تجارة مع الله

بارت (35)

#تجارة_مع_الله
بارت (35) بقلم يـاسـة

طالت والعمر كل ما تلف بي يطول
غم ذاك العمر من ينگضي تعلعل

( عريان السيد خلف )

🌿🌿🌿🌿🌿🌿🌿🌿🌿🌿🌿

دخلنه للعمارة بقينه نمشي قرابه النصف ساعه
يله وصلنه البيت عمتي دخل رسول السيارة بالكراج  نزلنه منها واني گلبي يوجعني من القهر
وين صفه الوگت بيه وين صرت ليش هيج مكتوب عليه الذله شـ صار لو إخواني بيهم غيره و گلبهم بيه محنه ورحمه على أختهم

دخلنه للبيت أستقبلتنا زوجة رسول تطلع نهاية
العشيرينات ومعانيها كلش مرتبه

وسن  :  يا هلا بالجاينه نورت العمارة

براء:  منورة بيكم أشكرج

ضحگت وگالت

-- هل اگول عمتي نستنه وما سألت بعد بينا اثاري
مگابله الگيمر وگاعدة

رجعت باستني وباست عمتي و اخذت ريحانه من ايدي ودخلتني بالصاله بس گعدت هي راحت بسرعه جابت مي واجت

ماهر: اذا غداج جاهز صبي ترى براء ما متغديه

وسن : اي من عيوني سويت الكم مطبگ سمج دقايق واصب

راحت للمطبخ وماهر ورسول تمددو بالصاله تعبانين ما نايمين عمتي نفس الشي خلت ايدها جوه راسها وتمددت عليها بقيت بس اني كاعدة صافنه على نفسي هاي اني شسويت عود صدگ عفت بيتي واجيت يعني هسه اني ابقى بيت العالم شكد اريد أبقى وشلون اعيش أني وبنتي بحظك وبختك يا زيد عساها بهذلتي تطلع بعافيتك

بعدني گاعدة وايدي على خدي نزلت ابنيه من الدرج تطلع أكبر من وسن تصير زوجة باقر ابن عمتي ساهرة عمتي ساهرة عدها 3 ولد ماهر الجبير وبعده باقر والزغير رسول

أنغام : ها عمه شلونج

عمتي گعدت وردت عليها

_ هلا بيج عمه شلونج

دنگت على عمتي باستها ورجعت باوعت عليه

أنغام : هلو براء الحمدلله على السلامه

براء :  هلو بيج الله يسلمج

كملت سلامها وراحت ويا وسن بالمطبخ دقايق وفرشن سفرة الغده وكلهم التم من بعد ما صاحوا باقر يجي يتغده ويانا باقر مبين عليه تعبان وشعره مليان شيب صح ازغر من ماهر بس ماهر ما بيه هيج شيب شيبه كلش قليل هذا لا اللي يشوفه يگول هو الجبير

هم بدوا بالغده وعمتي گامت تجيب وتخلي گدامي
واني ما أشتهي ابد بس وگلت ريحانه مالي نفس الشي احس اللي سويته غلط حتى لو هو ما مطلگها وبعده يتواصل وياها بنفس الوقت يبقى عاقد عليه يعني مرته وطلعتي بدون علمه غلط وأكيد هسه يتخبل بس يسمع وفوگ هذا كله ماهر هو الماخذني وهم ما صار كم يوم من تعاركو

كملنه الغده والبنات لمو السفرة عمتي گامت وگومتني وياها بغرفتها دخلت للغرفه بيها قرويله زغيره وكنتور ابو بابين وبوفيه مال فرفوري جوه  وفوكاها فراش منضود جرت فراش من النضده وفرشته الريحانه

اجيت نومت ريحانه على الفراش وعمتي هم  نامت
بقيت بس اني خالة راسي بين رجليه وابجي خنگ
محد يحس بيه محد يفكر بيه شكد ما رائد يحبني اني احبه اكثر بس ما اگدر اتحمله طبعه صعب مزاجه مكروه و أني مالي خلگ اگعد ادري مشاعر احد واتجنب اعصاب احد احس بنفسي مريضه اللي مريت بيه صعب العشته محد يگدر يعيشه طفله وحايره بطفله انضربت هواي ونغدرت هواي سمعت كلام مستحيل وحده تتقبلة جعت ونجويت فقدت السند الوحيد الجان مخفف عني فقدت طفلتي التعبت بحملها صح ما شفتها بس احسها تلجم گلبي كل ما اذكر شلون تتحرك بطني تساومت على شرفي و زوج صديقتي الحسبته اخ الي  بيوم من الايام حاول يعتدي عليه وفوگ هذا كله الوجع اللي يصيبني واني أشوف بنتي تكبر كدام عيني وهي محرومه من أبسط حقوقها محرومه من المشي ومن الكلام

كل هذا اللي عشته سببلي عقد نفسيه ما اگدر اتخلص منها بين ليلة ويوم احتاج احد يحتويني يطلعني من الماضي الغيرني وغير طبعي وسلوبي رائد صح يحبني بس ما يعرف يحتويني ما حاول يصادقني ويكسبني اله مخلصها تصنيف عليه اعرف بيه يحب يشاقيني بس مو كلشي شقه يحبني حب تملك كون كلشي اليريده اگول سمعاً وطاعه اني بالاصل جنت مخلصتها سمعاً وطاعه لذلك ما اگدر اتقبل ارجع اطيع واني ساكته يحبني بــ انانيه كون لا اطلع لا اشوف احد لا اضحك لا اسولف ويا احد يريد بس يمه اضحك واحجي

بوشني بدون ما يمهدلي الموضوع دفعه وحده هاج لبسي هاي العباة وهذا النقاب شكد ما احاول اكبر عقلي وأعبر ارجع اضغف ما اتحمل بعد
مرات اگول ميخالف اعوفه يحجي وحده ويسكت المهم ما يكبر الموضوع بس ما اگدر تحملت بما في الكفايه كل التعب التعبته بالماضي جاي يأثر على حياتي هسه ،، بعدني ابجي دخلت وسن بيدها جاي الي والعمتي

وسن : يا عمتي نامت

مسحت عيوني بسرعه ورديت

براء : اي خطيه تعبانه

_ هذا جاي جبتلج وما دام عمتي نايمه راح
اشرب جايها

_ بالعافيه

_ يصير اگعد يمج لو تردين تنامين

_ لا ما انعس تفضلي گعدي

اجت گعدت مقابيلي وگالت

_ما اريدج تستحين ولا تفكرين ابد هذا البيت بيتج واحنه الخطار

_حبيبتي تسلمين الله يحفظكم

_اني مثلج تزوجت بعمر زغير رجلي اللي اخذته طلع سكير وابو بنات جان يگومني بكتله و يگعدني بكتله بحيث ما يضربني بيده ولا بحزام كله بصون وبوري حديد

_عزاا هذا رسول هيج يسوي

_لا مو رسول يروح فدوة الرسول هذا زوجي الاول

_الله يساعدج

_المريت بيه ما اتمنى بيوم من الايام تمر بيه أبنيه فقدت طفلين بسبب الضرب لحد ما بيوم طگاني بماعون وشگ ايدي عاد بيومها طلعت بلا عباية بالشارع هجيت وراها اطلگت منه و رحت گعدت بيت اهلي لا ام ولاب يتيمه من الصفحتين عشت تحت رحمه نسوان اخوتي صح اخواني ما أذوني ولا قصروا بحقي بس عظم بني آدم ثكيل على البشر مرات احس وجوهم تكثل ومرات احسهم مبتلين بيه بس ما يگدرون يحجون لان نسوانهم جانت تكرهني ولليل نهارهم يحجن براسهم عليه

_الله يعينج

_ يعين الجميع فدوه الاسمه ربي ما عافني وحدي
وعوضني عن كل الشفته من رزقني برسول حتى لا جنت اعرفه ولا يعرفني أمه شافتني بعرس كرايبنا وخطبتني اله وتزوجنا وصار عدنا ثنين ولد وهسه حامل بالثالث

_الله يجبر خاطرج ويعوضح بيهم كل خير

_ويعوضج ببنيتج وتشوفينها تركض گدامج

_آمين يارب

_لا عبالج اكو واحد مرتاح ترى كل واحد همه شكل بس الناس عايشه وقابله بقدرها صح انتِ تعذبتي وتعبتي بس لا تنسين حالج احسن من الف ابنيه على الاقل انتِ عندج بيت بـ أسمج وعندج راتب حتى لو قليل بس هم نعمه وعندج عماتج يحبنج ويكتلن سلف عليج وعندج السيد

حجت هيج وضحكت

_هههه اهم شي السيد

_اني ما جنت اعرف شي عليج كل اللي اعرفه
بنت اخو عمتي ومحد الج وهي بقت يمج هسه من اجه ماهر صار جم يوم يله عرفت بحياتج والاهم عرفنا السيد هههههه

_شعرفتي على السيد

_العرفته واحد نار وشرار وبايع العالم ومشتريج بحيث زالغ ماهر زلغه متوبه عمر

_ههههههه هو عصبي شويه

_ ويغار شويه هههههه

_ لا والله يغار هواي مو شويه

_الما يغار على عرضه لا خير البيه

_ صح بس مو بهاي الطريقه

_ وياج اني لازم تصير الغيرة بحدود بس بنفس
الوقت هذا دليل على انو  هو يحبج

_ الحب مو كلشي الحياة اذا مابيها احترام وتفاهم ما تكمل

_صح الصح وبنفس الوقت الحياة اذا مابيها تنازل ما تكمل

_ بزواجي السابق تنازلت هواي وتأذيت هواي ما عندي استعداد اخلص عمري كله أتنازل شوفي ما انسى ولا انكر افضاله اللي مغرگتني صارلي اخ واب وسند باصعب ظروفي بس هو ما عنده تفاهم ايده والضربه اني انهزمت من الضرب والاهانه ارجع من جديد للضرب والاهانه اني انهزمت من الخيانه والغدر تالي ارجع للخيانه من جديد شفت بعيني كلامه هو وزوجته ورقمه مسجل أبو أبنيتي

_هههههه وانتِ صدكتي وزعلتي وهجمتي بيتج
ترى كلش سهله هاي الشغله هسه اني اسجل على رقم اختي اسم براء واروح  ادز رسائل الروحي واكلهم هاي براء تراسلني

_عوفي الاسم هسه و الاسلوب نفس أسلوبه بالضبط

_ نسيتي هي جانت مرته ومعاشرته سنين اكيد تعرف اسلوبه

_ وكلام أمها

_اكيد تحجي هيج قابل تخابرج تكلج بتني جذابه هنّ متحسفاته مستعدات كلشي يسون بس حتى يرجعنه

_خلي نفسج بمكاني وتجيج هيج رسائل تگدرين
تحللين وبررين

_ لا اتخبل والله بس بنفس الوقت اسمع المقابيلي

_الوضع الجنت بيه ما جان يسمحلي اگعد أسمع جنت هسه طالعه من المستشفى طالعه من صدمه حادث بنتي عقلي جان ما يجمع ولا يفرزن ولا يحاول يتقبل جنت بفترة ضغط نفسي وجسدي
وفوگ هذا كله قبلها جانت هي بيته وفتحتلنا الباب بملابس البيت يعني كل هاي الاحداث تجمعت بنفس الفترة

_الله يساعدج و يلوم اللي يلوم هسه أبقي هنا فترة ارتاحي وفكري زين وهو هم خلي يفكر زين وخلي يشتاق الوجهج هذا الجنه گيمر العيد

_ من طلعت واجيت هنا جنت بحاله ما أگدر افكر بيها جنت مقهورة مافكرت بالموضوع ردت بس اشرد منه لان ادري ما راح يعوفني راح يبقى كل شويه يجي بس هسه من گعدت وحدي وشفتها صارت صدگ عرفت جيتي هنا بدون علمه غلط وراح يتأزم الموضوع اكثر

_هاي عوفيها عليه

_شلون

_نسوي خطه

_خطتيش

_نخلي السيد ما يزعل

_شلون

_اول شي نتأكد اذا مرته تجذب لو تحجي صدگ
وراها نباشر بخطتنا

_ياريت تطلع جذابه اذا صدگ هو هيج مسوي
ومخطط اموت والله

_جذابه وداعت ابنيتج جذابه بس اني اريد اطلع جذبتها وتشوفين برأته گدام عيونج حتى يرتاح كلبج وبنفس الوكت تصيرلج عبرة وما تخلين احد يدخل بينانكم ويهجم بيتج

أبتسمت على كلامها وگلت الها

_بيج هواي من كلام عمتي

_عمتج بنتني من جديد عمتج اللي علمتني عليه أمي ما معلمتنيا جابتها وياي ومن الصفر للعشرة هي تعلم واني احفظ لحد طيحت ابنها وگام ما يگدر يگوم بعد

_هههههه الله يحفظكم ويبعد عنكم بنات الحرام

_اي والله يبعد بنات الحرام هجامات البيوت
هسه خليني أگوم وانتِ ناميلج ساعه

عافتني وگامت رحت تمددت بصف ريحانه
ما حسيت على شي بعد لحد الليل فزيت محد موجود لا عمتي ولا ريحانه لبست حجابي وطلعت بقيت اباوع من باب الغرفه أستحي أتقدم أكثر بعدني ما متعوده عليهم أسمع صوتهم بالصاله اخذت نفس وتقدمت يمهم جانو كلهم ملتمين وريحانه مخلين يمها مكعبات تلعب بيهن سلمت وكعدت

ساهرة:  خابرت دنيا وكتلها اجينه للعمارة اتسودنت عليه شلون اجيبج بدون ما يدري رائد
انوب شويه وخابرني رائد حار شيحجي وشيگول
لو بيده يطلع علينه من التليفون گتله خليكم فترة ترتاحون وتراجعون نفسكم طاح وسده بوجهي

ماهر:  أكيد يسده بوجهج شتتوقعين منه

_ حقه يا يمه مهما يصير يبقى رجلها

بعدنا نحجي واجت وسن جابت صينيه العشا خلتها كبالي شوكت گامت شوكت حضرتها ما ادري

وسن. : يله ياحلوة تعشي

_ وانتم متتعشون

_ كلنه تعشينه حتى بنيتج تعشت بقيتي بس أنتِ

صحت على ريحانه أجتني گعدتها بحضني وبقيت اوكل بيها ما أكلت شبعانه بس أني ما أگدر لازم اوكلها بيدي حتى اطمن كملت العشا شلت الصينه وگفت على السنك اريد اغسل المواعين اجت وسن اخذتهن من ايدي ماقبلت بعدنا واكفين اني وسن بالمطبخ اجاه ماهر گال تعاي بالحديقه اريد احجي وياج شلت ريحانه وطلعت يمه

ماهر : يشهد الله ورسوله عليه اخاف عليج وأفكر بيج مثل ما أفكر واهم بزنوبه انتِ أمانه خالي يمي  واني اجيت من إيران للعراق على مودج اريدج تستقرين وترتاحين شوفي براء صدگ اني زعلان ومضايق من رائد بس يشهد الله ما اكرهه ولا اتمنى الخراب بينكم لان ادري بيه زلمه معدل ويگدر يحميج ويحافظ عليج انتِ وبنتج لكن أسلوبه وتجاوزاته باخر فتره زعجني بس هذا ما يمنع اگعد واحجي وياج كل العوائل تصير مشاكل بيناتهم وكل اثنين تصير مشاكل بينهم وبلاخص اول بدايتهم والزين اللي يگدر يتجاوز هاي المشاكل بالعقل ومشكلتكم اثنينكم بلا عقول

ابتسمت على كلامه هو بادلني الابتسامه ورجع كمل كلامه

_انتِ ما جنتي هيج جنتي ام عقل الجبير
المؤمنه الحبابه ليش تغيرتي

_ الظروف المريت بيها هي غيرتني ما اگدر اتخطئ الماضي التعب التعبته والصدمات العشتها سببتلي عقد ما گمت اثق بجنس أدم كل واحد بيكم ينضرلي من وجهه نظره محد بيكم فكر من شنو اعاني رائد يحبني واني احبه بس المشكلة هو ما يتحكم بأعصابه وكله أوامر ولازم انفذ بدون اعترض واني ما اريد اتنازل ولا اريد اصير مطيعه لان صرت قبل مطيعه ومسامحه تالي انداس على راسي

_كل اللي تحجينه حقج بيه بس لا تنسين انتِ بيدج تگدرين تشعلين النار واطفينها

سكت شويه وراها گال

_أبقي هسه هنا وهذا بيتي وشتردين بس أشري
بــ إيدج كلنه تحت أمرج وبس تحسين روحج ارتاحيتي وراحت زعلتج من ابو مسرة گولي وانه ارجعج بيدي اله

_الله يحفظك ان شاءالله

_شعدنا غير براوي الحلوة احنه

ترخصت من عنده وگمت دخلت جوه لگيت عمتي دنيا داگه عليه اكثر من مره ورائد داز رسائل

الاول مكتوب بيها

الاستهتار مراحل وانتِ وصلتي أعلى مرحله بيه
طرطور أني تضربيتي بعرض الحايط وترحين ويا عمتج

والرساله الثانية كاتب بيها

شكد حاولت وياج وشكد اتساهلت بس الظاهر انتِ مو مال احترام متعلمه على الكفخ والاهاين تبارك وامها اخذن حسابهن من كل هاي الهوسه واجه الوكت اللي تاخذين انتِ حسابج بس أصبريلي

بقيت لازمه التليفون وكل شويه اقرأ بكلامه
ما ادري شجاي يخطط الله يستر منه خلص اول يوم وثاني يوم والثالث كلشي هدوء ماكو اي شي يذكر اكعد ويا وسن ساعه نشتغل ساعه نسولف مرات ابجي هواي وهي تبقى تهدي بيه أنغام زوجه باقر قليل ما تحاجيني  واحسها مضايقه من وجودي ما اعرف ليش هي صح ما حجت شي وياي بس اني هيج احس عمتي ساهرة طايره بيه طير تحير شتجيب وشتسوي والولد نفس الشي وبلاخص ماهر اما رائد لا راسل ولا اتصل ولا حتى عمتي دنيا فتحت موضع عليه مخلصها ينشر بنفسه وينشر اصدقائه ومرات ينشر مسرة

طول هاي الايام هو حاربني بهاي الطريقه لابسني وما مهتملي و المشكلة احس روحي تلوب عليه مشتاقتله مشتاقه السوالفه گلبي يرجف من اذكرى كل شويه افوت على الفيس ألگله لو نشط لو نشط من كذا دقيقه اروح على الواتساب نفس الشي احسه متقصد هيج يسوي يريد يعاقبني ويخليني احس بقيمته

مر أسبوع على جيتي للعمارة ماهر راح أستقبل
اطفاله من الحدود وصلهم خالهم ورجع وماهر جابهم للبيت ما شاءالله عليهم ترتيب والتزام وثقافه نسخه مزغره من أبوهم من شفت التزامهم وطريقه كلامهم فشلت من نفسي وبيوم الراح ماهر يجيبهم اجت اخت أنغام من الصبح أسمها سماح اللي عرفته تصير ازغر من انغام بسنتينروارملة وعدها ولد و بيت جده اهل ابو ماخذينه اول ما دخلت اكلت عمتي اكل بالسلام وگامت ويا البنات ساعدتهم بالتنظيف والطبخ

جنت وين ما اروح تجي وراي اذا اگعد يم عمتي تجي تگعد اذا اطلع بالطرمه تطلع اذا اروح للمطبخ نفس الشي اشوفها وراي قلقتني بقيت حايره بموضوعها شنو تراقبني لو صدفه الموضوع لحد ما وصل ماهر وأطفاله كلهم تلكوهم فرحانين بيهم خو عمتي تريد اطير من الفرح ما بقى مكان ما باستهم منه وهمّ سلمو علينا واحد واحد اخر شي وصلوا يمي ماهر گال الهم  وهاي ام ريحانه بنته ضحكت وباوعت على اخوها ورجعت گالت

هاي أم ريحانه واخيراً شفناها رجعوا ضحكوا اثنينهم وباوعو على أبوهم حسيته انحرج منهم أبتسم ودنك راسه ما حجه شي اجت الابنيه باستني والولد سلم عليه من بعيد يستحرم يطخني
راحوا گعدوا يم عمتي بالصاله واحنه رحنه للمطبخ نحظر بالغده كل ما الزم حاجه تجي سماح تركض تاخذها من ايدي ما خلتني اسوي شي ولا الزم شي
حتى وسن انتبهت عليها عاد گالتلي روحي هناك
احنه كملنه راح ننقل المواعين بعد رحت يمهم بالصالة بعدني هسه گعدت اجت سماح گعدت مقابيلي ،، يدله بله هسه هاي شبيها لا عافتني أساعد البنات ولا گعدت من الاول

سماح: شلونج زوبه حبيبتي

زينب: الحمدلله زينه

_وانتَ فيصل شلونك شلون دراستك

فيصل : بخير الحمدلله

_ يستاهل الحمدلله  الله يخليهم الك ابو فيصل
ويفرحك بيهم

ماهر: الله يسمج ويخليج ان شاءالله اگول يمه ما دام وصلوا الجهال باجر عازمكم على الطيب شتكولون هم تتونسون وهم تشوفون الطيب شلون حلوة

ساهرة: يا يمه اني ما بيه حيل شيوديني روحوا
انتم تونسوا

_بسيارة نروح قابل مشي

_والله يا يمه ما بيه فايده انتم روحوا

_وانتِ براء ترحين

_وهو شنو الطيب متنزهه لو مطعم

_لا هاي جزيرة سياحية  قريب من منطقه المشرح
تصير بيها مثل الجبال وگاعها كلش حلوة شويه متعرجه وشويه بيها ثيل وشويه صخبه تشوفين كل الانواع بيها وأكثر شي تشوفين بيها طيور الصيد

_ما شاءالله

_ترحين

_ اي ليش لا حبيت اشوف المكان

سماح : واني معزومه لا

هو باوع عليها متفاجأه سؤالها رجع رد

ماهر : هاا اي اي أكيد

_ينطيك العافيه

_ ادللي

فرشن البنات السفرة وبدن ينقلن بالاكل هي گامت وياهن تنقل بالمواعين و تجيب وتكوم يم ماهر وجهاله واحنه كلشي ماكو يمنا

رسول: اگلچ بعد اخوج ترى احنه هم نريد نتغده لا تنسين

ماهر ضحك وحتى اني لزمتني الضحكه بس ما اگدر اضحك استحي

سماح : من عيوني هسه اجيب حصتكم

_هي بقت بيها حصه غير نگلتي الجدر الابو فيصل وجهاله

_جا خطيه هم جاين من السفر

_واني هم خطيه جاي من الشغل

كلهم ضحكوا بس أنغام ما عجبها كلام رسول
خلصوا البنات ترتيب السفرة والتمينا كلنه ناكل سوة وسماح ويانا جانو مسوين باچه واني ما أكلها
بقيت اغمس خبز وروبه لحد ما كملنه وكاموا البنات وحده تغسل مواعين وحده تحضر جاي اجت سماح جابت الجاي وزعت علينا

ريحانه رادت جاي بقت تبجي صاح الها ماهر
راحت تزحف عليه گعدها بحظنه ويشرب بيها
من شفت المنظر متت من القهر احس حتى عيوني گامت تحركني تجمعت الدموع بيها اريد ابجي اختنكت اذكرت من تروح الرائد ويگعد ينفخ الها ويشربها واني ما اقبل وهو يرجع يگول صايرة دكتورة علينه صار أسبوع ما كلف نفسه وسأل علينا هسه اني زعلان مني وكارهني ريحانه ما اشتاق الها معقولة هيج نهون عليه صح غلطت بحقه وتسرعت بالحكم عليه بس هذا من حرگه گلبي ومن گد ما جنت مضغوطه ليش يريدني اني اقدر وضعه واتفهمه وهو ما يقدر ولا يتفهم

كمت منهم دخلت للغرفه وبقيت ابجي لحد ما ارتاحيت يله سكتت بعد ما طلعت من الغرفه حتى عشاء ما تعشيت انسدت نفسي عمتي نامت هي وريحانه والولد كل واحد فات الغرفته الساعه بالوحده بالليل جعت واحتاجيت حمام حمامهم يصير بداخل الصاله اول ما طلعت تفاجأت بسماح كاعده ماقابيل ماهر بدون حجاب ولابسه دشداشه فوك العكس نص ردن وتحجي وياه هو جان مدنك ويستمع الها وهي تلعب بخصله من شعرها وتحجي بصوت ناعم عزا العزاني شنوو هاي

براء : العفو بس جنت رايحه للحمام

ماهر : لا ليش تعتذرين تعاي گعدي

_ لا اخذو راحتكم اريد ارجع انام

حسيته انحرج مني لان هي هيج لابسه كملت طريقي للحمام وراها طلعت للمطبخ فتحت الثلاجة وگعدت سويتلي لفه و جاي كاعدة اكل اجه هو گعد يمي رفعت راسي باوعت عليه بسرعه ضحك

براء: هههه شكو ليش تضحك

_راح اموت من الخجل الف رحمه على ابوج بهاي اليلة من طلعتي وخلصتيني

_ليش شكو

_ماكو شي سلامتج

_اممم شجنتوا تحجون

_هههههه استفسار ديني

_يا ما شاءالله

_ههههههههه نسيتي اني شيخ

من كال هيج نزلت راسي بسرعه واحس كلبي عصرني اذكرته من يكول شيخ المخابيل اويلي عليك رائد حتى بالحجي الك ذكرى وياي

_ ليش ضجتي كلت شي يضوج

_لا ما ضايجه بالعكس

_ متأكدة

_اي بس ما كتلي شنو الاستفسار الديني الجنتوا تحجون بي

_تسأل اذا مصبغه اضافرها وباقي أضفر واحد ممصبغ يصير تصلي وتتوضه عادي

_ هاا وانت شگلت الها

_كتلها لبسي حجاب وغطي اديج وراها نحجي بالصلاة

_صدگ

_اي والله وهسه راح تلبس حجاب وتغطي اديها وتجي

_لعد اروح اكمل اكلي بالغرفه قبل لا تجي

_لا ممنوع ترحين ابقي هناا لحد ما تروح تنام

_شنو تخاف

_ اي والله اخاف شو ما ارتاحيت الها ما ادري شلون تحجي تتموع ومشلتحه وعافت الوقت كله واجت تسأل نص لليل

_شكو بيها واذا سألت هيج وقت جوز هسه اذكرت

_ ولبسها

_اجوز ما ملتزمه مو شرط عدها غايه

_حتى لو واحد ياخذ حذره الدنيا صايره مو آمان
لا تروح تبليني أنوب

_حقك والله

بقينا كاعدين ساعه كامله كل  واحد حاط ايده على خده  وصافن بوجه الثاني منتظرينها تجي
ماكو ما اجت گال ماهر

ماهر : گومي نامي الظاهر ما عجبها تلبس وبعد ما تجي تصبحين على خير

_وانتَ من اهل الخير

رحت نمت وثاني يوم طلعنه من الصبح للطيب
حتى عمتي اخذناها الولد ما عافهوها لحد ما قنعت تروح اخذو سمج ومخضر وخبز وفاكهة والبنات اخذن غاز ومواعين وبريمز وهناك طبخن تمن أحمر والولد شوو السمج وصادو طيور
بيومها شكد تونست جنت محتاجه هيج تغير
المكان يجنن والجو ولا غلطه المنظر يفتح النفس رسول ماخذ دي جي شغل صفكات ويروح ويرجع يهوس

صورت كل شي الاكل والبنات وهم يطبخون وعمتي وهي تسيح والولد وهم يشوون
وريحانه شايلها ماهر على جتافه وصور كلنه صور جماعيه للمغرب يله رجعنا للبيت رجعنا تعبانين كبل نمنه وسماح نزلناها الاهلها اول ما وصلنه

ثاني كعدت مضايقه من نفسي الشوكت ابقى هنا
لا اخ ولا اب ولا ام وفوگ هذا كله رائد العافني معلگه وكمل حياته عادي ما مهتم ويوميه جاي ينزل أستوريات طالع ومتونس هو گالي راح أخليج معلكه لا ليحه السماء ولا گاعده بالگاع وهسه جاي ينفذ كلامه اجت وسن سألتني شبيج حجيت الها على كلشي گالت حلو ما دام حنيتي خلينه هسه نبلش بالخطه

_يمعودة ياخطه هذا ما تعبر عليه هيج سوالف

_ افففه عليج واني اختج جيبي تليفونج

انطيتها التليفون بقت تگلب بالصور والفيديوات وين ماكو فيديو بيه ضحك وسوالف تنزله على الحاله بالواتساب

_يمعودة شتسوين

_خلي يحس انتِ ما مهتمه ومرتاحه مثل ما هو مرتاح هسه ينقهر

_وليش تقهرينه خطيه

_اهااا طلع الحجي طلع اي عمي من الاول وگولي
اني اموت عليه وهذا كله دلال

_ الظاهر مالي نصيب بالدلال

_نصبر هسه ونشوف هذا الدلال شلون راح يطير طير من بغداد للعمارة

بقينا ساعه كامله ننتظر هو متصل بس ما دخل للحاله

وسن: توترت اعصابي ولج هذا اكبر لوتي متقصد
ما يدخل شنو

_لعد شكتلج

_ننتظر شويه بعد شعدنا قابل  وراك يا سيد وراك

بقت لازمه التليفون ومنتظره مرت ساعه ثانية هي ضحكت وگالت شافهن فيديو فيديو حظري روحج شويه ويطب علينه بقينه اني وياها لليل كل شويه وحده تجي تشوف بلكي داز رسالة مخابر ماكو مغلس على الموضوع ولابسني اخر شي وسن گالت

_ تتعاي هي لو بالهدف لو بالنجف جيبي التليفون

أخذت التليفون ورسلت صور من تليفونها التليفوني

_ شتردين تسوين لا تورطيني يمعودة

_ انزل هاي الصورتين وراها اقرأ عليج الفاتحه
ما ادري اقرأ الفاتحه على ماهر

جانت ماخده صورة الي لازمه البندقيه مال الصيد وماهر واگف كلش قريب من عندي يعلمني اضرب والصورة الثانية اني وماهر گاعدين  وريحانه بحظنه هاي الصورة جابتها من تليفون زينب هي جانت ما خذتها النه

_عزا العزاني ولج يموتني حلال اذا شافهن لا عفيه
اني ماهر من گالگم صورونا ما صورت بتليفوني خاف يشوفها وبنفس الوقت استحيت اگوله ما اريد اصور هيج صور

_ شوفي براء انتِ غلطتي بحقه اوك و هو زعل واخذ على خاطر هم اوك بس مال صار 8 أيام ما مكلف نفسه وما سأل لا حبي هنا لازم يتحاسب ويفكر اذا همل زرعته اكو غيره من يزگيها
هاي اول شي ثاني شي هو اكبر وافهم منج ورب الاسرة المفروض يتلافه الزعل ويرجع يصلح الوضع مو يبقى مده طويله المفروض هسه هو يرجع المي المجاريها

_لا عفيه  ما يصير أسوي هيج يموتني والله لج هو نص طگه يرجعني سحل البغداد

_  وهو هذا المطلوب

نزلت الصورة من ويانا ريحانه وكتبت سفرة من العمر والصورة الثانية مال البندقيه كتبت صدت اثنين أطيور

_شوكت صدت ليش اتجدبين 

_الحياة بدون جذب ما تمشي

_ههههه والله اخاف

_عمضي عيونج راح ادوس نشر

_ گلبي راح يطلع من مكانه خرب بليسج

انطتهم نشر وخلت التليفون على الشحن وگالت

وسن: بكيفك ياربي بعد لو فايزين لو مذبوحين

_ علگ السكر عندي

_هههههههه اذا انتِ علگ سكرج هو راح يعلگ
عنده القالون العصبي

وصدگ مثل گالت ماكو خمس دقايق ودگ تليفوني رگضنا اثنينه عليه جان هو يتصل

براء : جاي يتصل

_عوفي لا تجاوبينه

_اخاف

_ مره من المرات صيري قويه

رجع دگ مره ثانيه ما جاوبت بقى يدك من الفيس ومن الواتساب وعلى الخط من كل ارقامه حرگ التليفون حرگ اخر شي دزلي رساله

حظري نفسج مسافه الطريق واوصل واني  واعرف شلون اتصرف وياج

يتبع ،،،

مرحبا بنات هذا البارت اليوم وصلني من الكاتبة
  اتمنى منكم تصبرون علينه هاي الايام لحد ما ترجع ياسة الكم واحب أگول الكم ما بقى غير
3 او 4 بارتات ونختم ان شاءالله

تحياتي الكم أدمن لمى ❤️