ادمنت حدة عينيه

بارت 4

وتتونس انته من احترگ

وعطابي لمن يوصلك

تبتسم وتطفيني

كل هذا وانه اشتاگلك

كل هذا وانه اتلهفك

كل هذا وانه اتذكرك

جا گلي شينسيني

*********†*********†********

فاتنه ـ يفرك بظهره حيل متوجع صح انقهرت عليه وهو ما اله ذنب

بس خلي يشوف شلون عانت بسببهم جبت قطع ثلج خليتهم بفوطه هاك اخذ برد المكان ما صار شي

نائل ـ ههههه اي حقج ما صار شي مووو جيبي يلعن اليوم اللي فتحت گلبي بيه واستقبلج

فاتنه ـ هههههه اعتقد هاي مشكلتك مو مشكلتي گلبك تفتحه تسده هذا الموضوع راجعلك وخرت شعري ورا اذني مشيت من يمه جرني حيل وباسني بشفتي

گلبي صار يدك سريع اختنگت دفعته ماكو صرت احرك برجلي وايدي ماكو ما يعوفني

عيوني صارن يتقفلن من وحدهن وگلبي وجعني حيل ضغطت ايدي حيل وضربته وخر مني گعدت بالگاع حتى ما اگدر احجي

صرت افرك بگلبي حيل ومنا گالوا عندي قصور بالرئه گوه اجر النفس اختنگت كلش اشرتله على الجهاز على الميز بالصاله ما افتهمني گوه طلع صوتي گتله الجهاز

ركض جابه ايدي ترجف وروحي رايحه گوه اركز سحبت ابره وزرقتهه بالجهاز واني عيوني تغمض وگوه افتحهن

سحبت الجهاز اريد اخليه على وجهي ما سيطرت وگعت بالگاع

شوي وحسيت الجهاز على وجهي صرت اسحب نفس قوي اريد املي ريتي هوا ماكو ايدي منمله

فتحت عيني گوه بس شوي ورجعت غمضت ما شفت شي منو يمي

اخر شي تذكرته اني بباب المطبخ الداخلي وگعت گعدت الجهاز بعده على وجهي واني بالغرفه وبيبي يم راسي تقرا قران وتمسح بدمعته

رفعت الجهاز اكدر اتنفس شبه طبيعي صحت  وصوتي رايح يوم

ام سليم ـ ها يمه گولي

فاتنه ـ تعبانه تعالي يمي لميني بحضنج محتاجتج

ام سليم ـ يمه يبعد روحي روحج

فاتنه ـ اجت بيبي تمددت يمي ضميت راسي بصدرهه وبجيت من جرأته وياي لعبانه نفسي منه

شلون هيج يسوي بيه حسيت نفسي وحده قذره لان ما گدرت ادافع عن نفسي بوقتهه

رغم كلشي صار بسرعه جرني وباسني وطوقني باديه بس كرهت نفسي من بين تفكيري گالت بيبي

ام سليم ـ شصار وياج يوم اجيت للمطبخ وشفت نائل مخلي راسج بحضنه وينطيج الجهاز

ويگلج اتنفسي وانتي تنتفضين بيده مثل الطيره المذبوحه منو غثج وقهرج

فاتنه ـ بيبي هذا ابن اخوج مو زين والله خلي يروح ما نريده بيبي اني كارهته تعرفين شنو كارهته اموت منه

ام سليم ـ لا حبيبتي يوم والله نائل ورده وهاي كم مره يحجي وياي يريدج بس انتي حاقده عليه اني سامحتهم وانتي حاقده عليهم ليش

فاتنه ـ ليش سهل علي من جنت اشوف دمعتج تنزل لو حسراتج وقهراتج

لو من اخوات جدو يحجن ويگولن الفصليه من يمي اندمر شلون بيج انتي

ام سليم ـ ههههه عادي يا بنيتي عادي ما طول جدج ما يهمه هيج شغلات اني وياه ما يهمني صح انقهر شوي بس كلماته بلسم الي

فاتنه ـ ليش تسكتين وتخلينهم يتجرأون عليج اني احبج والله واشوفج احلى منهم كلهم انتي انقى بشر شفته

من اليوم ورايح والله اللي يدوسلج على طرف اشلع عينه وتشوفين

كافي كل هاي السنين نشوفج ونسكت الى متى كلهه تتجرأ ليش واذا فصليه شنو بيدج اجيتي

لا بسبب ناس ما عدهه ذرة ضمير ليش ما تحجون السبب ليش مخلينه باقين على عمى عيونه ما نگدر ندافع لو نحجي ليش

احجي وابجي وبيبي تمسح براسي وتبوسني بيبي فدوه احجيلي شلون اجيتي وشلون خلوج تعانين بسببهم

ام سليم ـ صعبه يا يوم صعبه يمكن حتى تحقدين على جدج اذا عرفتي

فاتنه ـ لا ما احقد عليه هو حبيبي وابوي وعندي بالدنيز احجيلي وريحي بالي والله عقلي ما جاي يستوعب شي

تدرين اخاف لا يجي يوم واحنه نصير بمكانج
ساعتهه شلون نتصرف نتغاضى ونشبع اذيه لو نحجي ونحصل كل الاذيه

بس يا ترى راح تصير عدنه بنيه لو حفيده ممكن تدافعلنه

جاي اقرا قصص هواي للفصليه والله يبجون الگلب مو بس العيون واني اتخيل انتي مريتي بكل هذا شنو گال گلبج ساعتهه

ام سليم ـ حبيبتي بنيتي انتي تدرين انتي احن علي حتى من بناتي ما تشوفيني اخاف عليج اكثر منهن

واخاف لا سامح الله يجي يوم وتصيرين بمكاني ساعتهه يمكن ما ابقى عايشه

فاتنه ـ خليت ايدي على حلگهه لا يوم لا اسم الله عليج من عمري على عمرج افديج بروحي والله

ام سليم ـ راح احجيلج بس وعد يبقى بيناتنه ما تحجينه لاي بشر لما ينكشف كلشي گدام الكل مفهوم

فاتنه ـ مفهوم بس بردي گلبي والله احس روحي مشتعله نار

ام سليم ـ هيه تبدي من جان عمري 15 سنه جانت عندي اخت اكبر مني بسنتين اختي تحب اخو جدج هيج واحد يموت على الثاني

صار يدز ناس على ابوي حتى يوافق عليه وماكو ابوي قافل الا يزوجهه لابن عمي واختي معارضه

وابن عمي ناهي عليهه الا هيه من دون كل بنات العشيره

جانت حلوه العيون كبار والوجه مدور والشعر اسود ليل ويه خصرهه اااي الله يرحمهه

فاتنه ـ حلوه اختج تجنن

ام سليم ـ اي صدگ تجنن جان قبل عدنه نوصل للخامس ابتدائي ونبطل ماكو مدارس قريبه بس بعيده

الولد يكملون والبنات تبطل وهيه بعد من بطلت جانت عدنه مزارع خير من الله ويشتغلون بيهه فلاحين

واحنه العصريات نطلع نتمشى جانوا اهل جدج ويانه من نفس المنطقه صح زراعيه بس ناس لهجتهم مو مكسره لا

لان اكثرهم دكاتره ومهندسين عشنه احلى عيشه ابوي مدللنه دلال ما صاير يمكن احنه اكثر بنات العشيره مدللات

حتى بالبيت نسوان الفلاحين يشتغلون بحيث هاي الورقه لو بالگاع ابوي ما يخلينه نشيلهه اني جنت بالختلات اتعلم منهن الطبخ

فاتنه ـ بيبي شنو اسمهه اختج

ام سليم ـ اسمهه مليكه جانت اكبر وحده بيناتنه احنه البنات احنه اربعه اخوات و 3 اخوان ليش ما بيوم العصر طلعت بس مليكه للبستان

طلعت وراهه واشوفهه واگفه ويه واحد بس بعيدين عن النظر

الا اذا واحد راح للجهه الثانيه يشوفهم ورا الشجر رحت اركض الهم وشفتهه گاعده بحضنه ويسولفون

صحت بيهه وما اگلج نظراتهم شنو صارت خوف على ارتباك على توسل گتله رايدهه اطلبهه من ابوي مو تتختل بيهه بنص الزرع

لو شايفينكم الفلاحين شتسوون وننفضح وسيرتنه تصير على كل لسان هو ما گال شي گال يومين واهلي يمكم

فاتنه ـ اي يعني هسه اخو جدو جان يحب اختج اذا صدگ يحبهه ليش ما طلبهه من ابوج ليش هيج يختلي بيهه حرام ما يجوز

ام سليم ـ اي يمه صحيح من بعد هاي السيره اختي ما تخلي عينهه بعيني ابد گلتلهه بعد اذا شفتيه وحدكم اگول لابوي

هنا هيه بعد ما طلعت للبستان اسبوع واخو جدج ما خلا ناس ما دزهم على ابوي وعمامي ما قبلوا على ابو شنو بتنه ما تروح للغريب

وهنا واحد من ولد عمي نهى عليهه والمعروف بذاك الوكت اللي ينهون عليهه لازم تاخذ اللي نهى عليهه لو تبقى بدون زواج طول عمرهه

فاتنه ـ بس هذا حرام واجبار ما يجوز وابوج شنو كان رد فعله

ام سليم ـ ابوي من بعد ما نهوا عليهه بيت عمي لابنهم رفض اخو جدج وكلما يجيب ناس يرفضهم

لان ابن عمي شراني وكلشي يسوي ابوي خاف عليه لا يصير بيه شي

وكم مره گله ابتعد لا تصير نهايتك هاي الزواجه وهو قافل عليهه الا هيه

ابوي شك بيناتهم علاقه لان ما معقوله هذا الاصرار كله عليهه وهيه الباب ما تطلع منه

فاتنه ـ يعني هسه ابوج الله يرحمه هم جان سبب باللي صار كملي كملي

ام سليم ـ الله يغفر ذنبهم المهم صار ابوي يراقبهه واني اگللهه ابوي جاي يراقبج وهيه اذن طين واذن عجين هيج كلش

صاروا يلتقون بالليل من بعد ما كلهه تروح لغرفهه هيه تطلع للبستان تشوفه وترجع

ليش ما بيوم ما شفتهه دورت عليهه البيت كله ماكو وابوي جان رايدهه گتله نايمه گال كعديهه

شلون اگعدهه وهيه بنص البستان طلعت من الباب الخلفي وركضت للبستان لمكانهم اعرفه وصلت يمهم ويا ريتني ما وصلت اثنينهم بحاله استغفر الله ربي

فاتنه ـ يعني بعلاقه كزوج وزوجه قصدج مو

ام سليم ـ اي يوم اي جريتهه من شعرهه واخذتهه لابوي بسرعه رتبت نفسهه ودخلت هو گاللهه بعد يومين خطبتج من ابن عمج وهيه تخبلت

لا خلت بواجي لا لطم لان بعد ما يفيد هيه مسلمه نفسهه لهذاك شلون لو انكشفت ساعتهه تموت وسمعتنه تنتهي

راح ابوي لغرفته وهيه ذبحت نفسهه من البجي زين اني اعرف لا اكدر احجي وساعتهه يذبحوني ويذبحونهه

بقيت ساكته ثاني يوم بالليل كلهه نايمه گعدنه الصبح ما لگيناهه شارده من البيت

فاتنه ـ يا عزااا شلون هيج تسوي فضحت نفسهه بنفسهه

ام سليم ـ اي يمه بس ابوي ما گال لاحد بس لاخوتي وحذرنه محد يحجي لا لعمامي ولا اي احد

راح على ابو جدج گله ابني مسافر من يومين الظاهر جانوا حاسبيلهه حساب طلعته وطلعتهه هو وياهه

رجع ابوي وجهه اصفر ما ندري وين راحت اجوا عمامي يطلبونهه ابوي اجلهه شهر

گللهم البنيه مريضه ودزيتهه لخوالهه ببغداد من تصير زينه تجي ونسوي الخطبه

فاتنه ـ خطيه والله شنو من موقف الله يساعد گلبه

ام سليم ـ اي اااه يمه ساعته ورا 4 ايام اخواني ما بقوا مكان ما دوروهه بيه وماكو

وبيوم جنه نمشي بالبستان العصريات جانت عدنه خرابه تاركينهه وابوي مخلي بيهه اثاث قديم

طلب من اخواني يطلعونه حتى يبيعه واحنه نتمشى جابوهم اثنينهم هيج بالملابس الداخليه من الخرابه

واحد من اخواني طلع مسدسه وقتلهم اثنينهم ابوي ما لحگ عليه وهنا بدت ويانه

الناس عرفت واهله ما خلوا احد كلهه بانواع الاسلحه فلشوا بيتنه تفلش حاولنه نشرد لبغداد

طوقونه ورادوا يكتلون ابوي واخواني لو ما فديناهم اني وامي واخواتي

ساعتهه جدج جان فاير دمه على اخوه ومن فديت ابوي كتلني كتلة موت وامي واخواتي وكلنه صرنه ما ندري منين يجي الضرب همه 20 نفر واحنه بس 8

حبسونه بالخرابه مالتنه لا اكل ولا شرب 3 ايام لما گالو گعده وكلهه تحضر يردون فصل

اتجمعت ناس ومن كل العشاير جان بوكتهه الفلس يحجي اخذوا املاكنه كلهه وبقولنه بس البيت ووياهن ياخذون فصليه

جانن اخواتي صغار واذا ما وحده تروح فصليه ينكتلون ابوي واخواني

اخواتي جانن وحده 10 سنوات ووحده 7 سنوات مو مال يرحن فصليه ابوي گال ما عندي غيرج بويه اخواتج يموتن جواهم

فاتنه ـ ااااي وانتي وافقتي مووو

ام سليم ـ اي طبعا ولا اخواني وابوي يموتون امي واخواتي منو الهن بعد وبهيج لازم يعوفون المحافظة ويطلعون لغير محافظه حتى لا ينهدر دمهم

واذا بيوم دخلوا للمحافظه ينكتلون وشرطوا عليهم لازم 30 سنه ما يجون لهنا وبيومهه اخذوني

ما اگلج امي جهزتني جذب رحت بدشداشتي السودا وحجابي وعلاگه حتى مو جنطه بيهن 3 لبسات وعبايه على راسي

اخذوني عقدلنه الشيخ اني وجدج وهنا بدت وياي اصعب معاناة جدج ما متقبلني ابد يطلع يدخل يغلط ويسب

امه واخواته واخوانه كلهه تكتل بيه على ابو بسبب اختي ابنهم انقتل

صرت اتحمل ابشع الالفاظ والسب والشتم والكلمات المو زينه ومن يجي جدج لا يخففون معاملتهم القاسيه وياي

لان جان فارض هيبته وشخصيته عليهم ليش ما بيوم من الايام اجه واحد من ولد عمهم وشافني بالمطبخ اشتغل

صار يتقرب مني واذا اطلع صوت يطلعوني مو خوش ردت ربي ينقذني بكل طريقه واني اتوسله وهو ابد يگلي فصليه حالج حال السلعه

بيومهه دخل جدج وشافني شلون اجر بنفسي منه وهو يريد يعتدي علي گام شاله وضربه بالحايط

فاتنه ـ ااااي عفيه بجدو البطل

ام سليم ـ هههه اي بطل بطل ساعتهه عمامه كلهه گلبت الدنيه گللهم هيه زوجتي ومحد اله يمي شي وانگلب الديوان بوقتهه بالحجي علي

على ابو مو شريفه وحالهه حال اختهه هم لابد جانت مصاحبه وماخذين شرفهه

هو بساعتهه انطوه مهله نص ساعه يثبتلهم اني زينه لو لا

دخل علي للمطبخ واني اجهز بالجاي ياخذونه جرني من ايدي واخذني للغرفه وقفلهه وصار اللي صار من بعد بواجي وتوسلات اخذلهم النيشان وطلع

ومن ساعتهه سكتوا عني يومين ورجع الحجي من اهله امه واخواته واخوانه

فاتنه ـ يعني هو هم يعني اعذريني ولو تدخل وعيب احجي هيج بس يعني تقربلج بعد هاي المره لو لا

ام سليم ـ لا ابد لما وراهه بشهر بدت وياي اعراض الحمل وساعتهه زاد الشغل علي حتى بلكي يصير بيه شي لو اسقط لو اموت

من يطلع حتى ضرب يضربوني ومن يرجع لا ابد مجرد يتأمرون لما صارت عندي ولاده وصار عندي سليم يله سكتوا شوي على ابو جبتلهم حفيد ووريث

هنا جدج شافني لو شنو يسوون وياي ما احجي صار وياي ضدهم

وراهه بسنتين صار ساجد وراهم ابوج بسنه وبعدهم سمير هنا تقريبا خفت علي كلمة الفصليه

جدج وقتهه گال هاي هيه نكتفي بيهم وقرر نطلع من بيت اهله نسكن بالموصل بعيد عن كل الناس

شگد خطيه حاول يجيبلي اخبار عن اهلي ماكو اي خبر سنين وماكو خبر

صرنه منطقتنه بيهه كل الاطياف جيراني شيعيه والثانيه سنيه والگبالي ايزيديه ومن غير الكلدان والاشوريين متنوعين يعني حتى صابئه جانوا اكو

بس هيج معدودين وراهه الصابئه تركوا بيوتهم وراحوا للجنوب قريب على اهاليهم

فاتنه ـ حضنتهه وامسح بدموعهه يروحي انتي كملي كملي

ام سليم ـ اي من مر على ولادتي بسمير 10 سنوات هنا صارت ساره وجدج ما واسعته الدنيا وراهه ب 3 سنوات جمانه وراهه جمار بسنتين واكتفينه

زوجنه سليم واني حامل بساره وزوجنه ساجد وراه بسنه وابوج وراهم ب 6 اشهر هيج صاروا عندي هواي بنات

شلتهن على گلبي واخاف عليهن من الهوا لو مر لما كلهه صارت عدهه اطفال وراهه زوجنه سمير

وهنا جدج حن وراد بعد وصارت بيدق وراهه ب 3 سنوات انتي صرتي

ومن امج تعبت بنبأ اخذتج الي وهيه من البدايه تعبانه ويه اخوانج ربيتج يوم يوم وساعه ساعه

فاتنه ـ يعني هسه سبب دمارج ابو نائل مو

ام سليم ـ لا بالعكس ابو نائل جان معارض اروح فصليه وگللهم خلي يقتلوني بدالهه ولا اختي تموت بين اديهم

واخوي اللي قتلهم اتوفى من 7 سنوات نائل گال كلشي وهو صدفه جان يدور على شغل وجدج مشغله ويسولف عليه

لما بيوم اخذني للسوك وشفته بيه شبه من اخوي محمد بشبابه صرت اسأله وهو يجاوب لما عرفته ابن اخوي

صرت اسأله عليهم ومن رجعت ترددت احجي لجدج لان اذا عرف احتمال يبطله وهو محتاج هاي الشغله لان جاي يدرس هنا

وراهه ب 6 اشهر حجيت لجدج وهو اتقبل الموضوع وصار بالعكس يسانده مو يأذيه وواگف وياه لان نائل كسب جدج باسلوبه وتعامله واخلاقه

فاتنه ـ يعني هسه اني غلطانه بحقه مو

ام سليم ـ اي حتى ضربتج اله اليوم مو حلوه

فاتنه ـ بس يا بيبي

ام سليم ـ لا بس ولا ابد يوم ترا نائل رايدج بالحلال ومو هسه گال انتظرهه تكمل وهو هم يكمل بس يعني هسه يخطبج وتعقدون بس لا غير

فاتنه ـ بس اني ما اريد هيج اني اريد اعيش قصة حب ويه شخص احبه ويحبني مو حب من طرف واحد

ام سليم ـ لا يوم الحب بهذا زمنكم مو حب فطري حب هاي الشباب حب غريزي

يحبون بالبنيه مو گلبهه لا جسمهه ومو كلهم لان حتى لا نظلم البعض

شفتي هاي قصة اختي رغم جنه عايشين بزمن لا انترنت لا انفتاح جان كلشي بالحسره وشفتي اللي صار بوقتهه

صار دمار عوائل بسبب نزوه اني اخاف عليج يوم انتي بريئه ونقيه

مو مال تعيشين قصه حب يجي يوم وينكسر گلبج ساعتهه ما تأمنين بأي بشر

فاتنه ـ ان شاء الله حبيبتي طلعت بيبي واتصلت بجمانه حجينه شوي وغلقته ومرت الايام

اليوم اول يوم مدرسه طبعا قبلهه باسبوع طلعنه اني وبيدق وميس نحضر ملابس للمدرسه واحتياجاتنه

دوامي يكون من بيت اهلي المدرسه قريبه عليهم ونطلع اني واخواتي مدارسنه متقاربه بيدق انقبلت صيدله وجمار خريجة هندسه

تقدملهه استاذ جامعي واجت تاخذ رأينه بالموضوع لان هيه متخوفه من كلشي تخاف لا بعدين تصير مشاكل وهيه ما تلزم لسانهه وتگب العيطه ههههه

رجعوا خبر هيه موافقه وتمت خطوبتهه الحمد لله
اول يوم مدرسه الصبح تحضرنه اني واخواتي نطلع بابا ياخذنه بطريقه وصلنه وبدت الدروس

ميس عادت السادس اكثر من مره تريد تطلع معدل عالي كملنه دروسنه ورجعنه للبيت بين تحضير الدروس وكتابة الواجبات اتصل علي جدو

ابو سليم ـ ها فتونه شلونج باباتي

فاتنه ـ الحمد لله حبيبي انتم شلونكم مشتاقتلكم والله

ابو سليم ـ واحنه اكثر بويه اهتمي بدروسج وبعطله اخر الاسبوع اجي اخذج

فاتنه ـ تمام يروحي

ابو سليم ـ مصروفج جاي يكفيج لو لا

فاتنه ـ الحمد لله مكفي وزياده

ابو سليم ـ يله باباتي كملي دروسج وصيري سباعيه مثل كل سنه

فاتنه ـ ان شاء الله قفلت التلفون وبديت اقرا گلبي تقريبا استقرت نبضاته وشبه طبيعي صار بس القصور اللي بالرئه مأذيني كلش

اذا بيوم تراب لو دخان لو شوي رطوبه اختنگ كلش ومسعفي الجهاز وبالمدرسه للاحتياط اخذ وياي بخاخ

مر هذا الاسبوع ورحت لبيت جدو يومين ورجعت وهيج لما صارت امتحانات نصف السنه امتحنت والحمد لله مجاوبه وهاي العطله اخلصهه ببيت جدو

اجه نائل ياخذني جدو دازه بدلت ونزلت لان ملابسي ببيت جدو غير عن ملابسي ببيت اهلي

لبست بنطلون اوف وايت وقميص ابيض وستره اسود وشوز اسود

صعدت بالسياره ذبيت النظاره بالجنطه وطلعت تلفوني والهتفون رفعت عيني شفته مبتسم رديتله الابتسامه

نائل ـ شلونج

فاتنه ـ الحمد لله زينه

نائل ـ دوم يا رب مجاوبه زين

فاتنه ـ هههه اي بس ما اعتقد هذا الشي يهمك مو

نائل ـ امممم صحيح بس حبيت نكون اصدقاء لا اكثر

فاتنه ـ ما اعتقد صداقتي وياك راح تسعفك حتى تنول مرادك صدگني اني اصعب من اللي تشوفه گدامك

نائل ـ تمام براحتج

فاتنه ـ شغلت موسيقى هادئه وبقيت استمع لما وصلنه للبيت ردت ادخل جرني من ايدي گلت نائل بلا هاي السوالف عوف ايدي

نائل ـ اسف على اللي صار قبل فتره ما اعرف شلون ما سيطرت على نفسي وقتهه

فاتنه ـ تمام بس اعتذارك ما مقبول ويا ريت بعد هاي السوالف ما تعيدهه لان ساعتهه تشوف جدو بوجهك مو اني

وبيبي اذا عرفت ما اعتقد راح تبقى صورتك حلوه گدامهه فخليك حباب رجاءا وكلشي اله حدود اني محرمه عليك وانته محرم علي فياريت تحترم هذا الشي

نائل ـ ان شاء الله

فاتنه ـ جريت ايدي منه ودخلت شفت بيبي حضنتهه وبستهه مشتاقتلج ست الحبايب گعدت يمهه شوي نسولف ونضحك دخل نائل باسهه براسهه وحضنهه

طلعت من الصاله رحت للغرفه فوك بيدق نايمه وجمار تسولف ويه الحب بدلت ونزلت شفته ماكو وبيبي وحدهه شافتني ابتسمت

ام سليم ـ شلونج يوم

فاتنه ـ بشوفتج اني بخير خليت راسي بحضنهه يوم مشتاقه لحضنج والله

ام سليم ـ حبيبتي بنيتي واني مشتاقتلج يروحي شلونج بالامتحانات

فاتنه ـ الحمد لله مجاوبه رفعت راسي بيبي ليش جمار تريد تسوي العرس هسه

ام سليم ـ مو هيه ماما بس الولد يكول بيبيته تعبانه ومو مال يأجل وهمه طولوا الله يسهللهم هيه جهزت كلشي شوكت تروحين تشتريلج شي للحنه للعرس

فاتنه ـ بعد يومين نطلع اني وبيدق وساره

ام سليم ـ الله كريم شنو جاي على بالج تاكلين اليوم

فاتنه ـ بس لا تضحكين علي مشتهيه برياني دجاج هيج من اديج الحلوات والدجاج مقرمش يميييي هيج يجنن ولبن

ام سليم ـ ههههه تتدللين يله گومي وياي نحضر واعلمج

فاتنه ـ يسسسس يله وگفت يم بيبي وهيه تشتغل عادي واني من بعيد اشمر الدجاج ويطش الزيت على الطباخ وابقى اصرخ وهيه تضحك

لما شوي شوي تعلمت كملنه الغدا وانتظرنه جدو اجه وحضنته مشتاقتلك حبيبي جدوتي

ابو سليم ـ بويه هلا بنور البيت هلا ببنيتي هلا بشمعه بيتي شلونج

فاتنه ـ بشوفتك صرت احسن يله غسل وبدل ترا جوعااانه كلش اليوم الغدا برعايتي

ابو سليم ـ هاااا منج من الشيطان تتعلمين تطبخين

فاتنه ـ هااا جدو هاااا بطلت بعد ما اتعلم ها هيه شنو هاي لهالدرجه مستهان بيه ترا اني مره معدله

ابو سليم ـ ههههه لا والله مو مستهان بيج انتي زينة البنات بس استغربت صراحه مو عوايدج

فاتنه ـ اي بعد لا تستغرب بيبي جاي تعلمني شوي شوي

ابو سليم ـ هيه بيبي معدله وين اكو منهه

فاتنه ـ لا تبدي بغزلك گدامي يله بدل عفيه والله جوعانه صاعده اگعد دودو وجمور صعدت حضنت بيدق ونمت يمهه

صرت العب بخشمهه واجر برموشهه وهيه تضرب بيه لما گمت جريتهه من رجليهه وگعت بالگاع صرخت

بيدق ـ ااااخ لج حماره شنو هالتصرف الارعن اذيتيني

فاتنه ـ هههههههه شوفي شكلج اااخ يمه بطني عطوبج للظالين وبرمودتج واصله لانطاليا

بيدق ـ ههههه انجبي حقيره يله ولي بعد ما احجي وياج

فاتنه ـ حضنتهه لج اموت عليج دودو يله تعالي نتغدا خلي اشوف جمور بعد طلعت رحت لجمار تراسل وتضحك خاب هلووو جمور شلونك ضلع

جمار ـ ههههه هلا بالرجال المعدل هلا بالهيبه هلا فاتنهم

فاتنه ـ امشي وارفع ياختي وهيج نفخت نفسي وامشي مثل الضباط وضحكت لج خرب ولا اسيطر على نفسي گدامج لازم اضحك طارت الهيبه وعلي

جمار ـ ههههه افديك ضابطنه

فاتنه ـ احم احم يله تعال وليدي تغدا اليوم الغدا برعايتي اني طبخت

جمار ـ جذااااابه

فاتنه ـ هههه والله گليت الدجاج بس شنو هلاااا صار الزيت بحر على الطباخ لما تعودت وبيبي بس تضحك علي

جمار ـ ههههه اي مو اگول اذا ما تخربين ما يتعدل مزاجج

فاتنه ـ يسسسس يس يله غدا راح تموتوني جوع ومنا جدو قافل غرفة الرياضه شلون بيه ها

جمار ـ الله يخليج عوفينه ما نريد لا رياضه ولا رجيم جسمج حلو خلص اسكتي واستري علينه ما بينه حيل هبطات

فاتنه ـ عابتلج يله انزلي نزلت قبلهن حضرت ويه بيبي وگعدنه على الميز ناكل كلنه جدو اتصل بنائل حتى العصر يطلعنه للسوك

اشرتله على باجر رجع اتفق وياه على باجر كملنه الغدا ورتبنه المطبخ وصعدنه لغرفنه ما شبعانه نوم نمت لان حيل تعبانه

**********†*********†*********†****

حبايبي علقوا على الفقرات

وصوتوا على البارت حتى تصعد القصه

تابعوني على الانستا