أسيـرة "داعـش"

part 1

#أسيرت داعش

#الكاتبه اسيـــنات

البارت الاول

"بعمري ما شايل تعب تالي وكت شلت التعب واضعافه "

لا تنسون التصويت وتعليقاتكم ومتابعه للحساب لطفا

بسم الله الرحمن الرحيم 🤍.

••••••••••••••••••••••••••••••••••••••••••••••••

كعدت على صوت ماما كمت كوه امشي اسحل بروحي سحل ودايخه دخلت للحمام غسلت وجهي اريد اصحح شويه اباوع الوجهي عيوني منفوخات

شوكت ابطل سهر يربي بدلت لفيت شالي شلون مكان نزلت جوه الكل كاعد امي جاي تسوي الريوك

ورقيه اختي جاي تراجع ونونه الفصعونه كاعده بحضن بابا تحجي وياه وتتدلع كلت واني انزل

:-صباح الخير

_جاوبني بابا مبتسم

:-صباح النور هلا وردايه ... ابتسمت على ابتسامته رحت بسته بخده احجي

:-فدوه اروح الأبوي حبيبي ضحكت ، رحت للمطبخ ماما تسوي بيض شميت الريحه كلت

:-الله شكد احب هاي الريحه من الصبح ودعاء الصباح الله
باوعتلي تضحك

:-يله شيلي الجاي وتعالي اخذت خبزه اكلت شويه كالت

:-ولج لااا عوفي من نكعد يالله
واني ماكو ما اسمع اكل اني وواكفه احس يصير طعمه الاكل اطيب

شلت القوري مالت الجاي ورحت كعدنه كلنه ناكل ومن غير الضحك والسوالف والعرك  كملت كعدت اراجع بابا راح لشغلو اجه ابو الخط

رحت بس كم بنيه الباقيات يخافن كاعدات بالبيت والبعض اهلهم بطولهن لان يخافون عليهن من جهه حقهم ومن جهه جبانات صعدت سلمت على عمو اسعد كعدت يم صديقتي رغد سلمت عليه مبتسمه ابتسمت على ابتسامتها

ضليت اليوم كله اسولف وياها ما بين المحاضرات والسوالف خلصنه رجعت للبيت بعد ما سلمت طبيت للبيت شميت ريحه الاكل كلت

:-خرب شهل الريحه التجلط
رحت للمطبخ ماما مجانت موجوده فتحت الكدر اشم الريحه هستوني اريد امد ايدي ما احس الا وعاطت نونه كلت

:-وجع ووسم شبيج خرعتيني

:-شجاي تسوين ؟؟

:-شجاي اسوي اشوف شطابخه ماما كلشي ما اسوي

:-اي دشوف الجذب ولج فاتحه الكدر وتردين تاكلين اكو ليش سمنانه لان تأكلين وجبتين على الغدااء ...باوعتله صفح صعدت بدلت ونزلت تغدينه غسلت المواعين ..ضليت ادرس للعصر نزلت لكيت بابا جاي من الدوام وكاعد هستوه طالع من الحمام بسته بخده ووجهه نوراني هيج مريح للنظر باوعلي

:-هلا وردايه
:-هلا بابا شونك حبيبي ؟
:-بخير حبيبتي شون الجامعه اليوم؟

يحجي وكانو يسئلني السؤال الي حفضته من كدما يسئله وكانما يريد بس شغله وحده حتى يكلي اكعدي بالبيت

:-بابا والله ماكو شي اصلا ماكو شي يمنه بالجامعه ولا اكو احداث واني كتلك اي شي يصير اجي اخبرك

هز رأسه الدواعش يوكفون السيارات وهاي الفتره صايره كم حاله خطف واغتيال واغتصاب وبابا خايف علينه اجت رقيه تشرب جاي كلت

:-فدوه صبيلي مالي خلك اكوم
:-كومي لج عجوزيه هوه اني كوه صبيت
الروحي نوب اصبلج  ...عيبت عليه ضحكت وهيه تهز بايدها وكمت صبيت وكعدت اباوع وياه كل ساعه ومتنهد ضرب ايد بايد متحسف كال

:-الموصل مدمره الوضع حيل صعب شكثر اكو شهداء وزلم راح دمهم هدر الله ينصرنه بحق الائمة  ...تنهدت اشرب جاي كلت واني اشرب

:-زين بابا هسه شحيصير يعني اذا تأزم الوضع الموصل تتدمر ويسيطرون عليها ؟
بهذه الفتره تعمقت بالأخبار روحي صارت بالأخبار على كثر ما اباوع وأشوف صرت اذا يصير شي واني ما اعرف اتخبل لازم اكعد اباوع والكل يباوع للاخبار بحيث اول ما ارجع من الدوام لازم افتح التلفزيون وأشوف شصار وبابا اول ميرجع لازم يشوف ويايَ

:-الاوضاع ما مستقره كل يوم قصف وانفجار وشهيد وجاي يسيطرون على مناطق بالموصل  الله يسترنه بحق السيده زينب ويرحم جميع الشهداء 

:-بس بابا ما لازم ننسى انو الحشد جاي يضحون بروحهم علمودنا ما شاء الله عليهم هم اقوى من داعش بمليون مره

:-سباع بويه سباع هذوله ما ينكدرلهم هذول الحشد هذول الزلـم السباع ادعيلهم بويه ادعيلهم ينتصرون

ضليت اباوع وخايفه من اشوف الناس جاي تموت ارتعب واخاف من طريقه موتهم يعني شغلات متخطر بالعقل واتخيل اني اموت بنفس الطريقه اضل اخاف واهجس بشعور يلعب النفس شلون تحملوا وشلون وشلون ..

ضليت اليوم كله كاعده كلساع صاير انفجار لو نسمع اصوات طلق واحنه نخاف خصوصا نونه صغيره وتخاف وشايلين همها وبابا هم هم وجالس على كلبوا من كثر ما خايف علينه

..احنه اجينه للموصل علمود شغل باابا بيت جدي بالبصره مندري أوضاعهم شنو نتواصل وياهم واحنه خايفين عليهم رغم الحمدلله ماكو شي بالبصره بس منكدر نتواصل وياهم هواي بسبب الشبكه الضعيفه صرنا حتى تواصل ما نكدر نتواصل وياهم

ضلينه هاي الفتره عادي دوام وانفجارات وأصوات طلق وكل يوم يستحلون على منطقه ويسقطوه وهيج تعودنه صرت اذا اسمع خبر ما احس بشي لأن تعودت بس همين شعور بعدم الأمان مرعب
إلا أن جدي اتواصل ويانه وكال ارجعوا بابا مرضه أو بالأحرى ميكدر لانو الأوضاع صعبه ومو مالت رجعه ومنو يكول نكدر نرجع ؟

اني مجنت اعرف شي بس جانو يحجون بالدوله الاسلاميه والنظام بعدين عرفت داعش ونظامهم وكلشي عنهم  مهتميت كلش للموضوع مجنت اركز على هيج مواضيع لانو جانت حياتي
دراسه ، اكل

مجنت اسوي شي بس من عرفت بالاوضاع وتازمت الأمور لا هين صار وكتي كله بالتلفزيون والاخبار ولازم اعرف كلشي اول باول ومن ارجع من الدوام لازم اشوف الاخبار دائما جنت اخاف من اشوف الناس تموت والشهداء الي جاي يرحون  اتواصل ويانه عمي كال حيجي ابنه يضل يمنه هوه ابنه بالموصل شغله ودراسته ف دائما كل فتره يجي
بس هاي الفتره اتاخر علينه كلش مو من عوايده واحنه همين مستغربين يعني انسان مثله كان يجي باليوم مرتين

دائما يجي يسئل خاف محتاجين شي ثاني يوم اجه بس متغير حيل يعني كُل ما يجي عادي يطب يضحك ويتشاقه بس هل المره غريبه جيته استغربنه صاير عندو لحيه وشوراب رغم هوه مجان يحب يكبرهن وهيج مقوس حواجبو كلت بضحكه

:-اكول مصطفى شعجب طولت شورابك طالع جنك بومه ههه .. باوعلي معاجبه عبالك شو شنو حجيت  نضرته مدري شلونه هيج لبالك يريد ينتقم

:- عجبني اطولهن ... تفحصني من فوك ليجوه

بس شنو هذا اللبس يعني من طلعين هيج ؟

:-اكيد لاا مصطفى اصلا حرام البس واسع وطويل  متغير بشكل حتى رقيه لاحظت مو بس اني عادي سويت الاكل وي ماما للظهر اجه بابا

اتصل بيَ واحد من عمامي وهم يتوسلون بيَ يجي للبصره

:-تعال للبصره احنه نتلكاك ..ابوي ماقبل حجه
:- شلون اعوف شغلي بيتي هنا حياتي هنا جامعات البنات هنا
:-ولك محمد تعال جيب عائلتك أبوي يريدك لو تشوف امك حالته حاله تكول ليصير بي شي خايفه عليكم ومحمد اذا ما تجي اكلي الدنياا خويه تعال وفضها

:-ما ادري بعد اشوف الأوضاع يا خويه  ....
ما حجينه شي مصطفى صار بس بليل يجي يعني ساعه عشره هيج وأبوي يخاف ويضل يرزل بي ويكله ولك ذوله ولد الحرام بس لاتحجي وياهم وهوه ينكر ويكول ما دخلني بيهم وشعندي وياهم .

نزلت مستعجله الف بالشال تاخرت على الجامعه صعدت بالسياره سلمت وكعدت اراجع ما احس الا ووكفت السياره رفعت راسي اشوف مجموعة رجال لابسين اسود وشواربهم طوال ولازمين اسلحه واشكالهم استغفرالله هيج مخربطه مخربطه من كثر ما ضخمين وشواربهم نازله على صدورهم واكو منهم لازمين رأيه مكتوب عليها
لا اله الا الله خفت من أشكالهم ومن أجسامهم

حاولت ما أبين انو خايفه عرفتهم دواعش اجه واحد منهم جان كرشه شكبره لبالك مره حامل بالشهر الاخير  واستغفر الله يلعب النفس ريحتوا تتسابق وياا اجه للسياره وحجه وي ابو الخط مد رأسه يشوفونه يباوعلنه من فوك ليجوه خفت نضرته جانت مقرفه بشكل وتخوف بشكل حجه داعشي عرفته عراقي من لهجته من تفوو عليكم يا عديمين الشرف هيج تسوين بأهل بلدكم حجه

:-لحضه أنته من وين جاي ولوين رايح ؟؟
:-احنه من منطقه *** وهذني طالبات جامعه اوديهن وارجعهن للبيت امانه عندي

السايق خطيه رجال جبير ويخاف وباين عليه الخوف من صوتو اليرعش  الداعشي يباوعلنه ويصفن على وحده وحده اجه داعشي يحجي فصحى كال

:-ما هذا البـــاس هل انتن كافرات ..

:-حجيت بكلبي ماكو غيرك الكافر درت وجهي صفح جان يحجي بالفصحى حتى أصواتهم غريبه
اجه واحد يحجي عراقي كال

:-اتسترن هذا البس بس الك** يلبسنه لبالك مصاليخ ك***

باوعت اللبسي جنت لابسه بنطرون عريض وقميص طويل صدك تنرفزت واحس هيج مقهوره شلون يحجون هيج ما اكدر اسكت حجيت برجيف وبهمس ما جنت واعية بس كلش مقهورة ومحروك كلبي من حجيهم ومنهم
:-ابن الجل* كافر قابل احنه خواتك وك**
باوعلي كال

:-شكلتي ؟ ..نزلت راسي بسرعة ما لبالي يسمعني ما اريد احجي شي وتصيرلي مشاكل اني في غنى عنها

:-ما حجت بويه خلي اوديهن لبيوتهن باجر يتسترن..

ابو الخط يحجي ويقنع لحتى نروح والله وباوعلي الداعشي العراقي مبين سمعني كال وهوه خازرني حسيت نفسي متت بدمي
:-ك** كافره

ردت احجي رغد كرصتني سكتت احس النار جاي يطلع من اذاناتي هيج من القهر  كال الداعشي
:-من باجر اتسترن خمار وعبايه وجفوف سترجن من ستر عائشه عليه السلام فهمتن ميمشي لبسجن عدنه

:-ابن الكل* ههههه ضل يحجي وياه عمو اسعد ابو الخط ما اعرف بحلضتها ما اعرف شلون صار وبس سمعته صرخت عمو اسعد من الداعشي خانكوو صرخنه كلنه ميتين رعب ما نعرف شنسوي نخاف نتقرب وعمو اختنك فد مره باوعلي مبتسم وهوه يحجي ::-هذا درس الجن يا عاهر**

ما حجينه اي شي وخر وأشر العمو يمشي بجيت بقهر واني اشوف عمي مخنوك ويمشي بسرعه وهوه يرزل بينه سكتت  مشينه ضل يحجي ويانه ويفهمنه كون نلبس خمار وعبايه اذا ما نريد مشاكل رجعت للبيت سولفت البابا الصار ضل يحجي ويمنعني ادوام بس ماكو فايده مني دراستي شنو هوه بكيفهم اي اخاف بس ملازم اضعف وابين انو اخاف منهم ....كالت ماما وهيه خايفه من الي سمعناه بنيه ماتت من وره الاغتصا* تصير بنت جيرانه ضربت ماما على رجلها

:-استرنه الهي الستر الله يرحمهه خطيه
:-امين
..اباوعلها تريد تحجي ومتحجي هزيت راسي
كلت شنو ؟
:-شبيج

:-بعد لدوامين فدوه انتي وخواتج اروحلج فدوه لا داومين
:-هههه صدك تحجين انتي
:-اي اي ماما والله خايفه عليج والنبي
:-يا ماما انتي بس اندعيلنه ماكو شي مدام رب العالمين ويانه هذا هو وشيصير خل يصير الكاتبوا الله يصير

:-الله يسترجن ويستر كل بنيه ويحفظه الاهله ويحميجن من ولد الحرام
:-امين يمه
..حاولت اغير الموضوع لان خوفها زعجني
:- وين نونه ما شفته

:-بالغرفه جاي تدرس مو كعدت بالبيت تكول يعني هذني كلهن يدرسن بس اني مكعديني بالبيت

:-اي غير صغيره وخايفين عليه واساسا هوه الوضع مو زين ومدرستهم انسدت بعد عليش  ...اجت رقيه تكول

:-انتن شايفات الوضع شلونه الناس جاي تموت لو البنات الي راحن من وره الاغتصا* والقتل لو الشباب الي مثل الورد استشهدوا وتعذبو الله يصبر اهاليتهم شحال اهاليتهم بهذا الوقت ياما وياما راحو كلو فداء للوطن بس نكول الله يرحمهم  لا نخاف على نفسنا همه ما خافوا احنه نخاف اووف الله يرحمهم

:-امين ..ضحكت من حضنتني
:-اي ولج شلونج صارلي فتره ملتهيه عنج

:-زينه حبيبتي
كلنه هيج ضلينه نسولف ونضحك نحاول نخفف خوفنا بس وين اذا احنا نشوف الي يصير شيصير بينه بس عدنه اختي رقيه متخاف ودائما تحجي وتكول لا تخافين وخليج قويه وتكدرين وماكو داعي للخوف رب العالمين مخصص الج يوم ف كل واحد ويوموا  ...لليل درست و نمت

كعدت على صوت القصف مرعوبه اردد وأيدي على كلبي اشهك
:-يا علي يا علي ..ايدي على كلبي واحجي حالتي حاله وخايفه وكلبي مقبوض كمت بسرعه اركض على الدرج  نزلت بسرعه اشوف أهلي طبيت لغرفه اهلي ماكو اخواتي ماكو اي شخص حجيت بصوت عالي يرجف وصوتي مشخوط ما اعرف شسوي

:-م ماما باابا وينكم ..الدمعه بطرف عيني ما اكدر ابجي الدمعه ما تنزل من عيني هيج شعور يخوف
صرخت بصوت عالي

:-رقيييييه نووور وينجن....؟
ارمش هواي ، تنفسي سريع ، دكات كلبي العاليه ،
شعري الي يطير من البرد ، جسمي اليرعش ، عيوني غوشت حطيت ايدي على وجهي سمعت صوت بالمطبخ رفعت راسي بلهفه  كلت اكيد امي موجوده تسوي اكل البابا رحت للمطبخ واحس رجليه وحده تضرب بالثانيه دخلت فتحت عيوني على وسعهن من المنظر رقيه منتهيه نايمه بنص المطبخ ووكوه تجر النفس

ركضت عليه الزم بيه اريد الزمه ماكو جنهه طير مذبوح تشهك وهيج توقعت بيها صرع هيج ترافس

:-رقيههه ولج شبيج ..بااااابا مامااا ولكمم الحكولي فدوه تعالو رقيييه حبااابه فتتتحي عيينننج هاتاي شبيججج اختتتي ولجج يمممه كلشي ولا انتي رقيه ما عندي غيرج لا تسوين هيج  ...اصرخ وابجي وصوتي عالي اجر بشعري اضرب على صدري اريد احد يجي احد يسمعني احد يساعدني كمت واني امسح الدم بملابسي ارجف

:-يا علي دخيلك ..رحت ركض للغرفه مالت بابا وماما لمحت بابا نايم على الجربايه رحت بسرعه اكعد بي واضرب على ايده واني مستعجله عين عليَ وعين على أيدي الي بيها دم اختي

:-بابا بابا كوم ك كوم فدوه الحك رقيه حتموت بابا بنتك حتموت مددلتلك حتموت الياسه مالتك حتموت كوم الحك بااااابا ولججج رقيييه بابا فدووه
كوم كووووم

فرفحت روحي اصرخ بصوت عالي  من قهري طلعت الحركه بنفسي صرخت لامه نفسي بزاويه الغرفه اجر بشعري واحس مجاي استوعب شي اجر بشعري وتتحرك حركه هستيريه

:-هذا حلم حلم والنبي حلم مستحيل م مستحيل يرحون ويعوفوني مستحيل ربي ربي دخيلك  غمضت عيوني حيل اجر بشعري واضرب راسي بالحايط
ما احس الا ....

يتبع ..

مرحباا يا اصدقااء حبايب كلبي اول بارت من القصه حيكون التنزيل كل ما اكمل البارت أنزله بس بوقت المدارس لا حيكون كل اسبوع بارت أو بارتين حسب وقتي وفراغي صوتو وعلقوا اهم شي ومتابعه للحساب lrayh123

تابعوا حسابي الانستا

وقناتي التلي اشتركوا بيها ..

اللهم صل على محمد وال محمد