خطأ طبي «عقاب الاماني»

- ٤٤ -

#خطأ_طبي «عقاب الاماني»

بقلــم : نورمين 🖤🦋

...

امير: اخذتها مني، شتتخيل اخليك تتهنى بيها؟!

رمشت بصدمة..

شنو اخذتها مني شديحجي هذا؟!

امير: ها انصدمت؟ لتنصدم ترا جانت الي قبلما تاخذها!!

هديته وكلت بهدوء..

عقاب: اعرف ان ابوك وابوها رادوا يزوجوكم حتى تقوى العلاقة بينهم بحكم شغلهم بنفس الحزب

امير: لا، جنة واحد يحب الثاني بس مكايليلهم

ضيقت عيوني بحدة ..

عقاب: انتبه لحجيك!

امير: منتبه كلش زين، واذا تريد روح اسئلها للدكتورة وتاكد منها بنفسك!

اخذت نفس وزفرته، اني مو هذا موضوعي اصلا!

عقاب: اشش لدوخني، العندي كلته والباقي يمك، اذا تريد تظل تشم الهوى نفذ احسلك، لان حتى اني ما اتمنى اعيّشك الي ديخطر ببالي..!

تقدم باتجاهي وكال بتحدي..

امير: اني هم العندي كلته، لان اتوقع انت هم متريد تتخيل بشنو حـ تمر اماني وهي محبوسة!

جريته من ياخته وكلت بغضب..

عقاب: لسانك اكصه اذا جبت اسمها ع لسانك النكس!!

رد ساخر..

امير: شصيحلها لعد؟

ضربته بوكس ودفرته وكع بالكاع ..

ظل بمكانه وحاط ايده ع حلكه الي يجري دم..

عقاب: الي وياك لقاء بعد، ونتحاسب..

هز راسه ضاحك..

امير: اي ليش لا

طلعت مناك مورث، اريد ادفنه بكاعه بس لموكفني الدكتورة!!

من الخبصة نسيت الحجي، شلون انساه اني يكدر بمكالمة وحدة يطلعها!!!

اول مشافوني الولد ظلوا يسألون..

قسورة: ها شسويت؟

ضرغام: شو تأخرت جوة شصار؟

رديت بنترة...

عقاب: شصار يعني شصاااار اجيت ارتكب بي جريمةةة!!!!

قسورة: شسوييت؟

زفرت انفاسي بحيرة وحجيتلهم..

قسورة: معليك بي يريد يضوجك، ميدري انت اصلا تعرف بسالفتهم

ليث: اي واضحة

عقاب: عبالكم ما ادري؟ اني الكاتلني هالحيوان اذا يريد يضوجني ليش يستخدمهااا، اذا ميريدني اتهنى بيها ليش ميكتلني ويريح نفسه؟؟؟ ليش كل ليريد يأذيني يضربني بالناس الاحبهم ليييشش؟؟؟؟؟

ضرغام: لانهم سفلة، وكلشي توقع من السافل

شاهين: هسة شقررت، خو ما ترضخله؟

عقاب: ياكل تبن، هسة اخابر الحجي واخلي هو يحلها

قسورة: خابرته قبل شوية ردت اكله بس ما رد

عقاب: يجوز نايم،  خ اشوف هسة

شاهين: عاد تصدك، عبالي حتطلكها

خزرته ودرت وجهي...

قسورة: احجي حجي بي خير لو تنلصم اخيك

شاهين: وشكلت قابل، هو عقاب هيج طبعه متتذكرون قبل شلون جان يدفعها عنه لمصلحتها، عبالي هسة هم حيسوي هيج مدامها بسببه انسجنت

جان يحجي بتلقائية، لدرجة كلامه خلاني اصفن ..

قسورة خزره وليث كفخه لان شافوا ردة فعلي..

اخذت نفس وابتعدت عنهم..

طلعت التلفون اتصلت عالحجي ..

دكيت مرتين ما جاوب، بالثالثة رد.

عقاب: الو شلونك يابه

الحجي: هلا بأبو الشباب، خيركم جنت نايم وما سمعت التلفون

عقاب: ميخالف، يابة فارغ اجيك نسولف؟

الحجي: اي بس خوفتني، شصاير شبيك؟

تنهدت وحجيت بأختصار.

عقاب: الدكتورة انسجنت ..

..

ببيت الحجي، جنة كلنا كاعدين وسولفتله كلشي صار.

الحجي: الظاهر لا توفيق ولا ابنه مال احترامات

ليث: كلش وداعتك

عقاب: الي اريده منك يابة تحلها بمعرفتك

الحجي: بدون متكول اصلًا.

عقاب: تسلم يابه متقصر.

الحجي: عيب عليك، ابني مو غريب انت!

ابتسمت بتوتر، وهو كام سوة اتصالاته ورجع.

كعد وكال..

الحجي: محلولة لتشيل هم

تنفست بارتياح..

عقاب: تعيش وتظل سند النه

الحجي: شعندي غيركم اني، وهسة روح للمركز بينما الواسطة تحلها، لليل تكدر تطلعها

كمت حضنته وبست ايده..

عقاب: ماعرف شلون اشكرك يابه..

حط ايده ع كتفي..

الحجي: دمشي روح وبعدين نحجي

هزيت راسي وكمت بساع..

الحجي: ضرغام وياه، لتعوفه

ضرغام: حاضر

قسورة: واني لعد

ليث & شاهين: واحنه؟؟

الحجي: توزيعة هي وكلكم كبيتوا، كعدوا وسكتوا لتجيبولنا العين

طلعت وية ضرغام وعفتهم جوة.

شغلت السيارة وانطلقت للمركز.

ضرغام: وين مو منا الطريق؟

عقاب: امر ع العقيد زيد، نحتاجه ويانه خاف يصير ميصير عالاقل عنده عرف يكدر يتصرف ويمشيلنا الامور

ضرغام: زين تسوي

وصلت لبيته، دكيت عليه همزين طلع موجود..

طلعلي واخذته وياي بعدما سولفتله القضية.

زيد: محلولة لتشيل هم

عقاب: ان شاء الله

وصلنا للمركز، الدنيا ليل.

طبينا وفعلا الواسطة جانت مسوية شغل بس بمقابل مبلغ قوي للجهة المعنية.

بس باقي توقيع صغير وتنفض السالفة.

والمدير هذا المسؤول ع التوقيع مموجود طالع لان دوامه مخلص.

ولباجر الصبح يجي .

عقاب: شنو لباجرر، هسسسةة تطلع متظل لباجررر!!!!

ضرغام: لتصيح ولك رح تفضحناا

عقاب: شنو هالمهزلة هسة تخابروا، واحد يحل بمكانه ويوقع مالي شغل، هسة تطلع يعني هسة!!

صاح بيه عقيد زيد..

زيد: عقاب ترا السالفة مو ضربة شاطر وتصير بهالسهولة!! اصبر وهي بكل الاحوال باجر طالعة ليش تخبصنا وتخلي الشغل كله يروح علينا؟؟!!

عقاب: تبات هنااا انت متخيل الموضوع سههللل؟؟!!

زيد: وداعتك ما عليها شي وهسة انطيهم فلوس و اوصيهم يديرون بالهم عليها

فركت وجهي بحيرة، شلون بلوة يا ربي!

زيد: عقاب اهدئ ترا الوضع تحت السيطرة

عقاب: ميخالف بس اريد اشوفها

زيد: ماشي

انطاهم رشوة، وطبيت شفتها..

كلبي نبض بوجع من شفتها ورة القضبان، هذا مو مكانها خاصة هي انظلمت!

فتح الشرطي الباب وراح..

مجان اكو احد بالسجن بس هي..

يعز عليه اشوفها بهيج مكان..

اول مشافتني اجت حضنتني بقوة.

حسيتها خايفة واجت تحتم بأمان حضني. 

خليت ايدي ع راسها ومسدت ع شعرها بلطف..

عقاب: لتخافين امنيتي انحلت ..

شالت راسها من حضني وكالت بفرح..

اماني: صدك ولله!

هزيت راسي مبتسم بتصنع، مدا اكدر افرح حتى برغم الصار، لان بعدها هنا!!

من تطلع ساعتها تكمل فرحتي صدك..

عقاب: اي حبيبتي ..

اماني: شلون؟ منو الساعدك!

عقاب: الحجي حلها بمعرفته

تنهدت براحة ورجعت لحضني..

اماني: همززين، كلش خفت وحدي هنا ..

تعكرت ملامحي بضوجة..

عقاب: يلا بس هالليلة ..

وخرت عني وكالت بدهشة.

اماني: ش..شنو! يعني ابقى هنا اليوم؟

عقاب: بس الليلة، وباجر الصبح اخذج وتطلعين منا، وداعتج حاولت احلها بدون متظلين هنا اليوم بس ما رهمت لان الكلب المدير مموجود

اماني: اا .. ا تمام تمام عادي..

حجتها بتوتر، بس جانت تحاول متبينلي هالشي..

عقاب: اعرف امنيتـي قوية و تكدر تتحمل بس هالكم ساعة مو؟

هزت راسها .. خليت ايدية ع خدودها وبست راسها..

عقاب: وداعتج متـروح هالسواية بلاش..

اماني: لا.. ماريدك تسوي شي فدوة، ولله تعبت من المشاكل والثارات الي متخلص..

عقاب: لعد يعجبج اسكتله ع وضعج هذا؟

اماني: ليش تحسبها هيج؟ ليش متفكر من جهة ثانية؟

عقاب: شلون يعني؟

اماني: اذا تظل هيج وية كل واحد يتعرضلك مراح نعيش بسلام، تظل انت تضربه ويرجع يضربك مرة ثانية ومنخلص!

عقاب: هالمرة ماكو مرة ثانية لتخافين.

اماني: استغفر الله.. يعني انت هيج حليتها برأيك؟

عقاب: اي ومن جذورها!

اماني: وابوه واهله؟  ميطلعون وراه يطالبون بثاره منك!

عقاب: يتلكون نفس مصيره

هزت راسها بيأس..

اماني: انت ملاحظ من تزوجنا لليوم ما مر علينا اسبوع هادئ! حتى الي يكون ما بي مصايب، نكون منتظرين وعايشين بترقب شوكت تجي المصيبة لان تعودنا وكمنا نشوف الهدوء العايشيه هو هدوء ما قبل العاصفة!

عقاب: هاي اخر عاصفة، وراها يجي ربيعنا ونعيشه بسلام سوة..

اماني: بودي اصدك.. بس صعب!

عقاب: امنيتـي امانة عندج اليوم، ديري بالج عليها والصبح اجي استلمها منج..

ابتسمت ودمعتها نزلت..

مسحتها وبست عينها ..

عقاب: دموع ماكو.. ممنوع سامعتني؟؟

هزت راسها بأرتباك، ودعتها وطلعت ..

اعرفها دتبجي ورايه، واعرف بروحي دا ابجي بداخلي..

بس ميخالف، بس هالكم ساعة وتهون..

ضرغام والعقيد محجوا شي من شافوا حالتي الضايعة.

زيد راح للبيت وبقينة اني وضرغام كاعدين بحديقة قريبة عالمركز لان ممنوع نظل هناك.

عقاب: اذا تريد تنام او ترتاح، روح ما احتاجك

ضرغام: كل عقلك انت! ازعل وياك ترا اذا حجيت هيج بعد، خوّة لو شنو اذا ما اوكف وياك بهيج لحظات!

طبطبت ع كتفه مبتسم بتعب..

عقاب: متقصـر خيـاي..

ضرغام: غالي وغالي يابـه..

ورة شوية، راح جاب لفات وعصاير.

دك تلفوني الحجي.

عقاب: هلا يابة

الحجي: بشر ابوية شصار؟

عقاب: ما صار، هياتني كاعد قريب عالمركز ومتاني شوكت يصير الصبح

الحجي: هاي الجنت خايف منها، ادري بالمدراء ميظلون لتوالي الليل

عقاب: حظي ..

الحجي: ميخالف هيج ولا غير شي

عقاب: اي اكيد

الحجي: ليش متجي لعد، وجودك هناك ميفيدها بشي ترا

عقاب: ماكدر يابه، ماكدر اعوفها وارجع بدونها للبيت..

الحجي: ع راحتك بس دير بالك

عقاب: بعينـي..

الحجي: في امان الله..

عقاب: الله وياك يابة..

سديته منه، صفنت بالسماء واخذت نفس قوي ..

مخنووك وهذا الهوا كله مدا يغذي رئتي ولا يفيدها ..

عقاب: ضوة روحي بعيد، لهيج دا احس بكل هالظلمة والخنكة يمكن..

شوية ورجع ضرغام، انطاني لفة ما اخذتها.

عقاب: ماريد اكلها انت

ضرغام: هاي مالتي وهاي الك

عقاب: ماريد كتلك، جيب بس العصير

ضرغام: الاكل ماله علاقة ترا ليش مزاعله

عقاب: ما اشتهي يابة

ضرغام: ع راحتك

شربت العصير وهو كاعد بصفي ويسولف ..

ضرغام: شكد ما اريد اتخيل شعورك ما اكدر اتخيله بدقة، الله يعينك مو سهلة ..

عقاب: ابد... المكان وصخ وهي نقية، ضرغام مشفت خوفها .. جانت تبتسم وتمثل القوة، بس متدري اني كاشفها وشايف خوفها بعيونها وبرجفة صوتها..

ضرغام: اخخخخ، دخلي تطلع مناك بسلامة ونشوف شغلنا بأمير الكلب

عقاب: متحلف بي.. الا اجرم بي وحق علي!

ضرغام: يستاهل..

دك تلفونه، شافه وسده.

عرفت هاي خطيبته.

عقاب: جاوبها ليش سديته

ضرغام: مو وكته

عقاب: ديلا كوم جاوبها واحجي وياها شوية وتعال..

ضرغام: وانت؟

عقاب: اطير قابل؟ هياتني كاعد وساكت، واصلا وجودك ميسوي شي، فحاجي البنية احسن

ضرغام: اذا هيج تمام

ابتسمتله بتصنع، راح واني فتحت تلفوني..

صورنا فيديوهاتنا، فتحت واحد منهم..

جانت تغني بي بيوم لرحنه لاهلها..
مادري شلون لكيت نفسي مبتسم ومركز بحركاتها وبصوتها وهي تغني..

....

قسورة

بالليل، جنت بالبيت.

هستوني سديت التلفون من الحجي، رجع دك..

باوعت، هاي ريما.

بعد اخر شي صار بيننا..
كامت هي تبادر وتتصل وتراسل من فترة لفترة..

تنهدت ورديت..

قسورة: الو

ريما: هلاو شلونك شخبارك

قسورة: بهالدنيا، وانتِ؟

ريما: صافية دافية

قسورة: زين

سكتنا شوية، احسها تريد تحجي بس منتظرة مني ابادر..

قسورة: عندج شي تكوليه؟

ريما: لا.. الي عندي كلته الك من زمان

قسورة: ها زين

ريما: ايي

قسورة: لعد ليش اتصلتي؟

ريما: زعجتك؟

قسورة: لا بس عبالي بيج شي

ريما: شي مثل شنو؟

قسورة: ماعرف.. اي شي..

ريما: تصدك شنو

قسورة: شنو؟

ريما: مخنوكة، احس بجبل ع صدري

قسورة: اسم الله عليج..

ريما: شكرا.. ومدا اكدر انام ولا اتنفس براحة، وهيج فجأة صار رغم قبل شوية جنت زينة.

كلت هاي اكيد حست بأختها، وهي واهلها ميدرون اففف..

قسورة: اذا احجيلج شي، توعديني تظلين عاقلة ومتسوين هوسةة؟

حجت بأنفعال

ريما: خنتني؟؟؟؟!!!!!

قسورة: خنتج شنو شبيج بابا؟

ريما: ها لعد؟

قسورة: اختج الدكتورة

ريما: شبيها مون؟

قسورة: مسجونة

شهكت بصدمة، كلت هايهيه انفضحنة ووصل الخبر لاهلها!!

ريما: شنووووو شدتحجيييي اختييي!!!!! يا الله لييش ليييششششش!!!!!

قسورة: الله يكرفج ع هالحس العايق هذا، وساعة السودة لكتلج عليها

ريما: قسورة احجي اختي شبيهااا مسجونة!!!!!؟؟؟

صحت بيها
قسورة: نصي حسج بت الحلو!!!

ريما: لك احجيييي!!!

سديته بوجهها، استغفر الله شجاني وحجيت لهالمفضوحة.

شيخلصني من حلك عقاب اذا درى، وهو وصانة منحجي.

ردت دكت، فتحته وحجيت بساع قبل لتحجي هي وبصوت عالي..

قسورة: حسج ما اسمعه لا اسد التلفون واخليج تضربين اخماس باسداس!!!

ردت بهدوء...

ريما: تمام سولف

قسورة: اي وين جان هذا الهدوء من قبل!

ريما: تحجي لو اروح لبابا؟

قسورة: دكعدي وانجبي

ريما: غلط لا تغلط خوش لو لا؟

قسورة: خوش

حجيتلها الصار بالتفصيل..

قسورة: وباجر الصبح تطلع

ريما: هسة اني اضوج لو افرح، تيهت بشنو لازم احس

قسورة: فرحي حتطلع

ريما: هيج تكول؟

قسورة: اي

ريما: زين هي شلونها؟

قسورة: شلونها يعني شتكولين انتِ؟

ريما: سودة عليه يروحي شحالها هسة الله لا ينطيك يا امير الكلب

قسورة: هذا حسابه بعدين

ريما: وخوف اختي والصار وياها!!!

قسورة: مـ يمر مرور الكرام، كتلج حسابه بعدين بس خلي تطلع على خير والباقي علينا

ريما: اثق بيك اني..

ابتسمت، بتل بتل مو حجي عادي، سحر عبالك..

قسورة: عفيه

سديته منها ورة شوية، وظليت كلشوي اخابر عقاب..

ضايج عليه حيل وماعرف شسويله..

ادور الحجي وصانة محد يوصل للمركز لان ميريد نجيب العين وتنكشف سالفتنا..

.....

عقاب

مرت عليه الساعات ببطء فظيع جنها دهر..

خابرني قسورة كم مرة.

قسورة: اي شلونك

عقاب: زين

قسورة: بعد شلونك

عقاب: ترا مالي خلكك، مية مرة كتلك زين

قسورة: زين شلونك بعد؟

عقاب: اجي ادوس ببطنك حتى تتاكد؟

قسورة: ما اكدر انام وبالي يمك، اريد اجيك بس الحجي ميقبل

عقاب: ما يحتاج يابه

قسورة: حاس بيك مو زين، لتمثل عليه

عقاب: خوش

قسورة: حبيب

عقاب: همم

قسورة: تهون

عقاب: اي..

ما صدكت طلعت الشمس، انزرعت بباب المركز قبل الضباط حتى.

وخابرت لعقيد زيد، كال جايك.

شوية ووصل، طبينة جوة ننتظر يجون المدراء والضباط لان بعده دوامهم ما بلش.

ورة ساعة تقريبا، بلشوا يجون وادور اجة المدير اخيرا.

همست لضرغام..

عقاب: تعرف تهلهل؟

ضرغام: لا ليش؟

عقاب: مو جيت حضرة جنابه بعد كل هالانتظار تستاهل نهلهله عليها

ضحك وكال..

ضرغام: اي ولله، و مال تكله زارتنا البركة هم

عقاب: غير لو ما حاجتنة يمه، جان كتله

ضرغام: هههه استقر..

شو من التقيناه، كال لزيد.

-هاي القضية متنسد، تعذرني انت و السيد **** مو بصلاحيتي اسدها بعد

عكدت حواجبي بصدمة..

عقاب: شنو متنسد؟؟؟ لعد والبلاوي الزرگة الاخذتوها من عدنه البارحه!!!!!

زيد اشرلي اسكت..

عقاب: انت مدتسمع شيحجي!!

-اطلع برا!

عقاب: ما اطلع منا لاما توقع وشتسوي سوييي!

-هيج يعني؟

زيد اتدخل وضرغام لزمني وكلي..

ضرغام: كبر حوصلتك مو كبل تتعارك شحجينة احنه؟!

زيد: اعتذر منك سيدي، اعذره زوجته المسجونة واكيد ضايج عالصار بيها، اكدر اعرف ليش متنسد القضية؟ مو البارحة كملناها وخابرناك، كلت الصبح اوقع؟

-لان ما حافظتوا ع سرية الموضوع، الخبر واصل للاعلام والبارحة مواقع التواصل كلها تحجي بي بحيث الاخبار وصلت للسلطة التنفيذية وللقضاء، وقبل شوية وزارة الصحة اعلنت انها تتبرئ من هيج دكتورة وطالبت بمحاسبتها بأشد العقوبات الممكنة!

ظليت واكف مصدوم، هذا شديحجي لخاطر الله المن حاجين احنه!!!! وزارة شنو عقوبات منو!!!

زيد: سيدي محد طلع حجاية منا، اكيد اكو غلط بالموضوع

- ميفيد هالحجي بعد، منكدر نتصرف والموضوع كبر وصار قضية رأي عام، اي حركة بخصوصها محسوبة ضدنا

زيد: حاول منا منا فدوة لعينك سيدي و البنية مظلومة اصلا!

-ما اكدر، تعذرني طلعت الشغلة من ايدي

محجيت حجاية وحدة، الشعور فاق قدرتي عالكلام ..

طلعنا من غرفته اني وضرغام وظل زيد يحجي وياه ويحاول..

دمعتي تلالي بعينـي بعجز..

راح من ايدي خيط الامل الوحيد الجنت متعلق بي..

طلع زيد، باوعتله انتظر منه خبر يكسر حزني بس هوكال بأسف..

زيد: ما قبل، للاسف..

عقاب: ويعنـي؟

زيد: القضية حتظل مستمرة والمحاكمة عكب باجر

نزلت دمعتي، فركت وجهي بقهر وخلخلت ايدية بشعري بقلة حيلة...

عقاب: صبرني و عينني ع هالمصيبة يا رب..

زيد: رح ابقى احاول وياه، ولو مدام الموضوع وصل للوزراء وصار قضية رأي عام يعني منكدر نلعب بي بعد، بس احاول بغير طريقة وبلكت الله يمشي الموضوع

هزيت راسي..

عقاب: متقصر زيودي، تعبتك وياي شكرًا ع وكفتك وياي..

زيد: عيـوني الك صدك جذب، ها واخذتلك منه موافقة حتى تشوفها فد 3 دقايق

عقاب: زين سويت..

باوعت لضرغام..

عقاب: دقايق وارجعلك

هز راسه بهدوء، ملامحه تبين تأثره وحزنه عالصار وياي.

طبيتلها..

اجتي حضنتني وكالت بعيون تلمع..

اماني: ليش اجيت، جان اني طلعتلك!

درت وجهي، مقهور وماعرف شلون اصوغلها الصار بطريقة متكسر خاطرها..

حست عليه مو طبيعي..

اماني: شبيك عقاب ليش هيج ضايج؟

باوعتلها بحـزن، نظراتي تحجي سوء حالي وهي تعرفني من نظرة..

اماني: شصاير ليش هيج حالتك؟

عقاب: حبيبتـي مراح تطلعين اليـوم..

بهتت بصدمة، ادور ضحكت وحجت تحاول تلطف الجو..

اماني: عادي حتلو باجر، ترا اني اكدر اصبر ليلة بعد ..

هزيت راسي بنفي، رجعت حجت..

اماني: ها حتى باجر ماكو؟

عقاب: ماعرف امنيتـي، اني ضايع ضايع ..

اماني: لـ .. ليش انت مو كلت انحلت و اليوم اطلع؟

اخذت نفس وزفرته، حجيتلها الصار وهي وسعت عيونها بدهشة ..

اماني: يعني اني خلص رح انسجن؟

مجاوبتها، عيوني حُمر والغصة شعلت بلعومي..

شعور العجز وحالتها هاي ديكتلني ببطئ..

جعدت ملامحها بحزن ادور شوية شوية تلاشت ملامح الحزن ورسمت تعابير ثابتة..

اماني: يمكن هذا الصح عقاب، اصلا اني جان لازم اكون هنا من زمان!

رديت بعدم تصديق..

عقاب: الظاهر تخبلتي، شهالحجي صاحية لروحج انتِ شدتمسلتين!!!

اماني: صاحية كلش زين، وهو هذا الي لازم يصير، اني قاتلة واستاهل اتعاقب!

عقاب: اماني لتخليني افقد اخر ذرة تحمل عندي، قاتلة شنو نسيتي الحقيقة انتِ؟!!

اماني: ما نسيتها بس شوفة عينك، يمكن حتى الله يريد يعاقبني وميريدني اطلع منا!

كالتها وبجت ..

ادنيت عليها كمشت ايدها وكلت واني اباوع بعيونها ..

عقاب: اطلعج منا ولله ليظل بالج

اماني: هذا عقابي الاستحقه، عوفني

عقاب: ولج اني من شفتج عرفت الدنيا متنعاف، وين تريدين تعوفيني وتروحين؟

باوعتلي بعيونها الدامعة وتمتمت ..

اماني: انت دنيتـي كلها، ما اكدر اتخيل شلون اخلص حياتي هنا بعيد عنك.. مجرد التفكير بالموضوع يقهرني ويدمرني..

عقاب: اشش كافي..
مررت ايدي ع خدها برقة ورجعت شعرها لورا اذنها..

وكملت بنبرة مطمئنة..

عقاب: حياتنا راح نخلصها بسعادة سوة.. وماكو قوة بالدنيا تكدر تسوي العكس و تفرقنا، خليها ببالج تمام؟

اماني: بس الواقع يختلف!

عقاب: عندج ثقة بيه؟

اماني:  اكيد

عقاب: لعد اطمني، اطلعج منا يعني اطلعج ماكو نقاش

طلعت من يمها ..

اني انطيتها حجاية ان اطلعها من السجن..

ولازم اكون كد حجايتي..

صار كدامي ضرغام والعقيد زيد..

عقاب: زيودي اريدك تدبرلي محامي زين

زيد: اعتبره صار

عقاب: شكرًا

زيد: لا ولو، هسة اخابره وانطي رقم تلفونك تفاهموا

عقاب: عاشت ايدك

خابره وانطاه رقمي، ادور ترخص وراح.

ضرغام: هسة شنو؟

عقاب: رح تشوف!

دكيت ع ليث..

عقاب: الوو ليث

ليث: عيونه وسنونه

عقاب: اريد الولد الي تخشخش بالبداية وعرفلنا ان الدكتورة سوت الخطا الطبي بعملية اختي

...

انتهى!

لا تنسوا التصويت والتعليق 🦋🖤

#الكاتبة نورمين