#خطأ_طبي «عقاب الاماني»
بقلــم : نورمين 🦋🖤
...
نترت بي.
اماني: انتَ خبلتني انتَ!!
عقاب: لا اله الا الله وج يابة تعوذي من الشيطان وكعدي عاقلة
اماني: حيصير بيه توحد من وراك، حابسني هنا النهار كله، وفوكاها مغلس ع دوامي رغم وعدتني ترجعني اله، وما اشوفك بس بالليل، ساعة تصير حباب وساعة تكلب عليه، شنو دنلعب لعبة توم وجيري احنه؟ ومن اسئلك بشنو دتفكر؟ احنه شنو نهايتنا؟ كلشي متحجي ومعندك غير حجاية بعدين، انت الي متفهمني شنو ليوجعك؟ بعدين شبييك من يوم طلعنا ولسة متحاجيني؟!
حجيت بأنفعال وعيوني صاروا حُمر، مودي انكلب كله.
عقاب: ما ناسي وعدي الج هاي اولًا، ثانيًا كلشي دا اسوي هسة هو لمصلحتج وبعدين حتتأكدين من هالشي
اماني: هم بعدين هم بعدييييين!!!!
حجيت بحسرة وهو هز راسه، وملامحه مبين عليها التأثر، اي هو متعاطف وياي واضح من نظراته! بس شنو قصده بأنو كلشي لمصلحتي؟ معقولة هالحيرة والتخبط العايشته بيه مصلحة الي!!!؟
راح للغرفة، طفيت التلفزيون وكعدت بالكاع، شعور صعب .. لما تحس كلشي متفق انو يزعلك وماكو شخص واحد يكدر يفرحك، وحتى الي تحبه هم متجاهلك ..
لليل كُلش، جنت فاتحة كام وية ريما ودنسولف.
ريما: شلونه الدوام ؟
اماني: لسة مداومت
ريما: شوكت تبلشين لعد؟
ابتسمت بسخرية وكلت مقتبسة من كلام عقاب
اماني: هه بعدين
ريما: شنو بعدين، لشوكت يعني هاي البعدين؟ صارلج شهرين ممداومة!
اماني: علمي علمج
ريما: متسألين باتمـانج لعد؟
اماني: ماحجي وياه
ببرود حجيت، صدك احس نفسي كارهته ع كمية البرود لعنده.
ريما: لتصيرين ثولة، متحجين وياه هاي شي بينكم، شغلج شدخله؟
اماني: مو يا اختي الذكية، ما اريد اتناقش وياه
ريما: زين ليش؟ ع شنو متعاركين وهيج قافلة عليه؟
اماني: وللهـي من يوم طلعنا...
قاطعني صوت عقاب الي كال بتنبيه.
عقاب: لسانج دكتورة!!!
جفلت من مكاني وحتى التلفون وكع مني، دنكت سديته بوجه ريما وحطيته ورايه، وسويت نفسي بريئة، لان نظراته الحادة اخترقتني وخوفتني!
عقاب: شكايلج اني؟
كال وهو يمشي جاي باتجاهي
اماني: شكايل؟
عقاب: اي شي يصير بيننا متحجي لكائن من يكون! حتى لو اشيلج فلقة هم متشكين لاحد مو لو اني مشتبه؟
اماني: اي ويعني؟ ااقصد اني ادري ليش دتكولي هالكلام هسه؟
عقاب: تعرفين ليش ميحتاج تستغـبين
كالها بنص وجهي بسخرية ودار وجهه، مشى كم خطوة ورجع التفتلي نص التفاتة وكال.
عقاب: جهزي نفسج باجر اخذج للدوام
توسعت عيوني بصدمة وتحولت كآبتي لفرحة جبيرةةة!! اخييييرا رح ارجع لشغلي!!!
اماني: يااا الله شكرررا هواااااييي عقااب
ابتسملي بتزييف، شرب مي ورجع لغرفته، بس اني ما اهتميت لان هاللحظة التاريخية لازم تتوثق!! مو مال اخربها بحدية استاذ عقاب!
دك تلفوني ريما، فتحته والابتسامة شاكة وجهي من الطول للطول.
ريما: يمه عزا لعزاك باتمان خبلت اختي، ولج احجي شسوالج من عاط!؟ وج يمةةةة لحكييي بنتج
كامت من مكانها تصيح لامي ومسوية جو لنفسها، بحيث حتى ما انطتني مجال احجي!!
اماني: دسمعي اول شييي، باجر اداوم ريريييييي!
ريما: جذابة، هستوج تكولين متدرين شوكت!!
اماني: اي مو هسة عقاب اجة كلي حضري نفسج لباجر!
ريما: ولله عمي زين، مبروك مقدمًا ولو مادري ع شنو بس يلا
اماني: ههههههه شكرا شكرررا
ريما: لا يمه ماكو شي، هاي بتج حترجع لشغلها باجر وردت ابشرج
اسمعها تحجي ويه ماما، الي كيفت وكامت تدعيلي، زادت فرحتي وظليت اكمز حايرة شون اعبر عن فرحتي!
رحت للغرفة، دكيت الباب ع كيف ومديت راسي، جان عقاب يباوعلي ببرود.
عقاب: شعجب دكيتي الباب؟
اماني: مدريني شو طلعت وحدها
دار وجهه عالتلفون، مشيت ع كيف صرت يمه.
تحمحمت كم مرة حتى ينتبهلي او يياوع عليه بس ماكو، تركيزه كله بالفون يراسل واصابعه تتحرك بسرعة!!! شكو والمن ديحاجي لحتى ميكدر يرمش حتى!
اماني: احممممممم احمممممممم
تحمحمت بكل قوتي لدرجة حسيت زردومي شحط، بس يلا كله يهون حتى ينتبه الافندي.
عقاب: شكو شبيج تمعمعين؟
اماني: احترم نفسك اول شي
ضحك بسخرية ورجع يباوع عالفون وكال.
عقاب: زين، وثاني شي؟
اماني: ممكن تباوع بوجهي وتحترمني من احجي وياك ؟
تنهد، سد التلفون وكال بحدة.
عقاب: تفضلي احجي شعندج
اماني: بس ع كيفك ترا مكتلك شي يعصب
رد بأنفعال وعكد حواجبه
عقاب: يابه مية مرة كايلج هذا صوتي الطبيعي، ممعصب!
اماني: لا كلش واضح اصلا
عقاب: فوتي بالنظيف ترا مشغول
كتله بشك لان عينه عالفون.
اماني: بيمن مشغول، ويامن دتحجي بالفون؟
عقاب: شعليج انتِ؟
اماني: شنو شعليه غير انت زوجي!!
عقاب: هه، شغل باباتي شغل
رفعت حاجبي بشك، ممصدكته خاصة من يستخدم هالاسلوب المستصغر تجاهي.
عقاب: عندج شي بعد؟
حجيت بأستعجال.
اماني: ااا اجيت اكولك شكرًا ع كلشي دتسويه الي، وشكرا لان قبلت ارجع لشغلي
عقاب: مو مهم يابه، تدللين انتِ
ابتسمت، اخخ عقاب كال تدللين بنبرة حلوة والحجاية نزلت جنها عسل ع گلبي!!
عفته ورحت لمكاني، تمددت مبتسمة وعيوني عالسكف، شكد متحمسة ارجع لشغلي ولحياتي!! دا احس روحي من كد السعادة، اشبه الجهال اول يوم دوام روضة هههه.
كعدت الصبح ع صوت عقاب، ابتسمت وكتله.
اماني: صباح الخير
عقاب: صباح الخيرات دكتورة
تمغطت بمكاني وهو واكف يختار ملابسه حتى يبدل.
اماني: منو ياخذني؟
بدون ميلتفتلي كال.
عقاب: اني طبعًا
رفعت حواجبي وكلت بتفهم.
اماني: اهاا
سكتت شوية ورجعت سألته.
اماني: مكتلي شلون رهمت ارجع للشغل بعد كل هالمدة؟
اندارلي وكال بضجر.
عقاب: دكومي غسلي وجهج لمي كفشتج وبدلي، ترا اخلص كبل اطلع ما اظل انتظرج، وتروح عليج وبكيفج بعد
وسعت عيوني بصدمة ممزوجة بالخجل، ياا هذا شبي وياي!! حطيت ايديه ع شعري ارتب بي لان صدك مكفش وصاير جنه شمس.
اماني: شدعوة عليك كل هالحجي شكتلك هسة اني!
عقاب: يابة اني الاعرفه الواحد يكعد يغسل وجهه يشرب مي، مو اول ميكوم يبلش تحقيق ولغوة!
اماني: يعني هسة اني الغي؟
عقاب: لا اني
اماني: رح اسكت تدري ليش؟
باوعلي بحدة.
اماني: لان مزاجي حلو وما اريد اعكره من الصبح وياك
عقاب: تسوين فضل ولله
خزرته وكمت، باوعت لروحي بالمراية، اخبل ولله شبي عقاب وياي لعد!
برطمت بضوجة، غسلت وجهي وطبيت اخذت ملابسي من الغرفة، جان عقاب ديلبس بلوزه، تعديته وطلعت ببرود.
بدلت بالحمام وطلعت، لبست كوت رمادي للركبة وبوت عالي اسود وبنطرون اسود جينز، وشعري بعدني مادري شسوي بي.
طبيت للغرفة وعقاب باوعلي بأعجاب، ابتسمت بثقة ووكفت بصفه اباوع لنفسي بالمراية.
مشطت شعري ورجعته لورا، باوعت لروحي هيج حلو؟ اممم ممقتنعة، رجعته لكدام شو هم ممقتنعة، اخذت باند اريد اشيله بس ما احس الا ايدي حاصرتها ايد عقاب!
باوعتله بتعجب، خزرني واخذ الباند من ايدي.
عقاب: عوفي هيج لتربطيه
اماني: ما عاجبني صاير هوسة
عقاب: لا بالعكس
حجيت بعناد وجريت ايدي منه.
اماني: شكرًا لاهتمامك بس اني ممرتاحه هيج بي اريد اربطه
عقاب: متربطيه وانتهى الحجي! وديربالج تعاندين
خبلني!!! شنو مرض التملك والانانية هذا الي عنده!! من صدك دكتاتور ظالم ومتطرف برأيه.
اماني: مو بكيفك هي، كافي مستصغرني وتمشيني ع كيفك، اني مو لعبة بايدك، هم عندي راي وكيان خاص بيه افهم عاد!!
عقاب: لتخليني احرك ابو الكيان هسة واكعدج هنا!!
اماني: تهددني يعني؟
عقاب: شلون متفهميها فهميها، هذا لعندي
اماني: تمام، بطلت ماريد اداوم لعد
كلتها بوجهه بتحدي ورحت للصالة، ولله يا الله عباله يساومني ويخليني اخضعله!
...
عقاب
استغفر الله، شتحاجيها هاي بلا!!
شلون افهمها انو السالفة مو شغلة عناد؟
رحت وراها، لكيتها كاعدة بالصالة وتهز برجليها بتوتر.
عقاب: دكتورة اسمعيني شوية
ما باوعتلي، كعدت كدامها واخذت نفس، طول بالك عقاب هم حقها خبلتها بأوامرك المتخلص!
عقاب: دكتورة!
رفعت راسها وكالت بنفاذ صبر.
اماني: نعم نعم شكووو ادوررر؟!!!
عقاب: صوتج نصي، لتعلي عليه
اماني: هه صار حضرة الدكتاتور وبعد؟
تنهدت.
عقاب: جيبي المشط وتعالي
بتعجب كالت.
اماني: عفوًا؟
عقاب: سمعتي شكلت، يلا بساع ترا تأخرنا
باوعت داير مدايرها بضجر، تنهدت وكامت جابت المشط ورجعت، انطتنياه وكعدت بمكانها.
عقاب: تعاي هنا
اماني: ليش؟
عقاب: الف لعنة عليك يلي ببالي، تعاي يابه فضيني ادري امشطلج عن بعُد؟
اماني: وشكو تمشطلي، لا شكرا ماريد ودوام هم ما اداوم
عقاب: صمي حلكج وتعاي قبلّا اتصرف تصرف ميعجبج
اماني: وشنو الفرق؟ بالحالتين اني مجبورة ع شي ماريده!
عقاب: بس الوسيلة تختلف، والنتائج هم!
باوعتلي بحقد وكامت، اشرتلها تكعد كبالي عالكاع، حتى اسيطر ع شعرها، نفذت وبلشت امشطلها ع كيف، اخذت خصلتين من جوانب شعرها ورجعتهن لورا، حطيتلهن قراصة بيري الي حاطها بجيبي كذكرى منها.
كملت اخيرًا بعد تذمراتها.
اماني: ترا هذا كله الي دتسوي ميغير رأيي
باوعتلها وابتسمت، هالتسريحة بيري جانت كلش تحبها، وجنت اسويلهيا دوم لان هي متسيطر، وهسة كُلش لايكة ع الدكتورة!
عقاب: دشوفي روحج وبعدين نقرر
بشك ردت.
اماني: خو ما لعبت بشعري؟
عقاب: فضيني يا يابه ترا تعبتيني من الصبح
سكتت وراحت باوعت بالمراية، حطت ايديها عالتسريحة تلمستها، اندارت شافت القراصة وباوعتلي وهي مبتسمة.
عقاب: ها وهسة بعدج نفس القرار؟
هزت راسها بلا وهي مبتسمة
اماني: كلش حبيتها عاشت ايدك
كمت رحت يمها.
عقاب: تدللين ويلا امشينا
اماني: بس اجيب جنطتي واجي.
هزيتلها راسي وطلعت شغلت السيارة، شوية واجت، محجت شي طول الوقت وجانت تباوع عالشارع، ابتسمت ع منظرها ورجعت اكمل سياقة.
طبكت يم مطعم، نزلنا نتريك.
اماني: مو كلت تأخرنا؟
عقاب: من وراج غير
اماني: اني شعليه
عقاب: عالعموم، نتريك وكلمن لشغله
اماني: تمام بس شلون بالرجعة؟
عقاب: اني ارجعلج يابه لتشيلين هم المواصلات
اماني: سؤال ثاني؟
عقاب: جواب ثاني
ابتسمت وحجت.
اماني: شلون دبرت الموضوع واني صار اكثر من شهرين ممداومة؟
عقاب: اذا ناسية اذكرج، عطلة زواجنا هاي
كورت حلكها بصدمة.
اماني: اهااا مو اكول ..
ابتسمت وعدلت كعدتي لان الاكل وصل.
عقاب: اي
واحنه دنتريك، رجعت سألت.
اماني: اممم بس اجازة الزوجية مو هواي حسب علمي؟
عقاب: وانتِ لسة بالج هناك؟
هزت راسها، جاوبتها ببساطة وشربت جاي.
عقاب: واسطات
اماني: هم صدك
عقاب: كملي اكلج بسرعة
اماني: خلصت معندي شي
عقاب: يلا لعد
طلبت الحساب وكمنه، بالطريق جانت تباوع ع الشوارع متعجبة.
اماني: هذا مو طريق المستشفى مالتي!
عقاب: ادري
اماني: وين رايحين لعد؟
عقاب: مستشفى جديدة وقريبة ع البيت
اماني: ياا شلون واني مداومت هناك غير يوم!
عقاب: واسطات يابه
ضحكت ع ردة فعلها، وصلتها وقبل لتنزل وصيتها.
عقاب: من تخلصين دكي عليه
اماني: تمام
فتحت الباب دتنزل، كمشت ايدها، باوعتلي مستغربة.
عقاب: هاج
مديتلها فلوس، باوعتلهن ورجعت باوعتلي، وكالت بعزة نفس.
اماني: شكرًا ما احتاجهن
اخذت ايدها وحطيتهن بيها.
عقاب: هن مو هواي اصلا، خليهن يمج خاف يصير ميصير تحتاجين شي
باوعتلي بامتنان ونزلت.
اماني: بيباي.
عقاب: الله وياج
سدت باب السيارة، باوعتلها طبت للمستشفى وانطلقت للمكتب.
اول ما وصلت، تلكوني شاهين وضرغام.
شاهين: شوكت تحس بينه وتتحرك عاد؟
ضرغام: اني احاجي الحجي، ما اكدر انتظر استاذ عقاب ووقته المناسب بعد
عقاب: نجب انت وياه، عدنه شغل مهم هالفترة، عليش مستعجلين شو البنات ومطايرات!
ليث: مو بلا، شو هم مينتظرون بعد
ضرغام: حير بلفتك ونجب لتدخل
ليث: ممنون منك
ضرغام: تدلل انت
عقاب: وجع شون ملگى من الصبح، وخروا شو
عفتهم يصايحون وطبيت، سلمت ع قسورة وكعدنا بمكتبي.
قسورة: شلونك اليوم شو وجهك متفح
حجاها وغمز
عقاب: الحمدلله وماكو شي من الي ببالك
قسورة: هو شنو الي ببالي؟ وين راح بالك انت ها؟
عقاب: عود تفرها عليه؟ تحلم، ويلا تكسح منا عندي هواي شغل
قسورة: زين بالجذب كلي شلونك شخبارك، حسسني انو اني مهم عندك يخي
عقاب: ديلا شلونك؟
قسورة: مو زين وحال الضيم حالي
بضوجة رديت.
عقاب: هم بچى
قسورة: ولك مشتاقلها حس بيه خربحظي
عقاب: مصارلك اسبوع من شفتها، اثكل شوية
قسورة: شوف هذا يربي، ولك دقايق راحت اختارت ملابس وية اختها اشتاقيتلها، مو بعد هسة وصار 4 ايام
عقاب: والمطلوب مني شنو؟
قسورة: متجي لبيتكم هي؟
عقاب: مرات اي
قسورة: لعد متخابرني متكلي يحظيييييي؟؟
عقاب: اششش خفة هالحلك، وشسوي كايلك مثلا؟
قسورة: جا هي هاي خوتنا؟
عقاب: مو جنك صدكت روحك؟ اصحى اني خليتك تشوفها مرة لان جنت ضايج وجان ميلادك فما حبيت اضوجك اكثر، اما هسة فتنجب وتسكت مالك علاقة بالبنية
قسورة: خاب مو بيدي مو بيدييي!!! متربعة بگلبي وبنص عقلي بحيث افكاري وحياتي كلها عبارة عن ريما، تخيل شنو الاضرب من هذا كله؟
بملل.
عقاب: شنو؟
قسورة: الگلب من يدك مو يسوي دم دم ..؟ اني گلبي يسوي ري ري..
ضحكت بصوت عالي وهو عبس
قسورة: اضحك اضحك شكو عليك، هو الرجليه بالشمس مثل الرجليه بالنار ..
عقاب: هسة منو اشتغل عنده هرمون كاظم الساهر؟
قسورة: اشش عقاب ابد مو وكت شقاك، تعبان ضايج مختنك كاره الدنيا من صدك
عقاب: ايبااه، خلي اوكفلك الارضية وانزل منها فد مرة
قسورة: ولله ياريت
عقاب: ههههههاي
...
اماني
خلص اليوم واني بردهة النساء، جنت اشتغل واني مستمتعة، لان من صدك اشتاقيت لشغلي، ما توقعت نفسي حشتاق للطب بعد كل الصار، وخاصة ورة الخطأ الطبي السويته.
تعرفت ع ممرضة حبابة اسمها شهد، والاطباء هنا جديين ومعدهم شقة او تهاون بحياة المرضى، حسيت بالراحة اكثر واني اشوف حس المسؤولية بعده موجود، صدك لو خُليـت قُلـِبت.
ساعة 1 ونص، طلعت كعدت بالحديقة، الجو حلو والسما كلها غيوم ومنظرها يجنن وية الورد والشجر، نفسيتي ارتاحت كُلش ودكيت ع عقاب.
اماني: الو
عقاب: هلا يابه
اماني: ااا اكولك.. اني خلصت دوام
عقاب: مسافة الطريق واكون يمج، بس ارمشلج طلعيلي
اماني: تمام
سده، ظليت اباوع ع جهة الاتصال وصافنة، ضجت وحسيت مودي انكلب كله، ليش ما سألني شلونج شسويتي شون جان يومج الاول؟
وعليمن يسأل، اجذب ع روحي قابل، ادري بي يكرهني وميطيقني، بس شيقنع گلبي الراكض ورة كلمة حلوة منه!
طبيت اخذت جنطتي وسلمت ع الدكتورات الي بالغرفة، ووكفت يم الاستعلامات، اجة دكتور ساري، الي عرفته انو هو زميلي بالاختصاص -القلبية-.
ساري: شعجب باقية هنا لسة؟
شو هذا ذب ميانة من اولها وكام يتدخل!
اماني: منتظرة ياخذوني ..
ماعرف ليش ترددت اكوله منتظرة زوجي.. خطر ببالي عقاب، من كلي لتكولين لاحد اني زوجج وتتفاخرين بهالشي.
ساري: امشي اني اوصلج بطريقي تأخروا عليج
اماني: لا شكرًا ما اريد ازحمك
ساري: زحمة ايش يمعوده، غير احنه زملاء
اماني: حتلو، افضل انتظر..
داحجي وقاطعتني دكة الفون، باوعت عقاب.
اماني: وصلوا، من رخصتك
ساري: براحتج
مشيت من يمه، هو لطيف كلش بس اني مدري شبيه، كمت اخاف واتحسس من كل الناس، بعد الصار وهم گلبي يدك لغير انسان.
طلعت من المستشفى، شفت سيارة عقاب كدام باب المستشفى وابو الامنية ديتعارك وياه واصواتهم عالية.
-ممنوع تطبك سيارتك هنا
عقاب: ميخالف عالمرة التجي عود
-حركها منا لا اتخذ اجراء بحقك
عقاب: يابة مو منتظر المدام، متطول كتلك هسة تجي، متكلي شچلبت!
-ممنوع يا اخي متفهم انت
عقاب: ها اها اجت مرتي ورح اروح، ارتاح
حجاها بجزع واني صعدت، الظاهر صارلهم هواي ع هالحالة وعقاب مغلس.
صعد ينفخ بغضب، ساق بهدوء، شوية وحسيته رجع طبيعي، بس هذا كله واني اباوع عالطريق بسكوت ومحاجية شي، حتى سلام ما سلمت عليه، لان جان معصب يخوف.
كسر الصمت لما سألني بنبرته العميقة.
عقاب: شلون جان يومج؟
ابتسمت ع سؤاله وكلبي رفرف، طلع مهتم مو مثلما ببالي!!
اماني: حلو كلش واتونست بصراحة
باوعلي ورفع حاجبه بتعجب، ورجع يباوع عالطريق.
عقاب: هاا يعني حبيتي المستشفى؟
اماني: اي كلش حبابين ومسؤولين!!
رديت بحماس، بعدين من شفت ملامحه المستغربة، حجيت بهدوء.
اماني: مو مثل ذولاك، ارخص شي عدهم روح البشر
عقاب: منو ذوله؟
اخذا نفس بتعب، ماريد اتذكرهم هسة واخرب مزاجي، خليني فرحانة.
اماني: هيج ناس اشتغلت وياهم قبل، انت شلونه يومك؟
باوعلي بخطف وابتسم.
عقاب: يومي اقل من عادي وروتيني، ما بي شي جديد
هو يحجي واني مركزة بأبتسامته، وتفاحة ادم الي تتحرك وهو يسولف، نظراته، شرايينه البارزة برگبته، شعره المرتب بطريقة تناسب شخصيته الكلاسيكية، لزمته للستيرن ونبرة صوته الرجولية، تفاصيله كلها ع بعضها تأسر گلبي ..!
عقاب: مضيعة شي بوجهي؟
ضحكت.
اماني: شعرك حلو
باستغراب رد.
عقاب: اشكرج
اماني: تدلل يابة
قلدت كلامه، باوعلي وضحك ورجع يباوع عالطريق، هن ثواني بس شسون بگلبي، طبول كامت تتراكع بنصه لدرجة حسيته ديسمع الصوت وخلص انفضحت.
وصلنا للبيت، نزلنا وطبينا، بدلت ملابسي ورفعت شعري، ورحت للمطبخ.
فتحت الثلاجة اشوف شكو ماكو للغدة، افف ماكو شي سهل واني مالي خلك اطبخ، وخاف يخرب ادور وشيخلصني من حلك عقاب بعد.
قررت اسوي طماطة وبيض، اي احسن واسرع شي، ثرمت الطماطة والبصل وحمستهن عالنار، صارت الريحة خرافية ومنا اني جوعانة، بطني كامت تزقزق، شوكت اخلص وافترسها.
اجة عقاب من ورايه عالريحة.
عقاب: شنو هالريحة الحلوة شدتسوين؟
التفتا عليه ورديت بابتسامة.
اماني: طماطة وبيض
كعد عالطاولة وكال بسخرية.
عقاب: انتبهي من تطكين البيض، مو مثل اختج
تخصرت وكتله بتقليد.
اماني: انتبهي مو مثل اختج اننننننن
هز ايده وكال.
عقاب: جاهلة، الله ينطيج العقل
اماني: اجمعينننن
شددت ع اخر حرف وخزرته.
عقاب: ديلا خلي عينج عالطاوة لتحترك
اماني: لتخاف منتبهتلها
عقاب: خوش كملي لعد
طكيت البيض عليها وحطيتها عالطاولة.
عقاب: انتوا هم تخلوهة بالطاوة مالتهة؟
اماني: اي تصير اطيب
عقاب: صح
اكلنا وشربنا جاي بطلب من الدكتاتور، رحت تمددت بمكاني بالكاع، وكمت اصيح اخ واوي من ظهري، لان ع وكفة اليوم حسيته انكطم، خاصة صار فترة طويلة متعودة ماسوي شي.
صاح عقاب.
عقاب: بيج شي؟
اماني: لا بس تعبانه من الوكفة
عقاب: تمام
شيصير عليك لو تكلي تعاي نامي عالجرباية، شكد كلبك قاسي اففف.
ماكدرت انام، نومة الكاع من غير شي مكسرتني وادور وجع ظهري، وعقاب تلفونه كلشوية يدك خبلني، راسي صار طبل، كملت السبحة.
كمت للصالة، سويت حليب دافي واخذت مسكن الالام، وكعدت اشرب واسمع اخبار.
شوية واجة عقاب متعطر ومبدل، استغربت هذا وين يريد؟ ادور هو ذيج الايام مو جان يتاخر للعصر يلا يجي؟ اليوم شعجب اجاني الظهر وظل!
وشعنده هسة طالع وين يريد!؟
اماني: وين رايح بكل هالاناقة؟
عقاب: ليش شوكت مجنت بكامل اناقتي اني؟
اماني: بس هالمرة غير
عقاب: لا يابة نفس كل مرة، ونصيحة مني الج لتدخلين بيه وتوجعين راسج بالخالي بلاش
اماني: من السالفة يمك لتدخلين، ومن يمي تنكلب عليه الزوج الغيور وتصير اضرب من الدكتاتور باوامرك، عليك غفور رحيم وعليه شديد العقاب، ممكن اعرف ليش؟
تقرب همسلي بحدة.
عقاب: لان اني عقابج القاسي دكتورة!
....
انتهى
لا تنسوا التصويت 🖤🦋
#الكاتبة نورمين 🖤