لبوة على شفا الثار

بارت الحادي عشر

لبوة على شفا الثأر

                                      بقلمي:leo Alfatlawi. 

Ins:le_m3r

بارت الحادي عشر

علقو على كل ومضه حتى تصعد القصه  ♥️

مرات اگولن گضت
ماباقي حسبت وكت ارتاح وتعدي
                 
                                 مرات اكرهه العمر
                          واسأل ودور درب للمكبرة يودي
   

رجعت للخلف واني اشوف واحد گدمي ملثم بيده سجينه  والثاني يم بيارق يحجي وياهه بالتركي
وهيه تتوسل

اباوع الغرفه نابشيها نبش ماخالين شي ماگالبي

العجوز جانت تبتسم بشماته وتباوع لبيارق بتشفي

لان تترجه  بالولد  وهو ساحبها من شعرها ويحجي بنرفزه وياهه ماعرف شردت بعدها تحجي وضربها راجدي من قوته سفطها بالفراش 

ضمت وجهه  واشرتله اي

-- ناي افلوس الجبتيهن البارحه وينهن

--يمي جوه المخده ماضميتهن

--طلعيهن انطيهن اله

اشرتله على  ايده الي بيها سجينه  افتهم وخرها من كدامي

شلت المخده طلعت الفلوس انطيته اخذهن ورد يحجي وهي بس تحلف تفل و كام دفرها ابطنها
انطوت رد عليه لميت روحي وضميت وجهي

صاحت اندارلها رد دفرها وحجه ويا بطريقه توعد اشرت اي اخذ  صاحبه وطلعو

بيارق.   غبيه راح تعب اليوم كله

--عزه ياتعب ولج شنو مكتوب علينه اليوم لو كاتلينه

--جبناء ميكتلون ذوله مراهقين يدورون افلوس راح اتشوفين منهم هواي  منتشرين بكثره هنا وانتي الثوله تاركه الباب بدون قفل

--والله من التعب نسيته  مفتوحه خلي الحگ اصرخ بلكي يكمشوهن

--كعدي اتصرخ هاي اذا مو سامو دازهم شافنه البارحه من رجعنه محملين ناي ابروح اهلج لاتتغابين فتحي عيونج اي غفله ترحين بيها

--اشوكت دخلو وخربطو الغرفه هيج ولاحسيت

--دخلو دورو الفلوس وگلبو الامه وانتي ميته

--يعني خذو كل تعبنه وحلقتي والمحبس هم راحن

--موگالولج اني ناي وهيج مسلمتهم مالي گدام عيونهم امني ضامتهن الج بمكان لو ابو ابوهم من كبره ميندلهن

كومي قفلي الباب ورتبي الغرفه وانتييييي بت الكلب مو گلتلج حرسينا اشلون نمتيييي

العجوز. مااااا ماادري

--شنوووو متدريييين گلتلج ضلي كاعده لولا

--اي اي

--يعني تستحقين العقوبه هسه لولا

العجوز ماردت لمت روحه خايفه

كامت جرت واير وراحت يمها هيه تباوعلها بتوسل وتكلها التوبه انام دخيلج 

لبالي راح تكسر كلبها بس  ابد اتكول كلولها طلعي قهرج مالت الاغتصاب بيها كل واير اقوه من القبله

اني اطفر من يمي وجسمي وجعني  كلما اروح اريد امنعها تصرخ بوجهي ارجع لمكاني بس كلبي مينطيني

اجاها واير بنص وجهه اخذ روحها بي رگضت كمشتها
-- لخاطري والله مااتحمل اشوفها هيج

--نااااااي وخري

--بس هالمره فدوه كلبي وجعني

--هاي اذا رحمناها الله يزيد غضبه

دفعتني ورجعت ضربتها واير اقوى

شفت العجوز بدت تفقد  بجيت صرخت  كافي  شنو حيوانه انتييي متحسين

--نااااي ناي اسمع صوتج مره ثانيه اخليج وياها

--مااكدر دااتخيلها ماما

--اتخسى هالساقطه امج لاتكولين هيج هاي اقذر وحده بالعالم كالتها ودفرتها حيل

-- مادري شنو الصاير وياج لو شنو امسويتلج بس كلبي عصرني  موبيدي الله راح ياخذ حقج بالاخره خليها اتولي

شمرت الواير وباوعتلها وهي  تنفت
-- بس لخاطر ناي راح اتركج والله جنت ناويه انهيج اليوم تفلت عليها  وردت اجت كعدت

دنكت خلت راسها بحضنها اشوفها متالمه رحت  يمها خليت ايدي على راسها بجت كالت ترديني ارحمها اني منو يرحمني

--عدنه رب جبير مثل ماخلقنه ماينسانه لابد الايام الحلو بعدها  مضمومه  بس صبري وحمدي ربج على كلشي راح يجي اليوم الي نتذكر المرينه بي ونضحك

--لحدمن اصبر سنين واني متحمله انواع العذاب شفت اشياء ماكو صاحي  يضل بعقله عشت عيشه حتى الحيوان هم مايحملها ليمتا اضل هيج ناي تعبت مارتاحيت بيوم  ماتحسين بيه لان ماعشتي العشته

--لاماعشت العشتي كلتلها وبتسمت

اتخيلي روحج  داخل عائله بحضن دافي مسنوده من شخصين واحد اقوى من الثاني

اتشاقين اخوج الي هو تؤم روحج وتتحامين وره ابوج الي ضحكته  ماليه الدنيا وهو يشوفكم اشلون تتجاكورن بعناد 

فجاة تلكين روحج  كاعده بين تابوتين مكسوره ماتعرفين المن اتحضنين لو المن تشتمين حتى عطره يضل بداخلج

  وبنفس  الوقت محتاره  تبجين لو اشلون تحمين الباقي من عائلتج لان اتشوفين يتغالبون على اذيتهم

--انضلمتو واتعذبتو

--لاماسمحت لحد يوصلهن  وگفت بوجه كل واحد بس فكر يقرب يمهن  اكله بسنوني ماجنت اهتم لاللضرب ولا للاهانه  كلشي اگدر عليه اسويته حتى لو كان بي اذيه لنفسي

--وهسه وين صفيتي عود حصلتي نتيجه

--بعد العمر كدامي  واستوني بلشت بأول الطريق اسعى ياعبد وانا معك خلي شغلتين براسج اول وحده الصبر لاتستعجلين  والثانيه  شغله الخوف واليأس امحيهن من ذاكرتج

--ااتمني اصير مثلج  قويه

--اني موقويه بالعكس لو تجين للصدگ افشل وحده بالتاريخ بس الحياة صفعتني راجدي صحتني لزماني

--شبعني صفعات الوكت بس مااكدر اصحى لان مااريد اذكر المريت بي انتي صحيتي لان جان عندج احد اتكملين لخاطره اني بروحي ماراح احصل بس الوجع والكسره

--واني وين رحت موتكولين اجيتيني من السما وصرتي اختي اعتبريني عائلتج الجديده

اخذت نفس طويل وتحسرت رفعة راسها ليفوگ مغمضه
اندكت الباب كالت
وهاي الباب تندگ كومي شوفي ياصخام بعد خلي تكمل فرد مره

رحت فتحتها دخلو الجهال الزغار ولد زهره نزلت  راسها باوعت
-- هااا بده الهم تعالو ماما

دخلو يركضون يمها كعدو 
--اشوكت دخل

--من المسا لساتو هون ماما ئالت لاتتحركو بس في  برد كتير

--نامو حايب اهنا ليش مااجيتو من وكت

--كنتي موهون وهو حزرنه مانؤل لحدا

--الله ياخذه ناي فرشيلهم وغطيهم خلي ينامون

كمت فرشتلهم نامو غطيتهم هواي حتى يدفون زين لان برد

كعدت  امسح على روسهم يكسرون الخاطر اطفال زغار مايعرفون  من الطفوله بس اسمها حاملين تعب وضيم يهد اكبر احد

غفو خطيه بسرعه  اباوع لبيارق عينها بيهم اتباوعلهم بكسره عدلت الغطه   وكمت

كعدت يمها كلتلها شنو اشبيهم وين امهم ليش اجو لهنا

-- امهم اتزوجت واحد غجري حقير  حتى يستر عليها وعليهم تالي طلع كلب ابن كلب يجي يخلص شهوته بيها وياخذ شكو افلوس ويروح ينقبر يم معشوقته  

--مااطلگت

--وين تطلگ منو يخلصها منه تره عقد هيج فوكاني ويضلون مكمشين بيه الحيوانات واذا حجت يفرك حلكها محد يفزعلها هنا اذا صاحبته يسحلها محد يكله وين اتريد موانوب مرته

--ليش هنا غير نظام

--بنتي يانظام هيه داخله بدون اوراق بشنو تشتكي غير يسحلوها يشمرها عالحدود

--هذا المكان شنو يتسمى الي احنه بي

--حاره ال----اكثرها غجر ومتشردين اجانب  ناس تعبانه كلش حتى الشرطه متوصل هنا قليل اشلون اتكولين ماحاسبينه بشر مكان متروك للمتعاطين والمدمنين

--انتي اشلون اجيتي لهنا يعني صارلج اشكد

--سالي هالحيوانه اشلون خطفتنه واشلون شمرتنه بسرداب اشهر ماشايفين الضوه وحاجتنه نقضيها جوانه

--اهلكم وين عنكم مادوروكم

--ماعرف جنه زغار ومر وقت طويل علينه جوه بالسرداب  من الرعب والخوف نسينه حتى اسامينه    وجانت تنقلنا من منطقه لمنطقه و -- اووو ناي سالفه طويله  كالتها وغمضت مسحت عيونها

--مافكرتي تدوريهم من اتحررتي منها

--شدور  منو يقبل بوحده ماضاله بنفس بشر مسقطه كم نغل

--جان سلمتيها للحكومه ليش تبلين نفسج بيها

-- اريد استلذ بموتها اشوفها تتوسل بديه حتى اخلصها من الدنيا  اطلع دموع نرجس وألمها من روحها واطلع شكو دمعه نزلت منا وحسسها بشكو خوف عيشتنا بي وبدل الاختصاب الجنه نتعرضله اراويها اضعاف الالم مالته

كالتها واندارت للعجوز  صكت على سنونها كلتها خو مانسيتي اخر بجيه الها وهيه تتوسل كتلوني حتى ترتاح من الألم

كامت دفرتها بحلكها ورجعت دفرتها مره ثانيه  براسها بكل حليها

كعد الطفل على صوت الضرب شافها   بجه  خايف تركتها ورجعت كعدت اخذته لحضنها
-- لاتبجي حبيبي هاي مثل عمك نكسه تستاهل الضرب

--خاله خايف هلا بيأتلنا

--اكص ايد التنمد عليكم نام لاتخاف اني يمك

--ناي سكري الباب امنيح مشان مابيدخل

--هسه اسده نام يروحي

اتمددت بيارق اخذته لحضنها  اتمنيت ما اعرف قصتها شنو ولانرجس اشلون ماتت

  اشلون انگلبت الايه وهي صارت تحت رحمتها بس خفت اسألها راح يجي يوم وعرف ادري راح تحجيلي كلشي من وحدها

مرت بالساعه اندكت الباب كمت فتحتها دخلت زهره بس شكلها تعبان تبجي كالت وين كعديهم

--خطيه نايمين تركيهم

--لاخلي يلا أومووو كالتها وراحت نكثتهم من افراشهم

كامو ابسرعه شبكو امهم   اخذتهم وطلعت بدون لاتحجي

بيارق. ناي اضن مابيها بعد نوم

--لايالله نطلع للشغل اقلها نمسح العماير وبعدين انروح للشقق حتى يضل وقت اكثر بس ها ماالم ازباله من الشقق بس انظف

--اني المها ميخالف بس فضيني وقليلي مكياج ولج البارحه الزلمه يكزز عليج خفت يتحارش

--همزين اكو قانون اهنا بس يتحارش اسمطه بدعوه اكلج اشو تاهيه صدك مكان قانون بي ودوله ملتزمه ومكان تايه

--ماكو مكان تايه بس كولي مناطق مبيوعه اي

مثل هاي الحاره خاصه بالغجر قليل يجوها الشرطه بس وكت المصايب تلكيهم على راسج اكو مكانات خاصه بالمافيات همه ابنفسهم الامن  سامحيلهم بهالشغله ماعرف شنو السبب بس باقي المناطق لاقانون فوق الكل

--لعد عفت المناطق الباقيه كلها اجيت بذني خصيصا اني

--مو الله يريد يطيح حظج بالزايد دكومي

كمت غيرت ملابس رتبت روحي طلعنه بعدها النومه بعيني بس شسوي لازم اشتغل

ضلينه واگفين بالموقف منتظرين الدلمش كلما تجي منلحك بسبب الدوام عين بالعالم وعين بالساعه

--ناااي بعد مابيها يلا عالباص

--ولج غالي متسوه ويأخرنه اكثر

--ميخالف لعد شنسوي هاي كدام عينج مانحصل وكت دوام

--هااي وراج باص  اجه ركضي صعدي بين ماطلع الكارت

اني احجي وهي ركضت اول ماوكفت صعدت واني وراها جنت مدنگه طلعت الكارت صعدت طبعت الكارت دخلت واشوف كدامي جود  خال اديه عالگشن ومدنگ عليها ضام وجهه انداريت ردت انزل مزدحم وتحركت السياره

صرت بضهر واحد ودخلت عالسريع  وصلت يمه احس كلبي انخطف عطره اجه بداخلي كمشتني العبره  اشكد مشتاقتله اتمنيت انرمي بحضنه مثل قبل واشكيله من كل الشفته

صوت بيارق فززني وهي اتكول هنا تعاااي

عبرته رحت يمها عبر مكانين دخلت گعدت وهي كعدت يمي  ضميت راسي
--شبيج

--صوتج لاتگولين اسمي

--اكو واحد عرف هنا

-- ذاك الولد الگدامج جود

--وهاي انتي تبجين لخاطره جان حجيتي ويا اذا هيج مشتاقتله

--ردت بس انتبهت لروحي شلابسه والمكان الرايحتله ماردت انزل من عينه خفت يستحقرني اكثر مااني مستحقره نفسي

--اتحبي

--موحب ولااخوه ولاصداقه شي اكبر من ذني كلهن

--مبين فايخ وشكله حلو

--يمتلك حنيت  العالم  ينطي عمره لصاحبه يسنده بروحه وكفلي بأيام الي اتخلت بيها عني حتى امي رجع ثقتي بنفسي بعد مافقدتها من اعز ناسي

-- يجون بوقت غلط المفروض مانلتقي بي بأحد حتى لايزيد جرحنه

--الغلط مو بيهم الغلط بينه احنه مانستحق مثلهم ابكد ماقدملي ابگد مااذيته شوفي اشلون تعبان ومحتار جان يضحك للهوا بسببي ترك صديق عمر قبل شغله

--شدراج تركهم

-- مبينه من كسرته وصعدت الباص جانو يطلعون سوه ويشتغل بأسنيورت هسه جاي وحده
ولوف جلار  اذيته جان كلام كرم صدك من يكول ابتعدي هسه حسيت بالغلط مالتي

--كومي حاجي كسر كلبي ولج شوفي اشلون امجتف ومنتجي

--اذا تقربلته راح اكسره  اكثر لان مايرضه اشتغل وتعب وبنفس الوقت مايكدر يساعدني خليني بعيده عنهم كافي السويته بيهم

سكتت واني خليت راسي عالجام اباوعله اشلون منتجي مغمض التعب والهم مبينات عليه اتندمت دخلت بينهم وخربت حياتهم

عيني بي ابتسم  اذكر وكفاتنه بالمطعم  من يعصب علينه اني وكرم  ويرد  يضحك لان مانسمع  منه ونضل على غلطنه

وكفت السياره بالموقف صعدت العالم انتبهت لكرم صعد دنكت بسرعه اجه يمه وكف كلمو العالم صعدو اتحركت السياره

نزلت الكلاو لفيت وجهي عدل بالمشمر خليت راسي عالكشن  دقايق واسمعه كله اليوم يردولنه الخبر

--ماكو بعد خبر وصاحبك لاتجيبلي طاري

--جود كافي تره زودتها كافي عليه المصيبه الشايلها ولك نوم مثل البشر مادينام مواصل ليل نهار يفتر مثل المخبل

--الله يلعنه لان حيوان ضيع كلشي بيده 

--تركته بطريقه  للمركز الرئيسي راح يشمر روحه بتهلكه في سبيل يحصل خيط

--عسى مايشمر روحه بجهنم ماراح يغير شي انتهى بديت ايأس

--وين انروح هسه

--مادري مااادري كرم عقلي وكف لاتسألني

--صوتك يمعود العالم انزعجت اني راح انزل

قاطعه رنة فونه رد ها خويه --لاهذا وياي طالعين للتقسيم -- تمام هاي هيه ثواني خليك وياي

--جود يكول اطلع عالتقسيم الولد مناطريك

كام جود دفعه وخره وداس دگمه الموقف وكفت السياره نزل بدون لايرد ركض ورا كرم نزل 

بيارق. شكو شو مخبوصين

--اكيد ماطولهم مصاحبين الغثيث تلكين مسوي مصيبه وباليهم ويا مو اول مره

--شنو يشتغل. الغثيث

--شكو شي ممنوع على وجه الارض  هو بي مع هذا محد يعرف شنو شغله بس مشترك بين  حدود تركيا والعراق هذه العرفته

--عزه بعينج ناي طلعتي موهينه شماخذه ولج

--اتفاق والحمد الله  ربي وگفلي طلعت منه بسلام واله اني شمرت روحي بتهلكه بدون تفكير الله اعلم  شجان صار بيه لو مامطروده بذيج الساعه

--بس مبينين حبابين ذوله الولد

--اكثر من ماتتصورين رغم رعونته واخلاقه الي محد يحملها بس يحبو وايدهم وحده مع العلم يعرفو يشتغل شغل مشبوه

--يعرفو ميأذيهم بكد ماساندهم

--هم لاتأمنين  كلش واحد ماعنده گلب ولايعرف طريق المشاعر وين اهم شي عنده مصلحته عباره عن شيطان متنكر محد يسلم من ايده

ولج اخاف يدورج

--امني تلكي رمه اليمين من ساعه الطردني اصلا بعد مايذكرني بنتي هذا فاقد الاحساس شافج عجبتي خلص وياج كم يوم انتهى
ورقتج احتركت يمه  شمرج حالج حال الحيوانه وجاب غيرج وحمدي ربج اذا طلعتي من جوه ايده مثلي  بدون اضرار الله ياخذه مثل مايستغل المعتازين

 
-- لاتضوجين نفسج ربي ياخذ حقج من كل واحد استغل ضعفج  يله وصلنه  بلكي نلحگ نرجع من وكت كومي

مرت الاسابيع  مالتقيت بيهم بعد وشلتهم من راسي او بالاحرى مالحگ افكر ملتهيه بالركض واشلون اكدر اجمع افلوس اكثر

اطبعت على شغلي صح موذاك المبلغ بس بيارق ساعدتني وكدرت احول  الماما مبلغ  للجرعه الثانيه بعد  وحده والعمليه

صرت بت هاي الحاره وتعلمت على ناسها او  صرت منهم

هواي اتعلمت اشياء منهم عدم الخوف النباهه السرعه بالشغل اوكف بوجه المقابل وتحدا اكبر واحد بدون تردد

بالبدايه جنت كارهه وجودي بس من اتعرفت عليهم لكيت اكثرهم فقره وصاحبين نخوه رغم انو طريقهم جان مايل بس زلم من صدگ

حسبوني منهم بت حارتهم واي مشكله او شي يوكفون وياي

هم اكو كم واحد سالفه زهره اتكول زعران الحاره مراهقين طايشين  بس مايحصلون مجال ويخافون من سامو ميتقربون النه

زاد الحمل عليه لان علاجها غالي   من غير لحن الي يوميه بمشكله ومضروبه واكعد اليل كله اقنع بيها ماضل شي واخذكم لبالها عايشه بنعيم وناسيتها اشكد اتحمل حجي منها ومن ماما تاركتهن جنت اسمع واسكت  لان اعرف روحي مااكدر اجيبهن اذا مااتخلص ماما علاجها كله

الشغل صعب و الحاويات موذيج الفلوس اليل كله نسهر نفتر عليهن كوه انحصل ونخاف انروح للطمر الصحي بعد الصار كمنه نكتفي بالموجود

اتعلمت لغه اشويه الحمد الله  اني ذكيه ابسرعه الكف وبيارق ماقصرت وياي خطيه لغة شغله العربي ابد ضلت تحجي كله تركي وياي حتى اتجاوب اشويه ويه العالم وبالفعل اتعلمت صح مو هواي واسمع مگلوب  بس امشيه حالي

واكفه اغسل اماعين يم مره جبيره اتباوعلي
وتبتسم كالت اتعرفين اطبخين

--اي اعرف كلشي شنو  اطبخ

-- شي كيفج

رحت للثلاجه طلعت اللحمه والبتيته والبصل وكفت سويتلها برياني  اتذكرت كرم من يوكف على راسي واني اطبخ ويستعجلني ضحكت

غصبا عني نزلت ادموعي موبيدي احنلهم الله يلعنك غيث حرمتني منهم

كلمت طبخ هدرته طلعت كلتلها كمل هي جانت اتصلي

--الغرفه تنضيف

--البارحه نضفتها بس هم انضفها ميخالف تردين بعد شي

--اي ملابس غسليها وشطفي البالكون

هيه حجت هواي بس هذا الفهمته منها

اشرت اي ورحت للغرفه نضفتها لكيت جهاز عالجربايه واني تعبانه مهدود حيلي كعدت اشويه گلبت بالفون جان مابي رمز

ماعرف شنو الخلاني ادخل على صفحه كرم لكيت اخر صوره منزلها  بزواجنه  غيث واكف بقاطه يم السياره وجود يمه وكرم بالنص ماطالع بس راسه حاضنهم اثنينهم ويضحكون

التاريخ قديم

رجعت للخلف بالمنشورات لكيت بين واحد والثاني مواكثر من يوم يومين

كلبي لجمني شنو الصاير وهيج تارك الفيس معقوله اتخاربو وردو  للعراق

دخلت للماسنجر دزيت ؤك ردت بس امن عليهم  ماردت ابين منو اني

ماشفت جواب والمره شفتها  اتحركت  شمرت الفون وكمت طلعت للصاله كلتلها كملت باجر اجي امسح الباقي مالحگ لاجره لوسمحتي

--باجر الفلوس من اتكملين

--فكور من الصبح  اكرب باجر بت الفكر صارلج اسبوع اتاجلين متكليلي اشوكت

--احجي تركي ماافهم

--عساج مافهمتي عمرج انعل ابوج لابو الذل العايشته وياج

--شنو تحجين

--اختي مريضه خلص علاجها لازم احوللها افلوس

--باجر  انطيج يوم واحد متلحگ تموت

--ربي ياخذ من عمرج ويخلي على عمرها كولي امين

عفتها تلغي تريد تفتهم شحجي وطلعت لكيت بيارق  عالدرج كاعده تصفن  رحت يمها كلتلها اكيد هم ماانطوج افلوس مو اولاد الابلسه تكول نگدي مونشتغل

-- ولج يمكن حامل

--عزه ابعينج اشكد صارلها متاخره

--ماعرف بس مااجتني من يوم الحادث صار اسابيع من اتعده وقتها

-- هسه انروح لدكتوره ونتاكد

--شكلها ابن حرام ابطني شوفي ولج وين انطي وجهي دبريني ماكو غير انزله

--خطيه ولج شذنبه

--ذنبي اني اجيب طفل ماعرف ابو صدك تحجين تعرفين ابنمن اول واحد نام وياي لو الثاني شتكولين ابن منو

--استغفر الله بس هدئي لازم اكو حل خلصتي شغلج لو اكوم مكانج وانتي ترحين للبيت ترتاحين

--شرتاح خليني اشتغل بلكي يوگع واخلص يمعوده وخري خلي اكمل مسح وصعدي للشقه الطابق الخامس اول وحده

--تمام اكلج هاي ماانطتني افلوس

--يبوو كرميده هاي بس اخذهن غصبا عن ابوها كومي كملي يلا ماضل وقت حتى انروح لعماره ٢٠ اكو زبون طلبنا

--اووو هم هذا ولج شقته وسخه تلعب روحي منه

--لعد شنسوي نااي اشلون انحول افلوس اختج البارحه كالت خلص علاجي

--هم صدك يله اتلثم واشتغل الله يشعلهم بالدنيا قبل الاخرى قذرين عدهم الشرب اهم من الاكل

رحنه كلمن كملت شغلها بس بيارق كلش تعبانه واليوم من الصبح  مسدوده ابوجهنا ماحصلنه ولادينار  حتى ضلينه  بدون اكل

نزلت لكيتها كوه واكفه تتوجع سندتها وطلعنه اتوسلت بيها انروح انحلل حتى نتأكد كوه رضت

رحنه مكان مثل الصيدليه حجت هيه وياهم قبلو ياخذولها تحليل بس من كتبت اسمي عالراجيته اتعجبت باوعتلها ضحكت

--ليش عود اسمي مواسمج

--انتظري خلي نستفاد

--من شنو نستفاد مافهمت

--اذا طلعت حامل تتصلين بغيث اتكليله انتي حامل ونسحب افلوس منه

--وهو هيج غبي راح يصدك ولج هذا امفتح بالتيزاب واني مااريد منه داشتغل ومشيه روحي ماصدكت افلت واستقر لاترديني 

--انتي ثوله اول وتالي الطفل ينزل وشمكفيه روحج شو كليلي اشلون اتحولين افلوس هالجرعه وحتى لوكلتي اشتغل زايد تمام العمليه اشلون ولج خليج وراي مثل ماشمرج بالشارع وماحسب احساب خليني اخذ ثارج منه

--بيارق اخاف لبالج سهل هذا والنبي يجي  يعلكنه بالحاره من كفشتنه ويخلي الرايح والجاي يتفل علينه  بين قوسين يعدمنه راچديات اجفينه شره

--مايكدر اني اعرف اشلون افرها عليه بس انكمل العمليه وكليله راح الطفل لاراح يشوفج ولايعرف من الاصل

--يطلعنه من جوه الگاع

--مايكدر عايشين بحاره متخطر على بال احد اصلا مامعتبريها موجوده بتركيا  ميعيشون بيها بس الحيوانات

-- مااعرف لايمعوده لاتبليني ويا هالخبل

ماردت كعدنه ننتظر النتيجه صاحو بااسمها كامت جابتها وتضحك كالت مبروك

--امشي بيارق اليشوف ضحكتج  يكول ابن انذور محصلته

--لاابن الغثيث الي راح يفتح باب الرزق علينه

مارديت لان بس اريدها تلتهي بشي وتنسى اشلون صار الطفل رجعنه لمنطقتنه  اتلكانه سامو وهذا كرهت روحي هالكد مايتعرضلي اتكول ماكو مره غيري بالحاره شافني كامشه بيارق  كال مريضه

--اي

--تعالي ارتاحي 

--سامو وخر 

--انتي الحب لاتزعلين

--دوخر حب معوزه طياح حظ

--حلو تحجين

--من كثر ماتعرفت على ناس راقيه بحياتي  صار لساني ينطق بالشهد  سامو وخر لاهفك كله

هو يضحك على لغتي واني الطش ماعون اوصل وصلتها  للغرفه وطلعت اجيب صمون لكيته واكف بالباب خله اديه يمنعني

--اشلون شغله سامو مووقتك اريد صمون ميته جوع

اشر على عيونه وكال بس بوسه

--دخيل الله سامووو

--ههههههه حبيبي انتي عيون حلوه

--نسيت الغمازه اويلي وينك يالبالي اتشوف مرتك وين وانت كتلت روحك لان اجاها مسج والله جان اخذتلك درب بي تسليه  

يباوعلي صافن مايعرف شحجي ضحكت ضحك الزمال على ضحكتي وباسني بالهوا

دفعتهه وكملت طريقي  لكيت حتى محل ابو الصمون معزل ومعدتي كامت توجعني من الجوع هسه اشبيه ماعرفت ابوكلي ماعون برياني من المره شناكل هسه

رجعت  اسحل بروحي لكيته بعده بمكانه سجينته بده يشخط  بعوده شافني ابتسم وغمزلي

--ربي رازقني بحظ وقوه تجذب شكو سگط

--احبج

--اني هم احب قسمتي العوجه

--تعالي اعلمج اشلون تضربين اليتعرضلج

--بس احجي عالكيف لان ماافهم عالسريع

--انطيني بوسه

--اشتعل ابوك غيث

دنكت ردت اعبر من يمه كمشني حصرني يم الحايط دنگ راد يبوسني صرخت  وضربته كف   عصر ايده   شفت وجهه اتغير رجعت ليوره خايفه لان نظرته جانت موطبيعيه

خذ الفلوس من ايده العاصرها وباسها بدون لايحجي بس مبين يريد ينفجر 

عافي وراح اخذت نفس

عزه بعيني لو ضاربني بالسجينه ومشوهني اشوكت ابطل هالرعونه دفعي ولي جوه اتضربي ليش متشوفي متوحش

دخلت جوه لكيت الغرفه مفتوحه و بيارق اتغير ملابسها  كالت شنو ماحصلتي

--لاوالله معزل بس سامو اخذ الفلوس بلكي يجيب

--ناي ابتعدي عن سامو تره شفته خال عينه عليج هذا موراحه تعرفين بيمن يفكر

--ماانطي مجال

--ادري متنطي بس خليج نبهه دوم وياي لاطلعين وحدج والباب دوم قفلي وحتى الحمام بعد لاطلعين وحدج كعديني

--تمام بس ارتاحي

--لاياارتاح كومي وياي خلي انطفر عالواهس بلكي لنه طايح

--انتي حامل اني شكو طفره وحده توكع معدتي من الجوع

--ناااي فدوه لغيث كومي

--حظج وحظ غيث غير ذكره هاي

--ابربج هم جان يشاقيج بليل لو بس نومه وحي الله

--امور شخصيه عيييب بنتي

--ابروح اهلج والله ابنفسي اعرف شنو يدور بين المتزوجين من رومانسيات

--اشكد بطرانه غيث والرومانسيه لايتفقان ابدآ

--اشلون يعني

--هذا بشر من نوع اخر ويحب يغث المقابل   يعني يكرهج ابروحج يضل يصنف ويعيب وشقى ثكيل مايتركج لمن يبجيج   

-- هم حسيتي بمشاعر ويا

--ماعرف ماضلينه هواي وجنت حاسبه حساب اشهر وننفصل وتردين الصدگ مستكثرته على روحي جنت

--ليش هيج لگطه

--حلو كلش وصاحب جسم وأبن عز يعني حتى بالحلم الوحده تخجل تحلم بواحد مثله 

--دااحس اكو شي بعيونج ولج من تحجين

--ماانكر جنت احس بدفو حظنه ماعرف لان اول واحد يتقربلي لو جان حساس بشي ثاني بس دوم انعل الشيطان اشيل الفكره لان اعرفه مولي

--شعرفج يجوز يحبج

--اي من شمرني اول ماوصلنه بين العشق الحقيقي ولج هذا الف وحده اتمر علي باليوم ماخال وحده من بنات اسطنبول ابنفسه گاضيها ملاهي وسهرات من حضن لحضن

--اوف شوقتيني اشوفه

-- متقلب المشاعر والشخصيه  يطلع الف عيب بيج  يكرهج بروحج تالي  من يجي  اليل  العيوب تتحول لهفه يضل يدور احضان وبوسات ولاتكول هو نفسه الجان ناصب عليج بالنهار

--لعد وصل الدور الج تعالي ننصب عليه اشويه

--تركي فدوه تره هيج حجيت والله اصلا موبالي كافي البيه مااريد اتمشكل ويا

--دولي وين مبايلج شو كالتها واخذته صورت التحليل كالت شسم صفحته

--مااسويها بيارق

--ناي اشوكت عمليت امج كليلي اشلون ادبريها ترديها اتموت  اشمدريج مالله دز هالطفل حتى ينقذج

--مااعرف بس خايفه

--خليج وراي واذا عرف شمري المبايل عليه وكولي مواني ماراح يدري ناي سمعي مني

--خليها بعدين موهسه

--لااشو هسه اعرف تردين اتطفريني شوفي لاينكسر خاطرج عليه تره اي فلس اتسحبي منه يستاهل اضعافه من شمرج وماحسب احساب توكعين بيد مثل هالكلبه تدرين شنو مصيرج لو من وعدج ورد بحجايته وردتي اتبيعين كليتج لو ماطالعه بوجهج شجان صار

--هو يستاهل بس اخاف والله هذا موسهله العب ويا

--اسم صفحته بسرعه ومالج شغل بالباقي

غيث----- تلكي صديقي بالصفحه القديمه

كعدت  حولت على صفحتي القديمه دخلت على صفحته  سوت ارسال للصوره وغلقت الفوف شمرته وكامت اتطفر

--ولج اخاف خطر تالي يصير بيج شي

--لاتخافين مسقطه طفلين قبل ماصارلي شي يلا كومي اخذيلج كم طفره

كمت عالواهس عجبني الوضع   نطفر ونضحك اتكول نلعب مو جاي انسوي جريمه نسينه همنا كله

الضحكه تطلع من گلبنه منعرف صدك لو على حضنه الاعوج رحنه على  قوطيه رجعنه بطفل

لمن تعبنه بهتنه كعدت كلتلها خلص مابيه حيل بعد

--ولي لعد اني بيه حيل وهاا ورانا طلعه بليل

--خلي اتسمم يمعوده صدك ولج ماعدنه افلوس بعد

--الله يسلم امج شفطتهن كلهن وبعدها اتزاكط من شفتج لسه ماجمعت فلس خلي اشوف تسوه

--امداج لاتحجين هيج هسه تجي ونعيش بيت واحد وتشوفين حنيتها وطبخها الطيب راح اتعوضج عن كل المريتي بي

--الله ناي هيج ونصير مثل البشر ونطلع من هالمكان ونشتغل بمكان نضيف ونصير بنات حالنه حال البقيه

--لو سمحتي مدامات تره اني مطلقه وانتي حامله طفل

--هسه خليني اعيش بالاحلام ناي حتى دراسه ندرس نتعاون اني وياج بالمصرف ونكمل دراستنه حتى انشوف بلكي اكو مستقبل بعد هالتعب

--ان شاء الله بس خلي  انلم افلوس العمليه والجرعه الاخيره  حتى اجيبهن بعد اي شي نشتغل راح يكفينا

--ناي مو ترجع امج تستعرين مني وتركيني

--انجبي والله اختي حالج حال لحن حتى ماما متلهفه اتشوفج هالكد ماسولفتلها عليج بس لحن راح اتكون مسؤوليتج مالي خلگها فاهيه واني روحي طالعه

--والله لطلعها من عين النعوصه واخلها تاكل بشر مره كد حالها

--موكافي اطفر ولج

--اي والله متت كافي يلا انام باين سامو خمط الفلوس نامي عالخفيف يلا

خليت راسي يم راسها انباوع للسگف كلتها شوفي هالخط مثل الحصان

--لاولج هذا زمال صورت غيث من راح يشوف التحليل

--ههههههه وحق الله اذا لكفنه اله يطلع الجذبه من عيونه سمعي ولج الباب تندگ اضن سامو خلي اكوم

كمت فتحت الباب جان مطيني ضهره اندار انطاني علاكه وبعده گالب خلقته كمشتني الضحكه كوه اتمالكت نفسي

باوعلي واتخصر ضحكت ماكدرت هو هم ضحك كرص خدي ابسرعه رجعت راسي ليورا دخلت وسديت الباب

بيارق. والله اله يوم يدخل يفلش روسنه يطردنه منا ويطلع ضيمه بيج   شنو جاب ولج شو العلاكه جبيره

--عزه مانتبهت كمشتني الضحكه

--ولج صدك متطلكين وتاخذي ونصير احنه صاحبين الحاره

--اي واجيبج بليل وياي حتى اترجميلي شنو يريد لان نص الكلام مافهمه  اكلي وسكتي

--استوني اطلع اللفه واسمع وصلي مسج تركتها وفتحت الفون لكيته من غيث كلتلها ولج غيييث هذا

--اي الله جابه والله ضايجه كمشي لفتج وتعالي يمي

اخذت لفتي ورحت انتجيت عالحايط ابصفها غطينه رجلينه وفتحت الفون خلت راسها بالشاشه

--بنتي خلي اعرف شكتب وخري راسج

اني احجي وهو اتصل شمرت الفون ضحكت

-- ردي ولج

--شكله عزه هسه يكشفني

--بس كمشي حلكج الفاهي ومحد يدري يلا لج قبل لايبطل 

اخذته رديت استوني اكول الو واجاني صوته شلع طبله اذني وييينج ياغضب الله

--لاتصرخ  تره والله اغلقه وبعدين ليش تريد تعرف مو انت الطردتني

--ناي ناااي لاتختبرين صبري كولي وين انتي

--يم ناس بالشارع بالملهى مااتصور يهمك

--الصبر يارب العباد  ناااي اخر مره اسأل

--لعد لاتسال مااگلك الك ابن يمي گلت خلي اكولك بي واسد الفون ولو انتهى حقك منه بس اضل احسن منك

-- اشلون صار وشوكت ناي وينج

--اني غلطانه دزيتلك التحليل روح غيث

--نااي ناي عطيني مجال يولي بالقران موش  قصدي اشكك بيج بروح اخيج   وين مجانج دزيلي الموقع

--شنو الاتغير هاي بس لان عرفت عندك ابن يمي

مارد استغفر بس صوته مختنگ وتعبان اخذ نفس رد گال بروح اعزاز گلبج يكفي يولي  خذتي حگج وزياده

--لواعرف هيج الطفل راح يغير مزاجك جان كلتلك قبل لاتطردني

--وعمه الساده من يوم الرحتي لسه اندور ماخلينه  مجان ولج النوم مادحگتو كل دقيقه اتخيل صارلج شي  ابرروح  عاشق  احجي وين انتي

--غيث والله عايشه ومدبره روحي لادور بعد ماارجعلك واذا عالطفل لاتخاف اول مايجي للدنيا انطيكيا لان ماكدر احمل مسوؤليه بعد شخص

اسمع ذب حسره طويله وسكت اشويه وحجه بهدوء ناي يولي عگلي وعطيني العنوان

--شتسوي بي اخاف ناسي اهانه لو ظربه ماجربتها بيه ضلت ابنفسك اتسويها غيث انسى اكو اتفاق بينه وهاي اني راح انفذه حتى نتصافه

--يولي تراج بعدج بأسمي

--حيل اشعجب لسه ماطلكتني موكلت اول منوصل لوحبيت بعد اتذلني

--شنهو اليرضيج وتنسين  العملتو

-- مااريد بس خليك بعيد عني ورجع لراتب لهلي لان هذا اتفاقنا

--تمام  والشقه من اليوم اسجلها ابأسمج بس

--لاتكول بس مكان انطردت منه ماارجعله صح فقره بس عدنه كرامه تسوه اهلك

--اخ بويه  تمنيتج حدي  تاعلمج اشلون تهترين 

--اي بين على حقيقتك طلع صوتك مو

سكت اشويه واجاني صوته من بين اسنونه  ناي ناي ناي 

--روح غييث

--يبه  انتظري اشبلاج  اطفرين لاتجين بس عطيني  عنواج ادزلج افلوس تتسممين بيها

--اسلوبك غيث لاتخليني احضرك ونزل ابنك

--كونج مره صدگ  وتعمليها  وعمة الساده   اطلعج من حدر  الكاع وعدل النقص البوجهج

--جان طلعتني صارلك اشكد ادور وجهي مابي نقص لاتضل اتذب حجي

اسمعه  اخذ نفس وگال خرب بيج لبالي صارلج شي وبالنسبه لوجهج شنهو طلعتلج غمازه ثانيه لو اتعدل لون عيونج

--مستفز ماتتعدل روحي يله اريد انام

--ناي  بداعت امج لاتخليني هيج لاطايل سما ولاكاع التردي اعملو وهذا شاربي موش على وجهي اذا رديت بجلمه عطيتها الج

--من الاخير  غيث مكاني ماراح تعرفه والطفل اول ميصير اني اجيبه الك بس اذا عرفت الراتب ماموصله لهلي حتى الكفل ماتحصله يله روح

--اكفي يولي  تره  ماجان الاتفاق هيج لازم تگملين الحمل يمي

-- ولاجان الاتفاق تجيبني من العراق   تشمرني هنا وانت تدري ماعندي افلوس ولاجواز وحتى جنت مريضه

--وكتاب الله بنفس الدقيقه رجعت

--رجعت لولا ميهمني غيث تريد الصدگ بعد مااثق بيك وماعونت احصل مكان استقر بي لواموت ماابهذل روحي بعد  الصار والحسيته

--تمام بس هدي والحمل صدگ لو جذبه من ضمن قاموسج

--منو كلك اني اجذب تره اني معروفه بالصدق

--لاحشى منهو گال  مشهودتلج من اول لقاء بينه

--هذا يتسمي هروب من مصيبه موجذبه

ضحك وكال اووف بويه كلت رحتي بعد مااسمع صوتج  يولي كطف جكاره هيج شليتي حالي خليتيني افتر مثل المسودن مااندل طريجي عش يولي 

--لوماهاي المصيبه مال الحمل  اصلا ماامفكره اتصل

--والله ياخوفي هم نفس مصيبه  الهروب لان اعرف كوارثج متخلص 

سكتت رد كال بهدوء ناي لخاطر الايام الگضيناها سوه والله تعبت ولج اريد اناملي ساعه مااكدر لخاطر الطفل اخاف يصير عليه شي

--كلشي مايصيرله  اكدر ادبر روحي   وباجر حول افلوس لماما حتى مااطلع للشغل احافظلك عليه يله اريد انام 

كلتها وغلقت الفون قبل لايرد  طلعت من الصفحه  لان اخاف يدخل برنامج خاص وتالي يندلني

انداريت لكيت بيارق صافنه هيي شكو

--نااي عندج مثله وجايه نايمه يمي

--وانتي وين شفتي هاي بس سمعتي صوته هيج سحتي  وهم  والله علمود الطفل تره موبحالي هذا حفيد العائله املاكهم كلها متعلقه بي

--لعد اذا هيج روحي سويله طفل

--مو بلشتيني بحمل اشلون اروحله خلي اخلص من العمليه مال ماما وافلت بريشي اني شكو ابأملاكهم شمستفاده  بس كون الله ميكتشفني

--ناي صدك اذا تردين ترحين روحي تره صح كلامه احنه بغابه وانتي زغيره رادلج حمايه

--تصدگين لو اگلج اخاف منه لاتسمعين حجيه هيج بهدوء تره جواه بركان على اقل  غلطه يثور واني ماعندي احد حتى لوحركني ماكو واحد يعترض 

--لاتغلطين خليج ماشيه عدل

--الحجي سهل بس تطبيقه صعب تدرين شنو جنت احس من انام بحضنه احس بذل ورخص لازم اسكت على كلشي يسوي واتحمل كل مزاجه وماارد بس لان مشتريني بفلوسه

--يجوز يحبج بالمستقبل ويعاملج زين

--حتى لوعاملني زين اضل ذيج الي اجت باست حتى ايده بس حتى يشتريها بگدر اتمنى النهار يخلص حتى اخلص من نضرة الذل اتمنى اضعافه مايجي اليل غيث صاحب مزاج مايخطر على بالج كميه الالم الجنت احس بيها واني داخل حضنه واخاف امنعه

--لان بعدج زغيره تتعودين ويه الوقت

--ههههه علمااتعود لنه صاير الطفل ياخذه ويرد يشمرني ليش حتى اسوي هيج بس لخاطر كم يوم اعيش بالعز ويا انعل ابو العز الي يخليني اذل روحي هالكد

--خلص ناي تركي هاي هيه كلمن اخذ حقه انسي

مسحت دموعي  باوعلتها وضحكت عالسويناه  ضلينه انسولف ونضحك نسينه شكو حزن  لمن غفينه حتى الشغل راح مال اليل ماطلعنه

كعدنه ثاني يوم وحده اتغم الثانيه عالفهاوه انريد نبني مستقبل وحنه كاضيها نوم

مر يومين الفون فتحته بس اتصلت بماما اتاكدت حول الحساب وغلقته

اليوم كعدنه كلنه نشاط لان شغل اليل تركنا منعتازه بعد ماكو تعب رحت للحمام سبحت وحضرت روحي

خلصنه طلعنه مرينه بالميدان صار المطعم كدامنه اشتاقيت لشوفتهم وسوالفنه وضحكنه

اتخيلت جود بعده واكف وكرم يتوسل بي ينطينا افلوس حتى انجيب عرنوص وهو يأشر دخلو كملو شغل  ضحكت ونفس الوقت العبره كمشتني

درت وجهي كملت طريقي  للعماره  وصلنه

بيارق ضلت تمسح جوه  واني افتريت عالشقق اخذ حسابنه وصلت لشقه العجوز كالت بس مسحي بيتي

--تمام هسه بياررق حدخل انضف بيتها اتكول موصخه ومابيه حيل تمسح

--كثري الاجره لاتصيرين ثوله ونزلي الزباله بطريقج

--يلا وانتي استعجلي لاياخذن العماره الثانيه

دخلت للشقه مسحت وايدي جرت للمطبخ وراها البالكون وساعتين فد وگفه يالله خلصت

طلعت للصاله ردت حسابي لكيتها بالحمام

كعدت اتانيها شفت فونها  اتذكرت دازه لكرم

كمت شلته فتحتها اشوف مستلم لا

دخلت عالماسنجر لكيت واصله الرساله وراد بالتركي قريته بس مافهمت شنو 

كتبت شلونك كرم ردت ارجعه شفت تم الاستلام وجاري الكتابه

انتظرت كتب منو

--هيج معجبه داسال عنك شو ماكو بالمطعم

--والله بزونته قبل كم اسبوع طلعت من الشقه واختفت ملتهين اندورها

--لاصدك صاير وياك شي

--ناي وين انتي لخاطر ربج

--عايشه مدبره روحي اشلونه جود

--تركي جود وين هالمده اشلون گاضيتها وين اتنامين

--استااجرت شقه

--ناي جوازج عدنه ياشقه

--اها صدك لادانام يم صديقه

--بالشارع مو ليش ناي وليش مجذبه على غيث شنو معوز هم اتزيديها عليه

--شنو امجذبه ؟

--تره البارحه  اتصل بااخته يبشرها عالحمل ماعرف شنو كالتله بس اتاكد ان  انتي مجذبه اتحولت من فرحه الي اذانات مال زمال براسه

بعدني اقره واتصل لبالي هو رديت واسمع صوت غيث كال  الف تحيه لربتج شنهو سقوط شنهو جذب شنهو طياح حظ بس اريد اعرف الله من ياطينه   خالقج

--نفس الطينه الخلقك منها  لاتتجاوز وعلى شنو ضايج على دينارين خسرتهن اردهن الك

--امكانيه اتعجبيني كلشي اتوقعت منج بس مال تجذبين لخاطر افلوس لا هاي جديده

بجيت لان صدك حسيت بذل من عرفني  شهكت

-- اني لومامعتازه مااكلك حول بس ماكدرت ادبرهن  وروح عاشق ارجعهن الك بس انتظرني المهن

بعد يحجي حتى ماسمعته غلقت الفون وحضرته 

مسحت الرسائل واتندمت ليش هيج سويت انهزت ثقتهم بيه وتفشلت  كدام الولد

رجعت الجهاز طلع المره كمت مسحت ادموعي  كلتلها حساب

انطتني اخذتهن شلت الزباله وطلعت احس روحي مخنوكه وخجلانه نفس الوقت

استوني انزل الدرج واسمع صرخت بيارق  رحت ركض  لكيتها واكعه والدم تارس المكان

دنگت اريد اشيلها اجن ثنين نسوان هم  وياي سألن شكو

-- بيبي
واشرت على بطنها تاسفن لان مبين مات من النزف الي منلحگ عليه

شلناها كوه طلعنه من العماره وهيه اتلوج وصلنه للشارع اخذت تكسي كلتله للمستشفى

--لاناي للغرفه

--ولج اتنزفين حتموتين

--لااعرف اشلون اوقفه المستشفى اتريد افلوس هواي

--عندي حصلت الحساب مالج شغل

--ناااي ميكفن وديني للغرفه ابسرعه

--غبيه تموتتتتين

--ولج ماعدنه افلوسسسي يردون هواي يحجزونه استعجلي دتگطع ولج يمه لحكيني

عصرتني من كثر الالك صعدتها وصعدت  وياها  دليت السايق  عالمكان وصنله نزلت بس فايضه دم

اتلكانه سامو وصاحبه اجو يتراگضون شالها وصلنه للغرفه نيمها وكال شنو الصارلها

--هيج شي نسوان ميصير تعرف اطلع

--اجيب شي تعتازو

--اي شي مال نسوان بس استعجل بالصيدليه روح

هو راح واني  وطلعت اركض لزهره دكيت الباب بديه اثنينهن طلعت مخروعه كالت شكو

--بيارق سقطتت تعالي فدوه

تركنه حتى الباب مفتوح واجينه بسرعه دخلنه للغرفه راحت يمها وبيارق تملخ بروحها

كعدت يمها كشفتها وفحصتها خلت ايدها على بطنها جعصتها وكالت ادفعي هذا منتهي

--على كيفج وياها خطيه

--نااااي انطيها شي اتعضه وديري وجهج

جريت الخاولي ناوشتها خلته بين اسنونها

كل دفعه تطلع روحه وياها

وزهره دوس على بنطنها وتكلها دفعي

بالعشر دقايق وهنه مستمرات شفتها بهتت من التعب والوجع ماجان بيدي بس اندعي وابجي  لان خفت اخسرها

صاحت زهره لكي  لاتوئفي ادفعي

هيه عضت الخاولي ورجعت تصرخ لمن كالت بيكفي خلصتي

اخذت نفس وحمد ربي

تركتها تنظيفها طلعت  رحت للماركت اشتريت حليب وعصير وخبز كم فاكها خلصت الفلوس رجعت لكيت سامو بالباب واكف خجلان بيده علاكه كال ذني

اخذتهن وشكرته بالله اني وين جان عقلي من كلتله جيب

--ناي اجيب اكل لاتسوين

--لاهاي جبت فواكه ونساتل

--لاراح اجيب شي لاتاكلن هذا

هزيت راسي ابتسم وراح ياربي هذا الولد اشكد عاطل بس كلبه طيب وشهم

رحت للغرفه دخلت لكيتها روحها رايحه كلتلها الحمد الله على سلامتج

--اووف ناي خلصت

--انتي وكعتي روحج مو

--لاولج اجت وحدها زلكت يلا شنو جايبه احس بطني خاليه

--طبعا من البارحه مماكلين عساها سم ابطنها هالعجوز حتى افلوسها نحس مثلها هاج شربي هالحليب بين مااغسل الفواكه وسامو جايبلنه اكل

--يبو الولد سبحته دمايه وياي

--هههههه لاوالنوب دزيته على حفاضات الج

--الله يغسل حضج يالعوبه دروحي غيري انتي صايره اضرب مني

كمت غيرت ملابسي شمرتهن كلهن بالغساله وغسلت الفواكه رجعت للغرفه لكيت سامو مدخل الاكل طلع شكرته ودخلت قفلت الباب

عزلت بماعون زغير فاكهه وقطعه دجاجه من الجابها سامو  وخبزه كلتها بس لاتعصبين خلي انطيها بمناسبة روحه الطفل

--بس هالمره ناي تره ازعل وياح

--ابد اخر مره  وها صدك غيث اتصل رزلني لان اخته كايلتله جذب

--شعرفها

--مو اني كلتلها ماكو طفل من سالتني كلتلها استوها شفتها بالحمام بس نسيت هالشغله راحن عن بالي

--موشرط مرات لبالج جايتج وتطلع ماكو بس كولي هيه خبيثه رادت اتخرب عيع

--انتي جذبي الجذبه وصدكيها اكلي لاتموتين انوب ابتلي بدفنج كافي عمليه ماما

-- هههههه ماموت على كلبج ويله خلصنه من افلوس الجرعه الاخيره همزين

--بس استقر اجمع شكو افلوس خسرهن واشمرهن بوجهه  اعلمه اشلون يعيرني   شذنبي الله خالقني فقيره ومبتليه بعائله وهو غني مومن حقه يدوس عليه ويهيني

--كومي والله بطرانه ومهتمه انتي  تعالي اكلي وياي لااخلصه

مر اسبوع   ماطلعنه للشغل مرتين اتصل عمو على جهاز لحن  يأكد على افلوس العمليه حتى يحجز  لان بعد الجرعه موهواي ويقررون  العمليه

لااكدر اطلع ولاكدر اضل بيارق تعبانه ومترضه اطلع وحدي

تالي كالت ناي روحي جوه المغسله اكو كاشيه شيليها تلكين ذهباتج اخذيهن بيعيهن اجه وقتهن  واني عندي كم فلس ونشتغل بلكي اندبر الباقي

--ان شاء الله  باجر اطلع للشغل 

--اني هم

--انتي متتحركين ماكو اتخلصين الاسبوع

--بس اوكف وياج مااشتغل وداعتج مليت من الحبسه مامتعوده

--تمام اذا هيج يلا نامي خلي اروح اطلعن

كمت رحت للحمام كعدت حفرت الكاشيه شلتها لكيتهن بجيس هنه وكم دولار ضحكت ذكرتني بضمه الجوازات والذهب نفس العقل والتفكير نمتلك

كمت للغرفه لكيتها غاطه بالنوم استغليها اخذت صمونه وكم شغله  انطيها للعجوز كلتلها اكلي ابسرعه بلاصوت

اشرت اي طفيت الضوه واتمددت رحت بالنوم ماكعدت غيرعلى صوت بياق كالت عيني تره اني المسقطه كومي

--يووو بيارق بس اشويه بعد وكت

--ولج كومي صار اشكد بدون شغل هسه نلكي مكانه ملطوش

--منو يلطش المزبله لاتخافين محد يكرب مثلنه ويتحمل هيج

--اكو هواي لالبالج بس انتي يلا لج

كمت باوعتلها بضوجه وهيه تضحك

ماعرف شنو حست من شفت ضحكتها
رجع بيه الوكت لذيج الساعه وضحكت عاشق غمضت ابسرعه خفت من هالشعور ياربي دخيلك

-- اشبيج ناي  اذا تردين اتنامين نامي يمعوده طز بالشغل

--بيارق وعديني متركيني

--وين اتركج بس الموت يبعدنه  اشبيج

--لااسم الله لاتكولين فدوه

--هههههه دكومي وياي يلا لاتسويلج ادراما شايفتلج عار يموت

--ياربي كون انضل عارات والله مايصلحنه حتى لايوصلنا الموت

--كومي جان اندعيني دعاء بي حظ يالمصخمه يلا راح نتاخر

كمت غسلت وجهي شلت شعري لبسنه وطلعنه اكو شعور بكلبي كل مااريد امنعه يرجع غصبا عني

نعلت الشيطان وخرت الفكره عن راسي رحنه للصايغ بعت المتبقى ورحنه للمكتب حولنه الفلوس ودزيتله مسج كل فتره احولك لحد ميكملن

اكلنه لفات وصعدنه للعماره دكينه اول باب طلعت كال منريد

--شوفي موكلتلج اخذو مكانه

--يلا دروحي شوفي ذني الشقق واني الباقيات اي وحده اتكلج انريد صيحيلي

--صعدي فوك اني الجوه

صعدت من وحده الوحده كلها متريد لمن وصلت لشقه العجوز دكيت الباب طلعت باوعتلي كالت زين اجيتي

--يلا هسه امسحلج البيت

--لا اكو واحد اجه

--شنو منو اجه

--واحد عليج

--مافهمت بس لحضه  احجي عالكيف حتى افهم لاترطنين

ردت حجت سريع حتى مالحك اترجم اشرت انتظري وفتحت فوني عالترجمه كلتها كتبي لان تلغين  مالحك على حلكج

كتبت كومه انطيته ترجمه

--اكو ثنين شباب سألو عنج  ثاني يوم من رحتي كالو من هذا المبايل متصلين بينه الابينه وينها الي اتصلت

--اي وشنو كلتيلهم

رجعت الفون الها ردت كتبت خلصت انطتنيا

دست ترجمه كلتلهم وحده تجي  اتنظف العمار وتنظف الشقق واتلم النفايات وحنه انساعدها بفلوس بس البارحه وكعت من الدرج طلعت حامل وسقط طفلها

--عزه ابعينج كولي خدامه وفضيها اله اتعددين كل هالحجي يمصخمه  كتبتلها ماعرفتي منو وشرادو

اخذته كتبت زوجج وواحد اسمه كرم كالو اتصلي بينه اذا اجتج وحاولو يعرفون ويامن صعدتي سياره ومنو وصلج

اخذت الفون ونزلت اركض لكيت بيارق كلتلها طفري

--شكوو ولج

--غيث وسال عليه والعجوز ماخلت غطه امستر حتى كايلته جانت حامل وسقطت

--عفيه اول شي اتسوي العجوز بي خير من كالت انتي الحامل وامشي ابسرعه لاتتصل  هالعجيزه هسه تلكي راشيها 

--اويلي اذا لكفني اله يعلگني مايصدگ لواحلفله بماخلق الله من كائنات

--ناي ترجعيله

--انتي خبله لواموت وضل عمري كله اشتغل بالحاويات ولاارد ابيع لحمي برخيص وحس بذاك الاحساس نفسه  وره كل هذه الذل  انطي ابني
على شنو هاي هيه تصافينه لااطلبه ولايطلبني 

--هو بعد نروح لغير مكان اهنا منجي تلكي مفتر على كل العمارات هذا مادامه عرفج تشتغلين بهاي المنطقه خلي بلكي يحس بتانيب الضمير اشويه من يعرف مسقطه طفله

--الحمد الله ربي نقذني طلعت كدام الولد موجذابه اول مره بحياتي تجي عدله وياي تلكي هسه متخبل راح يتعارك ويه اخته 

--لعد خلي يتمشكل وياها بس يعرف يصخم وياج ويشمرج يلا طلعي ابسرعه

طلعنه رحنه للكراج صعدنه دلمش اوف جيلار قريب عالساحل نزلنه اندور مكان نشتغل بي

افترينه عالعمارات كالها محجوزه بيها من الكامشها تعبنه الضهر بده يخلص وحنه ماكو

رحنه عالساحل كعدنه ميتين تعب كلتها هسه شنو

--ماكو غير الم نفايات ليل والنهار ماكو شغل اخذو

--لافدوه بليل وكلت ميخالف محد يشوف مو بالنهار خلي اندور شغل بمعمل بمكان

--ناي ماينطون افلوس يوم كامل تطلع بالعراقي ١٢الف وانتي وراج  امج متكليلي اشلون ادبريها اقلها انطلع اضعافها بالنفايات اتلثمي ومحد يعرفج بس انخلص بعد منشتغل ابد

--بس هالايام تره بس اخلص افلوس العمليه مااشتغل  كومي خلي نرجع

--انتي بس خليج قويه ولاتنصدمين من الراح تسمعي

--لااالاتكولين ماعدنه كروه  اووف ربي والله مابيه ولج كم ساعه نمشي جان كلتي منشتري لفات

ضحكت وكالت لليل نوصل كومي ماكو حل غيرها

--عندي حل ناخذ كارتونه وحده تكعد والثانيه تسحلها ونتبادل الادوار

-- لا ولج تلزمنه الحكومه يشمرونه بالشماعيه لبالهم شاردين من مصح

--هم صدك لعد نزحف

--ناااي امشي كالتها ودفعتني تضحك

رجعنه ادفع وضحگ ساعه نركض
الجو صار ليل بي بروده اشويه  وبيارق تعبانه

بس ماعرف مجنه حاسين بهم لو خايفين من تعب حسيت وحده اتشيل الهم عن الثانيه انباوع ونضحك على روحنه مامهتمين. اليشوفنه يكول عايشات فوك الغيوم

وصلنه  دخلنه المنطقه   لكينه احتفال وهوسه وناس تركص  كلتها شنو ولج عرس

--لاهذا احتفال تعالي نتونس بي وهم ناكل بلاش ماطول مصفرين

--شنو عيد لو مولود

--لاولج هاي مال تعارف يعني اكو عائلتين اتفقو راح يزوجون

--الله فدوه خلي اشوف العروس وين بيا شقه

--نصعد بذيج الفوك دشوفي العريس اشلونه ذاك كدامج الشايب ابو ادريس الوسخ

--عيع ذكرني اباابو صلاح صار ولج عندي فضول منو الماخذته

--بت سامح الكهوجي الطفله علمود افلوسه

--يمه عزه ابعينه هالطفله اشلون انطوها اهلها خطيه

--منو الخطيه لالبالج هاي طفله ومغصوبه لاحبيبتي ذوله غجر هيه مفلفله وكاتله روحها عليه اتريد تتمرمغ بالعز  كم يوم وشوفي شادته بحل وتسحل بي بالحاره

--الله عليج لعد اشبيه اني من زوجونه عوزي مااكتل نفسي ماعرف منين الباب حتى اشرد

--منو هذا الزوجوج اله

--زوجي الاول  ابو صلاح

--ناي كل يوم اكتشف بيج شغله

--دتعالي نصعد وبعدين اسولفلج اشلون الغثيث  نقذني منه

صعدنه ليفوك انصدمت من شفت العروس تركص وفرحانه عزه ابعينج والله واني شايله همج صدك مفلفله يمه لواموت مااتزوج هيج زواجه

كعدنه واباوع اشلون شاكه حلكها ومتروسه ذهب اتخرخش بديها صفنت منو الصح هيه لو اني

--يعني شيصير لو متزوجه ابو صلاح مجان عايشه هسه مرتاحه ماكو هم

-- جان اختج ميته والله اعلم امج  وين شامريها من يزوجوجن  ويخلصون منجن  اي سويتي الصح

--كلش صح عالاساس هسه اني صاحبة شركه ومحتاره بالفلوس اشو اغط  راسي بالحاويه حتى احصل قوطيه مال منكر وبيعها

سكتت ماردت اخذت نفس وانتجيت اشويه وكامت بيارق  اتصفك وتضحك اتكول من اهل العروس ضحكت هالابنيه اشكد طيبه وكلبها جبير بس لو تحرر هالعجوز جان ماكو احسن منها

وزعو شي مثل الكيك ماعرف خبز امدبدب زغار اكلت اشويه ماحبيته ردت اخليها اتذكرت العجوز ضميتها بجيب القمصله كلتلها بيارق صار اليل هم يالله نطلع

--كومي يلا وجه البومه حتى فرحه متخلينه

--ولج يلمون الزين كله ويضل بس الوسخ

--لاصرتي صاحبت كار مرة الغثيث ابو الملاهي

--ههههه رجلي يشرب واني ابيع ورا القواطي اليشمرهن تفلي عليه

--ماعندي تفله استوني شاربه عصير اجليها

--عيع امداج ديله

طلعنه صار بوجهي سامو ضحك كال وصل سرانه

---ههههههه يباوق بربج ترجميله كليله رجلها ديدور عليها  هذا  اذا راد يرحمك يمدك بالحبل من السطح اسبوع بهالبرد

--صدك جذب اليشوفه ويسمع صوته ماخذ الحاره طول عرض ميكول هيج صافن عليج ومتمني اتكليله يله

--دمشي خلينه عايشين هنا بحمايته محد يحاجينه لحد مالله يفرجها ويجي الرد السريع الي يصدم امه ابكبرها

دخلنه للغرفه انطيت الخبزه للعجوز كالت بيارق ناي شحجينه

--ولج راح اتموت اذا مومن الجوع من العفنه تركها فدوه خلي اتولي منا 

--حالفه مااتركها لمن اشوفها تتوسل بالموت كدامي وهم ماارحمها اخليها اتموت عالبطيئ هيج اريد اشفه غليلي بيها

--دكومي خلي انغير ونروح اكلج انتي بعد مابيج طلعه اخاف اتموتين يمعوده

--لامابيه شي كلتلج مواول مره حمدي ربج نمت وداريتيني هالكد بذاك اسقاطي ثالث يوم كمت من الصبح للشغل دكومي غيري بين مااشوفلي خبزه يم زهره نسند كلبنه بيها

كمت غيرت ملابسي حضرت الكواني دخلت بيارق بيدها خبزه وطماطه يمه اشلون فرحت اتكول وليمه جابت

سوت لفتين انطتني وحده اكلت نصها صح جوعانه وباوع للفه ابدي اكلها كلها بس حسيت بالعجوز ضميت الباقي بالبسكوت جوه المخده واشرتلها ابتسمت فرحانه

طلعنه اتلثمت كالت ناي لبسي واقيه امبينه تمطر اليوم

--مابيها مطر بس امشي يلا فدوه مومكان بعيد

--لالازم بعيد ولازم انروح للطمر ونص كلمه ماكو لان طكنه الفكر مابيها مجال

--تره استوج امسقطه بيج شي يعني هالمره اتموتين

--لاجبت سجاجين ناي اذا ماتردين مااغصبج روحي  ذني القريبات بس مابيهن شي العالم هيه ميته جوع خلي انجازوف بس اليوم وبلكي الله ماكو احد ويسترها ويانا

--ولج المكان بعيد وانتي تعبانه

--لاجبت افلوس من زهره نصعد دلمش وانرجعها الها اليوم من ابيع يلا ناي لاتصيرين جبانه بس هالمره وعد ولج كتلني الجوع ورانا ندفع ايجار الغرفه والفواتير

سكتت صدك التكوله ماكو حل ثاني لان فعلا اليمنه فكور ماكو

صعدنه دلمش واخذنه اخر محطه نزلنه كملناها مشي الباقي  مارحنه نفسه لااخذتني لغير مكان جان قريب على ملها يعني هواي قواطي مشروبات نلكه واشياء زينه

دخلنه المنطقه كلبي خمشني خايفه بس امنت من لكيت كم واحد يلم وياهم زعاطيط كالت بيارق لاوالحظ ناي والله احسج شؤم

--استوج يالله دريتي من زمان بس هم بيها صالح اقلها اكو احد والخير هواي هنا يلا ايدج شوفي هالحاويات اليمج واني اروح لذنيج

كلمن لزمت مكان الحمد الله قبل لايطلع الفجر  ترسنه كوانينه بس اخذت حيلنه لان نتراكض حتى انحصل الزينات

ونتغالب حتى عرك اتعاركنه لان يردون كله الهم  عاد همزين بيارق بيدها سجينه صاحت ناااي لكفي هاي

شمرتلي سجبنه اخذتها وضحكت كلتلها شنو ناخذه الطمر خاوه

--عليها شكو واحد يتعرضلج شخطي

--خرب بيوم سامو شكو شي مابي حظ علمنا عوزي بس طبره اصير توب

--لاتنسين الموس بحلكج هم لازم اتخلين

--ولج اني ثوله تالي قبل لااطلعه اگطم لساني وبدل مااخوفهم اثيح لحدوني

--لمي لج يله لاتخلصيها حجي

ايدي وايدها ركض ركض ترست كونيتي

كعدت ارتاح اجت يمي تسحل بكونيتها كالت يلا

--خلي ارتاح متت ولج

--راح يصير الصبح تره بدو يطلعون من الحانات هسه يسوون هجوم بدون شعور

اتلثمت عدل شلت الكونيه على ضهري ورحنه خلصنه الشارع وصلنه للشارع العام مستعجلين

انريد نعبر اخاف تخلص الاشاره وتتحرك السيارات

استوني اعبر وانتبهت سياره غيث كدامي

اني ماطالع بس عيوني ماعرف اشلون عرفني دك هورن عبرت ابسرعه شفته فتح باب السياره ونزل صاح نااااي

الضوه اتغير انخبصت  السيارت الورا بالهورنات صعد ابسرعه وانطلق

بيارق. هذا رجلج

--اي

--عزه بعينه شنو من سياره صاعد امشي ابسرعه ولج هذا راح يركنها بس يخلص الشارع ويندارلنا

--واذا جه شنو خايفه منه اكله يطلكني وخلص

--امشي الفاهيه يطلكها دشلعي كلبه هيج تتطلگين بهالسهوله  دشوفي منين طالع من اكبر ملهى بااسطنبول يعني مريش

جرتني من ايدي وركضت  ابسرعه دخلنه بين الافرع من فرع لفرع لمن كلتلها ولج مابيه اتحرك خلي ارتاح

--يلا هو بعد ميحصلنه هذا كل يوم هيج وكت يالله يرد

--اي يضل سهران وهاي الويا ساره ويمكن هالمهلى المرينه عليه مالت ابوها

--مانتبهت ضلت عيني بسيارته ولج متاخذيني شريجه الج والله خوش بنيه اني وساعدج عليه

--هههه الي يسمعج يكول صدك وعايشه الدور بيارق صدك انتي ماكو منج  اطيب انسانه اتعرفت عليه وحسبتج بمعزت لحن حتى عوضتيني عنها قللتي اشتياقي الها كمت اشوفها بيج  بس اكو شغله

--اعرفها بس ماراح اتركها انتي لوعايشه وحاسه يوم واحد وياها بالحسيته وعشته جان ماحجيتي هيج

--شوفي هذا الكون اشكبره لاتصدكين اكو بشر بي مامضلوم ولاماشاف الحرمان

--عمري ١٣ اول مره دخلتني على رجال ابكد جدي بجيت اتوسلت بست حتى رجليها بس ردتها ترحمني تدرين اشكالتلي كالت اذا سمعتج مانعته اگطعج وصل واخذ عذريتج بصيخ حامي

--يمه دخيل الله شيطان هاي

--يوم ثاني واني بعدني اتألم وميته شمرتني ويه اثنين اتناوب عليه للصبح خلوني اتمنه الموت غمض واتمنه ماافتح عيوني تدرين اول اسقاط صار واني عمري ١٣ونص تعرفين شنو حسيت من الم لو شنو شفت من رعب

--ونرجس

--نرجس جان املي الوحيد بالدنيا صديقه عمري لااختي الي اترجيتها من الدنيا جانت اصغر مني

--يعني ماتت لنفس السبب

--لامره وحده شافتها ماتحملت ضلت تنزف تركتها وره فتره باعت كليتها اشكد اتوسلت وبجيت اشكد اترجيتها كلتلها شينطوج افلوس اني اجيبهن الج ماجانت تسمع وقعت على وهيه تعرف بيها راح اتموت لان الدكتور كاللها احتمال ضعيف اتعيش وحده من كلياتها بيهن تشوه ولادي

--ماتت بالعمليه

--ماماتت عاشت ورجعتلي الروح واني اشوف ضحكتها بس جانت دوم تتالم وتضل للصبح تبجي كمت ادوس على روحي واتحمل الالم والعذاب ويه اليدخلون عليه بس حتى يرضون وينطوني افلوس ادزهن بيد هالشيطان اجيب  مسكن لحد ما

---كالتها وصفنت بس ادموعها نزلت عاصرن روحها

--شنو بيارق احجي فدوه لاتضلين حاصرتها بصدرج

--دنت نفسه عليه رجل هالكلبه وهيه عمليها بعدها خضره كلتله اني مكانها شنو اتريد اسوي تدرين اشسوت هاي المكسور خاطرج عليها

--شنو

--سحلتني وسدت الباب كعدت تشرب وتضحك على صوت صرختها لمن انتهت طلع كمت ركضتلها لكيتها تلفض انفاسها الاخيره ماتت بين اديه

--ماطلعتي مااشتكيتي ماكشفوها من لكو جثتها

--ماكدرت اشكد حاولت اشرد ماكدرت محبوسين جوه بالسرداب  جنه بيت مستقل منطقه زراعيه واذا طلع صوتنه لو عارضناها جانت تحمي الصيخ ودخله باللحم شوفتنه انواع العذاب اكثر الاوقات حتى حاجتنه انخلصها جوانه من الخوف ايام انام بدون اكل خليتنه انبوس رجليها بس حتى ترضه علينه وتنطينه لكمه خبز لو شربه مي

--اشكد عمرها نرجس

--صح مو هواي ازغر مني بس عقلها طفل ابو السنه من جانت تصرخ بوجهه تدرر على روحهه من الخوف حتى من ماتت جانت كامشه ايدي وترجف خايفه كالت خايفه لاتركيني ناااي جانت خايفه تترجاني انقذها كالتها وبجت

حضنتها بجيت وياها اتخيلتها لحن وهيج يصير بيها

مسحت ادموعي كلتها راح تجيج لحن هم نفس العقل حسبيها مكانها الله عوضج بيها وانتي علميها  وكوني مسؤوله عنها وحميها  ونرجس طير من طيور الجنه ارتاحت لاتبجين

مسحت ادموعها وضحكت

--وروح نرجس اعيشها احسن عيشه اعوض طفولتنه كل بيها ماخليها معتازه شي والفلوس الضامتهن كلهن الها حتى دراسه اخليها تكمل   واشتريلها شنو بنفسها

--والعجوز خايفه على لحن منها تره اكو رب هو الياخذ  بثار نرجس منها ماراح يتركها لخاطر لحن خلينه انعيش بنظافة وحياة جديده كافي الشفناه خلينه ننسى وناجر شقه وحتى ماما راح اجيبها انكمل عمليتها هنا

دنكت اخذت صفنه

--لاتصفنين انتي موتتمنين تعيشين بنظافة لحدمن تضلين عايشه هيج عيشه والمن تلمين وتضمين وحارمه نفسج

--مااكدر ناي

--لاتكدرين خليها اتولي بطريقها ربي يحاسبها واحنه نعيش مثل البشر  بيارق خليني اجيب اهلي واني مامنه حتى نكدر نطلع نشتغل براحه ماورانه هم لو نفكر بشي لان منكدر ناخذها ويانه ولانكدر نتركها خلينه نترك الغلط والانتقام ورانا ونبلش من جديد

ضلت ساكته ماردت تركتها اخذت اشويه  هزت راسها بأي باوعتلي وبتسمت كالت باجر اطلع الفلوس وناجر شقه وناثثها صدگ  كافي بعد تعب حتى شغلنه انبطله نشتغل شغل محترم ونعيش مثل باقي الناس

--لااني خليني مااكدر اعتاز افلوس

--لانكدر ايدج ابأيدي نشتغل كالوحده شفتين وجيبي امج اهنا انسجللها ضمان صحي نص اجره نكدر انعالجها راح نكدر ناي

--والمره

--خلي اتولي ربي ياخذ حقنه منها بس ماراح اسامحها

--هسه انتي اختي الثانيه

--لازم اغير اسمي واصير مثلكم نفس المعني حتى نكون صدك خوات

--ههههه اني اختارلج -غنوه  شتكولين حلو

--هاي هيه لحن وناي وغنوه  وووف واخيرا ناي صدك يصير عندي عائله وتحسبوني منكم
البس واطلع مثل باقي البنات ويكون عدني شقه

-- جنتي اتكدرين اتسوين ذني ليش قبلتي اتعيشين هيج

--ماجان عندي امل بالحياة مجرد الغل يمشي بگلبي واتمنى انتقم من كل رجال المن اجر شقه واعيش واني منتهيه من كلشي محد يقبل بيه ادري

--وهسه شنو التغير

--اجتني احلى اخت وراح يصير عندي ام ووحده اتعوضني عن نرجس شنو اريد اكثر من هذا  يلا كومي اخر كواني انبيعهن ذني

--ههههههه اتحمستي اشوفج

--ثواني غيرتي فكري وگلبتي مزاجي اشتعل الغثيث اشلون اتخله عنج بس همزين بيها صالح جان لسه بعدني خاتله يم الشيطان اكل واتفل عليها

كمنه وحنه كلمن تحلم بشكل نسحل بالكواني ونباوعلهن ونضحك انودعهن

وصلنه نص الدرب وهيه تضحك كالت راح اشتري فرشه ام الارنب لاتضحكين عليه من زمان نفسي بيها

--خلي اناجر شقه بالاول

--باجر من الفجر نطلع اندور لو بيها مجال هسه نروح اول شي اريد بيها بالكون جبير كون اخلي بي مرجوحه وزرع ووواريد غرفه بيها ميز على مكياج وانتي

--كلشي مااريد ذني كلهن شفتهن وعشتهن اريد بس اهلي اجيبهم

--راح يجن وامج تطبخلنه اكلات طيبه ونطلع سفرات ونطفر بالحدايق  ولج ناي صدك والله راح انعيش

--ههههه ان شاء الله بس خلي نخلص هسه من هالكواني

وصلنه للمنطقه ركض للرجال انطينا الكواني حجه وياها ضحكت وردت ماعرف شنو لان تحجي سريع واني كوه على كدي الكلام

انطانه حسابنه رجعه للغرفه دخلنه اخذت الملابس رحت سبحت وغيرت طلعت لكيت فوني يرن لحن تتصل

كعدت رديت عليها كالت هاا ناي وينج من اشوكت اتصل

--جنت بالشغل

--ياشغل وجه الصبح ناي شنو شغلج موتكولين تركتي

--اي تركته بس اليوم جان اخر حساب خير رايده شي

--سمعي داحجيلج البارحه اجه سمار وجهه اصفر من سأله عمو گله دامشي وكفت سياره كدامي نزلو منها شباب لابسين زي عربي مسلحين اخذو فوني يفتشون بي وانوب سألوني على ناي واحد يهدني والثاني يكمشني اقسم ماعندي تواصل ومنعرف اخبارها ميصدكون

--سووله شي

--لابس هددو وكالو اذا عرفنا اكو تواصل  بينكم وتنكر ندفنك رد ميت رعب  من البارحه لسه ماطلع 

--اوو اشلون راح اخلص منهم ذوله اني وين جان عقلي من ورطت روحي هيج ورطه استغفر الله -- وانتي ليش كاعده هيج وقت 

--ماما كعدت للصلاه  وغيث هم اتصل مرتين هسه

--موحضرتي اشلون اتصل؟

--من غير رقم ولج نزل عليه نزله معدله وتهمني بالجذب كال  كلولها خلي تتصل بيه حتى اطلكها

--خلي يولي بعد خلي يحرگ بروحه اكثر من اجيبكم عود اتصل بي وكتها ولو اليوم كشف كلش يلا ماضلت على هاي

--شنو اتجيبينه

--صفيت شغلي ورتبت اموري  كلها كم يوم واجي اخذكم

--جذب ناي بروح عاشق

--هههههه وداعتج باجر راح ندور شقه بس انحصل افرشها واجي عليج ماما اشلونها

--زينه بس الجرعه دتعبها خطيه بقت بس العمليه امنه الدكتور هسه اذا سمعت الخبر راح اتطيب وحدها

بيارق. ناااي راح اطلع اجيب صمون هسه فتحو

--يلا فدوه نعسانه اريد انام استعجلي ورجعي افلوس زهره خطيه اخاف ماعدها

--اتسوك لباجر فرد مره

--لاموكلنه نطلع اندور شقه نشتري لفات بالطريق

ابتسمت بس مبين الفرح على وجهه طلعت واني سولفت ويه لحن وراها انطتني ماما جانت مامصدكه راح تجي يمي مبين طالعه الدنيا من عينهن بس ميحجن كدامي لان اتخاف الومها

  امنت عليهن  سديت الفون كمت للعجوز فتحت اديها كلتلها اكو مفاجأة الج باجر

--شنو راح اتكتلوني

--من تجي بياق راح اتكلج انطيج مي

--اي عطشانه اريد مي بسرعه قبل لاتجي

كمت انطيتها مي ورجعت اتمددت دخلت بيارق بيدها صمون وجبن كعدنه سوينه لفات سويت لفه للعجوز اخذتها ودارت وجهه للحايط تاكل خايفه كالت بيارق والله متستاهلين بس شنسوي

--تركيها خلي اتولي انوب عراقيه حرمات والله هسه لو تركيه انكول هاي شغلتهم مشهورين بيها

--رجلها تركي الكلب علمها على هالشغله

--اشلون جبتيها لهنا

--باجر اسولفلج هسه   يلا نطلع اندور

--شندور ابربج تره الساعه ٥ الصبح نامي محد مفتح خلي نرتاح لاحكين عالفره  اريد اسالج ومستحيه

--اعرف شنو وروح نرجس افلوسي كلها حلال وضامتهن وكت الازمه عمري كله اشتغل واضم خايفه من والوحده اخاف اكبر وانشمر  جنت افكر اجمع ومن يتقدم بيه العمر  اجيبلي وحده اتعيني منا لمن اموت

--يلا هاي اني اجيتج مثل راح اشفطهن كلهن

--هههههه فدوه الج ولج ناي والله نزلتيلي من السما انتي وعوضتيني عن كلشي حسيت روحي عايشه من جديد بيج بالاخص من سمعت قصتج وشفتج اشكد قويه واكفه على رجليج رغم الصارلج عرفت روحي اني ضعيفه وجنت مستسلمه للحزن والتعب

--المفروض اني اشكرج لوماانتي جان ماعالجت ماما ولاكدرت اوكف على رجليه من جديد جان هسه بايعه اعضائي و بالشارع الله اعلم شصاير بيه يجوز واكعد بيد وحده مثل هاي  يلا نامي لان دااحس روحنه اوفر

--اني هم والله موشكلنه زودناها دااحس روحي مواني  يلا انجبي ونامي

--اي هيج هسه انتي بيارق

--ولي غنوه

--اها نسيت صدگ غنوه

نمنه الضحكه ماليه اوجوهنه منتظرين النهار يطلع حتى انبلش بحياة جديده كلها احلام

فتحت عيوني على صوت ونه قويه و رفسه  انداريت كمزت واني اشوف بيارق  فاتحه عيونها  والسجينه بنص بلعومها ------

لاتنسون التصويت ♥️