قارورة الـ مُخلد

الحلقة |3|

ڪاتبة | زينب صلاح
في | قارورة الـ مُخلد

♥♥♥♥♥♥♥♥♥♥♥♥♥♥

مࢪيم*

يوم عادي مثل بقية الايام والروتين البنات راحو رحله وبقت يمي بس نغمه، وعصرونيه سوينه چاي وڪليجه وڪعدنه نتعلل..

ولدي وجابر يمي ونسولف ونضحڪ، طلع جابر باڪيت الجڪاير مالته ومن شاف قلته ڪال..

-بويه قُتيبة جيبلي جڪاير من ابو يوسف

-صار بويه.

راح قُتيبة بس اشو الولد تأخر لا ساعه لا ساعتين ماڪو دز جابر مهيب وراه يشوف وين صار الثاني هم غط قرابة الربع ساعه وهٰو ابو يوسف هياته بظهر بيتنه مو بعيد..

شوي وهجم مهيب الوجه احمر والدمو؏ عشرة عشرة جابر ڪان بيده استڪان الچاي وڪع من ايده وطفرله يرجف..

جابر- ولك بويه شبيك احجي؟

مهيب- يوسف يڪول سيارة ضربة قُتيبة وابوه اخذه للمُستشفى بويه.

مريم- يممممه وليدي راح ولك اخوككك ويننن؟!!

جابر- وين هسه هٰو؟ اهدي يا ام مهيب خلي نفهم

مهيب- ما ادري ما ادري اتصل ؏ ابو يوسف

رفع جابر تلفونه وبأول رنتين رد الطرف الثاني...

جابر- وين انتم هسه ابو يوسف.. قُتيبة شلونه؟.. جاي جاي مسافة الطريق

مريم- طمن ڪلبي يا ابو مهيب فدوة اروحلك

جابر- حالته حرجه امشي بويه

مريم- وينن اخذني وياك اشوف وليديي

جابر- ويننن اخذج ويننن وبناتج من يجن وين يرحن فڪري بنغم مو شوفين الطفلة فحطت من البجي..

عافني وراح وڪلبي محترك ڪعدت ادك والطم خلوني بناري وراحوا، وبنص صريخي ولطم الحوارين التمت وبناتي ما اعرف يمته وصلن واني فاقدة..

بعدها حسيت الدنيا طفت بعيني وڪُل شوي افز وارجع اغفه واحس السُڪر ارتفع، ؏ وجه الصبح فزيت وطلعت واشوف ابو قيصر حاضن همسه من كتفها ويسولف وياها وبصفه ولده قيصر ومُخلد شلون جايب وياه ثنين من ولده لا همه يطيقونه ولا هٰو يطيقهم..

غير اب واولاده عجيب امرهم!!

ㅤㅤㅤㅤㅤㅤㅤ

همسه*

امشي خطوة وارجع عشرة وخواتي عافني وراحن واني بعدني متسمره مڪاني اباوع لبيتنه تتعالى بي الصرخات وصوت امي يرن ويتردد بمسامعي ومو متحمله صدمه..

شهڪت ولزمت الباب اسند نفسي واني اشوف امي دك وتلطم وتصرخ وخواتي داير مدايرها يبجن اريد اعرف شصاير بس خوفي ڪتم ؏ انفاسي وعقد لساني..

اريد اجمع جُملة مفيدة ماڪو..
تقدمت وڪعدت ڪدام امي اريد افهم نزلت دموعي وهمست بصوت ما اظن سمعته وهي بهاي الحالة..

همسه- شـ شصار؟؟

مريم- راححح رااح وليدي من ايدي ولڪم اريد ابني جيبولياااااا..

اغمى عليها من التعب والصريخ ساعدني النسوان ونقلناها للغرفة وهي بعدها تون اني وخواتي وحده صافنه ؏ الخ ما نعرف شصاير حتى الجوارين يڪولون اجينه ؏ صوت الوالده ومحجت شي..

وابوي وخواني ما همه اجه الليل واخخ ڪانت اسوء ليلة نمر بيها لان نسوان وحدنه بالبيت وامي تڪعد وتصرخ وترجع تتخربط والنوم ما شفناه بعيونه..

شڪد صليت ودعيت ربي يفرجها ويه طلوع الشمس خواتي قفلن ونامن من التعب، سديت الباب وطلعت للحديقة ڪعدت ؏ الڪرسي وضميت رجليه لصدري ودموعي تشرح
كمية العجز الي محاوطتني بهاي اللحظة..

اباوع للسماء صافييييه والغيوم بيها شحلات الجو بس ڪلبي معصور، زقزقة العصافير ويه صوت الرياح الاجواء هاي ڪانت ڪفيلة تخلي جسمي يسترخي واسد عيوني..

وبين ڪاعدة ونايمه اسمع صوت شوي شووي بده يتوضح
الباب ڪان يندك حطيت شال ؏ راسي وشفت الساعة بثمانيه حيللل هاي شلون نمت بدون ما احس ؏ نفسي..

همسه- منو؟

-عمج ابو قيصر اني بنيتي

فتحت الباب وشفت عمي خالد وابنه قيصر واڪف خلفه ومن بعيد شفت مُخلد صف السيارة واتجه النه نهديت بالبجي وعمي ضامني لصدره ويمسح ؏ راسي..

خالد- اهدي بويه ماڪو شي وين امج؟

همسه- شنو صار؟ وماما ڪُل شوي متخربطة

خالد- ما تدرين شصار؟!!

مُخلد- لا بويه جانن برحله بس عجيب عمتي ما حجت!

ردت اجاوب واجه صوت امي من باب الغرفة..

مريم- لا ما يدرن شلون صار ابني ابو قيصر؟

خالد- هلا خويه اطمني سبع ما بي غير العافية

مريم- بداعت وليداتك!!

-وروح المرحومه ام قيصر هياتنه اجينه من المستشفى عنده شوية رضوض وضربه براسه اخذوله اشعه والحمدلله صاح سليم ڪم يوم يبقى بالمستشفى ونسويله خروج..

همسه- ؏ منو تقصدون؟

خالد- قُتيبة

همسه- ليش شبي قُتيبة؟

مريم- وداه ابوج يجيبله جڪاير وضاربته سيارة

همسه- سوده بوجهي عمو فدوه نڪدر نشوفه؟

قبل لا يجاوب عمي طفر مُخلد..

-عمتي ممڪن تروح بس انتن لا شعدجن بالمستشفى وانتن بنات

-تره اخويي اريد اشوفه

خزرني وڪال..

-روحه ماڪووو يومين ويطلع اخوجج

همسه- يمهه فدوة اخذينه

مريم- حجي ابن عمج صح وڪافي سڪتي! تفضلوا خويه

خالد- زاد فضلج ام مهيب بس جهزي هدمه للولد وجابر اخذهن وياي

امي ما ڪذبت خبر اخذت جنطة حطت بيها هدوم وحمت الغده مال امس لان ما طابخين وسوت شوربه ؏ السريع وبدلت وطلعت وياهم وهي توصي لا تفتحين الباب لا طلعن يمج مواد وسوي غده لخواتج اني ما اطول..

سديت الباب ودمعتي طفرت هم قهر ؏ اخوي وهم تعب رحت سويت الغده وخلصت والبنات بعدهن نايمات اني هم من التعب وما نايمه ذبيت نفسي مثل الميته..

ما اعرف شڪد وقت مر ڪعدت ؏ صوت راما..

-همسه ڪعدي امي وين؟

-اي عمري ڪعدت اوفف راسي

طفرت اسل وشوي رجعت بيدها براسيتول وڪلاص ماي..

-هاج شربي

اخذتهن وشربتهن ودخلت اية ناڪعه بالماي ولافه المنشفه ؏ نغم وهاي تضحڪ يمه شحلاتها دبدوبه وضحڪتها ماليه وجها..

اية- ولج شصاير ما تحجين امي وين؟

حجيتلهن الاعرفه مختصره الحادثه وهذن نفجرن بالبجي واني وياهن ؏ الواهس..

مر وقت وڪمت مسحت دموعي..

همسه- يله ما بي شي ؏ شنو البجي يلاا حبيباتي اصبلڪم غده

مر اليوم وبالليل اجت امي وصلها قيصر وراح وطمنتنه انُ ما بي شي وحجه وياها وباجر يطلعونه..

اليوم الثاني مر وبالليل اجه قُتيبة بس مڪدرنا نشوفه الجيران وقرايبنه والبيت صار هوسه رغم ڪلبنه النار ؏ شوفته بس تحملنه تقريبًا لـ ١١ ونص فض البيت وڪلها راحت..

طڪينها رڪض للدوانيه بس شفناه مدد وراسه ملفوف ورجله مجبسيها طگيناها بجي ونحضن بي ونبوس..

قُتيبة- بويه اختنڪت وخرن خربب بليسجن

اية- الاحول فوك ما خايفين عليه

اية ڪُلش تحب قُتيبة وهٰو ڪذلك متعلق بيها واطباعهم متشابهه لذلك هي اڪثر وحدة تأثرت بخبر الحادث بس ما بينت حزنها طبعها قوية وما تنزل دمعتهابسهولة هية حتى عشه ما تعشت واڪلها قل بهاي اليومين..

همسه- شلون صرت حبيبي

قُتيبة- اروح فدوة للحنينه بخير لا تخافين

اسل- والله اني ما خفت ادري بيك بزون بسبع اروح بس ذن جنهن ارامل ڪاعدات ويعون

ڪفخها مهيب ؏ راسها وڪال..

-مو انتِ ما عندج احساس فطبيعي لا تقلقين

راما- يي والله حسيت قطعة من ڪلبي نڪطعت من ڪالت همسه

قُتيبة- ماڪو شي عدت سلامات الا ابوي وامي وين؟

مهيب- ابوي تعب حيل وراح ينام وامي يمه

قُتيبة- ونغمه؟

همسه- تعبت حيل ونومتها، ڪول انتَ محتاج شي جوعان تعبان يوجعك شي؟!!

قُتيبة- والله اريد انام نعسان حيل

مهيب- اساعدك نروح للغرفة؟

قُتيبة- لا ابقى بمڪاني مرتاح

طلعن البنات ومهيب راحن ينامن واني عدلته لفراش وتأكدت انُ مرتاح بمڪانه الا طلعت وصار بوجهي مهيب..

همسه- هاا وين؟

مهيب- ابقى يمه ما ارتاح انام وحدي خاف يحتاج شي ومحد يمه

-زين تسوي، يلاا تصبح ؏ خير

-تلاڪين الخير حبيبتي

عفته ورحت نمت..

بعد هالشي ما صار حدث مُهم وڪُله روتين يومي واني شديت حيلي للامتحانات وهمات ادرس قُتيبة لا ثالث وبڪلوريا مرت شهرين وقُتيبة شال الجبس وارتاح منه..

اول شهر جان رمضان بس ما حسيت بي السنه لان اغلب وقتي لو ادرس لو ادرس قُتيبة..

بدت الامتحانات وامتحنه وخلصت ؏ خير وبالنسبه الي مجاوبه بس متوترة..

بيوم النتائج ڪعدت يمه مهيب اني ؏ اليمين وقُتيبة ؏ اليسار ظل يطلع ويسوي شوي وابتسم وڪال..

-عفية قُتيبة ناجح بمعدل 81

قُتيبة من الفرح ظل يهلهل خربنه عليّ من الضحك بس خطية يستاهل فوك تعب الحادث ورجله مڪسوره نجح بهذا المُعدل..

مهيب- هاا هموسه اڪول

همسه- فدوة مهيب احجي شمنتظر!!

- معدلج 99.5

راد يغمى عليّ من الفرح ظليت اطفر وارڪص وابوي حاضني ويبوس براسي ويڪول..

جابر- دڪتورتي بنيتي وفخري الف مبروك

حاضنته وابجي من الفرح وامي تهلهل فرحانه بيه حسيت ڪلبي راح يوڪف من الفرح، ابوي سوالي حفلة تخبلللل بالبيت وڪُله جاهز وعزمت صديقاتي..

مر اسبوع ؏ الحدث هٰذا ودخل ابوي وياه عمي خالد وقيصر ومُخلد واخوتهم التوءم امير ومُنير بس شنو ينڪطون هيبة وڪلهم لابسين اسود حتى قيصر رغم شڪله مو ذاك الجمال وحقنه ودومه عافس وجهة بس الصراحه تنڪال هيبة وثڪيل..

تعالت الاصوات واحتد النقاش بينهم بس ؏ شنو ما افتهمنه..

ڪُلنه طفرنه بخوف من طلع مُخلد وصاح بعالي صوته..

مُخلد- والله ثُم والله وروح امي اڪلب عرسڪم عزا واخلي الدم للرڪب اذا سويت الي براسك يا يابه وڪُل الزين تعرف مُخلد اذا ڪال ڪلمه ينفذها لو انتَ تصير بوجهي

خله وطلع عافهم ذابينها صامت شوي وطلعوا وقبل لا يطلع همس قيصر..

-يابه ابنيه بنفس اخوي تحرم عليّ حرمة اختي خلي النفس طيبة والقرار لعمي ابو مهيب اڪيد

خالد- ان شاء الله خير

طلعوا وابوي ودعهم ورجع ڪعد بالحديقة ويمه مهيب وقُتيبة امي ڪعدت بصفه وحجت..

مريم- شنو قرارك ابو مهيب؟

جابر- القرار بيد بناتي والله محتار هالشوفين الولد طلع دمه محترك ومُخلد خوش مُخلد ابو وڪفات ورجال ونعم النسب

مريم- هياتهن ڪدامك احجي ڪُل ما طالت السالفه خربت

جابر- اية وهمسه تعالن يمي زُجاجاتي

خايفه تقدمت ڪعدنه ابوي من الجهتين ڪُل شوي وباس راسنه وذب حسرة تشڪ صدره تنهد وڪال..

جابر- من سميتجن زُجاجاتي تعرفن شنو! يعني اي وحدة من هالزُجاجات الخامسةانڪسرت انڪسر انه بويه ڪُل وحدة من عدجن معزتها بڪلبي ڪبيرة يا بابا اني اريد افتح وياجن موضوع وتسمعني للاخير وانطيجن مهله تفڪرن وترجعلي خبر

هزينه راسه علامة قبول تنهد وڪمل..

جابر- قبل وفاة زوجة عمجن بفترة وصتني وصيه وهاي الوصيه انُ اية لـ قيصر هي من زمان عاجبتها وتريد تخطبج بس ماڪو فرصة والمرض اخذ وقتها وانطتني هالوصية والوصية لازم تتنفذ يا بابا بس اني هم ما اڪدر اجبرجن ولا اضغط عليجن والله شاهد من ذاك الوقت لهذا الوقت عايش بين نارين ومحتار واريدج يا اية تفڪرين وترجعيلي خبر بهااي اليومين!

ارتاحيت من عرفت مو اني المقصودة بس نعصر ڪلبي واني اتذڪر ڪلام قيصر ومُخلد يعني هٰو يحبها لـ اية؟؟؟

واباوع لـ اختي وجهة صار اصفر وعيونها تلالي بالدموع وتهز راسها موافقة، دار راسه وباوعلي وكمل..

جابر- وانتِ يا بابا مُخلد طلب ايدج ؏ سُنة الله ورسوله واني من جهتي موافق بس القرار قرارج ترفضين تقبلين اني وياج

همسه- ليش مو توه تعارك ويه ابو علمود اية؟

جابر- لا بابا عمج غير الوصية وڪال الجبيره للجبير والصغيرة للصغير يعني رادج لـ قيصر واية لمُخلد بس هٰو رفض واني هم رفضت لان بناتي مو لعبة ڪُل يوم مبدلين يا يثبتون ؏ وصية ام قيصر الله يرحمها يا مالهم قسمه عندي

يمممه احس ڪلبي شدله وصله ويهز عزااا يعني الي سوا علمودي تعارك ويه ابو علموديي ياربي اوفف متحمسه وخايفه بنفس الوقت ڪلبي ڪارصني من ناحية مُخلد احس راح يأذيني رُغم الولد ما شفت منه الا ڪُل زين..

بالليل ڪعدنه واية صافنه والدمو؏ تنزل ومن نحاجيها ما ترد حتى ؏ العشه ما ڪعدت وابوي من شاف الوضع هم ما تعشه وطلع مقهور..

الوصية صعبة وبنته صعبة وواڪع بين نارين..

اسل- انتِ شنو رأيج همسه؟

همسه- بشنو؟ قصدج مُخلد!!

اسل- اي شنو موافقة؟

همسه- والله ما ادري مشوشه وخايفه بنفس الوقت من الموافقة

اية- بس هٰو يحبج!

ابتسمت اول مرة شارڪتنه ودموعها بعدها تنزل تنهدت وجاوبتها..

-شمدريج حُب! وبعدين اني ما اعرفه واليوم شفتن عصبيته هاي اذا اصير ڪدامه براشدي اصير بالفتحة السابعه

راما- ههه لا ولج والله احسه لطيف ڪُلش وسبورتي ما شفتي بالمدينة وهسه تلڪين ابو داس بطنه من رادج لـ قيصر

اسل- عني والله يفوتج وڪامل والڪمال لله.

همسه- شدراج بي ڪامل ولج

اسل- هاا مو سمعت مهيب يڪول لامي انُ مخلص لُغات ودائمًا يطلع خارج العراق وعنده محل يخص التلفونات وما تابع الها وبعد هوايه حجوا بس ما لحڪت اسمع

راما- يااي هذا لو تزوجتي احدث تلفون وسفرات وڪذا ما شاء الله

اسل- وبعدين ليش رافضه تره يحبج

همسه- نجبي شدراجن يحبني

راما- صراحة نظراته بالمدينة ڪافية تشرح مشاعره لو من ڪان يتعقبنه برأيج ليش؟

همسه- مو مهم الحُب مو ڪُلشي وحتى لو وافقت اطول فترة الخطوبة واتعرف عليه ما عجبني افسخ

اية- زينة العقل وبرأيي

همسه- وانتِ شقررتي؟

اية- همسه خايفه والله شفتي لـ قيصر شلون عاڪد النونه ليل نهار واصلًا مو حلو تدرين بطبعي انتِ اريد شريك حسب مواصفات ببالي

همسه- والله اني وياج عاڪد النونه واحسه معقد بس مبين مثقف وهادئ جربي فترة خطوبة

اية- بالحالتين اتزوجه ما اڪدر اخلي بابا محتار اڪثر

حجت هيج ولفت نفسها بالبطانيه ونامت واحنه همات طشرنه..

وبعد تفڪير طويل اخذت قراري وان شاء الله بداية خير علينه واڪيد احط شروطي..

اية*

الخبر ڪان صاعقة ونزل ؏ راسيچ وما عندي فرصة الرفض مثل همسه، ڪرهت روحي وجمالي الجابلي مصيبة مثل هاي..

شفت البنات نامن بس همسه شوي تأخرت مبينه تفڪر وبالها مشغول رُغم اعرف انُ هي تحبه بس متخوفه من الفڪرة..

وڪعت من اول ما تبده العصير عليّ وباللقاء الثاني بغرفته بيوم فاتحة امه زاد هٰذا الشعور داخلها وڪان حُب متبادل الحمدلله رُغم محد معترف للثاني..

وڪلت امري لربي ونمت..

مرن يومين وابوي طلبنه للديوانيه اني وهمسه اول شي سأل همسه..

جابر- هاا باباتي شنو قررتي.

همسه- موافقة بس..

جابر- ڪولي بنيتي

همسه- بابا عندي شرطين

جابر- اسمعهم!

همسه- اول شي اڪمل دراستي واريد الخطوبة ما تقل عن ست اشهر

جابر- دراستج هٰذا شرطي قبل شرطج وبالنسبة لمدة الخطوبة انطيهم علم والله ڪريم

همسه- تمام

جابر- شايفه الخير بنيتي

باس راس همسه وهي هم باست ايده وراسه وهمست..

همسه- بوجودك تچايتي

ابتسملها وباوعلي اتسعت ابتسامته وڪرص خدي وڪال..

جابر- يي باباتي شنو قرارج

اية- موافقة

جابر- ما عندج شروط

اية- مثل همسه دراستي وتمديد الخطوبة

جابر- خلص متفقين شايفات الخير..

بابا خابر عمي ڪدامه واخذ وعطى بالڪلام سداه وحجه ويه ويه قيصر ومُخلد بعدين باوعلنه وڪال..

-مُخلد يڪول غير اربع اشهر ماڪو وبالتالي قيصر نفس القرار..

همسه- انتَ شنو رأيك بابا؟

جابر- تدرين مُخلد راد خطوبة هٰذا الاسبو؏ ونهاية الشهر زواج وبالڪوه اقتنع هسه ما اظن يقبل وعن رأيي المماطله ما بيها فائدة

همسه- تمام موافقة

اية- الي تشوفه بابا..

جابر- ؏ برڪة الله الجُمعة المشيه مال الزلم والعقد

يتبع...