قارورة الـ مُخلد

الحلقة |2|

الڪاتبة | زينب صلاح
في | قارورة الـ مُخلد

♥♥♥♥♥♥♥♥♥♥♥♥♥♥

همسه*

فتحت عيوني واحس براسي مصد؏ واشخاص يمي واصوات واني مو فاهمه شي والوشه الي بأذني بعدها مستمرة وشوي شوي بدت تتلاشه واول جُملة التقطتها مسامعي بصوت احن انسان لـ ڪلبي..

جابر- زُجاجتي بنيتي اسمعيني شو كعدي باباتي هديتي حيلي.

-بابا!

-بعد ابوج وحيله ڪُله وياي.

-ايي

رفعت جسمي وابوي شربني ماي وامي كاعدة يمي تمسح ؏ شعري وتبوس براسي ودموعها تصب ؏ خدها وراما تباوعلي بخجل واسل ونغم يبجن بصفها..

رفعت ايد امي وابوي وبستهم..

-ما بيه شي هياتني كدامكم بس شوي تعبت.

راما- لا بابا مهيب ضربها.

-شنوووو!!!!!

خزرت راما وباوعت لابوي الي الا شوي ينجلط من الهبطة حبيبي شلون خايف سوده بوجهي، مسح ؏ ايدي وكال..

-شنو سبب بابا احجي؟

-بس تسمعني للاخير ولا تعصب منه فدوة

-ڪولي بنيتي؟

-شوف بابا من بداية السنة الدراسيه لاحظنه انا وراما سيارة تتعقبنة و...

بديت اسردله ڪُلشي بدون ما اكذب او اغير شي لحد اللحظة هاي واشوفه يتفاعل وياي والصدمة والخوف تتضح ؏ ملامح وجهة بس بالختامية مال اليوم شفت الغضب بعيونه وتمتم بغلطة خلتني احمر خجل..

-لاه يا سـ***

ابوي يتحفظ ڪدامنا ما يغلط حتى اخواني محذرهم بس لاول مرة تصير..

ما اشوفه غير طفر صحت بي يوڪف وماكو وامي لزمتني ما خلتني الحگه تخاف اتخربط من جديد بس بالي يمهم..

شوي وتعالت الاصوات وبعدين خمدت ودخلت اية اول ما شافتني رڪضت وحضنتني..

-خوفتيني عليج يا روحي

-من التوتر صار هيج

-صحيح الحجاه مهيب؟!!

-ليش شحجه؟

-يڪول صارلجن فترة ؏ هاي الحالة!

حجيتلها مختصر ؏ الي صار بالفترة الاخيرة وما اشوف غير شهڪتها الحذبت انتباهنه ڪُلنه وحتى امي وهي تمتم..

-معقولة مُخلد!!

رجف ڪلبي وبالڪوه نطقت..

-شبيه مُخلد؟

-ولج غير جان هنا من اغمى عليج وهسه من طلـ؏ ابوي دفعه وڪله شعندك ولك تلحك بناتي وهسه من سولفتيلي ربطت الاحداث..

ظلت مصطكه بمكاني وارجف من الخوف رغم الاعجاب الاكنه لـ مُخلد بس الخوف طغى بهاي اللحظة وخفت يحجي لابوي شي ويلفق تهمه الي ويضيف بهارات لقائنه بغرفته بيوم الفاتحة!

فززنه صوت مهيب..

-شنو هٰذا الحجي؟

اية ظلت تمتمت واني بلعت لساني خفت، ومن تقدم بحركة لا أرادية رجعت للخلف ولزمت بامي وڪف هوَ موسع عيونه متفاجئ من حملتي هاي بس قسم بكتاب الله كانت لا اراديه لان اني بعمري ما متعرضه لضرب من احد او صوت عالي وهاي المرة الاولى صادفت غضب مهيب..

مسح وجهة بثنين اديه وعاد سؤاله، نزلت راسي وجاوبته..

-ما ادري اني والله ما اعرف شي.

قُتيبة- ميخالف حبيبتي هسه يطلع ابوي ونفهم منه.

مهيب- لا تخافين اريد احاجيج.

ڪالها وتقدم بعد ما هزيت راسي علامة قبول اله ڪعد ؏ طرف السرير وتقدم وباس خدي الي ضربني عليه وڪال بأسف..

-والڪفل زينب مو قصدي بس من خوفي عليجن واني اشوف الڪذب بعيونجن ما سيطرت ؏ غضبي!

باوعتله بغصه ونطقت..

-ليش بس اني راما جانت وياي وهم كذبت، ليش بس اني ضربتني.

شهڪت..

راما- تردينه يضربني؟؟

-لاااا بس اريد افهم ليش وحدي ضربني ليش ما حاسبنه سوه لو لان انتِ توؤمه

مهيب- وداعت امي وابوي مو لان تؤمي بس من شفتها باوعتلج عبالي مسويه شي وجابرتها تسكت

-هههه ومن استنتاج عاقبتني بهالشكل ما خليتلي احترام ڪدام اخوتك حراام عليك اني هم اختك مو بس رامااا

-اختي ونور عيوني والله

-ما احبك بعد

-يهون عليج ابوي ضربني!!

-شنوو يمته!

-قبل شوي من طلع وعرف ضاربج

-سوده بوجهي والله حاجيته ما يعصب أذاك؟؟

هز راسه واشر ؏ خده وفعلًا كان احمر تقدمت وبسته بخده ما اشوف غير اية تصفك ايديها وتغمنه..

اية- غسل اي والله عود مزاعلين

مهيب- عليمن هاي ولج؟

-؏ راماا ام دميعة

-لسانج يحكج

-شتسويله مثلًا؟؟

-اكصه بنعال

طڪيناها ضحكه ؏ وجه اية الاحمر لان ما تڪدر ترد عليه وهي اعصاب نار طلعت تضرب رجلها ؏ الارض بڪُل قوة، باوعلي مهيب وهمس..

-هاا صافي يا لبن؟

-والله اذا عدتها بدون ما تسمعني وتنطي مجال ما اباوع بوجهك يا مهيب لو تصير روحي بيك

-هذا هوَ غالي والطلب رخيص

نسد الموضو؏ ومحد فتحه حتى بعد طلعت مُخلد من البيت بس احس ابوي زادت حيرته وصفناته ڪثرت ومشت ايام وراحت ايام والسيارة او بالاحرى مُخلد ما رجع يتعقبنه..

وفجأة وڪعنه انفلونزا كُلنا بس اني عندي امتحان وبكلوريا وصعب ما كدرت اغيب مثل خواتي واخواني..

جابر- يلاا بابا اوصلج بطريقي

-بابا اترك الشغل اليوم ما بيك حيل

-لا بابا ضروري اروح يلاا استعجلي

وصلني وبوسني وترك مصرف بيدي وراح اباوع الظهره ومشيته هيبه وشحلاته من يمشي ايده ما توڪع من السلام ڪُلها تعرفه وتحبه لان طيب وما عنده غش وطمع ويه الناس وڪفاته حلوة..

دخلت وامتحنت واحس جاوبت بس مو ذاك الجواب درجتي لا بأس بيها..

مر الوقت بين الدراسه والتعب وطلعت للبيت بس شنو ارجف ما متعودة وحدي ڪُل يوم صوت اخوتي وضحڪهم ماليني..

اثناء شرودي وتفكيري شخطت نفس السيارة بصفي لو اني متت بدمي واشوفه ينزل بهيبته ويتقدم الي نزع نظاراته واكلني بنظراته اكل..

مُخلد- شلونج؟

ما جاوبته وجسمي يختض مثل السعفه لزم ايدي وراد يسحبني للسيارة وحسيتها اشارة علمود احس ؏ نفسي..

دفعت ايده ورجعت خطوتين للخلف وهمست..

-شـ شتريد؟؟

-صعدي بالسيارة احاجيج

-ماا اريد اروح للبيت

-ما اڪُل بشر وجلالة الله ادري ليش تخافين مني؟

-فدوةة تعبانه اريد اروح للبيت

-يندار بيه تعبج صعدي اوصلج ما اسويلج شي

-اروح وحدي

حجيت بسرعة ومشيت بدون ما اباوعله شوي وحسيت ايدي نخلعت من السحبه مدري اني حسيت هيج من التعب..

ونيت بوجع وشفته عگد حواجبه وتساءل..

-اذيتج؟

-عوف ايدي

-صعدي بابا اوصلج بطريقي واني اصلًا جاي الڪم

الخوف ترس ڪلبي سحبت ايدي ونطقت..

-شتريد من بابا؟

-مو شغلج وامشي تعبتيني

-بابا ما يقبل!

هز ايده وطلع تلفونه وفتح السبيكر وصلني صوت تچايتي..

جابر- هلا وليدي

مُخلد- الله يساعدك عمي بس رايدك بطلب.

-تفضل وليدي

-اني اجيتك علمود موضوعنه وشفت همسه بطريقي والواضح مريضه وما تقبل اوصلها بس رايدك تقنعها وڪُلشي بعلمك يصير

-مُخلد خو ما بيها شي تحتاج دڪتور؟

-لا ما اظن بس راحه والشمس دك بينه هههه

-يلاا اخذها ودير بالك عليها واذا شفت حاجة لدڪتور اخذها واتصل عليه

-صار تدلل عمي اخذ راحتك واني ارجعلك العصر

-ان شاء الله

غلقه ورفع حاجبه بمعنى هاا بعد ما بقالج عذر وفعلًا اضطريت اصعد ويااه بس ڪان يتعمد يمشي بطيء علمود يتأخر واني ڪلبي صار طبل من التوتر والخوف الي ما اعرفله سبب..

ڪان يسرق نظرات مني واني اتجاهل..

وبعد مد وجزر وصلنه ومن ردت انزل قفل الابواب ايدي جمدت وجسمي تشنج وظهري اله حسيت بأنفاسه خلفي بشڪل قريب ڪُلش الا شوي ابجي من الخوف..

همس..
-لهاي الدرجة خايفة مني؟

-هاا

-تخافين مني همسه؟

-اريد انزل

-جاوبيني

ڪالها بغضب ولزم ايدي وفرني عليّ وخزرني خزره رعبتني..

-احجي!

-ما ادري

-شنو؟

-ما ادري ليش اخاف منك هيج احساس داخلي ما يريد قُربك

-مو حظي خر* ادري بنفسي

-مُخلد؟

-شريانه الابهر

-هاا

-ڪولي

-شتريد من بابا؟

-هههه فضوليه باباتي

-ايع

-ولج

-تريد تڪُله ؏ موقفنا بالغرفة؟

-استغفرالله شجاب هاي ؏ موضوعنا!

-لا مو خاف فاهم الموضو؏ خطاء

-لا خطاء ولا صح مالج شغل بموضوعنا اني وعمي وطمأني ولا تخافين!

-زين ڪلي شتريد منه وطمني؟

طڪها بضحڪه لدرجه فحط من الضحك وعيونه دمعن باوعلي ورجع غطى وجهه وبس اكتافه تهتز افف ضوجني شبي هذا تخبل..

-ضحڪني وياك!!

حجيتها ورفعت حاجبي اله من باوعلي عيونه نزلت لشفايفي وبلع ريگه ورجع حط عينه بعيني حسيت ڪلبي راح يطفر من صدري، تنهد وفتح قفل السيارة وحجه..

-طلعي!

-هاا

-ولجج اصحي وطلعي لا نندهر

بسرعة طفرت من السيارة ورڪض للبيت دخلت بدون ما التفت واباوعله حتى..

من رجع ابوي من الشغل اجاني ملهوف يطمن عليه وللعصر رجع مُخلد ودخلوا للدوانيه ونسد الباب ودار حديث بينهم بالهمسات وبعد ساعة كاملة طلع مودع ابوي و؏ هاي الجيه مر اسبو؏ عطلت بي..

لان راح تبدي امتحانات نصف السنه شديت حيلي ودرست وتجاهلت ڪُلشي مشت الايام وبدت الامتحانات ودائمًا اشوف مُخلد بسيارته بعيد عنه بس ما يتعقبنه مجرد يشوفني من بعيد وحسيت تعودت ؏ وجوده..

خلصت الامتحانات وكنت مطمأنه دخولي للبكلوريا لان مجاوبه وان شاء الله اخذ حق تعبي بالايام الي فاتت..

نقطعت ڪُل الاخبار بيت عمي ابو لـ مُخلد وحتى هٰو بعد ما اجانه واني شبه تناسيت الموضو؏ حتى اجه اليوم الي بالصدفة تعديت من باب الدوانيه وجذبني صوت ابوي والحديث كان يدور..

جابر- اني انطيت ڪلمة صح بس اجبر بناتي لا اخذهن بالسياسة وان شاء الله يقبلن لڪن حاليًا ما اڪدر افتح موضو؏ حياتي مثل هٰذا وياهن انتظر يخلصن السنه واحاجيهن

سڪت ابوي واحس جسمي يرجف شوي ورجع حجه..

جابر- ليش الاستعجال ما بقه الا القليل وغير هالڪلام ما عندي..

سڪت يستمع للطرف الثاني ورجع حجه..

جابر- خلص بويه متفقين في امان الله

رڪضت ودخلت للغرفة وعقلي افتر من الڪلام هٰذا شنو قصده بابا شنو الموضو؏ الغامض هٰذا الي يخصنه ومتسترين عليه وينتظرون الوقت المناسب حتى يفجرون القنبلة..

ما حجيت شي لخواتي وسڪتت لان ما راح يتغير شي غير يتوقعن احداث ويفرن راسي بالزايد..

راح يوم واجه يوم والروتين ممل..

بدت المدارس والحمدلله ناجحه ودرجاتي ڪُلها تسعينات، واخوتي ڪلهم ناجحين..

باخر فترة قلة الدراسه وخلصنه الڪتب اقترحن بنات الصف نروح رحله بيناتنه بالبداية ترددت بس لڪيتها فرصة اطلع من ڪأبة السادس..

اقناع بابا ڪان مو سهل بعد توسلات طويلة قبل اروح بس رجل خواتي ؏ رجلي واصلًا اني ڪنت راح اخذهن هم يتونسن وهم وياي..

حددنه اليوم وڪُل وحدة منه سوتلها اڪله او حله مُعين اني سويت ڪيك ڪُلش طيب وسويت لـحم بعجين..

حددنه اليوم الي صادف يوم جمعة ورحنه لمدينة الالعاب فرشنه ؏ الارض وڪانت اللمه حلوة بس الي خربها وجود اخ وحدة من صديقاتي ڪانت عينه زايغه ويبصبص والڪُل لاحظ وتجاهل...

اني ما اهتميتله، راحن البنات ڪصن باص للسفينه ولان اخاف المرتفعات فضلت ابقه مڪاني بعد ما اطمن من روحت الولد ويه اخته..

قريب منه ڪانت اڪو عائلة عندهم بنيه ايه من الجمال بحيث الشمس عاڪسه عليها ومجرد النظر الها يرد الروح وطول ما اني اباوعلها ابتسم..

-نسوي وحدة اذا عاجبج؟

طفرت من مكاني وباوعتله بخزره شو هٰذا ضحك الحقير غافل البنات ورجع..

-استحي ؏ نفسك وعوفني

-شسويت هسه اني سألتج بس

الحجي ويااه ضايع عفته ومشيت ما احس غير سحبني لصدره اريد افلت منه ماڪو ودموعي ظلت تنزل وشهڪتي شڪت صدري..

-عوفنييي

-نحجي او انطيني رقمج؟؟

-حقيررر عوف جاي اڪول

-ليش الغلط مو شفايفج يتوصخن

-يا ربيييي عوفنييييي

حاولت عالجت ردت ما عافني رفسته برڪبتي بطنه ودفعته ابتعد متوجع بس ما طول راد يرجعلي وما احس غير شخص وڪف حاجز بيناتنه وصوت الراشدي رن بأذني..

صفريت من شفته مُخلد واخو صديقتي بالارض ونزله رفسات بطنه خلاه يرفس وجع العالم تجمعت وبعدته واني اختنڪت بشهڪاتي باوعلي لعيون حمر ودمارات ڪصته ورڪبته طافره من الاعصاب..

اخذ ايدي بأيده وسحبني وراه ومن الخوف ما نطقت بشي، كعدني ؏ كرسي وراح ما ادري وين دقيقتين ورجع بيده بطل ماي فتحه غسل وجهي وشربني بس شفايفي يرجفن نصه تبده عليّ..

سد البطل وحطه ؏ الطاولة الموجودة وفرك وجهه بغضب ڪان لازم اعصابه بصعوبه علمود لا يخوفني اڪثࢪ..

قرب ڪرسيه وطلع من جيبه محرمه وڪعد ينشف وجهي رفع ايدي وطبع عليها بوسه وهمس..

مُخلد- ڪافي رجيف عيناي ماڪو شي

همسه- مُخلد لمسني الحقير وحجه ڪلام مو حلوو خرب فرحتي

- معليج منه انه اربي وداعت ڪُل دمعه نزلت بسببه بس اهدي

-والله فشله من صديقتي

-ليش؟

-مو اخوها وانتَ ضربته

-يولي عاار چـاا مو فشله من حط عيناه ؏ صديقة اخته؟

-خاف يقلب السالفه ضدي؟

-حتى اشك حلڪه

-هههه شتسوي هنا؟

-روحي هنا

-شلون؟

-مدخلج

-هففف شڪد اڪرهك من تڪول مو شغلج مدخلج ميخصج

-شوف العرمه تڪولها بوجهي

-اي احسن مو من وره ظهرك واخذ سيأتك

-امطر حسنات منيلي سيأت مڪرود

-لا تغير الموضو؏

-مو جاوبتج

-شوكت

-مو شغلج شسوي هنا

نرفزني ڪُلش فخزرته ما اشوفه غير عضلي اشفه وتقرب هامس بصوت يجننن..

-هالعيون شلون املها
سحر ذوبني بغزلها
بوسه من عندك حبيبي تسوه عندي الدنيا كُلها

اخر شي لزم ڪلبه وغمزلي واحس بوخت من الخجل والحياء ظلت اباو؏ لڪُلشي عداه شوي وڪام..

مُخلد- خمس دقائق وراجع لا تتحركين من مڪانج

-وين؟

-عيناي بدون اسئلة هسه ارجع

ترڪني وراح والخمس دقائق صارت عشرة والدمو؏ ظلت تلمع بعيوني..

لمحته من بعيد لو احس روحي رجعتلي وبصفه خواتي بس احس اية راح تنفجر والضوجه لبوجه راما واسل تقرأ الفف..

استقبلتهن بلهفه..

همسه- شبيجن حبيباتي منو مضوجن؟

خفت لا اخو صديقتي هم مضايقهن، بس فاجأتني اية من حجت..

اية- يمته تبطلين بجي وتاخذين حقج بيدج بله مُخلد ما جان موجود شجان راح يصير؟

راما- اية اهدي وانتِ همسه بيج شي؟

اسل- والله لو موجودة جان سحلتتتته من شعفته الخايسه

عرفت مُخلد حاجيلهن ومن باوعتله الاخ مسترخي وحاط رجل ؏ رجل ونظاراته لابسهن والجڪارة بيده تنهدت وحجيت..

همسه- مصار شي جان الخطاء مني ڪان لازم اروح وياجن وما ابقى وحدي

اية- رغم نسحل وعاشت ايدك مُخلد بس بعدها ناري ما طافيه.

اباوعله ربت ؏ صدره تلث مرات بمعنى ممنون وسعت عيون وحجيت بذعر..

همسه- شسويت؟

مُخلد- جرت اذن بسسيطة علمود يعرف الله حق وره البنات الي يتحارش بيهن زلم تڪسر ظهره

همسه- هففف شسويت؟

اسل- راشدي بوكس رفسه الي يعجبج

همسه- وانتن فرحانات؟

اية- ڪتلج عاشت ايده

تذمرت وزعلت منهم ولا واحد عبرني واشوفه منطلق ويه خواتي سوالف ليڪول يعرفهن من زمان ولا ڪأنه اول مره..

خوب اية لا هاي حڪاية ثاني تضحك وتسولف وياه وتتشاقه منطلقة بڪُل قوتها..

جبرنه هٰو يرجعنه وما ڪدرت اعترض بس ترڪنه ؏ مسافة شوي عن بيتنه وراح مشينه واشوف باب بيتنه مفتوح وناس متجمعة رجفه لزمت ڪلبي وحسيت رجليه بعد ما يگدرن يشيلني...

يتبع...