يعني نهاااااي نهااااي ما كنتِ عارفه انو سامي بحبك؟!!
قريت رسالتها عشر مرات! ....شنو! سامي بحبني؟!!
قلت ليها حب شنو يا روان لا لا إنتِ أكيد فاهمه غلط ، قالت لي ما فاهمه غلط و الحاجه دي واضحه حتى إنو يوم جا سألنا اذا في زول في حياتك قلنا ليهو لا ما عندها زول قال لينا طيب حصلت اتكلمت ليكم عني و و يعني من خلال كلامو عرفنا إنو عايز يعرف انتِ بتنظري ليهو كيف أو هو بالنسبه ليك شنو بس المؤكد إنو بحبك ، طبعاً نحنا لمن عرفنا إنو بحبك عديل قلنا ليهو مها ما بتحبك والله يا سامي عشان ما تتعشم ساي هي قالت مستحيل تعرس واحد بدرس في جامعه خليك من لمن يكون دفعتها ، المهم بقينا نقول ليهو الكلام دا في كل مره لحد ما في مره عشان كدا بقى يشمنا و ما بطقنا! !
ختيت يدي على خشمي و أنا بقرا في رسالتها! !....قلت ليها طيب ليه ما جبتوا لي سيره؟
دخلت سمااهر و قالت لي لأنو قلبك رهيفه و مسكينه ساي لو كان عرفتي إنو بحبك غصب عنك كنتِ حـ تحاولي تحبيهو و تجبري نفسك عليهو بس عشان ما تكسري قلبو ، عشان مصلحتك بتهمني ما قلنا ليك و هسي لو ما حركات سامي غاظت روان ما كانت جابت ليك سيره ،، قلت ليهم حتى لو كنتِ مسكينه و قلبي رهيف زي ما قلتي بس مستحيل اغصب نفسي على زول! سامي زول كويس و زول حاره و انا مستعده أعمل أي شي عشانو إلا قصة الحب و المواضيع دي! ....صدقوني سامي دا أنا بشوفو زي مازن أخوي!
سماهر قالت لي إنتِ بتشوفيهو كدا بس هو لا!
المهم الموضوع دا لفى لي راسي و بقيت اليوم كلو سرحانه و بالي مشغول! ....قلت لازم لازم اقابل سامي و اتكلم معاهو ، في نفس اليوم دا إتصلت عليهو بليل بس ما كان برد علي!......لحد اليوم التاني انا بجرب اتصل بس ما عارفه تلفونو دا جادعو وين!
من غير ما أركزت دخلت جهات الإتصال و إتصلت على عدنان ، الغربيه إنو رد طوالي و أول ما فتح الخط قلت ليهو يا عدنان سامي دا وين؟ بتصل عليهو بس ما برد علي!
بعد مسافه قال لي موجود .....قلت ليهو طيب ليه ما برد علي ياخ انا من أمبارح بتصل عليهو ، متأكد انو تلفونو معاهو؟
قال لي آي.....قلت ليهو طيب........طبعاً طبعاً سكته و إنخلعت لمن اكتشفت اني اتصلت على عدنان! يعني لو شاف رقمي دا و الرقم الكان برسل ليهو في الواتس و رسايل الـ SMS حيعرف إنو دي أنا! طيب ليه رد وليه جاوب علي عادي من دون ما يسأل انا منو و......قاطعني و هو بقول لي أيوه عرفت!....صراحةً كنت عارف إنو دي إنتِ ، بعد مسافه طويله صلت ليهو كذاب والله ما كنت عارف! قال لي الشريحه دي مش مسجله بإسمك! اذاً عادي اعرف اسم صاحب الرقم!
سكته ساي و بقيت اقول في سري طيب ليه ما حظرني! و ليه ما حصل رد على رسايلي و قال لي انا عارف أنو دي إنتِ؟
_ عايزا شنو من سامي؟
قلت ليهو نعم؟
_ قصدي يعني لو الموضوع مهم أكلمو ليك
قلت ليهو لا لا بس قول ليهو يرجع لي ، قال لي تمام و قفل الخط و خلاني مستغربه فيهو! بس شويه شويه بقيت أبتسم لحد ما قعدت أضحك براي! الموقف قد يكون بسيط و عادي بس بالنسبه لي موقف عظيم شديد و حلو! عدنان الما بتكلم مع زول خالص و ما عندو شغله بزول اتكلم معاي! و حصلت و وصلني من تلقاء نفسو! !
حسيت الغرفه ما سايعاني من شدة الفرح ، من دون ما أتردد دخلت قروبنا أنا و صحباتي و بإندفاع حكيت ليهم الحصل من يوم سافر و كنت برسل ليهو رسايل برقمي الجديد لحد المكالمه الهسي دي! ....بس ما كانو خاشين ، المهم انا و مزن مشينا السوق و اليوم كلو كنا هناك ما رجعنا إلا مع المغرب ، طبعاً لمن رجعنا انشغلنا في الحاجات و بقينا نحسب و نضرب و ماما تكتب الحاجات الناقصه للمره التانيه ، فجأه مازن جا كان مبتسم ساي ، مزن قالت ليهو عاد من خطبت سنونك ديل لمن نشفن من ضربة الهوا ، قال اعوذ بالله من هظار البايرات ، طبعاً لمن قال كدا ضحكت ضحك ، قالت ليهو منو دي البايره دي؟
ضحك و قال لي هي عارفه نفسها ، قالت ليهو خلاص خلي زول غير البايره دي يقيف ليك على عرسك ، ضحك و قال ليها معليش ما تتحسسي بهاظر معاك ، ماما قالت ليهو هظارك بايخ في زول بقول على أختو بايره؟
قال لي خلاص معليش آسفين يا حاجه ، اها قولي لي الناقص شنو تاني؟ ....قالت ليهو كدي خليني اقعد برواق و بعدين بكتب ليك الناقصنا ، قال ليها تمام و طوالي مشى على السلم ، فجأه كدا إتلفت و قال لي مهاوي عليك الله اعملي لي كباية شاي ، قلت ليهو طيب ، المهم مشيت عملت ليهو الشاي و وديتو ليهو ، لمن ختيت ليهو الشاي و كنت حـ أطلع قال لي مالك إنتِ؟
قلت ليهو مالي شديده و لضيضه!
قال لي بس انا ما شايف كدا! ليك فتره متغيره! قلت ليهو بالجد؟ غيتو ما حاسه بأي تغيير!
شال رشفه من الشاي و ختاهو و قال لي صحبتك عملت ليك شنو تاني؟ ؟
قلت ليهو ما فهمت! !
قال لي يومتا مزن قالت لي انو صحبتك ميامن ولا منو شاكلتك عشان نزلتي صورتها مع خطيبه! و عشان عارفك رغم سذاجتك و طيبتك بتتأثري بالكلام الشين ، يعني لو سبب زعلك و تغيرك دا نقاش صحبتك معاك كلميني عادي ، قلت ليهو لا لا ما كدا و ذاتو موضوعي معاها ما أخذ منحنى تاني ، قالت احذف الصوره و حذفتها و هسي بنتعامل عادي! .....قال لي متأكده؟ قلت ليهو آي! قال لي مع انو الواضح ما بقول كدا و متأكد انو في شي في بالك بس خليك عارفه إني معاك متى ما حبيتي تشكي لي عن حاجه مضايفاك تعالي من دون ما تترددي ، مهمها يحصل معاك تعاليني ، شاوريني ، احكي لي ، اشكي لي ، ما عارف المانعك تقولي لي شنو مع. اني أخوك في النهايه يعني حتى لو حصلت بيناتنا نقاشات يوم من الأيام و انا رفعت صوتي عليك أو ضربتك عديل في النهايه إنتِ اختي و مصلحتك بتهمني و أكيد ما برضى اشوف وحده من أخواتي زعلانه أو في شي مضايقها ....
طبعاً كلامو بكاني ،، ما عارفه مالي الأيام دي ببكي على اقل الأسباب ، لمن شافني ببكي بصوره جاده قعدني و قال لي اها شفتي بكاك دا بكى زول كاتم حاجه جواهو ،، قلت ليهو ماف حاجه بس دا بسبب كلامك ، عاين لي مسافه و سكت ، مسحت دموعي و قلت ليهو ماشه اشوف ماما و مزن بعملو شنو ، اول ما طلعت منو مشيت غرفتي ، طوالي اتذكرت إني كلمت عدنان يقول لـ سامي يرجع لي ما عارفه كلمو أو لا ! ! بعدين معقوله سامي ما شاف مكالماتي! !!
مسكت تلفوني و اتصلت عليهو تاني بس ما رد ، الساعه تقريباً كانت عشره! لمن ما لقيت رد إتصلت على عدنان ، أول ما فتح الخط قلت ليهو عدنان إنت كلمت سامي انو يتصل علي؟
قال لي آي كلمتو! ....قلت ليهو طيب ليه لا رجع لي لا برد لمن اتصل عليهو؟
ما عارفياخ شوفو لي وين ، هو ما معاك يعني؟_ لا ما معايطيب وين هو؟_ ما عارفقلت ليهو اف ياخ يعني طفش وين؟ طيب شوفو احتمال ما كويس !_ قال لي كويس قبل شويه اتصل عليقلت ليهو بالجد؟_ آيفي نفسي قلت سامي دا مالو كمان؟ يمكن زعلان مني عشان حذرني من ناس سماهر و انا بتعامل معاهم عادي؟!! طيب انا ما شفت منهم حاجه تخليني آخد حذري منهم و ما بحب اخرب علاقتي بزول بسبب كلام وصلني من زول تاني!لمن حسيت انو عدنان حيقفل الخط ، قلت ليهو بإستعجال دقيقه دقيقه يا عدنان ....عايزا اسألك أمك بقت كيف؟_ كويسه ، جبناها البيت من زمان 😊قلت ليهو كويس والله حمدلله على سلامتها ، هسي انت جنبها؟_ لاقلت ليهو طيب تمام و قفلت الخط و انا مغيوظه من برودو و الطريقه البتكلم بيها معاي! بس مع ذلك ما لمتو قلت هو طبعو كدا و أنا براي القررت اتحدى نفسي و ادخل حياتو و أحاول اغيرو بس شكلو زي ما قال سامي ما ناوي يتغير ، المهم هسي سامي دا اصل ليهو كيف؟ ما عرفتو مالو فجأه كدا ما عايز يرد علي! .....قعدت مسافه و بقيت افكر في نفسي قلت هسي انا جاده عايزا اشوفو عشان اقول ليهو انا ما بحبك والله يا سامي و بعتبرك زي أخوي! ! صعب علي والله بس كمان ما عايزاهو يتعشم زي عماد ، اف هسي اعمل شنو؟فجأه كدا مزن جات داخله و هي شايله معاها فشار و عصير ، فتحت الشاشه و جابت mbc2 ، قالت لي في فلم ظابط حـ يبدا بعد شويه ، قلت ليها ما بتقدري تحضريهو في غرفتك؟ قالت لي نوووو ما بقدر ، قالت لي صحي بالمناسبه مالك إنتِ؟قلت ليها بسم الله مالي يعني؟ ؟قالت لي مازن بوصي عليك ساي و من قبيل شغال لي أمشي شوفيها مالا!قلت ليها غيتو مازن دا ما عندو موضوع قبيل سألني و قلت ليهو ماف حاجه! ! قالت لي بالجد هو ماف حاجه؟ ....ما يكون بتحبي؟قلت ليها احب شنو عليك الله!قالت لي ما معروف ، اكتر حاجه بتسبب اكتئاب للبنات الحب ، قلت ليها خلاص انا ما من البنات ديل ، فجأه الباب ضرب ، مزن قالت ادخل يا مازن ، جا داخل و قال لينا الفلم لسه ما بدا؟مزن قالت ليهو باقي ليهو 5 دقايق ، قلت ليهم إنتوا اليوم حاسين بشنو؟قالوا لي ولا شي ، عايزين نحضر فلم سوا مع بعض في مشكله! !المهم على بال ما فلمهم دا يبدا دخلت الواتس ، لقيتهم رادين على كلامي الرسلتو ليهم بخصوص عدنان ، روان قالت لي ما شايفه انك لاصقه ساي في ولد الناس يا مها؟ معليش ما تزعلي من كلامي ، ميامن قالت ليها ماف حاجه بتزعل دي صحبتنا و نحنا عايزين مصلحتها ، صدقيني الأولاد ما بحبوا البت البتفرض نفسها عليهم ، ايوه نحنا عارفنك زوله على نياتك و ما عندك النوايا الخبيثه دي بس دا ما معناهو إنو كل الناس حتشوفك بالطريقه النحنا شايفنها ، الولد دا يا مها إتلايقتي معاهو اكتر من اللزوم ، يعني اتبرعتي لأمو بالدم قلنا ما مشكله لكن تمشي ليها في المستشفى في هنا المشكله و الخفه ، هسي اهلو حيقولوا عليك شنو؟روان : والله حيقولوا بت خفيفه و ماشه ساي بس و حابه تتخافف و تتظارف معاهم ، يعني هو لا بعرفك لا بتعرفيهو سبب واحد يخليك تمشي المستشفى عشان تشوفي أمو ماف ، معرفة من متين دي 😂😂😂باقي الكومنتات كلها ملوها ايموشنات ضحك! بالجد كلامهم وجعني! عمري ما حسبتها كدا و ما حصل فكرة الناس بتشوفني كيف أو بتفسر تصرفاتي بأي طريقه! انا أي حاجه بحس اني مفروض اعملها طوالي بعملها بدون ما اتردد طول ما إنو الحاجه دي ما بتزعج زول أو تسبب ليهو مشكله!سماهر قالت ليهم خفوا عليها شويه يا بنات ، مها ما عملت حاجه غلط ما تلوموها سايقريت رسايلهم بس ما رديت عليهم بس كلامهم بالجد دخل جوه قلبيالمهم بعد اسبوع من الكلام دا مشينا ودينا الشيله ، طبعاً سامي لحد اللحظه ديك ما برد علي و لمن ارسل ليهو ما بقرا رسايلي والله لمن فكرت امشي ليهو في بيتو ، طبعاً مازن عرس مازن و سماهر كان باقي ليهو 3 أسابيع و اصلاً هي قبل ما نودي ليها الشيله كانت محبوسه ، طبعاً انا و مزن زرناها كم مره قبل الشيله ، في يوم بابا جا لقاني زهجانه ساي ، قال لي صابتك عين ولا شنو !! قلت ليهو ليه مالي؟قال لي بقيت اشوفك دايماً بتفكري و سرحانه! في شنو؟ قلت ليهو دي الآثار الجانبيه للحياة البعد التخرج ، قال لي ذكرتيني كنت عايزا اقول ليك بعد دا تنزلي و تشتغلي في الشركه ، قلت ليهو لسه بدري حاسه نفسي ما قدر المسؤوليه دي 😂 لكن بمشي معاك الشركه بما انو ماف موضوع ، قال لي تمام جهزي نفسك انا طالع هسي ، فعلاً جهزت نفسي و مشيت معاهو ، كـ عادتو طول الطريق بونسني و بحكي لي مواقف مضحكه عشان اضحك ، يعني تلقائياً نسيت كلها حاجه ولـ ساعه رجعت لطبيعتي القديمه و بقيت اتشالق و اضحك و اتكلم معاهو بصوت عالي و الضحك ما يديك الدرب ، في الآخر مسكت بطني و قعدت اضحك شديد ، قلت ليهو بابا لو استمرينا كدا حـ نعمل حادث ، قال لي خلاص يلا انتِ اسكتي عشان انا ذاتي. اسكتي ، الإتنين سكتنا بعد شويه كدا قال لي زمان زمني التجنيد الأجبـ......قلت ليهو باااااباااا ،، قال لي خلاص سكته ، آخر الزمن!المهم اول ما وصلنا الشركه مسكت يدو لمن جينا داخلين ، قال لي اهااا عايزا تجيبي لي الهوا و تطيري فراشاتي؟قلت ليهو فراشاتك دي شنو؟ .....لمن فهمت ضحكت و قلت ليهو باباااا جادي إنت؟ اصبر لـ ماما ، قال لي ماسكه يدي و بتقولي لي اصبر لـ ماما؟ضحكت و قلت ليهو بس لو اشتريت لي عربيه ما حـ أكلمها ، قال لي خلاص كلميها ....قلت ليهو وااااي انا ما بقدر عليك 😂المهم اول ما جينا داخلين لاحظت إنو في موظفين جدد ، قلت ليهو القدام مشوا وين؟قال لي كانوا ما شايفين شغلهم رغم التحذيرات ما اتحسنوا فـ اضطرينا نفصل جزو منهم ، في بالي قلت يا ربي نور انفصلت ولا موجوده؟بابا قال ليهم السلام عليكم ، كلهم وقفوا و سلموا عليهو و انا لحد اللحظه دي مكنكشه فيهو ، لمن لقى الموظفين بعاينوا لينا قال ليهم بالمناسبه دي بتي! ضحكوا و كل واحد شاف شغلو ، المهم بابا مشى مكتبو و انا بقيت أتلفت ساي لحد ما فجأه جاني صوت بقول بتفتشي علي ولا شنو؟أول ما إتلفت لقيت نور وراي! قلت ليها لا ما بفتش عليك ، ضحكت و قالت لي حتى في ابسط الحاجات ما بتعرفي تكذبي يعني كأنك ما صحبة سماهر ، قلت ليها ما عايزا اتناقش معاك ، اول ما اتحركت من جنبها قالت لي لسه ما لحقتي أخوك؟ صدقيني سماهر دي لو دخلت بيتكم العافيه دي تعدمكم ليها ، ما عارفه منتظره شنو بعد ما قلت ليك الحقيقه كلها! البمنعك شنو تنقذوا نفسكم من البت المصيبه دي! قلت ليها لو سمحتي ....قاطعتني و قالت لي يعني انتوا كلكم طبعكم كدا؟ باردين بالشكل دا! اخوك انا رسلت ليهو قبل اسبوع من رقم تاني و وريتو حقيقة العايزها تبقى مرتو بس مع ذلك ما رد على الرساله و ما عمل أي حاجه! !قلت ليها منو الطلب منك ترسلي ليهو! انتِ مالك و مالو ياخ ليه موضوعهم ماكل معاك جنبه! اذا أنا اختو ما حكيت ليهو إنتِ منو عشان تحكي ليهو؟قالت لي صدقيني عشان انا بعرف حقيقة بت عمي كويس ما عايزاها تخرب حياة زول ، قلت ليها واضح انك العايزا تخربي حياتهم! ....شوفي يا نور لو عندك اي مشكله شخصيه مع بت عمك رجاءً ما تدخلي مازن و تحاولي تشوهي ليهو صورة سماهر ،، اتنهدت و قالت لي على كيفكم بعد دا بس اتذكري كلامي دا كويس! اول ما هي مشت مني كدا مازن جاني و قال لي الموقفك مع البت دي شنو؟قلت ليهو جات تسلم علي بس ، قال لي ما تتعاملي معاها خالص ، انا لو علي دقيقه وحده ما تقعد في الشركه دي بس ما حـ تنطرد لأسباب شخصيه...هزيت ليهو راسي بس و مشيت معاهو مكتبو ، بقى شغال على الابتوب و انا بفكر ساي في كلام نور! ....اتذكرت اني ما سألت سماهر انو ليه ما حصل قالت انو نور بت عمها! انا الأحداث دي جاطت لي في راسي و مخي بقى زي الطاحونه! ! بس كل مره اقول عايزا اسأل سماهر بـأجل الموضوع!_عليك الله بتفكري في شنو! ! حيرتيني معاك يا مها!قلت ليهو ولا شي ساي بس 😅فجأه تلفونو رن ، بعد ما رد عليهو قال لي حـ أمشي غرفة الإجتماعات في ، بإذن الله اليوم حـ نوقع صفقه مربحه شديد مع شركه قطريه ، قلت ليهو حلووو والله ، بالتوفيق ، المهم هو مشى و انا قمت من مكاني و قعدت في كرسيهو حق المكتب و بقيت ألف بيهو ساي ، شويه كدا جا عامل و جاب لي مويه و عصير و أكل ، قلت ليهو دا مازن القال ليك تجيبهم لي صح؟ قال لي ايوه ، قلت ليهو طيب شكراً ليك ، بعد ما مشى اكلت و شربت ، بعدها دخلت الفيس و بقيت افسبك ، طلعت منو و دخلت الواتس و اتفاجأت شديد لمن ظهرت لي الحاله حقت عدنان! !....قلت معناها سجل رقمي ، عيوني بقت قلوب قلوب ، كان خاتي صورتو و هو واقف جنب العربيه ، كنت حـ ارد على الحاله بس اتذكرت كلام ميامن و روان لمن قالوا لي انتِ لاصقه في ولد الناس و فارضه نفسك عليهو ، كتبت في حالتي : في إحساس جواي حاولت قدر الإمكان أمنعو ، في شكوك كتيره اتجاهلتها ، في قيل و قالت كميه رميتها وراي في صوت جواي عملتو صامت ، لأني ما عايز يكون جواي أدنى شك اتجاه الناس ديل ، ما عايزا علاقتي بيهم تكون مليانه شوائب ، خوفي انو كل الحاجات الرميتها وراي دي و اتجاهلتها ألقاها قدامي ، بقت تراودني مخاوف كتيره حتى بيني و بين نفسي ما بتكلم فيها ، فكرة الخذلان و النفاق من أقرب الناس دي براها بتخليني أرتعش ....بتمنى من كل قلبي إنو ما يجي يوم اتصدم فيهو في حقيقة عزيز علي ...كتبت الكلام دا و قفلت الشبكه ، بعد شويه طلعت و بقيت أتجول في الشركه ، بعد اللف الطويل دا نزلت للكافتيريا التحت ، طلبت قهوه و قعدت هناك ، شربتها بمزاج و رجعت قعدت في مكتب مازن و بقيت ألف بالكرسي ، وقفتو و بقيت متوجهه على الحيطه ، فجأه كدا الباب فتح ، إتلفيت بالكرسي و قلت مااااز.....سكته لمن لقيت الواقف قدامي دا ما مازن! !يتبع......