لبوة على شفا الثار

بارت الواحد والاربعون

لبوة على شفا الثأر

                                       بقلمي:leo Alfatlawi

Ins:le_m3r

بارتين سوه
علقو على كل ومضه♥️

***لحن ***

دخل  دنگ شال الفون وكمشني ودفعني كدامه طلعني من الغرفه  وكفت يم الدرج  باوعتله بترجي ردت احجي وكمش نزلني الدرج وصلنه يم عمي دفعني كدامه

--انت طالق

ابو اركان. لااا يبوي شبلاك

--طالق

--اررركان

--اندور مثل الزمايل ومحتارين وهيه تندلها

--صدگ يبوي لالحن متاتعملها بنيتنا

شمر الفون على غيث الجان كاعد منتجي يباوعلي بتعب

--رقمها يمك طلعو واعرف هيه وين

غيث.   ههه غشيم لبالك مثلك غبيه تلكي الف شفره خاله للتواصل

--هينه كومي لج اتصلي بيها

باوعتله عيوني مليانه دموع اشرت لا

--لحنننننن

--ماكول شتريد اتسوي  طلكتني مالك حق تضربني

--وحگ رب العباد اخلي جيله براسج وافصل اهلج احجي وينهاااااا

غيث. بتركيا

--عجل عش ساكت

كام خله اديه وره راسه

ابو غيث . لاااا زحمه والله ماتكدر تجتلها يبوي

باوع لعمي عيونه تعبانه ضحگ وهز ايده  شال الفون راد يمشي اختل توازنه كمش الحايط عدل وكفته وكمل مشيته طلع بره  راح ورا اركان

صاح ابو غيث  لمي غراضج 

ابو اركان. وين اتريد بيهااا

--لهلها مثل هاي حرام بيها العيشه

-- دكينه صدرنه ورحنه اخذناها من نص اهلها شنگلهم من تردها

--بتكم موكفو الواحد يأمنها على بيتو

--مايستگبلوها

--زتها بالشارع اروح  ارد ماريد ادحگ جهرتها هينااا اشمرها باب اهلها يطبها الف مرض الخذوها وان خلوها لاتردها حرام اخلي طلقه براسها

سماهر. وختها هم يبوي اغسل عارنه ورد هيبتنه بين العالم

--ااااخ اخوج كاضب ايدي ماعرف الولد شبي تسودن لايرضه يكول وينها ولايرضه واحد يجيب طاريها مطلع خبالو بالعالم ياهو اليكضبو يجتلو

--ولاراح يجتلها اكص ايدي اذا كضبها وعاقبها حدو يسمعها كم جلمه ويرد ويتوسل بيها لخاطر ترد لحضنو

--تسودن الزلمه بس اني عرف اشلون اعدلو اغسل عارنا واسد السالفه

كالها وطلع 

باوعت لعمي ابو اركان  كال عش يبوي هيج كصرنه وياكم

--مالي دخل بالصار هيه راحت

--وعش ماگلتينا بوكتها جان لحكنه بوكتها وتلاحكنا الفضيحه

--تذبحوها

سماهر.    تستاهل الدفن الي توطي راس زلمتها مجانها الگبر

ام اركان. موش كلتلكم من الاول عرفتهن ماوراهن بس الفضايح

ابو اركان.   انتن تنكتمن وانت  لو مره حوك بيج حظ جان كضبتي بيتج وعرفتي شيدور بي موش جهال مثلهن ورنه ور وانتي مثل الزمال تتصفنين وتزاگطين

--ياع دحگ هاي جاهله تربيه شوارع ماعرف منين جبتوها وبليتوني وصار اللوم براسي المفروض من انهزمت من اهلها وطت روسهم ماتجيبوهن

سماهر. العرگ دساس امهن منهزمه من اهلها عليمن يطلعن

ابو اركان. شرد عليج حرمه جبيره والشيب تارس راسج بس حگ شايله عگل حيوان اذا ماتربطين وينسحگ على راسج كل يوم تسرحين

--عمي اتركبنا الغلط لخاطر جلمه ودحك هاي جدامك حتى ماواحد منكم كلف روحو وطگها اشو ابنك حدو رمى اليمين وطلع يتزنح وره اخو خاف انگلو ردها لهلها

--الطگ موش للبشر حتى الحيوان هم روح وحرام بيها الظلم بس انتن كلشي محلل عليجن سماهر وروح ابني بكبرو اذا سمعتج واصله صوبها لو بس مسمعه البت جلمه وحده امدج بنص الوهاد واخلها دوس راسج

--ليششش عمي ليش هيج اتذل بينه تراني بت اخوك الجبيره وصاحبة كل هذه من بعد جدتي

هيه كالتها ومانسمع غير ضربه عصه بالكاع انداريته لكينه بيبي وكفه يم الباب اتباوعلها بستهزاء خلت اديها على العصه انتجت  عليها ورفعت راسها كالتها كملي عش انكتمتي

--بعد عمر طويل جده

--اي

--ماجنت اقصد

--وان قصدتي منهو يدحگ لو يسمع ضربه مداس ابو اركان خبرلي جسار كلو جدتك طالبتك

--لادخيلج جده وروح زلمتي هيج حجيت لايعمي والله زحمه بهالعمر انطگ  انجعلني بالخرس اذا عدتها

ابو اركان. دنگي على رجلين جدتج حبيهن وعتذري

اجت تركض دنكت بيبي خلت العصه بصردها ودفعتها

-- بعدي لغاد  لاتوسخيني  حدج توطين على مداسي موش صوب ارجولي عبنجن نگسات  لويسبحوجن بمي زمزم ماراح تنظفن

--عش جده موش اني حفيدتج العوده وحامله اسمكم  ماترفعين مگداري جدام السلف وتتباهين بيه تهينيني هيج

--اتخسى وحده مثلج تحمل اسمنا الاسم معرف منهو اليرفعو والحلال اله اهلو يگضبو من بعدي

--بعني شنهو

--الي براسج شيلي احسن ماخلهم يمحوج وانت يمه خبر جسار كلو خلي يهير المخزن ويكون مستعد راح ادزلو الازلام لخاطر يكمل الامرتو بي

ابو اركان. يمه لخاطر النبي بسج

--لاتخليني اردك يالجبير خليني محترمه مگامك الاگولو يتنفذ

--لحدمن يالحجيه

--لحد ماترد صاحبة هالمجان وتگضب كلشي مجاني ودوس روس العبيد لخاطر يمشون عدل ماتعبت كل هالتعب لخاطر اتركو بيد هوش اذا مانربطو يسرحون ويضيعون كلشي

ام اركان. منهو هاي عمه تحجين عنها واشوكت اختاريتي وحده تكمش المجان بعدج

--موش اني الاختاريتها صاحب المجان اختارها عبنها دواجن ومداسها بروسجن مارضت على نفسها الذل جازفت بالموت لخاطر تعيش حره

--ام غيث؟

--الله يرحمها بس مابعدتي جثير نفسها التاخذ ارواحن وحده وحده لخاطر ترد حگ ام غيث خبري اختج خلها ترد سهيله وكلها خلها تبطل تلعب بالنار تراها كربت صوبها جثير واذا كضبت بيها تحركها هيه وبزرتها

سماهر. منهو هاي التحجين عنها  من بنواتنا هيه؟

ماردت دفعتها بعصتها وانداريت لعمي
--اخيك ابو حمزه خبرو خلو يروح للبيت الجبير لحد مانفرغلو ونعرف شنعمل ويه اهل المجتول

ابو اركان. طلبنو عطوه منهم اسبوع

--حضروا الازلام وطوقو المجان زين كضبو المنافذ لخاطر اتسيطرون عليهم وخبر الشيخ ال--- كلو الجده بدعه طالبتك

--تامرين مثل ماطلبتي

--نفس اسمع بالبيت احركو بيكم غيث واركان اذا ردو خلهم يجوني لغرفتي

اشرو اي دگت العصه ودخلت

ابو اركان.   كومي يبه  لمي غريضاتج حتى اوديج

--ماريد شي مثل مااجيت ارد

--عجل  اتهيري وكولي المن رايده اوصلج 

--ماادري بس اروح ماضل حتى  لوبالشارع انام

كمت صعدت غرفتي بسرعه  مامستوعبه الصار

طلعت بنطلوني وبلوزتي غيرت بدون وعي جسمي يرجف  عقلي متبنج ماعرف حتى افكر  بس دموعي تنزل

باوعت بالمرايه على شنو تبجين شنو شفتي ويا وهيج محتركه حبيتي هاي هيه

طلگج يالثوله  وهو يعرف ماعندج

هيج هنت عليك اركان لعد وين حبك حتى لوغلطت تدري غصبا عني لوبمكاني اتسوي اكثر من هذا

اني اشلون هيج سويت بروحي وين اجيت والمن راح اروح شكلهم انهزمت ورحت اتزوجت غصبا عنهم وهسه تعالو استقبلوني

لعمي  ماراح يستقبلني
خالي يكتلني بعد السواه بي اركان

حتى ناي ادري راح يراقبوني حتى يحصلوها

كعدت بالكاع لميت رجليه لحضني غمضت عيوني خليت ايدي على كلبي

ربي اني مسني الضر وانت ارحم الراحمين

انفتحت الباب دخلت سماهر  شمرت جنطه
-- لمي زبالتج بيها

--مااخذ شي مثل مااجيت ارجع

--راح اطلعين هيج من البيت بالقران يذبحج اركان

--طلكني بعد ماله حكم عليه

--يلا كومي عمي مناطرج  حتى يوصلج 

--خلصت ماعندي شي

دنكت البس الحذاء اريد اسيطر على رجفه جسمي مااكدر

كمت طلعت لبست جنطتي على ضهري نزلت
رحت لغرفه بيبي اريد اودعها

لكيتها كاعد منتجه وبيدها سبحتها وعمتي ام اركان خانسه جوه رجليها 

دخلت باوعتلي بزعل  نزلت دموعي

اخذت نفس واشرت تعالي رحت شبكتها  خليت راسي بحضنها وشهكت

--عش يجده ضيعتي روحج بسبتها

--ضيعت روحي من طلعت من اهلي

--وين راح ترحين

--ماادري بس اروح منا

--شنهو الماتعرفي يريد يوديج المن ياخذج

--بيت عمي يم بيبي

--اخيتج وين

--ماادري

--اندل مجانها بعد مايفيد تضمين الحجي

--وداعتج ماادري سافرت بس وين ماادري بس كالتلي من اوصل اراسلج

--عجل شنهو التعرفي تطلكتي وانتي حتى روحج ماداريه عنها اشلون راح تعيشين يجده بهاي فطاريتج

--مثل ماجنت عايشه قبل ارد لبيت عمو

ام اركان. بس تخلص العده ياخذها ابن عمها

--اي وينو عنج بلكي يسمعج حتى يطر راسج   يلا جده عمج بالباب

هيه تحجي ودخل عمي وجهه مكلوب  كال تندلين بيت عمج

--بغداد

--اي منطقتهم بأي شارع

--لا ماندل

--عجل من انهزمتي منهم مادحگتي بأي منطقه جاعدين

دنكت مارديت

ام اركان. هاي كلكم طلعتو تدرون جانت منهزمه وراضيها

بيبي.  نجعل رضينه اندفنج حدر الخياس بدون جفن كالتها ودفعتها برجها

ابو اركان. يبوي بيت ماندل بس بيت خالج

بيبي.  اتصل بابنك الشفيه خلي يدلك المجان قبل لايرد غيث ويسويلنا سالفه

ام اركان. مايحجي مو جان موجود من طلگها اركان

--موش صاحي يالغوثه شارب لمن طالع من اذانو لو عندو اشويه عگل جان علكها من شعرها بالسكف وصلخ جلدها حتى يعرف حرمتو وين

كعدت مسحت دموعي  خفت من الحجي صدك جان تصرفه موطبيعي

عمي  اتصل دقايق واجه صوت اركان  كله امر يالجبيرررر

--مرض صوتك

جده. تركو منتاطح هو واخو

--وين بيت عمها

--شتسوي بي

--اريد اودي البت

--اتركها اني اوديها من ارد

--انطم ونص جلمه ماتحجي  كافي صخام وجهج جدام العالم  طلعتنا جهال ويييين بيت اهلهاااا

--يبه تيه مجانهم

--وحگ كتاب الله  يااركان اجيج اسحگ على جهامتك وانعل ابو الجابك عليه انضب وكول بيت اهلها وين لازتها بنص الشارع وانعل اليوم الي بلاني ربي بيكم

--ب---يم --- هسه ادزلك رقم عمها اتصل بيهم حتى تاخذها

--عندي رقمو لاتعب روحك وكونك تلعب لعبه من وتفر السالفه وروح ابني   اكضبك اطلع شكو اسوادين من راسك يلا انگلع انعل ابو شواربك

سد الجهاز وهز ايده كال خبل موش عاگل

--جانو معوزين اشوي اجن بنوات انهار كملنها

طلع رقم عمي وطلع بره يخبر ماسمعت شنو بس العرفته كله نجي ونتفاهم مسافه الطريج

دخل للغرفه لبس عگاله وعباته شال سلاحه خلاه بجيبه ودنگ على سبحته رن فونه

شاله باوع بي خال خير ان شاء الله

--جده منهو

--عم البنوات

كالها ورد -- هلا يخوي --لاهسه طالعين بس مسافه الطريج --خيير --شنهوو شبلاك اتحجى عدل خلى افتهم

يابه موش هسه اتصلت كلت بالبيت شوداگ للشمال--ابو سمار كول يالله عيب يخوي وانت زلمه هذا جلام جهال --تمام تمام اشوكت تردون --خير ان شاءالله توصلون بالسلامه نضل على تواصل --الله وياك

الجده. شكو

--زلمه جاهل ماعرف اتصلت كال بالبيت هسه يكول بالشمال صار اسبوع من رحنه يم بيت اخوي

--خوش  خالها بعدو بالسجن

--لاطلع من كم يوم بكفاله

--عجل ودها الو

--خلي اتصل  هسه يطلعون منتقلين للصين 

--لاتگلو اريد اجيب البت

--هو هم هيج

دنگ طلع رقمهم واتصل اول مارد كله الحمد الله على سلامتك ابو سامر تنذكر ماتنعاد --هلابيك --مايامر عليك ظالم بالبيت انتم --عجل وين --شنهو --اهااا خير توصل بالسلامه زياره مقبوله --لالا ماعندي شي -- اركان اشوكت اتصل بيك --كلت ماتصل تمام اخذ راحتك الله وياك
وينو

--ماخذ العيال وطالع عمره

--ابو سامر؟

--عالاساس

--اشتعل اصلك اركان للعمره

--هين لبالج اتركو هيج اذا ماكطمت اذانو وربيتو من جديد كومي يبوي روحي لغرفه ريحانه

--ليش عمو

--اهلج بقدرت قادر كلهم سافرو اليوم

--عمو ديجذب موجود لان خربان ويه اخو ميروح للشمال

--اتبين ماتضل لليل روحي لغرفه اخيتج واني اودج بليل

اشرت اي وكمت رحت لغرفه ريحانه  دخلت
جانت كاعده بدلتها لحد الان وام حمزه اتوكل بيها شافتني كالت ها يخاله بعدج

--راح يتاكد منهم موجودين لو ديجذبوم حتى يوديني

--عجل اذا هيج گارهيج اشلون راح تعيشين وياهم

--متعوده من زمان على الكره

--تعالي حدي يلكمريه عيني باره عليج ضاويه ييمه لايطگنج بعين

ضحكت

--صدقه لمحمد الله يشعلك اركان على عملتك هاي بردت كل شافتج ماصلت ع النبي 

شمرت جنطتي وكعدت يمها  دخلت اسماء اجت متعصبه حيل دفرت ريحانه  صاحت كافييي هالكد مكابلتها اني بنتتتتج

---ومرض شكو طلعين خبالج بالبت

--خلي اتموووت عش الساقطات يعيشن ويرتاحن واحنه هيج حظنه

--ياحظ ولجن البت عگلها موش براسها ضاله بس هيكل حتى اكل ماتاكل

--يكفي حامل عاشت ايام ويه الجان هاوي كلبها اله انييي اسبوعين واني اتوسل ومناطره بس نضره منو ماعبرني اصلا مادحگ بوجهي

--يطبج مرض اشكد حجيت ونصحتج وابوج اشكد حجه كالج ابن خالج رايدج جلبتي ودكيتي رجل اله غيث شيلي اتحملي اليصير

--ميخالف اتحمل راح ينسى هالساقطه

--اسماء بالقران اذا سمعج يصلخ جلدج عن عضمج كضبي لسانج احسلج

--عش يابه فوك ماساكتين جابها من الشارع ودخلها بينه حلوه هسه من انهزمت وطت راسو بين السلف

هيه تحجي واندفرت الباب دخل هو واركان اندارت شافته اتصنمت جان بيده فون خله بجيبه كالها كملي يولي عش. انكتمتي

--ماحجيت شي جذب روح اسمع السلف ماعدهم غير سالفت حرمت حفيد شمخي الجبير انهزمت

--امم وبعد

--خلي يزين شاربو احسن من مشيتو بين الزلم ودخلو للمضايف

هز راسه وتقدم ايأشر كملي

--احسن ماضال اتلطش بالعالم روح اگضبها وذبحها حتى اترد سمعتك

--خلي اذبح الطش الخبر بالاول

كالها وهفها براشدي من قوته سطر راسها بالحايط وكعت من يمي كمزت وكمشت خدودي

دنك شالها من شعرها
--دخيلك والله

ماخلاها حتى اتكمل حجي انطاها واحد ثاني اقوه من القبله طگ خشمها وحلكها دم سوه

عصر ركبتها خنكها كطعت النفس كامت اترافس صاحت الام خزرها سكتها وضرب راس اسماء بالگاع غمضت لان حسيته اتفلش

كام دنگ شالها من شعرها سحلها يم الشباج رفعها وصلها يم الحديد ودك راسها حيل مره الثانيه

كامت ام حمزه كمشتها كالتله كافي

اندار لاركان اجه جرها كامت تلطم سحبها وطلعها بره سد الباب

هيه ادك عالباب وتصيح لحكونيييي بتي راح يذبحها وهو اتوالاها دفرات وراجديات كل ضربه   اقوى من القبله وين ماتوكعلها

وكعت بالكاع

شال رجله دفرها انطوت على بطنها ركعها بظهرها من قوه الركعه اسمع طگه عضم وهيه انعصرت سحگ بطنها حيل كطع نفسها صارت زركه شهكت رفسها اتقيأة

مسح حذائه بملابسها وتركها اجه يمي انحشكت بالزاويه طلع الفون كال الشفره -----

***ناي***

سد الفون بوجه جود   عرفت كمشو لحن وعرفوني وين

اخذت فوني وقمصلتي طلعت اركض البس بالباب اجه جود وراي
-- بس انتظري وين تردين

--غيث عرف مكاني من لحن تلكي بالمطار جاي

كرم. الزگه طفرو ناي بوجهج عالعراق وجود شوفلك غير محافظه

باوعله جود رافع حاجبه وهز ايده
--ناي رقمج وين كاعده

--اسفه جود اني من اعتازك اجيك بس مكان لامو لان مااثق بيك لاوروح اخوي بس غيث ماطول خلانه براسه راح يدز جماعه وراك يراقبوك حتى يحصلني

--لاتصدكين غيث يأذيج

--لعد ماتعرفه بعد غيث مستعد يدوس على اكبر واحد مقابيل كرامته وسمه كدام اهلها مااكلك ماغلطت لان اني غلطان من راسي لساسي استاهل الديصيرلي بس مامتندمه مواني الي ارضه اعيش عبده وانطي  ابني لوحده ابليس  تافل بحلكها

--انطيني رقمج مارايد شي

--رقمي احتمال اغيره ماطول عرفني يمك عرف رقمي لاتقلق والله ماعليه جود اني ناي نسيتني

ضحك وخربط شعري
--المشاكسه ام تگ غمازه روحي ربي يحفظج امانه وبداعت الخوه اي شي تعتازي اول واحد طلبين منه اني

هزيت راسي

--ابتعدي اشكد ماتكدرين غيث اذا لزمج ماراح يرحمج اقل شي ياخذ ابنج كدام عينج ويخلي بحضن مرته الجديده ويشمرج بمكان يخليج تتمنين بس الضوه

--وروح عاشق لوبس مأمنه على لحن وماخذ دم اخوي ماهمني اروحله برجليه بس هو الجبرني هيج اسوي

--كل هذا بس لان منعج لاتاخذين حق اخوج

--هذا عاشق تعرف شنو عاشق الي لوجان موجود لسه مجان هذا حالنا كل وحده بمكان شابعين ذل واهانه وماكفاهم الظلم نيتهم ياخذو حتى الفرحه الي ربي عوضنه بيها

--ديري بالج على طفلج وروحي ناي لاترجعين حتى لاتتندمين اكثر

--ادري اتسرعت بلحظة غباء وادري ماراح يرحمني بس والله حسيت ابني غالي ماكدرت اسمع ياخذو مني واسكت

--السويتي صح ابنج محد يستحقه غيرج روحي ناي

-
ابتسمت اشرت اي و طلعت وراي اجت غسق لبست كلاوي وتلثمنه خفت مراقبين كلشي اتوقع منه شيطان مصور واعرفه اذا لكفني  انتهى امري

كل شارع ادخله اتأكد ماكو احد وراي يالله ادخل الثاني علما وصلنه للشقه روحي خلصت دخلنه جوه شمرت قمصلتي كعدت عالفراش تعبانه كلبي يم لحن كالت غسق شراح تسوين

--اضل هنا ماطلع منا لمن اولد

--حيل صدك تحجين

--لعد شسوي غير محافظه اذا رحت اضيع ماعرف ورجعه ماارجعله  وتنازل عن ابني لو اتصير ورحي بي  بس لحن كلبي يمها اخاف يأذوها

--موتكولين زوجها بحبها

--وطلكها الناقص اكولج اريد افلوس اشكد عندج ماعندي مجال غير اليوم كون احضر كلشي قبل لايوصل حتى اكدر انحبس ماطلع

--عندي اقصاد الدوام بعد وكت التسجيل

--انطيني كل العدج وانطيج الهويه اخذيها والرقم السري حتى تسحبين انتي وانتبهي اخاف هم يراقبج فدوه

--لاتخافين حتى مكاني مايندله ولايعرفني معرفه شخصيه قليل ملتقيه بي ومن كثر البنات الماره عليه نساني

--ولو اشك ينسى بس ان شاء الله ترحين للمستعمل تشتريلي ثلاجه وطباخ اهم شي حتى اخزن اكل واطبخ ويضل المسواگ اطلب يوصلي مواشكال وروحي جيبيلي الكتب النقص حتى اشغل روحي بالدراسه

--تمام هسه اروح

--غسق روحي بيدج اي غلطه منج يطير راسي غيث مايرحمني راح يطلع القديم والجديد بيه

--ازعل منج والله اصلا ماراح احجي وياج انضل على اتصال للاحتياط يلاداكوم هم يالله انحضر بس رسليلي الموقع اخاف ماكدر اجي يتأخر الوقت انطي يجيبولج الثلاجه والطباخ

--بس فدوه كون رخاص ماريد اصرف هواي حتى اكدر اكمل جواز لحن حتى لو نص عمر امشي روحي بي

--ولايهمج ادور لمن احصل شي مناسب

حولتلها الرقم هيه راحت واني كمت رتبت الشقه وشلت ملابسي شفت النقص حتى اجيبهن ومااطلع بعد

للعصر جابولي الثلاجه والطباخ دخلو اسسوهن لليل طلعت اتسوكت  الاعتازهن صح قليل بس اعرف ادبر روحي

اشتري واترحم لماما لوماراتبها الله اعلم شنو حالي هسه

رجعت بتكسي لان ماكدر اشيل  اتحاسبت ودخلتهن شمرتهن سديت الباب اخر نفس

هسه كلشي تمام يلا غيث داشوف اشلون حتكمشني اتريدها حرب واني كدها كل عقلك انطيك ابني بسهوله

رتبت الغراض شغلت الثلاجه اتذكرت ماعندي اكدور اشتعل اصلك كرم

رجعت اتمددت ميته تعب نمت بسرعه حتى مافكرت
كعدت من الفجر على صوت الفون شلته لكيت غسق رديت ها ولج

--ردت انام كلت خلي اتصل اخاف معتازه شي

--لسه بعدج ادرسين مانمتي

--هسه خلصت وحنام

--لالاتنامين اريد غراض مطبخ ومي والكتب حتى اقفل الباب مافتحه بس لابو الفاتوره راح اعلن سباتي للسنه القادمه

--ههههههه انعل ابو الحريه العايشه بيها ناي ولج هذا رعب داحس زومبي يركض ورانه موغيث

--ضلمتي الزومبي بالوصف بنتي هذا اتعده هالمرحله  من زمان سوه عقد ويه عزرائيل كل كم جثه يسلمها اله مقابل يزود سنه من عمره

--نانووو حبيبي اتشرفت بمعرفتج جنتي كلش طيوبه وحلوه بس هسه صار لازم اسوي مغادره

--انظبي لج روحي اتسوگيلي وتعالي داانطيج الهويه حتى اذا ماكدرتي اتسحبين منا انطيها لعمتج من اترد للعراق تستلمه مناك وها من توصلين رمشي مرتين حتى اعرف  ماصايدج

سديت الفون راحت نومتي مومال ارجع انام

كعدت غسلت وجهي اتريكت بدون جاي اخذت علاجي فوني بيدي منتظره باي لحظه غيث يتصل متفاجاه لحن الجبانه لحد الان مقاومه ومامنطيتهم الرقم

رحت للبالكون اتجتفت وكفت من وره الشباج ماكدر اطلع بارده

شدتفكر هسه كلبك بعده ينبض اتوقف

خليت ايدي على بطني يردون ياخذوك ميدرون انطي روحي وانت لا بعتك مره قبل لايدگ كلبك بطني واتندمت موهسه بداخلي وداحسبلك بالساعات اشوكت تجي

لحن اشلونج هسه اكيد اكلتيلج كم كف يلا ميضيعن بوجه اختج بس وعد راح اعوضج

اخذت نفس روجعت لفراشي فتحت كتبي والفون خليته عالاستاند بلشت اقرا لحد ماارمشت غسق مرتين ضحكت كمت فتحت الباب دخلت بديها العلاليك شمرتهن وحضنتني

--خير شكو

--ولج داحس روحي بفلم اكشن شكرا عيشتيني هالشعور

--هههههه صدك دتحجين

--والله امشي واتلفت وملثمه واتاكد من الشوارع واركض الله شعور يخبل

--لعد راح تشبعبين من هالعيشه ماطول امگابلتني

--اريد واحد مثل غيث يركض وراي ومن يلكاني يسحلني ويكتلني واني ابجي واكسر خاطره يجي يحضني يخليني على صدره يبوسني يكول اذيتج يروحي

--الله هذه الفلم  شنو اسمه

--انا والانباري

--ماريد اصدمج بالانباري بس هذا اختصاص رعب مره شك اراسل ابن خالي سحلني من كفشتي  شمرني بمكان مسكون اني الراسلته بعد ماشلع منه لحم وگطع الكهرباء خله الجن يحتفلون بينه للصبح

--بطلت ارد لجود حبيب كلبي صح ماعنده اكشن بس رب الرومانسيه خو من يعصب فديت

-- على كوله ذولاك الناس اندارلو فدوه امشي وياي عندي مسأله مدافهمها  شرحيها الي

بعدج مصره اتكملين دراسه

لعد ماعرفتيني لسه من اخلي شي براسي انفذه تدرين من قررت انهزم من خالي واكتشف هالشي كل يوم يمر يصلخني صلخ لباله راح اخاف واتراجع ماغمضت عيني اله واني بتركيا

--واختج

--راح اجيبها ونعيش بعيد عنهم  حياتهم ظلام وحنه خلصنه عمرنا عايشين بالظلام اجه الوقت نطلع للنور

--غيث راح يتركج

--دخلت عالمه بالغلط ماعرف اشلون اخلص نفسي بس الي اعرفه لازم امن مكان حتى اجيب  لحن واولد ابني اخلي بحضنها وأمنلهم حياتهم بعيد عن جهنم الناوين يجبروهم يكملون بيها  حتى اعرف اشلون اجيب حق عاشق  ان ماكدرت بالقانون اخذه بيدي ولهنا انتهت مهمتي بالحياة

--اشوفج نهايتج بالسجن مؤبد لو عدام ماتقبل غلط

--عود تعالي زوريني

--الله ونكعد نكتب قصتنا واودعج بيوم اليعدموج   واترحم عليج لان بسببج اتعرفت على جود

--عود رديلي معروفي باختي حسبيها بدالي  ولاتخلين واحد يندل مكانها 

--وبعد ماشوفج

--شوفيني  بيها  وذكرني بضحكت غيث

--هاي اذا ماانكتل قبلج

--والله همه اهله نواقيص موبعيد عمه يحمله الثار وينطي راسه

--والورث كله يصير ابأسم ابنج

--متشوفين ابني كاتلهم الكل يركض يريده وادري اذا حصلو مايعيش ساعه وحده لهيج انهزمت حتى ماتلوموني

--الله ينتقم لاوالله اني الوحيده وكفت وياج صح غيث ميستاهل بس حياته متنطاق ولاهو يقتنع يتركهم لو  يطلگج احسن شي سويتي من انهزمتي

--نصحني كال ماراح اتكدرين لعيشتي چلبت لااكدر اخذني بس والله جنت مجبوره لحن جانت على فراش الموت وماجنت اتخيل هيج واحد راح يحب الثاني وراح يجي يوم اتندم واضطر انهزم منه واكسره وراي

--هااا ناي مسحي دموعج ويله الاكل برد خلي ناكل ميته جوع

كعدنه ناكل ونقرا للعصر عين بالكتاب وعين بالفون
اجت رساله لغسق فتحتها كالت جود

--اشبي

--ديسالني عنج شكله

--كليله ماعرف اي خبر عنها ماشفتها من زمان

رسلت خليت راسي بالفون وياها  طلع جاري الكتابه اجه مسج ناي يمج بس لاتكليلها داراسلج

باوعتلي اشرتلها لاتكليلي كملي

--لامحكلها رايد شي

--علاج عدها افلوس شنو معتازه كولي ولاتكولين مني

--لاخزنت مواد اكثر من حنطت يوسف وغيرت شقتها راحت منطقه ابعد ماندلها

--عالاساس اندل الاولى حتى الثانيه شدتسون

--هيه نزلت تتسوگ واني ختلت مكانها

--ولاتگعد راحه الفتاة المغامره اشلونها دراستجن اذا تعتازن شي فتحن كام اشرحه الجن

--ميحتاج تشرح بس راويني وجهج افتهم وحدي امك اشلونها

--اتسلم عليج تكول  الثكل حلو

--ابوسهاااا كلها حكم ومواعض كافي انت ثكيل راح انكون ثنائي متوزن

---بنتي انتبهي لدروسج  عدتي  الشرحته الج البارحه

--اي والله مرتين ماذكرت من شرحك بس عقلج ويين انتبهيي

--لانتي شغلتج تعبانه بابا اهلج خطيه تعبانين عليج وديصرفون ليش هيج

--اي والله بابا كلش خطيه متساعده  وتاخذني منه والله ربي راح يكتبلك اشكد ثواب

--هههههههه استغفر الله روحي بنيتي عندي شغل يلا حبابه روحي كملي دورسج

--احبك

--شنو

--دااحجي ويا كتاب الفيزياء

--سلميلي على كتاب الاقتصاد اليمج وكلها خلي اتخفف ضغط مشاكل السلعه

سدت الفون  واندرتلي
--خو ماشفتي شي

--لاابد يااخي من ثگله اجاني مغص

--احب امه

--حبي صاحبه بطريقج وكومي ولي داطلع اجيب دفاتر بعد

استوني اكوم واجاني مسج من لحن --

***لحن***

اريد احجي ماعرف

صاح بصوت كمزني الشفررررره شنهووو

--ماعرفها هيه تتصل

--حلو اركان خويه شوف شغلك

شمر الفون على اركان ورد لاسماء دنگ عليها كالها اذا دحكت شكلج بيت هلي اجرم بيج

--ابوس ايدك لا  مواني نشرت الخبر ام عامر وروح اخوي وسماهر الي ساعدتها حتى تخلص من ناي

--من بيت ابوج لبيت خوالج عدل

--لالالاغييث ابوس رجلك اصيرلك خدامه بالقران اصونك حتى لوماتعقدني بس خليني يمكم  ماراح ادحك وجهي ولا تسمع نفس مني

--اركان تاخذها تزتها على ابوها كلو اذا لمحت شكلها اعتبر حگك منتهي

كامت تطلم بثنين اديها

شالها من شعرها ماتكدر اتكوم يمكن كاسر ضهرها لان صرخت بصوت رجت الغرفه اخذها سحل فتح الباب شمرها على امها كالها هالمره بس طكيتها عالخفبف الثانيه ادفنها ربو بتكم لاتجبروني اربيكم

سد الباب

واركان يطبگ بردانه بس شوفته وهو هيج هادء كلبي وحده وكف

شال الفون فتحه واجي يمي خلاه كدامي

-- الرقم لحن

حتى النفس كطعته

دنگ حك خشمه اتقدم حشكت روحي خفت من شكله
وصل قريب كلش خله ايده وره ركبتي   سحبني اله همس الشفره شنهو

--مااا ماعرف

مارد نزل ايده خلاها  يم بلعومي حرك اصابعه على كيف حتى بعده ماضاغط گطعت النفس  ودموعي نزلت

كمشت ايده احس روحي بهتت ضغطه ماجانت قويه بس من كثر الخوف غمضت ماكدرت اوكف على رجليه كعدت بالكاع

كعد كدامي نص كعده كمش ايدي وشهكت

--الرقم شنهو

--مادري

دار ايده وره راسي بحركه خفيفه ماعرف اشسوه 
بس افترت الدنيا رخت اديه تركت ايده  كمشني نيمني بالكاع وخر شعري عن وجهي

-- لحن حركه ثانيه تفقدين الذاكره

-- ماعرفه الرقم

غيث. اسم عاشق لو اسمج

غمضت

--احرفكم الاولى

اركان. جرب

--اي غلط تلكفنه نغله هاي

--عجل هاي راح تموت  وماحجت  يمكن ماتعرف صدك خلينه نروح لتركيا نعرفها من الاقامه

--الحريم مايهتمون بالاقامات مالتهن حتى بدونهن يدخلن محافظات

--يمكن بسطنبول

--موش غبيه لهالدرجه تضل باسطنبول  تدري احصلها بسهوله

--نروح لغير محافظة

--ادور بغير محافظه وهيه بأسطنبول خاتله تضحك على عقلي ماعرف شنهو براسها مو بت  ابليس مايلحكها شايله عگل وتفكير مايخطر براس احد

--افلوسها تخلص تضطر تطلع تشتغل

--عجل ماعرفتها بعدك هيج بشر اذا مامأمنه روحو لشهور بعيده مايجازف بالموت

--اشكد عايش وياها ماعرفت طريقه تفكيرها

--ماتنحز كل دقيقه تغير طريجه بالثواني تدخلك بمشكله  وبلمح البصر تطلع منها اتصفن اكبر مسقط متمرسه بالجذب والمصايب لدرجه ماتخطر بعگل مسودن

رد اندارلي اركان اني من الخوف كوه اتنفس ماعرف شناوي

--دحگتي اسماء شعملنه بيها انتي مضاعف اعمل بيج

شهكت بخوف

--اخر جنص لحن احجي والج جلمه ما انأذيها

--كلشي ماعرف

هز راسه ودنگ كومني خلاني عالحايط كعدني طلع من جيبه جكاره ورثها بجيت

اخذ نفس نكثها من الجمر وخلاها يم عيني غمضت حسيت بحماوتها

--وروح اخوي  اطفيها واقلع عينج

وخرت راس كمش وجهي بده عصره وثبت راسي سد حلكي وقرب الجكاره بصفحه بركبتي لاحتني لولا ماادري بس من الرهبه صرخت صرخه طلعت من كلبي

وخرها وسحب النفس مره ثانيه نفخه بوجهي ودنه الجكاره يم عيني
-- اضن وحده تكفيي

الحماوه مالتها حسيها جوه الجفن كلتله ع ل ن

--عفيه بالحبابه

--الرقم

سكتت سحب نفس منها  وسد حلكي كمشت ايده اشرت احجي

نفخه وخر ايده رديته وغيث يكتب
دز الاحرف دقايق واتصلت

مسح دموعي بطرف اصابعه

--راح تجاوبيها واي غلطه  وروح حازم اطفي الجكاره بعينج  سمعتيي يولي

اشرت اي

--شكو شي اكتبو تقري وتسأليها غيرو ميحتاج اكلج عقوبتج شنهو

لميت رجليه

طلع فونه وغيث رد عالاتصال فتح اسبيكر كالت ها لحن شعجب اتصلي

--هاا ماعندي شي ومحد موجود

--اهاا كلتي ماعندي شي تمام  عندج شي تكولي لواروح عندي شغل

كتب اركان قريتها كلتها اركان طلگني

--ناقص مثل اخو استفرد بيج وضربج مو

--لا

--هه اغبياء لبالهم المره ماتعيش بدون رجال  ميدرون انفر الكوكب بدينه

--اريد اجيج

--وين انتي هسه

--بعدني يمهم بغرفه ريحانه خلوني حتى اخدمهم

--نطاج جوازج

--اي وفلوس مهري

--حلو قدمي على فيزه ومن تطلع اتصلي اكلج وين اتحجزين

--على اسطنبول مو

--لابأنطاليا اني

--يعني اجيج على انطاليا اخاف ماكدر اتصل بعد

--لاتعالي على سامسون

--ليش

--حجزت طيران من دهوك لاڤيون  احتمال هسه اطلع لايران

غيث ضغط على سنونه وشمر الجهاز فلشه بالحايط كمش راسه كال اكضبها لوطير للسما

اركان باوعلي لميت رجليه لحضني

مسح وجهه وكام

-- لازم نلگه طريجه ماتضل هيج

--ااااخ ربي بس اكضبها مارايد شي

--نروح للمطار انحصلنه واحد يعرفنه حجزها اي محافظه

ادنكت الباب وصوت حسام يكلهم جدي ينشد عليكم

فتح الباب غيث طلع واركان اجاني رجعت ليورا كعد كدامي نص كعده

وخر اديه كمش وجهي داره اتلمس ركبتي باوع لعيني مشه ايده على رمشي

--وحگ كلام الله لوصاير بيج خدش لنعل ابو اصلج

وخرت ايده وضميت وجهي بحضني  شهكت اخذ نفس وكام طلع  احس الدنيا تفتر ودايخه باوعت لريحانه 

-- شفتي اخوج اشسوه بيه

طوت نفسها وضمت وجهه بالغتره ماحاسه بالدنيا

دخلت ام حمزه كالت طگج الجلب

مارديت

اجت يمي كعدت شالت راسي باوعتلي  ردت اديره صرخت احس ركبتي طگت

--اصخام بوجهه هذا شعامل

--ركبتي خاله

-- توته ندهي جدتج بسرررعه

كامت  جرت مخده خلتها وكمشت رسي مددتني عليها دخلت ام اركان  كالت شصاير

--حدري  خيه هذا شانط ركبتها واني ماعرف اشلون اردها

--هذا الهوسه كلها  لاتكولين ماطاكها

--اركان مايطگ حرمه

--موبس هيه حرمه عجل اشو خواتو يكضبهن ينهيهن وسهيله صاعد نازل يطگ بيها اااخ يمه تعالي ليه ودحگي  حظ بنتج بيا خيسه  نايم

--تركي الحظ البت مشنوطه ركبتها شعمل  لايصيرلها شي

--لاتخافين كلشي مايصيرلها موش عصبه هاي راكها لخاطر تخدر ويخوفها عفيه ابني الذيب هذا كل حيلك

--البت يتيمه خافي ربج بيها

--بس اريد اعرف انتي هم عندج كلب بنتج مدسكطت وانتي جايه منزنحه لهاي

--بنتي لسانها باذر اذا مانحش تنفلع راسها هيج باكي تخاف وتبطل تلتح وره سماهر دتعالي دحگي البنت روحها رايحه من الخوف

--تستاهل عبنها عرمه  وماتنگضب  كون جاسرها جان برد دمي صدگ ميلي غادي  لشوف

كعدت يمي بحركه سريعه ماعرف شسوت بيها بس حتى ماحسيت رجعت طبيعيه تفلت بوجهي وكامت

صدك روحي رايحه حتى ماحجيت اول غطتني ام حمزه  نمت

يومين واني بالغرفه مااطلع لان عمي ماموجود اخاف اتحرك لاهم انكتل وهنه هم مادخلني

اسماء طلع عدها زله بالفقره اخذتها سماهر وياها هناك لان ماعدها احد وامها مافارغه يادوب ريحانه  الي عليها ماعرف كم شهر بس بطنها بدت اتبين وخايفه عليها لاتسوي شي تروح طفلهم مكابلتها اربعه وعشرين ساعه

رغم ماسوالي شي بس من اذكر روحي بين ادي لاحول ولاقوه ابجي بخوف وهو مستغل هالشي 
احقد   عليه وكره نفسي اشلون جنت مصدكته هسه يالله حسيت روحي صدك ثوله وماافتهم

كاعده يم ام حمزه دخلت سهيله تركز برجلها كالت يلا ست الحسن كافي مطموره واحنه نخدم

ام حمزه. البت مريضه وماتعود الكم بعد

--حتى لو موش ضالين بس نعلف بحلكها شعرفنه اشوكت ترد لهلها سالفتها مطوله خلي تكوم تساعدني بحدي بالمطبخ يلا كبل لايردون

--عمج مايرضه

--جدتي كالت خلي تكوم ومن اليوم تجي تنام غادي يمها لان حسام يريد ينام يمكم المجان بارد بالمضيف

--امج اشلونها كالو غيث طاكها

--الله يجسر ايدو بدل جسر ايد امي جعلو بالمرض المايگوم منو كدرتو على الفقره تارك حرمتو ادحم بالبارات

--روحي احجي هالشي جدامو عش تتختلين

--لااحجي ولايحجي وياي مشاكلي مكفيتني يلا لج كومييي

كمت طلعت وياها للمطبخ لكيته اتكول مزبله من الوسخ

هيه يادوب وكفت عالطبخ واني بلشت جلف وتنظيف ماخلصت لمن طگ ضهري دخلت عمتي ام اركان كالت لاهلا ولامرحبا بهالوجه

سهيله. عمه كضبي الطبخ تااسبح راح يجي اركان

--موش الصبح سبحتي

--هههه لاذيج سبحه اليل هسه كلي ريحه طباخ ابروح ابنيج بسرعه ماابطي

--ماصار عندج جاهل

--ان شاء الله هالشهر وابشرج

--الج ابشاره مني ست ابتوت ترس ايدج يلا روحي كبل لايرد

--الابشاره من يروح الثاني

--هذا شغلتو هينه بس يگضبونا ويجيبوها لجاي واني عرف اشلون اريحو

--مايجيبها لجاي ياخذها لبيت جدتي غادي يحبسها لحد مايصير الجاهل

--اي وخطيه الجاهل اختنگ بالحضينه شنهو اول جاهل نفاس يگطع النفس

--هسه صدك ارتاحيت اروحن يله

راحت وهيه وكفت عالطبخ  خلصت المطبخ كالت هالوهاد عدل نظفي وانطي مي للحيوانات

عرفتهن بلشن حرب ويردن حجه اعترض حتى يضربني بدل كتلت اسماء لان بيبي ماهيه رايحه لبيت ابو حمزه

سكتت مارديت طلعت للمكان  كله قذاره حيوانات وسخ لفيت الشال على خشمي وبلشت بالتنظيف كل دقيقه اريد اتقيئ كوه مسيطره اخر شي ماتحملت
كلبت معدتي حتى الحيوانات مانطيتهن مي صعدت ركض للغرفه لان ملابسي ادمرن صارت بوجهي سماهر طالعه من الغرفه اتكول عروس المكياج والذهب والعطر ساطر المكان  عود لابسه اسود

شافتني بهالحاله القذره  طكتها ضحگه بصوت عالي واجه صوت  اركان من جوه ومررررررررررررض

دخلت للغرفه وقفلتها بسرعه

وكفت وره الباب اباوع لروحي وقذارتي  صعبت عليه نفسي ليش هيج يصير بي اليتيم

ملابسي وسخه وحالتي تعبانه مذلوله ماعندي احد يرضه يستقبلني ضاله عاله على ناس

سمعت صعدته وهيه تسولف تكله حضرتلك الحمام

--نزلي زهبي الزاد غيث جاي

--بس احضرلك ملابسك تامر من عيوني اهم شي رضاتك عليه

دخلو للغرفه سدوها غمضت تاليتج تخدمين  وهمه يضحكون على جرحج

اني راضيتها استاهل ذيج ناي ازغر مني بس مارضت على نفسها الذل مع العلم تدري وراها موت بس طلعت بكرامتها ورفضت اتكون ذليله

واني راح اكون مثلها ادوس الكل جوه رجلي محد يكدر يحاجيني

رحت للكنتور طلعت انكس فستان رحت للحمام

فتحت الدوش يتوازن ميه بين مانزعت دخلت جوه ساعه كامله واني اجلف لمن وكعت شكو وسخ

نشفت وطلعت وكفت كدام المرايه باوعت الدلعه مال فستاني كلش اوڤر صدري وركبتي كلها طالعه وضيگ من فوگ بلحظه خفت من اتذكرت اركان

شكلنا لحن ولج غيث دگ على راسه وناي مالبست لاشال ولافستان لمن خلته ينجب ويرضه بالواقع وهم ضربته على وجهه ونهزمت

شغلت الشسوار نشفت شعري وسحبته

طلعت علبه المكياج خليت خفيف شلت الربطه زغيره شديتها مثل الاسكارف وطلعت شعري من كدام كم خصله بهمال

رشيت عطر باوعت بالمرايه ضحكت صدك نفسيتي اتحسنت احس روحي انسانه ثانيه انسانه قويه رغم شي قليل سويته بس حسيت اتغلبت عالضعف

لبست شحاطتي وفتحت الباب صار الغروب نزلت دخلت لغرفه بيبي لكيتها جايه و عمي  كدامي كاعد  سلمت

كعدت يم بيبي دنگ هو يسبح

بيبي. اشلونج يجده

--الحمد الله

--البنوات زهبن العشه

--اي بيبي ديصبن

--عجل كومي استعجلي الولد اجو

ردات اكوم دخل غيث واركان رجعت كعدت حشكت روحي يم بيبي

اجه غيث دنگ باس راس بيبي وهمس لكيتها

--سبع كفو من اصلك

كلبي رجف شلت راسي اجت عيني   بعين اركان  خزرني ودنگ على بيبي باس راسها
كعد يمها من الجهه الثانيه

-- شوكت تسافرون

اركان . باجر الفجر

ابو اركان. اخذوني بطريجكم  اودي البت لهلها

--وين يابيت اهلها تراهم مسافرين

--اليوم جنت يمهم وتفقت ويه الزلمه واتفهم الوضع

--ييييبه ماتطلع من هينا البت بعدها على ذمتي

--لامابيها مجال يااني مسودن ياانت خبل وناوي اتخبلني وياك يول موش طلجتها جدامنه

--اي بس بدون مومن وابيت اهلها عدهم ازلام هذا شرع ربي هم تدخل بي

--انجعلك بالموت وختلاف الدفانه ابن الكلببببب انت اشجابك عالشرع واحد سكير تافلته الگاع خزيتني وسودت وجهي جدام العالم وكوه كدرت اسدها اتكلي متروح

--ماتطلع وحگ كلام الله اذا اتحركت للباب اجسر رجليها وراوح وراها اسحلها هيه واهلها  لاتكووول ماكال

--اودها وكونك ازلمه وتسويها بالقران اخلي طلكه ابراسك واخلص من رعونتك

--وحگ كتاب الله  احركها هيه والبيت التنطمر بي ماخلي بيهم صاحيييي لاتكولون ماكااال

كام دفر الباب وطلع يتعارك ويه روحه

بيبي. تسودن الزلمه وروح ابني

--مسودن من كاعو هذا الولد راح يموتني ناگص عمر

--خلو يردها لذمتو ماطولو هيج جاتل روحو

بيبي  اني مارد  ريد اروح لهلي

ابو اركان. ولااني اخلج ويه الخبل كل دقيقه مزاجو شكل تهيري  واني اودج يبوي وانت عمك ابو حمزه اشلونو

غيث. بالبيت  الشباب املازمينو طشينا خبر سافر لدبي وجهزنه بيت جدتي

--موش بعيد

--احسن بعيد عن العين واحنه مانتركها نتناوب عليها وهم راح اجيبلها وحده ازتها حدر الكاع تسليها لحد ماتولد وخلص منها

--الله يگويك

هو يحجي واني كلبي نعصر يعني لكاها اشلون اكدر انبها اخبرها من خالتي ام حمزه ماكو غيرها

كمت طلعت رحت للغرفه دخلت لكتها اتوكل بريحانه كلتلها خاله ابوس ايدج

--خيرج يمه

--شفتي وجع الكلب مال الفكد واني ماضل عندي غيرها

--لكوها

--فدوه اروحلج والله ناوين يكتلوها بروح شاهين اشلون جانت اتساعده رديلهيا الله يخليج

--يمه شيخلصني من غيث اجفينا شره

--والله ماخلي يدري خاله راح اتموت اختيي الله يخليج كلتها وجريت ايدها دنكت بستها وبجيت

جرتها استغفرت

--خاله اتموت خاله والله انتحر وراها ماعندي غيرها اضل بروحي بهالدنيا حسبيها بتج وهيج يسون بيها ترضيها

--يخاله والله يحركنه غيث

--اذا دره اكله اني بكت الفون ابوس ايدج

--هاج وطلعي بالمزرعه لاتخلين احد ينتبه واذا عرفو اتره انكر اكلهم هيه خذتو بدون دراي

--اي اي

اخذته خليته بصدري وطلعت بسرعه امسح بدموعي رحت بالمزرعه خفت هم ينتبهون ابتعدت اشويه

كعدت على حجر استوني اطلع الفون واسمع اركان وراي كال شعملين هينه

--هاا

--ومرض وشنهو هالبس انتي شنهو ماكو احد جاسر راسج كبل شايفتنا مكرنين جدامج بس فهميني

--انت موطلكتني

--اطلگج ازتج ادفنج هالبس اذا لكيتج لابستو اطرج بالنص وشعدج گاعده هينه

--هاا

--دخيل رب العبااااد لحن الي براسي كافي يسودن سلف بكبرو لاتزيديها شعدج هينااا

--ضجت جوه ووو

--اي كملي

--هيج اجيت دااشتم هوا

مسح وجهه خله اديه وره ركبته باوعلي

صعدت الزيگ مال الفستان  وخليت ايدي اضم صدري لان عرفت متخبل من هيج

مسح وجهه واخذ نفس اجه يمي ردت اكوم كمشني رجعني لمكاني كال بس خلي احجي وياج

--مابينه حجي

--اذيتج

مارديت

--كرهتيني يولي

--اي

--حگج بس انتي ماگصرتي طلعتيني جاهل جدام اخوي

--واخذت حقك وزياده باجر حروح بعد مافشلك صدگ اني موكفو اصير مرتك

--لاترحين

--مااريد اضل اصلا غلط طلعتي مناك واتندمت لان سويها ولو يرجع بيه الوكت عمري مافكر اجيك واطلب منك الطلبته

--طلبتي اولا انتي الي من اول يوم دحگت وجهج بي  وماتصيرلين لغيري حتى واني حدر التراب هم اخلي جماعه وراي تجتلج

--شنوو شنو اشتريتنييي يااخي ماريدك

دنك عصر وجهي رفعه صار قريب من وجهه حجه من بين اسنونه والسماني اركان اراويح الاديان كلها  بين عيونج اكرهج بحياتج واخليج تتمنين امج ماجابتج بس تفكرين طلعين من هينه ترحين لابوي اتكليلو ماروح سمعتيييي

وخر ايده كمت

--ماروح ولاكله والصبح حروح داشوف شتسوي

--لحنننننننننن لحن لاتجربين حضج وياي بالقران ادفنج تعرفيننن شنو ادفنج

--انتى طلكتني ضاله شنوو

--اردج

--ماريد ارجعلك

--لاتردين ضلي معلكه حالج حال اي زمال لاطلعين ولاتحترجين من مجانج وهاي عيونج اقلعها بيدي بس الكفج مدحگه بوجه احد

راح ردت اكعد رد جرني من من ايدي

--وهذا شعرج ادير عليه بانزين واحرگج انتي ويا اذا دحكتج بدون حجاب

دفعني و راح كمشت ايدي افرگ   بيها سمعته رجع كمزت كمشني من فستاني جرني اله

ذني تنزعيهن وتزتيهن  احسن ماربطج  وزتج من السطح سمعتيييي

اشرت اي

شمرني عالحجر كعدني بمكاني عدلت فساتني ا

راد يمشي وكف قبل لايحجي بجيت

مسح وجهه وخذ نفس
--دخلي جوه

--عوفنيي والنبي انتحر واخلص منك

-شكووو كاعده بحدج

-الطم املخ روحييي شسوي ياخي اعتقني راح امووووت

--دخلي موتي جوه لايمر احد

--وروح اخوي اكوم انحر نفسي واخلص تعبت اركان تعبيتتتت اتركني ياخي هسه جايه بس اخذ نفسسس راح اختننننك

--صوتج بت السطل العالم تسمع نعوصتج شتتخييييل

كعدت بالكاع كمشت راسي راح اتخبل مابيها مجال

طلعت ام حمزه  دفعته

--شلزكت راح اتخبلها روح اني يمها هسه انرد

--خلي شي على ملابسها حسام وغيث هينا

--هاي عباتي راح البسها بس روح البت ترجف ساعه وانجلطت

--بعدي عن طريجي

--اي عفيه ابني اكو حرمزه غادي دحگ على حرمتج روح اتكاون وياها

مارد باوع صفح لخالتي وراح هزت ايدها وكعدت

--وروح ابني   اذا طلع عندو ذره عگل اطلع ماافهم خبرتي اختج ولج

--مشفتي اشلونه وين اكدر اخبر

--راح يفتر بالمزرعه يصيد اجلاب مثلو اتصلي

دخلت رمز صفحتي رجعتها دخلت على ناي اتصل بيها رن ضحكت بس غابت ضحكتي بصوتها من ردت بتعب كوه كالت لحن راح اموت---

***ناي***

يومين محبوسه بالشقه اختنكت وهو ماكو حتى مارد لتركيا حسيته يضحك عليه مايعرف وين مكاني

جنت اقتصر بالاكل احاول اكل وجبه ونص باليوم  وحتى الفواتير  ادفه بالحاف ماشغل صوبيا حتى اكدر الم افلوس جواز لحن

جنت معتازه علاج وكم دفتر  باوعت لساعتي اتأخر الوقت حتى لوطلعت محد راح يشوفني اجيب كم ابره  حتى مااطلع بعد

لبست وطلعت رحت للماركت للصيدليه ماحصلت  يمها صار الدلمش كدامي والجو ممطر ماكو بشر امنت اكثر رحت صعدت اتلثمت عدل

رحت للميدان نزلت ركض للصيدليه شفته ديعزل دخلت انطيته الراجيده اخذت علاج شفت اشباء مال طفل رف كلبي اشتهيتهن  اخذت ممه وباودر طفل

دفعت افلوسهن اخذتهن وصلت للباب حضنتهن اول اشياء لابني يمه فديته هو وابو
بستهن وكملت طريقي

صارت المكتبه كدامي داروح والمح صديق غيث التركي ويا صاحبته  شافني ماشافني ماادري

ركضت لجهه الموقف بسرعه ماعونت تجي الدلمش واكفه واتلفت

كام واحد كعدت مكانه ايدي على كلبي غمضت ربي اعمي وسد حلكه كون ماشافني دخيلك وين اروح هسه

اجت الدلمش كمت صعدت جانت مقبطه ضليت واكفه وكلبي يدگ بسرعه وصلت قريب دفعت ونزلت ركض للعماره دخلت اركض حذائي مي والدرج مرمر ماحسيت غير رجلي راحت بالخالي اجيت كبل على بطني

انگطع النفس اريد اسحبه ماكدر كوه كمت صعدت اسحل بروحي دخلت للشقه شمرت غراضي واتمددت ضهري وبطني سوه وجعني

طويت نفسي ردتها تهدء ماكو احسها تتملخ
كعدت واشوف الدم ينزل نزلت دموعي ويا خليت ايدي على بطني لاماما لاتروح فدوه الك ولك اخر شي بقالي انت

عاشق لاتتركني مرتين استوني ردت ضحكتي

جسمي يرجف خايفه احرك روحي واشوف نزف غمض وخرت رجليه واحس الدم ينزل بغزاره شهكت بحركه كتلتلك انييي كلتلك بيدي ولك استوني اشتريتلك ممه لاتروح

ربي دخيلك ابني ربي انطتنيا وجبرتني بي لاتاخذه وتكسرني تركت كلشي لخاطره اتركليا

حسيت لويه قويه شلعت روحي كطعت حتى النفس اتمددت طويت نفسي شلت فوني اتصلت بغسق مغلق

الوجع ماينحمل والدنيا افترت من الهبطه

عصرت بطني وعضيت ايدي اريد اخذ نفس ماكدر

ردت اكوم اطلع حتى ادگ الباب عالجوارين بلحكوني ماكدرت افترت الدنيا ورجعت لمكاني

افرك ابطني اريدها تهدء ماكو النزف بعد مالحك عليه صرخت لحكونيييي   افترت الدنيا بعد ماحسيت

صحيت على الم يروح ويجي فتحت عيوني كوه هادء وحدي

خليت ايدي على بطني بعدك لو رحت ردت اشيل راسي ماكدرت خدرانه

مديت ايدي ترجف اتصلت بغسق مغلق اتندمت اشلون ماسجلت رقم كرم  وكع الفون من ايدي

اباوع اديه كلها دم المكان صاير عباره عن احمر البرد مجمد جسمي بدون غطه سابحه

فتحت حلكي اريد اصيح صوتي مايطلع غمضت كمت احسب لنهايتي

اسوء موته بعد هاي حياتي وحدي بدون اهل ولاحبيب فاقده جزء من روحي

افقد ورجع وحدي اتمنيت يمي غيث اتمنيت يهدئني من الخوف الشايلته ويكلي ماتموتين بعد عندج عمر لاتخافين

فوني يضوي كوه سحبته رديت بدون لااشوف منو يتصل  اجاني صوت لحن همست راح اموت--

***لحن***.

كمت بسرعه فتحت كام

-- ناااي بس فتحي كام دااشوفج فدوه اروحلج لاتكولين اموت لاتركيني ولج فتحييييي كام 

--ماكدر

--لالاتكدرين ناي ناي احجي شبيج

انفتح الكام نايمه عيونها سادتهن كوه تفتحهت وترجع اتغمض المبايل ينهز ماكامشته عدل خلته على شي يمها وتركته

بجيت بصوت عالي

همست لاتبجين خليني اروح واني ماقلقانه عليج

--لالاناي ناي باوعليلي ولج فتحييييي عيونج اشبيج احجيييييي

-- عاشق مات

--منو يمج ولج صرخييي خلي يلحكوج ناااي لاتغمضين نااااي

ماعرفت شسوي اخذت الفون وركضت جوه دخلت لبيبي جانو كاعدين كلتلها لحكيني بيبي ناي ماتت

جده. شنهو ولج

--هاج احجي وياها كلها شسووووي حتموت ابوس ايدج

اخذت الفون كالتها شمالج يالعرمه

همست شي ماعرفنا

--يامصخمه ميلي الكامره خلي ادحگ شنهو وضعج

حركت الكامره شهكت بيبي اباوع الشقه متروسه دم

-- نزلتي الجاهل يالهتره جعلج بالموت

همس لحن امانه يمج

غيث على كعدته ماتحرك يباوعلنه

بيبي.  ولك كوووووم البت مواته

--يطبها سطعش مرض خلها تعفن محد يندل مجانها

ركضت يمه كمشت ايده

-- الحكها خلي جماعتك ينقذوها بعدين اكتلها ابوس ايدك غيث اختي حتموت

ضحگ بتعب وسحب ايده

--ولك ماتتتتت ماتت شنو من كلب شايل

دنگ على فونه ماهامه

دخل اركان كمت رحتله
-- اركان اسوي التريده بس ناي

--اشبيها البلوه

--راح اتموت خبر اصدقائكم خلي يرحولها

--منهو يندل مجانها

بيبي. عش موتكولون حصلناها

--لاعرفنا بتركيا بس بالضبط وين مانعرف

كعدت متبنجه كامشه الفون واني اشوفه تموت كدامي

كام غيث اجه اخذ الفون كالها انكس موته تستاهليها

--راح ابنه غيث

--انجعلج لاحكتو

--شوف الممه الي اشتريتها اله

--ماتستاهلي قذره وموته اقذر حتى دفن ماكو لمن تطلع ريحتج بالتعفن ذاك الوكت يلكوج

--بردانه

--لسه البرد جايج من تصيرين جوه الكاع ونرش عليج المي

همست غيث خايفه

اباوع لغيث ضل يباوعلها ساكت اشويه و نزلت دمعته بسرعه مسحها لاواحد ينتبهله

شمر الفون عليه   شلته  لكيت ايد ناي عالفون واكعه ومنتهيه مابيها نفس صرخت ولطمت على وجهي كمشتني بيبي واركان اخذ الفون كال لاحول ولاقوه الابالله

--لالااختي ماتموت  لالااركان سوي شي

غيث.  وينها

--ماعرف والله ماعرف باسطنبول بس مادري وينها غييث ماتت ناي

--منهو يندلها احجي خلي اخبر يلحكوها

--وحده ماعرفها صديقتها

--لج احجييييييييي راح اتمووووت

-- اسمها غسق الحكها بلكي بعدها عايشه

طلع فونه وطلع بره يخابر سمعه يكله كررم اطلع وافهمك بالطريق بسررررعه يخوي ---

كمشت الفون وكعدت لميت روحي امكابله الشاشه عيني بناي اتمنى تتحرك

حتى دموعي نشفت بس جسمي يرجف ماكو بحلكي غير ناي كومي لاتركيني

اكثر من نص ساعه حتى اعيوني بعد ماشوف بيهن وهيه ماكو فاقده لمن سمعت بابها انفتح ونشال الفون بنيه زغيره وياها كرم شافتني سدت الفون

كمت ردت اطلع وره غيث كمشتني بيبي

-- ماتموت لاتخافين

--ماكو بيبي منتهيه

--گويه ترد ماتخلج بروحج اعرفها كعدي اندعي ربي يردلها ارويحتها

كعدت لميت رجليه لحضني شبه فاقده عيني بالباب اشوكت يرد اركان ويكول عايشه

لنص اليل و ماكو خبر حتى اريد اكوم واسال ماكدر اخاف اسمع شي موزين

دخل اركان كمت اشرتله شنو

--مثل هاي ماتموت لاتخافين

--عايشه يعني

--بس جاهلها راح هيه بخير

احس الروح ردت الي موالها بسرعه صليت صلاه بابا جان يصليها من يسمع خبر يفرحه

لكيتهم يباوعولي صافنين تركتهم وطلعت كمشتني كال وين يولي

--اتوضه اصلي صلاة الشكر

--عجل هاي شنهو العملتي

--بغير دين هذا داصلي صلاتي وخر

--يولي وييين لاتسوديني لحن خلي شي على صخامج وطلعي

رجعت اخذت شيله بيبي خليتها على جسمي وطلعت اتوضيت رحت لغرفه ريحانه  هناك السجاده دخلت لكيتهن نايمات طلعت السجاده وكفت اصلي  وابجي مامصدكه

خلصت دااسلم كعدت ريحانه  باوعتلي ابتسمت --طر الفجر

--لابس داصلي صلاة الشكر رجعت ناي للحياه

--عجل اني عش مانطاني ربي واصلي

--بالجنه هو وانطاج ابنج عوض عنه راح تشتمين ريحته بي

-- واني مارايده غيرو كل ليله انام بس حتى ادحگ شكلو مايجيني  

--ميريد يقهرج لان يحبج

--اشتاكيتلو جثير حتى ريحتو خلصت من الغتره بعد ماشتمها بي ورحي لهفانه الو

--راح يجي ابنج وينسيج كلشي ويرد ضحكتج

--ماترد غير واني بحضنو  كالتها و باوعتلي مبتسمه بكسره

حضنت الغتره وردت غمضت حسيتها عاقله مابيها شي حمدت ربي وسجدت بالكي ردت لعقلها خطيه لخاطر ابنها

كملت كمت ردت اطلع بس شي سحبني الها رحت  اتمددت يمها بطنها كبرانه خليت ايدي عليها رفس الطفل ضحكت كعدت

-- رفسني ابنج

--ابو دگ بكلبي

--الله يعوضج ويصبرج

ماردت  غمضت كمشت الغتره حيل  اخليت ايدي بطنها منتظره بلكي الطفل يرد يرفسني

حساس حلو من تحس گائن صغير جوه ايدك يتحرك بعد ماشايف الضوه اتحسه ملاك
نمت واني اضحك على حركته

كعدنه على صوت سهيله وهيه اتكول كومي يلا عمي ينشد عنج حتى يودج لهلج

--هسه جايه روحي

--اي ريحانه اجيبين النغل البطنج

ام حمزه. اكتمي لاكوم ادوس حلكج ابن ابني نغل انعل تربيتج

--وشعرفج ولد

--بطنها مدوره كشفت عليها وعرفتو جاي الياخذ التعب وحگ ابو

--امم يجي بالسلامه اخاف هم مثل ابن غيث

--انجعلج مجانهم كولي امين

راحت كمت لكيت ريحانه كاعده تمسح بالغتره مطبكتها عدل وصافنه

كمت حضنتها وبستها باوعتلي عيونها مليانه دموع

--لاتهتمين للحجي راح يجي ويكونلج سند ويكص لسانهم

ام حمزه. ان شاء الله من حلكج لباب السما رايحه بخاله

--اي خاله لهلي

--احسلج روحي يخاله بعدج زغيره وحليوه حرمات تضيعين صباج ويه هيج عالم ماوراهم بس الموت والثارات

--ديري بالج على ريحانه

--بعيوني هاي حرمت العزيز ماتوصيني

رجعت بستها وكمت طلعت غسلت وجهي صعدت غيرت ملابسي شلت شعري لبست الشال عدل نزلت

لكيت عمي يبلس كال استكان جاي يبوي

--تأمر عمي غيث سافر

--اي من الفجر راح يجيب حرمتو يلا  تهيري

--اي خلصت

--عجل جيبيلي ستكان جاي تانطلع

رحت للمطبخ دخلت لكيت سهيله اتخابر شافتني نصت صوتها
ماهتميت صبيت جاي شلته وديته لعمي لكيته كاعد يسولف انطيته وطلعت بين مايشرب اروح اخبر ناي امن عليها

دخلت لغرفه ام حمزه لكيتها ماكو

--ريحانه وين خاله ام حمزه

دخلت سهيله كالت راحت لبيت اهلي تشوف بتها اشوي وجايه رايده منها شي

--لابس ردت الفون داخبر اختي

--ههههههه اختج راحو يجيبوها من گشتها حتى يذبحوها جدام السلف اوف ربي عدالتك وانتي ريحانه متكومين اربعه وعشرين ساعه كاعده

--تركيها خطيه مريضه

--منهو هاي مريضه تضحگ عليجن علي ماتضحگ

--يمعوده ياتضحك شوفي حالها خافي ربج

--ناطري ودحگي عدل عگل منهو الشاطح

راحت جرت الغتره منها خذتها كامت ريحانه صاحت جيبيهااااا

--رايدتها حدري هينا

راحتلها  ريحانه  دفعتها وطلعت تضحگ  راحت وراها تركض دخلت للمطبخ

اكو جلكان نفط ركضت عليه  غطتها وشالت الجداحه كالتها بس اتكربين احركها

ريحانه. لا بس هاي بگت من شاهين

--وحنه مارايدين منو ذكره

اباوعلها واكفه  بس دموعها تنزل تباوعلها بترجي

سهيله. عش تبجين عالغتره ههههههههه عجل دحگي شراح اعمل

كتلتها و جدحت الجداحه والغتره لكفت النار ماشوف غير ريحانه  ركضت جرتها من ايدها وحضنتها

طلعت اصرخ لحكونننااا عميييييي الحكنييييي

اجو  يركضون من الغرفه واركان دخل من بره صاح شكوو

--ريحانه  بيدها نار بالمطبخ راح تحترك

كلها اجت للمطبخ دخلت وراهم واشوفه دايره الجلكان النفط على روحها  وبيدها الجداحه

عمي. يبه ريحانه  جيبي الجداحه يبعد ابوج

--راحت ريحتو يبه احتركت غترتو

--ميخالف عندو غيرها اجيبها الج

--مارايده رايدتو الو شتاكيتلو جثير

--ابنج يبوي ابنو بطنج خطيه جاهل يموت

--عجل ماخفت عليه من كسرت كلب ابو عش عملت بينه هيج

--ريحانه ابوج جيبي الجداحه يبعد روحي

--اني موش ريحانتك اني ريحانه شاهين

سهيله. اركااان اندارلها من الباب الثانيه

اتقدم اركان كالها يخوي انطينياها

--شاهين جان رفيجك ويحبك ماغدرك

--اعرف وحگ كلام الله

--بالحلال يخوي ماوطينا روسكم

--جيبي الجداحه يخوي

--ماريد اعيش بمجان ماهو بي رايحتلو اكمل ويا غادي

كلها بثواني الي يريد يكمشها والي يتوسل

بلمحه البصر جدحت الجداحه  كبت النار بيها -----

لاتنسو التصويت♥️