أسيـرة "داعـش"

part 30

#أسيرت داعش

#الكاتبه اسينات

لا تنسون التصويت وتعليقاتكم بين الفقرات ومتابعه للحساب

lrayh1234

بسم الله الرحمن الرحيم 🤍

•~••~••~••~••~••~••~••~••~••~••~••~••~•
مشهد من البارت السابق لحتى تتذكرون

اسمع وعاكده حواجبي ياسين منو ؟

اي كتلك اجيبلك الفلوس ..من كالت هيج طبيت بسرعه حجيت

:-يا فلوس ؟؟...

•~••~•

نزت من شافتني ومبينه باجيه رادت تغلق التلفون رحت بسرعه اخذته منه

:-ياسين منو ها نور ياسين منو

:-و ورده بس خلي افهمج لحضه

:-شتفهميني ياسين منو

رفعت ايديه تحجي وتريد تبجي

•~••~•
نور

:-والله هوه جاي يهددني مدخلني والقرآن بيمن تردين احلفلج ورده جاي يهددني

:-بيمن

:-والله هوه جاي يهددني بيج والقرآن اذا ما انطي فلوس يأذيج وياذيني والله ورده كل هذني التصرفات الاسويهن مو بيدي هوه والله تدرين بيه

ضلت صافنه تباوعلي واني ابجي حيل مو بيدي يهددني بيه وكل يوم يطلب فلوس واذا ارفض الجمله البسيطه مالته اختج عاجبتني ومن كلامه افهم نيته الوصخه

كل هذي الاشياء الي جاي أسويه هوه يكلي عليه جان زميل عادي بالجامعه بنفس القسم اني وياه هوه الي اجه وحجه وياي

جنت عاديه وياه لمن كام يهدد بيه وكم مره حذرته يروح ويعوفني بحالي ودائما يتقرب مني واني اصده

جان دائما يهدد بيه وحركاته غريبه بس بعدين من حجيت وياه بطل بس بعد فتره رجع السوالفه والتهديداته ابجي حيل وهيه ساكته صافنه بيه ما مستوعبه حقه

:-هذا يا حيوان ..

بسرعه اخذت تلفونه رحت يمه ترجف واني ارجف وخايفه اخذته دخلت على المكالمات

:-شجاي تسوين

:-حسن حسن ..

طلعت رقم حسن هستوني جاي اسحب التلفون رد رفعت التلفون وعافتني رادت تطلع لحكت بيه دفعتني حيل وكعت ابجي وهيه سدت الباب عليه وقبل متتطلع اخذت تلفوني وياه

ضليت لامه نفسي ورطت نفسي واختي شجابني اني وصادقته ما عندي عقل والله

ردت اكله بس خفت بس هوه جبرني ودائما اذا ما ارد عليَ يريد يفضحني بالجامعه وأطر انطي فلوس

ابجي حيل واني اسمعه تصيح وتحجي وتغلط حيل خفت واحس كلبي يدك حيل لمن صار صوته عالي حيل وتصيح بصوت عالي وتغلط

لبالي تحجي وي حسن راسي كام يوجعني بسرعه

كمت ارجف فتحت الباب جان اشوفه وي ياسين وياسين لازم ايده حيل وهيه تضرب بي بكل قوته وتفشر عليه وهوه يحجي

:-جيبي التلفون جيبي ...

:-نجب لك حيوان خسيس شتريد منه ها شتريد منه

حيل خفت واحس رجليه وكفن وهوه حالته تخوف يرجف ويحجي فاتح عيونه وعيونه حمر دم والشرايين مبينه بعيونه وحركاته لبالك مريض نفسي ويحرك اصابعه بطريقه غريبه فزيت من صرخت

:-وخر لك كلب

رحت بسرعه دفعته بكل قوتي ارجف واحجي

:-شتريد جاي لهنا شجابك ياسين شجابك لك حيوان خربت حياتي امشي بره اطلللع بررره لا اخابر الشرطه

:-جيبي التلفون لتخابرين الشرطه ..

حيل خفت مو شخصيته متغير سوو صوت غريب بحلكه مغمض عيونه كام يحك بركبته حيل ويباوعلنه بطريقه تخوف وعيونه ناطات هستوه راد يتقرب وكع بالكاع يرجف من خوفي ضربته على رأسه حيل برجلي

بسرعه جريت ورده احجي وخايفه

:-بيج شي ضربج احجي

:-وخري ..خلي نربطه على ما يجي حسن خاف يكعد

سكتت من عافتني وراحت جابت شالات وكعدت تربط بي حجت بنبره قهر وبخنكه والدمعه بطرف عينه

:-ورطيتينه نور شسويتي بينه ...

انفجرت بالبجي رحت يمه ابجي مفرفحه اريد اتقرب احضنه خايفه حيل وهيه ولا مهتمه تربط بي واني اجر بيه اريد تحضني

حيل خايفه ومحتاجه الحضنه اجر بيه حيل بس اريد احضنه بس هيه ماكو ابد

كامت من يمي غسلت بالمطبخ واجت تلم بشعره وتجر بي جرته من رجله كوه تجر بي بسرعه رحت جريته وياه خلينه ظهره على القنفه كمت اربط وياه ونربط أكثر من مره خاف يكعد ويفتح الربطه سدينه حلكه واني ارجف

رحت بسرعه سديت الباب مالت البيت وقفلته الدنيا ليل هستوه ب 2 بليل كاعدين على اعصابنه لحد ما ما صارت ب 2 ونص دك تلفون ورده كامت بسرعه لبست حجابها

وراحت فتحت الباب واني هم رحت لبست حجابي بسرعه فتحت الباب على كيف طب حسن من شافه ضل يحجي وي ورده وهيه تحجي وياه وتسولفله وتبجي تندمت حيل وابجي بصمت خايفه ورطته

رجعت اباوع حضنه نوب راح يم حسن مدري شسوو بسرعه سديت الباب من شافني ركض طبيت للحمام ارجف خفت حيل ابجي فتحت المي غسلت وجهي ارجف

شوي وطلعت ما لكيتهم ثلاثتهم خفت وين راحو ضليت الوب خايفه لا يصيرلهم شي ميت مره اتصلت عليه يرن بس متجاوب صار تفكيري خاف راحت وعافتني منو الي بعده اريده يمي لو اضل مكابلته ميت سنه ما امل منه كل ما افكر هيج ابجي

:-كله من غبائج يثوله هاي خسرتي اختج رتاحيتي اختج عافتج وراحت ارتاحيتي نور

ضليت بمكاني كاعده وارجف وعيوني على الساعه عيوني ساعه على الباب ساعه على الساعه

صح تصرفي غلط بس مجبوره اسوي هيج مو بارداتي كلشي جاي اسوي بس هوه حيل جان يضغط عليه خصوصا اخر فتره وما اكدر احجي لانو حياذينه وحياذي ورده واخاف حيل منه

اول مره بحياتي هيج اسوي ومتندمه ميت مره وبدي هيج الله ياخذ أمانته واخلص لانو هواي اذيته الورده حتى مرات من اشاقه وياه واضربه أو اغلط عليه بالشقه احس كلبي جاي ياذيني عليه

ولحد الأن موقفه من باست رجلي بعقلي مدري شيصير بيه من اذكر هيج روحي تروح متت واني انتضرهم تعبت حيل

لمن صارت ب 4 الفجر انفتحت الباب طبت كمت بسرعه اباوعله عيونه منفوخه حمر دم يخوفن ومحني ظهره وتمشي شافتني تنهدت وراحت طبت الغرفه بجيت بصوت ناصي.

•~••~•
ورده

طبيت الغرفه تعبانه واحس عيوني يوجعنـي وكل طاقه ما عنـدي رحت غسلت اريد اصحصح صفنت تذكرت

"هستوه اجه حسن ضليت ابجي واشهك وهوه خايف عليه وكوه واكف على أعصابه ويحجي من بين أسنانه

:-ورده احجي منو هذا

سولفتله كلشي راحله حط ايده جوه خشمه يشوف تنفسه نوب حط ايده على كلبه وعلى ركبته لزم معصم ايده باوعلي ورد كال

:-هذا مدمن شلون ورده اختج اختلطت وياه ...

صفنت مصدومه نور صديقه هذا صحاني من صفنتي

:-شبيج ؟

:-يعني هذا مدمن مخدرات

:-اي

:-يعني اختي ..لطمت على كيف على خدي نثولت مضل عقل براسي خايفه حيل مدري شسوي ما اعرف شسوي ورطتنه

:-فدوه حسن شسوي كلي احس عقلي صفر

:-لتخافين راح يتعاقب بتهمه الابتزاز والاجبار لانو هوه ابتز اختج وراد يتعرضلكم لتخافين محلوله بس اختج هاي ضبيه شوي مو اي واحد كو*** تصاحبه

ضليت ساكته يعني اختي وهيج ليش ما كالتلي يربي ميته قهر ليش ما كالت جا حليناهه من بده يطلب منج تعالي كولي مو تتصرفين بدون متكولين هاي احسن هيج

:-زين هوه يهدده بالفلوس منين تأخذ ؟

:-مني

مسحت وجهي حيل

جنت احط فلوسي كباله وهيه تعرف مكانهن وعندي ثقه بيه عميه بحيث إذا يكولوي نور باكتج ما اصدك

لبست عبايه امي جانت معلكه هوه شاله طلعنه نمشي والدنيا ليل لمن وصلنه للسياره ركبت وهوه نيمه ليوره كعدت لفيت روحي حيل خايفه

:-هسه شنسوي

:-منسوي شي ...

ياوعتله ساكته مشه مسافه بعيده وصل يم منطقه شبه فارغه وضلمه كلشي ما اشوف بس صوت دكات كلبي اسمعه من الخوف

راد ينزل بسرعه لزمته حاضنه ايده اباوعله بخوف

:-وين فدوه لتعوفني وياه

:-هنا روحي هنا

بجيت :-لتروح عفيه خايفه والنبي منه

باوعلي ومسح دموعي حضني صار وجهي على صدره ابجي واشهك ومجلبه بي حيل من قميصه وخرت امسح بعيوني وهوه يهدي بيه نزل فتح الباب

وعيوني تراقب شيسوي نزله يسحل بي سد الباب اخذه يجر بي لمحت كم شخص بسرعه نزلت راسي صرت ابدا ما أبين زحفت بحيث اختنكت خايفه

تقريبا أكثر من نص ساعه واجه بسرعه ركب من شافني

:-هاي شبيج ليش هيج يمعوده لتعلكين

:-لا كمت شسويت منو هذولي

:-اصدقائي همه الي راح يودو للسجن واني راح استلم قضيته واطيح حضه

سكتت :-لتخافين روحي عادي

مسحت وجهي :-نور ..شسوي

:-البنيه ما دخله طاحت الضحيه ولتنسين جان يجبره ويخوفه بيج

:-ما ادري حسن ما ادري

لزم ايدي باوعتله بتردد خايفه ..شغل السياره ومشه عيونه ليكدام يسوق واني لامه نفسي حيل على الباب تعبت حيل افكر ليش هيج ديصير وياي يربي

عيوني يوجعني بارده واني لابسه خفيف جسمي يرجف مثل السعفه هسه شحيصير يربي رغم حسن هوه الي أخذه بس خايفه حيل المكان بعيد عن بيتنه بهواي وصلت يم الفرع

:-اوكف هنا .

:-خلي اوصلج

:-لا اوكفلي واني اروح خاف أحد يشوفنه

هز رأسه وكف باوعتله

:-شكرا حسن هواي جاي اعذبك

:-تؤ اسكتي لتتشكريني ..لزم خدي يمسح عليه واني مالي خلك شي

:-تصبح على خير

:-وانتي بالف خير وردايتي ولتفكرين بشي..

هويت راسي نزلت امشي واتلفت خاف اكو احد لمن وصلت أشرت الحسن دخلت للبيت

اتنهدت من حسيته ادك الباب وتبجي وتحجي

نـور:-ورده حبابه افتحي الباب اسفه والله اني كلبه اني ما استاهل بس فدوه افتحي لتضلين هيج فدوه ورده والله كلبي جاي ياذيني

كلبي هسه شايل هواي ما اريد اسمع صوته دايخه حيل ضليت بالحمام كاعده لمن حسيت راح اوكع على روحي من التعب

كمت فتحت الباب منزله راسي ما اريد اشوفه واتأثر بدموعه بسرعه رحت طبيت بالفرااش وغطيت جسمي ووجهي ضلت هيج تبجي احس راسي راح ينفجر شي يتحرك براسي ويضرب بالجمجمه

عطت بيه :-برههه امشي طلعي بره دوختيني بس تبجين

من صرخت عليه خافت وبسرعه طلعت تبجي

حطيت راسي بالمخده حيل جاي ياذيني فركت راسي اريد اخفف الالم لحد ما نمت

ما كعدت الا ب6 ما نايمه غير بس ساعتين نعسانه ردت اخذ اجازه بس صارلي هواي أخذ كمت غسلت جوه عيوني اسود وتعبانه تعب مو طبيعي

كملت لقيت حجابي وطلعت جانت كاعده ومبدله

:-ها ورده صباح الخير

مارديت طلعت وهيه ورايه ركبت وهيه هم وصلته ورحت المستشفى بديت اشتغل بس متت تعب

صارت الاستراحه رحت ركض اشتريت كهوه بس اريد اصحح اتصل تلفوني نور

:-ها ورده تجين تاخذيني لو اني ارجع

:-ليش من وكت ؟

:-مالي خلك ..

:-ابقي شوي واجي ..

غلقته منه ورحت اخذت زمنيه ساعه رحت واحجي وي صديقتي دكتوره اسمه مريم تحجي وياي صديقتي المقربه

رحت طلعت ركبت بالسياره وسقت احس شوي واسوي حادث من كثر ما نعسانه وتعبانه وصلت انتضرته لمن طلعت ركبت وصلته للبيت وابدا محجيت وصلته ورجعت للمستشفى كملت ب 1 الظهر هستوني جاي اطلع

اجه حسن باوعتله

:-ها وردايه شلونج

:-هلا الحمدلله

:-شلون صرتي

:-زينه

:-نحجي بغير مكان ؟!

:-اي مو هنا

رحنه ركب بسيارتي هوه الي ساق وصلنه يم كافيه راح اشتره كهوه وكعدنه نشرب ويحجي

:-اي شبيج هيج وجهج

:-ما بيه

:-شوفي عيونج لبالك وحده سكرانه

باوعتله ساكته وهوه ضحك ابتسمت على ضحكته اباوعله

:-اي هيج اضحكي ..

:-ابتسمت ساكته

:-حنضل هيج

:-لا اكيد

:-اي هسه شسويتي وي نور

:-جاي اتجاهله

:-هم خطيه ليش هيج

:-لا مو خطيه تستاهل شوي خلي أعلمه

:-مادري بعد بس لطولين

هزيت راسي

:-اي شوكت تلتحق ؟

:-عكب باجر

:-تضل هنا ؟

:-اي باجر اروح ، نطلع نفتر ؟

:-امم بكيفك

:-هم نتونس

:-اي تمام بس انطيني الوقت

:-تمام ..

وصلني للبيت وهوه راح طبيت جانت نور تنضف وريحت الاكل طبت بخشمي شافتني كامت والوصله بايده وشعره رافعته وكفشه

:-ها الله يساعدج ..

هزيت راسي دخلت الغرفتي بدلت وغسلت وصليت كعدت اشوف شكو بالتلفون اكلب ضايجه شفت نور ناشره ستوري حزين واغنيه حزينه ضليت ابجي ..

طلعت جانت كاعده

:-ها اكوم أصب الاكل ..

:-اي ..

راحت صبت كعدنه ناكل بهدوء وهيه ساكته وتحاول تفتح موضوع بس حتى احجي

:-ورده خلي نروح نزور ماما ..

مدنكه راسي احجي:-تمام

كملت كمت هيه راحت تغسل مواعين واني هم رحت بسرعه نمت من التعب ما رحت للعياده لأنو حيل تعبانه ومالي خلك

كعدت ب 4 رحت طبيت الغرفته جانت نايمه طلعت راسلني حسن

(وردايه اليوم نطلع مدام ما عندي شي ؟)

:-اي تمام واني هم ما عندي ..

(تمام لعد جهزي نفسج اني اجيج )

رحت سبحت ومشطت شعري حضرت ملابسي ادري بي هسه يضل يعلق على لبسي فلبست فستان طويل ولفيت شالي وحطيت شوي مكياج رتبت نفسي واخر لمسه حطيت عطر

كملت لمن اجه رمشلي رحت طلعت امشي واكفلي نهايت الفرع جان كاعد ولابس قميص اسود وفاتح الدكم الاولى صعدت مبتسمه

:-هاي شنو مطقم وياي ههه

:-لا يا شمدريني

:-علينه تدري بيه البس اسود ..

:-هسه يالله الاسود سيد الالوان ..بس صدك حلو عليه

باوعتله من رفع قميصه يحجي طلع صدره شفت داك وشم بي ما بين كله شهكت باوعلي

:-شبيج ..

:-داك وشم

:-لا

:-والنبي داك خلي اشوفه فدوه فدوه حسن

:-لا ورد لا ..اريد اجر القميص ميخليني ما احس الا جرني حيل اله صفنت عليه هوه هم صفن يتمعن بملامحي

:-حسن وخر لاا

صرت ادفع بي وعمدا احاول اوخر القميص من صدره وهوه يتلاوه وياي لمن ايست وتعبت وخرت

:-طاحضك تعبت

:-انجبي عزيزتي

ضحكت بصوت عالي شغل السياره

:-وين حنروح

:-اول شي ناكل حجزت بمطعم وبعدين خليه مفاجأة

ضليت مبتسمه شغل البلوتوث طلع ساري السواس اغنيه بس اسمع مني متت ضحك صار يغني ويسوي صوته مثله بس ميضبط واني هم صرت اغني وأطك اصبعتين واصور

لمن وصلنه للمطعم نزلت جان جناح خاص وخرلي الكرسي باوعتله مبتسمه

:-شكرا

:-لتتشكرين ..نوب حجه بهمس مسمعت

:-ها ؟

:-ماكو شي روحي ..سكتت

جابو المينو ضليت افكر شاكل جوعانه حيل

:-يوو أنته اطلب مجاي اعرف شطلب

:-شتردين اطلبي تردين انزلج كل الاكل هنا ؟

ضليت صافنه

:-لا خاف مناكله اطلب شي خفيف ويشبع ..

طلبنه ونزل الاكل بديت اكل وهوه هم واصوره من يأكل وهوه يعيط بيه واضل اضحك لمن كلمنه ضلينه شوي كاعدين

وكمنه رحت ركبت بالسياره وهوه راح اشترالنه عصير وجبوسه ونساتل وحب نزعت الكعب وكعدت عدل سد السياره وبلشت اكل حلويات

:-شلون تأكلين ومتسمينين ؟

:-تره اسمن بس ما أبين لأنو بسرعه اسوي رجيم

ضليت اباوعله مبين اكو كلام يريد يحجي بي

:-حسون اذا اكو كلام احجي

همس:-يبعد كلب حسون ونبضه

:-ها

:-ماكو شي بس اريد اكلج شغله ..

:-اي ؟

:-ورده صارلي فتره متردد واريد احجي وياج وخايف لا ترفضين ومقدر ضروفج ردت اكلج قبل بس تعرفين صارت وفاه امج الله يرحمــه فأجلته

:-شنو حسن جاي تخوفيني

سكت

حطيت الجبس على جهه احس انسلطت من حرورته

:-اي احجي

:-ورده تقبلين تتزوجيني...

يتبع 🔥...

•~••~••~•
شلونه القفله 🙈

ارائكم بالبارت اريد تصويت ولايكات لحتى استمر علقوا حتى القصه تصعد

وشاركوه وانشرو عنه وسولي تاكات على الانستا حسابي اسمه الكاتبه اسينات هذا اليوزر soso1.913

وتيك هم انشرو عنه من اشوف تفاعلكم اكمل نشر

اغاني روايتنه ذكرى

انسى العالم
الحب مالي
بس اسمع مني
انتَ روحي

في حفظ الرحمــان 🤍.