خطأ طبي «عقاب الاماني»

- ٤١ -

#خطأ_طبي «عقاب الاماني»

بقلــم : نورمين 🖤🦋

...

ابتسمت وعيوني لمعت بفـرح لمن شفت الي اجة!

ليث!!

مد راسه واختفى..

راحوا عليه وهم شايلين اسلحتهم ..

حازم: روحوا جيبولياه بسرعة!!!!

خفت عليه ليتأذى، هذا شجابه ادور جنت بواحد ادور صرت بأثنين دخيلك ربي!!!

طلعوا لبرة واجتهم طلقات وكعوا بمكانهم..

ضحكت وكلت..

عقاب: سبعـي!

باوعت لقسورة شفته مبتسم بتعب، جعدت ملامحي بتأثر ورمشتله بعيوني بنظرة هانت..

طب ليث وهو رافع مسدسين بأثنين ايديه باتجاه حازم ..

واسلحة حازم وزلمه توجهت علينا، هو خلى مسدسه براسي..

وذولاك الاثنين البقوا خلو مسدساتهم براس قسورة..

ليث: يا هلا بالشباب، شتاقيت شلونكم

حجاها ساخر وهو يباوعلنا، ابتسمنا وحازم بلش يهدد.

حازم: اي حركة غلط احسب جماعتك راحوا بخبر كان!

ليث: نفس الحجي الك، اي حركة غلط افجر مخك!

حازم: هه وحدك؟

ليث: افاا..

كالها بثقة وفجأة سمعنا صوت رصاص..

التفتت شفت ضرغام وشاهين دخلوا من ورا وكتلوا ذولة الاثنين البقوا..

وظل بس حازم وحده!

بلع ريكه ووجهه كام ينطي الوان من الخوف لان خلص تورط!!

ليث: وهسة منو لوحده؟

عقاب: حي الله الشباب!

ضرغام: اسمحلي اكلك انجب، حسابك بعدين مو هسة

هزيت راسي ضاحك، عرفت قصدهم لان مكلتلهم خابرني..

فكوا قسورة بس جان منتهي ما بي يحجي ولا يكوم..

عقاب: صايرين..

حازم: احسللكم توخرون عني وتخلوني اروح منا ترا بطلقة وحدة اخلي دم عقاب بطوله!

ليث: جان بودي اخاف واكلك لا الله يخليك بس يخي حتى من تهدد تضحك!

حازم: ما ضاحك وياك انييي!!! سوولي طريق خلي اطلع منا!

صاح بخوف، ليث يباوعله بتك عين مستهزء..

حازم واكف وراي وحاط مسدسه براسي، ما يشوفني شسوي..

غمزت لليث واشرتله بخلي يعبر..

استلم وحجة..

ليث: متفقين، بس عوف عقاب اول شي

حازم: مستحيل!! عبالكم اني زوج تضحكون عليه تخلوني اعوفه وادور تكتلوني!!!

شاهين: متاكدين منك زوج اصلا مو عبالنا

ضرب طلقة بالفراغ، ارتعدوا الولد وصوبوا اسلحتهم عليه وسحبوا قسام ..

حازم بتهديد: حجاية وحدة بعد افرغ المسدس كله براس عقاب، و اني ربحان بكل الاحوال دام اخذت روحه وحرگت روحكم!!

ضرغام: ما رايد روحك وعلي، سويها وشوف شلون اخليك تشتهي الموت ومتلكاه!!!

قهقه بسخرية ولزك المسدس براسي، دنة راسه قريب عليه وحجة وهو يباوع لليث..

حازم: وخر عن الطريق!

سويتله حركة بوجهي بمعنى نفذ كلامه، انسحب ووكف ع صفحة..

حازم: نزل سلاحك وشمره، انت والبقية هم!

شاهين: خو ماكو شي؟؟

حازم: هذا لموجود لو تحب نجرب مغامرة ثانية ها عقاب شتكول؟

تنهدت وكلت..

عقاب: ذبوا اسلحتكم متشوفوه رح يكتلني!!!

جنت احجي الحجي ليريد يسمعه حازم، بس بوجهي اغمز واسوي حركات حتى يفهمون انو هاي لعبة مني!

وصلتهم الرسالة رغم ممبين عليهم راضيين بس رضخوا..

شمروا اسلحتهم وحازم فك ايدية وادور اني فتحت رجلية بس شنو، بصعوبة كلش لان اصابع ايدي اليسرة مكسورة واي طخة بيهم اشوط من الالم..

حازم: شفت شلون الروح عزيزة؟ ههههه وقبل شوية مسويلي روحك سوبر مان ومتخاف من الموت ..

رديت بسخرية..

عقاب: وحد عنك، قبل شوية تشمر واني واني وهسة كمت تتوسل وتدور طريقة حتى بس تشرد!

حازم: انجب وامشي كدامي

دفعني كدامه بحيث ظهري مقابيل وجهه ..

عقاب: اي شكو بيها..

غمزت لليث ابتسم نص ابتسامة..

طلعنا من المعمل، والولد يمشون ورانا ببطء ..

اول ما عبرنا المدخل، حازم وكف وكلي ..

حازم: اركع وتشاهد ع روحك!

ضحكت والتفتتله..

عقاب: من كتلك اكو احلام تتحقق ما صدكتني!

حازم: شنو؟

عقاب: هاك ..

كلت هيج وركعته ع عينه، ورفعت ايده لبيها المسدس لفوك وهو كام يرمي بس الرصاص كله راح بالهوا...

الولد اجوا وجابوا اسلحتهم، حتى قسورة!!

تلاويت وياه ورغم ايدي ما تعينني بس كدرتله وذبيته بالكاع!

انكلب وجهه اصفر وكام يتوسل ..

حازم: الله يخليك لتكتلني، شتريد فلوس انطيك ولله اغركك بالفلوس واخليك تعيش ملك زمانك ومتحتاج للحجي بعد بس عوفني عايش!

دفرته ع حلكه طلع دم..

عقاب: هاي اعتبرها مقبلات، لسة الاطباق الرئيسية تنتظرك، اححححح ليلتك سودة!!

اجة قسورة حط ايده ع جتفي..

قسورة: الي نصيب هنا شريك!

ضحكت..

عقاب: كله حصتك!

قسورة: معدل!

جريناه لجوة كعدنا ع الكرسي..

ليث: ترا اني البطل هنا، احترموني شوية خلولي مجال حتى لو بوكس الله اكبر!!

عقاب: تفضل ابو بطنين

وخرت، اجة شبعه بوكسات خلة وجهه خريطة ..

رجع لورا ..

ليث: لك ولله خوش طريقة لازالة التوتر والطاقة السلبية، شاهين ضرغام تعالوا جربوا تفوتكم وعلي!

ضحكت ضحكة جبيرة وقسورة كاعد ع صفحة يباوع ومبتسم..

اجوا ضرغام وشاهين شبعوه دك خلوه جنازة، فكيتهم عنه..

عقاب: هسة صار دوري، اوكفوا ع صفحة!

شاهين: فد بوكسيين تلاثة بعد، الله يخليك

عقاب: يلا حتى ليظلن بنفسك

شاهين: عااااش

ضربه بالعشر بوكسات، كمشت ايده..

عقاب: صارن عشرة شو؟

شاهين: اعذرني تحمست

ضحكت وهزيت راسي..

عقاب: ديلا ..

راح وكف يم ضرغام، جبتلي طبلة وكعدت كدامه..

عقاب: صح النوم!

كوة يحجي..

حازم: ف..فد..وة ، خليني اروح و..ول..له ما اتقرب م..منك ب..بببعد..

رفعت حاجبي بشك
عقاب: وحق ابن اخوك؟ لو نسيته من صارت السالفة تمس حياتك الجايفة؟

حازم: م..مممم... ماريد ش..شي بعد.. بس عوفنـ..نني..

عقاب: اعوفك تعيش بس بشرط..

حازم: شتريد اني حاضر..

باوعت للولد وكلت بعدم تصديق..

عقاب: ولكم باعوا حتى كام يحجي عدل من كتله اعوفك!!

ليث: روحه عزيزة هالمطي..

شاهين: ما صدك سمعها اصلا حتى لسانه انطلق وروحه ردت!!

ضحكت وباوعت لحازم...

عقاب: تحجيلي بالتفصيل شنو علاقتك بأمير وليش حاط بالك وياي ..

هز راسه ببطء، كعدت ..

عقاب: غرد

حازم: هو كلي جنت جاي اشوف يوسف الصبح، وشفت عقاب طالع من يمه وهو يتلفت جنه بايگ بوگة وخايف احد يشوفه، من راح طبيت للبيت شفت يوسف غركان بدمه ورئسن خابرتك..

عقاب: ومن كلك قسورة انت زمال ما رضيت، يلا بلا شلون يصير الزمال بعد؟

حازم: شتريد اسوي لعد؟

عقاب: ما صفنت وية روحك وكلت خاف امير ديجذب؟

حازم: ابد، لان متاكد مليون بالمية انت!

عقاب: شفت كاميرات المراقبة؟

حازم: اي وجانت التسجيلات من قبل الحادث لحد ورا نص ساعة محذوفة

عقاب: فكلت هاي اني حذفتهن؟

حازم: اي طبعا

عقاب: اذا اكسرلك سنونك هسة، هم يجي واحد يكلي ليش؟

حازم: ترا انت جنت ع عداوة وياه، وحاط جماعة تراقبه شلون تريدني ما اشك بيك فهمني!!

عقاب: ما كتلك لتشك، بس مو هيج تمشي عالعمياوي بدون متتاكد!!!!

حازم: كلشي يأشر باتجاهك والاهم شهادة امير الي شافك بعينه!!

عقاب: بسيطة..

دك تلفون ليث فكلي..

ليث: عقاب الدكتورة تتصل..

كمت اخذته منه وطلعت برة رديت..

اماني: ليث وين صرتوا گلبي وكع، رح اموت من الخوف والقلق ولله، ليش مترد عليه صار شكد اخابرك!!!! مو كتلك كلي بكلشي يصير اول باول!!

عقاب: اسم الله ع گلبج امنيتي..

سكتت شوية، حسيت بيها دتبچي ..

عقاب: هاي هم دتبچين؟

اماني: ليش هيج تسوي بيه.. انت متخاف الله؟! ليش دومك شالع گلبي ولك!!

دنكت راسي ورديت..

عقاب: اسف وحقج ببطن عينـي ..

اماني: اسفك ميفيد!! انت كل مرة تشمر روحك بالخطر وترجع تكلي اسف، اسفك ماريده عقاب ماااريييده!!!

بجت..

عقاب: يابه مو مية مرة كايلج دموعج غالية لترخصيها لاحد!

اماني: اي بس..

عقاب: بس شنو!!

اماني: الدموع ع الغالي مو غالية وانت اغلى شي عندي بالدنيا..

تنهدت وحسيت الوجع الي بجسمي كله تبخر وطار بسبب سحر كلامها..

عقاب: ماريد اكلج يبعد روحي لان انتِ تجين قبلها، اعزج واحبج اكثر من روحي ..

اماني: خايفة عليك

عقاب: اني بخير ولله..

سمعت صوت احد يمها، ميزته وعرفت هاي اختها ريما تسأل ع قسورة..

اماني: قسورة شلونه؟

عقاب: زين زين ..

اماني: شوكت تجون؟

عقاب: فد شوية ..

اماني: تمام انتظرك..

عقاب: نامي لتنتظرين ترا الطريق بعيد ونتأخر..

اماني: عيوني متغمض لاما اشوفك واتاكد بنفسي انو انت بخير ..

كلت بمرح ينطوي عن سعادة ..

عقاب: ما ينكدرلج..

اماني: رجلي منو؟

عقاب: كافي ام لسان!

اماني: يلا لتتأخر ..

عقاب: ان شاء الله ..

اماني: احبك ..

عقاب: ولهان اني..

سديته منها واخذت نفس انعشت خلايا گلبي..

ما اكدر اوصف الحالة الي اني عليها غير بالسحر..!

شلون جنت متألم ومزاجي ضارب والدنيا مسودة بعيوني، بس من حجيت وياها اختفى كل هذا!!

لمسة سحرية حولت كل محيطات احزاني لدنيا وردية من السعادة.

رجعت لجوة، لكيت قسورة مخليهم يذبون ع حازم مي ومثبت عليه الاسلاك..

وواكف يم الجهاز مال الصعقات الكهربائية..

محجيت شي، كعدت ع صفحة وظليت اباوع شلون يكهربه وذاك يصرخ ..

من وصل لحد معين من الصعقات، حسيت حازم مراح يتحمل بعد..

كمت وخرت قسورة عن الجهاز وطفيته.

قسورة: ليششش؟؟

عقاب: رح يموت كافي عوفه

قسورة: ليش اني شريد يعني؟ هو اريده يموت!!

عقاب: تؤ.. منوصخ ايدنا بي..

اجة ليث من ورايه..

ليث: شنو معناها هاي عقاب؟ شنو منوصخ ايدنا!!

عقاب: يابة لتهجمون عليه، هو بكل الاحوال بهالنزيف وبهالمنطقة الخالية، رح يفطس حي على الصلاة!

ليث: وليش منكتله بأيدنا ونتاكد من موته!! شمعنى نعوفه هنا مدا افتهم!!

عقاب: تردون الصدك؟

كلها كالت اي.. تنهدت وحجيت..

عقاب:كلامه قنعني، اي واحد بمكانه جان سوة لسواه وعباله اني صدك القاتل!!

قسورة: صحيح بس هذا مينسيني الطريقة الي جرّني بيها من السيارة وعذبني اني وياك!

ليث: بس؟ لك كالب سيارة الحجي ومفلشها تفلش والحجي وضعه حرج، وهسة بالعناية المركزة بين الحياة والموت!!!!!

قسورة انصدم.. يمكن مجان يدري!!

قسورة: ش..شنوو!!! هاي شوكت هالحجي وشلونه هسةة!!!

ظلينا واحد يباوع بوجه اللاخ ..

قسورة: متحجون انخرستوووا!!!!!! شبي الحجججيييي!!!!!؟؟؟

شاهين: الصبح خابرت الدكتورة وكالت جايبين الحجي للمستشفى، مسوي حادث ووضعه حرج، ركضنا لهناك عبالنا انت وياه تالي ملكيناك يمه، والباقي تعرفه

قسورة: عوف هالخرط هذا كله ع صفحة، الحجي شلونه هسة؟

ضرغام: بخير ووضعه مستقر حاليًا..

رفع حاجبه بشك وحجة بعدم تصديق..

قسورة: شنو حاليًا؟؟!!!! وبعدين شيصيرررر؟

كام يصرخ والولد سكتوا..

قسورة: عقاب انت مخببببلللل!!!! مسوي كل هذا بالحجي وتريد تعوفه!!!!

محجيت شي..

قسورة: لتحجون شي، اني اروح واشوف بعيني وقسمًا بذات الله، اذا صاير شي للحجي ومتكلولي بي احرك عشيرة حازم كلهااااا!!!!

هو منا تعبان وجسمه يتراجف من الكهرباء، ادور يصيح ومتعصب صارت حالته اسوء..

عقاب: ميخالف ع كيفك ويه روحك..

جر سلاح من خصر ليث وضرب حازم بصدره وببطنه وبرجله..

صحت بي..

عقاب: لك انت شسوووويييييتتتتتتتت!!!!!!!

حط عينه بعيني وكال بنشوة الانتصار..

قسورة: فوّخت گلبي مبدئيًا، و صدكني هاي مجرد قطرة ببحر النار الي بصدري!!!

خزرته بعدم رضى، بعد اريد اخذ منه حجي ع امير وعلى مخططاتهم بس قسورة خلص عليه!!

عافني وراح، مسح شاهين وليث البصمات وضرغام طلع ورة قسورة.

رجعنا بسيارتي والاجواء مشحونة عالاخير.
ليث جان ديسوق واني بصفه، والبقية لورا.

ليث: وين رايحين؟

عقاب: لبيتي

طفر قسورة معترض..

قسورة: للمستشفى اريد اشوف الحجي!!

عقاب: بهالحالة تروحله؟ نبدل ونروح سوة

سكت وكمل ليث سياقة ..

.....

اماني

كاعدة ع اعصابي والف فكرة وفكرة اجت براسي..

اعصابي تلفت واحس بخنكة فضيعة بحيث النفس يصعب عليه اخذه..

مية مرة دكيت ع ليث يلا رد، وحاجاني عقاب..

لحظتها بس ردت روحي من سمعت صوته!

ولو بعدني ممتاكدة منه اذا صاير وياه شي ومتأذي لو لا، بس مدام سمعت صوته وتطمنت عليه كلشي يهون..

وخاف اني ناقصة وجع گلب، اجتني ريما !

من العصر درت بالسالفة، خابرتني وحجيتلها فأجت وظلت تاكل بروحها على قسورة.

وكلما اتفائل شوية تذبلها قنبلة تخليني اركع راسي بالحايط..

ريما: يعني انتِ متاكدة هو كلج زين؟

اماني: مو سمعتي بأذنج من كال قسورة زين!!!

ريما: اي بس خاف يجذب علينا، خاف قسورة بي شي، عفيه اتصلي خلي اسمع صوته

اماني: دا اتصل وميردون

ريما: ولج خاف كمشوهم مرة اللخ!!!

اماني: لا ممعقولة!!

ريما: اي لعد شنو، وينهم لسة وليش ميردون ع تلفوناتهم!!! اكيد كمشوهم جماعة هالنذل هذا يا الللللللههههه!!!

لفيت ايدية ع راسي وكمت اهز بجسمي بتفكير..

معقولة كلام ريما صحيح؟

لا لا عقاب كال كلشي تمام ورح نتاخر ..

ورة نص ساعة تقريبًا..

خابرت ماما عليها..

ريما: لا ماما ماكو شي بس مشتاقة لمون ورح ابات يمها

سما: شعدج بايتة ما كفاج من العصر لسة يمها؟ هسة ادزلج ريان يجي ياخذج عيب شعدج ظالة ببيتهم

ريما: لتجيبي وتتعبين روحج وتتعبي وياج، ما اجي يعني ما اجي

سما: وج يمه عييب!! شسوين بين رجال ومرته بايتة وبيتهم اصلا صغير وين تنامين بنصهم؟!!

ريما: لو انام بالحمام هم مارجع، ديلا

سما: بسيطة اني الج، يصير خير

ريما: يي خوش

سدته بوجه ماما، حجيت عليها ..

اماني: شنو هالاسلوب السز وية امج ؟

ريما: اني وامي معليج

اماني: ريما اعقلي مو زعطوطة انتِ، اكو وحدة بعمرج تحاجي امها بهيج اسلوب!!!

ريما: اكبر جاهلة وزعطوطة اني بس عوفيني..

تحجي وتهز برجليها بعصبية..

اماني: محسوبة علينا مرة وانتِ كلشي ماكو!

صاحت بيه وحجت بطريقة خلتني موسعة عيوني بذهول!

ريما: كافي عاااد!!!!! اني وين وانتِ وين، گلبي رح يوكف من الخوف ع قسورة وما اعرف شحاله هسة، ولا اعرف اذا ممكن يرجع سالم اصلا!! وانتِ حايرة بأسلوبي!  وامج حايرة بالعيب والفشلة!!!

اماني: وشبيج انهديتي!

ريما: حتى تسكتين عني!

مر الوقت وهم لسة ماكو مالهم اثر..

كمت افكر بكلام ريما، خاف صارلهم شي خاف لزموهم مرة لخ خاف خاف خاف ...

الف شغلة وشغلة اجت براسي!!

ادور اتصل ع ليث ميرد، ع شاهين هم ميرد شون مشكلة هاي يالله!!

ريما: اذا متخابريهم هسة اروح ابلغ الشرطة

اماني: خبلة انتِ تريدين تكبريها فوك ما هي جبيرة!!!

ريما: معليه لوين متكبر خ تكبر رح اطك من الانتظار!! ماكدر اظل كاعدة وساكتة اكثر من هيج

اماني: اوكفي خلي ادك هالمرة ونشوف

دكيت ع ليث، رفضه..

ريما: ها؟

اماني: ليث رفضه!

ريما: شكتللججج مو كتلج لازميهم!!! ما صدكتيني وخري

اخذت جنطتها وطفرت تلبس جاكيتها..

اماني: وج مخبلة انتِ وين مولية بهالليل!!!

ريما: اي تخبلت وعقل مظل براسي، خلي نبلغ الشرطة حتى هم يتصرفون لوين نظل ننتظر!

اماني: وشعندج بالمراكز ولله اذا سمع بابا يموتج، ولج تعاااي

اصيح وراها وهي ماكو، فتحت القفل مال الباب و لبست حذائها..

وهنا جانت الصدمة، رجعوا الولد كلهم!

ظليت واكفة بمكاني ومن الفرحة ابتسمت وعيوني دمعت..

ليث: يصير نطب لو لا؟

حجه هيج لان ريما جانت واكفة وسادة الباب محد يكدر يعبر..

ابتعدت عن الباب وعيونها تحجي مدى لهفتها ع قسورة..

الي بس شافها دار وجهه عنها..

جانت حالته تعبانة لدرجة مبين معذبينه، ريما تباوعله وعيونها تجري بصمت..

طبوا الولد وعقاب اخير واحد جان، ركضت حضنته..

عقاب: زحمة من الولد ولج..

حضنته اقوى..

اماني: البيت بيتي والرجال رجالي شسويلهم!

ضحك ووخرني عنه، طخيت ايده تأوه بألم..

عقاب: اااه..

باوعت ع ايده شفتها زرگة، والاصابع منفوخة مزورگة!!

اماني: هايشنوو عقاااب!!!!!

عقاب: ع كيفج ماكو شي، سهلة..

اماني: يا سهلة هاي اصابع ايدك مكسورة!!

جنت احجي بخوف واندفاع، هز راسه ونظراته لطيفة يحاول يطمئنني بس وييين اني روحي راحت ع المنظر الشفته!!

قسورة: ضمديهن شو شتسويلهن دكتورة، لتمشين بحجيه هذا حتلو يتوجع يكابر ..

عقاب: انت بالذات تسكت!

قسورة: يي ميخالف

درت وجهه عليه وحجيت بجدية..

اماني: ترا ابد مو لعبة الموضوع، تدري اصابعك اذا عفتهم هيج يصير بيهم غرغرينا وساعتها ايدك كلها تنكص!!!

ليث: اوووتش طلعت تخوف السالفة

اماني: شعبالكم لعد!

عقاب: ميخالف، خلي ابدل وعود ضمديها شو شتسويلها

اماني: هاي تحتاج مستشفى، ماكدر هنا بالبيت اسويها!

عقاب: ميخالف، احنه اصلا بس نبدل ونطلع للحجي بالمستشفى.

ظليت واكفة مصدومة..

اماني: انتو صدك تحجون يعني!! جايين من الموت وحتى راحة ماكو!

عقاب طبطب ع كتفي وراح..

مشيت يمهم..

اماني: معرفتوا توكفوا تكلوله ارتاح وبعدين روح للمستشفى!

قسورة: لا احنه ولا انتِ، ولا اي احد بالدنيا ممكن يوكف ابن عن شوفة ابوه، خليها ببالج ..

تنهدت بقلة حيلة.. نسيت هم شلون يفدون الحجي بروحهم اذا احتاج الموقف..

عقاب سبح وكمل، ادور جاب من ملابسه لقسورة، سبح وبدل لان ملابسه كلها دم ومشككة وحالتها حالة.

بالغرفة، جنة اني وياه..

اماني: انت ليش متبطل تخوفني عليك، شتسوي اذا وكف گلبي من وراك فد مرة؟

باس ايدي وباوع بعيوني وكال بنبرة هزت گليبي..

عقاب: اسم الله ع گلبج، يومي قبلج ..

حطيت ايدي ع حلكه وحجيت مقاطعة كلامه..

اماني: اششش لتحجيها حتى .. ما اتحمل اعيش بدونك ما اتحمل يصيبك اذى، اموت ولله!!

ابتسم بحنية وكوّر وجهي بأيديه -خلا ايديه ع خدودها- ..

عقاب: اني الي ما اتحمل اعيش بدونج، صدكيني قبلج ميت جنت.. انتِ رجعتي عيّشتي مشاعري واحاسيسي الميتة كلها، بالضبط مثل صدمات الانعاش الي ينطوها لشخص فارق الحياة ويرجع يصحى..

اماني: هو شنو ليشفعلك بگلبي غير لسانك المعسول هذا وحجاياتك الحلوة هاا؟!!

ضحك وحضنني بقوة..

اماني: ع كيفك ايدك تتأذى..

عقاب: لتخافين استخدمت بس وحدة..

وخرت عنه وحجيت بتعجب..

اماني: وحدة وهلكد قوي؟

عقاب: كولي ما شاء الله!!

ضربته ع جتفه..

اماني: ديلا علساس احسد اني..

عقاب: شمدريني متطلعين صدك حاسودة؟

اماني: عقااب!!!

عقاب: اشاقة اشاقة ههههه..

اماني: شقاك صاير ماصخ حيل!

كرص خدودي وباسهن..

ظليت فاكة عيوني مصدومة، هاي اول مرة يسوي هيج!

عقاب: مشايفة روحج شون تصيرين تنوكلين من تعصبين، اووف صددقةةة لالله!!

عافني وراح حط عطر، واني ع نفس الوكفة وبعدها الصدمة مسيطرة عليه..

عقاب: ها وكفت الصورة؟ الوو يحـلو؟!

فزيت من صفنتي..

اماني: ها حبيبي؟

عقاب: عيونه انتِ، طالع ديري بالج ع نفسج وسدي الباب زين ورانا

هزيت راسي واحس خدودي صايرات اقراص حمر من الخجل ..

عقاب: افدي الخجلانة..

اماني: كافيييي!!

صحت بي، ضحك وطلع ولحكته..

شفت ريما واكفة ع صفحة هي وقسورة يحجون ووجهها ميبشر بخير..

بس شافونا قسورة وخر عنها وهي دارت وجهها، الظاهر دتبجي..

كلت خ يطلعون وافتهم منها شصار مصار ..

وصدك طلعوا وقفلت الباب وراهم ورجعتلها..

جانت كاعدة عالقنفة وتهز برجليها بتوتر ودموعها متجمعة بعيونها، اول مرة اشوف اختي بهيج حالة!!

كعدت بصفها وحجيت باهتمام ..

اماني: شبيج ريري شصار؟

باوعتلي وبجت..

زاد خوفي وقلقي ..

اماني: ولج شكو ليش دتبچين!!

.....

عقاب

طلعنا للمستشفى وضرغام هو الي ديسوق هالمرة..

سئلت بفضول..

عقاب: من الخبصة نسيت اسئلكم، شلون لكيتونا؟

قسورة: اي صحيح شلون!
شاهين وضرغام باوعوا لليث، الي سوة حركات غرور بوجهه ..

ضرغام: سولف ابو الليوث!

ليث عدل بياخته وحجة..

ليث: شفتك تخابر بالمستشفى ومعصب، ومن سئلتك نكرت وحسيتك مو طبيعي، لحكتك لحدما تيهتك بين الفروع وظليت اتلاطم، ابو التكسي كال ما اكدر اعبر اكثر، نزلت منه ودبرتلي دراجة، وكوة حصلت شبكة وكدرت اخابر لضرغام، اجاني هو و شاهين وجابوا اسلحة من بيت عقاب بمساعدة الدكتورة طبعا واجيناكم!

قسورة: ووينها الدراجة شو مشفتها؟

ليث: بنچرت بالدرب وشمرتها

قسورة: وشلون وصلتولنا؟

ليث: الله المن انطانا رجلين؟ ركض ركض

ظليت اباوعله ومبتسم ممصدك الخبال ..

عقاب: ترا انت فد شي!

ليث: اعرف!

عقاب: جاملني ع الاقل يا اخي! كول شكرًا مثلًا!!

ليث: ديلا شكرًا..

عقاب: خاف صارت زحمة

وصلنا للمستشفى، قسورة تخبل من شاف الحجي نايم بالعناية المركزة، بس الممرضة كلتلنا كعد قبل فترة وضربوا مهدئ وانطوا علاجه لذلك نايم بعمق هسة وان حالته هسة احسن.

ظل كاعد يمه شوية واحنه برا..

طلع ورة وقت، شافني ع نفس الكعدة.

قسورة: متكوم؟

عقاب: وين؟

قسورة: ايدك لو نسيت!!

عقاب: هاا اي ..

قسورة: يلا تحرك

عقاب: شوية واكوم

جرني من ذراعي الثانية ..

قسورة: كتلك كوم، ما ناقصنا ناس معورة ومفشخة بعد خلص وظل كاعد للصبح

مشيت وراه، رحنه للطوارئ لكينا دكتور موجود.

حجيتله الحالة وبلش يشتغل.

- تتحمل اعدل اصابعك قبلما اصبهن لو اخدرك؟

عقاب: عليمن تخدر، اشتغل كبل يابة

-تمام

عدلهن واني احس روحي شاغت..
وجع مو طبيعي ولا يكلك اصابع هلكدوتهن!!!

كوة كاتم الصرخة ووجهي كله صار احمر وعروكي برزت..

قسورة حاط ايده ع جتفي كنوع من الدعم النفسي..

ما صدكت يخلص!

علگ ايدي برگبتي..

عقاب: هايشنو ماريد هيج!

-للاسف ميصير الا هيج حتى ميتحركن ويرجع العظم لوضعه الصحيح

قسورة: معليك بي دكتور كمل شغلك..

استغفر الله شلون بلوة، ادور احس روحي عاجز وايدي برگبتي!!!

-كملت وهذي العلاجات جيبهن من برا، مموجودات هنا بصيدلية المستشفى

قسورة: عاشت ايدك تعبناك

-ولو واجبي..

راح واني حركت ايدي شوية

قسورة: اكومك؟

عقاب: احد كلك رجلية مكسرة؟

قسورة: طبك مرض ردت اساعدك عود

عقاب: ميحتاج ..

كمت وياه طلعنا للحديقة ..

الهوا حلو والجو دافي..

قسورة خلصها يتنهد، عرفت بي ضايج ع سالفة ريما.

عقاب: ليش جانت تبجي؟ شكلتلها ولك؟

باوعلي وسكت..

ادور ابتسم نص ابتسامة وكال..

قسورة: كلتلها بخير

رفعت حاجبي بشك، ممصدك بس هاي!

عقاب: بس؟؟

قسورة: لاا، يعني جان اكو حجي بعد..

عقاب: دسولف!!

قسورة: اا تمام ..

من بدلت وطلعت من الحمام، جانت واكفة يم الباب..

من شفتها درت وجهي مردت احجي وياها، هم لان مواقفها لسة يدگن بگلبي وهم لان اخاف ائذيها بكلامي لان اني مجروح منها..

ريما: قسورة لحظة!

وكفت بس مباوعتلها، ظليت داير وجهي ع صفحة..

ريما: لهدرجة كارهني؟ حتى بوجهي متباوع؟!

قسورة: وهاي باوعت، تفضلي شعندج

ملامحها اتجعدت بحزن من سمعت نبرة صوتي الباردة ..

ريما: انت زين هسة.. خو ما متأذي هواي؟ سمعت الولد يكولون كهربوك..

ابتسمت بحسرة نص ابتسامة..

قسورة: لو شايليني فلقة هم مراح اكون متأذي، بكد ما اذيتيني انتِ!!

نزلت دمعتها.. اخذت نفس وكملت بگلب محروگ..

قسورة:  يمكن الجروح الي دتشوفيها بوجهي وجسمي بنظرج توجع، بس صدكي هاي لا شيئ مقارنة بألي هنا -اشرت ع گلبي-، وهاي الجروح الظاهرية توجعنا لفترة وبعدها تشفى وتختفي، بس الجروح الي بالگلب هاي بيش نداويها؟!

ريما: كـ..افي..

رفعت تك خد بسخرية..

قسورة: كافي هه؟!!! اني هم هواي كلت كافي، تتذكرين؟! سمعتيني يا ترى؟ لو ظليتي راكبة راسج ومستمرة بعنادج؟

دنكت راسها، لعبت بأيديها بتوتر وهي تحاول متبجي، الولد شافونا بس غلسوا وداروا وجههم، وللصراحة ما اهتم اذا سمعوا كلامنا او لا، لان بكل الاحوال حرجع احجيلهميا.

ريما: واذا كتلك اني اسفة؟ قسورة اني حابة نطوي ذيج الصفحة و نفتح صفحة جديدة، تسامحني؟

باوعتلها مطولًا، توقعتها تحس وتعتذر من تعرف شنو خسرت بس گلبي قسى..

قسورة: واذا اكلج الصفحة الي طويتيها جانت اخر صفحة بدفتري؟

سكتت وعلى عيونها نظرات خائبة ..

قسورة: متوقعتي أرد اعتذارج وطلبج مو؟ هه.. شفتي شلون انتِ ضامنتني حتى بهالموضوع؟

ريما: اي اني ضامنة حُبك الي وهالشي مو غلط!

قسورة: صح مو غلط، بس الغلط من تستخدمين هالضمان ضدي وتدوسين ببطني وترجعين تكولين اسفة ومكيفة بروحج ضامنة مكانتج بگلبي!!

ريما: شنو معناته هالحجي هسة؟ قبلت اعتذاري لو لا!

قسورة: تعرفين كمية الخيبة الي تجي من تنكسرين من المكان الوحيد الي آمنتي بي؟!

بجت وعضت ع شفايفها بمحاولة لكبت دموعها..

ريما: بس اني ما استاهل كل هالقسوة منك!

قسورة: اااه... روحي باباتي ما اريد ائذيج اكثر بكلامي ..

ريما: انت مو قسورة الحبيته!

رمشت بصدمة.. اول كلمة حب تطلع منها!!!

رغم كمية الزعل الي بيننا بس گلبي رجفلها..

حتى بهيج حالة متكدر تلزم روحك يگلبي؟!

قسورة: شخسرانة لو كايلتلي هالحجاية من قبل؟ جان كل هذا ما صار!

ريما: مكدرت..

قسورة: للاسف.. تأخر الوقت!!

ريما: ويعني؟؟

قسورة: انتهى يعني انتهى يابة ..

رجعت تبچي وادور انتوا اجيتوا، والباقي صرت تعرفه..

عقاب: ما اعرف شكلك بس انت بالغت..

قسورة: يجوز، بس اني امشي ورة گلبي، شوكت ما كلي انت غلط سوي الصح اسوي.

عقاب: وكلبك هسة ديكولك ع هالتصرفات صح؟

قسورة: اكيد

عقاب: ريما خوش بنية ترا!

قسورة: بت روحي هاي واعرفها كلش زين، مو انت لتكلي هالحجي عقاب!

عقاب: لعد شبييييك!!!

قسورة: متأذي، مخذول، تعبان وهيج شغلات سخيفة ..

عقاب: انجب انجب، ريما صح غلطت هواي بس عرفت غلطها واجت اعتذرت، والي يحب يسامح ويغفر لحبيبه، يحتاج اكلك شكد جفصت ببطن الدكتورة ومع ذلك ما تركتني؟!!

قسورة: انتوا وضعكم يختلف، لتقارن ابد.

عقاب: بكيفك بعد لعليه كتلك

قسورة: تسلم يابة ..

....

اماني

ظليت للصبح كاعدة منمت ابد..

ريما غفت ع نفسها من التعب والبجي، حجتلي الصار بينها وبين قسورة وكلش ضجت عليها ..

مكدرت اغفى وعقاب ماكو ..

رجع ب7 الصبح..

شاف ريما ..

اماني: نامت من التعب..

عقاب: حجالي قسورة الصار

اماني: اي الله يهدي النفوس

طبينة للغرفة..

عقاب: امين، انتِ ليش منمتي؟

اماني: بالي يمك

اشرلي بأيده المعلگة بركبته..

عقاب: هاي صبيتها، شتريدين بعد؟

اماني: سلامتك..

جرني من خصري عليه، شهكت بصدمة..

اماني: ولا تكول مريض! انتبه لحركاتك!

عقاب: لتظلين خايفة عليه..

اماني: ليش شعندي غيرك اني احبل اجيب؟

رفع حاجبه وابتسم بخبث..

عقاب: متأكدة؟

وهنا حسيت ع الجفصة لجفصتها..!

...

انتهى!

لا تنسوا التصويت 🦋🖤

#الكاتبة نورمين