ركضت ادگ بالباب طلع عمو مهيب تعلگت برگبتة و گلت
-عمو الوسيمممم
هو بادلني الحضن و شالني و گال
-بهلا بذكية عمها هلا بروح عمها
دخلت لجوة و لگيتهم كلهم موجودين همه و نسوانهم و زعاطيطهم يبو شيخلصنا اليوم شاورت عمو مهيب
-كون يرحون و تبقى انت
-اسكتي لعبوا روحي حچيهم كله اترفع هذاك و هذا صار كذا تگول نسوان
قهقهت بخفة و نزلت جنطتي و رحت اسلم عليهم واحد واحد ، بديت من الكبير للصغير اول شي عمو حسيب هذا رجال شكبرة الله يطول بعمرة ، مسح على راسي و گال
-شلونچ بوية
ابتسمت بلطف و گلت
-بخير عمو بشوفتك
-لسان عطيات ههههههه
سمعت ضحكة بابا العالية ، شگد بابا يحب ماما بحيث من يسمع بأسمها تشوف عيونة تلمع
رحت لعمي الثاني و اسمع عمي حسيب يگول لبابا
-هاي منك و من عطيات مرات اشوفك بيها و مرات اشوف عطيات
سلمت على عمو جبر هذا يخوف خزرة منه تخليك بعد ما تخلف ، گال بصوت خشن تگول گاعد يتعارك
-مجاوبة ولچ مو ؟
بلعت ريگي
-اي عمو الحمدلله
ضحك هو بصوت عالي يربي تگول قاتل متسلسل حط ايدة ورة ظهري و حضني
-ولك هاي من هي و صغيرة تخاف من عندي و لهسه
ابتسمت ابتسامة مجاملة و رحت لعمي الثالث عمو اديب هذا تحسه من كثر ما بريء تستحي تحچي ويا
-ها بعد عمچ شلونچ سباعية انتي گدها و گدود
-عمو حبيبي شكراً متسبعة بيكم ، زينة الحمد لله
هز راسة مبتسم و گال
-دوم يارب
ابتسمت و رحت لبابا حضنتة و گلت
-باباتي
همس بأذني
-روح ابوها و حياتة
رحت لعمو مهيب اخر العنگود
-وخر انت ما اسلم عليك توني سلمت
-شوف الادب شوف الاخلاق استحيت
-عمو حبيبي وخر خليني اروح لغرفتي كرهت هاي الهدوم مال حرگ
هو عض شفتة و گال
-عليمن طالعة ولچ صاكة
-شوف عمو گدامك گاعدين اربع ضباط شوفهم هسه احچي عليك يكمشوك هنا يبسطوك
-شوف شلون تحچي وي عمها ترى هذول اخواني قبل ما يصيرون عمامچ
-عمو ترى الفرق بيني و بينك كله يطلع تسع سنوات
-اهخ اسكتي ولچ لا تحاچيني بهاي السالفة
-هههههههههههههههه
رحت لغرفتي لبست كيلوت اسود عريض و تيشيرت اسود و فواگا قميص ابيض خفيف و طويل ، صح انا مو محجبة بس دائماً لبسي عريض حتى گدام ابوي و اخوي
شلت شعري كباية مخربطة و حطيت عطر و نزلت عبرت من البراني الي چان بيها عمامي و رحت للصالة هناك نسوان عمامي كلهم اف هذني شيخلصهن ، ادور بعيني على تغاريد ، اجت ركض اليه شبگتني
-شلونچ لچ
-وخري تغاريد
-يوه گلبت خلقتها
-حقيرة چلبة لا تخابرين لا تسألين
-ملتهية اسچ
-سچاچة ام اربع عيون ولي عني
رحت اسلم على زوجات عمامي عندكم عمي جبر متزوج اثنين و النوب خاطب الثالثة و عمي حسيب متزوج وحدة و مطلگها و رجع تزوج الثانية ولا تگول رجال رجلة و الگبر ، بس عمي اديب و بابا متزوجين وحدة و متورطين
سلمت عليهن گعدت يم امي و گالت خطيبة عمي جبر
-بتچ حلوة الله يحفظها
-حبيبتي عيونچ الحلوة
جاوبتها امي
انا ابتسمت و همست لماما
-وين غزيل ؟
-بغرفتها تعرفيها
هزيت راسي و بدن هنه يحچن و انا و تغاريد نعلق عليهن ، قطع حديثنا سؤال خطيبة عمي
-شراح تقدمين ؟ على يا جامعة يعني
-والله خالة ما ادري بعدني ما مقررة الله الكريم على المعدل
شو هاي فتحت عيونها بعصبية گالت
-و خلخالة شنو هازة كاروكچ اني
رفعت حاجبي و هاي حركتي المعتادة
-عفوا ؟ گلت شي خطأ ؟
-اي گولتي شي كولش خطأ
رفعت حواجبي و صافنة على اللهجة هاي شجاي تحچي
-ك و ل ش ؟
گلتها ببطئ
-عيني خالة ام اركان شوفي بنتچ
-خالة !
-اوي اسكتي عني
اجيت اريد احچي خزرتني امي ، درت لتغاريد
-هاي صاحية ؟
-اهخ ولچ من اجت لهسه و هي بس تعلق راح اگوم انتفها
-ايع شو ما تستحي هاي من كل عقلها شفتي شلون تحچي ؟
-اي ولچ اكيد فرت راس عمي فر
-يا فرتة هاي اذا ما ساحرتة والله شكلها مال هيچ
-اسكتي هو عمچ جبر دينة النسوان تگول ما شايف بحياتة متزوج اثنين و خاطب الثالثة
-والله يربي
-شنو مدفع عندك
-عزا ولچ عيب لا تنطلقين
-اسكتي شبيچ والله شنو ثلاثة ششايل مدفع لا و النوب عندة ولد شكبرهم بطولة و احفاد و بعدة يريد يتزوج و يكمل النسل
-بس اسمعي لا تنكرين هو عندة رجولة و كاريزما يخرع الواحد
-هاي هو وي العالم العادية هيچ لعد وياهن شيصير والله يمكن يطلع سا....
سديت حلگها بيدي و گلت
-كافييي لجج لا تدوسين زايد حميتي
-يوه تستحي وخري اشوف فيروز وينها تحب هيچ سوالف
-روحي لفيروز روحي
راحت تغاريد هاي فالت لسانها ولا تستحي و اجاني قيس هذا يصير حفيد عمو حسيب
-زمهرير هذا عمو مهيب يريدچ
-گلة ما بيها حيل تگوم
هز راسة و راح ، اخذت انا كيك اكل ورة شوية اجة و گال
-زمهرير يگول تجي لو اجي اكسر رجليها
خزرتة و هو خاف
-هو يگول مو اني والله
-گله تعال اشوف شلون تكسر
راح و بعد ما رجع ، شوية و دخل عمي مهيب بحذائة للصالة ماما شاطت روحها گامتله و گالت
-مهيببببب حذائككك
-وين بتچ العايقة
كمشت ماما اذنة
-ولك مهيب كل مرة تدخل بالحذاء فتيت گلبييي ولكك هاي جديدةةة
-احنا شلون بالمرة العجوز وخري اريد بتچ
-اهخ گلبي لا تمشييييي
مشة هو على السجادة الجديدة يمكن ماما انجلطت ، تقرب يمي و جر كبايتي
-بت الحلو مو صارلي ساعة اگلچ تعاي لازم تخليني ادخل
-وخر ولك كلهم يباعون
-انچبي ام لسان زفر
همست و گلت
-خليني محترمتك لا اطلع سوالفك
هو فلت شعري و مسح عليه و گال
-حبيبتي زمهرير الحلوة بت اخوي الجميلة صاحبة العيون الخضراء تعالي وياي شوية
هزيت راسي راضية و رحت اريد اطلع اشوف ماما تهز لمهيب راسة و ايدها بمعنى اصبرلي ضحكت عليها و هو خطية وجهة صار اصفر طلعنة و گالي
-اگلچ الخيزرانة مال فليح بعدها عند امچ ؟
ضحكت بصوت عالي و هزيت راسي
-اي بعدها
-لا بروح ابوچ احچي صدگ
-اي بعدها شبيك
-احلفي
-يوه وخر ليش اچذب
-ولج هاي امچ چانت تلحگ وراي بيها و تضرب ظهري لهسه الوجع بعظمي بس لا تسويها
متت ضحك انا كمشت ايدة اسند روحي اريد اسكت ماكو
-انچبي لا تضحكين مرة ضربتني على علباتي بيها اسبوع كامل امشي صفح و من اسبح اعوف علباتي ما اغسلها صارت سودة من ورة امچ
گلت مختنگة
-كافي حباب فدوة اهخ بطني
-حقچ حقچ ما مجربتها
-كافي عمو شتريد مني دوختني
-تعاي العبي ويانا
-يا عمو صدگ تحچي شلعب ما تشوف المعدان كلهم يمك اذا طبيت انفضح ترى عمري ١٨ مو ٨
-اول شي هذول ولد عمچ عادي ثاني شي لو تصيرين سبعمية وخمسين تبقين ذيچ الي تلبس حفاظة و تمشي
-بعد عمو بعد حطلك مايك و صرخ بعد ما بقو احد ما درى استر عيبة اخيك بعدين الله يسترك وخر اروح يم النسوان هاي خطيبة اخوك ودي اكمشها اگطعها بسنوني
-ختولي هاي من شافتني لهسه تخنزر
-شتخنزر
رفعة شعرة بحركة ثقة
-معجبة
-اوي استقر
-انچبي لج مو بعينچ ؟
-شو شوية اشوفك
ابتعد عني و هو يسوي حركات عود باعي حلو
-شوف انت حلو تدري ليش ؟
-ليش ؟
-لان تشبهني نفس شعري و نفس عيوني يالله خاف تطلع انت ابوي ؟
-من ارگعچ بكلة هسه
-لا صدگ عود ليش
-مو امچ من حبلت بيچ چانت عدنا و انا چنت مگابلها و گاعد انتظرچ فصرتي مثلي
بديت اصفگ و ضميت شفتي عود متأثرة
-والله عمو من كثر ما ذكي استحي احچي وياك
غمض عيونة و اشرلي بيه عود روحي
-روحي منا زمهرير روحي
-اوي عود ميتة عليك
اجيت جاي اروح و سمعت صوت مال قوس يبو هذا الغثة يصير ابن عمي جبر نسخة من ابو سبحان الله من شابه اباه فما ظلم
-ها شجاي تسون هنا
جاوبة عمو مهيب
-شتريد لك ؟
-شكو عمي علكيفك شحچيت
-انچبي و روح منا لا اطلع
-هسه شبيك شگد تحچي
فتح عيونه عمو مهيب معصب تقرب منه شالة من بلوزتة ، هو بنية عمامي كلش چبيرة يعني ضخام كلش اكيد ضخام اذا كلهم ضباط حتى جدو الله يرحمة بس عمو مهيب كسر القاعدة و صار استاذ جامعي
-ويامن تحچي لك ؟؟ شنو اصغر اخوتك انا ؟ تحترم لا ادوس عليك افتهمت هيلگي ابو النسوان
دفعة عمو و هذا قيس صوفر
-عمي مو قصدي شي ب..
قاطعة عمو و هو يصيح
-اش ولا حرف يلا راويني عرض اچتافك
راح قيس
-مهيب : ادبسز كلب اصغر اخوتة انا و هيچ يحچي وياي
-شنقصة شو خوفتني بعد ما احچي وياك
-انتي مالچ دخل شما تحچين احچي
تقدمت شبگتة و بستة بخدة
-عمو الوسيم حسنة عمامي
-بعد بعد اصبغي
-احبك والله
-بعد روحي اموت عليچ شسمة زمورة حبيبتي
-عمو حبيبي
-اريد شامية بروح ابوچ
اشرت على عيوني
-من هاي العين قبل هاي العين
-بعد عيوني
رحت للمطبخ و هو راح لغرفة اركان يلعبون بلي هو و المعدان الباقين ولد عمامي ، گعدت اسوي و منتظرة تصير اجت تغاريد
-راح نروح احنه
-يا ليش
-بابا گال كافي ثگلنة
-عمو اديب شحلاتة يول
-والله حتى انا تعبت توني مخلصة امتحانات
-صدگ شلونچ
-زينة عيني بس انتي يحتفلون بيچ
-ابوي عزمهم والله
-ادري يلا باي
طلعت و انا تنهدت يربي هاي بس لا غارت ، انا و تغاريد نفس العمر بس الفرق بالأشهر هي اكبر مني ، اغلب الاهتمام الي دائماً زمهرير و زمهرير ، هي اشطر مني و اعترف احلى مني و دائماً احسن مني بكلشي ، يعني هي چانت درجاتها دائماً اعلى مني بس الانظار كلها عليه
بس ولا مرة حسيتها غارت او ضاجت مني بالعكس دائماً وياي و تدعمني بكلشي اسوي ، هي جمالها مو طبيعي ، سمرة بس سمارها يكتتللل و عيونها عسليات و شعرها سرح يعني من كثر ما سرح القراصة مرات توگع من شعرها
من الاشخاص المقربين الي ، قاطع تفكيري ريحة غريبة يبو بس لا احترگت الشماية
فتحت الگدر لا والله زينة ما احترگت ، طلعتها و صعدت لفوگ لغرفة اخوي ، دگيت الباب محد يفتح ، رجعت دگيت سمعت صوت عمو مهيب يگول تفضل ، افتح الباب لو اموت ما ادخل
ضليت ادگ و ادگ ازعجتهم ، فتحلي اركان اول ما فتح عيط بوجهي
-خبصتييينااااا
خزرتة انا حطيت الماعون مدري الطاسة الي بيها الشامية بأيدة و انا ما اباع بعيونة ، حقير شلون يصرخ عليه گدامهم ؟
عفتها و نزلت لجوة ، تنهدت و گعدت يم امي و هذني بس يحچن و يسألن و انا اجاوب على گد السؤال و مرات ابتسم و اغلس
ورة شوية للغدة تغدوا و طلعوا ، گولوا من البداية جواعة عليمن صلبتونا حتى ما نمت الظهر ، بس طلعوا نزلت غزيل سابحة و مشسورة و معطرة
-حقيرة غزيل عفتيني وحدي
-ويع لو اموت ما ابقة يم مجموعة النفاق هاذي بس لك لك لك
-اههخخ هنيييالللجج
-يلا روحي نامي و انا اساعد ماما
تقربت يمها و جعصت وجها بأيدي بحيث شفايفها برزت
-اختي الصغيرونة الحبابة الحلوة اموت عليچ
دزيتلها بوسة بالهوا و صعدت لغرفتي ، سبحت و كفشتي بقيتها و حطيت راسي و نمت ، گعدت على ايد تلعب بشعري حسبالي ماما جاي تمشطة فأستمريت بنومتي
بعدين حسيت واحد ضربني على راسي گعدت مخترعة
-اسم الله اسم الله
-شكو شكو منو دخل يمه الحگينيينينيننييييي
ما حسيت بس على واحد حط ايدة على حلگي
-شهرتيناا ولچ انا اركان
درت عيوني شفتة اخوي الكلب صفگتة براجدي من الخرعة
-حقير مطي ابو نص دماغ اكو واحد يدخللل هييججج و نوب تضربنيييي على راسيييي حسبالييي انهدممم البيييتت
-صارلي ساعة و نص اگعد بيچ ما تگعدين زمهرير يموعدة اگعدي زمهرير يابة اگعدي ماكو فاتحة حلگچ شكبرة و تشوخرين
اشرت على نفسي
-هاي اني اشوخر ؟؟؟ مو انت اذا فتحنا الباب عليك تگول مولدة عطلانة
-انچبي كافي اهخ خرب يومچ مو ايد ساطورة حسيت سني تحرك
كتفت ايدي و گلت
-شتريد مني هسه ها شتريد اطلع برة ما اشوف وجهك
رجعت حطيت راسي على المخدة و غطيت روحي حتى وجهي طلعت بس خشمي ، خف صوتة و گال
-زمهرير
لا رد
-اختي الحبيبة
لا رد
-والله مو قصدي اصرخ عليچ بس چنت العب و انت خبصتينا بس تدگين افتحي الباب ليش تدگيها و خسرت بالمباراة من وراچ
لا رد
-لا حبابة شو باعيلي
-عوفني اركان نعسانة
-والله ما اخليچ تنامين زعلانة گومي اصالحچ يلا اخذچ لأي مطعم تردي يلا
-ما اريد عوفني
-اسف وداعة عيونچ الزرگ مو قصدي
-فشلتني گدامهم
-لا تخافين عمچ مهوبي لعب بيه طوبة رزلني رزالة غسل لبس
-اطلع اركان نعسانة
-لا تتنعوصين و گومي شنقصة شحچيت هسه
درت وجهي اله و ربعت متعصبة
-يعني صرخت عليه گدامهم و رفعت صوتك عليه انا ابوي ما مسويها اركان محد يرفع صوتة علية انت ليش هيچ سويت و النوب كلهم يباعون عليه فشلتني گدامهم و انا اتفاخر بيك اخوي ولا مرة رفع صوتة علية هيچ تكسرني ؟
-حقچ على راسي بعد ما اسويها ولا ارفع صوتي بس لا تزعلين ما اتحمل زعلچ هو بس انتي و غزولة عندي شعندي غيركم لا مرة و لا زعاطيط اموت عليچن اثنينچن لا تزعلين مني يلا و صالحيني
مد اصبعة الصغير عود مصالحة ، ضحكت انا و شبكت اصبعي و گلت
-اذا عدتها بعد اضربك بوكس
-بكيفچ يابة گدامچ
تقربت على خدة و بستة
-اسفة والله مو قصدي اضربك بس اخترعت لا تزعل مني و اذا تريد اضربني
-شضربچ حتى ابوچ يعتقلني اسبوع شو وخري اروح انطمر و انتي هم نامي
-اي والله فد نعسانة
رجعت حطيت راسي نمت مباشرة من التعب ، ما ادري ورة شگد و گعدت شبعانة نوم اخذت تلفوني من جوة المخدة شفتها ب٣ الصبح يا عزا هاي شگد نمت
نزلت للصالة ظلمة و محد موجود كلهم نايمين ، دخلت للمطبخ جوعانة اريد شي اكلة كلها بس فواكه عمي حطولكم دولمة تمن فد شي
فتحت الثلاجة لگيت جبن ، اكلت جبن و خبز من الجوع يمكن خبزتين اكلت ، خلصت رتبت الهوسة الي سويتها و صعدت لغرفتي
دخلت اخذت تلفوني و گعدت اباع مسلسلي لا ساعة و لا ساعتين ، فوگ خمس ساعات انا گاعدة اباع المسلسل ، شفت الساعة صارت ب ٧ الصبح ، سديت التلفون و حطيت راسي اتگلب اريد انام ماكو
گمت من الفراش و رحت لميز الدراسة و طلعت دفتري ، بديت اتذكر طفولتي ........
-بابا بابا
-ها حبيبتي
-بابا البارحة انطتني ست لانية ولقة لياضيات ( رانية ، ورقة ، رياضيات )
-اي شگد ؟
-عشلة من عشلة
شالها و باسها من خدها
-بنيتي الذكية فدوة اروح الها
گمز اركان من مكانة و گال
-بابا و انا انطوني درجة العلوم
-اي شگد ؟
-خمسين من خمسين
راح مصعب لاركان و طلع خمستالاف
-اعرف بنيي ذكي هاك هاي هدية
گال اركان و هو يبدع ايد ابو
-شنقصة بابا ما اريد فلوس كافي انت فخور بيه
باسة ابو من راسة و گال
-اخذها بوية
اجت زمهرير و گالت
-و انا هم اليد
-هههههههههه شگد تردين
-كيفك
-هاچ هذا الف
هزت راسها و اخذت الالف ، اجت امها علگت مطارتها على رگبتها ، و انطت الجنطة مالتها لمصعب ، شال اركان جنطتة
ركضت زمهرير تريد تفتح الباب ما يفتح راحت لابوها
-بابا افتح باب ما يفتح
-اجيت بوية اجيت
فتحلها الباب و گال
-تفضلي اميرة زمهرير
ضحكت و صارن خدودها حمر ، باسها ابوها بخدها قوي
-اروح فدوة لليستحي
اجة اركان و فتح عيونة من لگة اختة بالصدر
-بابا انا اكبر منها و انا الولد شتسوي هاي بالصدر
-ولد ولا بنت ماكو فرق اگعد يمها
-لا بابا شنو هاي بطلت اروح مشي
-زمهرير : تعال الكان يمي
-ما اريد
-تمام انا الجع ( ارجع )
گمزت من الصدر لورة و غندبت
گعد اركان و صاح الها
-تعاي زمورة بحضني
هي فرحت و گمزت حظنه و هو شبگها و باس خدها
-لا تزعلين مني
هزت راسها و گالت
-ما زعلت
باوعلهم ابوهم و هو مبتسم على جهالة شلون يحبون بعض
وصل زمهرير ووراها اركان ، الظهر حَلّو من الدوام وگفت زمهرير تنتظر ابوها ، شوية و اجة خذاهم وصلهم للبيت
اول ما وصلت راحت بدلت هدومها و اخذت اكلها مال الصبح و اخذت من الغدة و الالف الي انطاهيا ابوها و ركضت تريد تطلع
كمشتها امها
-وين رايحة ؟
-العب ماما العب عوفيني
-ويامن تلعبين
-ماما عوفيني اليد الوحح
-زمهرير !
-ماما عوفيني عولتيني
-لا الا اعرف وين ترحين
غرغرت عيون زمهرير بالدموع
-العب والله
-ويامن تلعبين اركان نام و صديقاتچ نايمات انتي ويامن تلعبين ؟
-اكو ولد اعلفة بالحديقة العب وياه
-منو ؟
-ما ادري واحد حباب
-زمهرير تعرفين الكذاب الله يحاسبة ؟
-ماما ما اكذب انا
-يلا روحي بسرعة و تعاي لا تتأخرين
هزت زمهرير راسها و ركضت للفرع الي بي تيم و هي تگول بنفسها
-الله انا ما كذبت راح العب ويا لا تعاقبني
وصلت لتيم لگته منتظرها هو بس شافها گام
-جبت لك لفة جبن و لفة لحم منو تحب
هو يباع الها و ما جاوبها
-و هذا ماي و جبت خيالة و جزلة
حطتة گدامه و راحت گعدت بمكانها تراقبة و هو ياكل ، خلص هو شرب ماي
-خلي نلعب طوبة
هز راسة بلا
-حباب ما اليد العب وحدي
باوع بعيونها ، هز راسة ب أي و گام وياها هي گمزت و صفگت ، مدت ايدها حتى يكمشها هو باوع لأيدها و ايده شاف الفرق بينهم ، رفض يلزمها و مشة گدامها ركضت ورة و گالت
-ليش ما اكمش ايدي ؟
ما جاوبها
-انت ليش ما تحچي ؟
لا رد
-اسمع خلي نلعب غميضان انا لاح البد و انت الگيني خوش ؟
هز راسة ، غمض عيونه و هي ركضت لبدت جوة الزحليگة ( زحليقة ) ، خلص العشرة و فتح عيونة يدور عليها ، مرت خمس دقايق و هو يدور و ما يلگي
اخترع حسباله عافته و راحت ، ضل يدور بشكل سريع و هلع ، دور بكل مكان حتى جوة الزحليگة بس هي چانت ناعمة فما مبينه
گعد بالگاع و حضن نفسة خايف كأنوا فقد امه و شي عزيز عليه ، سمعت صوت مناشغتة ، ركضت هي و حضنتة ، گالت و هي تمسد على ظهرة
-انا هنانا لا خاف انا يمك
هو شافها و بدة يبچي اكثر
دفعتة هي و طاح بالگاع ، انصدم منها و كأنوا چان ما متوقع تسوي هيچ ، هي غندبت و حچت بعصبية
-انت لجال ، و اللجال ما ابچي ، انا ما لحت بعيد و حتى لو لحت انت لازم الگيني مو اگعد تبچي ! ما احبك اذا بس تبچي صيل قوي ( انت رجال و الرجال ما يبچي انا ما رحت بعيد و حتى لو رحت انت لازم تلگيني مو تگعد تبچي ! ما احبك اذا بس تبچي صير قوي )
گام هو و مسح دموعة
-انت ما لازم تبچي ما احب شوفك انا هيچي ، لازم صيل قوي و تحميني حتى اذا ضعت الگيني خوش ؟
هز راسة مؤيد كلامها نزل راسة خجلان
-لا استحي مني بس لا تبچي گدام احد حتى يشوفك انت قوي انا احبك و ما اريد احد يشوفك يبچي
رفع راسة باوع بعيونها الخضر و هي ابتسمت بلطف و گالت
-تعال مرجحني
ركضت گعدت بالمرجوحة و هو بدة يمرجحة ، صوت ضحكاتها ملة المكان ......
سديت الدفتر بس ما حسيت عيوني انملن ادموع ، وينك يا تيم اتمنى اشوفك مشتاقلك اتمنى تكون بأحسن حال اكو شي جواي يگول انت بعدك عايش و ما ناسيني جاي احاول قدر الامكان ما انساك