🔸အဖြူရောင်နုနု🔸14
အပိုင်း~၁၄
Next day...
မင်းထက်နေနိုင်တစ်ယောက်ကျောင်းသွားဖို့ရေချိုးခန်းထဲမှာshavingလုပ်ဖို့ပြင်နေစဉ် ..
Shaving creamကိုမေးရိုးတစ်လျှောက်ပွတ်ပြီး
မုတ်ဆိတ်ဓားကိုလှမ်းယူကာရိတ်ခါနီးမှတစ်ခုခုစဉ်း
စားမိကာ...
" လွန်းဖြူဖြူ....."
ရေချိုးခန်းထဲကနေလှမ်းအော်လိုက်ပါသည်။
" ဟေ့ လွန်းဖြူဖြူ ....."
ဖြူဖြူကပြန်မထူးပဲအခန်းဝမှာဘွားခနဲပေါ်လာပြီး
" ဘာလို့ခေါ်တာလဲ ကိုကို..."
" ဒီမှာ မင်း ငါ့ဓားကိုတော့ယူမသုံးထားပါဘူးနော်"
" ဟင် ဘာကိုလဲ....သြော်... "
ဖြူဖြူကအဓိပ္ပါယ်ဖော်မရတဲ့အပြုံးမျိုးပြုံးလိုက်လျှင်
" အဲ့မျက်နှာပေးကဘာလဲ...မင်းတကယ်ယူသုံး
ထားပြန်ပြီလား..."
" မသုံးရပါဘူးကိုကိုရယ် ဘုရားစူး..."
" ကျစ်! မင်းကြောင့် ငါဘာပစ္စည်းမှစိတ်ချမထားရဲတော့ဘူး.."
" ကိုကိုစိတ်မသတီဘူးဆိုရင်လည်း မရိတ်နဲ့ပေါ့
ဒီအတိုင်းလည်းကြည့်ကောင်းသားပဲ၊နှုတ်ခမ်းမွှေး
လေးထားလိုက်ပါလား..."
နှုတ်ခမ်းမွှေးဆိုမှအောက်ထပ်ကနှုတ်ခမ်းမွှေးတကားကားနဲ့ကောင်ကိုသတိရသွားပြီး...
" နှုတ်ခမ်းမွှေးထားရအောင်ကိုယ်ကဆရာဝန်၊ကလေကချေကောင်မဟုတ်ဘူး...."
" မဆိုင်ပါဘူးကိုကိုရယ်..နိုင်ငံခြားမင်းသားတွေကြည့်ပါလား၊နှုတ်ခမ်းမွှေးနဲ့လည်းခန့်တာပဲ..."
" အဲ့တော့မင်းသိပ်ကြိုက်နေတယ်ပေါ့..
သွားလေ နှုတ်ခမ်းမွှေးနဲ့ကောင်သွားရှာချေ..."
ဖြူဖြူ့ကိုရေချိုးခန်းထဲကနေတွန်းထုတ်ပြီးတံခါးပိတ်ပစ်ပါသည်။ ဟယ်တော့....
>>>>>>>>
ရေချိုးပြီးအပြတ်ရွှိုင်းနေတဲ့သူ့အားဖြူဖြူကလက်ပိုက်ရပ်ကြည့်ကာ...
အင်း ကိုကိုလည်းအရင်ကထက်ပဲများလာတာပဲ။
ဆံပင်ကိုတောင်ကိုရီးယားမင်းသားကေညှပ်ထား
ပြီး..အကျီကတော့စတစ်ကော်လံအဖြူနဲ့ပုဆိုးကို
အရင်ကလိုကွက်ကျဲကြီးတွေလုံးဝမ၀တ်တော့ပဲ..
ပိုးတွဲပုဆိုးကိုမှအဆင်နုတာလေးတွေရွေးဝတ်တတ်လာသည်။
ဘော်ဒီစပရေးကလည်းမွှန်နေအောင်ဖြန်းရသေး
တယ်...။
" ဖြူဖြူ့ နားထဲမှာတော့လျှံနေတာပဲ သိလား..."
"လျှံနေရင် ကလော်ပေါ့...."
" ကျောင်းမှာကိုကို့နာမည်ကြီးနေတာကိုသိလား
မဟာတန်းက ဆရာတစ်ပိုင်းကျောင်းသားလေး
ပုဆိုးလေးနဲ့ကိုကိုဆိုတာ..."
" မသိဘူး။မင်းလိုအားနေတာမဟုတ်တော့ လိုက်နားမထောင်အားဘူး..."
" မထောင်လည်းကြားနေရတာပဲ...ကျောင်းမှာဆို
ဂျူနီယာလေးတွေကြား၊ဆေးရုံမှာဆိုဟောက်ဆာ
ဂျင်မလေးတွေကြား..
ဖြူဖြူ့ကိုကြအနေအထိုင်ဆင်ခြင်ပါဆိုပြီး ကိုကိုကြ
လူပျိုပုံတအားဖမ်းတယ်နော် ...."
သူကရှပ်အကျီရဲ့နောက်ဆုံးကြယ်သီးကိုလှမ်းတတ်ကာ...
" အဲ့တော့ ငါနဲ့အပြိုင်မိုက်ချင်တဲ့သဘောလား"
" မဟုတ်ပါဘူး... ကိုကို့ကိုပိုင်ရှင်ရှိမှန်းမသိပဲကြူးမိ
ရင် အဲ့အမျိူးသမီးလေးတွေ ငရဲကြကုန်မှာဆိုးလို့ပါ"
ကိုကိုပဲကအားလုံးပြင်ဆင်လို့ပြီးသွားတော့မှဖြူဖြူ့
ဘက်ကိုလှည့်လာပြီး....
" ဒီမှာငါတို့ယောက်ျားလေးတွေက တစ်ကိုယ်လုံး
ချွတ်ပြီးလျှောက်သွားနေရင်တောင် ဘယ်မိန်းမက
မှကြိုက်လှချည်ရဲ့ဆိုပြီး မုဒိန်းဝိုင်းမကျင့်ဘူးကွ..
သိလား ..လာမယှဉ်စမ်းနဲ့...."
" အဲ့တာကလည်းဖြူဖြူတို့မိန်းမတွေက ကိုကိုတို့
ယောကျာ်းတွေထက်စရဏအားပိုကောင်းလို့ပါနော်"
" အေးလေ..ကမ္ဘာဦးကတည်းကငါတို့ယောက်ျား
တွေကိုဈာန်လျောအောင်လုပ်ဖို့လည်းမင်းတို့ မိန်းမတွေမွေးလာတာကိုး..."
အံမယ်...မိန်းမတွေမရှိရင်လည်းသူတို့အချင်းချင်း
ပြန်ကြိုက်ကြမှာကိုများ။
>>>>>>>>>
ဘွဲ့လွန်သင်တန်းသားအနေနဲ့..မနက်ဆိုအငယ်တန်းတွေကိုဝင်သင်ပေးရသည်၊ပြီးကြမှသူတို့တွေလည်းဆရာကြီးတွေဆီမှာပြန်အတန်းတတ်ရသည်။
ဒါပြီးရင်ဆေးရုံကိုပြေးရသည်။
မိန်းမရှိတာကိုတမင်ဖုံးကွယ်ချင်လို့တွဲသွားတွဲလာ
မလုပ်တာမဟုတ်ပဲ၊အတန်းချိန်သာမရှိရင် ဖြူဖြူနဲ့
တွေ့ဖို့အကြောင်းအရင်းမရှိတာဖြစ်သည်။
စာသင်ချိန်ပြီးလို့သူတို့အုပ်စုကန်တင်းဘက်ကိုလိမ့်
လာစဉ်...လမ်းမှာဖြူဖြူနဲ့တွေ့သည်။
ရေးကြီးသုတ်ပျာဟန်နဲ့...
" ကိုကို နဲ့တွေ့တာအတော်ပဲ..ဖြူဖြူနဲ့ခဏလိုက်ပေးပါလား..."
" ဟာ ဘာလည်းကွာ ဒီမှာငါထမင်းသွားစားမလို့ကို
မင်း မမြင်ဘူးလား"
" ခဏလေးပါ ကိုကိုရယ်..."
" လိုက်သွားလိုက်လေ မင်းထက်ကလည်း...."
သူ့အဖော်တွေပါလို့လွန်းဖြူဖြူတမင်လာလုပ်နေ
မှန်းသိကာ..
" စားပြီးရင်အတန်းတတ်ရအုံးမှာ မအားဘူး.."
ပြောပြီးသူ့အဖော်တွေနဲ့လည်းဆက်မသွားတော့ပဲ
လွန်းဖြူဖြူလည်းလိုက်လို့မရအောင်ယောက်ျားလေးဆောင်ဘက်သို့ချိုးကွေးကာ ထမင်းစားဖို့လျှောက်လာခဲ့သည်။
ဒီနှစ်အမ်အက်စီမှာယောက်ျားလေးဆိုလို့သူနဲ့နောက်တစ်ယောက်သာရှိပြီးကျန်တာမိန်းမတွေပင်။
ဒီလူတွေနဲ့ဒီနေရာမှာတွေ့လာတာ၈နှစ်ကျော်လို့
၉နှစ်ထဲရောက်လာပြီမို့..ကျား၊မရယ်လို့တောင်မခွဲ
ခြားပဲ ပြောမနာဆိုမနာလောက်အောင်ခင်မင်နေ
ကြပြီဖြစ်သည်။
အချင်းချင်းထဲပြန်ကြိုက်သွားကြတယ်ဆိုတာရှားပါ
တယ်၊ဘာလို့လဲဆိုတော့ ဒီနှစ်တွေအတွင်းဒီလောက်မြင်ထားရတာကိုရိုးအီနေတာကတစ်ကြောင်း၊
ပြီးတော့စာမှစာဖြစ်နေတဲ့မိန်းမတွေကဘယ်လိုလုပ်သူတို့ကိုယ်သူတို့ကြည့်ပျော်ရှုပျော်ဖြစ်အောင်ပြင်
ဆင်နေနိုင်မှာလဲ...။
ယောကျာ်းလေးဆိုတာကသေလောက်အောင်ဉာဏ်တုံးပါစေ သစ်နေဆန်းနေမှကြိုက်ကြတာလေ။
အဲ့တာလည်းသူ့ကိုမိန်းမတွေနဲ့တွဲမြင်တာနဲ့လွန်းဖြူ
ဖြူတစ်ယောက်ကသမုတ်ချင်တာပဲ....။
ကျစ်!
ထမင်းစားဖို့ခုံမှာထိုင်လိုက်ယုံရှိသေး..သူ့ဖုန်းထဲကောလ်ဝင်လာသည်။ခုနကအတန်းဖော်ထဲကတစ်
ယောက်ဆက်တာ...
" ဘာလို့လဲ အကြည်..."
" မင်းထက် ဒီမှာဖြူဖြူနေမကောင်းဘူး၊အန်နေတယ်ဟဲ့ လာအုံး..."
အကြည်..ဆက်တာဆိုတော့သူ့ကိုနောက်နေတာ
မဟုတ်မှန်းသိ၍ကပြာကယာထထွက်လာရသည်။
သူရောက်တော့ဖြူဖြူကအမျိုးသမီးအိမ်သာထဲမှာ..
" ငါဝင်လာမယ်နော်..."
သူခွင့်တောင်းပြီးလှမ်းဝင်လိုက်ရသည်။
အထဲမှာဖြူဖြူနဲ့သူ့အတန်းဖော်တွေရှိနေကြသည်။
" နင်ကလည်းလေကိုယ့်မိန်းမဘာဖြစ်နေမှန်းမသိ
ရှေ့မကြည့်နောက်မကြည့် စွတ်ပြေးတော့တာပဲ.."
" အေးလေ ထမင်းမစားရရင်သေတော့မယ့်အတိုင်းနဲ့..."
အရင်ကဖြူဖြူ့ကိုကြည့်မရတဲ့ဆရာမတွေကအခုကြသူ့ကို့ဝိုင်းကောကြသည်။
" ဖြူဖြူ မင်းဘာဖြစ်တာလဲ..."
" ဒီနေ့ အနာတမီဒိုင်ဆက်ရှင်းလုပ်ရတာတဲ့၊လူသေ
အလောင်း(Dead body)ခွဲပြီးခေါင်းနောက်နေလို့နင့်ကိုလာရှာတာတဲ့..."
" တကယ်ပဲ ဖြူဖြူ ညီမလေးရရဲ့လားဟင်"
ဖြူဖြူကအဆက်မပြတ်အန်ချထားပြီး..အကျီတွေ
မှာစွန်းပေနေကာ၊လူကလည်းနဂိုပိန်သွယ်ရကြားထဲကခပ်ယဲ့ယဲ့သာရှိတော့သည်။
" သွေးပေါင်ထိုးကျနေပြီထင်တယ်ဆေးရုံသွားပြီး
ဆေးချိတ်မှပဲ..လာ ကိုယ်ချီမယ်..."
သူ့မိန်းမကိုသူပွေ့ချီပြီးကားဆီခေါ်လာရသည်။ဖြူဖြူ့အိတ်ကလေးကိုသူ့သူငယ်ချင်းတွေကလိုက်ပေး
ကြသည်။
ဆေးရုံကိုခေါ်သွားပြီးသူတို့ရဲ့နားနေခန်းထဲမှာဖြူဖြူ့
ကိုဆေးပုလင်းချိတ်ပေးထားပြီး..သူထိုင်စောင့်နေရ
သည်။
တစ်ကျောင်းလုံးမှာဖြူဖြူ့သူငယ်ချင်းတွေရိုက်သတ်လို့မကုန်နိုင်တာကို..ကိုယ်မဟန်နိုင်ရင်တစ်ယောက်ယောက်ကိုအကူအညီမတောင်းပဲသူ့ကိုမှ
လိုက်ရှာရသလား ဆိုပြီးစိတ်တိုရသလို။
ဒါပေမယ့်လည်းမိန်းမတို့သဘာဝအရမှီခိုအားကိုးချင်စိတ်ကြောင့်သူ့ကိုလာရှာတာလည်းဖြစ်နိူင်လို့..
ထားပစ်ခဲ့မိတာကိုနောင်တရချင်လာသည်။
ဖယောင်းတိုင်လိုပိန်သွယ်သွယ်လက်ချောင်းလေး
တွေကိုလှမ်းကြည့်ကာ..
" ဒီလောက်ပိန်မှတော့ ကိုယ်ခံအားဘယ်ကောင်းပါ့
မလဲ..."
ပွေ့ချီလာတုန်းလည်းအတော်ပေါ့ပါးနေလို့..
" မိန်းကလေးတွေများကွာအသေခံပြီးတော့ကို
လှချင်တာပဲ..."
ဆေးရုံကိုသူချီခေါ်သွားရတော့အားလုံးမြင်ကြပြီး..
ဒီသတင်းကဆရာ့နားထဲရောက်မှာပေါ့။ဆရာက
အိမ်ကဒေါ်မြင့်ကိုဖြူဖြူစားဖို့စွတ်ပြုတ်တို့ဘာတို့
ပို့လိုက်လို့ပြောဟန်ရှိသည်။ဒေါ်မြင့်ကနေတဆင့်
သူ့အမေနားထဲကိုရောက်သွားတော့...
ဖြူဖြူမူးလဲတယ်ဆိုတော့ကိုယ်ဝန်မှတ်ပြီးအားရ၀မ်းသာနဲ့အိမ်သို့ရောက်ချလာပါသည်။
နေရင်းထိုင်ရင်းအဖွားကြီးဖြစ်ချင်နေတာပဲတကယ်
ကိုယ်ဝန်မဟုတ်ပါဘူးလို့အတင်းရှင်းပြရသည်။
"အမေကလည်းဗျာ၊ကျွန်တော်တို့ကအလုပ်များတဲ့ဆရာဝန်တွေပါ၊ဘယ်လိုလုပ်ကလေးမွေးအားမှာလဲ..."
"ဟဲ့ မင်းတို့ကမွေးပေးယုံပါပဲ၊ဒီမှာမင်းအမေငါကသန်သန်မာမာကြီးရှိသေးတယ်.မင်းတို့ထိန်းစရာမလိုပါဘူး၊ ငါ့မြေးငါ့ဟာငါထိန်းမှာပေါ့..."
" စိတ်ကူးယဉ်မနေပါနဲ့..."
"မင်းသာလိုချင်ရင် ငါ့ချွေးမကမမွေးပေးပဲမနေဘူး"
" ဒီမှာအခုတောင် မူးလဲနေတာမြင်ရက်နဲ့ဗျာ."
" အဲ့တာမင်းလျှာရှည်ပြီး..ဒီအိမ်ပြောင်းလာလို့ပဲ..
ဒီအိမ်မှာငါ့ချွေးမကအနေအစားဆင်းရဲလို့ ဒီလိုဖြစ်
တာပေါ့၊ ပိန်သွားတာကြည့်ပါလား..."
" မသိပဲပြောပြန်ပြီဗျာ၊အမေ့ချွေးမကဆရာဝန်လိုင်း
သာယူတာ။လူသေကောင်ကျသေအောင်ကြောက်
တာဗျ..အခုအလောင်းခွဲရလို့ဖြစ်တာလေ
ကျွန်တော်နဲ့ဘာမှမဆိုင်ဘူး။
ကျွန်တော့်အိမ်မှာအနေအစားဆင်းရဲတယ်ထင်ရင်
အမေ့ချွေးမကိုအမေ့အိမ်သာခေါ်သွားလိုက်.."
လူမမာဆိုတဲ့ခေါင်းစဉ်အောက်မှာလွန်းဖြူဖြူ့ကိုသူအလိုလိုက်ရပြန်သည်။
" မင်းစားချင်တဲ့အစားအသောက်တွေကဘာမှအာဟာရမဖြစ်ဘူး၊အားရှိတာကိုစားရမယ်...
မသိတာလည်းမဟုတ်ဘူး၊အသိခေါက်ခက်နဲ့အ၀င်
မနက်နဲ့...."
စွပ်ပြုတ်ပူပူကိုမှုတ်ပေးပြီး...
" စားပါဗျာ မမချော၊ခင်ဗျားတစ်ခုခုဖြစ်ရင်
ကျုပ်ပဲဝိုင်းအပြောခံရတာမြင်တယ်မှတ်လား..."
ပါးစပ်မကောင်းလို့မစားချင်ပေမယ့်..မစားရင်အတင်းပါးစပ်ကဖြဲတိုက်မယ့်ရုပ်ကြီးနဲ့ဆိုတော့..ဖြူဖြူမှာ
သူခွံ့ကျွေးသမျှ ကြိတ်မှိတ်မြိုချရပြန်သည်။
" ဟင့်အင်း ကိုကို တော်ပြီ..."
" မရဘူး မင်းရပ်ခိုင်းတိုင်း ငါဘယ်တုန်းကရပ်ခဲ့လို့လဲ..."
ဟင့်.....။
>>>>>>>
ဒီနေ့စာသင်ဝိုင်းကအပြန်ရေကျော်ကcity mark
မှာသူ့အတွက်လိုအပ်တာတွေဝင်ဝယ်ပါသည်။
တစ်ကိုယ်ရေသုံးဆပ်ပြာ၊ရေမွှေးကနေစပြီး၊ရှပ်အကျီ၊ပုဆိုးနဲ့အတွင်းခံတွေအထိ..ဒီနေ့အချိန်လည်းရ
သေးတာကြောင့်စိတ်ကြိုက်ရွေးဝယ်လိုက်သည်။
ပြီးတော့မှ ညစာအတွက်ကြက်သားနဲ့သစ်သီးနည်း
နည်းဝယ်ဖို့frozenဘက်ကိုလျှောက်လာစဉ်..
ဆွဲခြင်းတောင်းတစ်လုံးနဲ့ဈေးဝယ်နေတဲ့နုနုကိုတွေ့
လိုက်ရလို့...
" နုနု...."
သူခေါ်တော့ချာခနဲလှည့်ကြည့်ကာ...
" ဟယ် မင်းထက်..."
" နင်ဈေးဝယ်နေတာလား..."
" နင်ကော ..တစ်ယောက်ထဲလား၊နင့်ဇနီးမပါဘူး
လား..."
" မပါဘူး၊ ငါစာသင်ဝိုင်းကအပြန်မှာ
လိုတာဝင်ဝယ်တာပါ"
" သြော် ဟုတ်လား"
" နင်ကောတစ်ယောက်ထဲလား ၊ပစ္စည်းတွေကအများကြီး"
" အေးဟယ် ငါကောင်မလေးခေါ်မလာမိဘူး"
" ပေး ငါကူသယ်ပေးမယ်..."
" ရပါတယ်လေးတယ်"
" ပေးစမ်းပါ....."
" နင်အချိန်ရလို့လား..."
" ရသားပဲ၊ ပြီးရင်အိမ်ပြန်ယုံပဲ..."
" သြော် နင်ဘာဝယ်မလို့လဲဝယ်အုံးလေ..."
"အင်းညနေစာ ကြက်သားနဲ့အရွက်ဝယ်မလားလို့."
" ဘယ်သူချက်မှာလဲ..ဒေါ်ဒေါ်လား..."
မင်းထက်တို့အိမ်ကဈေးနားနီးသားပဲ၊တကူးတက
ဝယ်စရာလိုမယ်မထင်။ငွေကြာရံအိမ်ဆိုရင်လည်း
သူဝယ်စရာလိုမယ်မထင်၍မေးလိုက်တာဖြစ်သည်။
" ဆေးရုံနဲ့နီးတဲ့နေရာပြောင်းပြီး၊အိမ်ခွဲနေကြတယ်
လေ..အဲ့တော့ငါ့ဖာသာချက်ပေါ့..ဒါပေမယ့်အားမှပါ၊နင်သိတဲ့အတိုင်းပဲလေ..."
"အေးလေ၊ နှစ်ယောက်စလုံးအလုပ်များတာပဲကို"
" နင်ကော...နင်တို့အဆင်ပြေရဲ့လား..."
နုနုကခေါင်းလေးကိုဖြေးဖြေးညိမ့်ပြီးပြုံးပြရင်း...
" အင်း..ထွေထွေထူးထူးမရှိပါဘူး၊ ကိုဗညားကလည်းငါ့အပေါ်ကောင်းမွန်ပါတယ်...."
" ဟုတ်လား၊ တော်သေးတာပေါ့ ...."
ဈေးဝယ်ပြီးရှင်းတော့လည်းအတူတူမို့..သူဝယ်တာ
တွေကိုနုနုကမြင်ပြီး...
" နင့်အတွက်ချည်းပဲလား၊နင့်ဇနီးအတွက်ကော"
" အင်း သူ့အတွက်ကမလိုပါဘူး..."
" ဟယ် နင်ကလည်း..."
" မဟုတ်ဘူး ၊ ဖြူဖြူကစင်ကာပူတို့၊USတို့ပဲသုံးတာလေ၊အဲ့တာကြောင့်..."
" ဒါပေမယ့် နင်ဝယ်ပေးရင်သူမသုံးပဲနေမလား"
နုနုကသူတို့ကြားမှာပေါ့ပေါ့ပါးပါးဖြစ်သွားအောင်..
သူငယ်ချင်းဇတ်သွင်းပြီး..ဖြူဖြူ့အတွက်ပါတကူး
တက၀ယ်ခိုင်းနေတာလားတော့မသိပါ။
မင်းထက်ကသူရွေးထားတဲ့ရှပ်အကျီနဲ့အတွင်းခံတွေကိုကြည့်ပြီး..
" တော်ပါပြီ၊ သူကြိုက်တာငါဝယ်ပြီးပါပြီ.."
city markထဲကထွက်လာတော့..နုနုအထုတ်က
အလေးကြီးမို့သူကူသယ်ပေးရင်း..
" ဘယ်ကိုတင်ပေးရမလဲ၊ ဒရိုင်ဘာပါလား"
" မပါပါဘူး၊ အိမ်ကဒီရေကျော်ထဲမှာပဲလေ...
ငါဈေးဝယ်ရင်ကြာတော့..စောင့်ခိုင်းရမှာစိတ်မဖြောင့်လို့...၊ taxiနဲ့ပဲပြန်မယ်ဆိုပြီး..."
" ငါ လိုက်ပို့မယ်..ရတယ်မှတ်လား."
" ဒါပေမယ့် နင်အလုပ်ပိုမှာပေါ့..."
" ငါအားတယ်လို့ပြောပြီးသားပဲ..."
သူ့ကားပေါ်ပဲတင်ခေါ်ပြီးနုနုကလမ်းပြ၊သူကမောင်း
သည်။တခြားဘာစကားမှဆက်မပြောဖြစ်ကြပါ။
ဒီအခြေအနေကအကြောင်းသိသူတွေအတွက်ရယ်
ဖို့ကောင်းနေမှာသေချာပါတယ်။
သြော်...
တွံတေးသိန်းတံသီချင်းလိုတောင် ၄၀ကျော်၅နှစ်ကို
မရောက်သေးပါပဲ၊လွန်ခဲ့တဲ့၎လကအထိမခွဲနိုင်မခွာရက်ဖြစ်ခဲ့ကြတဲ့ငယ်ချစ်ဦးနဲ့...အခုတော့နှလုံးသား
ရေးတွေကိုဘေးချထားလိုက်ပြီး၊ပါတနာတွေနေ
ကောင်းကျန်းမာပြီးအဆင်ပြေရဲ့လားမေးနေရပြီ။
ဟက်.....
နုနုအိမ်ရှေ့ရောက်တော့ခြံဝမှာပဲရပ်ပေးလိုက်သည်
၊ကားသံကြောင့်အထဲကကောင်မလေးတစ်ယောက်ပြေးထွက်ပြီးပစ္စည်းတွေလာကူသယ်သည်။
" အိမ်ထဲဝင်ပါအုံးလား..."
" နေပါစေ...သွားတော့မယ်နော်.."
ကားကိုဘက်ဆုတ်ကာပြန်ကွေ့မောင်းလာစဉ်.နုနု
ကခြံဝမှာရပ်ပြီးကျန်ရစ်ခဲ့တာကိုဘက်မှန်ကနေ
မြင်နေရသည်။
ကားမောင်းရတာစိတ်အိုက်လာလို့ရေဒီယိုကိုလှမ်း
ဖွင့်တော့..
🎶အိမ်ပြန်ချိန် ရောက်ခဲ့ကြရင် ငိုကြရမှာ
မင်းရော ငါရောဆိုင်သူ ကိုယ်စီ ရှိပြီးသား..ဘဝမှာ
မဆိုင်တဲ့ ကြားနှစ်ယောက် မနစ်နာလေအောင်
တို့ နှစ်ယောက် ပျော်ရဲသလား......
တို့ နှစ်ယောက် ပျော်သင့်သလား.....
/တိုက်တိုက်ဆိုင်ဆိုင်ခိုင်ထူးရဲ့'ဆိုင်သူကိုယ်စီနဲ့မို့'
ဆိုတဲ့သီချင်းလွှင့်နေပါသည်။
🎶ဆုပ်လည်းစူး××စားလည်း ရူး×အခြေအနေမှာ
အားလုံးမေ့ပြီး ထင်ရာစိုင်း ပစ်လိုက်ချင်
ရှိပြီးသား ခံစားချက်ကိုယ်စီကို.....
တို့နှစ်ယောက် အသိနဲ့ ထိန်းသိမ်းလိုက်ကြစို့......
ဟုတ်တယ်နုနု၊ငါတို့၂ယောက်လုံးကပညာတတ်
တွေပဲ။အခုတော့ဖြစ်သင့်တဲ့ဘ၀မှာနေပျော်အောင်
နေလိုက်ကြတာပေါ့။
နုနုလည်းအဆင်ပြေနေတာမြင်လိုက်ရတော့..
သူ့ရင်ထဲကလေးလံနေတဲ့တစ်စုံတစ်ရာဟာပွင့်ဟ
အက်ကွဲထွက်လာပြီးကြမ်းပေါ်ပြုတ်ကျသွားသည်။
သို့သော် သွေးစိမ်းများလည်းထွက်မလာသလို၊နာ
ကျင်ခြင်းလည်းအလျဉ်းမရှိတော့ပါ။
လမ်းမှာဆူရှီဆိုင်တွေ့တော့ကားရပ်ကာဆင်းဝယ်
သည်။ဆူရှီနဲ့ဘာဘယ်တီးလ်..
သို့ပေမယ့် ၂ခုစလုံးကိုသူမကြိုက်ပါ။
>>>>>>
ဆက်ရန်
စာဖတ်သူအသဲတစ်ယောက်ချင်းစီကိုကျေးဇူးတင်ပါတယ်နော်။သဘောကြရင်မန့်ပေးရှဲပေးပါအုံး