بنات الجُزُولي

20

*#بنات~الجُزُولي 《20》*
*#بقلم~قطوف~محمد*
*☆☆☆ــــــــــــــــ☆☆☆ــــــــــــــــــــ☆☆☆*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏​​‏​​‏​​‏​​‏​​
لحدي ما جينا داخلين البيت الساعة بقت ١٠ وما صلينا العشاء وناس عمتو نعمات اصلهم بنومو من بدري من الساعه ٨ ، مشيت غرفتنا وحذيفة قفل الأبواب ، ومن التعب صليت وطلعت طرحتي ونمت بالعباية بس حذيفة قال لي قومي طلعيها ح تضايقك ، قلت ليهو أنا لا ما بتضايقني ، فقومني وأنا عيوني مغمضات طلعها لي وباسني في جبيني وغرقت في النوم..
تاني يوم بعد ما حذيفة جا من المسجد وجاب لي معاهو الشاي كالعادة ، لقيتو طلع شنطتو وبقى ينزل جزو من ملابسو فيها ، وقبل ما اسألو قال لي مسافر القضارف حصلت مشكلة كبيرة في المشروع، قلت ليهو في شنو؟، قال لي حصلت لخبطة في الأوراق وقالو انو الأرض ما حقتي..
قلت ليهو كيف الكلام دا؟، مش انت معاك الأوراق؟، قال لي وهو بقفل شنطتو اي معاي لكن ما عارف الحاصل شنو ، كان عايز اسوقك لكن المكان بعيد وح تتعبي والجو ما مناسب ، قلت ليهو ما مشكلة، انت ح تجي متين؟، قال لي ٣ أيام كحد أقصى ، لو احتجتي حاجه في قروش في دولابي و نومي مع عائشة تمام؟ او لو كمان عايزة تمشي لي ناس أبوك امشي، هزيت ليهو راسي وهو شال شنطتو بس قبل ما يمرق استعجلت ليهو وحضنتو وقلت ليهو ح اشتاق ليك كتير!،
وهو كأنو اتفاجأ من ردة فعلي كشخصية خجولة بس ضماني عليهو وقال لي حتى أنا خلي بالك من نفسك يلا مع السلامة ومشى ودع ناس أمو ومرق،،
وانا بي جاي نضفت غرفتي وشلت صينية الشاي وديتها للمطبخ ولقيت عائشة بتجهز في شاييها وشكلها ياداب صاحيه قلت ليها صبااح الخير،قالت لي صباح النور ، قلت ليها مالك زعلانه يا عشوش من صباح الرحمن؟، قالت لي وهي بتاخد نفس طويل بتزفرو بي بطء، انا زهجانه وزعلانه يا سحر!، قلت ليها ليه مالك؟،
قالت لي اولا استخرت ونهائي ما مرتاحه لعبد الحميد دا وح أرفضو مباشرة من أمو بس انا خايفة من ردة فعل أمي!، وعلاقتها القوية مع سامية ح تخرب.
قلت ليها أولا عايزة اقول ليك اعملي الحاجة البتريحك وما تخافي من اي شي انتي هسي قلتي ما مرتاحه صح؟، معناها تقيفي هنا طواالي ، بعدين ح تقدري تتحملي على مفسك وتعذبيها عشان هاطر علاقة أمك بي سامية؟ ح ينفعوك بشنو؟، وبعدين جارتكم دي لو عاقلة وفاهمة ما ح تزعل وح تتعامل معاكم عااادي، قالت لي ما هو دي المشكلة خالتو سامية زعالة شديد وكمان بتاعت اشاعات، يعني ما معروف تطلع وتقول فيني شنو؟، قلت ليها خليها تقول العايزاهو راحتك اهم شي يا عائشة!، قولي لي امك انك رافضه وامك ح تتصرف وتوريها هزت لي راسها وبقت تشرب في الشاي وظاهر انها مهمومة لسه
ضحكت وقلت ليها اها تاني مالك يا بت؟، قالت لي الليله صحيت متأخرة ولقيت حذيفة سافر وما ودعني وانا ما عندي رصيد اتصل ليهو!..
قلت ليها تاني عشان تصحي متأخرة ، طلعت تلفوني وانا بتصل على رقمو واديتو ليها ، اول ما رد قالت ليهو انا ما سحر!، .. تسافر وما تودعني يا حذيفة؟ .. طيب ح تجي متين؟، .. ٣ ايااام؟ لالالا ،وهنا عائشة بقت تبكي وقالت ليهو تعال بكرة ما تتأخر عليك الله!!، .. انا زهجانة بس يا حذيفة .. طيب حاضر حاضر ، يلا مع السلامة وقفلت الخط وادتني التلفون قلت ليها مالك؟، قالت لي حذيفة دا اشترى الأرض دي قبل ٥شهور كدا ومساحتها ١٠ فدان وانا من البداية كنت خايفة عليهو منها وقلت ليهو ح يزورو الورق وشوفي هسي حصل شنو!
هنا انا خفت لانو متاهت الأراضي دي كلها نهايتها سجن، بس طمنت نفسي بانو ما ح يحصل شي وحذيفة ح يجي بعد ال٣ أيام طوالي، قلت لي عائشة ما تخافي ياهو ال٣ أيام دي وبجي ما بتأخر وما تقلقي ما حيحصل شي اتفائلي ، قالت لي ان شاء الله ، وبدت تنضف في المطبخ قلت ليها المطبخ خليهو لي وبغسل معاي العدة انتي امشي ضايري برا، قالت لي سحر انت...، قلت ليها عائشة خلاص ياخ انا ما بقدر اقعد ساي كدا والله!، قالت لي حنتك ح تطلع قلت ليها خليها أصلا طلعت يلا يلا امشي واتلفت وبقيت ألم في العدة وأضاير في المطبخ وعائشة مرقت تضاير برت..
لحدي ما خلصت العدة لقيت عمتو نعمات دخلت وشافتني وقبل ما تقول اي شي قلت ليها والله انا ست البيت!، سكتت وضحكت قالت لي خلاص سمح تسلمي يا بتي♡، وبقت تعمل الفطور وتونس فيني ،
بعد الفطور شلت تلفوني واتصلت لي حذيفة وقال لي انو وصلو مدني ياداب ، بعد قفلت منو بقيت راقدة وما عارفة اعمل شنو بس اتزكرت انو عندي ملابس كتيرة عايزة غسيل طلعتها وطلعت ملابس حذيفة برضو وبي الونسه مع عائشة غسلتهم بالغسالة، وعائشة بتشرهم لي..
الباب دق وعائشة مشت تفتحو ولقيناها جارتهم سامية سلمت علي وقالت لي من عرسك شهر ما تميتي وبتغسلي؟، قلت ليها اي فيها شنو العرس بشِلْ الزول؟!، سكتت مني ومشت لي عمتو نعمات جوا، عائشة ضحكت وقالت لي طلعتي ما هينة قلت ليها ما كدا والله بس سؤالها بايخ جدا، قالت لي صحي والله..
بعد ما انتهينا دخلنا الصالة وفتحنا المكيف واي وحدة انجدعت في سرير ونامت لحدي العصر صحينا واتزكرت انو حذيفة بكون وصل فاتصلت عليهو كتير بس ما رد بديت اخاف واقلق بس قلت احسن اقوم اصلي وادعي ليهو وفعلا قمت اتوضيت وصليت ودعيت ليهو ولميت الملابس عشان أكويها لقيتو اتصل لي رديت بي سرعة وبي لهفة ظاهرة قلت ليهو حذيفة!، كنت وين مالك ما بترد على تلفونك وصلت؟، قال لي اي وصلت والتلفون كان صامت بس وهسي ماشي على الأرض، قلت ليهو كان ترتاح أول وتمشي بكرة قال لي لا ما عندي طريقة يلا مع السلامه ح ارجع ليك بعدين قلت ليهو حاضر وقفل وانا تميت مكوتي بي جاي...
______________________________

*عائشة: -*

بعد ما خلصت غسيل مع سحر ومشينا الصالة هي طوالي رقدت نامت بس انا بقيت اتقلب ساي وافكر في سامية وامي البكون خططو لي اسامي اولادنا زاتو قمت ومشيت المطبخ عشان اشرب موية لقيتهم قاعدات في المطبخ خالتو سامية قالت لي عبدالحميد حاي بعد يومين وح نتقدم وبما اننا جيران نتفق على خطوبة..
هنا انا غلبني السكوت وقلت ليها والله يا خالتو سامية انتو ما اخدتو رأي ، قالت لي الموضوع محسوم ونحن زي الاهل وشايفاك موافقة، هزيت ليها راسي وقلت ليها لا انا ما موافقة والله..
امي اتخلعت وملامحها اتغيرت ، خالتو سامية قامت بي زعل وقالت لي تمام بنات حواء راقدات ، بس انتي ان شاء الله تلقي اليفك ليك بورتك قلت ليها أولاد آدم راقدين برضو ما تخافي علي، اتغاظت من كلامي ومرقت وهي زعلانه وهنا امي ساكته ووشها ما بتفسر وقبل ما تنطق اي حرف قلت ليها انا استخرت والولد دا ما بنفع معاي قالت لي عائشة انتي عويرة تلقي ليك واحد زيو وين؟، قلت ليها بلقى بإذن الله ، قالت لي غايتو طلعتي هبلة وضيعتي سعدك من يدك قلت ليها امي انا قلت ليك استخرت ودا عمرو ما ح يكون لي سعد،وشلت كباية الموية ورجعت الصالة شربتها واتقلبت نمت..
تاني يوم سحر اتصلت على حذيفة من الصباح واطمئنينا عليهو وامي دي ساكته وما بتتكلم معاي نهائي قلت ما مشكلة فترة قصيرة وح ترجع تتعامل معاي عادي ، وسامية مخيره بعد دا كان قطعت صلتنا بينا ولا لا هي اصلا بتاعت مصالح ما اكتر ، ،
اها بعد ما صلينا العشاء سحر كانت راقدة وبتتقلب ساي وسرحانه وكل شوية بتشوف تلفونها ، قلت ليها مالك يا بت قلقتي بي، قالت لي وعيونها مليانة دموع حذيفة... شفتي من ما اتصلنا عليهو الصباح وانا بحاول في رقمو بس بديني مقفول قلت ليها ما تخافي ها اصلا الأرض حقتو دي في مكان ما فيهو شبكة، ااكد ليك اول ما يلقى شبكه ح يتصل عليك هسي انتي نومي وروقي هزت لي راسها ورقدت وهي بتجاهد في دموعها عشان ما ينزلو..
هنا انا حسيت بالغيرة، في وحدة تانية بتخاف على أخوي وكمان في الفترة الاخيرة دي حذيفة اغلب يومو معاها ما قادرة استوعب انو اخوي القمت معاهو خطوة بي خطوة واتربيت على يدو يجي يوم وينشغل عني وعن دلعو وحبو وهظارو لي ومعاي؟، يوم شالها قدامنا برضو حسيت بي غيرة وقلت و كان بشيلني انا بالطريقة دي!، ولمن مرقو مشوار مع بعض وجو متأخرين ولمن يجي من الصلاة ويجينا يودي ليها الشاي!، الحاجات دي كلها كان بعملها لي بس هسي بطل..، وحتى بعد المرات بتمنى بجد انو ما يكون اخوي وبحسد سحر جدا على كمية الحب والحنية والاهتمام البكنو ليها اخوي ولا كمان هو ما بتعامل كدا على اساس انهم متزوجين جديد!، لا هو ح يعمل كدا طول حياتهم وما ح يتغير عليها لا ح يزيد في كل دا..
انا عارفة حذيفة واصلو وحنيتو وطيبتو وكمان شدتو لو غلطتي عليهو بس برضو هو هين ولين ، وبتمنى جدا لو القى زوج زيو..
قلت هوي يا عائشة دي زوجتو وهو في النهاية مصيرو ينشغل عنك فيما بعد بيها وبي أطفالو خليك عادية واتقبلي الواقع وما تضايقيهم..
_______________________________
*سارة: -*

قضيت مع ابوي وسبأ يوم بس ابوي لسه زعلان وقفل مننا الاتنين وبقى ما بتكلم معانا، وسبأ دي من كترت البكاء جاتها هالات ووشها بقى اسود عديل ونفسياتها في الارض..، جهزت ليهم الشاي وطبخت ليهم كم صنف كدا وجهزت لي سبأ فطورها حق المدرسة وقلت لي ابوي انا ماشه بعد دا وبجي بعدين اسوق سبأ معاي عندنا مشوار قال لي انتي امشي بس ديك ما عندها اي مرقة من البيت دا ، مدرسة زاتو تاني ماف ليها،
لمن أبوي قال الكلام دا كان سبأ طلعت وهي لابسة ملابسه وشايلة شنطتها فقام رمقها بي نظرات كدا خلتها ترجع لمن لحقتها لقيتها طلعت ملابسها ورمت شنطتها واترمت في سريرها..
قولت ليها عايني يا سبأ قومي اقري قرآن هي فترة عصيبة شوية وتاني ح نرجع زي ما كنا تمام؟، هزت لي راسها وما اتحركت،، شلت المصحف واديتو ليها وقلت ليها اقري مسافة ما امشي شقتي اجيب ملابسي واجي قالت لي تمام وقامت تقرا وانا لبست عبايتي وشلت روح واجرت ركشة ومشيت شقتي
لمن دخلت الشقة اتفاجأت لمن شفت زينب وبناتها مروة واية ومعاهم ابوبكر في الصالة قلت السلام عليكم وروح نزلت ومشت لي ابوها بي شوق وسلمت عليهو وحلفت ما تمشي لي حبوبتها ولا لي عماتها
ما اشتغلت بيهم كتير ودخلت غرفتنا شلت لي شنطة يد كبيرة وشلت منها شوية ملابس جاني ابوبكر وقبل ما يتكلم قلت ليها ح اقعد عند ناس ابوي كم يوم سبأ عيانه قالت لي طيب تمام واداني مصاريف ومرق وانا مرقت وراهو لقيت روح قاعدة بي طرف وبتعاين ليهم بي طريقة غريبة وكأنها نستهم .. كيف ما تنساهم وهم قريب ال ٣ شهور ما جو ولا سألو من بتهم ساي!
عمتو زينب قالت لي مالك ما سألتينا عن جيتنا دي ما يكون ضايقناك ، وعاينت لي شنطتي شكلها قايلاني طالعة وحردانه ليهم البيت ، اشرت ليها على ابوبكر وقلت ليها دا منو ؟، مروة ضحكت وقالت ليهم العملية لحست راسها ، عمتو زينب قالت لي وهي بتضحك مع بناتها اجي دا ما ابوبكر ولدي!، قلت ليها خلاص دا ولدك وانتي عايزة تزوريهو انا ما عندي فيكم اي دخل وخلونا لحدي هنا كويسين وما يكون بينا الا السلام بس لو سمحتو! ، اية قالت لي بتنا حرشتيها علينا، قلت ليها انا ما بحرش هي براها شايفة بي عيونها حبوبتها وعماتها الملاك ، أبوبكر قال لينا يا جماعه لحدي هنا خلاص انا لمتين اقعد اقضي حياتي كلها كلام وحل مشاكل معاكم؟ خجلتوني من نفسي انا في حياتي دي كلها ما عملت شي غير اجي اعدي اليوم كلو مراضه بينكم بس بعد دا ح تشوفو وش ما ح يعجبكم و تاني على قول سارة خلو بينكم السلام بس وخففو من حقدكم وكرهكم لي سارة يا أمي!، عمتو زينب التفتت علي وقالت لي ولدي عايزة تغيريهو علي كمان؟!، مروة قالت لي انتي اصل...، وقبل ما تتم جملتها ابوبكر كورك فيها وقال ليهم بسس ولا كلمة تانية لو سمحتو!، شوفي مشوارك يا سارة واتصلي علي بعدين هزيت ليهو راسي ومرقت وانا مبسوطة شديد من أبوبكر ووقوفو في صفي وما كان باقي لي الا امش احضنو ياخ!♡..

-----------------------------------

*وأنا راضية على أن يُصبح في نهاية كل هذا كتفٌ نَركَنُ إليه من العالم، وبعد هذا العناء تهتفُ قلوبنا -وأخيرًا- وجدنا الوطن.💜💫*