မိန်
🌼pann
Part (5)
8.12.2022 ကြာသပတေးနေ့..။
ကိုယ့်အတွက် အရေးပါတဲ့နေ့တစ်နေ့လို့မှတ်တမ်းတင်လို့ရပြီပေါ့..။
ကိုယ် မင်းနဲ့ဆုံဖို့မမျှော်လင့်ထားတဲ့နေ့လေးကျမှ ရုတ်တရက်ကြီး ဆုံလည်းဆုံတဲ့အပြင်ကို မင်းနဲ့ပါရင်းနှီးခဲ့ရတယ်..။
မင်းတော့မသိဘူး.. ကိုယ့်မှာမင်းကိုမြင်တော့ ကိုယ့်အချိန်နာရီတွေ ရပ်တန့်သွားသလိုပဲ ။
ကိုယ်မျက်လုံးထဲမှာလည်း မင်းတစ်ယောက်ထဲကိုပဲ မြင်ခဲ့တာ..။
ကိုယ်ထင်တာတော့ ကိုယ်တို့တွေ့ချိန်လောက်က ဆယ်နာရီကျော်ဝန်းကျင်လောက် ဖြစ်မယ်ထင်တယ်..။
ကိုယ်တို့အဖွဲ့အတန်းလစ်ပြီး ကန်တင်းဘက်ထိုင်တဲ့ချိန်လေ...
" ညက အိပ်ရတာအဆင်မပြေတော့ တစ်ကိုယ်လုံး ကိုက်ခဲနေတာပဲ.. "
" မင်းမှလား.. ညကဘယ်လိုအိပ်လိုက်တယ်မသိဘူး ဇက်ကြောတွေနာပြီး တစ်ဖက်နဲ့တစ်ဖက်တောက်ကောင်းကောင်းလှည့်မရဘူး "
" ဘယ်ကောင်ပြောတာလဲ..ဒီအတိုင်းပဲ အိပ်မယ်လို့"
" အတူတူနဲ့အနူနူပဲ ပြောမနေနဲ့.."
" စာကိုကောင်းကောင်းလိုက်မကြည့်နိုင်ဘူး.. "
" ငါဆို ဘာသင်လို့သင်နေမှန်းတောင်မသိဘူး.."
တစ်ယောက်တစ်ခွန်းပြောနေတဲ့ချိန် ဘေးနားဝိတ်တာလေးက ရောက်လာတော့ ကိုယ်စားချင်တာကိုယ်မှာလိုက်သည်..။
သောက်ဖို့ပါ တစ်ပါထဲထည့်မှာလိုက်သည်..။
ကိုယ့်ဝိုင်းနဲ့ကိုယ်စားသောက်ရင်း စကားပြောနေတာကို ထဖောက်လာတာကရဲရင့်..။
" ဟာ.. "
" ဘာဖြစ်တာလဲမင်းက.. အလန့်တကြားနဲ့ "
" ဟိုဘက်ဝိုင်းမှာ ထိုင်လိုက်တာက ငါ့ကောင်မလေးကွ.. "
" ဟမ်.. "
ကျွန်တော်တို့တွေ ရဲရင့်ပြတဲ့ဝိုင်းဘက် အလျှိုလျှိုလှည့်ကြည့်လိုက်ကြသည်..။
" ဘယ်တစ်ယောက်လဲ မင်းကောင်မလေးက.. "
ထိုင်နေကြတာက လေးငါးယောက်မို့ ရဲရင့်ကြိုက်တဲ့ကောင်မလေးက ဘယ်သူမှန်းမသိ..။
" အသားဖြူဖြူလေးနဲ့ အချောဆုံးအလှဆုံးတစ်ယောက်လေကွာ.. "
" ညွှန်းတာကွာ.. "
" ငါပြောတာလည်း မဟုတ်လို့လား.. "
ဟုတ်ပါတယ် ချောပါတယ်..။
ဆံပင်က ကျောလောက်ထိကိုမှ အောက်နားကလုံးလုံးလေး.. ဘာအကူမှမပါဘဲ ဒီတိုင်းလေးချထားတာ ။
မျက်နှာလေးက သေးသေးလေးနဲ့ အပြင်ဆင်လည်းတတ်သည်..ချောတာတော့ထင်းခနဲပါပဲ။
ဒါပေမယ့် ကျွန်တော့်အကြိုက်ကတော့..။
" ဟုတ်ပါ့..လှချင်ကတော့မှုံလို့ ပပဝတီ မယ်သီတာ ယဥ်သကိုမယ်လေးနဲ့နင်လားငါလားပဲ.."
" မရွဲ့နဲ့ မရွဲ့နဲ့.."
" အကောင်းနဲ့လည်း မင်းကောင်မလေးချောကြောင်းထောက်ခံရသေးတယ်.."
" တော်.. ငါသွားစကားပြောချင်တယ် "
" ပြောချင်သွားပြောပေါ့.. "
" မင်းတို့ပါလိုက်ခဲ့.. "
" မင်းဘာသာမင်းသွားပါလား.. ငါတို့ပါတကားကားလိုက်နေရမှာလား ..အုပ်စုလိုက်သွားရအောင် ဂိုဏ်းစတားလည်းမဟုတ် ဖိုက်တာလည်းမဟုတ်.. ဒီတိုင်း MP ကျောင်းသားလေးတွေပါ "
" ဒို့က ယောကျ်ားဆို.. "
" ဟားဟား... "
မျိုးဇံက ကနွဲ့ကလျအသံနဲ့ လက်သီးလက်မောင်းကိုပျော့နွဲ့နွဲ့ဟန်ဆွဲကာ ပြောတော့ ကျွန်တော်တို့ရယ်မိသေးတယ်..။
" တစ်ယောက်ထဲ မသွားရဲလို့မင်းတို့ကိုခေါ်တာပေါ့.."
" မလိုက်ချင်ပါဘူးကွာ..မင်းဟာလေးက လှသလောက် မာနကြီးလောက်မယ့်ရုပ်.. "
" တစ်ခါလေးမှစကားတောင်သွားမပြောဖူးဘဲနဲ့ လူတစ်ယောက်ကို လွယ်လွယ်ကောက်ချက်ချလို့မရပါဘူးကွာ.. "
" ပြေးကြည့်တာထက် တွေးကြည့်တာကပိုမြန်တယ်.."
" အိမ်မှာရှိတဲ့မေမေကမှာလိုက်တယ်.. လှတဲ့မိန်းကလေးတွေကို ရှောင်တဲ့ "
ဝင်းထွန်းက အီလန်ဆပ်ပြာကြေငြာတဲ့မို့မို့မြင့်အောင်ပြောသလို ပြောပြန်သည်..။
ဒီကောင်တွေပါးစပ်ထဲမှာ ကြေငြာတွေလည်းမနေရပါဘူး..။
" မင်းတို့ကငါ့ဘေးအဖော်လိုက်ပေးရုံပါကွာ..စကားကိုငါကပဲပြောပါ့မယ် "
" ငါတို့ကျဝဇီပိတ်ကျင့်ပြီး မင်းတစ်ယောက်ထဲပြောရမယ့်ကိစ္စပဲ မင်းပဲသွားလိုက်ပေါ့.."
" တစ်ယောက်ထဲမသွားရဲလို့ပါဆို.. "
" မသွားရဲရအောင် ဟိုကမင်းကိုဂုတ်ချိုးသတ်နေလို့လား.. ယောကျ်ားပဲကွာ ရဲရဲတင်းတင်းပေါ့..ဘာဖြစ်လဲ "
" အဲ့လိုရဲတင်းဖို့ သတ္တိဘယ်လောက်လိုတယ်ထင်လဲ.. တခြားမှာငါရဲရင်ရဲမယ်.. ကိုယ်သဘောကျတဲ့မိန်းကလေးရှေ့မှာတော့ ရင်တုန်ဒူးတုန်နေသေးတဲ့ ပုထုဇဥ်ယောကျ်ားသားဟ "
" မင်းပဲကြောက်.. ငါတို့တော့မကြောက်ဘူး.. ဟေ့ မိန်းကလေး ကိုယ်မင်းကိုသဘောကျတယ် ချစ်တယ်ပြောပြီး လှည့်ပြန်လာခဲ့တာလေးပဲကို.."
" အဲ့ဒါပြောတာကွာ.. "
သူတို့အငြင်းခုန်စကားဝိုင်းမှာ ကျွန်တော်ဝင်မပါဘဲ ငြိမ်ငြိမ်လေးသာထိုင်ပြီးကိုယ့်အစားသာကိုယ်စားနေခဲ့တာ..။
" ကျစ်.. မင်းတို့လက်ပေါက်ကပ်တာနဲ့ ထပြန်တော့မှာပဲ.."
" ငါတို့ ဒီကလှမ်းကြည့်ပေးထားမယ်..သွားလိုက် သွား "
" မင်းဘ.. "
" တစ်ခုခုလှမ်းပေါက်ခါနီးဆို ငါတို့ပြေးလာပေးမယ်.. "
" သေမှလာတော့ ဘာလုပ်ရမှာလဲ.."
" သင်္ဂြိုဟ်ပေးလို့ရပါသေးတယ်.. "
" အမျှတန်းပါဝေပေးမယ်..မပူနဲ့ စိတ်ချသွား"
" ငနာတွေ..တစ်ယောက်မှအားကိုးမရဘူး "
ရဲရင့်က မျက်နှာကြီးတည်တည်နဲ့ ပြောနေပေမယ့် တခြားသူတွေကတော့ မျက်နှာတွေကဘာမှမဖြစ်သလို အေးအေးဆေးဆေးလေး..။
" ထက်အောင်.. လိုက်ခဲ့ "
လိုက်ခဲ့ပေးဆိုတာထက် by named တပ်ပြီးခေါ်နေပြီ..။
ကျွန်တော်ကတော့ ရဲရင့်နဲ့အကြည့်ကိုမဆုံအောင် ခေါင်းကြီးငုံ့လျက်သား..။
" ဟမ်.. မလိုက်ချင်ပါဘူး "
" ငါ့အပေါ်ဒီလိုပေါ့ မင်းတို့က.. "
" ............. "
ထက်အောင်က သူ့အစားသူပဲစားနေတာကြည့်ပြီး ရဲရင့်က ကျွန်တော့်ဘက်ရောက်လာပြန်သည်..။
" မြတ်ငြိမ်း.. လိုက်ခဲ့ "
" ဟမ်.. "
" လိုက်ခဲ့စမ်းပါ.. "
" ဟ..ဟ..ခဏ..ခဏ "
ကျွန်တော့်အလှည့်တော့ ငြင်းချိန်ကိုမရှိလိုက်တာ..လက်ကနေအတင်းဆွဲခေါ်ခံရလို့ တရွတ်တိုက်ပါသွားရတဲ့ ကျွန်တော့်အဖြစ် ။
ခဏဆိုလည်း မရဘူး..။
ပေါင်ပေါ်တင်ထားတဲ့ ကျွန်တော့်လွယ်အိတ်လည်းပြုတ်ကျမှာစိုးလို့ လှမ်းဆွဲဖမ်းကိုင်ထားရင်းနဲ့ပါသွားရတာမို့ ကျွန်တော့်ဟန်ကတော့မလှမပကြီး..။
သူကတော့ လျှောက်လှမ်းသွားတာက မော်ဒယ်အတိုင်း..။
" ရွှန်းလဲ့.. "
ကောင်မလေးတွေဝိုင်းအနားရောက်တော့ မျက်နှာကတစ်မျိုး..။
ကျွန်တော်လည်း အဲ့အချိန်မှ လွယ်အိတ်ကိုကောင်းကောင်းလွယ်နိုင်လိုက်ရတယ်..။
" ............ "
ကောင်မလေးက ဘာမှမပြောဘဲ ကြည့်နေတော့ရဲရင့်က သူ့ကိုယ်သူမိတ်ဆက်ပြန်သည်..။
" ကျွန်တော့်နာမည်ကရဲရင့်..ဒါကျွန်တော့်သူငယ်ချင်း မြတ်ငြိမ်း.. ကျွန်တော်တို့က 5BE MP ကျောင်းသားတွေပါဗျ "
" ဘာကိစ္စများရှိလို့လဲ.. "
" အရင်ထိုင်လို့ရမလား.. "
" ရှင်.. "
" မိုးတိုးမတ်တပ်ကြီးနဲ့မို့.. "
" ဟုတ်..ဟုတ်ကဲ့..ရပါတယ် "
" ကျေးဇူးပါဗျ.. အဟွင်း "
အံမယ် သူကနေရာလွတ်ခုံတစ်ခုံမှာ အခန့်သားလေးသွားဖြဲမျက်နှာပြဲနဲ့ ဝင်ထိုင်တယ်.. ကျွန်တော့်ကိုကျ ထိုင်လေဘာညာမပြောဘူး ။
သူမပြောတော့ ကိုယ့်အသိစိတ်နဲ့ကိုယ့်ဘာသာပဲ တခြားဝိုင်းကခုံကိုလှမ်းယူပြီး ဝိုင်းမှာဝင်ထိုင်လိုက်ရတယ်..။
" ဟိုနေ့ညက သီချင်းလာဆိုတဲ့အဖွဲ့လေ..မှတ်မိလား"
" ဪ.. အစ်ကိုတို့လား "
" ဟုတ်တယ်..အစ်ကိုတို့ပဲ "
" ............ "
ကျွန်တော်တို့မိတ်ဆက်ပြီးတော့ ကောင်မလေးတွေက ပြုံးစိစိလေးဖြစ်သွားကြသည်..။
ပြုံးရယ်သံလေးတော့ တီးတိုးလေးတောင်မထွက်လာခဲ့ပါဘူး..။
" အဲ့နေ့က ရွှန်းလဲ့အတွက်သီချင်းလာဆိုကြတဲ့သူက.. "
ကာယကံရှင်ရဲ့သူငယ်ချင်းက ထောက်မေးတော့ ရဲရင့်ကလည်း အကွက်မိဖို့ကြိုးစားနေတဲ့သူမို့ တန်းသူ့ကိုယ်သူမိတ်ဆက်စကားပြောသည်..။
သူတစ်ခွန်းငါတစ်ခွန်း ပြောကြရင်းနဲ့ စကားဝိုင်းက ကျွန်တော်မပါဘဲနဲ့လည်း စည်ကားလို့ပါ..။
ကျွန်တော်ကတော့ တစ်ယောက်ထဲထိုင်ရင်းနဲ့ အကြောင်းရင်းမရှိ လွယ်အိတ်ပေါ်မှာလက်ညိုးလေးနဲ့ အဝိုင်းလေးပဲဝိုင်းဆွဲနေခဲ့တာ..။
တစ်ယောက်ထဲ ဆိတ်ငြိမ်ခြင်းကမ္ဘာမှာ ဖြတ်သန်းနေချိန်လေးမှာ လက်ရှိကမ္ဘာထဲ ဆွဲခေါ်ခံလိုက်ရတဲ့ တစ်ခုထဲသော သက်ရှိလေးက..။
" မမကဗျာ.. "
" ဪ..ရွှန်းလဲ့ "
အသံလေးကြောင့် ကျွန်တော်မော့ကြည့်လိုက်သည်..။
ကဗျာ... ။
ကျွန်တော့်အသည်းထောင့်က ကဗျာ..။
" မုန့်လာစားကြတာလား.. "
" အဟွင်း..ဟုတ်တယ် ဟိုမှာလေ ခင်ချိုတို့မာမာတို့က ဗိုက်ဆာလို့တဲ့ "
ရွှန်းလဲ့ဆိုတဲ့ဘေးမှာ အပြုံးလေးနဲ့ရပ်နေတဲ့သူလေး..။
မျက်နှာလေးက ကြည်လင်ပြီး နွေးထွေးနေသည်..။
ဒီတစ်ခါကျွန်တော့်ရင်ခုန်သံလေးက ညိမ့်ညိမ့်ညောင်းညောင်းလေးနဲ့ တစ်ချက်ပြီးတစ်ချက် စည်းချက်မှန်မှန်ခုန်နေခဲ့တာ..။
မျက်တောင်မခတ်ဘဲ စိုက်ကြည့်နေရင်းက ကဗျာ့ရဲ့မျက်လုံးအကြည့်က ကိုယ့်ဘက်ခဏတာဝေ့ဝဲရောက်လာတဲ့ချိန် ကိုယ့်မှာမလုံမလဲနဲ့မျက်လွှာလေးအမြန်ချမိလိုက်တယ်..။
မင်းကိုမကြည့်နေတဲ့ပုံစံလေး ကိုယ်လုပ်မိလိုက်တယ်ဆိုတာက တမင်ကြံရွယ်ထားတာမဟုတ်ပါဘူး..။
ကိုယ်ခန္ဓာရဲ့ အလိုလိုတုံ့ပြန်မှုထင်ပါတယ်..။
" အဟွင်း..အဲ့ဒါဆို အစ်မသွားလိုက်အုံးမယ်နော် အဆောင်ကျမှတွေ့မယ် "
" ဟုတ်ကဲ့.. "
မင်းလေးကတော့ အပြုံးနဲ့ထွက်သွားသလောက် ကိုယ့်မှာတော့ တမေ့တမောလေးနဲ့ မင်းလေးကိုခိုးကြည့်နေခဲ့မိတာ..။
" ရွှန်းလဲ့ရဲ့အစ်မလား.. "
" ဟင်..မဟုတ်ပါဘူး အဆောင်ကအစ်မလေ..အဲ့ဒါကြောင့်ခင်တာ "
" ဪ.. သူကအစ်မလား မထင်ရဘူးနော် "
" နည်းနည်းပုသေးသေးလေးဖြစ်နေလို့ပါ..မမကဗျာက သဘောကောင်းတယ်.. ညီမတို့စာမရရင် မမကဗျာကစိတ်ရှည်ရှည်နဲ့ စာရှင်းပြပေးတယ်"
ရဲရင့်က ဒီတိုင်းမေးနေပေမယ့် ကျွန်တော်ကတော့တစ်ခုချင်းစီတိုင်းကို အလေးထားပြီးနားထောင်နေမိသည်..။
" ဟုတ်လား.. ဘယ် betch ရောက်ပြီလဲ "
" ဟင်.. မမကဗျာလား "
" အင်.. "
" 4BE civil က.. "
" ဪ.. "
လက်စသတ်တော့ civil ကကိုး..။
civil ဘက်ရှာဖို့ကို ကျွန်တော်ဘာလို့မေ့နေခဲ့မိတာလဲ..။
4BE ဆို ကျွန်တော့်ထက်တစ်နှစ်ငယ်တယ်ပေါ့..။
ထပ်ပြီး နောက်တစ်ကြိမ် ကဗျာရှိရာဘက်ကို တိတ်တခိုးလှမ်းကြည့်မိသည်..။
သူလေးက သူငယ်ချင်းတွေနဲ့စကားပြောရင်းနဲ့ ဘာသဘောကျစရာရှိနေတယ်မပြောတတ်..ပြုံးရယ်နေလို့ ။
ရယ်လိုက်တိုင်း မို့တက်သွားတဲ့ပါးလေးတွေရယ်..။
နှုတ်ခမ်းပါးတစ်စုံရယ်..။
သွားတန်း ဖြူဖြူလေးရယ်..။
မှိတ်ကျမသွားဘဲ မှေးကျရုံမှေးကျသွားတဲ့ မျက်လုံးတစ်စုံရယ်..။
အဟွင်း.... ။
အသံမထွက်ဘဲ နှုတ်ခမ်းတွေတွန့်ကွေးတက်သွားတဲ့ထိ ကျွန်တော်ခေါင်းပြန်လှည့်ပြီးခေါင်းငုံ့ရင်းပြုံးမိတာက သူလေးကြောင့်..။
အကြိမ်ကြိမ် ခိုးကြည့်မိခဲ့တယ်..။
တိတ်တခိုး တစ်ယောက်ထဲ သဘောကျပြီးပြုံးနေမိခဲ့တယ်..။
အချစ်ဆိုတာ ဒါပဲနေမယ်..။
.
9.12.2022 သောကြာနေ့..။
ကျောင်းမှာတော့ မင်းကိုထပ်မတွေ့ဘူး..။
ရဲရင့်နဲ့ရွှန်းလဲ့တို့နှစ်ယောက်ကတော့ အချင်းချင်း စကားတွေအများကြီး ပြောခွင့်ရတဲ့ သူငယ်ချင်းမိတ်ဆွေတွေ ဖြစ်သွားပြီ..။
မနေ့ကမှ စခင်ကြပေမယ့် ဒီနေ့တော့ပိုရင်းနှီးနေကြပြီထင်ပါတယ်..။
သူတို့ကျ မြန်လိုက်တာနော်..။
လွယ်လည်းလွယ်နေသလိုပဲ..။
ကိုယ့်အလှည့်ကျမှ နှေးနေပြီးခက်နေသလိုပဲ..။
ကိုယ်ရဲရင့်ကို အားကျလိုက်တာ..။
ကိုယ်လည်း မင်းရဲ့အနားမှာနေပြီး မင်းနဲ့စကားတွေအများကြီးပြောချင်တယ်..။
မင်းရဲ့မျက်နှာလေးကို ငေးစိုက်ကြည့်ချင်တယ်..။
ကိုယ်ချစ်ရတဲ့အကြောင်းလေးကိုလည်း ပြောပြချင်တယ်..။
" ဟျောင့်တွေ..အဆင်သင့်ဖြစ်ပြီလား "
စာရေးနေတဲ့ချိန် ရဲရင့်နဲ့ထက်အောင်က သန့်သန့်ပြန့်ပြန့်လေးဝတ်ထားပြီး ရောက်လာသည်..။
အချိန်ကြည့်တော့ ခွန်နှနာရီထိုးနေပြီ..။
" မင်းတို့က တကယ်သွားမလို့လား.. "
" အေးလေ.. အစကတည်းက ပြောထားတာပဲကိုး"
" ဘယ်ကိုလဲ.. ဘယ်သွားကြမလို့လဲ "
ဘာမှနားမလည်ဘဲမသိတဲ့ကျွန်တော်ကပဲ ကြားဖြတ်ဝင်မေးရသည်..။
" ရွှန်းလဲ့တို့အဆောင်သွားမှာလေ..မင်းမသိဘူးလား.. မျိုးဇံ မင်းမပြောထားဘူးလား "
" မေ့နေတာ.. "
" လျန်းလျန်းအဆောင်ကိုသွားမှာလား.."
" အေး.. မပြင်ရသေးဘူးဆို မြန်မြန်ပြင် "
လျန်းလျန်းအဆောင်ကို သွားမှာတဲ့..။
ဒါဆို ကဗျာတို့ဆီကိုပဲ..။
" ဘာမှပြင်စရာမလိုပါဘူးကွာ..ဒီတိုင်းပဲလိုက်ခဲ့မယ် "
" ဟုတ်တယ်..ဟိုတစ်ခါလိုတော့ အဖြစ်မခံနိုင်ဘူး"
ဝင်းထွန်းနဲ့မျိုးဇံက စိတ်မပါတပါနဲ့ပြောကာ ဖုန်းကိုအိတ်ကပ်ထဲထိုးထည့်ပြီး ကုတင်ပေါ်ကနေထလာကြသည်..။
ကျွန်တော်ကရော..။
ပြင်ရမလား.. ပြင်သင့်လား ။
" ဒီတစ်ခါတော့ ရွှန်းလဲ့လေးဆီကနေကို ခွင့်တောင်းလာတာပါကွာ.. လာဆိုချင်ရင်ဆိုပါတဲ့ သူမတားပါဘူးတဲ့ "
" ဒါတော့ လူတိုင်းပြောမှာပဲကွ.. "
" ငါတို့လာရင် ထွက်ကြည့်ပေးဖို့ပြောထားပါတယ်.."
" အဲ့တော့ ခေါင်းလေးပြူထွက်မယ်တဲ့လား.."
" ဟာ..မင်းတို့ တအားစကားများတာပဲကွာ ဟိုရောက်ရင်သိလိမ့်မယ်..ဘာမှမပြင်ကြတော့ဘူးမလား "
" မပြင်ဘူး.. "
ဝင်းထွန်းနဲ့မျိုးဇံက သံပြိုင်တူငြင်းကြတော့..။
" ဒါဆိုလည်း သွားမယ်ကွာ.. မြတ်ငြိမ်း သွားမယ်..ထ..အဲ့စာ နောက်မှရေး "
ကျွန်တော်ရေးလက်စ စာအုပ်ကိုလည်း ရဲရင့်ကလာပိတ်ချတဲ့အပြင် ကျွန်တော့်ကိုအတင်းထခိုင်းကာ ဆွဲခေါ်နေပြီ..။
ဘာမှတောင် ပြင်ဆင်ချိန်လေးမပေး..။
ပြောတော့ ပြင်ဆင်ပါဆို..။
အခန်းထဲကထွက်မှ ကျွန်တော်တို့လက်ထဲမှ ဗလာသက်သက်ချည်း..။
ကျွန်တော် ရဲရင့်လက်ထဲကနေ ရှောင်ထွက်ပြီး..
" ဂီတာ ဂီတာ.. "
အခန်းထဲပြန်ပြေးဝင်ပြီး ဂီတာသွားယူရသည်..။
" ဪ..အေ ဟုတ်တယ်.. အဓိကဟာကြီးမေ့တော့မလို့ "
ဂီတာဆွဲပြီး ပြန်ပြေးထွက်ခဲ့ကာ အခန်းတံခါးပိတ် အဆောင်ကနေထွက်ခဲ့လိုက်သည်..။
ဦးတည်ရာလမ်းကတော့ လျန်းလျန်းအဆောင်ဆီ..။
.
လျန်းလျန်းအဆောင်ရှေ့ရောက်ပြီ..။
အရင်တစ်နေ့က ထိုင်ခဲ့တဲ့အုတ်ခုံမှာလည်း ထိုင်ပြီးပြီ..။
ရဲရင့်က ရွှန်းလဲ့ကိုဖုန်းဆက်ပြီး သူရောက်ကြောင်းပြောပြီးပြီ..။
ရွှန်းလဲ့ တို့သူငယ်ချင်းအဖွဲ့က ဒီတစ်ခါတော့ ဝရံတာဘက်ကို သူ့တွန်းငါ့တွန်းနဲ့ ထွက်လာခဲ့ပေးသည်..။
ဟုတ်ပါပြီ.. ဒီထိက ။
ကဗျာရော..။
ကဗျာရော ဘယ်နားမှာရှိနေလဲ..။
ဘယ်အခန်း ဘယ်အရပ်ဘက်မှာမင်းရှိနေမယ်လို့ တိတိကျကျမသိပေမယ့် မင်းလည်းဒီမှာရှိနေမယ်မလား..။
ဒါဆို ကိုယ့်ရင်ထဲကအချစ်သီချင်းကို မင်းနှလုံးသားနဲ့ နားဆင်ပေးပါ ချစ်ရသူ..။
" နှလုံးသားနဲ့ နားဆင်ပေးပါ.. "
ကျွန်တော် ဂီတာကြိုးညှိရင်း တစ်ယောက်တည်းတီးတိုးပြောတဲ့စကားကို ဘေးမှာထိုင်တဲ့ရဲရင့်က..။
" ဟင်.. "
" ဘာလဲ.. "
" နှလုံးသားနဲ့ နားဆင်ပေးပါလို့ ပြောရမှာလား.."
" ဟမ်.. "
" အဟက်.. ဟုတ်တယ် ဟုတ်တယ်..မင်းတော်တယ် မောင်ပြူး..အဆောင်ပြန်ရောက်ရင် ဘောက်ဆူးကောင်းကောင်းနဲ့ ဆုချမယ်..ဟားဟား.. အဆောင်ကကောင်မလေးရေ ကိုယ်ဆိုတဲ့သီချင်းလေးကို နှလုံးသားနဲ့နားဆင်ပေးပါ..နှလုံးသားနဲ့နားထောင်မှ မင်းလေးရဲ့နှလုံးသားထဲ ကိုယ့်အချစ်တွေရောက်မှာ "
ရဲရင့်ရဲ့မတိုးမကျယ်အသံက တိတ်ဆိတ်တဲ့ညချမ်းအချိန်ခါမို့ ကောင်းကောင်းကြားနိုင်သည်..။
ကျွန်တော့်မှာတော့ ပါးစပ်လေးအဟောင်းသားနဲ့ ကြောင်တောင်တောင်လေး ရဲရင့်နဲ့အဆောင်ကြီးကို တစ်လှည့်စီကြည့်မိနေတာ..။
ငါက မင်းကိုအကြံပေးခဲ့တာမှမဟုတ်ခဲ့တာကို..။
" ဘာဆိုကြမလဲ.. "
" မြတ်ငြိမ်း.. မင်းပြောကြည့် "
မေးပြန်ပြီ နောက်တစ်ကြိမ်.. ။
ကျွန်တော် ရဲရင့်မျက်နှာကိုငေးစိုက်ကြည့်ပြီး အဆောင်ကို လှမ်းငေးကြည့်ကာ..
" တစိမ့်စိမ့်ကြည့်.. "
" အဟားဟား.. ကောင်းသားပဲ "
" အဟွန့်.. ဘုန်းကြီးရူးနဲ့လှေလူး အဲ့မှာစတွေ့တာပဲ"
ကျန်တဲ့သုံးယောက်ကတော့ မျက်စောင်းတရွယ်ရွယ်နဲ့သာ..။
" သူများအကောင်းနဲ့ပြောတာကို မနာလိုမဖြစ်ကြနဲ့..တစိမ့်စိမ့်ကြည့်လေးနဲ့ စမယ် "
" ပြီးရော ပြီးရော.."
" အနည်းဆုံးတော့ ကမ္ဘာတစ်ခြမ်းငြိမ်းအေးရအောင် မောင်တော်အကြိုက် နှမတော်တို့ဆောင်ပေလေတော့.. "
" အို.. လာပေရော့ "
" အဟက်.. အဟား "
သုံးယောက်သား အသွားအလာညီနေတော့ သဘောကျစရာဖြစ်နေခဲ့တာ..။
" မျက်လုံးရှေ့မှာမြင်တိုင်း....ကြည့်ခဲ့ဖူးတယ် မထင်ပါနဲ့ သူများအတွက်လှလွန်းသူတွေလည်း ကိုယ်အမှတ်တမဲ့ပါပဲ "
ကျွန်တော်ကပဲ သီချင်းအစလေးနဲ့ ရင်ထဲကခံစားချက်အပိုင်းစလေး ဖွင့်ထုတ်မိသည်..။
ဒီညတော့ဒီတိုင်း စာသားရရုံနဲ့ ကိုယ်ဟစ်အော်ထုတ်နေတာ မဟုတ်ပါဘူး ကဗျာ..။
ကိုယ့်ရင်ထဲကနေ လာတဲ့ သီချင်းသံပါ..။
စာသားတိုင်းကို ကိုယ့်ခံစားချက် ကိုယ့်နှလုံးသားလေးနဲ့ သီဆိုနေတာပါ ကဗျာ..။
" အားလုံးထဲက မင်းကျတော့..ရေး..ကိုယ် မျက်တောင်မခတ်ဘဲနဲ့ "
ဆိုနေကျတိုင်းတစ်ယောက်တစ်လှည့် ဆိုနေပေမယ့် တိတ်တဆိတ်နဲ့ ကျွန်တော့်နှလုံးသားလေးကပါ လိုက်သီဆိုနေမိတာ..။
" တစ်နေကုန်ထိုင်ပြီး တစိမ့်စိမ့်ကြည့်..နဖူးကနေခြေဖျားထိအောင်ချစ်တယ် ..အသည်းလေးအား စွဲညို့သူရေ မျက်စိအောက်က ပျောက်မသွားနဲ့အုံး..တစ်နေကုန်ထိုင်ပြီးကြည့်.. ဒီမျက်စိကအသည်းထဲအထိစီးဝင်.. ဘယ်တော့ကြည့်ကြည့် ချစ်မိသူရေ..ဒီလိုမျက်စိအောက်က ပျောက်မသွားနဲ့အုံး ..တစ်နေကုန် ထိုင်ပြီးကြည့် "
ကိုယ့်မျက်စိထဲ မင်းလေးရဲ့ပုံရိပ်တွေ ယှက်ပြေးနေတာ မင်းသိချင်မှသိလိမ့်မယ်.. မြင်ချင်မှလည်း မြင်လိမ့်မယ် ။
" ဒီတိုင်း ကြည့်နေရုံလေး..သိပ်တော့မများပါဘူး"
" ကိုယ့်ရဲ့အကြည့်ကပန်းတွေလိုပွင့်..ကဲ ယူ..မင်းဆွတ်ခူး"
" အားလုံးထဲကမင်းပဲ..အမြဲတမ်းမြင်နေခွင့်ပြု "
" တစ်နေကုန်ထိုင်ပြီး တစိမ့်စိမ့်ကြည့်..နဖူးကနေခြေဖျားထိအောင်ချစ်တယ် ..အသည်းလေးအား စွဲညို့သူရေ မျက်စိအောက်က ပျောက်မသွားနဲ့အုံး..တစ်နေကုန်ထိုင်ပြီးကြည့်.. ဒီမျက်စိကအသည်းထဲအထိစီးဝင်.. ဘယ်တော့ကြည့်ကြည့် ချစ်မိသူရေ..ဒီလိုမျက်စိအောက်က ပျောက်မ........."
သီချင်းလေးငါးပုဒ်ဆက်တိုက် ဆိုခဲ့ပြီး အဆောင်သူတွေကို နှုတ်ဆက်ကာ ပြန်လာခဲ့ကြသည်..။
ကျွန်တော်ကတော့ မမြင်ရသေးတဲ့သူကို လှမ်းမျှော်ရှာပြီး အိမ်ပြန်လက်ဆောင်မပါဘဲ ပြန်လာခဲ့ရသည်..။
.
12.12.2022 တနင်္လာနေ့..။
စနေ တနင်္ဂနွေ နားရက်မှာအိမ်ပြန်ဖြစ်ပြီး ဒီနေ့အဆောင်ပြန်ရောက်တော့ ညစာစုစားရင်း ရဲရင့်ကိုမေးဖြစ်တယ်..။
" ရဲရင့်.. မင်း ဒီနေ့သွားအုံးမှာလား "
" ဘယ်ကိုလဲ.. "
သူကတော့ ထမင်းလုတ်ကြီးကြီးတစ်ဇွန်း ပါးစပ်ထဲမထည့်ခင် ပေါ့ပေါ့ပါးပါးပြန်မေးသည်..။
" မင်းကောင်မလေး အဆောင်ကိုလေ.. "
" မသွားသေးဘူး..ဒီနေ့ နည်းနည်းပင်ပန်းနေတယ် နားလိုက်တော့မယ် "
ကျွန်တော် ဘာမှထပ်မမေးတော့..။
ခေါင်းလေးပဲငုံ့ချလိုက်သည်..။
" မြတ်ငြိမ်းရာ..မင်းမို့သွားမေးနေသေးတယ် "
" ငါဆို ဒီကောင်စကားစလာမှာစိုးလို့ကို မသိချင်ယောင်ဆောင်နေတာ.. "
" သိတယ်..စိတ်ဓာတ်တွေများ "
" ............. "
" .............. "
ပခုံးတွန့်ပြသူကတွန့်ပြ..။
ဂရုမစိုက်ဘဲ ထမင်းစားနေသူကစား..။
" မြတ်ငြိမ်းနဲ့များ တခြားစီ မင်းတို့ကောင်တွေ..ငါ့သူငယ်ချင်းလေးပဲ ကောင်းတယ် "
ရဲရင့်က ထမင်းပန်းကန်ကိုလက်တစ်ဖက်နဲ့ကိုင်ထားရင်း နောက်တစ်ဖက်နဲ့ကျွန်တော့်ပခုံးကိုလှမ်းဖက်သည်..။
ကျွန်တော်ကတော့ ထူးပြီးပြုံးလည်းမပြုံးပြတော့..။
စကားလည်း ဝင်မပြောဖြစ်ပါ..။
" ဟွင့်..မြတ်ငြိမ်းလိုကောင်က သူနားအေးပြီးရောဆိုပြီး မင်းနောက်လိုက်တာ..ချိုတယ် ငံတယ် စပ်တယ်ဆိုပြီး ပါးစပ်ကနေဘာမှဟမယ့်ကောင်မဟုတ်ဘူး.."
" အေးလေ.. ဟိုမှာလည်း ဘာမှမရှိဘဲနဲ့ သူလည်းအားတက်သရောကြီး လိုက်ပေးချင်ရအောင် ဝေဿန္တရာမင်းကြီးနဲ့အမျိုးတော်နေတာမဟုတ်ဘူး..သူ့ဘက်ငါ့ဘက်လည်း မျှမျှတတထည့်စဥ်းစားအုံး "
" မဟားတရားကြီး လိုက်ချင်နေတယ်လို့များ ထင်နေသလား မောင်မင်း..မင်းတော်တော် အရိပ်ကဲညံ့ရသလား ငါ့ရဲ့သားတော်ငယ်ဖြစ်ပြီး "
" မင်းဘိုးအေ မင်းသားဖြစ်ရမှာလား.. "
ထက်အောင်က စတော့ ရဲရင့်လှမ်းရိုက်ပေမယ့် ကောင်းကောင်းမထိလိုက်ပါဘူး.. လက်ဖျားထိပ်နဲ့ပဲ ထိလိုက်တာမို့ နာမယ်လည်းမထင်ပါဘူး ။
" အဟွင်း...အဟက် "
ဒီဝိုင်းထဲမှာ ငြိမ်သက်နေတာက ကျွန်တော်ကလွဲဘယ်သူရှိအုံးမည်လဲ..။
သူတို့ကတော့ပြောသား..။
ဘယ်သူရှိလို့ သွားချင်မှာလဲတဲ့..။
ရှိပါတယ်.. ရှိတာပေါ့ ။
ရှိလို့ သွားချင်နေတာပေါ့.. ။
ငါကြိုက်တယ်ဆိုတဲ့ကောင်မလေးက ရွှန်းလဲ့ မမလို့ခေါ်တဲ့ ကဗျာလေလို့ ဘာလို့ကျွန်တော်ထုတ်မပြောဖြစ်တာလဲ..။
ကဗျာကလည်း လျန်းလျန်းအဆောင်ကဆိုတာလည်း ကျွန်တော်ပြောဖို့ ဘာလို့နှုတ်လေးနေခဲ့မိတာလဲ..။
ကျွန်တော် ဒီအတိုင်းလေးပဲ ဆက်ငြိမ်နေမိခဲ့တာက ဘာအကြောင်းရာတွေကပိတ်ပင်တားဆီးနေခဲ့လို့လဲ..။
.
13.12.2022 အင်္ဂါနေ့...။
" ထက်အောင်.. ထက်အောင်.. ထက်အောင် "
ရဲရင့်အော်သံကြားလို့ ကျွန်တော်ဖတ်နေတဲ့ဝတ္ထုစာအုပ်ကို ချခဲ့ပြီး အခန်းပြင်ထွက်လိုက်သည်..။
" ထက်အောင်တို့ အပြင်သွားတယ်.. "
" ဟင်.. "
အနောက်ကိုပြန်လှည့်လာပြီးရဲရင့်ကရှေ့ကိုသွားနေရာကနေ ကျွန်တော့်နားပြန်လျှောက်လာသည်..။
" ဘယ်သွားကြတာလဲ.. "
" မုန့်သွားစားကြတယ်.. "
" ဘယ်တုန်းက ထွက်သွားတာလဲ..ကြာပြီလား "
" စောနလေးကမှ သွားကြတာ.. "
" ဒါဆို တန်းပြန်ရောက်ကြအုံးမှာမဟုတ်ဘူး..မင်းအားတယ်မလား "
" ဟင်.. "
" အားအား မအားအားငါနဲ့ခဏလိုက်ခဲ့အုံး.. "
" ဘယ်သွားမလို့လဲ.. "
" ရွှန်းလဲ့နဲ့ သွားတွေ့မလို့..သူ့ကိုမုန့်ဝယ်ကျွေးမယ်ပြောထားတာ ဆိုင်တစ်ဆိုင်ဆိုင်မှာသွားထိုင်ဖြစ်မှာမို့ မင်းအဝတ်လဲခဲ့လိုက်အုံး..မြန်မြန်လုပ်သိလား..ဟိုမှာစောင့်နေတာ ကြာမှာစိုးလို့ "
" ဟမ်..နေ.. "
ဘာစကားမှမပြောလိုက်ရ..။
လူကိုအခန်းထဲပြန်တွန်းထည့်ပြီး အပြင်သွားဖို့ကို အတင်းပြင်ဆင်ခိုင်းပြန်သည်..။
လျန်းလျန်းအဆောင်မဟုတ်လို့ စိတ်မပါပေမယ့် အကူညီတောင်းတော့လည်း လိုက်ပြီးပါရမီဖြည့်ပေးရအုံးမည်..။
ကိုယ်လည်း သူတို့အတွဲဖြစ်မြောက်ရေးမှာ တစ်ထောင့်တစ်နေရာကနေ အားဖြစ်ပေးခဲ့တာမို့ ကိုယ့်အလှည့်ကျရင်လည်း ပြန်ပြီးအကူညီခံရမှာပေါ့..။
အေးလေ..ကိုယ်လည်း ကိုယ့်ကံနဲ့ကိုယ်လာအုံးမှာပါ။
တွေးရင်းနဲ့ ဝတ်ထားတဲ့ပုဆိုးကြမ်းကို နည်းနည်းသန့်တဲ့တစ်ထည်နဲ့ ပြောင်းလဲဝတ်လိုက်သည်..။
ဝတ်ထားတဲ့စပို့ရှပ်အင်္ကျီကိုမချွတ်နေတော့ဘဲ မနက်ကကျောင်းသွားတုန်းက ဝတ်ထားတဲ့ရှပ်အင်္ကျီအဖြူကိုပဲ ကြယ်သီးတစ်လုံးမှမတပ်ဘဲ အပေါ်ထပ်အနေနဲ့ ကောက်ဝတ်လိုက်သည်..။
ကိုယ်ကြိုက်တဲ့သူနဲ့တွေ့ရမှာမှမဟုတ်ဘဲ.. အများကြီးမလိုပါဘူး ။
ဒီလောက်ဆို တော်ပြီပေါ့..။
" မြတ်ငြိမ်း.. ပြီးပြီလား "
" အေး.. "
" ဒါဆို သွားရအောင်.. "
" အွင်း.... "
ပြတင်းပေါက်တံခါးကို ဂလန့်သေချာချပြီး တံခါးသော့ပိတ်ပြီး သော့ကို ကျွန်တော်တို့သိမ်းထားလေ့ရှိတဲ့နေရာမှာပဲ ကျွန်တော်သိမ်းထားခဲ့လိုက်သည်..။
ပြီးမှ နှစ်ယောက်သားအတူထွက်လာခဲ့လိုက်သည်..။
🌼pann
__________________________
pann စာပြန်မစစ်မိဘူးနော်..။
အမှားယွင်းပါခဲ့ရင် နားလည်မှုနဲ့ ပြင်ဖတ်ပေးစေချင်ပါတယ်ရှင့် ..။
မျက်စိနောက်စေမိပြီ..။
pann မအားဖြစ်နေလို့ တစ်ရက်ခြားမှစာတင်နိုင်ပါမယ်ရှင့်..။
ကျန်းမာရေးဂရုစိုက်ကြပါနော်..။
စိတ်ညစ်စရာတွေရှိကြပေမယ့်လည်း ကြိုးစားဖြေဖျောက်ကြစို့နော်..။
အချိန်ပေးပြီးဖတ်ပေးကြတဲ့ တစ်ဦးတစ်ယောက် ချင်းစီတိုင်းကိုလည်း ကျေးဇူးအများကြီးတင်ပါတယ်နော်..🙏
pann ကြိုးစားပုံဖော်သွားပါမည် 💪