الحارث

بـارت أضافي

• رواية: الحـارث♡
_________________________

" ضُمها لصدرَك التَعبان "
_________________________

حسابات الابطال توجد في البارت الاخير من القصة ✨
أفراح:

مرت الأيام بطبيعية بمشاكل بسيطة
أحياناً او بضحكات عالية، بحزن وفرح

بعد ما ولدت دنيا صار عدهم ياسر
الي حالياً عمرة اكثر من سنة، ماخذ بياض
أمة وملامح أبو، هدوء دنيا وضحكة حلوة
مثل سند

شفت رواد ونجمة يكبرون كدامي بعائلة
صحية باكثر ما يمكن، حاولنة نوفر اني
وحارث الحياة الي اتمنيناها الهم وفخورين
هواي بألي أنجزنا

حضن الام والاب الي جان يتمناه حارث
صار شي روتيني بحياتهم، حنان وحرص
الأب الي محسيت بيهن صارو ميهموني
واني اشوف هالحنان والحرص يتوجه الهم
من حارث... حتى الي جان اكو حصة جبيرة

ابتسامة تنمو على وجهي من يدخل رواد
يركض للبيت حتى يشوف لحارث درجاتة
الكاملة الي اخذهن اليوم، جان بذكاء وحرص
ابو على دراستة بس الفرق لكة دائماً من
يشجعة ويبوس راسة بفخر

البيت لا يخلو أبد من ضحكات نجمة
صراخ نجمة، وخباثتها على رواد بكل
مرة يكعد يدرس

كعداتنة بالصالة لنص الليل نشوف افلام
وجمعتنا الظهر بالمطبخ حتى يساهم الكل
بالطبخ بالذات اذا صادفت أجازة حارث
وصار الغدة عليه، الريوك الي جان يكرهة
حارث صار جزء حلو من يومنة بالذات اذا
كعدنة اني وياه ورواد الي عندة مدرسة
بقرب الصوبة نتريك سوة، صلاتنا الجماعية
اني وحارث ورواد ووقوف نجمة بعدم فهم
... تفاصيل هواي حرصنا نطبعها بذاكرتهم

تفاصيل بسيطة بس رح يكون الها الأثر
العظيم بمستقبلهم

ابتسمت بعد ما سمعت حارث
كال: صفنتي

غمضت عيني محركة راسي متحسسة
دفو صدرة بجانب وجهي وايدة تتحرك
بهدوء على ظهري وهمست: افكر

- بشنو

- حياتنا، شلون انكلبت بكم سنة
من شخصين بائسين لعائلة دافية

حركت اصابعي الي على بطنة بخفة
وهمست: مجنت متخيلة هالحياة
ولا حتى بأحلامي، جان ببالي انو رح
يجي يوم البس الابيض واني طايرة
فرح باسعد يوم بحياتي، بعدها رح
اخلص عمري بالمطبخ وية شخص
كل همة بطنة وروحة مجرد من كلشي
ومن كل مشاعر يصلح بس اكل ونوم
.. صح ملبست الابيض وبديت زواجي
باسوء ما يمكن بس جانت حياتي هيَ
البيضة، مو بس بيضة زاهية بألوان

فتحت عيني بعد ما باس راسي بهدوء
ورفعت راسي اباوع عليه، كلت مبتسمة
بخفة: حارررِث

- انجرت الراء؟ بيها الخير

- خير خير

- خيرج؟

- اريد اكتب قصتنا؟

كملت قبل ميجاوب وكلت: هسة الاغلب
ديكتبون قصصهم كلش بنفسي اكتب
قصتنا

- اي وبعدين

- هاهية شكو بعدين

- بس تبردين دودتج؟

- اي بس

- أستجني حبيبي

- تخليها بنفسي؟

- تخلينة فرجة لأمة محمد؟

- تدري شنو، اذا قبلت رح اخلي عنوان
القصة أحببت فصلية وامدحك واخلي
الكل يحبك، واذا ماقبلت هم اكتبها بس
اسميها فصلية للشيطان واخلي البنات
كلهن يدعن عليك اويلي الله لو تشوف
دعاويهن عالقصص مال عجايز كاتلهن
القهر، بالمكان يكتلنك والمحسن

ضحكت بعد ما دفع راسي من ورا باتجاه
وجهة وكال: وترضين يحبني لو يدعن علية؟

هزيت راسي برفض مبتسمة وكلت: يلا
حارررث مو اني فرحتك، انتَ فرحني هالمرة

سكتت ونظري يتنقل بين عيونة حد
ما تنهدت بعد ما سمعت صرخة نجمة
الي رجت البيت وكلت: هسة كلبو البيت

وخرت الغطة ووكفت، طلعت من الغرفة
ووكفت بالصالة اباوع عليهم رواد امدد
على بطنة بالكاع والتاب مخلي بالكاع
كدامة يلعب بيه ونجمة كاعدة على
ظهرة تجر بشعرة وتحرك براسة مثل
السيارة

تقدمت عليها وشلتها وكلت: مامه
موزين لتخليها هيج تسوي

رواد: شسويلها اذا اوخرها تعيط

رفعت نجمة وهية تدفع بية تريد
تنزل وترجع عليه، ماثبتت غير من
دخلت للمطبخ وكلت: جوعانة ولج

سويت الها حليب ورجعت للصالة
وكلت لرواد الي جاب كتابة لحارث
يراجعلة: حبيبي انتَ شاطر بيه لتضل
تخاف صار كم مرة تراجع

رواد: هوة ضل بس باجر بعدين عطلة
واضل العب بالتاب وما اقرة شي

ابتسمت وكعدت وحارث اخذ الكتاب
منة ومدد عالتخم يسألة، نزلت نظري
لنجمة الي دتشرب من الحليب وعينها
علية، ابتسمت وبوزت شفتي انطيها بوسة

ضحكت بعد ما أبتسمت مقلصة عيونها
ومستمرة تشرب وهمست: لج ام بطن

ضلت تباوعلي مبتسمة وعيونها بدت
تكلب بنعس، خليت راسها على صدري
امسح عليه بخفة بعد ماخلصت الحليب
حد ما نامت واصبعها بحلكها كالعادة

سحبت ايدها بخفة وبعدها وكفت
ووديتها للغرفة طفيت الاضوية ورجعت
للصالة وكلت: يلا رواد تأخرت

- بعد شوية

- وتروح للامتحان نعسان؟
كوم نام هسة وباجر ماعندك
شي نسهر سوة

- صدك؟

- والمحسن، يلا تحرك

مديتلة ايدي لزمها وكال: تصبح على
خير بابه

- وانتَ بخير حبيبي

رجعت لحارث بعد ماوديتة لغرفتة
التفتت للتلفزيون وشفت الفلم الي
طالع وكلت: نرجع لموضوعنا هسة

- ليش عدنة موضوع

- اي حبيبي عدنة، شوف ترا ماكو
داعي تفكر هواي بالموضوع لأن
بكل الاحوال رح تنكتب بس اني
مسوية روحي جاية أخذ رأيك

- زحمتي روحج والمحسن

- ترا هوة برنامج بنات والولد
منقرضين بي يعني الموضوع
كلشي مابي

- وشنو الي تكتبي بالضبط

- نقرة شوية من قصة واشوفك؟

تنهد بملل واني افتح التلفون والزك
بي وخليتة يقرة بارت من خلص التفتت
عليه وكلت: ها

- الي صار انو ربع ساعة خلصت
واني اقرة عن مظلومة المجتمع
بلا اي فائدة، مغثة باختصار

- زين عمري والساعات الي تخلصهن
عالأفلام حتى تشوف قصة البطل الخارق
لو قصة الحب الملحمية شنو تستفاد
منهة بالضبط، عالأقل نعرف من القصص
اشياء ممكن نحذر منهة لان قصص من
مجتمعنة

- واني ناقصني، الشكولات الي اشوفها كافية

- هسة لتقرة انتَ، بس اني رح اكتب

- عجيب

- والله انتَ العجيب، رايحة انام اني
ومثل مكلتلك القصة تنزل يعني تنزل
بس الا اكول معيشنة بعذاب اني والجهال
وين الله ويكضوك الشرطة المجتمعية
مدري شيسموهم

تنهدت من باوعلي مبتسم ورفع ايدة
وحاوطني بيها مقربني لصدرة
وكلت: لتقشمرني

- ماحاجي شي اني

- ها يعني موافق، تمام

رفعت راسي من سكت وكلت: موافق مو

ابتسامة واسعة صارت على وجهي
من هز راسة بملل، حاوطت وجهة
بايدي وكلت: اكزكز عليك والمحسن

- لا وخري

بلحظة تقربت عليه وعضيتة من
ركبتة وهوة مدري شنو يهمس وي
روحة، بعد مدة رفعت راسي مبتسمة
وكلت: متأذي ترة

ابتسمت وكملت: موافق مو، يعني
اسويك البطل الحباب

- شتسوين سوي هوَ كم يوم
وتملين وتعوفيها لأن سالفة
تعبانة

- لا ما أمل، بس انتَ هم لازم
تساعدني بكم شغلة وتسولفلي
حاجات ماعرقها

- لتدخليني

- اهو حاررث، يعني اني أبد مطالبة
منك شي غير التعيين والقصة والاثنين
خليتهن حسرة بكلبي، لهل درجة مالي
خاطر عندك

باوعتلة بهدوء عابسة شفتي وبداخلي
ابتسم لان متأكدة لعبت عالوتر الحساس
ماكو ثواني وكال متنهد: هاهية براحتج

أتذكر أني نمت بيومها واني معلكة
بركبتة لدرجة الاختناق من الفرحة

ثاني يوم الصبح جان من المفروض
عدنة عزيمة لان طول فترة امتحانات
رواد لا كدرنا نروح لأحد ولا أحد أجانة

ومن الصبح قبل مايجي رواد من
امتحانة الاخير جانو سند ومهيمن
والحجية والبنات يمنة

جنة كاعدين اني ونرجس بالمطبخ نسوي
بالغدة التفتت الهة وهية كاعدة عالكرسي
وكلت: حتى اتصال ماكو يالبذاتة شدعواج

كالت متنهدة بلا مترفع نظرها: حقج

تقدمت وسحبت الكرسي حاطتة
كدامهة وكلت: صاير شي

بمجرد ان حجيت رفعت ايدها مغطية
وجهها واسمع صوت بجيها وكأنه جانت
تنتظر أحد يسألها

تنهدت ماسحة وجهي وبقيت اباوعلها
بهدوء وايدي على خدي، حد ما مسحت
وجهها تتنفس بعمق وعيونها حمر

نزلت ايدها وهمست: عذريني نفسيتي
تعبانة هالكم يوم

- انجبي ولج شنو عذريني، احجيلي شبيج

بللت شفتها وذبت نفس وكالت: احس
حباتنا كل مالها تصعب، تخيلي صرنا
منكدر نتواجه، واحد ميباوع لوجه الثاني

- ولبش هيج دتصعبون الامور على
روحكم والله خبلتوني

- وحتى ان كعدنة نحجي رح ينعاد
نفس الكلام، هوة رح يكول الي ديصير
بسببة وبسبب اخطاءة والله غاضب
عليه واني ابتليت وياه، واني بمجرد
افتح موضوع الطلاك يسوي هوسة
يتعارك ويطلع

- كرصيها نرجس، تتطلكين وشتسوين
بعدين، الرجال يكلج مكتفي بيج ومو هامة
موضوع الاطفال وديحاول يخلي هالموضوع
ميأثر عليكم اكثر بس انتِ مدتساعدي

- افراح حتى وان حاول بس الموضوع
يأثر وهوة مو صغير من حقة يشوف
اطفالة يكبرون كدامة ماشوف نفسي
الي حق امنعة من هالشي

- ما مانعتة انتِ منطيتة الحرية المطلقة
حتى يختار، وهوة ديختارج بكل مرة، لا كال
اطلكج ولا كال اتزوج عليج، ردتي علاج ورفض
لان رح تعانين وتتأذين وبالذات اذا مانجح
ورغم هاذة ماكسر خاطرج ووافق ودتحاولون
عالأقل انتظري لابد اكو فرصة.. اتركي
سالفة الطلاك لتحركين الجو

- انتظر اكثر؟ أفراح صار كومة على
زواجنا ماكو اي امل كدامي

تنهدت وحطيت ايدي فوك ايدها
امسح عليها بخفة وكلت: اشوف
مهيمن وحارث اكو شبه بالاطباع
بيناتهم، واذا هالشي صح يعني من
المستحيل يسوي شي مو مقتنع بي
ولو شكد ماتحاولين انو تتطلكون
او يتزوج مستحيل يسويها بناءً
على طلبج، اتمسكي بي نرجس
وسدي هالموضوع

سحبت ايدي بعد ما دخلت دنيا
شايلة ياسر الي صوتة رايح من البجي
وكالت: افراح شسالفة بنتج شنو
مجلوبة كل ميجي ياسر تلعب بي
لعب

ابتسمت وكلت: شبيها

- باع شمسوية بي

ضحكت بعد مارفعت ايدة وشفت
أثار اظافيرها مخرمشتة ومجرحة
ايدة وكلت: والله وصينا ميتدنالها
محد كلة روح احتك بيها

كعدت عالكرسي وكالت: عشتو
ميت عليها هوَ، رايح على عمة حارث
وهيَ لاحكتة

- حقها شعدة عايف ابو ورايح
على ابوها

باوعت عليه وهوَ مخلي راسة على
جتف دنيا ويفرك بعينه وكلت: يمكن
رح ينام، اذا تردين خلي بغرفة رواد
ماكو احد

ابتسمت بتعاطف بعد ما شافت
نرجس الي تنهدت تمسح وجهها
وكالت: اي احسن

بعد ماراحت دنيا سمعنة هوسة صارت
بالاستقبال وكلت لنرجس: كومي يمهم
لتضلين تقهرين بروحج

اخذتها ورحنة للاستقبال وابتسمت من
شفت رواد الي كاعد بصف حارث ويحجي
وياه مبتسم وكلت: ها جاوبت

- كلشي جاوبت اي شي تسالني
الست اعرفة

سند: سچاچ على عمة الفرخ

الحجية: لحد يسمعك ويصدك انوب

كعدت ونرجس كعدت بصفي ورواد
كال: يعني رح انجح اني

الحجية: ان شاء الله يمة

رواد: اي بيبي ماتنطيني هدية نجاحي
شنو تنتظرين

الحجية: لا يا ناقص

حارث: ليش ناقص حجية هاذة حقة
هية هالبيبي عندة

رواد: لا بابه بعد هدية من سند
وعمو مهيمن ونرجس وكلهم
حتى انتَ كلت اجيبلك دراجة

حارث: لا هسة صدك ناقص

مهيمن: ليش ناقص هاذة حقة
هوة هالبابه عندة، صدك مو جان
مواعدك بسفرة مدري لوين

حارث: مهيمن

مهيمن: ضلع الضلوع

حارث: استچن

مهيمن: ها رح تضربة بوري؟

حارث: بيني وبينة ضلعي

بعد ماصبينة الغدة وكعدنة نتغدة
حارث كال: السفرة كلهة الكم ألا
الدولمة ليمد ايدة اكسرها

سند: خايب ابنك رح يقطني خلي
اتهنة بالغدة عاد

ابتسمت وكلت: ترا احنة عدنة عزيمة
اليوم والثانية من يستلم النتيجة

سند: كولي ناصبين عليكم وهاي قطة مقدماً

مهيمن: أني عن نفسي وجودي
كافي ماجيب هدية

رواد: عادي نرجس تجيبلي

حارث: والعباس ابني نچر

سند: قفاص قصدك

وفعلاً بعد ماخلصنة غدة طلعو
سند ومهيمن بعد ما جبرهم رواد
حتى يشترولة هدايا

رجعت للصالة بعد ما خلصت المواعين
وكعدت يم نرجس ونظري على حارث الي
ملتفت عالحجية ويتهامسون بينهم ونجمة
بحضن الحجية نايمة

التفتت لنرجس وهمست: اتخبل
من الكعدة هاي مالتهم

ضليت كاعدة يمها نحجي بهدوء
وعرفت من خلال الصدفة مو لأن
تسنطت عليهم انهم ديحجون بالشيخ
وانه لسة ميحاجي صراع

الحجية من بعد وفاة بدرية بقت هناك
وصارت تجينة كل فترة بس وصارت
مسؤولة عن كلشي هناك

دخل رواد بعد مدة والابتسامة
من الاذن للأذن وكومة غراض نزلو
ومهيمن مستمر يدردم كل ميفوت
من يم حارث

حد ما صاح حارث: تچايتي بعد طي**

مهيمن: يا تچاية اذا ابنك ماخلة فلس
بجيبي لو رايح جايبلة هدية وخلصان
احسن

حارث: فدوا الة شنو يعني

للمغرب طلع الكل وراحو واني نضفت
البيت وحارث جاب عشة هوَ ورواد
وبعد ماتعشينة مثل ما واعدنة رواد
سوينة سهرة وطلعنة فلم

موضوع السهرة على فلم تعود عليه
من هوَ وصغير جان دائماً يسهر وية
سند أو حارث اذا عندة أجازة ثاني
يوم وبقت هالكعدة المفضلة عندة
لهاذة عمرة بس صرنة اني وحارث
نسهر ويا

لنص الفلم الي عدنا.. للمرة الألف يمكن
التفتت عليهم وباوعت مبتسمة لرواد
الي أستسلم ونام وراسة على صدر
حارث لان تعب اليوم هواي

رفعت نظري لوجه حارث الي حاط
ايدة جوة راسة ونظرة عالتلفزيون
خرجت من شرودي متحمحمة بعد
ما لمحت ابتسامة بطارف شفتة
وهمست: شيل رواد ركبتة أنكسرت

- كولي اريد مكاني

- عندك مشكلة اذا ردتة؟
مو عساس الحضن وصاحبة
الي

وبعد ما ودة رواد للغرفة اجة وطفة
التلفزيون وابتسمت بعد ما مدلي ايدة
لزمتها ووكفت ودخلنة للغرفة

كلت بعد ما حطيت راسي على
صدرة: كلت للبنات عالقصة حتى
اخذ منهن احداث هم

- لتكبرين السالفة عاد

- هنَ هم حبن الموضوع، رح ادور
احد يكتبها حد ما يردلي خبر

كملت بعد ماسكت وادري بي ما
مقتنع بالموضوع وكلت: سولفلي
عالاحداث قبل ما اجي ماعرف هواي
أشياء

- مثل شنو

ابتسمت بحماس وكلت: من البداية
شنو اقدم شي تتذكرة

- مفهمت من وفاة ابن عمي يعني

- لا حبيبي من صغرك

- بشرفج؟

- ولمحسن

- بالخير، وهاي اني هيج فارغ
احجيلج قصة حياتي كلها

- لو كل اسبوع سالفتين هم نخلص
يلا حباب سولف، وهم فرصة اعرفك
اكثر

بعد هواي من محاولات الاقناع الي
اتندمت عليهن بعد ما حجالي نبذة
بسيطة عن أمة وطفولتة وعن عقابة
بعد لعبة الدعبل وعن الاحاديث الي
تدور بين امة وابو

كل هاذة بجهة وقصة جذع النخلة الي
جان يروحلة بصغرة والي أخذني عليه قبل
هنا فعلاً غصب عني انهاريت بالبچي

رفعت ايدي بهدوء بعد ما هدئت
شوية ومسحت على فكة بخفة
وهمست أحاول اسد الموضوع

- هاهية ماكو داعي تكمل، احجيلي
اي شي تحبه انتَ

- ورا ماراحت استمر الوضع بين
دراسة وشغل ونرجس والحجية
وعلاقتي الي تقوة بمهيمن ومشاكل
بدرية وصراع

- امم، ماعرف شمو أسأل انتَ
احجي الي يجي أبالك لحد ماتنام

- ميصير أسكت حد ما أنام

- يلة حباب مادام ليوم مرتاح
كل يوم تجي تعبان من الدوام
وتنام من وكت

تنهد وكمل صح بشكل مختصر
بس احسن ألي حتى اتذكر كلشي
كالة، وبعد ما سكت كلت: وزواجك
انتَ والسعلوة

- شبي

- انطيني تفاصيل

- ماكو داعي تردين تكتبين قصتج
شكو نابصة الكل بالنص

- اويليييي والعباس لا ابرد كلبي
بيها وأقرة دعاوي البنات عليها
دعوة دعوة

- ذيبة

- كمل كمل شلون ووين وشصار

- لتلحين ماكو داعي

- شوية حباب

بعد ما تنهد بملل كال: اتفقن بدرية
والحجية والشيخ وياهن وراحت الحجية
شافتها وحبتها زط بط أجة يوم العرس
واني حالي حال المعازيم

- رح تجلطني حارث، احجيلي بيوم
العرس شصار

- ماكو شي مهم بس قبل العرس بكم ساعة
اتصلت وكالت البدلة مبدليها مو نفسها الي
مختارتها، انوب راحت تعاركت وية ام الصالون
الي هية زوجة صاحبي واتصل بية يعتب

بأختصار ردت اشرد اكثر من مرة بس
اتعوذ من الشيطان، تالي طلع الشيطان
هوَ الي خلاني اكمل العرس

- ايع شنو هالمغثة، ماريد هيج مغثة
خلي القصة بس ألنة مو؟

كرصتة وهمست: موو؟

- غير تعوفني بحالي عاد والعباس
بزعتي روحي

ابتسمت بخفة ودفنت راسي بركبتة
اسحب انفاسي المخلوطة بريحتة
بهدوء ورغم محاولتي لتلافي الموضوع
بس أحس بقهر بكلبي من كون كل
الي حجاليا هوَ نبذة عن أمة بس
الي مينطيني كلبي اكول الله يرحمها
ولا ينطيني ادعي عليها

⠀ ⠀
⠀⠀⠀  ‎ ‎ ‎ ‎ ‎ ‎     

نرجس:

سديت الباب بعد ما دخلت وتقربت
للجرباية ودخلت جوة الغطة، رمشت
بعيني بهدوء افكر شلون ابدي بالموضوع
ونظري معلك على ظهر مهيمن الي
لسة يتجنبني

تنهدت بعد مدة وتقربت بهدوء
حطيت جانب وجهي على ظهرة
وحاوطتة بايدي الي نزلتها بخفة
على بطنة وهمست: ابو همة.. آسفة
ضوجتك هواي

أتنهد بعد ما بست ظهرة بهدوء والتفت
علية وخليت راسي على ايدة وكلت: خلص
مو نرجستك اني هاهية كافي منريد احد بعد
والعباس، شنو جايبلك واحد لاتعرفة ولايعرفك وتعال وكلة وشربة ولبسة واصرف عليه، هوَ
انتَ اشتريت لرواد ارتفع ضغطك

ذبيت نفس بعد ما ضل ساكت
وكلت: تشوفني فرحانة بألي ديصير
لو فرحانة بحالتي لو فرحانة واني
اجي اكلك بنفسي خلي ننهي زواجنة
ترة صعبة علية اكثر منك

بللت شفتي وسحبت نفس بعد ما
نزلت دموعي وهمست: تستاهل
تكون عائلة وتصير أب وتربي اطفالك
وهالشي مارح يصير بوجودي، ماريد
اصير بهل أنانية

شهكت شهكة طالعة من جوف صدري
بعد ما حسيت بي يضمني لصدرة اكثر
بعد ماغطيت وجهي، لزمت تشيرتة بقوة
ودموعي تبللة واحجي كلام مو مفهوم
من شهكاتي لمستمرة

ماعرف شكد ضليت احجي وابجي بشكل
مو مفهوم بس بعدها حسيت بي يبعد
وجهي عنة ويمسحة بايدة الي اتحسس
خشونتها على وجهي وكال وهوَ يمسح تحت
عيني باصبعة بخفة: انتِ خولتيني اسوي الي
اريدة واني سويت الي اريدة نرجس ماكو
أي أنانية... دحجي وياج باعيلي

كالها بعد مارفع راسي بايدة مثبتة بقوة
وكال: اذا ضليتي بهاذة راسج اليابس
وأصرارج مارح اجبرج اي، احققلج
رغبتج واطلكج، بس صدكي ما اتزوج
وراها وابن مو منج انتِ ميصيرلي
للمرة الماعرف شكد اكلج سدي
الموضوع لتكبري اكثر

حضنت ركبتة بلا ماكول شي ودموعي
تنزل على ركبتة وهوَ محاوط ظهري
شديت عليه بعد ما مسح على شعري
وهمست: نرجستك مو؟

- امم

- كول والعباس

- والعباس نرجستي

⠀ ⠀
⠀⠀⠀  ‎ ‎ ‎ ‎ ‎ ‎     

افراح:

بعد مدة نزلت بداية قصتنا وجان
الكل موافق او مستهزء بالموضوع
والجواب مثل حارث، انو فترة ورح
نمل ونتركها

جانت الصدمة أنه صعدت الرواية أكثر
من الرقم الي أحنة توقعنا بأول كم بارت
وجانت بس طفولة حارث وبعدنا ما
متطرقين لأي احداث غيرها، بس طبعاً
مكلنة لأي واحد منهم على تفاصيل
الرواية او صعودها وهمة مامهتمين
للموضوع كلش

بدة الاستغراب بعد ما صرنة نسأل
بخصوص الشغل والماضي وندقق
بهواي احداث

طبعاً عدا دنيا الي سألت سند شنو
انجازاتة بفترة ما قبل جيتي لبيتهم
وجان جوابة: اني ماتعبكم من تردون
تكتبون شي عني بهاي الفترة كتبو أكل
سند ووقف سند ليأكل وجلس سند ليأكل

حارث واجهت صعوبة حتى اكدر اخذ
منة حدث بسيط من شغلهم وحدث
من الماضي وجان سؤالي مثل: شنو
جنت تسوي من تروح لهل أماكن

التفت عليه وكال: العب طوبة

- احجي حارث غرد حبيبي

- كولي الجو هدوء وانتِ توترة
وكاعدة على اعصابج

- حارث عليك العباس تحجيلي تفاصيل

بعد ماطلع شيب براسي رفع جسمة
ناوي يوكف وكال: هيج نومة هم ماتنراد
اروح أولي اشرفلي

لزمتة من ايدة بقوة وكلت: والله ازعل عليك

- افراح زودتيها هواي ودتسوين
مشاكل من لاشيء بحجة القصة

- لو ماضام شي جان جاوبت

كال بعد ما وكف شايطة اعصابة وصار
يحجي بصوت عالي ونظراتة تخزرني: شنووو
ضاممم يعنييي، انتِ شنووو تتوقعيننن
جنت اروووح اسوي هناكك، انتِ تعرفينن
كلشش زيننن وتريديين احجييي حتتتى
تسويين مشكلهه هاذذة كل ما بالمووضوع
اريحجج؟ خووش جنتت اروح اشررب انوبب
عالركصص وعالكح** وراهاا ترديينن تفاصيلل
اكثررر؟

وكف يحجي تفاصيل روحاتهم هو وميهمن
وشوكت يرحون وشوكت يرجعون وغمضت
عيني اتنفس بقوة واعرف دام فقد اعصابة
السالفة رح تكبر وتأكدت بعد ما بدة يحجي
حتى عن الي جان يروحلهن ومن ضمنهن
الرقاصة الي لابسة ازرك وصحت: كافييي
عاددد شبيككك اسكتتت

باوعتلة اسحب انفاسي بقوة واحس
دموعي عالطارف وكلت: ليش هيج دتسوي

- موو تردينن تفاصيللل؟ شلووون صايرة
التفاصيلل ااذاا مفهوميي عنهاا غلط شرحيهاا
انتِ، دامجج مو كداهاا لتحطينهه بهيجج
مواقفف خايسهه مالهاا داعيي

طلع بعد ماهزيت راسي مستهضمة
لان ادري اذا كملت رح انفجر هسة

ومن بعدها ماشفتة غير ثاني يوم الظهر
بعد مارجع من دوامة، جنت كاعدة بالمطبخ
اني ورواد ودخل هوا، وكف رواد بسرعة
وكمز عليه حاضنة وباسه من خدة

التفتت انشف المواعين الي عالميز كال
حارث بعد ما بَعَد رواد: وين اختك ولك

- هم نايمة بابه متشبع

- اركض كعدها وتعال

راح رواد عليها وتنهدت بعد ما صار
بظهري وايدة حاوطتني وحدة فوك بطني
والثانية محاوط بيها اعلى صدري، همس
بعد ما خلة راسة يم أذني: بعدة زعلان الحلو

لزمت ايدة ناوية ابعدها بس وكفت
من همس: متتحكمين بلسانج وتحجين
كلشي بلا تفكير تمام، بس عالأقل بعد ما
تحجين فكري، رغم هاذة ماجان عندي
مشكلة بهل خصوص، بس هالمرة اكو
بينة وعد ببداية جديدة بهل بيت ومشينا
عليه سنين، خربتي كلشي بلحظة

رفعت ايدي متنهدة امسح عيني بعد
ما ابتعد وراح للغرفة، التفتت للطباخ
وطفيت النار وصبيت الغدة وبعدها
اجوي رواد وحارث الي لازم ايدين
نجمة وهيَ تمشي وكل شوية توكع
روحها من النعس ويرفعها تكمل مشي

بعد ما دخلو كعدها عالميز مثل
ماتحب وتضل تلعب بالغراض
الي عليه او تكسر بيهن

بعد ما تغدينة بقيت انظف المطبخ
وهمَ طلعو بقت هوستهم دقايق
وبعدها صار هدوء

طلعت من المطبخ بعد ما خلصت
ومديت راسي لغرفتهم جان رواد
مطلع سبونجبوب ومغطي نجمة
ااي بصفة ويتفرجون سوة

دخلت لغرفتنا وسديت الباب وتنهدت
بعد ما شفتة نايم وتأكدت منايم بليل
تقربت للجرباية ومددت بمكاني وايدي
جوة خدي اباوع لوجهة وأرمش بهدوء

مر وقت طويل واني بمكاني ونظري يتنقل
على ملامح وجهة، نزلت نظري لأيدة ونزلت
ايدي وشبكتها بيها بهدوء، بالمختصر ضليت
احوص حد ما كعد

توة فتح عينة تقدمت بهدوء عليه
تنهدت بعد مدة من مصدرت منة
ردة فعل ورفعت ايدة اخلي يحضني

كال بصوت مبحوح: للتالي مارح
تعترفين أنتِ غلطانة

- چء

لزمت ايدة بعد ماجان ناوي يسحبها
ويلتفت وكلت: اهوو، اي اني الغلطانة

- احجي عدل

سحبت ايدة مرجعتهة واباوعلة بطرف
عيني وكلت: حقك علية استاذ حارث
ازعجتك هواي

- كولي طيحت حظك استاذ شنو
ازعجتك

- ديلا هاهية واني هم بعد ماسأل شي

- لا عوزج تسألين انوب

- ديلا ارجع نام لتطير النومة

خليت راسي بصدرة بعد ماحضني وغمض
وسمعتة يهمس: تزيد رعونية ماتنقص

- لتجذب

- والعباس كل ماحبج اكثر تسترعنين
اكثر

ابتسمت بخفة مغمضة عيوني وشوية
شوية ثقلت انفاسة ورجع نام

⠀ ⠀
⠀⠀⠀  ‎ ‎ ‎ ‎ ‎ ‎     
بعد الي صار رجع حارث ضد موضوع
القصة واني اقنع بي ومقتنع غير بعد
مدة بعد ماكلت انو مارح اجيب طاريها
كدامة أبد ورح تصير شغلة بين البنات
بس، وطبعاً جان كلامي مو صحيح

استمرت القصة اكثر من شهر تنزل
واحنة نجمع احداث من الاغلبية
حتى حارث رجعت اخذ منة بس
اكتفي بألي ينطي هوة الي وما
اضغط عليه

نرجس استمرت بمراجعاتها ومحاولاتها
للعلاج، بعد كم شهر من زواجهم راحت
تسوي تحاليل لان تأخر الحمل وجانت
صدمة جبيرة النة من عرفنة عدها عقم

عانت من مشاكل هواي بعد هالخبر
سعادتهم الي جانت تتناثر بكل مكان
يرحولة بعد زواجهم اختفت

حماسها وهيَ تسولفلي كل يوم عن تعاملة
وياها بالرغم أنة نادراً مايسمعها كلام حلو
بس جان معوضها بتصرفاتة

كل هالاشياء تغيرت بعد هالخبر، صارت
بكل مرة تتصل بية تخليني الطم بعد ما
تكلي طلبت الطلاك لو تعاركنة لو ماريدة
لو خايفة يلومني بالمستقبل اذا كبر وهو
محاس بشعور الابوة بسببي بالرغم أنو
هوَ الثاني صارحها كم مرة أنه يلوم روحة
؏ الي صار وأنو هاذة غضب من الله عليه
وافكار هواي مشابهة تدور براسة

موصلت اي شي من هالكلام لحارث
بالرغم اتوقع انو مهيمن يجوز يسولفلة
لأن ميضم عنة شي

بعد مدة اكو متابعات للرواية عرفن
حسابي وراسلني وحجيت وياهن شوية
التفتت فجأة على حارث وكلت: اكو
بنية تسلم عليك

كال وهوة مغمض: منو

- من الرواية تعرفني وهسة راسلتني
مو نفسها ذيج لكتلك عليها

- لتطوخين وتاخذين ميانة... كرصيها

- أمرك سيدي

- ايي وتسلم علية

زميت شفتي وكلت: تكول سلمي
على عمو حارث

- عمة بعينجن كون

ضحكت بقوة ورجعت نظري للتلفون
بيومها صارن وحدة تنطي للثانية وراسلني
اكثر من عشر بنات بيومها جنت اراسلهن
والأبتسامة من الأذن للأذن بالذات على
ردود حارث

التفتت عليه وكلت: حارث بنية تكول
عمو حارث شلونة، شلونك؟

- زين بعد عمج

رجعت التفتت للتلفون ودقايق
وكلت: بنية تكول عمو حارث صدك عصبي

- لا وين

- زين ووحدة تكول عمو حارث بعدة
يضوجج

تنهد وحسيتة بعد شوية ويجيبني
بدفرة وكال: لا

زميت شفتي بقوة وبعدها كلت: بنية تكول..

- انجبي انتي وياها

- تمام

رفعت الغطة عليه وكلت: نام حبيبي
لتعصب يلة ليرتفع ضغطك

ضحكت بعد ما سحب الغطة لراسة
ورجع ينام
⠀ ⠀
⠀⠀⠀  ‎ ‎ ‎ ‎ ‎ ‎     

رواد طلع ألاول كلة درجات كاملة كالعادة
ورغم هاذة جانت فرحتنا بي كلش جبيرة
وهم رجع الكل انجمع ابيتنه وانقطو بهدايا
لرواد

وكملت فرحتي اكثر بنرجس الي لاحظت
عليها آثار حمل بس محجيت لأن محبيت
انطيها أمل ويخيب بعدين، وهيَ هم جانت
مأيسة كلش ومو ابالها الموضوع

شكيت بيها لأن واحنة واكفين بالمطبخ
فجأة أصفر وجهها وراحت تتقيئ

ماكو أسبوع بعدها وأتصلت بية تبجي
وتضحك بصدمة وعدم استيعاب
بعد ما طلعت صدك حامل

فرحة الكل بيهم جانت متنوصف، مهيمن
الي بعد ماعرف أتصلت بية ميتة ضحك
لان مهيمن طلع كومة ناذر

نرجس بعدها حامل حالياً، وزينب رفضت
اي خطابة يجيها لأن ناوية تبقى يم امها
تداريها لان موت ياسر جان شي مكدرت
تتخطى رغم كلشي صار وبقة مأثر على
صحتها الي تتراجع كل فترة وتحتاج عناية

اما سند ودنيا صار عدهم فريق ثلاثي
وية ياسر الي بهاذة عمرة ويحب الخبز
والصمون، أنطي صمونة بأيدة وانسى بعد

وبالنسبة لتعييني الي نسيتة بعد كل
هالسنين والأمور الي صارت، صدمني
حارث بيوم بعد ما فتح الموضوع وياية
وسأل أذا بعدني ألي رغبة بي

وافقت وأني افكر شلون ممكن أدبرها
واني مسؤولة عن البيت وحارث ونجمة
الي بعدها بعمر صغير والحجية صار
مستحيل انو تكدر تعيش هنا بعد، ورواد
الي يحتاج أحد ويا خصوصاً بفترة المدرسة

جان الموضوع صعب الية وبقيت حايرة
بين رغبتي وبين بيتي واني متأكدة رح يصير
اكو تقصير بالأثنين، ماطول الموضوع غير
كم يوم وأنسد رح تسألون ليش؟ لأن فرحتكم
طلعت حامل بأسابيعها الأولى

ما أنكر انو بأول أيام معرفتي بحملي
مفرحت أبد الشي الي حطم حتى فرحة
حارث بعد ما شاف الهم بعيوني وأني
أحجيلة عكس حملي الاول

رغم هاذة متراجع عن كلمتة وترك الاختيار
ألي ومارفض موضوع التعيين بس جان كلش
واضح أنه مو مقتنع بهل شي اكثر من قبل

بس وأني أكلب بالرسائل الي من البنات
جذبني جمل تكررت هواي، وموضوع
مكدرت اتخطى، انو الأغلبية أكثر شي
أفتهمو من قصتنا اني وحارث هوَ
التمسك، تمسكنا ببعض رغم كلشي

وأكثر جمل تكررت وحبيتها هيَ: لتعوفي
انتِ أهلة، فرحتنا وفرحة الحارث، ام رواد
وهواي غيرهن

بيومها جتني لحظة أدراك أنو لو مهما حققت أنجازات بعد التعيين رح تكون ولا شي اذا
تأثرت حياتنا الحالية بسببها، أذا صرت أم
مهملة لرواد وصرت مرت اب مو أم، زوجة
لحارث مو فرحة، وتربت نجمة بطريقة غلط

بعد كعدة طويلة مليانة تفكير حسيت
بمشاعر فرح تتسلل لگلبي ازدادت بعد
مسحة خفيفة على بطني وتفكيري بشنو
ممكن يكون جنسة.. أخت أو أخ

وتأكدت من صحة قراري من حجيت
وجهة نظري لحارث ولمحت لمعة فخر
وسعادة مرت بعينة قبل مايبوس راسي
بهدوء ويحضني ألة... لحضنة الي مستعدة
اتخلى عن أي شي حتى يبقة يستقبلني
بنفس اللهفة والدفو.. والحب

لهنا ونكون شاركناكم بآخر تفاصيل حياتنا
بكامل حبنا ألكم، والي سألوني شلون ممكن
ننساكم، بكل صراحة أتمنى متنسونا، أذكرونا
دائماً بصلاتكم وبزياراتكم وبكعداتكم وبقلبكم

•اذا عجبك البارت لاتنسى تصوت بنجمه ♡

....

خلصتن؟ يلا حولو عالرواية الجديدة
الي متكمل بلا وجودكم وضيفوها للمكتبة، موجودة حالياً بحسابي ♡