ادمنت حدة عينيه

بارت 2

يا التحيرني وتغثني ببرودك

اظن فرگاك اهون من وجودك

ما حرگتني نارك بالعكس لا

اني المحترگ گلبي ببرودك

********†*******†*********†*****

فاتنه ـ هاي بيبي اللي خلصت عمرهه كله تسكت على كلمة الفصليه بسببكم انتم اهلهه

ورقتك احترگت نائل الا اندمكم انتظروني والله لاصير كابوسك الحقيقي ركضت حيل وازيد برفع الدرجه

شنو نيتكم بهذا القرب هسه تردون تدمرونهه مستحيل اخليكم والله

والبنات ما اگدر هسه احجي شي اخاف عليهم بيدق خوافه لابعد حد وجمار عصبيه نار

وجمانه لا تخرب فرحتهه لو ساره اللي مستعده تتخلى عن كلشي لخاطر امهه

جريت نفس بسيطه نائل بسيطه الا اخليك تفكر الف مره قبل لا تتقرب يمهه

بيدق ـ كافي فتون كافي شوفي حالج شبيج تخبلتي لا يوگف گلبج

ترا انتي مو سمينه والله جسمج حلو لا تخلين الكلمه تأذيج وتأذين نفسج

فاتنه ـ انتبهت الجهاز طفى گلت لا حبي دودو والله عادي ترا بس اريد اضعف احسن

وهسه اكلت ككو وعسل يعني سعرات زياده وبعدين الركض نشاط يله اروح اسبح واجي بستهه بخدهه

بيدق ـ ماشي يروحي روحي ارتاحي

فاتنه ـ تمام عمري رحت للغرفه حضرت المنشفه والروب اخذتهن ورحت للحمام احس المي جاي يزيل همومي

كملت وطلعت نشفت شعري بالسشوار ورتبته
لبست برمودا ماروني وبدي ربع ردن اسود ورفعت شعري

رطبت ايدي ووجهي ونزلت بيدي تلفوني شفت ساره دخلت ركضت حضنتهه يروحي سارونتي

ساره ـ يمه فدوه لگليبي شلونج

فاتنه ـ تمام وانتي وين عموره

ساره ـ بقى ويه ابوه العصر يجيبه كافي كبر بعد هههههه

فاتنه ـ لا ليش ما جبتيه وياج خلي شوي نلعب سوا

ساره ـ والله ما هانلي اگعده خلي يشبع نوم السنه مدرسه الله يعيني عليه

فاتنه ـ ههههه عادي ترا شنو ماكو نونو جديد وأأشر على بطنهه

ساره ـ هههه جاي افكر رغم الملحه بس خلي يخلص العرس يله اي شنو جبتوا للحنه للعرس

فاتنه ـ كلشي جبنه حتى الج فساتين اثنين اسود والثاني ابيض وبيه ورد وحجاب مثل اللي تحبينه

ساره ـ اروح فدوه للي يذكروني ردت عود اليوم اروح اشتري يله بعد وفرتوا علي طلعة السوگ

فاتنه ـ ههههه تتدلل يا حلو

بيدق ـ والله يا ساره بقت تلح وشنو بس احنه وليش ساره خطيه

جمار ـ اي والله صدگ لو گالوا الفيله حنينه

جمانه ـ اي والله موتتنه بالملحه

ساره ـ هههههه بنيتي فتونتي لا تگلولهه فيله والله تجنن اكثر وحده جسمهه مرتب بيجن شو طول وجمال

فاتنه ـ اي فهميهن والله ملتزمه بالتمارين بس هنه مو يخربطن يحجن علي الفيله والفيله

ساره ـ والله ازعل عليجن اذا گلتن فيله غير باجر الخطابه توگف بالباب

بيدق ـ هههههه اي والله عنسنه بعد

جمار ـ هههههه غير كون يجي الامير ويليام وياخذهه

جمانه ـ والله صراحه غير فتونه حلوه ليش الجذب بس احنه متنمرات بزياده

ميس ـ تحياتي للمتنمره يله شوكت تنظفين جسمج

جمانه ـ منظفته واليوم اروح للصالون اسوي جلسة تنظيف بشره لوجهي

جمار ـ منو يوصلج

جمانه ـ نائل قابل منو

فاتنه ـ من ذكرت اسمه گبيت نار گتلهه

لاااا خلي باقر ياخذج مو الا نائل ولدنه خير من الله واذا تردين مجاهد ياخذج

جمانه ـ ههههه عود انتي ليش تكرهينه

فاتنه ـ بگلبي شنو اگلج هو ابن خالج اللي باع اخته وخلاهه تعاني كلام الناس الجارح گلت

لا شنو اكرهه بس احسه شايف نفسه هيج خشمه تحسينه واصل للسما

جمار ـ ههههه يله اي واحد بس اخذوني للصالون وياكم

ميس ـ اني ما اروح اليوم ارجع لاهلي وباجر العصر اجي قبل الحفله حتى اروح الظهر للصالون ويه امي وارتب البنات

بيدق ـ واني ماسكاتي ومقشراتي موجوده على شنو رايحه

فاتنه ـ واني وياج دودو

ساره ـ واني مشتاقه لامي روحن انتن اثنينجن

جمانه ـ ماشي يله جمار خلي اشوف منو يوصلنه ونروح

جمار ـ اريد اصبغ شعري

ساره ـ لا يعمري والله شعرج يجنن لا تخربينه بالاصباغ

فاتنه ـ اي والله وبعدين شعرج مو اسود فاحم ترا حلو

ميس ـ اي والله صحيح اذا كلش سوي خصل

جمار ـ قنعتني احييجن على تفكيرجن

جمانه ـ ههههه يله راح اروح اشوف منو ياخذنه حتى بعد ساعتين ننطلق

جمار ـ ماشي

فاتنه ـ صعدنه فوگ لغرفتنه اني وبيدق وويانه ميس وساره بقت جوا ويه بيبي يسولفن عبالك اخوات مو ام وبنتهه

صرنه ننظف هاي اللي تقشر وهاي اللي ترتب حواجبهه لما صار العصر كلش قريب المغرب نزلنه وجوهنه تلمع لمع استلمنه ساره صارت تخبل

جمانه ـ يله جمار نائل ياخذنه

جمار ـ خوش يله بس اگلج هاي فتينه شبيهه متخبله من الولد شو حتى صوت ما اله من ياخذنه

جمانه ـ يوووو هسه ما تعرفينهه يا عيني هيه تضوج منه من اول يوم اشتغل ويه بابا وهاي اله سنتين ما شفنه منه شي

جمار ـ اي والله رزن وثگيل وحتى عينه ما يشيلهه علينه لو يبصبص مثل السايق القديم

جمانه ـ اي والله يله امشينه لا نتأخر

فاتنه ـ سمعتهن العصر بس ما اهتميت لان حقهن ما يعرفن منو هذا اللي دخل حياتنه على غفله اليوم استفسر من جدو شلون اشتغل وياه

ورجعت ويه البنات صار الليل حضرنه العشا وتعشينه البنات رجعن مخصلات شعرهن والوجوه تلمع لمع صعدن سبحن ونزلن تعشينا كلنه وجدو بس يبوس بينه

وكلنه گاعدين داير ميدور يمه البنات راحن يكفن الاغراض واني بقيت يمهم كنكت شوي وحجيت
جدو حبيبي سؤال

ابو سليم ـ جواب باباتي

فاتنه ـ هو بخصوص نائل يعني شلون اشتغل وياكم

ابو سليم ـ وليش هذا السؤال بويه احنه يوميه نوظف هواي خصوصا شركتنه محتاجه عمال حاليا والمعارض مال السيارات هم وجنت محتاج سايق وعينته

فاتنه ـ يعني يعني هيج قصدي شلون عرفته وعينته يمك وهيج مأمن بيه

ابو سليم ـ جنت ناشر بالفيس محتاج سايق وهو بوقتهه جان هسه مخلص امتحانات السادس ويدور وظيفه يعين اهله بيهه وجربته اكثر من مره الولد امين ويصون الامانه

فاتنه ـ احجي وعيني على بيبي اللي دمعت وتمسح عيونهه بشيلتهه گتله يعني هسه انته تعرف من وين اهله صح شغلكم هذا وما اريد اتدخل بس عاجبني اسأل فضول لا اكثر

ابو سليم ـ هو الولد محافظات واجه هنا يشتغل وهاي صارله تقريبا سنتين او اقل ما شفنه منه شي مو زين حتى كم مره ياخذ بيبيتج يزورهه ويرجعهه للبيت وانتم مأمن عليكم وياه

فاتنه ـ صار معلوم حبيبي يله اخذورا راحتكم تصبحون على خير بست راس جدو وايده وبست راس بيبي وايدهه وصعدت والف فكره ببالي

يعني جدو ما يعرفه واذا ما يعرفه ليش بيبي ما گلتله عليه هو ابن اخوهه زين هذا ابوه هو نفسه اخوهه اللي اتفق ويه ابوهه وانطوهه لو غيره

زين هم الهه اخوات واحنه ما نعرف سالفة الثار اللي صارت بوقتهه شنو وبسبب منو يا ربي هواي افكار براسي صعدت للسطح گعدت على فراش صغير من الخوص بيبيتي تحبه

شغلت موسيقى هادئه اريد العواصف اللي داخلي تهدأ والتفكير اللي اخذ كل عقلي وين يله حسيت واحد يمي التفتت شفته مجاهد

مجاهد ـ شلونهه الحلوه مالتنه

فاتنه ـ حضني على صدره الحمد لله حبيبي

مجاهد ـ انتي ما تگعدين هيج الا اكو شي شاغل بالج وماخذ تفكيرج گولي شنو شبيج

فاتنه ـ ههههه لا وين بس افكر بجمانه بعد يومين ما راح اشوفهه ونزلت دمعتي مسحهه

مجاهد ـ هاي قريبه شوكت تردون تروحولهه شقتهه موجوده ومو بعيده ما راح تروح لغير محافظه لو ما راح نشوفهه راح تصير گدام عيونه وزوجهه حباب وخوش ولد

فاتنه ـ هزيت راسي اي تمددت خليت راسي على رجله وهو يلعب بشعري گلت مجاهد لو اكتشفت احد ضام عليك شغله مهمه شنو راح يكون موقفك

مجاهد ـ اذا جان السبب مقنع اعذره واذا لا ساعتهه لكل حادث حديث ليش

فاتنه ـ ما ادري هيج سؤال واجه بخاطري وسألته

مجاهد ـ فتونه شبيج حبيبي

فاتنه ـ عيوني تجري مثل الشلال لو شگد امسحهن ما ينشفن گتله خايفه

مجاهد ـ تخافين واحنه نشم الهوا مو عيب

فاتنه ـ ردت احجيله وسكتت خفت لا يصير شي ما محسوب حسابه شوي وتعبت نمت على رجله حسيت نفسي انرفعت

وبعدهه گعدت الصبح نايمه بفراشي والبنات يمي يحضرن باغراضهم شفت الساعه بال 11 راسي مصدع گلت صباح الهوسه

الكل ـ صباح الركض

جمار ـ بيدق احنه رايحين انتم اذا تردون تعالوا ورانه

بيدق ـ ماشي بس تسبح فتونه نجي ما نتأخر يله فتونه بسرعه

فاتنه ـ يله گايمه گايمه رحت فرشت اسناني وسبحت نشفت شعري وسرحته لبست بنطلون جينز وبدي وستره واخذت فستاني بيدي لبست النظاره لگينه نائل منتظرنه گالت بيدق

بيدق ـ يله فتونه ما بقى وقت بعد حتى نطلع گبل للقاعه ما نگدر نرجع للبيت نتاخر ساعتهه وما نلحك على شي

فاتنه ـ استغفر الله يله اجيت صعدت شغلت موسيقى هادئه باذني واتفرج على الناس جريت حسره التفتت شفته منتبه وياي سويتله شكو رجع عينه على الطريق

وصلنه للصالون ردت شعري برم ونازل وترفعه بس جهه وحده سوتلي ومكياج هادئ بس العيون خليتهه تكبرهم وتبرز كسرة الشفه لبست فستاني مفتوح لنص الفخذ

بيدق رفعت شعرهه تسريحه كامله ومكياجهه هادئ وجمار نفس الحاله بس الحمره طوختهه وجمانه تجنن هيه وفستانهه وسارونه هم كملنه ما گدرنه نصعد بسياره وحده

صرنه اني وجمانه وجمار بسيارة ويه نائل وساره وبيدق اخذهم زوج ساره وصلنه للقاعه نزلنه جمانه بدلتهه جبيره دخلتهه جمار واني وراهن

اخذت باقي الاغراض من السياره شفته يمي ما اهتميت صاح

نائل ـ لو الفتحه بعد اكبر خلي تطلع كل رجليج احسن

فاتنه ـ ما اعتقد اني مسؤوله منك وتتدخل هذا الشي يخصني فرجاءا لا تصير صاحب حق براسي

نائل ـ ماشي براحتج

فاتنه ـ نزل نظاره ويتفحصني من راسي لرجلي ارتبكت حيل گتله عينك لا افگسهه اخذت الاغراض وداخلي يغلي غلي

نائل ـ الله الله لا توگعين وتفضحينه

فاتنه ـ مو شغلك خليك بشغلك احسن يا

نائل ـ يا شنو

فاتنه ـ الحجي وياك ضايع اروح احسنلي ردت اصعد الدرج للقاعه جرني من ايدي

نائل ـ عبالج ما شفتج ذاك اليوم تتنصتين لا والخلقج ساكتلج بمزاجي يا حلوه

فاتنه ـ يحجي ووجهه كل شوي يصير بتعبير شكل جريت ايدي منه

ههههه امممم يعني هسه انتم فخورين باللي سويتوه موووو احجي وغضب الدنيا كله اتجمع بيه وهو يرد ببرود

نائل ـ ما اعتقد هذا الشي يخصج

فاتنه ـ لا يخصني وغصبا عليك لان انتم ما تستاهلون هيج جوهره ذبيتوهه وما سألتوا على حالهه شنو هسه جايين بعد كل هاي السنين تردون القرب

باحلامكم والله نجوم السما اقربلكم من قربهه اگلبهه عليكم جحيم وساعتهه خلي خنزرتك تنفعك

نائل ـ والمطلوب مني هسه

فاتنه ـ تصيرون زلم وتبتعدون عن عائلتنه وتخلونه عايشين ما اعتقد هذا الشي يخصكم يا بايعين الشرف صار يحجي من بين اسنانه وجرني جوا اكو غرفه فارغه

نائل ـ احنه زلم وغصبا على اكبر راس افتهمتي وهاي مال ابتعدوا بعيده عن تفكيرج هذا شيليه من مخج انتي ما تعرفين شي

لان اذا عرفتي راح تكرهين اهلج لان ما حجولج شي شفت نفسي عاصر ايدهه قوي ووجهه بوجهي عيونهه مغورگه

فاتنه ـ عوفني ولا تتقرب بعد افتهمت جريت الاغراض وصعدت للقاعه انطيتهم لبيدق ورحت للحمامات المكياج ضد المي مسحت عيوني

ايدي كلش توجعني شفت طبع اصابعه صحت كسر كون بايدك يا حقير الردن تول ما مبين كلش الطبع الا اذا واحد يركز رحت گعدت بعيد عن البنات اريد اهدأ شوي لان داخلي بركان صاير

بيدق ـ تعالي فتونه راح تبدي الحفله

فاتنه ـ اي جايه بس شوي ارتاح

جمار ـ يله بنات اجو اهل العريس راح نشغل الديجي

فاتنه ـ منو محضر الديجي

بيدق ـ ميس گالت علي اني اتكفل بيه

فاتنه ـ تمام راحن البنات وبدت الحفله يرگصون مستحيل اقهر نفسي بسبب شخص ما يستاهل

رحت قريب عليهم گعدت على الطاوله وهنه يرگصن وبنات عمامي هم وياهم شوي واجت بيدق گالت

بيدق ـ فتون هسه دورج

فاتنه ـ ههههه ساجده غيرهه ما ارگص

بيدق ـ اي

فاتنه ـ شوي وشغلن ساجده اسمر والعيون وساع نزلت اهز كتف وصلت بنصهن وهنه فرغن الساحه بقت بس الي

صرت اهز خصر على كتف لما خلصت الاغنيه وشغلوا غيرهه العب حبيبي وحدك بهالساحه كلش لما تعبت رحت گعدت شوي واشرتلي مره رحت يمهه گولي خاله محتاجه شي

ـ لا يمه سلامتج انتي بنت منو

فاتنه ـ بنت ابو سليم ليش خاله

ـ ها مو ادري بناته اربعه انتي منو بيهن

فاتنه ـ هههه خاله اني بنت ابنه توفيق

ـ الله يحرسج يوم

فاتنه ـ تسلميلي خاله رحت گعدت اشرتلي ميس اگوم گمت وياهن وهم كلنه سوا حفله تجنن شوي وگعدت لزمت تلفوني اجاني مقطع فديو ارگص شفته نائل

التفتت داخل القاعه بس نسوان وبس احنه تلفوناتنه باقيه كلهه مسحوبه تلفوناتهن كاتب جواها

وارى في خصرك الممشوق كل حياتي

وترقصين بين يدي على جراحاتي

لتكوني طول عمري اغلى امنياتي

كثري رگص يا بعد بيتي اروح فدوه لهذا الخصر

كتبت

سارقص في جنازتك لأسعد نفسي ووياهه قلب اسود

شوي ورد سمايل ضحك كلش هواي سديت التلفون وضميته بالجنطه

خلصناهه رگص وضحك لما اجه العريس حناهه وجمانه فرحانه يگلبي وتضحك من كل گلبهه

حنينه وياهه وصورنه هواي نشرتهه ستوري بالفيس وصورت ويه البنات ونشرت بس العيون مبينه الوجوه عليهن سمايل طلعنه من القاعه السيارات كلهه انترست بقى بس نائل

يربي اليوم شيخلصهه وياه بقت وياي بيدق صعدنه بالسياره وصلنه للبيت نزلت بيدق وسدت الباب اليمهه فتحت الباب اليمي مقفول حاولت ماكو عرفته قافله جريت نفس گتله افتح الباب

نائل ـ مو قبل ما نتفاهم

فاتنه ـ ما بيني وبينك اي تفاهم يكون بعلمك انته بالنسبه الي ولا شي فرجاءا احترم نفسك وبلاهه سوالف المزعطه ويله افتح القفل اريد انزل

نائل ـ اسف بخصوص اللي صار العصر

فاتنه ـ واعتذارك ما مقبول يله افتح الباب بسرعه

نائل ـ ماشي تتدللين بس يكون بعلمج يجي يوم اللي تحتاجيني بيه بعد ما تعرفين كل الحقيقه

فاتنه ـ ان شاء الله ما يجي هيج يوم واحتاجك فتحت الباب ونزلت الكعب حيل اذاني نسيت اگله منين جاب الفديو يله هسه عايزته الى قير دخلت ادردم

بيدق ـ شبيج گليبي

فاتنه ـ اوووف تعبانه كلش اريد انام

بيدق ـ اصعدي حبي ارتاحي اني اجي وراج بعدين

فاتنه ـ ماشي صعدت سبحت ارتاحيت شوي رطبت جسمي لبست شورت وكيمونه رحت لغرفة الرياضه شغلت جهاز الركض وبديت اركض شوي شوي لما تعبت كلش

رجعت للغرفه لفيت راسي ونمت الصبح گعدت بال 9 نروح للصالون اليوم اني اروح ويه جمانه غسلت وحضرت نفسي واخذت فستاني وياي اخذنه بابا

ارتاحيت شوي ما اشوف المغثه من الصبح وصلنه وبدت تجهز جمانه واني عيني بالتلفون مكنكه شفت التعليقات على الصوره رديت عليهن كلهن هو بس منطي اعجاب بعد احسن

لو ما ينطي الاعجاب يسوي فضل قفلت التلفون ورجعت اتفرج عرايس كلش هواي شوي وصاحتلي وحده من العاملات طلبت شعري ترفعه ومكياج وسط

كملتني ولبست فستاني جابولنه الغدا اكلنه شوي وكملوا جمانه وهيه متوتره كلش حضنتهه اهدي حبيبي انتي يا احلى عروسه يعمري تخبلين

جمانه ـ فتونه گلبي احسه يريد يوگف ما ادري شوفي ايدي ترجف

فاتنه ـ ههههه يعمري انتي اهدأي ماكو شي شوي واتصلوا گالوا سيارات الزفه تجي للصالون لان اتأخرنه هواي وصلت السيارات والموسيقى كلش عاليه

اجاهه العريس وباسهه براسهه ونزلهه لازم ايدهه اخذت جنطتي وباقي الاغراض اخليهم بسياره صخام نائل لان گالو منتظرنه بالباب

خليتهم بالسياره رحت اصعد يم البنات ماكو مكان رحت غير سياره هم ماكو مكان كلهم هيج ازدحام گال جدو نائل يوصلج للقاعه ويرجع

ودع جمانه هو وابوي واعمامي كلهم يحضنونهه وهيه تبجي واني وياهه ابجي مشهد رغم الفرح بس محزن مكانهه بالبيت راح يصير فارغ

صعدوهه بالسيارات وبابا اخذ جدو وعمامي يرجعون للبيت واني صعدت ويه نائل الطريق كله عيوني تجري من اتذكر كل سوالفنه وضحكنه وشقانه ومقالبنه

نائل ـ هاج امسحي عيونج راح يسيل الكحل

فاتنه ـ اخذت الكلنسه رتبت عيوني جريت نفس ورجيت راسي على الكرسي اباوع من الجام على الزفه طلعت تلفوني صورت شوي السيارات

لما وصلنه للقاعه نزلت وسديت الباب دخلت للقاعه شفت اخواته وسياره العروس بعدهه بس اني من اهلي شلون سالفه هاي شوي ووصلوا البنات اطمنت

رحنه گعدنه على جهه الناس كلهه فرحانه وترگص الا احنه عبالك بعزا شغلوا هواي اغاني من ضمنهن اغنيه رگصوا عليهه سلو وقطعوا الكيك

بيدق ـ يعمري ربي يسعدهه شوفوا فرحتهه بنات

جمار ـ الله يسعدهه اگول بنات اليوم تستقبلوني يمكم ما اگدر ابقى بالغرفه وحدي

فاتنه ـ يعمري كافي بجي مو زين عليهه والله خلونه نفرحلهه جمانه تستاهل الفرحه ويله گوموا نرگص وياهه نحسسهه فرحانين مو عبالك بعزا اسم الله

ميس ـ اي يله بنات حجي فاتنه صحيح

فاتنه ـ عبالكم ترا اني افكر هههههه

جمار ـ يا صلاوات واخيرا طلع بيج خير

بيدق ـ ههههه يله بلا نگرتجن گومن

فاتنه ـ ههههه يله رحنه بالوسط نرگص رحت سحبتهه من الكوشه ونزلت ويانه رگصنه سوا وهيه فرحانه من كل گلبه

شوي وگالو راح يجيبون العشا رجعنه لطاولتنه گعدنه وزعوا العشا احنه ما تعشينه مقهورين لان راح تفارگنه شوي وگالوا راح يطلعونهم للفندق يعني احنه نرجع للبيت

عددنه هواي نفس السيارات اللي اجو بيهم رجعوا واني ويه نائل وبيدق وجمار وبيبي گعدناهه بالصدر هو يلتفتلهه ويبتسم بحجة اللي اعدل رجلي ضربت الكرسي حيل صحت

اخ يمه رجلي اتكسرت من الكعب وهو يباوع بالجامه ويخزر حركت عيوني بلا مبالاة حسيته دخن كلش ورا شوي هم رجع يتبسم رجعت ضربت الكرسي گال

نائل ـ حجيه اليوم اكو واحد ما موكلينه زين جاي يزاگط

ام سليم ـ ههههه يا يمه شبيك هو منو المزاگط

فاتنه ـ اي بيبي هو اليزاگط يعرف نفسه وخزرته ابتسم

نائل ـ اي صحيح هو اني هم هيج اگول

جمار ـ ههههه خرب بليسج فلشتي وجهه

فاتنه ـ ههههه عبالج اني فتينه سابيتهم سبي وملبستهم عبي

بيدق ـ هههههه كافي ولجن ما اريد اضحك بصوت استرن علي ضحكتي شهيره

فاتنه ـ هههههه اي عادي والله الا اجلطه اذا ما اخليه منا للدوام هو مبطل شواربي مو علي

جمار ـ هههه ولج استري علينه مو زين هسه صرنه نطلع نرجع للحبسه والله واموتج

فاتنه ـ اححححح احب اخبث

بيدق ـ ابد مو جلبه وخبيثه

نائل ـ عمه ام سليم محتاجين جلب للحراسه

فاتنه ـ اي والله يا ريت لو تگعد بالباب وراتبك علي شفته دخن

جمار ـ هههههه خرب اااخ يمه بطني ولكم راح اموت

بيدق ـ ولكم بطني اااخ انتي كارثه ههههه

فاتنه ـ ههههه والله لارد الصاع صاعين شوي ووصلنه للبيت نزلوا البنات بقينه اني وبيبي گوه تتحرك تعبت من السياره

اخذتهه اول ما دخلتهه باب البيت انجريت من ايدي ردت اوگع لزمني من خصري دفعته لطش بيه ووووخخخخرررر ايدك

نائل ـ ههههههه يله وين جسارتج قبل شوي ترديني جلب مو عضيتهه من كتفهه حيل گتلهه حتى ما تنسيني

فاتنه ـ اااخ لك مجلوب طيح الله حظك بقيت افرك بكتفي عيوني دمعت جريت جنطتي ودخلت گبل صعدت فوگ ركض

ايدي كلش توجعني طلعتلي ملابس ورحت للحمام فتحت التسريحه وكتفي كلش يوجعني بجيت

كملت سبح اخذت مكعب ثلج وصرت ابرد بيهه ما تبرد حتى مطلع منهه دم اجتني رساله كاتب

نائل ـ شلونه كتفج

فاتنه ـ الله لا يوفقك تشوهت من وراك المجلوب

نائل ـ هههههه عادي فتره وتروح حتى بعد ما تتدخلين بشي ما يعنيج

فاتنه ـ اتوقع اني ويه عائلتي وانته مو من ضمن العائله فلا تتدخل اذا احجي اي شي يجي بلساني خووووش

نائل ـ اوك تمام

فاتنه ـ سديت التلفون عابتلك اي والله المجلوب اااخ يمه ايدي لبست تراك ربع ردن حتى اخفيهه نشرت صور العرس ستوري ورحت نمت

گعدت ثاني يوم بال 2 الظهر گمت گوه رحت غسلت ونزلت جوا اريد اي شي اكله ما ماكله من قبل يوم ومو كلش بس بالاسم

وصلت للمطبخ دخلت لگيت نائل يم بيبي شافتني بيبي انصدمت گتلهه ادري ادري ابن اخوج الشفيه لا تخافين

ام سليم ـ يمه فتونه لا تگولين للبنات حبيبتي انتي

فاتنه ـ ليش وجدو يدري خزرته دنگ راسه

ام سليم ـ اي يمه يدري وهو وظفه حتى يوصلي اخبار اهلي

فاتنه ـ اوك تمام اذا هيج تردين اني وياج بس يوم وحق عيونج الحلوات اندمهم على كل قهره انقهرتيهه وكل دمعه نزلت من عينج بسبب ناس ما تستاهل التفتتله يباوعلي بغضب

ام سليم ـ لا يوم لا حبيبتي مو انتي بنيتي الحبابه ما ربيتج على الحقد وهاي السالفه صارلهه سنين ما تستاهل هسه نفتح الجروح القديمه

فاتنه ـ وانتي گلتيهه جروح بكل جرح بگلبج اخليه بگلبه لان اهله ما اعرفهم فهو اللي راح يدفع الثمن

ام سليم ـ لا حبيبتي لا يا امي عوفي كلشي خلينه نعيش واعرف اخبارهم بنيتي انتي

فاتنه ـ واني وياج توصلج اخبارهم بس هو لا مستحيل بعد يبقى السايق بهذا البيت لان بيه دم الخيانه والغدر جرني من ايدي حيل حسيتهه انملخت

نائل ـ لا انتي ولا عشره منج تبعدني عن عمتي واللي صار مو ذنبي افتهمي شنو هنا براسج گليلي

فاتنه ـ اول شي شيييل ايدك وخررررر ثاني شي صوتك ما يعلى بهذا البيت مفهوم لا عبالك بيبي سامحتك وتريدكم عبالك هاي هيه

هههههه رفعت عيني بعينه شايف من كلهه تدري انته ابن منو شنو راح يسوون بيك مع الاسف من هسه مكسور خاطري عليك شلون راح تصير سحلتك وطردتك

نائل ـ اياني واياج فاتنه احذرج لا تندگين بيه خليني كافيج خيري شري وخليني ادمي بلا ما انگلب عليج والله واشوفج الوجه الثاني

فاتنه ـ اممممم اي صحيح كتفت ايدي وطلعت كتفي لبيبي شوفي يوم هاي عظة ابن اخوج اللي يستحرم المتدين التفتتله اوووي ترا خفت كلش منك

********†**********†********†*****

علقوا على الفقرات

وصوتوا حبايبي ❤️

لا تنسون تابعوني على الانستا