نقطة لقاء

بارت الثامن والاربعون

‏والرُوح على مَنْ يُدَارِيها تَرتَمي .

>>>>>>>>>>>>>>>>

ما احس غير فهد فات عصبي وراح علئ ليان وضربها راجدي ..

بقيت مدهوشه من الموقف وصافنه اباوع علئ ليان حاطه ايدها علئ خدها مصدومه وفهد اباوع عليه صايره عصبي نار

لزمها من عكس ايدها حيل وگال : شنو هذا الحجي الي سمعته لياااان

كامت تبجي وهيه لازمه خدها وكامت متعرف شتحجي صارت تئتئه بحجيها گالت

_ فهد بس اني محجيت شي

رجع عتها من ايدها اكثر وگال : اني سمعتج شكلتي شنو جذبيني وشنوو تريدين توكعين الطفل وتحجين تفشرين علئ بنان مو هيه تايهتلج تحجين عليها

كامت ترجف وتحجي متوتره وگالت

_ والله هيه جبرتني احجي هيج كامت تفشر عليه وتغلط

عاط بيها وگال : وتكعدين تغلطين وتكولين عليها نغله وعلئ ابني نغل

مسحت دموعها وگالت : واني مجذبت بشي هاي الحقيقيه

بعدها مكملت كلامها وجابها براجدي ثاني وگال

_ لهنا وبس صابرلج هواي اني كثرن سوالفج وساكت وما ماد ايدي عليج ليش ؟ لان اكول هاي بنت عمي بحسبة اختي ما امد ايدي عليها بنيه صغيره طايشه بس وصلت حدها وياج تتعدين علئ مرتي وتحجين علئ ابني

ليان : شنو تضربني علمود هايه وكامت " تأشر عليه بيدها "

رجع لزمها من اصبعه ونزله بقوه وگال

_ اصبعج هذا مترفعي عليها ومتحجين عليها هيج حجي يا ماعندج كرامه انتِ شوفي هسه تروحين تكعدين وتحترمين نفسج لا اعرف شسوي واطردج بس مراح اسوي هيج واخرب عرس اختي وفرحتها بس خلي يخلص العرس علئ خير وبعدين اعرف شلون اتفاهم وياج لان انتِ ظاهر مو مال احترامات

ليان : ميهمني شسوي سوي تضربني تطردني اني احبك ومستحيل اخلي بنان تاخذك متستاهلك اني الوحيده الي استاهلك قابله منك كُلشي حتئ تريد اصير ثانيه قابله حتئ لو متريد نزوج قابله ميهمني بس اهمشي اني وياك نكون سوه

تحجي الكلام واحس نفسي كامت تلعب من كلامه معقوله اكو بشر ماعدها كرامه ولا تكله حتئ قابله اكون وياك بدون زواج ..

عاف ايدها وگال : حرت شلون احجي وياج وافهمج بس انتِ ظاهر حتئ عقل ما عندج هسه لو ضاربلي حمار جان افتهم بس انتِ ماكو ميفيد لا ضرب وياج ولا حجي وياج اذا انتِ حتئ علاقة بالحرام تريدين بس صوج مو صوجج صوج امج وابوج الي معرفوا يربون

ليان : فهد اسفه لتزعل مني

فهد : اطلعي روحي يم امج كعدي وما اريد المحج وخلي يخلص العرس واعرف شلون اتفاهم وياج

ليان : بس

عاط بيها وگال : روحي يم امج هوه اذا امج جمانه شترجئ من وحده مثلج يلا ولي

مسحت دموعها وقبل متطلع باوعتلي بنظرات حقد باعت علئ بطني ورجعت باعت بوجهي وابتسمت بطرف شفتها ورها طلعت من المطبخ ..

من الموقف الي صار والهبطه الاكلتها احس جسمي نمل وصارت بيه رجفه ..

اجه فهد يمي وگال : كافي بعد مراح تحجي وياج روحي هسه كعدي يم البنات وتجنبيها هسه اني طالع يم الولد

هزيت راسي

راد يطلع ورها اندار عليه وگال

_ ولتعبين نفسج ولتتحركين هواي مو زين عليج

ما ادري شلون طلع مني صوت گلت

_ تمام

طلع واني صرت اخذ نفس شويه حتئ بس تروح مني الرجفه الي صارت بيه خليت ايدي علئ بطني ودعيت من كُل گلبي

انو ربي يحفظلي الطفل الي بطني وميصبه اذيه ..

___________

ريم
كاعده والدمعه بطرف عيني واني اباوع لروان مقهورة بس كُل متشوفني تبتسم

لحد ما سمعت هلاهل وجتي بنان علية مبتسمه :- اجوي يلا ريم حضري نفسج

وكفت بخوف وامي يمي وتكول : لتخافين ريم شبيج امي ليروح يصير بيج شي ومثل معلمتج مو تنسين

روان : خاله مو هيه صايره صفره انوب تحجين وياها هيج

رحاب : لازم بنتي ريم مو صيرين ثوله

ريم : اهووو يوووم فهمت والله فهمت بس عوفوني

رحاب : غير اخاف عليج ونصحتج شسوين مسوين

روان : لتخافين عليها خاله هاي ريم النچرة

رزان : لتضحكين توتريها

روان : اوي عيني

ورا ثواني والجكليت كام يتطافر والهلاهل ترست البيت

بكلبي فرحه متنوصف .. اليوم زواجي من " مؤمل "

اول ما وكفت لزمت ايدي روان وتكول بهمس : رييييم لج انتِ خايفهه المفروض تضحكين تصخمين مو عبالك مجبورة

ريم : شسوي متوتره

روان : لتتوترين اخذي الموضوع ريلاكس كُلش عادي غمضي فتحي تلكين نفسج بحضن مؤمل لتخافين

ريم : ولج روان اني بيا حال وانتِ تكُليلي هيج

روان : هاي الحقيقيه انتِ هسه متوتره بس لما تصيرين وي مؤمل حيروح كُل توترج

ريم : وانتِ شمدريج اظاهر مجربه

روان : انجبي بس اني اعرف كُلشي مو فاهيه مثلكم كافي عياره صيري نچره مو صارلي ساعه احمد بيج واكول صديقتي ماكو مثلها

ريم : اووف روان اووف

روان : اووف بعينج كافي تتأففين ومثل مكتلج شدي حيلج خوش اريدج نچره ذيبه لبوه هايشه تبينين قوتج افترسي يبعد خيتج

ريم : عزاا هاي شنو انتِ كافي روان

روان : فوك ما انصحج اول متوصلين البسي هذا السيت لونه شسمه نسيت خرب شسمه بلا اقصد يا شسمه شنو لون

ريم : هسه اني حموت وهاي دتسولف بهيج امور كافي

روان : صبري لج .. اي اي ذكرت هذا السيت لون كحلي وخلي حمره حمره وفتحي شعرج الاشقر وخلي يموع الرجال خوش ما اوصيج

ريم : الله كريم بس عوفيني حموت

روان : وموتتاتهم .. يمه رفعي راسج اجه مؤملج يختي

هي كالت هيج رفعت راسي بصدمه
صار هو بوجهي توه ديطب

ضليت اباوع مرتبكه ، وهو ابتسم الي
نزلت راسي لحد ما ايده انمدت لحنچي ورفع راسي بـ ايديه .. وباس راسي

وكالي بـ ابتسمامه : مبروك النه

ابتسمت اله وگلت : الله يبارك بيك يوم الالك

فتحت عيوني بصدمه شنو الي كلتهه ريمم مو وكت الچفصات ابد .. هلكد ما سلموا علية ضلت الكلمه بحلكي ومادري شلون طلعت مني ..

هو اريده يلزم روحه ميكدر وجهه صار احمر ويريد يضحك

ضليت متصنمه وهو مد ايديه ونزل البركع على راسي

واني اسمع صوت المزيقه برا بالطرمه والهلاهل

لحد ما طلعت وصاروا اخواني كُلهم برا متسطرين واني اشوف الحزن بعيونهم بس ياسر جان يبين مو مهتم ويحاول يضحكهم

تقدم اول واحد " أبوية " وكام يوصي بـ مؤمل

محمد : مؤمل هاي ريم سلمتها بـ ايدي الك واني متأكد راح تصونها .. بنتي الوحيده و وردتي اني هسه انطيتك قطعه من روحي .. دمعه من عيونها ما اريد تنزل

ضحك مؤمل وگال : شنو عمي توصيني على ريم ؟ احطها بعيوني مرتي وحبيبتي ميحتاج توصيني
اجوي ورا أبوية الولد

فهد : اسمع لك اختي انطيناها الكك خووش يابهه اذا اشوف ريمه فد يوم زعلانه لو مبجيها لو مضوجها لو شمسوي افصمك فصم سمعت

مؤمل : هسه انتَ دتوصي لو دتتعارك

فهد : اسكت معليك بس خلي حجي مالتي براسك تراا صير محلوه اني لو ما اعرفك خوش ادمي جان ما انطيتها الك اريدك تصونها وتحافظ عليها

مؤمل : ادلل ريم بعيوني اخليها

حسن وكف هم وصاه كل واحد كام يتهدد مو يوصي وهمه يحجون واني دموعي تغرغر بعيوني ..

همام : مؤمل اذا شفت ريم بيها شي وها دقيقه الضرب ياويلك فد يوم اسمع ضارب ريم

مؤمل : استغفر الله عيني محامي همام مو تنكسر ايدي اذا اضربها شو انتوا ما ادري شلون تفكرون

همام : اي نفكر شلون منريد بس مثل مكلت الك

اخر شي ياسر كام يحجي بعصبية وعبالك انفجر بس يضحك كلامه گال

_ والله لو ما معرسين وعرسكم اليوم جان كتلك وهاا والله اني رأيي من راي اخواني شايف ريم اذا فد يوم اشتكت منك من حاجه تعرف شسوي بيك اني ياسر ها لتستهين بية مؤمل خوش واذا اشوفها تبجي اموتكك شني اموتك انهييييك عمي خوش سمعتتت ترا ؟

ضحك مؤمل : لا يابة تتخيلون انتوا تنكسر ايدي اذا أمدها على ريمتي

ياسر : ايي عبالي بس دانبهك اني ترا هاي اختي صح نتكافش ونتعارك بس اختيي اوك الوحيدههه خوشش ديررر بالك عليهاا ولحظه لحظه شكلت ريمتي فهد سمعته يكول ريمتي

فهد : شسويله

ورها اجه بابا حضني اول محضنته كمت دموعي تنزل وبقه يحجي ويايه يهديني

ورها رحت حضنت فهد كمت ابجي حان موقف ابد محلوو جان يكول گال

_ هسه شكو البجي وين رايحه وشوكت متريدين تجين بيتج ثاني هذا ويوميه تجين يمنه وخلي اشوف الي ميجيبج .. وشتحتاجين كولي كافي مسحي دميعاتج

عفته ورحت علئ همام هم حضنته وگال

_شتحتاحين كولي ريم تمام و اذا فد يوم زعلج او سوالج شي تلكينه اربعتنه مسفطين كدامج تمام وطلاكج علئ ايدي خوش خويه

هزيت راسي وضحك علئ گلامه جان يكول مؤمل

_ بيش طالبنه شنو نطلك محامي همام

ضحك همام وگال : كُلشي يصير هاي دنيا

وحضني حسن هم وهم بقه يحجي ويايه لحد ما وصلت الـ ياسر الي صح حجيه كُله ضحك بس احس تكطع گلبي حضني وگال

_ اختي الخبله كبرت وصارت عروس اهخخ بعد ويامن اتعارك و يامن اتكافش منو يضوجني بس يلاا بعد اروح اخذ راحتي شوكت ما اريد اروح غرفة روان ماكو جلب بوليسي يحرسها راح زوج وخلصنه منه

_ ياسر ليش تبجيني

_ هاي شنو طلع عندج مشاعر واحاسيس

گال هيج وضحكت

_ ابقي ضحكي هيج لتبجين وبس يضوجج هذاا كُليلي اوك اختي العزيزه

_اوك اخي العزيز

اخر شي ودعونا والدمعه بعيني وأيدي ترجف لما اسمع حچيهم الغصه متنوصف
صعدنا بالسيارة وتحركت السيارات بعدنا متوجهين للفندق بس محد اجه من اهلي ويانه ..

ومن هنا بديت مرحلة جديدة من حياتي ..

وي الشخص الي 3 سنوات واني احبه الي ما فد يوم راح من بالي اذكر كُلشي شلون ..

جنت اكل بنفسي اكل لأن جنت احس حبي اله من طرف ومشاعري الي تهيج بنص اليل والدموع والبجي ..

وما انسئ الدفتر الي جنت اكتب بي عبارات حزينة عن " مؤملي " ..

اذكر كُلشي بس الحمدالله حبي مراح هيج وطلع هوه هم يبادلني واليوم من احلئ ايام حياتي يمكن جنت خايفه ومتوتره بس جانب مني جان حيل فرحان وسعيد ..

بس جان اصعب شي الي لما ودعت " اهلي "صح اني مرايحه المكان بعيد واكدر بأي وقت اجي اشوفهم او يجوني بس يبقئ شي ناقص هيج احس بخنكة وحصرة بداخلي راح ابتعد عن

ابويه و امي واخواني و مو بس همه روان صديقتي الي جانت اكثر من اخت الي واكفه دائما ويايه بالحلوه وبالمره شقانه كعداتنا سوه بليل ورزان حجيها ولطافتها ويايه .. وبنان الي ماكو مثل حنيته عليه وجانت تعتبرني اخت حالي من حال روان ورزان حشتاق الـ كُلشي

واكيد البيت حيصير بدوني محلو لان اني جنت منطيته طعمه بس شنسوي هاي هيه سنة الحياة ..

اهم شي اختاريت الانسان الصح الي گلبي رهفله واتمنئ ما اتندم بيوم علئ اختياري واكون اختاريت الشخص الصح الي راح يكدر يصوني ومراح يخذلني بيوم من الايام ..

كُل طريق جان حلو والزفه تجننن وهوه كلسع يباوع عليه ويبتسم ومشغل اغاني ومكيف ولازم ايدي حيل شون ديلمحني انو لتخافين ماكو شي يخوف ..

نزلنه للفندق وهوه لازم ايدي وكلسع امه واخته يجون يعدلون بالبدله فوتوني كعدت علئ الجربايه واجت امه شكد حبابه وشلون تحجي ويايه بأسلوب حلو جان تكُلي

_ حبيبتي لتخافين ادري امج اكيد علمتج شسوين بس اني اجيت حتئ اهدئج ماكو شي يخوفج ومتاكده مراح تندمين بقرارج لما اخذتي مؤمل لتخافين

ريم : تمام خاله

_ اي حبيبتي وهاي ليله حلوه لتاخذيها بالخوف والتوتر تمام

هزيت براسي ورها نزلتلي البركع وطلعت واني بقيت انتظر مؤمل يجي احس كلامها هدئني بس بعدها اكو خوفه او بالاحرئ توتر بداخلي ..

وره شويه فات مؤمل اني هنا دكات گلبي عشره عشره .. نزع الستره مالته واجه يمي كعد ورفع البركع

كمت عيوني ما اعرف وي اوديهم اني ريم الي اخش بعيون الاوادم انسحل هيج سحله جان يكول

_ شهل الجمال ريمتي طالعه تخبلين بس الكحل سايح من وره البجي ترا ما ماخذيج للاعدام

بقيت صافنه بوجهه جان يكول

_ متحجين

ريم : شحجي

مؤمل : احسج مستحيه مني

ريم : ايي

مؤمل : يعني مستحيه

ريم : اي والله مستحيه

ضحك علئ كيف وگال : لتستحين سندريلا

ريم : متوتره

مؤمل : من شنو

ريم : ما ادريي ومقهوره هم

مؤمل : ليش

ريم : لان عفت اهلي

مؤمل : هسه علئ هاي ترا بسيطه يوميه اوديج الهم

ريم : ايي و متوتره

ضحك وگال : اذا علئ توتر هسه اخلي يروح

ريم : شلون؟

اشو هذا قرب وجهه عليه وانفاسه طخت بوجهي لو ردت اتخربط جان يلزم راسي بيديه الاثنين وباسني بقوه من شفتي ..

وخر مني وهوه مبتسم گال

_ اي زين طلعتي خوش تبوسين

نزلت راسي وگلت : شنو

ضحك بقوه وگال : ماكوو شي بس تدرين هسه ارتاحيت

ريم : ليش ؟

مؤمل : غير حسيت بطعم شفايفج لان ما شاء الله اخوانج مينطون ياخه للواحد بس بعد وين صرتي ريمتي الي محد بعد يكدر يحجي شي

ريم : ايي

مؤمل : اي ست ريم اخذي راحتج روحي سبحي بدلي تعاي نتعشه جوعانه مو

ريم : مو كُلش

مؤمل : تمام انتظرج روحي بدلي

كمت اني وبدلت فتت للحمام دانزل البدله بس متنزع شكد حاول ايدي متنوش حتئ افتح السحابه بقيت افكر بقهر واحجي وي نفسي

_ شلون حظ الج يا ريم المكروده هسه وكت السحابه اووف هسه اني شجابرني واخذت هيج بدله اووف شراح يفتحه بقيت تقريبا 10 دقايق

جان يندك الباب وگال

_ وين صرتي ريم بيج شي

ريم : هـاا لا مابيه شي

_ تمام بس طولتي

ريم : لا كملت كملت هسه اطلع

بقيت واكفه ملكيت غير حل غير اصيحه وگلت

_ اويي علئ شنو خجلانه

فتحت الباب وطلعت اني وبدلتي جان يكول

_ شو ممبدله شنو عجبتج البدله

ريم : مو شسمه مدينفتح السحابه

مؤمل : يعني صارلج ساعه بالحمام تريدين تفتحين السحابه

ريم : ايي

اجه يمي وگال : بسيطه جان من البدايه اجيتي گلتيلي

نداريت وهوه كام يفتح بالسحابه شو ما اشوف غير حط ايده يتلمس ظهري دينزل البدله اكثر جان الزمها واكول

_ ها شكرا حروح ابدل

دافوت للحمام جرني حيل وحضني ودفن راسه بركبتي قشعر بدني من حركته گال

_اهخخخ يريحتج

كلت بصوت ناصي : مؤمل خلي اروح ابدل

باسني علئ كيف بركبتي وگال : روحي

رحت واني صرت حمره من الخجل فتت سبحت وكملت بقيت واكفه كدام المرايا افكر

البس سيت الكحلي لو لا بقيت صافنه بس گلت يلا عادي ولبسته وعدلت وجهي شويه وحطيت حمره حمره وفديت شعري جان قصير بس بعده ممنشف گلت اخلي هيج احلئ واخذت نفس وطلعت

لكيته كاعد ينتظرني اول مشافني فتح عيونه وكصني كص من فوك ليجوه اهخخ اشوو هذا اجه بسرعه جرني من ايدي وكعدني گال بهمس بس سمعته

_ من دنعل شيب الخلفوج علئ هل خلفه

عكدت حواجبي وكلت : شنو شكلت ؟

مؤمل : كلت منين ابدي بيج

فتحت عيوني وگلت : شنووو

مؤمل : ولج لتحجينن خرب بأخوج

ريم : شبيك مؤمل ليش دتحجي هيج

مؤمل : جوعانه انتِ

ريم : لا

مؤمل : اني هم

ريم : ايي

لزم ايدي وگال : احبج ريمتي

ابتسمت واحس گلبي يريد يطلع من مكانه

مؤمل : حبيتج من يوم شفتج انتِ وكفشتج ريم انتِ تحبيني مثل ما اني احبج

ضحكت جان يكول

_ شكو تضحكين

ريم : تدري من شوكت احبك

مؤمل : شوكت

ريم : 3 سنوات واني احبك ولا رحت من بالي

مؤمل : صدك

ريم : اي احبك هواي مؤمل

مؤمل : واني اموت بيج ريمتي

تقرب عليه وباسني براسي ورها رجع باسني بشفتي بس اقوه من مره ثانيه ورها بحركة سريعه شالني وخلاني علئ الجربايه نصدمت گلت

_ شكوو مؤمل

مؤمل : اشش احبج

اتقرب عليه واجه نام يمي وخله راسه بربكتي وكلسع يطبع قبلاته علئ ركبتي لو وجهي ورها نزع قميصه ووو ..

وهنا جانت من احلئ ايام حياتي وي مؤمل ..

_______________

روان
لما راحت زفة ريم واحنهه مقهورين بس ما حسيت الا ياسر سحبني حيل لان جنت واكفه برا واباوع
سحبني حيل من ايدي باوعتله بصدمه

روان : ياسر شبيك تخبلت وخر ايدي توجعني

باوعلي مبتسم ويحجي ب استهزاء : خطيه يا عيني امشي تعاي

كام يسحبني لسيارته واني اعيط عليه : شبيك ياسر تخبلت وخررر اني اصلا زعلانه منك

ياسر : بعدين نتصالح الله كريم بس اصعدي

باوعت عليه مخنزره : وين وين تريد توديني

ياسر : لج طركااااعه صعدييي

صعدت بسرعه واني افرك بـ ايدي لأن كامت توجعني حيل

هو صعد وبدون ما احد يلاحظ اصلا شخط السيارة ومدري وين ويباوع علية ويضحك

روان : شنو انتَ شبيك منسيت احنه متزاعلين ليش جبتني هااا يلا نزلني وين وين ماخذني

ياسر : اسكتي لا اعرس عليج روان خليني عايش جو اني حزين اليوم ف خلي شوية اغير المود .. بشوفت كفشتج

روان : لا لا ما اقبل اصلا ماعندي كفشه اليوم ما الك حق تعيب يلاااا كلت نزلني

ياسر : ماكو عمي تحمليني غصبا عليج راح اوديج وين بالله نروح مطعم بس لا هسه الكه ولد وانتِ ما شاء الله ماكو شي محاطته بوجهج وشعرج منا لا عمي لا ما اقبل عود من نتصالح اخذج

روان : وشنو الفرق عود ترا هم ما البس حجاب اوك

باوع علية يقلد ويكول : ما البس حجاب شو سكتي حبيبتي

روان : يااااسر نزلني نزززلني

ياسر : انجبي سايق عندج نزلني جا شني غير اني رجلج دكاااافي خل نتصالح عوفي خبالج وطنكوراتج على صفحه أنتِ متتحملين شقه واني انسان لطيف واحب اتشاقه مدنتفاهم هسه بسبب هل شي وبس

روان : ايييي ما طول تعرفني اني هيج شكو لعد تحجي هيج كدامي

ياسر : هسه اني شمدريني عاد لترجعين تحققين الموضوع صارله فوك الاسبوع

روان : اي اي ما احقق اصلا رأيي ميهمك

ياسر : لا يهمني بس أنتِ متتفاهمين كله عراك وعركات وعياط شنو هايييي

روان : ها متريدني طلكني من هسه مدام بالبدايه

ياسر : روان راح تنكتلين خليني فرحان وجايبج ودنتصالح

درت وجهي بزعل : اي

ياسر : على كيفج وياي عمي شسويت اني وهيج تطنكرين علية

روان : خطيه مسويت شي يا عيني

اباوع عليه نظره متشتت يباوع للشارع ويرجع يباوع علية ويضحك

اخر شي كام يحجي واني مسوية ما اهتم اله ودايرة وجهي بزعل

انمدت ايده من كدامي وشغل اغنيته وصار يغني وياها ويضحك ويباوعلي

تورط گلبي في حبك تورط
تخربط نومي في ليلي تخربط

كام يهز براسه يمين ويسار ويضحك : الف شمال الف يمين

احبك كني صار سنين .. اجه حبك مثل تهديد
دقيقه واحد وتسعين

كال اخر كلماته وايده لامست ايده

شالها وباسها وكال : احبچ عمي

روان : ادري

باوعلي بطرف عين ومبتسم گال : دباع الغرور

التفتت اله متحملت انفجرت ابجي

طبك السيارة على صفحه واني ابجي اول مرة اصير بهيج موقف وأكره هيج يصير بية وما ابجي كدام أحد ..

بس اليوم بزواج ريم حسيت تراكمات صارت علية وانفجرت بهل موقف الي سواه ياسر

أندار عليه يمسح دموعي علئ كيف گال : رواني .. طركاعتي .. ام كفشة القوية المتبجي ليش تبجين عمري انتِ اني مأذيج ترا والله ترجعين للموقف بايخ ويضحك مو مال زعل .. ليش تبچين كافي قلبي لا يتحمل

كمت امسح بدموعي بسرعه وبلكوه اسكت نفسي حتى ما ابجي بعد مسحت دموعي وهو گلي : هلكد ضايجه مني ؟

كلت بسرعه واني امسح دموعي : لا لا والله مضايجه بي مادري شبية اني اكره ابجي مادري ياسر ما ادري

ياسر : لتبچين انتظريني رواني هسه اجيج دقايق

حجيت مستغربة : وين رايح

ياسر : انتظريني هسه اجيج

نزل من السيارة واني التهيت اسكت بروحي وامسح دموعي ومكياجي راح .. تذكرت ريم من نريد نبجي واحنه ممكيجين تكوم تعيط علينا وتكول يخرب المكياج

ثواني واجه بيده موطات اثنين ام الككو

بدل ما ابجي هلمرة ضحكت حيل گلت : يمهه متنساااا

ياسر : شعبالچ عمي اني ياسر هيهيهيهي وين اكو زوج مثلي .. هسه تصافينا

روان : الحمدلله تصافينا

انطاني الموطه وهو يضحك : اهم شي موطة الصلح

باوعتله بضحكة وگلت : من يَسورتي بعد وام الككو لا لا هيج هواي

ضل يضحك ورجع شغل الاغنيه ويباوعلي ويغني
لحظات متنوصف اني اعيشها بحب وسعاده وي ياسر
كلت

_خما عيوني حمره

ياسر : انتِ وين بجيتي شو بس شوية ومسحتي دميعاتج عبالج ما ادري بيج متحبين تبجين كدام أحد بس قبل هل مرة كتلج هذا شي مو عيب واني مو واحد غريب اوك

باوعت بقهر وكمت احجي : مادري هواي صارن علية ماتحملت وبجيت

ياسر : عوفي البجي ما احب البجي اني كملي الموطه مالتج عمي

روان : اوك

بقيت اكل بالموطه وهوه باقي يباوع عليه جان يكول

_ مسحي موطه علئ شفتج عميي

دامسحها گلت : ها نمسحت

هوه كام يضحك وگال : دمسحي عدل لو اجي امسحه الج اني بطريقتي بس ها اني مو مثل المسلسلات التركيه البطل يكول للبطله مسحي وهيه تكعد تفر حلكها فر وبالاخير متمسحه بعدين يجي البطل يمسحه الها بمنديل

روان : ايي لان انتَ مو مال رومانسيات

ياسر : لا هاي ما مقبوله منج جرحتي مشاعري هسه اشوفج رومانسيه الاصليه

روان : لا لا داده اشاقه وياك اني انتَ ابو الرومانسيه

ياسر : مو خاف متعرفين رومانسيتي خلي اشوفها الج

روان : لا والله مشكور ميحتاج

ياسر : يلا عادي بعدين اشوفج رومانسيتي ايام طويله

روان : اي اي

______________

بنان
خلصت الزفه وراحت ريم فصعدت للغرفه مهدود حيلي تعبانه وبطني رجعت التقلصات واني اريد بس اخلي راسي علئ المخده وانام رحت بسرعه سبحت وطلعت حتئ شعري ما مشطته رحت تمددت بس اول محطيت راسي علئ المخده راحت النومه كلها ..

بقيت صافنه وافكر بحجي ليان ونظراته الي وخايفه تسوي شي بأبني ..

اجه فهد فات واجه تمدد يمي وحط يده علئ راسه انداريت عليه وگلت

_ شبيك فهد احسك ضايج اذا علئ ريم ترا عادي قابل وين رايحه وتكدر اي وكت تجي و نروحلها

فهد : لا مضايج علئ ريم بالعكس لو ما اعرف مؤمل خوش شخص جان ما انطيته ريم بس اعرف شكد يحبها

بنان : لعد بعد شكو ضايج

فهد : مابيه شي بس شويه تعبان

بنان : تدري فهد

فهد : شنو

بنان : خايفه علئ طفلنا حيل خايفه لا ليان تسوي بي شي

فهد : لتخافين هسه مو جنت جوه هم تعاركت وياها بس هيه صلوات شلون عين صلفه بس كالت بعد ما اجي يمها ولتخافين بعد متوصلج لتخلين حجيها بالج

بنان : ما ادري بس شويه خفت لسوي شي وخاصة اني حيل تعلقت بطفل صح بعده ما اجه بس ما ادري

ابتسم وگال : احساس الامومه غير

كمت ابجي باوع عليه مصدوم عدل كعدته وگال

_ شكو تبجين شبيج

امسح بدموعي وگلت : تريد صراحه اني خايفه اخسر طفل

فهد : ليش تفاولين عليه

بنان : ما افاول بس والله اخاف اذا صار شي بي اني اموت

فهد : اسم الله ان شاء الله ميصير شي لتخافين ولتفكرين هيج ميصير

بنان : واذا خسرنا

فهد : كُلشي يتعوض بس لتفكرين بهل طريقه هسه يجي طفل مدحدح حلوو مثل امه

ضحكت وگلت : وسبع مثل ابوه

فهد : بس خاف يطلع ابو دميعه مثلج

بنان : لا لا ما اريد هيج يصير

ابتسم وگال : لعد مسحي دموعج لا تعدين الولد شتريدين يصير سبع وابو دميعه وين صايره هاي

بنان : مسحت دموعي هاهيه تمام

فهد : اي عفيه شطوره

رحت دحست نفسي بحضنه وهوه هم حضني قوي گلت

_ زين فهد سؤال

فهد : جواب عيوني

بنان : فرضاً الجنس طلع بنيه تفرح لو لا ؟

فهد : شلون ما افرح اكيد افرح

بنان : يعني تفرح نفس فرحتك للولد

فهد : طبعا كلهم خير وبركة اني ما اهتم ابد اذا جان ولد لو بنيه افرح بالاثنين

بنان : زين تتوقع ابنه يشبه منوو

فهد : يشبه ابو اكيد

بنان : وليش ميشبه امه مثلا ليش ابو

فهد : اي غير اني ابو يشبهني اني

بنان : واني امه خلي يطلع حلو عليه

فهد : لا عليه

بنان : فهدد شنووو مااا عليهه

ضحك وگال : هسه اني شمدريني يطلع عليج عليه نفس الشي

بنان : اممم

فهد : اشاقه وياج خلي يطلع عليج صاك

بنان : هسه احلئ شي لا يطلع عليه ولا عليك

ضحك وگال : هاي شني وين صايره شلون ميطلع علينه غير احنه اهله

بنان : ما ادري اووف بكيفي احجي اني

فهد : مطفيه غير

بنان : تعبانه فهد

فهد : تعاي ابوسج حتئ يروح التعب

بنان : فهدد

فهد : عيون فهااااد

بنان : شبيك بس تقلد عليه كُل ما اكول فهد تكولي فهااااد

فهد : لأن انتِ هيج تحجين تكوليها بطريقه مايعه

بنان : اهوو ترا ما احجي بطريقة مايعه اني

فهد : شو كولي فهد

بنان : فهدد

ضحك وگال : فهااااددد

بنان : اهوو انتَ ناصب عليه

فهد : لا ولج بس انتِ تكوليها بطريقة مال واحد يبقئ يعظعظ بيج

هوه يحجي واني رحت بسابع نومه ..

_____________

ريم
كعدت الصبح هوه صباحية عرسي بدلت حتئ نرجع البيتنا .. فرجعنه اني ومؤمل من الصبح البيت كله نايم لان رجعنه من الصبح حيل فرجعنه نمنه ورها كعدت ..

رحت بدلت حتئ احضر نفسي لبست فستان بسيط لون اوفوايت وحطيت مكياج خفيف ..

جان يطلع مؤمل من الحمام واجه يمي ولزمني من خصري وباسني من خدي وگال

_ شلونها عروستي

ريم : زينه وانتَ

مؤمل : هم زين

ريم : يلا تعال ننزل اهلي علئ جيه هم

مؤمل : اخوانج يجون لو لا

ريم : ما ادري بس يمكن تجي بس ماما والبنات

مؤمل : اي تمام صدك مكلتلج

ريم : كول

مؤمل : عمتي سُميه اجت اليوم

ريم : اي هلا بيها

مؤمل : اي بس راح تبقئ فترة بيتنا بس حبيت انطيج علم

ريم : اي عادي حبيبي

مؤمل : افديج تعاي ابوس حلكج الي ينطق كلمة حبيبي

دفعته علئ كيف وگلت : وخر مؤمل كافي مو حمرتي تخرب

مؤمل : اوييي تخرب وخرت وخرت شكد تتنعوصين

ريم : اني اتنعوص

مؤمل : لا اني

ريم : اممم مراح احجي هسه شي لان ما اريد نزاعل من مصباحية عرسنه بس غير مره حزعل وحطول زعله بعدين تتعود عليه حياتي انتَ فديتك وهسه خلي ننزل

لزمته من ايده اباوع علي ذاب من لزمة ايدي ضحكت وگلت

_ يلا ننزل حياتي ابتسم ابتسامه طلع سنونك البيض الحلوات

نزلنا جوه وجان اشوف خاله واسيل و شفت بعد بس اكو وحده معرفتها مره جبيرة وكاعده لازمة سبحتها بس معالم وجهه تعلن عن الشر المهم

نزلنه واستلمونه بالهلاهل وبوسوني وباركولي ورها مؤمل راح واجيت كعدت جان تكُلي هيه هاي المره گالت

_ انتِ اسمج ريم مو

ريم : اي خاله

_ وخلخاله تخلخلج شني خاله هاي كولي عمه اني عمة مؤمل سُميه

مردت اسوي مشاكل فـ ابتسمت وگلت

_ اوك عمه

سُميه : اوك شني هاي كولي صار صار بنات هل وكت اوك اوك

سويت نفسي مسمعت وسكتت جان تباوعلي من فوك ليجوه جان تكُلي

_ بس لو اعرف شحب بيج مؤمل

ريم : عفوا

_ سلامتج اي كُليلي شتعرفين متعرفين حتئ تشيلين البيت شيل شنو بس اسمج جنه

ابتسمت ابتسامه وگلت : والله ياخاله احم اقصد عمة كُلشي ما اعرف اني اصلا ما اعرف اشتغل

سُمية : هاي شنو كُلشي متعرفين

ريم : مع الاسف

سُميه : صدك نيشانج وين خلي نشوفه نتأكد

ريم : عفوا تتأكدين من شنو؟

سُميه : شنو من شنو نشوف بنيه لا

ريم : لا لهنا وبس خاله مدري عمه شنو هل حجي ترا اني ترباية اهلي مو قطعت قماش عليها دم تحدد اني شنو وعيب هيج اسئله هل شي بيني وبين زوجي مؤمل شي خاص بينه

سُميه : وشبيج عيني اكلتينه شكلنه

ريم : ايي هوه هيج وحتئ مؤمل ميقبل ونيشان يم مؤمل وميقبل ينطي لحد وبس عيب هل اسئله هاي

اباوع عليها كامت تهز بيدها معاجبها واني ولا همني كعدت بس اوزع ابتسامات مبيته بدايتها وياي شر ما انطيها مجال تجاوز اكثر ..

بقيت شويه لحد ما اشوف ماما والبنات جايات رحت كمت من يمها ورحت كبل حضنت ماما والبنات وسلمت عليهن واجن كعدن يمي نسولف
وستلمتني ماما گالت

_ ها شلون بارحه جان

تنهدت وگلت : يمهه شنو هل اسئله

رحاب : شسئلتج غير خايفه عليج

ريم : لتخافين كلشي تمام

روان : خاله عوفيها خطيه تستوحي

ريم : انتَ شرايووود

بنان : والله البيت محلوو بدونج ولو شوفين كعدنه كلهم مدلغمين فهد والولد

هزيت بشعري وگلت : طبعا مقهورين غير ريمتهم راحت وصار البيت كئيب

روان : اهخخخ بارحه نمت وحدي بالغرفه بدونج

ريم : اي علمود تحسون بقيمتي اهخخ بس

رزان : ايي خما تأذيتي بارحه

ضحكت وگلت : صايره جريئه ولج رزان

رزان : شسوي الانسان يتغير

روان : عوفيها هاي صايرة سرسريه ايهم فسدها جان صوت مينسمع منها

رزان : اوييي عوفوني

روان : اي احجيلنه شلون جانت ليلتج

بنان : انجبي روان عيب شنو هل اسئله

روان : اهو شكد معقده يعني زوجت وو حيجيها طفل وبعدها معقده

بنان : مو معقده بس شويه مستحه

ريم : يابه عادي .. باعي تريدين صراحه جانت ليلة جميله جدا مع مؤملي

روان : ايي وشصار

ريم : بوسه علئ حضنه علئ امممم

روان : كافي كافي لتكملين افتهمنه ما احب سوالف حبجيات عبالي تكافشتوا شي اكشن طلع بس مشبعج بوس وحضن

ريم : اي شنسوي

بهل اثناء اجت خاله ام مؤمل گالت

_ ريم بس انطيني الكلينس من يمج

گلت بتنعوص : ادللي خاله هاج

اشو ما اشوف غير اجتني ضربة علئ جتفي من روان گالت

_ ايععع دخيلج ريم لتخليني اكرهج شهل تنعوص

ريم : شبيج ايدي

روان : ابوس راسج بس لتصيرين مايعه هوه هذا جنت خايفه من صار

ريم : لج شبيج بس هيج كدام الاوادم

روان : نشوف نشوف

بنان : اكلج ريم هذيج المره منو من اول ما اجينه خازرتنه

رزان : اي والله صح حتئ اني انتبهت

ريم : ولج هاي عمة مؤمل اسمها سُمية اول ما اجيت استلمتني ولا تكولي وين نيشانج خلي نشوف انتِ بنيه لا

بنان : عزاا شنو هل عقليات

روان : ايععع هاي طلعت مو سُميه مسمومه

ريم : اي والله مسمومه بس اني سكتتها ولا احلئ شي اني شغلت عقلي كلتلي تعرفين تشتغلين لو لا كلتلها لا حتئ شنوو لا تكرب عليه شغل لان مبينه متحلفتلي

رزان : ليش راح تبقئ هنا فتره

ريم : اي والله راح تبقئ

روان : لعد اكلتي نعل فشنو لتنطيها مجال تغلط وياج مردعيها تمرعد واذا صار شي انتِ بس صيحيني اني امردعها الج

ريم : اي اي اعرفج كفوو

بنان : يمهه يمهه منجن

روان : انتِ ابقي يمهه ويمهه شكد فاهيه

رزان : ترا بنان مو فاهيه بس انسانه مسالمه

روان : وهاي طبعها فادها لا

بنان : اووف يا اخي كافي مشاكل شكد تحجون بالمشاكل

روان : ايي ادللي هسه شنغير موضوع اكلج رمروم

ريم : ها

روان : عود صدك الشغله نفس جكة الابره

شو منشوف غير بنان كرصت روان وگالت

_ انتِ شلون بيج انجبي عاد

روان : اويي مو كلتي غيري الموضوع

بنان : وتغيري لهل مستوه

روان : هسه قابل كلتلها شرحيلي هيه بس سؤال

بنان : ولا تتغيرين

روان : بس تتغيرين انتِ عود افكر اتغير

ريم : ولجن كافي وحدتجن السان الدلالات اسكتن

روان : عوفيج من هل معقده تعالي سولفيلي

____________

بنان
بقينه كم ساعه يم ريم وهاي ورها اجه ياسر اخذنه وهم سلم ورجعنه للبيت ..

رحت كعدت بالصاله جان فهد كاعد وهمام وياسر
وما شاء الله الوجوه مكلوبه علئ اخوتهم وطبعا اول موصلنه استلمونه شلونها ومدري شنو وفهد متخبل كلسع مؤمل يخباره يكُله ترا زوجنا اني واختك ريم صارت ريمتي بعد ما اجيبها الكم وهوه يتخبل ويطنكر بزايد ..

المهم رحت كعدت جان همام يجي يمي وگال

_خويه بنان اكلج

بنان : تفضل

سد تليفونه فهد وگال : شتريد

همام : داحجي وي بنان انتَ شعليك

فهد : اني وياها نفس الشي احجي شتريد

همام : ربي صبرني سمعي خويه تذكرين هاي الممرضه الي اسمها مَي

فهد : هاي الي كلسع تكول هـا و هـا

همام : لتعيب عليها اي بنان تذكريها

بنان : اي اذكرها

شو منشوف غير ياسر عاط وگال : منو هاي عصير

همام : شنو عصير

ياسر : مو انتَ تريد مي مدري عصير

همام : اهوووو اقصد مَي مَي

ياسر : هاا واني عبالي عصير اي منيه هاي عمي

همام : هاي ممرضه

ياسر : هاا هاي الي حاط عينك عليها

فهد : حلوو حلوو

همام : انجب لااا ماكو هيج شيي بس هيج معليكم وثاني شي شعليكم المهم بنان تذكريها

بنان : ايي

همام : انتو شفتكم حجيتوا هيج فشنو تريدين انطيج رقمها وتحجين وياها وتتعرفين عليها وصيرون صديقات وهيج

جان يجاوب فهد وگال : لا

بنان : ليش فهد ترا البنيه حبابه

همام : فهد شبيك تراا اعرفها البنيه خوش بنيه لو مو خوش ما اكول البنان تتعرف عليها

ياسر : ولك فهد ليش تقطع قسمة الولد

همام : انجب ياسر

بنان : ترا عادي فهد واذا اراسلها

فهد : لاا بنان

همام : مو وكت غيرتك خويه عيني ترا بنيه مو ولد بنيه بنيه بنيه

ياسر : بأختصار راح تراسل انثئ رقيقه

بهل اثناء جان تنزل روان من الدرج وتكول

_ ها منو الانثئ الرقيقه

اباوع علئ ياسر وجهه انكلب الوان جان يكول

_ شنو منو شكو

روان : ترا سمعتك منو هاي التحجي عنها

ياسر : رواني شبيج تعاي اكلج منو

روان : بعد لتحجي ويايه ياسر

صعدت روان فوك وياسر ديروح يلحكها جان يندار علينه ويكول

_ اشتعلوا اهلكم بنفط ونار والله ياخذك همام يا جلب هسه هاي شلون افهمها

فهد : انجب لك مو اكوملك

ياسر : ميحتاج سيادة الضابط روان راح تكفي وتوفي بالكتله

همام : الله يساعدك خويه

فهد : اي بنان متراسلين احد

همام : اهخخ شبيك غيور ترا بنيه بنيه بنيه يا عالم ياناس بنيه والله مو ولد

بنان : عفيه فهددد

فهد : خوش

همام : عفيه بسيادة ضابط المهم بنان حنطيج الرقم وانتِ راسليها كبعا صارلنه فتره منحجي اني وياها المهم راسليها وعود انتِ اي ردتي مني الرقم مو اني وانتو تعرفوا وهاي تمام

بنان : تمام

اخد تليفوني سجل الرقم جان يكول

_ وماوصيج خويه مدحيني يمها صبغيني شكد متكدرين

فهد : هاي انتَ مسحول سحل ظاهر

همام : اهخخ خويه اهخخ المهم بنان ما اوصيج

بنان : ادلل

_________

روان
اول منزلت من الدرج سمعته هيج يحجي بسرعه رحت وصعدت فوك جان يجي ويلزمني ويكول

_ شبيج روان

روان : خير شتريد

ياسر : تراا افتهمتي غلط

روان : اوك عوفني روح للانثئ الرقيقه

ياسر : ولج طركاعه افتهمييي خلي امسلت

روان : يلا يلا مسلت

ياسر : هاي اقصد علئ عصير

روان : تضحك عليه انتَ يا عصير

ياسر : اقصد مَي مَي

روان : منو هاي

ياسر : هاي وحده همام حاط عينه عليها فشنو هسه ديريد بنان تراسلها وهيج بس نسيبج فهد غيور فاني كتلها ترا راح تراسل انثئ وانتِ اجيتي سمعتي ومصدكين تجين سوين مشكله و سحليني كالعاده

روان : هاا هيج زين شكو تكول انثئ رقيقه تكدر تكول غير شي

ياسر : شسوي بعد گلت هيج ليش دورين المشاكل دواره

روان : ما ادور بس انتَ تستفزني

ياسر : وانتِ متتفاهمين

روان : ايي عوفنيي

ياسر : يابه شكدد تحبين المشاكل المهم تعاي اكلج

روان : خيرر

ياسر : انتِ ليش هيج حلوه

روان : هسه يلا دريت

ياسر : اي والله

روان : هاا هيج يعني

ياسر : شوكت نعرس رواني

روان : هوه انتَ بس تريدنه نعرس

ياسر : اكيد واريد اسوي عرسنه بالقاعه حتئ نذب لحم علئ راحتنه ونركص اني وياج

روان : احلامك حلوه يلا وخر خلي اروح

ياسر : غصباً معليج واذا مو برضاتج اخذج كوه خوش

روان : لا والله

ياسر : وداعت كفشتج

روان : مادام كلت بداعتي كفشتي صدكتك

اشوو هذا بسرعه لطني علئ حايط وباسني حيل بشفتي بدون اصلا ميسوي وضع استعداد دفعته حيل وگلت

_ ياسر هاي شنو شبيك تخبلت فرضا احد مر وشافنه وليش هيجج سويت

ياسر : يمهه مو شفه طركاعه طركاعه

روان : وخررر مني يمي مو هيج

ياسر : بعد بعد شايفه

روان : ايي عوفني وبعد لتعيد هل حركة محلوه

ياسر : خوش عود اجرب غير حركات وره زواج

روان : شكد ادبسزز

ياسر : عساس انتِ شلونج

روان : اكرهك

ياسر : اموت منج عوذه اي والله

روان : اشوف تزوجك لعد

ياسر : كطيعههه اشو البنات الحليوات ماليات الدنيا وكفت عليج انتِ

روان : اي مو هيه بس ثوله تقبل بيك

ياسر : واولهم انتِ

روان : تدري صدك اني وحده ثوله وعوبه لان قبلت بيك

ياسر : بعد هاهيه عمييي ماكووو تراجع

روان : اههخخخ منك

ياسر : مو تنسين لتقفلين الباب مال غرفتج الجلبه البوليسيه وراحت اجي ان يمج انام خوش

ضحكت وگلت : شتسوي تجي تحرسني

ياسر : شكد عرمه

روان : من زمان حوبييي

ياسر : نزول عليج

روان : دروح روح

____________

بنان
كاعده بالليل ضايجه واحس اشتهيت مثل ذيج المره

فهد كبالي كاعد ع لابتوب ويشتغل
رفع راسي يباوعلي شوية ويرجع يكمل

لحد ما كلي :- شبيچ بنان ؟

جاوبته : احس مشتهيه ليمون

فهد : اي موجود يمكن جوا دقيقه اجيبلج

بنان : لا لا اوكف مو بس ليمون

فهد : شنو برتقال حجيب الحمضيات كلها بهيج حاله

بنان : لا لا لا بس عليك الله لتضحك خوش

ابتسم وكال : ديلا كولي عاد

بنان : ملح فوكاه

ماشوف غير كام يضحك ويهز بـ ايده : غير تنسا هذا شنو شلون مالح وحامض شلون يصير

بنان : مادري مادري حباب جيبهن وتعاي بسرعهه

ضحك وجاوب : لج خاف تتسممين شلون يصير هيج

بنان : ميصير بية شي بس جيب وتعال فهدد بسرعه بسرعههه

فهد : لك اوي يلا فهاااادد

بنان : فهدددد

طلع وهو يضحك ويقلد : فهاااااد شبي فهاااد

ضحكت على ضحكته بعدين احس انقهرت لان ديعيب علية بأعتباره

اجا وحسب الطلب جايب ملح وليمون
باوعت عليه واني ضايجه

فهد : شبيج معبسه قبل شوية تتمضحكين

بنان : من وراك غير

فهد : شبية شسووويتت

بنان : غيرر انتَ تعيب علية كل ما اكول فهد تكول فهاااد

فهد : شسوي غير انتِ هيچ

بنان : لا والله اني هيچ ؟؟؟؟

فهد : اي جا منوو

بنان : وخر زعلت وهاك اليمون والملح ماريدهن

فهد : خرببب شلون هرمونات حتخبل تعايييي يمعوده ، هذني شنو تعاي اكليهن

بنان : ماااا اكلهن انت

فهد : هو منو ياكل ذني بس المخبل ترا

بنان : عزااااا اني مخبله

فهد : لا لا مو هيج قصدي يعني المخابيل الي مو حامل مثلچ

بنان : بس اني اريد اكلهن بطلت ماريد قصدك مخبله

فهد : مو هيج اقصد خرب شلون شغله هاي يمعوده لا تطلع وحمه بأبني .. شتطلع وحمه صفره وين صايرة هاي

بنان : ضل ضل قلد انتَ

فهد : درابين گلبي تعاي غصبا عليج تاكليهن

جريت الماعون منه وكلت : مو علمودك علمود اليمون والملحح

فهد : لككك فهاااد

بنان : ها يعني متستسلم

فهد : تؤ دكلي المالح والحامض واذا يصير بيج شي اني معلية

بنان : ترا كلشي ميصير بية لان هاي جاي اتنسا

ضحك وكال : دكلي اكلي حروح اكمل الشغل الفوك راسي

______________

مَر شهر كامل .. دخلت بالشهر الخامس ونص وبطني بدت تكبر وفهد يقلد عليها

لحد ما يوم من الايام .. فهد قرر ياخذنا لحديقه وهيج العصر

ريم خابرتنا وكالت فهد مخابر مؤمل وراح اجي هم كلش فرحنا

بهل مده علاقتي تطورت كلش بـ مَي وسوالفنا صرنا صديقات حيل واكيد بعلم فهد

لحد ما همام كلي اعزميها وهاي واحجي وياها ومدري شنو ف قررت اخابرها واعزمها ويانه تجي هم تتونس وهم اشوفها
دكيت عليها رأسا جاوبتني

مَي : يا هلا بنون شلونچ

بنان : تمام أنتِ شلونچ

مَي : اني زينه شلونه الطفل

بنان : زين يسلم عليج

مَي : هـا ؟

بنان : زينن يسلم عليج

مَي : بعد عمري مشتاقتلج

بنان : اني الاكثر اكلج مَي

مَي : هـا

بنان : باعي احنه العصر راح نطلع لحديقه وكلنا موجودين حتى رزان وروان وريم كلنا يعني فـ عادي تجين ويانه حبابهه ..

نهاية البارت
يتبع ..

(لاتنسوا التصويت)

أن شاء الله يعجبكم البارت وبال 5000 كلمة 💖

7.nldn حسابنا الأنستا

إلى اللقاء يا أعز العابرين في قلبي ♡.

الكاتبات دينا & نور