

--عمي والله

--من انعل عمك على ابو تربيتك تعال يول تاعلمك اشلون تحجي

كومه من ياخته ورگعه راجدي اقوى من القبله

بعد يردون يلحكون عليه مايكدرو وستلمه دفرات وراجديات

عمي يجر بجهه وسهيله تطلم عمتي تبوس بمتنه يجرو يدفعهم ورد كل دفره اكول هسه يموت ماتركه لمن اتقيأ ونام على وجهه كاطع النفس

سحبه عمي ابو اركان كله يكفي تركو

سماهر. حرام عليكم تنطون بتي لنص زلمه عن نفسو ماكدر يدافع اشلون يدافع عنها

اركان. بالقران اذا مابطلتي تهترين انسى عمرج وحطج بصفو اعلمج اصول الدين

--اطكني يااركان

--واسحك راسج تنكتمين وتحترمين نفسج طلبتينا ومارديناج رحنه للعالم دكينه صدرنا وجبناها من نص بيتهم

--وتزوجها لهذا

--لااعقدها ل ابوي عجل المن ناخذها

--وانت تاخذ بت الشوارع وبتي تعطيها لزعطوط مايعرف حتى يحجي

--وزني جلمتج يبت عمي لوماحاسب حساب لغيث جان كضبت لسانج وبترتو

رنو. بس اني ماريدتو ابوس ايدك لخاطر خالي لاتزوجوني الو

--ولانفس انتي عجل من رضيتي غادي شنهو جان براسج

--مالبالي الو كالو جاين بيت جدج طالبيج لابنهم دخيلك اركان طلكني ماريد اتزوج

--فات وكتو هالحجي صرتي بأسمو حمدي ربج على قسمتج

سهيله. واني هم مارايدتها من گلت بنات السلف اخذ عرمه وبلا اخلاق وشكل

هيه تحجي واركان جرها من شالها كومها من يم ابنها كالها شحجيت اني

--خاف ربك البت جبيره حرمتك ازغر منها

--سهييييله

--ماخذه بت سماهر هيه امها اشلونها انوب ه--

مالحكت تكمل خنكها كامت تضرب بي اتريد اتجر النفس صارت زركه وهو يضغط لمن عمي راكض جره من قميصه هم ماتركها بحرگه سريعه اختل توازنها انسطرت ابصف ابنها

دفعه عمي من صدره كله كافي يبه شبلاك وكعت طراكات بيهم

--الحرمه المايله مايعدلها غير الطگ

وانتن دحكن يولي والخلق السماوات الي اسمع معترضه لو حاولت وحده بس تعلب بذيلها ادفنها بصف اخيتي واحسب الله ماخلقها واني كد كلمتي

ابو اركان. هاي هيه يبه محد يحجي بس اهدء واتهيرو للخميس انزف

--بلغ الشباب وعطي افلوس لجراج يجيب غرفه وانتي يمه اي شي تعتازي خبري الولد يجيبو واخذ البت جهزيها

ام اركان. تامر يبعد امك ياغرفه جهزها الو

--الجوه هسه اخبر الولد يصبغوها

--هاي هيه خلي افرغها من السكراب ساعه وتكون جاهزه روح جدتك طالبتكم

راحو عمامي وهو فتح ارداناته وشال سلاحه راح وراهم دخل

وسماهر حضنت بيتها وتبجي وياها يباوعن لحسام بقرف

وسهيله وعمتي كومن حسام اخذنه لغرفه ريحانه يبجي مثل الطفل

كوه كتمت ضحكتي وينج ناي تجين اتشوفين المهزله

ضاعت ضحكتي بطلعه اركان وهو يباوعلي بعدم رضه كال صعدي حضريلي الحمام

ماصدكت صعدت اركض قبل لايبدل رايه ويدمجني وياهم

دخلت للغرفه ذبيت شالي فتحت الكنتور طلعت ملابسه دخل وراي شمر سلاحه والفون وكف يفتح بالدكم

هو يباوعلي واني خانسه صافنه بوجهه اراجع يومي اخاف مسويتلي مكسوره

سميت بسم الله اخذت المنشفه ورحت عبرت من يمه كمشني انداريت كتله والله كلشي ماسويت

--متاكده

--حتى الاماعين غسلتها مرتين

--مرتين؟

-- اذا عندك خطار جيبهم جنت اجذب الصبح من كلتلك لا اصلا اتشاقه

رفع حاجبه

-- اسال عمه اليوم ماطلع صوتي ابد وحجابي مانزعته حتى سهيله تحارشت بيه مارديت كلتلها احترما لاركان

باوعلي مامصدگ ضميت وجهي بسرعه

مد ايده وخر شعري كال شبلاج يولي اكو واحد معنفج قبل

--هئ

--بعدي اديج شنهو هالمكياج الي بوجهج

--لاماخليت من منعتني هذا وجهي من تحتر الدنيا هيج يصير

--ماطولج هيج واثقه بعدي اديج

وخرت اديه عصر خدودي بيده ودنگ يتفحص زغر عيوني

برطمت عصر وجهي كال كم مره حذرتج

--اخر مره بعد مااخلي وعد

--الف وعد سمعت من جبتج لحد الان

--والله رجعني ماسمع حچايه

--عش اردج واكو طريقه اتوبج بيها

--وجهييي اركان راح ينشلع

--شيلي اديج لاجسرهن

--اخر مره فدوه اذا عدتها اشلع راسي اركان خدودي راح يطگن

خفف الضغط لبالي راح يتركني دنك خله راسه بركبتي ردت ادفعه همس ورب العباد ازتج من الشباج

--ركبتيي موهيج اركان اشبيك

مارد زاد اكثر عناد حسته يملخ بيها مو يبوس كامت تحركني شهكت

وخر راسه وكف يباوعلها ويمسح بيها على كيفه

--تاتتعلمين اشلون دفعيني

--والله دتأذيني اركان اني موكدك

--عجل انضبي ولاتعاندين

--تره دتجبرني واني اكره هالشي

-- وانتي منهو سال عنج ان رضيتي لولا

درت وجهي ردت اروح سحبني اله كال وين يولي

--والله تعبانننه

--دخيل رب الفهاوه

بجيت عرفت روحي ماراح اخلص وصدگ عصر وجهي دنگ اخذ شفتي

ابكد مااحبه بكد مامضوجني بهاي تصرفاته لايعرف تعب شنو ولاعنده ساعه معينه بكل وقت رايدني اجباري او برضاتي

نايمه على ايده احرگ باصبعي على صدره وندكت وصوت امه تصيح لحننن

باوعتله اشر شكو

--طلگني

--هههههه شكو

--ارحموني راح اموت تهدني انت تستلمني امك تخلص امك يجي اليل تتولاني انت وين اروح

--ثبتي واني اگلج

--يما لحكيني

ضحك دنگ باسني و سحب ايده غطاني وكام
راح فتحه اسمع امه اتكله وين حرمتك يمه

--نايمه

--كعدها خلي تنزل تنظف البيت

--تعبانه هسه اخبر حريم الفلح تجي مجانها

--ياع ومن شنهو تعبانه

--صوتج بويييه صدك تحجين

--اخذلك اطراك من امك يالذيب والله شمااشوف بگيت بطرگ الاسم

--استغفر الله ربي روحي يمه الله يهديج

--مسودنه ويهديني اركان شبلاك يمه تحدر تحت تتكاون حتى ويه الهوا وطگ الجبير قبل الزغير انت تصعد فوگ تصير جنك جاهل تتراجف منها

--اشلون اطلابه هاي يمه جيبيها من الاخير

--تنزل تنظف الغرفه الجوه وهسه

--ماتنزل

--تكسر جلمتي يأاركان

--ماعاش اليجسر جلمتج ياام اركان بس خفي عالبت اشوي

--شتقصدك

--ماقصد بس جان لعبتنها بذكاء اكثر دازتني هداد جدام العالم تاتلبسين براسي البت عييب واني تربات بدعه

--اني مالي دخل هاي سماهر وسهيله

--هههه وهاي لبستنها سوه بالمبارك عليجن

ماسمعت صوتها بس نزلت الدرج وصوت ضحكته وراها

دخل اخذ قميصه طلع سد الباب اني هم ماصدكت من صدك تعبانه اول ما غمضت غفيت

ماكعدت غير نفس بركبتي فتحت عيوني اباوع الساعه ٣باليل

وخرت راسي لكيته ذاب روحه مبين تعبان شعره نازل على عيونه يشخر ماحاس على نفسه

وخرت ايده عن خصري كمت على كيفي لايگعد شلت ملابسي من الكاع اخذت منشفه رحت للحمام سبحت عالسريع لفيت روحي بالمنشفه طلعت وهو ولاحس على نومته مامتحرك

طلعت ملابس من الكنتور لبست وكفت مشطت شعري ضفرته

رجعت لفراشي كعدت عالجربايه شبعانه نوم

اخذت الفون كلبت بي اتعده الوقت والنعسه ماكو مليت من الكعده

شمرت الفون ادنيت يمه خليت راسي على مخدته مشيت اصابيعي على تحديد لحيته
كمش ايدي فتح عيونه كوه باوعلي بنعس باسها ودار وجهه غمض

جريت شعره همس بطلي يولي

--كوم ضايجه وحدي

--نامي بنيتي وروح اخوي تعبان

--صار هواي نايم كوم اركان فدوه

مارد انطاني ضهره اتجتف ونام

--عرفتك بعد ماتحبني والله اركان كوم رجعني لماما

--استغفر الله هرمونات نص اليل

--لاطلعلك سالفه ثانيه كول مليت بعد موبحالج اتورطت اگلك اي

انكلب باوعلي واني عوزي ابجي مسح وجهه

--يعني اذا انطمرت لان منعول ابو صفحتي من التعب اطلع ماحبج

--اي متحبني من اتزوجنا جنت تضل للصبح كاعد تباوعلي متنام حتى لوجنت تعبان بس هسه شعبت

--يولي بالقران من الصبح لقبل ساعتين اني على فد وكفه رجليه صارن خيوط من التعب شتلغثين انتي

--نام اسفه ازعجتك واذا مضايقك وجودي عادي انزل يم بيبي كول تره عادي بعد ماضوج

غمض بيأس

نمت درت وجهي وغطيت حتى راسي اسمعه اتحسر

ادنه وخر الغطه باسني من ركبتي وخله راسه على راسي همس اني زمال ابن زمال من جبت وحده مجانج تشتغل وخليتج تشبعين نوم

-- هاي كلها لان كلتلك كوم ضايجه

--انعلج ابو الضوجه كومي يولي نحدر جوه بالمزرعه

--موكلتلك بطلت اتحبني اركاااان وخرررر

--يولي المزرعه شدخلها بالصخام

--اتريد حجه تكتلني تنزلني المزرعة حتى يشوفني واحد وانت تستلمني طراكات

--يبه اكو حيوان گايلج عليه مكرن كومي يولي العالم مطموره ماكو زمال صاحي غيري

نداريت اباوعله عصر وجهي ضحگ كال على ماتعقلين تنعلين ابو اصلي يلا كومي

--لا ارجع نام خطيه تعبان

--خليتي بيها نومه كومي يبه اني هم ضايج خلي ادخنلي جكاره جوه بلكي لنه الله هاديج وتنعسين

كمت لبست الترواكه مال التراك و الشال بين مالبس ملابسه خله الفروه على متونه ردت اطلع كال وين يولي شهالبس

--ماكو احد وتراك مستور

--ميخالف طلع احد اشلون وانتي بهالشكل ونوب بارده يولي تتمرضين

--لاموبارده ومابيه حيل ابدل فدوه اركان والله حتى ظلمه محد يشوف

نزع الفروه مالته لفني بيها
--ولو الراح يلكفنه يكول مخابيل بس امرنا الله

--وانت شتلبس

--ماريد البس بس فضيني وكون البخت يكمل وتكضبنا امي اكعد وزن

--هههههههه هسه اتكلك ضليت بس اسم

--اندارلج فدوه ونذر جعل محد يضحك غيرج مشي يولي كبل لارد بجلمتي

ركضت للباب فتحته وطلعت ماعنده مانع يرجعني للحمام اسبح

ضحك وطلع وراي سحبني خله ايده وره ضهري نزلنه عالكيف

طلعنه بره نمشي بالمزرعه الجو حلو بارد و الزرع اخضر رحنه يم البحيره

كعد واني رحت يم المي منظره يخبل صافي كعدت مديت ايدي احرك بالمي

انداريت لكيته خال راسه بين اديه كوه فاتح عيونه كسر خاطري كمت رحت يمه

--كوم دنرجع

كمش ايدي كعدني اخذني لحضنه باس راسي --طارت النومه

--جذاب

--يولي لسانج عش اتخليني اعضو واتوبج من التجاوز

--لعد شوف عيونك كوه تفتحهن ضوجتك مو

--حتى وانتي مضوجتني هم احبج بكل حالاتج اعشگج

--بعدك اتحبني مثل الاول

-- شكو حب انخلق بالكون مايجي ذره بلي احملو الج كل ثانيه ينزرعلج عشگ بكلبي اكبر من الگبلو

مد ايده سدها حيل ضهرت شراينه كال دحكي الوريد

--اشبي

--تمشين ويه الدم بالثانيه الي مايوصل للكلب معناتها انتهيت

--لعد ليش هيج خانگني ماتخليني حتى اتنفس براحتي

-- اعترف بروحي مريض وادري هالشي يكرهج بيه بس موبيدي وروح اخوي اتخبل ولااحد يشوفج غيري لو بيها مجال اشلع كلبي واخلج مجانو بالقران اغار عليج حتى من نفسي

شلت راسي باوعتله

--من ادحگ الكمر يضوي ويه خدودج امنيتي احجب ضواه وضمج بضلوعي اخاف عليج من عيوني

--اشوكت حبيتني

--من اول نضره الج تذكرين من سلمتي عليه وخليتي ايدج بايدي من ساعتها كلبي دگ وبيوم الخليتج بحضني حسيت نعومت بشرتج موبس عشكتج لا صرت مسودن دعيت حتى على امج ماردت احد غيري يحبج

رجعت راسي بحضنه باسني وضمنه اله همس كارهتني مو

--لا

--بس اخلص من قضيه غيث اخذج ونسافر اي مكان بخاطرج وضلي اشكد ماتريدن

--عبايه وبوشيه وهم تحجزني بالفندق اتكول باوعي من الشباج

--لاجبه ونقاب كافي بس حتى اتعرفين اشكد احبج وراح اخليج براحتج

--اني جبتها لنفسي استاهل صدك اريد فستان للعرس

--امج تكول مشتاقه لحن اودج يمها

--مااروح ارركان والعرس راح احضره وهم البس ابكيفي

--اي بالغرفه غير نسوي برفات ليله الزفه من عيوني يروح اركان

--الله يلعنج ناي على هاي الورطه

--اي بالقران هيه ورجلها وروني ور شعلو جدي بگبرو

--ليش شصاير

--ماكو شي لايضل بالج يلا يولي راح يطر الفجر

--اي والله نعست

كمنه رجعنه دخلنه للغرفه شمرت شالي والفروه دخلت بفراشي اجه يمي سحبني خله راسي على صدره لفني بالغطه
غمضت اشويه ورحت بالنوم بين نايمه وبين كاعده اسمعه يسب عرفت النومه ماردتله

مرن كم يوم والاوضاع متوتره وسماهر وسهيله صاير بينهم من الروس سماهر متمكنه والكل يحسبلها حساب لخاطر اخوها محد يكدر يحاجيها والتوكع بيها سهيله حتى كتل يكتلها ابوها بس عمتي واكفه بجانبها

رنو حتى الاكل گاطعته بس بجي نهار وليل مرتين اجت تتوسل بأركان يطردها

واكفه بالمطبخ دخل توته بت سهيله استعجلتني عالجاي

سطرت الاستكاين عالسريع بالصنيه رحت ردت ادخل واسمع سماهر اتكول لعمي ابو اركان شكلت عمي نروح نخطب رد عمي يبه اخذي راي اركان بألاول لاتبلشينه وياه

--عمي صدك تحجي من اشوكت احنه ناخذ راي ازلامنا بالخطبه حرمته عاكر لحدمن يضل هيج

--هو راضي بالقسمه الله الو

--بس احنه لا من حكنه انريد احفاد عجل هالحلال المن يضل ذيج خذت وليداتنا ونهزمت لانعرف عدلين لوميتين وهذا كاضبه الزلمه حارمتو من الخلفه ضالين بطرد حسام لاسامح الله اذا انجتل ينتهي نسلنه

--هينه يبه من يرد احجي وياه ون شاء الله خير

--ناخذ من الشيخ ال حميد خوش بنوات عندو حليوات وحديثات وحدتهن فلكه كمر

سهيله. وعش تزوجو عجل موش اني حرمتو

--مايشوفج غير حرمت اخو مالو نفس بيج اجيبلو بت احديثه تشيل من وكت بلكي تعوضو صبر السنين المرت

--عمي راضي بهالحجي عجل اذا هيج عش حجزتوني يمكم كل هالسنين اذا هيج اخذ جهالي وارد بيت ابوي كافي مذله

ابو غيث . ماكو وحده تتحرج من بيتها هذا بيتج قبل لايكون بيت عمج وزلمتج الج حگ يمو تاخذي من بين عيونو من عقد عليج وكف قسمتج يتحمل المسؤوليه

--عجل خلي يعدل بينه عش تزوجو اذا ماصار عندي الكم حگ بزواجه واني بيدي ازوجو

ابو اركان. كافي يبه وروح ولدي ملينه من المشاكل بسكم واذا على اركان يرد واني احجي وياه واذا مالو نفس بيج خلو يحللج وتروح سماهر تخطب

دخلت بيدي الصنيه الكل سكت خليتها بالكاع يم
سماهر الي تباوعلي بحقاره وفرحانه عرفتها ادور حق بتها بخرابي

ماحجيت طلعت صعدت فوك لغرفتي دخلت احس نفسي مختنگه سديت الباب ماعرف شسوي محتاره شي بصدري يحركني

بهيج وقت كل ابنيه تعتاز امها اتذب حملها عليها بس اني اختلف ماشوف غير ناي بعيني

رحت للكنتور طلعت فوني وكعدت بالكاع دموعي تنزل فتحت الرمز دزيت لناي لحگي عاشق راح يطلع وحذفت المسج

بعدني ماقافله الفون اتصلت رديت بشهكه كالت شكو لحن

--راح يزوجون اركان ناي دختنگ احس روحي راح اموت

--اهووو رجعنه للموال نفسه موخلصنه من السالفه وراحت منو رد نبشها

--سماهر اتكوم تكعد اتريد جهال متخبله اربعه وعشرين ساعه اتقنع بيهم وهسه عمي اقتنع وكال راح احاجي اركان

--لاتبجين اركان مايسويها يحبج

--اعرف يحبني بس هم يريد جهال مل وهو كل شهر منتظر النتيجه بس موبيدي والله اني اكثر منه رايده شبيدي وماسويته

--كافي يروحي واذا اتزوج الباب يوسع جمل واليروح الله ويا لاتهتمين محد يخسر غيره وروح اخوي مثل ماخليته ياخذج ارد اخذج من بين عيونه

--ناي لاتتخلين عني

--انجبي وبطلي تهترين سالفه بدعه مسحي دموعج انتي العليج سويتي ماقصرتي صرتيله عجينه وشكلج مثل مارد ضلت يمه بعد يريد يحافظ عليج يحترم نفسه ويتقبل الموجود شبع من سالفه الحب والعشره خلي يتزوج

--اذا اتزوج ماراح اضل ويا هو انطاني وعد اذا رد بي راح يحكم علينه بالانفصال

--كونج كد الكلمه حتى احسب حسابج ويانه

--وياج ناي

--تمام راح ازورلج جواز ويه الجهال بس اضرب ضربتي الاخيره واخذكم وطفر هاي هيه خلص كلشي انوب نعيش مثل مانريد كافي الضلم الشفناه

--صدك ناي نعيش براحه

--راح نعيش براحه ونربي جهالنه مثل مانريد مسحي دموعج بعد لاتنزليهن لخاطر احد دوم اتذكري بابا من جانت دمعته تنزل اذا شاف دموعج لحن لاتكسري وهو بكبره

--مابجي بعد بس كسرو كلبي ماتحملت لان حسيت روحي ماعندي سند يدافع عني

--افاا وانه اختج هسه اخذ حق دموعج فتحي الكام بسرعه

--شراح تسوين

--سوي مثل مااكلج ونزلي سولفي وياي كدامهم وضحگي اذا ماخليت بدل دموعج تنزل اضعافهن من عيونهن ماتسمى بت ابوي

كمت مسحت دموعي فتحت الكام اباوعلها منتجيه عالحايط بكامل اناقتها

مكياجها وشعرها ولبسها اليشوفها ولايكول هيج شايله هم باوعتلي وضحكت كالت ها عجبتج

--اتمنى اصير مثلج هيج قويه

--ترگي القوه ماوراها غير وجع الكلب والتعب خليج على وضعج واني بضهرج شمري همج عليه بدون لاتفكرين يله نزلي يعمري

فتحت الباب واني مرتاحه احسها صدك شالت الهم من صدري

نزلت اضحك واسولف دخلت للغرفه الكل كاعد بس عمي طالع شافتني سماهر كالت ها اتصلتي باركان بسرعه شكيتي شمرتي سمج

ردت ناي بصوت عالي سماهررر موكبرتي اشوكت تبطلين سوالف الجهال

--منهو هاي ناااي؟

هزيت راسي كامت ركضت رادت تاخذ الفون مانطيته رحت كعدت يم بيبي خليت الفون كدامها وهنه التمن كالتها بيبي ها يالصگعه بعدج عايشه

--هلا بدعه والله مشتاقه لسوالفج الحلوه اشلونج على غياب حفيدج المدلل

--تتشمتين ناي

--افا بدعه موحنه الناكرين الملح والزاد تاركين هالامور للجهال والناقصين

--شقصدج يجده

--اذا اردت ان تقدم معروفا فتأكد انه انسانآ وليس حيوان ليرفسها شتكولين سماهر

سماهر. وين جهالنه يالساقطه

--راح افوتلج هالتجاوز بس ياجهال تحجين عنهم شنو مضيعين جهال وجاي ادوروهم يمي

--ناااي وين شبل

--ههههههه شبل منو هذا النوب يله ماعلينه تعالي اعرفج على ولدي ماما عاشق تعال حبيبي

اباوع لسماهر حلكها يابس وعينها بالفون وناي منتجيه كاعده بكل ثقه اجه عاشق وهيه شهكت ضمت وجها بشيلتها

كعد بحضن ناي وجهه مشخوط يباوع بمكر كال منهو ذني يولي

--تركك منهن وكلهن انت منو وشناوي من تكبر اتسوي

--عاشق غيث ال--- حفيد بدعه بس اكبر اروح لهل غيث اخذ حقج منهم واطردهم بالشارع كلهم واحرگ شكو واحد بجاج

--صدقه لمحمد يروحلك فدوه غيث واهله كوم حبيبي علي ماما تعال

وخرت عاشق اجه علاوي شكله نازك ودبدوب باسها وكعد بحضنها كالتله عرفهم عليك

--اني علي شاهين حفيد بدعه

--واني شصير منك

--امي وروحي وبس اكبر اروح لبيت بدعه اخذ شكو افلوس انطيهن الج واخد حگ بابا وماما من بين اعيونهم

--كفو منك زلمه من ضهر زلمه كوم يبعد امك كوم اطلع ويه اخوك بره يلا

كام طلع وسماهر على بجيتها وبيبي تبتسم كالتلها نجره وكويه من يومج

--ولو اعجبج اتخيلي بهذا العمر وهيج يفكرون لعد من يكبرون شراح يصير

سماهر. غيث راح يطلع ويسحك على راسج والجهال يردون لحضني

---هههههاي اشكد قديمه انتي هاي شنو معلوماتج اكل عليها الدهر وشرب

--نتواجه يب انهار

--لو سمحتي المحاميه ناي الالجي مساعده علاء الدين تعرفين شنو يعني ورقه وحده. اطير راس حفيد بدعه وسندج اذلج تعرف شنو اذلج نصيحه بعدي شرج عن لحن وصيري حبابه حتى لااخليج تحت امرها

--اشلون صرتي محاميه ويه منو علاء الدين يناي

--شفتي بالله اني هم متعجبه شتكولين بدعه بفرت الطاوله

جده. السبع ماينگي حرمه اذا مايعرف بيها ذيبه وكدها بس لاتلعبين بعدد عمرج يجده

--لعبت من زمان وراهنت عليه وماعندي شي اخسره بعد الي يمكم بس اختي لاتخلوني ارد واخذها واخبللكم ابنكم الثاني

--كونج صدگ تعمليها وتوصلين صوب حرمتو وروح الراحو يالذيب ينبشج من جوه الكاع يطلعج ويدفنج بمعرفتو

--بس لاتحلفين حتى لادفعين كفاره جان كدر حفيدج السبع يسويها يله عندي شغل لازم اروح

سماهر. انطري لج

--قبل لاتلغثين خليها بالج كل دمعه من لحن مقابيلها سنه اضافيه لاخوج بالسجن من غير جزء من ورثكم الحرام يله انگلعي

اشرت باي غمزت لسماهر ضحكت وغلقت الفون

ضمت وجهه بالشال وكامت تبجي بصوت عالي وعمتي على صفنتها كاعده بعدها مامستوعبه اتمنيت يمي ناي احضنها واشبعها بوس عالسوته بلحضه كلبت بيهم الحال

طلعت كعدت عالدرج احذف كلشي بالفون واسمع اشلون يدعن ويلطمن كوه كامشه ضحكتي

دخل اركان وعمي كمت ضميت الفون وراي بسرعه
شافني رفع حاجبه وصل يمي كال بس لاتختلطين بيها جثير

باوعتله فاتحه عيوني كرص خدي باس ايده ودخل وره عمي

اسمع الهوسه صارت بيبي اتصيح تعرفون مجانها وساكتين وعمي يحذر مايريد احد يعرف لان غيث منبه على هالشي

رحت للمطبخ دخلت اتلكتني سهيله كالت اجه اركان

--اي مدتسمعين الهوسه

--البركه بأختج اويلي من يعرف اركان عندج تواصل وياها شراح يعمل اتهيري للطلاگ

--ههه عرف وتدرين شنو سوه

--طگج

--لاوالله كرص خدي وباسه ودخل ولاكأنما مسويه شي

-- عاميتو بالسحر بس منهو يصدك احجي ورد ليورا ااااخ حظ الساقطات

--بيبي بددددعه

--اششش موش وياج احجي تركج من الهتر وتعالي ويانه

--وين رايحين

--للصالون اخذج جنتي المصونه اعدل جهرتها

--هسه اشوف اركان بلكي يرضه

--كضبي هالحلاوه شوفيلياها حلوه لو مضبوطه

اخذت منها اكتلت اشويه اشرت تمام راحت للطباخ اتكمل سوايتها واني بيدي الماعون الي انطتنيا اكل بي

دخل اركان كال جاي يولي

سهيله. اركان اريد افلوس اروح للصالون ويه بت سماهر

--هينه يبه بس سويلنا جاي جايه خطار

بعدني ماحاجيه بس باوعتله اشر ماترحين اني هم سكتت راح طلع واني صعدت لغرفتي بين ماتخلص الهوسه

اخذت ملابسي دخلت غسلت شلت شعري بدون تمشيط وشمرت روحي بالفراش اندعي لناي لوماهيه جان هسه الله اعلم شصار بحالي ماعرفت فتحت على روحي باب جان مسدود

العرس اتأجل مانعرف شنو السبب محد يحجي كدامنا

اكثر الاوقات يلتمون عمامي بغرفه بيبي ويسدون الباب يضلون بالساعات جوه ساعه تصعد اصواتهم وساعه هدوء بس اركان جان يطلع وجهه مايگصه السيف

من كثر المشاكل كام يطلع الصبح مايرد غير نص اليل وحتى من يرد يضل كاعد للصبح يدخن

كلمااكعد الكاه يباوعلي بعيونه حيره من اساله يصفن بوجهي مايرد اذا كلش يكلي لاتخلين بالج تعبان من الشغل ياخذني لحضنه اني انام وهو يضل يدخن

البيت داخل حاله انذار بس ام اركان تباوعلي بتشفي وسهيله كل ماتشوفني تكتم ضحكتها مافهمت شكو

اني هم مااسال اخلص شغلي وارد لغرفتي حتى الضهر بعد مانزل اقفل غرفتي وانام لان اعرفه مايرد مانزل غير الغروب وهمه الله هاديهم محد يدگ الباب عليه

واكفه ارتب بالكنتور سمعت هلاهل عرفت جابو العروس من الصالون

لبست شالي نزلت لكيتهم بغرفه ريحانه دخلت
رنو كاعده دموعها تنزل وامها يمها تطحن من القهر

سهيله مكلوبه ميه وثمانين درجه استحقرت نفسي من شفتها اشلونها

الشعر قصير ومصبوغ فستانها مخصر والصدر صاعد عليه وشم ناعم والمكياج مرتب اليشوفها ولايكول نهايه الثلاثين فززتني هناء وهيه تضربني على ضهري انداريت اشرتلي وين

--هلاعمري يمج اشوكت اجيتي

--من الصبح بس انتي مختفيه فوك

--اركان مايرضه انزل يكول ماريد مشاكل

--لاتضلين فاهيه فتحي عيونج وعينج بزلمتج لايروح من ايدج

--شنو يعني مافهمت

--ماكو شي تعالي نصعد غرفتج ناخذ راحتنا لنشوف وين تصل السالفه

طلعنه صعدنه للغرفه دخلنه سديت الباب شمرت الشال كعدت عالجربايه واني طلعت عصاير خليت كدامها كعدت كلتها شصاير احجي

--رجلج وينو خو مايفوت

--لاماهو الضهر مايجي لليل ياله اخذي راحتج

--ناس اتخرب على سعادت العالم ماتخلي واحد عايش مثل البشر لبالهم الفلوس راح يتعيشهم براحه اخ يبدعه لواكضبها ماهدها اذا مابتر راسها

--كلبي ديلعب خوفتيني

--لا حبيبتي همه خايفين منج كلمه وحده منج يهد اركان كلشي ويخرب التخطيط. وكل عقلهم الاملاك تروح لعامر

--شنو سالفه عامر صدك الكل يسولف بي

--سمع غيث عادو المحاكمه مالتو دحگ روحو بعد مايسيطر كام يلعب بذيلو دخل مشروعين بأسمو والفلوس من حساب غيث لان مفتاح الخزنه الجبيره بيد عمي اذا مالحك غيث وطلع يضيع تعبه ويبلشون بتقسيم الورث

--واركان اشلون ساكت

--ماساكت محتار اذا انفتحت شغلت الورث راح ينكشف كلشي وكتها يروح راس اختج لو يحط روحو ماراح يكدر يحميها

--ليش ناي شدخلها

--راح احجيلج بس لحن امانه فتحي عقلج تاتفتهمين عليه ولاتخربين على روحج والسر بينه مايطلع لبشر

--تره ادري انتي الزارعج اركان بيت عمي اتجيبين الاخبار سمعته وهو يخبرج قبل فتره

--بسبب اختج لعبت لعبه اذا انكشفت تنهي حياتها هيه وجهالها اركان خلص كل هالسنين يتزنح بس لخاطر يسد السالفه وماتنكشف بس بعد مابيها مجال بالاخص من عادو المحاكمه وكالو الحكم ضده هالمره مؤبد قررو يقسمون الورث

--لعد مايقسمو خلي نخلص من هالهوسه

--اندعي كون غيث يطلع قبل لايصير شي لو يتأجل التقسيم لان اختج اتصير بخبر كان

--شمسويه ناي

--دربوها على شغله كامت فرت العبه ماعرفت حكمت على روحها بالموت اذا بلشو اليوم بالتقسيم وفتحو خزنت غيث لخاطر يطلعون الاوراق قبل طر الفجر تكون حدر التراب

--عزه يمه اختي وهيه شدخلها بهالهوسه واركان وعدني يحميها مايخليهم يأذوها

--هنا مربط الفرس حمايتها بتأجيل تقسيم الورث ومايتأجل اذا مااركان قرر --

--يتزوج حتى يجيب طفل ويدخل اسمه ويه الورثه

--مايتزوج عليج والكل يعرف هالشي وغيث رغم بين اربع حيطان بس بعدو يحرك بيهم مثل الدمى وبمزاجو بمساندت زلمتج

--هو بعده مانحكم ليش مستعجلين عالتقسيم

-- طلعو بسالفه محسومه القضيه وجدتي مريضه يخافون ينحكم مؤبد وتروح بيها واذا ماتت جدتي راح يتذابحون وراها قررت تقسمو وتعطي لكل واحد حگو

--هاي اسوالف سماهر

--عجل عدنه حيه غيرها خايفه تموت جدتي وعمي ابو غيث يخلي عامر يگضب كلشي بعد مااختج الذيبه خذت ابنها واركان رافض يتزوج عليج ماضل وريث غيرو

--يعني اليوم يتقسم الورث

--مانعرف لحد البارحه اجتمعو وقررو بس ماعرفنه شنهو لليل ونعرف اذا عله اصواتهم وسمعتي التفگ اشتغلت معناتها انفتحت الخزنه ونعرف المضمون وقبل طر الفجر روس ناس تنسحل وتصير حدر رجلين بدعه

واذا صار هدوء معناتها اكو واحد شال مصيبه غيرو على امتونو وخرب على روحو

-- هاي كلها علمود كم دينار

--ياكم دينار تعرفين اشكد الورث لو الاملاك العد بدعه لالبالج الورثه بس ازلامنا والاحفاد لاحبيبه منين ماتفرين وجهج الهم حگ يمنه ومشاركين بالحلال من اخوت بدعه لحد ازغر جاهل بالعمام

--يعني ذوله الجانو يطلعون ويه غيث واركان الرياجيل كلهم من ضمن التقسيم

--اكيد ولد اختها ولد خواتها ولد عمامنه كلها مشتركه وموحده الملك صح كلمن ياخذ حصته من الفلوس بس الاملاك وحده وكلها باسم بدعه لان هيه الجبيره وگاضبه كلشي والكل تحت امرها

--بس انهدت كوه تكوم خطيه تكسر كلبي دوم دمعتها بعينها ماهامها لافلوس ولااملاك ضاله بحسره عينها بالباب

--موش گليل الراحو شاهين وغيث الجانو يساهرون وياها للصبح تضحك على ضحكتهم ضلت بطرك اركان وهم مكسور ضهرو باگي بطرك الحسره
وبدون خلفه اي غفله عنو ينغدر ويضيع اسمو

--يمه اسم الله عليه من عمري على عمره ان شاء الله يتقسم والورث ونخلص من هالسالفه

--خافي على روحج ان تقسم كلبج يلجم وان بگه كلبج ينكسر من الجهتين ماكو ضحيه غيرج

--كلبي ديلعب احسج ضامه شي

--ماضامه خيه تركج من الهتر هاي اشوكت تعرس

--ماعرف يمكن وره محكمه غيث

--عجل عش من هسه راحت صالون

--يردون يسون تلبيسه مال ذهب باجر عازمين العالم هيج سمعت حتى تطلع وتدخل ويه حسام تتعود عليه يعني لاتنصدم بليله العرس

---هههههههههه لاراح تنصدم ابشرج ربي ماتضيع حگ احد حشى منك تعالي دحگي اسماء كلبت على ام عامر صافن ويه سماهر و احجايه الثانيه اتكلها هذا بيت زلمتي وخالتها متسودنه

--حيل بيها تستاهل اشكد حركت كلب ناي

--كومي طلعيلي كلبيه خلي اغيره

--اسويلج غده

--لا خيه بعد وكت ماشتهي هسه خلينه كاعدين نسولف من انجوع ننزل سوه نسوي

غيرت ملابسها واني هم على واهسها لبست تراكي وشلت شعري خليت مكياج

اتربعت يمها عالجربايه تسولفلي على اسماء اشلون تتشيم بغيث واشلون محضره نفسها لطلعته وسماهر كل كم شهر تاخذها اتشوفه بالسجن حتى اتقوي العلاقه بينهم

ضلينه لتالي الضهر حسيت بجوع كلتللها راح انزل اصب غده

--اني لاتحسبين حسابي نعست من اكعد اتغده

--بكيفج ماتاخر ابسرعه اجي

كمت لبست روب عالتراك اخذت شالي طلعت صوت ماكو البيت هادء مبين الكل نايم يوميا هيج وكت شبعانه اكل وبعز نومتي

نزلت دخلت للمطبخ صبيت بسرعه صعدت سمعت صوت خفيف جاي من غرفه سهيله اخذ كلبي

اديه كامت ترجف اخذت نفس غمضت اجذب روحي ماسمعت شي

نزلت الصنيه بالكاع رحت امشي واندعي كون مو الي ابالي

وصلت للغرفه خليت ايدي عاليده مال الباب فتحتها ودخلت غمضت عيوني واني اشوف كدامي ---

*** ناي***
ندارلي عاكد حاجبه باوعلي حسيت حتى النفس انگطع اريد اتبلعم ماكدر اشر للمساعد احمد كام راحله اباوعله انطاه ملف يكلبون بي

استغليت الموقف اباوعلهم بدون لاادنگ ومديت ايدي بحركه سريعه سحبت الورقه خليتها بجيبي

استاذن من الحاكم واجه يمي كال بابا لاعبه بالملف

--لااستاذ ليش

--اكو ورقه كلش مهمه جانت بيها

--اخاف يم محامي احمد

--لالا شو ابتعدي داشوف انطيني ملفج

كمت فتحت الملف مالتي كدامه اخذه من ايدي نكثه عالميز وخلاه على صفحه

وجع يدور بالاوراق مخبوص واحمد ويا كلمن كامش مكان

ضليت واكفه كامشتني الرجفه عيني بي وعين بغيث الي خال اديه وره راسه يترقب مصيرنه

اصعب لحظات بحياتي ماعندي حتى وقت افكر بي لازم اخذ قرار واحسم الامر

غمضت شفت دمعه عاشق من يسألو عن ابو

فتحت عيوني كمشت مداليتي اجت كدامي صوت عاشق وهو يتوسل بيهم لايذبحو

حسيت روحي مختنگه رددت بداخلي ربي اني عبدك ولجأت اليك اللهي خذ بيدي وكشف عني ماغفلت عنهُ انك اعلم العالمين

اخذت نفس سحبت الجنطه مالت المحامي فتحتها ادور وياهم اجت اغسق يمنا اتكلب بالاوراق

وكف المحامي مسح وجهه احمد همس استاذ ضلت عالمكتب

--لامتاكد جبتهن

--ماشفتها من جنت بالسياره اقره بالقضيه

--بس الملف محضره من البارحه

--لااستاذ اكو اوراق ضلت عالمكتب من طلعنه شفتهن احتمال وكعت يمهن

--مااترك هيج ورقه مهمه متاكد جايبها تمام تركو البيدكم اني احل الموضوع

راح للحاكم يحجي ويا عصرت نفسي راح يعيدون الكامرات واروح بيها

غمضت اريد اخذ نفس مااكدر فتحت عيوني اني واشوفه بعده يحجي بهدوء ويا لحظات وكلبي يوكف

استوني اردد ربي اني مسني الضر وانت ارحم الراحمين وهو ضرب يعلن تم تأجيل الجلسه

لااراديه سديت جفوف اديه همست يسس بفرحه

انتبهت لروحي كعدت عدل انداريت لغيث لكيته مدنگ كامش الحديد يباوعلي ويضحك

درت وجهي

رد المحامي بس شكله كاشفني يباوعلي بطريقه موطبيعيه والدنيا طالعه من عينه من يمي انغلست

لم الاوراق رجعهن للجنطه كامو القضاة طلعو من باب المخصصه الهم

واحنه كمنا طلع الاستاذ واحمد ورا
غسق كدامي واني بضهرها

طلعت الورقه من جيبي عفستها عالكيف واجيت امشي
لمن وصلت يم جهه اركان خليت ايدي على ايده عصرتها

شال راسه بدون لااباوعله حس عليه اخذها من ايدي طلعت شي ونزاح من كلبي

حتى الرجفه اختفت رحنه للغرفه المخصصه النه دخلت لكيت الاستاذ كالب الاوراق عالمكتب ويدور شافني كال ملفج ناي

--هاك استاذ بس تره جان بيدك

--ميخالف وانتي غسق واحمد خلو ملفاتكم هنا

خليناهن عالمكتب

اباوع لغسق وجهه اصفر اتباوعلي عوزها تبجي فتش اوراقنا وشمرهن بالكاع بعصبيه

احمد. متاكد عالمكتب خليني اتصل بالسكرتيره

--مقفول المكتب مالتي والورقه جبتها وياي واحد منكم اخذها طلعوها لاتجبروني اطلب اعاده الكامرات واعرضكم لمسأله قانونيه

--واحنه مستعدين لهذا الشي

--وانتن

--اني مستعده استاذ واتصور اختبرتنا اكثر من مره ومواحنه انخون الي ثق بينه

--تمام خليجن لاتتحركن انت ابنيي روح جيب المفتشه بسرعه

طلع ولد الجان يمسح واحنه صافنين عليه اتفاجأنه من طلبه

واكف متخصر يباوعلنا بطريقه اتخلي الواحد يعترف حتى لومامسوي شي واكثر وحده شاك بيه من نظرته

دخلت المفتشه اول وحده بالشت بغسق

هيه اتفتش وغسق تباوعلي وتبجي خلصت كالت ماكو

--الثانيه

غسق. استاذ بس اسمع

قاطعتها بسرعه كلتلها بدون لايسمع يفتشني واذا موجوده عندي مستعده اتحمل اي عقوبه

--يلا بويه فتشيها

اجت يمي رفعت اديه فتشت وغسق تشهك كملت كالت ماكو

هو فتش احمد هم ماكو. وكف كمش راسه كال اشلون كدرو ياخذوها منو خاني منكم

احمد. استاذ احنه تلاميذك مستحيل انسوي هيج وهم محاوطيك محد كدر يوصل يمهن

--واني متأكد جبتها واحد منكم اخذها

--اخاف وكعت بالسياره اروح ادورها هسه

--الورقه اذا ما ظهرت بعد ساعه اخبر المسؤول يتخذ الاجرائات وياجن

--براحتك استاذ سوي التريده واي غلط او دليل احنه مستعدات نشيل القضيه

--من هالدقيقه انت مرفوضات بعد مالجن دخله عالمكتب

--ليش استاذ لافدوه

--طلعن يلا وانت لم الاوراق وجيب الجنطه بسرعه تعال وراي

وكفت بوجهه كلتله ليش ترفضنه بشي مالنا ذنب بي

--اعفي عنكم واردكم للشغل بس الورقه ترجع

--منين انجبيها

--من الي اشتراها منكم وخري بابا عن طريقي

وخرني بضهر ايده وسحب فونه اتصل طلع مخبوص يدور على نسخه طبقه الاصل وراه احمد

كعدت دنكت كمشت راسي حسيت روحي خاينه وعاشق يباوعلي بأسف

حلمي تبخر بثواني راح كل تعب سعيت اله
اجت غسق يمي وخرت اديه رفعت راسي باوعتلها وبجيت

-- ليش تبجين انرفضنا انحصل احسن منه

--بديت احقق اول خطوه ماضل شي وافاتحه بموضوع اهلي واخذ ثارهم

--تعرفين وره هالشغله راح تنطردين شنو الغير رايج بلحظة وخلاج تاخذين هيج قرار

--عاشق وكف بعيني وهيا حلمها تشوف ابوها غيث اكثر من مره طلعني من الموت بس جان رد المعروف غالي

--لاتبجين انروح لدكتور ذوالفقار ونحجي ويا راح يكدر يأثر عليه ماضاع شي اكو هواي طرق ندخل بيهن

--ماطول شگ بينا ماراح يرجعنا

--وماطول دكتور ذوالفقار ساندج راح نرجع يله نطلع كم مره اكلج صيري كد الثقه دومج امفشلتنا

ضحكت مسحت دموعي كمت رادت تطلع كمشت ايدها باوعتلي

--جان فقدتي هويتج بسببي

--فدوه الج وافقدها شنو يعني كل عقلج اخليج وحدج تنسحب هويتج لعد الصديقه اشلون يطيح حظها غير بمجهود البيست مالتها

--اشوف راح نصفه بالشوارع لاشهايد ولاشغل

--اذا كلش ضاقت الدنيا بينه نشتغل ويه رجلج بالتسليب
لاانوب واكفه تحجي ويا بكل ثقه اتكله عيد الكامرات

--لان اعرف بس حجي هاي نقطه ضعف عليه اذا سواها بعد محد يجي لمكتبه لعدم ثقتهم بموضفينه

--لاصدك كفوووو عجبتيني

--ههههه وين غيث جان كلج امكانيه وعمه الساده

--جان يباوعلج ويضحك اشلون عرف ماراح تغدرين بي

--يعرفني صگعه مابيه خير كلبي دوم يفشلني يله لج نروح دنشوف اشلون ادبرها لاينتهولي اهل غيث وقتها علاء موبس يطردني من المكتب لا يشمرني بحضن غيث نفس الزنزانه

--لعد خليج بس اطلع اتاكد المحامي رايح لو بعده ولج لحد الان ارجف عزه بعينج ناي

--خطيه راح يركض للمكتب متامل يلكاها هناك

--لاتخافين عليه اكبر مزور وحيوان بالبلد هسه يدبر وحده لخ بس حتى مايخسر القضيه يله رايحه داشوف المكان

طلعت واني نزعت الروب خليته على ايدي وكفت وره الباب منتظره دقايق ودخلت كالت ماكو احد رايحين بس اهل غيث بعدهم

طلعت رحنه نمشي وصلنه بره نزلنه من الدرج لكيناهم واكفين باوعلنا جود واشرلنا يضحك

واركان جان واكف امجتف ضايج بغير عالم ماعرفت شبي انتبهلي اشرتله بعيوني فهم سحب ابو ودار وجهه عني حتى لااحد يتعرضلي

دنگنه كملنا طريقنا طلعنه بره المحكمه رحنه جهه السيارات بعدنه مارافعين ادينا انأجر تكسي وصوت اركان ورانا كال السياره حاضره اتفضلن ويانا

انداريت ابتسم كالو كفو ينطح كفو يولي بالقران اتلعبين ابليس تگ رجل عالحبل

--اتصور لهنا كافي اتصافينا

--واسفه موش احنه الندور وراج بالمقابل يامرت اخوي الج حگ يمنا تاخذي من هالشارب

--واني مااريده متنازله عنه بس تركوني اكمل طريقي ماحصلنه من معرفتكم غير وجع الكلب ضيعتونه اكثر مااحنه ضايعين

--كلشي يتصلح

--كلمه سهله تنكال بس صعب التنفيذ لحن وينها ليش اتصل ماكو

باوعلي ودنگ حگ گصته

--اركان شصايرلها

--مابيها شي بس عدنه عرس وملتهيه بس ارد اخلها تخبرج يلا اوصلكم بطريجنا

--ماريد احد يشوفني وياكم كافي الخراب الحصلته ابسبب اخوك

--المحامي تعرضلج

--اي وتعرضلي شراح اتسوي

--وحگ الخلق الكون ماينام اليوم بيتو صاحي روحن بطريجن وحگج اليله يصل لحدر رجليج

--فصلني من شغلي

--ولايهمج من باجر احسن مكتب الج

--همي مو الشغل تعرف شريد اسنين اركض سهر وتعب لمن وصلتله وكمشته بأيدي بس جان مقابيل طلعت غيث

--بس يطلع غيث الج الرايدتو

--ماراح يرضه

--لان وحدج يعرفج هتره وراح تضيعين روحج بس من اكو ازلام بضهرج تختلف الشغله

--اكو ورقه الطبقه الاصل راح يطلعها

--ماتفيد اكو من شال القضيه ودلائل قويه جان سلاحهم الوحيد هالورقه معروف ماراح ننساه الج طول العمر اركابنا الج ياام عاشق يله مشي وياي اوصلج بطريجي

--اركان

رفع حاجبه واشر عيب

خليت ايدي وره غسق رحنه ورا نمشي

وصلنه سيارته لكينه جود وكرم واكفين سلمت رد جود وكرم مد ايده باوعتله ابتسم كال اني كرم

اتصافح ويا اركان عصر ايده كاله وهيه مرت اخوي اثگل يول احسن ماعدل ملامح وجهك

اشر اي وهو يبتسم جود يضحك وهو مدنك

فتحت باب السياره صاح اركان انتظري يولي خويه جود سوق انت وكرم يگعد كدام

جود. لااني اخذ تكسي اخذو راحتكم

--يول شبلاك اني اكعد يم بنواتنا وانت سوق لوماتعرف تسوق

--لايابه اعرف بس للعلم وحده من البنات اليمك تابعه الي

--حاليا اخيتي من تصير ازلمه وتسويها بأسمك ذاك الوكت الك الحگ

--ماضل شي الشي الجان مانعني فرجت عليه ضلت بس اندبر المشيه

--ابشرر شيوخ السلف وكباريتو كلهم يمك بس اشر

--ماتقصر وعلي مشهودتلك

باوعتلهم كلتلهم خلصتو

جود. خيرج ام عاشق

--خير يصيبك بعد اختك ماعدنه مره للزواج عدنه وحده تريد تطلق

باوعت لاركان مدنگ بغير عالم عرفت مسوي مصيبه وخايف منها

فتحت الباب دخلت غسق وراني وراها صعد اركان بصفي
شغل جود وكال اي ام عاشق وين الجحر هالمره

--وصل غسق اول وبعدين اني

--وين بيت غسق

كرم. الله يالثگيل ماتندل بيتها

سكت كمل طريقه وصلنا غسق صدك طلع يندل بس يريد يسمع صوتها

وهيه عينها بالجامه ماعبرته اصلا ولاعلقت عالسمعته لمن وصلنه نزلت حتى ماسلمت راحت لبيتهم

دليتهم بيتنا من مكان لمكان لمن وصلنه للفرع واشوف الكدامي مثل كل يوم غمضت وضميت وجهي بأيد اركان

اركان. هاي العركه الكم تابعه

--جود رجعني للمحكمه

جود. ههههههه الله عليج ياهو ابنج

--ازبل واحد بالجهال

اركان. اركن السياره يول دنشوف ابن السبع جم واحد جاتل

--ياخوفي ابن السبع يوكع بيدكم وتخبلو اكثر ماهو متخبل

--وجودج بحياتو يكفي مرت خوي اركن يول وين رايح

وكف السياره نزلو

نزلت وراهم ضليت واكفه وهمه راحو يم الهوسه مال الجهال

اركان سحب عاشق من بينهم معروف من خباله وعيونه النه
كعد نص كعده كاله شبلاك يول عش اطگ بالجهال

--طگو خويي

--اهاا عاشق

--وعمه الساده دحگ اشلون جاسري

--وعمه الساده يول حلو عجل جذبت يبن غيث

--اني ماجذب ولاتكول ابن غيييث دحگ يول وو

-- هوب هوب خلينه نسمع بالاول شبلاك دخلت بالتهديد وينو خويك

--علي حدر هينا -دحگ يول راسو يتحلحل

باوع لعلي وضحك سحبه باسه خله بحضنه وكمش عاشق عن لايشرد

بجه علي كله عمو بعد مايطگ احد لاطكو

عاشق. لاتبجي يول يلا انت طكني خليني اروح

اركان. لاسبع على ابوك يول بس ماتعرف الي ينطگ مانو زلمه

--اهووو اشكد تلغث يله فضني جدتي مناطرتني

--جدتك مناطرتك لو تريد تفلت اكف يول
خليني اندحگ اذا طاگ خمسه ماطگك واذا اقل لا راح تنكط

--اليوم بس اثنين

--والبارحه

--ماذكر

--يعني ضايع الحساب بيهم

--منهو انت

--اني عمك

--وذوله منهو

--رفجان ابوك

--عجل ابوي وين عش مايجي

--تريد تشوفو

--ناي ماترضه

--موش بكيف ناي موباجر بعدو جاي واخذك نروحلو

باوعلي منتظرني شنو ارد اخذت حسره ودرت وجهي

اسمع اركان يكلهم منو الضربه عاشق والجهال التمت طلع محفظته ينطيهم افلوس

جود متخصر واكف ميت ضحك واكرم صافن على لهجتهم اشلون يحجي مثل غيث

خلص شاله واجه يمي كال ابن غيث مصفي المنطقه

--موبشر شيطان متنكر ماعرف عليمن طالع

رفع حاجبه باوعلي

--شبيك تره داتحسس

--بيتكم وين يولي

--هذا المشتمل ابو الباب الزرگه بس لهنا اركان حدك لاتخليني اندم دليتك

--لاتخلين بالج انطيتج جلمه محد يكرب صوبج ولاراح يندلوج بس عكب باجر الزياره جيبي عاشق لغيث لان شغلته مطوله الله اعلم يطلع لولا بالقران يكسر الكلب ينتظر الاسبوع بطوله ويتلكاني من الباب حتى يعرف اخباركم

--تمام جيب هذا عنك

--خلي عينج بي الجاهل حرك وبروح اهلج اي شي تعتازي مايردج غير لسانج تركج من اهلنا وغيث لاتنسين اني اخوج

هزيت راسي

باس عاشق ونزله راح لعلي كعد يمه كمش وجهه بديه يباوع بوجهه عيونه تلمع ابتسم اخذه لحضنه

جود شال عاشق وكرم بصفه يسولف ويا ويضحك فرحان نفس طريقه غيث بالحجي بس دار وجهه كرم دمغه

كرم. لابن الغثيث على ابوك خبل

--ابوي يطگك

--ناي تسحل بي الكيعان مايكدرلها يجي يطلعها بيه

--هاي اذاناتك عش هيج

--من كد ماامك جانت تسحب بيهن

جود. شايف ابوك لولا

--اي حتى انت وهذا ابو اذان اسمه كرم ناي يوميا تفتح جهاز غيث وطلعنه صوركم

--شتسولفلكم علينه

--ماتحجي بس تبجي

باوعلي دنكت خجلانه

كرم. امك جانت حراميه كل ماانزع جواريبي تبوكهن

--عجل ماطكها

--هو ابوك بجلاله قدره ماكدر يضربها اتريدني اني العبد الفقير اضربها

اركان. يله يول ترحون

جود. اي خويه يله عمو روح لبيتكم وصير حباب لاتضوج امك حتى عكب باجر نلتقي يم بابا

هز راسه عاشق فرحان باسه جود وباوعلي يضحك بعيونه لمعه مامصدك كبر ابن غيث وكام يحجي وياهم

رد كرم عصر وجهه باسه من غمازته نزلو سلمو وراحو رجعت للبيت دخلت لكيت عمتي تمشط لهيا شافتني كالت ها يعمه رجعتي

--اي عمه جابوني زملائي بالعمل وهم واحد منهم فصل الزعاطيط الضاربهم حفيدج

--وعش يفصل فوك ماطاگي بنيي

--استغفر الله ربي لاومقتنعه ابنها فقير الي يوم اكمش ابنج افلت راسه من جسمه

--انجعلج بالكسر فوتيي انعل اصل اهلج كونج صدك وتسويها بناي

--اي شتسوين

--اروح لغيث غادي هو يتصرف وياج صدك ام محمود اجت جابت الحساب مال الاسواق وكالت باجر اروح لل--اذا تريد ناي ادز افلوس لامها تاتاخذهن بطريجها

--خليها عكب باجر حتى اروح وياها

--ترحين لامج

--ههههه اشبيج اتغيرت ملامحج

--لابس داسال

رحت كعدت يمها كمشت اديها كلتها صح احب امي بس انتي شي ثاني بكلبي الشفته يمج والعشته وياج يعادل حنيته امي اضعاف

--وحگ داحي خيبر صرتي اعز من غيث وسماهر عندي وجودج بالدنيا بعد ماجنت انام براحه كمت انام بخوف كوه اغمض عيني

--ليش خايفه من شنو

--خايفه تركيني بعد ماعلمتيني عليج تاخذين الضحكه بعد مارديتها الي بجهالج

--اذا كدرت اترك عاشق وكتها كولي تركتج انتي الي عوضني ربي بيها اشلون تفكرين هيج

-:تنطيني جلما ماتركيني

--هاي يم ابنج مويمي اذا كدرتي تاخذيني منه فااني الج

--غصبا عن ابو اخذج هذا الهتر لاتفكرين بي اهم شي اهلج ماياخذوج

--ماعندي اهل غيرج ياام غيث شيلي هالسالفه من راسج وحضري روحج ماضل شي قررنه نسوي نحتفل ونعوض حفله التخرج

--عجل ماتاخذين امج

--انتي امي محد تعب عليه وصلني لهنا غيرج بس اتمر هالايام على خير واسوي الي براسي اخذج انتي والجهال ونعيش بيتي

--عندج بيت

--هههه ابنج هدالي بيت بعيد ملادي شفتي بالله

--الله يفگ سجنو كومي يمه غيري ملابسج تازهبلج الزاد

كمت رحت للغرفه فتحت الكنتور رن فوني طلعته لكيت غسق رديت كالت خبري كليله لايجي ويخطب مااوافق

--بس اعصابج هاي هيه خلي يولي بس والله صاير صاك هذا اذا خطب بدون مهر توافق عليه

--اي خلي يخطب اني مااخذه صدك باجر ترحين للجامعه حتى نحجي ويه الدكتور

--اي اروح اكيد

--هاي اذا مامخبره وباجر نتعرض الاسئله

--شبيج صدكتي ولج لوعنده شك واحد بالميه احنه الماخذيها جان سجنه وحنه هناك يلا روحي باجر نلتقي نكمل حجي

سديته شمرت الفون واسمع عاشق اشلون يسولف لعمتي على اركان خفت تنتبه ابن الثوله جايبها عدل ولاغلطه

غيرت ملابسي وبلشت بالشغل بس بالي مو يمي يم غيث الي قربت طلعته خايفه يحاربني بجهالي

ماعرف اشلون خلصت شغلي وكعدت اسوي كبه وبورك للاسواق اجت عمتي هم شاركتني اباوعلها تعبانه كوه كاعده بس اعرفها حتى لو مارضيت ماتبطل ماتهون بيه اشتغل وحدي

لنص اليل يالله كملنا سلفنتهن خليتهن عالميز هيه نامت وكمت حضرت ملابسي

افتريت عالجهال غطيت علي وعدلت نومة عاشق

اتمددت اخذت هيا لحضني نايمه بعمق وجهه كله براءة وخرت شعرها خدها ناعم ابيض وشفافها حمر
تعرفين ابسبب لحتج على شوفته ضحيت بحلمي

شنو رده فعلج من راح اتشوفي وهو من يعرف اسمج

اخذت حسره وحضنها نمت كعدت من الصبح على اتصال غسق
رديت ها ولج

--ليش تحجين بهمس

--الجهال نايمه اخاف يكعدون

--اني طالعه كدامج للجامعه وبابا كال اذا رفض اني اشوفلجن محامي غيره لاتشيلن هم

--لافدوه بلكي مايرفض خليني انشوف دكتور ذوالفقار

--ناي هذا مامرتاحتله عينه وسخه بس البارحه سايرتج حتى لاتضوجين

--شسوي ماكو غيره يرجعني غسق تدرين محد يكدر يسوي شي ولايفر القضيه غير علاء

--اعرف اشتغلت عنده وشفت اشلون كلب مال تزوير وفر قضايه يله لعد كومي غيري بسرعه وتعالي صدك عمتج درت

--لايمعوده غير اتصبح ماخذه عاشق ومنهزمه انوب بدل الهم اتخبل كافي عليه هم لحن مختفيه

--رجلها صح حلو بس موراحه شكله متعصب وماينجرع هاي اشلون حاملته

--هذا المتعصب يم لحن غير شكل لو تهفه راجدي يكلها ممنون

--الله اريد منه

--اكو البارحه عينه بالمرايه يريد بس يسمع صوتج

--وماراح يسمعه طول عمره ناي لاتزعليني منج لاتذكرين اسمه كدامي ويله كومي اتاخرنه

غلقته و كمت غيرت وطلعت عالكيف حتى لايكعدون

ماصعدت ربلات اخذت تكسي اسرع وصلت للجامعه اتحاسبت ونزلت فتحت الفون

دخلت واني اراسل غسق واسمع دكتور ذولفقار كال هلا بست ناي
رفعت راسي لكيته يباوعلي من وره النضاره اديه بجيوبه ابتسمت همست هلو استاذ

--خير اليوم هنا

--اجيت اشوفك بس شنو صاير شي شو ردك مال واحد زعلان

--شتكولين انتي مومن حقي ازعل

--يعني انت مصدك احنه نخون الثقه صح غيث زوجي جان بس تعرف علاقتي بي واني اكثر وحده اتضرر بهاي طلعته

--اتصل بيه عاتبني وطلب احجي وياجن اتردن الورقه اذا يمجن مستعد لاي مبلغ اتطلبنه

--استاذ لو متاكد عدنه مجان تركنا استاذ علاء اذكه من هيج شي هوماگلك فتشنه

--لاماكال بس يكدر يقاضيجن ويلبسجن تهمه

--تمام اذا اكو اثبات عنده احنه مستعدين وها طلبنه يعيد الكامرات حتى يتاكد اخاف عرف اني مرت غيث

--لامحد يدري وانتي شنو ناويه من يطلع

--ماعرف بس مثل ماتعرف علاقتنا احنه منتهيه من قبل لايدخل للسجن

--يعني اذا تقدملج احد راح توافقين

صفنت بوجهه متفاجاه من الكاله

--شو سكتي هيج السؤال صعب

--لاموصعب بس اتفاجأت

--ليش ناويه تضلين بدون زواج لو خاله بالج ترجعين اله

--لاهاي ولاهاي بس انت تدري اني بعدني على ذمته

--موتكولين بس عقد بيت وهذا سهل طلب من اي سيد جلسه يفصلكم

--ماعرف شكلك دكتور

--ناي من اول يوم دخلتي للجامعه واجيتي حجيتيلي على حياتج وطلبتي اساعدج من وكتها واني افكر بيج بس مافتحت الموضوع وياج ماردت اشغلج عن دراستج وانتي هم جانت نفسيتج تعبانه ردتج تجتازين كلشي وتنسين المريتي بي حتى لايأثر على حياتنا المستقبليه

--تعرف عندي اطفال

--ادري ومستعد احسبهم حالهم حال اطفالي

--وتعرف عندي حق يم عالم اريد اخذه

--راح اساندج وسهل الشغله عليج وحتى دراسه راح اخليج اتكملين بعد وطفالج اسجلهم باحسن مدارس

--ليش هسه بالذات طلبت هالشي

--من زمان اريد اطلب بس كلتلج اكو ظرف تمنعني وهم جنت اشوفج مشغوله طول الوقت وتفكيرج محصور بين الدراسه والشغل هسه الحمد الله خلصتي كلشي واجه وكت هالحجي

--الصراحه فاجأتني ماجنت خاله هالشي براسي

--على راحتج لاتستعجلين بالقرار فكري واخذي الوقت كله بالمقابل راح تلكيني وياج بكل وكت تعتازيني

--شكرا دكتور

--اي شنو جان طلبج بالبدايه ماعرفته

--لاماردت شي تسلم دكتور

--اذا على رجوعج لمكتب علاء تامرين اروحله بنفسي اردج بس مو هسه بعد ماترديلي الجواب وحتى اكو علاقه قويه بينه اكدر احاجي وهم بشغلت اهلج راح افاتحه وخلي يكمشها اعتبري قضيتهم محسومه

--الله كريم

--ماكو اكرم منه مااكلج لاتفكرين بس اكلج ماراح اتندمين ياريت ماطولين عليه

اشرت اي مشيت متبنجه

وصلت للنادي لكيت غسق تتماطل ويه ايهم واكعتله راجديات وهو يصد شافني كال خلصينيي

--خلي اخلص روحي اول انت شجابك هنا

--خبرتني هاي الثوله كالت مشتاقيلك اي خير شكو ولج من شنو نخلصج

--خبر صاعقه

غسق. شكو

--دكتور ذوالفقار خطبني

--عزه بعينه

ايهم. اكيد اتخبل صدك يحجي هذا بكد ابوج وهم متزوج

--موبعيد يكلي بالسر

--خلي يولي موخلصتي مصلحتج بلوكي

--اني منين تطلعلي هالعطلات بحياتي

--هواي راح تلكين منه

كالها وضرب غسق على راسها ردت تضرب بي

تركتهم ودخلت طلبت ريوك اخذت كوب كهوه ورجعت كعدت يمهم وهمه مستمرين واحد يضرب الثاني

يومين واني على كعدتي بالبيت اتصفن ماعرف اخذ قرار

طابگه مخدتي متمدده يم الجهال بليل فاتحه الفون يباوعون كارتون واني بالي يفتر دخلت عمتي شمرت عباتها اجت يمنه كعدت

وخرت المخده كعدت اتمدد مكاني عاشق يباوع دنكت بسه وانتجيت كامشه جف ايده العب بصابيعه وباوعلهم وين اخذكم واروح بعد مادليت مكاني ودمرت روحي اعرف ماراح يسكتون راح ياخذوكم مني

كالت عمتي الله كريم عمه تدبر

--شنو عمه

--احجيلي ناي شسويتي صار يومين واني منتبهتلج موطبيعيه

--سويت شغله رجعتني الف سنه ليورا ماحسيت بحجم الغط اله واني داخله بنصه

--ماكو واحد مايغلط بس الشاطر يتلاحك روحو قبل لايهلك

--انطردت من المكتب بعد مامشيت عدل ويتعدلت حالتي تعين ماكو شغل ماكو جنت شايله هم بس اختي وامي كملوها اطفالي وذوله همهم يكسر الضهر

--ايدي وايدج ماكو هم ان شاء الله

--هم ارجع للمعجنات لعد وسنين السهر والتعب وحلامي الجنت حتى واني صاحيه اشوفهن
اشوكت الحظ يبدي يحالفني عمري خلص واني على نفس ركضتي تعبت عمه تعبت وماوصلت لنتيجه

--ماعرفتج هاي انتي ناي نفسج عجل وين اني واني ومحد كدي المره مره بقوتها وثقتها عمره الرجال ماجن مثل الها

--باجر يتحدد كلشي العليه سويته حتى لااطفالي من يكبرون يلوموني يله عمه راح انام فدوه عينج بفون غيث لايلعبون بي

--لااني كاعده ادحگ وياهم امني

كعدت الصبح على رنه اركان فصلته لايكعدون الجهال دز مسج فتحته لكيت حضري الجهال راح اجي

سويت تحويل وكتبت لاتجي راح نطلع بالطريق احنه دست ارسال

كعدت هيا فتحت عيونها اشرت اشش كومي

كامت تفرك بعيونها اخذها للحمام غسلتها وغسلت رجعت للغرفه طلعت بنطلونها وكوتها

لبستها شلت شعرها ذيل احصان لبستها حذائها ابوعلها دكيت الخشب يمه لااحسدها همست ماما وين رايحين

--لبابا نشوفه

--الله واخيرا مناخذ عاشق

--لاصوتج لايكعد بس انتي حبابا راح اخذج

--اشوكت نروح يله

--بس اكمل مكياجي طلعي بره هسه اجي وراج

طلعت واني كملت عالسريع وعيني بعاشق اخاف يكعد ويجلب جبير يفتهم ماكدر اخذه راح يتعقد اذا اول شوفه لابو بالسجن ولاراح يصدكني بعد هالجذبه

استوني اطلع وكعدت عمتي اشرت اشش

--وين رايحه

--لغسق اشويه واجي هيا وياي ماتاخر عينج بيهم

--سدي الباب وراج وجيبي وياج مسواك ماعدنه ماكدر اطلع

اشرت اي وطلعت قفلت الباب كمشت هيا تمشي عالبطيئ رب الفهاوه والثول بتي

دنكت شلتها وكملت طريقي وصلت للشارع اجرت تكسي صعدت خليتها بحضني وكعدت يم الباب صارت بيه خوفه من كثر القضايه الجنت اقراها
تنزل الام قبل لاتنزل بتها تروح السياره وتضيع الطفله

وصلت وهاي تتنعوص الطريق كله تريد تكعد وحدها كوه كامشه روحي لااكتلها احس طاقتي بده تخلص بعد ماعندي قدره تحمل

وصلنه نزلت ونزلتها وياي لكيتهم داخلين متاخره

بسرعه رحت للتفتيش دخلت هيا كدامي تركض

خلصت راحت وراها دخلت لكيتهم كاعدين يسولفون

وغيث اديه بجيوبه يروح ويجي منتظرنا شافني باوع وراي مالكه احد خله اديه ورا راسه يباوعلي بقهر

انداريت اباوع مسافه بيني وبين هيا تسرح بدون فهم متدري وين رجليها ماخذتها ومستمره بالمشي

ركضت وراها كمشت ايدها انداريت باوع لغيث تغيرت ملامح وجهه بلحظه

اجه يمشي بسرعه وصل دنك شالها يباوع لوجهه ضحك وباسها وحضنها يشتم بيها

اباوع عيونه تلمع كوه كامش دمعته وخرها رد يباوع لوجهه وهيه صافنه وخرت شعرها عن اعيونها

رد حضنها واخذ نفس منها طويل صارت عينه بعيني ابتسم

تركته ورحت يم الولد سلمت وكعدت رد جود منين هاي

--لكيتها بالشارع اتكدي جبتها اربيها ويه الحيوانات العدي

--هاي تشبه اختج بس عيونها تختلف

--اتعجبك حتى الثول نفسه

شال راسه اركان يباوعلنه عيونه تريد تاكلنه كلتله على شنو ضايج لوماثول مرتك ماطلعت بتي هيج

--انكتمي وهاي اشوكت صارت

--وره السقوط مالتكم

--بيها الخير بعد شعدج مفاجأت زتيهن كلهن لاتضلين كل يوم هافتنه بصاعقه

--خلصن اخر ماتبقى هاي

كام جود اخذها من غيث يبوس ويسولف وياها يضحكون على شكلها وهيه تتصفن

اخذولهم اشويه وجابوها وكعد خلها غيث بحضنه ويمه جود يطگلها بصابيع ايده ويضحك

كام كرم كعد يم غيث من الجهه الثانيه ه كال نااي جيناتج قويه هم نفس الايتات

جود. هالكد ماجان يصنف بيها غيث ربك هفه بثنين مثلها

همه يحجون وهو مويمهم مامصدك بيها وكفها على رجليه وكمشها من خصرها يبوس بخدودها

ضاجت اتنغزت مسحت وجهه ضحك وباعلي اتذكرت من جنت اسوي هالحركه دنكت

اتحسر لباله موبحاله وبردت مشاعري مايدري امنيني هسه اكوم اخذه لحضني

بعده على جماله وترتيبه مامتغير راجعه تسريحه شعره تشيرته المفضل

درت وجهي حتى لاينتبه اباوعله
خلاها بحضنه كالها بصوت ناصي تعرفيني منو اني

--هئ

--اني ابوج

--غيث

--اي غيث يروح غيت

--كل يوم اكول لناي اريد اشوفك

--اااوف بويه تردين اتشوفيني واني اصلا مادري بوجودج

--حتى اگلك عاشق يعضني

--ول يابه اكضبو اشلعلج اذاناتو

--علي ياكل اكلي

--اورو ور الج

--ننو اخذت لعابتي

--اجيبلج محل هو وصاحبو مجانها يروح ابوج شنو تردين بعد

--عاشق ناي تبسطه يبجي

حضنها وباعلي عيونه تلمع وهو يسمع بته تشكيله بكسره

كام كرم باسها من خدها وكرصه صاحت باباااا

--يروح ابوج

--بابا جعص خدي

--هسه اطكو الج بس ماكلتيلي شسمج

--هيا

صفن عليها وباوعلي دنكت اخذ نفس وابتسم رد يسولف وياها

اباوعلها اشلون يلكف ويسولف طاير بيها وجود يسالها عن اسولف عاشق من جهه وكرم يتحرش من جهه اكثر من ساعه وهمه على هاي السالفه لمن صاح غيت كافييي يبه خبلتو البت تركوها

اركان. هذا منهو ولك غيث واكع للجهال طگ بدون رحمه هسه بتك ماترضه حتى يحجون وياها

--وانت جيب جهال عشيرتك المهتلفه لبنتي

--يله اشلون بت وامها الهتره

--هاي الشيخه هيا ازغر احفاد بدعه

هيا . لاحفيده رضيه ماتعرفها انت؟

باوعلها غيث بس نظرته اتغيرت

--بس هيه اتحب عاشق هوااااي وتضرب ناي لان تضربه

هز راسه اخذها لحضنه حضنها حيل باسها وانطاها لجود كله كوم اخذها بره اريد احجي ويه ناي

كام اركان كله اني هم اترخص

سلم حضن غيث كله الشغله كملت ماضل جثير

--حظرلي الشباب كون اطلع الكي كلشي جاهز

--الكل مناطرك حتى التسليم اجلتو لحد ماتطلع يبوي اشكد مشتاك لذيج الايام

--هانت ماضل شي طالعلهم وانت جود خويه المطعم رد فتحو وكرم العماير سلمهم للمكتب خلي ياجروهن

اجه كرم حضنه وبجه ضحك غيث

-- افا تبجي وانه اخوك

--مامصدك غيث راح ترجعلنه

--ارد واشلع اذاناتك اذا تاخرت عن الشغل

--كول لناي خلي تطبخلنا دولمه واني اطلع من وكت

--يول وين تحجي انت ناي صارت المحاميه ناي الالجي جلمه زايده منك اتهفك وره الشمس ديربالك على اذاناتك لايطيرن

وخر كرم حضنه جود كله رايحين كبلك لاتتاخر

--جاي يخوي ماگصرتو كفيتو وفيتو ونعم منكم

--استعجل حتى تروح وياي انمشي عالعالم

--زواجك عليه هديه

--بمناسبه شنو

--الله رزقني بهيا

كرم. لعد واني مورزقك بعاشق

--وجه الفكر دمرني عاشق بجيتو نعل ابو اصلي

--ناي شمري بالشارع وانت استعجل اطلع حتى اتجيب غيره وتزوجني

--ههههه ابشر اول اسبوع اجيبلك المره لايدك

--احلف

--يول بدون لااحلف موش اخوث مثلكم باگي سنين بس ادحگ ماعرفت اخطب

اركان. اتلعمو وهو هينا خلف بره ماضيع دكيكه من عمرو تارك الحلفان والثول الكم

جود. ههههه اي بعلي يله نروح احنه

غيث. توصلون سالمين

سلمو وراحو اخذ هيا يلكفون بيها

كمت اجه قريب مجرد وصل يمي اتخربطت مشاعري كلها

دنك همس اشرتلج عش ماتسمعين الكلام

--فوك مانقذتك

--لوكاضبيج حتى شهادتج يسحبوها

--اطلبك صارن ثنين

--وهيا الثالثه بس هم مالج شي يمي

درت وجي ردت امشي كمش ايدي رجعني لمكاني باوعلته غمض
-- بويه اشكد مشتهي اخذج لحضني

--انت تركته

--ادري اسف الدنيا كلها ماراح تشفعلي يمج اشلون خلصتيها من غيري

--ادرس ورابي اطفالي بهدوء عايشه بسعاده انام براحه اتمنى ماتطلع حتى اكمل

--وعمه الساده مامرت ليله وغمضت عيني مثل البشر احسب للاسبوع بالثواني واكف بالباب مناطر مثل اليتيم اتأمل بلكي يحن كلبج وتجيني

--خيرتك

--الخيارين بيهن موتي بس الفرگ الاول بالحرگ والثاني دفن حدر التراب واني اشهگ النفس

--واختاريت الثاني لان تعرف مابيه خير وراح ارجع احفر واطلعك

-- اخذتي حيفج وزياده من حيلي اسنين واني عيني بالسما اترجه ربي بكلب ملجوم يرف كلبج عليه الجان مصبرني شي واحد

--شنو ؟

طلع ورقه فتحها صورتي مرسومه واني اضحك غمازتي بارزه

--منيلك هاي

--عدنه رسام جنت اگضي اليل ويا اني اوصلفو دحگي اذا اكو غلطه وحده بملامحج الج حگ

--نهيت كلشي قبل لاتدخل تركتني اواجه مصيري وحدي

--ماتركتج لوما مأمن كلشي الج مالبالي اطول بس مااجت بيدي عدل وانتي استعجلتي رحتي واختفيتي اخذتي بدل حگج اضعافو خليتيني بطرگ نبضات كلبي كمت ادور عطرج بكل جزء بيه صرت مثل المذبوح عالنص ويترجه الرحمه

--اتريد اسامحك كول منو كتل هلي

--اخذي جهالج وروحي لتركيا كملي حياتج غادي واني جاي وراج

--ماتعبت وصلت لهنا اذا ماجنت مقرره اخذ كل حق الي

--راح تضيعين نفسج ناي لاتجبريني ادز احد ياخذج انتي والجهال يحجزوج لحد مااطلع

--وانت لاتجبرني اسوي شي اخليك اتعيش طول عمرك متندم

عكد حاجبه اشر شنو

--خسرت تعبي وسهر ليالي وشكو حلم بديت احققه بس حتى اخلصك

--راح اعوضج

--ماريد عوض لان اني الي اختاريت هالحياة واني الخسرتها بس ثمن رجوعي الها اخسرك غيث لاتجبرني اسويها

--وداعت هيا وعاشق وداعت كل ليله سهرتها واني احلم بعيونج وضحكتج ادفنج انتي وعايشه وانعل ابو كلبي اذا رف ناي الي براسك شيلي لان ماراح ارحمج

--اخر مره اسألك منو همه

--ناي قبل لاطلبين الطلاگ موش تصيرين بأسم واحد راسج يطير

دكدكت على صدره كمش ايدي عصرها سحبتها وطلعت

وصلت للباب درت وجهي لكيته على وكفته خال اديه وراه راسه يباوعلي بخوف

طلعت لكيتهم رايحين ضال بس اركان قبل لااحجي اجه شرطي كال الباشه يريدك

--ناي هاج بتج لشوف غيث شرايد

--مارايد شي بس لباله بعدك ماتندل مكاني كال خلي يوصلج ويندل مكانج

-- اها ان شاء الله اتصافيتو

--اي الحمد الله اخذني لبيت الي بي ماما

--شعدج

--اريد اشوفها

--يله صعدي

اخذت هيا مارضت تجي ضلت مجلبه بركبته صعد خلاها بحضنه صعد شغل السياره

يمشي ويبوس بيها خال ايديها عالاستيرن هيه تضحك وهو يضحك على ضحكتها

اكتشفت جهالي اشكد جانو بعازه ومتلهفين ابو بحياتهم

درت وجهي للشارع اتريد تحجزني غيث وتضيع كل تعبي بكل سهوله

عيني بالشارع ماحجيت لحد ماوصلنا لبيت اشويه ابعد من بيت عمي اخذت هيا ونزلت كال ساعه وامر عليج

--اني اخذ تكسي

--لااني عندي شغل هينا ساعه واخلصو

--تمام يله اخذ راحتك

رحت للباب دكيته فتحته مريه عرفتها ام سروان سلمت كالت اتفضلي بيبي

--اني بت ام عاشق

--ناي هلا يبيبي دخلي

دخلت شايله هيا لكيت ماما كدمي دموعي وحدهن نزلن

ذبيت هيا وشهكت وركضت شبكتها ابجي بصوت عالي هيه مصدمه

وخرت كمشت وجهه بوسته كالت ناي

--اي ناي ماما مشتاقتلج

--بعد وكت وين جنتي استوج اجيتي

--جنت حالفه مااشوفج اذا ماعرف الي كتلو اهلي

--واشلون عرفتي منو كلج غيث ؟

--ليش ضميتي عليه ليش خليتني اتعب كل هالتعب

--ناي تركيهم الله قبيلهم

--راح اتركهم صار عندي جهال بعد كمت اخاف عليهم

--عفيه بنتي هسه عقلتي خليهم يولون هو الله اخذ حقهم خالج متبهذل بالدين واخو مرته دوم موصاحي بالشرب ----

لاتنسو التصويت ♥️