فهد
رجعت للبيت عادي غيرت ملابسي وطبيت غسلت وطلعت بعدها .. فتحت جهازي كلت اتصل على بنان ، اتصلت مرة ماكو رد مرة ثانيه هم ماكو رد اتصلت تقريب ال 5 مكالمات وماكو كلت خاف زعلانه بعدها ..
بس لا صاير فد شي المفروض من عندي ما اعوفها حتى لو اتنرفز .. بدلت ملابسي وطلعت شغلت سيارتي ورحت كبل للبيت الي بي بنان .. بنص الطريق كلت خل انزل اجيبلها فد شي واشتريت نساتل وجبس وعصاير واخذتهن وياي خاف زعلانه علية حقها لان عيطت عليها بس مجان قصدي وهي ما انطتني وقت حتى احجيلها
وصلت للبيت ونزلت فتحت الباب بالمفاتيح اللي اعرفه هي كَالعاده تجي تستقبلني من الباب بس اليوم ماهيه طبيت للهول ما موجوده كلت خاف بالغرفه نايمه أو شي رحت اتأكد لكيت باب الغرفه مفتوح وماكو اي احد بالغرفه اصلا ، خفت وانقبض كلبي صحت
فهد : بناااان .. بنااااان انتِ هنا ؟
مالكيت رد .. زاد خوفي أكثر صحت
فهد : بنااااان وينج
وهم كذالك لا يوجد رد وماكو اصلا
ركضت دورت البيت كله ما موجوده
ياربي وين راحت هاي البنيه مو شلتني شل مداعرف دربي وين دخيلك الهي هي بأمانتي
شفت كلاص كدامي شلته ومن قهري طكيته بيدي واني اعصابي نار ماشوف غير ايدي كلها دم
مو وكتها كلش
طلعت بالشارع واني افتر واسئل الناس الموجوده
جانت دنيا ليل وناس قليله وماكو اي رد أو جواب منهم
ضليت امشي واسأل لكن نفس الرد ( لا والله ما شفناها)
.......................................
قبل يوم ( بيت جمال عالغدا )
اتصال جمال و عدنان
جمال : شلون لكيتها ووين ؟
عدنان : معليك بطريقتي .. اني عدنان ميصعب علية شي .. شوف اني حرجعها بس لازم تجي وتساعدني
جمال : اساعدك بشنو
عدنان : اخطفها من بيت الضابط
جمال : تم وميكون خاطرك الا طيب .. بس عدنان هذا ضابط تتوقعه مراح يعرفنا لو يندل المكان ؟
عدنان : مستحيل تطلع نخله براسه وميلكانه ولا راح يلكى المكان
جمال : خوش حجي
عدنان : رايدك باجر وياي لتنسى الساعه بمكان
جمال : تم .. الله وياك
.................................
بيت فهد
زوزو : يمه فهد ليش مدا يبقى بالبيت خيره
رحاب : والله يكول عندي شغل وملتهي ، هذا عذره بكل مرة دوخني هالولد هذا وكلبي لاچمني منه وخايفه عليه
زوزو : خاب شني رجال شكبره شكده تخافين عليه ، رحاب ابنج اسَد لتخافين عليه هذا فهد
رحاب : اوف يا فهد
ياسر : أهلاً يا جماعه كيفكون صباح الليل بتوقيت يسوري الورد
رحاب : تعال ولك تعال ابوك نايم كلي من تشوفين ياسر كوليله باجر يداوم لان حاجي ويه العميد مالتكم
ياسر : اكيد اداوم وانتِ كوليله ابن صديقك ابو احمد حمودي لا غير ضاربيه سچين وبالمستشفى وفهد راح يمشي بالقضية خوش عيني
زوزو : يمه شكد تحجي دوختني ، شو وخر عن التلفزيون ساد الشاشه متكلي شنو انت ولككك وخر المسلسل راح يخلص
ياسر معاند : زوزو تردين نستله
زوزو : وخررررررر
رحاب : ياسر لتضوجها وخر
ياسر : هلو عيني ضوجها ، اصلا زوزو متضوج مني مو صح
زوزو : بطل تصيحلي زوزو ما تستحي الا اضربك بهاي العكاز وروح امي يا ياسر
ياسر : زوزو زوزو زوزو زوزو زوزو
ماحس الا انضرب ضربة قويه على ظهري من عكازه زوزو شلون عكاز معمره وقويههه حيل بحيث حسيت ظهري انقسم
ياسر : اخخخخخخ زوزو ولج اني ابن ابنج هيج تسوين بية
زوزو : لتكووووول زوزو
وماحس غير الضربه الثانيه على رجلي
ياسر : ولك بويهههه ، خل اشرد بروحي العزيزه احسن متجيني ضربه ثالثه
زوزو : مال الغسل روح لك روح همزين مسلسلي ما خلص وهو واكف كدام التلفزيون
رحاب : عوفي هو هيج متعرفين ياسر انتِ ويانه عمر
زوزو : شلون ماعرفه عاجنته وخابزته هالوليد
.......................................
ريم
طلعت من غرفتي صادفني ياسر صاعد ويدندن اغنيه
ريم : خيرك موهنديس ياسر شعندك ( وغمزتله)
ياسر : ماكو والله على حطت ايدج اي شكو ماكو يمج
ريم : شنو يمي هو اني شعندي هو غير التلفون والكتب والصخام المدرسه
ياسر : اوففف يالمدرسه
ريم : اي باجر ابويه كال حتداوم .. اخلص منك
ياسر : هيهيهيهي هوهوهو ضحكتيني هو دوامي مثل دوامج ونفس الأوقات ، شبيج بويه مطفيه أنتِ مو جنت اداوم
ريم : اي طفيت من ورا ال كيميا تموتتتت
ياسر : لعبتي الكيميا
ريم : شلون يا بطل
ياسر : H1 + O2 = H2O
ريم : شوف انتَ وين عايش تهي بهي
ياسر : ليش عمي شبيه
ريم : ياسر اني وين وانتَ ويننننن كاعد تطلع خبالاتك علية
ياسر : كم ريم عندي هيهيهيهيهي
ريم : وحدههه
ياسر : انكلعي لعد روحي اقري شكو جايه تكوليلي كيميا ومدري شنو
ريم : هو منو كال لعبتي الكيميا
ياسر : چا شترديننن اكلج
ريم : روح نام اليوم شاخط زياده دخت ودوختي وياك خاف انسى القريته بسببك وخرررر عنيييي
ياسر " يقلد " : ننننن انسى القريته بسببك
هز ايده مستغرب .. شمسوي اني الكل گالب علية
...............................
فهد
رجعت اجر خيبتي وياي بعد ما فقدت كل املي هنا والدنيا ليل ومنو راح يعرف اصلا
باجر الصبح اتوجه للمركز وأشوف شغلي وابدي ابحث
قبل لا اطب للبيت اجاني رجال عمره يطلع تقريب ال خمسينات اعرفه هذا كاعد بيت بصفنا سلم علية وسلمت عليه
ابو عبد الله : عمو فهد اريد أكلك شي
فهد : تفضل عمي
ابو عبد الله : زاد فضلك بس هالشي مهم حيل ومن فضلك ما اريد اسمي ينجاب بالطاري وكدامك اني
اللهم اني بلغت
فهد : تدلل عمي اصلا لتكول هيج ، خوفتني عمي شنو موضوعك اول شي اتفضل اسف والله دخت اعذرني
ابو عبدالله : لا وليدي اني أجيت اكلك هالحجايتين واروح
اني شفت شباب اثنين ملثمين ممعروفين منو همه بس مبينين ينتمون لجهه معينة المهم .. عمي ترى شفتهم حطوا مثل الخاولي صغير على وجه بنتكم طلعت تفتح الباب و اخذوها بسيارة .. هاي حالة خطف بهيج حاله واني مكدرت اسكت واني شايف هالموقف
فهد بصدمه : انت شفتهم جنت موجود ؟
ابو عبد الله: اي نعم جنت موجود
فهد : يالون السياره ؟
ابو عبد الله : السياره عالية وسوده .. مبينة سيارة عصابات والله اعلم
فهد : مشفت رقم سياره فد شي
ابو عبد الله: لا والله يا عمي مشفت اني تدري بية رجال جبير ونظرية ضعيف ولابس نظارات
فهد : عمي ليش مصيحت مجان موجودين ناس
ابو عبد الله: صراحه وليدي محبيت أتدخل واصلا مجنت مستوعب السالفه ورا تقريبا دقايق من روحتهم فكرت وكلت هذوله خاطفيها
فهد : تسلم ابو عبد الله مقصرت أن شاء الله
ابو عبد الله : لا شكر على واجب ابني هذا واجبي وسويت العلية والحمد لله اني اترخص مع السلامه
فهد : الله وياك
طبيت للبيت واني محروك دمي وأيدي يابس عليها الدم
عقلي تعب من التفكير 3 ساعات دمروني دمار والتفكير زادها علية .. بنان اوف يا ربي هالبنيه شلتني شل
وينها .. خاف سوولها شي .. والله اندمهم واحد واحد اذا سوولها شي .. يا الهي دخيلك راسي راح يطكككك
رحت طلعت غراض التعقيم والشاش وداويت ايدي
جان الجرح عميق بس محسيت بي طول هالفتره كل تفكيري شاغلته بنان ، امانتي وامها امنتني اني بهيج حاله خنت هالامانه ، اذا صارلها شي مستحيل اسامح نفسي بيوم من الايام
.....................................
بيت جمال
كعدت رزان وروان جانت نايمه وايدها مأذيتها والوجع كلش يأذي ومدتكدر كلشي تسوي
رزان لبست ملابس المدرسه وافكر ..
جمال حيسوي بية مثل مسوى بنان
بنان وينج ، كلش تعبنا من بعدج ، شتاقيتلج كلش
طلعت وكالعاده ما اتريك ولا اكل اي شي بس الكى المصروف وآخذه واروح للمدرسه
................................................
بنان
بعد ما تمت عملية الخطف جنت فاقده الوعي تماماً ما حسيت على اي شي يمي طول المسافه الي اخذوني بيها ماحسيت ..
كعدت واني بغرفه فارغه وخاليه تماماً وجبيره كلش مربوطه بالأرض وحلكي مشدود بشي مثل الشال بحيث ماكدر اعيط ولا احجي وأيدي كذالك مربوطه بحبال قويه ورجلي نفس الشي
اول محسيت بديت ابجي وابجي اعيط بس الصوت تلقائي مينسمع
ياربي اني تعبت كلش
اريد خواتي اريد امي
اريد روان القويه واريد حنية رزان
شتاقيتلهم حيل حتى لأمي اريدها
امي هي الربتني وتعبت علمودنا واجهت كل شي
أما جمال .. جمال شلت حقد جبير عليه بكلبي
الله ينتقم منه على اللي سواه بيا حق بيا شرع بيا قانون يبيعني مقابل فلوس واني صح مو بنته ، بس عشت وياه سنين من صغري ولحد هسه عمري 19 سنه
حسيت الباب انفتح ودخل منه نفس الرجال الي جان بهذاك البيت واشتراني ، الكلمه صعبه تنطق ( اشتراني ) ليش اني شنو اكل لو ملابس لو ماكول غير حسبي الله عليك يا جمال الله ينتقم منك ومتشوف السعاده طول عمرك
عدنان : هههههههه عبالج ياخذج هذاك الضابط لو انسجن
ضليت اباوع عليه بصدمه وتجمعت الدموع بعيني واني اتذكر الضابط فهد شلون نقذني من عنده هذاك اليوم
طب بس ياريت وحده
طبوا وراه تقريب ال 3 ولد توزعوا بالغرفه و طب اخر شي ( جمال )
عدنان : شوف الكيها الكيها مستحيل بيوم من الايام يعصى علية شي ، حتى من دخلت السجن ثاني يوم طلعت وجبت جماعه طلعوني ، هههههههههه اني عدنان ليكون بعلمك حتى متلعب وياي
ضحك جمال وهو يباوعلي : تدلل هاي هي اني رايح مو تجيب طاريي اذا صار شي خوش
عدنان : ولك انتَ شسويت حتى اجيبك بالطاري شو كله شغلي اني وكله اني دورت روح بالسلامه ابو فراس
طلع جمال وبجيت من قهري ، القهره البكلبي مستحيل تنحجي شنو بيع شنو مشترى شنو فلوس احنه بيا عصر
هذا هو جمال ما يهمه غير الفلوس ، باع انسان مقابل فلوس
اني انتهيت هنا ..
.....................................
فهد
ما نمت ويا ريت نمت
الليل كله واني كاعد وافكر التفكير نبش مخي ومعرفت انام ولا دقيقه كل ما اغفى تجي هي على بالي
كلسع اتخيل شكلها اول مشفتها
المرة الأولى .. بنان مميزه بيها شي مميز وغريب
لازم الكاها وشلون بأي طريقه وراح اطلع فرق بحث ونشوف كاميرات الطرق ونتخذ الإجراءات
اطلعها اطلعها لو بآخر الدنيا و بأيدي اسلمها لأمها
وابوها ، السالفه الي جنت اصبر بنان بيها
جاي ندور عليه محبيت احجي كدامها بهذا الموضوع لا تتحسس لو شي ولحد الان ديدورون عليه وعليه القاء قبض
كمت من مكاني ورحت غسلت وجهي حتى اصحصح وغيرت ملابسي ورحت للشغل
وصلت و دخلت بسرعه وصحت مؤمل يجي وراي للمكتب حتى احجي وياه
مؤمل: خير فهد صاير شي وجهك مو طبيعي
فهد : مؤمل لازم تحاجي الدوريات الموجوده ويطلعون فرق بحث
مؤمل : شنو وليش شبيك فهد احجي خل افتهم
فهد : بنان ، البنية الي سولفتلك عليها
ضحك مؤمل وغمزله : هااا هاي اللي بيتك اي شبيها
فهد : انجب مؤمل مو بحالك لازم تساعدني
البنية انخطفت من باب البيت اذا صارلها شي صدكني اتخبل امها وصتني بيها شلون مؤمل شلوووون
أنصدم مؤمل وكال : شنو شلون انخطفت
لزم راسه بألم : مادري مؤمل مادري شلون وماعرف منو همه اصلا راح اتخبل رسمي كتلك حالاً ومن هسه كول للكل مداكدر اوكف حتى الليل كله منايم بس انطي خبر الهم وخل يجون هنا وافهمهم شيسوون واني وياهم طالع ادور اكيد
مؤمل : هسه رايح خلال ثواني الكل يمك
طبطب على ظهر فهد وكال : لك فهددد اول مرة اشوفك هيج لك انتَ ابو الصعب ميصعب عليك شي كومم هسه نلكاها
ابتسم فهد شبح ابتسامه وكال : أن شاء الله ، أن شاء الله الكاها
ابتسم مؤمل على وضعه وطلع
....................................
بنان
عدنان : شوفي لج اني طالع وبالليل ارجع ماريد حلكج ينفتح لو تضوجين اي احد من هذوله الولد لا صدكيني متلومين الا نفسج خوشششش
بنان : درت وجهي عنه وهو باوعلي صفح وجمع الولد الموجودين وشاورهم بس ماعرف شنو بس همه كلهم هزوا راسهم معرفت ولا سمعت
جنت ابجي على وضعي
ياربي دخيلك ساعدني
تذكرت امي بيوم من الايام كلتلي اذا صار وياج لا سامح الله شي موزين بس ادعي هذا الدعاء
( لا اله الا انتَ سُبحانكَ اني كنتُ منَ الظالمين )
بجيت واني اتذكر حياتي قبل صح ممرتاحه بس عالاقل مجنت اعرف الحقيقه الي عقلي مجاي يستوعبها
باوعت على هذوله الواكفين وجوههم تخوف وميطمنون بخير
همه واكفين اثنين بس اجى واحد منهم كعد كبالي وبده يفتح الشال عن حلكي
صاحوا بي بس هددهم وكال اخلي عدنان ينقص من ارباحكم واللي عرفته هذا المساعد مال عدنان
اول موخره باوعتلهم بحقد وبديت احجي : أن شاء الله متشوفون الفرح طول عمركم أن شاء الله تبجون دممم انتوا وعدنان ..
ان شاء الله وجوهكم متضحك طول العمر يا انذال .. الكم يوم يا ظالمين يا حيوانات
ضربني راجدي هذا الكبالي بحيث ورم حلكي
رفعت راسي وتفلت عليه ماحس غير لزمني من
شعري وعته عتت وكال : طلعتي قويه متوقعتج هيج صراحه .. ههههههه راح تفيدينا حيللللل
بجيت وصحت : وخرر عني شعرييييي
لزمه وضل يباوع عليه : شعرج يجنن هنياله والله
بنان : الله ياخذكم ولد الزنا
ماحس غير ضربني بوكس قويي على حافة خشمي بحيث خشمي بده يجري دم
لزمني من فكي ورفع وجهي : راح تندمين على هاي الكلمه يا حلوه
رجع سد حلكي واني ضليت ابجي ماكو اي امل بعد مراح أحد يساعدني ولا راح يلكوني لان اني اصلا ماعرف مكاني وين
.....................................
بالمدرسه
كالعاده بحلة المدرسه والمدرسه مهجومه والبنات كلهن ديطلعن
واكفه ريم بالحر وهي تنتضر رزان تطلع عدها شي ابالها
تأخرت رزان حيل
شافت ريم سيارة ياسر من بعيد وهو يأشرلها تعاي
راحت متوتره وصعدت ذبت الجنطه بالسياره
ياسر : وين أن شاء الله رايحه
ريم : دقيقه ياسر هسه اجي عندي شغله
ياسر : تمام
راحت ريم وكفت وطلعت رزان
ريم : رزان الله جابج وينج يمعوده
رزان : والله كالعاده احنه اخر شعبه تطلع
ريم : رزان بس طلب
رزان : حبيبتي عيوني الج
ريم : بس اريد رقم امكم حتى أحاجي روان اشتاقيتلها والله المدرسه محلوه بدونها
ضحكت رزان وكالت : اني جايبه ورقه كاتبه بيها رقم امي للاحتياط خاف يصير بية شي المهم هاي هي اخذيها و راسليها أو اتصلي عادي
ريم بضحكه: تسلميلي والله فرحتيني يلا باي
رزان : باي
راحت ريم تضحك وصعدت بالسياره
ياسر : اكلج هاي مو اخت ام كفشه ؟
ريم بضحكه: اييي
ياسر : ها شعندج وياها شنو الشغله
ريم : والله ماكو بس اخذت رقم امهم حتى احجي ويه روان
ياسر : هااا ليش هي ماعدها رقم
ريم : كافي لتسأل مو شغلك تمام
ياسر : انجبي فوك مجاييلج بعز الحر ارجعج ومكيف وعالكلج اغاني ومسويلج جو
ريم : اوي ياسر صاير تزعل شبيكككك شكلت
ياسر : كلتي مو شغلك
ريم : اي صدك يعني مو شغلك بعدين تعال اشوفك مهتم لروان هواي خيرك موهنديس ياسر
ياسر : انطمي شنو مهتملها تدرين بية اني فضولي لا اكثر ويلا انجبي
ريم : اهاااا بس ماااا انجببب
ياسر : تنجبييييين
ريم : كافي ياسر دوختني
ياسر : ام عطوب دوختج
@@@@@@@@@
فهد
بداية البحث انقسمنا مؤمل وياي يساعدني ومجموعة يدورون بكاميرات المرور ونص بدوا يسألون وهواي طرق بداية البحث تعاملنا ويه ضابط ثاني اسمه "هادي"
وبدينا ندور ولحد الان ماكو اي شيء جديد عنها ولا اي خيط وصل
همه ديدورون بكاميرات المراقبه وبالبدايه رجعوا لمنطقة فهد وأخذوا التصوير اللي مسجل كلشي صاير حتى رقم السياره طالع وهذا الشي الغبي اللي سواه عدنان
صار الموضوع شوي أسهل بما انوا لكوا رقم السياره ف بعدها البحوثات وكلشي
وشغلة احمد كلفتها لضابط صديقي وراح الصبح ويه ياسر للجامعه وتمام كلشي وهم ديدورون على هذوله المجموعه
...........................................
بنان
اندفعت الباب ورجع طب هذا الولد ونظراته ابد مو راحه وشايل بيده صينيه وبيها اكل
اجه هم رجع فتح حلكي
بنان : افضل تضل فاتحه مو كلسع تشيل الشال وترجع تسده وهذا الاكل ما اكله لو اموت خوش خليها كطن بأذنك
حجى الي لحد الان ماعرف اسمه شنو
بكيفي مو بكيفج شريد اسوي اسوي خوش
بنان : تخسى
ماحس غير وجهه بوخ وضربني هالمره لا هالمره ضرب قوي مو مثل قبل شوي حسيت وجهي كله ورم
بنان : طلعوني منا طلعوني الله ياخذكم الله ينتقم منكم
الولد : هههههههههاي لتضحكيني
بنان : وخر من يمي وخررررر ضليت ارفس برجلي أحاول ينفتح الحبل بس نفس الشي وأيدي كذالك مشدوده
بجيت واني اتذكر خواتي وأتذكر كل موقف النا
بيوم من الايام جان عدنا قفص مال طيور حب مشتريهن فراس ههه فراس النذل
جنه كاعدين اني ورزان بالغرفه دنسولف منشوف الا روان طابه وشايله واحد منهن لونه سمائي وبي ابيض جان تكول
روان : شوفووو الجمال اكيد جميلة غير اسمها روان
رزان : رواااااان وخريييي اطلعيييي
روان تضحك: ليشششش
بنان: ولج اطلعي متحبهن تخاف منهن
رزان : طلعيييي ماريد اشوفه ماماااااا تعاي لروااان
ضلت روان تضحك وكعدت ع صفحه وهي شايله الطير كالت : شوفو ترى هنه 3 طيور وسميت كل وحده على اسمائنه السمائي هذا اني و الابيض هذا فاهي بس يكتلون بي چنها رزان
رزان : انجبي شنو شقصدج
روان غمزت : عرفتي قصدي عيناي
كملت : والأصفر وبي اخضر هذا بنان .. كافي خيره وشره وكاعد يباوع لهذوله يتعاركون
رزان : يعني شقصدج هسه اني فاهيه ويكتلون بية
روان : اييي يبعدي
رزان : انجبيي تردين اشوفج شلون اكتل
روان : لج دقيقه لتنجعص روانن خل اروح اضمها
بنان : لج خبله تردين تتعاركين متدرين بروان كفشه منها تخلص شعرج
رزان : شوفي شحسوي بس باعي
طبت روان ورفعت شعرها وصعدت أكمام البلوز
روان : خل اشوف شلون تندكين بية ست رزان
وحده لزمت راس الثانيه وبدا الصريخ مالتهن وحده تعيط عالثانيه وكعن بالكاع كتل ودفرات داشوف كدامي ولد مو بنات تؤام بس وحده عكس الثانيه
شتاقيت لكعداتي وياهن ياربي اريد اشوفهن .. اسمع صوتهن
.......................................
حسن : مريم
مريم : نعم
حسن : حطلع اني وفرح هنا بالمنطقه اخذها امي تصيحج جوا تريدج تكول زوزو ضايجه خل تجي يمنه
مريم : لك هاي تدري ليش تضوج
حسن : ليش
مريم بضحكه: مسلسلها هاي حلقاته الاخيره ومتدري بعد شتسوي بس باع هي تحب الچبس جيبلها جبس وكيك خوش ماوصيك عود مو ترجع ناسي
حسن : شنو ناسي بية زهايمر
مريم : انت لو غيرك دكيت بية الدكه الناقصه هااا
حسن : ترى سالفه قديمه
مريم: اي اي سالفه قديمه ( رفعت أيدها بتهديد) اياني اياك تنسى خوش وجيب وياك طبقة بيض للصبح واجبان
حسن : شويه شويه شبيج انهديتي بية ، ها اها حروح
مريم : اي
نزلت مريم جوا يم زوزو و رحاب
مريم : اكول خاله شو بيت ام ليان مديجون من يوم العزيمه
زوزو : اي يجون علمود بطونتهم
رحاب : لا خاله يجوز مرضى يجوز عدهم فد شغله
مريم: لا لا همه مو جانوا يجون هواي شو هسه هالايام ماكو
زوزو : اي صدك والله مجايين شو جيبولي تلفون خل احجي ويه هاي جمانه البذاته
جابت مريم تلفون ودكت على جمانه ( ام ليان )
زوزو : الو
جمانه : هلا هلا خاله شلونج
زوزو : امممممم عاش من سمع صوتج
جمانه : خاله لا عبالج انتي زعلانه مني ترى اني اكثر زعلانه منكم وبالذات من فهد
زوزو : يا يمه شبي فهد
جمانه : بعدين خاله سالفه طويله
زوزو : لا شو هسه تحجين
رحاب تهمس لمريم : شبي وليدي يمه زعلانه منه
مريم: تلكيها علمود بتها لو شي
جمانه : خاله تقبلين ليان كايله لفهد اجيبلك مي وهو كايللها ماريد ومن جاية ريم كللها من يمج مي شنو عود يتنكس من عدنه لو شبينه احنه
زوزو : چا غير انتي تكضين بتج شعدها تفتر ورة الولد يجوز يتوتر منها بعدين شني تنكس ويتنكس وين عدنه هاي السوالف احنه ها مو عشرة عمر وتطبون علينه ونطب عليكم شسالفه جمانه انتي صغيره قابل
جمانه سكتت
ورا دقيقه انكطع الخط
زوزو : عزا ولج هاي شنو سدته بوجهي
رحاب : ههه لا لا هاي راحت الشبكه من يمهم وانكطع
نزلوا وراها ياسر وريم اخذها للمكتبه جانت تريد تشتري دفاتر نقص واقلام وأشياء محتاجتهن
....................................
ريم
دنفوت من يم وحده من المكتبات تذكرت جنه اني وروان نروح نشتري منها ورا منخلص المدرسه
صوفر ياسر
ريم : ها ياسر خير
ياسر : باعي هاي الحاتههه بوياااااي
ريم : ادبسزز منو هذاك اليوم راح كتل الولد
تقلد ( انت متستحي تباوع على أعراض الناس )
ياسر : انجبي لج امشي احنه رايحين للمكتبههه
ريم : غض البصر يا مسلم
ياسر : رايحين نشتري دفاتر مو غير شي
اكلج خل اذبلها الرقم هسه شصار يعني
ريم : يااااسررر اكعد راحه ترى احجي لابوية
ياسر : اوف شلون عُكره يمي اني
ريم : شلون يمي واحد ابو بنات شايف اذا تزوج بالمستقبل هاي سوالفك كلها تلكاها يم مرتك بس تخطب بسيطههه اني اعلمك
ياسر : اسم الله عليك ياسر شبيج ولج شني حاقده علية
ريم : مو حاقده بس اني انسانه متحب تجذب ولازم تريدني اصبغك يمها لا حبيبي اني ماعندي يمنى و يسرى كله عدل خوشش
ياسر : اذبحج عالقبله اذا حجيتي اي شي خوش
ريم : تدلل بعيني
ياسر : حتنكتلين هسه بنص الشارع ريم
ريم : شعليه اني دا احجي الصدك ماريد اجذب عليك
ياسر : انجبي خيتي وامشي نشوف شتردين مطلعتني
.......................................
بنان
كاعده وهذا الحقير الواكف كبالي عينه مراحت علية ونظراته قذره اكيد اذا اني ابوية هههه ابوية !! باعني وين صايره هاي اوفففف يربي
مرت هيج ربع ساعه واني اصرخ عليهم ومضل واحد متعاركت ويا اندفرت الباب وفات عدنان
كعد كبال وجهي وكال : تدرين اني ليش خاطفج
بنان : لان جلب
عدنان : لتخليني اتعصب بعدج مشايفتني شلوني خوش ديربالج مني بنان
بنان : لتكول اسمييي يا حقير
لزمني من شعري قوي وعاط بوجهي : منو الحقيررررر
بنان : اخخخ عوفف شعرييييي
عدنان : منو الحقيرر
بنان : انتتتت عبالك اخاف منك لاااا ماخاف غير بس من الله
عدنان : تنجبين وتسكتين ترى خلال يومين راح نطلع منا وونروح لبيتناااا حتى نغير السياره
بنان : بيتنااااا بعينك لو تموت ما اطلع وياك ولا اجي
عدنان : متجين انتي اني اجيبج مثل ما جبتج هنا لتنسين اني عدنان خوش
.................................
فهد
طبيت جوا واشرت للكل ب ايدي يعني كلكم هنا هزوا راسهم
صحت بأعلى صوتي : سلمواااا نفسكممم اليوم لو اني لو انتوا
نهاية البارت
يتبع
لاتنسوا تصويت
الئ اللقاء يا اعز العابرين في قلبي ♡ .
الكاتبات دينا & نور