خطأ طبي «عقاب الاماني»

- ٥٧ -

#خطأ_طبي «عقاب الاماني»

بقلــم : نورمين 🖤🦋

...

سويتله الصدمة ومن اول مرة رجع نبضه.

تنهدت ورفعت راسي لفوك وحجيت بفرح ..

اماني: الف الحمدلله والشكر الك يا رب.. ما خيبتني..

فاروق: روحي ارتاحي اني اكمل العملية

محجيت شي، ابتعدت كم خطوة وكعدت ع كرسي.

حيلي كله انهد وياه، حسيت روحي طلعت بهالكم دقيقة الفاتن..

اصعب موقف ممكن يمر بي الانسان ان تكون حياة شخص عزيز عليه بين ايديه..

اما بالنسبة الي، جانت حياتي كلها بين ايدية، مو بس شخص!

عقاب هو كل حياتي واماني عمري، مستحيل اتخيل نفسي بدونه!

تزامنًا وية الانهيار النفسي الي دا امر بي، صارلي انهيار دمعـي.

بحيث دموعي كمت ما اسيطر عليها، روحي من جوة دتبجي ومتوجعة.

جنت اظن يوم الخطأ الطبي هو اتعس يوم ممكن يمر عليه بكل حياتي..

بس الي اتضح هسة، لا والف لا ..

هذا هو الاتعس على الاطلاق، ومستحيل يجي يوم ينافسه ببشاعته..

بكل معنى الكلمة متت، الف موتة بظرف ساعتين..

طلعت من غرفة العمليات، تلكوني جماعة عقاب والحجي.

قسورة وليث اول ثنين ركضوا عليه ولمحت عيونهم دامعة..

قسورة: بشري شلوونه

ليث: دكتورة شلونها حالة عقاب احجي

باوعتلهم ونزلت دموعي، لو ما راد يحميني مجان صارله كل هذا..

حسيت بالذنب، اني سبب وجوده جوة بين الحياة والموت..

اني سبب خوف اصدقائه عليه، اني!

قسورة: دكتورررة اني مو كتلج لتطلعين الا وعقاب ويااج؟؟؟؟؟؟؟ وييييينهههههه؟؟!!!!!!!

ليث: صارله شي موو؟؟

ضرغام: ع كيفكم خلي نفتهم منها

ليث: شتفتهم لك متشوفها ساااااكتةةةة!!!!!! احجيييييي شبييي اخووونااااا؟؟!!!!!!

قسورة: كتلج لتطلعين بدونه، ليش طلعتييي؟؟ رجعي جوة اذا ميعيش هو انتِ هم لتعيشييييييين!!!!!

عاط بيه بغضب وبنبرة صوته الغاضبة سيطرت الرجفة والخوفة ..

اماني: عايش.. عقاب عايش قسورة!

كلتها اخيرًا، قسورة سجد بالكاع وليث كذلك، شاهين وضرغام حضنوا بعض وبچوا من الفرحة.

ليث وقسورة حضنوا اكتاف بعض وكاموا يسولفون ويضحكون رغم دموعهم تارسة وجوههم..

قسورة: شكتلك اني هذا عار ميموت ويعوفنا

ليث: احلى عار وحق محمد

قسورة: لك اخخخ بس خ يكوم الا ادوس ببطنه هالساقط هد حيلي ..

ليث: وياك اني، متت من شفته غركان بدمه ولا يحرك ايد ولا رجل..

قسورة: اسكت خياي روحي راحت وعلي، عمري كله ما حاس بـلوعة مثل ذيج اللحظة..

ليث: هيج تحبه ولك كـ*** ؟!

كالها بضحك، قسورة ضحك وتنهد..

قسورة: واكثرر، ولكم عقاب اخوووي مو صاحبي!

طولما اسمع حجيهم مبتسمة، صدك لو كالوا الله ياخذ شي من البشر وينطي الاحسن منه.

صح رب العالمين اخذ اهله لعقاب، بس عوضه باصدقاء اعز من الاخوة، و يقدمون روحهم لخاطر سلامته.

تعديتهم ورحت للمغاسل، غسلت وباوعت لروحي بالمراية..

عيوني حمر دم وجهي كذلك، انفاسي متسارعة بفعل الموقف المرعب العشته من ثواني..

اخذت نفس وزفرته طاردة كل الالام الي دا تفتك بكلبي وبعقلي بدون رحمة..

طلعت مناك، شفت شهد بالممر.

اماني: ها شهودة وين حطيتوا عقاب؟

شهد: بالعناية دكتورة

اماني: ووضعه بعده مثلما عفته مو؟

شهد: اي وضعه مستقر، بس حطيناله اوكسجين

اماني: مو مشكلة، يلا اروح اشوفه اني شكرًا حبيبتي

شهد: ولو دكتورة

مشيت كمشت ايدي وكالت بحنية..

شهد: يصير زين ولله، لتظلين تبجين وخايفة ..

جنت محتاجة اسمع هالكلام كللش، ابتسمتلها رغم الوجع الي توحي بي ملامحي.

رحت للعناية المركزة، ما خلوا احد يدخل للجناح بس الكادر الطبي، الولد والحجي كاعدين جوة.

طبيت يمه ووية ما شفته ممدد والاجهزة متصلة بجسمه بكل جزء، كلبي انقبض بوجع..

نهائيًا ما شفت حبيبي بهيج حالة وضعيف..
تعودت اشوفه دوم قوي ومينهز ابد!

كعدت يمه ولزمت ايده.
لعبت بأصابعه وخلخلت اصابعي بأصابعه وكمشتها بقوة واني احجي وياه ..

اماني: هديت حيلي بوكعتك هاي، ابد ما تخيلت يجي يوم احب انسان لهالدرجة، بس حبيتك! تمنيت اموت ولا اشوفك غركان بدمك ومتوجع، متعرف شسويت بيه انت ..

دنكت راسي ماسحة دموعي، ادور ابتسمت ..

اماني: بس انت ثبتتلي انو بعدك تحبني، انت حتى كتلي امنيتي بدون متنتبه ع نفسك!! تدري .. بس تكعد اجي اني اخطبك واتزوجك وهالمرة اني اغصبك نتزوج حتلو جنت متريد، شنو بسلا عبالك بس انت تخوّف وتجبرني اتزوجك؟! لا عيني ماكو هيج حجي يمي..

ضحكت ع سخافتي وكملت واني اباوعله ..

اماني: بس الفرق اني رح اتزوجك بدون شروط ولا اتفاق، بس بأسم الحب!  ومراح اعوفك ابد وهالمرة كل متدفعني اچلب بيك بقوة اكبر، لان صرت اعرف انت شنو..

بست ايده وخليتها ع خدي ..

اماني: درعـي الحامي، حبيبي القوي، عقابـي الحاد، دكتاتوري المتناقض .. كوم عاد امنيتك متكدر بلياك .. اشتاقيتلك هواي .. اشتاقيت لسوالفك ولغزلك الحلو، صار مدة حارمني منه ليش ها ولك؟؟

التفتت يمنه يسرة وكلت بمرح ..

اماني: يابة همزين انت نايم، جان شيخلصني لان كتلك ولك!

بعد ما بيها مجال اني تخبلت رسمي، اضحك وابجي بنفس الوكت، شسوة بيه هالعقاب مادري!!

حرك اصابعه، وسعت عيوني مصدومة وملامحي زارتها الدهشة الممزوجة بالرعب..

اماني: هاي كلمة ولك هيج بيها سحر لو شنو؟!! يمه بسلا سمعني!!

ظليت اباوعله بترقب خاف يكعد بس ماكو، حرك اصابعه ببطء بس.

تنهدت براحة حاطة ايدي ع گلبي..

اماني: همزين بعده نايم، جان شخلصني

ادنيت عليه، صفنت بملامحه الحادة عن قرب..

تلقائيًا الابتسامة احتلت شفايفي، مديت اصبعي خليته ع رموشه وحركته ببطء..

وخرت واني مكورة حلكي بتعجب..

اماني: اول مرة انتبه رموشه هلكد ثخينة وحلوة!!!

باوعتله وتمتمت بخبال..

اماني: نتبادل حبيبي؟؟ شتسوي بيهن انت ولد متحتاج رموش ثخينة اني بنية احتاجها كللش!! تخيل وهن بهذا الثخن وتخليلهن مسكارة يبوو يطلعن دماار!

صفنت ع روحي هاي اني شدا اخربط!!

نفضت افكاري وخبالاتي وكمت.

اماني: راجعتلـك دكتاتوري ..

القيت نظرة سريعة عليه وطلعت، نزلت للطابق الارضي حتى اشوف الولد شعندهم ما عندهم واطمنهم.

......

قسورة

بعدما خلصت عملية عقاب، نزلونا ننتظر جوة لان مكان العمليات صار ازدحام.

واحنه بينه ب6 اشخاص.

شاهين وليث راحوا يجيبون اكل، سجاد طلع برا يخابر.

واني وضرغام والحجي كاعدين.

قسورة: احنه موجودين يابة، روح ارتاح انت

ضرغام: اي يابة روح انت، ماكو فايدة من كعدتك هنا واحنه اصلا باقين ويه عقاب

الحجي: اذا ما اشوف وليدي بخير وسلامة بعيوني ما اتحرك منا لمكان، نقطة راس سطر!

ضرغام: مو خاف تتعب

الحجي: ما عليه شي لتخاف

ضرغام: براحتك يابه

باوعت لسجاد، يمشي ويخابر بانفعال.

مدري شعنده هاي اله فترة بس اتصالات ودومه يوكف وحده، يلا يجوز وية اهله شعليه.

جان تلفوني ديدك وريما المتصل.

صارلها هواي تتصل بس اني كاتمه لان جنت بوضع ابد مو مال احجي بي وية اي بشر.

ضرغام اشرلي كوم حاجيها، من لاچارة كمت.

وهم حتى اهلها يكونون ع علم بوضع بنتهم.

لان هي هم جانت بموقع الحادث، واحنه لسة مصدومين ومنعرف شجابها لعقاب بذيج الساعة!!

قسورة: الو

ريما: وينك انت صار سنة ادك عليك مترد!!

قسورة: صارت شغلة مهمة

ريما: عاد انت متخلص شغلاتك المهمة، بلا متستحي تنطي الفون للحجي يرد عليه؟ شكلت لروحك بلا من سويتها؟!!!

قسورة: علساس هيج شرمتيها بالمستحة وما حجيتي شي

ريما: لا بلااا!!! شوف حبيبي لا عبالك تسويلي هالحركات استحي وابطل اخابرك، لا عيني اني اظل اخابر وعناد! وهسة كلي وين جنت شنو من توصيلة هاي صارلكم بال 4 ساعات!!

جنها مسجل بس ترطن ترطن بدون فهم ولا علم، واني منا روحي بخشمي ونفسي مطايقها.

اختصرتها وياها.

قسورة: عقاب واختج تعرضوا لهجوم مسلح وهسة احنه بالمستشفى

شهكت بصدمة وردت...

ريما: شنووووو!!!!! لااااا جذب جذب اصلا اختي شجابها ع عقاب!!

قسورة: من اعرف اكلج عود

ريما: خرررب حظظظظظظهااااا!!!! وهسة شلونها اختييي؟؟

قسورة: ما بيها شي اختج، اخويه البي..

سكتت شوية وصوتها صار اهدئ من قبل شوية..

ريما: شبي عقاب؟

قسورة: وضعه خطير ريما .. اخويه وعضيدي جان بينه وبين الموت شعرة!! جنت رح اخسره تفهمين شنو يعني؟!

ريما: فاهمتك حبيبي، بس هسة هو شلونه وضعه؟

قسورة: اختج تكول زين، بس اني ما اصدك الا اشوفه بعيني!

ريما: تشوفه تشوفه بس اهدئ، ادعيله وخلي الباقي ع رب العالمين

قسورة: ليش الي مثلي هم ينقبل دعائهم؟

ريما: وحد قابل مو من عباد الرحمن انتوا؟؟ بعدين شنو هاي مال الي مثلي شبيك انت قابل؟!

حسيت روحي جفصت، فركت وجهي بتوتر واردفت مغير الموضوع.

قسورة: انسي اني تخبلت من ورة هالساقط، طير عقلي وكلبي بصوابـه، وعلي ما ظل عندي خلك لكلشي

ريما: ميخالف حبيبي تهون اهم شي صار زين، واني هسة رح اكول لاهلي ونجي، وهم حتى اشوفك

قسورة: متتصورين شكد محتاج وجودج يمي بهاللحظة!

ريما: قسورة ..

قسورة: عيونه..

ريما: هايشنو وسنونه وين لعد؟

ضحكت.

قسورة: مو وكتها مزاجي مو شي.

ريما: اممم ميخالف رح امشيها لان خطية انت

قسورة: رحم الله والديج

ريما: لا صدك جذب تدلل انت

قسورة: اي كولي شتريدين؟

سكتت لثواني بعدين اردفت بصوت دافي..

ريما: اني احبك قسورة، لا تضعف وظل دوم حبيبي الشجاع والاسد

قسورة: بس الاسد مرت عليه لحظات سودة ..

ريما: انت دتكولها، مرت! يعني راحت وانتهت، والاسد يبقى اسد والكل تستمد قوتها منه، ديربالك تخلي يضعف!!

قسورة: الاسد يحتاج لبوته حتى يظل متماسك ويميل عليها كلما حس بأعوجاج..

ريما: الي اعرفه الاسد يبقى معتدل حتى بميلانه تجاه لبوته!

قسورة: ولج ام لسان..

ضحكت وردت بدلع.
ريما: ها حبيبي

قسورة: اموت عليج اني

ريما: اني هم..

قسورة: يلا مع السلامة

ريما: الله وياك حبيبي، وجايتك ترا

قسورة: منتظرج حبيبتي.

سديته ورجعت كعدت.

سولفت للحجي كلي زين سويت، يظلون اهلها ولازم يعرفون شصار ويه بنتهم.

شوية واجتـي الدكتورة.

الحجي: باباتي شلونه شلون صار؟ شوكت اكدر اشوفه؟

قسورة: ها دكتورة بشري!

اماني: كلش زين لتخافون، عنده منا لساعتين بعد اذا ظل هيج وضعه مستقر نطلعه من العناية ونخليه بغرفة وتكدرون تشوفوه براحتكم

عكدت حواجبي بعدم فهم..

ضرغام: شنو منا لساعتين؟ يعني عقاب بعد عنده فرصة يصارع الموت؟؟!!!!!

ما ردت بس ملامحها تنطي الرد المناسب!

الحجي ضاج ورجع كعد، اما اني ظليت مادري وين انطي وجهي..

قسورة: بس انتِ كلتي صار زين شنو هالحجي هذا هسة!!!!

ضرغام: صوتك قسورة مو بالصياح هي

نترت بي بغضب..

قسورة: برودك يا اخييي!!!!!  تكلك عقاب بعده بحالة خطرة وانت حاير بصووتي!!!! خرب******

الدكتورة ظلت واكفة بلا متحجي شي..
صياحي زاد ما نقص..

قسورة: ولله يا اماني اذا صار شي لعقاب احرك المستشفى حررركككك!!! تسوون المستحيل.. تخلقون معجزات.. معليييه اريد اخويه يطلع منا بحيله!!!

جرني منها وحجة بغضب وهو كامش وجهي بأثنين ايديه، اعصابه بارزة ونظراته كذلك بارزة بحدة!

ضرغام: لك انت غبي انتتتتتت، ليش تفاول عليه هو شبي!!!!

قسورة: ليش انت متسمعها، تكلك اكو احتماال!

ضرغام: طززززززز بالاحتمال!!!! اخونا بخيير، بخيييييييييييير افهم!! وحيطلع منها سلامات كافي تفاول عللييييه!!!!!

اجوا الامنية رادوا يطلعونا، تلاوينا وياهم بس الدكتورة كلتلهم من طرفي فعافونا وراحوا.

الحجي حسيته مو طبيعي، حتى ما حجة ويانه شي غير عن العادة.

رحت يمه والكاه وجهه مطعون وتعبان..

ضرغام: ها يابة خيرك

قسورة: يا الللله!!! مو اثنينكم سوا انت وياه!! يابة شبيك ليش هيج وجهك اصفر!!

ضرغام: دكتورة تعاي شوفي فدوة

وخرنا عنها، فحصته وكالت..

اماني: خلي اخذه لغرفة يرتاح، ضغطه هابط يجوز

قسورة: اي يابه يلا كوم

كومناه اني وضرغام، وديناه لغرفة تمدد والدكتورة شدتله مغذي.

شوية واجوا البقية خايفين، طمنناهم وطلعنا عفناه يرتاح.

سجاد: وهسة شلونه؟

قسورة: زين بس خلي يرتاح، من الهبطة ضغطه نزل

ليث:  اففف هو احنه اتبهذلنا شحال هو

ضرغام: اي ولله، بس يلا عدت ان شاء الله

ليث: ان شاء الله، شاهين جيب العلاليك خل ناكل

جابهن ورجع انطاهيا.

شاهين: عجيب عليك بهالوضعية وتكدر تاكل!

ليث: شوف حبيب، اكو شغلة مهمة لازم تعرفها.. لا لا لازم كلكم تعرفوها وتفهموها كلش زين..

قسورة: اي بلا؟

سجاد: اي شنو هي؟

ليث: ترا ماكو ربط بين الحزن والاكل بطلوا تربطوهن سوا، كلش عادي واحد ضايج ياكل، مو شرط يعوف الاكل يلا تصدكون حزنه، الحزن بالكلب مو بالمعدة

ظلينه صافنين ..

ضرغام: شوف هو اكو حكمة بكلامك، بس مدا اوصللها

ليث: اي ولله شبيكمم!!! مثلما السيارة متمشي بلا بانزين احنه منكدر نتحرك بلا اكل لان يطينا طاقة!

شاهين: اوكف هذا الحجي اني سامعه بالعلوم مال صف ثاني ابتدائي

ليث: لعد شكد مطي، تعرفه ومتطبقه

شاهين: لككككك!! هاي عليمن

ليث:عليك

هجم ع ليث، طبينا بنصهم اني وضرغام.

سجاد لزم ليث وشاهين ظل يفتر وراه واني لازمه بس هو يسحول بيه ماكدرله.

ضرغام: يمعودين بالمستشفى مو بالمكتب احنه خرب بيكم!!

ضربت شاهين ع راسه وحجيت بانزعاج.

قسورة: دكافي زعطوط انت وتركض وراه

شاهين: متسمعه لعد يكلي مطي

قسورة: وهسة انت ع هاي ضايج؟

شاهين: لعد شنو، رجال شطولي شكبري يغلط عليه هالهايشة هذا!!!!

ليث: لكككككككك هااااي عليمن تكول هايشةة!!!!!

شاهين: عليك عليمن يعنيييي؟؟ منو عدنه هايشة غيررررك يلف النهار والليل كله!!!!

ليث يدفع بسجاد

ليث: هددددني خ اراوي الهايشة شتسوووي!!!

شاهين ضحك وكله.

شاهين: ها يعني تعترف بروحك هايشة ههههههههه

ليث: هسة الهايشة بيها نفع حليب صخام الا المطي هذا بس دك لا فهم ولا نفع

كورت حلكي وحجيت باعجاب..

قسورة: اوباااااااااا!!!! ردها شاهين هاي مينسكت عليها

ضرغام: لك انت بدال متهدي بينهم تعلكها بالزايد!!

قسورة: وعلي سينما وبلاش واني منا ضايج هههههههههه

ضرغام باوعلهم وكال وهو يغمهم.

ضرغام: تضحكونه عليكم اهمداكم هي هاي خوتكم

شاهين: هو البدةةة!!

ليث: انت استفزيتني!

شاهين: وهاي مبرر يعنييي؟

ليث: لعد شنو، لو ما تجفص ببطني اني ما ادنالك

شاهين: هدني قسورة

قسورة: خاف اهدك وتهجم عليه

شاهين: لا هدني

ملامحه هادئة، امنت بي فهديته كلت عقل.

ليث: انت هم هدني سجاد

سجاد: واذا تمالختو؟

ليث: دنجب وهدني، قابل خايف منك اذا اريد اتعارك

سجاد: ديلا ولي

هده وكف كدام شاهين.

ليث: اسف خياي

شاهين كفخه ع راسك بخفة وضحك، ادور حضنه.

شاهين: دنجب كال اسف كال، من شوكت بيننا هالرسميات هاي ولككك!!!!

ليث: مدري شفتك ضجت عبالي اخذتها صدك

شاهين: لا لتخاف ادري بيك لسانك مو الك من تجوع

ليث لمعت عيونه ورد بفرح..

ليث: لككك افدييي اليدري بيه، جيب صحيبـة.

مدله خنصره، ضحك شاهين وكال.

شاهين: وعلي ما بيك ذرة عقل

ليث: ديلا هسة نتصاحب لو لا؟

شاهين: اي نتصاحب ليش لا

شاهين حط خنصره بخنصر ليث وتصاحبوا.

ادور جرّه حضنه، هي حضنة هي بوكسات بالبطن ليث كام يصيح انوخذت غدر ولحكولي.

صدك ضحكنا بلحظتها..

.....

اماني

واكفة برة يم الممرضة شهد صديقتي دنسولف.

شهد: يعني انتوا متطلكين بس بعدكم واحد يحب اللاخ، لعد المن تطلكتوا؟!

اماني: مادري شهد، محتارة لان اني نفسي مادري ليش، عقاب الوحيد الي عنده الجواب

شهد: اول مرة اسمع هيج شغلة، وحدة تتطلك وهي متعرف شنو السبب

اماني: اني ببالي سبب، بس ما متاكدة اذا هو او لا

شهد: لعد مدام تعرفين ان اكو هيج احتمالية، مفروض تحاولين تفهمين ليش هيج سوة!

اماني: ليش هو انطاني مجال!! صدني بكل الطرق القاسية لدرجة خلاني اكرهه وكمت اتجنب اشوفه! كسر كلبي شهد، كسر المشاعر مو هيّن وهو هواي كسرني ووجعني!

شهد: افف مادري شكلج، الله يجبر بخاطرج حبيبتي صدكي تفرج متظل هيج

خلت ايدها ع جتفي وطبطبت عليه بحنان ..

اماني:  الله كريم ..

وكفت سيارة ريان كدامي ونزل منها هو وريما.

ووراهم بابا هو وماما بسيارة ووياهم حرس كومة بغير سيارات.

ريان: مووون شنو هذا لسمعناه!!!

ريما: شلونج خو ما بيج شييي؟؟

اماني: زينه زينه مبيه شي ليظل بالكم

ريان: وعقاب شلونه؟ ريما كالت متصوب!!!

اجة بابا من بعيد يحجي بغضب..

رياض: هو لو اني الله يخلصني من هالعقاب ارتاح!!! شلونج باباتي

اماني: زينه

سما: ولج يمه انتِ ليش بالشة بيه هالبلشة هاي!!! الا توكفين كلبي يلا ترتاحييين!!

اماني: ماما ما بيه شي ع كيفج!

سما: الا يصير بيج يلا ترتاحين يعني!! ولج كافي بطلي منه مو بكل مرة دتشوفين شلون يأذيج ميفيدج، ادري شسوي واخلصج منه اذا حتى من اطلكتي بعدج وراه!!!

شهد عافتني وياهم وراحت، حجيت بنفاذ صبر لان صدك حجيها ضوجني.

اماني: كتلتووني!!! عقاب عقاب عقاب عقاب كافي خللللص!!!! عوفوه بحاله هو معليييه!!

رياض: معليه وهيج، لعد لو عليه شلون؟ جان شلناج جنازة من اول مرة مو؟

اماني: هه.. انتو وين جنتوا من كل الدنيا جارت عليه؟ من وكعت بمصايب ويين جنتو؟ عقاب الوحيد الي وكفلي بالسجن وبالخطف!! وحتى تصاوب هسة بسببي لان راد يحميني الي!! وبكل اصرار ترجعون تتهموه هو السبب!! كافي كافيييي لهنا وبسس!! ممنوع واحد منكم يتدخل بعد بحياتي!

ريما: تصاوب وهو يحميج؟

ريان: شصار مون شلون تصاوب ومنو ذولة الهجموا عليكم؟

رياض: قبلها كليلي شجنتي تسوين وياه؟

تنهدت بضجر..  الدنيا وين وهذا وين حاير!

ريان: اني كتله يرجعها للبيت

رياض: ليش وانت شبيك مكسر لو عايزك ايد رجل و مترجعها؟ متستحي تدزها ويه رجال غريب!!!

باوعتله وابتسمت بعدم تصديق..

اماني: عقاب رجال غريب!؟

ريان: اول شي دوامي يتاخر وانت تدري، ثاني شي عقاب مو رجال غريب، بالعكس وشفت شلون حامي بنتك ومتصاوب بدالها حتى متتأذى!!

رياض: ها وانت تريدني اصفكله واكله رحم الله والديك؟!! هذا واجبه مدام ورطها بأموره ومشاكله!!!

حجيت مستنكرة..

اماني: بس عقاب ماله علاقة!! الي هجموا علينا رادوني الي!!!

ريان: ش..شنوو؟؟!!

ريما: شنو رادوچ الج هم منو ذولة!

اماني: مثلما سمعتوا، اي بابا .. عندي الك سؤال واريد منك جواب صريح..

لاحظت بابا وجهه اصفر وتوتر، ريان هم ظل مصدوم ويباوع لبابا بخزرة!

اماني: الهجموا علينا رادوني الي، والسبب عداوة وياك!! عقاب زلك بالحجي بس ما كال كلشي صار، كلي خلي الدكتور يحجيلج احسن..

رياض: ما عندي شي احجي، هذا اكيد يريد يذب بلاويه عليه

رفعت تك خد مبتسمة باستهزاء، تمثيل ورد ضعيف حيل كدام المصايب الشفتها!!

اماني: بس عقاب ماعنده شي يخسره او يخاف عليه ويذب بلاويه ع احد!

ريان: هالحجي هذا مو مكانه المناسب، خلونا نرجع للبيت ونحجي براحتنا

اماني: الظاهر عندك علم بالحجي فما تريده يدور هنا

توتر واردف..

ريان: لا بس مو حلوة نحجي بمشاكلنا هنا كدام العالم الرايحة والجاية، وانتِ هم دكتورة هنا لتنسين الج سمعتج

هزيت راسي باقتناع مزيف..

اماني: اي ليش لا ...

سما: لعد امشي جيبي غراضج خلي نرجع للبيت

اماني: ما ارجع، روحو انتو

سما: رياض احجيلك كلمة!! تريد تظل يم هذا الي ميتسمى!!

اماني: ماما!!!!!

رياض: امشي ويانه بابا، وجودج هنا مو صح

اماني: بحياتي مسويت شي صح، بكد وجودي هنا .. روحوا انتوا اني باقية هنا.. مستحيل اعوف الانسان الي ضحى بنفسه علمودي وادير وجهي واروح!!

سما: لك ريان احجيلك شي وياها، ريري ماما كليلها تجي ويانه احجي وياهااا

ظلوا ساكتين لان اخواني يعرفوني من اقفل شلون.

اماني: لحد يحجي وياي ولا ابد، قراري اخذته وانتهى! وهسة من رخصتكم اروح اشوف المرضى العندي

عفتهم ورايه وفتت لجوة، حسيت نفسي اقوى واشجع من قبل بهواي.

شعور جديد عليه بس كلش حبيته!

شفت الولد كاعدين يم غرفة الحجي.

اماني: اجيت اشوف الحجي شلون صار

شاهين: اي تفضلي دكتورة

طبيت، لكيته هستوه ديصحصح..

حجيت بمرح..

اماني: شلونك يابة؟ احنه بعدنه ما صدكنا عقاب صار زين ادور انت تخربطت! ع كيفكم ويانه شويه

الحجي: غير ندلل عليكم

اماني: تدللون بس مو هيج خوفتونا

الحجي: هاي بعد شنسوي

اماني: هسة انت ابقى هنا، لا تتحرك لان ضغطك هابط تحتاج راحة وهذا المغذي هم خلص، شوية وتصحصح وترجع طبيعي

الحجي: اريد اشوف وليدي

اماني: بس يصحى انت اول شخص اخليك تشوفه، تمام؟

الحجي: متفقين اذا هيج

اماني: يلا لعد خلي اچيك وضعك

هز راسه بتعب، شكلت جهاز الضغط وقستله ضغطه.

طلع بعده نازل.

اماني: تحتاج اكل، المغذي وحده ميفيدك

الحجي: ما اشتهي شي

اماني: لخاطر عقاب، ترا ميقبل تتعب نفسك بهالطريقة!! واذا درة بيك بعدين يضوج

الحجي: اوف اوف..

اماني: ها شكلت؟

الحجي: ديلا ميخالف

اماني: هسة اخليهم يجيبولك الاكل.

الحجي: ماشي

ابتسمت وودعته.

اماني: اروح اني

الحجي: ع راحتج باباتي

طلعت، جانوا كلهم واكفين بوضعية الاستعداد ووجوههم تنطي تعابير القلق، منتظرين مني خبر مطمئن.

قسورة: ها اماني؟

اماني: بخير لتقلقون، بس احتاج واحد منكم يجيبله اكل من برا لان اكل المستشفى ماصخ ميفيده

شاهين: اني اروح

قسورة: يلا بساع لعد

شاهين: تمام رايح

راح، اجة ضرغام سأل..

ضرغام: دكتورة فارغة شوية؟

باوعتله بغرابة..

اماني: ا..اي شكو؟

اشر لقسورة وكلي..

ضرغام: تعالي برا بالحديقة احسن، ليث وسجاد ظلوا هنا بين منرجع خاف الحجي يحتاجله شغلة

اومئوا بالموافقة، ومشيت وياهم للحديقة.

الدنيا صارت ليل.. الجو واكف حتى نسمة هوا ما بي، واضوية المستشفى منورة الحديقة بطريقة ملفتة للنظر.

اماني: كولوا شصاير ترا خوفتوني!!

حجيت بقلق، ظلت الافكار تجيبني وتوديني.

قسورة: لتخافين، اريد اعرف منج شجاب عقاب وياج؟ اا اقصد ليش جنتو سوة؟ شصار منو ذولة اذا تعرفين شي او سمعتي شي غريب احجيلي

ضرغام: واطمني كله يظل بيننا، متطلع اي حجاية فأخذي راحتج

باوعتلهم مطولًا واني افكر احجي او لا!؟

اخير شي كلت هم اكيد ميريدون الضرر لعقاب، عليمن خايفة اني بعد؟!

حجيتلهم كلشي صار من لحظة صعدت سيارته ولحد ما اجوا وشافونا.

قسورة: يعني انتِ جنتِ الهدف؟!!!

كالها بصدمة..

هزيت راسي ببطء، ضرغام رد سأل.

ضرغام: عندج عداوة ويه احد؟ ليش جانوا مستهدفيچ؟!!!

اماني: ما عندي عداوة ويه اي احد، بس عقاب كال خلي ابوج يحجيلج

قسورة غمض عيونه متنهد وكال بأستنتاج..

قسورة: هيييج الحجي!!!! خرررب *** غزوااان!!!!

اني وضرغام ظلينا واحد يصفن بوجه اللاخ بعدم فهم..

ضرغام: ها قسورة شكو؟

اماني: منو غزوان؟ انت تعرف شجان عقاب يقصد!!

قسورة: اكيد اعرف!!!! دكتورة ابوج الي متخيلته نزيه مو هيج!! النزاهة بكون وابوج بكون ثاني مختلف تمامًا!!!! والي صار اليوم هو سبببه!!! وجود عقاب جوة بين الحياة والموت والدج سبببه!!!!!!

كام يصيح بحرگة، وسط صدمتي وفقداني لعبارات الرد، بسبب جهلي بالموضوع اساسًا..

ضرغام: ابوها شعليه قسورة احجي عدل لتظل تحجي بالالغاز!!!

قسورة: يا الغاز لخاطر الله!!!! دا اكلكم دكتور رياض الرحمن مو نزييييه مو نزيييييييه!!!!

جان يحجي ويباوع علينا، ادور صوب اهتمامه يمي وكال..

قسورة: ابوج اكبر تاجر ادوية فاسدة ومنتهية الصلاحية بالبلد!!! ومو بس هيج عنده عصابات اتجار بالبشر واعضاءهم!!!

فتحت حلكي بصدمة وملامحي تاهت ببحر الدهشة، باوعت لضرغام الي كابت غضبه كوة، ورجعت باوعت لقسورة وكلت.

اماني: جذاب.. انت دتجذب! بابا مستحيل يسويها مستحييييل!!! بابا رجل نزيه حرام عليك تحجي هيج علييه!!!

هز راسه بلا وكال..

قسورة: هذا الي جنة نعتقده كلنا، بس للاسف..

اماني: اششش لتحجي شي انت واحد جذاب!!! ما بقة عندكم غير بابا تعلكون عليه اغلاطكم ومصايبكم!!!!

قسورة: الحمدلله هواي عدنه شماعات نكدر نعلك عليهن اغلاطنا بنفسنا، مو بحاجة شخص خارجي نحمله مشاكلنا، والي كلته الج هو الحقيقة الي ما رادج عقاب تعرفيها!!! خوفًا من ردة فعلج هاي!!!

ضرغام: ولله حقه!

اماني: شنو حقه شو انت وحدكم تحجون!! بابا مو فاسد بابا انزه نائب بالعملية السياسية كلهااااا ما اسمحلكم تحجون عنه بهالطريقة!!!!

قسورة: غلطانة كلش دكتورة، كللش!

رديت بصوت عالي مستنكرة..

اماني: انت الي غلطااااااان انتتتتتتت!!!! ابوية ميسويهااا ميسويهاااا لتفترون علييه!!

اجة صوت ريان من وراية..

ريان: كلامهم صحيح مون، بابا فعلا انسان فاسد ومرتشي!

انداريت ببطئ والصدمات دتنزل ع راسي بالتتابع بطريقة خالية من الرحمة!!

هزيت راسي بلا وبوزت شفايفي باستنكار، نزلت دموعي واني اشوف ريان ملامحه توحي بالجدية..

يعني هي هاي الحقيقة!!

اماني: ريان والمبادئ الي علمنا عليها؟؟ وحبه لمهنته ولمساعدة الناس؟؟؟؟؟ محاضرات الاخلاص والوفاء والوطنية كلها جانت عبارة عن جذبة؟؟ معقولةةة؟!!

هز راسه بأسف وتقدم باتجاهي خطوات قليلة.

ريان: للاسف، كلشي علمنا عليه وزرعه بينا جان خدعة، رسم نفسه بعيوننا بطل وطلع هو الشرير والظالم!!  علمنا الصح بينما هو جان الغلط بعينه!! لبس عباية النزاهة وهو من داخله اكبر فاسد ومرتشي، تظاهر بحب الناس ومساعدتهم بينما هو نفسه الي يوزعلهم ادوية منتهية الصلاحية قاتلة!!!!! جزء كبير من انهيار الوضع الصحي بالبلد سببه ابونا اماني!!!!!

صدمتي وكسرتي بي زادت اضعاف مضاعفة عن قبل، حسيت نفسي عايشة بكذبة وكلشي اني عليه مزيف!!

اماني: ريان ا.. انـ ... ــيي ممصدكة.. بابا ميسويها انت متاكد من الي دتكوله؟!!

ريان: ولج بنفسه كلي هالكلام، وحتى وجود الحجي والولد ببيتنا اليوم الصبح جان لهالسبب!! ومخطط خطفج جان حتى يضغطون ع بابا وياخذون منهم المبالغ الي يريدوها وهو رافض ينطيها الهم!!

حجالي كلشي يعرفه بكل التفاصيل، بحيث ابوية وكع من عيني وطلع حتى من كلبي بتصرفاته...

دخيلك يا ربي، عشت كل عمري اشوفه انزه نائب سياسي، تالي يطلع هو سيد الفساد الصحي كله!!!

لا ومو بس هيج، يحجي بالاصلاح وبالقانون وبالاخلاق وطلع هو مجرد منهن!!!

شكد جبيرة صدمتي بيك يا بابا ...!

لا واله عين يجي ويحجي ع عقاب بعد كلشي سواه!!

شكد جنت احبه واحترمه كرجل قبلما يكون ابويه، ع كد ما هسة انصدمت وخابت ظنوني بي..

للفجر، ساعة 4 تقريبًا..

جناح العناية المركزة خالي، وعقاب هو المريض الوحيد المتواجد هنا لان الي جان وياه خرجوه لغرفة اعتيادية.

طبيت يمه، حطيت كرسي وكعدت كباله ..

دموعي وحدها كامت تنزل، ماعرف عليه لو على نفسي لو على صدمتي ببابا لو عليهن كلهن سوة..

اماني: حياتي انكلبت گلاب .. ماعرف شديصير وياي!! من جهة انت وجروحك الي لسة يلسعن بكلبي،  ومن جهة ثانية بابا وكسرته، بيمن احير ولله هواي عليه هيج بيوم واحد!!!

حطيت راسي ع سريره وكمت ابجي بكلب محروك..

ثواني قليلة مرت، حسيت بعدها ع ايد حطت ع راسي وربتت عليه بحنان..

شلت راسي شفته فاتح عيونه بتعب وحاط ايده المشدود بيها كانونة ع راسي..

دموعي واصلت مسيرتها بالنزول ع خدودي بينما الابتسامة الفرحانة بصحوته ارتسمت ع شفايفي بتلقائية..

كلبي رفرف من الفرح بشوفة عيونه الحلوة راجعتلها الحياة.

ربت ع راسي بحنيته وبأيده الثانية مسح دموعي برقة..

عقاب: ر.. رجـ.. جعتلچ هـ ... ـها اها، بسچ مو ذبحتيني!!

اماني:  لا تعوفني بعد وتسوي هيج بيه! متت خوف عليك.

هز راسه ببطء وكال ..

عقاب: اسـ... ـسم الله عليـ ..ـج حبيبتي، ه.. هياتني كدامج..

اماني: الكل باله يمك، الحجي والولد كلهم برا ينتظروك يريدون يشوفوك ويطمئنون عليك، وميقبلون يعوفون المستشفى ابد

ابتسم وكال..

عقاب: هو عقاب بس بهالسوالف كلها توكفله

اماني: حرام عليك، ترا جماعتك كلهم ينشد بيهم الظهر وبس تأشر يجوك ركض

عقاب: شو ما جابولي امير لعد!!

اماني: امير شعليه شجابه ع حجينا!

عقاب: انسي مو موضوعنا، ساعة بيش هسة؟

باوعت ع ساعتي وكتله.

اماني: بالاربعة ونص وخمسة

عقاب: العصر غير؟

اماني: اكله جماعتك بايتين يمك يكلي العصر، 4 الفجر عيني!!

عقاب: عمى بعيونج كوون!!!

حجة بأنفعال وكام بساع، ووية ما كام تأوه بألم، كمشته امنعه يتحرك بس وين ينكدر هو!!

عقاب: اااخخخخ ياابةةةة

اماني: دير بالك ترا متصوب انت!!! ليش كمت!!!

انتچى عالسرير وكال بجدية.

عقاب: اششششش حرف واحد ما اسمع!! شعدج ظالة للفجريات بالمستشفى؟ لو حلتلچ الشغلة عقاب مموجود كمتي تلزميين خفارات!!

حبيت اشاقي.. فرديت بخبث.

اماني: وعقاب شدخله بية بعد مو طلكني!! عسى ما اعيش بالمستشفى ليش هو متعصب غير افتهم؟!

عقاب: افهمج بس اخخخ لو ما ايدي هاي، جان راويتج! وهسة كومي ولي للبيت يلا ما عندي مرة تظل للصباحيات بهيج مكاان!!!

اماني: اي ولله صدك ما عندك

عقاب: دكومي لعد!!

اماني: بس اني مو مرتك، متكدر تأمرني

عقاب: دكتورة كتلج كومي!!! ليش تخليني اتعصب وهستوني طالع من الموت!!

اماني: مادري شبيك متعصب اساسًا، ريان برا كاعد يمي واصدقائك كلهم موجودين منو يكدر يدنالي بعد؟!

عقاب: حتلو، اريدج تظلين مرتاحة هيج دوامات كلش متصرفلي وتتعبج

اماني: بس اصيح دكتور فاروق يچيك وضعك حتى اطمن واروح

عقاب: شوف هاي تكلي يچيكك!!

اماني: هم صدك عليمن يتعب روحه الرجال، شو كعدتلي متقمص شخصية الدكتاتور بحرفية عليمن قلقانة مادري

عقاب: دكولي لنفسج!

ابتسمت وادنيت يمه، وكلت..

اماني: كلتلك اساسًا ..

قصدت انو هو نفسي.. توتر وحجة بارتباك..

عقاب: ميفيدنچ هالحركات، لبيتج يلا

اماني: لگلبك يعني؟

صفن شوية ادور ضحك، ابتسمت ع ضحكته..

اماني: واخيررررًا ...

عقاب: مو صاحية وعلي!

اماني: ليش هي لتحبك عاقلة؟!

نبضـات فؤادي لا تحيى الا بظهور أبتسامتك..
عيّنـاي تفقد بصيرتها ان لم تكن صورتك امامها..
والحب يفقد جمالـه وبريقهُ ان لم تكُن انت صاحبه..
بقلم: نورمين

....

انتهى!

لا تنسوا التصويت والتعليق 🖤🦋

#الكاتبة نورمين