هجران وحب

لبارت ال ٢٨

هجران وحب....

بقلمي عاشقة القراءة....

لا أخفيك شوقًا
‏صوتكِ وحده من يستطيع أن يرمم ثقوبًا في داخلي
‏عجز الجميع عن إصلاحها.

مرت ٣ شهور واني ما سمعت صوتة ولا حجيت ويا شكد يتصل ويتوسل ارد علي بس ماكدر الله شال حبة من گلبي بلحضة

شكد صعبة علية من درت وجهي وشفتة يباوع عليهة هاذ لموضوع دمر اعصابي كل ما افكر بي احتقرة اكثر لو من حضنتة لطفلة وصاحتلة بابا فقدت كل. عقل ماضل براسي واني متاكدة هاي لطفلة بنتة بيهة شبة منة موو طبيعي نفس لعيون ولشقاوة ولون لشعر وحتة ضحكتهة نسخة عنة

كل الي سويتة راقبت حالتة وكل يوم اخذ صورة لأبنه وارسلهة اله
.
يرد.... اروحلة فدوة ومن اشوفة يكتب نوب اطفي ل واي فاي حتة ميراسل عليت گلبة عل

يتصل علة اسر ويگلة ودي لتلفون لزهراء

يجي اسر يجيبلي لتلفون اخذة منة وادخل للغرفة اسدة بوجهة واطلع انطي لتلفون لأسر

شليت حالة مرات يراسل يغلط ويسب و يريد احجي ويا معصب من طريقة كتابتة تحسة واصلة حدهة ويا بس هم ما اهتملة مرات احضرة ايام وارجع ارفع عنة لحضر. لان يصيبني لفضول شحاط عل حالة ليوم

بجة جسور تركت لتلفون من ايدي وكمت شلتة.

جنت اقراء بحالت ايسر مخلي صورتة عل حالة وكاتب جواهة.

(((يومًا ما سيموت هذا الشوق، لكن الآن انا الذي اكاد ان اموت)))

دخلت عل دردشات وبسرعة اجاني مسج من ايسر يمكن ضهرت عندة متصل لان وراسل كتب

... يولي شبيج وياي شخبلج الله علية بس ردي اريد اسمع صوتج والله گلبي مفرفح عليكم

شفتهة وما رديت من بجة جسور عفت لتلفون وكمت علي شلتة الاعب بي وهوة يضحكلي اروحلة فدوة والله احلى شي صار بحياتي هوة جسر

مونسني منسيني ضيم ايسر وفراگة.

تعلقت بي شلون لاطفال لصغار من يتعلقون بلعبتهم لمفضلة وميحبون يشوفونهة بيد احد غيرهم

هيج اني صايرة ماحب احد غيري يلزمة مرات عندي شغل وانطي لعمة سنا وبالي يضل يمة مع. انو هية مربية ابو وعدهة خبرة كلش كافية بس مو بيدي احب يضل كدام عيوني ليل نهار. مرات اخاف انام. لا يبجي وماكدر اكعد علي واضل بس اتفزز مو مرتاحة بنوم لان فكري كلة يمة

رضعت جسور وغيرتله. رجع نام بسرعة حبيبي كولش عاقل وهاداء بس يرضع ينام

واذا گعد يضل يلعب ويضحك وية نفسة بل كاروك

طبعن عمي جابلة جهاز كامل مال بيبي يمكن ايسر موصي ويمووت علي مرات يدز علي بليل يضل يلاعبة. ومكيفين بي بحيث من ايد لايد. اسر لو لزمة ينزل علي دوسة ونص بوس عهد و وعد نجحن من لخامس وديحضرن بل عطلة للسادس لان صعب كولش

بس يستغلن وقت فراقهن من يرجعن من لمعهد يدخلن ياخذنة من غرفتي وينهزمن بي لغرفتهن واني مخلصتهة بس ادور

خليت جسور بكاروكة وبوستة. ورجعت لزمت لتلفون ايسر مراسل كومة.

كاتب

مو احجي وياج ردي

ترة وصلت حدهة راح احجز علة اقرب طيارة وارجع اكسر راسج شبيج وياي هلكد قاسية. علية. زين انطيني سبب يخليج تسوين هيج بيه

بس لا مصدكة لموقف لصار كدام باب محل لمرطبات

متحجين شبيج والله شعلتي عشيرتي شعل وتالي وياج ولا بنت ناصر

اخر شي راسل (((طلال مداح عندما اشتاق قال : "جُودي بوصلٍ وارحميني ، وانصفي إني جريح ")))

وخرج من لتطبيق وبين اخر ضهورة اله قبل دقيقة

تنهدت بقهر والله مشتاقتلة. موووت بس مو بيدي. اكابر اكثر من مرة حاولت ارد علي بس اكتب لرسالة ورجع امسحهة.

خليت هاي لجملة عل حالة. وطلعت

(((تبِي الصدق؟انا اشتقتِلك حيل بس أكَابُر.)))

وتركت لتلفون. ونزلت جوة اتذكر احداث عيد لاضحى شلون جانت باردة ايسر مسافر وتصل بس عايد وراح عمي طالع لدبي عدهم مؤتمر وبس اسر بل بيت جاب طليان ثنين واخذهن يم لگصاب ذبحهن وزعوهن عل ناس لمحتاجة

بس عمي من اجة ثاني يوم لعيد ضحة همين عجول ثنين وزعو للمنطقة كلهة.

وبهاي لفترة لكل حس علينة. عدنة مشاكل اني وايسر.

واجت عمتي تحجي وياي تكلي ميخالف شما يسوي من يكون بل غربة. لتگطعين بي ترة تزيدين علي هم فوك همة ومو سهلة علي عايف وليدة وبيتة بس مطر يسافر وية صاحبة. ميصير يعوفة وحدة بهاي لمحنة

اني ضليت بس اهز براسي كدامهة. كلامهة ماغير بية شي وحسيت ايسر هوة دازهة تحجيلي هيج بس سايرتهة لحد ما طلعت رحت حضرت ايسر من لواتس.

نزلت عل درج بعدني وسمعت صياح سلطان وعهد لبيت مابي احد عمتي يم جيرانة جنتهم جابت وراحت تشوفهة

وعمي راح للشركة هوة واسر

سلطان شعندة هنانة ياربي وهم عركة جديدة وية عهد شلون منخلص

عفتهم يصايحون لصوت جان طالع من الاستقبال

دخلت للمطبخ لكيت وعد جاي تسوي اندومي وصافنة تتسمع علة صوت سلطان.

.. شبي هاذ يتصايح

تنهدت... كل عادة يحاسب عهد علة لبسهة ولان ليوم بل معهد شافهة تحجي وية ولد زميلنة. تسئلة. عن لمحاضرة مال امس لان مجنة حاضرين. ولصدفة اجة سلطان ليوم ياخذنة من لمعهد وشافهة. لو تخبل يريد ياكلهة بسنونة بس ضرب ما ضربهة لهسة

... اووووي هسة هوة شعلية. بيهة

... شمدريني والله خبلنة. وشمعنى شاد بس وية عهد. مدري لان اني مو لسان مثلهة. ما اجادلة مالة علاقة بية بس عهد متتحمل ترد علي وهوة كلشي ولا مرة تلاسنة

.... الله يكون بعون ميس علي

... ختولي تستاهل والله واحد طبعة انگس من طبع سلطان هل جلبة مانسيت شسوت بايسر لهسة

.. خطية. لتحقدين عليهة

... شوفي انتي صدك مثل مكال سلطان

واخذت لاندومة. بكاسة خلتهة واخذت شوكة. وصعدت لغرفتهة

.... شتقصد مثل مگال سلطان يمكن قصدهة لو فطيرة لو مخبلة. بس لان اكبر منهة مكملتهة استحت

بتسمت وهزيت ايدي وطلعت لاكتني عهد دخلت من باب لصالة ناطة بل بجي وتصيح.... اااني بعدد ما اتحمل شنووو سلطان ويدخل بحياتي هوة مو والدي ترة. ولا مسؤل عني اني ويتحكم بحياتي وبلبسي. وية منو. احجي ترة لعيشة وياا صارت لا تطاق كلولة لايجي بعد لبيتنة. تحجي وتبجي بحركة ولازمة لتلفون ادك علة. عمي. بس ميجاوبهة

نزلت وعد علة صوت عياطهة.... شكو شبيج وين سلطان

...... انگلع بل مايردة هل جلب ابووو لنسوان. مصاحب لمدرسات كلهن. مال مدرستنة. بس والله لافضحة ليوم يم عمي.

... هاي شبيج عهد شنوو. هل حجي ليسمعج ترة يمووتج

.... طزززز يموتني. مو هية فالتوووو. لحضرتة لاجرب لوصخ

بتسمت علة كلامهةاذا سلطان اجرب وصخ لعد منو لنضيف لسانج يولي هوة منو بنضافتهم لو بئناقتهم

دخلت عمتي مفزوعة علة صوت صياح .... خيرر نشالله شكو

راحت عهد تركض عليهة وتبجي

... ماما تقبلين سلطان يضربني راشدي بس لان حجيت وية زميلي

... اوووف يا طلابتج انتي وسلطان شبلاكم يومية متكاونين جنكم لفار ولبزون

... مااامااا هوووة يدخل بخصوصياتي شعلي بية هوووة شسوي ليدخل بعد وليوم اكول لبابا علية.

.. كلتلة اني كال عوفية ابن عمهة ويريد مصلحتهة

.... اي مصلحة هاااي مااماا ويضل يكفخ بية. مااا والله بعد اذا متكتلو انتو اني اكتلة

.... دمشي منا مو هوة جاهل وتكتلي انتي وج مااماا هااذ مرجف زلم مينجرع جاية انتي تندكين بي مو زين منة متحمل لسانج وما شاحطج بشارع. والله بنتي واعرفهة. لسانهة متبري منهة وهاذ يتخبل من الي تلاسنة. هذيج ميس لرعنة لگوية لمحد كدرلهة. خلاهة مثل لكلب لمطيع. تركض ورا

... اااي غيرر هوووة جلب وسواهة مثلة

عاطت بيهةة عمتي ... عهدددد احترمي نفسج ابن عمج اكبر منج انتي شو ادب سززز متحترمين

كامت تبجي وتغلط علي وصعدت لغرفتهة.

سناا.. اووف يربي شمتعبة هااي لبنت وكل لصوج باحمد هوة منطيهة عين وخلاهة هيج تستگوي عل اكبر منهة

دخلت للغرفة. وهية تحجي عليهة.

وعد رجعت لغرفتهة. تكمل لاندومي

واني صعدت يم جسور اخاف اعوفة وحدة.

لكيتة من لهوسة ولصياح كاعد بس مطير عيونة وصافن. اجيت يمة وكفت لاعبتة. ضحكلي بسرعة. شلتة بوستة ونومتة يمي عل جرباية. ساعة جانت. ب ١١ ونص لصبح

رن تلفوني رسالة عل واتس.

شفتة ايسر كاتب علة حالتي. ((ادري بيج خبيثة تحبين تشلعين گلبي 💔 بس اني الج راجع بهل يومين بسيطة. ))

قريت لرسالة وهوة بعدة متصل

وخرجت بدون كلام ولا هتميت اعرف هاي لحركة تخلي يتخبل مني. بسرعة دگ فصلتة بوجهة.

كتب ((ردي لا والله اسوي شي ميعجب))

شفتهة وما رديت.

اتصل. كلت خليني احرك اعصابة اكثر.

فتحت خط وما حجيت شي هوة نهد علية. برزايل ولغلط واني ساكتة فتحت سبيكر. وجسور سمع صوتة. وكام يناغي ويضحك علة صوت ايسر

وايسر عافني ولتهة يناغيلة. ويلعب ويا

كال.. دكي علية. مكالمة فديو

دكيت وخليتة كدام جسور. اني ما ابين بس هوة يشوف ابنة وبنة يشوفة.

بدة يضحك ويا ويناغيلة. لو احس ايسر كاعد علة اعصابة. . احسة يريد يسحبة من لشاشة ويشبكة

يكلة.. امك لجلبة متقبل تسمعني صوتهة بس والله متحلفلهة بس الزمهة سبوع ما اهدهة.

جسور.. ااغاااا

... يروحي انتة اووف كون يمي واشمشمك يعافيتي يضناية.

بتسمت علة كلمة ضنايا

وهاذ يكركر ضحك لابو علة كد ميدك علي ويحجي ويا احسة عرفة وتعود علي لان ميستغرب من يشوفة يضل يضحك.

ايسر.... زهراء ردي علية وسمعيني صوتج بس خلينة نتفاهم ليش تسدينهة بوجهي. يعافيتي

فكرت ليش ما احجي ويا واكسبة حتة من يرجع ميشد. وياي لان عاندتة. وما حجيت ويا
فكرت هيج راح اسهل علة روحي امر كشف لحقيقة.
فرديت علي

.... شتريد.

.... صلاتك يمحمد اخيرا نفكت لجبسة

... هههه يا جبسة شبيك

.... هاا يولي هنت عليج. اتگرضم بس اريد اسمع صوتج ونتي تستنكفين حضرتج. تردين علية.

... موو بيدي جنت مگتئبة وبس ابجي حتة اسئل عمتي.

.... ادري كالتلي امي زهراء صار بيهة كتئاب مابعد لولادة وين ماشوفهة. منزوية وتبجي واعرف لمفروض ما اعوفج بهيج اوقات بس بعد لضروف حكمت.

... يلة اهم شي ايمن رجع يمشي من جديد

... اي لحمدالله. والله جان كاسر ضهري

.... هوة وين هسة.

.... بل فندق واني طالع برة اتمشة واحجي وياكم لهوة حلوو هنا ولجو بارد ما عبالك شهر لتاسع

... اي طبعن همة صيفهم شتا وين يشوفون لحر مو احنة هنا مسموطين سمط عايشين عل سبالت.

.... اي تعاي يمي هنا. نشبع برد ولو بردتي بحضني ادفيج

... لا انتة تعال شيودينة يم ترامب وجهة. يطير لنعمة

.... هههه اني الج بس خليني ارجع. دشوف شلون متردين علية.

... مو هاي رديت عليك

.... رديتي من اريد ارجع باجر نشاللة بليل احنة بأرض لوطن

... نشالله. وكتلك جنت تعبانة. وماما ماكدرت تضل يمي بس ٣ ايام واخذهة ابوية. ومنا لسهر ولقلق ولتفكير الله يكون بعون عقلي علهم لشايلة.

.... ولا مريتي شبيج عن ياهم تحجين.

تنهدت... هم لتربية ولسهر لوما عمتي وياي اني عشرتيام ماكدر اصد علة ابني الا شلت لسيم مال لعملية وكمت اتحرك يلة. كدرت اسندهة بي

.... يلة اني جاي ونشالله. ماخليج تحسين بي الا اسهر ويا ونتي نامي

ضحكت... ههه لا خاف لعكس

ضحك وكال.... تبارك واسر شخبارهم

... مادري دا احس اكو مشاحنات بينهم هل ايام ومادري ليش وشنو لسبب

... يلة عمري في امان الله ايمن يدگ علية

... اخذ راحتك حب

... شوفيني وجهج قبل لا اسد بسرعة

بتسمت وتمددت بصف جسور خليت راسي بصف راسة وجهت لكامرا علينة. وبتسمتلة.

تنهد بشوگ.... احووو يناار گلبييي شلون بية بعد ماتحمل ولج هاي شصاير بيج شو. وجة جسور صاير اسمن من وجهج

رديتلة بمكر.... مو ضعفت لان انت بعيد عني مالي نفس بشي.ابد (ان كيدهن عضيم)

.... يلة هاي مو حجة اكلي زين ترة اموت علة زنودج اني

... اهوو بدينة عاد يلة روح صوجي وحجيت وياك.

... اني اعلمج بعدين. وسدة

تركت لتلفون عل ميز واخذت جسر ونزلت جوة لكيت عمي واسر جايين وعمتي صابتلهم غدة.وكاعدين يشربون جاي

اخذنة لوقت نحجي وية ايسر ونسيت صار بساعة. هوة عل خط

نزلت عهد مورمة لعيون كلتلة... بابا اريداحجي وياك بموضوع

باوعلهة بقلق واشرلهة تجي تگعد يمة

ااجت كعدت حضنهة. وكال.... احجي بابا منو وياج

بجت.... بااباا سلطان يضل يضربني ويحجي علية لان ماقبل البس حجاب وليوم لان سئلت زميلي بل معهد عن محاضرات لبارحة لان جنت مامداومة

اجة سلطان ضربني ورزلني الى متا ابقة شابعة تكفخ منة اني مو ميس خلي يصحى علة نفسة
تحجي وتبجي وحاضنة ابوهة

وهوة يمسح علة راسهة. ويسكت بيهة.

حجة وياهة.... اولا يبابا اني ماريد اجبرج علة شي بس لحجاب فريضة علة بنات لمسلمين وهوة ستر ولمفروض بدون ميگولج سلطان انتي تلبسي لان صرتي جبيرة ولسنة لجاية نشالله تدخلين سادس علمي ميصير بعد تبقين بدون حجاب صح ناعمة بعدج بس واجب عليج يبابة لحجاب مثل لصوم ولصلاة

ردت بدموع.... بابا ماعرف البسة والله يخنكني

باسهة وحجة بهدوء وياهة ... ميخالف بابا البسي علة كد لطلعة لو لدوام وبلبيت ذبي ما. احاجيج اني

.... اي بس هوة يريدني البس حتة بلبيت

.... لا معليج بي لتلبسين بلبيت هاا شبقة

... اي اريدك تمنعة يدخل بخصوصياتي. شنو يعرف كلشي عني عبالك مراقبني. مو هااي وعد شو ميدخل بيهة. وهاي حلا لو كدرتة بس علية

تنهد عمي بتعب... شسويلة يا بابا خاف احجي ويا ويزعل وهوة يريد مصلحتج ترة يخاف عليج. والله

.... اهووو ماريدة يخاف علية كلة يولي عني

اسر... عهد احترمي شوي

ماحجت وخنست بحضن عمو احمد كاللهة.... هسة ادگ علي اخلي يجي هنا نتفاهم

اشوف عهد خافت بس ما حجت. اتصل عمي بسلطان. وطلبة يجي للبيت.

نص ساعة دخل سلطان وعهد طفرت لغرفتهة ركض

صاحهة عمي وخلاهة ترجع... يلة مو هاذ سلطان تعاي حاسبي كدامي

اجة سلطان سلم وكعد يباوع عليهة. وهية خلست بعد ماسمعنالهة صوت.

اسر.... ما تحجين يولي وين لسانج

عهد....

سلطان.... لوما مذنبة ما سكتت

حجت بهمس ولا عبالك هية نفسهة لتلعلع قبل شوي ... وشمسوية اني

سلطان... شعندج واكفة وية لولد ادكين سوالف وضحك

... كتلك سئلتة عن محاضرات البارحة  شكو تضرب

رد... ليش انتي هيج رديتي علية. لو نطيتي. انت معليك. انت موو ابوووية وتدخل خليك بحالك وعووفني.

سكتت ما حجت ودنگت راسهة تبجي. حضنهة عمي بس ما رضه عليهة. وعاتبهة علة قلت ادبهة وية ابن عمهة بعدين سئل سلطان. متغدي

كالة.... لا والله جنت كاعد اريد اتغدة بس خابرتني وتركت لغدة واجيت.

لتفت عمي علة عمة سنا كللهة... صبو غدة لسلطان

رد سلطان.... لا اريد عهد اجيبلي غدة. من ايدهة

ضحك اسر بس ما حجة شي

احمد... كومي بابا جيبيلة غدة وعتذري منة.

كامت بدون حجي تخاف من سلطان خوف بس الله يعلم بي.

دخلت ادردم وية نفسهة وتحضرلة بل غدة عمتي مگلية كبة. ومسوية زلاطة وطرشي وخضرة ولبن.

شگلتلة صينية واخذتهة. مثل لعاقلة لحبابة خلتهة گدامة. ورجعت للمطبخ بس هوة ناداهة.

سلطان.... تعاي تغدي

ردت بضجر... مااريد اكل اندومي

صاح.... تعااااي تغدي اخر مرة اعيد عليج

بجت وباوعت لابوهة. ... بابا شوف كدامك يصيح علية.

احمد... اي يا بابا تعاي. تغدي وعوفي لاندومي مو صحية

عهد. لعد لكبة صحية.

سلطان.... انتي شكد ما تهرطين شبيج تعاي اكلي بدون صوت عسريع

اجت بعصبية. اخذت كباية وكعدت يم ابوهة تاكل بيهة بس كوة متحملة. متذبلهة سالفة تغثة بيهة. هية محترمتة لان ابوهة موجود والا من عمي ماكو تحجي وتعاندة حتة لو يضربهة بس لمهم تعاندة

تغدة وكاللهة... كومي شيلي لصينية. وجيبيلي جاي

كامت شالت لصينية. وراحت تصبلة جاي اني كاعدة عل قنفة وبحضني جسور الاعب بي ويضحكلي

كال سلطان... شو تعاي جيبي

كمت نطيتهيا. ورحت للمطبخ يم عهد جاي متعرف تصب الا اني صبيتلهة ودتة لسلطان.

واباوع عليهة سحبت جسر من حضنة. وخازرتة. وهوة گوة كاتم ضحكتة.

امرهم غريب واحس سلطان خالهة براسة.
لان صدك وياهة وعد ميسوي بيهة هيج بس عهد مجننهة. تكول مرات اشك هوة يراقبني.

سئلتهة ليش تگلي . مرة دا اراسل بصديقتي علواتس واجتني رسالة منة كاتب بيهة..... لضلين تراسلين بسهاد ونامي يلة زين هوة شمدري اني دا احجي وية سهاد مو عندي ٥٠ صديقة. غيرهة.

وبعيد لاضحى مرزلهة لان. طالعة كدام ثائر بتراك ضيگ. ومن حاجي وياهة. رادتلة ... انت شعليك هوة خطيبي من زمان. عمي طلبني اله وعد طلبهة لحمزة. اي بيومهة لاطشهة راشدي الة طابعات اصابعة بوجهة

اجت خلت جسر بحضني وكالت بهمس... لتنطي لولد بعد خاف يعدي من خبالاتة

بتسمت واخذت جسر وصعدت لغرفتي. نومتة بكاروكة ونمت علة نومتة لان بليل يضل كاعد واني سهرانة ويا واتعب

بعدني. ما غفيت واسمع گبت لعيطة جوة. فزيت بقلق ونزلت اركض عل درج وكفت واسمع سلطان وعمي يحجون. وميس موجودة وتبجي وتحجي علة سلطان.

اسمع سلطان يكلهة... انت شجابج هنا.

وهية تردلة... هااذ لهامك. ابوو لنسوان.

وماشوف الا ميس واكعة بل كاع بسبب راشدي من سلطان

كامت تبجي وتغلط علي وراحت دفعت عهد بقوة وكعت بل كاع عهد وتاذت وتصيح... انتي شلاعبة. بعقلة ومخبلتة عليج احجي ولج.

لزمهة سلطان ضربهة راشدي ثاني ودفعهة عن عهد

وسحب عهد گعدهة عل غنفة وگعد يتفحص ايدهة الي نضربت بل گاع بسرعة زرگت يمكن نرضت وهاي ناطة بل بجي

عمي وعمتي واسر بس مصدومين وميس مخلت شي محجتة.

تگول لعمي.... والله يعمي هوة نايم يهذي باسمهة. وقبل فترة من تصوب من طلع من لعمليات كلة يصيح بسمهة. ماخليت شي ما سويتة وتالي عيونة تميل لغيري والمن لعهد لجاهل.

سلطان تخبل كام تعارك وياهة. وضربهة. وسحبهة ويا للسيارة يگللهة. انتي حسابج بل بيت مو هنا.

بس هية گلبت لدنية بل صياح وعمي سحبهم. للداخل لان عيب منا لجيران وهاي تصيح مثل لمخبلة

دخلو للصالة. وعمي كعدهم يريد يفهم منهم شنوو هاذ لكلام.

عهد. ضلت مصدومة وتبجي بخوف وصعدت ركض لغرفتهة.

صاح عليهة عمي.... تعاااي عهد ارجعي

سلطان... عمي خليهة تروح.

احمد... لا اريد افهم منهة هاذ لكلام لنگال عليهة صح

سلطان.... عمي عوفهة. تروح. هية متعرف اني حبيتهة. بگلبي متدري بكل لسالفة وهسة. اذا تسئلهة منو تكرهين اكثر واحد بل عالم راح تگلك سلطان

احمد عصب.... شنووو هاذ لحجي سلطان اني حاسبك الهن اخ جبير مو الگاك تخطب بيهن. بعدين من كل عقلك مخلي عهد براسك وهية زعطوطة. شوف الفرق بينك وبينهة شكد انتة ٣١ سنة وهية توهة داخلة عل ١٧ انتة متزوج وهية بعدهة طفلة. برايك هاي مال واحد يحطهة ابالة هاي زعطوطة اذا ما تنطيهة جبس واندومي تگلب لبيت علة راسك مو مال مسئولية. وزواج. شيلهة من بالك ابني وماريد. اسمع هاذ لحجي مرة ثانية. ولا اسمحلك. تمد ايدك علة مرتك مرة ثانية من حقهة. تغار عليك انت زوجهة.

سلطان.... عمي كلامك علة راسي بس عهد احبهة. وما اعوفهة لو اخذهة غصباً عنهة. ما اعوفهة.

اسر..... هاااي شبيك سلطان لبنية متريدك متشوفهة تتخبل منك نوب غصباً عنهة وين صايرة هاي

سلطان.. اسر انت اسكت ترة والله انهة عليهة وليتقدملهة لو جانة ابن عمي الا احط جيلة براسة.

عهد صاحت بدموع وحرگة گلب.... شنووو قصدك. والله لو تمووت. ما اقبل اتزوجك. اعرفك تكرهني وتريد تحقر وياية. بابا لتصدگة ترة هاذا واحد جذاب

جانت واكفة علة نص لدرج وتحجي من شافت سلطان گاملهة صعدت ركض لغرفتهة. وغفلت لباب عليهة

رجع سلطان گعد بمكانة ويخوزر بميس

كالة عمي... ابني سلطان ليش تخلينة. نتخارب تالي وكت عوف عهد متفيدك. جاهل هاي ونت صعب متكدر تتحملهة.

رد.... اتحملهة اتحملهة انتو ما عليكم من هاي لناحية

اسر.... هسة شنوو قافل. عليهة.

سلطان.... اي لو الي لو متصير لغيري

احمد.... عمك ابو عبود. طلبهن لولدة. من زمان. ورايد عهد لثائر وعد لحمزة.

نطت وعد. . بابا اني ماريد حمزة وما افكر اتزوج اريد ادخل كلية طب واكمل دراسة. حمزة تخرج وهسة لازم يتزوج وهوة اكبر مني

احمد.... وهسة اني شكول لعمجن وحدة متريد وثانية لعينتين حاط عينة عليهة.

سلطان... لا ناهي عليهة.

اسر... سلطان انت متزوج واختي صغيرة.

سلطان عصب.... هسة حجتكم لعمر ماتزوجهة هسة انتضرهة تكبر يلة

احمد... اكولك انت شو مدري شلون تحجي لبنية متريدك شلون نقصبهة.

سلطان... عمي عوفني اني احجي وياهة ترة والله ان ما صارت من نصيبي طلقتين احط وحدة براسهة وحدة براسي وافض. لشغلة

اسر.... لا انت صدك متخبل هاذ مو حب هاي انانية وتملك

سلطان.... وليكن مستحيل اعوفهة

احمد.... لحجي مابي فايدة وياك اخابر ابوك ونگعد نتفاهم

سلطان... سوي لتريدة عمي ماتراجع عنهة للموت اذا متت وهية علة ذمتي عود خل تتزوج. وراية.

سنا.... والله يعمة انت خوش رجال بس عهد متكدر تعيش وياك هاي خبلة مو مال كتل وصياح ليعاندهة تعاندة لو يموتهة مترضخلة

سلطان... اني اعرف شلون اتعامل وياهة.

احمد.... هسة مصر علة قرارك هاذ

ميس... عموو والله ميتزوج اذا ميطلگني

سلطان.... ونتي شتريدين مني موفرلج كلشي مناقصج بعد عليش هل عيارة. وبكيفج بعد تريدين تطلگين وتروحين يم ابوج تضلين تگو*** براحتج. ولي روحي وتصلج اوراق طلاقج هناك تريد تبقين معززة مكرمة واصرف عليج بس متدخلين بحياتي هم بكيفج ما اجبرج علة شي بس انصحج تضلين لان اذا اطلگتي تضلين. مكفخة لابوج

ميس... ليش هسة اني مصايرة مكفخة الك

.. كتلج اعترفي عل سوة بيج هيج حتة اخذ بثارنة منة وانتي ضليتي ساكتة وهذاك لگو** يسرح ويمرح بكيفة.

ميس... انتتتت دتعيرررني. باغلاطي. يا اخي انسة الله بعزتة وبجلالة يغفر ويسامح  وانت بشر تغلط حالك حالنة ومتغفر لاحد

كام وكف واخذ تلفونه ولسويج باوع لعمي وكال... عمي ترة اني عند كلامي والله وتدري بية كولش زين كول وفعل

ولتفت لميس حجة بامر.. كدامي عسيارة يلا وماريد اسمعلج صوت

كامت وكفت بس منتهية بجي.

باوعت علية جنت واكفة عل درج وكالت.... هاااي حوووبتج انتي طلعت بية وشسويت وياج ندار بية وللله وكت اني احب سلطان. اكثر شخص جنت ابغضة

وطلعت. ولحگهة سلطان

عمي حيل تعب وصعد ضغطة سويتلة عصير ليمون. ونطينا حبوب ضغط وستعدل شوي يكول.... خايف من سلطان مخبل يسويهة. ويكتلهة ويكتل روحة هاذ اذا راد شي ياخذة بكل قوة ويحب لعناد حتة لو ابو يكف بوجهة ميكدرلة هوة حطهة براسة بعد شيخلصهة منة

اسر... يابة افضل حل تخلي يعقد عليهة بس مثل ما كال وينتضرهة. الى ان تكبر يجوز بعدين تتغير وتحبة لو هوة يبزع ويعوفهة

احمد.... والله مادري خل يجي اخوك باجر ونشوف شنسوي بهل مصيبة

وصاح وعد كللهة... اصعدي يم اختج ولتعوفينهة لتسوي بنفسهة شي يقصد ((تنتحر))

راحت وعد يمهة

وعمي وعمتي ضلو يسولفون بل موضوع سلطان صدمهم كلهم من كال اني احبهة.

ما اخفي عليكم جنت شاكة من زمان بس كلت يمكن يتهيئلي ومو حقيقة

لان هواي احسة يغار عليهة ومن يشوف ثائر يمنة يضل بس يخوزر بيهة تالي طلع يحبهة والله انتو يا جنس ادم مالكم أمان

..........

ثاني يوم ساعة  ب ٥ لعصر    جنة دنحضر  للعشة علمود ايسر وايمن جايين  خابرني بل ٤ لفجر كال راح انطير من لمطار.   ونشالله بعد ١٢ ساعة اني اكون بأرض لوطن  

..  مو هواية  ١٢ ساعة

...  لا مو راح ننزل بثلاث مطارات  يلة نصل لطيارة
متتحمل   تمشي ١٢ ساعة.

...  اممم توصل بالسلامة يارب 

....  الله يسلمج حب ادعيلي  

...  ربي يحفظك ويسعدك ويوفقك ويوصلك النة بسلامة انتة وايمن. 

....  اي عفية  هاذ صاحبي حتة لدعاء اقسمي بينة 

....  علة فكرة بديت اغار منة  انتة تحبة اكثر مني.

....  كلمن اله معزة شكل  انتي غالية وهوة غالي

ودعتة واني ادعيلة يوصل بسلامة.  وصاني علة جسر  وسدة

.....

سنا...  هاا زهورة كلشي جاهز

زهراء....  اي عمة ولدولمة خليتهة عل طباخ. بين ميوصلون تستوي

....  عاشت ايدج.  نسرين هسة خابرتني كالت منتضرة قاسم يرجع من لدوام حتة يوصلهة.

....  تلحگ تجي قبل لعشة

...  والله مادري. اشوف

دنحجي ودخلت عهد بعد عيونهة. مورمة من لبارحة تبجي بس لان درت بايسر راح يجي راحت بدلت وخلت مكياج خفيف حتة تخفي  ورم عيونهة.   

عهد....  سمعت لمكروة راح يجي هم 

سنا....  ماما ابن عمج ميصير تحجين. علي  هيج

عهد....  ماما اكرهة والله

سنا...  ميخالف اكرهي بس احترمي.  

عهد...  خل يولي 

سنا....  من ولي لولتج    اكلهة احترمي  مدري شتحجي

عهد...  اهو لو ادري ما نازلة.  راح اولي اصعد عود من  يصعد ايسر لغرفتة ادخل اسلم علي لحد يدز علية.

سنا...  روحي بعد احسن.  خاف تذبيلج كلمة جدامة  وتخبلي

صعدت لغرفتهة  تتئفئف 

شوية وسمعنة صوت  لترحيب ولضحك طلعت عمتي وعلگتهة بل هلاهل. من شافت ايمن يمشي علة  رجلة  دخلو كلهم للمضيف بس سمعت ايسر دخل للصالة ويا عمتي. حاضنتة. وتبوس بي.   اسمعة يگوللهة. لبنات وين لعد

ردت...  فوگ  يمة اصعد  ارتاح وسبح بين ميصير لعشة

هزلهة راسة. ودخل للحمام.    لجوة

اني ستغليت لفرصة وصعدت ركض   للغرفة.  دخلت غسلت وبدلت وخليت عطر.   وفليت شعري وشلت جسور جان توة گاعد من لنوم. او يمكن كعد علة صوت  لطرگعة مالتي  

نفتح لباب ودخل ايسر  باوع علينة بلهفة وبتسم   ترك لجنطة  من ايدة واجة يمشي بلهفة علينة  شبگني  حييييل

.................................  يتبع

للبارت تكملة

لاتنسون تصويت وتعليق بين فقرات لبارت. 

احبكم دمتم بخير