لبوة على شفا الثار

بارت الرابع والاربعون

لبوة على شفا الثأر

                                      بقلمي :leo Alfatlawi

Ins:le_m3r

بارت الرابع والاربعون

***ناي***

صداع قوي  صوت بجي وجهي احد يحرك بي

عيوني غواش عليهن مااشوف

فتحت روجعت سديتهن صوت رويدا وهيه اتكول ناي فدوه اروحلج بس اصحي

غسق اتصيح مانلحك انتهت خليها نايمه احسن

الصوت اتلاشه رجعت بغير عالم

فتحت عيوني الشمس بوجهي مسحت عيوني ردت اكول الدنيا افترت رجعت نمت فركت راسي

درت وجهي غسق نايمه هيه وكاعده لامه رجليها لحضنها ورويده تباوعلي صافنه كامشه ممه عاشق و عيونها حمر

انداريت لكريوك عاشق فارغ كمزت رحتله ماكو بس جاروبته ومداليه الصليب عالمخده

شلتهن  اريد احجي انشل لساني

بجت رويدا بصوت

كعدت غسق مسحت وجها وكامت اجت يمي همست بكسره  وينه

--ماندري

--اترجيته اتوسلت بجيت كلتله اموت اذا سويتها

--ناي اهدي

--ابني بعده زغير مالحكت اشبع منه

--بس اهدي وين يروح قابل هسه نلكي تلكي اخذه لشقته وين قابل

ركضت للفون طلعت رقم غيث ايدي ترجف  اتصلت ماكو خارج التغطيه دخلت على صفحته اتصلت
--رد رد غيث ابوس ايدك رد رددددددددد

شمرت الفون
كمشت راسي كعدت راح ابني اخذه

غسق. شدراج هو اخذه

مارديت كمت لبست حذائي وطلعت اركض نزلت عالدرج نسيت حتى عمليتي ماشوف كدامي بالي يم غيث اركض مثل المخبله واتوسل ويه روحي

وصلت للشارع وكفت اجر تكسي وصعدت وياي غسق   كلتله اسنيورت

اريد اسيطر على رجفه جسمي ماكدرت غمضت ماكو بلساني بس غيث دخيلك لاتسويها بيه

غسق. ناي بطنج دتنزف انفتحت عمليتج

--اشكد صارلي نايمه

--ولج بطنج

--اشكددددد صارلي نايمه

--من البارحه اصلا مندري هو الي اخذه لبانه انخطف كعدناج ماتكعدين رويدا خبرت كرم  كاللها لااخذه غيث بس ما متاكد

--هو جان محضر كلشي دخيلك يارب كلشي اختبرني بس ابني مااتحمل اخبارك صعب يارب

شنو الذنب السويته ليش هيج دتعاقب

--نلكي ميلحگ يروح بس هدئي وكمشي بطنج

--هذا يمشي عالكيف كليله خلي يوكف انزل اركض بلكي الحك

--راح نوصل بس صبري

اكل بظافيري وباوع للشارع   لساني انشل ماعرف اندعي

وصلت للعماره نزلت ركض دكيت الجرص على شققهم وادك بالباب حيل

انفتحت دخلت صعدت الدرج عالسريع لكيت كرم واكف بالباب شافني دنگ

نزلت دموعي كلتله لاتكول راح

نزل كمشني

--ابني وين كرم

--ماعليه اهله ماياذو

--لالا غيث مايسويها بيه ماياخذ ابني مني يدري بيه اموت ورا

--تعالي دخلي ملابسج كلها دم

--وووولك ابنييييي يما اوليدي اخذو من حضني يما بعدني ناشبعت من ريحته

دفعته رحت لباب شقته ادك حيل واصرخ افتح غيث   لاتسوي بيه هيج ولك امووووت غيث افتح الباب عاقبني بأي شي بس موابني

--كلتله اتمووووت لاتسويهاااا

--ليش ماكلتلي مواتكول انتي اختك اشلون خليته ياخذه يما ابني زغير اخاف حتى اكمشه كرم

اريد ابنييييي رجعليا كرم ابني اموووت والله

--كافييي راح اتموتييين

--راح عاشق هاي هيه بعد ماشوفه

حسيت الدنيا افترت وصارت ظلام

فتحت عيوني بالمستشفى يمي جود ابتسم كال الحمد الله على سلامتج

شهكت دنك مسح دموعي
-- يرجعه والله

--مالحكت اشبع منه

--بس صيري زينه وروحي اخذي من بين عيونه

--جود خبره يحبك راح يسمع منك

--والله خبرته وتعاركت وحجزت راح اروحله 

--اخذني وياك اروح

--ماتكدرين تتحركين عمليتج مفتوحه ردو كبسوها 

--صيح لكرم خلي يحجزلي اروح وحدي

--ممنوع اطلعين منا ليومين ناي عقلي اني رايح بلكي اكدر اقنعه

--شنووو وروح اهلي اطلع وخلي احد يمنعي وخرررررر

دفعته وكمت احس بطني انشكت عصرت روحي  كام طلع يركض  دخل ويا اثنين دكتوره وطبيب 
كمشوني هو والطبيت  واني اصرخ وارفس اريد بس يهدوني

رجعوني سحل للسرير اتلاوه وياهم ماتركوني لمن ضربوني ابره ثواني وبعد مااحس

يومين واني على هاي الحاله مايخلوني اصحه مهدء وره مهدء لان حالتي تعبت كلشي  وعصابي انهارت
ماتركوني لمن انهديت صدك ومابيه بعد حتى احجي بس دموعي تنزل

فتحو الاخياط والعصر سجلولي خروج

طلعني جود وغسق كوه امشي رجعت للشقه دخلت صار كدامي كريوكه احس روحي شاطت ردت اكمشه جرتني غسق رجعتني لفراشي كعدت وعيني بي

غسق.  ناي ارتاحي شويه وخبري بلكي يحن كلبه

--ماراح يحن كال مكان امج وانتي جاي دورج

--شعرفه ولدتي واشلون سوه صوره للجواز

--اخذوله صوره كدامي جوازه كامل من زمان بس زوره صورته يمه صدري مورم ابني جاع ولج غسق جاع ابني

--مثل ماهو عزيز عليج هم عزيز عليه هذا ابنه ماراح ياخذه بذنبج

--راضيه كلشي يسوي بيه خلي يعذبني يضربني يحبسني يطلع شكو غل بداخله بس لايعاقبني بي ولج استوني حسيت اني عايشه استوني ضحكت براحه واني اشوف ربي رجعلي  عاشق بحضني

--صح كسرتي بس هو يحبج ماراح ينطي كلبه يعذبج كم يوم ويرده

--ماراح يرجعه لان مايكدر يعاقبني غير بهاي الطريقه واني ماانتظر بلكي يحن ويرجعه

--شراح اتسوين

مارديت كمت  لكنتوري ادور عالجواز طشرت الملابس هوست الدنيا ماحصلته

انداريت لرويدا جانت تبجي

--وينه

--ماكو ماخذه غيث بس هويتج موجوده

--ليش ياخذه شنو هالظلم ربيييييي تعببببت

--سوي غيره

--اشوكتتتتت اشوكتتتت كليلي ابني راح بعد ماشوفه ولج يكتلوووو ام عامر ماتخلي عايشششش هسه اتموته

--مايخليها غيث

--مايدري غيث مايدري منو يكول بعده عايش يجوز مات اي الي ميرد عالاتصالات يجوز ميت

رحت لكريوكه اتلمسته وين انت يماما عايش لحكت الراحو  هم بجيت هم جعت ودورت صدري

اااخ يمه تعالي  كليلي شسوي اشلون ابرد النار الي بداخلي

شلت جاروبته اشتميتها وخليتها بصدري
كعدت يم الكريوك بس المداليه والجاروبه بحضني كلمن تركلي ذكره تاخذ روحي

مرت عليه ايام متمر حتى بالحلام جنت بكابوس عيني متغمض كامشه الفون منتظره غيث يفتح جهازه لو واحد يرد

لكمه ماكدر اخلي بحلكي وصلت لمرحله مااكدر حتى اتنفس عيني بملف عاشق  احلم رجعلي  ونايم بي

صار الفجر كلبي احسه انفطر مابيه اتحمل بعد
البنات نايمات

كمت على كيفي لبست قمصلتي وطلعت نزلت من العماره رحت امشي بدون شعور ماعرف وين بس اريد اتنفس مخنوكه

ماشفت روحي غير كبال عماره غيث

كعدت يم الباب لميت رجليه اباوعلها اشوكت ترجع اشوكت يحن كلبك وتكول كافي هالكد اعذبها
ارجع وسوي بيه كل الي يخطر على بالك والله اتحمل منك اي شي بس رجعلي ابني

فركت كلبي احسه يريد يطلع كل انواع الالم مريت بي بس مثل هذا لا

احساس صعب موت عالبطيئ لواعرف هيج معزه الطفل اتصير ماجان اتوسلت واترجيته بس حتى انسوي

اتخيلت شي عادي مثل حبي للباقين ماتخيلت راح اكون مستعده انطي روحي بس لشوفت وجهه

وجه الصبح وكفت سياره نزلت منها ساره باوعتلي وضحكت كالت ها فر الطاوله بيج خلاج تكعدين كعدته

--جنتي تدرين

--لا للاسف غيث شغله كله دفن بس ادري ناوي يرجع ويطلگج بس يطلع الاربعين مالتج

--اشوكت يجي

--مااعرف بس اعرف محضرلج مفاجأه راح اطلع شكو قهر شافه من عينج

--لاتكولين يأذي ابنه

--لالا مولهلدرجه البارحه حفله الطهور والعالم عازمها كلها صح سكتاوي لان حزنانين بس هذا ولي العهد صاحب الاملاك العايشين بيها كلها جدته سلمت كلشي اله

--عندج صوره

--امم عندي وحتى فيديوات مال الاحتفال  فدوه لحبيبي  غير بالبس العربي طالع يجنن وهو يلعب جوبي ويه اركان فرحان ابأبنه

كلتلها بتوسل خلي اشوف ابني فدوه اروحلج والله كلبي ميت على لمحه وجهه

--كومي بسرعه تعالي وياي لايشوفج كرم تالي يخبر غيث دخلتي شقته ميرضه

كمت وياها دخلت عالسريع متلهفه على شوفته انطتني فونها كعدت اباوع اشلون بيبي  شايلته  واتهلهل وطش جگليت عليه هو وغيث

صوت الرمي خابص الجو عيني باابني زغير ملفلف مامبين منه شي خالته بحضنها  وتضحك وغيث يمها يمسح على خده ويصور

جابتلي مي ساره اخذته وشربته بدون لاانتبه
بكد ماجنت مختنكه دقايق ارتاحيت راح كل قهر عن كلبي اتمددت مرتاحه وطايره  رحت بالنوم ماكعدت اله نص اليل صدري يوجعني من الحليب

كمت كعدت راسي مصدع شلت فوني الساعه ٣بليل
طلعت صفحه غيث لكيته متصل ماصدكت  ابسرعه دكيت طلب فتح كام فتحت باوعلي وضحك بكسره

--ليش غيث هيج سويت بيه

رفع حاجبه

--وينه بس اشوفه

--منهو هو

--غيث جوعان صدري ديدر

--شبعان ونايم بحضن عمتو

-- ابوس رجلك سوي التريده مستعده لاي عقوبه بس ابني لا دخيلك ادري غلطت واستحق اي شي بس موعاشق

--منهو عاشق يولي

--غيرت اسمه

--طبعا غيرتو غير ابني بس عاشت ايدج من غير تعب وتفكير حصلت ولد عالجاهز

--خلي اشوفه الله يخليك

--ماراح دحگين وجهو لمن تموتين

نزلت ادموعي كلتله بكسره بس هالمره كلبي يوجعني غيث والله بعد مااتحمل

--اويلي يابه بالقران شلون جنت ناويلج نيه اربيج بيها بس حظ خرب بأهلج  شايله بخت  انحجزت هينا  ماكدرت اردلج هم هينه لاتفرحين جثير ماطول  رادلج تاعلمج اشلون تنهزمين

--غيث بداعت كل غالي على كبلك والله راح اموت

--هذا الموت مايحجي بي الدخل وعايش كل وجعه

--اتندمت والله وروح عاشق جنت ناويه ارجعلك

--هه جيثر متأخره والندم بعدو لسه مادحكتي منو شي راد وشوفج الندم على اصولو وراس ابني كل ليله سهرتها واني عيني بالباب بلكي يرف كلبج  وترحميني راح اطلعها من عيونج يلا ولي

--لالا لاغييث غيث بس اشوفه هيج من بعيد الله يخليك بس المحه

اخذ حسره

شهكت اباوعله بتوسل

غلق الفون احسه شك كلبي رجعت اتصلت غلق فونه

بجيت بصوت احس الخنگه بگلبي طلعت ساره على صوتي كالت شگعدج

--توسلت بس اشوفه حتى لومن بعيد مايرضه مايررررضه

--ناي لاتوكعيني بلوه دره انتي يمي

--ولكم حسووو بيه داموووت نار بكلبي مشتعله

--اوو انتي راح اتضلين اتنوحين واني راسي يوجعني كومي طلعي رجعي لمكانج 

--اشوكت يرجع موانتي تدرين

--والله هالايام عالاساس بس صارت مشكله ويه اهل المكتول ومحجوزين كلهم

--ماراح ابجي  خليني هنا فدوه اخاف يرد واني ماادري بي

خليت ايدي على صدري غمضت ربي احمي ربي والله كلبي بعد مابي فكد كلشي ولاابني اخذ من عمري وخلي على عمره

--هااج شربي مي

--ماريد

--راح ترتاحين بي مهدء احسن ماضاله تنوحين العالم نايمه لايشتكون علينه لو تكومين اطلعين

جنت بحاله ماميز بين الغلط والصح كلبي  خالي ردت اي شي يهدئني

اخذته منها بدون لاعارض شربته صدك ماكو دقايق ونمت

اسبوع  ماكو غيث من اخر اتصال گطع كل برامج التواصل

حالتي سات اكثر كاعده بغرفتي القديمه لاالتقي بأحدولااحجي ويه بشر منتظره جيت غيث بالثواني

المي اتحول لحبوب مرتين اخذ باليوم بدون وعي اذا اتأخر اشويه اتخبل ماعرف شسوي املخ روحي بدون لاحس

ساره خالتلي شريط مهدء  بالمجر كلما احس راسي صدع اخذ منه ثواني واعيش غير شعور حتى ابني انساه

مر اسبوعين حتى تمشيط بعد ماامشط حتى السبح اسبح وكت مااخذ علاج عالسريع واطلع ارجع اكعد وره الباب لاافتح لباب للبنات ولااحجي ويه احد يسولفون من وره الباب لمن يملون ويرحون

كاعده وكت العصر كامشه مداليه والجاروبه بيدي اباوعلهن اخر ذكره بقالي منهم

اشلون صار شكلك هسه اكيد اتغيرت وكبرت

كمت تفطن تباوع بعيونك

ابوك ديلعب وياك  اكيد فرحان بيك

هم مكتوبلي اشوفك بيوم لوصرت حلم الي

كمشت راسي رجعتلي النوبه  كمت بسرعه للمجر لكيت الحب خالص وساره ماكو
كمت افتر بالبيت مثل المخبله ماعرف شبيه

ضليت اروح واجي بس اريده يهدء ماصدكت ساره فتحت الباب ودخلت رحتلها اركض اشرت شكو

--راسي راح ينفجر

--وشرايده

--ساره انطيني من هذا الحب 

--ماعندي خلص

--لالا فدوه اروحلج ولج راح اموت

--كلتلج ماعندي وهذا غالي وانت ماشاء الله كاعده لاشغل ولاعمل هم اكلج وهم علاج منين اجيب

--اشتغل وارجعلج كل دينار اخذته منج بس رحميني راسي راح ينفجر

--عندي ابره وهاا بس هالمره غاليه هاي

--شنو هذا ادمان الدتنطينياه

--اي ادمان متردي تركي مولازم

كمشت راسي ورجعت كعدت افرك بي غمضت ناي شدتسوين بروحج راح تصيرين مدمنه بطلي اتحملي بس يوم وراح تتعودين 

اشكد حاولت اضغط على نفسي بس   كلما جايه يزود  ماكدرت اصبر اكثر بس هالمره اخذه وابطل بعد مااخذ اي بس اليوم

كمت رحتلها للغرفه لكيتها اتبدل شافتني كالت ها شقررتي

--بس اليوم انطيني

--ناي حتى لو جيتي اتوسلتي بعد ماانطي تدرين سعر الوحده بيش

--لالا مااطلب

--وغيث ميوصله الحجي والنبي يحركنه اني وياج

--هو اصلا مديتصل اشلون يوصله

--غير بسببج اتورط واحد من اهل الكاتل شامرله حجايه عليج وهو منهي ماخال عضم صاحي بي وردت الهوسه من جديد

--كلتله طلكنيي ليش ماطلكني

--اي موهو ابو الجبان بدل مايدور مرته ويعاقبها على السوته  يكوم يطلكها صار اشهر لايعرف ليله شنو ولانهاره حتى للعراق مانزل مايكدر يراويهم وجهه

-- يمه راسي راح ينفجر فدوه بسرعه راح اموت

--تعالي داعلمج اشلون تاخذيها اخاف تعتازين واني ماموجوده

--لامااخذ اخر مره

--قبلج كلنها دتعالي كعدي

كعدت جسمي كله يرجف وخر ارداني مديت ايدي شدتها. ودخلت الابره ثواني مواكثر وعشت بقمه السعاده شعور كأنما طفل بصباحيه العيد

اتمددت واني مبتسمى ضحكت كالت ها حلو الدنيا ترديني ابطل شفتي السعاده

--نعست

--لاتنامين حرمات اتضيعين راحتها بالنوم

--راح ابطل بس اليوم

--بعد ماتكدرين اتبطلين جسمج اتشبع بس لاتكولين لغيث اني علمتج

-- ماراح يرجع ولاراح يدري

-- لاراح يرجع بس يصفي السالفه كل يوم يتصل سال عنج اخ اتمنيت روحي مكانج ليش فضلج عليه شنو بيج يختلف

--حتى يزيد عذابي وحياتي الظلمة

--والله لو ماخذني مكانج جان صنته ابد ماسودت وجهه كدام اهله جان اتحجيت وصرتله جاريه جان عبدته وحبيته اكثر ماني حابته هسه

شنو الفرق مومتزوجج هو

بالخفي محد يعرف هذا الشي بس اصدقائه واني والله تركت كلشي حتى بابا وابد ماخنته حتى بتفكيري اشكد عذبني ابد ماعترضت قبلت بأابسط الاشياء حتى من دخلج لحياتنا صح اكرهج واتمنى تموتين بس اتقبلتج  لخاطره لان عرفته عاشكج من جواه بس انتي ماتستاهلي

--راسي دفتر

--اني بس الي استاهله اني حبيته اكثر من روحي عايشه بس لان هو موجود ماخليت احد يلمسني وتركت كل عيشتي القديمه وكتفيت بي والله تبريت حتى من بابا وگطعت اتصالي بماما مثل ماطلب ضليت بدون اهل بس حتى يرضه عني

--ساره داحس شي على عيوني وجسمي خدران مداحس بشي

--غيرت لبسي صرت البس محتشم واذا طلب مني اتحجب راح اتحجب وحتى من الشقه ماراح اطلع ماريد حتى صديقات ادري بي يحبني بس ليش مدايعترف بيه اني مالي ذنب انولد بهيج عائله ولاذنبي ابوي موخوش ادمي ليش ديحملني مسؤولية هالشي وماراضي يخليني بأسمه اعرفه يحبني بس مديقبلني زوجه كدام الكل

--ابني اشلونه همسولفلج عنه

--ماعرف مااسأله وها اذا تردين علاج راح انطيج رقم غيدا هيه تنطيج اني بعد ماعندي واخاف غيث يدري والله يذبحني

--كلتلج مااريد راح ابطل

كمت احس الدنيا تروح وتجي سندت نفسي كوه وصلت   لغرفتي دخلت كعدت عالكرسي اخذتلي بالربع ساعه اتحول الخمول لنشاط موطبيعي   حتى كلبي بارد ولاتكول اكو شي

باوعت وجهي تعبان صاير سحبت المشط مشطت كمت  اخذت قمصلتي وطلعت نزلت لكيت كرم عالدرج كال وين رايحه

-:للكوافير اريد افلوس

--ناي بيج شي

--لابس ضايجه اريد اغير من روحي اشويه بلكي اطلع من الحاله البيها

--ناي شصاير وياج

--هههههه ولاشي شبيك بس مرتاحه وداحس بطاقه ايجابيه ماريد افوت هالشعور اعرف مزاجي متقلب هسه اشويه وارجع للحاله خليني استغل وضعي

--ولو خايف من هالحجي بس هم زين اتسوين اشكد تردين

--ماعرف اي شي انطيني ورروح لرويدا خلي تسحب وتنطيك

--الله يطيح حظج على حظ رويدا امشي اني وياج رايح داشوف وين اتولين

--هياته هنا كرم شبيك

--ميخالف اكو عالم خاتله بحضن اهلها  وسالكه ابهاتنا بالاوامر امشي

رحنه للكوفير دخلت وهو ضل كاعد بالباب
سويت وجهي وعدلت شعري سويت اضافيري اتصرف  تصرف اني ماعرفه شنو يجي طيف عاشق بعيوني واضيعه ماريد اذكره

خلصت طلعت صفن بوجهي كرم ابتسمت  كلتله تره مومخبله اشبيك

--والله لوتتخبلين هواي احسن اقلها واحد يشمرج بالمستشفى ويأمن

--جوعانه

--يخسى الجوع ياام عاشق

باوعلته بكسره همست وينه عاشق

--ناي ناي دااريد احجي وياج بخصوص رويدا

مسحت عيوني شبيها

--اريدج تساليها اذا اخذت اهلي ورحت خطبتها تاخذني

--وين جنت هالوكت كله

--ناي ماتعرفين بيمن دامر  بس بعد مااكدر مجاهلتني صارلها اشهر ماتحجي وياي والله كلبي خلص ماضل صبر

--كرم انت مصعبها تكدر اتغير دينك وتتزوج ماطلبت منك غير اتصير بأسمك وتعيش وياك هنا

--لاراح اخطبها من اهلها اريدها برضاتهم اطلعها منهم بدلتها كدام الكل ماريدها بالختله

--احجي وياها اليوم اكيد راح توافق

--ماكو حاضرتني وبالمطعم اتكول غريبه ماتحجي وياي كلمااجي افاتحها اتصدني وتفشلني اتخليني اخجل وبطل وحدي

--تعبت تره اهلها مستغليها راتبها وشغلها كله الهم وهمه مامعتازين  وانت شالع كلبها الابنيه ملت كرهت روحها

--تجين وياي انروح الها نحجي اني وياج

--مابيه والله اريد ارجع انام

--لعد اختك واختك ويين ام تك غمازه يلا اخيتي الورده اعزمج على عرنوص يلوگ للعيون الجنهن عيون بزون مصدوم

--يلا واعزمني على لفه ميته جوع

--استغلي استغلييي امداج من دون الخوات قفاصه 

رحنه للسكن دكينه الباب فتحت الباب  رويدا باوعتلي وضحكت حضنتني حيل مامصدكه بستها وهمست كرم وياي

--ليش جاي

--دندور على عروس اله كلنه بلكي تعرفين وحده منا منا بت حلال

صوت غسق اجه من جوه انييي خوش بنيه والله متربايه مرتين موافقه

--ههههه لكرم مولجود

--شوف التفرقه غير اخت نعال انتي ولج غير تزوجيهم سوه ليش اتكسرين بخاطر جود يلا ميخالف اني اخذه ونزوجهم بنفس اليوم

طلعت من الغرفه ضحكت ركضت حضنتني

--مشتاقتلج صخله

--والله اني اكثر اشلونجن شنو ماكو اتفضلو

--خلي تلبس حجابها القديسه تعالو هنا ادخل كرررم اووي لعبتي غير انت

دخل سلم امدنك اديه بجيوبه خجلان

--هلابالنسيب وصديق الكيكه. ادخل دااسويلك كهوه بالملح

--راضين يابه بس كون صاحبتج ترضه

--اني اخليها ترضى غصبا عنها بس خبر صاحبك وقنعه ياخذني وياها عالواهس

--مابيجن وحده تشتغل لوجه الله شطلعن وانت صديقات القفاصه يله لج وين نكعد

--غير عريس انت اخجل ابني عييبب هيج تحجي

باوعلها رافع حاجبه

--ابوس امك خبر جود خلي يجي يخطبلك ونلبسه بيه

--لواتأذنين اذانين  وتصلين بالكنيسه  ماياخذج جود

--ليش عيني وين يحصل مثلي اشو جمال وهدوء وكياته

--منو هاي امج

--ناااااي احجي وياااا راح يطير العريس

دفعت كرم كعدنه بامكان الضيوف دخلت رويدا سلمت وكعدت بعيد مدنكه ماتحجي

راحت غسق اتحضر الكهوه كل عقلها نص ساعه واني متربعه عالقنفه خاله ايدي على خدي واباوعلهم منتظره اشوكت يبلشون

اندكت الباب راحت غسق فتحتها واجت تدفع بجود من ضهره كالتله مفاجأه

--هههههه خير مجتمعين

--اي ديخطبولك اني

--اهاا خير ان شاء الله

--ماكلت وافقت لولا الي هيه اني

--بنتي بعدج طفله لاتحجين هيج حجي

--شنووو موهاي ناي بكدي معرسه صار قرن

--هذا القرن انكسر روحي سويلي جاي يلا بابا حبابه

دخل كعد وهيه اتخصرت تباوعله بغضب ضحك ودنك راحت اتسوي جاي اشويه واجت دخلت كالت كطعو الغاز مامسددين الفواتير

--جذبتي كعدي مااريد بطلت

--اي همزين صدك جود اني اتعاجز من الشغل اشلون اذا اتزوجنا منو يشتغل

--امي بس سكتي رحمه لدينج

--سمعتووو راح يتزوجني عيب انت رجال وانطيت كلمه ميصير ترجع بيها

--لاحول الا بالله

--انت ماتجي اله باسم امك والقميص

--حلوو كملت غسق بابا كومي جيبلي مي

كعدت اتربعت دارت وجهه هز ايده وكام راح للمطبخ صاحت جووود جيب وياك مي لهنا حباب والله ميته عطش

--من عيوني

--وسوي جاي عيب عدنا خطار

--ماعدكم اماعين اغسلهن ماطولني واكف بالمطبخ

--لارويدا دتغسلهن اول بأول

--لعد ماتتعلمين

--ابرد المي بارد ترضه اتمرض

--اسم الله بكرم ولابيج

كرم. لاياناقص

--بالمبارك لكيت حلكك احجي ماطولك حصله قبل لاتيهه

غمزت لغسق تكوم

كمت وكامت هيه رحنه للمطبخ خليناهم يحجون براحتهم

دخلنه للمطبخ لكينا جود صدك واكف يم الطباخ يسوي جاي

راحت يمه غسق بحجت علمني اشلون اسوي واني وكفت احضر اماعين الجاي طلعت كعك من الحافظة خليت بالصينيه

انداريت لكيتها  شابكه اديها وره ضهرها واكفه اتصعد برجليها وتنزل تحجي ويا منسجمه

وهو رافع حاجبه يتسنط بتركيز ماسمعت شكالتله لان تحجي عالكيف

بس هو عظ شفته وكرص خدها رد للقوري طفاه

شكلهم حلو ينگرطون كياته

جاب القوري وخرني وكف يصب كال ليش جوه عيونج اسود

--من السهر

--يهون وتصير اسولف تجين تشتغلين وياي تلتهين اشويه

--ماادري خلي ارتاح اشويه واشوف

--هدوئج كلش مامطمني وراها مصيبه

--هه لاتخاف راحت ناي القديمه ماراح اتشوفني غير واني هيج

خلص صب واكف يباوعلي كال خبرج

--لاصاير شي

--لابس دااسال

--جود والله كلبي بعد مابي يتحمل كول شنو اكو ماطولني داخل صدمه حتى فرد مره اتجاوز كلشي سوه

--وداعت عيونج ماكو شي بس وضعج وطريقه كلامج مال وحده عايشه بهدوء وراحه

--ليش كطع اتصاله

--ماگطعه مخبوصين اهل الكاتل محاصريهم صح ماخذين عطوه بس هم موأمان على ساعه يغدروهم ضالين حذرين واله هو جان ناوي يرد ثاني يوم

--يعني اي ساعه يدخلون للبيت ويكتلوهم

--اكيد لان عمه الناقص ضام راسه يخاف يسلم روحه وكم مره رادو يفصلون رفضو ذولاك يردون دم وصايره هوسه ضالين مناوبات محد ينام  امم ماكلتي شنو سبب الراحه

--ماعندي شي اضوج عليه ليش حتى ماارتاح

اخذ حسره وابتسم خربط شعري

شال الصينيه وغسق ماعون الكعك تمشي وتكرط ورا

دخلنه للغرفه الضيوف لكينه كرم يم رويدا كاعد اشابك ادي ومدنك ورويدا تمسح بدموعها

غسق. انكول مبروك

كرم. اي ابوج عرس جود والحمزه صدك اتفل بوجهك اذا خالها بعقلك وناوي تاخذها

--ليييش هاااا لييييش خاف ربك راح اعنسسسس رويدا لاتاخذي ميفيدج طردي موخوش ولد ذاك اليوم شفته ديحجي ويه وحده

--لاياجلبه اشوكت

--ذاك اليوم نسيت يم ابو الطماطه

--هسه جذبتي جذبي عدل مالكيتي غير ابو الطماطه اتواعد يمه غبيه وجذابه وقزمه  وكسلانه وفاهيه ماخاله صفه رذيله مامكتسبتها

--وصديقتك نسيتها

--تف عليج ناي منين لكيتها هاي

--جود ترضه هيج يحجي وياي

جود. صدك انتم تحجون يابه زعاطيج اشبيكم اي كرم مافتهمنه شقررتو

--اخذكم وروح لهلها نخطب

--حاجيت غيث

--اي كال اشوكت ماقررت احنه جاهزين نطلع لهلها نطلبها

--وخطيبها

--هاا مو شسمه من ذاك الشهر اه هو

--غيث سلكله الطريق

--لابس حجه ويا اتفهم هو وفصخ الخطبه

--واضح بذيج الحاله وبس حجه ويا بعلي لاتكعدون انتم اذا ماتسولكم مصيبه ماتطلعون منها غير بروسكم

خليتهم يحجون ورحت للغرفه دخلت كاريوك عاشق على حطته رحت اله شلت مخدته اشتميتها واخذتها لحضني
غصه بكلبي محد يحس بيها غير ربي

مشيت اصابيعي على فراشه اشلونك حبيبي

تدري لحد هسه ماتغمض عيني اذا ماتخيلك بحضني بعدك وألوليلك واحجي وياك

حسيت ايد على متني انداريت لكيت جود كال موكافي

شهكت كمش وجهي مسح دموعي
--وعلي يرده

--ماراح يرجعه

وخرت ايده وطلعت رجعت لشقته بسرعه لان احس مفعول الي اخذته خلص

دخلت ركضت لغرفه ساره فتحت الكنتور لكيت كم شريط واكو اثنين ابر

اخذت واحد من الاشرطه طلعت حبابه اخذتها ورحت لفراشي

صار شهر على غيابه مامنه لاخبر ولااتصاله
بدل الحبايه كمت اخذ اثنين والابر كل يوم وحده بليل

الراتب يادوب يجيب اربع ابر كم مره اخذت من كرم مرتين من جود والباقي من ساره بالدين لان خفت كامو يسالوني وين اودي الفلوس بالاخص جود اكثر من مره اتعارك وياي حس بسبب الهدوء البي

نسبت الثلوت بدمي صارت تعادل اضعاف المدمنين من سنوات موبيدي غصبا عني انجرفت لهذا الشي بالاخص من سمعت راديلهم عالثار  حسيت ابني راح يكون الثمن هالمره واذا خطته غيث يموت وابني يكتلنه ورا

صارت الساعه العشره بليل واني واروح واجي بالبيت منتظره ساره رايحه اتجيبلي الابره

اخذت حبايه مافادتني مفعولها قليل
كلعت بالبالكون اعصر براسي كل دقيقه اتخيل اشمر روحي حتى اخلص من الالم وكوه اصبر روحي

انفتحت الباب ركضتلها قبل حتى لاتحجي طلعت ايدي وربطت الواير

--ناي هاي اخر مره

--ميخالف بس ظربيني

--كل مره اتكولين وتردين تبجين وتتوسلين كلبي مينطيني اتركج تره الطلب صار هواي

--سارررره سااااره راح اموت ضربييييني وبعدين احجي

--جود اتعارك وياي كال ابلغ غيث وتدرين غيث ماراح يرحمني اذا عرف

--ماراح يبلغه ميدري اخذ انطينياها ابوس ايدج

--ناي تعرفين اني بدون شغل وغيث يدزلي الفلوس ماكدر اخذ اكثر لان راح يشك والطلب صار عليه هواي كامو يداعون

--بس هالمره بعد ماكلج جيبي

-- ولج غيداء اتكول اريد افلوسي خلي ادبرهن الي لواخذهن بطريقتي

--اني انطيها

--منييين تنطيها وانتي بلا شغل وحتى لواشتغلتي عشر سنوات متوفيها

---ساره راح اموووت

راحت لغرفتها راحت وراها طلعت نيدل سحبت الدوه كعدت ضربتني ثواني واختفى اي الم اتحول لراحه

اتمددت غمضت عيوني كالت ناي

--راح اوفيها الفلوس

--منين اتوفيها لالبالج  اطلبين من غيث راح يعرف وبدل العقاب الجان ناوي راح يعلكنه اثنينه من شعرنه ويحركنه

--مااخذ من غيث

--لعد منين اتريدهن باجر

--شسووووي ابوووك انطوني مهله

--اشتغلي وياها بضرف يومين بس اتسددين كل الدين وتلمين لعلاج مال شهر

--بيج شي انتي ششتغل

--اكلج اني مالي شغل بعد تردين علاج روحيلها
راح احولج رقمها اتصلي بيها واتفقي وياها هذا غيث ديتصل صوتج لاطلعي راح ارد

كالتها وردت --هاحبيبي --لاجنت نايمه استوني كعدت اشوكت تجي--

شنو الشهر الجاي تره اتاخرت شعدك ---اووو ماخلصت لسه  --لا بالشقه مالتك هههههه مشتاقتلك

كمت من يمها فتحت الباب طلعت وسديته بس السده اجت قويه اسمعها اتكله وداعت بابا  مابيها شي اصحى مني

رجعت لغرفتي اتمددت عالجربايه حضنت مخدتي

اشويه وانفتحت الباب اجت يمي كالته شوف هاي ناي النايمه

صارت صورته كدامي باوعتله كوه افتح عيوني لكيته نايم بغرفته وبيده جكاره ضحك كال كافي لوبعد شتكولين

--هه ماريده بعد خلي يمك

--اووف هيج كلبج قوي

مسحت خشمي وغمضت

--ندمتي

--اني مااندم بس عينك بي حتى لاتفقده مثلي العناد ماورا بس وجع الكلب

--وجعج كلبج

--كبر

--امم وكام ينتبه 

--هم دور عليه

--اول الايام جان يدور على صدرج

--مادگ كلبك وحسيت بي وهو يدور امه

--للاسف لا كلبي وكف عن النبظ من ذيج الساعه

--بس كلبي لا غيث تعبانه

--بعد وكت التعب

حكيت ركبتي وحضنت المخده

-شماخذه ناي

--اذا طلبت منك اشوفه راح اتخليني اشوفه

--ناااااااااي شماخذه

--اريد اشوفه

--اشكد النسبه التاخذيها  ومنين

مسحت خشمي

--من بعيد بس المح شكله اشلون صار

-- شنهو نوع التاخذي وياكلب ابن كلب انطاج وين الزماييييل عنج

--والله راح اموت على شوفته بس هيج بسرعه راح اكتفي وعد ماراح اكلك راوينيا بعد بس اشويه  الله يخليك

--سسساااااره

ساره. حبيبي ماادري هيه تطلع من الصبح ماترد لليل شدخلني

--انعل ابو ابوج شنهو التاخذه

--مهدء موشي قوي شفت الشريط الصبح بيدها وهسه جنت ناويه ابلغك

اخذت الفون فركت عيوني حتى اكدر افتحهن  واحجي ويا

--ناي سحبي عينج من جوه

--مااخذ شي لان مانايمه هيج ماكدر افتحهن

--عجل خليج مساهر لمن تبطلين جذب

--لالا اخذ اخذ مهدء حتى شافته ساره

--مهدء امم طلعي ايدج ولاتجربين حظج وتعترضين بالقران اسدو واخلي شوفتو حسره بكلبج

كعدت خليت الفون سحبت البلوزه ايدي ترجف

راويته ايدي الزينه سحب نفس من جكارته  ضحك بستهزاء وغلق الفون

رجعت اتصلت رد نعم

--اخذ حبوب

--من اشوكت

--ماعرف

--يانوع ابر تاخذين

--مثل الجنت تاخذه

--الله يلعنج عشر سنوات مدمن يالله وصلت لهاي المرحله خبله انتييييي

--كلت راح اشوفه الج

--منيلج افلوسهن

--راتب بابا

--نااااي سعر الابره براتب ابوج منيلج افلوسهن

--بس اشوفه ابوس ايدك ابطل ابطل ماخذ بعد

رد يغلق الفون بجيت بصوت اسمعه يلعن ويستغفر

كام طلع من الغرفه دخل لغرفه سماهر راح يم كاريوك حول الكام

نايم صفح خدوده مدبدبه صايره لام روحه
احسه اخذه كلبي

وخر الكام همست بس اشويه والله ماشبعت منه

--لاتبجين تهيري جايج

--اشوكت

مارد غلق الفون

كمت ماكدرت انام من الفرحه من كال راح اجي

مجرد ماخطر على بالي راح اشوف عاشق   ماعرف شسوي

كمت طلعت ركض نزلت بره العماره  وكفت يم الباب انتظر اتكول هسه راح يجي 

رغم برد الجو بس  من اخذ العلاج افقد كل احساس

كعدت لميت رجليه عيني بالشارع   اتذكرت الاطفال الجانو يلعبون ونوكف اني وغيث نباوعلهم ونضحك اكله اشوكت يصير عدنه اطفال

درت راسي للدرج منا جنت اصعد ركض وهو يضحك عليه وين وصلتنا ليش خليتني اشوفك عدو بوجه حبيب

بعدني احبك ماكرهتك بعدني اشتاقلك واحن لدفو حضنك

خليت راسي عالحايط  اباوع للنجوم شضامتلي الدنيا بعد

ماتعبتي مامليتي مني ليش هيج خالتني بالج

للصبح واني على كعدتي لمن  افتحت الباب وطلع كرم شافني اجه كال خبله انتييي شكو كاعده بالبرد

--الجو دافي

--حلو يعني اتخبلتي رسمي كومي باجر جاي غيث

--هو كلك

--اتعاركت اشكد حاولت امنعه  حتى جود اتصل بي مصر الغبي بس يطلع يكتلو وهو قافل مثل الزمال 

--راح يجيب عاشق

--راح يجيب جوازج وتكدرين اتخلي يردج اتشوفي

--ماراح يخليني اشوفه اعرف شناوي بهاي جيته  واني هم مااريده بعد راح اذي بدون لااحس

--شبيج ناي شصاير وياج اليشوفج يكول اول مره تتعرضين لمصيبه

--كرم شي متحس بي لاتحجي بي

كعد كدامي كال والمسيح حاس واعرف ماكو اعز من الابن بس شسويلكم اذا كل واحد يحارب الثاني بأعز شي

--ماتركني مو تركته اني ليش اخذ ابني

--لان يدري ابنج اعز منه وانتي اعز من ابنج عنده

--هم يجي يوم واشوفه

--راح تربي وتكبري وتسجلي مدرسه بس كليلي مالحكت اشوفه المن يشبه

--هه يشبهلي حتى غمازته

--لابربج حيييييل والحمزه يستاهل منو تاخذه هذا بالله وين انحصل زوج مثل غيث وترضه بي

ابتسمت

--كومي وياي انروح للمطعم 

--ماكدر تعبانه ونعسانه

--يابه صار اسابيع  نايمه يانعسانه دكومي وذاك اليتيم جود ضال  بس يتهدد اتكول جلب شالعين ذيله تالي راجدي واحد من الغثيث ينكتم

--اشوكت شفته

--كل يوم يجي للمطعم يسال عنج مايريد يوصل لعماره الجلب رجلج وكلما يوصل يسوها هوسه ويه ساره شاك تنطيج مهدء

--ماتنطيني لايخاف هيه تستمتع بعذابي

--كومي خلينه نلعب بحلال الغثيث رجلج نفتح اليوم مجاني على روح ابو

--هه مينطيك كلبك اتكول على روحه

--هذا اخوي

--واني

--انتي اعز من اختي والحمزه صح صايره جنج ابو ابريص سالگي حذاء ماريد ادمر شخصيتج بس ناي وجهج يگطع الرزق

--من حلات اذاناتك ودتصنف كرم العده وجهك ميحجي

--اتعطلت رايح ارجع الكي ملابسي مغسوله والدولمه تبقبق راح اجيب جود وياي ياكل يلا لج

كام انطاني ايده كمشتها وكمت
راح واني دخلت صعدت لشقته مهوسه ردتها من الله شي يسليني ويلهيني لحد ماشوف غيث كدامي

وكعت تنظيف وجلف لمن انهد حيلي
طبخت اربع انواع اكل الي جمدته والي خليته ياكله للعصر واني على فد وكفه لمن بعد مابيه اتحرك وراسي وجعني

طفيت الطباخ باوعت للشقه لاماادخل لازم ابطل اذا اريد ارد ابني لحضني كون اتحمل اي اتحمل شنو يعني اصعب منه وتحملته ----

***لحن***.

سديت الاتصال ويه ناي رجعت لفراشي  رن فوني فصلته  بسرعه لاينتبه احد شلت راسي كلها نايمه

رد اجه مسج ثاني فتحته مكتوب طلعي  ياغضب الله لابالقران اطفر واسحلج من نص البيت

--شرايد اركان

--انعل ابوج لاابو اركان لحنننن طلعي

--مااطلع روح منا

--هيج الحجي عجل انتظري ودحگي الراح اعملو

كمت بسرعه سلقيت باب المطبخ ورجعت ركض للغرفه فتحت الشباج رفعت رجليه اباوع بالحديقه اخاف طفر صدك

رن الفون فصلته رجع رن رديت قبل لا يكعد احد على صوت الاتصال همست شتريد اركان

--اشتعل اصلج  وين وليتي

--داقفل بالبيبان والشبابيج حتى متكدر تدخل

--اهااا حلو دحكي يولي الج دقيقتين اذا ماطلعتي ادخلج وافشگ جهامتج بالنص

--مااطلع روح لااصرخ واخلي العالم تلتم وياخذوك للسجن  عزه يحبسوك وبيبي بدعه تجي اتزورك وتجيبلك اكل وامك توكف ادعي عليه

--لحن

--همم

--طلعي ماسويلج شي بي احجي وياج

--كول والله مرتين  لبالك ماادري شتريد اتسوي وهاا صدك اشلون تضرب سمار وتكسر ايده موخطيه

--الي تنمد ايدو على حلال غيرو موش بس تنكسر ايدو لاتنبتر من الاصل وانتي اكضبج لولا وروح اخيتي اطرج بالنص

--متباهي عندك عضلات تره ازغر طفل بمنطقتنا  يكتلك وحتى سمار لالبالك خاف منك وماضربك لاانتي كلتله اخذه على كعد عقله خطيه وحيد امه لاتضربه

--اوووويلي يابه اذا كضبتج شعمل بيج طلعين مصلخه لحن مو هينه

--اي اطلع وافتر واسوي الاريده  مالك دخل موخلق غيري روحي الها يااخي لاتلطش اشكد لزكه

اخذ حسره

--ههه ضل بس اتحسر كلشي ماتكدر اتسوي لان اشتكي عليك

--ضحكي يولي اذا ماطلعت حليب امج من خشمج مااتسمى عالزلم

--منو كلك انت زلمه تذكر لو اذكرك من كتلتك ناي

--الصبر ياصاحب الصبر

--وين انت

--عش يولي ترديت تتأكدرين تااتهترين  براحتج مو هينه يولي كلامج هذا حرف حرف راح اطلعو من بين عيونج ولسانج اكضبو ابترو من نص حلگج

--مااتلحك لان راح ارجع لذمه سمار وبعد مالك حق  تحجي

--كونج مره وتعمليها ماگلج  اطلگج منو  لااهذه شغله افشل من وجهرتج  بالقران احول زلمتج حرمه واربطكم ويه الحلال غادي اتكملون حياتكم

--ميت  غيره لان احلى منك وكيوت وهم ارجعله مااخاف من تهديدك  الي بس حجي

--لحن لحنن صبري بده ينفذ والقران  اطفر الباب وادفنج بمجانج وانعل ابو اليكف بوجهي

--ماتكدر واحد جبان

سكت مارد عضيت شفتي اضم ضحكتي عرفته فول

سمعت باب السياره انركع حيل سديت الشباج بسرعه همست وروح بابا يااركان بس تطفر اصرخ

--موش جاهل واطفر وخلج   كد كلمتج من اگضبج لاتضلين تتوسلين

--مم عود ميخالف يله روح

--رايح يبت انهار بس وروح اخيي اذا دحكتج  طالعه مجان بدون ستر لوشعره وحده باينه من راسج راح تكون نهايتج

-- اهووو هم رد يهدد ابني موطلكتني  مالك دخل البس ابكفي

--حلو عجل  عمليها ودحكي اليصيرلج

--بعد اكو اوامر

--تتهزلين يولي هين ماضل جثير عود وكتها خلي حضن امج يحميج 

--اي والله ذكرتني بحضن ماما يسوه حضنك الف مره  دافي وناعم اشكد جنت مظلومه وياك

--لالبالج جوه البيت وماعرف شتعملين لحن او لااا مماراح احلف ولااهدد على سالفتج  بس سمعي يولي بنفس الدقيقه الي تخلين راسج بحضنها اعتبريها مدفونه

--مرييض

--عفيه مريض خبل كولي التردي وداعت ابوي ازغر غلطه تكفلج جثير ديري بالج على نفسج  حتى لاتبجين

سديت الفون موعاقل خفت من حجيه رجعت لفراشي نمت ردت اكمش ايد امي بعدين اتراجعت خفت صدك يسويها اعرفه. موعاقل ولايخاف من الكتل

مر كم يوم غالقه الفون ومااطلع من البيت مو خوف بس ماريد مشاكل اعرف ياخذله فتر ويمل بعد مايسال

ناي بعد اخر مخابره هم غلقت فونها مانعرف عنها شي وتعودنه هاي حالتها من جانت فارغه موهسه عدها طفل

كعدت الصبح على صوت بيبي ام سروان فتحت عيوني كالت كومي بيبي اتريكي راح الوكت

--وين ماما

--راحت ويه بيبيتج  عدها مراجعه بالمستشفى يلا حبيبتي داروح للسوك كومي سدي الباب وراي

كعدت لميت شعري كمت وراها سديت الباب رجعت جوه رن الفون شلته مكالمه فيديو من ابنيه رديت مريه متوسطه محجبه حلو شافتني ابتسمت كالت اشلونج يحلوه اكيد لحن

--اي لحن والحمد الله

--اني ساري بت ام سروان

--هلا خاله بس بيبي ماهيه طلعت استوها للسوك

--خليها براحتها من اترد اخبرها اشلونج انتي ماما سولفتلي عليج هواي بس ماتخيلتج هيج حلوه

--شكرا خاله انتي الاحلى

--مارجعتي لهلج بعدج يم ماما

--اي بس حنطلع اني ماما دتدور بيت بس كم يوم

--وليش طلعن هيه منو عدها خليكم وياها اتلهوها خطيه فرحانه بيكم

--لاثكلنه عليها خطيه زين منها المره استقبلتنا ابيتها كل هالفتره

اجت وحده تقريبا ابكدي لو ازغر يمها اشرت سلام

--هلو عيني

ردت بالانكلش ضحكت امها كالت هاي بتي دتكلج اشلونج

--ماتعرف عربي

--لاالزغار مايعرفون بس ولدي الاكبار يعرفون لان صار بغداد قبل لااهاجر  اي لحن شدتسوين

--دارتب البيت واحضر غراض الطبخه حتى تجي بيبي تلكي جاهر

--عفيه بالشاطره ياعيني خليكم وياها والله تسولفلي بيكم وطايره مامصدگه سوده عليه من يوم الي لحكني اخوي وهيه بروحها ضاله مگابله الحيطان

--ماعرف والله ماما التحدد هالشي موبكيفي

ضلينه انسولف اكثر شي هيه تسال واني اجاب عن حياتي
خليت الفون عالاستاند اشتغل واحجي وياها لمن صار الضهر سلمت لان اريد اسبح

خبرت ناي هم ماكو وغسق حاضرتني ماعندي غير اندعي اتكون بخير  تركت الفون ورحت سبحت وطلعت لكيت ماما وبيبي رادت بس وجهه مكلوب اجيت يمها كعدت كلتله خير شكو ماما قلقتيني

بيبي. ماكو شي حبيبتي بس رجلج خبرنه كال اريد احجي وياكم عاد كلتله احنه بالمستشفى عندك شي مهم تعال هنا لان منكدر نستقبلك بيت العالم

--اي شنو الصار

--امج انغثت ليش كلتله تعال

--اجاكم

--اي اجه بالبدايه كال حقكم عليه ومن هالحجي اشكد حلو واسوالفه من يحجي بهدوء رزن وكل عقل امبين رجال تابع للعرب انوب طلب يردج على ذمته امج كالتله ماردها الك اله اذا مخبله بعد السويته بيها

--شكال

ماما. وليش مهتمه لحن ماما اشبيج صدك تسالين اركان شيلي من راسج مااردج اله لوينكلب ذهب ذوله عرب ماما

--لاماارجعله بس داعرف شنو مال

--ماكال بس خليها بحضنج منا لمن اتموت الي متصير الي متصير لغيري وهاا ممنوع تطلع للباب بس لكيتها طالعه اشلع راسها والله شايف روحه لو حقه مالاكي واحد عدنه

--لاهو حتى من ابو وعمامه ميخاف هم يوكف بوجهم ويسوي الي براسه بس امني مايضرب مره بس يدفنها هيه وعايشه

--وفرحانه حضرتج

--لاماما داكلج على اطباعه بيبي بدعه اتكول امسودن ابو يكلها ترباتج مايعرف شنو رحمه يشتغل بدون ذمه

--لويموت مااردج انوب يباوع لبيبيتج يكلها هسه اشلون اوصيج على لبسها  وانتي راد واحد يلبسج اشلون جنتي عايشه ويا

--هو حباب بس مريض يغار حتى من نفسه عمو  يگله طگ روحك طلقه بلكي نخلص من اسوادينك

--لحن ماما اني لوموجوده فلاازوجج مثل هذا هذا سمار الفاهي براسه

هزيت راسي اي بس كلبي معصور مااكدر احجي لان اشوفها معصبه اخاف اتعيط بيه

دخلت مرة عمي  وبيبي ام سروان  تركتهن ودخلت للغرفه اضوج من جيتها اسمعها تتعذر من بيبي وتبوس بيها

للعصر اجه عمو هم يتوسل بيبي  لان صارلها كم يوم عدنه زعلانه ماتركوها لمن رضت عنهم ورجعت وياهم ضليته بس اني وماما اشكد كمت احس روحي ثكليه وخجلانه من وضعنه

الشغل كله شايلته عنها وماما الطبخ مانخليها اي شي اتسوي انخلي الصينيه كدامها ونشيلها من اتخلص

اشكد العوز صعب ومذله بس ماجان عدنه مكان انروحله مجبورين

كاعده بليل بالحديقه اباوع للنجوم واحجي وياهن اجت ام سروان كالت هاي وحده متصله عليج

--صديقه ناي

--ماعرف ردي عليها

اخذت الفون كلت الو ردت صوت سهيله كالت اشلونج

--هلو ام حسام

--منو يمج

--ماكو بس بيبي وراحت جوه ليش

ماردت ثواني واجاني صوت اركان كلتله ماطلعت ولاشفت احد ولانمت يم ماما

--عفيه ببنيتي  الي تسمع الكلام عش اتصل  مغلق

--مومغلق بس هذا جهاز بيبي ودوم عالصفحه مالتها ليش صاير شي ناي بيها شي

--لاماصاير شي لحن محجوز   بمجان بس اتحرك انجتل   ماكدر اجيج ابروح اخيج   لاطلعين   بالقران  عگلي راح يختل واني اتخيلج طالعه والنكس يدحگ لشكلج

--شرايد اركان

--عيونو لاركان  رايدج وروح اخوي  ماضل بالكلب حيل يحمل كل هالشوگ

--مارجعلك

--عش يولي

--تسال ليش لعد منو صرخ بوجهي تذكر من ردت اتشوهني بالجگاره

--انجعل ايدي بالكسر

--وهنتني

--انجعل لساني بالشل

--وطلكني

--جلمه نطقتها وعضيت اصابعي ندم وراها والخلق الكون  احبج احبج شنهو وحگ كلام الله اعشگج

اخذ حسره وهمس   مشتاگ لحضنج وشمت عطرج

هو يحجي واني احس حلكي انشگ من الفرحه

--امج الله هداها  تردج لحضني

-- اتكول حيوان هذا مومال مره خلي يدورله حيوانه مثله حتى تكدر تتحمل خباله

--حيوان؟

--هيه اتكول اني اشدخلني

--وانتي كلبج ماحن وعفيتي عني

--سويتها مره وندمت ماعيدها

--حگج يولي عبني موش ازلمه حرمات الشوارب على وجهي واني ماعرفت حتى احميج  بس وحگ اليعلم الغيب  كلها اجت عكس وياي
لحن

--همم

--مشتاگلج وكلام الله بس ادحگ وجهج مالمس شعره منج وروح اخوي روحي عطشانه لشمه عطرج

--موتكول مكان خطر مااكدر اطلع

--بس كولي اي اطلعلج لوبنص الموت

--حجي لسان هذا

--حگج النايم اليل مومثل  الي مناطر يطر الفجر تايروح لدرب ولفو بس حتى يدحگ عتبه الي داستها اجدامو

--لعد ليش من جنت اسالك اتحبني اتكول لا

--لان ماحبج

--اررركان

--يولي اشكد مشتاك لاسمي بالسانج اشتعل ابو اركان على ذيج الساعه الكشره الي نطقتها بيها

--بيبي دتباوع روح داكوم

--انتظري شنهو اليرضه امج

--ماما تكرهك اتكول لو انطيج لجلب ولارجعج لاركان

-- الجلب احسن مني يله نعبرها شنسوي سلميلي عليها وكلها خلى اتخفف اشوي من هالكلمات العسل تركج من امج انتي شرايده

--سويتها مره واتندمت بعد ماعيدها

--اجيب اهلي واجي لهلج اطلبج منهم ودفع ثگلج مهر واگضب شاربي لراحتج التطلبي  كبل لاتگولي نافذ

--ماريد ارجعلك ولاعيش وياك

--عش يولي

--اركان والله اجذب عليك اذا اكلك اتخطيت السوتو بيه لونسيت الخوف المريت بي كل انواع العذاب جربتو بيه

--واذا كلتلج اشيل كلبي واخلج مجانو اليگرب يمج امحي من الوجود

--حتى ماما مترضه

--المهم انتي ترضين لحن لاتردين الجواب اخذي كل وقتج منتظرج  لاخر العمر

انسحب الفون من ايدي شلت راسي ماما كمت وهيه ردت انت لوعندك صدك شرف ونخوه ماتضحك على عقل طفله ماكفاك السوتيه بيها

---اسكت خليني احجي - لا حجتلي على كلشي انضربت ونحبست  هذا كله وسكتنا بس مال تتختل نص اليل وتسولف وياها  هاي ميسويها بس الماعنده شرف  --زواجكم غلط جان. انت ناس همج ماعدكم غير الموت   شيلها من راسك ماانطيها الك لواعرف اتضل عمرها بدون زواج

--شنو بكيفك هيه لوبحضنك لوبحضن الكاع لااشو ازوجها ودااشوف شتسوي

سدت الفون وخزرتني

-اسفه ماما ماعيدها

--لحن اخر مره اسمعج تحجين ويا مره لخ اوديج لخالج كافي ناي ماعرف اراضيها وين ضيعوها الي

--مااحجي ويا بعد

--ماما ميفيدج انتي حياتج تختلف عربي مزاجه صعب ماتكدر على عيشته بس الي رابيه ويا

--اعرف

--لعد وعديني ماتحجين ويا بعد لاتنطي مجال يضحك على عقلج ويعلقج بي

--لااخر مره بعد مااحجي ويا

--يلا دخلي جوه الجو بارد ودنشوف باجر مكان نكعد بي فشله من المره هالكد ضالين عدها حتى لو  انضل بالامام لحد ماتفرج

دخلنه جوه رجعت الفون لام سروان كعدنه هنه بسولفن واني كلبي يم اركان احس ماما قست عليه هواي صح صعب مزاجه بس مو ذنبه حياتهم هيج خلتهم

گطع تفكيري بكلام ماما كالت لحن ماما تكدرين اتسوين كبه

--اي اكدر بس المن

--حتى اروح للاسواق افتر عليهن خومونضل هيج المره تصرف علينه

ام سروان. ازعل عليج داده صدك تحجين

--والله خجلانه وادري ثگال عليج وزودناها بس ان شاء الله بس هالايام ونشوفلنا مكان والله ماقصرتي وماعرف اشلون اردها

--تردين اترديها انطيني لحن لابن بنتي ---

***ناي***

طلعت بره كعدت نفسهم الجهال بعدها تلعب   ضليت اتفرج عليهم واضحك على ضحكتهم

حرگني راسي فركته حيل وهزيته اضيع الالم حتى انسي

ضليت لليل على كعدتي الهي روحي حتى لارد واضعف كدام العلاج

اتعده الوقت فرغ الشارع  واني ساعه افرك براسي وساعه اكوم افتر

كرم اتاخر ماعرف ليش  الفون فوك

صارت العشره وهو ماكو  بعد مااتحملت حتى ماشوف

استوني اكوم وانفتحت باب العماره طلعت ساره بيدها فون تخبر

شافتني ضحكت كالتله شوف هاي من البارحه لسه كاعده منتظرتك بالباب  --لا ما صاحيه ---وين حتطلع انتظر دااحجي وياك --تمام راح انتظر اتصالك يلا باي

قفلت الفون كالت مصدكه يرد

--اريد حبايه

--ماعندي

--بس وحده من باجر راح اتعالج

--كلتلج ماعندي

--اتصلي بغيث هو ينطيني

--غيث كال حبسوها فوگ لاتخلوها تنزل اني جاي يعني ايسي ماتحصلين منه كلشي غير هو متمني تتعذبين

--ساره راسي راح ينفجر ابوس ايدج اخر مره اطلب

--عندج رقم غيداء اتصلي بيها

--ماعندي افلوس وهاي اله افلوس انطيني انتي الله يخليج وداعت ماما راح انطيج كل فلس اخذته منج

--ماعندي لاحبوب ولافلوس ولابر وهسه رايحه داخذ من غيداء افلوس  بسكوت عن غيث لان خلصت افلوسي عليج   هااا الي موالج لاتفكرين

--بس اليوم مااكدر ولج راسي رايح يطگ

--انتظري خلي اخبرها اذا تدايني

اتصلت بيها واني افتر افرك براسي مااكدر اوكف من الالم

ردت ها حبيبتي غيوو -- ههههههه لا جايتج بس هاي ناي اتريد منج خدمه --لالا اتريد افلوس تشتري ابره وراح اتوفيهن الج -- اعرف والله كلتلها كثر دينها بس شسوي كاعده بلاشغل --هاا امم تمام هسه اكلها واذا رضت اجيبها وياي --يلا باي لاتشغليني منتظره مكالمه من غيث

--هاا شكالتلج

--سمعتي كالت دينها كثر وماكدر ادينها اكثر بس اكو طريقه

--لاتكولين اشتغل عدها

--مم لابس تعالي وياي اكو يمها احد من سمعج كال خلي تجي اني انطيها

--المقابل

-- هسه بلا مقابل  انكسر خاطره ينطيج بلاش بس المره الجايه ماعرف انتي تقررين

--ماروح

--لعد خليج

راحت للسيارتها فتحت الباب صعدت اريد اتبلعم ماكدر الموت هواي اقل من الداحس بي

مثل الذابحني عالنص واخالني لااني ميته ولاني العدله اترجه الرحمه

احس روحي تنملخ شي ينهش بجسمي لاارادي بدون شعور جان تصرفي  ركضت للسياره وهيه استوها تتحرك مالحكت غير عالباب الاخير  فتحته شحطت السياره وكفت

صعدت باوعتلي وضحكت كالت اي عقلي شلعتي كلبي

-- رحميني راح اموت

--تعالي كدام

--ساااااره امشي بسرررعه راسسسي راسسي  راح يطگ

--غيث اذا دره بالمكان الراح اخذج بي يضيعج سمعتي

--خلييي يدري بلكي يكتلني واخلص

--بس هاي المره  اروح وياج   واذا دريت كايله لغيث اني الوديتج عليه وعلى اعدئي اكتلج واكتل روحي

--سوي التردي ابوس ايدج اتحركي دمووووت

-- عندي شغل  اوصلج مقابيل الشقه وارد انتي  اتصلي بيها تطلع تنطيج  الابره خو تندلين اتردين

--اندل بس استعجلي ولج راسي راح ينفجرررررر

من كميه الالم  كمت اضرب راسي باب السياره بس اريده يهدء حتى اتمنى ينفجر ورتاح

شحطت سيارتها لان شافتني وصلت اخري بعد ماحس شسوي

بالطريق وفونها رن خلت ابلوثوث بأذنها واشرت اشش ردت ها حبيبي --طالعه رايحه للشقه مالتي موكلتلك -- تمام حبيبي هياتني قريبه عالمطعم خمس دقايق واني بابه وصلت يم الجسر -- اوك هسه اتصل بعثمان يطلع انطي الامانه

هيه تحجي وانتبهت اكو شريط  بالتابوت اليمها

فتحته بسرعه اندارت كمش ايدي دفعتها وخذته جرته مني كمشت ايدها  عضيتها  حيل حتى اتهده صاحت  لااااا نااااااااي

فلت الاستيرن من ايدها صارت  سياره كدامنه رادت تضربها شحطتها ودارتها

مانسمع غير صوت هورن درنه وجهنه ونشوف وحده صفح من جهه ساره  اجت بكل سرعتها  دخلت بسيارتنا وشي حار اخترق جسمي ----

لاتنسون التصويت♥️