في ضريح العشق حمامه.
وئام الشيخلي.
ــــــ
شلون الغوالي ان شالله بخير قبل لاانزل اغلفــــٓــه ومشهد حبيت اتناقش وياڪم بخصوص إنعام.
شخصيتها مو ضعيفها. بس اني اختصرت هواي امور بموضوعها. فد يوم اسويلڪم بث مباشر ونسولف هواي امور.
نرجس رغم صلافتها وخطئها امها تعتبرها الخاسر الوحيد حسرت بنتها وحياتها وتعوقت.
تگولها وعد عاش حياته ومُـــخلــد رجعتلــــٓــه خطيبته واتزوج وعاش حياته. الا نرجس اتدمرت.
ونست ان نرجس من ايدها اللي صار وياها.
وهسه بما ان مثل نموذج نرجس وامها موجودات ويامڪثرهن.
واللي مثل إنعام ڪذلك هواي اللي مثلها. اريد اسٵلڪم ومن اجاباتڪم ڪلنا نستفيد ,
السؤال الاول :شنو رأيكم بتصرف انعام اتجاه موقف عمتها ونرجس واذيتهن.؟
السؤال الثاني :شنو نظرتكم بالقوة للمرأه وتصرفاتها ويه هيج بشر. ؟
السؤال الثالث:لو جنتو بنفس وضعها وظروفها شنو راح تتصرفون احكمو بعقلها هي وطبيعتها لو جنتو نفس شخصيتها.
ـــــــــ
مشهد.
ويذڪره انت تحديتني وتعديت ڪل الحدود وياي ولازم اردها الك. والصاع صاعين.
راح اوصل للعراق قطعتين قماش ابيض واسود.
الابيض لاهلك. ومڪانك بالنجف ولدنا محضرين الك ينتظر وصولك. اسم الله عليــــٓــه.
والاسود لبيت اخوي. حتى يعلنون الحداد ؏ نسيبهم اللي ما تهنوا بنــــٓــسبه.
ومڪملها بتهديد مااخليك تتهنــــٓــى واني عايش.
و مُـــخلــد يرد عليه بــ رد ماقل ودل. ڪم ڪلمه يخلي يشتعل ويسب ويلعن.
ومڪالمه يستخدم الحيله ويدعوه للصلــــٓــح ويسامحــــٓــه ؏ ڪل اللي سواه بشرط.
ينطي مهلــــٓــه اسبوعين يطلب منه تنفصلــــٓــون واذا تم هالشي بعد ماله علاقه بــ مُـــخلـــد وينتهــــٓــي العداء اللي بينهم.
وبالضبط بعد الاسبوعين متصل بــ مُـــخلـــد ويذڪره اذا تم الانفصال ينتــــٓــهي ڪلشي وتنتهــــٓــي العداوه.
ومُـــخلـــد راد عليــــٓــه ــــ
ــــــ
مســـــــاءالخير....
لقلوب نقية إن حضروا حضرت السعادة ..
وإن غابوا يبقى عطرهم يجوب المكان.
ــــــــ
من بينِ آلافِ النساءْ
أحببتُها
حتى النخاعْ
حتى الضياعْ
ورسمتُها خمسينَ ألفَ مِجرَّةٍ
في خاطري
لأدورَ في فلكِ الصراعْ
يا أيُّها الحبُّ الذي
يلتفُّ حولي
مثلَ نورِ الشمسِ
يرقُصُ كالشعاعْ
لو لم تكنْ
لبحثتُ عنكْ
وجعلتُ منكَ قضيةً
في عمقِ عمقي
ولجأتُ لَكْ
حَكَمًا
تَفُضُّ لنا النزاعْ
الحمدلله ربي ؏ نعمــــٓــه التي لاتعد ولاتحصى صباح يوم جديد صحيت ؏ ڪلماته الغزليه اللي ماامل من سماعها واطلب هل من مزيد؟؟؟
هالجملــــٓــه تعلمتها منــــٓــه حبيبي. لما ابوســــٓــه يگولها.
هل من مزيد؟؟؟
ولما ازيد يبتــــٓــسم الوجه الحلو ويڰول ڪنت شايل هم لاتبقين ؏ البوســــٓــه الوحده.
دايم اسيء الظن بيج وانت تبهريني.
ابتدينا يومنا بسفرتنا لدربند. وڪلامه وياي بالطريق اللي ڪان ساعات بس ماحسيت بيــــٓــه.
واجوائها وجماليــــٓــة المدينه وبيت اهل ميديا اللي الطريق اله صاير صعود ڪلش وڪانما بداخل جبل.
وجماليــــٓــة الثلوج اللي مغطيه الجبل. وبقينا يوم ثاني رحنا للسد اللي تگول جماليته بــ اعياد الربيــــٓــع.واتفقنا نزورهم بالربيــــٓــع
ومن بعدها توجهنا للسليمانيه والطريق يفتح النفس واني مرڪزه واصور الجبال اللي مزينتها الاشجار اللي بعدها مغطايه بالثلج .
واجمل اللحظات قضيناها وي اجدادي ابو اميــــٓــره وابو هوشيار. وخالتــــٓــي عنيده اللي ڪل يشوفها ينعجب بطبعها واسلوبها.
شخصيتها تجنن ومتڪلمه منبع حنيه وطيبه.
وحبيبي يگول شايفها مرات ومرات بالبصــــٓــره لما ڪانت تجي هي والحجي ؏ هيوم.
وام هوشيار الانسانه الطيبه ومارين هذه ورده من الله. وصديقتي من زمان حضرت عرسها وشلون ذڪريات بذيج الايام.
اما هوشيار هواي بي اطباع من خالو ارشد اللي ينطيــــٓــه شبــــٓــه بالشڪل والتصرفات وصديقه المقرب.
ڪان يتشاقى ويضحك واجتماعي حييل ڪلش اندمج وي مُــخلــد اللي يگول احس نفسي شايفهم ومعاشرهم من زمان.
ڪلش ماخذ راحتــــٓــه بينهم وهم محسسينه واحد منهم.
ويومين مرت مثل لمح البصر بين البيت وگعداتهم والتعلوله والدومنه والشطرنج اللي حبيبي ڪسبها بس خسر بالدومنه.
ونقاشاتهم وسوالفهم ممتليه فرح واني اشوفه ابينهم.
وبين الطلعات بالمدينه وجبل ازمر واول مره اشوف غالي گــــٓــلبي بدون الزي الرسمي.
طالع يجنن بالبنطرون الڪتان وبلوز ولفاف وڪوت طويل.
؏ گوله مهند اخذتله ستين صوره. وهوشيار يگولي هذا اختصاصي عوفي التصوير.
راح اسويلڪم اقراص وصور تعجبڪم.
رديت مشهودلك والرب.
ترڪت التصوير ورحت العب بالثلج واڪتب حروفنا.
واتذڪرت انس لماڪتب اسمي وعباره تدل ؏ غلاتي عنده من ڪان بالاردن.
وڪومــــٓــة صور اخذلنا هوشيار اني وحبيبي.
ساعات وڪٵنها ثواني من رجعنا مو حاسه بــ اي تعب طلعنا اني وياه بشارع الستين اراوي الاماڪن اللي مشينا بيها مره اني وخالو ارشد ومرتين ابو الحسن لما صورنا بالمطر اني ونور .
وهمات من سلمنا عليهم يگولون ما محسوبه. ونطلبڪم بعد زياره.
ورجوعنا صار عن طريق ڪرڪوك ومنها للدوز مرينا ؏ لجين. اللي ڪانت مريضــــٓــه وتعبانه نفسيا بسبب الظروف اللي مرت عليها.
بس هي تتقوى وتتصبــــٓــر وتگول الحمدلله ؏ ڪل حال.
گعدنا ساعات ذڪرنا اشياء مفرحــــٓــه وذڪريات حلوه.
وگالت الي قررت تقرا الڪتب اللي وصلهن الها اوس بعد ما نجحت الاولى ومشروعها الي ساعدها بيــــٓــه نال اعجاب استاذتها.
ومفڪره هالسنه تڪون معيده بجامعتها وبعدها تقدم دراسات.
تعذبت هواي وڪلنا ندعي الها.
ربي يجمعهم بحلاله و اوس يعوضها عن ڪل ايامها اللي عانت بيها وتعذبت ويستبدلها بفرحه وحبه الها ينسيها ڪل الالم بٵذن الله.
ورجعنا لبغداد اتشڪرته يگول ما سويت شي وعدت اعوضج عن ڪل دمــــٓــعه نزلت من عيونج الحلوه. وادعي ربي هالعوض يڪون من اوس لــ لُــجين اللي وعد نفس هالوعــــٓــد گدام ابوي.
ومستمرين بدراستنا لمادة الجراحة اللي حسيتها اسهل بوجود اوس اللي ناوي بالمستقبل دراســــٓــة هذا الاختصاص وخالو ابو الحسن.
وبنهايه هذا الشهر مهند ناقش اطروحــــٓــة الدڪتوراه.
عشنا وياهم يوم من القلق وشد الاعصاب والتوتر.
وبفضل رب العزه تتوج هاليوم بفرحــــٓــه بالنتيجه اللي هي امتياز.
وبعد اسبوعين ڪمل اموره بالڪامل بترڪيا ونوروا العراق.
وجدهم ابو غياث فرض عليهم يسڪنون ابيته وحلف عليهم يمين. ما يستٵجرون بيت.
اما يڪمل بناء القطعه اللي اشتراها او يشتري بيت ويسڪن بي. غيرها ماڪو و ما يقبل بــ اي نقاش.
وهذا اللي صار شحدهم يڪسرون ڪلمتــــٓــه ويفرحتي وتوٵمتي واختي وصديقــــٓــة روحي بيني وبينها اربع بيوت مو اڪثر.
وروحي صارت بــ موده وحرڪاتها وسوالفها الماســــٓــه صغيره وياويلهم اذا ما ڪل يوم ياخذونها لاهلي .
وشنو تعلق ابويه بيها ڪلش يحبها.
ومُـــخلــد نفس الحاله ڪلش يحب سوالفها. وهي حياله تغلي نفسها.
ومهند يگول يامن تعب يامن شگــــٓــى يامن ؏ الحاضر لگــــٓــى.
بنتي ياعالم يااسلام بنتي متقاسميها مُــــخلــد وعم مُــــخلــد. واني العــــٓــبد الفقير مفوض امري لله.
ويذڪر مُــــخلــد لما ڪان جايب الها ملابس فارســــٓــه وهي لابستهن وگايل اڪيد تصير فارســــٓــه خالها إلياس وٵني عمــــٓــها.
ومهند راد عليــــٓــه واني ابوها شنو مثلا حارس الاسطبل مالت خيــــٓــول عمها وخالها!!!!!!!!!
ومؤيد يزيده ويمثل هو مقهور عليــــٓــه ونفس حرڪات اوس لازم گلبــــٓــه يگول لاتذڪرني وجعتلي گلبي اني ڪل ما اتذڪر ڪلمــــٓــة مُــــخلــد حالك ما اتمناه لعدوي شلون حڪومتــــٓــك ساقطــــٓــه وما معتــــٓــرف بيك دوليا وهاي عود انت اڪبر منــــٓــه بسنــــٓــه.
حلوه سوالفهــــٓــم وخاتمها التعلولــــٓــه الماســــٓــه همست الي هي حامل وبعدها ما مبشــــٓــره احد واني اول وحده عرفت.
وسٵلتها ويبعدهم؟؟؟؟
گالت بالليل ابشــــٓــره وباجر اعتبــــٓــري الخــــٓــبر وصل لڪل محافظات العراق وستين دوله من دول الجوار.
هو لــــٓــح يريد طفل يگول ٵخ اخت انعم الله حتى بعدها تقدمين دڪتوراه.
واڪتملت الفرحه و؏ عطلــــٓــة نصف السنه زواج جود وطيبه. واجود واسيل بنفس اليوم.
وبڪل فرحه ادعي ربي يديمها علينا ويطعم الفرحه لڪل بني ادم.
الحنه ماحضرت لان حنتهن بالبصره. وصارت احتفاليه حلوه حنه للولد ابيت جدهم اڪيد احضر وافرح لڪل الاطراف. وهواي ضحڪنا ؏ سوالف مؤيد اللي يگول عن جود ضرب الســــٓــره ومغلس ما يستٵذن.
ومــــٓــره يگول ماخليت عرسي وياهم لخاطر مهند و مُــخلــد حتى يحضرون العرس.
والحفلــــٓــه اللي ابيتهم صارت ڪلش حلوه اتونسنا هواي وفرحنا لفرحــــٓــتهم.
ڪلهم غالين عندي ومن اتذڪر راح يڪونن البنات قريبات علــــٓــيه تزداد فرحتي.
اما العرس اللي صار ڪلش ڪلش حلو بقاعه وامي ومرام وزوجات اخوالي وڪرستين وآن حظروا الحفله .
اني حضرت متاخر البرنس اخرني ڪونه مايدخل الحفله.
مبدله ومكمله وهو گبالي يگول الي بــــٓــعد وڪت لاحگــــٓــه ؏ الحفلــــٓــه.
مافهمت عليــــٓــه فرحان لو شنو شعوره.
ومن سٵلتــــٓــه.
گال اڪيد افرح الهن وقسمتهن زلم معــــٓــدله.
بس صعبه طــــٓــلعــــٓــة البنيه من بيت اهلها.
شايل هم ابوي . جر حسرات وسڪت.
وبعدها گال ؏ الاقل مااشيل همهن مثل ٵنعام اللي همها ياڪل بگــــٓــلبي.
والمشكله ڪلشي ماافهم منها. ڪل مااتصل بيها تگول بخير ونعــــٓــمه ومن انزل البصره واروحلها اشوفها سلانه سل وعيونها مغرغره دموع.
زوجها والنعم منــــٓــه بس عيالها وسڪت ما ڪمل ــــ
وبعد حسرات گطعت انفاســــٓــه نهض لباب الصالــــٓــه رفع راســــٓــه ليفوك يستنــــٓــق ورجع گعــــٓــد ويفرك وجهه.
گال نار بگلبــــٓــي عليها من البارحــــٓــه لليوم بيها شي وما تگول بس اول وتالي اعرف شبيها.
شلون يگولها الڪلمات بقهر وحزن.
شگد تعجبني حنيتــــٓــه ؏ اهلــــٓــه وشايل همهم ڪلهم.
بقيت گاعده وانتظر رحمــــٓــة الله.
حن عليــــٓــه وگال ياله گومي اوصلج ومن وصلنا القاعه اتصل بــ ريان تطلع تاخذني.
دخلت اباوع لاسيل وطيبه وفرحتهن وجمالهن اميرات ماشالله عليهن. سلمت عليهن وبارڪت الهن.
ورجعت گعدت يم امي والبنات. وهديل تسولف عن حال ابوها من اجو من البصره وشلون مودعهن دمعت مااتحملت واني اتذڪر حال ابوي.
الله يعينه عمو اثنينهن بناته وشگد حنين هو وگلبــــٓــه طيب.
وانعام دمعت عينها وڪل شوي تنزل دموعها وتمسحهن بنتها وتبوسها وهي تبتسم بوجه بنتها.
بنتها تطلع بعمر يزن ابن انوسه. ڪلش حلوه نسخــــٓــة جدتها ياقوت. والثانيه تشبه هدوله. والولد اثنينهم يشبهون اخوالهم. واحد موجود والثاني من سالت عنه گالت بقا بالبصــــٓــره حسيتها تگولها بقــــٓــهر .
واقل من ساعتين اتصل مُــخلــد يگول عندج دراسه اني برا منتظرج. ونهى الاتصال قبل لا انطق حرف.
الماســــٓــه تضحك تگول اووووه نسيت اعلمج ؏ طريقتي. رفعت تليفونها مسويته وضع طيران.
تگول لان متفق وياي نفس اتفاقج واني حاسبه حسابي اعزل القاعه ؏ ايدي .
لو يجي جده الاغااا من البصره مااطلع اذا يگولون ثم الختام بالسلام الجمهوري.
ضحڪت ؏ سوالفها وطلعت واگول بداخلي شگد متلائمين سبحانك ربي.
ومحبوبين من قبل الڪل وجدهم ايڰول احتيا البيت بوجودڪم وصار بي روح.وڪلش يحب اطفالهم.
وڪانت دائما تگول مهند و مُــخلــد هواي اڪو تشابه بينهم بالصفات وبهواي امور. اللي لاحظته ڪلهم متشابهين بالصفات.
رجعنا للبيت والطريق ڪله ما نطق شي غير سٵلني عن انعام شلونها؟؟؟
رديت زينه الحمدلله.
وهو خلصها يتصل وماڪو رد.
رجع سٵلني تلفونها بيدها لو صامت؟؟
ليش ادگ عليها وما ترد؟؟
رديت ما ڪان بيدها تليفون. احتمال بجنطتها وما سمعته.
وبهذا الڪلام هو مستمر يتصل وماڪو رد واباوع مو طريق البيت.
انفتح خط وسلم. وصوت وحده ترد السلام وتسٵل شلونڪم وشخبارڪم.
سٵلها بــ استفهام ام عدنان.؟؟؟
ردت ـ اي وڪملت سلامها. وهو رحب بيها وسٵلها جايه وياهم. ؟؟؟
جايه انت لبغداد؟!!!!
ردت لا والله بس تليفون نعومه يمنا اجه وي مُبــين من جابته جدته من يم اهلك.
حلفها بروح عدنان شصاير؟؟
وليش مُبــين ما جاي وي امه؟؟
من شوڪت انعام تگدر تفارگ اطفالها مو عاد مُبــين اللي اصغرهم ومتعلق بيها.
گالت اسالها اخيي انت وهو تگول الك.
رحمه لروح اهاليتك لاتدخلني.
اني ؏ سڪنتها ويانا ما خلصت. يگولون انت حرضتيها علينا .
جانت مطيعه وتخبلت بسببج.
لح عليها هواي وهي تتعذر. وبعدين گالت من سڪنت انعام يمي وعمتها ما راضيه علمود الجهال تگول متعودين عليهم.
وتدري اختك تحير شلون تعلمهم وتفهمم وتدرسهم النهار ڪله وياهم وياهم.
وهي طلبت يجون يشوفونهم واحنه مو بعيدين جم بيت بينا وبينهم.
ماقبلوا ؏ تريد تحرمنا من ضنانا بحجة نرجس. ونرجس ما ضارتها. وهواي ڪلام.
وام ريسان صارت تجي تشوفهم وتاخذ مُبــين وياها تگول اعلمه علينا وانعام مو راضيه. وحقها خليها هي تسولف الك.
وريسان بينها وبين اهلــــٓــه. بس ما راضي ؏ تصرفات اهلــــٓــه.
الطفل من ياخذنه لحد ما يرجع ؏ بجيــــٓــه وحده وانعام نفس حاله. من يوم طلعت وگعدت يمي لليوم.
تخاف عليهم وحقها نرجس شاده حرابها انوب من سمعت تزوج وعد متخبله وگاعده.
تگول ڪلها عاشت حياتها الا اني دفعت الثمن.
والبارحه من الصبح وهن يتحضرن يتوڪلن لبغداد ام ريسان خلتها تصعد السياره واخذته منها.
وحلفت الها تجي ورا الظهر هي وابوه وگالت اجيبه الج عدها مراجعه لطبيب مفاصل.
ومن البارحه هو يمنا تگول نريده يتعود بدونها حتى ناخذه منها. اريد تتعاقب هي هم مو بس نرجس.
ومو راضيات ؏ ام نورس لان تختلف عنهن تگول حرامات رضعت حليبي عبالك ام مهند امها مو اني.
وريسان مايڪسر ڪلمــــٓــة انعام بس يعرف يعاقب نرجس حتى يرضيها مهضومه ؏ اهلها اللي عاشو حياتهم ڪلشي ما بيهم وهي ؏ البعد تلطم اهلي واخواني وامي.
صار يفور نار من گالت البارحه انعام اتصلت عليــــٓــه وسمعته يبجي.
اتصلت من تليفون اسيل هو يبجي وهي تبجي.
هاك اسمع صوته والله ياوليدي قحطان شايله ويفتر بيه ماله سڪته وابوه بايت بالميناء ما گدر ينزل.
بس من عرف خابر وتعارك وياهن وصاني بيه يگول انزل ويصير خير.
و مُــخلــد نهى الاتصال وياها بعد مااخذ منها ڪومــــٓــة تفاصيل.
لمــجرد سمعت صدعت الله يعينها شلون متحملــــٓــه.
اتصل ؏ هديل گالها انعام واطفالها خلي يتحضرون جاي اخذهم.
رجعنا للقاعه وشلون يسوق بسرعه جنونيه. ويستنشق بقــــٓــوه ويستغفر. ويضرب ؏ الاستيرن.
وصلنا القاعه هي طلعت نزل فتح الهم باب السياره صعدوا.
مشينا مسافه ياله سٵلها وين تليفونج ادگ عليج ماتردين؟
گالت نسيته بالبيت.
گالها وابنج؟؟؟
هي بجت بصوت يگطع الگلب وبناتها بجوا.
رجع ضرب ؏ الاستيرن بقــــٓــوه. متعصب حيل.
من يمي خفت ابتعدت لزگت روحي يم الباب.
وهو نار ويشتعل يگولها شلون مهضومــــٓــه وبالضيــــٓــم حالج وما تگولين؟؟!!
المن ابوج مخلفنا.؟؟!!!
التفت الها يصرخ ليش تبجين ليش تنزل دموعج واحنا سته وابوي وعمي رائد.
ليش اجيج لبيتج واسٵلج واحس بيج مهضومه وڪاتمه وما تگولين هذا حالي.
ليش ماتشڪين همج ليش شايله همومج بوحدج.
ولـﭻ غير احنــــٓــه سندج.
شوفي ڪثــــٓــرة السڪوت شلون خلاهم يتمادون عليج ويٵذونج.
وهي تبجي وتختنگ بالبجي. وڪلماتها مو مفهومه.
صف السياره صوت الشحطه مال التايرات يخرش. نزل بــ استعجال جاب الها مي من صندوگ السياره وصعد يباوع الها بقهر.
هي تبجي وترجف گالت اني شابعه قهر وشايله همڪم.
ليش قليل اللي صار بيڪم؟
منو منڪم ما اتٵذى؟
منو منڪم ماتعب ڪل هاي الشهور؟
امي وابوي وجدتي وانتو ڪلڪم.
اجي اني اڪملها واشيلڪم همومي.
اتعصب اڪثر ويعاتبها يگولها حاس بيج وافهم عليج واجيتج لبيتج وسٵلتج ليش تگولين مابيه شي بس مشتاگه لاهلي لان صارو بعيدين عليه؟
ليش ما شڪيتي لاـبوي ـ لو مختار لو حتى رعد اللي هو اصغرنا.
ليش هذا حالج شباقي منج انت وتشلين همومج بوحدج.
عرفت بڪلشي صاير وياج بس اريد اسمع منج.
بالگوه ياله حجت ياريتني ما سمعت حرف من ڪلامها.
التفت اله نار وتشــــٓــتعل ويگولها ڪــــٓــملي.
وهو تسولف عن نرجس شنو مسويه بيها وبــ اطفالها ياله انعام طالبــــٓــه منهم تطلع من البيت. وي ڪل ڪلمه تختنگ بدموعها.
ضغطت ؏ راسي صدعت واني اسمع الله يعينها شلون متحملــــٓــه. دموعي تنزل بسڪوت.
ٵلم گلبــــٓــي رجعني لحالي ومعاناتي من صحيت من الغيبوبه. وبقيت ايام وايام اعاني.
بنتها تگوله خالو گصت شعرنا وعضت مُبــين من ايده طلعت دمه.
وانعام ڪملت ڪلامها تگول من يدخل اخوها للبيت يدخلونها لغرفه وماتطلع ومن يطلع هي تنطلق.
وڪم مره يترك الشغل متعمد ويجي يلگاها تتعارگ وصوتها واصل خارج البيت.
ومن يعاقبها لو يمد ايده عليها تتعمد تصرخ بصوت بحيث الجيران تجينا ؏ صوتها.
تعب ومل ڪل الاساليب استخدمها وما فاد.
بعد مابترو ايدها وبعد ماتزوج وعد هي زادت اضعاف.
وامها واخواتها يگولن جننها ريسان من ڪثر ما عذبها. ما عدا ام نورس ماتحجي وياها.
اني ما داخله بيتهم من يوم طلعت منه وحياتي ماشيه ماعندي مشڪله غير مُبــين خايفه خايفه عليه.
تبجي بقهر تگول روحي من الدنيا هو متعلق بيه حيل.
ڪل مشاڪلنا بسببه وڪل قهري وتعبي وتڪولي ڪل يوم تسلين. اي والله مسلوله سل اخاف اخسره. اموت اذا صارله شي.
وريسان وعمي تعبوا حيل عمي انضرب جلطه صح تعداها بس صحته مو تمام.
وريسان شڪل عنده ضغط وانت شفت حاله يمشي ويستنــــٓــد ؏ الحيطان من القــــٓــهر. وشغلــــٓــه متعب حيل.
حاير بيني وبينهم. وعمتي جانت زينــــٓــه عليه وبحياتي ما صارت بيني وبينها مشڪله.
بس بعد زواجك احسها تنتقم مني بــ مُبــين.
گدام ريسان تگول متعودين عليه وما نگدر بدونه احنا هم اهله اخذه نشوفه ونرجعه وين ماخذته قابل. وصايره مثل جدي لا ريسان نطق ڪلمه تگوله ما راضيه عليك واني والده وتدعي هواي تدعي .
والي تگول ڪلهم عاشو حياتهم وبس نرجس اللي خسرت خطيتها برگبــــٓــه اخوها اللي عوقها حتى يرضي اهلج. ويرضيج.
ضــوگي شوي من لوعتها وتحملي ابنج يعيش بعيد منج.
اخذه منج لو عمري يوم واعيشج لوعــــٓــة فراگــــٓــه.
شنو حال مُـــخلــد لما تحجي عن حال ابنها.
يتگطع قهر. يمڪن لو گدامــــٓــه يمحيهم من الوجود.
وشنو حالها لما گالت مُـــخلــد اتخيل ابني صايره بي خوفه من ڪلشي.
اذا اي احد يلمسه يصرخ. حتى اخواته يخاف منهن.
قحطان راح يجيبه يگول شفت نرجس تدگ جفوف ايده بالابره وهو يصرخ جابه ونقاط الدم بـ ايده.
خابرت ريسان وسبحان الله جابها عدله هو ان قريب من البيت واجه شافه يصرخ.
وعمتي تحلف يمين قحطان يجذب ونرجس مريضه ونايمه ما طالعه من الغرفه.
وصلنا لبيت جدهم نزلنا تلگتنا ام مؤيد.
ومؤيد ڪان يرتب الڪراسي بالحديقه لرجعتهم.
اشر اله راح يمه.صار يمزح وي مُـــخلــد مايدري بنار گلــــٓــبه.
وبعدها اشوفه يلح يروح وياه ومُــخلــد ما قبل.
يگوله خمس دقايق ابدل واجيك ما قبل راح للسياره جابلي مفتاح البيت. حتى مالحگت اسٵله وين تروح.
يمشي بتعب احس مشيته مو بــ اتزان تبعته حس بيه وگف واتلفت ريگه ناشف بالگوه ينطق ورفع ايده لصدره حتى تنفسه صار بصعوبه.
گال بحنيه اجيب الها ضناها واعرفهــــٓــم حدودهم وافهمهــــٓــم وراها ارجال.
دمعت عيوني من ڪلمتــــٓــه گلت بس اجيب الك مي اشرب.
هز راسه دخلت بــ استعجال وجبت المي رغم ادري عنده بصندوگ السياره بس ردته يشرب گدامي.
شرب ويوصيني بنفسي.
وٵمنتــــٓــه ما يسوق ســــٓــرعه ويهدا. ابتسامته المتعوبه زينت وجهه الحلو وگال ان شالله رويحتي.
طلع والدنيا صارت غروب والجو صار بارد.
دعيت ربي يحمي ويحفــــٓــظه من ڪل سوء.
ورجعت يم انعام وعمتها ام مؤيد تستفهم منها ليش تبجي وشصاير؟؟
بعد ڪل هذا وهي تلوم نفسها متندمه لان گالت اله. تخاف عليــــٓــه من الطريق وتخاف من المشاكل.
تگول لحد الان عمتي ماناسيتها اله تگول مُـــخلــد يگول المفروض نرجس ما مزوجيها وتبلون الناس بحقدها المفروض مبقيها ابيتڪم وتعيدون تربيتها.
وڪل ڪلام گاله بعد الحادث يحسسهم بشناعــــٓــة فعلهم. رغم عمي وريسان گالوا فعلا وهذا الصح.
هي تعيرني بيه مُـــخلــد هيج گال و مُـــخلــد عيرنا ومااحترمنا هي طالعه من العمليه مالت بتر ايدها وهو يزيدنا قهر.
اسمع وازيد قهر. رجعت الزفه وبالي وافكاري ڪلها يمه.
الجو برد شوي دخلو للصاله. رن تليفوني ڪان هو وحسيت بتعبه من اول ما نطق شلونج ابويه انت.
يلوم نفسه يگول شلون نسيت اسالج اخذج لاهلج لو تبقين.؟
اني مضروب براسي انت ليش ماذڪرتيني.
گلت عادي ڪلش وين باقيه اني. بس بالي يمك.
گال لايضل بالج. وصاني اذا احد سٵلني اگول عنده شغل. اني وصيت مؤيد مااريد احد يعرف. ويضل بالهم وتخرب فرحــــٓــة البنات.
واذا مااتصل لايضل بالج مااوصيج بنفسج وسٵلني ؏ انعام يگولي خليج قريبه منها ولحي عليها تتعشى هي واطفالها.
رديت ان شالله.
قبل لاينهي الاتصال گال اخذي التليفون الها.
هي قريبه مني نطيته الها مااعرف شنو ڪلامه وياها وهي بس تمسح دموعها وتدعيلــــٓــه.
وتگول ان شالله.
اخذت الماســــٓــه ورجعت لبيتنا بدلت وهي تسٵلني عن انعام.
سولفت الها مختصر وهي تمدحها تگول مثل خالتي ام مهند ڪل همها تربيــــٓــة اولادها وشگد معتنيــــٓــه بيهم وشگد تحملت ماتشڪي لاحد.
وزوجها ڪلش يحبها وهو اللي رايدها من بعدها بالاعداديه اتقدم الها وبالبدايه ماڪانت موافقه وهو اصر عليها.
ومن اخذو اخته ام نورس لــ مختار شافها فرصــــٓــه تقوى العلاقات اڪثر. ومن ڪملت معهد ورجع اتقدم.
وقبلها ڪان اي شخص يتقدم الها هو يروح ويگلــــٓــه اني رايدها.
ومن اخذها ما مصدگ صارت اله وهي شلونها اسٵلي هيوم شايفتها قبل لاتزوج تگول نسخــــٓــة خالتي بڪلشي.
بس قدرها تڪون حماتها نرجس اللي ڪانت منغصــــٓــه عليها حياتها.
بس تحملت وما شڪت لخاطر زوجها وحبه الها.
اتذڪرت لما اني رحت للبصره وي هيوم وڪان يوم عرسها نفسه يوم ميلاد مُـــخلــد. والبدله مالتها اللي گالت مرشوش عليها طلاء اضافر.
ميس گالت اي غير هي نرجس اللي راشتها بيومها من حقدها لان شافت فرحــــٓــة اخوها وحبه لانعام.
عاد هيوم ما مقصره مختاره الها اجمل بدلــــٓــه.
وڪررت هالشي بفستان اسيل. حسبي الله ونعم الوڪيل عليها.
رجعنا لبيت جدهم بقيت يم انعام ولمــــٓــة البنات.
تليفوني بيدي اخاف يتصل. اباوع للساعه بالعشره ونص .
مابقا عندي صبر اتصلت عليه گال وصلت جبت مُبــين من يمهم واني ابيت اهلي. بس اڪو هوسه واصوات يمه. وهو گال تعبان ونهى الاتصال.
بقينا لوقت متاخر نمت يم البنات صحيت واسمع اصواتهم بس مابيه انهض دفيانه وازعج شي عندي هاي الفقــــٓــره.
سمعت صوته اي متٵڪده صوته واتٵڪدت اڪثر لما مؤيد گال لك هلا بذيب البصره.
وهو يسٵل عن انعام.
نهضت بــ استعجال ومسحت بــ ايدي ؏ شعري ارتبه لان منفوش. وطلعت.
فدواته بيده مُبــين نايم نطاه لانعام ويهمس باذنها وهي تهز راسها.
ونزل جنطــــٓــة ملابس ابنها من السياره.
سلمت عليه ابتسم بوجهي وگال جيبي مفتاح البيت ميت تعب بس اغمض عيوني انام.
وراح لــ مؤيد مااعرف شنو طلب منه اللي تذمر ويگول بالله اني شجاني ماتزوجت البارحه حالي حالهم وعريس ومحد يسخرني.
خوش لاگيها عليــــٓــه بڪلمتين بطل وبس انت گدها.
يعمي اني مو بطل ولا گدها خليت البطوله للابطال.
رجعنا لبيتنا وفعلا تعبان نام ساعه ومن صحى گال انعام راح ابقيها ابيتنا مااخليها ترجع للبصره الا اندمهم وادفعهم ثمن ڪل دمعــــٓــه نزلت من عينها.
اخليهم يحسبون الف حساب لو فڪرو مجرد تفڪير يٵذوها بحرف.
ابتسمت بوجهه وگلت شگد انت ڪبير بعيني اللي من يوم دخلت گلبي خليتني مااشوف الا انت.
وڪل يوم تڪبر بعيني اڪثر واڪثر.
واتذڪر احنا ڪانت جمعتنا مستحيله بعد هاي الظروف اللي اجتمعت.
بس دعاء احبابنا واعمالــــٓــه هو وطيبــــٓــه گلبــــٓــه ومحبــــٓــة الناس هي اهم اسباب جمعتنا.
اني ادري رغم هي ما محتاجــــٓــه ماديا بس مصرفها ڪل شهر يوصلها يم امها وتنطي الها .
وللعصر مؤيد جاب ڪنتور بابين. واجه هو والولد صعد المڪتب للبيتونه.
وخلو الڪنتور بغرفــــٓــة المڪتب. وراح جابها بــ ايده ويگولها هذا بيتج لان بيت اخوج واختج يعني بيتج.
تعيشين يمي معززه مڪرمه واطفالج حواليج.
دمعه وحده مااريد تنزل منج اذا الي خاطر يمج. اشيلج بعيوني ڪل عمري.
وشنو اللي صاير حتى يصير بحالج ڪل هذا.
فوگ جريمتها واجرامها تتعذبين انت.
اريد اشوف انعام القويه اللي ماتهزها ڪل المواقف.الذڪيه الفاهمه.
اطفالج متٵثرين باللي صاير وياج.
نسيهم هذا الشي بــ اسلوبج. وخلي الباقي عليه.
شارگه حلگي عليه وممتليه فرح واني اشوف حنيته عليها.
وخوفه واهتمامه وما گال شنو المسوي هناك اللي خلاهم ثاني يوم وڪلهم يمنا ويتوسلون.
وهو رد خليها ترتاح يمي ڪم شهر وبعدها نتناقش.
وزوجها انجن يتوسلــــٓــه وهو يگول بعدها ما ارتاحت ترتاح ويصير خير.
وهو رد عليه خليها اسبوع يڪفي ترتاح واجي اتفاهم وياك واني الممنون.
وفعلا سواها بعد ما طلعت سبعــــٓــة البنات ياله قبل يتناقش وياهم.
وخلال هالايام هو وياها وياها اذا هو واذا مهند.
يحيرون شلون يسحبون همومها منها ويرسمون بسمــــٓــه ؏ وجهها.
وهي شلونها نسمــــٓــه هاديه ومحبوبه ڪلش.
خلال هالاسبوع التليفونات ما بطلت ترن وهو يگول ما احد يتدخل.
وخاصه جده اللي اتصل وهو يعد ويصف ويسب وغلط ؏ مُــــخلــد ومهند وحتى عليها.
ومُــــخلــد بس يضحك واستفزه بضحڪـتـــٓــه.
زوجها ڪان وضعــــٓــه صعب واضح ڪلش يحبها شلون يتوسل مُـــخلــد وهو اڪبر من عمــــٓــره.
وعمها انسان فقير بس عمتها مذنبــــٓــه.
ومُـــخلــد حط النقط ؏ الحروف وصار يناقشهم بڪل اللي صار.
وحط شروط اطفالها ما يطلعون من بيتها اللي يريد يشوفهم مو بعيده عليڪم.
ويلــــٓــه وسواد ليلــــٓــه اللي يغثها بحــــٓــرف واحد.
الاسبوع اللي يڪون زوجها بالميناء هي تروح لاهلها وحتى لا تگول اني مشغول اخوانها موجودين ياخذونها ويرجونها.
حاسبهم لان حارمينها من الطلعه و؏ هواي امور.
وطلب منهن يگولون بشنو هي مقصــــٓــره وشنو ذنبها.
زوجها وعمها هواي مدحوها وخاصه زوجها. وصفها بــ اجمل وصف وفعلا تستحق.
وعمتها اتعذرت وبعد موافقتهم ؏ ڪل شرط من شروط مُـــخلــد.
استٵذنوه ياخذوها ويطلعون. ومُـــخلــد كررها يوصي زوجها ويگول لو متاڪد من غلاتها عندك ماارجعها الك ما يحتاج اوصيك.
عشيرتنا فاهمين بر الوالدين بالمگلوبي . برهم يااخي محد گال اعصيهم.
بس مالت ضناك يعيش وي مجرمه ومريضه نفسيه هاي ڪلش واگفه.
وهو تعهــــٓــد ما يزل قيــــٓــد شعره عن اللي گاله مُـــخلــد.
ويبين اله شنو غلاتها عنده.
وهم طلعوا يمڪن بعدهم بداخل الفرع. ومؤيد يگول اريد الڪنتور ماعليه مو اني جبته.
ماتصدگ شگد محتاجه.
مُـــخلــد گال اي اصعد نزله حلال عليك ورجع المكتب بمكانه.
دخلنا لبيت جدهم وامي اتصلت بشرتنا نور الدنيا ابن الحيد.
بدلت بــ استعجال واخذني مُـــخلــد اللي الطريق ڪلــــٓــه يسولف الي عن غلاة الحيد عنده.
ومتلهــــٓــف يريد يشوف ابنه ولما وصلنا وشفناه بالممر والطفل بيد ابوي يٵذن بــ اذنه. والعشيره ڪلها متواجده.
اللي وگفو لما وصلناهم. والحيد يگول يوم الك ان شالله ابو الاسد.
حبيبي يسلم وعيونه ؏ الطفل اللي بسم الله ماشالله. يجنن ربي يحميــــٓــه .
شتت نظري مااتحملت واني اشوفه لما ابوي نطاه الطفل وهو اخذه بين ايدينه بحذر يسمي ويصلي ؏ النبي وآل النبي.
بوسه من جبينه ويدعي ربي يجعله من الصالحين ضمه لگلبــــٓــه.
واني مااتحملت اڪثر سٵلت عن مرام ودخلت اتحمدالها بالسلامه حبيبتي.
سٵلتها واني اشوف امي وخالتي وام حسام يمها.
همات طلبتي العشيره مثل ولادتج بحمودي؟
گالت لا والله ما طالبت هالمره. هي اجت عدله احنه يم اهلي واجاني الوجع وبدون مااطلب اجوي وياي .
بقينا لليل بالمستشفى واجتي الماســــٓــه جابها مهند اللي يگول محتلين المستشفى.
وياهم اطفالهم. وموده اول ما دخلو الممر تنادي جدو واجت مسرعه واحتضنت ابوي اللي احتضنها ويگول يوم اللي تجي حفيده وياجن انت ورواسي
امي همست الي انوسه حملها مختلف عن اولادها الثلاثه. والباقي يم ربج وهيومه بيها بنوته ان شالله.
دعيت ربي يسهل عليهن ويگومن بسلامه. فدواتها هيومه اذا اجتها بنوته تشبه رواسي حتى تجنن احمد هي رواسي شمسويه بحاله بسوالفها وحرڪاتها وهو يلطم احوووو يانار گلبــــٓــي. ڪون عشره مثلج.
وهيومه تلطم. بصعوبه مرتبه امورها.
وڪملو اوراق الطفل اللي سمــــٓــوه عيسى مثل ما رادت ڪرستين.
مرام صحتها تمام الحمدلله. ومن طلعوها للبيت احنا رجعنا لبيتنا.
مرت ايامنا حلوه بوجود البنات وطيبه واسيل ودائما اللمــــٓــه تصير ابيت جدهم والماســــٓــه وسوالفها اللي تشبعنا ضحك.
ماتنلام هيوم من تگولها توٵمــــٓــة اوس وزوجــــٓــة مهند شلون تصيرين مثلا.
خالتي والحجيه صارن دائما ينزلن لبغداد ويبقن ڪم يوم.
والحجيه اللي ماشالله عليها مثل خالتي دائما صايمه تگول صحتي من فرحــــٓــة وليدي.
دام هو فرحان اني صحتي زينه. وهي شلونها حنينه عليهم ڪلهم بس هو اله خصوصيه عدها.
هو اني من صغري اموت ؏ جداتي واحب عطرهن. وشلونها جــــٓــدة مُـــخلــد محبوبه ڪلش وحنينه و ڪل ڪلمــــٓــه تنطقها بحڪمه.
يگول عنها سوالفها دافيه. من تجينا تحب گعــــٓــدة الشمس واني مااصدگ نڰضيها بالحديقه نتغدا ونڪملها گعــــٓــده للمغرب.
ويانا غاليــــٓــة روحي اللي يومي ما يڪمل بدونها.
موده اللي تجيني وڪتراتها بيدها تريد هواي ضفاير. وهاي همات تبعت طريق نور بتعلقها بيــــٓــه.
وعمها يحير شلون يدللها وابوها يگول بنتي ياعالم بنتي.
بيدي محاضراتي واستمع لسوالف الحجيــــٓــه الحلوه. واسوي ضفاير لــ موده. وابوسها مااشبع منها.
والحجيــــٓــه تمدح هواي بزوجــــٓــة عمهم رائد اللي شفتها مرتين بعد زواجها مبينه ڪلش محبوبه.
بس جيتهم يومين مو اڪثر و وعدو يجيون هالمره ويبقون اسبوع وياهم انعام.
اللي اجتنا وڪان واضح عليها اول ما شفتها متغير حالها للافضل.
مُــخلد ڪل ماينزل للبصره يمر الها ويطمٵن عليها.
وهسه تگول مثل ما گال يحسبون الف حساب قبل مايفڪرون يٵذوني بحرف.
اطفالي يمي يجون يشوفوهم يمي. بين بيتي واهلي واطفالي اللي ڪل اهتمامي بيهم.
وزوجي هو من البدايه زين عليه وما مقصر بس المشاڪل من الحوالينا.
اما رفل زوجــــٓــة رائد فعلا مثل ما وصفتها الحجيه ورده من الله. وڪلش تحب خالتي اللي مداريتها ڪلش.
تڰول بعد ما جدهم سمع ابوي ڪلام. واني ارفض اللي يتقدمون وابوي مو راضي ويذڪرني شلون ڪسرني وطعن بيــــٓــه بڪلامه.
هي جانت تجي وتگول انت ما منطيها للجد.
اللي رايدها يستحقها واني احطها بعيوني. هذا ابني اني ما عليك بــ ابوه.
وهواي وگفت ويانا.
وصار شهور من تزوجنا معاملتها الي تحسسني بنتها المدلله.
لا عجب والله منو ابوها ومنو امها. ابوها اللي وعد ابوي يعتبرني بمقام وحيدته.
وفعلا سؤاله عني وشوفته صارت جزء مهم بيومي.
اشوف بي جدو عبدلله بالحنيه والحڪمه.
شگد تعجبني شخصيته واحترام اولاده اله بهذا عمرهم ياخذون رٵيه بڪل صغيره وڪبيره.
وڪملت ڪلامها عن خالتي والحجيه وام طيبه وعلاقتها بزوجــــٓــة وعد وهديل.
وعن مدى سعادتها وراحتها ابينهم. وعمو ڪلش مو مقصر وياهم تگول احسه اب الي ولــ رائد.
اما حب رائد الها اللي تستحقه وتستحق سنين الانتظار ورغم الظروف اصر الا هي.
وسبحان الله اڪو هواي تشابه بينه وبين مهند ومؤيد بحبهم للاغااا. ــ
مره يحلفون بروحه ومره ينبشونها.
يگول خـــ رــب بروحــــٓــه وهو بگبــــٓــره ڪان هسه ابني بالمدرسه.
شگد حلوه لــــٓــمتهم ولدنا ورائد وي مؤيد واخوه واولاد اعمامه وڪٵنهم ڪلهم اخوه.
والفضل لله سبحانه وتعالى وثم جدهم ابو غياث.
اللي الاحظه يعامل رائد وغفار ومختار بحب ويحسسهم هو جدهم حالهم حال اسباطه ولد بنته.
وجودي ابينهم احس نفسي بين اهلي شگد اڪو تشابه بينهم وبين اخوالي.
ام مؤيد وام حسام الڪل بالڪل عند الجد وهالشي مو من فراغ لاااا.
لان هن منبــــٓــع حنيــــٓــه وطيب. شايلات هم ڪل العيلــــٓــه الصغير والڪبير.
اللي ماعجبه الاڪل ابيته يجي لام مؤيد يسالها شنو طابخه.؟؟
يحبون الاڪل من ايدها هي مربيتهم ڪلهم.
وزوجات حموينها يشوفنها اخت الهم واحترامهن الها يفوق الوصف.
الماســــٓــه تذڪرني لمن مره اوس غنى ــ
وشوگــــٓــهم نسمة جنوب وسيرت لاهل الشمال والعتب بشفاهم ود وحنين.. مدللين احباب گــــٓــلبي مدللين.
وبوڪته عرفنا مُــخلــد ڪان يم بيت احمد.
وانت لگفتي الڪلمات وگلتي ڪل الاغاني تلوگ اله.
گلت خليني ساڪته بوگتها تناقشنا عن عشگ اهل الجنوب. وما گلتي الي يبعدهم ڪان قابع بثنايا الگلب.
ضحڪت وگالت والله ما ضميت بس لان شفت الطريق طويل ومستحيل.
بس ماڪو عند ربج مســــٓــتحيل.
ضحڪت وتګول وين رجعنا اتذڪر سوالفــــٓــه وشلون ڪان مرابط بجامعتنا وبعد الزواج يگول علمودج.
ادري تصخنين اذا ماتشوفيني. لو تبجين اذا غبت عنج.
ورجعت تسولفلي من ڪانت خالتي عدهم بترڪيا بوقت ولادتها.
وعمو يتصل عليهم. يگولها ڪافي طولتي ومن يسمعه يگولها البيت ما يسوى بلياج.
هو ياخذ التليفون ويگوله بعد ماترجع وعمو يسبه ويشبعه رزايل يگوله لابوك لابو دراستك قحط الجامعات الا خارج العراق تدرس.
ومهند يگول صار اڪثر من سنه مااعترضت ؏ دراستي الا من امي اجتنا اعترضت.
اجت ام رماح وگالت العشا يمنا. ومهند يگول لاحظتوا مؤيد شلون شرگ حلگه.؟؟
وسٵلو عن موعد العرس. اللي ؏ الاساس الى ان تتخرج. ومره يگول بعيد لحد ما تتخرج وهي هسه مرحلــــٓــه ثالثه.
گال ؏ العيد ان شالله.
وڪملت تعلوتنا يم بيت خالهم ابو رماح. وباقي الايام يم بقيه اخوالهم ويمنا وبيت عيال ريان واهل ورود زوجــــٓــة وعد.
وباليوم اللي ڪنا يم بيت خالهم ابو اجود وڪلنا موجودين. جود ڪان يناقش ام اجود اللي هي استاذه بجامعته عن البحث. ومن موضوع البحث انطلقوا عن الروايه والشعر والنثر والشعر المسرحي و أحمد شوقي.
وبڪل هاي المواضيع توٵم روحي مشارك بالنقاش.
واني مفتــــٓــخره و؏ گولــــٓــة هيومه شارگه حلگي. والتفتت لــ ٵلماســــٓــه واگول الها شفتــــٓــي المثقف؟؟!
شفتي توٵم روحي شلون لــــٓــبق وشگد حلو يناقش.
بس ڪان هذا النقاش لاشي مقابل نقاشه هو وام اجود و اللي فهمتــــٓــه خلال هالاشهر من ريان اللي ﭼــنــــٓــة اخوهن ام جود وام اصيل.
ٵن هم عائليا عباره عن ثقافه ورقي. وفعلا هالشي شفتــــٓــه بــ ام اصيل اللي شفتها مره ومتشوقه اشوفها.
وصار نقاش ام اجود وحبيبي عن غابرييل غارثيا ماركيث وروايته مئة عام من العزلة. وهو يوصف الڪاتب بعبقرية اسلوبه.
وحاصل ؏ جائزة نوبل للأدب عام 1982 تقديرًا للقصص القصيرة والروايات اللي ڪاتبها.
وهي ڪلش معجبه برواية الحب في زمن الڪوليرا.
وتوٵم روحي عاجبته رواية الجنرال في ورطه.
واثنينهم اتفقوا ؏ اجمل قصــــٓــه قصيره قارينها اله هي حزينه ڪلش اسمها اجمل غريق في العالم.
والڪتب يجيبها ابوها. وبعدها رجعت لرواية مئة عام من العزلة. وهي تحجي عنها تگول سبع اجيال. شوقتني شوڪت اڪمل دراستي واقراها والماســــٓــه تگول باجر ابدي بيها.
وهي تگول اذا بديتي بيها ما راح تترڪيها الا تختميها.
بوڪتها ابوي جاب النا الروايه و قريناها اني ومُـــخلد وهو سبقني ويناقشني ويحرگ عليه سمعتها منــــٓــه قبل لا اختمها بالمجلــــٓــد.
وبعدها صرنا نستابق بقراءة روايات هالڪاتب والقصص القصيره اللي يڪتبها ابداع.
لو ام اصيل موجوده ڪان اتعمقت الڪم. بتفاصيل اڪثر هي قارئه اڪثر مني.
گلت ماشالله عليج ليش انت مقصــــٓــره؟؟؟
گالت لا ما اوصلها بالقراءه هي من بعدها يم اهلي اذا اگلج من السادس ابتدائي تقرا ڪتب.
و من تندمج بڪتاب تنسى حتى الاڪل وامي ترزلها.
وابوي محامي الدفاع وهي تگول مااريد اڪل الڪتب غذاء الروح.
ودخلنا بشهر نيسان اللي اول يوم منه تبشرنا من خالتي اتصلت تخبرنا وعد صارله ولد والحمدلله هو وامه بصحــــٓــه وسلامه.
وبعدها بــ اسبوعين انفڪت العُــــقد وانحلت ڪل الاشڪالات اللي ڪانت بطريق دڪتورنا الفنان.
واجمل فرحه ماتعبر عنها ڪل الڪلمات اختنا الرابعــــٓــه راح ترجع النا.
وتڪون رڪن مهم ابيت خالها اللي يشوفها واغلى من روحــــٓــه وڪل الايام اللي عاشتها بعيده عنا ڪانت غصــــٓــه بداخلــــٓــه عليها و؏ حالها .
ماترڪها ابد دائما يروح الها ويحسسها بغلاتها عنده بنته الرابعه اللي ڪانت تناديه بابا الى ان ڪبرت صارت تستحي منها وتنادي خالو.
حضرت وي اهلي حفلــــٓــة العــــٓــقد اللي صارت حــــٓــفله تجنن بحضور زوجات اخوالي والبنات وڪرستين وآن وخاله عنيده وهيوم وعيالها وجماعــــٓــه ڪرڪوك.
ڪل وحده من الموجودات عبرت عن فرحتها الها. وحبينا نعوضها الايام المؤلمــــٓــه اللي عاشتها.
بس اڪيد ڪلنا مو مثــــٓــله سندي الغالي العاشق الها اثبت حبــــٓــه بڪل ماتعنيــــٓــه الڪلمه.
مااحــــٓــلاه دڪتورنا لما دخل بــ اجمل طلــــٓــه بسم الله ماشالله ؏ جماله واناقته.
بعد العــــٓــقد مباشرا وصــــٓــل گبالها وهو يوعدها گدام ڪل الحظور. راح يعوضها عن ڪل دمعــــٓــه نزلت من عيونها عن ڪل لحظــــٓــه الم وحزن وتعب مرت عليها.
هي اختياره حبيبته اللي ڪل الظروف الصعبه اللي واجهته ما زادته الا اصرار عليها وحب الها.
هي اللي اختارها گــــٓــلبه وعقلــــٓــه وما ملت عينــــٓــه الا هي.
هي حبيبــــٓــه گلبــــٓــه وروحــــٓــه اللي راح يڪون الها العِــوض والسند والحبيب.
ونفس وعد الياس لــ مرام. والله والنعم من ولد محمد گالتها ام حسام وتبعتها بهلاهل تغطي ؏ صوت بڪائنا واحنه نسمع ڪلمات اوس الها وفرحتــــٓــها بالڪلمات. اللي قابلتها بدموع.
والموقف الاجمل اللي صار. وحبايبنا يحضرن الذهب والحلقات.
ومعدلتنا ام حسام مخبوصه دخلو ولدنا حسام الياس انس مصطفى مهيمن والحسن.
الموقف ما انساه لاخر لحظه بحياتي. جماليه دخولهم بقياده حسام ابن النجم ابن الحجي عبدلله الحسن.
والبقيه من بعده.
الهدوء عم الصاله لما وصلو گبال اجمل عشاق.
وگال لــ لُـجين. المتعارف عدنا اخو البنيه يشتري حلقــــٓــة الولد.
ربي يحفظهم اخوانج اثنينهم صغار بعدهم.
وانت ربيتي بينا واختنا ڪنت ولازلتي.
وصارت اشڪالات بينا منو اليشتري الحلقه. اني لو ولد اعمامي لو ولد عمتي.
ڪلنا اشترڪنا بشرائها.
لان ڪلنا اخوه الج.
وهنا نزلت دموع لُجين بغزاره ماتحملت ڪلمات حسام اللي بجتنا ڪلنا.
وامي ومنتهى زوجــــٓــة ابوها قريبات منها.
طبعا منتهى اجمل هديه من رب العزه لــ لجين وابوها.
انسانه مالها وصف حنيه وطيبه وعاملت لــجين وڪٵنها بنتها واڪثر.
ومااتحملت وهي تشوف دموع لجين هي صارت تبجي.
امي احتضنت لجين ومسحت دموعها تڰولها ڪافي دموع مااڪتفيتي ڪل السنين المضت.
بوستها تگولها شنو اتفقنا ويمڪن اوس ما صدگ استغلها فرصه هو قبل العــــٓــقد شلونه وانوب عقــــٓــد شرعا . وهو بالطريق يتحلف نعقد ونجيبها ويانا. وامي تگوله استر علينا وليدي.
اخذها لحضنه بوسها ويهمس الها وهي تهز راسها ابتسمت.
انوسه تگول سولف الها نڪته لو اغنيه.
خالتي عنيده قريبه منها وزوجات اخوالي. اللي يحبنها ڪلش من هي طفله يعاملنها مثل معاملتهن النا.
شنو ڪلامهن الحلو وياها.
وامي حضرت الذهب حتى يلبسها و الماســــٓــه اتصلت بخاله خلود وفتحت ڪام تگولها شوفي المشعشع اللي گلتي بس ڪلام وافقر منه ماڪو.
هي گالت وينــــٓــه فدوه لعينــــٓــه المشعشع.
شنو يسوي ما يصير مثل مهند سريع الذوبان في الماء بس دخل الصاله سحلج
بحظنه وانت شارگه حلگج.
الماســــٓــه تگولها تمام شوفي واحڪمي.
قربت الحاسبه عليهم سلمت بارڪت الهم وهو يگولها مڪانج خالي.
تگول اعوض بالحنه والعرس.
وبدا يلبسها الحلقــــٓــه والذهب والماســــٓــه تگولها شفتيي وخاله خلود تگول من حقــــٓــه. شيبوا گلبــــٓــه الله يشيب گلوبهم الطرفين عمامه وعمام ابوها.
الماســــٓــه تگولها يسمعونج عيب. وهي تزيد.
لعب جوله دڪتورنا وي ڪل قطعه ذهب يلبسها الها بوسها. من الوجنتين.
وهي تگلب الوان يمڪن تتمنى تختفي.
والاقوى بعد ما ڪمل تلبيس الذهب ذڪرها تلبسه الساعه ولما لبسته قرب خده منها.
هي خجلت وسحبت ڪف ايده وباسته.
فرحان ڪلش ويگول احسبو حسابڪم باقي لنهاية الحفله لو يجي جدي التاسع عشر ما اطلع من الصاله.
قفل تليفونه يگول خاف يخبثون عليه.
ويراويني حلقته يگول شوفيها تشبه حلقــــٓــة ابوڪم.
ڪانت بلاتين وڪلش حلوه. گلت اي نفسها تجننن.
يڪول عشيــــٓــرة زلم ياله جابوها.
وابو الفيڪات ماادري وين لگاها واني وهو والياس دفعنا فلوســــٓــها.
بس گلت اذڪرج عن الحلال والحرام واللي اعرفه سيادة الرائد يستحرم ما ياڪل حرام.
واني من فضل الله صرت صاحب عايله لازم بعد ماابذر حلالي.
فــ گلت ضروري اذڪرج گلتي اول ست شهور راتبي الك الله لايجذبني.
باوعت اله بنفس نظرته لما ما يعجبــــٓــه الڪلام.
وگلت بس اول شهر واتذڪر گلت لا مااريده محالله ومواهبه.
انتفض يگول والرب ما گايل والعظيم والعربي ما گايل.
اباوع لام حسام وخالتي عنيده وام مصطفى وام الحسن ناقصتهن بس ام هيا ويڪمل الجوبي شنو احتفالهن وشنو فرحتهن.
يڰول غير وحده تحس گاعد ؏ اعصابي وتسحبني اگابلهن بالجوبي بس اني اهز جتف.
ضحڪت وگلت مشهودلك والرب. ذڪرتني بعرس الحيد واغنيه بين العصر والمغرب.
الناس لازمه جوبي وانت وعبدالعظيم تهزون جتف.
گال ام عطوب ااااا اقصد زوجة الرائد انت سامعه اللحن بين المقاطع صار يلحنه متتت ضحك.
ترڪته وشارڪت البنات وحبايبنا بالاحتفال اله.
صارت الحفلــــٓــه تجننن وڰلت لالماســــٓــه روحي اسحبيهم ترا توٵمج ؏ اعصابه گاعد.
الماســــٓــه سحبتهم ابد ماتردد گولــــٓــة خاله خلود اجه ميه باللوفه.
يامحلاه الاحتفال بوحودهم ابينا فديتهــــٓــم.
هي تستحي بس وگفت بالوسط.
الا هو گابل الماســــٓــه الي ابدعت وايده بــ ايدها بڪل اغنيه.
ولا ڪٵنها حامل نست نفسها.
شنو الرقصه الحلوه اللي رقصوها ؏ اغاني قديمه ڪوكتيل لقاسم السلطان. لعب لعب الخضيري بشط. سحرني بطارف عيونه.
وبعدها شفته يمشي ؏ دجله لابس حجلين برجله وڪل الڪوڪتيل ڪانت اغانيه حلوه.
هيومه تگول الماســــٓــه درست ماستر بترڪيا؟؟؟
متاڪدين؟؟
لو فن الرقص بجامعه مهند. فعلا بدعت بدعت وڪٵنهم متفقين هي واوس ؏ ڪل رقصــــٓــه.
الحفلــــٓــه استمرت ساعات وهو مارجع لمڪانه و من راد يرجع خالتي عنيده وام حسام رجعنه يگولن ڪملها فرحتك وڪلنا فرحانين الك.
فعلا اشوف الفرحه بعيونهن الڪل ويحيرن بيا طريقه يعبرن عن فرحتهن.
واوس رادها من الله واجته من ام حسام والا خلصت الحفله ياله طلع.
بتنا يمهم ذاك اليوم ومُـــخلــد ڪل شوي يتصل يسٵل ويگول مشتاااااااق وبعدها يگول وحشتيني عدد ما خانني هذا البشر واڪثر وحشتيني.
اعشقها هالاغنيه واول مره سمعتها لما نزلها بمــــٓــنشور من ڪان ايفاد بـــ روسيا.
واتصل بــ اوس وبارك اله.ومتمني اله حياة مليــــٓــئه سعاده.
وباليوم الثاني رجعنا لبغداد.
بين البيت وتعلقنا بــ موده وتعلقها بينا والدوام اللي اڪثر من مره اخذتها وياي ابد ما تعبتني حرڪاتها تجنن.
بس المشڪله تمرضت وابوها يگولها انصابت بالعين وبعد ممنوع تاخذيها واڪل گلبــــٓــي.
وبعد اسبوع من رجوعنا وبيوم الإثنين2013/04/29.
واللي يسميــــٓــه هو بدايــــٓــة العمر. واول ما صحيت الصبح بارڪت اله واني اگول فديت اللي نور الڪون بهذا اليوم.
وهو يگول والاجمل من ڪلشي لقائتنا اللي تڪررت بهذا اليوم اجمل لقائين منقوشات بذاڪرة روحي.
والاجمل الاجمل الاجمل وجودج بحياتي ڪل ايامي ميلاد بوجودج.
ڪل يوم اصبح بعيونج الحلوه هو يوم عيد عندي.
وبعد ما رجعنا من الدوام گال نرتاح شوي ونطلع الجو ڪلش ارڪن السياره بڪراج ونمشي.
طلعنا قبل المغرب مشينا وايدي بــ ايده واني استمع اله.
اتعشينا بمطعم العريشــــٓــه وبعدها للڪورنيش اول ما دخلنا التفتت اله الابتسامه منوره وجهه.
گال مثلي رحتي لذاك اليوم؟؟
رديت اڪيد.
توقعت راح نستعيد ذڪريات ذاك اليوم. بس ماتوقعت راح يسٵلني بيومها اڪو ولد گال ڪلمــــٓــه وقصدج بيها. اتغزل اڪيد.
وام ياسر رهمتها وگالت يگول زي موحد شنو السالفه؟
بس ابد ما دخلت عقلي.
ضحڪت وگلت اي صح ڪلنا لابسين نيلي بيومها.
گال لاتراوغين شنو گال امانــــٓــة الله گوليها.
اريد اڪتم ضحڪتي مااگدر واني اتذڪر هيومه گالت الله يحبه ما سمعه الذيب.
لح عليــــٓــه وگلت ــ
گال العيون سالفــــٓــه.
حسيته ضاج وايده اللي ڪانت بيدي سحبها خلاها ؏ ڪتفي وقربني اله وگال تمنيت سامعه بلحضتها.
وڪملنا مسيرنا. واحنه نمشي وقربنا من دجله نطاني الهيتفون والثاني يمه وسمعنا.
اذكر يوم انا وخلي على دجله تلاگينا
گعدنا هناك ع الشاطي يا محلى ليالينا.
ومن وصل مقطع ــ
لو خلي يجي يمي لطش الورد في دروبه
واگوله گــــٓــلبي الصابر ابد ما ينسى محبوبه
گال واني اسمع هذا المقطع واستذڪر يوم تخرجي وحضورج والعباره.
اقسمت يمين اطش طريقج بــ اجمل الورود.
يا الله يا مُـــخلــد اجمل قسم ــ غير لحد الان صديقاتي بسيرتها.
اباوعلــــٓــه مبتسم گلت سرقتها منك يالله يامسك.
واعشقها بصوتك.
رفع حاجبه بحرڪه تاخذ العقل وگال تتهنين بيها ابويه انت. اسريقها هي بقت عليها.
گلــــٓــبي سرقتي وختمتي بــ اسمج وڪتبتي لافتــــٓــه ممنوع الدخول.
من ڪنت بالاعداديه من برامج التليفزيون ڪانت تستهويني فقره بعد الاخبار حدث في مثل هذا اليوم ويذڪرون الاحداث المهمه والعام.
واليوم نستذڪر حدث في مثل هذا اليوم من عام 2004.
ضحڪت گلت بس لا تريد تذبها براسي.
گالها بجديه. لايڪون عندج رٵي ثاني اڪيد انت اللي طرقتي الباب عليــــٓــه وابتدا العمر.
ضحك لما گلت اختك هيوم تگول عنك ولد صايم مصلي زاهد عن الدنيا وملذاتها هموم الاغااا مڪفيته مايعترف بالحب وسنينه وقافل گلبــــٓــه.
لاعب بــ احوال احمد وحاتم اللي حبوا.
واجيتي انت ــ والبقيــــٓــه انت تعرفــــٓــه لان ؏ گوله مهند ستين مره عيرتوني.
يگول فعلا وهذا الصح.
صعدنا العباره وسمعنا اغنيــــٓــه يدك التي حطت ؏ ڪتفي ڪحمامــــٓــة نزلت لڪي تشرب.
رن تليفونه اڪثر من مره ڪان يبتعد مني ياله يجاوب.
شڪيت بشي وطلع شڪي بمحلــــٓــه لما رجعنا للبيت وشفت الصاله والتحضيرات واهم شي علبــــٓــة الشطرنج وياهن.
سمعته لما اتصل ويگول عاشت ايدج وصوت الماســــٓــه ردت عليــــٓــه تدلل.
نها الاتصال ومباشرا رن تليفونه رد ڪان صديقــــٓــه.
واني صعدت وافڪر شنو البس دخلت الغرفه شفت بوڪس فتحته فستان يجنن.
رفعته يبووو عزااا بعين العدو ؏ گوله هيومه ڪلش غير مستور.
اتصلت ؏ الماســــٓــه قبل لا اسلم هي تضحك.
سٵلتها عن الفستان اختيار من؟؟
گالت والرب زوجج اني عبد مٵمور.
صدگ ذواق عم اولادي.
وڪلش طالعــــٓــه عينها مثل شيخها تگول الولد صارف دم گلبــــٓــه بس ردت اسالج انت بعدج تبوسين بس وحده لو تطورتي.
بس اني متاڪده مو وحــــٓــده تلميــــٓــذة امرؤ القيس بعد.
گلت روحي الماســــٓــه هي تلام هيوم من تگول خريجــــٓــه من جامعه الشيخ مهند.
سبحت ولبست الفستان ونزلت بعده يتصل من شافني ابتسم ويگول للولد من رخصتك اجونا ضيوف واني الطم ؏ خدي.
رحمــــٓــه لروح جدك اي ضيوف هاي اللي تجيك والساعه قربت لمنتصف الليل.
ضحك من ڪل گلبــــٓــه ويگول معذور والله من شفت الجمال فقدت عقلي.
وما ؏ المجنون حرج.
هو اني سديته حتى ماسمعت شنو گال بعد ما گلت اجانا ضيوف.
انتبهت للشمــــٓــعه رقم تسعــــٓــه اللي يگول عن الرقم تسع سنوات لدخولج لحياتي ڪــ حبيبــــٓــه.
والڪيكه مڪتوب عليها التاريخ وابتدٵ العمر.
اما السهره اللي هو ڪان بطلها العاشق المُتيــــٓــم.
تضاهي سهرتنا واجواها بيوم السبعه.
ويگول عنها لازم اجوائها تتخلد بالذاڪره.
بعد عناء ثمان سنوات والتاسعه صرتي ملڪي وملڪــــٓــة مملڪتــــٓــي.
واڪيد ڪتبنا ذڪرى مشترڪه بخــــٓــطي وخــــٓــطه.
وڪملها اجواء السهره اللي صارت اجمل من سهرتنا بيوم السبعه.
قال ـــ
ماذا سيحدث لو تقاسمنا السهر عيناك لي، ولك القصائد والقمر.
قالت ــ
أنت حبيبِي وصوتك أغنيتي.
وأسمك قصيدتِي.
وعيناك سفري.
وطقوس عشقــك فصول روايتي التّي لن تنتهِي.
إني أعشقك لليوم للغد
للعمر الذي لا يرد.
فــ ٵنت وحدك من سكنت قــــٓــلبي تــــٓــهيم فيه وتستحل نبضاته.
الا يڪفيكَ هذا؟؟
ام تريد شيئا بعد؟؟!
قال ـــ
وتسألني ماذا أريد منها ــ
هل لي بكأس خمر من شفتيك او شيئا من خصلات شعرك الناعم.
هذه الليلــــٓــه سنؤدي طقوس عشقنا على أكمل وجه.
وأتقرب إليك أكثر بترانيم هيامي و تراتيل انتمائي سنقيم ولائم عشق في عرس اللقاء ســـ أشهق زفرات احتياجك حتى اختنق بكِ .
ومن بعد هاليوم مستمرة سلسله الايام الحلوه والاتفاق ؏ حفلــــٓــة التخرج. والزي للحفلــــٓــه واللون واني ڪاتلــــٓــه روحي اريد اللون النيلي.
وصار اتفاقهم ؏اللون الاسود واني ضايجه ومو عاجني.
ورقاء تتمازح تگول ڪلــــٓــه بيد سرمد اطلبي منه. ويغير ڪلشي.
ڰلت تغيرون ماتغيرون اني البس نيلي تضامنا وي سيادة الرائد.
يبقى تحبوني تتضامنن ويانا واذا ما تحبوني. سويت حرڪه بعيوني اتوسلهن.
مناهل تغني فرحنا واليحبنا يفرح ويانا ويتضامن ويانا. ماادري ليش گلبي يگول باسل راح يحضر حفلــــٓــة تخرجي لان سٵلني اڪثر من مره بس هو بالموصل.
اني والبنات گلنا ينزل اڪيد وهي تگول خلي يغيرون الزي نريد زيتوني تضامنا ويانا.
بين ضحڪه وسالفه وتصنيفهن اللي ما يخلص وخاصه ورقاء بعد ما تڪمل تڰول استغفرلله ربي اني بشــــٓــده ما بعدها شده. وهي شـدة الامتحانات.
نادوا علينا ڪلنا متعاجزين ندخل للقاعه وميساء راحت ورجعت النا بــ جملــــٓــتها الشهيره البشرى ياقوم. ماتجيبها الا بنت ديالى.
البشرى يامسك. تم الاتفاق ؏ اللون النيلي.
الله يبشرج بالخير گلتها واني فرحانه.
واجه هاليوم اللي ڪان من الايام الجميلــــٓــه والمميزه بحياتي.
بحظورهم اللي الهم الفضل بڪل ايجايبه وڪل نجاح وڪل انجاز وڪل فرحه بحياتي هم سببها .
سندي وقوتي عمقي وكوكبي قمري وشمسي وجنتي ضلعي الثابت الذي لا يميل انتم.
ربي يحفظهم ويديمهم الي وما يحرمني منهم ڪل حياتي.
ويرزق ڪل بنت بسند مثلهم.
يفرحتي لما حضرو ابوي وامي رغم وقتــــٓــه قليل وطلع ڪان عنده شغل بمقر الشرڪه بالبصره.
والاب الروحي شمسي اللي مالي حياة بدونها.
سندي اخواني واولاد اخوالي رفــــٓــعة راسي وفخري.
اجوني ڪلهم بلبس رسمي نيلي ـ يالله ياجمالهم.
اما الهيبــــٓــه وتوٵم روحي وتاج راسي اني اللي حبيت حظوره بزي الداخليــــٓــه النيلي والتاج ؏ اڪتافه.
هيومه واحمد والماســــٓــه ومهند.
وسن واسمى وانوسه ومرام.
و؏ گولــــٓــة صديقاتي باقي احد من العشيره ماحضر؟؟؟
اجمل اللحظات تتخلد بذاڪــــٓــرة الروح بوجودهم حواليــــٓــه ومشارڪيني فرحتي.
هواي مواقف مفرحــــٓــه وحلوه صارت اليوم.
ومثل ما توقعنا حضر باسل حفلــــٓــة التخرج وفرحــــٓــة مناهل صارت فرحتين.
اما نبيل الطالب الخلوق صاحب الصفات الجميله اللي وصل خبر لــ ورقاء يريد يعرف رايها بيــــٓــه واذا وافقت. الاسبوع الجاي اهلــــٓــه ينزلون للغربيــــٓــه ويطلبوها من اهلــــٓــها.
مااريد اگول مفاجٵه وهم اثنينهم يمتلڪون صفات ما شالله.
بس اڪو شخص اتعڪر مزاجــــٓــه ؏ الاخر وهو يسمــــٓــع هالخبر.
عزيمــــٓــة الغدا ڪانت ؏ حساب الاب الروحي واني گاعده بين مُــخلــد واوس اللي ماترك موقف مضحك ما ذڪرني بيه.
يغني خلصت والشده عبرناها. ويحسبلي بعد شگد واتعين. والراتب شگد. ويذڪرني شلون درسنــــٓــي واخذت من وقته الثمين اللي مو ملڪه ملك الجماهير.
وختمها يگول الله يرضاها سرمد زعلان عليه.
عاد اني ڪلشي ولا زعلــــٓــه گلت ولاتهون انطيك بنتي.
عاد تراضينا وعاشو عيشه سعيده.
گلت الحمدلله من ختمتها بصلح.
الاب الروحي قدملي هديه ڪانت ؏ شڪل هرم مثلث بڪل وجه من اوجهه الثلاثه صوره.
الاولى اني ڪنت بالروضه وهو ڪان ماخذني وياه للجامعه نفسها جامعتنا و؏ ڪف ايدي فراشه.
الصوره الثانيه بالمستشفى ولابســــٓــه الاﭖ ڪوت مالته والسماعه بــ اذني وهو گبالي افحص گلبــــٓــه. فدوات لعيونه مبتسم شگد حلو وشگد غالي.
الصوره الثالثه بملابس التخرج بعد ما امي ڪملتهن الي. وهيوم لحت لبسيهن اخذلج صوره بحديقــــٓــه اهلي .ام ياسر الغاليــــٓــه الها بصمــــٓــه بڪل فرحه.
ڪلش عجبتني واني ادورها واباوع الصوره الفڪره تجنن تشڪرته الغالي.
واڪيد ماتخلــــٓــى ڪل لحظاتنا من توثيقها وهذا اڪثر شي احبه.
هيومه ڪاميرتها بيدها وتصور. گالت هوشيار طلب احوله هو يصمم قرص واني اصمم قرص.
اڪيد هو راح يبدع اڪثر.
رديت وانت مو اقل منه تجنن افڪارج فعلا متعددة مواهب.
وبعد العزيمه ما رجعنا للبيت ڪملنا بجلســــٓــه تصوير يم نفس المصوره اللي صورتنا بالبدله وهو ڪانت رتبتــــٓــه نقيب.
باقي ابالها بحيث بارڪتله الترقيه وتگول وجهها خير.
يگولها هي الخير ڪله.
واختارت النا لقطات ڪلش حلوه. واتفقنا تسوي مثل البوم العمر.
قالت ـــ
ِوِلد الحب في قلبينا بصمت تآلفت ارواحنا.
هكذا يولد الحب الصادق حين رسمتك شهريار زمانك.
ونبض باسمك قلبي وخلدك حبيبي وحامل لواء قلبي فارس متقدم قوافل جيوش حبي ونبضات عشقي فأنت فارس ضياء حد السيف لست غازي لأغادر ولا مستبي مكلل بأكاليل الغار قبل ان يغزو.
قال ـــ
احببتها وأعلنت عليها الاكتفاء فــ هي العمر والبقاء وهي الحياة. وهي وطنٌــــٓــي الآمنٖ الذي لمَّــــٓــني بعد الشتات.
يتبع ـــــ
وئام الشيخلي,,,,,,,, 💞