#وكر الأشتر

بارت ٢٥

البارت ..٢٥
رواية ... وكر الاشتر
بقلمي .. نور سمو العراق

💔💔💔💔💔💔❤️💔❤️💔💔💔❤️❤️❤️

ثُم تُمزق الصفحة التي كان يَـعز عليك طيها ..

...........

صفاء

طلعنه من المستشفى بعد ما هو اخذ موافقة مصطفى بالخطوبة اني سحبت مصطفى وحجيت وياه .. هييي انت متاكد يعني من خطوبتك من افيان بظل هاي الظروف لا امك تزعل منك

رد عليه.. وتزعل شنوو يعني صدك جذب عليهم حلال وعلينه حرام بس هو اني هم احتراماالهم مراح اسويها طكطكة مجرد اعقد مهر شيخ وبس وعود بعدين نسوي الحفله وابوك الله يرحمة

عفته ورحت ويا اشتر كال ... اخذوني وياكم ما اريد اظل هنا

بطران مجاوبته ركبت ويه اشتر هو من يضوج يلتجى لحجي اديب خابر على حجي اديب كله .. هااا حجي موجود محتاجك اريد احجي وياك

كمل كلامة وهو يكول .. يله تمام جايك بالبيت اليم صورة سوادي انتظرك هناك

والله رحنه للبيت لكينه حجي اديب كاعد بيه هو وعايد وكزاره يشربون جاي ومشغلين جمريه ويسولفون

سلمنه عليهم وكعدنه كال اشتر .. يولد جيبولنه عشا ممتعشين

راح كزاره وعايد وعرفت هو ما يريد يحجي بالموضوع كدام عايد ولا كزاره

طلعوا الولد والحجي كال ... هاااا بويه احجي شعندك شبيك فضفضلي يبوووي

سحب نفس وبلل شفايفه بحيره اخذ الجكاره من باكيته وشربها وهو يكول .. شحجي حجي شحجي وشكول ما ادري احس كلبي نار احس روحي طالعه

لزم ايده وهو يصبره .. احجي بويه احجي كول ريح كلبك انه ابوك احجيلي

جاوبه بتنهيده وهو يكول .. دزو عليه ابريهم الذمة بين الحياة والموت هم ما كدرت اسامحهم

حط ايده على وجهه ومسحه بقهر وهو يكول .. اعترفتلي وجيهه وهي تكول تكول اني حركتها اني بيدي اني واخوي بس ما جان قصدنه والله ما جان قصدنه كل القصد جان نريد نخوفها حتى ما تحجيلك شي وما تشكي منه رشيت عليها النفط

وتحسين يخوفها بالجداحة وهي تصرخ وتبتعد عنه ورافعه اديها لحد الان اتذكرها تستنجد بيك تصيح ... اشتر اشترر راح يحركوني

ردت وكالت وهي موجوعه .. والله مو قصدنا نحركها بس جنه ما نريد توصل الك كلام

وتحسين جدح الجداحة ولهبتها اخذت طرف ثوبها وما لحكنه عليها حتى نطفيها اشتعلت كلها وجانت تركض تركض من حلاة روحها ما كدرنا حتى نلزمها جانت طايره وروحها طايره وياها واشتمينه ريحنه حرك جسمها

بعدها دخلت للحمام وشغلت الدوش وهي طفت روحها اني جنت متخبله عليها وبعدها كلنه قضاء وقدر

باوع الحجي اديب وهو عيونه حمر وطاكة بالدموع وهو يكول .. حركوها جنت حاس ومتاكد منهم هم الي حركوها وعطبو جسمها هم المذنبين بكل شي جانوا يكولون انتحرت ما تجوز الها الرحمة

اختي نقيه اختي شريفه وطاهره وتعرف ربها زين اختي ما تنتحر اختي ما تغصب ربها وهذا الكلام ريحني

تعرف ليش ريحني لان عرفت اختي بيد البارئ عز وجل بيد امينه ما تنظام ولا تنظلم راحت مظلومة تشكي من ظلم البشر

ارتاحيت من عرفت وتأكدت اختي ماتت ظلم وما ظالمه نفسها

حجي اديب بإيمان..."وَلَا تَحْسَبَنَّ الَّذِينَ قُتِلُوا فِي سَبِيلِ اللَّهِ أَمْوَاتًا بَلْ أَحْيَاءٌ عِنْدَ رَبِّهِمْ يُرْزَقُونَ

اختك عند ربك عند ربك باحلى عيشه وبجنات الخلد طالتها ايد الغدر والله عذبهم بالدنيا قبل الاخره الله انتقم منهم واخذ حق هاي الطفله اليتيمة المظلومه

محد يگدر يغلب الله وكل واحد ينال جزاءة وعقابه وشكد ما تطول المده وشكد ما الانسان يطغى عظمة الله تطغى وجبروت رب العالم اقوى من كل جبروت هو الجبار المنتقم ينتقم من كل ظالم وينتقم لكل مظلوم

دار وجهه اشتر عليه وهو يكول بحسره وقهر .. اختي مجاي تطلع من راسي اتخيلها تركض تستنجد ما ادري ما ادري احس بكل احساسي عايشه بروحي منظرها من حجت لحد الان مجاي يطلع من راسي اني راح اتخبل

لزم راسه بوجع وهو يكول .. ما ادري شبيه احس راح اوكع احس عقلي راح يطفر من راسي ما اكدر اتخطاه كلام وجيهه

صح هو اني كوه جمعت كلامها وحسيت بوجهها وحتى ملافظ الحروف كوه تطلع منها كد ما موجوعه بس ما كدرت اتعاطف وياها ردت اخنكها بيدي ردت تحس بالوجع اكثر تعيش المعناة الي عاشتها اختي المكسورة

عض اصبعه بقهر وهو يكول ... اوووف اوووف يا رحيق ما ادري شسوي كلبي معصور عليها اريد اروح للنجف اريد ازورها اريد احضنها ابوسها اطمنها اني يم لا تخافين ..

اخيتي هاااي اعز من روحي ما اكدر ياربي ما اكدر صبري ١٧ سنه واني ما اكدر انسى لحظه منها ولا اكدر اشيلها من دماغي كلبي صار اسود حاقد على الكل

لزمه حجي اديب وهو يصبر بيه .. قُل لَّن يُصِيبَنَا إِلَّا مَا كَتَبَ اللَّهُ لَنَا هُوَ مَوْلَانَا ۚ وَعَلَى اللَّهِ فَلْيَتَوَكَّلِ الْمُؤْمِنُونَ

بويه هذا مقدر ومكتوب والمكتوب على الجبين لازم تشوفه لعين الله يرحمها ويجعل قبرها روضه من رياض الجنه هسه هي ويه امك ويه ابوج عايشه بنعيم ربها الرحمة والغفران الها

سكت مجاوبه ورجع كعد حجي اديب ظل يحجي وياه ويصبره هو كال .. يردوني ابريهم الذمة يردون الله يخفف ذنبهم وطغيانهم وحقارتهم

كلتلهم بكل حقد وعصبيه ما مبريين الذمة ليوم الدين ولو بينكم وبين الجنه ذنب رحيق ما راح ابريكم الذمة

جاوبه .. ربك موجود ما يغفر الهم هاي الخطيىئة الله ينتقم من كل ظالم وجاحد

اشتر بتنهيده .. حجي اديب بعد باجر معزوم على خطوبة مصطفى اخوي من نسيبتي اخت مدامتي

حجي اديب استغرب .. شلون مصطفى غير رابي وياهم شلون يخطب والوادم مستويه

جاوبه اشتر ... واحنه شدخلنه بيهم عالم غربه شنو عرفه ولفه وياهم وبعدين لبنيه تجي عليها ناس وهاي خامس مره تتاجل الخطوبه وامها كالت اذا ما تخطبون هسه بعد هذا انوب الماس تموت شنو نظل وره دورة السنه لا هذا مو حجي ترا هواي انتظرنه وهو لا ابن عمها ولا ابن خالها

واني اريد اجمعهم قبل لا يموتون الناس ولو هي الارواح بيد الله واحنه بينه روح وهم بيهم روح بس الحذر واجب

حجي اديب ... اذا تريد تتشمت يا أشتر فإني اكلك لا بويه هذا الشي حرام وما يصير لان الله ما يرضا بالشماته والدنيا تدور

اشتر .. اتشمت على شنو هم اصلا مو مال شماته ما ظال بيهم شي حتى واحد يتشمت بيهم  بس كتلك اني اريد استعجل واجمعهم خاف كل شي يصير وانت تعرف شنو الظروف محاجة احجيلك بيهن

سكت حجي اديب وهو يعرف سوالف الاشتر هو ناوي عليهم ويريد يتخلص منهم

اجو الولد كزاره وعايد كعدوا يمنه جايبين عشا اشتر ما اكل ولا خله لگمة بحلكة ابد

عايد كال بضحكة ... ما تدرون غير سالي انخطبت ههههه لك خطيبها ضعيف مهلس هو كاعد وهي تشرب اركيله وتصور وتنشر على الانستا خرب ستورياتها كلها تدخين وهاي السوالف

اشتر .. اي همزين انخطبت الحمدلله حتى مدامتي شويه تستجن

ضحكوا هم وهي خابرتني كتله .. بنت الحلال بذكرها

مشيت شويه وهو اجه وراي اشرلي افتح مايك ويسمع كلامها كال .. اي خلي اسمعها

ظلت تحجي ويايه وهي تكول.. اخوك وين

باوعتله وضحكت .. ههه يم سالي

ردت بغضب وهي تكول .. سلها البين وشكها نصين لا والله وين

غمزلي وكتب بموبايلها كتب .. كللها شنو بعدج تحبي

سالتها.. شنو بعدج تحبييي ؟

جاوبت باندفاع .. لا عيني خطابتي كثرة اخوووك صار ماضي هسه اني حاليا افكر بعريس الغفله

اخذ الموبايل من ايدي وهو يكول .. دتزوجي وشوفي الا كل جزء منج ادفنه بمحافظه

هي ما اشوف الا غلقت المكالمة وانهزمت ضحكت عليه وهو عصب كال .. هاي ولك بس لا صدك ناويه تريد تتزوج حتى وحق الرسول ثدك كل مكان ادفنه بمحافظه انوب صدك اني طلكت وهي كل شويه واحد خاطبها شنو جانوا منتظرين

ضحكت ... ههههههه لا يابه والله تحبك بس هي متفاجئة من خطابتها مثل ما انت متفاجى بس انت ليش هيج حجيت وياها بعد ما تثق بيه وتخابرني

رد عليه .. لا شحدها تخابر ولا يهمك بعد سجلي المكالمات خلي اشوف شعندها

جاوبته بنفي .. لا يابه لا ترا البنيه مأمنه بيه ما اريد اخرب ثقتها بيه تعذرني

ضحك وتركني وراح يسولف ويه كزاره مدري على شنو اتفقوا
....................

افيان

خابرني نسيبي الكفو وهو يكول .. افيان موجوده اريد اجي لبيتكم  اريدج بشغله

عاد اني كيفت هو صح مو لحد الان نسيبي بس شسوي كاعده اريد اجمعه هو واختي بلكي اجمع راسين بالحلال

جاوبته بحماس .. اهلا وسهلا بيك تدلل احل الك كل الشغلات شتريد اراقبلك اختي لو اجسلك نبضها لو شنو ناوي عليه امرني تحت امرك اتجسس عليها لو اشتغل استخبارات لو اغتالها

ضحك وهو يكول .. بس على كيفج لا تتحمسين لا ماكو شي من تفكيرج الموضوع ما يخص سوليين يخصج

جاوبته .. هااا جا خوش يله تعال منتظرتك راح افرش البساط الاحمر

سد التليفون واني بسرعه خابرت اختي زوليخة تنهار اذا تسمع الاشتر اجانه

فتحت خط وردت بدون نفس جنها وحده حامل بشهرها ... خييير شتردين

كشرت عن ملامحي .. اووع عابت باع اخلاقها ولا جانها اختي اني الاخلاق والادب والطيبه والحنيه والديمقراطيه وهاي ابليس تافل بوجهها

كلتلها بقرف .. نسيبي راح يجي عنده موضوع وياي تكدرين تجين تاخذين ابنج لان ما اريده يزعجنه

تعصبت وردت عليه.. شعنده وياج نسيبج وشوكت تجي وانتي تحجين صدك لو مقلب من سوالفج لمعفنه

رفعت حاجب بقرف.. ويييع وهسه اني ما عندي شغل وعمل وعايفه شركاتي وبرانداتي ومستحظراتي اكعد اسويلج مقالب شكلولج عليه حافظ لعيبي

تنهدت بملل... احجي شعنده وياج؟

جاوبتها بخبث.. ما اعرف يجوز يريد يخطبني بس بصراحة قبل لا تهجمين اني مراح اوافق هو صح طليقج ويحل عليه واني جنت اتمنى اتزوج رجال مثله بس بصراحة اعرفج زوليخة تنهارين اذا اخذته لهذا السبب كنسلت الموضوع حتى بعرسنه ما تخلينه نتهنه

بس خجلانه يربي شلون احجي شلون اگوله اني مموافقه ورافضه بسبب اختي ياريت يتفهمني وما يزعل مني وياريت يفهم ان اني احب اخووو وصح هو مسربت بس ما ابدله بكنوز الدنيا

عاطت بيه وهي تكول ... كاااااافي كااافي شكد تلغين وتالفين قصص هيج يعني لهلدرجة اشتر حقير بنظرج يخطبج وانتي اختي انجبي وانلصمي وشوفي شيريد

جاوبتها .. وشدعوه عليج زوليخة شدعوه هل الانهيار ترا كتلج مراح اوافق وشرحتلج الاسباب وحتى قررت اصلح ذات البين بينكم حتى احصلي بيت بالجنه من وراكم

ردت عليه بغضب .. دمشي ولييي شكد تغليين ادبسز

قفلت الخط بوجهي باوعت للمكالمه بعد ما سدتها كشرت بقرف .. عابتلج شكد خبيثه ما تحب الخير الغيرها

جنت لابسه ثوب تسواهن جان صاير عليه برشوت

رحت سبحت وبدلت لبست ثوب من سولين ههههه خرب شكد جلبه ماكو هيج قابليه جاي التقي برجلها واطلالتي من توقيعها

رحت اتفقد احوال الرعيه جيهان نايمه يم ماما بعدها عمليتها توجعها وماما جانت تقره قران وامين كاعد بصفها يلعب بالموبايل

وتسواهن كاعده مكابله المرايه وتلقط بالملقط بحواجبه اووي كيوت من انسجن رجلها اهتمت بروحها نسوان برابيك

كعدت يم امي اسويلها مساج الرجليه وسولفت الها عن نسيبي كالت .. خليج حذره وكل شي يطلبه منج كليلي باعي اني اعرفه هو ما يريد النه المضره وهوايه ساعدني من جنت غايبه عنكم ويجيبلي اخباركم وكل طلب اطلبه منه ينفذه بس ارجع واكول خليج حذره وحتى لو نثق بيه لازم ناخذ حذر

دكيت صدري .. ولا يهمج يمه نسيبي اثق بيه اكثر من تسواهن واني تربيتج محد يغلبني

اندك الباب وطلعت وفعلا جان نسيبي سلمت عليه وجبتله برهومة يلعب وياه ورحت احظر ضيافه

ما اشوف الا زوليخة اجت تركض تهف هي وجنطتها ولابكوتها كالت بغضب .. منو عدنا

عود عبالها اني زوج ما شمت ريحة واجت ام العطور اتذكرتها من تكول اشتمي هاي مو ريحة الاشتر ما اكدر احجي اخاف منها تاكلني وتشربني واني فقيره مو مثلها

كلتلها بهدوء.. ناس خطار جايين عليه روحي انتي ارتاحي عمري غسلي وتغدي ماكو شي

عفتها ورحت وهي منهارة تقضم بأظافرها ومترتره ومتعصبه هههههه الا اسودنها يله ارتاح

دخلت واني ارحب بيه .. هلا هلا بالنسيب الكفوو

رد عليه وهو يكول .. هلا بنسيبتي الوفيه

ابتسمت .. اامرني شسوي اكتل اذبح اسلخ عد عيناك اصيرلك ابو طبر

ضحك ورد عليه.. لا باعي اني اجيت اريد اخطبج لمصطفى اخويه وحددت موعد للخطوبه بنفس الموعد

عقدت حواجبي.. بنفس الموعد هو شظل للموعد ترا ما ظل شي والله زين وين الحك ااجر فستان احجز صالون

جاوبني .. مالج شغل اني كله ارتبه الج اي فستان تردي واي صالون اني اتفق وياهم وعلى نفس الموعد

انتي عليج بس تعقدين وهذا هو لان بصراحة اقاربي حالتهم خطره واني اريد اجمعكم اخاف لا سامح الله يصير شي خوما اظل انتظر بعد شهر

تنهدت بحيره سكتت مجاوبت

كال.. هو مجرد عقد ينربط بيه اسمج ويه اسم مصطفى وانحلت القضيه وبعدين نسوي حفله اذا تردين

رديت عليه... احجي بهذا الموضوع ويه امي لان اني احس نفسي متشتته

كال .. اي اكيد بس اني اريد اخذ منج موافقه مبدئيه واني ادري بيج تحبين مصطفى لهذا السبب فاتحتج انتي بالموضوع وبعدها ان شاء الله نحجي ويه الوالده

كمل كلامه وهو يكول ... روحي صيحيها خليني احجي وياها بسرعه

وكفت ورحت جبت امي على الكرسي والمتحرك واجيت اله طلعت وهو ظل يحجي ويه ماما ويتفق وياها

وسولين واكفه بباب غرفتها جنها ابليس وكاتلها القهر تريد تموت هي منا فضوليه انوب محد يسولفلها اشتر شبيه راااح تنهار

كالت بغيره .. بشري شيريد المسعد

نزلت راسي بخجل ودلع ... امممم يريد يخطبني

عاطت بيه وهي تكول ... انتي صدك ما تستحين احجي المن خطبج

ضحكت ... هههههه لا ما احجي اخاف من الحسد

عفتها ومشيت وهي ركعتني بغمه راح تمووت من القهر شكد مطيه من كل عقلها يعني عبالها اشتر يخطبني خبال حتى خبال

...................

سولين

رجعت من الدوام بسرعه هاي الخبله حركت دمي وطلعت اصلا يريد يخطبها المصطفى وعشتو تخاف من الحسد عساس ماخذه سي سيد امداني

بس اني فرحت بصراحة ووواي واخيرا راح يصير عدنا بعد عرس واختي افيان راح نحطها بركبة رجال هو اني متأكده راح تطلع ببرنامج الخط الاحمر كاتله مصطفى وره العرس بس يله المهم احنه نتونس وناكل اكل اعراس وبعدها اكل فواتح

شفته من اجانه ودخل بيتنا جنت حيل سعيده بوجوده بعد ما خطب اختي لاخو يعني يعني ناسبنه بيت الاشتر وصرنه گرايب وناسبنه الافنديه واخذوا بتنا فافيه هههه

من هسه تحمست شنو راح البس وشلون اكعد واسولف واثق بنفسي وما انطي مجال حتى يباوعلي احركة حرك اسمط بيت جده بسيطه

اني مطلعت اله ولا حتى خليته يلمح طولي بس دزيت على ابراهيم اخذته منه اي والله وليدي مشتاقتله اشمه واحظنه واخلي على صدري مو علمود الاشتر

هو شويه وطلع وافتهمت من امي ان اخو خطب اختي افيان وقرروا بعد باجر الخطوبه

يله الحمدلله على كل حال ما عدنا شي. كعدت ويه ماما نسولف ونتفق على كل الامور

شويه واندك الباب رحت فتحت الباب فرحت من شفت رنا وامها جايين علينه رنا حيل متغيره و وجهها اصفر وذبلان جانت حامل وبطنها صغيرونه

ضحكت وفرحت بيهن بستها وحضنتها وسلمت على عمتي ودخلن جوه ظلن كاعدات ويسولفن ويضحكن

هي كعدت يمي كالت .. اجينه نشوف جيهان واليوم جدو يجي هو وام حسن هماتين يشوفوها جدو لعب بيهن لعب وكلهن التحجي بعد ويه جيهان اشك حلكها وكذلك كوثر طيحوا حظها وبطلوها من الجامعه وجابوا الفلوس من هذا صاحبها الي اخذ الفلوس

لج لو تدرين هي الي مراسله جيهان وكلتلها امج عايشه وهي الي لفقت كل التهم والكلام ضد اشتر وضد كريم لج كتلوها كتله وهسه لا تطلع ولا تطب محبوسه بالغرفه انوب كاتله روحها تريد تتزوج اجت مره شافتها ما عجبتها خلت وراحت

كلتلها بتنهيده .. والله بصراحة مصدومة اني بكوثر مو طبيعيه والله لج شلون هيج تسوي مجانت هيج ليش تغيرت تدرين والله حتى انقهر عليها لج والله مجانت هيج كله بسبب ايو وربع ايو خبلنها وسقطن اخلاقها

ردت عليه... اي والله للامانه هي صح بيها خيط وغيره بس مجانت هيج هي تخبلت من رافكت ايوو رادت تثير مثلها بس شنسوي والله اني هم الخاطر جدو وجاسم انقهر عليها هم هماتين اذوها وضربوها وعاقبوها بلكي الله وتمشي عدل هي هسه متخبله تريد بس تنهزم منهم بس مخلصتها بجي وتريد امها

تدرين انقهرت عليها والله ما ادري ليش كسرت خاطري وحجيت ويه جاسم يخففون ضغط عليها كال الله كريم بس هو جدو الي متخبل وحتى ذاك اليوم لزم حنان وسكطها تسكط لكاها طالعه للسوك من دون علمة كتلها وطردها لاهلها يريد يطلكها متخبل جدو متخبل يكول انطيتهن مجال استهترن

جاوبتها ... اي والله صدك استهترن هن رخولهن الحبل انجلبن هو شنو بيت جدو كهلان اول ما تزوجت حنان غير كلها جانت تتمنى تعيش عندهم على الاخلاق على الادب والراحة وهسه صايرين وحوش ناس تاكل ناس

رنا .. لا الحمدلله هسه رجعوا طبيعين وبيبي ام حسن وعت على نفسها بعد ما جدو رزلها وظل يحجي عليها صارت ادميه وظل على كل شي يحاسب

جاوبتها .. يله الحمدلله

بعدها عمتي حجت وهي تبتسم كالت ... احنه اليوم اجينه وطالبين القرب منكم

ضحكت اني كلتلها .. شنو ناوين تخطبون منووو بس لا ناوين تخطبون خاله تسواهن

ضحكت وهي تكول... هههههه لا يابه لا يا تسواهن احنه جايين نخطبج انتي الحارث

فتحت حلكي مصدومة كلتلها ... هاااا شنووو تخطبوني لحارث

ابتسمت وهي تكول ... ايييي اتمنى اني وحده منجن تثير الحارث وحارث يكول سولين حتى لو عنده درزن جهال اني قابل بيها واحبها

رمشت بعيوني ممستوعبه الوضع ... لا بس مو هيج بس اني لاااا

امي جاوبتها بجمود وهي تكول .. لا خيه صدك تحجين ترا هي رجلها يريدها بينهم زعل بس ان شاء الله زعلهم ما مطول هو يحبها ومتعلق بيها وبنتي تحبه ولحد الان ممتخطيته ولا تكدر تتجاوزه لحد الان عايش بعقلها وذهنها هي حتى ابنها مرات تصيحله باسم ابوو بنتي لحد الان ما نست زوجها

بجت عمتي وهي تكول .. والله جنت اتمنى تصير من قسمة حارث بس كله من وره عامر الله لا يوفقه لا دنيا ولا اخره كسر خاطر ابني وكسر كلبه هو جان يحبها ولحد الان يحبها زوجها غصب عنها وانوب تمرمطت بطفل الله ينتقم من الجان السبب

جاوبتها بتنهيده .. عمه فدوه سلميلي على حارث وكليله ما تهون عليه كلش بس كليله خلي يشوف حياته واني من كل گلبي ادعيله اخوي هو والله ان شاء الله يارب يلكة بنت الحلال الي تسعده وتسر خاطره وحارث ونعم منه الف وحده تتمناه ربي يوفقه ويسعده وين ما يكون

جاوبتني برجاء وهي تكول ... بس هو يحبج

جريت نفس وزفرته.. عمه والله ما اعرف شلون احجي وياج بس هذا گلبي صار ضدي يحن ويون على اشتر شكد الوم عليه شكد احجي ماكووو قافل عليه رغم كل شي هو قافل وعنده امل بيه

اني ما اكدر اظلم حارث وياي اذا تزوجته ياخذ جسد بدون روح وشنو اهمية الجسد من دون الروح والله هيج اني هنا ظاله جسد وروحي كلها عنده احبه مو بيدي

رغم كلها تحجي عليه وترزل بيه بس اني ما اكدر هيج متعلقه بيه والله هذا احساسي تجاهه ورغم الجفا وكسر الخواطر الا اني ما استحي واكولها بكل صدق اني احبه اموت عليه اعشقه مو بيدي ياريت اكدر انساه بس ما اكدر ما اكدر عقلي طفر من راسي من كد التفكير

لزمت ايدي وهي تتنهد كالت .. صوج عامر الدخلاه حياتج جان انتي هسه ببيت حارث وجان هسه حارث مو هاي حالته الله كريم ان شاء الله يارب ترجعين وينلم شملج برجلج اني هم ما اريدلج القهر والظيم والذل

بست عمتي وحظنتها .. واني احبكم واتمنى الكم كل الخير يارب يسعد حارث بحق الحبيب محمد

هزت راسها بقبول بعدها ظلت تغدت يمنه وامي عزمتها على خطوبة فافي وراحن كعدن يم جيجي و انطنها واجب وطلعن

صفنت هاي شنوو شو كثرة خواطيبي يكولون التكثر خواطيبها بارت عزاا لازم اتزوجلي واحد منهم لا اعنس واني منتظره اشتر هههه

بعدها صفنت شكد مقهوره على حارث فعلا هو طرف انظلم بكل حياتنا ابوي بعده عني ولو ما داخل اشتر حياتي ممكن نكون متزوجين بس قدر الله وما شاء فعل وكل شي بالقسمه والنصيب والنصيب لو يصيب لو يخيب

......................

جيهان

شويه دتتحسن حالتي كريم ابد ما تركني كل يوم يجي عندي يجيب الممرضه تداوي العمليه وتنطيني ابر

ارتاحت نفسيتي من شفت العمليه دتنطي نتائج الحمدلله والأمور صارت طبيعيه

جان كريم كاعد يمي ويسولف ويايه لازم ايدي يكول .. وهذا بعد ما عندج عذر يعني بعد ما الج مكان الا حضني تنامين بحضني ابوسج واضمج

ضحكت  بخجل.. هههههه لا مو هيج عيب

عض شفته وهو يكول... لا يابه ماكو عيب العيب بالجيب غير مرتي انتي يله حتى نلحك نجيب نونو احلى من ابراهيم ونلعب عليه

هزيت راسي بقبول واني مبتسمه.. تمام مثل متريد نجيب نونو ليش لا

شويه واجت افيان ام العلوم تركض كالت .. ولج عدلج روحج اجه جدي الشيخ وام حسن وحنان وكوثر

انصدمت وصابتني رجفه تخبلت عزا يبووو كلهم اجوو هو افتخر وفرح وكف وجدو دخل راح عليه ملهوف باس ايده ابو وباس راسه وحضنه وسلم على عمته

اجه جدي الشيخ وباس راسي وتحمد الي بالسلامه وام حسن وحنان وحتى كوثر والله صايرات ادميات والشيخ معصب عليهن وغضبان ويخوزر بيهن

كلهن .. هاي جيهان مرة ابني جبيري كريم الا بسببجن طردته واذيته وهو نظر عيني وفتشة عيني بعد اريد وحده تسوي مشاكل حتى اعرف شلون اتصرف وياها وحق الله وعظمتة وجلالته ما ارحم اي وحده تتجاوز واني عرفت التتجاوز من الي ما تتجاوز

اني جنت ساكته محجيت شي وهن يردن عليه .. تدلل حجي تدلل شيخنا لا ان شاء الله هي جيهان بنيتنا ماكو بعد لا مشاكل ولا مصايب

كريم جان ساكت ومفتخر بابو ويباوعلي فرحان لان ابو وكف وياه ضد نسوانهم الحمدلله يارب الحمدلله الي ظهر الحق وزهق الباطل

كوثر متغيره وصايره صفره وبس تصفن هي اجت سلمت عليه وباستني واحس بيها تتودد الي حاولت استجيب الها

بلكي الله وتتعدل لان هسه حالتها ما تطمن والكل ضدها ابوها واخوانها وحتى ام حسن وحنان

اني اكول اسوي لله وبلكي الله تنعدل على ايدي هم الي بيها اجر لان هي هم يتيمة وماكو واحد ينصحها

.....................

فيان... 

طلعت من الحمام لافه راسي بالخاولي طبيت للغرفة ظليت اهز چتف وارگص عبالي وحدي بالغرفة واشتم ريحة جگاير واشوف تسواهن خلستني

كالت والله زمن فوينه العوبة صارت مرة وراح تعرس وفرت ايدهه وغمتني...

انحنيت وطليت بوجهه كتلها اشايفتني مو مرة عندي شوارب مثلا؟  عندي لحية عندي  استغفر آلَلَهّ الا تحچينه

كالت مصدومة بتصنع عزااا بعينج بعدج ماعرستي وزحتي الحيا

فريت چتافي گتلها شحجيت شكلت هسه اني حتى ماكملت حجايتي

غمتني مرة ثانية افاا والله ماصايرة هاي عروسة يغموها اكثر من مرة

كامت وطلعت واني لبست ونشفت شعري وطلعت امي وسولين وجيهان بالصالة

شفت ماما مدمعة عيونها وتباوعلي بنظرات
بين حزن وفرح

رحت بخطوات سريعة  دنكت على راس امي وبسته وهي شهكت بالبجي وتبوس بيه وحضنتني

دنكت على اديهه بوستهم واريد انزل على رجلها ابوسها
چلبت بﺟتافي مخلتني واجن خواتي التمن وحضنه بعض

تسواهن فرقتنا عن بعض وكالت ولج يله تأخرتي عالصالون

مسحنا دموعنا وطلعنا اني وسولين للصالون
سويت تسىريحة بسيطة نازكة وحلووة
وفستاني  شمواه ردن طويلة وطويل بس مفتوح من الصدر على شكل سبعة وبي فتحة للركبة من يم الرجل صفح

اجو علينا للصالون صعدنا بالسيارة والسايق مشغل اغاني ردح واني كوة لازمة مااهز چتف لو اطك اصبعتين متحمسه بيه حماس

وصلنا  للبيت دخلنا جانوا موجودين جدو كهلان وخالو بشار وكريم وحارث وجاسم
‏
‏سلمت عليهم وبعدها رحنا للغرفة نزعت البرنص وجتي ماما شافتني حضنت وجهي باديهه الاثنين وتباوعلي مبتسمة
‏- سألتها بابتسامة فرح طالعة حلوة ماما مو

هزت راسها ودموعها توكع على خدها

اجت تسواهن ورانا وكفت يم الباب كالت افيان ام الخبطات شون ماطلعين حلوة

كمت واجهتها كلت هذا هو مدام تسواهن ام الجكاير كالت حلوة يعني حلوة

ظلوا يضحكون واني رحت اباوع بالمراية متخصرة واتفرج على جسمي ومكياجي والتسريحة وابوس بروحي بالهوا يمه فدوه لهل وجه شنو هالجمال صدك جذب يحسدونج والله خاب فدوه لحلكي

ضجت اشو تأخروا وتسواهن تلاشيني وكل شوية كالت ثگلي يابنية ثگليى لاحگة الثگل حلو انت عروس

شويه ونسمع صوت هورنات مال سيارة ووراها واندكت الباب رحت ركضت اني والكعب طليت من الشباك... 

واشوفهم دخوا اول واحد حجي اديب ووياه اشتر
وراهم  صفاء ومصطفى دهر دهره طالع صااك بس لا طالع احلى مني بالقران احظره

اروح اركض للمراية اشوف ركضت واجيت اوكع لزمت بالقنفة وتسواهن لزمتني كالت وهي صاكة على سنونها
مو گلنا ثگلي الثگل حلو هسه لو واكعة ومكسورة ظهرج شنكللهم جانت تكمز جنج هذا ابو بطن لا والله جنج القرد بالقراءة

ابو بطن منو ؟يمكن تقصد الكنغر،

ركضت لعند سولين كتلها عليج الله منو طالع احلى اني لو صافي فشخة

كالت ولج شنو تنافسينه هو ضرتج غير هو رجلج

سحبتها روحي طلي وشوفي بعدهم مافاتوا بالاستقبال طلعوا استقبلوهم

كالت بتلكأ اشتر وياهم

جاوبتها اي نسيبي الكفو العلم منور الميدان

ابتعدت كالت ماريد اطل لا يلمحني اشتر وانت كعدي ولزمي مكانج ولج شوفي شسويتي بشعرج تكفش كعدي
كعدتني كوة وعدلت شعري خليت ايدي على گلبي يدك سريع من اللوابة

يمه واخيرا فر االجدر ولكه قبقه فافي خبطة وصافي فشخة بس طالع حلو اليوم المدهور راح اغير لقبه الى صافي كشخة بس اليوم

بعدها دخلوا جوه واسمع صوتهم بالاستقبال ووراها صاحوا عليه اعقد

لبسوني خواتي البرنص وكعدنا بالغرفة والشيخ يقرا ايات قرأنية وبدا يعقد النا واني اطلع من البرنص الي مغطي نص وجهي واباوع واكول معقولة كل هذول الشخصيات جايين يخطبون وحدة خبلة مثلي. صدك ما عندهم ذوق

اجيت اطكها ضحكة بس الشيخ سألني ولازم ارد عليه
ورديت نعم قبلت وانت وكيلي

واخذوني للصالة كعدت ووهو طب وسمعت صوت هلهولة وطشوا الجكليت

اجه كعد يمي واني ثگلت صرت چيس اسمنت

اجت اخته ومرة حجي اديب انطوه الذهب وهو يلبسني وكلما يلبسني قطعة يبوس راسي ويكول طالعة تخبلين

ناقصج بس كم فولت وتنورين تشغلين اضوية مديت ايدي اريد اكرصه ببطنه بس تذكرت حجي تسواهن لازم اثگل اليوم عالاقل..

....................

زينب

اليوم خطوبة مصطفى اني اجيت اروح بس بصراحة ما اعرف ليش صارت عندي ردة فعل ولزمت كاعي

شويه ودخلت امي جايه من المستشفى وهي متخبله اول ما دخلت وهي لزمت التحفيه وركعتها بالكاع وتناثر كزازها

صرخت اني بخوف ورفعت رجليه عطت بيها بقلق ..شكووو شبيج ليش هيج دتسوين

ردت عليه بغضب وهي تكول ... اخوووج العااار الادبسز الساقط راح خطب من وراي راح رافك الاشتر والله اليوم لو اني لو مصطفى

خابرت بسرعه واجاها الرد كالت بغضب وملامحها احتدت .. ساهر هسه تجي هسسسه هسه تجي لك ذول تمادوا ذول تخبلوا انجنوا لك تعال شوف هذا العار الادبسز شسوه اشتر يتحادانا ويرد الصاع صاعين هذا الادبسز الطايح حظ

لو تشوف شسوه راح اخذ مصطفى وخطبله وما حظرني هسه تجي وتجيب سلاحك اريدك تكتلهم اريدك تقهرهم مثل ما قهروني اريد لو جثة مصطفى لو جثة اشتر

اني حطيت ايدي على صدري ... عزاااا لا يمه اخووووتي ولج انتي شلون هيج تحجين شلون الج ايدج وتطالبين بقتل اخواني والله اشتكي عليج

ما اشوف الا ساهر دخل ورشاشته بيده وهو يصيح ... اليوووم اشتر ادفنه بمكانه واني سااااهر اليوم ما اسويها خطوبه اليوم اسويها عرس من دم حقراء جبناء بسيططه

طلع يركض وهي ضحكت بخبث ومنتظره النتيجة واني احس روحي انهارت

فتحت موبايلي وخابرت اشتر عطت بصوت واني اصرخ .. اشتر الحك راح يكتلونكم اجاكم ساهر بسلاحة

نهاية البارت ... يتبع

كونوا انتم كونوا بخير ... احبكم 💔

لا تنسوا التصويت والمشاركة بكم نكتمل❤️