««هجران وحب»»
««بقلمي عاشقة القرائة»»
الماهمة اهتمامي سقط حقة..
بعد يحلم دقيقة ابالي يبقة..
اريد اليسهر ويتعبلي ويذوب..
عندي الحب اعلة گد المشقة..
««يحيى العلاق»»
..
عهد
صافنة بجهة الاتصال بلواتس وعيني متركزة علة اخر ضهور الة قبل ٣ شهور بتاريخ ٢٠٢١/٩/٢٢ يوم لسبت
وهسة احنة بشهر ١٢ ليوم ٢٥ بي وسلطان ماله اي خبر
كل الي اعرفة هوة طلع بمهمة سرية وهيج مهمات متعودين علي هوة وسلام مرات يغيبون ٣ شهور ٥ بدون ميتواصلون ويانة بس هاي لمرة لاولى الي اهتم بيهة لغياب سلطان احس مخنوكة حيل ومابية ابجي اذا شافوني شكللهم ابجي علة سلطان ليش هاي اول مرة يغيب
تذكرت اخر موقف بينة من اجة جابلي لفون مالي
وزار ايسر ثاني يوم من شال لنهوة عني
جان كاعد بصالة. وتعمدت انزل كدامة بتراك وبدون حجاب جان بفكري اريد اشوفة بعدة يضوج من يشوفني بهيج لبس بس فاجئني من ما انطة اي ردة فعل بس سحب لفون ونطانياه
وسئلة بابا عن ميس كالة.. طلگتهة وهسة يم اهلهة.
وماكعد ربع ساعة يم لولد وكام طلع
بيومهة كولش نقهرت شنوو بعد ما اهمة وهيج تصرف مادري ليش جنت حابة غيرتة علية احس نفسي انغر مادري اشوف نفسي علي من احسة مهتم وغيران علية.
هاي ال ٣ شهور جانت صعبة علجميع.
ايسر مريض من يوم لعافتة زهراء. وماما تعبانة بسبب اخواني تكول انهجمت بيوتهم.
بس متكدر تلوم ايسر علسواه تخاف ينقهر ويخسر صحتة.
ومنا اسر وتبارك مدري شبيهم. كلما يريد يحدد موعد لزواج ترفض وتاجل وهوة متخبل
بيتنة. صار مابي روح من طلع منة جسور رغم كل سبوع يجي يمنة يوم كامل بس ماشبع منة.
بدينة سنة دراسية وهل مرة سادس علمي صعب وماخذ كل وقتنة بدراسة. وصعب ويريد حفض هواي واني هاي لفترة تعبت من لتفكير بسلطان احس صاير بي شي مدري هيج حساس يجيني وبذات لان كل مهمة سرية يروح بيهة يجي مصوب اقل شي طلقتين مضروب بس كلة برجلة لو بيدة بكتفة بس مرة وحدة تصوب ابطنة قبل سنتين وصل للموت لان اصابة خطيرة.
وهوة من لنوع لمايهتم لروحة علة كولت سلام يكول يذب روحة بلموت
يكول مرة طلعت ويا بمهمة وية ما شنينة عليهم لهجوم ندور وين سلطان ماكو.
ندحج ونشوفة. قتحم لمبنة وحدة وفناهم فني بس تصوب طلقتين بكتفة
وهيج اني خايفة علي حتة مرات اكول احسن سحب لنهوة عني لو يريد نتزوج وهوة هيج شغلة واخاف اتعلق بي ويكتلو وارجع اكول لاعمار بيد الله لو يريد يموت من لطلق جان مات من زمان
بس يمكن اني لان تعلقت بي ولكيتلي شخص اتمشكل ويا وهسة راح مفتقدتة بس كل ما اصلي ادعيلة ربي يردة بسلامة علاقل احجي ويا خاف زعلان مني
........
تنهدت بضيق هاي مو اول مرة يسويهة. اكثر من مرة الكة طلبية اكل باسمي بلوكر بس كل فكري وسام لو فدك يدزوهة ما عبالي ايسر وكل مرة اريد اسئل وسام انشغل بشي وانسة اسئله.
سديت لتلفون وطلعت حتة مادگيت علبيت وسئلت علة جسر
لجو جان بارد. ثلج وبدة ينزل لمطر ولزي مال لكادر لطبي خفيف ميدفي رغم لابسة جوا تشيرت طويل وحجاب بس بردانة كولش كعدت بلممر افرك بدية من لبرد وانفخ عليهن حتة يدفن
تعبانة ونعسانة مابية ابات بلمستشفى ليوم بس مجبورة ماكدر اخذ اجازة. يذلنة بيهة دكتور احمد هاي لمستشفى لنشتغل بيهة هية بلاساس لاهل احمد ابوه وعمامة وحالين هوة لمدير ولمسيطر علمستشفى وحاد سنونة علية لگلب عبالك اني كتلة حبني عفية وبعدين عفتة وهسة جاي ينتقم.
وكفت حتة اروح اكمل شغلي بغرفة لعناية لمشددة
وسمعت لبنگلاديشي يصيح بسمي لتفتت علي
قدملي قمصلة سودة
سئلتة بستغراب... هااي منين
رد... اني مايدري هوة يكول هاي الج انت
اخذتهة منة ومن عطرهة عرفت صاحبهة اااه ياما وياما دفنت انفي بنحرة وغفيت علة ريحت عطرة لاعشقهة واثمل كلمرة اشمهة علي
لبستهة بدون تردد بس احس عطرة رجعلي ذكريات قديمة خنكتني حيل وتركت قصة ابلعومي نزلن دموعي بدون ما احس وقبل لا ارفع ايدي امسحهن وصلني مسج من ايسر
فتحت لفون جان كاتب... لتبجين يولي ترة كلبي خلص من ورة هلدموع
تنهدت ومسحت دموعي ولتفتت ادور بلممر لعلي المحة لدنية ليل وماكو مراجعين بس الي بايتين وية مرضاهم وميطلعون من لردهات لممر فارغ وماكو احد منين ايسر ديراقبني.
رجع كتب... لضلين تتلفتين مراح تشوفيني
طفح لكيل عندي وكتبتلة.... شكو كاعد وتراقب بية روح للبيت باردة لدنية.
رسل... وهسة انتي خايفة علية 🤔😒😕
كتبت... طبعن لا بس ما عاجبني. تضل تتجسس علية هاذ لشي يزعجني كولش احترم ايسر ترة ماعدنا. زوجين احنة اطلگنة. استوعب وعوفني بحالي
شاف لرسالة وخرج بعد مارد.
تنهدت بقهر وجريت حسرة نزلن وياهة دموعي بسرعة مشيت للعناية هناك ميكدر يراقبني. ويشوف دموعي
دخلت جان موجود سمير ورند
اول مشافني سمير كال. ... والله اجيتي بوكتج تعاي ضلي بمكاني بس اروح اكلي شي راح اكع من لجوع
.. اي روح ولتهتم اني بمكانك
... ولله كفو لو هيج لزميلات لو بلاهن. ويباوع لرند صفح
ضحكت عليهم. لمخابيل ثنينهم يحبون بعض ومغلسين بس احسنلهم بعد لصار وياي حالين ماشجع احد علارتباط ابدا
ضليت بلعناية لحد ساعة ١٢ بعدين تعبت وكولش نعست نزلت للكافتيريا اخذ كوب قهوة. وبطلعتي لمحت سيارة ايسر صافة قريب من لمستشفى وهوة بداخل لسيارة مرجع لكشن ليورا ونايم اخذت كوب لقهوة وطلعت وصلت قريب منة لجو جان كولش بارد وجامات لسيارة عليهن حبات مطر مشوشة لروية شوي
ولمطر بدة ينزل اكثر مكدرت اضل واكفة ودخلت بسرعة للمستشفى.
صار بوجهي دكتور احمد غمزلي وعض علة شفتة.
بعدت نضري عنة متجاهلتة شكد تلعب نفسي من نضراتة
وصل يمي وكال... هاي شمسوية بي ساحلتة سحل
مارديت ومشيت منة اسرع يقصد بكلامة علة ايسر
عوذة من عيونة
هوة دخل لكافتريا واني صعدت للعناية.
وضليت هناك جرة وحدة لساعة ٦ لصبح
خلص دوامي ب ٦ ونص وطلعت ادور علة تكسي جنت هلكانة تعب وعيوني ماكدر افتحهن من لنعاس
لشوارع برة واكف بيهة مي لمطر وهوه بارد ولجو بعدة توة بدة يكشف شوي
ردت تكسي مالكيت
باوعت علة سيارةايسر بعدة واكف بمكانة بس مجان منتبه علية ويحجي بتلفون ويعرك بعيونة مبين توة صاحي من النوم
كلت اخذهة مشي للبيت مو بعيد عن لمستشفى اقل لنص ساعة مشي
لفيت نفسي بلقمصلة حيل من لبرد ومشيت متجهة للبيت بس امشي ولهوة لبارد يكفخ بوجهي وخشمي جمد وصار احمر
واحس من لبرودة بلاعيمي ورمن
ما مشيت عشرين متر وصفت سيارة ايسر يمي
نزل لجامة وكال... اصعدي
بدون ما اباوع علي رديت... روح ماريد اصعد
ما حجة نزل سحبني وصعدني غصب وقفل لباب وصعد هوة ساق بسرعة
.... نزلني ايسر بسرعة
... باردة عليج تروحين تتمرضين وتمرضين وليدي. وياج
كولش ضجت يعني ميهمة بس وليدة
وبعد ما حجيت وياه
رجع گال... سويت تحليل لأبوة لآوجا اذا طلعت كذب هاي مو بنتي احرگ آيفا والله
ختنگت بس بينت كدامة مو مهتمة ... اي ناركم تاكل حطبكم شعلية اني لو نسيت سقط حقي عليك مثل ما سقط حقك علية استاذ ايسر
تنهد بضيق..... موووو ناسي مووو نااااسي
... لعد نزلني ماريد اجيب لسمعة لسيئة لاهلي
باوعلي نضرة عتب وما جاوب
رجع ورة شوية كال... من تنزلين حضريلي جسر اخذة وياي
لتفتت بقلق.... ليش
رد... نسيتي ليوم جمعة يخلص لنهار يمي
تنهدت براحة عبالي يريد ياخذة مني للابد امووت والله
رديت... بس اني ليوم نهار كلة برة لبيت وهسة خلصت ليل بلمستشفى ومشايفتة من لبارحة لصبح خلي يمي لو ساعتين وتعال اخذة
رد.... اذا انتي من لبارحة فا اني من لجمعة لماضية ما شفتة حسي بيه هم ابني ومشتاقلة
وگتلج عوفي لشغل اني اصرف بس اصريتي
عصبت... وباي حق انت تصرف علينة اني واهلي لا مشكووور يا استاذ مو بحاجة فلوسك اني. ومرة ثانية لتحاول تسببلي مشاكل بشغلي حتة يفصلوني ترة العابك مكشوفة
رد.... ابو ابنج من حقي ادفع نفقة شهرية الج ولجسر حتلو اطلگنة غير لمؤخر مالتج ٢٠ مليوم شو ما طالبتي بيهن وخليني اشتريلج بيت وحد انتي وابني وعوفي لشقة ناس طالعة ناس طابة
فورلي دمي صرخت بي..... ماااريد منننك شي وثانييي مرررة اعررف شلون تحجي شنوو ناس طابة ناس طالعة شكلولك نشتغل بملهة.
عكد حواجبة.... مو هيج قصدي. وصف لسيارة كدام بيتنة
نزلت قبل لا اسمع تبريراتة.
دخلت. لغرفتي اني وماما لكيتهة نايمة وجسور بحضنهة توة كاعد يعرگ بعيونة ويعض بيدة.
من شافني دخلت كعد بلفراش واجة يحبي علية عرفتة جوعان كعدت علة ركبي كدامة اجة علية حضنتة واشم بي من نحره اووف يريحة هلي شكد مشتاقتلك وليدي حبيبي
بوستة من وجهة كلة وهوة يأشرلي علة صدري
يريد يرضع
طلعت صدري وبدة يرضع مثل لمعزة يحب يرضع هوة كاعد بحضني ميقبل انومة . يزعل اضحك علي والعب بشعرة لكثيف بيدي
تأخر برضاعة وايسر واكف برة
رن تلفوني شفتة ايسر
رديت... الوو
.... هاا وين جسر
.... ديرضع
.... جيبي انطي ممة
.... من اوخرة يزعل
.... لتتحججين برضاعة حتة مأخذة ترة راح ادخل اخذة منج
..... هااي شبيك ايسر ايمتة تحججت بشي حتة متاخذة انت
... مادري راح ادخل
.... شتدخل هسة. لعالم كعدت ليشوفوك شيكولون علينة
.... يكولون ليملي ضميرهم ميهمني اريد ابني گلبي يوجعني علي هلكد مامشتاكلة.
بديت اسمع صوت خطواتة. بلبيت وهوة يحجي
و منا جسر ماكدر اعوفة يزعل بعد ميرضع ويضل يبجي
حسيتة واكف بلباب وراية جنت كاعده قريب من لباب ومنطيتة ضهري
توترت ماعرف شسوي ومابية احجي وتعارك وياه
اخاف ماما تكعد وتشوفة
قطيت صدري بشال حتة ابعد نضراتة عني يضل محرم علية دام اطلگنة ميصير اضهر شي من جسمي كدامة بعد
هوة ماضل بس تاكد دا ارضع بأبنة طلع تنهدت براحة احس جسمي كلة يرجف من جان واكف وراي
كمل جسر وبتعد باوعلي وضحك بعد اثر لحليب علة شفايفة دنگت بستة وشميتة حيل وبتعدت عنة اباوع علة تفاصيل وملامح وجهة اريد احفضهن لان ما اشوفة هواي ودا اشتاكله عكس ايسر ياخذة مني يوم لجمعة ويبقة مگابلة لنهار كلة ميرجعة للعشرة بليل يدزة وية اسر كل مرة بس مرة وحدة هوة اجة ومن ما طلعت علي ضاج. وبعد ما اجة
اخذتة غسلت وجهة وغيرتلة. ملابسة لبستة ثخين حتة ميبرد ولبستة كلاو ولميت قراضة بجنطة صغيرة. وقطيتة بقمصلة ايسر من لهوة وطلعت بي
جان لجو مكشف بس ضباب صاير كوة تبين لبنايات
فتحت باب سيارة ايسر وكعدت جسر يمة وخرت لقمصلة عنة بس شاف ابو صاح.... ااابااء وضحك
خلاني بس صافنة علي هاذ شعلقة بأبوه هيج
اخذة ايسر ملهوف علي يحضن ويبوس بي يشمة شم وية كل بوسة ويحجي ويا.... يروح بابا. يل بطل مالي شلونك
جسر يضحكلة ونايم علة صدرة
واني اباوع علي مصدومة وعيوني متغرغرة بدموعي
كل مرة وسام يطلعلهيا وما اشوف ردة فعل جسر علي نقهرت كولش من يشوف ابوه ينساني لحقير واني لتعبت وخلفت هيج اطلع من لمونة بلا حمص
باوعلي ايسر وكال... سدي لباب من يمج
وكعد ابنة بحضنة وشغل لسيارة
سديت لباب ومشة بتعد واني عيني عليه هاذ شسوة للولد ومخلي يتعلق بي هيج
دخلت للبيت وبالي يمة هسة يعلقة بي اكثر ويخلي يعوفني انجلط ساعتهة
رحت بدلت ملابسي وميتة برد وتغطيت ابطانية ثخينة ونمت ماحسيت بعد بس علة صوت رنة لتلفون ساعة ب ٢ لضهر ولجو مغيم
رفعت لتلفون لمتصل نسرين رديت بصوت نعسان.
.. الوو
ردت.. هلا بلگاطعة يعني اذا ما اتصل اني متذكريني
بتسمت لوحيدة لماكدرت اقطع علاقتي بيهة نسرين وهية دوم تنقلي اخبار بيتهم واسئل علة عمة سنا منهة وحتة من تمرض ايسر هية تصلت علية تبجي وتتوسل ارجع لاخوهة راح يمووت بس اني عتذرت منهة وكتلهة. بعد مايربطني شي بي بس جسر بعد لسوا
حاولت تبررلة وتكول هاذ بل ماضي وغلطة وسبحان لما يغلط وجان نفسيتة تعبانة وتصرف هيج ارجعي ولتضيعين ابنكم بينكم بس ما قتنعت وعتذرت منهة وسديت لتلفون ولحد هاذ ليوم تتواصل وياي بس ماطلبت مني ارجع تحجي امور عادية. مثل لصديقات صرنة
رديت.... لا والله مو ناسيتج بس هاي لفترة شغل ليل نهار مارتاح بس لجمعة
ردت.. اي ياعيني ضليلج علة شغلة وحدة مو ٣ ايام بلمستشفى وباقي لاسبوع محل لكيك زين منج تشبعين نوم
.... شسوي محتاجين ايجار كولش غالي وسام مديلحك يشتغل گرسون بمطعم. شهريتة كلهة يادوب ندفعهة ايجار وشغلي مصرف للبيت ولطبيب
... مو كتلج خلي ايسر يتكفل ترة هاذ حقج ما اخذتي منة شي
.... بعد لسوا بية ايسر خلاني ماكدر اتقبل منة شي شوفة وجهة ماكدر اتقبلهة.
... زهراء ترة انت حيل قسيتي علة ايسر انتي لوتشوفين حالة ترئفين بي لرجال مخلصهة بس صفنات حتة ليحجي ويا مينفة عبالك متوحد عايش بعالم ثاني لو للبيت ميجي بس وكت لنوم ومرات يبات بشركة ليوم لوحيد ليتواجد بي هوة لجمعة. لان يجيب جسر يمة
... اي كل الي صار من ايدة. خلي يتحمل عواقب افعالة.
... اي درجعي ويتصلح كلشي ليش هلعناد والله امي غير مريضة من ورة لولد تكول بعدهم ماتهنو نهجمت بيوتهم وكلما اشوفهة تبجي وحالتهة. حالة
.... ام صفاوي لو ادري بيج راح تفتحين هاي لسيرة جان مارديت
... اعذريني بس حالكم ما عاجبني ليش تضلون متبهذلين.
.... لعد ارضة ارجعلة بعد ما خذلني وخاني وهسة يمكن عندة طفلة اني شنو بحياتة بعد هية قبلي واولى بي ام بنتة.
.... وانت ام ابنة. مالج ولاية قابل شنوو
... ام صفاوي سدي لموضوع ماريد اسمع شي عنة
... براحتج
.. هسة انتي وين.
... ابيت اهلي
صفنت افكر وحجيت بسرعة..... ايسرر يمج صح
تلعثمت بلكلام بعدين اخذت نفس وكالت.... اي يمي هاذة
عصبت. بس مابينت.. زين مع السلامه
ردت.. زهراء اني اسفة
... بعد ميفيد لحجي ام صفاوي عن اذنج
وسديت لتلفون بضوجة وعصبية. كلهة واكفة وية ايسر ومنطيتة لحق لان رجل ميعيبة شي بنضرهم بس لنسوان حتلو ميسون ذنب يكولون عليهن عاار
ستغفرت ربي ورجعت نمت صلاة لجمعة فايتة. وبلحالتين اني معذورة رجعت اكمل نومي لجمعة فرصتي لوحيدة انام براحة.
ماكعدت لل ٤ لعصر احس نفسي ضايجة ومفتقدة جسر كل يوم اخابر واسمع صوتة. هسة منو اخابر وميرجعة. للعشرة بليل
كمت دخلت للمطبخ فدك مسوية تبسي غدة وضال منة خليت بماعون وحميتة بل مايكويرڤ واكلت بل خاشوگة بدون خبز احس مالي نفس كولش بلاكل هليام. بس دا اتعب وادوخ. من اضل بدون اكل
خلصت غسلت لمواعين ورحت فتحت تلفوني. دخلت عل حالة ايسر مخلي صورتة وصورت جسر
صفنت بوجوهم لاثنين شكد حلوين طالعين ماخذينهة بلسناب نفس لون لشعر ولعيون. نفس رسمة لوجة ولشفايف وكثافة لرموش ثنينهم مباوعين عل كامرة نفس لنضرة
اخذت سكرين للحالة وخرجت. خليت سماعات بذاني وشغلت اغنية لحسام لرسام ((لاتصدگة))
ضليت استمع وافتر انضف بلبيت وية فدك اضيع وقتي بشي مفيد ودخلت للمطبخ سويت كيكة. وخليتهة بل فرن ونزلت اشتري كريمات تزيين كيك من لسوق. وصيت فدك تراقبلي لكيكة.
بسرعة شتريت لكريمات ورجعت بطريق امشي فات من يمي واحد هاذ ساكن بلعمارة. الي مقابيلنة فد فضولي وحاشر روحة بكلشي
كال... ليوم لصبح هاذ منو لشاب الي طلعتي من بيتج
اني اعرف هوة يدري بكلشي بس عار يدخل بلشي لميعني. حجيت ويا بحدة.... طليقي واجة ياخذ ابنة. بيهة شي
رد بستنكار.. بس ياخذ ابنة لو غير شي
فور دمي.... شنووو قصدك بغير شي اكول عمو لو تجافيني شرك هواي افضل ومعليك بينة ششوف معليك لاتجي تحقق انت ما مسؤل عني مااشي
.. بس سمعة لمنطقة نخاف عليهة
... خاف عليهة هاذ من حقك بس مو مني اعرف الزم حدودي وماحتاج نصيحة فارغة منك.
وعفتة ومشيت فورلي دمي هاي مو اول مرة يدخل سواهة هواي. فد رجال مؤذي حسبي الله ونعم الوكيل علية
دخلت للبيت مزاجي معكر طلعت لكيكة من لفرن وما زينتهة ولا لعبت بيهة خليتهة هيج ياكلوهة وية لجاي بدون زينة.
دخلت لغرفتي حاولت ما ابجي بس ماكدر لناس كلمن يحجي من يمة مارحمونة حتة بلمستشفى ماخلصانة من لبلبلة ونميمة. بذني اسمعهن يلطخن بية لان يشوفن دكتور صخمووي يضل يسمعني حجي ونضراتة متفاركني كامن يتبلن علية. بس ماهتم اسمع واغلس خليهن يشيلن بذنوبي شريد منهن علة طول ما لحجي الي ينكال اني مامسوية منة شي وفقط بلبلة منهن. خليهن هنة وربهن ينجازن
ضليت احجي وية ماما ورجع وسام ب ٧ من لشغل. سبح واجة كعد يمنة منتشاوف بس بجمعة لان باقي لايام اني من لضهر للسبعة بليل بمحل لكيك اشتغل ومن لسبعة اروح للمستشفى من يكون عندي خفر مارجع للستة. لصبح واكثر لاحيان خفر اني تبارك مرات خفر وياي ومرات لا اداوم بنهار وماحضة بيهة اكثر لاحيان اخابرهة مخابرة. اسئل عليهة.
كال وسام.... لبيت ليوم ناقص بدون ابو لمشاكل حتة شعر زيوني ملموم عدل مو كافش مثل كل يوم
ضحكت لان جسر يضل يهلس بشعر ابن وسام وهذاك ميكدر يفك نفسة صغير نجي نركض بس علة صياحهم.
... هسة راح يجي ويستلمة.
ضحك... كومي فدك انروح انام قبل ليجي الرهابي
.... شكو دجاج تنامون من هسة. وغمزتلة
ضحك .... اي مو ورانة شغل يطول
بتسمت.... لعد لحك من هسة يخوي
شال ابنة ودخل لغرفتة يضحك
لحكتة فدك واني بقيت يم ماما. صح مرات ادوس ابطني من تكوم تحجي علية بس احبهة. واحس بحضنهة بامان وحنية. وهية ضلت تلعب بشعري. للعشرة رن لجرس عرفت جابو جسر كمت لبست شالي وطلعت. فتحت لباب
صار بوجهي ايسر شايل جسر وبيدة ٣ علاليك كبار نزلهن بلگاع. وباس جسر ونطانيا
وهوة لحقير ميقبل يجي يصد عني بصفحة ويضحك ويحضن ابوة. تخبل علي ايسر واني اريد انفجر من لغيض
وين يلة اجة علية وياشر علة صدري يريد يرضع. حجيت علي.... لااا ماكو بعد انت ميغزر بيك
حجة ايسر... روحي رضعي لولد جوعان وعوفي هاذ لحجي
.. مو جان يمك ليش ماسويتلة ممة
بتسم... سويتلة بس ماعجبة يريد الا من ماما اطيب بي نكهة خاصة.
طنكرت بوجهة ماعاجبني كلامة عفتة ودخلت
لحكني دخل لعلاليك للصالة وسلم علة امي وطلع صاير محترم ابو لنسوان
اخذت ابني رضعتة. ونمت علة نومتة
بس حسيت ب ٣ بليل علة صوت. لرعد. كمت من مكاني فتحت لشباك وضليت اباوع علمطر بدة ينزل وصوت لرعيد. صار اقوى
مثل هيج ايام تذكرني بوفاة علاوي كل سنة لشتة يخنگني بس هاي لسنة مخنوكة بس مو بسبب علي بسبب ايسر وخذلانة الي
وعصفت بنا الذكريات وأعادتني الى لوراء الى ذالك اليوم الذي لن يتكرر مرتين فقد كنت حين ذا أعيش اجمل ايامي
و.. اه من لايام الجميلة لانها حتماً لن تتكرر مرتين فهي مثل لصدف لاتاتي الا مرة واحدة
كنت حين ذا ملتحفتا بين احضانة غارقة في عيناه لسوداء واذوب بين همسة ولمسة شفاة على عنقي حقاً احببتة لماذا
خانني ..... انا أكرهةُ.... بل أحبة
هاكذا تركني تائهة بين كرهة وعشقة
زهراء
..
فزيت من صفنتي علة صوت لرعد وضربة لهوة لبارد علة بشرتي. مسحت دموعلي لنزلن وسديت لشباك ورجعت لفراشي جسور نايم ضليت اشمشم بي نزعج بتسمت وبتعدت عنة. ضليت اتامل بملامحة لطفولية لبريئة لحد ما نمت لان ليل لشتة طويل لواحد يضوج يضل گاعد
مر شهر حاولت قدر لمستطاع ابتعد. عن ايسر لان من يضل يطلع كل شوي بوجهي اضل افكر بي ومخنوگة جسر يجي مرات ياخذة ادزة وية وسام لو ماما ماطلع علي وهوة كل مرة ياخذة يمة من يرجعة بليل محملة كومة ملاعيب وحليب وحفوضات كلة من لاصلي لو البس حتة مكان مالة. مرات اضل احجي وماريد يجيبلة شي اني اصرف علي بس يهددني اذا سولفت لو منعتة يصرف علة ابنة ياخذة مني واني سكتت من يكثر لشي انطي لابن وسام لبسة ولحفوضات كلة من جسر. علمود وسام خطية يادوب يلحك يدفع ايجار شغلة كلة للايجار يوميتة ٢٥ الف دينار
كثرت لبلبلة ونميمة بلمستشفى علية بسبب هلبلوة احمد وبزعت نفسيتي بعد ماتحمل قدمت علة نقل من لمستشفى.
بس رفض احمد لحقير ولواطي راح فصل كل الي حجن عني بسوء
بفكرة هيج سيطر علامور بس هوة زاد لطين بلة صارو يتهموني علة علاقة سرية بي واني تخبلت. رحت بدون تفكير هادة علي لمكتبة دگيت لباب ودخلت قبل لا يئذن لي وشوفلك شوفة غرفت منهة. بسرعة سديت لباب وطلعت. اركض
لحگني هوة بسرعة رجع سحبني لمكتبة. وطلعت رند لكلبة لرخيصة سمير مستقتل عليهة وهية. ذابة روحهة علة احمد لقذر مثلهة.
عافتني ومشت بخوف وترجف وتلم بنفسهة
وهوة دخلني للمكتب. وقفل لباب تخبلت ودفعتة عني ردت اطلع لزم ادية ثنينهن. لواهن ورة ضهري
وحجة بهمس مثل فحيح لحياية.... اذا حجيتي شي من الي شفتي ادمر حياتج وسمعتج فتهمتي
.... وخرررر عني ما احجي عوفني. اطلع
بتسم بخبث وقرب حتة يبوسني تخبلت دفعتة ماتحلحل دفرتة جوة صرتة. بقوة بتعد متألم. بسرعة فتحت لباب قبل لا اطلع رجع لزمني وسد حلگي بيدة عضيتة وخر عني لازم ايدة وشياطين لدنية كلهة تتنطط بوجهة. لزمت. تحفية قزاز خالهة علمكتب وحجيت بخوف وتوتر
.... ابتعد عني لو والله اضربك
.... تضربين منو.
... انت بعد احسلك
رحت للباب فتحتة. اجة يريد يلزمني شمرت لحفية علي وكعت براسة. داخ ولزم راسة بيدة اني عفتة وطلعت اركض. اخذت جنطتي ولفون وطلعت برة كوة اتنفس حيلي يرجف.
نسحبت ايدي بقوة. هاذ ايسر شجابة. دموعي. غوشت لروية عندي
صعدني بسيارة. واني علة نفس لحالة ارجف وابجي صعد وشخط لسيارة مشة مسافة وكف
مسحت دموعي بستغراب ورجفة بجسمي مهديت. باوعت علي غضب لدنية. كلهة بوجهة وعيونة صايرات بگصتة
خفت شاف شي وخوفي تاكد من حجة وكال
... هااااذ لقندررة. شعندة. وياااج ليش بعدة يحوم وراج شرررايد
بجيت بضعف.... ماادري. والله
ضرب لستيرن بقبضة ايدة وصاح.... واااضحةةةة مثل نووور لشمس. هوووه رايدج. ااالج ليش متفهمين رااااح تصيرين صيدة سهلة اله زهررراء بتعدي وعوفي لشغل ليييش تعليين گلبي عايف شغلي وضيمي وكاعد اراقب بحضرتج خاف يئذوج وانتي بس لسان مابيج خير
بجيت ماكدرت ارد علي بعد رهبت لموقف بية ومنا صوتة تنتفض كل ذرة بجسمي من يصيح
مدري شلون تحركت ورتفع لشال عن صدري وبينت علامات زرگة صغيرة علية سببهة جسر وماحس بس علة ايدة تلتف علة رگبتي. ويخنگني
حجة بصوت حاد وگاز علة اسنانة. .... شسوووووة هاااذ لسگط وياااج احجي ياوويلج مني زهراءءء
دفعت ايدة اريد احجي واخذ نفس وافهمة مو مثل مامفكر هوة.
ضليت اگح گح وهوة يريد ينفجر من لعصبية. احسة گوة متحمل مايرميني جوة لسيارة ويدعسني.
ويبرد گلبة
صرخ.... ااااححججيييي شششبببييججج
جريت نفس بتعب وخوف وتوتر وجسمي يرجف. وحجيت
.... والله جسر سوة هيج
تنفس بسرعة وعصبية. ... شلوووون فهميني
... هوة. هو ة م من د. ا ارضعة وانام يبتعد لثدي عن حلگة. ويصير يرضع من اي مكان ويترگ هاي لعلامات بصدري. والله مخليت احد يمس شعرة مني بس شسوي لهاذ الله بلاني بي
تنهد بخنگة وخلة ايدة علة گلبة. ورجع راسة علكشن سندة. وسكن ماضل بس صوت انفاسة.لعالية.
طول علة هل حالة.
خفت علي همست بخوف.... ايسرر
مارد علية.
هزيتة وصحت... ااايسرر رد.
مارد علية كمت كعدت علة ركبي عل كشن وانده بي نزلت راسي علة صدرة. اسمع دگات گلبة.
من خوفي وغبائي نسيت صوت انفاسة. طلع يريد يختبرني وبس حطيت راسي علة صدرة. حاوطني بحضنة. شبعت بجي من حسيتة. خدعني بتعدت عنة. وصحت بي..... شغل لسيارة. وصلني للبيت.
مارد علية حرك لسيارة ومشة. وقت طويل هاذ مو طريق بيتنة.
لتفتت علي وين ماخذني
... للمزرعة
فتحت عيوني علة وسعهن .... شعندي بلمزرعة دا اكولك رجعني للبيت ايسر. لتخليني افتح لباب واشمر روحي من لسيارة
مارد بس غفل ابواب لسيارة. وضل يمشي واني احجي ولا ينفهلي.
تعبت من لبجي. وراسي يريد ينفجر سكتت رجعت لكشن ورتكيت علي. رن تلفوني. تبارك. رديت
الو
نتبة علية ايسر
.. هلا وين انتي. ليش ماكو بلمستشفى يولي
توترت... تعبت وطلعت للبيت. ليش شكوو
... والله لكو دكتور احمد واكع بمكتبة. وراسة مجروح ٤ نفذات خيطو رادو يرجعون لكامرات ويشوفون منو طلع اخر شي من مكتبة بس هوة رفض يكول وكعت لان دخت
توترت. بخوف... وهسة. رجعو لكامرات
... لا هوة راح حذف لفيديوهات مامرتاحتلة. ابد
تنهدت... يلة توبة بعدين احجي وياج باي
وسديتة.
ايسر سمع لمكالمة. كلهة. من سديت لفون بدون ميباوعلي كال... انتي لسبب موو.
رديت بخوف... دافعت عن نفسي. ماجنت متقصدة.
هز راسة. بعصبية احسة كاعد علة نار.
وصلنة بيت لمزرعة. مارضيت انزل.
... رجعني للبيت شوف لساعة بيش اهلي هسة يفكرون اني بلمستشفى.
... من تدرين لوقت متاخر شعندج برة لبيت
... ترة مطالعة اتونس هااذ شغلي.
... شغل نص ليل ويامن. وية. احمد لگو**
... هاذ شغلي انت معليك بية عوفني بحالي.
... لا هوة اشوف بعد منو يخليج تشتغلين.
وسحبني دخلنة للمزرعة. جانت فارغة بس لحراس ٣ واكفين عند باب لمدخل. تجاوزهم ودخل اخذ مفتاح لبيت. من مصطفى. ابن لحارس كل مرة نلگا هل مرة لگينة ابنة.
واني ورا امشي
فتح لبيت ودخل
..... رجعني. للبيت شكووو جايبني. هنااا ايسررر كلهةةة تعرف احنة اطلكنة ليش نجيب لسمعة لموحلوة لاهلنة
مارد سحبني ودخل قفل لباب. ساعة جانت ب ١٢ ونص شهر لواحد وموجة برد نطوهة بلاخبار حتبقة ٧ ايام
جنة باول ٢٠ يوم بسنة. ٢٠٢٢ بس ماشالله مو سنة من اول ليلة بيهة مشاكل لحد هسة.
نزع لسترة مالتة شمرهة. عل غنفة. وگعد رجع راسة وغمض عيونة.
بقة علة هل وضع شوي بعدين رفع راسة باوعلي بعدني علة نفس لوكفة اشرلي... متكعدين شبيج
... رجعني للبيت
... دكعدي نتفاهم
... ماضل شي نتفاهم بي ايسر رجعني للبيت
... اكعدي اني اريد احجي وياج
كعدت بتذمر وصديت عنة بصفحة.
.... اذا طلع لتحليل مال آوجا سلبي ارجعيلي زهراء لتخليني ضايع ومضيعكم وياي
بتسمت بستهزاء..... لتخاف ميطلع سلبي اطمن
تنهد..... اني اريد ابني. يمي ارجعي حتلو تبقين بعيدة عني بس ابنة لتبعدي عني ترة دا اتعذب ومتحمل ما اخذة منج ماريد اكسر گلبج
.... ارجعلك بلحلم ايسر
عصب.... لعددد لتلوميني علة الي راح اسوي.
.... شتسوي تاخذ ابني مني وتحرگ گلبي علي
.... اذا اطر لامر اسويهة وگام دخل للمطبخ طلع سلة فواكة. وكعد ياكل ابرود. ويباوع عتلفزيون
وياكل رمان قدملي دفعت ايدة
... ماريد
... مو صوجج لياكل بضرسة ينفع نفسة
كمل اكل كام غسل ورجع كعد لزم لريمونت يگلب بتلفزيون
ومامعبرني
اباوع علي لابس تشيرت موروني نص ردان وبنطرون اسود ولسترة لنزعهة سودة لحيتة عالية ومحددة بترتيب طالعة حلوة علي
نتبة علية صافنة بي وبتسم بدون ميباوعلي
ضجت من تصرفة يضل مغرور
كمت دخلت للغرفة الي مرة. بتنة بيهة. لان نعست كولش
نزعت لشال وتمددت عسرير وداهمتني لذكريات رجعت لهذاك ليوم الي ايسر ضربني بي راجدي بسبب خباثة ميس ومن حبسني ١٠ ايام اني محبوسة. بهاي لغرفة واسمع منة كلام يسم لبدن. ويشكك بية وبشرفي
تعبت من لتفكير واني بدون اكل ونوم. بسرعة دخت ونمت ولجو بارد احس رجلية ثلج اريد بس ادفيهن
لبطانية لعسرير بيهة ريحة ايسر تذكرت. من كالتلي نسرين ايسر حتة بلبيت مينام عرفت دينام هنا ابيت لمزرعة.
..
مرت ساعة لو اقل وحسيت علة ادين تحتضني ماعرف حلم حقيقة بس جنت كولش نعسانة. وما حسيت.
للصبح
كعدت علة حركة ابهامة يمسح علة خدي بلطف
فتحت عيوني بنعاس وفزيت برعب من شفتة. نايم جنبي وعاري من فوگ
علة ردة فعلي بتسم ابرود وگام من لسرير لبس لكيمونة. ولتشيرت. ومشط شعرة وطلع ما كترث لاسئلتي ولا لحرگة گلبي.
عصبت منة حيل كمت اريد اطلع باوعت نفسي بلمراية رگبتي بيهة علامة حمرة. تخبلت هااذ شبي مخبل ميفهم احنة اطلكنة ونتهة كلشي شو يتصرف وعبالك حلالة. ومو هامة حرام وحساب
لبست شالي وطلعت ورا لگيتة بلمطبخ يسوي ريوگ وكفت بصفة. علطباخ.
... شعندك يمي نايم
بتسم... بكيفي
صحت.... لاااا مو بگيفك ايسر ترة احنة اطلكنة ماعاد شي يربطنة ليش تغشم نفسك بوهم عزيزي اصحى علة روحك
سوف كلامي كلة وكال.... تعاي تريكي. اريد اوصلج واخذ جسر ليوم يمي.
باوعت بتلفون ليوم جمعة والله حتة مادري بلايام شلون تمر من كد ما تعبانة نفسيتي
كعدت اكل لان ميتة جوع وهوة لخبرة مسوي بيض مخلي علي طن ملح. لوما لجوع. ماكدرت اكلة. بس اجة بوقتة لان ضغطي هابط تريكت واخذت فوني ولجنطة وطلعت
وهوة طلع گدامي.
تلاگينة وية ابو مصطفى بلباب سلم علي ونطا لمفاتيح وطلعنة لطريق كلة ساكتين. بس هوة يحاول يتودد ويغير مزاجي بس هيهات. صايرة مانجرع وندفاعية بسرعة اعصب
مد ايدة. يريد يلزم ايدي. دفعتهة عني ضاج كولش وضل يحجي من ورة خشمة. وصلنة لبيت
صف لسيارة وحجة بضيق وحدة... جسر بسرعة حضري ولتجيبين ويا غراض عندة بلبيت ميحتاج.
نزلت معصبة . وبس اريد انفجر بوجهة مدري شلون تمالكت نفسي.
دخلت للبيت تلگاني جسر يحبي فديتة بعدة بملابس لنوم اوفر رصاصي. يجنن علي بوستة وشميتة بلهفة..... والله انت احلى شي بحياتي. صار يماما
يضحك علية ويصيح.. ماااء ماااء وياشر علة صدري
ضحكت علي وشلتة ودخلت لغرفة. ماموجود لا ماما ولا وسام
سئلت عليهم فدك كالت .. راح وسام يقيس ضغط عمتي يم لمضمد راسهة يوجعهة
رديت.بقلق.... شبيهة.
... مابيهة شي بس يمكن اكلت مالح.
هزيت راسي وتصلت علة وسام طمني هية مابيهة شي وسدة
اخذت جسور ارضعة وهوة سودة علية جوعان.
دزيت رسالة لايسر... جسر ديرضع. هسة انتضر شوي.
شافهة وما رد.
ضل يرضع بربع ساعه يلة بتعد. يضحك للهوة فديتة. بوستة وغسلت وجهة بس ما بدلتلة لاوفر حلو علي اريد ايسر يشوفة بي
نشفت وجهة زين ولفيتة بلقبوط مالتي. وطلعتة لايسر برة. فتحلي لباب مالتة واخذة مني. بس شاف ابوه
مامصدك. يضحكلة. ومجلب بملابسة يريد يگوم. شكد اضوج من اشوفة هيج يسوي علي ايسر ابو حضين كلهة صافة وياا واني صافية وحدي
عفتة ودخلت للبيت. والله جسر بي راشدي. ارجع عقلة لمكانة.
وكضيت ليوم بتنضيف ومساعدة فدك بطبخ وعلة ابنهة زيوني فدوة يشبه اختي مريم. حيل ويلاعب ويضحك. بس شابع كتل من جسر
للعصر كاعدة بغرفتي اسبح بعد ماخلصت لصلاه
ندگ لباب ودخل وسام شايل جسر
ستغربت ميرجعونة هسة.شعجب ليوم رجعو
.... هااا منو جابة.
.... عمة اسر جابة.
.. ماسئلتة ليش ليوم من وكت دزو
رد.... سئلتة. وكال بس مبين علي قلق ومستعجل كال... صارت عدنة حالة طارئة يم عمامي وراح مافهمني شي
خفت شبيهم. بسلا احد مات
سحبت تلفوني تصلت علة نسرين مغلق ايسر مارد علية
عفتهم مالحيت. بس ضل بالي يمهم.
ورة يومين مداومت بل مستشفى بعد بس اروح كمت من لصبح لليل بمحل لكيل اشتغل بتزيين. وبي خوش شغل بس متعب.
ثالث يوم اخذت اجازة جنت اريد اطلع اشتري عربانة لجسر
حتة من نطلع نتمشة ما اشيلة ادفعة بل عربانة. وهم ائمن اله
بدلتلة لبس ثخين. وبدلت اني وطلعت.
گلت لماما حتة ميضل بالهة علينة.
اخذت تكسي للسوق
من وصلت. دفعت لكروة ونزلت لاسواق صايرة كدام شارع عام مزدحم. بسيارات ضليت امشي متقصدة محل لاطفال وصلت جان عارض اشياء هواي كدام لمحل مادخلت للمحل شتريت من برة. عربانة لون اسود بزيتوني مرتبة وحتة بيهة شغلة من تخلين لطفل تسدين علي من لبرد. تحمي. عجبتني شتريتهة. جان سعرهة ٩٥ الف. دفعت لفلوس واكفة اريد لرجال يطبگهة الي لان مفتوحة وجبيرة متتخلة بسيارة
وماحس بس جسر انهب من ايدي لتفتت لمرة لابسة اسودكلهة مامبين. منهة شي شايلة جسر وتركض بي متت بدمي ركضت وراهة واني اصيح
... خااالة اوكفييي جيبي ابني. اركض وراهة دخلت بين لسيارات. حيل ماضل بية كلت هسة تدعمهة سيارة. وينمرد ابني.
اركض واصيح صوتي راح.... لجججج خاااله. ابنييي رجعيييي الله علييييج. لسيارات. تزمر واحنة نتراكض بنصهن.
.نتبهت علة رجلهة. بيهة زنجيل يشحط وراهة. طولة بلمترتين اركض اريد الزمة. بس اخاف تكع ويموت ابني علة اثر لوگعة. سناني اطخ سن بسن مدري خوف مدري برد
واباوع علة ابني مصدوم وفاحط يخاف منهة ومن صوت. لسيارات.
دگ تلفوني. ايسر مابية ارد علي احس اطرافي اجمدن. ميعينني اسحب عشاشة. مدري شلون فتحت خط واني اركض وراهة. احجي ويا كوة يطلع كلامي من سرعة انفاسي
هوة يحجي.. انت وين زهراء
گوة لفضت... بشارع ال...... دا اركض ورة وحدة اخذت ابني من ايدي ونهزمت. ايسر الحكني. اذا صار شي علة جسر امووووووت. واللله
تخبل من كلتله هيج حار شيغلط وشيحجي ويصيح. اني بطريقي الج.ضلي وراهة.
سديتة منة دموعي ولخوف لاني بي ماكدر اوصفة ابني مادري شنوو مصيرة بيدهة متت يربي متت خوف اريد بس اصيح احس صوتي ميطلع يرجف بخوف.
اباوع شباب تلاثة. كامو يركضون وراهة من شافتهم. سرعت اكثر بركض. طلعت لشارع. لحكتهة قربت. الزمهة بس دفعتني. وصعدت عل جسر كمت وركضت وراهة لو اموت لو ارجع ابني ليوم.
لجسر من جوا يفوت نهر لفرات هية صعدت وكفت بنص لجسر واحنة نركض وراهة.
صدمتنة كلنة وموتتني بدمي من وكفت علة حافت لجسر وتاشر بل مي يعني اذا تغربون اشمرة. بلنهر
تخبلت.لطيت علة وجهي واستنجد بلشباب ليمي.
.... عفية خوية احجو وياهة. اذا شمرتة يموت غير طفل ميتحمل وابجي منهارة.
وهمة يحاولون يسايرونهة حتة يوصلون يمة وياخذونة منهة بس هية عبالك تعرف لشغلة تصيح. بيهم وتغرب جسر عل نهر وهاذ حتقن من لبجي
يمة وليدي. خبلتة . وراح يموت بيدهة.
كمت اتوسل بيهة.... عفية رجعيلي ابني. ماعندي غيرة. امانة الله عوفي رجعيليا.
مترد علية ولا عبالك.
انوب لناس الي تمر من لجسر وتشوف لموقف تنزل تستفسر وتضل واكفة صار تجمهر عل جسر. لو هية تخبلت كامت تريد تذب نفسهة هية وجسر
كمت اصيح بيهم ينصرفون. لبعض راح ولبعض ماقبل خاف تشمرة بلمي حتة يطلعو.
تخبلت ولطيت... شتشمره غير يموت من لبرد اذا ما مات من لمي
رن تلفوني ايسر رديت. منهارة
صاح... وين انتو
... عل جسر ايسر الحك راح تشمر ابنة بلمي.
... هااي جايكم
... تعال من جهة ليسار من وراهة بلكت تكدر تباغتهة وتاخذة منهة
... ماشي هاي صعدت لجسر خلي عينج علي لتضيعينهة.
..... هياتني واكفة بس ماكدر اقرب عليهة
ضل وياي عل خط لحد ماشفت سيارتة. صفت علة جنب ونزل يمشي لمحتة. صار غريب عليهة. رادت تلتفت وراهة صحت الفت نضرهة
.... رجعيلي ابني.
صاحت عبالك متعرف تحجي .... لاااع ابناااي
ضليت احجي وياهة وهية ترد بنتر هجومية. لحد ما وصلهة ايسر وبسرعة سحبهة عن حافة لجسر واخذ جسر منهة.
ماعرف شحجي وشحس بهاذ لموقف بس. مبتسمة وشفايفي يرجفن احس ردت بية لروح من طمنت ابني بيد ابوه مراح يتركة
لمرة لزموهة لولد وجتفوهة
واني وكعت من طولي ارعش مثل لسعفة
........................................... يتبع
بنات خلص قررت اعوف لكتابة واطبخلجن فد جدر دولمة ونزلة بدال لبارت. وخلصنهة علية عاشت ايدج عاشت ايدج
اكوللجن دا اكتبلجت بارتات انطن رايجن بلبارت ماطابختلجن دولمة وتكللي عاشت ايدج
واحبجن فدوة لگلبجن. حبيباتي
وهاذ لبارت هدية لشهودة
دمتم بخير احبتي ❤