رواية "هل كانَ حُلماً...؟
(العِراق_المُصغَر)
بقلمي... نورس _قاسم"
________________
لتنسون التصويت والمتابعه
+كࢪزاياتي علقو ؏ كل فقࢪه بالقصه خلي تصعد...
_______________
:- دانحجي ونسولف اندكت الباب كامو الولد
سمعنا هوسه وكلام كامت طيبه گالت... عمامي اجو
اسمع رشاش يكول... ترا كِلش زحمه هالتصرفات شني ماكو احساس
وصارت هوسه والحديقه مالتهم انترست
كلبي وجعني رجعت داالملم الكيك والبيبسي سمعت الباب نفتحت
وحمودي يمي كال بفرح
.... هيييييي ماماااا
درت وجهي شفتها كدامي ركضت حضنت ابنها شالته وتبوس بيه وباوعتلي بنظرة تحدي
واني اباوعلها بنظرة استحقار واستنقاص
شگد رخيصه لعد لما رجعت لرجال ميريدها
سمعت صوت عمته ثناء تصيح :- هلا اجيتي هسه يلا نور البيت... وبوستها
خالة رشاش كالتلها... كـ*** ام الوكت اذا صارت صدگ البيوت تنور بدحگة جهرتجن
هنه باوعن الها صفح كالت... شكو مجذبه بشي؟
وجوهجن مغبره ووحده تحجي على الثانيه
وفوكاها تنافقن كافي يول كافي جذب ماتشبعن
ماردن عليها ثناء كالتلها... حدري افتكار حدري نحجي بغرفتي
رجعتي غصبا ع الكل وراح تبقين ويبقى البيت بيتج
نحن نطلع وانتي تبقين
.. كالتها وهي تسد باب الغرفه
طيبه ضحكت باستهزاء كالتلها... انه جاي ادحج نهايتجن شلون تطلعن بالدفرات
خالتي كالت... صلفات صلفات ولج شكد دحجت كـ***اب وداعشيات ما حسيتهن بهالصلافه
اشتعلو اهلك يا غفار... ومشت طبت للهول
اني حيل تنرفزت رحت كعدت يمها كتلها بضوجه وقهر... وشلون هسه هاي راح تبقى
باوعتلي وحجت باستهزاء :-لا حبيبه جايه تلم جويلاتها وتطلع هالحرمه عدها كرامه ماتقبل احد يمسها... وهزت ايدها وغمتني
سكتت وضليت كاعده افكر وخالتي تدردم طب رشاش گال :- تعالن بالمضيف كلجن
باوعلي وكال... حره
باوعتله بضوجه كال... لبسي واحتشمي وتعاي
ماجاوبته بس ضليت اباوعله بضوجه وقهر جر نفس كال... يلا بويه استعجلي
كمت بملل صعدت لبست حجاب وجاكيت طويل فوك تراكي جان الجو بارد ونزلت
صارت كدامي الحربايه وثناء وهنه يطلعن من غرفهن واكو بنيه صغيره تكوللهن
... يلا عمامي يكولون خلي يجن هسه
اني مشيت من يمها خزرتها وطبيت للمضيف باوعت بيه هوايه زلم واولادهم الي هم عمام رشاش اول ماطبيت گلت... السلام عليكم
ردو... وعليكم السلام
واسمع واحد يكول... هلا بويه
رشاش گاعد گدامي يباوعلي مبتسم اشرلي رحت گعدت يمه انتبهت كاعد بصفى اوس وبصف اوس حازم التفتت باوعت گدامي على واحد منهم رجال جبير مبين عليه حباب
يباوعلي ويبتسم كال... شونج بويه
كتله... الحمد لله وانت
گال... نشكر الله
رشاش گاله... هاي عمي ما كتلك راح اخذ زينة الحريم
دحج حرمتي
ضحك عمه كمل رشاش... ماناگصها شي ولا منگصه عليه
العم باوع لرشاش كاله... عفيه وليدي ماجذبت صدگ زينة الحريم ماشاء الله حرمتك حليوه وحبابه تليق بيك وبعشيرتنا
ضحك رشاش عمه باوعلي گلي... خاف هذا يضوجج لو يكصر وياج انتي بس گليلي اشوي على اذانو بصل
ابتسمت وباوعت لرشاش ضحك گاله :-عجل هيج تتبرا مني
التفتت انتبهت ع الحربايه وهي تفوت وتسلم وطبت وراها ثناء گالت... هلا باخوتي وعزوتي يول حميد وينو شلونو مشتاقتلو يبعد كلبيي...
وتسلم صوتها يلعلع
اوس كاعد بصفي گال بهمس... سلاما قولا من رب رحيم
رشاش باوعله خزره بابتسامه بمعنى اسكت اوس باوعله وجاوب بهمس :-خويه اسمحلي انگلع ماجاي اتحمل ادحج جهرتها بالقران لو ضرتي مااكرهها هيج
... ورجع باوع لعمامه اليحجون وهو يبتسم
حازم گاله... تكعد وتنجب انه ماادحج كل هالتلوث وحدي مثلك مثلي تتحمل الي اتحملو
ديجاوب اوس رشاش گح وكللهم :-انجبو واگعدو
اوس گال... امدانا كِلنا على نفس السفينه
حازم گال :-يارب تنگلب ونموت انه مااتحمل اكثر
يحچون بهمس اني هنا ماتحملت ضحكت التفتت ثناء باوعتلي ماهتميتلها كح رشاش وگرصني بايدي گال... فضحتينا يولو
باوعتله وسكتت حچه عمه الجبير گال :-نحن هينا اليوم تا نحل الكواين الصارت اخر فتره بين الحريم ونصافي الگلوب وترجع المي لمجراها
حجه الثاني... دحجن يابه انتن كلجن بناتنا بالله ما نميز بينجن نحن بعادتنا التتزوج ابننا تصير منا وبينا
تصير كواين ما مشكله بس لازم تنحل نحن مانضل طول عمرنا متخاصمين على سوالف حريم ماتسوا
اني تنرفزت كتله... اذا انت تشوف انو يدمرن بدلتي بيوم عرسي ويقهرني ويخربن فرحتي سوالف ماتسوا ؟!
فـ اني مااتفق وياك ومااقبل بهالحجي لان هذا جان احلى يوم بعمري وحضرتها خربت بدلي وخربت هاليوم باي حق بلا؟
باوعلي رشاش وخزرني اسكت اني اشرتله شكو عمه گال... لا بابا انه مااقصد هيج لا بالله انتي حكج وتاخذينو من هالرگبه
نحن الي ما نقبلو على بناتنا ما نقبلو عليج لان انتي هم حالج من حالهن صرتي من عايلتنا بعد
بس نحن نكول لو تتصالحن وتتركن هالكواين لانها تگصر العمر بالله
رشاش كاله... هالكلام المفروض يتوجهه الهالحرمتين... واشر على ثناء وام احمد
... واما مسالة البدله فهن هانني بسوايتهن هاي وانت تعرف ياعمي انه هالحرمه الجدامك ماطايقها ولا رايدها وجاي اكلكم بالخير ردوها يمكم
لان عاقبة هالسالفه راح تكون كِلش ما زينه
واحد من عمامه گاله... لا بويه رشاش هاذ الحجي مايصح وما مقبول
رشاش... لا يصح يصح ونص انه جاي اكلكم للمره الالف هالحرمه ماطايقها وضغطكم عليها وعليه هاذ ماراح يفيد بشي غير انكم تضيعولها عمرها ويه رجال مارايدها
هي من حقها تتزوج واحد يحبها ويهتم بيها اما انه فماعليه شي حرمتي يمي
... وحط ايده ع كتفي كمل كال... وانه وياها مرتاحين ونحب بعض وعايشين احلى عيشه
عمه گاله... مايصير هيج ياعمي افتكار هم حرمتك
گاله... انه ماحاسبها هيج ودامكم دريتو طلكوها ولاتشيلون ذنبها برگابكم طول العمر
انه ماراح احبها ولا راح يجي اليوم الي اعتبرها زوجه الي
انه اتفهم سابقا جان عندكم امل بحجة انه ما متزوج ولابد بيوم اتقبلها لانها جدام عيني
بس مثل ما تدحكون انه تزوجت واستقريت والحمد لله كِلش مرتاح وما راح اقبل باحد يخرب عليا فرحتي رشاش گبل ذاك انسو
عمه گاله... نحن ما بحرب وليدي نحن هم مانريد غير سعادتكم
بعدين ترا انت لا اول ولا اخر واحد يتزوج اثنين
دحج نصنا متزوجين حرمتين وعادلين بينهن وعايشين احلى عيشه
رشاش... هذول انتو انه اختلف... باوع لـ افتكار كاللها... وتأكدي سالفة البدله انه ماناسيها
كالتله... انه ماعليه جيب القران هسه احلفلك عليه
باوعت لعمها كالت... عمي احلفلك بالقران انه ماسويت شي بس ذبوها براسي
زين فكرو بيها انه شاستفاد لو خربت بدلتها؟
خالة رشاش كالتلها... عجل مني خرب البدله ابوي؟
افتكار... ما انه خاله صدگيني
حجه عم رشاش غفار هو نفسه الي اجه لبيت عمته عقيله وماجان راضي بعرس رشاش مني گال... عادي تصير اكيد صاير سوء تفاهم
رشاش گاللها... انكارج هاذ مابيه فائده ويزيد النار حطب
انتي غلطتي اعترفي واعتذري ولا تحاولين تطلعين بدور البريئه
افتكار... لاحرام عليك لاتظلمني انه ماعليه ما سويت شي للبدله
كاللها... عجل مني سوا هيج ماكو غيرج مستفاد
افتكار... وانه شدخلني هو مني اخذت البدله قابل انه لا عجل شكو تاهميني؟
رشاش كاللها... يعني قصدج اختي هند هيج سوت!
باوع لبنت عمه الصغيره كاللها... نونه صيحي هند بسرعه
عمته ثناء خزرت افتكار وكالتله... لا عوفيها يما لا تصيحوها خطيه مريضه
مااهتملها رشاش كاللها... نونه روحي اريد اعرف المذنبه هينا مني
عم رشاش غفار كاله... يول الي صار صار افتحو صفحه جديده البدله ما راح تتخيط بهالحجي نسد السالفه احسن
گاله... لا يابه... وباوعله باستحقار... انه زلمه اخاف الله مااقبل احد يتعدى على حرمتي عرضي واسكت
ودار وجهه... اليوم محد يطلع من هين الا لما ابين الحقيقه جدام الكل
ونعرف مني خرب فرحتنا بعرسنا ارد ابين كل واحد على حقيقتو اليوم
خالته كالت... خلي اكوم اجيبلك هند واجي
باوعلها كاللها... بعد عيني يخاله استعجلي.. وابتسم
راحت خالته بسرعه شويه وطبت گايده هند سلمت على عمامها وگعدت يم عمها الجبير مقابيلنا بصف الحربايات كاللها... هند
باوعتله كالتله... ها رشاش
كاللها... افتكار تكول انه ما شكيت البدله ولا سويت هيج
هي بلعت ريك وباوعت لـ افتكار كالتله... وانه شدخلني ليش جاي تسألني
كاللها... شلون شدخلج عجل هي مني الاخذت البدله من الغرفه ما انتي؟
هند... اي بس والله ما عليه
كاللها... عجل ليش اخذتي البدله؟
هند... هي هاي... واشرت على افتكار... اجتني وكالت عمتج عقيله تكول خلي تجيبلي البدله للغرفه الثانيه لان فارغه كتلها شلها بيها كالت اسويلها فيكه
افتكار بسرعه صاحت... يا شوكت انه اجيت وهيج كتلج شني يولو تردين تذبيها براسي
جاوبتها هند... لا انتي التردين تورطيني بسوالفج الخبيثه المكشوفه
افتكار... جذابه والله جذابه اصلا جنت كاعده انه يم جيرانه طول الوكت لا دحكتها ولا كتلها جيبي البدله هي اخذتها
ولما دحكت نفسها هاهيه انكشفت ذبتها براسي ماعليه والله
دفعتها هند بايدها صاح عمهن... هووب احترمن
وهي ما مهتمه كالتلها... يا حيه يا حربايه سويتي سوايتج وضميتي راسج لا تجذبين يولو ترا سالفتج مكشوفه اصلا كلها تدري انتي الكصيتي البدله
بس الصوج ما منج مني انه السمعتج وصدكتج
ورحت كلت لهالمسكينه انطيني البدله شمدريني هيج كلبه انتي
افتكار دفعتها كالتلها... لتغلطين احترمي... بجت وكملت... دحكتيني يتيمه وفقيره ومالي احد جاي تتهميني بسالفه انه ما الي بيها
وتبرأين نفسج
العمام كام يصيحون لان اصواتهن ارتفعت كام رشاش كمت ورا كامت افتكار وكفت كدام رشاش كالتله :-احلفك بالله بلا ما الكل يدري هينا انه وعمتك عقيله علاقتنا ما كلش زينه
وباوعت لهند وحجت... عجل شلون توصيني على البدله لو اجيت وكلت لاي احد منكم مايصدك شني انه غبيه واروح اگِل لهند عمتي تريد البدله وشلون هند صدكتني؟
واضح سالفتها جذب وجاي تتهمني
هند باوعت لعمتها ثناء الجانت ساكته طول هالوكت ومكتفيه بس تتفرج خزرتها وكالت... عممممه
هنا ثناء تحركت كلتلها... انجبي افتكار انجبي صارلي ساعه ساكته كلت بلكي تحس على دمها
بس لاا ما منج فايده ولسه مصره تجذبين وتتهمين هند ترا كافي انه سمعتج من كلتيلها جيبيلي البدله وصدگت
باوعت لرشاش كالتله... ما عبالي هيج تسوي
كاللها بشك... هسه هي صارت المذبنه وحدها؟
زين ليش ماحجيتي من الاول ؟
ثناء... گِلت من قهرها زلمتها تزوج عليها وسكتت خوما احجي واخرب بيتها
انه مااحب المشاكل
باوعت لـ افتكار وكالت... بس مال تتهمين هند لاااا ابد مااقبل اسكتي وسدي حلكج غلطتي اعتذري وانجبي
افتكار... ياا عمه لا تجذبين
دفعتها كالتلها... انه اجذب يالصلفه الصوج مابيج الصوج بيا الدافعتلج طلعتي ما تستاهلين وتردين تذبيها براس هالمگروده
افتكار كالتلها... هاا هسه سويتيني انه المذنبه وانتن الملائكه يعني دطلعن منها اثنينجن وذبيتنها براسي؟؟؟
ترا...
قبل لتكمل عمه غفار كال... خلص يابه خلص بس فكنا واسكتن عمي شني هاي النسوان صرعتنا كافي بس اسكتن
رشاش نتر بيه... لا مايسكتن ارد اعرف مني الشگگت البدله اليوم
غفار كاله... سوالف حريم لا تكبرها
كاله... السالفه جبيره من كاعها ياعمي واذا ما تحب تسمع لا تسمع انه مااحب انام على گفه وجهي
باوع لافتكار كاللها... احجي الصدگ يمكن اسامحج
هي تبجي مفرفحه كالت... دام هن تبرن مني انه راح احجي كلشي
صاحت ثناء... تردين تتبلين....
قبل لا تكمل كاللها رشاش... اسكتي لاتحجين حرف
باوع لافتكار گاللها... احجي
افتكار... اي صح انه غلطت وشگيت بدلتها بس والله من قهري بس هاي مو فكرتي وداعت ابني
عمه ثناء هي الگالتلي مثل ما خربت فرحتج خربي فرحتها
كتلها شلون
كالت دمري بدلتها
كتلها عمه اخاف
كالت انه وياج
ثناء صاحت... جذاااابه
العم الجبير كاللها... صوتج
ثناء... خويه والله...
قبل لتكمل كاللها... ولا حرف مااريد اسمع حرف منج
رشاش كاللها... كملي
افتكار... فـ عمتي راحت طلبت من هند تجيبلنا البدله بحجة عمتك عقيله تريدها
هند كالتله... رشاش والله هاي تجذب
افتكار صاحت وهي تبجي... انه غلطت اي بس انتن هم مثلي غلطتن مال تذبن اللوم عليه وتطلعن بريئات انه مااقبلهاا... تحجي وتبجي
عمهم الجبير كاللها... ياحيف بتربيتي الضاعت عليج
هي لزمت ايده تبوسها كالتله... والله ندمت عمي سامحني... هو داير وجهه عنها
وهند وثناء مستمرات يجذبنها رشاش كاللهن... بالله ماتنحسبن ع البشر الحرمه جبتها لا اذتجن بفعل ولا بحچايه ليش هالحقاره؟
افتكار تبجي وتگوله... ندمت والله ندمت ساعه شيطان
العمام رزلوهن وضلو يحجون عليها ويحاولون يهدون بيننا وانو هي ندمت وخلي ننهي هالمشكله وكثير لحو بالموضوع رغم هي شبعت رزايل لحد ما رشاش گاللهم
... انهي السالفه شرط هن التلاثه هسه وجدام العمام وهلي يعتذرن من حرمتي ويطلبن منها السماح
عمه گاله... وهو الواجب لازم يعتذرن وباوعلهن
افتكار كالتله... انه حاضره
واجت وكفت گدامي گالت وهي مفرفحه من البجي... سامحيني غلطت بحقج ساعه شيطان وماتنعاد من اليوم انه وياج خوات
وباست راسي باوعت لرشاش وابتسمت... ها راضي عني
ما باوع بوجهها اني واكفه ورا كتفه باوع لهند كاللها... حدري هين
هي هم تقدمت وكالت بملامح جامده وهي مركزه عليه... اسفه غلطت بحقج وشمرتلي بوسه وابتعدت
هو ضل خازرها ورجع دار وجهه كاللها :-جبيرتهن يلا عيني
تقدمت عليه كالت... سامحيني... وحضنتني
العم الجبير كال... الكل تسمع الراح اكولو بالقران الي اسمع انها مأذيه حرمة رشاش بحجايه لو بفعل قسما بالله اتصرف وياها تصرف مايرضيها كافي سوالفجن هاي تبطلنها
مال غيره ومدري شني
تروحن تاذنها لا مااقبل والي تسويها معناها هي مامحشمتني وانه اخليها تدحك نجوم بعز الظهر واضح كلام؟
افتكار... لا عمو اختنا هي
اني باوعتلها صفح باوع لثناء كال... ارد احجي وي ثناء
رشاش باوعلي كال... صعدي للغرفه يلا
وباوع لطيبه اجت اخذتني شفت كل الجناين وحتى خالتي طلعت من المضيف صعدنا للغرفه گالت... يبعد جبدي يـ رشاش برد گلبي من ذلها وخلاها تعتذر
ابتسمت طيبه گالت... عرفن قيمتهن جدام العمام
جرت نفس بقهر... بس هند شبيها تخبلت ليش سوت هيج
الخاله افراح گالت... تعلمت الاستگ***اب من ثناء اذا هي ليل نهار يمكم شلون ما تتعلم منها
بس سهله زين الي صار خليها تتأدب
هزت راسها بـ إي وكالت... الله يهديها بس
گتلها... من هسه اختنگت هذن راح ينامن على گلبي
خاله افراح گالت... انجبي وبطلي نكد اهم شي انسلحت كرامتهن جدام العمام واعتذرن الج
صار الج اعتبار منا ورايح يفكرن الف مره گبل لا يتقربن منج خطوه
گتلها... احس خايفه
گالت... ومن شني تخافين شو
هو رشاش ووياج ضد حتى ابو كافي يابنتي قللي نكد ما زين ع الزلمه جاي تدحكين شكد يحاول يرضيج على حساب الكل
انتي هم تنازلي شويه على موده وهاي الجهره لا تگلبيها على كلشي
ابتسمت گتلها... كلشي حيكون بخير دام هو وياي
ضحكت گالت... اي هيج صيري سبعه والتقرب منج خطوه
كملت طيبه... كسري رجلها
خاله صاحت... تربيتي... انطيني بوسه وحظنتها
ضحكت مر الوقت ونزلت خالتي وطيبه گاعده يمي ع التلفزيون انفتح الباب رشاش گال... يلا تعالن تعشن
كامت طيبه گالتله وهي تطلع من الغرفه... راحو عمامي؟
كاللها... اي
كمت وراها لزم ايدي ونزلنا سويه تعيشينا كلنا على سفره وحده وجان هدوء محد حجه اي شي
كملنا سويتلهم جاي وصعدت فوگ حضرت ملابس المدرسه وسديت الضوا ومددت حتى انام حاولت انام مكدرت من التفكير
رغم التعب الي احسه
شويه وانفتح الضوا گال... هاي شني
ضحكت گتله... شني
گال... تردين تنامين؟
گتله... اي تعبانه
اجه گعد بصفي وحط ايده ع راسي دايشوف حرارتي گال... مابيج شي يول كومي
وجرني كتله... ها شنو
گام راح فتح الكنتور وگال... هالكسل انه مااحبه ومن اول يوم هم
گومي... وجر الجنطه وكال... طلعي كتبج يلا
كتله... اهوو لتصير مثل رتيل
ضحك حط الجنطه يمي گال... انجبي وطلعي الجدول خلي ادحگ
شعندج باجر
كتله... عوفه اليوم والله مالي واهس ادرس
كال... لو تبقين ع الواهس فكل الطلاب ماعندها واهس بس كلشي حلو لازم تجاهدين تا توصليلو يلا
طلعت دفتر الجدول كتله... والله بارده مو مال واحد يدرس هسه
ضحك كال وهو يفتح ايده... حدري لحضني تدفي
ضحكت وحضنته وغمضت عيوني ضربني راجدي خفيف گال... كلاوات التهرب من الدراسه بطليها يلا
ضحكت وطلع الدفتر شاف الجدول كال... طلعي الرياضيات
طلعته طلع الدرس الشرحته المدرسه ورجع يفهمني عليه وكلما اسرح يضربني بالقلم خفيف ع خشمي ويگول... بس اخلص امتحنج ترا
ضحكت كتله... اوكي
كمل رجع يعيد يشرح واني اباوع لحواجبه وعيونه سود حيل هو يشرح واني مركزه بملامحه ولزگت بـراسي اغنية (يهنيالي)
باوعلي گال... فهمتي
هزيت راسي بـ اي باوع بعيوني گال :-انتي اصلا مو وياي صح
هزيت راسي باي ضربني راجدي بخفه كال... مو كتلج انتبهي
گتله واني اعيط.... توضروبنييي... ورجعت ضربته راجدي
هو باوعلي متفاجئ وگوا حاصر ضحكته گال... يول حرررره تضربيني؟ سهله
اني ضحكت كمت گام وراي جرني من بلوزتي رجعت عليه گتله بتهديد
:- تتحداني
گال... اي ... وكفشني
گتله... اي وخر
گال... ماوخر شتسوين بلا
گتله... سهله و كفشته من شعره... كتله هدني واهدك
ضحك باسني من رگبتي گال... خلينا متمسكين ببعض
لا اهدج ولا تهديني
ضحكت بصوت عالي گال... فضحتينا يولو
گتله... عوف شعري يولو
گال...اذا ما اعوفه شتسوين
اني گحيت وتركت شعره وخشنت صوتي حتى اغني گتله بصوت عالي
:-خذت عيني ونظر عيني
ادورك لو غبت بيني
اريد وياك الف الكون.
قبل لا اكمل هد شعري وحط ايده ع اذانه گال... كافي ارحميني الله يستر عليج يبنيه غلطت ومنج السماح
ضحكت بصوت عالي جرني من خصري وحط ايده ع حلگي گال... يول بس صوتج
حطيت ايدي على خصره وغنيت
:- علمني اغمض العين دونك لحظه ياغالي
نسيت شلون الك اشتاك من گد ما تجي ببالي
ضحك وغنينا ثنينا
... يهنيالي ويهنيالي..
حبيبي يمي هنيالي..
نغني ونضحك وكأن اول مره نغيها حط كصته ع كصتي وكال :-
"يافرحة گلبي بيچ، لون العشگ وياچ كِلش مختلف "
ضحكت وحضنته باسني من راسي شويه ورفع راسي گال... خليتيني اسخت وياج وانه الملتزم
ضحكت گتله... ع باجر ادرس
گال... ممنوع... گعد ع الجربايه وجرني گعدت ع رجله گال وهو يلعب بشعري :-دحگي التسخيت بهيج وكت ممنوع
حاليا لازم تقرين وتشدين حيلج لا تنسين كثير دروس فاتتج ادرسي ونظمي وقتج النوم ما راح يطير عندج كثير وقت استغليه
گتله... مو هيج بس مالي واهس للدراسه
گال... يول هو شلون ينعرف الطالب المجتهد من غيرو؟
من هالاوقات تصير حيل صعبه الواحد يدرس دروسو
بس الطالب المجتهد الذكي يتحمل ويتحدى هالظروف لان يعرف هو يفيد نفسو
الدنيا ما امان لاتعتمدين عليا ولا على اهلج
اليوم انه يمج باجر يمكن ما موجود واهلج نفس الشي
كتله... اسم الله لتحجي هيج
گال... جاي احجي واقع
ابتسمت كتله... راح ادرس بس اني مو مجتهده يعني ماعتقد راح اتفوق مثل ما تريد انت
اني كل همي بس نجاح
گال... صيري مجتهده وخلي طموحج دايما عالي دحگي هاي مدرستج تكرم المجتهدات بحضور الاهالي وتقدملهم كتب شكر وهدايا تخيلي تكونين منهن شگد راح تفتخرين بنفسج
جاهدي تا تجربين هالشعور الكِلش حلو
گتله... اني جنت اطلع بالدفرات
گال... انجبي
گتله... اكثر دجه الي" ٧٠
گال... تكدرين توصليها لل "٩٠
سبعه انتي ماينخاف عليج
گتله... بس
گال... ادرسي حره تنفعين نفسج باجر تكولين لجهالنا عندي شهاده وترفعين راسي وراسهم
جريت نفس هزيت راسي تلمس خدي بايده وگال :-انه تحديت بيج اهلي وعمامي وكلتلهم راح تجيب شهاده تفوق ترفع راسي بيها
مااستاهل ترفعين راسي ع الاقل جدامهم
ابتسمت گتله... صدگ هيج كلتلهم
هز راسه بـ اي گتله... ماشي حاادرس
وجريت الجنطه وطلعت دروسي ادرس وهو يمي كل شويه يجي يمتحني ويشرحلي سوالي واهس وهاي جانت اول مره اقرا بيها هالگد
ضلينا لحد الـ ١٢ ساعه ادرس ساعه نسولف ماحسيت بملل ابد بالعكس صارلي واهس كملت رتبت كتبي وحطيت راسي ع صدره تغطينا ونمنا لثاني يوم گعدت الصبح غسلت وتوضيت حتى اصلي لبست ازار الصلاة صليت ورحت يم رشاش گرصته من كتفه حيل فز كتله.... صبااحكك انيييي
ضحك گال... صباح الحب... فرك كتفه كال... النسوان تگعد زلمها ببوسه شبيج انتي طالبتني بثار
ضحكت گتله... حتى بعد ما تگعدني هيج يلا گوم نتريك
نزلنا تريكنا وبدلت وطلعنا جان الجو مطر والريحه مال المطر تخبل صعدنا السياره ووصلني للمدرسه باوعت ؏ الجدول عدنا اول درس رياضيات جانت المدرسه من تشرح بموضوع جديد تربطه بالموضوع السابق الدرسنياه رشاش وكل ما تسال اجاوب لحد ما كومتني كالت
... اسمج
اخذت اسمي وگالت... انطيتج تقييم كامل
ضحكت وجانت هاي فرحه كعدت واسمع البنيه الوراي تكول :-سجاجه جديده دخلت الصف
ضحكت كلت لو يعرفن شلون جانو يطلعوني بالدفرات بنفس الوقت حسيته صيت حلو
وصارلي واهس اكبر درس الانكليزي نفس الحاله وتجرأت اكوم واقرا بالكتاب والمدرسات جانن يشجعن كلش وهالشي يزيد الحافز الي عندي
من صارت الفرصه اجت بنيه سألتني ... تدرسين عند مدرسين خصوصي؟
كتلها... لا
كالت... والله سباعيه
متزوجه ويم عيالج وهيج شاطره
فرحت حيل من كلامها وحسيت نفسي شخصيه طلعنا من المدرسه واجه رشاش عليه والطريق كله اني احجيله شسويت
وشكالن البنات
وشلون المدرسات مدحني
گال... عفيه هيج اريدج ترفعين راسي
وصلنا للبيت طبيت للهول طيبه كالت :-جنت منتظرتكم حتى اتغدا وياكم
رشاش كاللها... واهلي
طيبه... اهلي تغدو وطلعو
.. وطبت للمطبخ
رحت بدلت لبست تراك وغسلت ولبست حفايات ونزلت كعدنا ناكل واني احجيلها وهي تشجع بيا كتلها :-لعد وين خالتي
طيبه... يم عمتي عقيله
كملنا وكمت حطيت الجاي ع النار و داغسل المواعين طبو الولد وويام عمي ومبين معصب وهم يتعاركون واحد ويا الثاني
طبو بالهول وهم يتجاكرون وعمي يكوللهم
ابو بكر... كافي اصواتكم
رشاش كال... شكو شمفينين هذول
اسمع بكر يگوله... اتفل بوجهي انوب لو اخذتهم وياي
رحت وگفت بباب الهول رشاش گال... يولو هيدو وفهموني شبيكم
اوس گال... اسمع هو البدا ما انه
حازم... انجب شسويتلك انه
اوس... خذه قمصلتي وشمرها بالطين
حازم... گتلك مااقصد
عمي صاح... اصواتكم من نعلعلا
حازم... انه هادي الصوج من هاذ
دفعه اوس وگاله... يعيل كوا كوا هاالكو**د المصخم
حازم... انجب انه اخوك يالكو**د يابن الكو**د
اوس... انجب ابن المطي لتغلط على ابويه
رشاش... كافي اولاد النعل اسكتو خزيتونا لاتفشرون جدام الحريم هي گوا**د
عمي واكف كاللهم... عمي انه گو**د ومنـ***ج ومطي اذا ماالعب العگال على ظهوركم
... ونزع عكاله
كلهم طفرو وواحد يصيح للثاني انه بشاربك ضحكت
حازم كال... انه شارد يم مرتي.. وركض للغرفه
اوس جر طيبه ووكف وراها وگاللهم :-انه باظفر اختي وعدكم الحساب
وابوهم كوا حاصر ضحكته كاللهم :-هسه تتصالحون كو**يد
طلع حازم من الغرفه وحضن اوس وكاله... حبيبي اسف بعد مالوث قمصلتك بالطين
جاوبه اوس... عفيه حبيبي صير نظيف وسوي مثلي من شگگت قمصلتك بالموس هيج الاصول
جاوبه حازم تدلل... اوسي ع الجايات ... وباسه بخده وراح لغرفته
اوس كال... كل هذه التصرفات تحت الضغط والتهديد... وصعد فوك
عمي هز ايده كال... لو مخلف ثورين احسنلي شهالبلوه
ضحكت بصوت عالي ضحك وياي وكال... جاي بويه
كتله... تتدلل...
ورحت صبيتلهم جاي ووزعته وصعدت لغرفتي الجو مطر يخبل خابرت رتيل سولفتلها ع كلشي صار وياي
فرحت من درت خلاهن يعتذرن جدام كل العمام
ووصتني گالت... التحاجيج حجايه اسحليها ولتخافين واي شي يصير خابريني انتي عندج اهل ما جايه من الشارع
كتلها... اكيد
سديته ونمت ساعه وكعدت ادرس طب رشاش كال... هاي مني جاي تقرا وحدهه
ضحكت رفعت ايدي كتله... اني
كال... اللهم صلي على النبي خاف احسدج
ضحكت كتله... مدري صارلي واهس
كال... عفيه بنيتي... وكعد يمي يدرسني ويشجعني
مر الوقت لليل الساعه ب ٢ احاول انام مااكدر التفتت رشاش نايم كمت اباوع من الشباك مطر قوي حيل حبيت ريحته
باوعت لرشاش نايم جريت القمصله لبستها وفتحت الباب على كيفي ونزلت
الكل نايم طلعت برا بالحديقه گعدت ع الكرسي انتبهت شوارعهم وبيوتهم كلها اضويه وقويه كلش
ولو انطفت الكهرباء عندهم مولده ليل ونهار
الكل هنا مرتاحين على عكس شوارعنا لو انطفت الكهرباء يظلم الشارع
كل واحد هناك عنده قصه
واحد حاير باكل خواته
وواحد حاير بعلاج امه
حطيت ايدي على گلبي وكلت كافي حره شوكت راح تطلعين من دوامة الماضي
كلشي تغير خلص شوكت راح انسى؟
نزلت دمعتي واني اشم ريحة المطر اتذكر حياة جانت وكت تمطر الدنيا تحط دوالك وتخليهن ينترسن مي وبعدها تقرا عليهن ايات وتسبح بيه ومرات تشرب منه
تكول احس براحه غريبه
بعدها غمضت مسحت دمعتي فتحت عيني وتهيألي اني وحياة نلعب جوا المطر لما جنا صغار
ونفتر وفرحانات
ضحكت وتقدمت ووگفت جوا المطر ومستمره اباوع للماضي
بكل اشتياق مو لوجعي القديم
لا اشتياقي لحياة
اختلطت دموعي ويا قطرات المطر فزيت على صوت رشاش وهو يكول :-شجاي تسوين هينا
درت وجهي عليه وابتسمت بقهر كتله :-مااجاني نوم
اجه وكف يمي كال :- ليش تبجين
هزيت راسي ب لا كتله... مدا ابجي
رفع راسي عليه گال :-احجيلي اكو احد مأذيج؟
احد سمعج حجايه؟
هزيت راسي ب لا كال :- عجل ليش تبجين؟
كتله :-مخنوكه شوي
كال :-من شنو؟
... هيج تذكرت اشياء... ونزلت راسي
حط ايده ع ظهري كال وهو يباوع بعيوني :-يول الجو بارد راح تتمرضين
ابتسمت كتله :-مااتمرض متعوده ع البرد... ودرت وجهي
كال :- حدري.. وجرني
صرنا جوا السگف گال وهو يمسح على خدي :-شلون متعوده
گتله :-هم هذول الفقراء تلكاهم عانو من كلشي مو بس الجوع.. ومسحت دمعتي
جرني عليه باوعت بعينه باسني من راسي گال :-المهم الله عوضج
ابتسمت گتله واني ابجي :- باوع هو الانسان مستحيل يقنع بشي وهاي مصيبه
مثلا اني جنت هواي اتمنى يصير عندي بيت جبير وفلوس وملابس حلوه
وغرفه وذهب مثل هسه
مجنت راضيه ابدا بحياة الفقر حتى من جنت اروح لجيرانه ام غدير اوديلها الخبز جنت اضوج بداخلي واكول شكد نذليت بس هسه كلشي عندي وهم مامرتاحه!
باوع بعيني كال... ما مرتاحه وياي؟
هزيت راسي ب لا كتله... اشتاق لحياة... حضني كتله... واتحسر هواي احس فاتتني هواي اشياء بعمري
باسني براسي كتله... من اشوف شوارعكم بداخلي اخاف احسدكم
ابتسم كال... ليش
كتله... لانكم مرتاحين ما مثلنا
كال... كل واحد يعيش همومو بطريقتو.. وجر الكرسي كعد كعدت على رجله كال... دحكي كل الي بالمنطقه ما مرتاحين مثل ماانتي متخيله
نحن ما نعرف شصار ويا هالناس وما من حقنا نحكم اذا هم مرتاحين او لا الظاهر ما كلشي
كتله... شلون هيج
كال... مثلا هسه انتي بمدرستج البنات الي ما يعرفنج راح يكولن هنيالها شكد مرتاحه سجاجه ومتزوجه ورجلها يحبها وداخله اهليه و و و و كثير حجي مو
هزيت راسي كتله... اي
كال... بس ما يدرن انتي شكد تعذبتي هن مجرد شافن الظاهر وانتي هم مجاي تشوفين من اهل هالمنطقه غير الظاهر
وتقارنيهم باخوتج وحياتج هالشي غلط
كتله... احجيلي شويه قصص عن اهل هالمنطقه
ابتسم كال... ما جايج نوم
هزيت راسي ب لا كال وهو يضم شعري ورا اذني... احجيلج عن العدل الالهي
هزيت راسي بـ اي كال... اكو حرمه هينا ماكو باخلاقها واحتشامها بنت حسب ونسب
وبيوم خطبها واحد بس هي مارادتو
فـ هاذ راح يطعن بشرفها وين ما يكعد
بس العالم ما جانت تصدكو وبيوم دخلو حراميه لبيت هالحرمه ونهبو كلشي بيه
وهو استغل هالحدث وكام يفضح بالحرمه ويكول جنت اكولكم تدخل زلم لبيتها بس انتو ما صدكتوني وهاي واضح جانت مدخله زلم
ومن دحكتوهم وانكشفت كالتلكم حراميه
فالعالم هينا صدكت وبيوم صارت مواجهه بينها وبينو كالتلو اسأل ربي مثل ما حرگت گلبي يجيك هاليوم الي صراخك من الالم يوصل لسابع جار عساها بمالك وبصحتك وسمعتك مااكولك بحريمك لان مالهم ذنب
مرت السنين والحرمه وصلت الثلاثين ومحد خذاها وهي ما مكمله دراسه وهالزلمه استمر يبوك وينسجن ضل بين السجون والبوك لحد ما خسر سمعتو وثقة الكل بعد هالحادثه بسنين طاح هالخنيثه الشهرها بين الناس
بإيد التنظيم وعذبو كثير وبعدها اخلو سبيلو بس حتى بعد ما تركو ما جان بخير
بالعكس سائت حالتو وانشل والكل تخلو عنو ضل تلث اشهر على هالحال يسويها تحتو
لحد ما صارو يلبسو حفاضات وصريخو فعلا بدت كل المنطقه تحجي بيه وتسمعو
الى ان توفى
حره... ربك ميعوف احد
كال... بدون شك
حره... والبنيه شصار بيها
كال... تزوجت بعد ما كبرت بس الله عوضها برجال علم ودين واخلاق
ابتسمت مسح على خدي كال... لو ما انصفونا اهل الارض اكو رب عادل هو الي بيدو كلشي
وبلحظه يغير حياة عبدو
خلي هالشي ببالج
لو الكل تركج هو وياج وراح ينتقم من الي ياذوج
ابتسمت كتله... الله عوضني بيك مثل هاي المره
ضحك كال... وانتي هم جنتي عوضي.. وباسني من حنجي
حره... ليش كلما اتاذى الكاك يمي
كال... لاني شريك حياتج لازم اشاركج حتى بألمج
ابتسمت وبسته بعينه ضحك كال :-صايره جريئه
حطيت راسي على راسه واني اباوع للمطر كال... خلص كافي نكوم ننام وراج مدرسه
جرني من ايدي صعدنا فتح باب الغرفه طبينا فتح سحاب القمصله وكال... يلا ع النوم
رحت نمت اجه نام بصفي رفع راسي خلاه على ايده وحط راسه ع راسي وحضني ونمنا لثاني يوم رحت للمدرسه وجان روتين عادي لحد ما رجعنا وتغدينا
طبيت لغرفتي حطيت مرطب ونمت كعدت باوعت رشاش ما هو
نزلت يم خالتي وطيبه نسولف ونتعلل
شويه وكتلهن... يلا اكوم اقرا
وكمت صعدت للغرفه شفت افتكار نزلت باوعتلي ابتسمت ونزلت
طبيت للغرفه طلعت الكتب وبديت اقرا واني اكتب
خلص القلم الحبر
تذكرت رشاش جابلي دفتر وخليته هو و صور حياة والاقلام بالجرار گمت فتحت الجرار
واشوف صوري اني وحياة مشككه شلتهن ورجفت ايدي من القهر... يتبع...
_________________
حبيباتي طيبه اسمها طيبه مو طيله بس اني اقلد لان اسحگ بحرف الباء گتلكم خلوها طيله احسن 🤧💔
وهسه حبيباتي قراءه ممتعه
تصبحون ؏ ماتتمنون
حساب الانستا
nawras_qasim_22
حساب الفيسبوك
Nawras_ qasim
♡♡♡♡