وانا في درب الهلاك ظهرت لي يا ملاك

27

خرجت من المحل وضربت بالباب حتى سقطت احد قطع الديكور
وافي قام ليعيدها:تراه مو غرفتك عشان تصفقين بالباب
وهو عائد لمقعده رأى العقد ،هذا العقد الذي ترتديه من احببتها تذكر سحاب وهي تمسك على رقبتها وابتسم:هي ملاكي ،ملاكي اسمها سحاب
عاد للكرسي وهو يمسك ذلك العقد وابتسامته واسعه
...
في الجهه الاخرى دخلت ملاك غرفتها بغضب دفنت وجهها بالوساده واستغرقت بالبكاء لأسباب عديده :سحاب ،وافي،راشد ،الشيطان
امسكت على عنقها لتبحث عن العقد الذي اصبح جزءً منها :ماهو هنا
عادت للبكاء حتى نامت وفي الظهيره استيقظت على دق الباب :افتحي يا أمي ما يصير كذا
ملاك فتحت وعادت لفراشها
ام سيّاف :شفيك ؟
ملاك :مافيني شي
ام سيّاف :الصباح رجعتي معصبه ودخلتي غرفتك قفلتي ونمتي للحين واكيد انك بكيتي قبل ما تنامين وش صار؟
ملاك :اشياء كثير مزعلتني واخاف من النهايه
ام سيّاف :نهايه ايش ؟ مافيه شي اسمه نهايه على وجه ذي الارض الا الموت ولا القيامه الاشياء الباقيه كلها تفاصيل صغيره وعقبات بحياه الانسان
ملاك :ليش يجون اعمامي ؟ حياتنا كانت حلوه قبلهم
ام سيّاف ابتسمت :زعلانه من الوحده
ملاك وجدت سببًا لتبكي بحضن امها :اي
ام سيّاف حضنتها :ياروحي انتي بيجون بيجون السنه الجايه
ملاك وهي تبكي :احبهم يمه ليش يسوون كذا ؟
ام سيّاف :يا ملاكي انتي ياروحي خلاص
زاد بكائها مع كلمه ملاكي ،من يسميها ملاكه ليس من تتمناه ،لا يعقل ان يكون راشد
ام سيّاف :يلا اغسلي وجهك الحين وانزلي للغدا ابوك واخوك بيتغدون معانا لا يشوفونك كذا
ملاك مسحت دموعها :ووافي بيخلونه لحاله
ام سيّاف خرجت:يقول بيتغدى بالمحل
ملاك بعد ما خرجت امها :ياكل لحاله ما يجيه شي وحتى بيرتاح اكثر ياخذ راحته وهو يفكر بحبيبته ويتأمل رسمها الخايس
سيّاف مر :بنت بسم الله شفيك لك ساعه تتكلمين لحالك زي المجنونه
ملاك :ولا شي صرت احب افكر بصوت عالي
سيّاف قرب :بكيتي ياروح اخوك ؟ مين بكاك واخليه ينسى حليب امه ؟
ملاك :لا لا تسوي فيه شي
سيّاف :مين هو اصلًا
ملاك :كاتب الكتاب الي بكيت بسببه
سيّاف ابتسم :تبكين عشان كتاب ؟
ملاك :كنت متوقعه الاحداث صح بس كل شي تلخبط فجأه وصار كتاب حزين
سيّاف :اذا كان يحزنك الكتاب اتركيه
ملاك :صرت احبه يعني تعلقت بالاحداث رغم انها تحزني مقدر اتركها وباقي عندي امل النهايه سعيده
سيّاف تنهد :براحتك
على الغداء لم تشتهي الاكل اصبحت تقلب الملعقه بصحنها وتفكر
ابو سيّاف :ملاك
ملاك :هاه
ابو سيّاف :شفيك اليوم مو على بعضك
ملاك :مو مشتهيه
ابو سيّاف :ما كلتي شي من الصباح
ملاك :عادي اطلع غرفتي ؟
ابو سيّاف تنهد :اطلعي الشكوى لله
قامت من الطاوله وفي طريقها لغرفتها سمعت دق الباب
ام سيّاف:اذا باقي تحت افتحي الباب
ملاك :طيب
اقتربت من الباب :مين ؟
وافي :انا
ملاك :وش تبي
وافي :افتحي
وضعت قبعه الهودي على راسها وفتحت :نعم
وافي :جبت الصحون
ملاك :طيب ؟ ليش ما توديها لسحاب
وافي :صحونكم
ملاك :حطها بالارض
وافي :شكلك كنتي تنتظرين راشد
ملاك :لا
وافي :اجل شفيك زعلتي يوم شفتيني ؟
ملاك :مدري صراحه وش سويت لي عشان ازعل ما سويت شي لا انت ولا سحاب
وافي ابتسم :تغارين منها
ملاك قفلت الباب بوجهه
وافي :صحونكم تحت
ملاك :خلها
ام سيّاف جت :مين ؟
ملاك :ولد عمي جاب الصحون
ام سيّاف :بعدي خليني اشوفه
ملاك :شكله بيروح
ام سيّاف :بتطمن عليه ما شفته
ملاك :خليه
ام سيّاف :وش قصتك مع الولد مسكين خليني اشوفه امه تسأل
ملاك بعدت عن الباب :شوفيه ...اساسًا صرتوا تهتمون فيه اكثر مني
ام سيّاف : الدوره مأثره عليك ذي المره كثير
ملاك صعدت لغرفتها وضربت بالباب
ام سيّاف فتحت الباب :وافي
وافي التفت :هلا خالتي
ام سيّاف :شلونك ان شاء الله بخير ؟
وافي:الحمدلله بخير
ام سيّاف :خلصت الصحن ؟ ازيدك
وافي :لا الحمدلله شبعت تسلم يدك
ام سيّاف :بالعافيه عليك شلون الشغل ؟
وافي :تمام الحمدلله زبايني كثار
ام سيّاف :الحمدلله الله يوفقك
وافي :امين وياك
ام سيّاف :مشتهي شي اسويه لك ؟
وافي :لا يا خاله خلاص الحمدلله
ام سيّاف تضحك :مو الحين بكره للغدا
وافي يحك خلف رأسه:ولله اذا بتسوين برياني كثر الله خيرك
ام سيّاف :ابشر بنسوي لك احسن برياني كل ما تشتهي شي قول لي واسويه حلا ولا اكل ولا قهوه
وافي :تسلمين
ام سيّاف :الله يسلمك
...
اسماء :ماشاء الله انا قلت لك لا تتدخلين
سحاب :انا ابي الخير لملاك قلت اخليه يبعد عنها عشان يخطبها راشد ورسمته عشان يحسبني مهتمه له
اسماء:ولله يا سحاب ان وراك مصايب اهجدي
سحاب :ما برتاح لين اشوف راشد مع ملاك
اسماء :تصدقين شكله عجبك وتبغين تبعدين ملاك عنه
سحاب :انا ؟ خليني اكمل دراستي ما ابيه ولا شي
اسماء :سحاب اهجدي بس خليهم
سحاب:ما بضيع راشد تراه يحبها من زمان
اسماء :والحب ما يسوي شي
سحاب :تحسبين الكل نفسك بيحب من بعيد ويسكت لين تروح منه
اسماء :اتكلم جد انا الحب ما يسوي شي يمكن هي ما تحبه وترفضه مره ثانيه وش يصير له غير انه ينكسر ؟
سحاب :ما بينكسر لأني بخلي ملاك بعد تحبه
اسماء :الحين وين رايحه ؟
سحاب :بروح اكلم امي عن راشد وملاك وبعدين بروح اسولف مع ملاك وامدح لها راشد يمكن تحبه
اسماء :ما بترتاحين لين تروحين بستين داهيه
سحاب :ما برتاح
نزلت سريعًا وهي تصرخ :يمه
ام علي :على هونك وش بلاك ؟
سحاب :اليوم شفت ولد خالتي راشد
ام علي :ايه ؟
سحاب :قعدت افكر لو يخطب ملاك مره ثانيه يمكن توافق ؟
ام علي :ما بينهم نصيب
سحاب :يمه تكفين من اول هي كانت تدرس الحين فاضيه اكيد بتفرح
ام علي :ولد عمها هنا ويقولون هو بياخذها
سحاب :ولد عمها عينه مو عليها سمعت ان خواته يدورون له من الشرقيه
ام علي :من الشرقيه ؟
سحاب :اي اخته الي تزوجت بالشرقيه يمكن تزوجه من حمواتها
ام علي :واحنا شعلينا من الناس
سحاب :احنا نبي نفرح ولد خالتي كلمي خالتي بس قولي لها جربوا مارح يخسرون شي
ام علي :يتحمس الولد بالاخير ترفضه
سحاب :تكفين يمه
ام علي :قاعد على قلبك راشد لا سمح الله ؟
سحاب :لا بس ابي افرحه هو وملاك ما شفتيها قابلتها بالمحل وقلت لها ترا راشد جا وجهها تغير
ام علي :اي محل ؟
سحاب :محل ولد عمها
ام علي :وهذا دليل انها لولد عمها اتركي عنك الحكي الفاضي بس وروحي طلعي الملابس من النشافه
سحاب تنهدت :طيب بعدين بروح عند ملاك
ام علي :وش ذا الحب جا لملاك فجأه ؟
سحاب:من اول احبها
ام علي :اسمعي يا سحاب يا ويلك ان سمعت انك اطريتي راشد على مسامعها تفهمين ولالا
سحاب :افهم
...
ابو سيّاف :ما ودك تحكين ؟
ملاك :تعبانه
ابو سيّاف :نروح عمره انا وياك وسيّاف وامك وترتاحين ؟
ملاك :ما اقدر ذي الايام
ابو سيّاف :الاسبوع الجاي
ملاك :ممكن
ابو سيّاف :اجل اغسلي وجهك واذا تبين نروح عند النياق
ملاك :منجد ؟
ابو سيّاف :اي يلا
ملاك :الحين بجي
ابو سيّاف :خليك كذا دايم وما عاش من يزعلك
ملاك ابتسمت :انسى الزعل وطوايفه دامك ابوي
ابو سيّاف :الله يخليك لي يا اجمل البنات
ملاك تضحك :على اساس عندك غيري
ابو سيّاف :متأكد لو عندي غيرك بتكونين انتي احسنهم
ملاك قامت وقبلت خده :وانا لو قالوا لي اختاري ابوك بنفسك بختارك
ابو سيّاف ضمها :وش ذا العاطفه جتك فجأه
ملاك :اكتشفت ان محد بيسعدني بذا العالم الا انت
سيّاف :وانا ؟ مو جيت وقلت لك الي زعلك بكسر راسه
ملاك ضحكت وضمته :حتى انت
سيّاف يمازحها :ابعدي عني
ملاك :زعلت ؟
سيّاف :ولله زعلت انا من الصباح هنا انط واتشقلب ابيك تضحكين جا ابوي ضحكك بكلمه
ملاك :تدري وش قال ابوي ؟
سيّاف :ايش ؟
ملاك :بيوديني عند النياق
سيّاف حملها :وانا بخلي له الكلام واسوي الفعل
ابو سيّاف يضحك :انتبه لا تطيحون
سيّاف :بنتك خفيفه معد تاكل لو يجي ابو حصين وهي نايمه يشيلها
(ابو حصين على ما اظن لقب للثعلب او حيوان يشبه للثعلب ويتم تخويف الاطفال به بقولهم انه الطفل الي ما ياكل بيجي ابو حصين يتحسس بطنه وهو نايم ان كان خاوي اخذه وإن كان مليان يتركه لأهله 👍)
ملاك :معد يخوفني ابو حصين
سيّاف :يلا البسي عبايتك ونروح
ملاك :طيب
...
بدر :ريوف
ريوف وهي تضع المكياج :نعم
بدر :بكلمك بشي
ريوف :اسمعك
بدر :بس لا تعصبين يعني اعرف انه ما بيعجبك الموضوع بس ...
ريوف :بدر عادي قول ما بعصب الا اذا كنت كسرت شي من اشيائي
بدر :يمكن قلبك ينكسر
ريوف :ماهو عطر قلبي قول
بدر :شسمه تذكرين الفيديو حق رده فعلك يوم انقبلتي
ريوف مبتسمه:اي كيف انساه كنا بالديره
بدر :اول شي ريم ارسلته بدون ما تقصه بعدين حذفته ورجعت ارسلته وانا عندي واتساب بلس وطلع لي الفيديو المحذوف وشفت صديقتك فيه
ريوف وهي تضع المسكرا :ماهي صديقتي ذيك عدوتي واشد اعدائي
بدر :طيب انا قلت استغفر الله خلاص معد بشوفه بس ...
ريوف :وش ؟
بدر تنهد:ما قدرت حسيت اني احب...
ريوف شهقت ووضعت المسكرا على خدها :لا لا تقولها
بدر بدأت عيناه تدمع :ولله ما قدرت يا ريوف حبيتها
ريوف ضعفت امام دموعه :يا حبيبي انت
بدر :هي وش اسمها ؟
ريوف حضنته:ياروحي حتى اسمها ما تعرفه وحبيتها
تنهدت :اسمها زينب
بدر :بتساعديني ؟
ريوف تمسك خده :ان ما ساعدتك اساعد مين
بدر :ولله اني شاريها وابيها بالحلال بس اني خايف من رده فعلها
ريوف :اعرف يا حبيبي اعرف نيتك
بدر :الحين وين رايحه ؟
ريوف :قلت ابي اطلع وتوني كنت بقول لك
بدر :ابشري اوديك وين ما تبغين بس امسحي وجهك
ريوف التفتت للمرآه :وش ؟
ضحكت :المسكره كذا من اول ؟
بدر :اي
ريوف:يلا رح شغل السياره وانا بمسحها واجي ...جيب جوالي هناك يشحن مدري مين يدق ذا الوقت
بدر :مكتوب ملاكي
ريوف:لا مو ملاكك ملاك وافي وملاكي انا والبنات
بدر :طيب الحين بتردين عليها ولا بتقعدين تتأملين اسمها
ريوف :وش اسوي احبها لو اني ولد تزوجتها
بدر :استغفر الله بس
ريوف :حتى لو اني ولد ما بتزوجها مكتوبه لوافي ...ايوه ملاكي
ملاك :وش اخبارك ؟
ريوف :بخير وصرت احسن يوم سمعت صوتك
ملاك :محسستني اني حبيبك على ذا الكلام
ريوف :ولله اشتقت لك من زماان عنك توني اقول لبدر من حبي لك لو اني ولد تزوجتك
ملاك :ما علينا الحين بسألكم متى موسم الرياض ؟
ريوف :بتجين ؟ الله ياحظ الرياض فيك
ملاك :صبر ما قلت بجي بس سألت بشوف بعدين
ريوف تلعب بشعرها :تجون انتي ووافي لحالكم
ملاك :شفتي فيديو الطين الي امس ؟ خليه ياكل ذاك الطين ما بروح معاه ولا شي
ريوف :تهاوشتم ؟
ملاك بلعت ريقها :لا اساسًا ما اكلمه بس اودي له الفطور الصباح وتجي حبيبته واجلس معاها لأنها تستحي واذا راحت اروح
ريوف شهقت :ايش ؟ حبيبته مين هذي الحيه الي تدخل بينكم مين ؟ اكيد شقرا وعيونها زرق حسبي الله عليها
ملاك :هدي ريوف شفيك هو يحبها وانا مالي دخل فيهم عساهم بالحريق
ريوف :وش اسمها؟
ملاك :سحاب
ريوف :بدعي عليها دعوه عليها حقوقي محد يسرقها بس قولي آمين
ملاك :تراها من معارفي
ريوف :اووه انتي كذا تزيدين الدعوه
اخذت نفس عميق :سحاب يا سحاب عساك بسحايب من عذاب عساك بمطر اشواك وتفتحين الماي تلقينه نار تشربين اللبن ويتحول سم عسى الارض تحتك جمر والسما فوقك صواعق
بدر همس :الله يكفينا دعواتك
ملاك :ريوف لا تدعين خلاص هم فرحانين ببعض انا مالي دخل فيهم وحتى افكر وش اشتري فستان لزواجهم
ريوف وقفت وضربت كفها على التسريحه :لا يا حبيبتي ما بتشترين الا فستان زواجك من وافي غيره لا تسمعين ولالا
ملاك :ما ابي لا وافي ولا غيره اضربت عن الزواج
ريوف تصرخ :ما بتضربين ولا بتعارضين ولا شي ترا الحين يمديني اجي الديره والطمك انتي على سحاب على وافي الوضع ما بيتطور الحين قفلي وخليني اكلم البق بوس
ملاك :ياربي ريوف انا اتصلت عليك ابي اتطمن واسولف معاك وانتي تحولين الموضوع لوافي الحين توصلينه للهنوف بتكبره زياده
ريوف :لا ولله يا حبيبتي تحسبين السالفه بكبر الحصى وهي اكبر من الجبال حبيبتي مستقبلك يضيع قدامك وانتي تتفرجين الحين بقفل وانتي فكري راجعي مشاعرك اعرف انك تحبينه بس انك حماره ما بتعترفين حتى لنفسك
ملاك :ري...
قفلت بوجهها وهي تدور رقم الهنوف:وراضيه تجلس بينهم وهم يسولفون الصباح وتجيب لهم فطور بعد بتذبحني ذي الملاك بتذبحني
بدر :بتطلعين ؟
ريوف :وهذا وقت طلعه ؟
بدر :براحتك
...
غازي :ادري انك مو نايمه
الهنوف :الا نايمه
غازي :طيب جوالك يدق
الهنوف :مين
غازي :مكتوب ريوف
الهنوف :اشوف
مد لها الهاتف وعندما كانت ستأخذه سحبه :بس بشرط
الهنوف :ايش؟
غازي :اذا كلمتيها تروحين المستشفى
الهنوف :طيب
غازي :هاك
الهنوف :ايوه ريوف
ريوف :وينك انتي عن الدنيا ما تدرين بشي
الهنوف :وش صار ؟
ريوف :اخوك مهبب هبايب
الهنوف :اي واحد حقك ولا حق ملاك ؟
ريوف :وافي معد هو حق ملاك يا حبيبتي راح لوحده ثانيه اسمها سحاب
الهنوف جلست :ايش؟ لحظه وش صار كيف عرفتي ؟
ريوف :ملاك المسكينه اتصلت علي تسأل عن موسم الرياض متى قلت لها عسى بتجون انتي ووافي قالت شفتي فيديو الطين عساه ياكله بعدين قلت لها تهاوشتم قالت لا بس انها غبيه ما تعرف كيف تجذبه تروح تودي له فطور كل يوم الصباح وتجي حبيبته الحيه الي اسمها سحاب حق من يسحبها بشعرها تفطر معاه وتسولف وهي تجلس عشان هذيك البقره الثانيه ما تستحي امسكي اخوك من اذنه واضح بوصلته خربت عدليه وخليه يرجع للجهه الاصليه
الهنوف:قلتي اسمها سحاب عشان ادعي عليها ؟
ريوف :دعيت عليها دعوه وبحقوق بعد
الهنوف :مهما كانت دعوتك آمين الحين بقفل وادق على وافي ارجع له عقله
ريوف :مع السلامه
الهنوف :مع السلامه
غازي :نرو...
الهنوف :يا حمار وش مسوي ؟
وافي :بسم الله علي وش اسوي الحين قاعد عند النياق
الهنوف :وافي ولله ثم ولله انك تجاوب بصراحه
وافي :انا دايم صريح
الهنوف :مين سحاب ؟
وافي :زبونتي
الهنوف صرخت:كذاب
وافي :اجل ايش انا معرف غير انها زبونتي ورسمتني
الهنوف :حبيبتك يا الكلب تترك ذاك الزين كله وتروح لوحده ما تسوى ظفر ملاك
وافي تنهد :اشتكت علي عند هيئه التشبيك ولا ايش ؟
الهنوف :لا احنا نسوي تحقيقات دوريه وبقدراتنا اخذنا الكلام من فمها استحي على وجهك ياخي وش تبي فيها
وافي :ما عندك زوج تهتمين فيه خلينا بحالنا
الهنوف اخذت نفس عميق :تقول خلينا تقصد انت وملاك ولا ذيك الكلبه الثانيه ؟
وافي:كلنا الثلاثه
الهنوف صرخت :مافيه ثلاثه مافيييه ثلاثه تسمع انت وملاك مالكم ثالث
وافي :اجل كيف اصارحك اننا اربعه
الهنوف :اخخ ياقلبي جاني ضغط من هي الرابعه ؟
وافي :منهو الرابع ولله ما قالت لكم عن راشد حبيب قلبها والي خطبها اول بس رفضته لأنها صغيره وبيخطبها مره ثانيه
الهنوف :لا الوضع كذا ما يتحمل انت الحين احبس نفسك بغرفتك وفكر بعقل الانسان مو عقل الحمار بتكتشف انك تحبها بس انك ما تبي تعترف لنفسك
اقفلت الهاتف وصرخت :غازي
غازي :انا هنا ليش تصرخين؟
الهنوف :ابي الديره
غازي :عندي شغل
الهنوف :اذا قلت ابي الديره يعني ضروري
غازي :مقدر انا لو اقدر كان عطيتك وقت طويل بين الملكه والعرس بس هي اجازتي ذيك وخلاص
الهنوف :تكفى خل اي احد يمسك عنك لو عُلا
غازي :ماهو مرابطه هو ياحياتي عندي مواعيد مقدر أجلها
الهنوف :وانا مقدر اضيع وقت وهذيك الحيه تتحرك من بينهم تكفى حبيبي بس لو اسبوع اعدل الاوضاع وارجع
غازي تنهد :طيب بشوف
الهنوف :الحين
غازي :الحين انا بروح اخلص مواعيد ذا الوقت و...
الهنوف :و؟
غازي :باخذك معاي تصلحين ضرسك
الهنوف :مو وقته
غازي :الا وقته وحتى اذا صلحتيه اوعدك بوديك الديره
الهنوف :متأكد ؟
غازي :متأكد
الهنوف :يلا بس بلبس عبايتي
غازي :انتظرك بالسياره
...
بعد الظهيره تغير الجو تمامًا ولم يعد مشمسًا كالصباح ،هكذا الخريف مُتقلب المزاج كما مشاعرهم في هذه الايام ،خرجت مع عائلتها لتنسى ما حصل /لتفكر أكثر
وللأسف كان موجودًا ،تحاول نسيانه لكن سرعان ما تعود نظراتها اليه وبعقلها كلام ريوف "اعرف انك تحبينه بس ما بتعترفين حتى لنفسك" ،لا يا هذه لست احبه أظن انني أحب من يراسلني لكن لو لم يكن راشد ...
ابتسمت وهي تفكر ، لو كان وافي كيف سيكون ؟
قاطعتها والدتها:بنت امسكي الكاس لي ساعه اشير به
ملاك :هاه تسلم يدك
ابو سيّاف :شكل الطلعه عجبتك تتبوسمين من يوم جيتي
أخذت نفس عميق :اي الجو حلو بس لو يجي مطر
ابو سيّاف :المطر أقبل تشوفين ذاك الجبل؟
ملاك :اي
ابو سيّاف :هو عنده هناك لو تركزين بتشوفين بياض هو المطر
ملاك بتعجب :اي ولله
التفتت عليه :يبه شلون تعلمت كذا يعني الجو وذي الاشياء
ابو سيّاف :التجربه والحياه
تنظر للأفق او بالاصح اليه كان يجلس بعيدًا عنهم والواضح انه يكلم بالهاتف ابتسامته واسعه وضحكاته تكاد تُسمع ،من يكلم يا ترى ؟ هي ،لا لابد أنها والدته ...