خطأ طبي «عقاب الاماني»

- ٣٨ -

#خطأ_طبي «عقاب الاماني»

بقلــم : نورمين 🖤🦋

...

ضحك عقاب، باوع للدكتورة الي ابتسمت وكال..

عقاب: اي يابة هيج تبدي، حلوة وعاجبتني وتالي توكع وفنه ليكومك بعد ..

بلعت ريكي بتوتر، الشغلة متبشر بخير وذولة خوفوني..

حُب ايش من اول نظرة واول لقاء؟

ما اصدك بهالنوع من الحُب اني.

بس الي دا احس بي غريب، يناقض طريقة تفكيري تمامًا ..

وينّي وينه واني اقصى اهتماماتي بطني!

...

قسورة

راحت اميمة للحمام وريما تحركت واجت يم اختها..

شوية وعقاب والدكتورة راحوا لأم جنات صاحتلهم، فظلت وحدها.

وكفت وراها وهمستلها ..

قسورة: هلاو يحلوة..

اندارتلي بتفاجئ لان طلعتلها بدون متحس عليه.

ريما: خوفتني!

قسورة: اسم الله عليج

ريما: شتريد؟ مو جنت يم ليث شوكت اجيت شو ما حسيت عليك؟!

قسورة: اريدج..

سكتت والخجل بيّن ع ملامحها خاصة بعدما نظراتي بلشت تتفحصها بدقة.

ريما: لتباوع هيج!

قسورة: شلون اباوع لعد؟

ريما: مدريني بس مو هيج

قسورة: هو شنو الهيج؟

ريما: هيج يعني بهالطريقة ال... ال...

متعرف شتحجي، كملت عنها واني ضاحك.

قسورة: بهالطريقة الحلوة قصدج مو؟

ريما: اا لا اكيد منيلك

قسورة: بس عيونج متكول هيج!

ريما: شتكول لعد؟

قسورة: تكول قسورة لتباوعلي هيج ترا دا اتوتر ونظراتك خربطت حالي..

سرحت شوية، ادور ابتسمت بطواعية.

حطيت ايدية بجيوب بنطروني وغنيتلها ..

قسورة: هذا اللون عليك يجنن يشبه لون عيونك ..

باوعتلي وعيونها تلمع..

قسورة: نظرات العالم متطمن، احذر ليحسدونك!

ريما: لتخاف عليه شايلة سبع عيون، هاك شوف

وخرت شعرها لورا، برزت ركبتها والكلادة الي بيها، ام سبع عيون بس اني راح تركيزي لغير شي وصفنت..

من لاحظت شرودي، رجعت شعرها وحجت بارتباك..

ريما: اني رايحة

دتمشي وكفت كبالها ساد الطريق.

قسورة: وين؟

ريما: اشوف اميمة وين صارت شو تأخرت

قسورة: وشعليج بيها؟

ريما: ه..هو شنو شعليه شو دوخر

دفعتني وراحت، ابتسمت واني اباوعلها شون شردت من الخجل..

احلى شي بيها، من تكون ام لسان بس يمي تتوتر ومتعرف تحجي حجايتين ..!

باوعت، شو ليث ماكو!

وين راح مو هستوه جان هنا؟!

....

ليث

كلمن وية الكبل مالته واني صفيت وحدي ..

شفت اميمة راحت للحمامات، مادري شلون رجلية اخذني لهناك وراها..

واكف انتظرها شوكت تطلع، بس بيني وبين نفسي ماعرف شنو اريد ولا شنو اكول الها!

حكيت لحيتي بتوتر..

شلون هزتني هالبنيـة واني الي ميهزني غير طاري الاكل!

طلعت من الحمام، انصدمت من شافتني بس تداركت نفسها ودارت وجهها عني دتروح..

ليث: انتظري لحظة!

لحكتها ووكفت كدامها وكلت..

ليث: اني ليث

جانت تباوعلي بطرف عينها ومعاجبها ..

اميمة: اي وشسويلك؟

ليث: متريدين تكليلي شنو اسمج؟

اميمة: لا

كالتها بحدة ورادت تمشي بس رجعت صرت كبالها ومنعتها..

اميمة: هيي انت شبيك شتريد؟!

ليث: رح اغلس ع الهيي وارجع اسئلج، شسمج؟

اميمة: وانت شعليك؟ وخر لا اصيح والم عليك القاعة كلها!

ليث: عنيفة كلش اميمة!
حجيت بمرح، عكدت حواجبها بفضول..

اميمة: منين تعرف اسمي؟

ليث: مصادر خاصة

اميمة: ليش سألتني اذا انت اصلا تعرفه!

ليث: ردت اسمعه بلسانج ..

ضيقت نظراتها وكالت بحدة..

اميمة: ما احب هاي التصرفات ابد، للان دا اتصرف وياك بأدب، وخر من طريقي احسن ما اشوفك وجهي الثاني

ليث: شنو حتمسحين مكياجج؟

خزرتني وكالت ..

اميمة: سخيف!!

راحت واني واكف بمكاني اباوعلها واضحك..

رجعت لكيت قسورة بوجهي..

قسورة: وين رحت، درت وجهي دقيقتين عنك رجعت ما لكيتك

ليث: متاكد دقيقتين؟

حك راسه وضحك..

ليث: ها سكتت؟

قسورة: يخوي انسى روحي واضيع الوكت يمها

ليث: چني وكعت

قسورة: وين وكعت؟

ليث: هناك
اشرت ع المكان الي واكفات بي اميمة وريما والدكتورة، باوعتلي اميمة بخزرة لان انتبهت دا ائشر يمها ..

قسورة: كدامهن وكعت؟

هزيت راسي مبتسم وكلت ..

ليث: كدامكم كلكم، مو بس كدامهن

عكد حواجبه بعدم فهم.

قسورة: حبيب انت شارب شي؟

ليث: يخوي شبيك فصلت، اقصد وكعت بالحُب!

قسورة: احااا هنا الحجي

ليث: ايي ولك..

تنهدت واني اتذكر الموقف..

قسورة: شوف هاي الاييي ولك والحسرة الطلعت منك وراهن شي، سولف شصار؟ حجيت وياها مو؟

هزيت راسي وحجيتله شصار ..

ضحك وكال..

قسورة: ولك انت مثليييي!! من اول نظرة تصوبت ووكعت

ليث: بالضبط!! بس شلون اني لسة ممستوعب الصار! 

قسورة: عادي اني هم ما استوعبت بالبداية، شوية شوية صار الوضع يتوضح يمي وعرفت بروحي حابها

ليث: بس قسورة انت تختلف عني!!

قسورة: بشنو؟؟

ليث: بحبي للاكل، انت تدري بيه ما عمري حبيت غير امي والاكل، شلون هاي اجت وطبت لكلبي دون استئذان؟

قسورة: عالاقل انت جنت تحب، اني مجنت احب ولا اعرف شنو يعني حب الا لما عرفتها..

ليث: هيج رايك؟

قسورة: اي حبيب

صفنت بتفكير ..

...

اماني

الحفلة جانت كلش حلوة والاجواء هم تجنن ..

العرسان طايرين من الفرح و كلش لايكين سوة.

واني وعقاب ظلينا نروح منا ونرجع منا وكلشوي نسلم ع احد لو نتلقى طلبات شكل.

حسيت روحي ام البنات وهيج عليه خبصة.

عقاب جان عادي ومتونس.

اماني: ما تعبت؟

عقاب: لا بس انتِ انتهيتي يمكن ..

ضحك عليه واني تنهدت وكامشة رجلية ..

اماني: متت من الكعب رجلية مدا احس بيهن!!

عقاب: ليش لبستي لعد اذا هيج يكسرج؟

اماني: غير حتى اوصلك، شيصير لو انت اكصر بفد 15 سانتيم جان ما لبسته

عقاب: لا بلا؟

اماني: اي لعد شنو، غير بدونه اوصل لبطنك ونصير چنة رقم عشرة!!

حجيت هيج وهو غص بالضحك ..

اماني: اضحك اضحك هو انت شكو عليك، طويل ما تحس بمعاناتي

عقاب: ترا انتِ مو كصيرة، طولج وسط وكلش حلو

اماني: اي ادري بس يمك اصير چني دبة طرشي

عقاب: استلم هههه، ولج يابة احلى شي بالبنية يكون طولها وسط، ومن توكف يم زلمتها اكو بينهم فرق طول

اماني: هاي عندك، عندي يختلف الحجي

عقاب: بس اني مقتنع بيج بهالطول!

اماني: عوزك ولله متقتنع!

عقاب: ادور؟

اماني: ولله لعد شنو، ترا انت اطول من اللازم جنك عامود ما شاء الله

عقاب: رحم الله والديج

اماني: ووالديك حبيبي بس لتضوج، ترا هاي الحقيقة

عقاب: اي ميخالف، بس حجاية عامود اعلمج عليها بعدين

اماني: اهوو حسرة عليه احجيلي حجاية وياك لو اشاقة

حجيت بضجر، جرني من خصري عليه ارتعدت، العالم كلها هنا شو هذا بايع المستحة..!

عقاب: لا مو حسرة، بس ليدك الباب يسمع الجواب

اماني: دوخر ايدك عيب منا العالم

عقاب: مرتي وبكيفي، العالم شعليها؟

اماني: تمام معليها، اني استحي هيج وخر حباب

جر ايده مني، اخذت نفس ورحت كعدت ع صفحة.

كعد كبالي وخلى ايده جوه حنجه وظل يباوعلي ..

اماني: جماعتك هناك ليش متروح يمهم؟

عقاب: ماريد

اماني: ل..ليش غير تشاركهم فرحتهم؟

عقاب: ماريد

اماني: علكت حبيبي؟

عقاب: تؤ.. صافن بالجمال، خليني مندمج ليش تقاطعيني؟؟

اماني: العفو عيني، استمر

حجيت ودرت وجهي عنه بتوتر..

نظراته توترني والطريقة الي يسند بيها حنجه فوك ايده ويصفن بيه، تزيد ارتباكي وتوتري!

اجتي ريما ..

ريما: تعالي نركص، عوفي عقاب عاد مشبعتي منه

عقاب: شو الحجي صار كدامي؟

ريما: ديلا نسيبي اسمع منا وطلع منا

كمت وياها، صاحلي عقاب رجعتله..

عقاب: مو تهزين ترا ما اقبل!

اماني: لتخاف هي بس شدة يا ورد ونحط العرايس بالنص وهذا هو

عقاب: عفية بنيتـي

ابتسمتله ورحت..

وكفنا بشكل دائري وخلينا جنات وميقات بالنص..

وسوينا شدة يا ورد وعالكين اغاني وهن يفترن بالبدلة عالواكف..

لان اعتيادي عدهن توصيات عُليا من الحكومة، مثلي!

بس ريما جانت تركص ومدايرة بال لاحد..

قسورة تخبل واجة جرها طلعها ..

خطية يغار وهي تعانده هههه..

تونسنا وضحكنا هواي، ادور اجة وقت رقصة العرسان.

ميقات وشاهين، جنات وضرغام..

كلش حلوين والفرحة مبينة بأبتساماتهم الي مزينـة وجوههم بعرض.

جنت اباوعلهم ومبتسمة، انداريت باتجاه عقاب لما كال..

عقاب: شكد حلوة ضحكتج امنيتـي!!

اكتفيت برسم ابتسامة..

كام ومدلي ايده، وسعت عيوني بصدمة ..

عقاب: تسمحيلي برقصة دكتورتـي؟

ضحكت بعدم تصديق، كمشت ايده وكلت..

اماني: اكيد عقابـي

كمت وياه، ركصنا يم الطاولة مالتنا.
مرحنه يم العرسان.

ايديه حاوطت خصري..
وايدية لفيتهم داير مداير ركبته..

فرق الطول الي بيننا، جبرني ارفع راسي..
لحتى تتلاكة عيوني بعيونه..

عقاب: انتِ احلى بنية شافتها عيني ..

اماني: احبك هواية يا عمري..

عقاب: انتِ الي عمري.. انتِ احلى شي صار بعمـري! اصلًا يكفيني من هالعيشة انو دخلتي حياتي وصرتي الي..

اماني: يكفيني من الحياة انو انت نصيبـي ورجالـي..

عقاب: ضوة روحـي اني مستعد اصيرلج كلشي تتمنيه وتحلمين بي ..

اماني: متأكد؟

عقاب: طبعًا

اماني: امم مثل شنو، شتكدر تصيرلي؟؟

عقاب: اصيرلج گلب تعيشين من خلاله.. ضوة ينورلج طريق حياتج .. روح واخذ كلشي متعبج ومضوجج وابعده عنج، اصيرلج كلشي ممكن تخيليه وراح اظل احبج لحد اخر نفس اتنفسه ومراح اعوفج لو مهما صار، لان اني حبيتج من اعماق گلبي ..

ابتسمـت ودفنت راسي بصدره بخجل..

ماعرف شنو اكول، حجة كلشي ممكن ينكال..

وادور نظراته الي وترتني، فشردت منه اله!

...

قسورة

عقلي وكف من شفت الاخت تركص ولا هامها شي!!

جريتها من نص البنات واخذتها لنهاية القاعة، جان مكان هادئ وبعيد عن هوسة الاغاني.

حجيت بغضب..

قسورة: انتِ ناوية تخبليني؟؟ شوكت تحطين عقلج براسججج؟؟

ريما: شدعوة عليك هو اني شسويت؟!!

قسورة: هذا كله وشسويتي!!!

اخذت نفس هدأت روحي وحجيت بهدوء..

قسورة: لا تخليني اتندم لان حبيتج، تصرفات الطيش هاي انسيها خلص راح وكتها! وياج رجال مو رجل كرسي لا احساس ولا شي، دتفهميني؟؟

ريما: اصلا تعرف، هذا اكثر شي يخليني اتردد ارتبط بيك!!

قسورة: نعم؟

ريما: اطباعك وطريقة تفكيرك القديمة هاي!! اصحى ترا احنه بالقرن 21 والحياة تغيرت والناس هم تطورت!

حجيت بسخرية ممزوجة بالخيبـة ..

قسورة: لان ماريدج تركصين كدام العالم صرت دكة قديم ومتخلف؟

ريما: اني مكلت متخلف..

قسورة: بس هذا الي قصدتي بكلامج!

ريما: لا، اني ردتك تغير طريقة تفكيرك علمودي، انت مو تحبني؟ ليش متحاول تتفهمني؟ قسورة اني تعبت اتخلى واتنازل عن امور هواي بحياتي بس حتى ارضيك!! اصدقائي ابتعدت عنهم علمودك، تصرفاتي غيرتها وعلاقاتي محدودة، حتى لبسي كمت تدخل بي، وهسة بطريقة تعبيري عن الفرح صرت هم تدخل وتعترض؟؟

قسورة: اي صحيح كلامج ليحب يتنازل هواي لخاطر ليحبه..

ريما: اذا تعرف هالشي، ليش متطبقه؟ مو عدل اظل بس اني اتنازل!!

قسورة: حقج.. انتِ ممجبورة تتنازلين لخاطري، تكدرين تسوين ليريحج يابة واني اسف اذا تدخلت بشي ميخصني

حجيت بهدوء، كلامها خدش كلبي بقسوة..
حسستني انو بس هي الطرف الوحيد المضحي!

سكتت وباوعتلي بعيون دامعة..

ريما: من كل الي كلته، هذا بس الي وصلك؟ قسورة اني قصدت انو احنه لازم نتقبل بعض بأفكارنا ومعتقداتنا وطريقتنا المختلفة بعيش الحياة، مو نظل ننفر من بعض ونتعارك عالرايحة والجاية، اذا من هسة نتعارك، اذا تزوجنا شلون؟

قسورة: زواج ايش.. اذا ع كولتج من هسة وهيج حالتنا، عليمن نورط روحنا بزواج ومحتمل اطفال؟ شنو ذنبهم، فالاحسن كلمن يعيش حياته مثل ميريد وية الشخص الي يشبه تفكيره وابوك الله يرحمه..

هزت راسها بعدم تصديق وحجت بحدة..

ريما: اهاا، انت هيج تشوف؟؟

قسورة: اي نعم

ريما: هذا هو لعد، اعتبر كلشي بيننا انتهى

ابتسمت بسخرية.. انتهى؟

قسورة: ليش هو شنو الجان بيننا؟؟ علاقة؟ هه.. الوضع الي وصلناله اليوم سببه اني.. مو يكولون كلشي يزيد عن حده ينكلب ضده؟ هذا الصار ويانه!!

ريما: مدا افتهم شتقصد؟

قسورة: الوفرة بالحب والاهتمام الي قدمته الج، وصل لمرحلة مُذلة لدرجة كمتي تسترخصين مشاعري وحُبي، ماعرف ليش انتوا البنات من يحبكم شخص بصدق يعجبكم تذلوه وتشلعون گلبه، لا وتستمتعون بتعذيبه!!

حجت بصدمة..

ريما: يعني انت هيج شايفني؟؟؟

قسورة: بالضبط، واكثر همين .. من يوم الي دريتي بحبي وانتِ متفوتين فرصة تتدلعين بيها وتعانديني حتى تحركين كلبي، ماعرف منو لكلج هالشي حلو او حيزيد حبي الج!! وكل هذا الي تسوي بس لان ضامنـتني، ضامنة حبي الج تكولين اي عادي شما سويت يسامحني فلهذا مستغلة الوضع ومحاسبتلي حساب، بس خلي اكلج شغلة مهمة.. كلشي عشناه لليوم جان من طرفي اني وبس!! لج انتِ كلمة احبك للان ما كلتيها!!!! هه وبكل عين صلفة تكليلي كلشي بيننا انتهى؟؟؟

ضحكت بسخرية وكملت بكلب محروك...

قسورة: اني الي اقرر شوكت ينتهي مو انتِ! لان اني الطرف الوحيد العايش الحُب وشايل العلاقة ع ظهري، وماخذ دوري ودورج سوة!! وهسة، وبكل رضا احب اكلج، كلشي بيننا انتهى و جانت فرصة تعيسـة دمرتني، شكرًا ع كسرة گلبي ما قصرتي ..

عفتها صافنة ودموعها تنزل بغزارة ع خدودها..

بس مكدرت اسوي شي، لان خلص وصلت حدها..

كلشي اله طاقة تحمل معينة وبعد ينتهي واني خلص انتهت قدرتي ع التحمل!!

يكفي الركض الركضته وراها من 3 شهور للان ..

يكفي حبيت وانذليت وانطيت من طاقتي وكلبي ووقتي واعصابي ع انسانة ما تقدر ولا تراعي..

رغم انو كلتلها من قبل، مستعد اسويلج كلشي بدون مقابل..

وما اريد منج اي شي، بس اريد تقدير..

لان بدون التقدير ما اكدر استمر واكمل وياج، صعب!

بس الظاهر، حتى بالحُب مكتوبلي اتعذب وما الكة الراحة..

مكتوبلي انجرح واتأذى من الناس الاحبهم..

مكتوب عليه ابقه وحدي بلا عائلة او ملجأ لغُربتي ووحدتي..

....

اماني

انتهت الحفلة..

ودعنا البنات ورجعنا اني وريما وية عقاب..

ريما وجهها ميتفسر، طول الوقت مبوزة ومن احاجيها متقبل تحجي، ساكتة!

سألت عقاب اشرلي ع قسورة، الي جان هم مبوز وموده مكلوب.

الظاهر متعاركين، ادور تذكرت..

من جانت تركص واخذها وهم مبوزين، اكيد ع هاي تعاركوا!

بباب القاعة ..

حضنت اميمة، حبيتها كلش وحسيتها مرحة ومليانة طاقة.

اماني: فرحانة بمعرفتج

اميمة: اني هم فرحت بشوفتج، جنت اسمع عنج هواي من البنات

ابتسمت..

اماني: شكرًا، يلا بيبـاي

اميمة: بيباي..

راحت وية اخوها الي اجة عليها، وليث واكف يباوع من بعيد ..

ندست عقاب.. ابتسم وصاحله.

عقاب: ليوثي، تعال حبيب

اجة.

ليث: كول رايد شي؟

عقاب: شلونها اميمة؟

ليث: شلونها؟

عقاب: انت لو اثول لو اثول

ليث: الاثول الاولى

عقاب: زين

ليث: لا صدك شتريد

عقاب: الله يصبرني، روح بابا روح

دفعه وراح شغل سيارتنا، لحكه ليث وظل يسئله شيريد بس عقاب مغلس.

هو لو ليث انثول لو انثول، ماكو حل وسط!!

صعدنا اني وريما..

ليث واكف يم جامة عقاب ويكله..

ليث: تحجي لو شلون؟؟

عقاب: باجر، تعبان هسة

ليث: شيصبرنييي!!

عقاب: تصبر تصبر

ليث: هسة دحجي خربحظك

عقاب: مالي خلكك وادري بيك اثول، اظل احجي وانت مطي ما تفتهم تخلصها عليه ها ومافهمت وعيد

صفن شوية، ادور كال..
ليث: بربك لو حاجيلي قصدك مو احسن؟ جان وفرت كل هالوقت، هسة انت شكد سولفت، لو كايلها ومريحني ومريح روحك!!

صعد الجامة وتنفس بنفاذ صبر..

عقاب: اللهم طولج يا روح ..

شغل السيارة وطلع، وليث يدك عالجامة..

كوة لازمة ضحكتي، حجي ليث صحيح!

انتبهلي اضحك..

عقاب: خير شنو لمضحكج؟

اماني: انت ..

رفع حاجبه بنظرة معاجبه..

عقاب: قرقوز كدامج؟

اماني: حشاك حبيبي بس ولله ليث كلامه صحيح

عقاب: بشنو؟

اماني: يعني انت لو من الاول كايله قصدك ع اميمة، مو احسن من هالحجي الي بلا فائدة لحجيته كله؟!!!

عقاب: زاد حسابج ترا

اماني: عوف الحساب وفكر بيها، عليك الله مو حقه الولد؟

عقاب: ديلا حقه، انتِ شبيج؟

اماني: ما بيه بس عادي دا اعبر عن رأيي

عقاب: بحضرة الدكتاتور، ممنوع التعبير عن الاراء!!

باوعتله وابتسمت باستخفاف..

ضيق نظراته بتوعد ودار وجهه يكمل سياقة..

اوي اني جبتها لنفسي رح اكلها مدبسة..

انداريت ع ريما..

لكيتها ع نفس الصفنة وعيونها ذبلانة بحزن..

حتى مو يمنا، اشك اذا سمعت شجنة نحجي!

ضجت عليها، اففف شبيهم ذولة ع غفلة انحسدوا وگبوا!!

وصلناها للبيت ورجعنا لبيتنا ..

اول ما طبيت، نزعت الكعب..

اماني: اوف اوف اوف، يمة رجليه يمةة مدا احس بيهنن!!

رحت للغرفة دا انزع تراچيي والكلادة كدام المراية..

اجة عقاب من وراية، جنت اباوعله بالمراية..

حاضنني ومغمض عيونه ..

عقاب: شنو هالجمـال هذا كله؟ اخذتي گلبي اليوم!!

انداريت عليه وكلت بدلع..

اماني: اليوم؟ ليش اني مماخذته من قبل يعني؟

عقاب: بلي ماخذته بس مو مثل اليوم، جان عندي جزء صغير ع كد حالي تالي حتى هذا اخذتي يا حراميـة!!

ضحكت ..

اماني: بس اني مو حرامية..

عقاب: لا حرامية ونص.. بكتي كلبي وروحي وعقلي وكلشي بيه، اخذتي وصار بس الج وحدج!!

اماني: ع هالحجي، انت الي نطيتني الفرصة ابوكك! مو بلا؟ لان الاعرفه مو عقاب لينغش وينباك منه شي؟

عقاب: هجمة مرتدة هاي؟؟!

هزيت راسي مبتسمة..

باسني بهدوء وايديه تتحرك ع اجزاء جسمي بجرأة..

اماني: عقاب..

عقاب: روحـه؟

اماني: ما اريد فدوة..

عقاب: ليش؟ مو كافي الوقت الراح؟

اماني: بعدني ما مستعدة..

عقاب: تثقين بيه؟

اماني: اكيد!

عقاب: لعد سلميني نفسج وانتِ مطمنـة!

ظليت ساكتة ودكات كلبي تسارعت ..

عقاب: هزي براسج اذا موافقة، وخلي الباقي عليه امنيتـي..

بلعت ريكي بارتباك، عيوني تباوعله بتوتر بس هو ديقابلها بنظرات مطمئنة وكلها حُب..

اخذت نفس واتخذت قراري..

هزيت براسي موافقة وهو ابتسم..

...

انتهى!!

لا تنسوا التصويت 🖤🦋

#الكاتبة نورمين