#خطأ_طبي «عقاب الاماني»
بقلــم : نورمين 🖤🦋
...
عقاب
بعدما طلعوا، قسورة كام يطلب اكل وسجاد كاعد.
همستله حتى ليسمع قسورة.
عقاب: شسويت على سالفة محامي قحطان؟
سجاد: أمّن، اني وليث حليناها
عقاب: زين والبضاعة رجعتوها؟
سجاد: كاملة مكملة وفوكاها صوغة هم
عقاب: كفو، ووين وديتوه؟
سجاد: هنا تسأل ليث بعد
عقاب: وضحت بدون سؤال، ولو هو يستاهل يتّم هواي عوائل
سجاد: بالضبط، لذلك ما ادخلت وخليت ليث يشتغله عالبارد
بصدمة اردفت مستنكر
عقاب: مو هستوك تكول مادري واسال ليث؟!
ضحك ورد حتى يضيع السالفة
سجاد: هاا، يي شلونك انت خو ما متوجع؟!
هزيت راسي مبتسم بخفة.
عقاب: زين والشغلة ذيج؟
سجاد: يمي، لتخاف
عقاب: تمام
اجة قسورة يسأل بفضول.
قسورة: عود شعندكم تتهامسون؟ احجوا شضامين عليه وانت عقاب ترا ممرتاحلك صار فترة، تضمضم ع اخوك؟!
عقاب: كتاب مفتوح اني، شعندي قابل واضم؟!
قسورة: ولله لازم نسال سجاد، اي غرد ابو الجود شبيها ما بيها؟
سجاد: عود انت تغار لو فضولي لو شنو فلمك؟
قسورة: الاثنين
عقاب: اضرب من الدكتورة ولله
قسورة: اخوي غير
هزيت راسي بالايجاب، دك تلفون سجاد كام جاوب بعيد عننا.
قسورة يباوعله بتعجب.
عقاب: شعندك؟ ليش هيج تباوع
قسورة: عود ليش ميجاوب كدامنا؟
عقاب: خصوصيات يجوز
قسورة: هي مال خصوصية، غير احنه دافنيهن سوا
عقاب: ميخالف، يجوز اهله جماعته
قسورة: خو مو النهار كله، عقاب دومه لازم الفون ويخابر وماخذله زاوية، عجبني!!!
عقاب: دوم دوم يعني؟
قسورة: لك ايي!!! حتى الولد منتبهين واكثر من مرة بسمرناه عبالنا عده وحدة، بس ليث يكول ماكو وهو هم يكول منين
عقاب: اها.. خير ان شاء الله
باوعتله، صدك حركاته مو راحة ويرد بتوتر عالاتصال.
كمل واجة كعد.
عقاب: ها يابة يكولون صاير هواي تخابر هالايام، نكول مبروك لو ننتظر؟!
سجاد: يا مبروك يمعود، متسكت عني بلا
قسورة: اموت واعرف ويامن تحجي
سجاد: لتموت، واصلا رح تعرف عن قريب، انت والكل هم
رفعت حاجبي ناظرله باعجاب، كالها بطريقة ملفتة للنظر صراحة.
عقاب: اي عالخير لعد
هز راسه بهدوء، ادور فجأة سمعنا صوت سيارات طبكت كدام البيت.
الباب اندفر وطبوا كومة زلم مسلحين، اني جنت ما مسلح، بس قسورة وسجاد شالوا اسلحتهم ووكفوا كدامي.
قسورة: الظاهر متعرفون ويامن اندكيتوا!!!!
سجاد: منو انتووو؟!!!
ثواني قليلة مرت من المهاترات المسلحة، وراها طب امير يمشي بفخر..
جحظت عيوني بصدمة وملامحي احتدت، اريد اهجم عليه لهالكلب املخه تملخ.
عقاب: ياااا كلبببب!!!!
قسورة وسجاد لزموني عنه، اجة كعد كبالي وحط رجل ع رجل.
امير: ما اشتاقيتلي عليك الله؟!
حجة بلطف مزيف، واردفت بغل وحقد.
عقاب: اييي كلش اشتاقيت، وناوي اليوم اغسل الشوق وامدك جنااازة!!!
امير: من يوم يومك تحب العنف، شوية اهدئ يا عيني مو كله دم دم دم، التفاهم مطلوب ترا
عقاب: التفاهم هذا للبشر، مو للحيوانات امثالك ما يصلح!
امير: مقبولة منك، المهم شلونه ظهرك صرت زين لا؟ ظل بالي يمك وكلت لازم اجي اشوفه واطمن عليه
قهقهت ساخر، ظل يباوعلي بمكر والابتسامة ما فاركت وجهه..
عقاب: مو كتلك مصيرك ترجع وانتقم منك؟ هياتك رجعت واني بعدني عد كلمتي!!
قسورة همسلي.
قسورة: ع كيفك جرحك لينفتح!!
عقاب: وينفتح!!
خزرني بعدم رضا، ما اهتميت لان الي كاعد كدامي ماخذ كل اهتمامي حاليا.
من شفته تذكرت كل مشاعر القلق والشوق والخوف والحزن الي عشتهن وية اماني مجبور بسببه.
امير: سجاد تعال لهنا
نزل سلاحه وراحله كعد بصفه مبتسم بنصر.
وسعت عيوني بتفاجؤ وقسورة ظل صافن عليه مصدوم!
امير: انصدمتوا مو؟ يلا هي الحياة مليئة بالمفاجئات، وسجاد جان واحد من هالمفاجئات الصغيرونة الحلووة!
سجاد هز راسه مبتسم بنصر، رمشت بعدم تصديق وكلت..
عقاب: لك انت عااااااار
قسورة: كلببب!!! لك حتى الكلب ميعض الايد الي انمدتله!!
اردف بخبث..
سجاد: مو كلتلكم قريبًا حتعرفون كلشي، بس ما توقعتوا القريبا هيج قريبة مو؟؟؟؟ هههههههه ريحتوا فضولكم هسة؟
قسورة: سجاد يا خاااين يااا كلللببببب
عقاب: انت هم نهايتك مثله، سودة مصخمة وعلى ايدي!!
سجاد: نشوف..
كالها بتحدي، امير حط ايده ع رجل سجاد وباوعلي وكال.
امير: عوفه خطيه عايش اللحظة، ميدري شمتاني!
باستهزاء جاوبته.
عقاب: لك انت لو بيك خير متدز كلب من كلابك يغدرني!! بس شترجى منك هي هاي سفالتك!!
امير: ولان هاي هي سفالتي، فرايد اكلك شغلة تزيدها يمك عالسفالة.
باوعت لقسورة الي صاير بركان اعصاب ورجعت باوعتله بس ما حجيت، منتظر منه يكول شعنده.
امير: اني قررت اخطب ماكو مبروك؟
باوعتله بملل.
عقاب: متريد بعد هلهولة فد مرة؟!
امير: لا هاي ضمها من تعرف هوية خطيبتي اريدها منك
عقاب: ومنو تعيسة الحظ هاي؟
جان منتجي، كعد عدل وكال الاسم بتشديد ع الحروف..
امير: اماني رياض الرحمن.
نبضة عنيفة دكت بكلبي، وسعت عيوني بتفاجؤ وتلقائيًا كتله بتهديد.
عقاب: تحلم!!!!!
بهالاثناء دخل ليث مسلح.
ليث: هاي منووو عدنه اليوم!!
امير: حتى انت فرحت، وعقاب لا تؤ تؤ وسفةةةة..!!
من شاف سجاد، جمد بمكانه ونزل سلاحه مندهش.
ليث: هاي شديسوي هذا، سجاد وين كاعد انتت؟؟!!!
سجاد: بمكاني الصحيح خياي!
ليث: شنو مكانك شديصيرر!!! عقاب قسورة شديحجي هذا!!؟؟
قسورة: مثلما سمعت، سجاد طلع خاين!!
ليث اكثر شخص تفاجئ بينا لان سجاد صديقه من زمان حيل.
صرخ بصوت عالي وسحب سلاحه يريد يضربه طلقة بس لزموه و اخذوا سلاحه منه.
ظل يصارع بين ايديهم حتى يفلت ويهجم ع سجاد بس ما كدر لان عددهم جبير.
قسورة: عووووفوووه يا سفلةةةةة ***!!!!!!
امير: لتخاف منسويله شي، اي عقاب ما كتلي مبروك لا هلهلت؟!
اني من كال اسم اماني احوالي كلها تخربطت، تنخطب منه!
ممعقولة يكون ديجذب، خاصة هو رجع للساحة رغم كل تهديدات التصفية الي منتظرته!
اذن اكيد اكو شي متغير!!
زين اختفاء اماني واهلها معقولة يكون هذا سببه؟!
لاول مرة بحياتي اعترف بأني خسرت، ومو اي خسارة.. خسارة حيل جبيرة!!
امير: هي هاي الحياة، فوز وخسارة خو ما تظل بس انت الربحان ميصير.. والدكتورة هالمرة حصتي اني!!
اردفت بغضب.
عقاب: تحلممممم!! تحلم تاخذها وتتهنى بيها!!!
كام وكف كدامي، طبطب ع جتفي وكال بمنتهى الهدوء..
امير: مرة كتلي بعض الاحلام تتحقق، واني هسة اريد اكلك كلامك جان كلش صحيح!!
اشر لزلمه، طلع يتمختر ووراه سجاد، وشوية شوية انسحبوا زلمه وطلعوا كلهم.
ظليت واكف مادري شسوي، روحي شايطة معقولة تنخطب اله، لا لا متسويها هي شكلتلي اخر مرة!!
حسيت الغصة انتقلت من كلبي وحنجرتي، لعيوني بحيث اكو نار تطلع من عيوني لا يطفيها بچي ولا تهدئ وحدها.
ليث: لككككك سججججججججااااااااددددد!!!!!!! ممممدددداااا اااصددددككك!!!!
قسورة: طلع حيووااان!!!! مدا اصدك ولله مدا اصددددككككك!!! لك عقاب هالفترة هاي كلها هو الباعنا واحنه مخاويه وحاطيه بنصنه، اعتبرنا منه وبينه وهو الكلب بايعنة بالرخيص!!! لك ****** بهالشغلة!!
هم يتصايحون واني روحي بخشمي، حجيت بهدوء.
عقاب: طلعوا برة
قسورة: شهاالبرود!! لك سجاد خاااين!!!!
ليث: عقاب اني اندل مكاناته، اروح اخلص عليه وادفن عااره هالعااار الساااقط!!!!
رديت بصوت عالي مليئ بالغضب..
عقاب: ممحححححد يسوويله شيي!!!! ممححححد تفتهمووون؟؟!!!!!
ليث: شنو محد يسويله شي! لك غدرنننااااا !!!!!
قسورة: مو بوعيه هذا عوفه
عقاب: بوعيي ونص، سجاد محد يدناله حسابه وياي اني وبس!!! ويلا برا ماريد احد هنا
قسورة: بس هو خاننا كلنا!!
ليث: اي اني ما اقبل هيج، خاصة اني لجبته ودخلته بيننا!!!!
عقاب: حجاية وحدة ما اسمع، كلت برا يعني برررررا!!!!
صرخت باخر كلمة، وكمت وراهم طلعتهم وسديت الباب.
كعدت عالقنفة افكر وكلبي يدك بتعب.
فكرة ان تكون اماني لغيري دتموتني..!
ظليت الوب مادري وين انطي وجهي ولا شسوي..
بس ادخن وانفث الدخان بهوس.
للعصر طلعت بالسيارة، رغم الالم الي دا احس بي بظهري والناتج عن جرحي.. بس مو مهم.
الالم من جوة روحي يوجع اكثر بهواي من الالام جسمي..
وكفت يم باب المستشفى، ظليت اباوع والذكريات زحفت لدماغي..
كل مرة وصلتها بيها لهنا، كل حديث دار بيننا بهالمكان..
كل ضحكة كل حزن..
بهيج حالة..
الذكريات تكون مثل حبل الاعدام، تنلف حول رگبة الانسان وتخنكه من دون ميكدر يتحكم بيها او يتخلص منها.
حسيت بشي نزل ع ظهري، مديت ايدي عالمكان لكيته دم.
الظاهر الجرح انفتح، اخذت كلينس مسحت ايدي وشغلت السيارة.
هالمرة وجهتي بيها، وصلت وجانوا مموجودين وحتى حرس ماكو.
ظليت افتر ببغداد مادري وين اريد بس اريد الكاها اريد اعرف حقيقة الي كاله امير!!
تليفوني يدك والولد يتصلون ويرجعون لورا، بس مسوي صامت ولا رديت، مالي خلك احجي شي.
مثلما رحت رجعت، اني وخيبتي وحزني.
لكيت ضرغام وليث بالباب واكفين، نزلت من السيارة تعديتهم ببرود.
اثار الدم جانت ملطخة ملابسي، فواضح ان جرحي انفتح.
ضرغام بقلق: عقاب وين جنت لسةة!! شنو هذا الدم!! شجنت تسوووي!!
ليث: اني رح اخابر قسورة يجيبله مضمد ويجي
ضرغام: اي بساع ليث
طبيت كعدت، ماكدر اتمدد لان ظهري ديأذيني بس اكابر وية نفسي.
ضرغام: عقاب انت اعقل واحد بينا، هيج تسوي بروحك؟
ليث: وين جنت من الظهر لسة اني واكف بالباب واتصل عليك مترد، وين جنت عقاب خو ما سويت شي؟
تنهدت بعمق، ورديت بحدية.
عقاب: اريد شوية هدوء راسي دايخ، ممكن؟!
ضرغام: ع راحتك
ليث: اسويلك شي تاكله احسن
عقاب: ما اريد شي
ليث: متشوف جرحك ينزف تحتاج تغذية فقدت دم هواي!!
نترت بي موسع عيوني بغضب.
عقاب: كتلك ماريد!
سكت منصدم من حالتي، بس ضرغام رجع كله.
ضرغام: معليك بي، سوي واني اخلي ياكله غصبن عليه
ليث: تمام اذا هيج
كلبت وجهي بملل، اني بيا حال وذولة بيا حال!
شوية واجة قسورة ووياه ممرض.
تمددت ع وجهي وهو بدل الشاش وضمد الجرح وكال.
-ميصير تخلي جرحك ينزف بهالطريقة، مكان الاصابة قريب جدًا ع عصب مهم بالحركة، انت اكيد متريد تنشل لا سامح الله مو؟!
غلست عليه وكعدت ع حيلي.
عقاب: قسورة حاسبه، اريد انام.
قسورة: تمام، تفضل وياي ابو الشباب
-بس شغلة اخيرة، اذا ردت تنام نام ع الصفحة السليمة خاف يرجعلك النزيف.
اومئت بنظراتي وطلع، وليث وضرغام بقوا ع وكفتهم.
عقاب: اتوقع سمعتوني كلت اريد انام؟
ليث: متنام منو لازمك؟
خزرته، ضرغام جره وطلع.
ضرغام: خلي نطلع ونعوفه يرتاح
سدوا الباب، خلخلت ايدية بشعري وزفرت انفاسي بحرارة..
عقاب: مستعد ادفع عمري كله بس اشوفج دقيقتين..
شوية وغفيت من التعب مدري من الدوة الاخذته، بدون ما احس ع نفسي.
تهادى لعقلي حلم غريب .. مكان مظلم جبير واماني بنصه تبجي وتصرخ بأسمي..
قلقت وبفعل خوفي عليها ظليت اركض منا ومنا احاول اتبع صوتها حتى الكاها واخلصها بس ماكو!
منين ماروح ما الكاها..!
اخير شي صوت بچيها بدة يعلة ووياه نوبة غضبي زادت، كمت اكسر واصيح لحد ما حسيت ع نفسي صحيت واني اصرخ ..
عقاب: وينجج اماااااااني ...
فزيت من الحلم عركان و انفاسي متسارعة، عبالك صدك جنت اركض وادور عليها..
اصلا ما حسيته حلم، عبالك حقيقة بس مثل السراب، فجأة اختفى كأنه مكان موجود اساسًا.
طلعت من الغرفة اجر خطواتي كوة، تعبان وحيلي كله بايد.
لكيت قسورة كاعد وصافن بالفراغ.
كعدت كدامه يلا انتبهلي وفز من صفنته.
قسورة: ها حبيب شلونك هسة؟
عقاب: الحمدلله، الولد وين؟
قسورة: صرفتهم حتى ليضوجوك
عقاب: زين سويت
قسورة: سمعتك تصيح رحت شفتك حلمان، ما كعدتك خاف تفز
عقاب: حلمت بيها تبجي وتصيحلي انقذها..
قسورة: استغفر الله ..
ذبيت نفسي حتى انتچي نسيت سالفة الجرح، تأوهت بألم وحطيت ايدي ع ظهري.
عقاب: اخخخخخ انعل ابو هالسالفة هااي!!
قسورة اجة شاف الجرح، وكال.
قسورة: همزين ما نزف، بس انت ديربالك عقاب ترا مو سهلة، يكلك ممكن تنشل اذا التهب العصب!
باوعتله وسألت.
عقاب: هو شنو الشلل؟
اول شي سكت، بعدين جاوب.
قسورة: ان تفقد قدرتك على الحركة واستخدام اطرافك غير؟
ابتسمت بألم، صوبت نظراتي بأتجاه اللاشيئ وجاوبته.
عقاب: تؤ.. الشلل هو كل مرة تحس نفسك عاجز بيها.. الشلل مو عجز جسماني، ممكن يكون عجز قلبي عقلي ادراكي او حتى عجز بأيجاد جواب شافي لسؤال محيرك..
افتهم الرنة شنو، كعد بصفي ودار وجهي عليه.
قسورة: حاس بيك اكثر من اي مرة راحت.. عقاب اني دا احترك وكلبي مفحم ع ريما بس من لاچارة اكابر وساكت حتى ما ازيد قلقك، عبالك اني مكيف بهالوضع؟ لا وداعتك بس شسوي! دورت بكل مكان ببغداد وماكو حس ولا خبر، بقت شغلة اربيل هي املي الوحيد، اضحك ع روحي اكول هسة هي متونسة بحالي قابل واني رح اموت ع خبر منها..
اليوم ولاول مرة من ايام، احس قسورة صدك حاس بخوفي وقلقي!
عقاب: بس انت محد اجة كلك رح اخطبها واخذها منك!
قسورة: لك اني طول عمري خايف من هيج لحظة!! لحظة يخطبها احد وتروح من ايدي بس لأني اقل منها بالمستوى وممكن ابوها ميتشرف بيه بسبب شغلي او بسبب علاقته المتوترة بالحجي!!
دمعته خانته ونزلت، شارحة مدى وجعه.
دك ع صدره وكمل كلامه بقهـر
قسورة: هذا يومية يموت الف موتة!! حتى وهي وياي فكرة فقدانها متروح من بالي! احبها واشتاقلها واخاف عليها حتى وهي وياي، وبغيابها دا اموت ولله خياي....
عقاب: بس اني متت خلص!!
قسورة: اسم الله عليك، نلكاها للدكتورة ونرجعها الك شحده يدنالها امير!! بعدين انت شبيك هيج مأيس، وين راح عقاب الي يريد يشرب من دم امير؟!!! شو استسلم!!!!
عقاب: مو هيج، بس حاس بخيبة امل جبيرة.. لك اني طلعت من الموت وجان وجهها اول وجه اشوفه من فتحت عيوني، وكلت خلص لو تنتهي الدنيا بعد ما اعوفها وهي جانت كلش فرحانة ويجوز اكثر مني حتى! تالي متالي تروح مترجع واسمع عنها خبر خطوبة!! لا ومن منو؟ من الحقير الي دمرني ودمرهاا!!!! شيصير كلبي حتى يتحمل متكلي؟!
قسورة: الدكتورة انخلقت الك! متصير لغيرك وهذا امير يحلم يدنالها ويحصل اظفرها، اذا انت خايبة ظنونك اني لا، ما اخلي ياخذ مرة الغالي لو ع كص ركبتي!!
ابتسمت ابتسامة تعبانة كلها امتنان..
عقاب: هنيالي بيك ولك
قسورة: شعندي غيرك لك انت اخووي اخووي حطها ببالك!
حضنته ع كيف، شعور الأخوة محسيت بي قبل لان مكتبتلي الدنيا يكون عندي اخ، بس هسة صرت اعرفه كلش زين بسبب قسورة.
ثاني يوم، كعدت من النوم متأخر والدنيا ظهر.
طلعت غسلت وقسورة جان برا، اجة وبيده صمون حار وكاهي.
قسورة: صح النوم يولد
عقاب: وين جنت وليش ما كعدتني من وكت؟!
قسورة: وشعندي مكعدك، ظل نايم مرتاح وهياتني جبتلك احلى ريوك شتريد من الله بعد؟ حتى الدكتورة ما مدللتك هيج دلال
حجاها بشقة، بس اني تغيرت ملامحي للحزن.
لاحظ هالشي فحاول يضيع جفصته وكال.
قسورة: تعال اكعد يلا خلي ناكل مدامه حار
عقاب: ما اشتهي انت اكل
قسورة: البارحة نمت بلا عشا وهسة متريد تتريك!! يابة اذا مو الك فكر بجسمك حرام عليك
عقاب: كتلك ماشتهي.. ما اتقبل الاكل ابد
قسورة: كتلك اكعد بصيغة امر، والامر يتنفذ!
عقاب: لا بلا؟
قسورة: ولله، يلا تعال اكعد لتخليني اسحلك واحط الاكل كوة بحلكك
ترس البيت بالريحة، كعدت ع صفحة اباوعله وهو يشتغل ويرتب المواعين.
صبلنا چاي وكعد.
قسورة: كول صاحبي مو معدل!
ابتسمت واردفت.
عقاب: معدل ونص خياي
قسورة: وع كولة اهلنا بالبصرة چا انه قسورة مو لعب چعاب
كالها بغرور، كلبت عيوني بملل، ما اكلت هواي بس يا دوب فتحت ريكي.
وراها طلعنا بالسيارة وقسورة يسوق.
عقاب: انت متأكد من الي دتكوله؟؟؟؟!!!!
سألته بتفاجؤ، هز راسه وعينه عالطريق.
قسورة: ايي، مدير مكتب ابوها علاقتي بي قوية هو كلي اليوم اجوا الفجر لبغداد
عقاب: يعني هسة هم بالبيت اكيد!!
قسورة: بدون شك
عقاب: لبيتهم يلا
باوعلي وكال..
قسورة: بدون متكول اصلا
.....
اماني
بعد ذيج الليلة.. تغيرت حياتي 180 درجة للاسوء.
كمت اكوبس بالمرضى واصوات توسلاتهم تدك بمخي ليل نهار، منظر اجسامهم الخالية من الاعضاء مدا ينمسح من بالي..
كمت احس بروحي مجرمة قذرة، كرهت ابوية واهلي كلهم..
هم سبب الي سويته، لو ما ابوية مجرم ويخطفونة بسبب مشاكلهم وياه، جان مصار كل الي صار!!
ماعرف شلون نمت من الاجهاد النفسي.
تحلمت بالناس وايدية متروسة دم، أبچي واصيح عقاب انقذني بس هو ماكو.. مموجود واني وحدي اصارع هالمأساة.
كعدت مفزوعة، فوك الفزع انصدمت من لكيت نفسي بغرفة ويمي ريما وامي ..
ريما: اخيرًا كعدتي، شلونج مون؟!
سما: ها ماماتي رايدة شي!!
ملامحهم، نبرات صوتهم وكلماتهم كلها مغلفة بالاهتمام والقلق.
اماني: مي ماما فدوة ريكي يابس
انطتني ريما، شربت وكعدت ع حيلي، فركت جبهتي بأيدي بتفكير.
سما: بيج شي اماني شسوالج هالكلب!!
رفعت نظراتي بأتجاهها، وسألت.
اماني: ريان وينه شلونه شو ماهوة!
نزلت راسها بحزن، وريما عبست.
تخبلت بسلا صايرله شي!!
اماني: احجوووا ريااان شبييي!!!!! ليش ساكتات؟!!!
ريما: بالمستشفى، ديتعالج لان وضعه مو تمام ابد
اماني: شنو معناته هالحجي؟!
سما: ماما اخوج اطرافه مكسرة، غير عن الاصابات الي بباقي جسمه .. فضلنا يظل بمستشفى اهلي يتعالج لان وضعه ميتحمل يطلع لبيت
بلعت غصتي بهالخبر المأساوي.. وسألت بحدة.
اماني: بابا وين؟
سما: شتريدين منه؟!
اماني: عندي هواي حجي وياه، كولي وينه!!!!!!!
ريما: اني اكلج وينه اماني
ماما خزرتها وعاطت بيها.
سما: اششش سكتي ريما!!!!
اماني: شتسكت شكوو ادور ريما احجيي ولله رح تخبلوني!!!
ريما: رياض ابونا النزيه راح يكمل الشغل الي ما كملتي انتِ، صفقات فساده بعدها ما خلصت وهذا الحقير الي اسمه توفيق جابنا لاربيل حتى نظل وسيلة ضغط يستخدمها تجاه بابا!!
اماني: مستحيل هذا لدتحجون عنه يكون ابويه!! اني ما عندي اب بعد خلص مااات ماااااااااات!!!
تذكرت كلشي مريت بي بسببه، انهارت اعصابي وبچيت.
ريما: اني هم ميشرفني يكون عندي هيج اب فاسد، ومثل مكلتي اختي، احنه ابونه مات وراح!
حجتها بأنكسار وحضنتني، عمري اكيد مدا تتقبل الي صار وياها..
اردفت ماما مستنكرة كلامنا.
سما: لو مهما يكن يظل ابووكم!!! رياض الرحمن ابوج انتِ وياها سواء تقبلتوا هالشي او لا!!!
صرخت بيها بغضب والنار تتطاير من عيوني المحتدات.
اماني: كتلج ابووووية مااااات!!!! الي خلا ايدية ملطخة بدم العالم البريئة، الي شمر حياة ابنه بالتهلكة وسمح بأنو تنهان كرامة بنته وتتعرض للتحرش، لو ينزل بي كتاب سماوي ما يصيرلي اب بعد!!!! رياض مات بعيني وبكلبي واني يتيمة الاب منا ورايح!!!
سما: بس يمه هو ما راد يصير هيج بيكم، قابل يتعمد يأذيكم هو!! غير هذا الحقير الي اسمه توفيق السبب!!!!!
ضحكت بخيبة امل..
اماني: يا ناس ياااا عاااااالم ابوية قاتل مجرم سفاااااااح وامي تداريله
ريما: يمكن هو ما تعمد يأذينا النا، بس جان متعمد يأذي هواي عالم بريئة، وترة هذا عقاب من الله اله، حتى يحس باحساس الناس من يقتل ابنائهم بدون رحمة!! يمكن الله لطف بينا وما متنا لان مالنا ذنب، بس هو تاليه اسسوووود ماما اسوووود!!!!!! وترة حوبة المظلوم تكتل يا ماما تكتتتتتتل!!!! وهو سلب ارواح ناس هووووواي بريئين وتاجر باجسامهم!!! بينما النا وللعلن سوة نفسه ملاك.. شدتحجين ماما عن يا اب!!! و ليش دا تدافعيللللله اصلًـاااااا!!!!!!؟؟
ريما جانت ساعة تصيح ساعة تحجي بهدوء، ودموعها ما سكتت ابد، اول مرة اشوف اختي هيج منهارة..!!
امي ما حجت عنه بعد، وهو هم ما اجة ولا راوانا وجهه.
ولو بيا عين يجي!!
جانوا حاطين حرس ع طول الجناح بحيث ممنوع احد يطلع من عدنه، وبالمقابل ممنوع احد يدخللنا.
الاكل يجيبوه ويسدون الباب، وبالتواسيل يلا يقبلون يخابرون سيدهم التافه حتى يطمننا ع وضع ريان.
ثاني يوم، بالليل كاعدين اني وريما وماما علساس دنتعشة.
بس جذب، يا لكمة تدخل لبطوننا بهالوضع..
الاكل مثلما نحطه نشيله.
انفتحت الباب مال السويت، اندارينا منتظرين نشوف منو الي اجة بفارغ الصبر.
رمشت بتفاجؤ لما شفت امير ابن توفيق هو الي دخل!!
ريما: انت شدتسووووووي هنا!!!! اطللللع بررا مناقصين لعبان نفس!!!!!
غلس وكأن مسمع، كعد وباوعلنا وكال بابتسامة مستفزة.
امير: مشتاقلكم صار شكككككد مشايفكم ولا ملتمين هاللمة.. مو بلا اماني؟
باوعتله بحقد ورديت.
اماني: شجابك انت!!
امير: مو دنكول مشتاق يا عيني
اماني: بس اني ماريد اشوفك! انت وابوك واحد احقر من اللاخ.. اطلع براااااا !!!!!
اصطنع تعابير حزينة على وجهه المستفز و كال.
امير: ليش هيج ليش تؤ تؤ تؤ .. ما مقبولة منج اماني هيج تستقبلون ضيوفكم خالة سما؟
سما: انت ضيف ما مرحب بي، ياريت تحس ع نفسك وع دمك وتطلع عاد لان وجودك هنا يعصبني اني وبناتي!!!
اول شي ضحك باستغراب، ما عباله ماما ترد بهيج طريقة.. ادور تغيرت ملامحه وحالته للغضب والتهديد.
امير: اسمعيني زين انتِ وبناتج.. منا وهيج القواعد تغيرت واني صرت سيد اللعبة، اني بنفسي الي احدد مصير كل واحد بيكم انتِ وعائلتج كلها!!!
سما: انت مريض!! من الاول كتله لرياض انت مو انسان طبيعي، لازمك مصح نفسي!!!!
تخبل وعيونه تغيرت نظراتها بطريقة مرعبة، كام وكف يم ماما واخذ سجينة الفواكه.
ركضت وكفت بينه وبين ماما وريما وراي تصيح عليه.
ريما: عووف امييي انتوا شنو من ملة، مجرميييين!!!!
اماني: وخررر شتريد تسوووي!!!!!! امير الله يخليك لا تسوي شي...
من ترجيته، يلا تنهد و هدئ شوية وسوة نفسه عادي.
وخر عننا، رجع يم ماعون الفواكه دچ السجينة بتفاحة وشالها، كام يكص وياكل.
واحنه نباوعله بخوف، منعرف شبي ولا شيريد، ظالين تحت رحمته هو وابوه الحقير.
امير: شوفوا .. الحجي الي سمعته قبل شوية رح اسوي نفسي ما سمعته، لان اذا ابقى سامعه تصير مو حلوة! واني ماريد ام عروستي الحلوة تتأذى!!
بعيدًا عن كمية الرعب بكلامه، صدمني من كال عروستي! هذا خو ما يقصدني الي!!؟؟
سما: هاي يا عروسة؟ انت شدتحجي؟؟!!
امير: بنيتچ الدكتورة الحلوة شبيج خالة اليوم!
زفرت رافضة بتلقائية..
اماني: لااا.. انت اكيد صاير لعقلك شي!! مستحييييل!! مستحيل اتزوجك!
امير: ليش مستحيل؟ شنو اليمنع؟!
بلعت ريكي احاول اسيطر ع نفسي، الهي شنو هالمهزلة!
اماني: اليمنع انو انت وابوك دمرتوني اني واهلي، خليتوني اسوي جريمة بمنتهى البشاعة استغليتوا ضعفي تجاه اهلي!! شوهتوا اخوية وكسرتوا جسمه، وفوكاها ساومتوني بأختي!!! وهسة جايبينة لمدينة كلشي منعرف بيها وحابسينة هنا مثل الحيوانات، وبكل صلافة جاي تكلي شنو ليمنع؟!!!!
كلب عيونه بملل..
اجة وكف كدامي وسأل بنبرة تحمل تحت طياتها التهكم.
امير: الظاهر دكتور رياض ما كلج بالمستجدات؟!
اماني: شيكلي، شكو يا مستجدات ادور؟!!!
امير: ابوج وافق على صفقة جبيرة تجمع بين ابوية وبينه، وعربون هالصفقة زواجنا اني وياج، الي جان لازم يتم من زمااااااان هواي!
اماني: ههههههه ولله صاير خوش تنكت!!
قهقهت بسخرية، كلامه ضحكني، ابوية باعني؟ الله وكأن هاي جانت القشة الي قسمت ظهر البعير، خاف جنت حاطتله فد اعتبار بكلبي هسة بأيده مسحه!
سيطرت الجدية على ملامحي ورديت بحدية.
اماني: اني ما عندي هيج اب.. ابوية مات!
امير: كلام فارغ.. انتِ صرتي الي خلص وانتهى الكلام!!
اماني: ولا حتى بأحلامك!!! لك اني نفسي تلعب منككك!!!!
جرني من ذراعي عصرها بقوة، جعدت ملامحي متألمة وتمتمت بكلمة اه..
امي واختي وكفوا يصيحون ويكلوله عوفها بس مدارلهم بال..
امير: تلعب نفسج مني ومن ذاك الكلب متلعببب؟؟ هاي لو عقاب جان ركصتيله وكيفتتتي!!! بس من امير؟ تصير نفسج تلعب منننه!!!!!
جان يصرخ بعصبية، صرخت بصوت اعلى منه وجاوبت بتحدي.
اماني: اكيييد اكيييف احببببه احببببببببه تسممععععع؟؟ احب عقاااب واموت عليه!
ضربني راجدي فر وجهي فر.
ماما وكفت بيني وبينه وريما تخبلت عليه.
ريما: كسسسسسر بايدك حيوووان كدرتك عليهااا!!!! يا ناااقص
ضربها ودفعها، ادور كمشني من جتافاتي وردد.
امير: مدام هيج تحبي، بسيطة اني الج!! الا اندمج واندمه وما اطلع امير اذا ما دست ع كلبج وكلبه بقندرتييي يا قندرةة!!!!
دفعني بالكاع تأذى ظهري بالكرسي، بجيت.
بس دموعي سببها كلامه مو المي..
امير: حضروا نفسكم، عكب باجر انتوا ببغداد حتى نخطب رسميًا.
كال هيج وطلع، ظليت اباوع لماما وعيوني مليانة دموع..
اماني: هذا الانسان الي كلتي عنه مهما صار يظل اسمه ابوية؟!! شفتي شسوة؟
ريما حضنتني وظلت تمسد ع ظهري برفق..
ريما: تأذيتي من دفعج هالحيوان؟
اماني: برأيج ياهيه اذتني اكثر، بيعة بابا الي لو دفعته؟
ريما: لتضوجين، احنه شكلنه؟ ابونا مات خلص لتقهرين روحج بسببه بعد
اماني: ريري ولله مو بيدي.. اني تدمرت بسببه!! ما كفاه كلشي خلاني اعيشه تالي راح باعني لتوفيق وابنه عربون شراكة!! اني شنو ذنبي بصفقاتهم؟
انفجرت دموعي، ماما معندها اي اجابة تكتفي بالسكوت لو تشاركني البجي ..
وفعلًا صار مثلما كال امير، اجينة لبغداد.
وية ما طبيتها حسيت بخنكة والدمعة وصلت لطرف عيني ورجعتها كوة، هالمدينة هواي اذتني..!
بالايام الراحت جان هواي يخطر عقاب ع بالي، مشتاقتله وكلبي يمه.. شلون صار تحسن لو بعده؟!
ديدور عليه ومشغول باله مو؟ رح يكدر يوصللي وينقذني من هالمستنقع لو لا؟
صعدت لغرفتي تمددت وصفنت بالسكف، جسمي وحواسي كلها ساكنة بس كلبي وعقلي يشتغلن بلا توقف..
اماني: درعـي الحامي.. امنيتـك تصوبت بغيابك وهي محتاجتك حييل..!
مر ببالي طيفه من جان يكلي لتبچين محد يستاهل دموعچ الثمينة حتى اني.
تمتمت بخفوت.
اماني: بس انت تستاهل كلشي عقابي، كلشي.. حتى روحي لان انت قدمت نفسك فداء الي حتى ما انصاب!!
فزيت من صفنتي ع صوت سيارات وخبصة ببيتنا.
طبعا الحرس مطوقين البيت من الطول للطول، نزلونا من سيارة طببونا للبيت كبل.
باوعت من الشباك، امير!
اخذت نفس حتى اقوي روحي، كافي بجي شيفيد!
سديت الشباك ونزلت.
جان ديسلم على ماما.
امير: يا هلا بحماتي الغالية، شلونج؟
سما: الحمدلله
نترتها وراحت، ريما تباوعله بتك عين من فوك لجوة.
امير: ريري ممكن تتركينا شوية اني واختج، عدنه موضوع مهم نريد نحجي بي.
ريما: مو ممكن للاسف، احجي كدامي شعندك شتريد منها؟
امير: ليش تخليني ازعلج؟
ريما: يا عيني شكد رقيق!!
امير: تحبين نعيد الشو مال ذاك اليوم؟
تنهدت وباوعت لريما بنظرة روحي، كامت تنافخ وراحت.
كعد امير واني ع وكفتي.
امير: خطيبتي الحلوة شلونها؟
باوعتله بقرف ودرت وجهي.
امير: الظاهر خطيبتي زعلانة مني، بس اني راح ازعلها اكثر اذا ما سوت الي اريده!!
ظليت مغلسة، مو طايقة صوته ولا وجوده احس اريد اجرم بي!
ثواني وخرعني لما ضرب التلفزيون بالمزهرية وفلشه.
شهكت مصدومة وماما وريما اجو ع الصوت يستفسرون.
امير: لحححححددددد يجيييييي كللللتتتتتت!!!!!!!
عاط بيهن بصوت رج البيت كله، لدرجة ما جادلنه رئسن راحن.
ظليت واكفة اباوعله ببرود، شيريد يسويلي اكثر بعد ما اهتم!
اجة وكف كدامي وخلة عينه بعيني، انعدمت المسافة بيننا.
نظراتي اله جانت تتحدى غضبه، وهالشي الي خبله!
امير: عينج نزليها لا افكسهاااا!!
اماني: ما انزلها، وفنك تفكسها؟
نفث انفاسه الغاضبة وجر شعري بقوة لدرجة وكعني بالكاع وانحنى باتجاهي..
امير: انتبهي لكلامج وياي، ترا اني ممسؤول عن نتائج غضبي انتِ تتحمليها يا زوجتي المستقبلية!
كمشت ايده الي حاطها ع شعري وهمست.
اماني: هي هاي طريقتك؟ تخليني اخضع بالقوة!؟ انت بعدك متعرفني زين، لا قوتك ولا قوة عشرة مثلك تخليني اخضع!!! خلي ببالك شغلة.. ما اتزوجك لو تظل بس انت بالدنيا رجااال، ديلاا موت!!!
قهقه بصوت عالي ساخر، هد شعري وراح كعد.
طلع تلفونه واتصل على شخص.
امير: اي، لا خطية صدك؟.. اممم اماني شتكولين لو نكسر رگبته لاخوج الحلو فد مرة؟
صمت.. يعني هم تهديد مرة ثانية!!! شطلعت هاي!!!!
اماني: لككك لا لا لااااااا ، لتأذي ريان ماله علاقة بمشاكلي وياك!!!
بعد التلفون عن اذنه، وهمس.
امير: توافقين لو لا؟ موافقتج مقابل حياته وانتِ اختاري
لميت شفايفي بحزن ممزوج بالقهر، يعني المرة الاولى تهددت بأختي وهسة بأخوية؟!
ليش هيج يدنيـا؟!
رفع حاجبه منتظر مني رد، عضيت ع شفايفي بقوة حتى اكبت غصتي، واومئت براسي موافقة.
ابتسم بنصر، رجع التلفون يم اذنه وكال.
امير: لا لا دير بالك عليه، هذا اخو المرة.. اي اي يلا الله وياك.
سده وباوعلي وكال بحزن..
امير: ليش تخليني الجئ للعنف وياج واني ماريد؟! تجبريني أأذيچ!
كومني من الكاع ومسح ع شعري، ادور جرني باس راسي واني مشمئزة منه والشعور واضح ع تعابير وجهي.
امير: اني اسف حبيبتي
اماني: شيل ايدك عني!
امير: شلتها بس لتضوجين
كلبت عيوني بحقد، صارلي فجأة مراعي ويهتم!
امير: اماني اني ولله احبج، انتِ ليش متنطيني فرصة اعبرلچ بيها عن حبي؟ ليش دائما تصديني ليش ذاك الحقير بشنو احسن مني هااا بشنو؟؟؟
ابتسامة ساخرة انرسمت ع شفايفي.
اماني: تريد تعرف عقاب بشنو احسن منك؟ ههههه.. قوية هاي!! لك انت وياه ماكو بينكم وجه مقارنة اصلًا، ديربالك تجيب نفسك عليه يا مجرممم!!!
هسهس بغضب..
امير: حتى مرة لخ من اضربج متكولين ليش!!
خزرته ودرت وجهي .. همس يم اذني بفحيح.
امير: باجر الصبح اجيب الشيخ حتى نعقد، جهزي نفسج عروستي الحلوة اريدج باجر تطلعين تخبلين!!
لزم خصري دفعته بساع وصحت.
اماني: لتكمشنييي!!!
امير: يلا ننتظر لباجر، ونكمش براحتنا!
رد بخبث، غمزلي وراح.
كعدت وكمت اشهك اريد اخذ نفس مدا اكدر..
ثكل عجيب مستوطن صدري وخانكني!!
اجوا ماما وريما، ظلوا يسالون شصار، اكتفيت بالسكوت وعفتهن و صعدت لغرفتي.
ذبيت نفسي عالفراش وظليت صافنة، اي يا دنيا شنو حتسويلي بعد؟! شضامتلي؟!
للظهر، مجنت اشتهي اكل، كعدت شوية لعبت بالاكل وكمت.
صعدت لفوك وهم لفيت راسي ونمت، ما عندي شي اسويه غير النوم حتى اتهرب من الواقع المرير..
ورة وقت حسيت ع صوت عالي بالبيت..
نزلت اشوف منو هذا والصوت بدة يتوضح الي!
هذا صوت عقاب!!
كمت اسابق نفسي بنفسي اريد اشوف شجابه؟
سما: انتوا شجابكم لبيتيي؟؟!!!! طلعوا برررا
ريما: ماما اني خليتهم يفوتون
سما: والحرس شلون قبلوا؟
ريما: شنو شلون، لهيتهم طبعا وخليتهم يفوتون من الباب الخلفي
سما: شسوين مطببتهم متستحييين؟!!!
عقاب: اووووووه، الدكتورة ويييين؟؟
قسورة: اهدى يابة مو بالصياح، ريما شصار وين جنتوا مختفين احجي؟
ريما: قسورة احنه جنة ....
قاطعتها لما دخلت.
اماني: شتسوون هنا؟؟
حجيت ببرود، لمحت بعيون عقاب نظرة مختلفة..
عقاب: شنسوي؟! انتِ وين رحتي ليش اختفيتي انتِ واهلج بدون متكليلي؟!
اماني: وانت منو حتى اكلك؟ شعليك بيه ليش تدخللل؟
بهت بوجهي مصدوم من نبرتي وحدتي بالكلام وياه.
عقاب: اماني..
سما: عوف اماني عاد شلزكت بيها انت!!!!! اطلع برا يلا احسن ما اصيح الحرس يشحتوك انت وهذا الوياك!!
ريما: يااااا ماما!!!!!
اماني: كلام ماما صحيح، اطلعوا قبلما اصيح الحرس يجرجروكم لبرا
ريما: اماني شبييج انتِ ادووور!!!! فوك ما اجوا يساعدوناااا
خزرتها لان رادت تجفص، سكتت وباوعتلي بضوجة.
عقاب: هيج صارت؟!
اماني: اي، ولو سمحت ياريت متراويني وجهك بعد!
هسهس بغضب واعصابه بارزة.
عقاب: راح تتزوجي للكلب امير مووو؟؟؟؟!
اماني: اي راح اتزوجه، عندك اعتراض؟
ظل يسوي حركات غريبة بوجهه، لا هي ضحكة لا حسرة لا حزن، مزيج من كلشي!!!
عقاب: هددچ مو؟!
باوعت بعيونه الي دتلمع بدموع بس كابتها بعصبيته، شكد تمنيت اكوله اي واصرخ بصوت عالي باسمه حتى يساعدني، بس ما اكدر!! ريان بأيد امير و اي حركة غلط مني تخلي حياة ريان بخطر!
اماني: واذا هددني شيفرق يمك؟!
عقاب: يفرق هواااي دكتورة
اماني: اذا عندك يفرق، عندي ميفرق لان المحترك بالنار متخوفه الجمرات بعد، وانت الحمدلله والشكر من جان دورك هم هددت وخليتني اتزوجك ودمرتني.. وعاشت ايدك كفيت ووفيت، هسة صار دور امير، واني قابلة اتزوجه!
عقاب: ليش رجعتيلي لعد؟ لو جان هدفچ تأذيني وترديلي الي سويته بيج؟!!!!
اماني: اي، ردتك تضوك الالم الي عيشتني بي وتحس شوية باحساسيي!!
هز راسه بأسف وكال كلام حفر بكلبي..
عقاب: جذب.. ما اصدك.. معقولة هاي انتِ اماني ..؟!
اختنكت بعبرتي، دموعي نزلت تضامنًا وياه، اريد اصرخ واكوله اي هاي مو اماني حبيبتك بس خوفي على ريان منعني..
طلع بسرعة بعدما انطاني نظرة حسسني انو اني لاشيئ، قسورة باوعلي وهز راسه مستحسف ولحك عقاب.
تمتمت بقهر واني اباوع للمكان الي جان واكف بي.
اماني: راح.. بأيدي دفعته بعيد عني!!!
سما: هذا هم مصيبة بحاله، زين سويتي وياه.
ريما: ماما انتِ شدتحجين، عقاب وقسورة يكدرون يساعدونا ليش هيج سويتوا بيهم؟!!!!!
سما: لتدخلين انتِ، شيكدرون يسوون ذولة بس اصحاب مشاكل!
ريما: اماني ولله مدا اصدك الي سويتي، ليش هيج حجيتي ويه عقاب هاي بدال متكليله شصار بينا حتى يساعدنا؟!!!
اماني: شيساعدج؟ ريما اخونا بأيد امير مستوعبة شنو معناته هالحجي؟ بس يعرف ان عقاب يدري يروحه لريان وساعتها شتفيدني عقاب ومساعدته؟!
ريما: اكيد اكو حل!!
اماني: معلوم.. الحل موجود وهو زواجي من امير
ريما: لج لااا ليش تدمرين نفسج مرتييين!!!! الزواح مو لعبة يمكن باول مرة عدت سلامات بس الثانية منو يكول تجي مثلها؟؟ انتِ غلطتي هواي اختي، هواااااااااي!!!!!!
راحت معصبة وما راضية عليه، بس اني خلص بعد متفرق عندي منو الزعل ومنو الرضى، اكثر من سوايتي هاي بعقاب ما اتوقع يجي..
.....
عقاب
بوحدة من الحدائق الهادئة، جنت واكف اني وقسورة وصافن.
فجأة لكيت نفسي احجي..
عقاب: بعيونها نظرة تعبانة.. امنيتـي صايرلها شي جبير اني متاكد! قسورة مستحيل تكون هاي اماني الاعرفها، اكيد امير مسويلها شي وهيج متغيرة عليه، لك حتى صايرة تحجي نفس حجي امها!!!!
قسورة: اني هم هيج اكول، ولو لاحظت ريما رادت تكول شي بس سكتتها
عقاب: اي انتبهت، زين متكدر تتواصل ويه ريما؟
قسورة: عقاب تلفونها مغلق! كلهم عالاطلاق اجهزتهم مغلقة
عقاب: والحرس منتشرين بشكل غريب!!
قسورة: و الدكتور رياض وريان هم مختفين.. تفكر بألي دا افكر بي؟
عقاب: امير حابسهم وديهددهم بالدكتور وابنه!!!
قسورة: صحح اكيييييد!!!!!!
عقاب: الحيوان واجة ينفخ بريشاته عليه عباله ما اكدرله، بسيطة نهايته قربت!!!!
رد بشك..
قسورة: نهايته قربت؟ شنو ببالك دتخطط لشي بدون علمي؟!
حسيت ع روحي جفصت، رديت ببرود.
عقاب: لا بس مدامه ببغداد فهو بين ايدينا!
قسورة: ليسمعك يكول بغداد بجيبنا، ترا السالفة مو سهلة
عقاب: محد كال سهلة، خليها لوكتها هي تنحل
دك تلفون قسورة.
عقاب: اذا واحد من الولد لتكوللهم احنه هنا
قسورة: لا رقم غريب!
عقاب: جاوب وافتح مكبر صوت
قسورة: تمام
سوة مثلما كتله، وية ما كال الو اجة صوت ريما الخافت.
قسورة: الوو
ريما: قسورة الحكلنا!!!
باوعنا واحد للاخ بخوف ممزوج بالدهشة.
قسورة: شكو شصاير؟
عقاب: ريما اني عقاب، احجي شبيكم امير مهددكم مو؟
ريما: اي عقاب، هددنا يكتل ريان اذا اماني ما قبلت تتزوجه
عقاب: هالحقيييير الكلببب عرفتته ولله!!!!!
دفرت السيارة بغضب.
قسورة: ليش ريان وينه؟
ريما: بمستشفى بأربيل تابعة لتوفيق
عكدت حواجبي بتساؤل.
قسورة: و شيسوي هناك ؟
ريما: اوووف شحجيلك قسورة....
حجتها بقهر، حجتلنا كلشي صار وياهم وهي ساعة تبجي ساعة تقوي بروحها وتخونها دمعتها فيتحشرج صوتها..
عيوني صارت بكصتي من سمعت وقسورة انصبغ بالغضب من فوك ليجوة، حالته متقل سوء عني بس الفرق هو غيرته ع حبيبته والسوو بيها خلته ميشوف دربه!!
ريما: هذا الصار والباقي صرتوا تعرفوه..
قسورة: وانتِ شلونج حبيبي؟
ريما: مو زينه قسورة.. ابد مو زينه..
قسورة بتأثر: تثقين بيه مو؟
ريما: اكيد لعد ليش خابرتك
قسورة: فدوة رحت، كومي مسحي دموعج وخلي بالج يصفى، محلولة بنيتي
ريما: تمام، عقاب بعدك موجود؟
عقاب: ها عيني وياج
ريما: لتزعل من اماني، السوته بسبب خوفها ع ريان
عقاب: اعرف، بس انتِ ديري بالج عليها
ريما: تمام، عقاب اكو شغلة ثانية..
عقاب: كولي؟
ريما: امير يريد يعقد ع اماني باجر، فدوة سوي شي
كورت قبضة ايدي بقوة، وحجيت من بين اسناني..
عقاب: يمي معليج
ريما: اني اثق بيكم، لتخيبون ظني ترا محد يعرف خابرتكم وكلتلكم
قسورة: زين سويتي، لتشيلين هم خليها علينا وروحي ارتاحي
ريما: يلا اجت اماني باي
سدته، باوعت لقسورة جان بركان من الغضب، طبطبت ع كتفه.
عقاب: سوية ناخذ حق حبيباتنا منهم، متفقين؟
قسورة: بس توفيق اليي!!!!
عقاب: ميخالف
صعدنا بالسيارة، دك تلفوني ابتسمت من شفت المتصل.
عقاب: الوو.. شنو الاخبار؟ .. لك عاااش ولله طلعت كدها.. انتبه لحد يلحكك واحنه هسه جايين.. قسورة وياي.. لا لا ميدري بس فد شوية رح يعرف كلشي..،تمام يلا الله وياك
باوعت لقسورة الي جان يباوعلي باستغراب وكتله بفرح.
عقاب: اعتبر امير وتوفيق وكعوا بالمصيدة!!!
قسورة: مصيدة شنو؟! ويامن جنت تحجي انت؟!
عقاب: هسة نوصل وتعرف كلشي
قسورة: من كتلك لشنو دتخطط ما حجيت!!
عقاب: يابة مو كلنا نوصل وتعرف، ليش تلح؟
بعد مرور نص ساعة، ذبيت السيارة بمكان هادئ وما عليه رجل هواي.
نزلنا اني وقسورة.
عقاب: خاف تنتبه اكو واحد ديراقبنا، كول
قسورة: غير افتهم هو شكو!!!
عقاب: مظل شي وتعرف، سوي مثل مدا اكلك
قسورة: امري لالله
ظلينا نمشي ونتلفت، لحد ما دخلنا بفرع تابع لمنطقة فقيرة، نصها انقاض وتجاوزات.
عبرنة كم بيت، طبيت للبيت المتفقين علي وصعدت للسطح وقسورة وراي يراقب.
شفته لابس جاكيت ابو الكلاو مغطي راسه، واكف وداير وجهه للجهة المضادة النا.
عقاب: لك هاا خياااااي
قسورة: منو هذا عقاب؟
التفت، اجة يمشي باتجاهنا، وخر كمامته عن وجهه تسالمنا وحضنني.
سجاد: مية هلاا حبيب شلونك
قسورة جان مصدوم و ما انطة اي رد فعل ثاني!
ضحك سجاد وكال.
سجاد: جبته لهنا وما كتله؟
عقاب: ايي ردته يفتهم عمليا شو هذا وكفت يمه الصورة!! خياي قسورة يمعود!
مررت كفي كدام وجهه وانادي بأسمه، جر سلاحه صوبه ع سجاد.
قسورة: وكعت بايدي يا خاين يا حيييوووان!!!!
سجاد جر بوش ورجع لورا..
سجاد: خياي ع بختك نزل السلاح، عقاب يمعود سوي شي، كله هذا جان اتفاق علمود نوكع امير!!!
وكفت كدام سجاد وحجيت.
عقاب: مثلما كلك، سالفة الخيانة جانت لعبة حتى ازرعلي عين يم امير واكدر من خلالها اطيح بي والزمه!!
سكت شوية ادور ضم سلاحه و تمتم باعجاب.
قسورة: لا يا **** ع هالفكرة!!!
ضحكت اني وسجاد.
عقاب: فوكاها طلعت ****؟
قسورة: واكبر **** هم!!!! ليش ما كلتووووولي من الاول لعد!!!!
عقاب: حتى تصير المسرحية مقنعة كدام امير
سجاد: بالضبط!
قسورة: اذا ادميكم هسة ما انلام ولله!!!!
عقاب: دستقر خلي نشوف سجاد شعنده معلومات النا.
سجاد: همزين تذكرتو
قسورة: ديلاا لككك
سجاد: مو ابطل وارجع لسيد اميرررررر
حجاها بخبث، جريته من ياخته.
عقاب: احجي عاد كافي مسلتة، الوقت مو بصالحنا ابد!!
سجاد: تمام جنت اشاقة اصلا
شفته مثل الضاج، هديته.
عقاب: اسف طلعت بدون قصد
سجاد: دسكت خلي الغي
عقاب: تفضل
سجاد: اليوم الفجر، حيصير عملية استخراج اعضاء لناس خاطفيهم الجماعة، حتى بوجهها تتصدر، رياض وتوفيق وامير حيكونون موجودين حتى يشرفون عالموضوع بنفسهم
عقاب: العنوان وين؟
سجاد: بـ ... أطراف بغداد، كل مرة يختارون منطقة مختلفة بس هن كلهن بالاطراف حتى بعيدة عن العين
قسورة: شكد عدد الزلم الوياه بالضبط؟
سجاد: هواي كلش، شغلة خطرة ومصيرية وعدكم الحساب بعد، فلازم تاخذون احتياطكم وتجهزون نفسكم
عقاب: وبعد شعرفت؟
سجاد: ريان بحالة صعبة، الولد منتهي واتوقع ميظل عايش، توفيق يهدد رياض بي علمود اعماله، وامير يهدد بي اماني حتى تتزوجه، والولد اصلا ممعروف يعيش او لا!
قسورة: ******* انعل ابو *****
عقاب: زين متكدر تعرفلي بيا مستشفى هو؟
سجاد: هي مستشفى .... يديرها توفيق ووياه شريك كردي
عقاب: عاشت ايدك، موجود وياهم انت بعملية اليوم؟
سجاد: معلوم، اكيد موجود لان امير المطي حاسبني ايده اليمين
قسورة: واليوم نكطعها اله
عقاب: هو المطلوب!
سجاد: بالضبط! عباله انتصر، ميدري ديحفر كبره بيده.
عقاب: خلي خلي.. بس سؤال ليش اليوم يلا خابرتني؟
سجاد: ما حصلت فرصة مناسبة وهم ما ردت اخليهم يشكون بيه لان وضعي جان محير
قسورة: طلعت تفتهم لك زمال
سجاد: شعبالك لعد، يلا اني لازم اروح، ما اكدر اتاخر هواي خاف يحسون عليه.
حط الكبوس ع راسه ونزل الدرج وهو يصيح.
سجاد: ديرو بالكم على نفسكم ومن تشوفون ليث وتحجوله الحقيقة دفروه بخاصرته وكلوله سجاد يكول الا ارجعلك كل غلطة غلطتها علية
ضحكنا بخفة، خليت ايدي ع كتف قسورة وهو هم خله ايده على كتفي.
باوعنا لبعض وكتله.
عقاب: نعزلها اليوم؟
قسورة: ونگلبها گلاب هم خياي
ابتسمنا وببالنا اشكال متعددة للانتقام!
بالليل، جمعت الحجي والولد والحرس الثقة الي عدنا كلهم وحجيتلهم اني وقسورة الخطة.
وهم كلنالهم ع شغلة سجاد وأنو سالفة الخيانة مجرد مهمة وهو ويانه!
والاخبار هاي الي عدنه بسببه.
انصدموا نفس صدمة قسورة، بعدين تقبلوا الموضوع بس ليث ظل متحلف بسجاد شلون ميكوله.
استخدمنا نفوذ الحجي ومعارفه حتى نكدر نطلع ريان من مستشفى توفيق وننقله لمستشفى ثانية بحمايتنا.
انطلقنا لهناك، وصلنا بعد وصولهم، فطوقناهم من جميع الاتجاهات وحاصرناهم.
عقاب: ضرغام شاهين ليث توزعوا انتو والشباب كلمن بجهة مثلما كلتلكم، قسورة انت ظل وياي
كلهم ردو: صار
عقاب: يلا امشوونا
......
اماني
ثاني يوم الصبح، كعدت مثل الميتة.
اليوم حيصير موضوع زواجي من امير حقيقة ما منها مهرب!!
رتبت شعري ولبست اي شي طلع كدامي ونزلت، ماما جانت كاعدة هي وريما.
بس الفرق ريما وجهها يضحك.
اماني: صباح الخير
سما: صباح النور ماماتي
ريما: صباح النور والعافية والسعادةةةةة صباح الحب والجمال على عيونج الحلوة اختي الحلوووة
باوعتلها بملل، وكعدت.
اماني: شنو مناسبة هالسعادة المفاجئة هاي؟
شربت حليبها وكالت.
ريما: وليش لحتى ما اكون سعيدة؟ ماكو شي يستاهل اضوج واوخر ضحكتي الحلوة بسبببببه
عوجت حلكي.
اماني: هم حقج انتِ، قابل رح تتزوجين قاتل غصب عنج؟!
ريما: ليش منو الي حتتزوج قاتل اسم الله؟!
اماني: ريما مالي خلكج من الصبح!
ريما: تمام ع راحتج، اني هم مالي خلك اجادلج صراحة
رجعت تاكل، شوية وسمعنا صوت تلفون يدك.
باوعنا اني وماما ع مصدر الصوت متعجبين منين ديجي التلفون واحنه ساحبين مننا كل وسائل التواصل!!
شو هاي ريما طلعت تلفون من جيبها وردت وهي تضحك.
ريما: النوووم مشفته من الفرح شتحجي انت، هلاااا كايمة
سما: وين كايمة لج!!!
اماني: منيلج هالتلفون؟ ويامن جنتي تحجين ؟؟؟؟
ريما: يهمج تعرفين يعني؟
اماني: اكيد!
ريما: لعد احسبي وياي للعشرة
اماني: ريمااااا اني مدا اشاااقة ويااااج!!!!!!!
ريما: منو كلج مشاقية وياج اني؟!
اماني: احجي لعد!!!!
ردت بمرح وهي تعدد وتسوي حركات بوجهها وتتمايل.
ريما: واحد .. اثنين .. تلاثة .. اربعـة .. خمسة .. ستـ
ما كملتها لان اصوات عالية صدحت بالجو، اكو شي ديصير برا.
ريما: اجووووووو اجووووووووو لكككك هلااااااااااا !!!!!!!
كالتها بفرح وركضت للشباك، لحكناها اني وماما متعجبين هاي شبيها!!
ريما: اديلووو قسورة اديلوووو، لككك عاش عقققااااااب، هلا هلا باع ليث وسجاااد شون يسوون حركاتتتت
اجيت وكفت وشفت عقاب والولد ديكتلون الحرس ويتفننون بضربهم.
ظليت مصدومة هذوله شديسوون وريما ليش هيج مكيفة!!
قسورة صاح ع عقاب.
قسورة: انت معلللييييك ظهرك ليتأذى يااابة!!!
عقاب: هن بوكسات وبالجهة السليمة ياابةةةة!!
ورجعوا يتعاركون وعقاب مستلمهم بوكسات بتك ايد.
ريما: لككككككك عااااش شااااااااااهيييين، ضررررغااااام قسسسسسورة انتوا الافضللللللللل، عقققققاب فدوة لايييييدددددككككك
فتحت الشباك وكامت تشجع عبالك دتباوع مصارعة.
دقايق قليلة مرت، خلالها انتهوا الحرس كلهم.
طب عقاب بالبداية ووياه بقية الولد ورا يطكطكون بايديهم ورگبتهم بغرور.
كلبي رفرف من كال ..
عقاب: مو كايلج من تحتاجيني و قبل لتصيحين اسمي، حتلكيني يمج واحميج؟!
ابتسمت بسعادة ممصدكة، باوعت لماما فرحانة، ادور لريما هزتلي راسها وابتسمت كان دتكلي خلصنااا منهم!!!!
رجعت باوعت لعقاب الي عيونه تلمع والابتسامة مزينة وجهه..
وكلت.
اماني: اخيرًا اجة درعـي الحامي!!
-سأكون درعكِ وحاميكِ الأبدي في اشد اللحظاتِ بؤسًا عليك، سأكون الضوء الذي سينيـر عتمة لياليكِ حلوتـي.
بقلم: نورمين
....
انتهى..
-البارت القادم هو الاخير!
لا تنسوا التصويت والتعليق 🖤🦋
#الكاتبة نورمين