#خطأ_طبي «عقاب الاماني»
بقلــم : نورمين 🖤🦋
...
عقاب: ليش لعد، وهسة تعالي
اماني: وين؟
عقاب: بحضني، اريد اتدفى
اماني: وشكلولك عليه صوبة؟
عقاب: واحسن صوبة ولله
هزيت راسي بعدم رضى ورجعت اشرب من كهوتي ..
هو هم مكال شي، بس لازمته ضحكة.
اماني: دضحك فظها
عقاب: ليش منو كلج متانيج تكليلي يلا اضحك؟
اماني: محد بس خطية وجهك تعقج لا انت ضاحك ع وجه ولا انت ساكت ع وجه
عقاب: وجهي وبكيفي شعليج انتِ؟
اماني: كيفك
درت وجهي، ردوده تطشر ام الجبهة!
مـرت الايام وحيـاتي وية عقاب هادئة وحـلوة.
مجنت متخيلة الحُب هيج يخلي الواحد فرحان واللمعة ترعد بعيونه.
رغم كل هذا، هاجس اتمام زواجي منه بعده شي يوترني.
بس تفهم عقاب وحُبه، غطى ع توتري لان مخليني ع راحـتي وميضغط عليه.
هو هم يعـرف انو هالموضوع مو سهل، خاصة بعد كلشي عشناه.
صار الصلح بينهم وبين حازم وابن اخوه، والاوضاع مستقرة الى حد ما.
ريما وقسـورة علاقتهم تطورت وصاروا اقرب لبعض واغلب وقتهم يتصلون لو يجون لبيتنا يلتقون.
شعور يدغدغ كلبي من السعادة، لما اشوف اختي الصغيرة عايشة علاقة حُب، والي وياها رجال بمعنى الكلمة، يحبها ويخاف عليها من الهوا الطاير.
اليوم، قسورة وريما يمنا .
جنة اني وريما بالمطبخ دنسوي حلاوة، وعقاب وقسورة يشتغلون عاللابتوب.
اماني: ليش تخافين ولج!
ريما: مادري مون ولله
اماني: زين انتِ مو تحبيه؟ وهو هم يحبج، بعد شكو ليش متقبلين يخطبج؟
ريما: كتلج مادري!!!
اماني: هو شنو الي متدرين؟؟ عاجبج وضعكم هيج يعني؟
ريما: اكيد لا
اماني: لعد شنو؟
ريما: خايفة ..
حجت بهدوء، نصيت النار عالكدر وانداريت عليها.
اماني: من شنو خايفة؟ ليش تخافين اصلا؟ اكو شي اني ما اعرفه؟
ريما: لا مو هيج، خايفة من فكرة الارتباط، احس بعدني ما مستعدة اتحمل هيج مسؤولية
اماني: لعد ليش انطيتي الولد امل اذا تحسين روحج ممستعدة؟
ريما: مو.. مو لان احبه!
اماني: عجيب تحبه ومتريد تتزوجه!
ريما: منو كلج ماريد اتزوجه!!!!
اماني: مو انتِ هستوج تكولين!!! لتخبليني ريما حددي موقفج
ريما: ضايعة مون افهميني ..
اماني: باعي لعد، اذا الموضوع هيج فعادي كل البنات عدهم هالخوف، لان هالمرحلة بيها تغيير جبير بحياتج، بس رح تتعودين صدكيني خاصة انتِ تحبي وهو هم يحبج، فلازم تتحركين عاد وتغيرين تفكيرج، دام اكو بينكم تفاهم وحُب فكلشي ينحل!
ريما: افكر ..
اماني: مو تفكرين بنفس الطريقة!! تفكيرج غيري وحاولي تفكرين بالكلته كلش زين
هزت راسها مبتسمة بتوتر..
اماني: وهسة خ نشوف الحلاوة لا تحترك وشيخلصنا من لساناتهم
ريما: اي ولج اي
ضحكت ورجعت اكلب بالكدر، الطحين صار لونه اسمر.
اماني: ريري جيبي الشيرة
ريما: هاج
ذبيتها وخلطت لحدما استوت، الريحة تخبل ترست البيت ترس..
عقاب: شهالروايح الحلوة هااي
اجة يمنه ووراه قسورة.
قسورة: صايرات نسوان معدلات عمي
ريما: ليش يمه شبينه لعد مو بعينك؟؟
ضحك وكال..
قسورة: بعينـي وبگلبي وبشراييني وحتى بدمـي، بعد؟
ريما بثقة: اي هيج اريدك
قسورة: تدللين انتِ
جنة دنصب بالمواعين، انطيته واحد لعقاب.
اماني: ضوك ونطيني رايك
عقاب: جيبي خاشوكة لعد
نطيته وحدة ورجعت وكفت كدامه وعيوني متركزة عليه.
اريد الكف الجواب من ردة فعل وجهه قبل ليحجي.
حجة قسورة فباوعناله.
قسورة: واني ابن البطة السودة؟
ريما: انطي صبر
قسورة: لا زعلت شنو هاي بس عقاب
ريما: لتظل تتمزعل مثل الجهال هاك
انطته ماعون، ضحك.
قسورة: افدي الحلاوة اني
ريما: اكل واسكت مو كتلت روحك عليها
قسورة: هاا اي اي ..
درت وجهي لكيت عقاب مبتسم ويباوعلي.
اماني: يلا اكل شمنتظر؟
عقاب: مو خاف عيب..
اماني: شنوة العيب شبيك حبيبي؟
عقاب: ما اريد هاي الحلاوة.
اماني: ليش شبيها؟
عقاب: ما بيها بس ما احب هالنوع
اماني: لعد شتحب يا نوع؟
عقاب: احب الحلاوة الي بخدودج ..
بهتت بوجهه بخجل، صخنت وهو مستمر يباوع بتمعن ..
قاطعنا صوت قسورة.
قسورة: الووو نحن هنا
عقاب: انت نجب لا بجلاق اوصلك لباب بيتك
قسورة: منجنيق مو رجل الله يستر عليك
عقاب: مجربها انت وتعرف
قسورة: اااخ اييي
ريما: دكل وانطيها رايك عيني وخلي رومنسياتكم من نروح
كالت لعقاب، ضحك وكللها..
عقاب: اذا هيج تكولين، هاهيه
ريما: عفيه بنسيبي اليسمع الكلام
قسورة: اي الله ربه
ريما: وانت منو ربك لعد؟
قسورة: هم الله
ريما: اي و شكو بعد؟
قسورة: ماكو بس هي حظوظ ع ناس وناس
اماني: هسة تاكلون لو لا؟
حجيت بنفاذ صبر..
عقاب: ناكل بس اعصابج عيني
اماني: يلا
اكل، عقج ملامحه فعبالي مو طيبة لو شو شبيها.
اماني: هاا؟؟
هز راسه للجوانب بالنفي، ملامحي هبطت بضوجة وقسورة ياكل وميلحك.
ظلينا اني وريما صافنين وحدة عاللخ، شلون قسورة دياكل بشراهة وعقاب عاقچ وجهه معاجبته؟!
باوعنا لعقاب بانتظار رد ..
غيّر ملامحه وابتسم وسوة حركة اوكي بأيده.
عقاب: ميـة ميـة عاشت ايديكم!
ضحكنا وريما صاحت يسسسس!!
قسورة: وهسهاسة بخشمج، كيفت ام لسان
ريما: انت اسكت حلكك لتفكه!
قسورة: بيمن اكل لعد؟
ريما: لتاكل عوف
جرت الماعون من ايده حطته عالكاونتر.
قسورة: حتى تتأكدون من اكلكم اني مظلوم، صدكتوا؟ هاي بعدنه هيج كلشي ماكو ومن هسة جوعتني الله يستر اذا تزوجنا شتسوي بيه، يمكن تحرمني شربة المي
ريما: اي اتمسكن بعد وذبلك دمعتين
قسورة: شوفوا الكلب المتحجر شوفوا
سوة روحه يمسح بدموعه، وهو جذب كلشي ما بي.
ريما: هذا الموجود، عندك مانع؟
قسورة: لا طبعًا، متحجر متصخر احبه احبه
ريما: هو هم يحبك
قسورة: ها؟؟
ظلينا مصدومين، اخيييرا ريما صرحت بحبها اله شخصيًا !
طول الفترة الراحت مكلتله كلمة احبك، بس جانت تتصرف وياه بطريقة تدل ع الحب.
هو مثل طبع عقاب، ابد ما ضغط عليها بس جان يشاقيها يكولها كلبي خلص شوكت تكوليها عاد.
من حست ع جفصتها، اخذت جنطتها وشردت، قسورة ركض وراها.
قسورة: ولعباس متروحين الا تعيدين شكلتيييي
ريما: يااا عقاب صيح بي حبااب
قسورة: لو عشرة من عقاب ميكدرولي هسة، ولج تعاي لهنا وعيدييي شكلتييي
سدت الباب، فتحها وركض وراها لبرا.
اني جنت اباوعلهم واضحك بصوت عالي.
اماني: ههههههه مو صاحيين ولله
حسيت ع ايد انلفت ع خصري وجرتني ..
ابتسمت لان صرت اعرف حركاته..
عقاب: صار وكت حلاوتي لو بعد؟
اماني: صاير وكح انت
عقاب: من زمان اني هيج اماني بس غير صابر لخاطرج
احس اسمي يحلى من يلفظه بلسانـه.
اماني: لتكول اسمي هيج!
قلدت طريقته بالكلام، ضحك وحضنني اله.
عقاب: اماني.. امنيتي الوحيدة وامانيّي كلها ..
اماني: كلشي يورد بروحي من تكول اسمي ..
عقاب: يا بعـد روحها لروحي انتِ ..
فزينا ع صوت قسورة وابتعدنا عن بعض..
قسورة: احم احممممم
عقاب: وسم شتريد؟
قسورة: سدو الباب وشوفوا شغلكم احنه رايحين
عقاب: سبع حجارات
قسورة: حبيبي ولله
ركض وراه شرد، اني جنت فشلانة من الموقف.
اماني: شكد فشلة يربي
عقاب: عادي يابه لتهتمين
اماني: ممكن جرعة برود لو سمحت؟
عقاب: جرعة شنو هاجياه كله هو وصاحبه
اماني: هههه لا بطلت اذا هيج
عقاب: ليش
اماني: منيلي عقاب بعد؟
ضحك ورد بغرور ..
عقاب: اي بهاي صدك حقج.
اماني: شكد واثق بنفسك!
عقاب: هواي دكتورتي …
ثاني يوم، كعدت الصبح منزعجة لان حسيت بشي يمشي ع وجهي..
فتحت عيوني طلع عقاب، ابتسملي.
اماني: ليش متكعد راحة؟
عقاب: جنت اقيس طول رموشج
اماني: هاا هههه، وشكد طلع طولهن؟
عقاب: مدريني بس طويلات حيل جنهن قوس، وعيونج الحلوات هلال.. ووياهن رسمة حواجبج الحلوة، غير عن جمال النظرات .. اخخ الله يساعدك عقاب ..
ابتسمت بخجل ..
اماني: حيل هذا كله الي؟
عقاب: الج وحدج
اماني: هنيـالي لعد ..
عقاب: اني الهنيـالي يابة!
باس عيوني وكام.
عقاب: يلا رح نتأخر
وخرت الغطة، تمغطت شويونة وكمت.
اماني: صباح الخير والعافية حبيبي
عقاب: صباحي انتِ امنيتي ..
رحت اغسل وحطيت الجاي ع النار.
كلما اكوله صباح الخير يكلي صباحي انتِ.
يخليني اظل ابتسم مثل الخبلة وماعرف شحجي..!
بدلنا وكملنا ريوك وطلعنا للدوام.
بالسيارة، جنت فاتحة الجامة لان الهوا حلو والجو دافي..
ويدور ببالي سؤال، ماعرف ليش مسيطر ع تفكيري بهالفترة.
اماني: حبيبي عادي اسئلك سؤال ومتضوج؟
عقاب: سئلي
اماني: شصار ع موضوع تثبيت عضوية مرشحي الاحزاب؟
عقاب: ليش دتسألين؟
اماني: مجرد فضول ..
عقاب: اهاا..
اماني: اي؟
عقاب: مددوه اسبوعين بعد
اماني: ليش عود
رد بمرح..
عقاب: سئلي المفوضية اني شكو؟
اصطنعت الضحك..
اماني: هاا هههه اي هم صح
عقاب: ليش اجة هالموضوع ع بالج فجأة؟
اماني: هيج كتلك فضول
عقاب: خير ان شاء الله
وصلني وراح.
مشى الدوام عادي وبين العمليات والفرة عالمرضى خلص الوقت.
بس رجلية وكعن لان ما كعدت ابد، شيجيب الظهر وامدد وارتاح.
للظهر، اجاني عقاب كالعادة ورجعنا للبيت.
بالطريق، دك عليه قسورة، فتح مكبر صوت ورد.
عقاب: شبساع اشتاقيتلي مصار نص ساعة من عفتك
قسورة: تعال للمكتب بسرعه
جانت نبرة صوته جدية.
عقاب سد المكبر وخلاه ع اذنه وملامحه تغيرت تمامًا.
عقاب: مسافة الطريق واني يمكم
سده وساق بسرعة، خفت من ردة فعله شكلوله وهيج انكلب كيانه!!
اماني: شبي قسورة وليش هيج تغير مزاجك؟
عقاب: نوصل ونفتهم
اماني: تمام
مجادلته بعد، واضح روحه بخشمه وبس احجي ينهد عليه.
وصلنا للمكتب..
نزلنا وهاي اول مرة اجي بيها للمكتب مالتهم.
صادفت شاهين وضرغام الي جانوا يحرسون بيتنا ببداية زواجي من عقاب..
سلمت عليهم وتعرفت ع ليث.
جنت اسمع بي من سوالفهم بس مملتقيته شخصيًا.
طبيت لجوة وعقاب كلي ابقي برة يم قسورة.
وهو طب يحاجي الحجي، واني ظليت اكل بروحي من الاعصاب شكو شديصير!!
ادور الوجوه كلها متتفسر، الله ليستر.
اجاني ليث.
ليث: دكتورة عندي الم ببطني شنو سببه؟
شاهين: هلكد ما تعلف، طبعا توجعك
ليث: انت معليك مماكل بحلكك
ضحكت وكتله.
اماني: شنو نوع الوجع وبيا مكان؟
اشر ع معدته ..
ليث: هنا دكتورة، مثل اللوية
اماني: شنو ماكل بخلال ال24 ساعة الراحت؟
سكت، ظليت اباوعله منتظرة اجابة.
اماني: متحجي شماكل؟
قسورة: مو هيج خلي اصححلج سؤالج
اماني: اي؟
قسورة: كوليله شنو مماكل مو شماكل، لان ما اتوقع اكو شي ما حطه بحلكه من البارحة واليوم.
عكدت حواجبي بتعجب..
شاهين: سأصفقلك بالمقلوب على هذا الكلام الذي يلامس القلوب
قسورة: حبيبي ولله
ضرغام: دعوفوه معليكم بي شتريدون منه!
ليث: عوفهم هيالك متشوفني لابسهم
شاهين وقسورة ضحكوا ضحكة طويلة ع حجي ليث.
قسورة: ولله صاير تعرف تسولف لك ليث
ليث: اعجبك
شاهين: عوزه ولله ميعرف يسولف، لك عالاكل الياكله المفروض يحجي مثل العباقرة ويتفلسف
ليث: شاهين انت تنجب
شاهين: من بعدك اكيد
ليث: لا ابد، انت اكبر مني
قسورة: هههههااااي باع الاخلاق السكط
ليث: رايك واذبه بالزبالة
قسورة: ميصير تذب شي ع نفسك مترهم يا عيني
ليث: نهنهنه
كام يقلد لان نسف جبهته، متت ضحك ع سوالفهم.
قسورة: اي قلد، بعد ما عندك غير التقليد
غلس عليهم ورد باوعلي.
ليث: دكتورة معليج بيهم ذولة القرود، كملي شجنتي تحجين؟
اماني: جنت اكلك شماكل؟ خاف صاير عندك تسمم؟
ليث: ع الاغلب اي لان الصبح اشتهيت لفة فلافل من ابو عربانة ونفسي دنت عليها رغم ادري بيها وصخة
شاهين: هاي تطيها نكهة مختلفة اصلا
ليث: اي ولك ادور وصاخة بطعم يخبل، اكلت 3 وما حسيت ع روحي
وسعت عيوني بصدمة وكلت
اماني: عزا!!
قسورة ضحك ع ردة فعلي
قسورة: عادي لا تستغربين هو هيج
اماني: اكيد بطنك توجعك اذا ماكل هلكد لفات ملوثة! يجوز صاير عندك تسمم اصلا!
ليث: هاا يلا الحمدلله لعد
اماني: شنو الحمدلله دا اكلك تسمم مو مبيك شي!!
ليث: ادري دكتورة وسمعتج ترا
اماني: لعد عليمن كيفت وكلت الحمدلله؟
ليث: لان تسمم سهلة شغلته
اماني: منو كال
ليث: اني
اماني: وانت شنو؟
ليث: مجرب
اماني: ها؟
ليث: شبيج دكتورة، مجرب مجرب.. مو يكولون اسئل مجرب ولا تسئل حكيم
فكيت عيوني بعدم تصديق، هاي شنو هالولد!!!
اماني: انت متاكد من روحك صاحي؟
هز راسه مبتسم.
ضرغام: هو احنه صار سنين وياه و لسة ممتاكدين اذا صاحي، تريدين انتِ العرفتي هسة تتاكدين منه؟!
اماني: هم صدك ..!
ورة شوية طلع عقاب ووجهه محتقن.
صار شكد مشايفته هيج!
عقاب: يلا دكتورة
كمت وراه.
عقاب: صعدي بالسيارة جاي وراج
اماني: وانت؟
عقاب: عندي شغلة وية قسورة اكملها واجي
اماني: ليش هيج صرت شكو؟
عقاب: بعدين نسولف
هزيت راسي بطواعية محبيت اضغط عليه.
اخذت السويج منه، فتحت السيارة وصعدت.
تصرفاته حادة والظاهر اكو شي جبير بالسالفة.
يلا يجي واعرف شصاير.
...
عقاب
طلعت من يم الحجي مفور ..
خليت الدكتورة تروح للسيارة قبلي لان اريد افتهم من قسورة شصار بالمضبوط.
عقاب: سولفوا شصار
ضرغام: اجة حازم هد عالحجي وبالف يا علي فكيناهم عنه
عقاب: هاي وين؟
ضرغام: بباب المكتب قبل شوية
زفرت انفاسي بغضب.. مو وكت هالسالفة هاي!
قسورة: بس كلشي ما افتهمت منه، يعني شبي احنه مو تصافينا من ذاك اليوم؟
عقاب: ابن اخوه لاكينه مقتول اليوم ببيته
حجيت بهدوء والصدمة انرسمت ع وجوههم..
شاهين: اي ويعني احنه شعلينه؟ او بالاصح الحجي شعليه؟
ليث: لتكول عبالهم الحجي كتله!!!
عقاب: للاسف.. اي هيج عبالهم
قسورة: استغفر الله هسة احنه بيها عليها، ميروح يشوف ابن اخوه ويامن ملوص!! جاي يتبلى علينا ترا مو وضعية هاي!!
عقاب: السواه حـ يدفع ثمنه غالي
ضرغام: اكيد!
سمعنا صوت اطلاق رصاص، كلبي رعد بنبضات خايفة وركضت لبرا، الدكتورة وحدها بالسيارة!!
طلعت والولد ورايه.
صرت كبال السيارة، باوعت للدكتورة ونطيتها نظرة اطمئني.
رمينا عليهم وهم كذلك..
عقاب: لا طلعييييينننن!!!!!!
فتحت الباب تريد تطلع، اجت طلقة يمها، صرخت بهلع ورجعت لجوة بس ما تصوبت.
صحت بعصبية وكمت ارمي بعشوائية من كد الخوف الحسيته عليها..
زادوا بالرمي والدنيا انكلبت، عتادنا ع وشك يخلص.
دزينا ليث يجيب من جوة.
راح يركض واجته طلقة بجتفه وكع بالكاع..
تخبلنا عليه وضرغام راح عليه شاله وطببه لجوة بدون ميهتم للرصاص.
وشاهين وقسورة جانوا مغطين عليه.
شو ذولة انسحبوا وراحوا.
زين ليش انسحبوا!!!؟؟
جانوا يكدرون يخلصون علينا هسة هنا واحنه بلا عتاد!
دفعت هالافكار ع جهة ورحت اشوف ليث.
الدكتورة هم نزلت وراحتله.
اماني: الاصابة مو خطرة، بس احتاج قماش نشد جرحه حتى ليفقد دم هواي
شاهين: هاج هاي دكتورة
انطاها قطعة قماش لفته ع جرحه ..
جان بين الصاحي وبين الفاقد الوعي.
عقاب: ليث حبيب شد حيلك هيّنة ترا!
ضحك بصعوبة وكوة حجة..
ليث: اني الها حبيب ولوو ..
شبكته لصدري واني مبتسم بقهر ..
عقاب: ادفعهم الثمن واحد واحد بس اصبرلي ..
اخذنا للمستشفى التشتغل بيها الدكتورة.
سووله عملية طلعوا الرصاصة من جتفه.
وضعه مستقر بس الرصاصة ممزقة عضلاته، ولو جاية شوية لليمين جان ضربت عصب بس الحمدلله هيج ولا غيرها.
طلعت الدكتورة من يمه لان بالعناية ومحد يكدر يطبله.
جنة اني وشاهين كاعدين ننتظره.
ضرغام وقسورة ظلوا وية الحجي واني اخابرهم كلشوية اطمنهم.
عقاب: ها بشري
اماني: الحمدلله وضعه مستقر لتخاف
تنهدت ومشيت ببطء انتجيت عالحايط..
الخوف والموقف الصعب الي مرينا بي اليوم تعبني!
شاهين: وشوكت يكعد حتى نشوفه؟
اماني: فد ساعة، ع ما يفكه البنج
شاهين: خوش ..
اجتي يمي، حطت ايدها ع كتفي، التفتتلها.
اماني: قوّي نفسك حبيبي
عقاب: اني قوي بيج امنيتي..
كمشت ايدي حيل وابتسمت..
اماني: كله يهون وينحل لتضوج نفسك
عقاب: شلون ما اضوج نفسي وانتِ ع شوية جان تصوبتي وليث ذاك وياه ممدود جوة ولولا لطف الله جان هسة شحالنا!
اماني: هسة انت لتظل تفكر هيج، الحمدلله من اجت هيج
عقاب: الحمدلله يابه ..
اماني: اي عفيه حبيبي!
ورة وقت، شفت ليث من بعيد لان جان بعده نايم.
اطمنت عليه وخليت شاهين يمه ورجعت اني والدكتورة للبيت.
ذبيت روحي عالفراش كبل، جان يوم متعب!
اجتي يمي اماني..
اماني: تحب اسويلك شي؟ جوعان تاكل؟
عقاب: تؤ..
اماني: بس ميصير تظل هيج يا عمري ..
كلبت ع ظهري تمددت وكلت واني فاتحلها ايديه..
عقاب: تعالي
اجتي حضنتها حيل وشميت عطرها ..
كلبي يريد يوكف بس اتذكر شون صرخت من اجت بصفها الرصاصة!
عقاب: متت من الخوف عليج اليوم!
اماني: اسم الله عليك ..
عقاب: يابة انتِ اكو عقل براسج؟ ليش ردتي تنزلين من السيارة واحنه محاصرينا من كل مكان والرصاص يمطر علينا!
اماني: مادري خفت ..
عقاب: مو اني يمج؟ عليمن هالخوف بعد
اماني: هو ردت اوكف وراك يلا احس بأمان ..
سكتت متمعن بكلماتها..
حضنتها اقوى وايدي تلعب بشعرها ..
عقاب: خايف يجي يوم اشوفج متأذية بسببي.. خايف يجي يوم افقدج بي .. خايف يطلع عليه صبح متكونين بي.. خايف تصيرين بكلبي جرح حالج حال اهلي وتعوفيني وتروحين.. خايف ائذيج من كد حبي وانانيتي بيج.. وساعتها شيصبر كلبي ع الوجع الي حيحس بي؟!!
اماني: لتفكر هيج هاي امور دنيا، وقضاء وقدر مكتوب علينا نعيشه، ومحد يعرفه غير الله، انت شعليك وتلوم نفسك؟
عقاب: لان القرار الي اتخذته بالغاء الاتفاق، جان انانية مني!
اماني: لا عقاب لا!!
طلعت الكلادة من جوة بلوزها، الي جبتلهيا.
اماني: تتذكر شكتلي بيوم انطيتنياها؟
هزيت راسي وحجيت ..
عقاب: حبي الج ماله حدود ولا نهايـة مثل علامة الانفنيت ..
اماني: والشعاع؟
عقاب: هذا انتِ، انتِ الشعاع الي نور حياتي وضوّة كل جزء بروحي ..
اماني: يعني اني شنو؟
عقاب: انتِ ضـوة روحي ..
اماني: وانت بدون ضواك شيصير بيك؟
عقاب: انطفي واموت من صدك هالمـرة..
اماني: اسم الله عليك!! اني مراح اعوفك ابد ابد وكتلك من قبل وارجع اكلك هسة، ناري وياك جنة وايدي حتظل كامشة ايدك بانطفائك قبل توهجك، واني حبقى امنيتك الي حبتك وحبت عيوبك بجنون ..
عقاب: شكد احبج يـ عروگ گلبي ..!
ابتسمت وسئلت بفضول..
اماني: جديدة هاي!
عقاب: اي ضيفيها لألقابج بعد ..
اماني: تمام بس كلي معناها
عقاب: علساس متعرفيها يا حضرة الدكتورة؟
اماني: هههه اعرفها بس احب اسمعها منك!
عقاب: عروك الگلب هي مجموعة الاوردة والشرايين الي تغذي الكلب بالدم، وتخلي ينبض ويوزعه للجسم، وبالتالي هي الي تخلي الانسان على قيد الحياة..
اماني: واني على قيد حُبك عقاب..
حجيت بسعادة، مرر ايده ع خدي بنعومة وملت براسي وية لمساته..
عقاب: روحـه لعقاب .. ولج اني العشت كل عمري بظلمة الليل، شلون خليتي الصبح يطلع عليه بضحكتج؟؟
...
انتهى!
لا تنسوا التصويت 🦋🖤
الكاتبة نورمين