#خطأ_طبي «عقاب الاماني»
بقلــم : نورمين 🖤🦋
...
الظاهر سده بوجهه.
اماني: شكو عقاب؟
اندار عليه وبهت بوجهي متفاجئ ..
اماني: شبيك معصب و ويامن جنت تحجي؟
عقاب: واحد بالشغل
اماني: يا شغل وانت جنت تهدد؟ عقاب احجيلي الحقيقة ترا مو طفلة وتضحك عليه بهالحجي، حالتك هاي وراها شي جبير!
تنهد بضيق، باوعتله بحزن.. الظاهر صدك اكو شي جبير!
عقاب: هددوني بيج
ضيقت عيوني بعدم تصديق..
اماني: منو وليش يهددوك بيه؟
عقاب: الكلب زوج زهرة وعمه حازم الشفية
اماني: اني مو كتلك ذولة خطرين، اتركهم اذا هيج صارت السالفة
عقاب: مستحيل، مو اني الاخاف من هالشكول
اماني: واني؟
عقاب: انتِ بعيـوني اشيلج لتخافين
اماني: اروحلهن فدوة
عقاب: اسم الله عليج يابه، وتذكري محد يكدر يمسج بضرر دام اني وياج
اماني: واذا صار ومسـوني؟
عقاب: امحيهم من الدنيا ولله!
كالها بعيون تجدح نار..
اماني: ليش؟
عقاب: شنو ليش شبيج باباتي؟
اماني: ليش تمحيهم من الدنيا.. اقصد ليش تسوي هيج علمودي؟
عقاب: اذا علمودج ما اسويها، علمود منو اسويها لعد؟
اماني: اييي لييييش!!
عقاب: غيـر مرتي، حلوة هاي
اماني: انت ما عندك غير هالحجاية، كلما احاجيك وكلت مرتي
عقاب: لعد مجذب؟
اماني: لا بس..
عقاب: امشي فوتي جوة
اماني: وانت؟
عقاب: اخابر قسورة والحكج
اماني: خو خابره جوة!
عقاب: عاجبني هنا اخابر، عندج مانع؟
اماني: اي عندي
عقاب: شنوة بلا؟
اماني: لان اذا خابرته هم حتخطط وتسويلك سالفة مثل قحطان
عقاب: لعد شلون احلها برايج؟
اماني: بالكلام! مو ضروري كلشي عنف، عندك عقل استخدمه واكسب المعارك بلا حرب!
ضحك وكال ..
عقاب: هاي اسويها في حال كان الطرف المقابل عنده عقل ويفتهم من اسولف وياه، اما بهاي الحالة فهذولة ميفيد وياهم غير العنف.
اماني: بس عقاب الي دتحجي عنهم مو اي اشخاص والسلام! انت صرت تعرف خطورتهم شنو ومن منو هم مدعومين!!
عقاب: دكتورة اني تعاملت وية الاتعس منهم، لتخافين اعرف شلون اكدر اطلع من حقهم وزايد
اماني: زين ليش هيج مُصر فهمني! شنو لمخليك مستقتل لهدرجة تجاههم!؟
عقاب: هواي اسباب، اهمها اختي
اماني: اختك اخذ حقها مني وعوفهم رجاءًا ..
عقاب: لا .. هاي الحجي قبل من جنت ماعرف تبعات الموضوع، هسة اني صرت اعرف منو القاتل الحقيقي فلا تحاولين وتتعبين نفسج وياي، اني ماخذ قراري ومخلص
اماني: راسك اليابس هذا حيـوديك بمشاكل انت بغنى عنها!
عقاب: مو شي جديد، تعودت
باوعتله بنظرات متأثرة، منين ما اجي يفرها عليه..
عجزت اوصل وياه لصورة حل!
..
ثاني يوم، وصلني للمستشفى وكال.
عقاب: ولله لو سامعة مني وممداومة هالفترة احسن
رديت باستنكار..
اماني: حتى لو عفتني بالبيت هم يكدرون يوصلولي ترا! عالاقل هنا اكو ناس وشرطة محد يكدر يوصلي.
عقاب: كلش عاد..
خزرته: عقااب!
عقاب: ديلا.. ديري بالج ع نفسج، لا تروحين منا ولا منا انتظريني مثل كل يوم واني اجيج
اماني: ليش اني يا يـوم ممسوية هيج؟
عقاب: ولا يوم، بس دا اوصيج من باب الحرص، لا تنطيهم فرصة يستفردون بيج تمام؟
اماني: ان شاء الله، بس انت هم لتنسى وعدك الي
عقاب: يا وعد هذا؟
اماني: تدير بالك ع نفسك شنو نسيت!!
عقاب: هاا، اي اي تذكرت
اماني: لا هايهيه ربحنا
ودعته ونزلت..
امشي واتلفت اباوع بوجوه العالم ..
وبكلبي الف دعاء ان الله يحميلي عقاب، من بطش حازم وجماعته السفلة.
مشى اليوم طبيعي بين العمليات والطوارئ، ما حسيت عالدوام شلون خلص.
رحت لغرفة الدكتورات والكالك عقاب جوة!
وية دكتورة زينب كاعد وينتظرني!!
حجيت بصدمة
اماني: شدتسوي هنا!
عقاب: انتظرج
اماني: ليش هنا ليش مو بالسيارة؟
عقاب: عجبني انزل، ميصير؟
اباوع لزينب عيونها عليه، استغفر الله اكوم افكسهن الها هسسة!!
انتبه فهو هم كام، اخذت جنطتي ونزعت صدريتي.
عقاب: تشرفت بيج دكتورة زينب
زينب: اني هم، فرصة سعيدة عقاب
ابتسملها، خزرته ومشيت وياه.
اول ما طلعنا حجيت بتقليد.
اماني: فرصة سعيدة عقاب نننن شكد ملطلطة عابت!
عقاب: شدعوة ترا البنية محترمة ومطلع منها شي مو زين؟
اماني: ساري هم جان محترم ترا
نتر.
عقاب: هم كالت صخام!
اماني: اي اكول، شعندك كاعد وياها؟ وشكو نزلت اليوم ماعرف اجي للسيارة وحدي؟
جنت احجي بضوجة، لان الموقف استفزني!
خاصة نظرات دكتورة زينب اكلته اكل وهو العينتين مكيف.
كال محترمة كال!
عقاب: مخج صايبه شي؟ ع شنو هالعصبية!
اماني: خلي اقربلك الصورة، تتذكر من شفتني كاعدة وية ساري؟ شلون طكن فيوزاتك وضربته؟ وشلون عصبت عليه وقتها؟ شنو جان احساسك بذيج اللحظة؟
عقاب: شجاب هاي ع هاي؟ يعني ذاك جان ساقط وطلب ايدج، هاي شسوت شو حبابة!
اماني: عقاب لا تخبلنيييييي شنو حبااابةةةة؟؟!!! مشفتها شون عوزها تكعد بحضنك وعيونها اكلتتتككك!!
ابتسم باستخفاف..
قهرني، درت وجهي دا اروح من غير مكان، بطلت مارجع وياه حتلو يشرحوني!
لحكني وكمش ايدي..
عقاب: مو وكت خبالج هسة!
جريتها منه وكلت بحدة.
اماني: ليعجبك تسوي فرض ولميعجبك خبال، عوفني!
عقاب: يابة امشي وياي والعني الشيطان
صحت
اماني: الف لعنة عليج زينببببب!!!
باوعلي مصدوم ادور ضحك..
عقاب: بالعباس لاگفة .. مو صاحية انتِ
اماني: وحد عنك؟
عقاب: رحم الله والديج، يلا امشي
كمشني من كتفي، دفعته .
اماني: ماروح وياك، واذا تريد خليك وياها .. اصلا تدري شنو .. روح روح خاف مشبعت من الكعدة وياها
هاي الحجي واني مفورة من الغيرة، كلبي يدك سريع ووضعيتي كلها تخربطت.
مشيت للشارع وهو ورايه ..
جرني من ايدي كوة واخذني للكراج وين ما حاط سيارته.
اتخبلت بالزايد، فوك سوايته ميبس راسه ومحجة حجاية حلوة تبرد كلبي..
عقاب: تصعدين لو اصعدج بطريقتتتتي؟؟
اماني: شلون بلا؟
عقاب: اطبكج واطببج كوة
اماني: هههه خفت..
سديت باب السيارة ودفعته.
اماني: وخرررر!!
جرني ثبتني ع السيارة ..
مجان اكو احد هناك، بس اني وياه.
خزرته بحدة وكلت.
اماني: انت متفتهم بالحجي؟ دا اكلك وخر عني!!
تنهد وحجة بهدوء..
عقاب: عليمن كل هالقهر فهميني؟ على زينب؟ طز بيها وج بابا اني علمودج عفت شغلي واجيت حتى أئمن عليج، لان كلبي يمج وخايف يسوولج شي!! تلكيتيني بزينب وزينب شبيج؟!!
اماني: حقك تحجي بهالبرود، مشايف النار الي شاعلة بكلبي..
عقاب: اسم الله ع گلبج يگلبي..
دمعت عينـي من سمعت حجايته..
ظليت صافنة بي بهيـام، وهو كذلك ..
حسيت هالمرة هو واعي لنفسه شديكول مو مثل كل مرة يجفص وتالي ينكر.
اماني: گلبي ديوجعني عقاب.. من شفتك يمها وكاعدين وحدكم تخبلت! ادور هي ماكلتك بعيونها وانت تسولف ومبتسم عادي، ولله حسيت عقلي طار.. ما اتحمل اشوفك وية وحدة ثانية حتلو ماكو شي بينكم، ما اتحمل تفهمني؟!
عقاب: افهمج..
اماني: لعد ليش هيج تسوي بيه؟ ها احجي.. ليش تخليني بهيج موقف واظل احرك بروحي!
عقاب: عليمن يا عيني..؟
اماني: عليييييييك!!! عليمن يعنيي؟؟
حجيت بصوت عالي، خلى ايدي ع گلبه وكال..
عقاب: يابة غير بس انتِ معشعشة بگلبي..
وسعت عيوني بصدمة..
نزلت دموعي وكلبي كام يدك مثل الطبل..
اخييييرًا اعترفلي بحبه..!
عقاب: بس انتِ هنا .. فلا تغارين بعد ماشي؟
صافنة ممستوعبة.. الصار حقيقة لو ديتهيألي!؟
عقاب: الو يمعودة وين رحتي؟!
فزيت من صفنتي، باوعتله ورمشت كم مرة بعدم تصديق..
اماني: اكرصني عقاب
عقاب: ليش؟
اماني: اكرصني ومعليك!
كرصني بزندي صرخت ..
حط ايده ع حلكي ووسع عيونه بتفاجؤ..
عقاب: طيح الله حظج ع هالصوت العايق!!
وخر ايده..
اماني: غير انت كرصتني!
عقاب: مو انتِ كلتيلي!
اماني: لعد هو هيججج؟؟ حسيتك شلعت لحمة
عقاب: ديلا ليسمعج يصدك عدج لحم..
اماني: نهنهنهنه فكاهي الله يخليك ..
عقاب: شكرا ويخليج..
اخذت نفس.. تذكرت سالفتي الاصلية.
اماني: عقاب السمعته جان صح مو؟ اذاني ما بيها خلل هالمرة مو؟
ابتسم بخفة..
عقاب: لا مبيها .. واساسًا اذنج سليمة من الاول ..
ضربته ع صدره بخفة
اماني: خبيييث
حضنته..
اماني: متعرف شسويت بحالي انت.. بهذلت كلبي ومشاعري وياك، احبك هواااي ولله
عقاب: يا كبـر حظي لعد ..
لف ايديه داير مدايري بقوة، غصت بحضنه..
احلى شعور .. فرحتي هسة ما اوصفها بكلام ولا احجمها بحجم..
لان بكل بساطة، مالها حد.
....
بالسيارة، الطريق كله ملتفتة عليه وصافنة بي والابتسامة مفاركت وجهي..
مدا اصدك ولله، اووف يكلبي شكد جنت منتظره ع نار لعد..
عقاب: مو ركبتج اتشنجت هيج
اماني: فدوة الك
عقاب: اشش لتكولين هالحجاية بعد، اسم الله عليج اني الاروحلج فدوة ولله ..
اماني: احبك تدري؟
جان يسوق، عين عليه وعين عالطريق..
عقاب: خليني اسوق رحمة لجدج
اماني: متسوق منو لازمك لعد
عقاب: ابيج!! وج عيونج ونظراتج ذبحتني كافي ديري وجهج نعلعلا يومك عقاب..
ضحكت ودرت وجهي..
اماني: اووي طلعت سريع الاشتعال..
عقاب: ششايفة لعد!
اماني: الله ليستر منك
عقاب: بهاي حقج.
غمزلي بنظرة خبيثة، معدتي وجعتني يمة هذا شبي.
رحنه لمطعم نتغدة.
اماني: ليش مخليتنا بالبيت مو أئمن؟
عقاب: امانج وياي
ابتسمت بحُب..
اماني: هم صح
لزم ايدي وطبينا، فراشات دتطير بكلبي من السعادة..
بس ببالي كم سؤال .. شعجب اعترف؟ شصار؟ وليش هسة بالذات يعني!!
كعدنة وطلبنا اكل.
حط ايده عالطاولة وسند حنكه عليها، يباوعلي بتمعن .
توترت وخجلت وكمت افرك باصابعي بعشوائية ..
عقاب: شصار وياج اليوم ما سولفتيلي
اماني: مصار شي مهم، لحد ما اجيت انت .. وخليت هاليوم يكون مميز.
ابتسم وانتجة عالكرسي..
اماني: انت ما سولفتلي شصار وياك وشسويت؟
عقاب: ما صار شي مهم
اماني: متاكد؟ وتهديد حازم؟
عقاب: باجر يوصل الحجي ونسولف
اماني: ويعني؟
عقاب: كال ديرو بالكم ع نفسكم ولتتحركون لحدما اجي ونقرر شنسوي
اماني: اهاا زين
عقاب: اي
اماني: عالاقل بلكي الحجي يتصرف بعقلانية اكثر
جان ديشرب مي، وسع عيونه بصدمة وكال.
عقاب: ليش بنظرج اني طايش بتصرفاتي ؟
اماني: اي ومتهور
عقاب: ادور!
اماني: اي ولله شبيك متفاجئ
عقاب: مو متفاجئ من الكلام بكدما مصدوم من الطريقة لدتحجين بيها!
اماني: اني صريحة عيني
عقاب: واضح..
وصل الاكل..
تغدينا واحنه نسولف ونضحك، حسيت روحي عايشة بحلم!
شكد فاتنا وقت حلو لعد..
بس يلا ان شاء الله نعوضه ونعيش بسعادة باقي عمرنا سوة!
رجعنا للبيت، بدلت وبوجهي نمت من التعب..
عقاب اجة تمدد بصفي..
فتحت عيوني اباوعله بنظرات ذايبة..
عقاب: تعالي
فتح ايده وكال..
ابتسمت ورحت حضنته ونمنا ..
كعدت مترسة نوم وفول طاقة ونشاط..
عقاب جان بعده نايم، فكمت العب برموشه..
طوال وكثيفات، رموشي مو هيج شنو هاي!
خشمه من نوع رفيع وطويل حاد، نفس طبعه ..
شفايفه حلوة .. لحيته خفيفة وفكه حاد، احووي ..
الله يساعد كلبي.
مديت ايدي ع عيونه.. ادور ع خشمه و ع شفايفه ..
رمش بانزعاج.. ضحكت ورجعت اشاكسه..
لحد ما كعد، سويت نفسي بريئة وباوعتله ببرائة.
عقاب: شكد صلفة!
كشفني، ما عبرت علي نظراتي البريئة.
اصطنعت الزعل وكلت..
اماني: هاي عليه؟
عقاب: لا
اماني: عليمن لعد، محد غيري هنا
عقاب: ع النومة
اماني: ها وليش عود؟
عقاب: اخذتني غفل واني اتأمل ملامحج..
ابتسمت بخجل ونقلت نظراتي بعيد عنه..
كمش حنكي بايده.. رفع راسي باتجاهه وخلا نظراتنا تلتقي ..
عقاب: لتحرميني من شوفة هالعيـون ولج ..
تمتمت بعدم تصديق..
امتني: عود انت صدك تحبني؟
عقاب: اي .. والظاهر مدا تستوعبين هيج بس نظري، تحبين اثبتلج بشكل عملي؟
احتقن وجهي وكلت.
اماني: ياا شكد سخييف!!
عقاب: اوي يابة طلعت تستحي الاخت!
اماني: ليش لعد شكلولك عليه يمه؟
عقاب: شايلة المستحة ..
اماني: مثلك يعنيي؟
عقاب: تؤ..
اماني: عقااب!!
كلت بنحيب...
ضحك وكال بهيـام
عقاب: هو اني شنو سحل گلبي وطيح حظي غير لسانج المايع من يكول عقاب
جرني لحضنه، كلبي ينبض بقوة واكو فد حركة بمعدتي ..
احس حتى امعائي ممصدكة ودتركص من الفرح!
اماني: واني اكول ليش كلما اكول اسمك تصيح بيه
عقاب: هههه اي
اماني: لعد وليش من اكول ها او اوي تضوج؟
عقاب: هذا بغير وكت افهمج بي
اماني: ليش عود، كول هسة صعد فضولي
عقاب: دومه فضولج صاعد
اماني: شسوي اذا انت تحجي حجاية تخليها ببالي وللنص تسكت
عقاب: لان مو وكتها
اماني: وشوكت يصير وكتها عيني؟
عقاب: بعد فد شوية
وغمزلي.
وخرت عنه وكمت متوترة..
اماني: الدنيا ليل كافي نوم، كوم يلا
عقاب: كايم يابة..
سبح وطبيت وراه..
ادور وكفنا نسوي عشا بس جنت محتارة شسوي..
اماني: شسوي للعشا؟
عقاب: قوزي
كالها بتحشيش، لان يدري بيه فاشلة بالطبخ
اماني: دمك ثكيل
ادنة عليه حصرني يم الكاونتر..
حط ايده ع شعري، رجعه لورا اذني وكال..
عقاب: بس تحبي ..
اماني: منو كال؟
عقاب: اني اكول
اماني: تؤ.. غلطان
عقاب: ايباااه.. صدك؟
هزيت راسي واني اباوع لملامحه المترقبة، ادري بي ممصدك لكلته بس متاني شحجي..
اماني: عبرت وياه مرحلة الحب، فأني ما احبه حب عادي والسلام..
ابتسم ورفع تك حاجب..
عقاب: لعد؟
اماني: واصلة وياك لمرحلة الهيام ..
عقاب: اي؟
اماني: الهيام وحدة من اعلى درجات الحُب.. وهالمرحلة معناها انو وصلت لمرحلة الجنون بيك.. وان حبي الك وصل لدرجة ما تتوقعها..
عقاب: لعد تدرين اني ليـا مرحلة وصلت بـحبج؟
اماني: اي بلا؟
عقاب: مرحلة الـولــه ....
اماني: شلون يعني؟
عقاب: الولـه من درجات الحب المتقدمة.. يعبر عن اختفاء السعادة واي مشاعر ايجابية بغيابج عني.. لان حياتي خلص صارت مرتبطة بيج..
هواي هيج ع كلبي كل هالحجي والصدمات..!
اماني: عليك الله تحجي صدك؟
عقاب: اكيد
سكتت ودنكت راسي.. مادري ليش بجيت..
رفع راسي وكال باهتمام..
عقاب: كلت شي غلط اني؟ ليش دتبجين يـروحي؟
سمعته كال روحي زدت بالبجي..
دموعي دموع فرح بس ما اكدر اكوله هشي خاف يكول عليه مخبلة..
عقاب: ولج ليش هالدمووع!!!
اماني: فرحااانة عقاب .. كُلش..
سكت وملامحه ارتخت بتعاطف ..
شبگني حيل وايده ع راسي تمسح بـرقة..
عقاب: افديج وافدي فرحتج اني..
ابتسمت وقويت حضني اله..
اخيرًا حلمي تحقق .. يا ربي الفرحة ما تنوصف وكلبي مدا يتحمل كل هذا ولله ..
المرارة الي عشتها والايام السودا الي خلصتها بجي..
ما توقعت تكون هاي نهايتها .. بس سبحان الله!
سويت شوربة، طلعت الطريقة باليوتيوب وكمت اسوي وياها خطوة بخطوة ..
وعقاب يضحك ويصنف عليه.
عقاب: اذا شوربة تتعلميها من اليوتيوب، شلون بالاكلات الصعبة؟
اماني: عادي، المن حاطين اليوتيوب لعد للسهل وللصعب حبيبي
عقاب: عيون حبيبـج انتِ..
ابتسمتله..
كملت وصبينا عشا، اكلنا وخلصنا والكهوة اكيد من ايده..
اماني: عود ليش متعلمني اسويها ع طريقتك؟
عقاب: احب اسويها بايدي
اماني: ميخالف بس علمني! ظلت بنفسي ولله
عقاب: تخسى گلبي.. بس بغير وكت مالي خلك هسة
اماني: ع راحتك
عقاب: انتِ راحتي امنيـاتي..
جنت دا اشرب كهوة، عفت الكوب وظليت اباوعله ..
اللقب حلو لو نبرة صوته حلوة، لو هو الحلو؟
لو اني لان احبه داشوف كلشي منه حلو؟ تاهت عليه يربي..
ورة شوية، جنة نباوع اخبار ..
بهالايام عقاب صاير يتابع اخبار بانتظام لان الوضع متوتر والاحزاب طابة ببعض ومشاكل التحالفات والانتخابات، هوسة متخلص!
من شفت اخبار التحالفات، اجة ببالي الاتفاق الي جان عقاب يحجي بي..
شصار بي هسة؟ بعده مثلما هو لو تغير ورا ما اعترفلي؟
انداريت عليه، باوعتله بسكوت، انتبهلي سأل.
عقاب: رايدة شي امنيتـي؟
هزيت راسي ..
عقاب: غرد يحـلو ..
اماني: استحي هيج!
عقاب: تعودي متستحين لعد
اماني: ليش؟
عقاب: شنو ليش غير رح تتعودين ع غزلي وكلامي الج طول الوقت!؟
اماني: يعني... حنظل سوة؟
عقاب: اي لعد شلون يابة
اماني: والاتفاق؟
عقاب: شيلي وشمري بالزبالة، هو وكلشي يخصه
بسعادة صحت..
اماني: صدك ولله؟
ابتسم وفتحلي ايديه، اجيت يمه حضنني وحطيت راسي ع كتفه.
عقاب: ما اعوفج بعد، لا اتفاق ولا بطيخ
اماني: شنو السبب؟ اقصد ليش هيج غيرت رأيك بين يوم وليلة؟
عقاب: وللهي مو يوم وليلة.. صار فترة طويلة افكر وارجع لورا وما اوصل لحل.
اماني: وهسة شلون وصلت؟
عقاب: بمساعدة قسورة
اماني: شلون شسوة هالقسورة وذوب قوالب الثلج الي بكلبك؟
عقاب: مو قوالب ثلج.. بالعكس اكو براكين تسعر بقلبي من كثر ما نارها تحركني، بس اني خو ما اراويكم هالشي؟ اكيد ابين العكس لان ما احب اتشكى
اماني: بس منا وهيج رح تشكيلي الي!
عقاب: نشوف..
كمت عن كتفه وكلت بجدية.
اماني: متشوف، تنفذ وبس!
عقاب: دكتاتورة!
اماني: حبيبي منو؟
عقاب: الدكتاتور
اماني: صح!
فرقعت بأصابعي دلالة على الاجابة الصح الكالها.
اماني: المهم، شسوة قسورة مكتلي؟
عقاب: ولا تنسين سالفة!!
اماني: عنك؟ اكيد!
هز راسه ضاحك وكال ..
عقاب: بالدوام جنة نسولف عادي وهو بلش يتباجة ع ريما ..
عقاب: هلا ابو الشباب
قسورة: هلا ولله شلونك
عقاب: بخير، بس لو الكف هالكلب حازم وابن اخوه.. اخخخ اصير احسن
قسورة: تلزمهم لتشيل هم
عقاب: ان شاء الله...
سكتنا وجنت انافخ بقهر ممزوج بالغضب.
قسورة: شبيك صاحبي سولفلي
عقاب: خليني بحالي يابة مالي خلك اسولف
قسورة: اووخ لهدرجة، شنو هاي! الدكتورة الها ايد؟
عقاب: عوف البنية ع صفحة
قسورة: لعد شبيك اذا مو هي السبب؟
عقاب: متحلف بحازم اخخخخخ لو الزمه شسوي بي، قسورة مسمعت شلون يهددني بالدكتورة!! اجيت اتخبل ولله
قسورة: طلكها بساع ورجعها لاهلها لعد
عقاب: ليش
قسورة: اثول انت؟ اذا طلكتها بعد شعليهم بيها يكلك انفصل عنها متهمه بعد
عقاب: بس...
سكتت واحس اقتراح الانفصال جبير .. مو ع كد طاقة تحملي.. ع الاقل هسة!
قسورة: شو كمت تبسبس ؟
عقاب: ها لا ماكو شي
قسورة: عقاب مو عليه هالحجي، اطلعلي بالنظيف وكول شبيك
عقاب: خايف ع الدكتورة..
قسورة: سوي مثلما كتلك وطلكها
عقاب: ما اكدر ..
قسورة: ليش متكدر شبيك مكسر؟
عقاب: مو هيج يـاثول ..
قسورة: لعد شلون؟
ماريد اكوله احبها، احسها متطلع!
بعدني ممتقبل الفكرة، رغم اني مؤمن بيها!
عقاب: تعرف شلون لتغشم روحك
ضحك هو وكام يغشم نفسه بالزايد
قسورة: ما اعرف، عرّفني بلا امرًا عليك
عقاب: استغفر الله يا ربي ..
قسورة: ولا حول ولا قوة الا بالله العلي العظيم
عقاب: تحشش حضرتك؟
قسورة: انت گدرتك بس عليه
عقاب: مو انت تحجيني كوة!
قسورة: شكلت انييي!! حتى ذكر الله بي اشكال يمك، هايشنو ادور!
عقاب: فرّة قديييييمة
قسورة: حدّثها
عقاب: كوم منا لا اطلع قهري كله بيك
قسورة: اي مو مرة ابوك اني!!
عقاب: يابة حتخبل وعلي!!
قسورة: عليمن ولله يا الله؟ كول احبهااا، اعترففف شنو لهدرجة صعبةةة!!
عقاب: صعببببة صعبببببة!!!
قسورة: سهلها
عقاب: لك ولله برودك كتلني!
قسورة: احاا برودي؟ لا شيئ يمك، بعدين هذي اسمها بساطة مو برود
عقاب: ايبااه
قسورة: اي وداعتك، اني ماخذ الامور ببساطة، انت لو تسوي مثلي تنحل مشكلتك من كاعها
عقاب: شلون يعني؟
قسورة: اول خطوة تسويها هي التقبُل، صارح نفسك بحقيقة مشاعرك تجاهها وتقبلها، لتظل تنكر وتكابر لان بعدين محد يتندم غيرك!
عقاب: صعبة قسورة.. واختي؟
قسورة: اختك مو عائق وانت تدري، انت متمسك بيها كحجة بس!
عقاب: لا مو هيج
قسورة: هيج ونص، والدليل انت جنت تحبها قبلا تدري بسالفة موت اختك الحقيقية! يعني من جانت مذنبة بعينك حبيتها، شحال هسة؟
عقاب: مادري قسورة.. ضايع ضايع..
قسورة: خلي گلبك يدليك للدرب الصحيح وصدكني ما راح تندم لان الگلب مراية الروح والمفتاح الي حيوديك لمدينة السعادة برجليك!
عقاب: هيج تشوف؟
قسورة: اي هيج، كافي تخلي عقلك يتحكم بيك، لمرة وحدة بس امشي ورا كلبك!
عقاب: اشوف...
عقاب: وها اها.. هذا الصار..
اماني: شمعنى ذكر الطلاق اثر بيك؟
عقاب: مادري بس كلامه بالانفصال حرك مشاعري وادركت لحظتها انو اني جنت اجذب ع روحي وما اكدر بلياج..
اماني: انت تدري شسويت بيه وشكد جنت ابجي وانقهر ورا كل مرة تكلي بيها احنه بيننا اتفاق ؟
عقاب: اسف يروحي .. وعد اعوضج عن كلشي سيئ خليتج تعيشيه..
اماني: ان شاء الله حبيبي
عقاب: هسة تعاي اكلج شغلة
اماني: شنو!
عقاب: دتعالي وتعرفين
جرني صرت جواه.. وسعت عيوني بتفاجؤ وكلبي نبض بقوة..
اماني: ش..شنوو؟
عقاب: متريدين بقلاوة؟
.....
انتهى
لا تنسوا التصويت 🦋🖤
#الكاتبة نورمين