#حين_اتى
وصفها قائلاً ..
لها وجهٌ ودود على الدوامِ يُرممُ قلَقي🍂
____________________¹⁰
اول يوم الي واني بايتة بالموكب الساعة ب ٢ ونص الكل فرش وبدو ينامون واني مجاي اعرف انام دزيت رسالة لضياء
...نايم لو بعدك
...بالحديقة جاي نغسل الكدور
...اجي اكعد بعيد عنكم بس اباوع
...لا هوسة ومحد غيرج طلعت حتى انتي تطلعين
...حباب والله البس عبايتي وبوشيتي
...نزليلي تلكيني يم باب القاعة
لبست ونزلت ع السريع واكفلي بالباب رحتلة بفرح ...اي همزين اجيت
لزمت أيدة الباردة دخلتها جوة العباية
...هاي شنو ايدك ثلج
...اي الجو بارد
...ليش دنروح ورة الموكب غير بالحديقة
...لا ماترهم يم الزلم ، تردين للبستان ؟
...اي ميخالف المهم نمشي سوة
انت شبيك أحسك ضايج ؟
...لا مو ضايج نعسان
...ليش متنام
...عيب من الولد ماترهم اعوفهم واروح
كعدنا بالزرع خليت راسي ع كتفة اباوع الدنيا ضلمة وصوت الهوى يحرك الأشجار
...احب المزارع
...كل واحد يحب ويحن لشبيه المكان الي انولد بي ولهيج اني احن للبيوت القديمة والعكود الضيكة الكة روحي بالولاية وراحتي هناك
زفرت الهوى وكلتلة بتأييد
...اي حتى اني احب الولاية بس احب الشواطي أكثر اتمنى نعيش هناك ونسوي سياج جبير وازرع خضروات
...عدنا مزارع بالكوفة وقريبة ع الشط بس صبخة والملح كاتلها تروحين تعمرينها
هزيت ايدي ضحك واسترسل
...شبيج شو احسج ضايجة
...لا بس لو توديني اشوف اهلي مشتاقتلهم
سكت واني منتضرة يرد ماجاوب
...اريد ارجع انام خلي نرجع
وكف ونطاني أيدة كمت ضليت ساكتة لحد ماوصلنا كلتلة باي ودخلت للقاعة
صعدت الدرج بقيت كاعدة ع أخير باية
سمعت صوت طفل وراي التفتت وجانت بنت مريم عمرها تقريباً ٤ سنوات كلتلها
...ها ياحلوة وين رايحة روحي يم امج لتوكعين
كعدت يمي ابتسمتلها ...متريدين تنامين اني هم ما اريد انام ابقي يمي عادي
ضلت كاعدة يمي وساكتة تحرك برجليها يمين ويسار بعدين سألتني
...احنة مانام
... موحلو النوم
...اي صحيح موحلو
...هسة العلوية تكعد
...يا علوية هنة كلهن علويات
...العلوية ماما
فتحت عيوني متعجبة وليش تكولين لامج علوية ؟؟
...باابا يكول ماما العلوية واحنة ميرزا لأن ماما علوية
دخت شنو ميرزا وليش ابوها يكول لامها علوية معقولة هيج يحترمها وميصيح بإسمها وهيج معلم جهالة سألتها
بابا يكول لماما علوية
...اي يكول علويتي
...هاا حلوو يعني بابا يحب ماما هواي
...يحبها بكثر الدنيا بابا يكوللها انتي النفس مالتي ماما النفس مالتة
...الله يخليهم ويحفضهم الج هسة ماما تفتقدج ومتدري بيج يمي نرجع وننام هسة ؟
...بكيفج ، انتي باجي لو علوية
...اني زهوري بس زهوري
...خاف عيب انتي جبيرة
... لا لا عادي اني وياج صديقات
هزت راسها بين المقتنعة ومامقتنعة رحت خليتها يم امها ونمت بفراشي حسيت الصبح بالهوسة بس بقيت نايمة لأن الساعة ب٥ وصريخ الجهال يم اذني ميخالف اني متعودة ع الهوسة
اتصل تلفوني شفتة ضياء غلقتة ونمت نعسانة خاف يكلي كعدي وصدك نمت ماكعدت الا ب ٨ الغرفة فارغة ولا واحد فوك واسمع جوة هوسة عرفت اكو نسوان جوة غسلت وبدلت حتى اصحصح قبل لا انزل فتحت موبايلي ولكيت مكالمات أكثر من ضياء ورسالة
...كعدي تريكي آش حار يفوتج
نزلت الدرج وكلها ناس غربة زوار الحسين هسة أسألهن وين النسوان أمهات الموكب لو اطلع ادور خاف ضياء ميقبل
بعدين كلت هو سياج مكان النساء اكيد عادي اطلع ذني النسوان ديطلعن حتى بدون احجبة لأن مكان معزول ومسدود
طلعت ادور ماكو بالحديقة الي كدام
لكيتهن كلهن كاعدات ناس تثرم ناس تلكط ويكطعون لحم كلتلهم صباح الخير وردت اكعد عمتي مقبلت كالت روحي تريكي
...لا اني ما اشتهي
...ميخالف روحي اكلي شي حتى لو خفيف
يلا ياحبيبتي
كلتلها اي ورحت صعدت فوك ما اشتهي بس سويت لفة جبن وجاي بلكوة كملتهن ونزلت طبكت الباب الحديد وراية
كعدت يم فاطمة تقطع بيذنجان كلتلي صح النوم احنة كاعدين من الخمسة ضياء يكول تأخرت الا نامت
...اي مو لأن تغير المكان يمكن
اسوي وياج بيذنجان
...روحي لبسي جفوف وتعاي لأن البيذنجان يتلف الايد وراح نسوي كمية كلش جبيرة
...لا ماعرف اسوي شي وهنة بإيدي
...بكيفج بس راحة ايدج تصير سودة وبيها تشققات زغيرة
كلتلها عادي اخذت السجينة وبديت اسوي وياها ونحجي انضمت النا عبير بت عمهم
أخذت فاطمة وصارت تحجي وياها هنة صحيح كاعدات يمي بس ذيج توجه الكلام لفاطمة
يعني هنة شكثر اني اريد بس فاطمة واجت هاي اخذتها دنكت اسوي بيذنجان واني ضايجة وغيرانة على فاطمة ما اريدها تحجي وي وحدة غيري وتبقى صديقتي بس اني
بعدين من شفتها دارت وجها نهائي عني ونست اني كاعدة يمها اصلا اخذت معجانتي الي اكشر بيها ورحت بعيد عنهن وكلت بعد ماريد اي وحدة حتى فاطمة
بس خلصت حجيها هاي بعد نص ساعة تقريباً باوعت لمكاني شافتني مموجودة ضلت تدور بعيونها علية وصاحت
...زهوري شوداج لهناك
باوعتلها ورجعت اكشر
...دا اخذ البيذنجان الكبار وكلة هنا
باوعتلي بتفحص وسألت
...متأكدة ؟؟؟؟
...اي متأكدة
هزت راسها ودزتلي بوسة ما اخذتها
اني مو هيج احس من وحدي ومكبرة الموضوع همة يحجون بيناتهم ويضحكون ومحد مقربني الة لو يحجي وياي وما اكدر ابقة بمكان همة بوادي واني بوادي وحدي هواي جاي اضوج واستاحش
ضلينة كاعدين لحد ال ٩ ونص خلص الثرم وتكصيص اللحم الطبخ ع الزلم عمتي كالت يلة ندخل خلي يجون ياخذو
دخلت اول وحدة هنة صعدن واني بقيت يم الزوار وتعرفت ع بنات من البصرة يجنن فد حبابات وهنة كالن تعالي كعدي ويانا ليش ضايجة
مديت فراش نمت يمهن وحجيت بفرح
...تباتون اليوم هنا ؟؟؟
...لا بس نصلي الضهر ونطلع
ليش خو ابقو هنا والله نتونس سوة
...شوفي حبيبتي نريد نرجع من وكت ابوي عندة دوام وماخذ إجازة ماتشوفينة طالعين من وكت
هاا يلا براحتكم ابتسمتلها وسألتني ...انتو تباتون هنا وين اهلج ؟
...احنة مو زوار هذا موكب بيت عمي
...يا عبالي زايرة شو احسج تختلفين عنهم
...لا مو اختلف بس ماعندي صديقات يعني باعي البنات اكبر مني والي بكبري عدها صديقة اني احب فاطمة اخت زوجي بس هي تحجي وي بت عمها
...يعني شنو انتي تردينها ملك طابو الج
بس لا انتي من نوع الي تردين الصديقة بس الج واذا حجت وي غيرج تزعلين
...هاا لا خلي تحجي وياها بس مو تعوفني وتدور وجها عني وتنساني أصلا يعني خلي نكعد تلاثتنا اصلا عيب تنطيني ضهرها فجأة
...هاي حقج بس انتي يمكن ماجاي تطين صبر
همة زينين وياج ؟
...اي زينين
...باوعي حبيبتي هاي مال صداقة بينج وبين حماتج ماترهم لابد ماتصير مشاكل خلي علاقتجن بحدود ضحكي وسولفي وي الكل تماشي وي المواقف خو ماتبقين واكفة ع كل سالفة ومقهورة منها
اشرتلي ارفع راسي ليفوك باوعت اتجاه الدرج مريم صاحتلي اجي ...هسة ثواني واجيج
رحتلها صعدت قبلي وكفت ع المربعة جبيرة بين نهاية الدرج وبداية باب الشقة
...وين جنتي ؟
...جوة يم البنات
...وليش هنا ماكو بنات ، وي الغربة تكعدين وتسولفين وويانة تتحولين جماد مو عيب هيج تتصرفين ؟
هذا موكبنا يعني موكب زوجج وموكبج وهاي النسوان خالاتي عماتي كلهن خطار وجايات يخدمن ويانا يعني خطارج هيج تعوفيهم وتكعدين جوة يعني ماطايقتهم ولا تريدينهم
عموماً اني ماحجي وياج هسة اخابر ضياء هو يحاجيج لأن انتي عندج سستم ونضام غالقة الباب ع نفسج وكم واحد يكدر يحجي وياج
...يعني انتي تهدديني بضياء ؟
رفعت حواجبها وردت
...مادام هيج مفتهما ف اي اهددج
نزلت والموبايل بإيدها بقيت اطك أصابعي متوترة كعدت ع الدرجاية ودعيت ربي اتأقلم وياهم واكدر أكسر هالحواجز احسن ما يبهذلني ضياء ومن يعصب يتغير يصير قاسي وروحة بخشمة
ربع ساعة وشفتها تصعد الدرج وكفت وقبل لاتعبرني لزمت أيدها ...اني مو قصدي اعوفكم
بس اني اخجل اجي اكعد بنصكم خاف ميعجب الخالات أو العمات ويضوجون مني ويعتبرو تطفل
كملت واني اشوف ملامحها تلين
...المفروض لو انتو كاعدين كلكم وكعدت بعيد انتي أو اي وحدة تصيحيلي وتكعديني يمكم لأن اني ممتعودة عليهم واخجل يعني اني صارلي شهرين يمكم اكيد مو نفسج انتي الي من طفلة وياهم ومتعودة عليهم
...لا حبيبتي زهوري والله محد ببالة هيج فكرة لو منريدج بالعكس ، وحقج علية المفروض احنة نقربج
جاي تحجي دك تلفوني ضياء كلتلي
...عوفي عوفي لتردين
باوعت للموبايل ورجعت باوعتلها كلتلي
...عوفي زهوري تعاي نسولف
...لا ميقبل يضل يصيح علية اذا ماجاوبتة
رفعت الموبايل بس رديت علي كلي نزليلي بالحديقة وصوتة ميطمن
...شكو ضياء صاير شي ؟
...نزلي منتضرج بضهر الموكب بسرعة!!
...اي راح انزل شبيك
خليت الموبايل بجيب فساتي ونزلت بدون ما اباوعلها يعني صدك كايلتلة
طلعت من باب الموكب للأخير بالگفة ولكيتة منتضرني بقيت واكفة بعيد اشرلي اجي حجيت ادافع عن نفسي
...اني مسويت شي واذا كعدت وي بنية من الزوار يعني شكو بيها رجاءاً ضياء لتأذيني
...تعاي هسة !
رحت يمة تقرب علية وكلي
...شصار احجيلي ؟
...بس لأن كعدت وي زايرة والله مسويت شي ثاني هي مريم عصبت علية وكلتلك خلص اني بعد ابقة وياهم ما أنزل ولا علية بالزوار
مسح كصتة وضل يستغفر
...كعدي بإي مكان تريدي وي الي ترتاحين الهم بس لتثكلين وجهج ع أحد إياج واذا غير هالشي صار احاسبج خلي هالشي ببالج ،أمشي روحي ولتخليني بعد انشغل بيج الهوسة الي عندي كافية
دار وجهة وراح بقيت بمكاني ابجي حسيتة رجع
بقة واكف ع راسي وساكت صارت هواي تراكمات وضغط علية تعبت مايشبهوني ويردوني اصير مثلهم نسخة وما اغلط بشي
رفعت راسي اباوعلة بقهر
...شبيك وياي بس تصيح اني ماسويت شي وكلتلك ماسويت شي وانت تضلمني
درت وجهي من حسيت أحد اجة
وطلعت مريم اجت تمشي سريع وتكولة
...لا ضياء عليك الله بعدتة عني وكعدت كدامي مرتبكة عبالها مسويلي شي
مسحت دموعي الي مابطلن يوكعن ورجعت تكرر كلمة آسفة وخرت ايديها
...انتي دوم تصيحين علية بيوم العرس واليوم وبعدين تكولين آسفة متفيد بعد انتي تحسين بغلطج واني الاكلها
كللها ضياء روحي راحت مترددة وكل شوية تدور وجها علية ...حباب وديني يم أهلي والله راح اطك واموت
...لييش ساكت يا اخيي ليش سااكت
خزرني ضربت ايدي بالكاع حيل
...وديني هسة يلا ماريد يم أهلي رجعني لبيتي ما اجي لهنا بعد كلهم اكرهم
هز أيدة وبقة يروح ويرجع
...حتى انت اكرهك يلا بعد شتريد
وكف وبهتت ملامحة باوعلي رافع حاجبة
...تكرهيني ؟
...اي قابل تأذيني واحبك وين لاكيها هاي
...ماسويتلج شي ولا بيوم أذيتج انتبهي لكلامج وكلمة اكرهك اذا عدتيها ثقي بالله ما تمر مرور الكرام
مسحت دموعي وسكتت
...كومي رجعي
...اريد اكعد وحدي ماريد هناك
بقة واكف يمي هوااي لحد ما قررت ارجع للقاعة وكفت تقربت يمة
...اني مو صدك اكرهك بس انت ماتهتم بية
ليش مريم تهددني بيك المفروض اني الي اهدد الي يأذيني واكول اكو بضهري ضياء مو أخاف منك
...تخافين مني ؟ ليش سويتلج شي
...من صيحت علية يعني شنو تريد تخوفني لو لا ؟ ليش ماحجيت وياي بهدوء
سكت كملت ...اني احبك بس انت ماتفهمني مافد مرة طلبت شي وكلت ميخالف ماسمعت منك غير كلمة لا
عفتة ورحت للقاعة رجعت يم البنية وماعفتها لحد ماطلعو يكملون مشي صعدت الساعة جانت وحدة ونص وزعو للناس وستوهم صعدو كدور النا حتى نتغدة
دخلت للصالة كلت السلام عليكم وكعدت بمكاني جانو بالمطبخ يحمون الغدة صاحتني عمتي ...كومي زهراء سوي الخضرة
...اي عمة جيت
رحتلهن طلعت الخضرة من الثلاجة الكطها ومريم تحاول تتودد الي ماتجاهلتها لأن عيب هي جبيرة ولازم احترمها مو من اول مرة أخرب وياها
نضفت الفجل وسألتني بتردد
...خو مسوالج ضياء شي
...يعني شيسويلي ؟
...حمد لله ، اني آسفة لأن كلتلة بس تنرفزت وقتها سامحيني
صفنت عليها هاي تغلط وتكول سامحيني
... بس هالمرة راح اسامحج مرة ثانية لا
واني مو طفلة حتى تصيحين علية ممكن اكون ببداية طريقي بس مو معناها مافاهمة شي من الحياة اعرف شون ادير حياتي وعلاقاتي وي الناس
يعني يصير هسة اني اخذج بنص زوجات عمامي وعماتي واكلج بسرعة تأقلمي وكوني صداقات وضحكي واذا مسويتي هالشي أصيح عليج ؟
...اني أخطأت ومعترفة إن شاء الله هالشي ميتكرر عذريني حبابة
...ماشي
مالت علية باست خدي وكلتلي شكراً
ابتسمتلها ورجعت اكمل الخضرة
لا حضت عمتي متنرفزة ووجها مو مثل كل مرة يضحك سألتها ...شبيها عمتي
...مبيها شي لتديرين بال
صاحت لبتها يطلع عمرها ٩ سنوات كلتلها تعالي ساعدي مرة خالج واحجي وياها
ابتسمت وحاصرتني الضحكة الا يردوني احجي وما ابقة وحدي يمكن ببالهم بية توحد
التمينا نتغدة اختاريت اقرب مكان الي لا يم عمتي ولا يم فاطمة شاركت بالحديث ع قدر الامكان احاول اكسب رضاهم لأن اذا هالشي يعتبر مشكلتهم الوحيدة واكدر احلها ليش لا همة طيبين وياي ويعاملوني بإحسان يستاهلون اجي ع نفسي شوية
بعد الغدة غسلت المواعين سويت جاي
حاولت اتجاوب وياهن بس هنة يحجن بالدين وبطريقة صعب افهمها شي اكبر مني
أعجز عن المشاركة ف ابقة ساكتة
بالليل طلعنة للحديقة المشتركة وحتى السادة كاعدين ديطبخون كاستر تحلاية للزوار واحنة نشرب جاي ضياء خابرني قبلها وشدد بالكلام
... زهراء لفلفي روحج وضلي كاعدة بمكانج
طلعنا وشفتة من بعيد لابس دشداشتة السودة وكاف ردنها بنية جسمة ضخم شيلبس يصيرلة مثل المحبس
ابتسمت من يمي واني اشوف شعرة يتحرك وي الهوى تبدد شعور وانصنع ثاني
كعدت وين ماكاعدات العلويات هو انتبه لوجودي ضل يمشي خرز السبحة ويباوعلي
اخذت من ايد فاطمة كلاص الزعفران واباوع لأيدة اريد اعرف شنو يشرب
شافني هيج مال الكوب عرفت بداخلة جاي
درت وجهي مامهتمة الة سألت مريم
...شوكت نطلع مشاية ؟
...ما اعتقد نطلع بس الله كريم منا لوقتها
...اكولج مريم هذا اخوج ليش ملابس عركجين مو هو معمم أقلها خلي يلبس عركجين ميصير هيج يهفهف شعرة الاسود
...يا اخو ولج هههه
رديت بفهاوة ...اخوج ضياء
ضحكت وضمت صوتها وهي تضغط ع حلكها بالعباية باوعتلة بخزرة واشرت ع شعرة
رفع حواجبة عود شون تخزريني سويتلة صبر ورجعت فتحت عيوني بقوة مد أيدة لجيب دشداشتة طلع العركجين ولبسة
شوية ارتاحيت أقلها هيج شكلة احسن
وين شكلة بالعمامة محد يكدر يباوعلة
فقررت بعد اذا راح للموكب مال الطرف يلبس عركجين الا يطلع
وهم اذا ماقبل اساومة شون ما اني البس بوشية انت تلبس عركجين
كالت مريم ...شوفي الكمر شون حلو ممأثر علي سواد السمة داير مدايرة وانتي تريدين تضمين ضياء بعركجين ؟
...بس ضياء مو كمر
...هاا
مسحت وجهي بأسئ رجعت اباوعلة وكلت
...ضياء شمس
وع هالاساس سحبت موبايلي وكتبتلة
...اني راح اسامحك هالمرة مو لخاطرك لخاطر شعرك
...انتي يرادلج ضبة
حركت عيوني بإستهزاء ورجعت اباوعلة ابتسملي فتحو السماعة ع جسام ياضنوتي
وهمة ع الكراسي كدور ثنين كدامهم يطبخون كاستر للزوار سيد أحمد وابن عمهم سيد هشام
برد الجو وكف واشرلي اروح يمة
تمشيتلة لزم ايدي ...ها
...نتمشى ؟
...اي عادي
...ها عبالي مو عادي
...لا انت زوجي اكيد عادي
ضحك وبعدها حضني وباس راسي
...شلون هسة شيصفيها بينا نرسي ع بر لو لا
...دير بالك بعد تصيح علية ضياء والله صدك ازعل ليش ضوجني يا اخي
... ما اضوجج وعد
رفع راسة مقلص عيونة اندرت اشوف وين يباوع تحرك بهمة رحت ورا ...ضياء وين
...هاي الطفلة راحت وي الزوار
ردت اعبر الباب الفاصل ماقبل وراح يجيبها ماعرفت ياطفلة بس ضليت منتضرة
رجعلي وبحضنة بت مريم يكوللها
...ليش عمو حبيبتي شلون تسوين هيج
كعدي يم امج وبيبياتج تضيعين ومانلكاج بعد هاج زهوري وديها لامها وكوليلها خلي تدير بالها عليها
مدلي أيدها حتى الزمها اخذتها
ورجعنا نتمشى سوة
...انت ليش هالكد خفت عليها
...غير بتنا شلون ماخاف عليها
...حتلو يعني اي طفل من اطفالكم نفس الشي مو
...اي نفس الشي ليش تسألين ؟
سكتت باوعلي منتضر ارد
فلتت ايدي من أيدها وراحت لامها
...خلص راحت البنية معلينة بعد
وميصير كل شوية تبتسم عيب انت معمم
عفتة بصدمتة ورجعت يمهن حجيت لمريم تنتبه لبتها ع ما استوى الكاستر وزعو للزوار الا رجعنا جوة
ايام الزيارة حلوة بس ما كدرت اخذ راحتي
والكل حس بية منعزلة ساعات ادخل الحمام ابجي وحدي احس مامرتاحة
وكل هالكلام يوصل لضياء مرتك منعزلة مرتك بس كاعدة وحدها مرتك مدري شبيها
سواء بحسن أو سوء نية
قبل الاربعينية بيومين انقطعو اغلب الناس لأن عابرين خان النص واحنة مرايحين مشاية خابرت ضياء طلبت منة احجي ويا
التقينا بآخر الموكب جان واكفلي اول ما أجيت تقدم اتجاهي وسألني بإهتمام
...ها زهوري خو مابيج شي
...لا مبية شي بس اريد اروح المشاية
ليش منروح ؟
...اي حبيبتي اخذج بس خلي ينقطعون الناس نهائياً حتى ناخذ راحتنا وكلنا نطلع
مافهمت يعني شلون ؟
...باجر نطلع حبيبتي لتشيلين هم
...يعني شنو ينقطعون الزوار مو المواكب باجر تشيل وحتى الاضوية ترجع تنسد شون نطلع ؟
...اي هو كل سنة هيج نطلع حتى تاخذن راحتجن بالطريق
...تحجي صدك ضياء حتى بالمشاية لازم نطلع وحدنا بالضلمة والوحشة ترة احنة رايحين الحسين مو رايحين نلعب والله لو رايحة وي أهلي احسلي
...عندي شغل عندج غير هذا الحجي لو تريدين تتعبيني بدون سبب ؟
...ماروح وياكم روحو وحدكم
...اي خوش يلة روحي للموكب الجو بارد
هزيت ايدي ورحت ماعاجبني
بس شسوي همة كلهم هيج صعبين
ثاني يوم من الصبح المواكب انسدت وشالو التكيات حتى موكبنا الشارع يصفر حرفياً يعني لمن طبخنا غدة طبخنا بس ع كدنة وبالليل الساعة ٩ تقريباً كالو يلا بدلو نطلع مشي
ماجان عاجبني اروح بس شسوي الكل يطلع
لبست وحضرت نفسي يبقى سيد احمد وبعدين يلحكنا بالسيارة لحد ماوين نوصل يرجعنا وجانت السيارة جبيرة ستاركس
طبعاً أخذنا ويانا ترامز جاي وكيك واكل خفايف وخليناهم بعرباين الاطفال لأن ب ٦ الصبح نرجع للموكب يعني نمشي بس ع سواد الليل
طلعو الخالات والعمات وبناتهم والجناين والسادة ٧ ويانة من ضمنهم ضياء جنت محتارة وي منو أمشي لأن صارن مجموعات والزلم هم مجموعة
انسحب من يمهم ضياء وأجاني
...شبيج ياروحي
...ها مابية شي بس ماعرفت وي منو أمشي
...اني وياج مدلي أيدة لزمتها بتردد
...باع اني عاجبني اروح وي البنات لأن راح يضحكن ويسولفن يصير الطريق حلو
...براحتج يعني هسة اروح ؟
...لا لا بس ابقة شوية وياك شوية وياهن
...اويلي عليج يومية لازمتلج ركن وماتردين تختلطين اليوم عجبنج
رفعت البوشية عن وجهي ومنتضرة تعليقة
كلي عادي ماكو احد
...بلة طلعلنة جني بهالضلمة شنكول
حتى اضوية ماكو والله الشارع وحش
رفع بطل الماي يشرب ومارد علية
انتضرت يتحركون وهن العلويات مو كلهن طالعات وكل شوية وحدة ترجع ناسية شي
بألف ياويل الا التمن ومشينا والسماعة تصدح بقصيدة يحسين بضمايرنا صحنا بيك آمنة
يمشون سريع واني حاضنة ضياء من البرد
عشت شعور ماسبق وعشتا كل مرة الطريق مؤنس الزوار واهل المواكب والأضوية هسة احس برهبة وحدنا بالشارع وضلام حسيت بمأساة وشعور السيدة زينب أكثر
مايكسر الهدوء غير بجي طفل أو همساتهم كلت لضياء واني مغمضة عيوني اتمنى
... الله إن شاء الله السنة الجاية عدنا طفل وناخذة ويانة مو شعور حلو
... آمين إن شاء الله
...اشو البنات ميضحكن ليش ؟ اني وخواتي جنة نضحك ونسولف
...ع شنو يضحكن ليش احنا وين رايحين ؟
...ها يعني موقف هاي
...ااذا صار موقف ضحكي عود
...شيصير يعني الا يطلعلنة جني
... ههههه انتي اليوم قافلة كولي بسم الله الرحمن الرحيم
...بسم الله الرحمن الرحيم
...عاشت ايدج حبيبة زهوري وين اكو مثلج
بس لو توازنين قفلاتج حتى لو كل شهر مرة ميخالف بس مو يومية
لزم بوشيتي لأن كل شوية تطير وتزعجني
...نزعيها حبيبتي وخريها عن وجهج
وخرتها اخذها مني خلاها بجيب دشداشتة
...لشوكت راح نوصل ندخل كربلاء
...لا بالزايد لعمود ٩٠٠ مو اكثر
...زين واذا صادفنة مشاية واحنة بعدنا مو تعبانين
...نرجع حبيبتي نرجع
...يو شكد معقدين انتو
...سكتي كافي !!
سكتت لأن شفتة ضاج كلتلة آسفة كال عادي وليهمج إن شاء الله ورة الأربعين لمن تخف الناس اخذج للزيارة ولحد ماتشبعين بس احنة نخاف عليجن
اني ويا جنة متأخرين وهمة طالعين كدامنا شفتهم كعدو يم عمود ٧١٥ موجودة قنفات
وصلنالهم عمتي كالت
...ها سيد كل سنة جنت تسبقنا
...زهراء متكدر تمشي سريع اذا ضغطت عليها بالمشي بعد اسبوع مانكدر تحرك رجلها
كعدت واني اكوللهم ...لمن نطلع اني واهلي كل ١٥ عمود نكعد نرتاح ونبقى بالطريق ٦ ايام
...يلا اكليها السنة راح تطلعين الفرق
...لا ضياء كال اخليج براحتج مايمشي سريع
...هسة يعوفج ويروح وي السادة
اخذت كاسة ألماي من عمتي ومارديت لأن يمكن صدك يعوفني وامشي وياهن
عبالي نكعد نستراح هواي بس ماطولو عشر دقايق وكالو يلا نكمل بقت عيني علي ولمن اجة نطاني أيدة حتى اكوم بسرعة كمت متحفزة
تركناهم ورانة يصعدون الاطفال بالعربانة وفرحانة سبقناهم ماطولو ربع ساعة وطلعو قبلنا ...حتى صوت القصيدة صار بعيد وماعاد نسمعة
...ميخالف يوصل شوية
صوت وشة السيارات الي تمر بسرعة وبرودة الجو وساعات اراقب النجوم الي اليوم برزت لأن انسدت الأضوية
فتحت موبايلي وشفت الساعة ١٠ ونص سألتة بحيرة ...اكول ضياء وين ننام مادام المواكب مسدودة كلها
...وين اكو نوم نخلصها ل ٦ ويجي ابو تقي ياخذنا
...ها خاف الواحد ينعس شي يعني شلون
...الي ينعس نطي جاي هسة اجيبلج جاي لو بعد؟
...لا مو اني قصدي ع الجهال خطية
...اذا مو انتي لتشيلين هم الجهال ينامون بعرباينهم
حكيت خشمي بقلة حيلة
...لو كايليلي جان نمت الضهر حتى مانعس
محد كال حتى انت همة نامو ماعبالي
وفاطمة اخذتها بت العمة ضحى وماعادت تحجي وياي
كلي كملي ...ماعندي شي شأكمل
...شبيها فاطمة
... فاطمة جانت صديقتي بس عافتني واخذتها بت عمتك ضحى
... يعني هسة انتي غيرانة ع فاطمة لو شنو
...لا ما غرت ليش اغار
...اي ادري بيج ، بس اني زوجج وصديقج ولعلمج احسن واحد ممكن تصادقي هو اني
منو يدير بالة عليج مثلي ؟
...اي صح والله انت احسن صديق
باع ضياء لمن نروح ونكعد بعد كول اريد جاي وكعك ونطي الي اني استحي ماشي
...ماشي عيوني الج
...وابقة كول الا تاخذين حتلو كلتلك لا انطيني
ضحك وبقة يهز راسة وهم تقريباً مسافة ٥٠ تيل الا لكيناهم كاعدين ومنتضرينا محضرين ترامز الجاي
صارت كعدتنا واحد يم الثاني لأن الأماكن مشغولة صبولنا الجاي وخلو الكيك كدامنا
شربت كوبين جاي والخمول مايروح رجلية احسهن مثل المتكطعات واكابر ماكدر اكول تعبت
بيومها فعلاً تأذيت ضياء يسحول بية تسحول طر الفجر صلينا واحنة يم عمود ٩٧٠ وصارو كم زاير يمر قرروا خلص نرجع البنات ضاجن كالن كل سنة نبقة أكثر واذا زوار خلي نكمل بس همة اصرو يرجعون
العلويات ماجادلن ولا لحن عود مثلي ابقة ازن اتعب نفسي واتعب المقابل
تالي الساعة ب ٥ ونص اجة ابو تقي ركبنا السيارة اول ماكعدت الوجع زاد علية عمتي كالت من اوصل اطيج مروغ
كل شوية اريد اغفة وماعرف انام بالسيارة
أكثر من نص ساعة الا وصلنا الموكب
ورجلية ترجف بس اريد انام لو اشربلي شي مسكن ضياء كلي صبري انطيج علاج وروحي
...حباب والله ماكدر اوكف خلي اروح أنام
...هاي شبيج انكلبتي صفرة كعدي هنا
...اي اذا انتو بجم ساعة مشيتولكم بالقليل ٤٥٠ تيل شتريد يصير بية
كعدت ع القنفات داخل القاعة يم الباب طول هواي الا جعلي بيدة كلاص ماي وحبوب ودهن نطانياهن شربتهن وكعد ركبة ونص بالكاع
يريد ينزعني جواريبي ماقبلت
...لا حبيبي اني ادهن رجلية شناقصني
بست راسة ماقبل
...ماكو شي قابل اني استنكف منج مدي رجليج أبوية متدرين شصار بيج وجهج ميطمن
ماقبلت يسويلي رجلية حضنتة ووعدتة اول ما اصعد اسويهن صعدت الدرج ع كيف وهو يراقبني من جوة
فتحت باب الشقة وجاي يفرشون كعدت ع كتر نزعت جواريبي واخلي المروغ واحس هيج يصلن علية من الألم
نمت بأول فراش كدامي ومو بسرعة غفيت جنت متإذية ماكعدت الا الساعة ١٢ ونص
وماجان الكل كاعد البنات الي بكبري واصغر مني بعدهن نايمات
حركت اصابعي بالكوة ردت اكعد وحسيت بعدني تعبانة رجعت نمت اريد ارتاح
حسيت ع فاطمة تكعدني ع كيف
...زهوري يلا حبيبتي كعدي هاي ضياء شكد مخابر عليج خطية ردي علي
مسحت عيوني باوعت للساعة ٣ ونص
اخذت موبايلي من أيدها فتحت الموبايل بسرعة لأن ادري بي مايقبل اتأخر بالرد
.. الوو
... بالي يمج شلون صرتي
... زينة بس رجلية تأذيني
...يلة حبيبتي كومي كعدي غسلي وصلي حتى تتغدين حركي رجليج نشطيهن
...ضياء والله متأذية ما اكدر اكوم
...اجي يمج ؟
...لا هسة شوية بس ارتاح
...نص ساعة واخابرج اريد صوتج احسن
... ماشي
...يلة في أمان الله
سديت الجهاز خليتة ع صفحة وكمت اعرج بالكوة اتحرك غسلت وجهي انتضرت نشف توضيت وبالي يم الصلاة شلون فاتتني وهالكثر تأخرت
صليت ومتأذية لدرجة موطبيعية اول ماخلصت رجعت لفراشي اجت فاطمة جايبة صينية الغدة خلتة كدامي تمن ماش وروبة ودجاج
ابتسمتلها ... شكراً تعبتج
كعدت يمي وردت بألفة ...ولو تددلين اشيلج شعرج ؟؟
...لا اني اشيلة
رفعت شعري وهي خبطتلي تمن وروبة
...زهوري عيوني اني ما ابتعدت عنج بس لان البنات بحساب خطار انتي امون عليج وإلا انتي اكيد صديقتي خو ما ضجتي ذيج الفترة
خليت الصينية بحضني اريد اكل واحجي وياها نزلتها
...لتخليها بحضنج افضل
...انتي ضحى صديقتج من زمان مو ؟تحبيها
...يعني صديقتي بس مو المقربة واحجيلها إسراري واكيد احبها بعد بت عمتي
...هااا
...انتي زعلانة علية ؟؟؟
... لا ما ازعل بس لان انتي بعمري احب اكعد وياج بعد عمتي هم حبابة واروح يمها
وهو ضياء كلي كعدي وين مترتاحين
واني ارتاح يمكم انتي وعمتي
حضنتني وكالت بود ...ياعمري زهوري واحنة هم نحبج لتشيلين بخاطرج علية ماشي
حركت راسي إيجاب ...يلة اكلي راح يبرد الاكل أخرتج
راحت من يمي عرفت ضياء محاجيها بس ماهتميت لأن جنت جوعانة وماعرف اجمع لاحجي ولا افكار اذا واصلة لهيج مرحلة من الجوع
صارت ال ٦ العصر وبدو يلمون ملابسهم جان شعور موحلو وين يومية اصوات الناس والقصائد ووين اليوم
مالمتهم لمن بجو لأن حتى اني بجيت وعرفت قيمة هاي اللمة لمن انتهى كلشي ورجعت اذكر الايام الفاتت
بوقتها راد ضياء نرجع ع البيت مالتنا يعني كبل للبراق اني صعدت بالسيارة لأن مالي خلك الوكفة حيل متأذية
مجان يدري ضياء بية صاعدة ديحط الجنط
اجة ابو تقي وسألة
...شنو ضياء راح تروحون للبيت ؟
...اي والله سيد تعبت وتدري بس هناك ارتاح
...وزوجتك تاخذها وياك ؟
...اي ليش ؟؟
...لاتتحسس بس لمصلحة البنية خليها يم أهلي بعد فترة حتى تتعلم تحجي وماتبقة هيج حتى رد ماتعرف اذا بقت وحدها وانت كل يومك بين المكتب والحوزة تبقى ذبتها هيج وتكثر بعد
ضجت هواي وماعرف شلون بقيت ساكتة
بس اعرف النسوان يزودن أكثر همة شمدريهم وابو تقي جان يحجي وواضح فعلا قصدة لمصلحتي
اسمعة يكول لضياء
...صح ماكو مثل ادبها وفطرتها بس اني من يمي انقهر لمن يحجون عليها
واكيد براحتك انتة شنو تشوف افضل الكم سوي بس اني ك وجهة نظري تخليها تندمج احسن ماتبقى وحدها
حسيت ضياء ضاج كلة ...مابيها شي بس هي مو اجتماعية اكيد العلويات ماعجبهن عدم اختلاطها بس اني اعرفها شنو متحتاج احد زهراء خاتمة القرآن ٥ مرات لاتعتقد تعجز عن الكلام والرد بس هي هاي ذبتها واني مخليها ع راحتها ماراح أجبرها ع طبيعة تصرف متحبة
ابتعدو ماعاد سمعت شي ضليت ابجي وامسح بدموعي يم أهلي محد حسسني هيج ولا احد فهمني ماعرف ارد بس حياتنا جانت بسيطة ماعدنا تجمع مثلهم خلصت ايامي بين خواتي وامي ياريت لو متعلمة من لبابة
انفتحت باب السيارة باوعتلة حجة بإرتباك
...زهوري شبيها عيونج ؟ من شوكت انتي هنا !!
............................يتبع
⁴⁰⁵⁰
صباح الخير ❤️
بنات ليش متعلقون ع الفقرات ؟
تدرون اني هالشي يحفزني اني اعرف أرائكم
وصراحة معاجبني هيج أتأخر بالنشر بس ماكو واهس انتو متشجعون
وإذا نبقة هيج اوقف القصة لحد مايصير بيها تفاعل أفضل حتى انشر بجدول حلو نفس القصص السابقة وما اتعبكم ❤️