#خطأ_طبي «عقاب الاماني»
بقلــم : نورمين 🦋🖤
...
قسورة: هووب هوووب يمعودين صلوا ع محمد
مسحت ع وجهي بمحاولة لتهدئة نفسي ومشيت، مو وكت العرك هسة، وهي ما شاء الله واكفتلي عالحرف، وبس تعاند.
وصلنا لكبر امها لميري، اول مشافت الاسم مكتوب ويمه صورة الها، ظلت واكفة بمكانها وتبجي بصمت، خفنا عليها بس الدكتورة كالت تركوها.
شوية وتقربت حطت راسها عالكبر وكامت تبجي بصوت عالي وتشهك وتغص بالنفس، وتعيد جملة 'اسفـة ماما مو قصدي ولله، جنت العب وياج ما عبالي حتروحين صدك '
كسرت گلوبنا بحالتها التعبانة، ظلت ع هالوضع بالساعة، لحد ما هدأت من كيفها، ظلت تهمس بحجي ممفهوم بس عالاغلب تطلب السماح من امها.
الحجي عافها ع راحتها، بس وضعه جان مو احسن منها، هم خسر مرته وهم وضع بنته متأزم، الله يعينه شي مو سهل.
كوة كدرنا نجرها ونوخرها، لان مقبلت تتحرك، بس من كلتلها نشوف بيري نوعًا ما اقتنعت.
مجانت مكبرة اهلي بعيدة، فرحنه مشي واني جنت بالمقدمة
وية كل خطوة اتقدمها باتجاههم كلبي ينبض نبضة ضعف وألم.
وبودي ارجع عشر خطوات لورا..
اي مشتاقلهم بس كسرة كلبي من اشوفهم مصفوفين واحد بصف اللاخ وماخذهم التراب مني، شي يهد الحيل..!
وصلت.. وكفت من بعيد ودمعتي نزلت، حسيت بكلبي حيطك عليهم، مشتااااق الهم حد الموت.
رشيت مي وحطيت حنطة للحمام، وكعدت بصف كبر بيري.
قريت الفاتحة وعيوني حُمر، اجاهد جهاد مصاير بس في سبيل مـتنزل دموعي..
اخر مرة من اجيت شنو وعدتهم و شـحجيت؟
وهسة شـ نفذت؟!
اجت ميري كعدت بصفي وبجت.
مريم: انت هم تشتاقلهم مو؟!
هزيت راسي ودمعتي خانتني ونزلت..
حطت راسها ع جتفي وبلشت نوبة بكاء جديدة.
مريم: اني هم كلش اشتاقيت لماما ولبيري.. ليش عافونا وراحوا ميدرون بينـا نحبهم ونريدهم يظلون ويانا؟
مسحت ع راسها بهدوء.
عقاب: كلنا ع هالطريق حبيبتي، وهاي سنة الحياة ..
اجت الدكتورة قرت الفاتحة ووخرت، ودموعها تلوح بعيونها بحـزن..
الحجي وقسورة قروا الفاتحة ووكفوا ع صفحة يباوعولنا.
كملنا، رجعنا للسيارة ورحنا لمطعم، حطوا الاكل بس محد يشتهي ياكل، بس قسورة اكل، واني والدكتورة وميري اصلا اكلنا قبل لنطلع.
رحنه لفندق، لان بالليل طيارة ميري والحجي لأربيل، ومنها يسافرون لتركيا.
حجز قسورة ٣ غرف ، ميري وابوها بغرفة، واني والدكتورة غرفة وهو وحده بغرفة.
كلمن اخذ مفتاحه وراح لغرفته، اني اخذته و اشرت للدكتورة بـلحكيني، اجت وراي بهدوء.
مسمعت حسها ابد من اخر مرة تناكرنا بيها ولسة، طبيت للغرفة وهي ورايه، ذبيت الجاكيت والحذاء وتمددت عالجرباية بتعب.
ظلت واكفة بمكانها، باوعتلها باستغراب.
عقاب: جنج شمعة فكر، متكعدين؟
اماني: عدل الفاظك
كالتها بهدوء وكعدت، استغربت معقولة هاي الدكتورة؟!! شو لا عاندت لا خزرت.
عدلت كعدتي وسألتها.
عقاب: بيج شي؟
هزت راسها بلا وايديها ع خدودها.
عقاب: مصخنة؟
بوزت شفايفها وبعدها ع نفس حالتها.
عقاب: لعد ليش دسوين هيج؟
اماني: هيج
حسيتها مو طبيعية، كمت رحت يمها وخرت ايدها عن وجهها وحطيت ايدي ع خدها وبعدين ع كصتها، اتحسس حرارتها.
عقاب: جسمج حار، مصخنة
اماني: عادي
عقاب: انتِ شوكت تحطين عقلج براسج؟
اماني: عوفني فدوة
عقاب: دكتورة!
اماني: عقاب رجاءًا
ردت بجدية تترجاني، عفتها وطلعت ضايج، شبيها مصخنة مو من طلعنة مجان بيها شي؟!
نزلت دورت ع صيدلية جبت خافض حرارة وحبوب وصفلياهن الصيدلي ورجعتلها.
لكيتها ع نفس كعدتها، بس انتبهت لخدودها حمر طماطة، معقولة من الحرارة هيج انكلبت حالتها!
حطيت العلاكة بحضنها، رفعت راسها باوعتلي وكالت.
اماني: هاي شنو؟
علكت التلفزيون واخذت الرمونت، تمددت عالجرباية وانداريت عليها وكلت بلا اهتمام.
عقاب: متفجرات
اماني: ها؟
عقاب: ديربالج ليطكن عليج
اماني: كهكهكه متضحك
عقاب: شربي وسكتي
اماني: ليش تعبت نفسك هسة اصير زينة
عقاب: ميخالف احتياط
باوعتلي بنظرات تلمع.. درت وجهي عنها بسبب انو گلبي بدا يخفق بعلو، ما ردت افقد السيطرة ع نفسي.
عقاب تذكر الدكتورة أئمن شي الها تبتعد عنك ..
اماني: شكرًا الك عقاب
كالتها بأمتنان، رديت ببرود متعمد.
عقاب: مسويت شي مهم
اماني: حتى لو
باوعتلها بطرف عيني، ابتسمتلي درت وجهي عنها..
ابتسامتها مادري شتسوي بيه، تبهذل احوالي وتخليني اسرح بغير عالم..
اخذت الدوا وتمددت عالقنفة.
عقاب: تعالي هنا يابه ما نبزز ترا
اجتي تمشي ببطء مرتبكة.
اماني: مو هيج، بس ما ردت ازعجك
عقاب: ازعاج ايش؟ انمطـلي وسكتي
هزت راسها واجت بصفي، ابتعدت شوية سويتلها مكان.
جنت احاول اسوي نفسي عادي وممتأثر، مستمر اكلب بالتلفزيون وعلساس مندمج بنشرة الاخبار، واني جذب حتى كم مرة تنفست حسبتهن..
شي خارج عن ارادتي..
مو بيدي من تقترب مني اصير شخص ثاني..
وشكد احاول اتفادى هالمشاعر بس عبالك شغلة عناد ازيد ما انقص!
غفت .. اباوعلها بعيون جوعانة، مدري شجاني!
ملامحها وديعة وبيها لطافة ع نعومة تجيب التايه، واعترف جابتني سحل!
عاكدة حواجبها بألم، مررت ايدي ع خدها ناار!
تنهدت وكمت شكيت المنشفة، وحطيت مي بارد بطاسة وجبتها واجيت يمها.
سويتلها كمادات، ووية ما حطيت الخاولي ع كصتها، ارتدت وسوت حركة بوجهها، تدل ع ان البرودة قشعرت خلايا جسمها المصخن.
وظليت هيج بالـساعة، اغسللها وجهها وايديها ورگبتها واسوي كمادات، لحد ما صحصحت وفتحت عيونها مصدومة.
اماني: شدتـسوي؟!
عقاب: هاي بدال الـشكرًا؟
كعدت ع حيلها.
اماني: غير افتهم شسويت؟
وكع الخاولي من كصتها، ضحكت واخذته وية الطاسة حطيتهن عالميز.
اماني بأستنكار ممصدكة.
اماني: جنت تسويلي كماداتت؟؟؟!!!
عقاب: اي
فتحت حلكها بصدمة.. تريد تحجي وترجع تسده وتسكت.
اماني: ليش هيج سويت؟
نزعت البلوز وظليت بالبنطرون، تمددت بصفها تعبان هلكد ما مدنك وياها.
عقاب: شنو ليش غير مصخنة وغادية نار!
اماني: زين ليش نزعت ملابسك شو ارجع البسهن
هزيت راسي بعدم تصديق ضاحك.
عقاب: يمكن جان احسلي لو عايفج تونين من الصخونة
اماني: محد كلك سويلي كمادات
عقاب: هم صدك.. سوي زين وذب بالشط
اماني: حتى تحس بيه
عقاب: خوش
درت وجهي عنها، ندستني من كتفي.
عقاب: شتريدين يـ غضب الله!؟
اماني: البس بلوزك ونام
انداريت عليها.
عقاب: شيخصججج؟
اماني: شنو شيخصج نايم بصفي هيج مو عيب عليك؟
عقاب: معاجبج ذاك الحايط.. ركعي راسج بي
اماني: لا بلا!!
عقاب: اي ولله، فهسة اسكتي خ انخمد تعبان
اماني: متنام هيج
عقاب: دكتورة لتخليني اطلع خبالاتي عليج
بسخرية هزت نفسها عود دترجف وكالت.
اماني: يمةة كمت ارجف
عقاب: ها هيج صارت يعني، خووش
كلتها بوعيد.
رادت تحجي بس ما لحكت، جريتها لحضني بقوة، كامت تدفع بس اني مثبتها.
اماني: شكد ادبسز هدنيييي!!!
عقاب: اريد اشوف شلون ما انام هيج
اماني: اهووو، هدني يلا ونام شون متريد
عقاب: ما حزرتي.. لازم تدفعين ثمن طول لسانج هذا
اماني: ميخالف دهدني هسة
عقاب: ميصير
اماني: لييييش!!
عقاب: لان هذا هو الثمن، تظلين هيج
اماني: انت متاكد صاحي؟
عقاب: مثلما متاكد منج دكتورة شاطرة
كلتها بسخرية مبطنة، يعني ليسمعها يكول ديمدح، بس هي واقعًا استهزء بيها.
اماني: شقصدك؟
عقاب: شفهمتي انتِ؟
اماني: تقلد عليه
عقاب: اذن الصوج بيج، اني مدحتج بس انتِ ناقصج ثقة بنفسج شسويلج اذا اعتبرتيها ذم؟
اماني: كلاواتك هاي مو عليه
عقاب: لا عليج الله؟
دفعتني ووخرت، ابتسمت بأنتصار.
عقاب: طفلة!
ردت بانزعاج.
اماني: ع فكرة انت ابد متضحك، وهالتصرفات عيب
عقاب: شنو العيب؟ لان حضنتج؟ عادي مرتي
اماني: انت بكيفك تحلل وتحرم، ساعة تحضني بحجة مرتي وساعة تبعدني بحجة اتفاق
حجيت بملل
عقاب: ردينا
اماني: اييي مدام انت مدا تفهمني رح اظل ارجعك لهالنقطة كلما تحجي!!
كعدت ع حيلي وحجيت بحزم.
عقاب: لعد خلي نحسمها حتى ترتاحين وتفكين ياخة عني
اماني: تفضل احجي اسمعك
عقاب: زين منين ابدي؟
اماني: من يوم لتزوجتني
عقاب: زين، اكعدي خ نحجي
تربعت وكعدت كدامي عالجرباية.
اماني: وهاي كعدت
عقاب: عفية
انتجيت لورا ع التاج مال الجرباية وحجيت.
عقاب: اتفاق زواجج جان من تخطيط الحجي، تزوجتج حتى استخدمج كـورقة ضغط ع والدج لحتى ينضم لحزبنا ونضمن وجوده ويانه
اماني: بس علمود هيج؟
عقاب: اكيد لا، من ضمن هالاتفاق، اكتلج ورة ما تنتهي الانتخابات لحتى اخذ حق بيري منج، هم اريح گلبي و اخلي روح اختي ترتاح بكبرها..
ملامحها بهتت بصدمة وعيونها متوسعة بدهشة.
عقاب: بس هذا جان قبل
اماني: ليش شنو الي تغير هسة؟
عقاب: اني
صفنت بيه، رطبت شفتي بلساني وكملت.
عقاب: اني الي تغيرت، بهاي الفترة العشتها وياج اكتشفت انو اني ما اكدر اكتلج، وتخطيطي لقتلج جان ناتج عن لحظة عصبية لا اكثر، اني ما اكدر امد ايدي ع مرة.. لا عليج ولا ع غيرج.
اماني: هسة اني المفروض بشنو احس؟
بعدم ادراك سألت.
رفعت اكتافي بحركة عنوانها ما ادري، هزت راسها بلا وهي تباوعلي وعيونها جاحظة بصدمة.
عقاب: مو تريدين تعرفين؟ هاي حجيتلج
اماني: ما كتلي شنو نهايتي لعد؟
عقاب: بنهاية هالشهر حـ كون طلكتج ورجعتج لاهلج وبعدها انتِ حرة نفسج
اماني: بـ هالبساطة؟!
عقاب: لعد شتريدين مثلا؟ هاي حياتج ورح ارجعج الها واتمنى تسامحيني ع كلشي سيئ بدر مني الج.
هزت راسها بلا وبجت.
اماني: يعني انت جنت تريد تكتلني؟
هزيت راسي بالايجاب، ملامحي محتدة واحس بوخز مؤلم بگلبي واني احجيلها..
اماني: متاكد السبب انو انت مـ تمد ايدك ع مرة؟
عقاب: اكيد، ليش شنو عبالج لعد؟!!
اماني: مو لأني كتلك انو بيري جانت حتموت بتسمم حتى لو ما كطعت شريانها اني؟!!
صفكت ايديه ببعض ومسحت ع وجهي بأرهاق.
عقاب: لا دكتورة لا ..
بجت، حطت شعرها ورة اذنها ورجعت سألتني بنبرة عالية مقهورة.
اماني: اي اشفقت عليه، كلت خطيه واختي بالحالتين ميتة عليمن اكتلها خلي اكسب بيها ثواب!!
صحت بيها
عقاب: انجبي عاد كتلج لاا!!!
اماني: لعد شنوو فهمني!!! ليش تراجعت بسهولة؟ وينه عقابك القاسي اليييي؟!!!
عقاب: تنازلت عنه
اماني: ليييييش فهمنييي لييش!!!
عقاب: كتلج ليش، لتلحين عاد!
نترت بحدة، غطت ايديها بوجهها وبجت بصوت عالي.
ما اتحمل زعلها ولا اشوفها تبجي، ما اكدر اكو شي بداخلي يخليني انشعل بنار وانطفي!!
اخذت نفس، وتقربت عليها حضنتها لصدري.
عقاب: لو ادري بيج هيج تسوين، جان محجيت
اماني: اششش لتحجي شي انت.. لتحجيييي اسكتتت ..
ضربتني بخفة ع صدري وهي تبجي وتحجي بقهر، عجزت افهم رد فعلها القوي والحزين هذا شنو سببه!!
غير لازم تفرح انو حـتخلص مني!
ظلينا ع هالحالة قريب العشر دقايق.. دموعها بللت صدري العاري وكـربت گلبي كراب من الوجع.
وخرتها عني وحجيت بجدية.
عقاب: هسة غير افتهم عليمن ناصبة هالمناحة؟
اماني: مالك علاقة
عقاب: ميخالف، مسحي دموعج كافي
اماني: كتلك مالك علاقة!!
عقاب: ليش تخليني اشيلج واشمرج من البلكونة!
اماني: اششش.. اسكت فدوة..
كالت وحطت راسها ع صدري، ولفت أيديها ع ظهري.
اماني: انت واحد حقير تدري بروحك لو لا؟
ابتسمت.
عقاب: ادري
اماني: همزين تدري بروحك ..
عقاب: رحم الله امرءًا عرف قدر نفسه..
اماني: اخذ منك بس لسان..
جريتها صار وجهها كبال وجهي، ضيقت عيوني وسألت بشك.
عقاب: شكلتي؟
اماني: ما كلت شي
عقاب: عبالي
كمت لبست بلوزي ودا اطلع سألتني.
اماني: وين؟
عقاب: يم قسورة
اماني: شعندك وياه؟
رفعت حاجبي بشك.
عقاب: نعم؟
اماني: قصدي شتسوي رايحله ..!
عقاب: مليت مكابلج انتِ وميري والنهار كله تتباچن، سودتن عيشتي سودة بوجوهجن..
حجيتها بمزح شو هاي دمعت وردت تبجي، اهوو اني شحجاني.
تقربتلها مسحت دموعها وكلت بنبرة لطيفة ضاحكة.
عقاب: مسكارتج مو خوش نوعية
باوعتلي بتعجب، ضحكت وكومتها وديتها كدام المرايا، حطيت ايديه ع جتافاتها وكلت.
عقاب: چنچ باندا !
عبست بوجهها وحجت بمكر.
اماني: دمك ثكيل لتحاول متضحكني
عقاب: نصيحة، لتبجين ترا ماكو شي يستاهل دموعج هاي اولًا، و ثانيًا مكياجج اغلى من انو تخربي علمود واحد غبي
اماني: مثلك يعني
تنهدت ورديت بجدية.
عقاب: اي
ظلينا نباوع لبعض بالمراية لفترة، بعدين عفتها وطلعت..
كافي هيج عقاب اتركها ولا تمدلها ايدك بعد.. خلي تنساك.
...
قسورة
كلمن بغرفة واني ابن البطة السودة، وحدي مكابل الحيطان.
اخخ لو يمي ريما هسة، الا اطلع القضى والمضى منها..
بس لا خطية، متتحمل هاي بزر نستلة.
تمددت بعشوائية وحطيت مخدة جوا ايديه وفتحت التلفون، ما منزلة ستوري لسة..
شلون بيه وستورياتها صارت مصدر سعادتي..
عالاقل اشوف وجهها الحلو كل يوم اعرف اخبارها ..
زين الدكتورة مو كلتلي اساعدك؟ شمتانية لو نست!!
يلا من نطلع احاول اختلي بيها و اذكرها.
كلبت بالفديوهات وطلعت اغنية لكاظم الساهر ..
صارلي هالمغني ادمان من وراها، نص ستورياتها تتغزل بي وبحبه وبتقديره للمرأة والنص الثاني يومياتها واغانيه.
جانت اغنية احبيني بلا عقد..
اسمعها ومبتسم واتخيلها ببالي دتضحك لو معصبة وملامحها تنكررط..
واني اغنيلهيـا ..
شكد حلوة الاحلام، وشكد صعب تتحقق..
رجعت للصفحة الرئيسية، حملتها طلع اكو ستوري منها، فتحته متلهف وجانت صورة الها وهي دتشتغل بالجهاز..
امعنت النظر وگلبي سافر لدنيا ثانية بنبضاته، هاي حبيبته ..
مرضه وعلاجه..
حلمه وواقعه..
غربته ووطنه..
سديت التلفون وغمضت عيوني متنهد، على امل فد يوم تتحقق امنيتي وتحبني ريمـة گلبي.
دخلت لعالم النوم وزارتني ريما بالحلم.
مادري شجان اكو يمي لان اصلا ما مهتم اعرف، عيني وتركيزي وادراكي كله ع ريري الي كاعدة كبالي.
ركزت انظاري زين داير مدايري، كاعدين بمكان كله خضار مثل الحديقة، وريما كاعدة عالمرجوحة ودتصيحلي حتى امرجحها.
رحتلها مكيف بس فجأة تلاشى الحلم وفزيت، ع صوت الباب تندك.
قسورة: الله يطيح حظك كائنًا من كنت..
كلت بسخط وكمت فتحت الباب.
طلع عقاب بوجهي، لميت ملامحي وكلت بغيض.
قسورة: هذا انت!!!
مشيت وهو طب وراي وسد باب الغرفة.
عقاب: لا خيالي، شبيك مغندب؟
قسورة: غير كعدتني من احلى حلم حلمته بحياتي
عقاب: لازم اكو ريما بالموضوع..
قسورة: لعد ياهية غيرها ساكنة گلبي وعقلي!
عقاب: استقر يـ العاشق الولهان
كعد عالقنفة كبالي واني عالجرباية وحطيت المخدة بحضني.
قسورة: حبيبتك يمك طبعًا متحس بيه وتقلد ابو راس
عقاب: ليسمعك يصدكك، ميدري كله عرك ومرافس
قسورة: من ايدك غير..
عقاب: ها هيج يعني؟
قسورة: اي ولله تريد الصدك غير؟ كله من ايدك، بحجاية وحدة منك تكدر تغير حالكم 360 درجة
عقاب: هنا نقطة خلافنا، الموضوع صعب قسورة وانت مدا تستوعب هالشي
قسورة: صعب اي وياك، بس مو مستحيل، تكدر تلكة حل وسط وتتعود عليه، بس انت مصعبها ومخليها فد بعبع
عقاب: صدك لو كال كريم العراقي.. لا تشكو للناس جرحًا انت صاحبهُ.. لا يؤلم الجرحُ الا من به ألمُ..
قسورة: الظاهر هرمون كاظم الساهر صاعد، شكو؟
حجالي كلشي صار وياه ويه الدكتورة، شفت بعيون عقاب حزن، الغبي يحبها وواكع ع وجهه بس مدا يصدك هالشي، وحاطلي موضوع بيري عذر!
عقاب: وهاي جيتي الك منها ..
قسورة: مادري شكلك، عاشت ايدك لو الله يطيح حظك
عقاب: ليش يمه؟
قسورة: شلون تكللها مخطط اكتلج؟
عقاب: لعد شتريد اجذب مثلا؟
قسورة: لا هاي ولا هاي، مو انت تكلي اكمش العصا من المنتصف! شبيك كامشها بالاعوج هسة؟
عقاب: تحجي عدل لو اكوم ارفس ببطنك؟!!
قسورة: يعني شلون نبطل ما نحجي؟
عقاب: احجي مثل الاوادم لتظل تمصرن
قسورة: هاهيه بس ليضوج الحلو
عقاب: تشتري المهانة مشترة ولله
قسورة: اهوووو هسة ليكلك حلو هم متقبل عليه، شون مشكلة يالله
عقاب: اي وكافي يلا نجب مو صوجك، صوج الاجة يمك
قسورة: قابل ميت عليك اني، هو انت اجيت وكعدتني من حلميييييي!! تعرف شنو يعنيييي؟؟ لو ادفنك هسة هم حلال بيك الدفن
عقاب: شكد سخيف
قسورة: اشكرك، المهم نرجع لموضوعنا
عقاب: الي هو؟
قسورة: يعني البنية من غير شي تتراجف منك، تجي تكللها جنت مخطط اكتلج؟ لا وجايني مكيف بروحك كايللها الحقيقة!!
عقاب: اي لعد ليش
قسورة: ميصير حبيب، لو كايللها درت اعاقبج فترة واشوفج الويل، بيها باب وجواب، بس قتل؟ ترا صعبة وهاي بزر نستلة متشوفها چلبت بيك تتباچة
عقاب: ما اتوقع هيج
قسورة: اسكت انت وتوقعاتك، هو انت شكول تحبك وحدة؟ جنك بومة مبوز طول الوكت
عقاب: علساس انت شلونك، خشمك شكبرة جنك نقار الخشب
قسورة: لا تتنمر هاي خلقة الله
عقاب: لعد انت هم لـ تتنمر ع خلقة الله
قسورة: ما متنمر ع خلقتك الزفرة، تنمرت ع طبعك الجاد والكئيب
عقاب: نفس الشي
قسورة: لا عيني فرق السما والكاع، خلقتك هاي من الله منكدر نتحكم بيها، بس طبعك هذا منك، نكدر نغيره او بالاصح تكدر انت تغيره، اذا جنت تريد طبعا
عقاب: رحم الله والديك واني ما اريد
قسورة: اهمداك يحظي
شمرني بالمزهرية دنكت اجت بتاج الجرباية صارت ثريد، متت ضحك عليه، مفور ومعصب بس مسوي روحه عادي وهو هذا الصح.
شكد حاولت اقنعه يباوع للموضوع من غير جهة، ماكو معاند.
...
اماني
كلام عقاب خوفني، بجاني وقهرني كلش كلش.
مو لشي غير لان حيطلكني.. ورح افاركه نهاية هالشهر!
يعني مبقالي وياه بس 3 اسابيع!!
كل الكلام الكاله ومُخططه لقتلي جان عادي عندي، عبالك ادري لان عاذرته.
تذكرت اهتمامه بيه من صخنت، شلون كاعد يم راسي ويسويلي كمادات وخايف عليه، هالشي بحد ذاته خلا كلبي يرفرف..
اقل تصرف منه يسعدني ويطيرني بالفضاء من الفرحة، بس هو بارد اتجاهي!
وكلامه الاخير عن الانفصال، خلا كل احلامي وتخيلاتي بحبه الي تتلاشى، وتتطشر بالكاع مثل قطعة كزاز مكسورة ..
الي بداخلي تجاهه، تعدى مرحلة الحُب ووصل مرحلة مدا اكدر اسيطر عليه ولا دا اكدر اتحكم بروحي تجاهه..
حضنه لمساته كلامه ابتسامته شغلات گلبي يرفع كدامها راية الهزيمة، ويستسلم الها بكل سعة صدر..!
زين شلون حـ عيش بدونه؟
لهالدرجة اني مالي قيمة بحياته؟
ولا الي تأثير ع حياته ولو بسيط؟!!!
ليش هيج ميحبني ولا يحس بيه؟
شورطك يگلبي وحبيت الميشوفك كدامه اصلًـا..؟!
شوازاني وحبيته وشمرت روحي بـنار الحُب المستحيل!!؟
ظليت متمددة بالفراش واتخيل روحي بحضنه الدافي وكلبي ما وكف من النبضات الحزينة.
احسه ديضخ الدم بتعب..
هيج من لاچارة..
ورة وقت طويل، اجة عقاب.
عقاب: كومي بدلي بسرعه، راجعين
اماني: تمام
بدلت وطلعنا، وصلوا الحجي ومريم لمطار النجف وودعوهم، مريم حضنتني وودعتني بطريقة صدمتني وصدمت الكل!
مريم: ديري بالج ع عقاب، ترا خطية يشتاق لامه ولبيري ..
همستلي توصيني علي، حسيت الدمعة وكفت بباب عيني، بس لا مو مال ارجع ابجي هسة شطلعت هاي.
هزيتلها راسي، ودعت عقاب واكيد حضنته ورجعت حضنت قسورة هم.
الظاهر الحجي فول سبورت مدري هم صدك علاقتهم قوية.
راحوا واحنه رجعنا لبغداد، الطريق كله سكوت وحتى اذا حجوا عقاب وقسورة فعلمود الشغل ماكو شي مهم.
واني ضاربتلي صفنة عالشباك چني عجوز حايرة بزمانها..
طبينا بغداد اخيرًا، اخذت نفس بصوت عالي لدرجة عقاب التفتلي متعجب وقسورة يباوعلي من مراية السايق هم مستغرب.
احس روحي مختنكة، من غير شي من اول اليوم كلبي مورم وادور صارت سالفة عقاب، احس انكتمت صمامات كلبي عالاخير وحتى النفس بألف يا علي يلا احصله.
نزل عقاب يجيب مي، فـ قسورة استغل الفرصة وكلي.
قسورة: خو ما نسيتي موضوعنا دكتورة؟
اماني: لا بس مصارت فرصة، ان شاء الله منا وهيج
قسورة: ها خير ان شاء الله
اجة عقاب، انطاني المي خليته بحضني ورجعت ضربت صفنة لحدما وصلنا لبيتنا.
نزلت اني وعقاب، ودعنا قسورة وطبينا للبيت، رحت غسلت وكعدت بالصالة.
هو راح يسبح لان سمعت صوت الدوش عالي، ابتسمت بحسرة..
ياريت لو عندي ربع بروده هذا، بس منين يحسرة..
آكل بروحي اكل من القهر، وفوكاها لازم ما ابين هالشي.
كمت اريد اروح للغرفة اتمدد، دخت فكعدت بالكاع.
من ريوك الصبح ولسة، وفوكاها حرك الاعصاب اكيد يصير هيج!!
طلع عقاب من الحمام، شافني هيج اجة عليه وسأل بقلق.
عقاب: شبيج ليش كاعدة هنا؟!
اماني: مالك علاقة
عقاب: مماكلة من الصبح مو؟
صحت بي.
اماني: كتلك مالك علاقة بييييييه!!!!
عقاب: تمام ع راحتج
عافني وراح للغرفة، نزلت مني دمعة مقهورة ومسحتها بساع.
عليمن ابجي وهو ع ابرد ما عنده.
كمت بيه ما بيه اريد اروح للمطبخ اكل شغلة مالحة لان اكيد ضغطي هبط.
ما حسيت الا الدنيا اسودت بعيني واختل توازني، الدنيا كامت تفتر ومن بعدها ما اتذكر شصار..
عقاب
دا البس بالغرفة وسمعت صوت قوي، رجعت للصالة شفت الدكتورة واكعة ومغمى عليها.
ركضتلها بقلق و شلتها حطيتها عالقنفة.
ادري بيها دتعاند حتى ويه روحها الغبية!!
عقاب: اوووف منج دكتوووورة اووووف!!!
...
انتهى
لا تنسوا التصويت 🖤🦋
#الكاتبة نورمين