تـنـاثـرو ونـدثـرت

بارت 9

#تــنــاثــرو_ونــدثــرت

#بــقــلــمــي_بــتــول_حــسـيــن

#بــارت9

----------------------------------

علـــى لحــــن الدمــع نــــامت عيــــوني الليـــل
و علــــى صــــوت القهـــر فـــز الصبــح گلبــي

لا ظــــــالم بشـــــر لا قاهــــــر أحـّــــــد يــــوم
ليـــــــــش يصــــير هيــــچ ويـــاي يـــا ربــي
مخنــــــوگة الســـــوالف تطــــــلع من الـــــروح
مـا أدري إشعجـب ؟ و شصـار ؟ و شذنبــي ؟
يــــــلوموني لأن ربـّيــــــت حزنــــــي ويــــــاي
المفــــــارگ محــــــب متگلــّـــي شـــــــيربّي .؟

-----------------------------------

ريحانة : بعد الكلام السمعته من سناء والصدمة باوعتلها اريد اكولها كذب بس عيونها گالت الحقيقة من الدموع التارستها وخرت ايدها من ايدي ونزلت بسرعة وعندي أمل ما اخذوهم او اگدر ألحكهم وماخليهم ياخذوهم بس كل املي خاب وتناثر گدامي واني اشوف امي گاعده بلصاله تبچي شافتني وگامت ،،

يمه عليج الله وين جهالي ييييمه لا تگولين انطيتي روحي يممممه عليج الله لا لج يمه شلون هييييج سويتي شلون انيييييي مو بنتج انييييي موووو قطعة من گلبج شلون گلبج انطاج يمه خالد مريض وزغيرون ويرضع يمه شگالت روحج انتي وعقيل

وابوي شكالت روحكم الله لا يوفقكم الله لا ينطيكم عقييييييل عقيييييل وينه عقيل سناء حبابه بداعة بنتج كوليله يروح يجيبهم يرجعهم أليه ولج سناء اعتبرتج اختي ليش هيج سكتي ليش ليييييش

عقيل دخل للبيت مبين چان گاعد بلباب رگضت عليه
هو دنك لزمته من ملابسه عقيل اني مو اختك عقيل مو احمد گبر يمكم مو النهار گله بحصن ابوي شلون
شلتوهم وذبيتوهم بلنار جهالي اريد جهالي هسه تجيبهم عقيل ليش مگتلي واني احجي ويا ابوي ليش سكتو لا تخبلوني احجوو ليش ساكتين

ضلو هيج اني طالعة وراح اجيب جهالي رحت لبست عباتي لزمني ورجعني للصاله

عقيل : ريحانة والله گلبي خلصان اني من القهر وين تريدين گعدي هيج احسلج والله هسه يملون ويرجعوهم ألج محد يتحملهم شبيج وبعدين شالو قبل فتره همه مو هنا وين تريدين تروحين

ريحانة : من گال هيج گتله شنووو شالوووو يعننني جهالي بعد ما اشوفهم ابد عقييييل لا تسكت هسه توديني ألهم اجيبهم واجي ، سكت ماحجه شي وطلع من البيت واني ضليت الطم وابجي وامي وسناء

يباوعلي ويبجن شگد دعيت عليهم گلهم وتحسبت اخر شي روحي متحملت كل هذا العذاب وماگدرت استوعب الافكار التتخيلي وشنو راح تسوي بيهم مرته لعادل ، فقدت وماعرف شنو صار وشلون گعدت

لگيت نفسي بلمستشفى وكل فتره اگعد وارجع افقد ماعرف كم ساعة او كم يوم ضليت هيج بس روحي رافضة تصحة وتواجه الواقع ضليت لا حبيب ولا زوج ولا اطفال بس روحي المخذولة من كلهم اي كلهم خذلوني

بعد ايام واني بلمستشفى نقص تغذية وضغطي مصفر من تحسن وضعي طلعت بس اعتزلت گلشي واتوجهت لربي اصلي وارجع اتمدد ما اگول انام لان النوم فارك عيوني واني صدري يدر حليب لخالد واتخيل هسه مخليته جوعان لو يبجي ومحد بحاله لو احمد هسه شنو وضعة اكيد يدور عليه ياربي انت اعلم بحالي رجعهم لحظني وريح گلبي وروحي

بس كل دعائي مافاد وشهر يجر شهر محد يرحم بحالي ولا واحد يرجعهم أليه ولا اعرف شنو وضعهم وكل اليجي يحجي وياي يگلي كم يوم وتنسيهم واحسلج متشوفيهم حتى متنقهرين وتكملين حياتج

حياتي هو اني شضل بحياتي بس خليت حسره بگلبهم احجي وياهم اسمع واني ساكته اكلي گلش قليل حاولت ألتهي ويا حوراء بنت اخوي عقيل بس كل مره اشوفها واوگلها او ألعبها اذكر جهالي واكول شنو حالهم هسه شگد ادعي الله لو يرجعهم لو يخليني انساهم صار 3 اشهر ماعرف عنهم شي

بيوم اندگت الباب وامي اجتني للصاله شايلة احمد بأيدها ماصدكت عيوني اني بسرعة اخذته ابوس بي واحضنه واشمه وابجي گتلها يمه وين خالد ومنو جابهم رجعوهم اليه مو

امي انقهرت ومسحت دموع بعيونها وگالت عادل انطانياه من الباب گال خلي يمكم اليوم لان دوم يبجي يريد امه واني باجر اخذه وكل فتره اجيبه بس خالد اريده يتعود هناك يضل ماگدر اجيبه 

بگدر فرحتي باحمد بگدما خاب املي عبالي رجعولي وبعد محد يبعدهم عني بس الحمدلله اطمنت عليهم وضل احمد يمي يوم وجان فرحان حبيبي مانساني بوقتها جان عمره سنه ونص وضليت منتظره كل فتره ويمته ميعجبه عادل يجيب احمد أليه ودائما مبهذل وملابسه وصخة عرفتها راح تنتقم مني بجهالي مريت بفتره بس الله يعلم شصار بحالي بهذاك الوقت واهلي ضلو يهددوني اذا اضل هيج بعد ميخلون حتى احمد يجي واشوفة بس مو بيدي واني اشوف ابني جوعان ومبهذل ووصخ ويجدي الضحكة والحنان عقيل ماقصر جان كل مره يجي احمد يروح ياخذه للسوك ويجي محمل علاليك ملابس وحلويات والعاب بس فتره وبعد ما اجه احمد شگيت ابوي محاجي عادل بعد ميجيبه اني صار تفكيري گلة بجهالي وبديت امحي عادل من حياتي

(لهنا واخذ حد عشرتك وانتهة المابيناتنة
يا وسفة امس جانت مطر
بس كاع حبك جن صخر ما طكت ابدمعاتنة)

تفكيري دمرني خفت صاير شي ويا احمد ليش هيج بعد ما اجه

سناء اخذت فتره مريضة بعدها عرفت هيه حامل وعقيل ضل يحجي لان بنته حوراء بعدها زغيره بس هيه خطيه رادت ولد وسناء صارت تطلع وتروح للجوارين وصار عدها صديقات وهذا الشي زاد المشاكل بلبيت بينها وبين امي وعقيل لان هملت بنتها اعتمدت عليه وهملت واجباتها واني ضاله بس اسمع واشوف لا ادخل بينهم ولا احجي وفرحانة بحوراء لان مصبرتني شوية وتمر الايام والاسابيع والاشهر واني مثل ما اني همومي وحزني على جهالي والخذلان العشته وكسرة گلبي هنه هنه ماتغير شي بيهن واجتنا بنوته ثانية جابت سناء بنيه وسماها ابوها عذراء لان سناء ماقبلت تسميها ضاجت رادت ولد وخليتها ويا حوراء واني صرت اهتم بيها وبلبيت وسناء بس ترضعها وبليل يمها وبلنهار يمي

گاعدة العصرية وحدي ونفتحت باب الحوش
وابوي صاح سولنا طريق وفاتو زلم هواي لبيتنا دخلت للمطبخ اسوي چاي بدون ميگولون لان صار الشغل المهرب الوحيد حتى انسى احبابي التناثروا من بين احضاني اجتي مرت اخوية وگالت بدلي ورتبي نفسج ولبسي عباتج وتعالي يعقدولج على ابو حسن

وگعن الاستكاين من ايدي وطشرن باوعتلهن واحس هيج عمري وسنيني طشرن مثلهن ،، گتلها شنو ارتب  نفسي شنو يعقدولي انتم شنو من بشر اكو واحد يزوج هيج ولكم الله اكبر حتى متكلفون  نفسكم تحچون تگولون هيج رخيصة عدكم اني يمه وينج ماتحچين شي ماريد ازوج كافي الشفته رجعولي جهالي وعوفوني بحالي

واني بحاله من الصدمة وضليت ادعي واحچي ما احس غير بايد انطبعت على وجهي باوعت ابوي بس دموعي نزلن ودنگت وعرفته هو المنع جهالي عني يريد يزوجني

ابو عقيل : ما اسمع منج غير گلمة موافقة اذا طلع شي ثاني من حلگج ادفنج بگاعج كافي طينتي وجوهنا وروسنه واخذتي عادل وشفتي شنو صار بيج احترمي نفسج لا امحيج من وجهي واخلص منج گدامي لبسي شي وتعالي للباب يعقدلكم السيد

ريحانة : عقيل مموجود اگيد مقابل بلشي اليسوي ابوي عرفت محد يگدر يسويلي حل لمصيبتي امي ساگته ودموعها تجري وسناء بس تباوع غسلت وجهي وحاولت اقوي نفسي بعد شنو اريد اخسر اني من شنو خايفة ضليت بس جسد يمشي خلي ياخذوه وين مياخذوه بس دموعي امسحهن ويرجعن لبست

عباية على راسي وامي وياي وگفت باب الاستقبال وحتى ماشفته ولا اعرف منو راح ازوج بس اگيد من معارف ابوي هه عقدلنا السيد ودخلت للبيت قفلت الباب عليه والمن بغراضي وشغلاتي واني ماعندي اي شعور غير الفراغ

ثاني يوم اخذتني امي للسوك ماسالتها اي شي لا اسمه ولا مزوج او لا ولا عمره ولا اي شي عن اهله ماشتريت شي امي تفتر وتختار وتشتري وحدها بس من اشترت ذهب هواي عرفت حالته زينه ماعرف ليش ابوي هاي المره ما اخذهن الفلوس هه يريد يقنعني بكم قطعة ذهب ويضحك عليه اشترت هواي شغلات امي واني طول اليوم ساكته وبس اباوع رجعنا للبيت

ويوم الثالث رتبتني سناء وحفتلي واني نفس سكتتي ولا حاولت امنعهم ولا حچيت ويا عقيل لحد الان ماشفته ضام روحة عني لان ماكو بأيده شي خطيه حنين هو وفطير ومايكسر كلام ابوي ابد

للعصر وامي وسناء طلعو ملابسي وغراضي گالو اجه زوجج جاسم هه عرفت اسمه جاسم

اجتي امي وسناء گعدن يمي ووحده تباوع للثانيه ويرجعن يباوعلي حچت سناء گالت اسمه جاسم ومزوج ومرته متوفيه وعنده ولد مستشهد خطيه لهذا يسمونه ابو حسن بيتج لوحدج ماعنده غير خوات 2 ومزوجات بغير محافظات لا تضوجين وين تلگين هيج قسمه زينه والرجال صديق ابوج وعقيل هم يعرفة ويحمدون بي

هه وعادل هم نعرفة وعشرة عمر وگلها تحمد بي ولحد الان يحمدون بي

امي گالت باوعي ولج لا تضلين فاهيه الرجال خوش رجال وشنو طلب منه ابوج گال حاضر ما اعترض وحالته زينه روحي عيشي ودللي عليه وخلفيله ولد يشيل اسمه انسي صخمان عادل مو قسمتج يمكن الله كاتبلج الراحة بهاي القسمة

سكتت ماحچيت وياهن ضلن ينصحن ويحچن واني ولا وياهن دخل ابوي للغرفة وگال يله گومي روحي ويا زوجج منتظرج برى باوعتله وحچيت بگلبي لا اول حلم حلمتة وتحقق ولبست بدله بيضه وللشخص الاحبه واريده شردنا وازوجنا ولا ثاني مره سويتولي زفة وعرس هه اليشوفني يگول زعلانه وزوجها چاي يرجعها مشيت وطلعت وياه ورفت عيوني اريد اشوف شنو ينتظرني

وانصدمت بشگلة وتراجعت كم خطوه للصاله لان هو چان واگف باب الاستقبال گلهم حسو بيه وبصدمتي وسكتو ونزلو روسهم اباوعلهم وارجع اباوعله رجال يمكن اكبر من ابوي شگلة حلو بس مبين الكبر عليه ماگدرت ألزم دموعي وخانتني شجاعتي وقوتي الچنت اتظاهر بيها ورجعت حضنت امي وبچيت وابوي يعتذر منه يگلة خطيه ماتگدر تفاركنه مو ماتچيبها كل فتره مرو علينا وامانه عندك دير بالك عليها ،، سمعته گاله انشالله

طلعت ويا من بيت اهلي وماحاولت التفت ألهم ابد ولا راح اسامحهم على هذا الزواج بيته مو بعيد عن بيت اهلي بينا شارع واحد بس دخلت للبيت جبير كلش وخوش بيت

جاسم : اتفضلي هذا بيتج انشالله وهذيج غرفتنا اخذي راحتج رتبي غراضج

ريحانة : باوعتله وگتله انشالله ،، مبين هادئ وخوش رجال وبعد الله يعلم شنو ضاملي الزمن ممعقولة ارتاح هيج

دخلت للبيت بي حديقة زغيره حلوه مرتبه مبين مرتب من ترتيب الحديقة ونظافتها البيت بي استقبال منفصل عن البيت وصاله ومطبخ وغرفتين كبار ومخزن ودرج بصفة افتريت بلبيت مرتب ونظيف دخلت للغرفة الگال عليها بيها غرفة اخشاب كلش حلوه وجديده فرحت من شفتها ابتسمت هو چان يباوعلي عيونه تلحگني وين ماروح

جاسم : رتبي غراضج واذا متصير زحمة عليج سويلنا شي خفيف لان مثل مشفتي اني وحدي ماعندي احد

ريحانة : باوعتله وهزيت راسي واخذت نفس هو اخذ الجنط والغراض ودخلهن للغرفة والمواعين دخلهن للمطبخ امي مامخليه شي بنفسها لان عرفت وحدي ماعندي احد وياي اشترت هواي شغلات للبيت هو گعد بلصاله چان اكو ميز طعام خشب بلثاله لان المطبخ مو كلش جبير وتخم خشب وعليه فراش ومخدات زغار سفنج متوقعت هيج البيت ولا الترتيب ولا الغراض شوية من الراحة حسيت بگلبي صارت

فتحت الثلاجة متروسه اشگال همزين حتى اطبخ استحي اگله على شي بس هو لحگني للمطبخ وصار يدليني بلغراض وعلب الملح والبهارات وهيج شغلات مخليهن بعلب حليب اطفال ونفس العلب مرتبهن ونظيفات ابتسمت الصراحة الترتيب اليشوفة مبين ترتيب مره يعني مستحيل يصدك هو هيج عنده خلگ ويرتب

سويت للعشه مخلمة شي سريع وخفيف اندگت الباب راح هو فتحها ودخلت مره ب الثلاثينات عمرها عباتها على نص راسها بس وبدون حچاب وعلج بحلگها ومبينه استغفر الله مدري شلونها

بيدها صينية اكل خلتها على الميز وطاحتلي بوس وتشبك ومبروك عروستنا وديري بالج على ابو حسن وداريه خطيه تحچي وتغمز اله وهو توتر ويفرك بلحيته

وگالت عيني عروسه چبتلج خبز والله هسه خبزته خلي يبرد وخلي بلثلاجة انتي عروس جديده ارتاحي 3 ايام وانوب اشتغلي براحتج واي شي تحتاجو انتي او ابو حسن گوليلي بيتي گبالكم يندله ابو حسن كلش زين وغمزتله وراحت ضليت فاتحة حلگي اني

راح هو سد الباب وگعد على ميز الطعام يباوعلي حسيت اكو شي بينهم خاف مرته ومحد كالي شمعرفها ازوج احنه لا زفة ولا هوسه وشلون هيج تدخل للبيت وحدها

باوعت للصينية بيها جدوره زغار ثنين واحد دجاجة وتشريب وواحد تمن وعلاكة بيها خبز اخذت الصينيه للمطبخ صبيت بمواعين وخليت الخبز يبرد وخليته بلثلاجة طلعت منه بس للعشه واني اشتغل وعقلي يشتغل بغير مكان افكر معقولة اهلي ماگالولي الحقيقة

اخذت الصينيه وخليت المواعين على الميز ورجعتها وگعدت اتعشه وهو بس يباوعلي ويبتسم

جاسم : مبينه انتي هادئه كلش وتسمعين الكلام وفطيره لان ماسئلتيني شي لحد الان وشكتلج سويتي بدون صوت

ريحانة : استغليت الموقف وشغلت عقلي حتى اعرف الحقيقة ،،، گتله غير زوجتك هاي؟؟؟ ضحك

جاسم : لا مو زوجتي ليش معقولة اهلج مگالولج شي عني

ريحانة : لا ماسئلت استحي

جاسم : امممم، لا مو زوجتي اني زوجتي متوفيه وچان عندي ولد منها وقبل فتره ستشهد

ريحانة : ها،  الله يرحمة

جاسم : واني لحد الان مانزعت الاسود ضليت دوم لابس دشداشة سوده

ريحانة : هزيت راسي وسكتت وگملت اكل واني افكر اذا مو زوجته لعد ليش هيج عدها ميانه وياه معقولة اخته بس غير مزوجات بغير محافظات
خلصت اكل والتفكير ما خلص

شال المواعين وياي وگال روحي رتبي غراضج اني اغسلهن واسويلي چاي ،، اني باوعتله وفتحت عيوني شلون بيه شلون راح اتقبله نفسي متتقبل هيج شي وهو نفس عمر ابوي مدري اكبر منه ياربي ساعدني شنو اسوي

طلعت من المطبخ ورحت للغرفة وبديت ارتب غراضي بلكنتور ولبست الحلقة الاشترتها أليه امي والتراجي بس والباقي قفلت عليهن وخليت شوية گحل بعيوني وحمره بس ماخليت غير شي

وبدلت دشداشتي لبست وحده من الاشترتهن امي هم حلوات والسيتات ضميتهن بلكنتور وضليت افتر بلغرفة متوتره مرن يمكن ساعتين واني بلغرفة وفكوت بجهالي وكلش شتاقتلهم گلبي مايبرد ابد نارهم ضالة وياي للأبد

طلعت من الغرفة دورت عليه بلبيت گله ماكو رجعت للغرفة تمددت وضليت افكر وين راح شنو قصته وشنو منتظرني وياه وغفيت واني مالگيت جواب لأسئلتي

گعدت الصبح باوعت وين اني بعدين تذكرت المصيبه الصارت وياي الجرباية مثل ماعفتها المكان بصفي فارغ ومرتب يعني مانام بلغرفة او يمكن مو بلبيت لحد الان

طلعت من الغرفة دورت عليه شفته نايم بلغرفة البصفي صفنت شنو السر الضامة اكو واحد هيج يسوي اول يوم زواجة لو جايبني خدامة وبس نشالله يطلع هيج وارتاح يارب

رحت غسلت وسويت ريوك وعجنت حتى اخبز گعد هو ضل يباوعلي بتفحص اعتقد يريد يعرف رد فعلي شنو اني اتصرفت بشگل طبيعي وصبحت عليه غسل وجها وراح للباب يفتحها لان اندگت

فتحها ودخلت امي وسناء وياها بناتها يعمري والله اشتاقيتلهن كلش ماسلمت عليهن اخذت حوراء وعذراء بوستهن ودخلت

هو ضل يباوع عليه ماردت احسسه بشي وديتهن للصاله ورجعت سلمت على امي وسناء ودخلنا كلنا تريكنا سوه وامي سئلتني ماجاوبتها هيه هم سكتت بعد ماعادت السؤال عليه وعرفت اكو شي

ضليت على هذا الحال هو مدللني وممقصر وياي وياخذني كل فتره للسوك او زياره او لاهلي بس ما احس بلفرح ابد لان بكلشي يصيرون جهالي گبالي  وامي دائما تجيني ومر على زواجي من ابو حسن 6 اشهر ماشفت منه شي بس هو مايحچي شي اليه ولا اني اسئلة استحي بس بليل كل كم يوم يطلع من البيت وشفته اكثر من مره يحچي ويا هاي جوارينا الاجتي اول يوم

وامي ضلت تلح عليه ليش ماصار حمل عندي لحد الان وتسأل معقولة هو لان جبير بلعمر لو تسأل هو شلونه وياج يعني خاف ضامة شي ولج لمن انفجرت اخر شي وسولفت الها

نصحتني اتقرب من جيرانه واعرف منها اي شي عنه وفعلاً من بديت اترخص منه واريد اروح يطلعلي اعذار وميقبل ويرتبك ويصير عصبي

ضليت اتعارك وياه لان اريد اعرف شنو مصير حياتي وياه عادل وضليت وياه على فطرتي وحبي هسه هم اعيد نفس الغلط رحت الها وعرفت هيه ارمله وعدها جهال 3 بس الذهب تارسها وتارس  اديها وشفت مطبخها نفس ترتيب مطبخي ونفس علب الحليب بلضبط ومن سئلتها ارتبكت وگالت اني انطيتهم لابو حسن لان چان ابني يشرب حليب وهواي عندي

هو بده يتغير وينام بنفس الغرفة وحاول اكثر من مره يتقربلي ومانجح وبطل يطلع من البيت كل كم يوم يبات بره وهيه كامت تجي للبيت وتشاقة وتضحك وياه عيني عينك هو يحاول يبتعد عنها  ويتوتر من يشوفها صار يطلع من البيت شبه تأكدت بينهم شي ولازم اعرف شنو شگد حاولت وصرت اتجرأ واسئلة شنو بينكم وهو يضوج وميحچي شي

وبيوم امي چانت يمي وگعدت تنصحني ما اخرب حياتي هو خوش رجال وممقصر بشي وشغلة زين لان يشتغل تاجر بلمواد الغذائية گالت سايسي بلحچي عرفي شنو بي وگوليله لازم اجيبلك ولد يشيل اسمك تضل هيج اذا لا سامح الله وصار شي هذا الخير كله يروح من ايدج وتنطردين من هذا البيت وتردين خايبة من گلشي يلخايبه تحركي شوفي شنو عنده

وفكرت هواي بكلامها فعلاً هو خوش انسان ليش اخسره وبيوم گعدنا نتعشه وبديت اسولف وياه وخليته يرتاح ويأمن وسولفلي اسراره وياريت ممسولفلي حسيت ماكو داعي اكمل وياه وانخذل مره ثانية .....................

اشوفكم بخير لا تنسون التصويت ⭐ وتعليق بتوقعاتكم الحلوه ❤️❤️