#خطأ_طبي «عقاب الاماني»
بقلــم : نورمين 🦋🖤
...
كمت اريد اروح للغرفة وعقاب جرني نيمني عالكاع وحضنني اله بقوة..
وراها ما حسيت شون الرصاص كام يمطر علينا من كل جهة حتى جام الشباك انكسر!!
كلبي وكع من الخوف ووية كل طلقة تجي بمكان قريب عليه اصرخ وابجي برعب..
هاي اول مرة بحياتي اتعرض لهيج موقف!
اطلاق نار وبنـص بيتي وبعز النهار بكل جرأة بدون خوف!
عقاب جان حاضنني ويهدي بيه، ما انكر وجوده سببلي راحة بس هم الوضع مخربط.
عقاب: اششش لتخافين اني يمج ..
اماني: منو ذوله عقاب وليش ديرمون علينا!!!
عقاب: عوفج منهم، اني اعرف شغلي وياهم بعدين، مسحي دموعج وكافي ترجفين هياتني يمج فنه ليدنالج ..
كالها وكمش ايدي الي دترجف من الخوف، شديت ع ايده وحشرت نفسي بحضنه ..
ابتسمت بحُب وبعز خوفتي حسيت روحي فرحانة..!
جان عقاب يشيل راسه يباوع منا ومنا عبالك ديدور ع شي.
اماني: لتشيل راسك!!
عقاب: سلاحي ماهوه .. مدري وين حطيته!!!!!
حجة بعصبية، جريته من ايده وكتله.
اماني: خيولي، دنك راسك فدوة
هز راسه بتفهم وظلينا هيج 3 دقايق بعدين هدأ اطلاق النار.
وراها سمعنا صوت الدوريات مال الشرطة.
كام عقاب واني مچلبة بي اخاف، هو هم مكال شي جان محتوينـي ومستوعب خوفي بتفهم..
عقاب: ابقي هنا راحوا
اماني: لا.. ماا اعوفك!
عقاب: ماكو شي وهاي الشرطة اجوا
اماني: حتلو، اخاف ولله..
حطيت راسي ع جتفه وهمست بخوف، حط ايده ع راسي وكال بصوته العميق..
عقاب: ميخالف راحت وخلصت اهم شغلة مصارلج شي ..
وخرت عنه.
اماني: وانت هم .. همزين مصارلك شي.
ابتسم واخذ ايدي بأيده وطلعنا لبرا.
الجيران كلها بالباب والشرطة داير مداير البيت والدنيا مخبوصة.
ادري وين جنتوا من مطروها رصاص علينا!؟
طوقوا المنطقة واخذوا اقوالي واقوال عقاب.
الجيران شايفيهم جانوا ثنين ملثمين ع دراجة، وخافوا يسوون شي ويأذوهم.
اكو كاميرات حاطيهن للبيت فهم اخذوا التسجيلات وراحوا للمركز لان عقاب رح يقدم بلاغ.
واني رحت وية ام جنات لبيتهم.
كعدت بغرفة البنات ومددت رجليه، الهبطة والخوفة اخذت نص حيلي.
وادور ظل بالي ع عقاب، منو ذوله شعدهم وياه، خاف يسووله شي وهو راجع وحده!!
موبايلي عندي، جابلياه عقاب من طب اخذ موبايله وجاكيته وكلي خلي يمج خاف اخابرج.
طلعته وخابرت ع قسورة، سولفتله الصار وهو راح وراه.
كلت خلي يلحكه يكون وياه خاف شو شيسووله.
ميقات: نامي خاف تعبتي
جنات: اي واذا صار شي جديد عود احنه نكعدج
اماني: لا عفيه خلوني هيج بالي مشغول ع عقاب ويني وين النوم
كعدت يمي ميقات وحطت ايدها ع رجلي.
ميقات: لتخافين ماكو شي ان شاء الله
جنات: هسة يجي لتقلقين، بس يقدم البلاغ ويرجعلج
اماني: خايفه عليه بنات
جنات: اففف ولله حقج بس شتكدرين تسوين
ميقات: الله موجود لتخافين عليه
اماني: ونعم بالله..
..
عقاب
قدمت البلاغ بالمركز وجنت كاعد احجي وية عقيد اعرفه اسمه زيد، دائما اتعامل وياه وهو يعرف طبيعة شغلي.
- يعني ما تعرف منو المشتبه بي؟
عقاب: ببالي شخص بس ما متاكد منه تمامًا
-دكول اسمه واحنه نتاكد بطريقتنا
عقاب: لا يابه ما اريد اظلم احد، انتوا بس تكمشون اصحاب الدراجة ويعترفون ساعتها لكل حادث حديث
-زين كلي منو حتى اخلي تحت المراقبة
عقاب: الدكتور امير توفيق
انصدم: وهذا شنو علاقته بيك؟
عقاب: مسئلة شخصية سيادتك
- زين؟
عقاب: اي هي هاي، وهسة اني اترخص ارجع للبيت لان المدام وحدها وخايفة
-براحتك عقاب، واني رح اخلي دورية حماية احتياط يم بيتك
عقاب: ممنون منك زيودي
تصافحنا وطلعت، شفت قسورة كدامي هستوه فات للمركز ومبين داري بالسالفة لان وجهه مخروع.
عقاب: هناا هناا حبيب
قسورة: عقاااب لك شصاير شكوو !!!
عقاب: امشي برا نسولف
طلعنا برا صعدت سيارتي وهو وياي.
قسورة: منو متعرض لبيتك؟ وليش ما خابرتني بساعتها!!!
عقاب: منين دريت ؟
قسورة: الدكتورة خابرتني وكلتلي
عقاب: ومنيلها رقمك؟
قسورة: عقاب لتخبلني اني وين احجي وانت وييين تحجيي!!
عقاب: يابه ما صار شي، رموا عالبيت ثنين ملثمين واجت الشرطة، وقدمت بلاغ هستوني وثيمالا ها اهااا
قسورة: الله وما انطوك وحدة صوغة بنص كصتك
حجة مستهزء بسبب ردي البارد، ورجع كمل بجدية.
قسورة: منو الرمى؟ امير مو؟
عقاب: احتمال جبير اي هو
قسورة: ولله لافلش راسه المصفح ولله!! اطلع لعيادتههههههه!!!
جر مسدسه، اخذته منه وحجيت بحدة.
عقاب: مو وكت خبالاتك، كتلك احتمال هو مو اكيد!
قسورة: مبينة هو سواها هالحقير!!
عقاب: ميخالف خلي نتاكد مخسرانين شي، ولا تنسى اعدائنا هواي ما نعرف يا ناقص منهم سواها
قسورة: ياهو الجان الا اكسر ايديه بس اصبرلي
عقاب: سوة نكسرهن حبيب
قسورة: اكييييد!!
عقاب: وهسة اهدئ لتظل مجمر
كلتها مبتسم، بادلني الابتسامة وانتچى لورا وكال.
قسورة: يلا يابه سوق
حركت السيارة وطلعنا للبيت، اول ما وصلنا رحت لبيت المعلمة.
قسورة: ويييين بيتك منا ترا
عقاب: الدكتورة هنا
قسورة: دجيب المفاتيح
شمرتلهيا.
عقاب: هاك
كمشهن وكال وهو يمشي.
قسورة: رايح كدامك
هزيتله راسي ورحت دكيت الباب، طلعتلي المعلمة عذراء.
عذراء: ها وليدي بشر ما عرفتهم منو؟ شصار وياك؟
عقاب: لا ولله لسة، بس قدمت بلاغ واجيت، منتظر التطورات
عذراء: الله لينطيهم العافية ع هالسواية
عقاب: امين، من رخصتج ام جنات بس صيحيلي الدكتورة.
عذراء: اي دتفضل وهسة اصيحها
عقاب: مستعجل ولله
عذراء: يلا ثواني
راحت صاحتها واجت، اول مشافتني الدكتورة اجتي ركض حصنتني بقوة وتنفست بعمق، ظليت واكف مصدوم من تصرفها.
ادور ام جنات وبناتها يباوعلنا، ارتبكت وكوة رفعت ايدي طبطبت ع جتفها.
وخرت وكالت.
اماني: خفت عليك هوايييي
عقاب: عليمن مو كتلج ماكو شي؟
اماني: شنو عليمن ليش قليلة الصار!؟
عقاب: دتعالي هسة بعدين نتفاهم بالبيت
همستلها وهي انطت ايماءة بتعابير وجهها معناها الموافقة.
تشكوت من ام جنات ورجعت للبيت اني وياها، طبينا وقسورة جان يلم الكزاز ويعدل بالغراض.
قسورة: شلونج دكتورة؟
اماني: بخير ..
عقاب: روحي ارتاحي اذا تريدين
اماني: تمام رايحه
راحت للغرفة وكعدنه اني وقسورة نسولف.
قسورة: ليش متجي ريما تشوف اختها؟ شون گطعية له له له
رفعت حاجبي وضحكت.
عقاب: ايبااه ليسمعك يصدك
قسورة: لعد شنو مجذب قابل؟ اكو وحدة يرمون ع بيت اختها ومتجي تتطمن عليها، شلون دنيا هاي ..!
ضحكت بعدم تصديق، يستغل كل الفرص الممكنة لحتى يشوف ريما!!
قسورة: عقاب بربك وصل خبر لابوها خلي تجي مشتاقلها ولله
عقاب: اششش اكعد واسكت هي الاخبار تلكاهه وصلتلهم
قسورة: شلووون!
عقاب: خابرت الولد انت؟
قسورة: بس ليث
عقاب: وكال للحجي؟
قسورة: اي!
عقاب: لعد اكعد وانتظرها، هسة تجي
قسورة: منو ليضمنلك تجي؟
عقاب: علاقتهن قوية اكيد تجي، والحجي بهيج امور ميتفاهم رئسن حيكول لرياض واعتيادي رياض يجيب عائلته ويجي لهنا
قسورة: تفكير مخيف
عقاب: دماغ يشتغل، خو ما مثلك؟!
كلت بثقة، ضحك ورد.
قسورة: شوف هذا.. ولك بابا لا دماغ ولا قلب ولا اذين ولا بطين، من توصل السالفة يم ريما كل جسمي يعطل
عقاب: يمه الحب يمه
تنهد قسورة وهو يضحك، ظلينه نحجي شوية بالشغل وصدك اندكت الباب.
كمت اشوف منو وطلع توقعي بمحله!
دكتور رياض وزوجته وبنته وابنه، سلمت عليهم وقسورة كذلك وكعدوا بالصالة.
سما: بنتي شلونها فدوة طمنني عليها ؟
عقاب: بخير لتخافين ما بيها شي
رياض: وينها مون!!
عقاب: نايمة هسة اصيحلها
قسورة رفعلي حواجبه لان الوضع متأزم والجماعة عوزهم ملة ويكعدون يلطمون.
مدري هي السالفة تخوف مدري اني لان متعود اشوفها عادي!
طبيت للغرفة لكيت الدكتورة نايمة عالجرباية، ومقرفصة رجليها لبطنها بوضعية الجنين.
كلبي نبض بقوة، خايفة!!
حاضنة نفسها ونايمة من الخوف!!
هالموقف اذا يدل ع شي، فـ هو ان ابتعاد الدكتورة عني صار شي ضروري وما بي نقاش!
اخذت نفس وتقربت يمها، همست بهدوء.
اماني: دكتورة.. دكتورة ..
فزت من نومتها مرعوبة، حضنتها بخوف هاي شبيها دخيلك يا ربي..
عقاب: شكو شكو .. اني يمج باعي ماكو شي يخوف .. حلمانة مو؟
هزت راسها وحطت راسها ع كلبي وحضنتني قوي.
اماني: حلمت بيك متصوب وغركان بدمك واني ما اكدر اسوي شي، اصيح ومحد يسمعني
جانت تحجي بقهر، وعلى وشك تبجي، وخرتها عن حضني، وكورت وجهها بأيديه -حطيت ايديه ع خدودها-
عقاب: مجرد كابوس لان عشتي ضغط قوي بأخر كم ساعة، هاي اني كدامج كلشي ما بيه شوفي؟
رمشت بضعف ورجعت حضنتني وكالت.
اماني: متعرف شكد خايفة عليك، احس كلبي يريد يطلع من مكانه ..
رفعت راسي واخذت نفس، كلامها اثر بيه كلش ..
عقاب: عليمن يا عيني، كتلج ماكو شي والي سووا هيج حيتعاقبون، بعد عليمن هالخوف بس فهميني؟
نزلت دمعة منها، باوعتلها بنظرة لييش!!
حركت كلبي بدموعها وخوفها..
اخذت ايدي حطتها ع كلبها، جان يدك بقوة عبالك يريد يكسر ضلوعها ويطلع..
رمشت كم مرة بتأثر وباوعتلها بتعاطف.. جعدت ملامحها وكالت.
اماني: شفت شلون كلبي صاير نار عليك؟
عقاب: اسم الله عليج وعليه..
اماني: وعليك هم حبيبي ..
حجاية حبيبي دغدغت گلبي، بس بنفس الوقت ماكدر اكون اناني واستمر وياها، واعيشها برعب كل حياتها الباقية.
جريت ايدي عن كلبها، كمشتها وخلت ايدها بأيدي.
عقاب: مسحي دموعج وطمني بالج وكلبج، اني بخير
اماني: بس كلبي ممرتاح ..
عقاب: وشلون نريّحه برأيج؟
لوت شفايفها وهزت اكتافها بحركة معناها ما ادري..
خطفت گلبي بحركتها..
ماعرف شلون فقدت السيطرة ع نفسي و نسيت اني شجنت احجي واخطط علمودها!!
تقربت بست خدها بنعومة..
هلكد ما ناعمة بشرتها، حسيت لحيتي خدشتها وعورتها..
باوعت بعيونها وكلت: وهسة؟
همستلي: نفس الشي
عقاب: لعد شغلنا لازم يكون وياه هو ..
اماني: هاا!
وسعت عيونها وحجت بصدمة، حطيت اصبعي ع شفايفها وكلت.
عقاب: اشش صوتج..
ظلت مصدومة ومتعرف شتسوي..
دنكت وبست جهة گلبها ..
مادري ليش هيج سويت بس الادري بي اريد اهدأها بأي طريقة!!
شلت راسي ورجعت باوعتلها لكيت صدمتها تضاعفت مرتين وعيونها جاحظة بعدم تصديق!
ابتسمت ع منظرها، سحبت اصبعي عن حلكها وكلت.
عقاب: وهسة شلونه؟
اماني: خبلته بالزايد!
كالتها بـ نحيب، ضحكت وهزيت راسي ممصدك لطافتها ..
عقاب: اهلج برة كومي شوفيهم
نطت من مكانها.
اماني: اهلي!!! شنو شوكت اجو وليش ما كتلي!؟؟؟
وكفت كدامها.
عقاب: هو كلبج انطانة مجال؟
رفعت حاجبي وكلت بمرح، عافتني وشردت ظليت مبتسم ولحكتها..
حضنوها واحد واحد وامها ظلت كامشتها وتبجي من خوفها عليها..
اماني: ماما ولله زينه ليش تبجين
سما: مو بيدي وج يمه من سمعت بالصار واني رجلية متشيلني بعد، ما صدكت شوكت اشوفج
باست امها وكعدت بصفها.
اماني: يبعد روحي ماماتي ولله زينه اني ومصار شي، بعدين عقاب وياي فلا تخافين عليه كلشي ميصيرلي، مو بلا عقاب؟
هزيت راسي مبتسم..
عقاب: اكيد، بنيتكم بعيـوني حاطها.
ابتسمتلي بأمتنان ممزوج بالخجل.
رياض: سالمة عينك وليدي بس اني اب ومن حقي اخاف ع بنتي وأأمن عليها
عقاب: اكيد من حقك
رياض: الصار اتمنى ميتكرر، لان ساعتها يختلف الحجي
جان كلامه عبارة عن تهديد مبطن، قسورة خزره وراد يحجي، اشرتله بلا وحجيت.
عقاب: الصار قضاء وقدر، ممكن يتكرر او لا؟ هالشي يم رب العالمين، منكدر نتنبئ بهالموضوع هسة، زائدًا اني هذا شغلي وهاي حياتي وكلكم تعرفون هالشي كلش زين، بعد عليمن هالحجي دكتور؟
رياض: وكلنا نعرف بنتي شلون انتهى بيها الحال ببيتك وزوجتك؟
عقاب: دكتوور!!!
حجيت بحدة وعيوني نطت، متفهم خوفه ع بنته بس الي ديسوي اسمه تجفص!
الدكتورة تدخلت بيننا تهدي الوضع.
اماني: بابا فدوة مو وكته هالحجي
رياض: شوكت يصير وكته لعد!
سما: رياض ما عايزين مشاكل احنه، عوفهم
قسورة كوم لازم روحه ومكال شي.
ومكتفي يباوع لريما من جوة لجوة وهي ولا يمه.
ريان: وتالي ما عرفتوا منو ورا السالفة هاي؟
عقاب: لا لسة بس التسجيل يم الشرطة
ريان: خوش حجي، انتظر منك التفاصيل بس تعرف
عقاب: بعينـي..
ريان: سالمـة عيونك ..
ريان حسيته حباب ومو مايع مثلما راسمه ببالي.
صح شكله ناعم بس هو لا، رجال من صدك وما جفص مثل العينتين ابوه.
ظلوا شوية ليما صار الليل وراحوا، اصروا تظل الدكتورة يمهم فترة لحد ما نعرف منو سبب التعرض الصار.
بالبداية رحبت بالفكرة بس بعدين كلبي انقبض، ما مستعد اسلمها الهم هسة...
عندي وياها كم اسبوع بعد !!
هي رفضت وتالي تقبلوا رئيها، وهالشي فرحنـي.
قسورة: جوعااااان يأهل الرحم ما عدكم اكل تطوني؟
اماني: هسة اسوي عشا
قسورة: اي ولله عاشت ايدج بس لا تخلين كبة فدوة اتخبل منها
اماني: ههه تمام
راحت الدكتورة للمطبخ، كعدت بصفه وجان يكلب بالتلفزيون.
عقاب: هستوك صرت جوعان، قبل شوية من اكلك تعال تزقنب تكول ماشتهي
قسورة: اولا يا صديقي وحبيب كلبي جانت ريري موجودة، خو ما تريدني اعوفها وادور اكل؟
عقاب: لا طبعا شون يصير
قسورة: مو بلا، وثانيًا الكعك يدمر اكلي وما احبه هيج وكت اكله
عقاب: ديلا هو انت اكبر بلوعة شتشوف تلف
قسورة: لااااا صديقققققي لااااااا
عقاب: و 16 لهدا تنام بحلكك
قسورة: تمون، المهم انت خلطت بيني وبين ليث وهاي شغلة مو زينة حبيب
عقاب: ماكو فرق نفس الطرگة انت وياه
قسورة: دنجب انجب وتعال سولفلي شعدك لزكت بالغرفة من رحت تكعد الدكتورة؟ ها احجيلي احجيلي شبيك مو اخيك اني خلي اتعلم للمستقبل
ضربته بكفة ايدي ع راسه.
عقاب: حيوان وانت شكو هيج مركز!
قسورة: تهي بهي غير مبين طامس لراسك بحبها
عقاب: صم حلكك
قسورة: عود ليش متحب تعترف لروحك بهالشي؟
عقاب: قسورة تسكت لو اسكتك بطريقتي؟
قسورة: سكتت بس مو خوفًا منك، لان جوعان مالي خلكك خ اتعشة واترس طاقة واجيك
عقاب: حتى اركعك مية دفرة واوصلك لبيتك
قسورة: ميصير 99؟
عقاب: تدلل
كمت دفرته ركض داير مداير الغرفة واني وراه، خونكته وهو فاحط ضحك، ادور شرد للمطبخ والدكتورة اخترعت من شافتنا عبالها شو شبينا.
اماني: شكووو شبيكممم!!!!
قسورة: هذا رجلج الشفية حاطني ويدك بيه عبالك تايهله
عقاب: نجب سرسري!!
قسورة: هاي عليمن؟
عقاب: عليك
قسورة: هااا هيج صارت يا صاحبي؟
عقاب: اي عندك مانع؟
قسورة: مو ترا احجي؟
حجاها بتحدي
عقاب: شتحجي؟
قسورة: تعرف احم احم ..
ياشر بعيونه عالدكتورة الي تباوعلنا بـ ريب مستغربة حالتنا.
عقاب: حتى ادفنك بمكانك
قسورة: الله شهيد واروح للجنة كبل
عقاب: لا زبالة ونشمرت بحاويتها
قسورة: هاا..
خزرته شو هذا صاح.
قسورة: دكتووووورة!!!
باوعتله.
اماني: ها؟
صحت بيها
عقاب: لتكولين ها!
باوعتلي بعدم فهم، خزرتها برطمت بغير رضى.
قسورة: ركزي وياي دكتورة معليج بي
اماني: شكو؟
عقاب: انجب كتلك!!
قسورة: دكتورة تدرين بـعقاب يحـب...
سكت شوية وهو يباوعلي بخبث.
الدكتورة تسمع بترقب، واني احس كلبي حيطلع من مكانه وهذا الغبي ميرضى يسكت!!!
اماني: اي؟ شبي عقاب؟
قسورة: يحب الكرفس كلش
اخذت نفس براحة، اجة يجفص المطي ولو اني مكايله احبها هو بكيفه يحجي ..
بس محاولته هاي خوفتني!
اماني: متاكد؟ ما شفته ياكل خضرة ابد
قسورة: اي لعد شلون، شتكول عقاب؟
حجة بخبث وهو ضام ضحكته، ابتسمت بتزييف ورديت.
عقاب: اي كلش كلش احبببه
حجيت واني خازر نظراتي ع قسورة الي رجع ورة الدكتورة ويسويلي حركات تغيض بوجهه.
اماني: تمام لعد خ اشوف اذا جايب منها حتى احطها بالاكل.
عقاب: ع راحتج، قسورة تعال وياي
قسورة: لا صاحبي ما اجي، كافي ما شبعت سوالف، ساعد مرتك متستحي تخليها تشتغل وحدها وانت تكعد تاكل عالحاضر؟
خبلني ابن الاوادم منين ما اجي يفرها!
اماني: لا عادي قابل هو شكو
قسورة: ميخالف دكتورة التعاون حلو بين الزوجين
تنهدت .. حسابك عسير قسورة بس خ الزمك.
عقاب: جيب المواعين من يمك وسد حلكك لعد
قسورة: صايرين حبيب
جابهم وحطهن عالطاولة، وزعتهن وكتله بهمس.
عقاب: الا ازوعك مصارينك بسيطة
قسورة: ههههههههاي فنننننك
عقاب: فني؟ خوش اني اراويك
قسورة: انتظرك ع احر من الجمر حبيب
عقاب: افاا ما يكون خاطرك الا طيب يبعدهم كلهم
اجتي الدكتورة حطت الاكل.
اماني: قبل شوية تتعاركون وهسة تتغازلون؟ بيكم شي انتو؟
قسورة: ما بينا بالعكس كلش متصافين مو؟
باوعلي مبتسم، ضحكت وكمشت ايده عصرتها قوي واني مبتسم واكله.
عقاب: بالضبط، احنه هيج حتلو نتكاتل بلحظة، بالوراها نرجع مثلما جنة واحسن
اماني: شكد حلو هيج
عقاب: اي ولله وكلش حلو هم
شفته يجرجر بايده وكوة لازم روحه ميصرخ لان حرفيا جعصت اصابعه.
هديته وكعدت همسلي بغيض.
قسورة: شكد حقير
عقاب: منك نتعلم، وخليها ببالك هاي مجرد مقبلات
...
اماني
كملنا عشا حطيت المواعين بالغسالة.
وعقاب بالمطبخ يسوي كهوة.
سئلني قسورة.
قسورة: شصار ع ريما؟
اماني: مصار، شوفة عينك ما لحكت اشوفها واحجي وياها وحدنا
قسورة: تدرين شنو دكتورة
اماني: شنو
قسورة: تركي الموضوع لكتلج عليه
اماني: ليششش؟!! شوف مو عبالك متهاونة بس ولله وقت ماكو
قسورة: اعرف ودا اكلج عوفي، لان اني اريد اسعى بي
اماني: ما فهمت شلون، بس ع راحتك
قسورة: شكرًا لتفهمج
اماني: مسويت شي اصلا
ابتسمتله وهو هم، شوية واجة عقاب جايب الكهوة.
شربنا وخلصنا، قسورة راح واني مديت نفسي ع القنفة بحركة عشوائية.
اجة عقاب باوعلي بتعجب.
عقاب: هاي شدسوين؟
اماني: ظهري يوجعني
عقاب: بس مو زين هيج، كومي كومي
اماني: وين؟
عقاب: ننام وين يعني؟!
باستنكار كلت.
اماني: ننام؟ اني وانت؟ سوة؟
هز راسه وسوة حركة ضجر بوجهه وكال.
عقاب: يرادلي اجيب جلافة واجلف مخج حتى ينظف من هالافكار
كعدت ع حيلي.
اماني: واني شكتلك قابل وكبيت هو مجرد سؤال
عقاب: سؤال سخيف!
اماني: بالنسبة الك هيج، اما بالنسبة الي لا سؤال مهم وكلش مهم همات
عقاب: من يا ناحية مهم مفهمت؟!
كالها بنبرة لعوبة ووكف كدامي، حط ايديه بجيوبه ودنك راسه باتجاهي فنظراتنا اتلاكت.
اماني: تعرف لتغشم روحك
عقاب: تؤ تؤ.. ما اعرف .. عرفيـني!
دفعته ورحت للغرفة.
شنو معناها هالتصرفات هاي!!
ساعة يكلي اتفاق ويرفضني وساعة يتوددلي ويقربني منه!
مستحيل اخلي يلعب بمشاعري بس لان اعترفتله!
تمددت بمكاني عالكاع وفاتحة تلفوني اكلب بالـيوتيوب اغاني كاظم الساهر واسمع.
ورة شوية اجة عقاب، نام بفراشه درت وجهي عنه.
عقاب: نصي الصوت دكتورة
نصيته ورجعت عدت اغنية ماريدك بعد روح.
احسها تشبه حالتي وية عقاب.
ساعة اعصب واكرهه و اكوله 'ماريدك بعد روح ولا احبك بعد روح' ..
وساعة احبه واتمنى قُـربه واكوله 'ماشيلك وسط عيني بس بالگلب والروح'
عقاب: عليّ دكتورة
صفنت، هذا شبي؟ انصي لو اعلي؟
غلست ما سويت شي، شنو اظل بكيفه اني.
رد حجة بصوت عالي ورزن.
عقاب: علي صوت الاغنية دكتورة
رديت بعناد.
اماني: مااا اعليهاااا، عندك تلفون واسمع بي
عقاب: هاا اجتج الربع ساعة!!
كمت من مكاني وكتله باستنكار.
اماني: هاي عليه هالحجي؟
رد بنبرة باردة مستفزة خبلتني بالزايد.
عقاب: ع ابوية
اماني: عقااب!!
عقاب: ما اعتقد اكو دكتورة ثانية غيرج هنا! اكيد عليج ع منو لعد؟؟
اماني: انت وبعدين وياك! شنو نهاية هالاستفزاز اريد افتهم!!
بنفس البرود رد.
عقاب: ز
اماني: ها؟
عقاب: ز ز ما تعرفي؟
اماني: مدا افتهمك
عقاب: مو كلتي شنو نهاية الاستفزاز؟ كتلج حرف ز
ظليت ساكتة ممستوعبة كمية البرود والسخافة الي هو بيها!
اماني: متاكد انت صاحي؟
عقاب: يمكن
اماني: سخيف وطبعك ابرد من الثلج!!
عقاب: ادري، غيرها؟
اماني: احبك
عقاب: هم ادري غيرها؟
اماني: اكرهك
عقاب: اصدمج اكثر؟ ادري
اماني: شنو انت!! خبلتني عجزت افهمك وافهم نفسي وياك!!
حط راسه يم ركبتي وهمس
عقاب: ...........
..
انتهى!
لا تنسوا التصويت 🖤🦋
#الكاتبة نورمين