وانا في درب الهلاك ظهرت لي يا ملاك

37

لحقت ياقوت حتى اقتربت وبدأت تلحظ شخصًا فوق الهضبه قام وبدأ يقترب منها حتى وصل اليها وهو مبتسم :ملاكي
وقفت ملاك بصدمه :أنت؟
وافي أمسك ياقوت:أي انا الشيطان وانتِ الملاك بكل الحالتين كنت المذنب وانتِ تساعديني بدون ما تعرفين شي ...
بلع ريقه وأكمل :وبكل الحالتين كنت أحبك
ملاك وعينيها بدأت تمتلئ بالدموع :كذاب
وافي :ماقد صدقت بكلمه مثل الحين
ملاك بغصه :طيب ليش؟
وافي :بشرح كل شي بس لا تبكين
دفعته وهي تصرخ :كنت تعرف كل ذا الوقت وما قلت لي
استمرت بدفعه :الله يعلم الي مريت فيه من عذاب ما نمت أيام افكر فيك وانت عارف كل شي
وافي :ملاك
ملاك مستمره:وياقوت قلت لك اسمه انكرت كل شي مثلت انك ما تعرف السلسال كم مره طيحته وانت تلقاه ولا فكرت مره وحده تقول برجعه لها واشوفها وتشوفني
وافي :اسمعي...
ملاك قاطعته:وامس امس بالضبط ما نمت من عذاب الضمير قلت شكلي زودتها عليه كل شوي اذكره بذنبه فعلًا استحق كل شي بس اكتشفت اني ما استحق شي
أمسك يديها بقوه :تستحقين حبي
سحبت يديها ودفعته مره أخرى :حبك عباره عن ذا العذاب؟
ثبتها من كتفيها :اسمعيني ما عرفت الا قريب قبل ايام بس
هدأت ملاك قليلًا لكنها ما زالت تبكي :بتقول كل شي
وافي :كل شي وعدتك انا بس أجلسي
ملاك:متى عرفت ؟
وافي :يوم جينا من الرياض
ملاك :طيب ليه كذبت ؟
وافي :عشان أحميك
ملاك :من أيش تحميني ؟
وافي بغصه :من كل شي ومني بشكل أكبر
بلعت ريقها :طيب ليه تحبني وانت خطر علي؟
وافي ابتسم :طيب انتِ حبيتيني وانتِ تعرفين اني متعاطي
ملاك :ذا غير وذاك غير
وافي :لا كلها نفس الشي ماهو بيدي بس حبيتك
ملاك :وشو الخطر يعني مافيه شي تشرحه لي؟
وافي :يوم جلست بالرياض يومين كانوا مخططين يراقبونا أنا وياك
بلع ريقه :كانوا بيكسروني فيك لكن ما كانوا متأكدين ان بيننا شي اضطريت اجلس هناك وشغلت محلي هناك ليومين عشان اوهمهم اني معد برجع واليوم جيتك خلسه بس عشان اعلمك
ملاك :طيب انت عرفت يوم جينا من الرياض ليش سكتت لين رجعت هناك ؟
وافي :كنت متردد اقول لك حتى مرات كثير كنت بطلع العقد واعطيك بس خفت تتركيني لأني وافي
ملاك بغصه وهي تنظر لعينيه :طيب ما فكرت مره أني كنت اتمناك ؟
وافي :فكرت بس خوفي كان اكبر مني
تنهدت ملاك وهي تنظر للسماء :وش بنسوي الحين ؟
وافي ابتسم :وش نسوي يعني نتزوج بس مو الحين ...يعني بنسوي عمليه بنمسك ابو فيصل بعد الفجر بروح الرياض
تنهد واكمل :يعني انتظريني زياده
نظرت لعينيه :بنتظرك لأخر عمري
بلع ريقه :إن ما رجعت ووصلك خبري شوفي نصيبك
ملاك بحزن :طيب ليش؟
وافي :وش
ملاك :ليش تعلمني وانت بتروح؟
ابتسم بضيق :لو مت اموت وانا مرتاح حبيبتي تعرف أني احبها
قامت ملاك واخذت ياقوت من حضنه وقالت وهي ذاهبه ببكاء:انت اناني ومتسلط ما تفكر الا بنفسك
لحقها وافي :ملاك
وقف امامها :شفيك الحين مو علمتك كل شي؟
ملاك ببكاء :اشوف نصيبي مع غيرك ؟ ابدا حياه جديده مع شخص جديد وما كأنه صار لك شي اذا اسوي نفسي ما نسيتك اسمي ولدي على اسمك وافضله على باقي اخوانه ؟ تحسب اني بسوي كذا ،انا تعبت من الفقد خلاص اكتفيت ما ابي افقد أحد زياده خصوصًا انت
بلعت ريقها وأكملت :لو متنا نموت سوا ولو حيينا نحيا سوا مارح اعيش لغيرك ولا رح تعيش لغيري
وافي :ملاك...
قاطعته :أنا مربوطه فيك تذكر لما قلتك ما خفت الا مره وحده بس وقلت لك اذا جا الوقت المناسب اقول لك ؟
وافي :اي
ملاك :خفت عليك يوم سويت الحادث خفت أفقدك وانا ما حددت مشاعري لك فما بالك الحين بعد ما تأكد كل شي وتعمقنا بالمشاعر لو صار لك شي بموت من حزني وقهري عليك أرجع عشان نعيش
وافي والدموع بمحاجره :تمام ،تمام اوعدك أني برجع عشانك برجع عشان نعيش أنتظريني ...
أخرج قرطًا من جيبه وابتسم:برجع وأكمل الفرده الثانيه الي عندك على ما اظن،وإن شاء الله بتلبسينه بعرسنا
ابتسمت ملاك رغم دموعها :كان معاك طول الوقت
وافي :يذكرني بملاك القويه الي تجازف بأي شي عشان تسعد أي انسان ولو كانت ما تعرفه
ملاك نظرت لعينيه :ملاك بكل حالاتها بتنتظرك لا تخيب ظنها
وافي:ما اخيب ظن ملاكي
نظرت لعينيه طويلًا :انا بروح
وافي :لا تروحين
ملاك :ليش؟
وافي :أخر ليله لي هنا خليك معاي
ابتسمت :مو أخر ليله لو رجعت بنعيش ليالي أكثر
وافي :تمام
في الطريق بقيت تسير وهي مبتسمه وياقوت بيدها رفعته ونظرت لوجهه :هاه ياقوت كنت تعرف بس ما قلت لي
تنهدت وهي مبتسمه :طلع وافي
راشد :ذا ياقوت ؟
ملاك :بسم الله شفيكم كلكم تطلعون كذا فجأه
راشد :معليش
ملاك تنهدت :اي ياقوت صديقي القديم
راشد :اشوف كيف عطيني
ملاك :كبر بالسن صار ما يحب الناس كثير
راشد ابتسم :أنا غير يعرفني من زمان
وضعته في يده :نشوف
نقر يده بذعر ثم طار بعيدًا
راشد :اح
ملاك صرخت :ياقوت
راشد :معليش خليته يطير بعيد
ملاك :لا معليك بيرجع دايم كذا يسوي
ظهر وافي وبيده ياقوت :انتِ فكيتيه لعندي؟
قبض راشد على يده بغضب عندما رأى وافي
ملاك :لا عطيته راشد وارتبك وطار
وافي وهو يمسح على صدر ياقوت :شوفي قلبه مسكين يدق
راشد وهو ينظر لوافي :غريبه كان يعرفني زمان
وافي :تغير مكانك صار لغيرك
راشد :ماقصرت بشي
وافي :ما قصرت بس خنت
ملاك بتوتر :يلا وافي امش بتأخر
نظر لعينيها بهيام :ابشري
راشد خلفهم :لو عرفني رح ينكر كل الي بعدي عرفهم
وافي :لو عرف طباعك بينكر حتى ماضيكم
ملاك بهمس :وافي
لحقها وافي :طيب أنتظريني
ابتسمت :دايم أنتظرك انا
بقي راشد واقفًا خلفهم ويلكم الحائط الذي بجانبه حتى تجرحت يده أخرج هاتفه واتصل على رقم :الحل الاخير
اغلق الهاتف دون أن يسمع أي رد :تمتع بأخر ايامك يا وافي
...
ريوف :يمكن ما تبيك
بدر :طيب وانا اقول لك كذا ليش ؟ عشان تسألينها تشوفين تبيني ولا لا
ريوف :طيب انا عندي خطه احسن من خطتك
بدر :وشي؟
ريوف :بكل ضي واعلمها كل شي واقول لها تكلمي عن بدر قدام زينب وبعدين اسأيها عن رأيها فيه وعلى حسب رأيها نقرر
بدر :طيب ابي اسمع رأيها مباشره وش دراني انكم ما بتكذبون علي
ريوف :يعني وش اسوي اعطيك رقمها ولا ايش ؟
بدر :ولله يا ليت اقدر اتفاهم معاها بعيدًا عن مشاكلك الشخصيه معاها
ريوف :يا بدر يا حبيبي تعرف وش مشاكلي الشخصيه معاها ؟
بدر :وش ؟
ريوف :تحب نايف البنت بقلبها واحد
بدر :بنسيها نايف وطوايفه
ريوف امسكت يده :انا ما اقول لك كذا لأني اكرهها وما ابيها بس اخاف عليك بتكسرك اعرفها انا
بدر :عطيني رقمها بس بجرب يمكن انجح ما تدرين
ريوف تنهدت وهي تبحث عن هاتفها:ابرئ نفسي منك
بدر :شوفيه هنا
ريوف :سجل عندك **********
بدر :يازين الرقم بس
ريوف :الحين اخذت رقمها ممكن تطلع تخليني أكمل مذاكره؟
بدر :وش تبين ؟
ريوف :ابي اذاكر
بدر :بطلع اجيب قهوه تبين شي؟
ريوف :مشتهيه دونات
بدر :ابشري بجيب لك اكبر بوكس
ريوف :بس طبعًا لي لحالي ما بشاركه مع احد وخل نصه ساده والنص الثاني شوكلت وحبتين بس بنكهه الموڤن
بدر :ان شاء الله
ريوف :وشوف البنات اذا يبون شي ما ابيهم يشاركوني
بدر :ريم نايمه
ريوف :ما داومت ؟
بدر :لا ما داومت مواصله من امس
ريوف :صدق؟ بروح اشوفها
بدر :نامت الحين
ريوف :بروح اشوفها اكيد صار لها شي ولا ما تسهر هي
بدر :براحتك
دخلت غرفه ريم :ريمي
ريم :بنام
ريوف شغلت النور:باقي ما نمتي
ريم :خليني انام بغيب اليوم تعبانه
جلست بجانبها :وش صار لك ما تسهرين الا اذا صار شي
ريم بغصه :ما صار شي
ريوف :ريم ترا اعرفك وش صار قولي لي
ريم جلست وهي تبكي :تحرش فيني
امسكت يدها :بسم الله عليك مين ؟
ريم:ابوها ابوها
ريوف :ابو مين اهدي شوي تكلمي
ديم دخلت :ريم شفيك ؟
ريوف :تعالي
ريم :ابو اسيل
ديم :وش صار ؟
ريوف حضنتها وهمست لديم :تحرش فيها
ديم مسحت على شعرها:ريم
ريم ابتعدت عن ريوف وتشير لمناطق التحرش:لمسني هنا وهنا كان ...كان بي...ضربه طلال وطاح قدامي
ريوف :خلاص ريم لا تفكرين فيه اكيد طلال تصرف
ديم :ريوف تحرش فيها اكيد بتنهار
ريوف تشير لديم بعينيها :ريم قويه
ريم:ماني قويه أخاف
ريوف :طيب بنات ديم عندك دوام الحين ؟
ديم :لا عندي الساعه ١٠
ريوف :خلونا نطلع نغير جو
ريم :مالي نفس
ريوف :انتِ اول وحده عشان تعرفين ان الحياه تمشي والتحرش ما يأثر
ريم :ريوف منتي فاهمه كان يقول لي بنسهر يعني لو تأخر طلال ثواني كان ...
انهارت اكثر
ريوف :بس طلال تدخل وهذي انتِ حيه ترزقين خلونا نطلع بنات من زمان ما نطلع كأخوات كل وحده مشغوله بحياتها
ريم :انتم اطلعوا
ديم :لا تعالي حتى انتِ بقول لكم وش صار مع يوسف
ريوف :وش صار انتِ بعد
ديم :تهاوشت معاه وبدلته الكفر
ريوف :وش ذا العلاقه الغريبه
ديم :بشرح لكم كل شي بس تجهزوا وانا يشغل السياره تعلمت مع بدر
ريوف :الله يستر لا تدخلينا بالاعمده
ديم :لا معليك عرفت خلاص
ريوف:يلا ريم
ريم :ما ابي
ريوف :بتجين بالغصب
ريم :لحول
ريوف :يلا بنروح محل الفطاير الي تحبينه خلاص تغيرت نظرتي عنه
ريم :ماني مشتهيه
ريوف :اي احرمي نفسك من الاكل عشان واحد متعاطي عقله رايح فيها وش تستفيدين عطيني فايده وحده بس انك ما تاكلين لأن انسان بعقل اقل من الحيوان تحرش فيك ؟
ريم:خلاص طيب بجي
ريوف :حطي ميكب لا تشوفك امي بذي الحاله
ريم :مالي خلق ولله
ديم :خلاص خليها تلبس نظاره وكمامه مارح تقول شي
ريوف :بروح اتجهز واجي القاك جاهزه
ريم بغير نفس:طيب
في السياره
ديم :اربطوا الاحزمه
ريوف :ولله ماش جملتك ذي ما تبشر بالخير
ديم :اي عشان نلقم مخالفه بسياره ابوي ومين يدفعها من مكافئته ؟ انا خليها لي مكافئتي بطلب من شي أن
ريوف :صدق؟ بطلب معاك عشان نوصل سعر عالي والتوصيل يصير مجاني
ديم :حبيبتي انا بنفسي موصله الف
ريوف :طالبه ايش ؟
ديم :تجهيزات لحياتي الجديده
ريوف التفتت لريم :تسمعين اختك متهاوشه مع خطيبها وتجهز لحياتها الجديده
ديم :بقول لكم السالفه يعني بسامحه بس بعدين الحين خليه شوي
ريوف :يعني تبينه يركض وراك ؟
ديم :اي احس اني رخيصه جا قال بخطبك وافقت بنفس اللحظه ولا قلت بستخير ولا شي خليه يحس بغلاتي
ريوف ابتسمت :جوي ذي الحركات
ديم :وش تبون تسمعون
ريم :ولا شي
ريوف :معليك منها شغلي ماجد المهندس
ديم :انتِ ما تحبينه
ريوف :بس اختك تحبه
ديم :خلاص نشغله
ريوف :بنات ابي امر محل الورد
ريم :وش المناسبه؟
ريوف :بشتري ورد واهديه لنفسي على اساس احد اهداني وبنزله انستا
ديم :ليش؟
ريوف :تخيلي فيه واحد يتابعني بحساب وهمي احس انه نايف ابي اشوف هو ولا لا كل شوي يسأل هذا ايش مين ذا وين ذا كيف ذا احس انه نايف
ديم :واذا طلع نايف
ريوف :بخليه يتابعني عادي
ديم :ياطول مشواركم خمس سنوات
ريوف :احسن عشان اعيش حياتي
ريم :الحين ذا الكلام وانتِ تحبينه
ديم :صدق محسستني بيحبسها بقفص
ريوف : كلنا نعرف الفرق بين انك تعيشين مستقله وبين انك تعيشين متزوجه ما يحتاج اشرح
ديم :ترا يمديك تمددين فتره العزوبيه اكثر يعني قولي له ما ابي بعد خمس سنوات
ريوف :عشان يذبحني ويموت
ديم :ذا المحل صح ؟
ريم :اي
ريوف :طلع مره قريب
ديم :لا باقي حبيبتي بنمشي لين عند الاشاره وندور ونرجع له لأنه بالجهه الثانيه
ريوف :برضوا يعتبر قريب
في المحل
ديم :ريم شفيك تطالعين فيه ؟
ريم :هاه مين؟
ريوف :الكاشير
ريم بلعت ريقها:ولا شي
ريوف :معاه هالات واضحه اشك انه طلال
ريم :لا مو هو
ريوف قامت :نشوف الحين
ريم :تعالي
ريوف :السلام عليكم
طلال :وعليكم السلام
نظرت لبطاقه الاسم :شسمه بغيت اطلب الحساب
طلال :تفضلي مكانك وبجي الحين
ريوف :شكرًا
عادت للطاوله :ولله هو يا بنات شفت اسمه مكتوب طلال
ريم :لحول
ديم :اشوفه جاي
ريوف :ديم قومي تبين الحمام
ديم :هاه
ريوف قامت وسحبتها :قومي نبي الحمام احنا بعدل طرحتي
ديم :اها طيب
ريم :بنات
ريوف :شوي ونجي
طلال :السلام عليكم طلبتوا الحساب صح؟
ريم :وعليكم السلام اي
نظر لوجهها عندما سمع صوتها :شلونك؟
ريم بتوتر:تمام
طلال :تراه الحين بالسجن لا تخافين وآسف على الي صار
ريم :لا عادي
نظر لها بأستغراب
ريم :يعني قصدي أنت مالك ذنب هو بس الي ذنبه...ما علينا شلون اسيل؟
طلال :تمام اليوم داومت
ريم :ما قدرت اداوم اليوم
طلال :عادي مو مسؤوله عنها انتِ خليها تعتمد على نفسها ما تدرين يمكن يجيك نقل بعدين
ريم :لا ما بنقل المدرسه قريبه مني
:طلال تعال شوف ذي الطاوله
طلال :هذا الحساب بعدين جيبوه للكاشير
ريم :ان شاء الله
عادت ريوف :وش صار ؟
ريم :تزوجنا
ريوف :صدق؟
ريم :لا انتوا تحسبون بيصير كذا مغير احرجتوني معاه
ديم :وين الاحراج بس جا طلب الحساب
ريم :قال لي اسف عن الي صار انحرجت مدري وش اقول له قلت له انت مالك ذنب
ريوف :طيب ذا الصح مافيه احراج
ريم:خلاص بس حاسبوا خلونا نطلع
ديم :عليك الحساب
ريم :ايش؟
ريوف :عليك اول راتب لك فطرينا منه
ريم :طيب خلاص
...
ام راشد :باقي ما نمت من امس ؟
راشد :مامعاي نوم
ام راشد :شفيك تغيرت معدك راشد الي اعرفه
راشد :تعبان ؟
ام راشد :ليه ؟
راشد :تعبت من حياتي
ام راشد :نزوجك؟
راشد :لا قلت لكم معد بتزوج خلاص
ام راشد :جرب يا راشد فيه الف بنت وبنت أحسن من ملاك جرب
راشد :ابي ملاك بس ملاك
ام راشد :ولد عمها يبيها
راشد :يمه تكفين نجرب بس ما بخسر شي
ام راشد :بتخسر روحك شوف كيف شكلك تعبان
راشد :اخوها قال لو تجي تخطبها الحين بوافق عادي خليني اجرب
ام راشد :طيب دام اخوها كلمك نشوف،الحين تبي اكل؟
راشد :لا بنام
ام راشد قامت:طيب
خرج للفناء ووجد حمامه تشرب من الماء الذي على الارض أقترب منها ببطئ وأمسكها نظر لوجهها:ما أحب الحمام
امسك رأسها بقوه وعصره حتى ماتت ثم رماها جانبًا بعدم مبالاه دخل غرفته وأستلقى على السرير بصمت لدقائق تنهد وهو يخرج كيسًا من تحت الوساده به مخدرات ابتلع واحده وأغمض عينيه براحه وهو يهلوس :ما بتاخذها يا وافي ما بتاخذها ملاك لي أنا بس
في جانب أخر
ملاك :ما بتجلس للغدا؟
وافي :مقدر ولله عمي الحين يتصل خليني افطر وامشي
تنهدت :كنت ابي اسوي لك برياني
ابتسم :مره ثانيه ان شاء الله ...
نظر لعينيها واكمل:وانتِ زوجتي
ابتسمت وأحمر وجهها خجلًا
سحاب :السلام عليكم
ملاك :وعليكم السلام مختفيه من زمان
سحاب :ولله محمد توه سافر خرجت على طول انكتمت بالبيت
نظرت لوافي :اول مكان جيت له هنا
نظرت ملاك لوافي وكان يتجاهلها وينظر للهاتف :تبين شي؟
سحاب وهي لا تزال تحدث وافي:اي ابي بن زي ذيك المره تعرف نوعه؟
وافي :بالزاويه تلقينه
ملاك :تعالي انا بعطيك
وافي :ارتاحي عندنا نظام جديد العميل يخدم نفسه
ملاك ابتسمت :لا سحاب غير نخدمها احنا
سحبت سحاب الى الزاويه :هذا صح؟
سحاب :اي
تنهدت :مدري شفيه يتجاهلني
ملاك :مين ؟
سحاب بهمس :مين يعني وافي
التفتت للأكياس وهي مبتسمه :يمكن بقلبه احد؟
سحاب :لا محد انا متأكده
ملاك :بيرجع الرياض خلاص فتح محل هناك
سحاب :صدق؟
ملاك :اي اليوم بيرجع
سحاب :وذا المحل؟
ملاك :انا بمسكه
بلعت ريقها :يعني شريكته؟
ملاك :تقريبًا
سحاب :انتِ الي بقلبه صح ؟
ملاك بأنكار :لا بالعكس انا أكثر من يكرهه بس بمسك المحل عشان جدي الله يرحمه
اخذت كيس البن وسارت بغضب
ملاك خلفها:اصبري باقي ما كملت لك النص كيلو
وقفت مقابل وافي بغضب :ممكن نتكلم؟
وافي:اتوقع قالت لك ملاك صار محلها اذا فيه مشكله كلميها هي
سحاب :انت بشكل خاص
اغلق هاتفه وتنهد :تفضلي
سحاب نظرت لملاك :قلت بشكل خاص
نظر وافي لملاك :خلاص اذا بتطلعين أنا بجيبها بعدين
ملاك :طيب
وافي :تفضلي وش بتقولين؟
سحاب :ليش صرت تتجاهلني؟
وافي :وش عطيتك قبل عشان اتجاهلك الحين ؟
سحاب :كنت انت تجهز طلبي لي
وافي :وش يعني لك ذا عشان تزعلين ؟
سحاب :يعني تعاملني معامله خاصه
وافي :اها فهمت قصدك ،أعذريني اذا كنت محترم بزياده لدرجه تحسبين اني معطيك معامله خاصه لأعجابي فيك ما عندي اي مشاعر لك
بلعت ريقها :طيب كم الحساب؟
وافي :خذيه هديه اعتذار
خرجت وضربت بالباب :بالشويش على الباب تراه قزاز
دخلت ملاك بعدها :شفيها ؟
وافي :زعلانه
ملاك :ليش؟
وافي ابتسم:لأني ما عطيتها اهتمام
ملاك :بس صدق ليش قبل عطيتها اهتمام ؟
وافي :تذكرين لما قلتي لي ان اسمك من اربعه حروف والحرف الثالث فيه ا؟
ملاك :اي
وافي :اسم سحاب كم حرف؟
ملاك :اربعه
وافي :الحرف الثالث فيه ا
ملاك :اها يعني تحسبها انا ؟
وافي :اي خصوصًا انه بنفس اليوم الي جيتي انتِ وياها طيحتي السلسال واحسبها هي الي مطيحته
ملاك :طيب ليه ما تتوقعني انا ؟
وافي :يعني الشخصيه الي طلعت ذاك اليوم كانت عكس شخصيتك بالمراسله
ملاك :سبب غير مقنع
وافي :طيب انتِ اشوف ليه ما توقعتيه انا وانا الحرف الثاني من أسمي ا ؟ ليش توقعتيه راشد
ملاك ابتسمت:سببي مقنع اكثر منك انت كاتب لي شعر وبالحقيقه تقول الفرزق
وافي :على اساس راشد يعرف شعر ؟
ملاك :يعني شوي يعرف
وافي :انا ما تعلمته الا عشانك
ملاك :انا بروح
وافي :لا تروحين
ملاك :عندي شغل
وافي:طيب انا بروح الحين ما بتودعيني؟
ابتسمت :كيف اودعك يعني ؟
وافي:بس كوني موجوده اذا بروح
ملاك :ما اقدر بس بشوفك من شباك غرفتي
وافي :تمام بس يا ويلك تسحبين
ملاك وهي خارجه :على حسب
...
عبدالمحسن :هديل تكفين عطيني رقمها
هديل :اكيد تستحي ما بعطيك
عبدالمحسن :طيب هي خطيبتي يعني لازم اكلمها
هديل :بستأذن منها
عبدالمحسن :لا عطيني وبس انا بتصرف
لجين :وش يبي؟
عبدالمحسن :جابك الله عطيني رقم زوجتي المستقبليه امي رحت عندها عطتني رقم بنت خالي من الخوف بغيت اكسر الجوال
لجين :اعطيك لو تبي عيوني اعطيك
هديل :يا ناس يمكن البنت تستحي او عندهم عادات انهم ما يكلمون الخطيب الا بعد الزواج ؟
لجين :يا شيخه ريوف تقول اختها تكلم خطيبها ووجدان ذاك اليوم كانت تكلم تركي وهم باقي مخطوبين يعني عادي سجله عندك
عبدالمحسن :احفره على قلبي عطيني بس
لجين :تراها اونلاين الحين
عبدالمحسن :اكلمها ؟
لجين :كلمها
عبدالمحسن :طيب وش اقول ما اعرف شي
لجين :السلام عليكم ...
هديل قاطعتها:السلام عليكم انا عبدالمحسن اخذت رقمك من خواتي لاني حبيت أقولك ...اقولك ايش؟
لجين :اخذت رقمك من خواتي لأني أبي اتعرف عليك وإن كان خلال ثلاث ايام فقط لكنه بيعرفنا على بعض بالقدر الكافي لو كانت عندك مشكله بذا الموضوع اتمنى تبلغيني وابشري باللي يسرك
هديل :لا لأني حبيت اقولك أني ان شاء الله ما بخيب ظنك وبحاول اسعدك قد ما اقدر وبتكونين وطني بالغربه وحط قلب احمر ونقطه
عبدالمحسن :لخمتوني
لجين :قول الي بخاطرك
عبدالمحسن :ارسلت لها
هديل :ايش؟
عبدالمحسن :السلام عليكم انا عبدالمحسن اخذت رقمك من خواتي لأني ابي اقول لك أني من اول لحظه شفتك فيها عرفت انك بتكونين شي مهم بحياتي وتأكدي اني بسعدك لأني حاربت الكل عشانك والله لو كانت عندك شروط او مشاكل تشوفينها فيني اتمنى تبلغيني والله يوفقنا ان شاء الله
لجين :وش رايك؟
هديل :حليو
لجين :حليو حليو يوصف شخصيتك
عبدالمحسن :تكتب تكتب
هديل :شفيها بطيئه
لجين :اكيد تكتب كلام كثير
هديل :لا اكيد ما تدري وش تكتب لأنها تكتب وتوقف
لجين :يمكن تاكل انا اذا اكل اجلس سنه اكتب سطر
هديل :لو تاكل وتجيها رساله زي كذا بتغص
عبدالمحسن :بسم الله عليها من الغصات
لجين :شوف شوف ارسلت
عبدالمحسن يقرأ بصوت عالي :وعليكم السلام تشرفت فيك وأنا ما وافقت عليك الا لأني شفت فيك الخير ان شاء الله ولا فيك أي مشكله ما عندي اي شروط وان شاء الله نبدا حياتنا الجديده بالخير
هديل :احس مو هي كاتبته
لجين :اجل مين ابوها ؟
عبدالمحسن بلع ريقه :الله لا يقولها
لجين :اسلوبها اعرفه تحب تقول ان شاء الله كثير
ابتسم وهو خارج:يلا الحين خلاص الباقي محادثات سريه
لجين :خير لازم اعرف كل شي
عبدالمحسن :خصوصيات متزوجين مو لازم تعرفينا سنك صغير
هديل :ولله اذا فتحت موضوع يحرجها يا ويلك
عبدالمحسن :ترا فيه خصوصيات متزوجين غير الاشياء الي تفكرون فيها
لجين :خبير زواجات ذا كم مره تزوجت ؟
عبدالمحسن :صفر
هديل :اجل وش الخصوصيات ؟
عبدالمحسن :مثلًا اقول لها اني ما احب المخلل
لجين ضحكت :اي اي خصوصيات محد لازم يعرفها رح بس
هديل :المخلل خصوصيات ؟
عبدالمحسن :اي هي لازم تفهمني وانا افهمها
لجين :رح بس سولف معاها الحين تزعل اذا تأخرت بالرد
عبدالمحسن :تنسى الزعل معاي
هديل :واضحه
عبدالمحسن :محطمين
لجين:رح رح احنا داعمينك
عبدالمحسن :وش سالفتك تبين تطرديني؟
لجين :فيه اشياء خاصه بين البنات ما تعرفها حتى لو تزوجت نبي نسولف بشكل خاص
عبدالمحسن :سولفوا لين تنبح حلوقكم
هديل :شفيه ذا ؟
لجين :شاف نفسه علينا
...
سطام :اسماء اسماء
خرجت من الحمام والمنشفه على رأسها :شفيك تنادي لك ساعه؟
سطام :احس اني بموت
اسماء :ترا كلها زكمه لا تكبر الموضوع
سطام :بموت اسماء حرارتي ٥٠
اسماء :لو حرارتك ٥٠ ذبت هنا
سطام :تعالي حسيني كيف تعبان
اسماء وهي تبعد المنشفه عن شعرها وتعلقها:برطب يدي بس
سطام :بموت على بال ما ترطبين يدك
اسماء :اجل تشهد
سطام :ولله ان قلبك قاسي يعني صح اذيتك بس المفروض تسامحيني وانا بموت يعني خلي عندك شويه رحمه
تنهدت وهي تغلق المرطب :طيب جيت
جلست بجانبه وهو مستلقي ووضعت يدها على جبهته :طبيعي بس يمكن ٣٨
وضع يدها على خده ثم على رقبته :كذا تقيسين
اسماء :طبيعي برضو
كح سطام كثيرًا :شكل فيني سل
اسماء :انفلونزا موسميه مع بدايه الشتا مافيه سل
سطام :تبيني اموت انتِ صح ؟
بلعت ريقها :لا
سطام :اجل عالجيني
اسماء:بجيب لك بنادول
سطام :بموت على بال ما تجيبينها
اسماء :اجل عطني وصيتك احتياط
امسك يدها ونظر لعينها بينما هي بلعت ريقها بتوتر :اذا مت ...روحي عند اهلك
سحبت يدها بغضب :بروح من غير ما توصي
فتحت أحد الادراج واخرجت حبه مسكن جلست بجانبه من الجهه الاخرى :اجلس
سطام :مقدر ظهري بينقسم نصين
تنهدت اسماء :لحول
سطام :ما عندك صبر على المريض كويس ما كملت معاك وجبت عيال ولا عقدتيهم
اسماء وهي ترفع رأسه بحده :فيه فرق بين عيالي الي جزء مني وبيكونون عزيزين علي وبينك
سطام :طيب بشويش راسي كسرتيه
اسماء :احسن
سطام :وين الماي
اسماء :ابلعها كذا ما بيجيك شي
سطام :لا بديت اقتنع انك بتقتليني بختنق فيها
اسماء :وين الماي طيب؟
نظر يساره بصعوبه :جنبي
اسماء :طيب خذها
سطام :يدي مقدر احركها
اسماء اقتربت منه ومدت يدها وأخذتها نظرت لعينيه :هذي هي
نظر لعينيها :ايه
ابتعدت عنه وفتحت الماء :هاه يلا وش ناقصك
سطام :انتِ عطيني
اسماء :على اي اساس
سطام :عندي نظريه ان يدي كلها جراثيم من المرض لو اكلتها مع الحبوب غلط
اسماء :نظرياتك وفرها لنفسك
سطام :اكليني وش بيجيك ؟
دفعت الحبه بفمه بقوه
سطام :لو معاي تقويم كسرتيه
اسماء :معاك تقويم؟
سطام :لا
اسماء :اجل انطم
سطام :شفيك منفسه علي ماهو بيدي اذا مرضت لدرجه مقدر اتحرك
اسماء :كل اعضائك ما تتحرك بس لسانك ما يوفر
سطام :الحمدلله تعرفت على شخصيتك الحقيقه قبل كل شي
اسماء :شخصيتي ذي ما تطلع الا اذا تنرفزت
سطام :اجل متى تطلع شخصيتك الحقيقيه؟
اسماء :اذا كان الانسان حنون معاي وعنده اسلوب
وضع يده على وجهها وهو ينظر لعينيها :ممكن تعالجيني؟
ضربت يده :انت مستثنى من القاعده
سطام :المفروض انا اولى فيها انا زوجك
اسماء :زوجي الي بيرجعني لأهلي ويجيب ورقه الطلاق بعده
سطام :طيب لو كنت ما برجعك ؟
بلعت ريقها :بترجعني غصب ما اقعد معاك دقيقه بعد الي سويته
سطام :طيب الحين جالسه جنبي تقريبًا بحضني
اسماء ابتعدت:مو بحضنك جنبك بس واساعدك كواجب انساني لا اكثر
سحبها من خصرها :الحين بحضني
اقتربت منه اكثر وامسكت وجهه همست بأذنه:اكثر شي اكرهه فيك تناقضك توك تقول الحمدلله ما كملت معاك...
ابعدت يده وابتعدت : والحين تدخلني لحضنك
سطام ابتسم وهو يهمس :مو تناقض اوريك اني اقدر اتحكم فيك والعب فيك مثل ما ابي
اسماء بنفس ابتسامته :انت تلعب ؟ خلاص خله تحدي بثبت لك انه تناقض فيك لا أكثر ولا انا ما انخلق الي يلعب فيني بعد
سطام وضع يده على ظهرها:انتِ مجرد لعبه عندي
اسماء ابعدت يده :وانت مجرد متناقض
...
ارسل لها بعد تردد طويل :السلام عليكم ما بطول عليك وبجيك من الاخر انا انسان شاريك بالحلال ومستعد اتقدم لك بأي لحظه وماني حق لعب
ردت سريعًا :من انت ؟
بدر :انا بدر اخو ريوف صديقتك
زينب :مو صديقتي
اطالت بالكتابه وارسلت :ما اتشرف فيك ولا بأختك ولا اي فرد من عائلتكم ولا اتخيل نفسي اتزوج منكم واصير حماه ريوف اعتذر
بدر :طيب عطيني فرصه اثبت لك نفسي واني مختلف عنها فكري بعيدًا عن مشاكلك معاها
زينب :ما عندي وقت لذي التفاهات
اغلقت هاتفها وهي تتذمر :معد باقي الا هو بالعالم اتزوجه
ضي :مين ؟
زينب :اخو ريوف جاب رقمي مدري من وين ويقول انا انسان شاريك بالحلال ما ابيه لا حلال ولا حرام
ضي :حرام عليك كان عطيتيه فرصه يمكن انه طيب
زينب :ما يهمني غير انه له علاقه بريوف ما ابي اصير زوجه اخوهاواصبح على وجهها كل يوم كفايه هنا
ضي :وش بينك وبينها علاقتكم كانت حلوه ؟
زينب :الي بيني وبينها احب ولد عمتي وهي دخلت بيننا
ضي :كيف راحت لولد عمتك ؟
زينب :يطلع ولد عمها
ضي :ولله قصتكم غريبه الحين اكيد سبيتي الولد وكسرتيه
زينب :احسن عساه يفيض من الكسر ويوصل لأخته
ضي :روحي افتحي الباب شوفي شكل سماح جت
زينب :جابت اكل صح ؟
ضي :اي مدري كيف تهربه
زينب وهي خارجه:عندها واسطات
اقتربت من المكتب الذي كانت تجلي عليه زينب ونظرت لهاتفها الذي يشع برساله من رقم بدر :اسف على الازعاج
ضي :الله يهديك يا زينب وش سوا لك
سماح :صباح الخير
ضي :وش صباح الخير الحين الظهر ، بدون مقدمات انا بنام تعبانه مره اجلسوا انتِ وزينب وين ما تبغون بس لا تصجوني تكفون خلوني انام من امس مواصله
سماح :ابشري بس عطيني التسجيل حق محاضره المصريه ما سجلتها جوالي طفى
ضي :برسلها لك بعدين
دخلت غرفتها استلقت على الفراش تفكر بصوت عالي :لو اخوي صار له كذا وش بسوي ،بزعل واهاوش البنت الي زعلته
جلست وتنهدت :احس قلبه طيب محد بذا الزمن يجي يقول كذا
امسكت هاتفها ولحسن حظها تتمتع بذاكره قويه حتى حفظت رقمه و ارسلت له :السلام عليكم ،اعتذر عن التصرف الي كان من صديقتي هي قاعده تمر بظروف صعبه شوي اتمنى ما تكون زعلتك بكلامها
في الجهه الاخرى اغلق هاتفه بأنكسار وتنهد :صدقت ريوف
جاءه اشعار اخر قلب الهاتف لكي لا يراه لكنه اتصل رفعه وهو ينظر للأسم (خالد):هلا
خالد :تبي تشوف بنتي؟
بدر :شفتها
خالد :طلعوها اذا تبي تشوفها بجيبها اليوم
بدر :كويس
خالد :شفيك؟
بدر :تعبان شوي
خالد :تعبان تعبان ولا تعبان مريض؟
بدر :تعبان نفسيًا
خالد :اشوى
ابتسم بضيق :ترا التعب النفسي اسوء من الجسدي
خالد :تقدر تنساه بأي شي رح شوف الشباب اليوم وش بيسوون
بدر :وش بيسوون يعني نفس دايم نايف بيغني لين صوته ينبح وسطام بيسوي شاهي وبيجلسون جلسه ممله
خالد :وافي اليوم جا ان كان بتجلس معاه
بدر :شفيه جياته كثرت
خالد :بيرجع هنا خلاص عنده محل
بدر ابتسم :ادري شعوا حلو انا مسميه واشوفه قاعد يكبر
خالد ضحك :نفس الشعور اذا جبت لك ولد ولا بنت وكبروا
بدر :تشجعني على الزواج يعني؟
خالد :ولله لو عندك القدره بعد التخرج تزوج
بدر :وين القى لي بنت خلصوا البنات
خالد :تبي من بنات عمك؟ اطلع شوي غير نبي نسل جديد
بدر :اجيب جنيه يعني ولا ايش؟
خالد :بكيفك عاد بس اطلع برا العايله البنات واجد
بدر :ومن وين تعرفهم اشوف ؟
خالد :انا اخون غاليه ؟ انا لله وانا اليه راجعون مستحيله ذي بس صدق ترا عندك عديلي غازي عنده ست خوات يقولون بس ثنتين متزوجين باقي اربع وعندك نسيب عمي جابر ذا الجديد عبدالمحسن عنده اختين
بدر :ولله اشوفك تتكلم زي العجايز
خالد :صدق؟
بدر :اي
خالد :صار لي اسبوع اجلس معاهم عند غاليه سوالفهم كذا
بدر :تجلس مع الحريم ؟
خالد :بس خالاتي
بدر ابتسم :عن وش يسولفون ؟
خالد :يدورون حول كل المواضيع بالحياه واهم موضوع كيف يزوجون عيالهم والي عيالهم متزوجين يمدحون زوجاتهم وخالتي ام سطام متصدره بذا الموضوع وامي تهاوشها تقول لا تمدحين بنات قدام خالد وغاليه تقول عادي اوثق فيه وانا قاعد افكر العنود شربت الببسي ولا مخبيه زين
بدر:كلن على همه سرى
خالد :وش رايك امرك ونطلع سوا
بدر :وين ؟
خالد :زي دايم نوقف بأي مكان ونسولف من زمان ما سويناها
بدر:العصر
خالد :اي تمام
...
ام سيّاف :بتسوين الغدا اليوم ؟
ملاك :اي اي بسويه بروح الحين
دخلت المطبخ وشغلت الراديو كعادتها وبدأت بالتقطيع وضعت البصل بالقدر وانشغلت أذنها مع الاغنيه :عشقتك قبل ما اشوفك وشفتك صرت كلي حلم ابي رمشك يغطيني وأبيك اقرب من انفاسي
فعلًا عشقتك وأنا لم أعرفك بعد لم أعرف سوى أنك شيطان أنغمر بالذنوب و انغمرنا سويًا بالعشق ،عشق المجهول ابتسمت وتنهدت :وافي
ام سيّاف :بنت وين سرحتي البصل احترق
التفتت ملاك بذعز :البصل
بدأت تقلبه :نا احترق مره
ام سيّاف :حطي اللحم واضغطيه
ملاك :ان شاء الله
ام سيّاف :تعرفين ان سعاد ؟
ملاك :اي عرفتها
ام سيّاف :عندها ولد كان متزوج وطلق هي راعيه مشاكل ولا هو محترم
ملاك :دام سمعتي الكلام من امه ولا من احد معارفه ما يعتبر شي صحيح
ام سيّاف :لا صحيح كل اهل الديره يحكون فيهم هي راعيه مشاكل وهو صابر عليها له سنتين
ملاك:بينهم عيال ؟
ام سيّاف :لا
ملاك :الحمدلله
ام سيّاف :معليك منهم الحين يبي يبدا حياه جديده
ملاك وهي تقطع اللحم :يبدا
ام سيّاف :يبونك له
التفتت لأمها :ما ابي
ام سيّاف :ما سمعتي عنه شي عشان ترفضين متوظف بالخرج قريبه منا وعنده بيت ملك وش تبين اكثر ؟
ملاك :يمه ما ابي واحد مطلق
ام سيّاف :وش فرقه عن العازب غير انه مر بتجربه زواج ويعرف يتعامل مع الحريم بالعكس شي حلو احسن من العازب ما يعرف شي
ملاك بلعت ريقها :كم عمره؟
ام سيّاف :٢٩
ملاك :كبير ما ابيه
ام سيّاف :وش فيك تدورين الغلط فيه بينكم خمس سنين
ملاك وهي خارجه:يمه ما ابي اتزوج شفيك تضغطين علي كأنك ما تبيني
ام سيّاف :تنتظرين احد صح ؟
تصنمت مكانها والتفتت :لا ما انتظر احد انتظر نفسي اصير بعمر مناسب للزواج
ام سيّاف :متى ؟ ٣٠
ملاك :لو كان ٤٠ محد له حق يتدخل فحياه انا بعيشها
ام سيّاف :لا حول ولا قوه الا بالله
ابو سيّاف :شفيكم؟
ام سيّاف :ام سعاد اتصلت تقول ولدها يبي ملاك
ابو سيّاف :ولدها متزوج ما ارضى على بنتي تصير شريكه
ام سيّاف :طلقها طلقها والبلا فيها هي قلت لملاك مواصفاته عيت مدري وش تبي
ابو سيّاف :خليها حياتها هي بتعيشها زي ما تبي بالاخير ذا بيت ابوها يوسعها لين تموت ان بغت
ام سيّاف :شفيكم علي انا ما ابي الا النصيب لبنتك
ابو سيّاف :نصيبها بيجيها وقت ما كتبه ربي
في الاعلى
تجلس على السرير وتمسك عقدها بضيق وتهمس:بنتظرك بنتظرك بنتظر...
ابو سيّاف :ملاك
بلعت ريقها :ادخل
جلس بجانبها:شفيك زعلتي من امك؟
ملاك :دايم تضايقني بكلامها تحاول تقنعني اتزوج وكأنها تبي تتخلص مني 
مسح على شعرها :ما تبي تتخلص منك تبي تفرحك
ملاك :طيب افرح بأي شي الا بالزواج خصوصًا من ناس ما اعرفهم
ابتسم ابو سيّاف :واذا كانوا تعرفينهم بتكون حاله ثانيه؟
ملاك بتوتر :لا يعني ما نعرف وش طبعهم
ضحك كثيرًا :خلاص إن جونا خطاب بنرفضهم الا اذا كانوا من معارفنا
حضنته :ما ابي اترككم
ابو سيّاف :لازم تشوفين نصيبك وحياتك بعيد عنا مو عشاننا ما نبيك بس نبيك تعيشين وتشوفين الحياه بدوننا بيجي يوم احنا ما بنكون موجودين لازم يكون بحياتك ناس يحلون مكاننا
ملاك :محد يحل مكانكم انتم اول من فتحت عيني عليهم
ابو سيّاف :ما يحلون مكاننا بس ياخذون مكان بقلبك يصيرون ملجأك ،احيانًا افكر لو اني ما تزوجت واخواني راحوا الرياض وامي وابوي توفوا وانا هنا بدون زوجه ولا عيال كيف بتصير حياتي وقتها احمد ربي على وجودكم يعني تحتاجين تجددين علاقاتك بعدنا تحتاجين تجددين دورك بدال ما تصيرين بنت تصيرين ام وزوجه لناس يحتاجونك وانتِ تحتاجينهم
...
الهنوف :راجعنا ورحنا السوق باقي ابي اروح البحر بالليل
غازي :الجو ماهو كويس
الهنوف :مشتهيه اشم البحر
غازي تنهد :طيب نمر الحين
الهنوف :ليش كا تحب البحر ؟
غازي :فيه شي ماخذ حبي كله
الهنوف :وش؟
قرض خدها بلطف :انتِ
الهنوف شهقت :تحبني وما تحب ولدي
غازي :الزايد من حبي لك راح له
الهنوف :اسكت بس لا يسمعك يزعل
غازي :ليه واثقه انه ولد؟
الهنوف :يقولون اذا اشتهينا اشياء حامضه يعني ولد وانا من اسبوع اشتهي ورق عنب حامض وعصير ليمون واشياء حامضه
غازي :احس ماله دخل
الهنوف :ولله صدق ترا غاليه تشتهي حلو دايم ويطلع بنت
غازي :طيب انزلي
فتحت الباب ونزلت :يا زين البحر
اخذ صدفه من الارض :تبين صدفه
الهنوف :تجنن
غازي :هذي هديتي لك ...
نزل للأرض واخذ واحده اخرى :وهذي لولدي اذا طلع زي امه يحب البحر
اخذتها وحضنته وتنهدت :ما كنت اتخيل بتجي ايام حلو بحياتي كذا
شابك يده بيدها :ان شاء الله ايامنا الجايه كلها سعاده
الهنوف :نجلس هناك ؟
غازي :نجلس
جلس وجلست بجانبه ووضعت رأسها على كتفه :ودي اسمي بحر
غازي :فيه اسماء كثير حلوه
الهنوف :غازي بيطلع حلو يعني مميز
غازي :تخيلي ولدك بالمدرسه ينادونه بحر بيلقى تنمر واسع
الهنوف :بحر غازي حلو
غازي :فكري بأسماء غيره
الهنوف :طيب جسار
غازي :نفكر بعدين الحين خلينا نتأمل
...
سطام :نايمه؟
اسماء :لا استرخي بس
سطام :اجل قومي استرخي ببيت اهلك
جلست :ايش؟
سطام :بوديك لأهلك الليله
اسماء :ليش؟
سطام :مو قلت لك بمزاجي اوديك مو قلت انتِ لعبه بالنسبه لي لا اكثر ؟
اسماء :كلامك ادخله من هنا واطلعه من هنا لأنك متناقض
سطام :خمس دقايق وانتِ بالسياره
اسماء :بجي بعد خمس دقايق وثانيه عناد فيك
نظر لعينيها بصمت وحضنها طويلًا ثم ابتعد عنها :هذا اخر ما فيني لك من ذي اللحظه ما عندي اي مشاعر تجاهك
دمعت عينيها :ممكن تطلع ؟
سطام وهو خارج ببرود :لا تتأخرين
...
ثامر :عروس النياق
المياسه :ثامر بطل من ذا اللقب
ثامر :تراه يمثل الواقع تعرفتوا بين النياق
المياسه ابتسمت :طيب
ثامر :وتبتسمين بعد عاجبك؟
المياسه :اجل ليه وافقت ؟
ثامر :صدق ما تبين عرس كبير ؟ ترا نقدر نروح الرياض ونحجز قاعه وكل شي
المياسه عبست :ابي عرس صغير باقي ما نسيت ابوي
ثامر :الله يرحمه
بدأت بالبكاء :كان ودي يحضر
ثامر :لا تبكين
المياسه :حلمت فيه
ثامر بغصه :شلونه؟
ابتسمت رغم دموعها :كان لابس ثوب ابيض ووجهه نور ومبتسم
مسح دموعها وهو مبتسم :أجل ان شاء الله بخير خلينا نتصدق عنه
المياسه :تذكر يوم سوينا عزيمه ؟
ثامر :اي
المياسه :انا قلت لعمتي الحلم وقالت بتسوي صدقه عنه وعزمت اهل الحاره
ثامر :طيب خلاص تصرفتي كويس والبكا ما بينفعه افرحي بيومك وادعي له
حضنته وهي تبكي :اشتقت له
دخلت ام راشد :شفيكم ؟
ثامر :تبكي
ام راشد :لحول مو قلت لك خلاص تصدقنا عنه وان شاء الله انه بنعيم
جلست بجانبها واكملت وهي تمسح على شعرها :ان شاء الله بتتزوجين الحين وإن جبتي ولد سميه عليه تحيين ذكره بالبيت وكل ما قلتي اسمه دعيتي له أنا مسميه راشد على جدك الله يرحمه وكل ما قلت راشد ولا احد قال ام راشد تذكرت ابوي الله يرحمه ودعيت له
المياسه :ما تشتاقين له ؟
ام راشد تنهدت :الا بس ما ينفع البكا ما ينفع الا الدعاء والصبر وان شاء الله لقانا بالجنه
لم يتمالك نفسه ثامر وخرج
ام راشد :يلا الحين الحقي اخوك انتِ خليتيه يبكي
قامت وهي تمسح دموعها :ثامر
ابو راشد دخل :الولد خرج شفيه ؟
المياسه :بلحقه الحين
ابو راشد :شفيهم يبكون ؟
ام راشد :تذكروا ابوهم
ابو راشد :إنا لله وإنا اليه راجعون
ام راشد :قلبي يتقطع عليهم ودي اشيل الحزن منهم واحطه فيني
ابو راشد :لا يكلف الله نفسًا الا وسعها ما بيشيلون اكثر من الي يقدرون عليه
في الخارج
المياسه :ثامر ،ثامر وينك
سيّاف تنحنح :السلام عليكم
المياسه بتوتر :وعليكم السلام
سيّاف :بغيتي شي؟
المياسه :ثامر طلع مدري وين راح
سيّاف :خلاص انا بجيبه اذا بترجعين
المياسه :بدور له انا
سيّاف :شفته راح بذيك الجهه بجيبه ارجعي قبل يبدا الغبار
المياسه :بروح له انا
سيّاف :لا تعاندين ولله بجيبه بسلامته
المياسه :طيب بنتظر هنا
سيّاف وهو يتلثم: طيب
بقيت لربع ساعه واقفه مكانها تنتظر  عاد سيّاف ومعه ثامر :هذانا جينا
سحبت يده بسرعه :امش بنتكلم بالبيت
سحب يده من يدها :لسى بدري بكره عادي
المياسه :ثامر بسرعه امش
سيّاف :مسكتي يدي مو يده
امسك يد ثامر ووضعها بيدها :هذا اخوك وسلمنا الامانه
بلع ريقها وسحبت ثامر بقوه :امش
ثامر :شفيك؟
المياسه :ليه تخرج وانت تشوف الغبار بتجي ؟
ثامر :كنت ابي اجلس لحالي
المياسه :خوفتني عليك
ثامر بسخريه:واضح الخوف ناديتيه هو يجيبني
اغلقت الباب :اعرف وش تفكر فيه محد بياخذ مكانك حتى لو تزوجت بتبقى اخوي وبعض الاحيان ولدي
ثامر :وانا ما ابيك تعامليني كذا
المياسه :اجل ؟ انا ما عدت افهمك اشرح لي نفسك
ثامر بصراخ:انتِ تعامليني كأني طفل ترا خلاص كبرت اعتمد على نفسي عامليني قد عمري
تنهدت :بحاول
بعد صمت قال بنبره هادئه :اسف اذا زعلتك
مسحت على رأسه :عادي تصير
ثامر :ميسو
المياسه :هاه
ثامر :زعلتي ولا كان قلتي لي ما احب ذا اللقب
المياسه نظرت لعينيه بحزن:لوهله حسيتك بتصير مثلهم
حضنها ثامر :اوعدك مارح اصير مثلهم ولا رح اشبههم وانتِ ساعديني وذكريني بنفسي
في الجهه الاخرى
ملاك :وينك تتمشى بالغبار توني كنت بطلع لك
سيّاف وهو مبتسم :مشوار وجيت
ملاك :الو تعرف تفرق بين حالات الطقس الي برا غبار مو مطر المطر الي نطلع فيه مشاوير ونتمشى
سيّاف :قابلتها
ملاك بسخريه :مين الملكه اليزابيث؟ عرفت انها خطه منهم وما ماتت
سيّاف :ذكريني اضحك بعدين ،قابلت المياسه
ملاك :طيب بتقابلها كثير بكره بتصير زوجتك رسميًا
سيّاف :مسكت يدي
ملاك :صدق انكم بزران ترا حرام
سيّاف :بالغلط ماقد صارت لك بالغلط؟
بلعت ريقها :لا
سيّاف :ما اقصد ذاك الحمار الي بالمستشفى المهم ما علينا بالغبار اخوها مدري وين راح ضاع وجبته وكانت بتمسك يده ومسكت يدي بالغبار ما شافت شي قلت لها مستعجله بكره عادي
ملاك :برافو انت لازم تكتب كتاب وتسميه كيف تجيب العيد مع خطيبتك ويكون عبره وعضه للناس،وش قال هي؟
سيّاف :سوت نفسها ما تشوفني واخذت اخوها وراحت
ملاك :لازم نراجع فكره زواجك ما تعرف شي
سيّاف :انتِ ماشاء الله عليك محترفه محترفه بس تنتظرين فارس احلامك ابو العيون المتكلمه وخشم السيف يجي
ملاك :ماني مختمه الزواج بس اعرف الاشياء الي تحرج البنات بحكم اني بنت مافكرت فيها؟
سيّاف :طيب بكره وش اسوي
ملاك :وش تسوي يعني تبصم وخلاص صرت متزوج
سيّاف :وش اسوي بالبيت ما اعرف
ملاك :الله يقرفك معرف شي بذا الموضوع سولف معاها وقضوها سوالف احسن
سيّاف :عن ايش؟
ملاك :عن النياق عندك غيرها يعني
سيّاف :ما اعرف شي طيب
ملاك :قول لها بنام
سيّاف :بتذبحني معها فاس دايم تشيله لو قلت شي وما عجبها بتفلق راسي فيه
ملاك :لا ما تسويها
سيّاف :ولله تسويها
ملاك :لو جت الحين سوتها فأنه ما عجبها كلامك
دق الباب
سيّاف :ولله هي روحي افتحي لها قولي لها سيّاف بلعته الارض
ملاك :بلا خوف سيّاف ما تسويها
سيّاف :اخاف منها بس احبها مدري وش ذي العلاقه روحي افتحي اذا مو هي ناديني
ملاك تنهدت :طيب
وضعت الطرحه على رأسها وفتحت الباب وابتسمت:وافي
وافي ابتسم :مردي لك
ملاك :ليش رجعت؟
وافي :بنص الخط اتصل ابوي قال لعد تجي بنجي احنا عشان عرس سيّاف
ملاك :تعبت نفسك
نظر لعينيها :مافيها تعب
بلعت ريقها :وش بغيت ؟
وافي :مفتاح المقلط عندكم
ملاك :اي اي معاي
امسكت طرف الطرحه وفكت المفتاح منه :هاك
ابتسم :حركات الجدات
ابتسمت مثل ابتسامته :اكثر حركه تحفظ الامانات
سيّاف بصراخ :ملاك لا يكون فلقت راسك
وافي :شفيه ذا ؟
ملاك :يخاف خطيبته تفلق راسه
صرخت :تعال
سيّاف :بتذبحني
ملاك :تعال ولد عمك ذا
همس وافي :نسيبك ان شاء الله
ملاك :اسكت
خرج سيّاف :انت؟
وافي :اي رجعت
سيّاف :وش تبي ؟
وافي :بفلق راسك
سيّاف بلع ريقه :ما تهزمني وانا ابو ياسر
ضحك وافي :تهزمك ام ياسر
التفت لملاك :ماشاء الله عليك ما تحفظين سر ،وش تبي؟
وافي :رجعت عشان عرسك وجيت اخذ مفتاحي
سيّاف :كفو ما بتخلوني لحالي
ملاك :ترا ما بيدخلون معاك غرفه النوم
سيّاف :انتِ باقي هنا ؟ ادخلي خلاص
ملاك :بدخل من غير ما تقول
...
مرت اربع ساعات والصمت بينهم يتردد لا شيء سوا دموعها وصوت نقرات يده على المقود ،تنهد ونطق :تبين اكل؟
اسماء :لا
سطام :طيب
نظر لها كثيرًا بتردد واخيرًا توقف جانبًا
التفتت له :وش فيك؟
نظر لها وبلع ريقه :سؤال واحد يا أسماء بيحدد مصير اشياء كثير
اسماء :مصيرنا حددناه وهذا احنا قاعدين نمشي بطريقه
أمسك يدها :أخر ما أطلبه منك جواب بس جواب
نظرت ليده وسقطت دمعه عليها
سطام :لو تركي ما كان موجود وتقدمت لك بظروف أحسن كنتي أخترتيني؟
اسماء بغصه:أخترتك بوجوده وبأسوء الظروف لكن ...
قاطعها سطام :ناخذ راحه من لكن نحذفها من قاموسنا ،أسف على كل شي
اسماء :ما تنفع أسف ولا تداوي جروح
سطام :وش يداوي جرحك علميني؟
بلعت ريقها :الطلاق
لاصق جبهته بجبهتها وهمس :الطلاق ما يداوي الطلاق يذبح
اسماء :مثل ما ذبحت حبي بيوم ميلاده
سطام :نحييه من جديد
اسماء :قلبي ما يعيش الشعور بعد ما يدفنه
سطام :نخلق شعور غيره
سكتت قليلًا ولم يتحدث سوى دمعها
سطام :اعرف اني جرحتك بس ...
قاطعته ببكاء :بس لا تروح مره ثانيه
اقترب من شفتيها وهمس :ما اضيع اغلى ما لقيته
ابتعدت :احتاج وقتي
نظر لعينيها وهو يمسح دموعها:بنتظرك
اسماء :الحين وين بنروح؟
سطام :الديره
عبست :ليش؟
ابتسم وهو يقرص خدها بلطف :زواج سيّاف ،لا تخافين ما رح اتركك سيده سكر
ابتسمت اسماء :رجعنا لذا اللقب
سطام :ولا بنطلع منه