اغصان يتيمة

𝐏𝐀𝐑𝐓 10

᪥᪥᪥᪥᪥ ࿇ ᪥᪥᪥᪥᪥ ࿇ ᪥᪥᪥᪥᪥

-اغصان يتيمة-
الكاتبة وَرْد حيدر

قبل كلشي لتنسون التصويت + التعليق بين الفقرات + متابعة الحساب

يگــــٓـꪆل?

يآديَـــرة التَلمني وآنـه المعَلعل؟!

᪥᪥᪥᪥᪥ ࿇ ᪥᪥᪥᪥᪥ ࿇ ᪥᪥᪥᪥᪥

ابتسمت واني امشي بكل ثقة فرحانة ، صار هورن كلش قوي خلاني اصتك بمكاني رجعت السيارة بقوة بوجهي عبالك تريد تدعمني نشخطت گدامي رجفت رجلي باد حيلي بسطت فوك الزبالة

رجعت انشخطت بقوة وهلمرة المي طفر علية طين لوث ملابسي رفعت عيوني باوعت الباب نفتحت مال السيارة بقيت مصتگة بمگاني نمدتلي ايد رفعت عيوني باوعت لقلافتة ضربت ايدة بگل حيلي وصرخت باقوة ماعندي بصوت رج المكان رج

_هآآآيييي لليييشششش

حسيت اوتاري الصوتية تگطعت من قوة الصرخة خفضت عيوني واني اشوف حالي شلون متناثر فوگي الطين صرت تحفة فنية من نقاط الطين احتصر وجهي رفعت عيني اباوعلة يعقم بيدة لان لمستة جان حاط بيدة كلينس من ضربت ايدة وگع وتلامست ايده بيدي اجة تجاهي يريد يگومني ردت ادفعة ابتعد وهوة يرفع ايدة بعلامة تهديد

جاسر: ايدج بابه

جريت عيوني اليزة الجانت گدامي وجهه باهت تحاول تگومني فتحت جنطتها طلعت منديل تقطر علية مي وتمسح بحنچي ركزت عيوني بلمنديل صار كله طين ندارت بلمنديل حول ملابسي الملوثة ولكن دون فايده مجانت تكدر تنضفهن بهلمنديل البسيط

تمسح وتردد بخفوت

_مسحيها بوجهي يمكن ماشافج

نفضت ملابسي انتچيت ؏ سيقاني محاولة للوقوف ، ايدي كلها مي ممزوج بلطين حسيت الشرار صارت تطلع من عيوني اول يوم ماصدگت اخلص من سالفة وسلم الفايل وضمن دوامي منين طلعلي هاذذة

استفزني وهوة ياشر تجاهي بيدة يفتح بلجگارة دخان بحلگة يلفح بارد ممبين بلجو من شدة البرد يبرز بكل كلمة ينطقها

_حجابج شنو وضعة؟

باوعتلة وعيوني مليانة غيض وكره مقموت تجاها

_شي مايخصك بعدين من تشوف واحد يمشي بلشارع وحضرتك تسوق بسيارتك حاول تخفف السرعة من باب الاحترام لا اكثر بس الضاهر انتة ماضال بيك حتة احترام داخلك مريض تحب تكسر خاطر غيرك ماتفكر هلانسان الخليتة يتوصخ شلون راح يمشي يومة احتمال ماعندة ملابس او ماعندة غسالة يگدر يغسل بيها ملابسة او ممكن عطلتة عن شي جان مهم بلنسبة الى

مد بوز وظل يحرك براسه ديفكر بشي وهالشي معاجبه

_يول لبسج چدام الناس بهلمنضر عادي؟؟!!

_مايخصك ماما

_يحح

_لابوية ولامي ولااخوية عليش تدخل

عقد حواجبة وباوعلي معاجبة الوضع

_الحجاب من ينلبس تكونين مجبرة بلباسة بصورة صحيحة ولائقة ك محجبة لازم تطبقين هل امور مو تشوهين صورة الحجاب وتنطين طابع غلط عنه ياتلبسينة ياتنزعينة اختاري شي واحد ماخذتهن اثنينهن لانتي محجبة ولا سافرة وين تردين توصلين؟

_مايخصك

_مايخصني فعلاً بس يخصج ك محجبة مقتنعة بحجابج؟

_ششعليك

زفر تحت انفاسة بصوت ناصي قربي وهوة يلتقط انفاس بسيطة من الجگارة

_حجاب وفخاذ طاكة يول ماترهم دخيل الله شلاعبه بروحج

باوعتلة بنضرة اشمئزاز وايدي تنزل بلتشيرت فتحت منة الجاكات نزل ، روحي تلوب شايطة اجت بصفي ليزة تهمس

_مابيج شي مامدمرة هوايي

نزلت عيوني اشرتلها بيدي ؏ ملابسي

_كلهلطين ومامدمرة چاا لعد اذا متدمرة شلون

_امشي شطفية بسرعه ، جريت عيوني تجاه الساعة البيدي ، بعد اكو وقت هواي انتضرج قابل شعندي

_مايوكع الطين ترس حتة اذاني بشرفج اروح للگلية اول يوم مطگعة ماي شنضف وجهي لو ملابسي لو ادي اذا ؏ هلمنوال مناه لباچر يله نكمل ختولي ولله ولا اروح انعل ابو الگليية

مد بوز الجكارة مشكلة بحلكة صايرة بين اصابعة ياخذ منها نفس وينزلها انتبهت النضراتة الجانت مركزهن الجهت رگبتي نزلت عيوني باوعت وحمتي طالعة مديت ايدي رفعت الرگبة مال القميص بهمجية روحي مكزبرة

دنگت التقطت غراضي بسرعة بدون حس وشتقيت طريقي بخطوات سريعة اسمع صوت ليزة خلفي تركض وتندة باسمي مابادرتها اي رد فعل كل الجان براسي افوت داخل البيت وتخلص من صورتة امامي

مديت ايدي قبضتها واني ادك بلباب احس اصابعي تفطرت الباب بارد بكل مرة ادك احس روحي تشيط

جلبت بية ليزة تحجي وتردف بخفوت

_مايقصد ولله

شفتها تبررلة غمضت وفتحت بغيض صحت

_كل هلسيان ومايقصد

_ياقوتة غصبن علييه ولله

هزيت راسي مبتسمة بستهزاء

_ها يحقق وياية

انفتح الباب رمقتني عمتي بنضرة عقدت حواجبها تباوعلي من جوة چفنها مضيگة عيونها ، بدون مانطق ولا حرف طبيت جوة روحي مفرفحة اسمع ليزة تحجي وية عمتي غمضت قافلة علية الحمام گعدت ؏ الصبة بلكاع ضامة رجلية الصدري دافنة بيناتهم راسي

الف سؤال وفكرة تتردد براسي هلانسان عجزت اتقبلة سبحان من زرع داخلنة القبول والنفور عجزت اتقبل انسان يحمل التعاطف والتحرش انسان غريب الطور مجاي اعرف شخصيتة الحقيقية وين ساعة انسان زين دافعلي وكف وياية واجرلي بيت اسكن بيه وساعة انسان متحرش متعمق بلنضر سخيف المدار

ضغطت راسي باثنين ادية نزيت ؏ صوت دكت الباب نداريت بنص جسمي حجيت بحس مخنوك

_ها عممة

اجاني صوتها تردف بقلق

_منو وياج

مسحت بقاية الدموع من جوة عيني بلعت ريگي

_محد

_شو افتحيلي الباب

_مابية شي

_افتحي منو وياج شبيج يا امي

_ماكو شي عمة رجعي جوة للهول ادفي الدنية باردة لاتنصگعين بهوة بارد وتروحين بيها

_لاتغيرين الموضوع شبيج احجي منو وياج

_عمة صدگيني ماكو شي

_ياقووووتة

اجاني صوتها بنبرة حادة خرطت العافية جريت نفس حجيت بحس واهن

_علساس اروح اقدم الفايل اني وليزة اخوها دهار بلسيارة طيني

_خاف ماشافج

_مادري علعموم عمة دخلي ادفي اني راح اغسل وطلع

_الماي بارد شلون تسبحين؟

_لا بس اشطف من فوك الملابس اوخر الطين

_لا امي عوفيهن متوازية ، هسة اجيبلج شي تلبسينة وعود من تطلع الشمس كعدي حطيلج طشت شي وغسليهن بلحوش

هزيت راسي سمعت صوت خطواتها يبتعد راحت ، حطيت ايدي ؏ البوري فتحتة ادمر طين مديت ايدي جواه اغسل بيدي المي خلاني اكزبر بارد ثلج احطها جوة البوري وسحبها من شدة البرودة الجانت بية

كمت ؏ حيلي اغسل بوجهي نزعت التوربان مليان طين شمرته ؏ صفحة واردف بيني وبين نفسي

_الله لاينطيك كون الله يصخم وجهك ويجوربك اكثر من مانتة هسة اجرب ومصخم

اندكت الباب نزيت فتحتة تلاشت نضراتي تجاه عمتي جانت لازمة بيدها ملابس قدمتهن اليه مبتسمة بحنية اخذتهن بسرعة نداريت طبگت الباب لبستهن بستعجال مديت كف رجلي جان داخلة الطين من جوة الحذاء غسلتة روحي صارت ترجف خليت ملابسي بلحمام روحي مكزبرة مابية اغسلهن الجو بارد والدنية بدت تمطر

اخذت خطواتي بتجاه الهول تمددت بفراشي ناصتة لسوالف آصف وعمتي.

آصف: عمة اني شكد عمري؟

حنينة: حبيبي عمرك ⁸ سنيــــن

رد بصوت عفوي طفولي يأشر بيدة بتعداد

_يعني اني لازم صف ثاني لو مسجل بلمدرسة مو؟!

جريت نفس روحي ممرودة ؏ هلوليد حجيت بحس خافت

_اي حبيبي لازم بلمدرسة

_ليش ممسجليني اني احب المدرسة اريد اصير دكتور اعالج الناس وعالج رجلية

مسحت عيوني أردفت مختنگة خافية الحزن ببتسامة بسيطة مرسومة بخفوت

_مو هسة اسجلك حبيبي

_ليش؟

_لان اكو ولد بلمدرسة وكحين واني اخاف عليك خاف تلعب وياهم ويخلونك تفحط لو ياذونك ماكدر اخاطر بملاكي الوحيد من اسويلك العملية مال القلب واعالج رجليك اسجلك يبعد رويحتي انته

_خاف اموت

شهكت ايدي ؏ حلكة

_اسم الله حبيبي وينك وين الموت بعدك زغيروني

نزل ايدي يباوعلي بعيون بريئة مختلطة بلمعة دموع

_بس الموت ياخذ الصغار والكبار

مديت ايدي امسح ؏ راسة وكرص بخدودة

_يمة اسم الله عليك هية عملية سهلة من تسويها تصير زين وتكدر وراها تركض وتمشي وتفرح وتعيش طفولتك

_بس اني اخاف خاف يطلع مني دم الدكتور..

_لا الدكتور حباب راح يخليك تنام ويسويها الك

_ولله

_اي ولله ، ابتسمت بخفوت ، شلون تريد تصير دكتور وانتة تخاف من الدكتور؟!

_اني ماطلع من الناس دم

كرصت خدودة اهز براسة مبتسمة امازحة

_شلون تطيبهم وتخليهم يصيرون زينين اذا ماتطلع منهم دم

_اشربهم حبوب يخليهم يصيرون زينين وماطلع منهم قطره دم

_يمة فدوة للحنيين

_اني بطل ماراح اخاف من العملية حتة اصير دكتور واطيب ودخل للمدرسة

_اي يبعد عيوني لاتخاف صير سبع حتة تدخل مدرسة وتصير زيين

_بس شوكت تسوولي العملية

جريت نفس لميت شفتي السفلية الفمي بأسف منين ادبر فلوس العملية ، حجيت بصوت هادددى مليان قهر

_تدبر وليدي اني اجيب فلوس وسويها الك بس خليني اشوفلي شغلة

_لا ماريد تتعبين

_لا ماتعب ييبعد ننضر عيني وضواها

قربتة ابوس براسة مبتسمة عيوني تدمع هلوليد شنو مستقبلة بنفسة يعيش حالة حال الجهال يفرح ويضحك ويلعب كلهن محروم منهم حتة "الدراسة" اخاف اسجلة خاف الجهال يخلونة يركض ويوكع بلمدرسة ولاسامح الله يصير بية شي واخاف تتعب نفسيتة الجهال يعيبون عن مشيتة لان يعرج ماريدة يحس بنفسة بية نقص عطلت مستقبلة واكول الله يسهلها وتدبرر

جريت عيوني الياقوتة الجانت صافنة عليه وعيونها تبجي تنزل الدمعة وتمسحها بكف ايدها ساكتة مانطقت بحرف ربي هلغصنين اليتيمين كون بعونهم وخلي الدنية تسهل طريقهم وتحل العراقيل الماليتهم

بقيت امسد ؏ راسة اشوفة غفة بحضني قربت المخدة خليت راسة بلطف بستة ومسحت عيوني جريت البطانية لفيتة بيها دفيتة كمت بسرعة جريت العباية باوعتلي ياقوتة عيونها نحلانة حجت بصوت متسائل

_عمة وين رايحة

_هسة اجي ، اشرت بيدي ، ديربالج ؏ البيت مو تفتحين الباب الياهو الجان كولي منو وفگيه خوش

_خوش ديربالج ؏ نفسج اوكفي عمة اخذي علاگة شي الدنية جاي تمطر راح تتنگعين

_ميخالف

اباوعلها طلعت مستعجلة رجليها كوة تدوسهن تمشي وتذب برجلها فتحت الباب طلعت طبگتة باحكام تام وحرص

جريت نفس عيوني ؏ السكف الضلام شاسع مغطي المكان ضوة الصوبة الكهربائية بعيوني لزمت التلفون الشبگة ضعيفة مال الجيران لازم اطلع بلحوش يله تجي قوية خليت التلفون ؏ صفحة ربي شهل بلوة

كمت ؏ اطراف اصابعي فتحت باب الهول اباوع للمطر شلون ينزل بكل انحاء الطرمة ويتناثر مديت ايدي تنگعت العب بلمطر رفعت راسي للسما صار وجهي كلة مي غمضت واني ادعي بخشوع

»- ربي دخيلك خلي عملية آصف تسهل وفلوسها تدبر ، نزلت دموعي بتوسل ، ربي المبلغ هواي منين ادبر منين اچيب وين انطي وجهي ياربي وين ، شهكت ، منو لعندي وشكيلة غيرك ياربي منو لحجيلة بلضيم لبگلبي ياربي ماضل عندي بس هلاخو من شملي الضايع ، بجيت بحرگة ، ربي اريد اسويلة العملية دخيلك ربي سهلها دخيييلك ياربي دخييللك انتة القادر على كل شي ماكو شي يستصعب على جلالتك اوكفلي ياربي بهلشدده دخيلك ياربي اوكفلي

فززني صوت آصف يكح دخلت بسرعة وسديت الباب لايستبرد اجيت بصفة عدلتلة الغطة اهمس بصف اذنة

_حبيبي آصوفي مريض؟

هز راسة بعلامة نفي وهوة مغمض بنعاس

رفعت الغطة لرگبتة احاول ادفي كل شبر بية ماريدة يستبرد نداريت للتلفون مالتي التقطتة وگمت گعدت بصف الباب مال الهول داخلها مگنبصة رجلية الصدري ميبستهن شفت الشبگة صارت قوتها نقطتين فرحت دخلت لليوتيوب صارت تطلع مقاطع تنفتح

دخلت للبحث كتبت

»- شلون اسوي مشروع مربح؟

طلعت مقاطع منهن اكل واكو حلويات واكو مشاريع هواية گلبت بيهن كلهن مايفيدن ينراد فلوس للمشروع واني فلس احمر ماعندي غير فلوس هلقذر وراح اشمرهن بوجهه

جريت نفس دخلت للفيس اگلب وراسي احسة يريد ينفجر اريد اشتغل باي طريقة ندك الباب شمرت من ايدي التلفوت خليتة ؏ صفحة وطرت رگض للباب صحت

_منو

ليزة: اني ياقوتة فتحي

مديت ايدي فتحت الباب اشرتلها تدخل المطر غسلنة طبگت الباب ودخلت وراها داخل الهول تقربت كعدت تربعت كدامها ساكتة مدت ايدها بلجنطة طلعت علاكة بيها علبة باوعت بعيونها تتفقد

_وين عمتي؟

_توها طلعت هسة تجي راحت تجيب جم شغلة

_جبتلها الزيت مال المفاصل باعي ياقوتة لازم قبل لاتحطة شوية تحمي ؏ النار شوية يصير دافي وتدلك بية المنطقة

_لازم تحمي؟؟

_اي يكولون لازم ينحمي امي تكول جنت احمي يصير شوية دافي مو حار ديربالج ترة يحركها شوية دافي وتدلكين بية المنطقة فد ترتاح مفاصلها

_شلون احمي ليزة ماعدنة طباخ

_ميخالف عود تعاي احمية يمنة هاذ بيتج وذاك بيتج

_اي حتة اخوج يصبة ؏ راسي

_ههههه بعدج مغثوثة منة؟

_ولله انتي بكيفج عاجبج السواه؟

_شوفي ياقوتة شلون افهمج ماعرف بس خليني احجيلج...

_احجي

_اكو امور تجية اندفاعية يعني مو عن قصد هاية وسواس براسة يجبرة هيج يسوي انتي تحملي ، مرضة واصل اقوة درجة تخيلي الصعوبة بلتعامل وياه يريد يساعدج لازم يغطي ايدة بكلنس هواي امور اني كتلج راح تعيشين وتشوفين

_ليزة لاتبرريلة هوة تقصد يدمرني طين

_شلون بله؟

_حته حجة ؏ حجابي كدامج

_لا ولج ينصحج مو قصة يضوجج هوة هاذ سلوبة بلنصيحة عبالك جاي يتعارك بس ولله ماقصده شي

_لاتبرريلة ليزة اني فهمت شي وانتي فهمتي شي خيولي لموضوع سدي

_شنو لفتهمتي؟

_الافتهمتة اخوج مريض زيادة عن الزوم يرجع بلسيارة مرتين يطش علية طين وتكولين مامتقصد؟! كارثة هايه

_يولي ولله مو قصدة مرات اكو شغلات اندفاعية تجي من راسة عجل اني شعرفني

_اني اعرف قصدة كلش زين ، جريت نفس اقرة بلعلبة مال الزيت حجيت ، عوفي لموضوع خلية يولي

_بعد انتي اعرف ولله اني مرات فاهية مافتهم زين

_لا اني افتهمها ؏ الطاير توصلني كبل

_ههههه بس اعذرينة

_عادي وداعت فرسدق

_صدك باچر ترحين نقدم مرة ثانية؟

_اذا اخوج هم يطلع بوجهي ولله ولا اروح

_لا وية بارود نروح

_تمام بيش ساعة؟

_دوامي صباحي

_هاهية

_يالله ياقوتة ديري بالج ؏ نفسج راجعة للبيت هسة عبالهم نخطفت

رادت تطلع ندارت باوعت وطلعت تلفونها

_انطيني رقمج او برنامج نتواصل بيه

مديت ايدي للتلفون جان ؏ الصبة حاطتة التقطتة رديتلها رقمي وتبادلنة برنامج تواصل ابتسمت وطلعت تركض المطر رشها رش طبگت الباب ورجعت للهول اتراجف گعدت بصف الباب مال الهول اگلب بلتلفون

بسرعة اجتني رسالة

»- ها ياقوتة اني ليزة

كتبت بسرعة

»- ها كبدي وياج

»-؏ الموعد باجر يولي مو تنسين

»- هاهية راح احط منبة من هسة

»- عفية

»- من هسة اليوصلنة بارود خوش؟؟؟!!

»- اي هسة هم راح ائكد عليه خاف ينسة

»- تمام

»- متغدية؟

»- اي

»- شكلتي

»- تمن ومرگة

»- مسوين مركة شجر ادزلج؟

»- الف عافية

»- صددك تحبين مرگة الشجر

»- اي اني اعجبج كل الاكل احبة

»- مثلي

»- ولله الاكل طيب ماينكرة

»- اي ولله يخبل

»- آصوفي يختلف عني هواي اكلات مو شي بيهن ماياكلهن مثلا عندج الطرشانة يكول شون اكل مركة حلوة بيها لحم

»- جنة دهار

»- هممم

»- هم مايحب ياكل هيج تدرين الحد هاذة يومنة يطبخ بيدة مثلا اشتها ياكل مركة فاصولية بيدة يكوم يطبخها مايثق بليطبخ الاكل

»- حتة بامة؟!

»- اي مو كتلج من شاف اسمهان ليومنة شكلت وياه بعد

»- الله يساعدكم علية

»- ههههههه ولج خفيف ؏ المعدة هوة ليطبخ وهوة الياكل مايتعب واحد فدوة لحلكة عكس بارود وازهر ذولاك يهججوونة اذا جاعو

»- صدك رجاء رجعت؟

»- اي رجعها ازهر عود زعلانة

»- ودهار يتحاجة وياهم بعد المشكلة الصارت؟

»- لا مگضيها بس يجي ينام ومرات يبات بلدوام ومرات غبشة ساعة ⁵ يجي يدخل گبل ينام لليل يخابرونة لو لازمين واحد كاتل لو مهرب يروح يحقق وياهم او بمعنى تعذيب

»- مو تلعب روحة شلون يعذب الناس ويلمسهم؟

»- يلبس كف خاص يستخدمة مرة ومن يخلص يشمرة

»- وشنو ذنب الناس يكتل بيهم

»- مو ناس عادية اكو مجرمين لازم يتعذبون

»- ومالگو غيرة يعذب

»- هههه شدراني

»- مزين اكرع جنة بتيتة

»- مايحب الشعر دايماً لو يحفرة كبس لو صفر تدرين ؏ طاري الزيان مرة جان عندة شعر واحد لزم شعرة مثل النثرة راح كورع راسة يم الحلاق يكول ايدة وصخة دخل للتواليت ماغسل

»- عوووع جان غسل شعره

»- مو هية هنا المشكلة شلون يلمس شعرة

»- جان لبس الكفوف

»- ولله ماخطرت ؏ بالة وزين وراح بوكتة شلون شعر جان يخببل

»- هوة يعرف يطبخ؟

»- اي يطلع ؏ النت ويطبق ويجيبها عدل

»- شيطبخ بله

»- مثلا قبل كم يوم تجمع وية الولد وطبخو دليمية هم ؏ النت وجابها عدل صارت تفلش

»- شلون ماتخرب اذا اول مرة لازم تخرب

»- لا مايخرب وداعتج الاكل يصير بيدة فتيت نفسة طيبة بلاكل

_هههه نفسة طيبة؟؟!!

»- شبيج ولله نفسة طيبة غير انتي ممعاشرتة وحكمتي عليه

»- ولله بعد مادري

»- صدك ياقوتة عود مري علينة عصريات

»- انشاء الله اذا يطلع اخوج اجيج

»- لا بشرفج اني وياج قابل راح نگعد بصفة راح نكعد بغرفتي ونكعد اراويج كم حاجة اشتريتها للتخرج هاي اذا نجحت

»- انشاء الله تنجحين

»- امين بلكت اخلص

»- زين ازهر مابادر بلصلح؟

»- ابد

»- ولله اني اخوج دهار اكرها ماحبة بس ولله هوة السواه مو قليل حمل دك كتل وضيم وذل وقهر المفروض يتجازة خوش مجازاه مو يتهمة وية مرته هوة هاذه جزات المعروف؟

»- هية جانت لازم هيج بس صارت العكس..

»- الله يحننهم

سمعت الباب ندكت كتبت بسرعة

»- يالله ليزة شوية وراسلج اني مگنگة ؏ الجيران الباب جاي تندك يمكن عمتي رجعت باي كبد

حطيت التلفون ؏ صفحة وطلعت اركض الباب تندك بقوة الدنية تمطر بقوة وصوت الرعيد خلاني اصتگ بمگاني فتحت الباب روحي تتراجف من البرد اباوع الحال عمتي سودة علية منگعة وترجف طبگت الباب ودخلت وراها بيدها علاگة

رگزت عيوني بلعلاگة گامت شمرت العباية شرتها وحطتها ؏ الباب راحت بدلت ورجعت النفس العلاكة تحوس بيها باوعتلي وهية تقدم ايدها

_هاج امي

نزلت عيوني بيدها لفة مال فلافل ريحتها تفتح النفس ترست المكان ترس مدمرة عمبة من جهه المقدمة تقربت اخذتها من ايدها وكعدت حطت بصفي قوطية مال ببسي وندارت تكعد بآصف نطتة لفتة وقوطيتة بقت هية طلعت لفتها ولقوطية وتجمعنة ناكل شكد جانت طيبة وطعمها عراقي اصيل عتيق من نوعة جانت كعدة ماتنسي وسط اضواء ضالمة عاتمة دافئة

،،

مديت ايدي اهز بية بقوة

تمنة: ابني كوم ممرغلتلي گلبي وتالي وياك گوم ياعيني گووووم مو زين هيج ضال بلفراش يول ضهرك تكسر لاتضل نايم امشي تمشى بلبيت لاتضل نايم

فتحت عيني بنعاس

بارود: خليني انخمد دخيل الله

جريتة من خوانيگة حجيت بنبرة ناترة

_ولكككك كوووم وتالي وياك انه كووووم

_عمي بيت مابية الراحة لو بيدي انام بلشارع بس غير تمطر الشوارع صايرة طين مو مال انام بيهن

_هاا تريد تنام بلشارع ، مديت ايدي جريتة من قميصة ، كووم اطلع نام بلشاررع كووم كدامي ادبسز

_اشاقة يولو

_ها دحجت الطين شفتة يخوف كلت اشاقة

_لو صيف جان مديتلي فراش بس وين بهلزلك انام بلشارع

جريتة زرزرت بعيوني بوجهه

_كوم افتر لاتتتنخمد بنص هلبلاء

_عمي گايم

_كوم من كون عمة العماك وعمة عمك

غمزتلها مبتسم

_ياعم منهم حددي؟

_خلدون ولعارات الوياه

_خرة بيهم شلع

_لايسمعك ابيك

_هههه وين جاسر المتجاسر؟

_دويهر بلدوام

_شني شفت ليلي

_مادري اجاه اتصال وطلع معفس وجهه

_اي عجل شغلة ضرورية

_اي صدك بارود اوليدي ننخوتك

_شني؟

_سويت خوش كبة للعشة اريدك تدز الحنينة بساع بساع ولييدي الصينية ؏ الكاونتر هم تتمشى وهم تريح گلبي

_ها يعنب انتي مگعدتني مو حباً بية

_كوم عاد ضمييتلك ابو بطن

_اذا ضميتيلي هنا اني وياج ربع

_يله ولك لاتزخها

_عجل جاي تمطر هسة يتبلل الاكل

_لا مغطية الصينية بعلاليك كلشي مكملة بس تشيلها وتوديها

_صار عيني تتمن عمبر

_شلون بلميانة الزفرة

_هههههه ترة ماروح

_لا حبيبي روح الخاطري

_عبالي

_اي حبيبي يله

_يله خوش

صحت واني بلمطبخ

_يول ويينها ماكو وين حاطتها

_مو كلت ؏ الكاونتر

_نسيت..

_مطرت ترة

اباوعله شايلها وضهرة محدب گوة يمشي بلصينية وصل للباب جمد بمكانة روحة نشلت اجيتة جلبت بية

_ها يمة شكو شبيييك

غمض عيونة وصاح بصوت واهن

_اخخخ ضهري

اخذت من ايدة الصينية حطيتها ؏ صفحة مديت ايدي لازمتة وردد بخفوت

_شجاك يايمة عين وصابتك

_شتصيبني على شني جمال اخلاق حال مال اشو كلهن متبريات مني العالم تحسدني على شنيي

_ياا يمة هنة بس رموشك تسوالهن بلد اوليدي ابو رموش مفرورة جنهن ريشات طاووس مرصعة بزراگون

_بوويياي

تقربت عدلت فراشة مخربط رفعت ايدي اشرتلة واني انتچيلة اساعدة

_نام عوف الصينية عود اذا اجة دويهر اخلية يوديها

تمددت بالف يالله باوعتلها عيوني بعينها

_ازهر وينة؟

_فوك

_يم حيتة

_اي

_طايح الحض

_السانك اخوك اكبر منك مايصير ماكو احترامات بينكم

سطرت كف بكف

_بشرفج اخو يتهم اخوة وية مرتة؟؟!! وين الغيرة دخيل الله

_معليك همة يحلونها انتة سوست البلة الحاروك اطلع منها

ضحك وضحكت ؏ ضحكتة وكمت ؏ حيلي نكثت البطانية ودثرتة بيهه طفيت علية ضوة الهول ردت اطلع صاح

_شغلي الضوة

_ليش

_يعني كليومية اعيدها بية فوبية الضلام اختنك اذا طفة الضوة

_ياا عجل يمة اذا تتزوج شلون

ابتسم طبك ايد بيد يفركهن ببرودة

_ولله هاي بعد امها داعية عليها اذا تطلع تستحي لان يمي راح يصير كلشي مباح تحت ضوة ساطع ماعندي طفي الضوة

مديت ايدي شغلت الضوة لزمت الباب وأردفت بخفوت

_هسة مريتك تكول عنك جبان

_لا اعجبج

نطبك الباب خليت ايدي فوك راسي واني اذكر ذيج الحضات الاليمة الجانت اشبة بلموت علية و؏ اخواني شلون جان عمي خلدون واسمهان يلمونة بلمخزن يجمعونة يفصلون عن المخزن الكهرباء يصير اضلم ويطك الباب بسرگي ليلة كاملة نضل بين هلضلام القاحل

كبرت وصرت رجال وبعدني اخاف من الضلام استحي ابات بغير بيت بسببب هلوستي اذا كعدت وشفت الكهرباء طافية اگوم ادوس بطن العالم بسبيل بس الگة بصيص زغير ينبع منة ضوة اختننك احس روحي تريد تطللع ، شكد دمرونة هلعارات جهال كبالهم زغار ابرياء نتعذب ونحمل اقسى الضرب مانسى جاسر شلون جان يتقصد يغلط علة خلدون العار ويستفزة حتة يشيل الضرب عنة ، يلزمة ينهي نهي بيدة لو ضهرة الصار كتاب اجرام وتعذيب شكو اداه مال تعذيب نبتت بضهرة

،،

ليال: كعدت الصبح ؏ صوت انين مبگي فتحت عيوني بفزع وخوف اشوفها مهيرة غرگانه بدموعها اجيت لازمتها حجيت بحس يرجف

_شبيج دخييلج شبييجج

جاوبتني بثينة بنبرة واهنة مليانة قهر صوتها مبحوح

بثينة: الالم ماخذها روحها نسحنت خلينة ناخذها نشوف شبيها راح تموت اختي مو حالة هاية كل يومية تبجي

حجيت مفرفحة عيوني جاحضتهن وجهي بهت

_الملازم عابس اخذها مابيهه شي ولله راح تصير زيينه

رفعت ايدي فتحتها بتعداد اشرتلها ؏ اصبعي

_ليال هاذا اليوم الخامس ومهيرة هاية حالتها چااا شوكت تصير زيينة مو روحها طلعتت

غمضت وفتحت بقهر يربي شسوي وين انطي وجهي كمت شفت خالتي صبرية متمددة ودرة تسويلها گمادات حالتها حالة ركضت للحمام كاسرت مي حار وبارد سديت الباب طلعت ركض فتحت العلاگة اخذت منها دشداشة وخاولي وداخليات اجيت عليها

_كومي مهيرة خليني اسبحج ولله راح ترتاحين كومي فدوة اروحلج

شفتها تبجي روحها مسحونة لطمت ؏ وجهي نزلت ابوس بيها عيوني مليانة دموع

_ابوسس ايدج كومي لاتخليني اتحمل الذنب فددوة عليج الحسين الشهيد كومي ويايه خليني اسبحج

حجت وشفايفها يابسة مفطرة عيونها ذبلانة مغورگة جسمها يختض دموعها تجري

_روحي تعبت شوكت اموت واشوف امي ورتاح شوكت؟ ، بتوسل ، ليال تعبت دعيلي اموت فدوة دعيلي

صارت عيوني بعيونها نزلت دموعي

_اروحلج فددوة لاتحجين هيج وتكسرين ضهري اكثر من ماهوة مكسور كومي فدوة العينج كومي عينيني خليني اسبحج احل جسمج كومي بلكت ترتاحين مهيررة كومي

استسلمت للامر الواقع نطتني ايدها كومتها كوة تمشي دخلتها للحمام سبحتها بسرعة بمي دافي حل جسمها روحهه ترجف مغمضة وتختض مثل السعفة جريت الدشداشة من التعلاگه لبستها ولفيت الخاولي فوك راسها گومتها بلگوة لزمت ايدها لفيتها ؏ ضهري لزمتها انتچيلها حتة تمشي دخلت للغرفة كعدتها بفراشها اباوعلها شفايفها تتراجف مددت رجليها دموعها تنزل

بثينة: مهيرة شلون صرتي

بقت ساكتة دموعها تجري نداريت باوعت البثينة شفت نضراتها مليانة بليأس والاحباط غمضت بخنگة شفت اكو مشط على الحافة مال الشباك اخذتة واجيت اركض وخرت الخاولي وبديت امشطلها بشعرها جنة شعر الهنديات طويل يسحل وراها لزمت خصلة من شعرها بستها ودموعي تنزل اهمس بخفوت

_كلة بسبببي الله ياخذني

اجاني صوتها مليان اوتار تعبانة موجوعة

_مو بسببج

_بسببي الله لايووفقني

_ليال

_عيونها ونضرها وعافييتها

همست بروح رچيچة دموعها تتساقط

_ادعيلي اموت

استوقفت المشط باحد غصلاتها جحضت عيوني بخنگة

_مهيرة عيني گلب اخيتج التگطع وصل

_گلبج اهون من روحج تتگطع گدامج

شديت ؏ شفايفي بروح مهمومة ومقهورة اختبارك ياربي صعب نزلت دموعي واني اضفرللها كلساع تشهك وتتحرك الضفيرة من بين ايدي ، لفيت شعرها وگمت غطيتها همست لبثينة تدير بالها عليها خطية اجت بصفها روحها ممروضة تعبانة كوة تنطق بدت تحجي وياها واني تعديت وراهن جريت تلفوني من الشحن وطلعت بسرعة للحمام

فتحت التلفون شفت اكو مطالمة من النقيب عراد تجاهلتها لگيت اكو رسالة من الملازم عابس مكتوب بيها

»- كلشي تمام؟!

بدون سابع انذار اتصلت علية روحي تلوب مفرفحة اجاني صوتة

_ها ليال شلونها الاوضاع بشريني؟!

شهكت بحس مخنوگ

_شحجيلك سيددي نكسر ضهري

سمعت صوت جداحة حمحم بحس تعبان

_مهيرة بيها شي؟

_سيددي مهيرة هاذا ليوم الخامس وبعدها موجوعة شسوي تعببتت سبحتها عبالي تصير زينة شو زادت بلزايد عفتها ناطة

_حولي التلفون الايدها

هزيت راسي مثل مخبلة طلعت اركض خطواتي تتعثر تقربت مديت ايدي فتحت باب الغرفة اشوفها متهسترة راسها يهتز يمين تلو الايسر تقربت بصفها لزمت ايدها الجانت خاوية كوة تحركها حجيت بحس يرجف

_مهيرة الملازم عابس يريد يحجي وياج

هزت راسها بنفي حجت بحس خافت كوة يطلع منها الصوت

_مابية احجي تت.. تعبت

اسمع صوت الملازم عابس خليت التلفون ؏ اذني اجاني صوتة يحجي بنبرة متحجرة صارمة وصوت الجداحة يدوي بصفة مبين يحرك بهلجكاير

عابس: خلي التلفون ؏ اذانها

قربت التلفون ؏ اذانها باوعتلي بعيون نحلانة حجت بحس موجوع

_ليال مابية الحيل احجي

عابس: مهيرة وياي؟! اسمعيني خليج وياية الو

بلعت ريگي انتهيت احس لموت بصفي

_وياك

_اسمعي تگومين للحمام هسة

_ششنو

_باعي

_اي

_تكعدين

_سيدي شجاي تحجي مو حجي هاذا لتكمل عفية لتكمل

_خليني اكمل اهدي

_لتكمل عفيية حمام واكعد شهلحجي

_زين مو مشكلة اخذج هسة لدكتورة نسائية وهية تفهمج الاقصددة

حجيت بحس يرجف دموعي تنزل مجلبة بلبطانية عاصرتها بقوة احاول اخفف الالم

_لا ماريد فدوة العينك كافي تعببتك اويايه

_بابه حبيبتي شبيج هيج خايفة ولله ماكو شي يخوف اعتبريني ابوج اي شي بس افتهمي خليني احجيلج لاتستحين ماكو شي يخجل ترحين للحمام و...

قاطعتة

_فدوة لاتخجلني بس..

جدح بلجداحة خمس مرات بغضب ورد بصوت بي فحيح خافت

_ولحل؟!

_اموت ادعيلي بلكت امووت فدوة ادعيلي اموت دعوت الغريب مستجاببة

_اهدي

_عليك الله دعيلي امووت

ذب حسرة قويه رد كال

_مهيرة

صفنت وميلت راسي بهسترية

_ولله تعببت

اجاني صوتة يحجي بحنية

_ادري بيج ولله

تعبتي وتأذيتي وهلتعب گلة اطلعة من عيونهم واحد واحد عبالج يروح هيج بلشط لا ولخلق هلكون كلة تعبج والامج هاذة كلة يجيج وبهلرگبة

صار صوت ضربة مال رگبة كمل كلامة

واجيبلج حگج مربع بس الرايدة منج شني؟ رايدج تصيرين سباعية تتحملين هلالام وتخلين ثقتج بربج جبيرة تأمنين بانو اكو يوم وتموتين بية هاية كلها مجرد لحضات واختبار من ربج تتحمليها ميصير تدعين ؏ نفسج بلموت قبل يومج غلط بنتي غلط وحرام من تطلبين من ربج الموت قبل لاتنزل ورقتج

صيري سباعية ثقي هاية كلها لحضات وراح تتعافين وترجعين احسن من قبل وهسة راح استاذن واجي اخذج للدكتورة نسائية تجيك وضعج تمام؟!

نزلت دموعي بقهر رفعت ايدي مسحتهن اباطن كف ايدي واني أردف بروح عليلة

_ولله مابية حيل اوكف

_عادي مو مشكلة اني هسة اجيبلج علاج ترتاحين عليه

_تعبتك....

سوه صوت بحلكة معناه لاء

_چؤؤ تعبج حيلي

سكت رد كال

_متغدية؟

_مالي نفس اكل جابتلي ليال رجعتة بيدها

_تاكلين بابه شهلعناد عافية هاية لاتتهاونين بيها توگعين وعلي ماتكومين تررة

زفرت نفس قوي ونزلت دمعة من عيوني عضيت على شفتي السفلية وگلت بقهر

_بس اكل اتقيئ بطني تضل توجعني

_شوية اكلي موزين تگطعين الاكل

_ولله ماريد

_شوية مو هواي شي بسيط اكلي وراه شربي علاجج اتفقنة

نزلت دموعي ونصيت راسي خجلانه

_تمام

_عفية بلشطورة

بقيت ساكتة روحي اختلطت بين الالم والوجع والخجل والمعاملة الطفولية شهكت حس ؏ شهكاتي رد كال

_بعدج بيت خالتج غير؟

بلعت ريگي جرح بلاعيمي هزيت راسي

_اي

_يالله ارتاحي اني نص ساعة بلباب انشاء الله

_انشاء الله..

حسيت ؏ صوت ابتسامة بخفوت وصوت هوة قريب سمعتة دخل جوف اذني يتنفس ويلعب بلجداحة ساكت

انقطعت هلنفاس باوعت للتلفون غلق الخط انطيتة اليال ونداريت بنص جسمي متلفلفة ورجف

،،

تمنة: ندكت الباب اسمع دلام يصيح چاي دحجت للساعة ⁵ الفجر كاعدين للصلاه واكفة اتوضة وتلفت

دخل دهار بيدة ريوكات صبح علينة وصعد بيدة العصة مال التعذيب وگاف ردانة نمرد گلبي هلوليد من كثر ماتعذب صار يعشق التعذيب مامصدك الله ذابة ؏ التعذيب اصفن علية وتحسب بخلدون واسمهان دهار صار هيج كلة بسبب الطفولة العيشوه بيها

شفتة نزل وبيدة لازم ملابسة والسلة الخاصة مالتة بيها ليفة وفرشة مال اسنان وصابونة وموس ومحجارة وشامبو ، دفع باب الحمام ودخل ماسمعت غير صوت الماي

نزلت رجاء

_عمة صباح الخير

باوعتلهه بطرف عيني حجيت بثكل وجهه

_صباح النور

شفتها ندارت تمشي بتجاه الحمام تفتح بلگيلون ماينفتح

_منو بلحمام؟

تمنة: جاسر بلحمام ماتسمعين صوت الماي معناته اكو واحد بلحمام وجاي يسبح الااا تعرفيين منو شوية استحي عييب

اجيت بصفها حجيت تحت انفاسي

_عجل شمالة ازهر بلسنة حسنة يالله يسسببح شمالة حضي

خزرتها

_شكلتي؟

_اكول شتردين ؏ الريوك بيض وطماطة لو بتيتة

_جاب دويهر گيمر وگاهي

_هممم عجل اسوي الچاي

_الچاي كامل گومي ذكري الله وصلي

تمنة:-

الصلاه مثل بناء جسر فوق لهيب جهنم كل ترك فرض يعني ترك قطعة من الجسر التزمو الصلاه لجسر سهل الخطوات ليس جسر عديم الخطوات .

خلصت صلاتي كعدن بنياتي شمعات عيني يتطافرن ذيج التصيح وين قميصي والثانية وين حذائي روزة بنيتي مضمدة وليزة اخر سنة طب عدها طموح ورايدة تحققة گلبي عليهن مسرسح واني اشوف بزر تمنة وصل دويهر الضابط وروزة المضمدة وبارود الخريج محاماه حقوق وليزة ماضل شي دكتورة المستقبل وازهر الفشل البيهم وطاح برجاء

عيوني تلاشت تجاه الحمام نفتح الباب بيدة السلة ولبدلة مالتة صعد رجع السلة بغرفتة حتة لحد يلعب بغراضة ونزل تقدم للغسالة شمر البدلة ويشمر فوكها شامبو يريد يغسلها صحت

_عوفها ابني اني اغسسلها

باوعلي وسوة جوت بحلكة معناه لاء

_چؤؤ ماعندي شي

لازم بيدة الصوندة يترس بلغسالة شوية وسمع صوت المجفف نداريت شفتة ينكث بيها شراها ؏ الحبل رجع يفرك بيدة تقدم واكف گدام الصوبة يتدفة ايدة صايرة حمررة

_البارحة شسويت

حجة بعدم مبالاه وهوة يفرك بيدة فوك الصوبة

_بلاء

هزيت راسي

_دريت

باوعلي من جوة حاجبة

_المجرم يستاهل

_اي امي بس انتة ماتستاهل

_شبية اني؟!

_انتة جاي تتوحش يوم عن يوم

_عليكم؟!

_لاء

_عجل خلص

ذبيت حسرة روحي اختنكت

_اوف منك

_ المن شايلة هموم الدنية يولو يستاهلون

_دحج دمارات ايدك شلون متشنجة

_تروح

_متروح ذن اعصاب

_ميخالف

_ذن من كثر الضرب والتعنيف

_طبعاً

_تمرد بگلبي

_هاذ عملي شلون اخالف القانون؟ ناس مجرمين شلون يعترفون عن جريمتهم؟ يشبعون صوندات يالله يغردون شي المخدرات تارسة خشمة ويكول سيدي ماتعاطة دمرو البلد واحد من القضاية واحد يتعاطة هلسم داخل ؏ بيتهم مكتل عايلتة كلها عقلة مو براسة منتهي لو الثاني يكبسل رايد فلوس يشتري هلسم مامنطينة داخل مكتل البيت كلة وعارض البيت للبيع يريد يورثهم وبفلوس البيت يشتري هلسسم وكل هلقضاية والاجرام وترديني ماعذبهم لا ابشرج *** امهم البارحه

شهكت ايدي اليمنة ؏ گلبي مصتگة بمگاني

_يمة دخيلك ربي شني من بشر ذولة يكتل اهلة بدم بارد علمود يشتري مخدرات؟ عجل واهلة مايتندم وراها من يتذكرهم

رجع ورة گعد ؏ القنفة هز راسة

_لاء شيتندم دخيل الله روحة طامسة بيها ، ربة دينة المخدرات يدور اهل يدور تانيب ضمير

_يا يمة دخيلك شني ذنب اهلة

_هوة هنا محور القضية كلها

_يكتلهم ليش الله كون لاينطيهم

_يكتلهم علمود فلوس عجل شلون واحد حارك امة لان مابيعتلة ذهبها حركها حرك حي بانزين يكول وهية نايمة شمرت فوكها جركان مال بانزين فزت ذبيت عود الشخاط وطفرت طبكت الباب يكول تتوسل بية اطفيها رايدة روحها والاخر لحضة يكللها خلي ذهبج يفيدج ولله مافتحلج الباب الحد ماتكسبين هاذا المدمن لاتستغربين حركها وباع ذهبها ونقبض علية اجينة للشقة الريحة گابة واليوكف العقل اكثر بيت بية ميت ومنو؟ امة محتركة كدامة وعادي عايش طبيعي لگينة گوب چاي دافي توة متريك ولوضع طبيعي

بقيت فاكة حلكي روحي تلوب

_فلك الصاببة حرامات بية التسع تشر

_حرامات بية تعرفين شنو نرجع للشي الاساسي القاح لو بلتواليت جان هواي احسن من هلتبن والطياح حض

_ولله يايمة الدنية صايرة تخوف

_من زمان

_مابيها امان

_هية تعرفين تتبع التربيه هسة تكولين شلون؟ من البداية اكون حريص عن ابني وين يلتقي وين يروح اراقبة اشوفة شيسوي مايسوي مو شك وانما حررص اي حركة اشوفها غريبة اكسر رجلة وشمرة بلبيت مرة مرتين يتوب اني ضد العنف بس بهيج حالات خطرة لا استخدام العنف افضل من ماتتطور الامور ويكتلهم

روحي اختنگت گعدت بلكاع متربعة وصافنة دخيلك ربي شمالها العالم عمي الدنية راح تنگلب اهل ينگتلون هلمود جم فلس يشتري بيهن مخدرات؟!!!

نزل ازهر شاف رجاء بيدها الصينية دنگت خلتها بلكاع تخبل من شافها دنگت وجاسر موجود عيونة صارت بلطول صاح بيها

ازهر: بنت القنادر بعد دنگي حيل ماوصيج

ندار عنة جاسر يباوعلة بعيون ثابتة مركزهن عليه مثل القناص كمل صياحة

_تعالي لا مرغلج بلكاع دك على راسج من صباحيت الله

رجاء: شبيك ازهر غير اتريك

عاط بيهه

_تعاي ريوكج موجود تعااااي

تمنة: ازهر مابينة حيلك دعوفها خل تاكل

رفع حواجبة وحجة بستفزاز

_ماتتريك هنا

ندار براسة خزرها وصاح

_مو چاااي ااحجيي وياج ماتتحركيين

عافت منيدها لافت من ورة القنفة تمشي بخطوات سريعة توها صعدت الدرج خلة ايدة براسها وجراها فوك اسمع بس صوت السطرات

تمنة: خطية البنية تريد تتريك شني من الصباحيات گاعد مغنتب ويكتل بيها

جاسر: بطران دخيل الله اني مفكر بيها اشوفلي شقة وخلي لبيت الى ماجاي ارتاح هنا نهائياً

_عليمن يمة

_اشتري راحتي

استقطع حديثنا صوت دلام تقرب توة سابح قرب الصوبة بصفة وكعد بصف الصينية صاح

_يالله تعالو تريكو

شفت دويهر گام يندة بارود يحجي بذنة وبلمخدة يكفخ بية حد ماخلاه يطفر من مكانة

بارود: منوو مات

جاسر: العطل ولخرط تعرفهم؟

بفررحة مد ايدة ؏ قميصة مجلب بية من خوانيگة

_ااحللللفففف

_عارات ميموتون احمم تعال اترريك

_عبالي ماتو وداعت محمدنة فرحت

الشيخ دلام: ياهمة

بارود: هيج محدد اي شو ناوشني ايدك خل اكوم ضهري موتني

لم شفتة السفلية لحلگة مگنبص مثبت عيونة علية

_كومني شبيك

شفتة لزم المخدة حجة بصوت خافت

_الزمها

_لا يابة تمزلك هايه شلزم منها

_دلزمها دخيل الله

مديت ايدي لزمتها جراها بقوة وكفت ضهري طك

_اخخخ ضهري

_طك؟

مديت ايدي اتحسس ضهري باللام

_اي شنطني

_اخذك لدكتور يشوفك شبيك؟

_لاء هوة يطيب بحدة

_تخاف؟

_اي ولله اخاف

تمنة: تعال تريك واني هسة ادلكلك ضهرك ببفلكس

تقرب كعد حطيتلة استكان صبيتلة چاي صحت دويهر يتريك ماراد كال متريك اعرف بية عذر منة حتة ماياكل لان شاف رجاء فاتحة الكاهي عبالة لامستة

نزلت ليزة بعجلة صاحت

_باررود توصلني للگلية راح اتأخر

ندار عليها سوة حركة بحلكة ورفع اجتافه

صحت بجزع

_شبيك بارود ولله راح اتأخر

_مريضض

_لا زين مو چاي تاكل

_لا ولله ضهري يوجعني خلي جاسر ياخذج

_شبيك بارود حباب

_معلية ولله

جاسر: عيفج منة تعاي اني اوصلج ماعندي شي

_بس..

_امشي

_مو باوع دهار هوة ياقوتة تريد تروح تقدم لفايل مالها

تكتف متگنبص بمكانة بثبات تام منتجي برجلة ؏ الحافة مال القنفة

_اي وشنو يعني

صاحت بية امي

تمنة: اي دخلي ياخذج تشلعين الگلب

مد ايدة طلع سويجة سبقني بخطواتة شغل السيارة بقيت اكل بروحي هسة شتكول علية ياقوتة؟؟ عيب علية هسة تاخذني بغير نضرة

،،

ياقوتة: كعدت ؏ صوت المنبة كمت بسرعة بحوشت بلعلاليك طلعت بنطرون اسود وقميص فوكهن قمصلة ذبيت شالي منا ومنا اجيت شخبطت بوجهي وبسرعة طرت للباب اسمع واحد يدك فتحت شفتها ليزة هزيت راسي

_اي ليزة بس اوكفي خل احاجي عمتي قبل لاطلع

دخلت اركض حجيت بصوت ناصي

_عمة اني راح اروح اقدم الفايل ليزة واكفتلي بلباب اروح؟

هزت راسها بنعاس

_روحي دادة وطبگي وراج الباب

هزيت راسي وطلعت اركض طبگت الباب واني عيوني بلگاع جانت مليانة طين حرصت لازلك امشي ؏ كيف بعيون متفحصة ودقيقة وصلت للباب مال السيارة مديت ايدي فتحتة سحبتة تقربت كعدت اجت بصفي ليزة كعدت وطبكت الباب ، ندفعت بقوة للكشن بسبب حركة السيارة السريعة خفف السرعة نكفخت بلكشن الامامي صارت عيني بعينة بلآمراية

،،

عابس: اي نعم دكتورة هاية حالتها شنو ممكن يهدئها؟

_حنطيها شريط ـــــــــ واحد ــــــــــ وشراب ــــــــ واحد شريط نوام

اخذت نفس من الجكارة هزيت راسي زفرتة

_مناعتها تتقبل كل هلعلاج؟

_اي تتقبلة لازم بعد الاكل

_گاطعة الاكل

_شوربة خفيفة شي تاكل ميخالف اهم شي يدخل معدتها شي متضل فارغة

_تمام انشاء الله ، مديت ايدي بجيبي طلعت المحفضة شكد صارن دكتورة

_ ^^^^

قدمت ايدي دفعتلها رجعت المحفضة الجيبي التقطت العلاگة صار گدامي عربانة مال لبلبي حار مسطر فوكة اعضام مال هوش ريحتة معبية المكان تقربت

_حجي بلا آمر عليك جيس معدل من ايدك

_بيش تريد

_معدل من اييدك

شدالي جيس خليت بصفة صمون حار وصعدت بلسيارة

،،

ليال: اباوعلها تتگلب ساعة يمنة ساعة يسرة روحها تلوب نزيت ؏ صوت تلفوني لزمتة مخترعة تلاشت انضاري للاسم جان "الملازم عابس" فتحت خط

_الو ها سيدي

حمحم وحجة بصوت هادئ مصحوب بانفاس بردانة

_اني بلباب

_جاية سيدي دقيقة

كمت ؏ اطراف اصابعي مديت راسي بغرفت خالتي ضلمة ماشفت شي اكيد نايمة طلعت ؏ اطراف اصابعي فتحت الباب تقرب بيدة نطاني علاليك اخذتهن من ايدة ندار للسيارة ورجع بيدة اسوار فضي ؏ شكل دمعات مختوم بوسطة اية الكرسي وادعية انتبهتلة ندار بضهرة شفتة بلجامه مال السيارة حطاه على شفايفة باسة حيل غمض فرك وجهه وندار علية قدم ايدة

_انطي لمهيرة هلسوار عزيز علية خليها تخلي بيدها وتحافض علية

اخذتة من ايدة باوعتلة

_بس ليش؟

_يحرسها بية ادعية وايات داخلة حتة بية قرآن زغير جوة اذا تفتحين الاية مال الكرسي تلگينة ، خليها تخلي بيدها وتحافض عليه

هزيت راسي

_صار سيدي

_يالله دخلي جوة بدت تمطر

شفتة صعد بلسيارة تحرك نزلت عيوني للسوار اتمعنة نداريت طبگت الباب واني مركزة بية جاي امشي استوقفني الضل المعكوس بلكاع رفعت عيني واشوفها خالتي صبرية كدامي ملامح الغضب مالية وجهه جاحضة عيونها وعاضة ايدها بقوة

يتبببع...

والى هنا نقفل البارت فلذات قلبي

يگـــٓـꫂل احدهم :-

چاا ليش من دون الخلگ؟
عشنة ۄي اهالينة غررب!

-الكاتبة وَرْد حيدر-