ادمنت حدة عينيه

بارت 13

انه اريدك بس الي ومن حقي اغار

طبعي طبع اطفال أمن بحاجتي

انه عالمو مالتي مرات اغار

شلون واحد غيري ياخذ مالتي

*****************************

فاتنه ـ يمه لا لا بداعتي لا ركضت للگراج ورا السياره واتلفت لا يجي هسه اني الا اضربه بس والله خوش جاي اضرب ههههه

نائل ـ افتريت من وراهه من الباب الثاني وهيه تضحك سديت حلگهه ها وينهه جسارتج شلتهه من خصرهه وشميت رگبتهه

بستهه شوي شوي رخت وسبلت اديهه ها فتينتي حبيبي نزلتهه ودرت وجهه علي منزله راسهه ارفعي راسج يول فتينه

فاتنه ـ ما اتوقعته ابد هيج يبوسني ويتجرأ حزت بخاطي كلش

يعني يستغل الفرص حتى ياخذ اللي يريده لما يوصلني لمرحله ممكن تكون بيناتنه علاقه تامه

غمضت عيني ما اريد الدمعه تطيح مو تربية فيروز اللي تنزل دمعتهه گدام اللي يظلموهه ابد جريت نفس قوي رفعت راسي شفته مبتسم گتله خلصت

نائل ـ اممممم يمكن اي ويمكن لا شتگولين

فاتنه ـ مستحيل اخليك توصل للي تريده صدگني ترا صعب عليك توصل لهذا واشرتله على گلبي

نائل ـ نگدر نوصله ويه الوقت

فاتنه ـ ههههه حلم مستحيل يتحقق

نائل ـ يجي يوم واذكرك بالحجيته وغمزتلهه

فاتنه ـ فتحت حلگي لك انته شنو من بشر ها

نائل ـ هههههه زومبي مو بشر

فاتنه ـ والله حتى الزومبي احسن منك شوي وسمعنه صوت انفجار قريب ما حسيت على نفسي بس اخر شي اتذكره ايدي بايد نائل

نائل ـ صار انفجار بالمنطقه مالتنه قريب الشارع العام ويه صوت الانفجار شفتهه مثل اللي انشالت من الگاع من قوة الانفجار جريت ايدهه وحضنتهه حيل

صرت جوا السياره الجام تفلش باب البيت وگع وهيه بحضني شوي ركزت والصوت كلش باذاني

اذني تصفر قوي صرت اسد وافتح بعيوني واذني اريد بس يروح الصفير من اذني

تقريبا 5 دقايق يله شوي ركزت گعدتهه ما تگعد ولج فاتنه اگعدي فتون حبيبي فتونه شفتهه تنفسهه ضعيف كلش شلتهه وركضت على الدرج شافني ابوي

ابو نائل ـ ها شبيهه

نائل ـ ما ادري من الانفجار يمكن انهبطت ضعف تنفسهه هسه بس تاخذ الابره والجهاز تصير زينه ركضت على الدرج بسرعه مددتهه واركض منا ومنا

اهلي كلهم صعدوا وعمتي وياهم مگابلتهه وتمسح باديهه وتبجي ركضت خليت الجهاز گوه تسحب نفس كلش ضعيف صحت عمه من رخصتج شوي

يا جماعه شوي شوي مجال بعدتهم صرت اضغط على صدرهه بلكي تسحب نفس اقوى وهيه ماكو

جريت الجهاز ونفخت بحلگهه واضغط وارجع الجهاز تقريبا 5 دقايق يله شهگت

گعدت على حيلي بالگاع روحي رايحه الحمد لله رجعت والله رجعت

گعدت بالگاع ما اگدر احرك ايدي بعد وبس ارجف جريت ايدي على وجهي مسحت عيوني حسيتهن يحرگني

ام ساهر ـ عفيه عليك يوم تلاحگتهه خطيه جان ماتت البنيه

ام نائل ـ لا هيه كل مره هيج

نائل ـ لا يوم هالمره اقوى والله اقوى جان ماتت والله شگول لعمتي لو صار بيهه شي

يا عين اللي اشوفهه واگللهه بنتج هيج صار بيهه هاي نتيجة افعالكم هاااااي

جريت قميص نظيف ورگعت الكنتور حيل وطلعت واني انزل لبسته وشمرت اللي انشگ بالدرج من صعدتهه وطلعت اروح للنهر احسن مكان افرغ بيه قهري

وصلت لميت اغراضي ضميتهم بين الشجر وشمرت روحي بالشط صرت اسبح لما وصلت مسافه بعيده گعدت على الجرف ارتاحيت شوي وبعدهه رجعت لمكاني

لبست قميصي واخذت اغراضي ورجعت امشي صح مسافه طويله بس احسن ارتاح وصلت للبيت ماكو احد

صعدت فوك بعدهه نايمه بدلت وتمددت يمهه جريتهه لحضني شفت تنفسهه طبيعي رفعت الجهاز

فتونه فتينتي حبيبي عمري فتون ردي علي بداعة امج ردي علي ضربتهه على خدهه ماكو جبت جهاز الضغط ضغطهه هابط

يا ربي هسه شسوي شفت ملابسهه زينه شلتهه ونزلت گبل للسياره شغلتهه ما تشتغل لا يربي لا

لا عندي مغذي بالبيت ولا شي اگدر اسويه ركضت للشارع جبت سياره واخذتهه وصلنه نزلتهه

خليتهه على السديه وشرحت للدكتور حالتهه انطوهه علاج ومغذي شوي يله فتحت عينهه گلت ها حبيبي شتحسين هسه

فاتنه ـ بعد الصوت ما حسيت بشي كلشي داير ما يدور ظلام كلشي يخوف ومرعب

هذا حلم لو حقيقه شنو هذا الظلام اريد اطلع ماكو احس نفسي شي مربطني

تعبت واني اسحب نفسي لما استسلمت وگعدت خليت راسي على رجلي وحضنت نفسي اريد احد ينقذني تعبت كلش تعبت واني اقاوم الظلام

حسيت على الم بايدي شفت ضوا بعيد گمت مشيت اللي جان مربطني اختفى وصلت لمكان الضوا صحيت شفت نائل گلت مي اريد مي

نائل ـ اي هسه جبت مي شربتهه شوي ها هسه شتحسين نفسج احسن

فاتنه ـ اي احسن بس من شوكت اني هنا

نائل ـ من ساعه تقريبا

فاتنه ـ شنو صار

نائل ـ ماكو شي سلامتج خلي يخلص هذا المغذي ونرجع للبيت ترتاحين ماشي

فاتنه ـ تمام

نائل ـ اكو مثل البرده يخلوهه داير ميدور السرير لفيتهه حتى محد يشوفهه وبقيت يمهه لازم ايدهه ما مانعت بالعكس شدت على ايدي

فاتنه ـ احس اكو وجع بجسمي وظهري كلش يوجعني لزم ايدي عصرت ايده حيل من قوة الالم شوي وراح الالم التفتت شفته مبتسم گلت ها شعجب تبتسم

نائل ـ من اشوفج ابتسم

فاتنه ـ ههههه وشنو السبب

نائل ـ لان انتي مصدر سعادتي

فاتنه ـ شنو قابل ككو حتى مصدر سعادتك

نائل ـ ههههه ليش هو بس الككو مصدر السعاده

فاتنه ـ اي والله عندي الككو مصدر السعاده والجبس والحلويات هم

نائل ـ واني

فاتنه ـ انته شنو

نائل ـ يعني ما اعنيلج شي

فاتنه ـ اممممم اوگف خلي افكر انته ممكن بعد كل هذا اللي جاي تسويه وياي اعتبرك صديق بس ها

اذا مره ثانيه ضميت عني شي اووو ما حجيتلي شي اوووو استغليتني وقهرتني اكرهك والغي وياك الصداقه

نائل ـ ههههه عادي احظريني

فاتنه ـ اي ذكرتني انطيني تلفوني حتى احظرك ما تنطنط علي بالفيس

نائل ـ ما انطيه محتفظ بيه

فاتنه ـ وليش يابه

نائل ـ اشوف بيه صور حبيبة گلبي

فاتنه ـ لا تكون فتحته واتصفحت بيه

نائل ـ اي

فاتنه ـ لا يا اخخ يمه ايدي لك شلون بيك ها هاي خصوصيه يا بشر شلون تدور بصوري بله وحده منهه اني ما مصورتهه عدل

نائل ـ هههههه كلهن شفتهن

فاتنه ـ شهگت لان اكو بيهن اني بكيمونه قصيره كلش وشورته گتله شنوووو

نائل ـ اي كلهن حتى بالكيمونه والشورته ومنزله شعرج على وجهج وعاضه الشفه

فاتنه ـ لك لك انته شلون بيك ها وشلون فتحت الرمز

نائل ـ عادي وانتي نايمه فتحته بالبصمه مالتج

فاتنه ـ يا دبسززززز ترجعلي تلفوني لا والله افلش كنتورك وراسك وياه

نائل ـ يله خلص المغذي خلينه نرجع ابوي يسأل عليج شلون صرتي

فاتنه ـ اييي حنين يا بعدي شلون ما يسأل

نائل ـ ههههه اي حتى اني متفاجئ من حنيته لان هو ما يحن الا اذا اكو شي

فاتنه ـ خاف لان راح نخلص من سناء ههههه

نائل ـ انجبي ويله گومي تمشين لو هم اشيلج راحت ايدي من وراج شثگلج الفيله

فاتنه ـ لا امشي ما عايزتلك المخنزر بس انطيني ايدك ظهري حيل يأذيني

نائل ـ ليش شكو

فاتنه ـ ما ادري شوفلي ممرضه تفحصه يمكن مجروح

نائل ـ اي هسه اجت ممرضه گالت المكان مضروب شوي وراحت كتلهه عادي اجيبلج عصاره تعالج المكان ويروح اثر الضربه

فاتنه ـ اگلك انته تريد تطبق دراستك براسي

نائل ـ هههه اي غير فار تجارب

فاتنه ـ فار بعينك لك يله رجعني للبيت هذا المستشفى وصخ يععع لعبت نفسي

نائل ـ يله يالنظيفه امشي

فاتنه ـ انظف منك القذر ابو النهر

نائل ـ وشبيه النهر

فاتنه ـ شبيه النهر كل الوصاخه بيه وانته واحد من الوصاخه

نائل ـ ضربتهه على راسهه يله انجبي وانزلي مو مكيفه وحلالج الوضع

فاتنه ـ اي بيش امشي براسك

نائل ـ يا حماره هسه اجيبلج كرسي وبعد لا تتجاوزين

فاتنه ـ والله هاي صداقتي تريدهه لو اسحبهه واصلا متمنيتهه من الله اسحب صداقتي منك

نائل ـ امري لله اريدهه ليش لا يله هسه اجي لا تتحركين

فاتنه ـ ادري صف اول وتوصي دروح يله شجلبت

نائل ـ غير خايف عليج الملحه

فاتنه ـ ولا يگعد الاشكر لو ما انته ككوي ومصنهر جنك باذنجانه مشويه

نائل ـ هاي علي

فاتنه ـ لعد على ابوي يله يله دوختني واني مريضه يله

نائل ـ لا وعايشه الدور الوصخه

فاتنه ـ شمرت ظفيرتي ورا ظهري اي طبعا احلى منك هو انته منو تقبل بيك عوووع تكشش

نائل ـ ضربتهه على راسهه لسانج الزميه يله شوي واجيج رحت جبت كرسي اخذتهه امشي بيهه

ووياي معين ياخذ الكرسي يرجعه وصلنه للشارع اجرت تكسي صعدتهه ورجعنه للبيت دخلنه ابوي منتظرنه بالطارمه

ابو نائل ـ ها خير وين صرتوا

نائل ـ جنه نلعب دعبل غير بالمستشفى هاي العاويه كلساع وساحلتني هناك

ابو نائل ـ شلون صرتي فاتنه

فاتنه ـ الحمد لله خالو تسلم عفتهم ودخلت للبيت شافتني ام ساهر اجت تركض علي وهمه كلهم گاعدين محد اتحرك خطوه لو نطق حرف

ام ساهر ـ ها فتونه شلونج يوم يوجعج شي

فاتنه ـ لا خاله ما بيه شي الحمد لله زينه مره اباوع بوجهه مره عليهم گلت من رخصتهم اروح ارتاح

خزرتني ام نائل ما اهتميت شسويلهم يعني صعدت اخذت ملابس ورحت للحمام سبحت واتمددت اريد انام تعبانه

ابو نائل ـ شبيهه

نائل ـ ما بيهه بس هبوط بالضغط

ابو نائل ـ خاف حامل

نائل ـ ضحكت بيني وبين نفسي گتله لا مو حامل اذا ما افتح مشروعي الخاص

وتصيرلي صيدليه خاصه واسم بين الناس واگدر اعيشهه عيشه حلوه مستحيل نسوي طفل

ابو نائل ـ انته تتحداني

نائل ـ لا ليش

ابو نائل ـ والاتفاق

نائل ـ يابه رحمه لاهلك اتفاقكم انتم سويتوه خلينه نعيش براحتنه ممكن

وبعدين اذا كل البيت عليهه تتوقع لو صارت حامل ممكن تقاوم لوقت الولاده بدون ما يروح الطفل هاا

ابو نائل ـ اي وشعليه الشغل بالحمل هاي النسوان تحمل وتشتغل

نائل ـ اي گلتهه تحمل وتشتغل بس مو تنضرب وتنهان وتحترك وينكال عليهه ابشع الكلام

من غير كلمة الفصليه اللي اليوم لان عمتي هنا ما سمعوهه الهه

واليوم بناتك الله يسلمهن صايرات حنينات لان عمتي موجوده حتى شوفي مدلليهه مو لو اني غلطان

ابو نائل ـ انته ويانه لو علينه

نائل ـ اني ويه الحق وانتم اخذتوهه من اهلهه بغير حق وهيه ما الهه ذنب فانتم سويتوا اللي تردونه خلينه نسوي اللي نريده

وها بالعافيه عليك مصروفهه الشهري اللي يدزونه اهلهه وبعد منا وهيج اني انطيك بدال شغلهه راتب بس خليني اشتغل

ابو نائل ـ شلون عرفت براتبهه الشهري يوصل الي

نائل ـ شلون يعني اتصل جدهه وسألني اذا يوصللهه الراتب بقيت صافن راتب شنو واتلافيت الموضوع وكتله اي ومكفيهه وزايد

ما يدري راتبهه الشهري ابوي مخليه مصرف للبيت ياكلون بفلوسهه ويشغلونهه خدامه ويهينوهه ويحجون عليهه مو

گبل ضربني على وجهي غمضت عيني حيل مشكور يابه عفته وصعدت افور وين يوصل وياكم الطمع بعد وين

دخلت للغرفه شفتهه نايمه بدلت واتمددت وراهه جريتهه لحضني دفعتني

فاتنه ـ اول ما بديت انام انسحبت من خصري دفعته وخر عني نائل مو بحال سوالفك ترا طالعه روحي كلش

نائل ـ عادي صديقتي غير تقربي يمي ما اسوي شي بس خلينه هيج

فاتنه ـ والله اذا سويت شي احرگك والله وگول گالت

نائل ـ لا ما اسوي شي أمني ونامي يله ترا تعبان والله

فاتنه ـ وتعبتهم اني شكو

نائل ـ هههه يله كافي نامي نامي رادت تحجي سديت حلگهه كافي نامي يله

فاتنه ـ گوه اجر بايده اريده يوخر ضحكت شوي ووخر ايده لك ايدك خنگتني امداك

نائل ـ امداج انتي الجلبه يله نامي

فاتنه ـ والله ما جلب غيرك وخررر وخر

نائل ـ اللهم طولج يا روح غمضت عيني اريد انام

فاتنه ـ اقول اقول هيووو نمت صدك هاي غير صديق الله مطيح حظه

درت وجهي صدك نايم لزمت رموشه گلت الله رموشك طوال وحلوات

خليت وجهي بوجهه خلي اشوفك بله اذا صدك نايم غمضت عيني وگحيت بوجهه طفر ههههه لك اخ يمه بطني شنو انته منصبه والله هههههه

نائل ـ گوه مسيطر على نفسي ما اضحك وهيه تلعب برموشي شوي وگحت بوجهي طفرت لا يا وصخه مسحت وجهي شبيج المخبله

باوعت الساعه 12 بالليل والله اكتلج القذره طبگت اديهه وحضنتهه حيل وخليت رجليهه بين رجلي يله هسه خلصي روحج لو انتي خوش مره

فاتنه ـ لك اخ الثور الزمال البعير ايدي اتكسرت وخر عني شجلبت اااخ يمه ايديييي شوي ووخر ايدي حيل توجعني وصايره حمره

فركت ايدي وضربته على كتفه مو صوجك صوجي والله اني شلون صادقتك

اااخ يمه روح روح منا يله جيب المخده اخليهه بالنص انته مو امان

نائل ـ هههههه امان والله امان يله نامي دنيا نص الليل وانتي تزاگطين

فاتنه ـ حمار اليزگط وجهك ويرسملك خريطه جديده تمددت جرني گلت اللهم صبرج يا روح انته ما تروح هناك شكو لازك هنا

نائل ـ احب هيج انام يله نامي خليت ايدي جوا راسهه يله نامي شوي ونمت

فاتنه ـ شفته نام حركت ايدي على وجهه عطست يمه نايم تلمست ايده ضخمه بالنسبه لايدي ضحكت ونمت

نائل ـ حسيت بثگل على صدري فزيت شفتهه راسهه على صدري ووجهه قريب وجهي والحلگ مفتوح وتضحك وتحجي

فاتنه ـ جدووتي

نائل ـ خلي اسايرهه بله گلت هااا

فاتنه ـ احبك

نائل ـ هههه ادري وبعد

فاتنه ـ انته حلو وهذا نائل مخنزر

نائل ـ جريت تلفوني اصورهه فرصه اضحك عليهه بيه گتلهه شبيه نائل

فاتنه ـ مخنزر

نائل ـ اي وبعد

فاتنه ـ بس هو هم حلو

نائل ـ ههههههه خوش وبعد

فاتنه ـ هو صح يدافعلي بس اخواته مسمومات وحيايه وادبسزيات

نائل ـ ههههه شبيهن

فاتنه ـ يضربني الحقيرات

نائل ـ بعد ما يضربنج

فاتنه ـ شوكت تجي بيبي

نائل ـ مسحت على شعرهه گلت بعدين

فاتنه ـ مشتاقه لريحتهه وهذا المخنزر ما يخليني اروح الهه واشبع منهه

نائل ـ بعدين هو ياخذج الهه وتشبعين منهه

فاتنه ـ احبك جدوتي

نائل ـ واني هم احبج

فاتنه ـ حسيت اكو حجي يمي ما اعرف شنو ادري بنفسي احجي واني نايمه كم مره البنات يسونهه بيه يسألني واجاوب كلشي

ويصورني وثاني يوم يگعدن يضحكن علي حسيت براحه واني نايمه گعدت الصبح شفت نائل گاعد ووجهه بوجهي گلت صباح الخير

نائل ـ صباح النور

فاتنه ـ غسلت لو بعدك

نائل ـ غسلت روحي غسلي وتعالي صلي يله حتى ننزل

فاتنة ـ رحت غسلت وصليت نزلنه اني وياه احضر بالريوك وهو وياي يحضر گتله ليش تحضر

نائل ـ الصديق يشارك صديقه بكلشي مو لو اني غلطان

فاتنه ـ ههههههه اي صحيح شكرا لمساعدتك

نائل ـ بس الاصدقاء ما بيناتهم واحد يشكر الثاني مو

فاتنه ـ خجلت من كلامه گعد واجو اهله وام ساهر كلهه گعدت تاكل اني اكلت قبلهم لفه وشربت جاي

رحت نظفت ولملمت كل الگزاز حولته بكارتون اللي ولا وحده منظفه شي ومتعبه نفسهه

غسلت البيت ونشفته اللي يطلع على ممر صغير واكو لا يطلع على المطبخ

خلصت ذاك الجزء ونشفته وفرشته ورجعت على هذا الجزء خالوا والولد طلعوا لملمت المطبخ وكفيته

غسلت الجزء الثاني من البيت ونشفته وفرشته وخلصت الگراج والباب الخارجي غسلته لان مشلوع

طلعت المي برا ورا ساعه جابوا خلفة بناء يثبت الباب وواحد ياخذ قياسات الجام

صعدت لغرفتي من اجو وقفلتهه شفت من الشباك طلعوا فتحت القفل ونزلت

حضرت الغدا برياني لحم جنت سالگه اللحم من الصبح بس كملت التمن وحشوته خلصت كلشي قبل الساعه 12 اجت ام ساهر للمطبخ

ام ساهر ـ الله يساعدج يوم تعبتي مو

فاتنه ـ لا خاله تعودت

ام ساهر ـ شوكت اجيتي هنا صدك ولو هاي الكلمه تحز بخاطري اكثر من خاطرج بس گالولي فصليه ليش يوم

فاتنه ـ بلعت الغصه ابتسمت هذا امر الله بعد ابنهم دعمه ابن عمي وتوفى بسرعه وشرطوا الا فصليه وجان محد بين البنات بس اني

كلهه متزوجه والباقين  اعمارهم 15 واصغر واني الوحيده اللي عمري 18 يعني اكبر وحده بيهم فهذا صار نصيبي الحمد لله

ام ساهر ـ هم شفتي فيروز بعد

فاتنه ـ اي مره وحده قبل لا ينتقلون للموصل ومن بعدهه رايحين لسليمانيه وبعدهه لاربيل وهسه ما اعرف مكانهم وين

مسحت دمعتي صارلي 4 اشهر ونص ما سامعه صوتهم حتى بيبي اللي انعمت من طلعت منهم ما ادري اذا عمليتهه صارت رجعت تشوف لو لا

شنو وضعهم شلون عايشين تنزل دموعي وامسحهه بايدي

ام ساهر ـ كافي يا امي كل شده والهه فرج ترا نائل يحبج حبيبتي امه سولفتلي كلشي حتى من جان يحبج قبل لا يجيبونج هنا

لا تخسرينه ماما وانتي بعد تربية فيروز مستحيل تربية فيروز تخيب ظن احد

فاتنه ـ تسلمين خاله كلامج مثل البلسم ربي يخليج

ام ساهر ـ ويخليج حبيبتي اگول شنو هاي الريحه الطيبه شنو طابخه اليوم

فاتنه ـ هههه برياني لحم اليوم سويته للغدا

ام ساهر ـ تدرين أكلج طيب

فاتنه ـ  شكرا خاله بيبي علمتني كلشي بس جنت اتململ وگوه اروح وياهه للمطبخ وتعلمت كم اكله منهه

ام ساهر ـ حبيبتي النادره نصيحه واعتبريني امج ترا ام نائل زينه بس اكو من فر عقلهه عليج انتي ابقي زينه هيج وهذن رايحات وحده ورا الثانيه

هسه احسبي شهر لو اسبوع تروح وحده والثانيه وراهه ومرتضى يجي يوم ويزوجونه اكسبي نائل وعيشي وياه مستحيل يفرط بيج اخذيهه مني

فاتنه ـ ان شاء الله خاله مرت ايامي هيج واليوم حنة سناء فرشت البيت كله فراش جديد نزلناه من المخزن اني ونائل نشتغل ونضحك

صرنه كلش اصدقاء وكلشي يحجيلي عن شغله وشلون يقلد على وصفات الاطباء اللي ما مفهومه ويگعدون يفكون الشفرات مالتهه واني اضحك

فساتيني اللي بالكنتور ما لگيتهن كلهن ماخذاتهن المسعدات صار وقت تجي الناس

صعدت سبحت حتى ارتب نفسي فتحت الكنتور طلعت جينز وقميص اوف وايت لان ذبينه الاسود ردت البسهم

نائل ـ فاتنه من بعد ما اتقبلتني كصديق عشنه براحه رغم مرات نتعارك اني وياهه ومرات تضربني

لان اخذ منهه نستله او ككو ونگعد واحد يكمش الثاني من شعره لما تجر شعري بايدهه يله تسكت

واذا ماكو تبجي الا تهلس شعري الحمد لله اشتغلت بصيدليه وراتب زين صرت انطي نصه لاهلي ونص الي اضمه

فتحتلي حساب بالبنك اخذ من اليبقى گد احتياجي والباقي اخليه بالحساب

قبل حنة سناء حجزتلهه فستان من النت وصل اسود بيه فتحه من الظهر للنص وطويل وصل مغلف وجاهز

بيوم الحنه اشتغل وياهه وهيه تضحك واسد حلگهه لا تشهرنه شيخلصني منهم

شفتهه تريد تبدل دخلت وحضنتهه من ظهرهه ها يا حلو شنو راح تلبس

فاتنه ـ اوووي نائل وخر ما اعرف جاي افكر البس هاي

نائل ـ ام الأوي امممم زين واذا اگلج البسي هاي هاج افتحي وشوفي

فاتنه ـ فتحت الكارتون فستان يجنن مثل اللي جنت اشتريهن بالمناسبات ركضت حضنته واتعلگت برگبته يااااي انته حلو حلو وبسته بخده

نائل ـ هههههه يله بعد الخد الثاني انطيتهه خدي باستني اشرتلهه على شفتي ضربتني حيل

فاتنه ـ ادبسز لا تصير يله نزلني

نائل ـ واذا ما نزلتج

فاتنه ـ اضربك

نائل ـ متأكده

فاتنه ـ اهوووو نائل وراي تبديل واسشور شعري عفيه وخر ما الحگ

نائل ـ ههه يله لا تبجين

فاتنه ـ هههه يله اطلع خليني ابدل

نائل ـ ما اطلع عندج حمام وبدلي ومناك اكو مكان للتبديل وروحي اريد انام

فاتنه ـ يا خبيث سشورت شعري وبرمته ومكيجت نفسي خفيف رفعت گذلتي بف ولبست الفستان والكعب

ياااي اجنن جريت تلفونه صورت كم صوره وهو نايم نزلت صارت بوجهي ام ساهر

ام ساهر ـ يمه صلاوات على النبي عين النبي تحرسج وتحميج يوم

فاتنه ـ شكرا خاله بدت الناس تتجمع وهنه مبدلات ومنار راحت للصالون ويه اختهه

ضيفت الناس كلهه وگعدت على الدرج شغلوا الديجي اغانيهن يحبنهه اشرتلهن اوگفن

شغلت ساجده گتلهن يله ارگصن صارن يرگصن ويهوسن واني اضحك على جهه وام ساهر يمي تقلد على رگصهن خربتني ضحك

بنات خالو صابر 3 بس كبار بالعمر ورويده هم موجوده شوي وسحبتني ام ساهر گالت

ام ساهر ـ بله شوي مجال خلنهه ترگص

فاتنه ـ لا خاله فدوه

ام ساهر ـ ارگصي ولج لا اموتج

فاتنه ـ رحت شغلت معزوفه بدت ذبيت الكعب على جهه ونزلت بنصهن اهز كتف وخصر

وام ساهر شدت الشال على خصري وتطگلي اصبع واني وياهه اخذني الواهس

رفعت راسي واشوف رويده تصور اشرتلهه لا ورجعت ارگص فرحانه اكو احد وياي ويحبني ام ساهر طبعهه مثل بيبي مسالمه

خلصت المعزوفه وطلعن غيرهه ردح اقوى وهنه وياي يرگصن رفعت راسي للدرج واشوف نائل يغمزلي ضحكت اكو زاويه بالدرج محد يشوفه منهه يصورني

گلت لام ساهر خليني وحدي ارگص نائل يصور هيه افتهمت وراحت طفت الديجي گلتلهن

ام ساهر ـ هسه انتن استراحه خلن فتونه ترگص وحدهه يله فتون ساجده مو

فاتنه ـ اي خاله شغلت اسمر والعيون وساع ونزلت بنصهن اركص ومن ارفع راسي اشوف الضحكه شارگه حلگه يهز ويصور شوي واتبدلت ملامحه

صرت اباوع بين الناس شفت رويده رجعت تصور اشرتلهه طفي هزت ايدهه وراحت

اي ويطبج مرض كملت بواهسي شوي وتعبت گتلهم كافي تعبت رحت گعدت صاحت مره

ـ اگلج خاله انتي بتهم

فاتنه ـ لا خاله جنتهم

ـ يا عبالي بتهم ابني دكتور وردت اخطبج اله

فاتنه ـ لا خاله زوجي صيدلاني ما يحتاج ماشيه اموري ضحكت ومشيت شوي وخلصت الحفله الناس بدت تروح

صعدت ابدل فتحت الباب وافر بيدي بالكعب واغني اويوووو ييووو يو يو طم طحطح طم طحطح دخلت وجرني

نائل ـ هلا وهلا اي بربوك شنو هذا الرگص

فاتنه ـ هههههيييي خبره اربعين سنه بهذا المجال لا عبالك

نائل ـ هههههه شلون شفتيني اصور

فاتنه ـ احححح اسكت لگفتك حافظتك حفظ ادري بيك ما تفوت هيج فرصه انته لو غيرك اللي وصلك الفديو بحنة جمانه لو اني غلطانه نئووووله

نائل ـ هههه دبسز شنو نئوله رويده شوكت صورتج

فاتنه ـ صورت بالبدايه واشرتلهه تطفيه ومره ثانيه من شفتك تبدلت ملامحك عرفت اكو شي غلط شفتهه رجعت صورت مره ثانيه

نائل ـ اي واني لزمتهه قبل لا تروح ومسحتهن منهه

فاتنه ـ اي احسن لا تروح تنطيهن لاحد وتسويلي سالفه يله وخر خليني ابدل اقول اقول نئوله

نائل ـ ها خير

فاتنه ـ خب لو تدري هههههه خطبوني قبل شوي ههههه بسرعه جرني من ايدي حيل على صدره

نائل ـ شنوووو اي بله منو خطبج ها ومكيفه الحماره

فاتنه ـ اي طبعا خطبني دكتور شفته مشتعل غضب واني ميته ضحك اخاف اضحك بوجهه ويكتلني

نائل ـ لااااا خاف ما تقبلين ست الحسن صافيناز خانم

فاتنه ـ لا شلون ما اقبل وانوب دكتور بعد شلون اضيعه من ايدي فرصه والحياة فرص ما تتعوض

نائل ـ فتييييينننننه لا تختبرين صبري شنو رديتي عليهه

فاتنه ـ امممم گتلهه افكر اذا ابنج حلو اقبل بيه شو هذا شالني وشمرني على السرير وصار فوگاي

نائل ـ اممممم شنو رأيج اشوفج شلون اني حلو واخبل

فاتنه ـ ما تگدر

نائل ـ شلون

فاتنه ـ هيج مجرد شعور وهسه يله وخر خلي اروح وراي شغل

نائل ـ بس اني أهم

فاتنه ـ اي عود نتعارك بعدين

نائل ـ فتينه تگولين شنو رديتي عليهه والا ما اوخر والله واسوي شي ما يعجبج

فاتنه ـ ههههه شبيك بس لا تغار

نائل ـ طبعا غير زوجتي وصديقتي ليش ما اغار قابل طرن

فاتنه ـ اممممم يله ارضيلك فضولك گتلهه زوجي صيدلاني وخليت ايدي على صدره وهو مركز بعيوني

رفعت رجلي شوي شوي وهو يبتسم دفرته وشمرته بالگاع

نائل ـ ااااخ الرعنه طاح حظج ادري متزوج مصارع لو مره ولج يمه صفاحي توجعني اااخ بطني اااخ الجلبه

فاتنه ـ ههههه احنه المحد يندگ بينه اها واها واها گتلك وخر بس انته لزگة جونسون

نائل ـ هسه اشوفج اللزگه شيسوي ركضت عليهه طلعت تركض للحمام وياهه ملابسهه وقفلت الباب

فاتنه ـ لك الخبل ههههه والله يا الله بدلت واخذت فستاني ورجعت للغرفه شفته ما موجود لميت شعري ومسحت المكياج ونزلت لملمت كلشي

*************************

حبايب علقوا على الفقرات

صوتوا للبارت

تابعوني على الانستا هذا حسابي خاص بالقصص مالتي