وجدان جتها رساله غيرت كل شي تأكدت انه شخص صادق ويراقبها لأنه كان محتواها :اليوم رأيتك مع أخوك كان يقبل رأسك وكنتي تصافحينه تمنيت ان اكون مكانه لأشم عبير عطرك وانظر لعينيك التي مثل لوحه ابدع برسمها الخالق ،ودت لو تكون الفرحه فرحتين وتكونين من نصيبي اليوم انظر اليك بكل ثقه لأنك (حلالي).
وجدان فجأه تذكرت يوم شافت تركي ماسك الجوال واستنتجت انه هو المعجب السري الي يرسل لها بس الوضع ما كان عاجبها وكانت تبي توقفه عند حده طلعت من بينهم بدون ما يلاحظون ويوم خرجت برا البيت شافت تركي يجيب اغراض وبينزلها البيت صرخت عليه :لقيتك تعال تعال
تركي :انا
وجدان :اي تعال محد غيرك هنا
تركي خاف منها وقرب وقال :هلا وش بغيتي
وجدان :انت وش تبي فيني اعتقني خلاص خلاص ما احب ذي الحركات انت لو تدري ان عليها عقاب وغرامه وسجن بس خلاص فات الفوت برفع عليك قضيه وما يفكني منك الا المحاكم
تركي :اي حركات وأي محاكم وش تقولين انتي؟
وجدان :تنكر بعد ؟ ما تدري انه يمديهم يراقبون جوالك ويطلعون انه انت الي ترسل
تركي :لحظه لحظه اهدي انتي وش رسايله ما ارسلت لك شي ولا اعرف شي عنك غير انك وجدان المحاميه الي بكت من الكلب
وجدان :لحظه لحظه بوريك يمكن تتذكر
تركي :اشوف
وجدان وهي بدت تدمع وصوتها تغير بس تحاول تبان قويه :هاه شوف هذي مو منك ؟ وهذي وهذي وخمسين رساله غيرها
تركي :اشوف عطيني
وجدان :اشمئز منك ومن رسايلك لدرجه ما بعطيك جوالي تلمسه ولا اقول خذ خذ معد ابيه ذا الجوال لأنه فيه كل قذارتك
عطت الجوال لتركي وجت بتدخل وتركي شاف الرسايل ونادها :لحظه تعالي
وجدان :وش تبي ؟ تبي تتأمل عيوني الي مثل لوحه ولا ايش ؟
تركي :فهمتي غلط انتي ما اعرف اكتب رسايل كذا ولا شي
وجدان :كيف
تركي :اساسًا ما اعرف ذا البرنامج
وجدان :حذفته عشان تخبي جريمتك صح ؟
تركي :ولله شوفي ببحث اسمه بالاب ستور وشوفي ماقد حملته
وجدان :تراني محاميه ما تقدر تخدعني يمكن عندك جوال ثاني
تركي :ما عندي ولا جوال غير ذا
وجدان جلست تحت :اجل مين مين هذا الي ماخلى ليلي ليل ولا نهاري نهار بكل لحظه يرسل وصف وقفتي مع اخوي بتفاصيل حتى انا ما لاحظتها محد كان موجود الا انت وهذاك الولد مشاري ماقد قابلته بحياتي ولا شافني
تركي :على حسب ما اعرف عن المحامه كل شي موضع للشك
وجدان :كيف تدري ؟ اليوم قلت ذي الجمله لأهلي واضح انه انت
تركي :اتابع مسلسل اسمه ... عن المحاماه (ما بذكر اسم مسلسل لأني ما ابي اخذ ذنب الي يتابعه ولأني اساسًا ما اعرف مسلسلات تتكلم عن القضايا والمحاماه 👍)
وجدان :نفس الي اتابعه
تركي :توني طحت عليه قبل اسبوعين
وجدان :معلينا من المسلسل ذا الي يراقبني ابي اصيده بأي شكل وارتاح منه تعبت من الخوف منه
تركي :مو انتي المحاميه وجدان الي ما تخاف الا من الكلب ؟
وجدان تضحك :خلاص شكلك ما بتنسى
تركي :مستحيل انسى كيف صرختي وقلتي اي بكيت وجدان المحاميه تبكي من كلب صغير
وجدان :لا تعلم احد عن الرسايل ذي ولا عن قصه الكلب
تركي يبتسم:حلو صار عندي سرين من المحاميه بعدين اذا صار عندك اعداء وجو عندي بيشترون اسرارك عشان يفضحونها مارح ابيعها لهم بمليون زي ما سوى صديق البطل
وجدان توترت :نقطتين بوضحها لك ما اعرف بتفرق بحياتك ولا لا بس اول شي احنا مو اصدقاء اوك ؟ ثاني شي عالم المحاماه مو نفس المسلسل خصوصًا احنا بالسعوديه نحكم بشرع الله بالخارج يحكمون غير واضافه الى انه مسلسل يعني ٩٠٪من وحي الخيال
تركي :ممكن الخيال يكون حقيقه مثال شخص نرجسي حب وحده وصار يقدم لها كل شي عشان يرضيها ويوم خطبها اهلها رفضوا بحجه انه من قبيله ثانيه جرب اكثر من مره وكل مره كانوا يرفضونه لين اخر شي سمع انها تزوجت واحد من اقاربها الشخص النرجسي هذا بيوم من الايام كانوا يتوقعون يرمي نفسه بخطر ؟
وجدان :لأنه نرجسي لا
تركي :راح انتحر لما عرف وش صار
وجدان :معقوله الحب يسوي كذا ؟
تركي :واكثر بس ما نتكلم عن الحب نتكلم عن الخيال انه لازم نتوقع اي شي من الانسان لأنه انسان
وجدان :بسألك سؤال
تركي :تفضلي
وجدان :انت وش تخصصك ؟
تركي :إداره اعمال
وجدان :يدرسونكم فلسفه بإداره الاعمال ؟
تركي :لا بس يدرسونا كيف ندير الاعمال والشغل من اسمه يعني ماله علاقه بالفلسفه
وجدان :كل ما نتقابل تتكلم كذا بشكل فلسفي والمشكله انك تقنعني
تركي يضحك :يمكن موهبه ؟
وجدان :يمكن
تركي :هاه وش قررتي بتشكين فيه ؟
وجدان :ما اعرفه انا بس بشك فيه
تركي :طيب فيه حل اسهل
وجدان :ايش
تركي :الي توك قلتيه لي كتهديد انك ممكن ترفعين قضيه ويفتشون جوالي
وجدان :ولله مدري يمكن يطلع مو هو واتفشل وانفضح
تركي :طيب انا طلعت مو انا الي ارسل ما تفشلتي ؟
وجدان توترت :مدري انا بروح قبل ما يجي احد
تركي ابتسم :طيب
توه راح تركي الا جت الهنوف :ليش طلعتي تعالي العشا
وجدان :ما ابي اتعشى طفشت من اللحم
الهنوف :حتى انا بس ترا فيه مكرونه بشاميل واشياء ثانيه
وجدان :طيب بشوف
...
سطام :وين اختفيت فشلتنا مع الضيوف
تركي :اهلك هذولي تقول لهم ضيوف ؟
سطام :انا معاك نسيت
تركي :اي نسيت بس شكلك يوحي انك منهم
سطام :لذي الدرجه اشبههم ؟
تركي :خصوصًا وافي شكلك انت وياه تؤام من ام وحده ووحده من امهاتكم يا امك يا أمه ما جابت عيال وعطوها الثاني
سطام :ما فهمت
تركي :ولا بتفهم لأني حتى انا مو فاهم
سطام :شفيك تطالع بمشاري ؟ ترا مو هو الي بيتزوج اختك الثاني احمد
تركي :هاه لا ولا شي بس لفت انتباهي انه من يوم جا على الجوال
سطام :خبير تقني مدري امن سبراني مدري شسالفته المهم له علاقه بالجوالات والاختراق وكذا
تركي :منجد ؟
سطام :اي ولله
تركي :طلع ماهو بهين
سطام :ايش
تركي:لا ولا شي
وافي :يلا انا استأذنكم بروح اتمشى شوي اهضم الاكل
سيّاف :اقعد شوي ونجيب شاهي
وافي :لا ولله ودي انام بدري اليوم
نايف :يا رجال خل عنك تشرب اسبريسو بالرياض وتنام الشاهي بيأثر عليك
وافي يطالع بعمه ابو سطام :كل شي تغير الحين
ابو سطام :يلا اذنك معك واحنا اصلًا شوي ونلحقك
ابو راشد :اشربوا ذا الكاس شاهي وان كان تبغون تروحون روحوا
تركي يضحك :اي بس ذا الكاس وبعده تقول لهم غيروا طعم الشاهي وذقوا القهوه وسهره
ابو راشد يضحك :اسكت فضحت تكتيكي مع الضيوف
ابو سيّاف :احنا ضيوف يابو راشد ؟
ابو راشد :لا ولله احنا اهل
ابو سيّاف :اي اشوا بغيت اهاوشك بعد كل ذي السنين المديده تقول ضيوف
ابو راشد :إن قلت عنكم ضيوف وقصدتها حتى انا بهاوش نفسي
...
وافي راح لمكانه المعتاد وصار يتمشى وينتظر ياقوت يجي عشان يرسل لها الجواب على اللغز بس طول لدرجه انه كان بيفقد الامل ويرجع البيت توه نزل الاشاف ياقوت جاي ومعاه رساله فتحها وكان مكتوب :
تأخرت صحيح ؟ كان هناك اجتماع عائلي لم اود الخروج منه
وافي رد :
نعم تأخرت يا ملاكي لدرجه انني نسيت الجواب،بالمناسبه هل للملائكه عوائل؟
ملاك :
لست ملاكك انا ملاك نفسي، هل أنت متأكد من نسيانك الجواب أم تمزح مزحاتك الشيطانيه ؟ونعم هناك عوائل
وافي :
اصبحت تعرفني يا ملاكي بالتأكيد امزح ،اتمنى ان لا يضايقك مناداتي لك بملاكي لأنني أرى انك ملاكي الحارس
ملاك :
اي ملاك حارس ؟لست ارافقك بكل مكان
وافي :
نعم لكن ذكراك ترافقني وتحميني من شر نفسي
كدت انسى الجواب هو الكتاب إن كنت تود التاريخ فهو يصفه وإن كنت تود العلوم فهو يحملها وإن كنت تود الادب فهو خير الادباء
ملاك :
احسنت أيها الشيطان جوابك ممتاز بهرت بك ،ولكن عندي سؤال كيف تساعدك ذكرى معنويه على حمايه نفسك من الوقوع في الشر والمعاصي،كثير من البشر رغم معرفتهم ان ربهم يراهم يطاوعون بني جنسك (الشياطين ) ويقعون في المعاصي
وافي :
كيف حكمت أنها ذكرى معنويه ؟ إنها ذكرى ماديه الجزء الذي اخذته من الرساله سابقًا ،أرى انك تغير الموضوع لكي لا تلبي لي مطلبي
ملاك :
اتحمله معك في كل مكان ؟ ،لست اغير الموضوع فقد تساءلت
وافي :
نعم احمله ،بما انك لا تغير هيا اعطني جواب لأحد السؤالين ماهو جنسك او سر عن نفسك
ملاك :
اوه يا الهي لم استطع النوم البارحه بسبب هذه السؤالين فكرت بالعواقب وقررت انني لن اخبرك سرًا عن نفسي لأنني متحفظه نوعًا ما بموضوع الاسرار سأخبرك ما جنسي لن يتغير الكثير ولن تعرف هويتي ،انني انثى
وافي :
كنت اعرف
ملاك :
كيف تعرف ؟ هل تعرفني ؟
وافي :
بالطبع لا اقصد انني كنت اعرف ان هذه الشخصيه الكامله سيكون خلفها انثى
ملاك :
وانا متأكده أن هذه الشخصيه المتهوره خلفها ذكر
وافي :
نعم أنا ذكر ،لأول مره تتحدثين بصيغه مؤنثه اظن انه مريح
ملاك :
نعم مريح كنت احصر نفسي بصيغ الذكور كي لا انكشف والان لست بحاجه لذلك
وافي :
اليوم القمر مكتمل كنت اتسائل هل تطلين عليه لتشاهدي جماله ؟
ملاك :
نعم انني مقابله له تمامًا لم أره بهذا الجمال من قبل
وافي :
حسنًا عن ماذا سنتحدث اليوم ،الطعام ؟ام نعود لنفس موضوعنا البشر
ملاك :
افضل ان اشاهد القمر هذه الليله
وافي :
حسنًا سأشاهده ايضًا ،لكن غدًا سوف نتحدث وعد ؟
ملاك :
وعد
الصباح
وافي قام على جسم كبير يحجب عنه الشمس وضربات على خصره وصوته شخص يقول :ولد هي قم قم وش جابك هنا ؟
الصوت مألوف ،صوت ابو سطام قام وافي مفزوع :هاه هاه ما سويت شي ولله
ابو سطام :يا ولد وش تسوي هنا من البارح ندور لك ما لقيناك خفنا صار لك شي هنا ولا هنا
وافي مسح وجهه بشماغه وقال :امس القمر كان مكتمل وقلت اشوفه ونمت بدون ما احس
ابو سطام جلس جنبه وابتسم قال :مثلي يوم قالوا لي بتزوج ام سطام وشفتها بالنظره الشرعيه وخلاص تم كل شي وقبل الزواج بيوم جيت هنا وكانت اول مره اجي وانا مو معصب كان شعور غريب والقمر مكتمل قلت اقعد شوي اشوفه وما حسيت الا ابوي يصحيني الصباح وهو يقول قم اليوم زواجك وانت هنا وللحين اعيش نفس شعور ذاك اليوم
وافي :كيف كان ذاك الشعور ؟
ابو سطام :اتوقع الحين مو محتاج تعرفه بعدين اذا جا الوقت المناسب بعلمك
وافي :وش دراك اني ما امر فيه ؟
ابو سطام قام :وجهك
وافي قام وراه :وجهي ؟
ابو سطام :اي لو كنت تحس بنفس الشعور كان وجهك يبان فيه
وافي :كيف يعني وش يصير بملامحي
ابو سطام :الي اقدر اقوله اذا لقيت بنت الحلال تعال عندي واقول لك كل شي بالتفصيل
وافي :اهاا طلع حب ما ابي اعرف عنه شي
ابو سطام :ليه وش كنت تحسبه؟
وافي :مدري قلت يمكن تحس نفس شعوري يوم كنت اتعاطى واكتشف انك كنت تتعاطى وتعالجت وتعطيني امل
ابو سطام يضحك :لو تعاطيت كان ما شفتني عسكري متقاعد اليوم ،لذي الدرجه محتاج امل ؟
وافي :لا تسلم صراحه بنت عمي عطتني
ابو سطام :ملاك ؟
وافي :اي ملاك ترا عرفت انك حطيتها حارسه علي
ابو سطام :زين عشان ما تستحي مسكينه
وافي :اي بس جتني نوبه غصب عليها وقفلت علينا باب الغرفه اخر الليل
ابو سطام وقف :سويت بها شي ؟
وافي :لا تعلمت السيطره على النفس
ابو سطام :كويس يعني كان اختبار لك من ربك
وافي :ولو ما سيطرت على نفسي ؟ كان سويت بها شي وهي راحت ضحيه وانا رحت السجن وانتهت القصه
ابو سطام :بس ما انتهت للحين ما سويت شي ولا اظن انكم بتسافرون سوا مره ثانيه الا اذا ...
وافي :ايش
ابو سطام يضحك :تزوجتها
وافي :حتى انت ؟
ابو سطام :مين يقول كذا
وافي :الهنوف متشفقه علينا تبي تزوجنا انا ونايف غصب ويخلى لها البيت
ابو سطام :بس الحين هي بتروح قبلكم
بعد شوي قال وهو يضحك :ونايف من شبكتها معاه
وافي :مين تتوقع ؟
ابو سطام :ريوف ؟
وافي :مين غيرها طبعًا بس الفرق انه هو يحبها
ابو سطام :السر الي كل الناس يعرفونه نايف يحب ريوف
وافي يبتسم :يعني لذي الدرجه باين؟
ابو سطام :ايييه من يومهم صغار حتى ابوك قالها قال ان كبر هذا الولد ما بيرضى غير فذي البنت زوجه له وبعدين ترا ابتسامتك حلوه ليه ما تبتسم كثير
وافي ابتسم اكثر :مافيه شي يستاهل ابتسم
ابو سطام :الا كل شي يستاهل تبتسم امك تعبت عليك تستاهل تبتسم لها ابوك ابتسم له اخوك اختك انا ملاك حتى ذيك النياق حقت سياف ابتسم لها
وافي :ياذي ملاك بكل سالفه
ابو سطام :يمكن تقدير رباني لأمر مستقبلي ؟
وافي :ما بعترض على قضاء الله بس اتمنى يعني ما تطرون شي ما صار وممكن ما يصير
ابو سطام :الحين وقف
وافي وقف :وش
ابو سطام حثى عليه تراب ومسح وجهه به
وافي :ليه يا عم ؟
ابو سطام :عشان شكلك يبان انك نمت بالبر ترا ابوك ولد الديره ذي يعرف
وافي :طيب انا نمت مو واضح
ابو سطام :نظفته وما بقى اثر
دخلوا على الرجال
ابو سطام :السلام عليكم
ابو وافي ماسك الضحكه :وعليكم السلام اشوفك لقيته ومردغته ولا ؟
وافي :لا يبه نمت بالبر وانا مدري وقومني عمي وجيت
ابو وافي :طلعت لخويك
وافي :مين ؟
ابو وافي :عمك جابر من يوم جينا الديره وانت وياه اخويا وسحبت علي
وافي باس راس ابوه :انت ابوي ولك الحق الاكبر إن كنت تبيني معاك اليوم بقعد
ابو وافي ينفض التراب من راسه :اي ابيك بس مو بذي الحاله رح تروش
ابو سيّاف يضحك :واضح انها نومه بطله
وافي :اي ولله بطله انصحكم تجربونها
ابو احمد :جربناها وشبعنا منها
ابو خالد يضحك:يوم كنت تلحق متعب عشان تتأكد انه ما بيقابل اختك وتنام انت وياه بالبر
وافي :اجل اليوم صبحيتنا برعايه مراهقه ابوي وصياعته مافي نقاش
ابو احمد :اي جا اليوم افضحه فيه
ابو وافي :بتتعاونون علي اليوم
وافي : مافي مفر
...
نايف :يا عيال وافي ما بيجي اليوم بيقعد عند ابوي
سيّاف :ليه شفيه ابوك ؟
نايف :لا مافيه الا العافيه بس عاتب وافي انه ما يجلس معاه كثير وصار يحب عمي اكثر منه وقال بيقعد عنده اليوم
بدر :منجد لاحظته علاقته بعمي صارت اقوى
سطام ساكت
سيّاف :شفيك ساكت بالعاده تسولف معانا بذي المواضيع
سطام :قبل ما نسافر الديره بأسبوع ابوي نادى وافي عنده على اساس يتقهوون وجلست معاهم شوي وابوي قال لي اروح لأنه بيتكلم مع وافي بشكل خاص ومن بعدها صارت علاقتهم اقوى
بدر :ويوم رحنا الرياض نجيب البضاعه راحوا مع بعض
سيّاف :اكيد وراهم سر
نايف :مستحيل وافي يعلمني كل شي
سطام :وما علمك ذي المره لأنه شي كبير ما يبيك تعرفه
نايف :مو لازم اعرفه خلاص بيعلمني بعدين وافي كان يسوي اشياء وبعد بفتره يعلمني اذا كان مستحي او خايف منها
سطام :تمام دامك راضي كذا خلك بس انا بحاول اعرف وش يصير
نايف :ما بخليك تعرف لأن وافي ما يبيك ولا يبي احد يعرف عطوه خصوصيه شوي مو لازم كل شي تعرفونه
سطام :طبعًا مو كل شي بس ان ابوي يلحق وافي بكل مكان ويراقبه ويتكلمون بالسر كثير كأنه هو ولده لازم اعرف انا
بدر:شكلك تغار منه ؟
سطام :ما اغار بس ابي اعرف وش ذا السر الي يخبونه عنا
نايف :الا تغار منه واضح
سطام :اي اغار وافي دايم محط الانظار وافي دايم كل الناس يدورون له وافي هو المدير وافي وافي وانا ما كأني موجود لو اروح الحين واضيع ما تدورون لي
بدر :وش ذا الكلام كبر عقلك
سطام وهو طالع :يوم اسكت تقولون ليه ساكت ويوم اتكلم عن حقي تقولون كبر عقلك شغلكم ذا معد ابيه
نايف يصرخ وراه :وانت محد يبيك لين تكبر عقلك الي زي الاطفال
سيّاف :يعيال مو كأنكم شديتم عليه ؟
نايف :لا ما شدينا خل فضوله ينفعه
سيّاف :الحين وين بيروح ؟
نايف:خله يروح جهنم ان شاء الله
سيّاف :استغفر الله العظيم
نايف :وش بتسوي ؟
سيَاف :بكلم ابوه يعني وش بسوي
ابو سطام :هلا
سيّاف :ايوه يا عم سطام تهاوش مع العيال وزعل وطلع مدري وين رايح
ابو سطام :خله شوي ويرجع بيتمشى شوي
سيّاف :متأكد يا عم ما نلحقه
نايف :وش تبي تلحقه خله
ابو سطام :اذا طول دوروا له
سيّاف :طيب
...
تركي :السلام عليكم
مشاري :وعليكم السلام
تركي :وش تسوي هنا لحالك
مشاري :ابد ولله عندي شغل اخلصه بالجوال
تركي :اختراق وكذا
مشاري :هاه
تركي :سطام قال لي انك تشتغل امن سبراني
مشاري يضحك :مدري ليه كلكم ماخذين فكره انه الامن السبراني اختراق احنا نهتم بالقضايا ابتزاز وكذا او الي ينشرون فديوهات مسيئه للدوله نطلع مكانه يعني زي الشرطه بس نشتغل بالانترنت
تركي :اي ادري بس اطقطق
مشاري يضحك :بعد ما عطيتك محاضره
تركي يسلك له ويضحك معاه :تقهويت اليوم ؟
مشاري :لا ولله لكن بخاطري اسبريسو
تركي :عندي آله بالبيت بسوي لك بس خلك مكانك
مشاري :لا ولله لا تكلف على نفسك
تركي :لا ولله مافيها كلافه
مشاري :ما تقصر
تركي يكلم نفسه :شغله يضايق بنات الناس
مشاري :هاه
تركي :لا بس اتذكر طريقه الاسبرسو
مشاري :خله مركز لو سمحت
تركي :إن شاء الله
يوم راح تركي قال :ويتشرط بعد إن شاء الله يارب اشوفك تتشرط بالعدس البارد
...
سطام يكلم نفسه :واوو اول مره ارتاح كذا من زمان كاتم بس شكلي زعلتهم ...لا ولله دايم هم يهضمون حقي خلني اعبر عن نفسي شوي كل كلمه قلتها صح مع انه فيه كلام غلط بس كل كلمه قلتها صح ...الحين انا وين ما جبت مويا ولا شي
فجأه سمع صوت احد يقول هيييه وبعده صوت طلق نار
سطام :بسم الله وش ذا انا وين رحت
بعد شوي تكرر نفس الصوت وتشجع سطام وقرر يروح له يوم وصل شاف شخص متلثم ومعاه كلب وسلاح يوم وصل عندهم الكلب صار ينبح
المتلثم قال :وش تبي
سطام :اول شي ابيك تبعد كلبك عني وبعدين اذا سمحت يعني ابي مويا
المتلثم قال للكلب :شششش
وراح جاب له مويا يوم جا سطام بياخذها اشر عليه بالسلاح وقال :لا تقرب انا برميها لك
سطام :ليه ؟
المتلثم :بس كذا ما ابيك تقرب
سطام :وش بيصير لو قربت ؟
المتلثم اطلق على الارض وقال :نفس كذا بس بوسط راسك
سطام :ما تخاف احد يمسكك ؟
المتلثم :انا اصلًا ما اعيش هنا بس جيت اصيد وبرجع وإن قتلتك محد درى
سطام :ممكن تشيل الفكره
المتلثم :وانت اشرب مويتك وتوكل لا تخرب علي الصيد
سطام وهو يشرب مويا شرق وقال :لحظه ابي اشوف رجولك
المتلثم :وش تبي فيها ؟
سطام :بشوفها لا تطلع جني
المتلثم ضحك الا ضحكته غريبه وقال :تحسب عندي رجل حمار
سطام :محد يدري ابي اشوف رجولك
المتلثم رفع الثوب وقال :هاه رجول طبيعيه
سطام :ليه صوتك كذا غريب ؟
المتلثم :مالك دخل
سطام :طيب ما عندك اسم ؟
المتلثم وهو يقنص على طير :لو يهمك عرفت
سطام :طيب عطني لقب اي شي عشان اذا دعيت لك كنت بموت
المتلثم :المياسه
سطام :تشرفنا انا سطام ،لحظه هذا اسم بنت المياسه
المياسه :لأني بنت
سطام :وش تسوين بالثوب والشماغ ؟
المياسه تجاهلت كلامه وقالت :وش تموت البيوت قريبه ارجع على جرتك وتوصل البيوت
سطام :ما جاوبتي وش تسوين
المياسه قنصت عليه :اصيد اصيد وانت عكرت صفو مزاجي إن ما رحت خلال خمس دقايق بتشوف الرصاصه ذي براسك
سطام: طيب ولا يهمك يا بنت الصحراء بروح بروح
توه سطام مشى كم خطوه قالت :امش على جرتك
طالع فيها الا هي مركزه بالبندقيه ولا طالعت فيه ولا بدربه
سطام :ولله شكلها جنيه كيف شافتني
المياسه :سمعتك
سطام :ادري
المياسه :قلها بوجهي
سطام توه لف عليها الا هي مقنصه عليه وقال :ياخي انتي وش قصتك اليوم تبين تقتليني ؟ خلاص اعتقيني عندك ذا الرصاص صيدي به ذيك الطيور
المياسه :انت امرك عجيب وش جابك هنا وش دراني انك ما تبي تسرق حلال ابوي
سطام :وينه ذا الحلال ما اشوفه
المياسه تأشر وراها:هناك ورا ذيك الخيمه يرعى
وشافت واحد عنده وقالت وهي تمشي جهته وتطلق بالهوا:وهذاك الحرامي بيسرقه
سطام من قوه الصوت جلس تحت وبعد شوي قام وكان بيرجع وجته وهي تمسك الحرامي من فنيلته وقالت :وقف
سطام:هاه بتخلينا نلعب حجره ورقه مقص والي يخسر تقتلينه ؟
المياسه :فكره حلوه بس مو الحين
الي هي ماسكته :انتي مره ؟ فكيني ولله معد اقرب ذا الحلال
المياسه :اسكت انت ...وانت تعرف ذا ؟ مخططين انت وياه واحد يشغلني والثاني يسرق
سطام :لا ولله معرفه
المياسه فكت الي ماسكته وجلسته جنب سطام وقالت :ما بتتحركون من هنا لين تعترفون
سطام :ولله معرفه والدليل انه فيه واحد هناك يبي يسرق لو انه خويي كان ما علمتك
المياسه التفتت :وين ... ياهيييه شفيكم انتم بتذبحون اضاحيكم بالحرام ؟
الي جنب سطام يوم شافها التفتت كان بيقوم ويشرد وهي رجعت طالعت فيه وقالت :قلت ما بتتحركون
ونادت كلبها وخلته يوقف عندهم ينبح وراحت للسارق الثالث
سطام :ما لقيتم تجون الا اليوم ؟
الحرامي :ياخي نبي نبيعها للناس وناخذ فلوس موسم اعياد الحين وتعرف
سطام :الحين كلنا بنروح يا ضحيه ذا الكلب ولا ضحيه سلاحها
الحرامي :بس ولله تخوف اول مره اشوف بنت كذا شكلها جنيه
سطام :لا شفت رجولها تأكدت مو جنيه
الحرامي :هاه عانها جابت خويي
سطام:دامه خويك ليه ما تهرج ؟
الحرامي :ابي ارفع اعصابها استمتع وانا ارفع اعصاب البنات
سطام :على حسابي ؟ ابي ارجع وراي اهل وبيت
الحرامي :اي صدق ترا وراك بيت يعني بالمعنى الحرفي وراك بيوت
سطام :ادري بس اقصد ان اهلي فيها ابرجع لهم
المياسه جت ورمت الثالث جنبهم وقالت :هاه من نبدا فيه اول
سطام :ياخي صدقيني ولله ماني منهم ولا اعرفهم
الي جالس جنب سطام :افااا يافارس تبيعنا
المياسه :سطام اجل هاه؟
سطام :ايييش ولله اسمي سطام ولله
المياسه :شكلي ببدا فيك يا سطام اقصد فارس
سطام :اسمعيني بس كلمه وحده اذا ما اقتنعتي اقتليني عادي حلالك
المياسه :هاه ياقايد وش رايك
سطام :مين قايد
المياسه :كلبي
سطام :مجنونه انتي تستشيرين كلب
المياسه :يلا قول كلمتك ونشوف
بدت تعبي سلاحها رصاص وهو يقول :انا سطام ولد جابر ابوي عسكري متقاعد عمي اسمه ابو سيّاف
المياسه وهي تعبي السلاح :ابو سيّاف ماهو اسم
سطام بتوتر :اسمه ياسر ولله ياسر انتي لو من اهل هذي القريه بتعرفينه
المياسه :بس ماني منها
سطام :طيب عندي لك حل ربطيني وخذيني لين باب البيت ونادي على ابوي واسأليه ولله بيجي ويقول ذا ولدي ولله ولله
المياسه :فكره حلوه اسوقكم زي الغنم وافضحكم يالحراميه
سطام :اذا ما بموت فيها عادي
المياسه :خلك معاهم يا قايد وانا بجيب حبال
يوم راحت قال سطام :انت ليتها بتبدا فيك وتقتلك وش فارس وش فارس ؟
الحرامي :عجبني اسم فارس عليك
الحرامي الثاني :اي ولله حلو
الحرامي الاول :تراها بنت
الحرامي الثاني :اما توني ادري
سطام :اسكتوا انتم
الحرامي الثاني طلع سكينه من خصره وقال وش رايك نسوي فيك خير ونخليك تموت على يد رجال احسن من انك تموت على يد حرمه
الاول قال :ولله فكره حلوه
سطام :ولله مو حلوه ...