قارورة الـ مُخلد

الحلقة |6|

الڪاتبة | زينب صلاح
في | قارورة الـ مُخلد

♥♥♥♥♥♥♥♥♥♥♥♥♥♥

همسه*

-'' جهزي نفسج جايج اريد نطلع سوه نغير جو ''

قريت الرسالة اكثر من مرة بابتسامه وتذكرت بابا بسرعة اتصلت عليه 
ما طول من رد عليه بصوت تگيل ومتضجور محه ابتسامتي..

مُخلد- هلاا

-هلو شلونك؟

-الحمدلله

-امم دومك.. بابا عنده علم؟

-لا من اجي انه احاجي انتِ جهزي نفسج ومعليج

-شبيك مُخلد؟

-شبيه؟

-شو تحجي من وره خشمك!!

-ابويه انتِ جهزي نفسج وانه جاي بالطريق

-تمام

سديته ميته قهررر اسلوبه مستفزز لابعد حد ما ادري شبيه لو ضاج من شغله تطلع بوجهي هم حظي هذا غميت كصتي وكمت..

طلعت تنوره بينصل سوده ام الشيالات وبلوزه شتائيه لونها وردي فاتح لبست شال اسود وحذاء كعب ناصي اسود وجنطه ورديه..
حطيت لوجهي مرطب وحمره ورديه ولخدودي شوي مورد وخطيت عيوني..

ضليت كاعده وصافنه ؏ لمرايه لانعكاسي خايفه من المستقبل خايفه مُخلد يخذلني لان مجاي افهمه ولا افهم شيريد بالضبط ساعه نار وساعه ابرد من الثلج نفسه وساعه الطف واحله منه ماكو...

اعرفه يحبني وهالشي واضح وضوح الشمس واني احس ڪلبي بده يميل اله وشعوري بوجوده ما اعرف اوصفه احس تلزمني رجفه ومغص وتتخربط احوالي..

لزمت شفايفي اتذكر بوسته بلا ادراك مني ابتسم واتمنى قربه رغم ابعده من خجلي بس احب من يتقربلي بلهفه وهالشي ما صار غير مرتين بيوم الخطوبه وامس واحس اخذ جزء مني..

ڪلبي صار مو الي ملك حصري اله..

وهذا الشعور يخلي نغزات بروحي ويزيد خوفي..

دگات الباب فززتني وانتبهت لـ اسل ماده بس راسها وگالت بابتسامه واسعه..

اسل- نسيبنا الصاك وصل وبابا يصيحلج

همسه- ههه والله لو يسمعج مهيب

-عزااا يشك حلكي العسل

-الثقههه

-هههه يلاا يلاا روحي لابو النسب

طلعت وما رفعت عيني اله وكفت يم بابا الي حظن اكتافي..

همسه:- السلام عليكم

مُخلد:- هلا

جابر:- فرغتوا البيت عليه انتَ واخوك

مُخلد:- ههههه بعد فترة ناخذهم شلون

جابر:- اجي كل يوم اجي اشوفهن بنياتي ذن زُجاجاتي

ابتسمت وبست كتف بابا هامسه..

همسه:- ربي لا يحرمني منك تچايتي

بقوا يحجون بشغل مُخلد لحد ما ترخص اخذ ايدي وطلعنه بس شفت بابا دخل اخذت ايدي منه بهدوء وكملت طريقي بدون ما اهتم..

بس فتح قفل السيارة صعدت وكتفت ايدي كدام صدري قبل لا يحرك السيارة حجيت..

- تحب تغثني؟

-شنو؟

باوعتله بضوجه..

-تحب تقهرني وتبجيني؟

جان يريد يربط حزام الامان عافه ودار عليه، مسح عله وجهه بتوتر..

-لا وروح امي احب اشوف ضحكتج ؏ وجهج واعرف نفسي ما استحقج بس

-بس شنو؟

ذبلن عيونه، ميل راسه وهمس..

-احبج.. ومستعز بيج اكثر من روحي

سكتت وما جاوبته..

-زعلتي؟

-لا تعاملني برود لا تطلب الشي مني بتأمر اني زوجتك مو عبده عندك كُل ما اگول اي مُخلد هو الاختيار الصح تسوي شي وترجعني عشر خطوات ليوره واكعد اعيد التفكير بعلاقتنه

فز مرعوب وسحب ايدي اله..

-شنو يعني؟ شنو تعيدين التفكير بعلاقتنه؟

-نكمل او ننهي كُلشي مدامنه ؏ البر

خزرني وعصر كف ايدي..

-لو كلها تصير ضدي انفصال ماكو اخطفج واهج هو انتِ الصح الوحيد الطلعت بي بحياتي وهم اخسرج

-تخسرني بسبب اسلوبك

-اتغير

ضحكت مستهزئه ودرت وجهي بسرعه لزمه فكي ودارني عليه خازرني..

-ولج شهالتصرف لا تعلين ڪلبي

-شوف شلون ضجت وتريدني بكلمة منك ارضى واكول ميخالف

-تعبااااان انه تعبااااان وروحح امي تعبااان كافيي وين ما ادور وجهي لوم وعتب لاززم مُخلد يراضي ويقنع ومحد معبره مو انتِ والزمن عليه

شهكت ببجي من صاح بوجهي ما حسيت غير سحبني لصدره يحضني وهمس بتعب..

-اذوني همسه اذوني عذبوا روحي وعيونج الاحبهن

ابتعدت وحضنت وجهه بيديه..

-منو؟

-كلهم كلهم اذوني محد دخل حياتي وطلع منها بدون ما يلچم ڪلبي

-احجيلي

-اتعبين!

-تعبك راحه احجي وارتاح

ابتعد يمسح وجهه وگال..

-اخذج لمكان بس احنه بي؟

-براحتك

ساق ساكت بدون ما يحجي اباوع لايده ترجف وعيونه حمر، عضيت شفتي مقهوره عليه شنو العاشه وهيج صاير!

بلعت ريك وانا اشوفه صف السيارة كدام شقق عيوني اتبعته من نزل وفتح الباب الي ؏ جهتي..

-تعالي عيناي

-مُخلد وين جايبني؟

-ما تثقين بيه؟

-بالعكس بس!

-لا بس ولا هم يحزنون تعالي

سحبني وراه واني ڪلبي احسه راح يطلعمن مكانه گد ما يدك بقوة، فتح الباب ودفعني بخفه داخلها بس دخل قفلها واستند ؏ الباب عينه بعيني..

مُخلد:- تدرين احبج

هزيت راسي..

مُخلد:- وما أأذيج

-اي

-اسف

-؏ شنو؟

تقدم وسحبني لصدره دافن راسه برگبتي وايده تفتح بالشال نااار صارت بڪلبي ورجفت كُل خليه بجسمي وصرخت من لا وعي...

-لا مُخلد فدوووة

ابتعد يباوعلي بعيون ذبلانه مسح خدي وهمس..

-ما اسوي شي بس اخذي راحتج نزعي شالج هسه اجي

راح وانا تنفست براحه ذبيت الشال ؏ اكتافي وافرك بايدي بتوتر، رجع وره عشر دقائق بيده كلاص عصير وستكان شاي..

حطه گدامي مبتسم..
-شربي حبيبي

اخذته منه وهمست..
-شكرًا

-العفو

شربت شوي من العصير وگتله...
-مُخلد!

-عيونه

ابتسمت وهمست..
-ما سولفتلي؟

اخذ نفس عميق وزفره عيون شردت وضغط بأيده ؏ استكان الچاي وگال..
-اليوم اجاني للمحل قيصر واختج.. تدرين؟

-ما ادري بس وين المشكلة بجيتهم!؟

-مو بجيتهم المشكلة

-لعد؟

عاف لستكان بدون ما يشرب الچاي وفرك ايدي..
-المشكلة بتواجد قيصر بمكان تابع الي

-ما فهمت!

-مو ضروري

-مُخلددد حجيت كمل سالفتك

-اتعب من احجي بصلافة اخوي

-شمسويلك قيصر؟ الاعرفه اني انتَ حتى ما جنت موجود بالعراق!

-ليش منو جان سبب سفري منو الخلاني اكره الدنيا وما بيها واهج لاخرها علمود اتناسه غدر اخويه الي

-غدر!

-قيصر اخذ كلشي من ايدي كلشي حرفيًا
اخذ حنان امي وطفولتي اخذ مستقبلي وحـ...

سكت وصفك ايده بقهر وصاح...
-قيصر خاني وغدرني ما حب الا لبنيه الحبيتها ولو هي هم ساقـ** ما قصرت بسرعه رحبت بي

فتحت عيوني مندهشه من الي سمعته ومن حس بهدوئي باوعلي وكمل..

-جان اسعد يوم بحياتي ههه ودمروا الي
فرحان جنت بتخرجي وردت اروح لامي علمود تخطبها الي بس قبلها گلت اروح انطيها علم...

مشيت بسرعة والابتسامه ما فارقت وجهي اسرع بخطواتي اريد اوصللها واگللها جاي اوفي بوعدي الج واخذج عروسه الي..
وحبي الج جان حقيقي ما كذبت بأي كلمة طلعت مني..

اتجهت لصديقاتها الي جانن گاعدات بشكل كروب باوعت لصديقتها المقربة نرجس..

-سمر وين؟

اشو هاي انخطف لونها وبقت تتلفت بأرتباك غلست وكل همي حبيبتي وردة فعلها بهاي لبشارة..

جاوبتني بتردد..
-ما ادري خاف طلعت!

-ما طلعتوا من القاعة سوه؟!

-لا جنت عند الاستاذ ما ادري

عقدت حواجبي لا مقتنع ولا مصدك، عفتها ودخلت ادور عليها بقاعتها بالنادي واخر شي ردت اطلع وشفت ولد وياها بنفس القاعة..

-خويه ما شفت سمر!

-سمر عدنان؟

-اي

-تلگاها بالحديقة الخلفية ويه خطيبها

عافني وراح وانه متصنم بمكاني!
خطيب شنو؟ حديقة خلفية شنو؟ شنو هذا الكلام الي عقلي مجاي يستوعبه ولا يهضمه..

رحت اقدم خطوة وأأخر خطوة واتمنى يطلع فاهم الموضوع خطاء او متوهم..

ڪلبي عصرني واحس النفس بالگوة يدخل ريتي وايدي ترجف..

وگفت بمكاني مصدوم! مو صدمة وحدة لا ثنين وحدة اكبر من الثانية..
حبيبتي بحضن اخويه بطريقة وصخه وحقيرة..

عيوني حرگني ؏ گد قهري وبلعومي يبس اريد اجر النفس ما اعرف شلون انتچيت ؏ الحايط بصفي اسند طولي عليه لان حيلي نهد وقوة ما عندي اوگف..

بلحظة تشكلت عيونها بعيوني!
ذن لعيون الي بيوم باوعتلهن وتغزلت بيهن لعيون الي بيوم گلتلي ما تشوف رجال غيري لا هسه شافت وما شافت غير اخوي..

فزت مرعوبه و؏ فزتها نتبهلي قيصـر لان عيونها تعلگت بيه..

مشيت وعيوني مو مصدگه لحد هسه احاول ارفض واقنع نفسي متوهم..

قيصر- شتسوي هنا مُخلد!

سمر- تعرفه؟!!

اباوعلها صوفرت وحالها تبهذل من جاوبها قيصر..
-اي اخويه

مُخلد- برري احجيلي وفسريلي الوضع الي جنتي بي!

سمر- مُخلد مو مثل ما انتَ فاهم

قيصر- شكو؟

لزمته من ياخته وصرخت بي..
-لااااا تسووووي نفسك مااا تعرف لا تجذذذب

قيصر- ولك تخبلت شبيك هو انه فاهم شي شجاي تخربط

-مگعدها بحضنك مگعد لبنيه الي يحبها اخوك بحضنك وتتغزل بيها ضميرررك مرتاااح

عيونه فگهن ؏ وسعهن وباوعلها ما اشوفه غير جابها براشدي فرها فر وصاح..

-عرفتج مو خاليه بس طلعين سا*** بهالشكل ابدد لاااا

سمر- اسفه بس افهمك

رجعت خطواتي وتفيت عليهم..
-هاي راح تكون اخر خسارة الي وياك قيصر اخرر وحدة وهالمرة راح تدفع ثمنها غالي اما بالنسبة الج ست سمر حسابج دفعينه بس مو هسه

طلعت افووور وغضبي ما اعررف وين اطلعه تجاهلت صوت قيصر واخذت تكسي  طلعت للبيت بسرعة..
وشي واحد اعرفه وهو قيصر متقصد ورتبط بيها علمًا انُ هيه حبيبتي لان متعود ياخذ كُلشي احبه مني..

حاسبت الولد ودخلت للصالة.. جانوا امي وابوي كاعدين بالصالة يتابعون اخبار..

ماكو دقيقة ودخل ورايه قيصر وبدون ما يهتم حجه بتوسل..

قيصر- بس افهمك

مُخلد- صوتككككك ما اسمعه وشكلك القذرر ما اريدد اشوفهههه

ابويه سحبني لان الا شوي اخرب شكله ودين محمد وامي كالعادة راحت لقيصر!

-نفسكك الخسيسه شلوننن تقبلتهاا ولك شلوننن واخوك يحبها

ام قيصر- فهمونه شكو؟

مُخلد- ليش لا افهمج.. ابنج الكلب راح ورتبط بالبنيه الاحبهه شفته وهو يبوسها گدام عيوني
لبنيه الي جنت اجي كُل ليلة واسولفلج حُبي الها وشلون اريد اتزوجهاااااااا

ابو قيصر- صح هذا الكلام ولك؟

قيصر- ماااا جنت اعرف انُ هي تكون حبيبتك والله ليش مجاي تسمعنيي

مُخلد- بالعافية عليكم جدر دهده ولگه غطاه گوا* يلوك لساق**

عفتهم وصعدت لغرفتي اجمع ملابسي، هو شنو الي مخليني باقي لحد الان لا اب ولا ام بيهم خير وهسه اخويه طلع انكس منهم من انعل ابو هيج بيت لا ابو الي يبقه بيه..

سديت السحاب مال الجنطة وطلعت صادفت دخول امي للغرفة..

ام قيصر- وين رايح؟

مُخلد- بعد سوايت ابنج مالي مكان هنا

-اي اطلع بقائكم بنفس المكان وانتم مثل النار والبارود مو لصالحكم من تهدأ ارجع

شگد كسرني كلامها وتمنيتها حتى لو بالكذب تمنعني وما تخليني اروح في سبيل راحة قيصر؟
هزيت راسي وكملت طريقي الحجي وياهم ضايع..

قبل لا اطلع من البيت باوعتله..

مُخلد- انا الطالع وانتَ الباقي بَـس وعد مني يا أذيتك هاي ارجعها الك اضعاف

ومرت ؏ طلعتي اسابيع لا ام ولا اب سألوا، بس قيصر شگد حاول يوصلي وانه ابتعد ما اريد كلمة تجمعني بي..

بهاي الفترة فكرنه انه وحيدرا وبكر وايهم نسافر نكمل دراسه وهم نبتعد شوي وعرفت همه يريدون يبعدوني لان جانت بالي فكرة وحدة وهي الانتقام!

وجانت قيد العمل
قيصر توه بالسلك العسكر ومترقي ملازم اول ودبرتله تهمه حلوة بمساعدة صديق خسرته رتبته..

بيوم جنت گاعد بالشقة الي مأجرها ارتب بملابسي لان اليوم نسافر، ندگ الباب..

بس فتحته صار بوجهي..
قيصر- وهسه بعد ما انتقمت تگدر تسمعني

مُخلد- لا، لان ڪلبي بعده ما برد ولو اموتك هسه هم ما يبرد

-جاي تظلمني ومع ذلك احاول اشرحلك

-روح مين ما اجيت قيصر اي شي ما يجمعني بيك لا رابط ولا صله وحتى العراق راح اهج منه لان نتنفس نفس الهوه

فز مفزوع..
-شنو تهج وين رايح؟!!!

-يهمك؟

-طبعًا يهمنيي والله اذا تريد ترجع للبيت وانه اطلع هم موافق تريدني اطلع من المحافظة كلها ميخالف يجرالك

-واتحمل لوم امي؟ تحلم اخليك بمكان الخسران والمظلوم ولا عبالك حسابي وياك انتهه بخسارة رتبه وسفري لااه بعد هوااي راح تخسر بعد

-ميخالف كل خسارة منك اتقبلها وانه ممنون بس لا تسافر وگتلك الي تريده يجرالك!

-اي شي اطلبه تنفذه؟

-اي

طلعت تلفوني من جيبي وگلبت بالاستوديو حتى طحت بالاريده
درت الشاشه الي بيها صورنه انه وسمر بوضعيات حلوة تفتح النفس..

اباوعله بلع ريگ وگال..
-شنو تريد اسوي؟

-ما اعلمك شغلك بَـس اريدهن بيد خوانهه

-يأذونك؟

-گتلك شغلك ما اعلمك، وجهي ما يبين

-خاف يأذونها شنو ذنبها؟

-هههه لا تخاف طلعنه مغشوشين ولك هاي طابگه خمسه سوه يصرفون عليها فعادي ما يأثر

-مُخلد!!

-خلص روح ما اريد شي منك

ردت اسد الباب بسرعه دفعه وگال..
-موافق موافق دز الصور بس اليوم ارجع للبيت

-ميخالف

دزيتله الصور وراح ماكو ساعة وتم الاريده اخذت جوازي وجنطتي وطلعت للمطار، من بعيد شفت الشله كلها واصله..

حيدرا- ولك هلااا بالطش والرش

ايهم- ضلعييي

مُخلد- شرياني الابهر

بكر- شووف العارات من اجيت محد رحب بيه هيج

حيدرا- ليش انتَ تساوي روحك ويه مُخلدنه

بكر- ايبخخ ليش مُخلد بيش الكليو؟

مُخلد- غصبن ؏ ابوك گوا*

ايهم- ابوييه شعليييي

حيدرا- لان صار ابو عارات مثلكم فعليه ونص

بكر- بعيدًا عن الشقه، مُخلد احسك مرتاح صاير شي؟

مُخلد- عجييب! من ارتاح لازم صاير شي؟

حيدرا- مطي ما عرف يوصلك الفكرة قصده انُ انتَ جنت مزعوج ومزاجك معكر شنو الغيره؟

ايهم- وهسه انتَ وضحت قصد بكر عود؟

بكر- نجبوا وانتَ جاوب؟ ما مرتاحلك ولك شمسوي!

مُخلد- كل شخص اخذ الي يستحقه

ايهم- شتقصد؟

سولفتلهم مختصر ؏ الي صار وقبل لا اخلص صاح بكر بعصبيه..

-تخبلللت انتَ ولك ما خفت خوانها يأذونها للبنيه ضميرك راح يرتاح؟

مُخلد- اي

حيدرا- غلطان مُخلد مو هيج لو تاركهم لربك وهو ياخذ حقك ما كافي لسويته باخوك؟! لا والله قصرت

مُخلد- والله ناري ما طافيه بعدها ولو ابقى بالعراق اكثر راح تحرگهم

ايهم- قليل السواه ليش مستهانين بالموضوع تره الخانوا مو غربه اخوه وحبيبته وانا لو بمكانه اذبحهم بمكانهم وما اكتفي

بكر- نجب لا تهوبز انتَ الثاني

هز ايهم بايده وسكت وانه هم ذبيتها صامت منا لم صار وقت رحلتنه وطلعت من العراق تارك كلشي وراي...

همسه- وشصار بعدين؟

مُخلد- اربع سنوات بالغربة والعرفته انُ سمر اهلها مزوجينها لرجال چبير بالعمر يصير صديق ابوها ورجعت قبل سنه من وفات امي بعد ما عرفت بمرضها

-شلون قابليه عدهم يربي!!!

سكت اباوعله مقهور ورغم السالفه مرت عليها اكثر من خمس سنوات تحسه عبالك امس عاشها، حطيت ايدي ؏ ظهره ومررتها بهدوء..

-وتشاء من السماء نجمة ويشاء الله ان ينولك القمر، ربك كاتبلك الافضل لا تضوج فدوة

التفتلي مبتسم وهمس..
-انتِ

-شنو؟

-انتِ هدية ربي

دنگت خجلانه وهو تقرب بوس خدودي وعبالي راح يبتعد بس بقه قريب
انفاسه الدافيه تضرب بخدودي وايده يتلمس بيها فكي، تصرفته خلت گلبي يرجف، سديت عيوني بقوة من باسني متلهف..

ضعفي بقربه ورجفتي ما اگدر افسرهه، دفعته من صدره من حسيت النفس انگطع بس ماكو ابتعد خمس ثواني ورجع باسني بلهفه اكبر يحضني اله بقوة وكأنوا يريد يدخلني بين ضلوعه..

حط راسه برگبتي يتنفس بقوة وكُل شوي طابع بوسه صغيرة..

مُخلد- روحـي بَـس يمج ضعيفه

-مُخلد

-يا شريانه الابهر المُخلدج

-جوعانه!

ابتعد باوعلي موسع عيونه..
-جاي اتغزل بيج اذا ملاحظه؟

-بس اني جوعانه!

-دنعل ابو الغزل اليخلي مرتي جوعانه تعالي اترس كرشج

-ياااا ما عندي!!!!

-شو بله اشوف

حط ايده يتلمس بطني واني متت من الضحك لان اغار وشفت مزاجه تعدل ويضحك لضحكتي..
فرحت بهذا الشي هوااااي لان گدرت اغير مزاجه..

يتبع......