خطأ طبي «عقاب الاماني»

- ٥٢ -

#خطأ_طبي «عقاب الاماني»

بقلــم : نورمين 🖤🦋

...

عقاب

نزلت من التكسي وشفتها كبالي..

لحظتها حسيت الدنيا كافئتني عن كل التعب الحسيت بي بفراكها..

شوية وتلاشت مشاعر الشوق بمشاعر الغضب والغيرة لما انتبهت الي موصلها منو!

عقلي تبخر والنار شبت بيه، هم ساري!!!

زمجرت بغضب وتقدمت باتجاههم..

عقاب: شنو هالمهزلة هااااااي؟؟؟؟!!!!

وكفت كدامي كحاجز بيني وبين ساري..

اماني: عقاب لحظة بس اهدئ.

عقاب: شنو اهدئ شعنده هذا وياج!!!!

التفتتله وكلت بعصبية.

عقاب: اني شكتلللللكككك؟؟ مو كتلك اذا تدنالها متلوم غير نفسكك؟؟ الظاهر انت ميفيد بيك الحجي وتحتاج اربيك مثل ذاك اليوم!

وخرتها ورحت جريته من ياخته ورفعت ايدي اريد اضربه.

ساري: بدال هالمراجل الي مدري منين نزلت عليك، المفروض تشكرني

نزلت قبضتي وفكرت بكلامه شوي، اماني بصفي واكفة وتكلي بس خلي نتفاهم، بس اني وين اعرف اتفاهم بعد؟

ساري: جانت واكفة بالشارع وحدها وانت ما اجيت اخذتها، فرجعتها وياي احسن متظل منتظرة تكسي ومتحصل، وين الغلط بالموضوع ليش لهالدرجة معصب؟

لعنت الشيطان وهسهست بتحذير..

عقاب: هالمرة سماح، رح اعديها الك بس مرة لخ اذا تشوفها واكفة بنص النار ودتحترك لا تطفيها ولا تدنالها، سامعني؟؟

ساري: انت مريض!!

ركعته كلة وكع بالكاع.

عقاب: تشتري المهانة مشترة!!!

اماني راحتله، تخبلت بالزايد كمت جريتها وراية واخذتها طببتها للبيت.

اماني: عوفنييييييي عقاااب شبيككك

سديت الباب وارتعدت صارخ بيها..

عقاب: اني شكايلجججججججج؟؟

صرخت بصوت اعلى مني فاجئتني!

اماني: وانت شنووووو؟؟ احنه انتهيناااا متطلكييين خلص مالك سلطة تدخل بحياتي بعد!!!!

رديت بهدوء ينطوي عن صدمتي..

عقاب: وقعتي الاوراق؟

هزت راسها واردفت بقوة مصطنعة.

اماني: اي وقعتهن وانتهى كلشي، اني وانت كلمن بطريق منا ورايح

عقاب: ليش اجيتي لعد؟

نزعت المحبس والكلادة، ومدت ايدها جرت ايدي فتحتها وخلتهن بيها ورجعت سدتها.

باوعت بنص عيوني وكالت بعيونها الدامعة.

اماني: اجيت ارجعلك ذني، حتى ميظل اكو شي منك يقهرني و يذكرني بيك بعد ..

فرقت شفايفي بألم وعيوني أحمرّت من فرط الوجع..

عقاب: بهالسهولة؟

اماني: ماكو شي صعب..

اشرت بسبابتي ع كلبي وكلت مستنكر.

عقاب: زين والي هنا شلون امسحهن؟

اماني: ما ينمسحن ..

عقاب: والحل؟

اماني: ماكو حل، انت وصلتنا لطريق مسدود وخليت نهايتنا بهالطريقة، فلا تطلب مني حلول بعد لان اني خلص تعبت! تعبت احبك تعبت افكر بيك تعبت اتنازل لخاطرك تعبت اضحي تعبت تعبت تعبت!!!!

عقاب: تعبت اتعبچ وياي دكتورة، روحي الله يوفقج بحياتج

وكفت صفح واشرتلها ع باب البيت بمعنى اطلعي.

هزت راسها متحسرة وكالت..

اماني: احسن شي وصلتله بعلاقتي وياك من كمت ما اتوقع منك شي اكثر.. بحيث حتى هالتصرفات كامت متجرحني ولا تعنيلي شي بعد..

عقاب: دكتورة!!!

نترت بحدة، كلامها ديلمس مكانات ملچومة بروحي..

مشت كم خطوة ببطء صارت كدامي، مستعدة لحتى تطلع.

اماني: الله يوفقك الك هم وتلكة الضوة الي ينور حياتك من جديد.. بس هاا مو لنص الطريق وتعوفها مثلما سويت وياي، كون كد كلمتك وابقى وياها للنهاية..

اندارت دتطلع، جريتها خليت عيني بعينها، ولزكت كصتي ع كصتها واتنفست بعمق..

عطرها قربها انفاسها شغلات هيّجت مشاعري بعنفوان!

اماني: عوفني هد ايدي!

جرت ايدها بس اني جنت لازمها بقوة.

عقاب: بساع بعتيـني ورحتـي ..!

اماني: ش..شنوو؟؟!! بعتك عقاب؟ منو الي باع منو؟ منو الي اختار البعد عن منو؟؟ منو طلب الطلاك منو اختار هالطريق منو هاااا منوووووو؟؟؟!!!!!

عقاب: مشتاقلج..

همستلها بتعب، باوعتلي بنظراتها الضعيفة.

عقاب: مشتاق لكلشي بيج.. لكلشي عشناه سوا..

اماني: فترة وتنسـى..

عقاب: انتِ ممشتاقتلي؟!

خليت ايدية ع راسها، محافظ عالقرب بيننا..

اماني: اجذب عليك اذا اكلك لا..

وهنا بس، خانتني نفسي ونزلت دمعتي.

وبظرف ثواني من التواصل البصري لكيت نفسي دا ابوسها بشوق ولهفة..

اما هي جانت جامدة عبالك صنم مو مثل كل مرة!!

ابتعدت بخيبة امل، مو هذا الي جنت اريده؟

ليش من صارت صدك كلبي وكف ضدي؟!

سندت كصتي ع كصتها وغمضت عيوني هامس.

عقاب: متغيـرة هواااااي انتِ..

اماني: انت السبب.

عقاب: صح..

اماني: عوفني اريد اطلع

عقاب: بس شوية..

اماني: ماريدك، وخر!

دفعتني ومشت رجعت كمشتها وحضنتها بقوة اكبر لصدري..

جانت مستسلمة بس بنفس الوقت تبجي ولسانها يطلب الرحيل، الي متاكد مليون بالمية رايه يختلف عن راي كلبها..

اماني: انت مو عفتني لييييش هسة مكمش بيييه؟؟

عقاب: ما عفتج وما اعوفج بكل عمري!

وخرت عني وحجت باستنكار..

اماني: مو انت الي دزيتلي اوراق الطلاق بأيد ريان؟ مو انت الي انسحبت وتركتني؟ مو انت الي تخليت عني و ضحكت عليه ورجعتني لبيت اهلي رغم توسلتك متسويهااا؟!!! لعد شنو تكول ما عفتج؟؟؟؟ ليش بعدك تغااار ليش تبوسني ليييييش واحنه متطلكيننن؟؟ شتريد مني ولوين تريد توصل بتدميري اكثرررر لوييييييييين؟؟؟!!!!!!!

ملت براسي للجانب، سامح لمزيد من دموعي الحارة بالتدفق بأريحية.

اماني: ولله العظيم انت اخذت حق اختك مني مربع وزايد، وما ظل عندي روح تتحمل اوجاعك اكثر، الله يخليك اعتقني و ريحني اني خلص انتهيتت!! ما بيه اتحمل بعد ولله

وخرت عن طريقها، وهي فتحت الباب وراحت بعدما القت نظرة اخيرة عليه..

نظرة تلخصت بيها كل معاناتنا، ووية طلعتها من هالبيت طلعت روحي وياها..

كعدت ونطقت بتعجب..

عقاب: اني ردتها تطلع من حياتي، ليش راحت واخذت حياتي وياها وهي طالعة؟!!

دك تلفوني، ريان.

عقاب: الو ها ريان

ريان: اماني يمك مو؟

عقاب: اي

ريان: عقاب نسيت شكتلي؟

فركت عيوني ورديت ..

عقاب: لا بس هي اجت وحدها

ريان: ميخالف، خليها يمك لحد ما اجي اخذها، دقايق واكون يمكم

عقاب: ميحتاج اني اجيبها

ريان: خاف متكدر، اني اجي

عقاب: رييان!!

ريان: خلص مثل متريد.

سديته وطلعت وراها.

شغلت سيارتي وطلعت لكيتها دتمشي عالشارع.

وكفت كدامها.. دموعها بعيونها ومسكارتها سايلة مدمرة وجهها.

دارت وجهها للجانب، جنها حست هاي اني.

دكيت هورن ونزلت الجامة.

عقاب: تعالي اوصلج

غلست وعافتني ومشت.

نزلت من السيارة، مشيت وراها لحد موصلت يمها ولزمت ايدها.

اندارتلي وجرت ايدها مني وحجت بعصبية.

اماني: ديربالك تمد ايدك عليه بعد!!!!

عقاب: خلص تمام، بس اصعدي خلي اوصلج لاهلج وما ادنالج بعد

اماني: ماريد، مو طفلة كدامك وكلشي ما اندل! كتلك ماريد اشوفك بعد، ماريد اكون وياك يا اخي، ماريدك افهم افهمممم!!!!

عقاب: دكتورة لتخلين صوتنا يطلع بالشارع!!

اماني: علساس تستحي انت!

خزرتها، سكتت.

عقاب: حس زايد ماريد اسمع، صعدي برجليج قبلما اصعدج كوة

اماني: رح اصعد، بس لا عبالك خايفة منك!!

الابتسامة الساخرة لكت مكانها على شفايفي ورديت..

عقاب: يي خوش

خزرتني وراحت صعدت.

سقت السيارة لبيت اهلها، طريقهم صاير يأذيني ويخليني اقارنه بذكريات ثانية..

اثنينا جنه هادئين كل الوقت، هي دايرة وجهها ولا التفتتلي.

وبس اصوات انفاسها العالية الناتجة عن عصبيتها تنسمع..

جنت اندار واخطف نظرات الها بلا متنتبه.

....

ريما

بالمستشفى، بقسم الاشعة جنت دا اخذ اشعة فكية (للفك) لبنية شابة.

ريما: اي حبيبتي ثبتي راسج ولتحركيه، عضي ع هاي وخلي فتحة حلكج هيج حتى تبين بالاشعة زين

هزتلي براسها، جان وياها مرافق.

ريما: تكدر تجي وياي بلا زحمة؟

-اي اكيد

ريما: تمام، ظلي مثلما انتِ لحد ما اجي واكولج

رحت للجهاز المعزول عن مكان المريض بغرفة صغيرة، وجان وياي المرافق.

شغلت الجهاز وبلش ياخذلها الاشعة.

لاحظتها مرتبكة وهو مثل الخايف عليها وبس يسأل..

-ليش هيج حالتها؟

ريما: ننتظر الاشعة تكمل ونشوف

-تمام

ريما: اكدر اعرف شنو تقربلها؟

توتر ورد ..

-زميلتي بالكلية

ابتسمت وكتله بمزح..

ريما: متاكد بس زميلة؟ شو دا اشوف غير شي

-ياريت لو هي هم تشوف ..

للحظة تذكرت قسورة، من جان هيج مهتم ويحبني واني حاسة بس مغلسة..

رديت بثقة.

ريما: تشوف تشوف لتشيل هم، انت بس اثبتلها انو انت جدي وياها وتحبها من صدك وساعتها حتكونون احلى ثنائي

ابتسم بودية واردف بهدوء .

-ان شاء الله يا رب.

اخذت الاشعة، طفيت الجهاز وكمت.

-ها كملت؟

ريما: اي اي

رحت للبنية، وخرتها عن الجهاز.

ريما: يلا هيج خلصنا

-وشطلع؟

ريما: كسر وخلع ورضوض بفكج

شهكت بخوف والولد هدأها كبل..

-تشاقة تشاقة شبيج بجيتي!

ضحكت بفشلة، لو هي رقيقة لو اني صدك بالغت.

ريما: اسفة جنت اشاقيج، بعدين اكلج شنو هي ضربة شاطر اطفي الجهاز منا تطلع الاشعة منا، فد 10 دقايق وتعالي اخذيها

ضحكت وراحت.

اخذت غير حالة وورة نص ساعة رجعولي.

انطيتهم الاشعة .

-شكرا دكتورة تعبتج وياي

ريما: لا ادللي، وديري بالج ها

غمزتلها عالولد الي جان واكف ع صفحة، ابتسمت جنها استلمت شقصد.

-دايرة بالي

ريما: بالتوفيق لعد

-شكرا هواية

ريما: العفو واجبي

راحوا واني مبتسمة، لطيفين يربي معقولة اني وقسورة هيج منظرنا للعالم؟!

للظهر، كملت نزعت صدريتي واخذت جنطتي دا اطلع.

صادفني جهاد وعباس، اثنينهم يشتغلون وياي بقسم الاشعة بس عباس قريب الي اكثر لانه محترم.

جهاد شوية عنده شطحات ويتمادى بالشقة فمبتعدة عنه، بس ع كد السلام علاقتي بي.

عباس: ها ريري رايحه؟

ريما: اي كملت

جهاد: ابقي اتغدي ويانه، رح نطلع نتغدة برا

ريما: لا شكرًا، اهلي منتظريني

عباس: ع راحتج، يلا مع السلامة

ريما: بيباي

اشرلي براسه، عفتهم ورحت.

عباس يفهمني ويعرف نظرتي لجهاد شنو فدائما يساعدني اتملص منه.

طلعت دا اركب تكسي، دك تلفوني، ابتسمت وصعدت.

انطيت السايق العنوان وفتحت خط مجاوبة.

ريما: الووو

قسورة: يا هلا بالحلووو

ضحكت ورديت..

ريما: وزن وقافية

قسورة: صادق طلال ميلحكني

ريما: دستقر عيني قيقو

قسورة: اني مو كتلج لتكوليلي هيج!!

ريما: شبي ولله حلو، وين لاكيلك واحد يدلعك انت!!

قسورة: دنجبي لج دلع ايش هذا

ريما: لعد شلون لازم الكالك دلع

قسورة: وشبي اسمي يكرص يبزز متكولي؟

ريما: ما احب الرسميات، شنو فرقي عن باقي العالم من يصيحولك باسمك لعد

قسورة: فرق.. وفرق كلش جبير بس غير انتِ متشوفي، بنص گلبي اذا باوعتي حتعرفين شقصد

ريما: وشلون اكدر اباوع؟؟

قسورة: متكدرين، حسي بس

ريما: للاسف احساسي ميشتغل

قسورة: يا عديمة الاحساس!

ضحكت ونصيت صوتي.

ريما: من اوصل للبيت نكمل، رح ابلش اتمادى عيب من السايق

قسورة: وهذا كله الحجي وانتِ بالتكسي!!!

ريما: لعد وين بالغواصة مثلا!

قسورة: انجبي، من ترجعين نتحاسب

ريما: خوش حضرة المحاسب

سديته مبتسمة، عيوني عالطريق..

كل النباتات مورّدة والخضار مالي المكان، منظرهم يبعث الطمانينة بنفس الناظر ..

راحة نفسييية، اموت بهيج مناظر.

فتحت تلفوني صورت المنظر وخليته ستوري، رجعت سديته وشوية ووصلت للبيت.

حاسبت السايق ونزلت.

صادفني ريان وجهه ينطي الوان.

ريما: سلام .. شبيك شو وجهك اصفر

ريان: اماني مو بالمستشفى

ريما: اكيد يم عقاب، ليش هلكد خايف!

ريان: اففف ريما افففف

ظليت صافنة، هذا شبي!

فات لجوة لحكته.

ريما: شو صاير اف واف شكو خيرك

ريان: مالي خلكج ريما وخري

ريما: انوب صاير كله ريما وريما، لا الوضع مبين كلش خطير احجي شكوووو خوفتني!

طبينا للصالة، صاروا كدامي ماما وبابا.

رياض: ها وين اماني لعد مو رحت تجيبها؟

سما: اختك وين ريان؟

تنهد ورد.

ريان: عقاب رح يجيبها هسة

ردت ماما بشك: عقااب؟؟ شعنده وياها؟

رياض: وشعنده جاي اصلا!!!

ريان: ريلاكس يمعودين هي راحتله، واني كتله يجيبها

رياض: شلون سالفة تعبانة هايي!!! انت ليش متبطل حركاتك هاي كم مرة كايلك جوز من عقاب وسوالفه!!

ريان: افتريت عليه ادور! اني شعليه دكتور بنتك ورجلها تريد تحاسبهم عندك حجاية منا مناك تعرف وين تلكاهم و روح

ريان جان يحجي بجدية، اول مرة اشوفه هيج عصبي.

بابا نار عصبيته غلت اكثر فصاح بريان..

رياض: طولان لسانك وكايم تعلي صوتك و تجاوب ابوك!!

ريان:اني اسف مو قصدي ارادد بس تعبان واستلمتوني عبالك اني كتلها روحي!! شوية حسوا بيه ترا مو بس اماني عندكم!!

خلانه مصدومين من رده وعافنه وصعد لغرفته..

ريما: ريان صاير وياه شي اكيد!!

سما: هاي اول مرة اشوفه بهيج حالة، ريما متعرفين شبي اخوج؟

رياض: عرج ما بي

سما: لا تحجي هيج رياض، ترا صدك احنه هاملي ومنعرف شبي ما بي

رياض: وزعطوط قابل هو، غير رجال وعليه الاعتبار، جاي يغار من اهتمامنا باخته!! شنو مراهق حضرته؟!!

سما: يعني انت كلشي عندك رجوليات، ترا الولد هذا ابنك وابني مو غريب، واذا كان ولد هذا مو معناته تهمله بحجة يعتمد ع نفسه!

رياض: ليش اني شوكت هملته؟! شو احسن لبس واحسن مدارس وحتى بأرقى كلية ببغداد خليته يداوم شيريد اكثر من هيج بعد؟!!

سما: يووه رياض لو اظل منا لباجر احجي ما تفتهمني

عفتهم يتكافشون وصعدت لغرفتي.

سديت الباب، ودكيت ع اماني.

اماني: الو

ريما: ها ولج وينج

اماني: بالطريق، صاير شي؟

حسيت صوتها مو طبيعي.

ريما: اشيائات مو شي، من توصلين تفتهمين بس اذا تكدرين طبي من الباب الخلفي لان رياض وسما واكفيلج بالصالة

اماني: دروحي روحي..

سدته بوجهي، ظليت صافنة بعدم تصديق!

ريما: ايا ادبسزز سدته بوجهيي!! ولله مو صوجج دولي، صوجي اني خايفة عليج دكليها

..

اماني

وصلني، نزلت وية ما وكف السيارة وحتى مع السلامة مكتله.

كارهته وكارهة تصرفاته، وكارهة كلامه الي ديدك بگلبي ..

تلكوني ماما وبابا تحقيق.

سما: وين جنتِ لسة احنه شنو اتفقنة؟

رياض: اني مو كتلج ذاك الرجال لتوصليله بعد؟ ليش تعاندينيي؟؟

اماني: بابا اني جنت...

قاطعني وكال باصرار.

رياض: بدون بس!!! بنتي للمرة الالف اكلج عقاب لتوصليله ميفيدج، انسان يضرج جوزي منه ابتعدي كافيييي!!!

اماني: ما راح اوصله بعد، وماريد اسمع اسمه بعد ولحد يجيبلي طاري بهالبيت، مرتاحين هيج.. الوضع تمام مو؟

ظلوا يباوعولي باستغراب، رجعت جاوبت.

اماني: السكوت علامة الرضا، ديلا اروح لغرفتي اني

صعدت واني اجر بذيـول حزني وخيبتي وراية مثل الجبال.

طبيت وصارت كدامي ريما، بعدها ما حجت رفعت ايدي كعلامة على السكوت.

صدك سكتت، شمرت جنطتي وكعدت ع جربايتي..

درت وجهي للجهة البعيدة عن ريما وظليت صافنة بالفراغ ودموعي تنزل وحدها..

ماعرف شلون اوصف الحزن الي بداخلي..

الموضوع كأن روحي ناصبة فاتحـة وتعزي نفسها على الخيبة والضياع الي عاشته وية عقاب.

اكو غضب جبير بداخلي، يقابله حزن عميييق ينهش بروحي وبكلبي..

الف غصة واكفة ببلعومي ومية الف دمعة غيرها دتتحضر حتى تنزل حدادًا على فراكي اله..

ما توقعت الفرحة الي عيّشني بيها، حيخليني ادفع ثمنها اضعاف مضاعفة من التعاسة ..

......

جنات

طلعت من القاعة اني وصديقتي رنا.

جنت اغفي لان بالمحاضرة نمت هلكد ما الدكتور ممل ومادته تجيب النعاس.

رنا: دبسچ تتثاوبين !

جنات: ادور حتى ع التثاؤب واكفتلي، حلوة هاي حلكي لو حلكج هو؟!!

رنا: دنجبي ام حلك، حلكي لو حلكج..
كامت تقلد عليه وتعوج بحلكها، ضحكت وضربتها ع جتفها.

رنا: لج غير من اشوفج انعدي منج و اكوم اتثاوب وياج وافك حلكي ع عرضه جني تمساح

جنات: لعد ديربالج لتثاوبين كدام حبيب الگلب ليروح يفلت

رنا: صدك هو وينه، شو من بدت المحاضرة الثانية ولسة حسن ماكو

جنات: تلكي غاط بالنادي يسولف وياكل هو ورحيم الممثل

رنا: ولله فاهمين الحياة صح ذوله

جنات: دوم السوالف الما بيها حظ تعجبج

رنا: وج بابا انتِ ثولة متفتهمين!!

جنات: من بعدج، بس ميخالف فهميني يا فهيمةةة

رنا: يعني وين اكو احسن من واحد يصادق الممثل؟ ميدخل محاضرات ولا يقرة ومخلصها بالنادي مثل حسن وفوك هاي ونسة وطبة وطلعة وهو ناجح بحكم واسطة رحيم يم الدكاترة

جنات: وشنو الحلو بهاي السالفة بلا، انتِ تظلين هيج!

رنا: يووه جنات عبالج كلها سجاجة وتحب الدراسة مثلج، لج بابا اني اريد اتووووونس

جنات: اتونسي محد لازمج

رنا: اسكت احسلي، اني وانتِ تفكيرنا مثل الخطوط المتوازية ابد ميلتقن!

جنات: صح

رحنه للنادي، وية ما فتنا صاحلنا رحيم.

رحنه يمه.

رنا: ها رحيم شكو

رحيم: دكعدي خ نسولف، لج اليوم قصفت دكتور غزوان قصفةةة تسوة حياته

لكزتها بذراعها ترفض، لان الاخت رادت تكعد علمود سي السيد حسن.

رنا: ه..هاا لاا لاا غير وقت عود

حسن: ليش انتن مو اجيتن تكعدن؟ كعدن ويانه

رنا: م.. موو احنه...

جنات: لا احنه عدنه موضوع مهم نريد نحجي بي على انفراد، شكرا

رحيم: بسلا ع كيفية وضع الايلاينر او تثبيت احمر الشفاه هههههههههههه

طكها ضحكة وحسن ابتسم بخفة، كلبت عيوني صفح ومشيت وجريت وياي رنا الي فقدت ع ابتسامة حسن وراحت بغير دنيا.

كعدنه ع طاولة وحدنه، ظلت كلشوية تلتفت تباوع لحسن، يبتسملها وهي تدير وجهها عنه عود استحت.

جنات: دكافي عاد ركبتج رح تطك

رنا: وج افدي الابتسامة اني، دباعي الجمال باعي، شكد الله تعبان بوجهه بحيث طالع هيج صاك

تحجي وتلتفت عليه، حجيت بجدية.

جنات: غبرة لتلتفتين عليه كلساع، هسه عباله دنحجي عليه

رنا: لعد احنه عليمن دنحجي؟

جنات: عليه بس خو ما نفضح رواحنا؟ اثكلي بابا لتظلين هيج خفيفة

رنا: جنات احبه! مو بيدي ولله عقلي يتبخر واصير غبية من اشوفه مادري شحجي ولا شسوي

جنات: معذورة حب هاي مضاعفات الحب، بس حاولي تسيطرين ع روحج ليروح يشوف نفسه عليج

رنا: لا ترا حسن مو من هالنوع

جنات: وشمعرفج انتِ من يا نوع هو؟

رنا: اعرفه شبيه غشيمة قابل، بعدين شنو الموضوع المهم الي لازم نحجي بي اني وياج ع انفراد؟؟ ليش ما خليتينا نكعد وياهم؟؟؟؟

جنات: يعني متدرين رحيم يوغف ع كلبي، ما ابلعه هو وسوالفه

رنا: وشسويله، غير علمودي تقبلين مو تدرين احب حسن!

جنات: اصلا حسن مادري شعنده ويه هالطكة ونص هذا، شو هو رزن ومثقف عكس رحيم تمامًا!!! شلون صاروا اصدقاء ويتراهمون مادري!

رنا: هو المختلف يتجاذب

جنات: مو دوم، تصدف..

شوية واجتي اميمة هي وميقات وجوههن تتلاطم.

قبل لتكعد، وقبل لنسألهن شكو اصلا.

حجت اميمة بتحذير..

اميمة: ولعباس لتسألني شبيج لو مجاوبة لو اي سؤال سخيف من ذني ادوس ببطنها واطلع حرگة كلبي بيها زين لو لا

ميقات كعدت وجرتها حتى تكعد.

اميمة: هديني اني اكعد

جنات: وشبيج عيني اجيتي مادة لسانج شطوله شحجينه شكلنا احنه

رنا: جاية تطلع حركتها بينا شبيج، اكيد شواهن شوي دكتور محمد مووووو

اميمة: شايفة اذا جبتي اسمه مرة لخ بعد، اكوم ادير هذا العصير كله ع وجهج

رنا: يمه خفت خفت

اميمة: احسلج تخافين، ما انصحج تجربيني بهيج يوم ابد!!

باوعت لميقات بنظرة شكو، اشرتلي ببعدين.

الواضح سالفة جبيرة مو مال ممجاوبة بالامتحان وبس.

جابلنا ابو النادي فطائر وعصاير، حجيت مستغربة.

جنات: عمو منين ذني احنه ما طلبناهن!

اميمة: ما طلبتوهن؟ لعد منين اجن

ميقات اشرتلي ع رنا، باوعت لكيتها مبتسمة لحسن.

من شافني دا اباوعله ابتسم وسوة حركة بايده عود ع حسابي.

ابتسمتله بتصنع ودرت وجهي.

جنات: رناااااا تبببببببن لجججج زفتتتت!!!

رنا: هاااا يمعوده شبيييج

جنات: ديري وجهج عن الولد عاد، خربيج شكد فضيحة

رنا: هااا لا لاا

جنات: ووجعا تنام براسج كافي تبصبصين استحي عاد

رنا: هو يباوعلي اني شكو

جانت تحجي بهيام واميمة وميقات صافنات عليها.

ميقات: وعيونج هاي الي مال فكس مدا تباوعله هم يعني؟

رنا: هو البدة، اني معليه

اميمة: كون كبر اي ولله كبر، بنات تالي وكت شـ خفية الوحدة!!

رنا: انتِ بالذات لتحجين، شردتي نص طلاب الجامعة

اميمة: اي حبيبتي اني ادورلي زلمة مو زعطوط يتملعب شسوي بي هذا

رنا: وهاي كل الصارحوج جهال؟

اميمة: لا، يعني تريدين الصدك بيهم خوش شباب بس شو اني ما راغبتلهم

ميقات: تدرون منو لصارحها بالجديد ورفضتتتتت؟؟

اميمة ضربت ميقات ع ايدها حتى تسكت.

بس هي حجت مقاومة كل سبل تكميم الافواه الي دتتعرضله من قبل اميمة.

ميقات: ولجنن علي صالح ممثل الكلية صارحهااا ورفضتتتته الغببييية!!!

اني ورنا شهكنا بصدمةةةة..

رنا: ججججذااابة!!!!

جنات: تشااقييين صددك عووود!!!

اميمة: شنو ولجن مو بعينجن اني؟

رنا: لا ولله ابد

اميمة خزرتها واني حجيت..

جنات: لج لا بس الصدمني انو رفضتي! ليش ولج هذا نص بنات جامعتنا يركضن وراه

ميقات: تصحيح، كل بنات جامعتنا

جنات: اي المهم، ليش رفضتي ولج احجي ترا بديت اخاف من رفضج المستمر!

اميمة: هيج ما خاش بالي

كتفت ايديه بغير اقتناع..

جنات: ما مقتنعة شو

ميقات: ايي لتصدكيها، واضحة ترفض لان ببالها احد ثاني

اميمة: دنجبي لا احد ولا اثنين، اني وحيدة فريدة وعاجبني ابقى هيج

ميقات: هااااا و لييثثث؟؟

من كالت اسمه، اميمة اوضاعها تخربطت بس حاولت تمثل انو عادي.

اميمة: و.. مـ.. منو، منو هذا ادور؟

ابتسمت وباوعت لرنا الي بادلتني الابتسامة بخبث.

ميقات: هااا صرتي متعرفي ادور! بسيطة

جنات: ولله طلعتي مو قليلة ست اميمة!! رافضة علي صالح وغيره وغيره، تالي طلعت حاطة ببالها ريسهم كلهم!

اميمة: دنجبي انجبي كال ريس كال هو كله خلك موظف امني عد حجي حمزه

اطلقت اوووه معجبة اني ورنا وميقات صفكت.

جنات: كلتيلي متعرفين منو ليث موووو؟؟ ههههههههااااي!!

من الفشلة اخذت جنطتها وكامت.

رنا: عصيرج تعاي اخذي لتنسي

رجعت اخذته.

اميمة: همزين ذكرتيني بي

رنا: لا ولو تدللين

فلتت وراحت واحنه نضحك.

جنات: هاي عود صدك تحب ليث لو تشاقين؟

ميقات: لج يا اشاقة ما شفتي وجهها شلون انكلب من جبنة اسمه، تيهت راسها من رجليها الله وكيلج، واذا ما تطلع ميتة بي اكص ايدي!

رنا: تصرفاتها تكول تحبه، بس هي وين لكته وحبته وشعرفت عنه؟

جنات: شمدريني، هن مرتين الشافتهن بي يمكن شوكت لحكت تحبه

ميقات: بس ترا شاهين كلي انو ليث يحبها وعاجبته

جنات: ايي لج ادري ضرغام هم كلي

رنا: يا سافلات ومتكللي!! لا وفوكاها ثنينهن ما حاطات ببالهن السالفة، هنيالي اي ولله هاي عود تدرن وهيج مطفيات لعد لو متدرن شلون؟!!

.........

اماني

بالليل، جنت كاعدة بالحديقة مال بيتنا وبيدي كوب كهوة باردة..

ماعرف ليش حبيت اشربها باردة رغم الجو بعده بارد.

اخذت رشفة منها، وصفنت بالسما.

جان الگمر بس مزين السما وماكو اي نجمة بيها..

وحده متسلط ومتفرد بهالمساحة الهائلة.

اماني: يا ترا لو اختفى هالكمر بنهاية الشهر وترك السما، النجوم حتكون كافية حتى تضوي السما لو متكدر تحل محل الاصل؟!

اجة صوت ريان من ورايه.

ريان: محد يكدر يعوض وياخذ مكان الاصل ابدا، التقليد والشي المعوّض حيبقى شي مؤقت زائل مهما طال الزمن، وما البقاء الا للاصل الاصيل..

ابتسمت وكلت باعجاب..

اماني: صاير فيلسوف ما عرفتك

اجة كعد بصفي، اخذ عودة مال غصن من الكاع وكام يشخبط بالكاع..

جان واضح عليه مو طبيعي، وريما اصلا حجتلي شصار بينه وبين ماما وبابا.

اماني: ريان صاير وياك شي احنه منعرفه؟

رفع راسه باوعلي وابتسم ابتسامة خفيفة، ادور هز راسه بلا.

اماني: اخويه واعرفك، صفنتك هاي مو خالية

ريان: زين، شنو ببالج مثلا شنو الشي الي مصفنني ومخليني اصير فيلسوف ع غفلة؟

حجيت بشك..

اماني: دتحـب؟

هز راسه بالايجاب، رجعت سألته بفضول.

اماني: منو هاي نعرفها احنه ومن شوكت بديت تحبها وليش هيج حالتك تعبانه شمسويتلك؟!

ريان: بس جري نفس رح تختنكين

اماني: دجاوب ولتحشش

تنهـد واردف..

ريان: تمام بس لتستغربين الي حتسمعي.

اماني: ماكو شي يثير استغرابي اكثر من الصار بعد

ريان: نشوف عود

اماني: اي كمل

ريان: ولله يا اختي العزيزة، اني احب شمس

اماني: شمس منو؟

ريان: بت دكتور توفيق شبيج، اخت امير

اماني: شنووو؟؟؟

هل يمكن ان ينادي غيري بضوء روحـي؟
أيمكن له ان يستبـدلني بفتاة أخرى؟
أيعقل بأن يستبدل المرء حبيبه بآخر؟!..
هُراء..
ان العاشق لمن يعشقُ لمخلصٌ حتى اللحد..
بقلمي: نورمين
....

انتهى..

لا تنسوا التصويت والتعليق

#الكاتبة نورمين 🖤🦋