خطأ طبي «عقاب الاماني»

- ٤٨ -

#خطأ_طبي «عقاب الاماني»

بقلــم : نورمين 🖤🦋

...

بس علمودها!

علمود تكون بخير، ولو بشكل مؤقت لبينما انهي حياته!

طلعت تلفون صرصور ضامه بالجكمجة للاحتياط، دكيت ع قسورة.

رد بتعجب..

قسورة: شو بهذا تخابر، شعجب؟ بعدين ليش متاخر عالبيت، ليث خابرني هسة كال عقاب وين لسة!

اردفت بصوت مُثقل من التعب.

عقاب: خابر ريما خلي تجي للمستشفى هي واهلها

قسورة: خير ان شاء الله شكو؟!

عقاب: الدكتورة تصوبت، تعرضنا لاطلاق نار واجتها الرصاصة بجتفها..

كال بصدمة .

قسورة: الهيي دخييييلك الصبر!!! وهسة شلونها هي؟

عقاب: ماعرف

قسورة: شنو متعرف لعد مو انت وياها؟!!!!!

عقاب: الله يخليك عوفني بهمي روحي طالعة، سوي لكتلك عليه وبس!!

سديته مغتاض، ضربت الستيرن بكف ايدي وحجيت بسخط..

عقاب: ما ردت نهايتنا تكون بهالطريقة..

سندت راسي ع الستيرن وتنهدت بتعب مخلوط بالقهر والخوف.

بالي يمها اريد اعرف شلونها رح اتخبل وعقلي على وشك يضرب!!

....

ريما

كاعدة بغرفتي ارتب بشعري، لان متواعدة وية صديقتي نطلع للمول نفتر.

دك تلفوني، شفت المتصل قسورة.

رديت بمزح..

ريما: شبساع شتاقيتلي مو قبل شوية تكلي ولي لزكتي؟

اجاني صوته مضطرب كلب كياني..

قسورة: اختج متصوبة وبالمستشفى، روحولها بسرعه

فكيت حلكي بصدمة وتعابير وجهي صارت فارغة ..

ريما: شنوو!!!! منو صوبها شبيها اختي وبيا مستشفى احجي قسورةة!!!!!

قسورة: بمستشفى ... وماعرف اي شي ثاني

ريما: لك شنو متعرررف لعد شمدريك!!!!

قسورة: دروحي هسة بعدين نتفاهم

سديته منه، ورحت ركض لامي حجيتلها، خابرت ابوية جان طالع.

طلعنا للمستشفى وهو كال يلاكينا هناك.

الطريق كله ماما تبجي وتتحسب ع عقاب..

سما: كله من ورا عقاب، من يوم دخل حياتها مظلت مصيبة موكعت ع راسها، دمرها لبنيتي حسبي الله ونعم الوكيل بي حسبي الله ونعم الوكييييل...

كمشت ايدها وحجيت محاولة ابث الطمأنينة بداخلها..

ريما: كولي يا الله ماكو شي ان شاء الله

سما: ان شاء الله، احميلياها يا رب..

وصلنا، رحنه للطوارئ.

سألت وحدة من الممرضات الفاتوا.

ريما: العفو بس الدكتورة اماني وين وشنو وضعها؟

-نقلناها لغرفة حتى ترتاح

حجت ماما بقهر..

سما: وشلونها هسة هي؟

-وضعها مستقر وحالتها زينه، ورا ساعة ونص تكدرون تشوفوها

تنفست براحة وماما لسانها بلش يلهج بكلمات الحمد ..

سما: الف الحمدلله الك يا رب، الف الحمد والشكر..

-زوجها وين راح؟ وقع ع اوراق عمليتها وبعد ما شفناه، احتاجينة وجوده علمود كم اجراء روتيني

سالت بصدمة..

ريما: ليش هو جان موجود؟

-اي، هو جابها لهنا اصلا، بس من خلصنا العملية ملكيناه

سما: ولله عرفت هو سبب حالة بنتي، هاج سمعي هو جايبها لهنا، لا وادور عايفها ورايح هالحقييير!!!!!

اشرت للممرضة تروح ولزمت ماما كعدتها ع وحدة من الكراسي المركونة عالجانب للانتظار..

سما: شكتلج اني شكتلججج؟؟ هذا عقاب وباء وباااء وصاب اختج ومستحيل تتعافى اذا ما ابتعد عنها!!!

ريما: مو وكته هالحجي ماما، خلي تصير زينه ونسمع منها شصار شمدريج انتِ هو السبب و حكمتي عليه فورا!!

سما: وج يمه اني ماعرف بنيتي قابل؟ ليش مجانت هالحوادث تصيرلها من قبل؟ شو من تزوجته لليوم ما شافت يوم راحة لا من سالفة اخته لا اطلاق الرصاص ع البيت لا السجن وهسة تصاوبت! شيصيرلها اكثر بعد؟؟؟؟؟

كلامها صح، ماكدر اكلها لا..

طبطبت ع رجلها بهدوء..

ريما: انتِ اهدأي وكله ينحل، بابا ع جية لتهبطيه وتعصبيه بهالحجي ليروح يصعد ضغطه ويتخربط

سما: علساس هو ميعرف الا اني احجي!!

ريما: ميخالف يا حبيبتي، مو وكتها هالسوالف، خلي مون تتحسن ولكل حادث حديث..

هزت راسها بخضوع وسكتت..

كمت اريد اخابر قسورة، اجة بابا يمشي بساع من قلقه.

اول مشافني حجة بعلو..

رياض: وينها اختج شصاييررر؟

ريما: هي زينه بابا لتخاف، الممرضة كالت وضعها مستقر وورة شوية نشوفها بس خلي يفكها البنج

رياض: الف الحمدلله يا رب..

اومئت موافقة..

رجع سألني..

رياض: وشلون صار هالحادث شلون تصوبت؟ وزوجها وينه؟

ماما من مكانها جاوبته..

سما: ذابها بالعمليات وطالع الشفية، وما ندري شنو ولا منو، عود تكعد اماني عود نفتهم!!

هي حجت هيج، وجنها ذبت بانزين ع غضب بابا..

غضبه زاد وصار اضعاف مضاعفة عن قبل..

رياض: اني اله بعد، سكتت هواي وهاي جانت الضربة القاضية!!

ريما: بابا بس خلي نفتهم شصار شبيكم!

رياض: ماريد افتهم بعد مليت تعبت جزعت روحي! ليا دوب اظل حاط كلبي بشيشة وخايف ع اماني لتتأذى بسبب عقاب هااا ليا دوووب؟؟ هذا هو كلشي انتهى وبعد ماله مرة عندي

قفل فد مرة، وماما موافقته واني ظليت بنصهم الوب مادري شسوي..

ما انكر معصبة ع عقاب، شلون عافها وحدها وطلع.

بس هم ما اكدر احمله ذنب الصار بدون ما افتهم شصار بالضبط!!

طلعت للحديقة بحجة اشتم هوا، وخابرت قسورة.

قسورة: ها شلونها؟

ريما: زينة زينة

قسورة: الف الحمدلله، ظلي وياي ع الخط خ اخابر عقاب وارجعلج.

ريما: تمام

سده، شوية وخابرني.

قسورة: اكلج حبيبي

ريما: كول

قسورة: تكدرين تطلعين لباب المستشفى شوية؟

ريما: ليش شكو؟

قسورة: عقاب بالباب، طمني عنها ورجعي

عكدت حواجبي باستغراب وحجيت ..

ريما: ليش بالباب ميفوت؟ وبعدين هو ليش عاف اماني وطلع لبرا؟

قسورة: ما ادري ولله، الزلمة مو طبيعي ومدا يقبل يحجيلي شي، اشك امير اله ايد بالصار

ريما: يعني هم من ورا عداوته بعقاب اختي تأذت مرة ثانية؟!

رد مستنكر كلامي..

قسورة: شنو هالحجي؟

ريما: واضح حجيي، اختي دتدفع ثمن عداوة مالها علاقة بيها اصلا!! و صديقك واكف ع صفحة يتفرج لا بي ينهي هالعداوة ولا بي يعوف اختي بحالها، وتالي شلون الا تموت يلا؟

اردف بعصبية..

قسورة: مالج حق تحجين بهالطريقة وانتِ متعرفين عقاب شديعيش ولا شنو حجم وجعه، ليش محملته الذنب وتكولين بسببه؟ امير هو السبب مو عقاب!!!!

ريما: وامير بسبب عقاب ديتصرف بهالشكل!!

قسورة: عجيبب!!!

ريما: دافع لصديقك دافعله بس لتنسى، اختي الي صايرة بوجه المدفع ومندري ع يا ساعة تتلقى الضربة التالية!

قسورة: امشي شوفي عقاب وسكتي الله يخليج، وحجيج هذا ما اوصيج عود كولي اله خلي يكب نار خاف هو عايز

ريما: خوش فكرة

سديته ورحت برا، شفت سيارته من بعيد واكف ع صفحة.

مشيت باتجاهه واعصابي تلفانة، ما ينلامون بابا وماما من يكولون كلشي احداث مؤسفة دتصيرلنا من لحظة دخل حياتنا!

نزل من سيارته وانتچى ع البنيد مالتها، مكتف ايديه لصدره.

وصلت يمه، حجيت واني مغضبة ملامحي..

ريما: شو هنا خير؟

عقاب: مو وكتج، شلونها؟

ريما: زينة مدامك بعيد، مثل هسة بالضبط!

عقاب: اكيد؟

ريما: اي لعد شنو، لتفاول عليها اختي بخير

عقاب: عساها دوم ..

حجة بطريقة خلتني اظل صافنة، للحظة اجيت اكول هذا ماله علاقة واحتمال متأذي اكثر منها !

بس سحبت هالفكرة من بالي ورجعت كلت ..

ريما: اذا عفتها، فصدك تبقى بخير على طول!

اومئ بالايجاب موافقني الراي، رد ببساطة..

عقاب: عفتها لتشيلين هم، ديري بالج عليها وخليها تكرهني، ما اوصيج بعد لسانج هذا كافي ووافي، في امان الله

دار وجهه وراح بدون مينتظر مني رد، شغل السيارة وطلع.

خلاني واكفة مصدومة، ماعرف اذا اضوج منه لو عليه.

شهالانسان الي ميخليك تعرف شتريد!

كمية تناقض مو طبيعية بشخصيته وبالانطباع الي يخلي عند الناس عنه!!

دكيت ع قسورة ومشيت راجعة لجوة..

ريما: الوو

قسورة: ها شصار

ريما: عقاب شبي؟

تنهد وجاوبني بسؤال ..
قسورة: حتى انتِ حسيتي بالي دا احسه مو؟

ريما: صراحة اي

قسورة: ماعرف شبي، اخابره ميحجي ويكلي مالي خلكك

ريما: هو كله غريب عجيب، اذا هو هيج خايف ع وضع اماني ليش ميجي يمنا وينتظر يشوفها؟ ليش واكف برة!

قسورة: ما عندي علم بس يجوز خايف يواجه اهلج ..

ريما: ما اتصور، عقاب واجههم دائما وجان موقفه قوي الا هسة....

قسورة: شنو هسة شكو؟

ريما: ما ادري شكلك بس مو طبيعي، بارد و كلي حجي للان صافنة بي

قسورة: شكال احجي؟!

ريما: شوف اني كتله ليش متعوف اختي حتى تتحسن لان بوجودك يمها تاذيها انت، فهو كلي عايفها وانتبهي عليها وخليها تكرهني ومدري شنو، ادور راح وما انطاني مجال اكله شكو وليش هيج ديحجي!!

قسورة: لعد الي ببالي صح!

ريما: شنوة؟

قسورة: بعدين بعدين

سده بوجهي، ظليت مشغولة البال..

بيمن احير، بـهم اختي لو بـهم عقاب وقسورة؟
ولله حيرة يربي!

.....

اماني

فتحت عيوني بعد وقت ما ادري شكد...

رفرفت بجفوني بتعب، تذكرت شصار وياي..

باوعت ع الجهة المصابة مضمدة، ودا احس بخدر بيها..

تنهدت بألم لان تحركت بطريقة غلط..

اجة ع بالي عقاب..
وينه!!

شوية واجوا اهلي كلهم ..

رياض: الحمدلله عالسلامة باباتي

تمتمت ..
اماني: الله يسلمك حبيبي..

باسني براسي ووكف ع صفحة..

سما: الحمدلله ع سلامتج حبيبتي شلونج شتحسين؟

اماني: زينه ماما ..

ريما اجت بصفي وكفت وكالت..

ريما: الحمدلله عالسلامة ولج وكعتي كلوبنا!!

ابتسمتلها بتعب..

عيوني تفتر بيناتهم تدور ع عقاب..

حجيت متسائلة..

اماني: عقاب وينه شو ماكو؟

ريما: شوية ويجي، خابروه عنده شغلة

اماني: هاا

ريما: اي انتِ ارتاحي

مر اليوم بملل، عقاب ماكو ومحد يحجي عنه

بس اجيب طاري يغيرون الموضوع لو يكولون راح بشغلة

خفت يكون صايرله شي وميريدون يكلولي..

بالليل، جانت ريما يمي وبابا وماما طلعوا برا..

ريما: اي دكلي يا عيني

اماني: ما احط لكمة بحلكي اذا متكليلي الصدك، عقاب وين؟

اخذت الصينية خلتها ع صفحة وكعدت كدامي..

ريما: متاكدة اذا عرفتي تحطين بحلكج الاكل؟

قلبي خفق بقوة، حجيت بخوف..

اماني: شبي بسلا هم متصوب!!!

ريما: لا يمعوده، بس راح

اماني: شنو راح؟ وين؟

ريما: راح بعد ميجي، عافج

رمشت بعدم فهم، شدتخربط هاي!

اماني: صاحية انت شهالحجي!

ريما: ولله، هو كلي هالحجي بلسانه

ضحكت بصدمة، لا هاي اكيد دتشاقة ممعقولة ميسويها!

اماني: باعي ترا هالحجي ميضحك ابد

ريما: منو كلج دا اضحكج؟ هاي الحقيقة، هو بلسانه كلي اني رايح

اماني: ما اصدك مستحيل، اكيد اكو غلط!

ريما: ما اتصور، جان كلش جدي بكلامه

هزيت راسي بلا، ممستوعبة !

اماني: انطيني تلفونج

ريما: وداعة ماما وبابا عندي دا احجيلج الصدك

نترت بيها..

اماني: كتلج انطيني!!

تأوهت بألم لان حركت جتفي بطريقة غلط.

ريما: تمام تمام بس ع كيفج

اخذته منها، كتبت رقم عقاب ودكيت..

يدك يدك ميرد، عدت الاتصال اكثر من مرة، الى ان غلقه وكام يطلع الرقم المطلوب خارج نطاق الخدمة..

صفنت، شديصير يالله، عقاب مستحيل يسويها خاصة بهالحالة الي اني بيها، ميعوفني ويروح هو وعدني!

اماني: صاير شي متاكدة، عقاب ميعوفني اني ادري بي شكد يحبني اي اي اكيد هذا امير الحقير ورا الي ديصير!!!

جنت احجي وية روحي واهز براسي محاولة اقنع نفسي بهالافكار ..

باوعت لريما وكلت.

اماني: ولله هذا امير ورا السالفة، اكص ايدي اذا مطلع هو مهدد عقاب بيه مثل ذيج المرة!!!

ريما: يا تهديد شدتحجين انتِ؟

اماني: لج ذيج المرة بالسجن، الحقير ساوم عقاب لو يطلكني ويعوفني لو يحبسني، بس عقاب ما رضخله وهسة اكيد سوة هيج بيه حتى يخوف عقاب ويخلي يبتعد عني!

ريما: واني اكول شبي واكف برا المستشفى ينتظر خبر عنج وشكله مو طبيعي!!

ابتسمت بتاكيد..

اماني: اي اي شفتي شلون! اني لازم اوصله لازم احجي وياه!

ريما: بس ماما وبابا ميريدوج تلتقين بي بعد، وحتى كالوا بس تطلعين منا يخلوج تطلكين

بهتت بصدمة..

اماني: يا الله دخيلك اني تصوبت لو العالم شو كلهم صاروا مو طبيعيين!!

ريما: حقج ولله، اني من يمي دخت شحال انتِ!!

طبوا ماما وبابا، سكتنا وهم لاحظوا انو سكوتنا اقترن بلحظة دخولهم للغرفة.

حجة بابا ..

رياض: اكو شي ليش هيج تباوعن؟

باوعنا اني وريما لبعض بنظرات طبيعية مصطنعة ورجعنا باوعناله وردينا بنفس اللحظة بتزامن وقتي فضيع!

ريما & اماني: لا ماكو بابا ليش؟

ابتسم هو وماما وباوعوا لبعض ..

واني وريما شاركناهم الابتسامة بتزييف..

.....

عقاب

وكفت سيارتي ع جهة ونزلت بمكان فارغ يطل على نهر دجلة..

ورثتلي جكارة، ثنين تلاثة عشرة وهيج لحد ما خلص الباكيت عالسريع..

عقاب: عايش بيها وكتلوني بفراكها..

تمتمت بوجع..

ما اعرف شلون رح اكون كد قراري..

ولا شلون رح الزم نفسي عنها..

دك تلفوني، رقم غريب جديد والي اكيد هو امير!

فتحت خط بدون ما احجي.

التقطت مسامعي صوته الساخر وهو يقهقه ويكول..

امير: حتى صوتك راح!! واو شكد جانت قوية ضربتي لعد!

تنفست بنفاذ صبر..

امير: متحجي شبيك انخرست وين راح رامبو الي بداخلك شو حتى حسه اختفى يحظي!!

عقاب: شعندك شتريد مني بعد؟

رد ضحك وكال بتصنع..

امير: يا صلوات طلع صوتك مبي شي، الحمدلله والشكر

عقاب: اختصر شعندك؟

امير: لازم مستعجل.. ها شكو شعندك؟

عقاب: مالي خلك اسمع صوتك الخايس، اريد اذب من راسي كوة متحمل ترا!

امير: اووووي شكد كيووووتتت انت

عقاب:تؤ.. انت الي مقرف!

احتد صوته وتغيرت نبرته المستهزءة لجدية محذرة..

امير: لازم تطلك اماني باسرع وقت ممكن، واريد نسخة من وثيقة الطلاق، كـهدية الي تظل ذكرى..

عكدت حواجبي متفاجئ، ما توقعته مستعجل ع الموضوع لهاي الدرجة!

عقاب: انت اكيد صار لعقلك شي!!!

امير: من زمان وداعتك، هاي من جنت صغير، فد مرة بالليل جنت دا العب وطوووبااااا، وكعت ع راسي وفقدت الوعي، كالوا صار عندك ارتجاج مدري شنو المهم جانت وكعة قوية لان من فوك الدرج للكاع ترس وعلى راسي اجتي الضربة فيت، يمكن لهالسبب شخطت!

عقاب: حرامات، لو فاطس بساعتها وخلصانين

امير: ربك ما كتب شنسوي بعد، يريدني ابقى حتى اعذبك واسود عيشتك

عقاب: موتك ع ايدي، خليها ببالك زين هالحجاية، لو تروح لاخر مكان بالدنيا ولو تختل جوة الكاع، مصيري الكاك واشفي غليلي منك!

امير: هسة انت دلكاني والله كريم لهالحجي

عقاب: تطير خو ما تطير، الزمك الزمك!

امير: خوش، وها عكب باجر اريد نسخة من وثيقة عقد الطلاق توصل للعنوان الي ادزه الك بعدين، والا..

رفعت حاجبي وكلت بترقب..

عقاب: والا شنو؟

امير: نسوي بيباي اماني، وعلى اللوبي!

كورت قبضة ايدية باقصى قوة عندي، احاول اتمالك نفسي كدام هالسافل الي ديطلب مني اشياء اعجز افكر بيها، مو ادور انفذها!!

امير: اهووو هم راح حسك، وينك يمعود بسلا دتبجي؟

رديت بحزم.

عقاب: تمام

امير: عفية بالسبع، هيج اريدك دوم تخلي حياة غيرك المهمة قبل حياتك الرخيصة

حجة هالكلمتين وسد الخط، خليت التلفون بجيبي .

ورثتلي جكارة واخذت نفس منها.
نفخت الدخان ببطئ واني اباوعله شلون يتلاشى بالهوا بسرعة.

ابتسمت بحسرة وهمست لنفسي..

عقاب: ياريت لو اكدر اخلي الالم الي بصدري يتلاشى بالهوا ويروح حاله حال الدخان..

تذكرت من كلتلها دير بالج تفاركيني بعد كل هالحُب..

تالي رح اطلكها، وعلمود منو؟ امير!

لك حتى وسفة اكسر كلمتي بسبب هالساقط!!

كلبي انعصر، غمضت عيوني متحسف وهمست..

عقاب: تالي انت الفاركتها عقاب.. انت العفتها وكسرتها رغم كل وعودك الها..

سحبت نفس بضعف..

صحت بألم وحاط ايدي ع ركبتي وافرك بيها بمحاولة يائسة لاستجماع ذرات الاوكسجين ..

عقاب: هواك ربي.. هوااااااااااك..

لليل، كاعد ببيت قسورة وويانة الولد.

مهموم والدنيا طالعة من عيني.

ساكت وادخن بدون حس ولا نفس، والولد كلشوية واحد منهم يذبلي نصيحة شكل .

ضرغام: ترا ميصير تظل تاكل بروحك هالشكل!

ليث: عقاب ترا الجكاير مو حل، احجي بلكي ترتاح!

جنت ادخن وصافن ولا يمهم، اسمع بس مالي خلك الحجي..

قسورة جر الجكارة من ايدي، خزرته بعصبية وصحت..

عقاب: جيبههاا!!!

قسورة: ماكو جكاير!  شبيك انت بسلا تريد تموت روحك!!

عقاب: علساس اني عايش هسة؟

رمش بصدمة، ممتوقع هيج رد.

البقية كذلك اخذوا نصيبهم من التعاطف ع ردي، الي مجنت مسيطر عليه شلون فلت!

غلست وطلعت باكيت من جيبي، بعدني دا اسحبلي جكارة وما اشوفلك الا قسورة رد جرّه من ايدي!

تعوذت من الشيطان وحجيت بهدوء.

عقاب: قسورة مالي خلكك ولعباس!

قسورة: مدا اشاقة وياك اني ترا!

عقاب: دجيبه لعد

قسورة: ماكو كتلك، متدخن بعد بسك!

عقاب: خوش خلي عندك، اني طالع

كمت شمره بوجهي ..

تنرفزت من تصرفه، واني منا روحي بخشمي..

باوعتله صفح، كام وكف كدامي وحجة.

قسورة: انت عايش، مو ميت .. مدام هذا يدك يعني اكو امل

اشر ع گلبي باصبعه..
ضحكت بسخرية ورديت.

عقاب: مو شرط، مرات الگلب يصير مثل البطارية الخربانة، عمرها خلصان وكل نفع ما بيها بس مجرد موجودة، للزينة يعني..

قسورة: اموت واعرف انت ليش سلبي واسود لهالدرجة!

عقاب: هذا اني من زمااان! مفروض تكون تعودت

قسورة: ماريد اتعود، خلي عقلك براسك ترا الموضوع بعده ببدايته، نكدر نطيح حظ امير وترجع للدكتورة!

عقاب: حجي سهل

قسورة: قابل شكو لعد!

تقدمت باتجاهه خطوة، غضبت نظراتي وحجيت من بين اسناني..

عقاب: عليمن تضحك بهالحجي؟ خلي نعترف مدام السالفة بيناتنا، احنه مو كد امير!

وسع نظراته متفاجئ ..

باوعت للولد، كلهم مثل تعابير وجهه..

عقاب: انصدمتوا مو؟

حجيت واني اجول نظراتي بيناتهم بالتساوي.

عقاب: هاي الحقيقة المُرة للاسف، اعرف هاي اول مرة تسمعون مني هيج كلام ومقدر خوفكم عليه، بس اني لهنا وخلص طاقتي صفرّت! ما بيه حيل اذية ولا وجع فقدان عزيز ع كلبي بعد ، اكتفيت بالراحوا!
وهذا امير الحيوان لو نريد نلكفه جان من زمااان لكفناه، مو هسة! بس احنه ببساطة منكدر.. لان هو دوم ديطلع سابقنا بخطوة ودا يخلي كل مخططاتنا تفشل!!

شاهين: نجرب منخسر شي عقاب..

عقاب: صح منخسر، بس اني خايف عليها لتروح تدفع ثمن تجاربنا الفاشلة! لان هالكلب امير مراقبني ع طول الساعة ويعرف كل شاردة وواردة بحياتي!!

ضرغام: وتاليها شنو يعني؟

ليث: يعني تستسلم؟

سحبت ذيول حسرتي وخيبتـي ورا ظهري وطلعت برا ..

اخذتلي باكيتين جكاير وكعدت بمنتزه قريب ع الشارع، يم بيت قسورة.

ورثتلي جكارة، اخذت نفس منها و رفعت راسي لفوك ونفخت دخانها عالي بكل قوتي...

كأن خلاصي من هالهم بدفع الدخان برا صدري بقوة.

ثواني وحسيت ع صوت وقع خطوات قريب لشخص ما يقترب مني.

التفتت ببطء، شفته قسورة.

رجعت درت وجهي وكملت تدخين بلامبالاة.

وكف بصفي وسألني سؤال خلاني صافن..

قسورة: شلونك؟

عقاب: مالي لون ..

قسورة: هو شصار؟

حجيتله الصار بالتفاصيل، لان قبل شوية كتلهم امير هددني بالدكتورة وتركتها نهائيا وبس.

....

اماني

ظل بالي مشغول طول الوقت وفكرة تجيبني والف وحدة غيرها تردني..

اتخبط بين كلام ريما وبين المواقف الي اثبتلي بيها عقاب صدق حبه الي، ووعدني ميتركني ابد لو مهما صار..

لليل كلش، بحجة ابدل ملابسي طلعت ماما من يمي واتصلت ع قسورة من تلفون ريما.

دك اول مرة ما رد..

رجعت دكيت مرة لخ، فتح خط.

بس جنه فتح باب من بيبان النعيم ع كليبي المتلوع لمن سمعت صوته الرجولي وهو يكول..

عقاب: الوو دكتورة

.....

انتهى!

لا تنسوا التصويت والتعليق 🖤🦋

#الكاتبة نورمين