#خطأ_طبي «عقاب الاماني»
بقلــم : نورمين 🦋🖤
...
اماني
كاعدة اتريك وسمعت صوت تلفوني يدك، جنت حاطته بالغرفة، رحت وشفت انو عقاب هو المتصل، جاوبت واني مستغربة لان مو من عوايده يتصل.
بعدين ضربت ع كصتي، ديلا اماني علساس جان عندج تلفون قبل وممتعودة يخابرج، همزين مصارله يومين.
استغربت شعنده بـريما؟ وليش يريدها تجي ويانه! بالي ربط ع اخر موقف بيناتهم ببيتنا، لا لا ممعقولة هو كال ميسويلها شي، وهي هم عرفت غلطها اكيد تكعد بأحترامها، بس شلون اذا جفصت؟ هاي لسانها متبري منها وتروح تودينا بمشكلة.
دفعت هالافكار واتصلت عليها، اني وياها وعود ما اخليها تمسلت، ردت بصوت ناعس، الظاهر جانت نايمة.
ريما: صباحوو مون
اماني: صباح الخير، نايمة؟
ريما: اي لولا ازعاجج، خير حلمانة بيه من الصباحيات؟
اماني: يا صباحيات الله يخليج حتصير ب11 الظهر
ريما: وتصير 12 شعليه قابل عندي دوام ولله حلوة هاي، اخلص من امج تجين انتِ، خلوني مطمورة شتريدون مني متكلولي
اماني: دخذي نفس
اخذت نفس بصوت مسموع، ضحكت عليها.
ريما: اخذت، تفضلي شرايده؟
اماني: الظهر اريد اطلع اشتري ملابس للدوام، تعالي وياي نفتر ونتونس سوة
مكلتلها عقاب طلب هالشي، خاف شو شتفكر.
ريما: باتمان يقبل؟
نترت بيها.
اماني: ريري بطلي هالحجي
ريما: ندري متقبلين عليه بس شحجيت اني
اماني: تدرين شنو؟ مو صوجج، ولي ماريد تجين بعد
ريما: اووووو لا لا، البضاعة المُباعة لا ترد ولا تستبدل
اماني: شنو؟
ريما: يعني ب2 اني يمج
اماني: بس تحترمين روحج ولسانج تخلي بلهاتج، ماريد مسلتة منا ومناك ترا عقاب يروح ويانه
ريما: خوفي عليج صار مسلتة؟
اماني: ريري ماكو داعي لخوفج، اعرف شدا اسوي وشنو طبيعة الانسان العايشة وياه
ريما: انتِ اعرف بنفسج بعد، بس امي اكلت راسي تريد تجيج وطلبت رقم تلفونج مني ومنطيتهيا كلت خاف تصير مشكلة، وبابا هم مثلها
اماني: لا عليمن مشكلة، انطي لكل البيت، وبالنسبة لماما شوكت متجي هلا بيها هي وبابا
ريما: وااو تطورات
حجت باستهزاء
اماني: شحجينا؟
ريما: ديلا سكتت سكتت، خلي اكوم اتريك وابدل واجيج عليمن انتظر لل2
اماني: تمام انتظرج
ريما: باي
سديته وكمت، رتبت بالبيت واخذت حمام وشسورت شعري، لبست بنطرون اسود جلد وكوت اسود، نفس ملابسي الي جنت لابستهم بيوم اجة عقاب للمستشفى وعقد عليه.
سديت دكم الكوت وشديت الحزام واباوع لنفسي بالمراية بحيرة، وين جنت ووين صرت..
ذاك اليوم جنت ارجف خوف وحزن وقلق ع اهلي.. واليوم واكفة بقوة وواثقة من نفسي وسلامة اهلي.
لو جايني واحد قبل، و كايلي حـ تحبين عقاب اكله دروح انت شدتحجي!!
وين اكو نار تحب البارود؟
وين اكو مجرم يحب عقابه العسير؟!
هه والحال هسة انو اني احبه!
بكلشي بي، بحدته بعصبيته بصمته بقسوته بحنيته بحرصه بجديته بقوته بأناقته بشخصيته، كله ع بعضه احبه، بس ليش مادري..
يمكن هو هذا الحُب الحقيقي؟!
لما تحب شخص بس لكونه هو، مو علمود مصلحة او شي ثاني.
رجعت شعري لورا وسويته ضفيرة، حتى ميضوجني لان طولان واريد اكصه، هو من زمان جنت مفكرة اكصه بس مجنت فارغة، يلا لعد اليوم اكصه.
شوية واندكت الباب اجت ريما، فتحتلها سلمنا ع بعض وكعدنا، حجتلي ع وضع بيتنا شوية وبعدها كمت اشوف شسوي للغدة.
بسخرية ممزوجة بعدم التصديق حجت ريما.
ريما: مون تطبخ غدة؟ مووووون؟ يا سبحان الله!!! سبحان مغير الاحوال، معقولة انتِ نفسج اختي؟ الي جانت تنام عطشانة لان مالها خلك تنزل تشرب مي!!
بملل رديت.
اماني: كرميني بسكوتج بلا
ريما: بسكوت لو جبس
بهتت بوجهها من سخافة الكالته، ضحكت ع تعابير وجهي واني عطت بيها
اماني: بررررا !!!
ريما: لا سكتت ولله
اماني: نشوف
درت وجهي عنها وطلعت من المجمدة صينية كبة تمن مجمدة، خليتها ع صفحة تفك وعود منا لمن يجي عقاب اكليهن.
ريما بدهشة: هاي انتِ مسويتها؟
اماني: لا طبعا
ريما: لعد منين هاي، مبينة شغل بيت
اماني: عقاب يشتريهم من وحدة بالمنطقة، خطية حالتها ضعيفة وهو يساعدها بأنو يشتري
ريما: ولله خوش يسوي، يجيب ويكوم وانتِ عليج بس تحميهن
اماني: اي هو هيج
ريما: شو مادري دا احسه حباب، بس بغير مرات احسه مينجرع
ضحكت ع كلامها، زين يعني مو بس اني اشوفه متناقض.
اماني: هو هيج مزاجه برتقالي
ريما: وانتِ شون متحملته؟
تنهدت..
اماني: ماشية الامور وبس..
ريما: مفهمت، يعني شنو؟
كعدنا بالصالة.
اماني: هو عقاب شخص غامض، متعرفين شيريد ولا شديفكر، ساعات يصير صخر من القسوة، بس ساعات يلين ويصير ماكو اطيب من كلبه، عجزت افهم هالتناقض الي بشخصيته وحيرني بطبعه
ريما: بسلا حبيتي ولج؟
اداركت نفسي لان راح افلتها كدام ريما، خاصة من حجيت ع عقاب جنت مبتسمة وسارحة اتخيله بعقلي.
اماني: لا بس يعني
ريما بشك: يعني شنو؟!!
اماني: اهوووو هو تحقيق خو ما تحقيق!
ريما: اماني ولله صار يرادلج فرمتة، ضربچ فايروس عقاب لازم نتلاحكلج قبل لتنتهين
ضحكت واني افكر، هو صدك فايروس وضرب عقلي وقلبي، وسيطر ع كل جزء بيه بلا ما احس..!
ريما: هسة ما كلتي تحبي لو لا؟
اماني: كتلج لا لتلحين
ضيقت عيونها بشك، غلست وعلكت التلفزيون.
حطيته ع قناة افلام، وهي مستمرة تباوعلي، اني مغلسة لان جد مالي خلكها وهي ما شاء الله فول انتباه رئسن تلكفني.
ريما: ما عرفتي ليش رجعج للدوام؟
سألت، باوعتلها بضوجة وشمرت مخدة عليها.
اماني: حلكج صمي، من اجيتي ولسة لكلكلكلكلك كافي دوختيني ساعة السودة الخابرتج بيها!!!
ريما: اوووي عيني وشبيج ضجتي شكلنه احنه
اماني: شنو الما كلتي وجع اي ولله وجع
عفتها تدردم وكمت للغرفة، الهي روحي بأي شي بس كون ما اظل يمها سودنتني!!
...
قسورة
فرحتي اليوم ما انطيها لاحد، اخيرًا حشوف هالثولة الي كعدت بگلبي ..!
بعدما ذلني عقاب بالقصف مالته، رحت لليث حتى ينطيني رايه بلبسي، واستاذ عقاب بسيطة اله، خ تخلص طلعة اليوم، الا اطلع كل سوالفه الحجاهن عليه من خشمه.
قسورة: يعني حلو لبسي لو لا؟!!
ليث: يابة تطك بالكاع
بفرح سألته ممصدك: صدك ولله؟
ليث: اي ولله خاصة جاكيتك الجلد هذا، عجبني ما تطينياه؟
جنت اعدل بهدومي بغرور، باوعتله وحجيت.
قسورة: ماليش اطيكياه يمه، مخلفك وناسيك، ذيج المحلات وروح اشتري شنو فلوسك قليلة!
ليث: ديلا هسة شطالب منك اني هو جاكيت
قسورة: يسواك هالجاكيت ولك، اخذته ب120
ليث بصدمة: صدككككككك؟!!!
قسورة: شعبالك لعد
ليث: ليش يا عديم الغيرة ليشش!!
قسورة: شكو ولك!
ليث: والك عين تسأل شكو؟!!
قسورة: اي والي خشم يسمع هم
ليث: ولك تدري كم لفة فلافل لو كص بيها، كم تشريب لحم وكم صينية باكلاء ودهن، كم صينية مندي، يالحمزه شكد بيها اكل هاي ال 120 ،انت ليش هيج واحد مُبذر، متستحي؟!!!
ظليت صافن عليه شتحاجي هذا بلا، ليش كل تفكيره مرتبط بالاكل؟!
قسورة: آر يو صاحي؟
ليث: لا ولله عملتك هاي سودنتني
قسورة: مو اكول ..
عفته ورجعت لعقاب، اتحمل خبالات عقاب ولا اتحمل هذا ليبجي ع لفة فلافل جنه واحد مشايف.
..
عقاب
كملت شغل ورحت يم الحجي، ناوي اسولفله شقررت، دكيت الباب، صاح ادخل، فتت سلمت وكعدت.
الحجي: ها يابة خيرك؟ شو احس بلسانك حجي
جنت متوتر وماعرف شلون ابدي بالسالفة، لان ما احب اخلف باي خطة او اتفاق نسويها اني وياه.
عقاب: اي صحيح
الحجي: سولف
اخذت نفس قويت نفسي وكلت
عقاب: يابة من الاخير، اني تنازلت عن قتل الدكتورة
الحجي بصدمة: معقولة؟ من شوكت هالحجي وليش؟
عقاب: اي يابة معقولة، اخذت قراري من يومين تقريبًا، وحبيت ابلغك بي
الحجي: زين ليش؟ شنو بطلت متريد ثار اختك؟
عقاب: حجي اني تعبت، موضوع الدكتورة تعبني هوايه، اني مو اخلاقي ولا شيمتي تسمحلي اتعدى ع مرة، حتلو جانت هي الكتلت وحيدتي واختي
الحجي: لعد منو الجان يهدد و يكول بس الزمها اشرب من دمها؟ وين جان هالحجي عقاب؟
عقاب: الغضب جان عامي ع عيوني، اني مو هيج يابة
الحجي: اعرف، بس عذرتك لان جرحك جبير، وتدري شنو ما خاب ظني بيك!!
رفعت راسي اله بعدم فهم وكلت.
عقاب: شلون يعني؟
ابتسم وكال.
الحجي: من الاول جنت ادري بيك حتتنازل عن عقاب الدكتورة
باوعتله بصدمة، شمدري؟
الحجي: تفاجئت مو؟ هههه يابة اني اعرف شمـربي وادري بيك بس تهدئ تغير حساباتك كلها، لان انت مو انت بلحظة عصبيتك
عقاب: شلون جنت متأكد لهالدرجة؟
الحجي: احساس، وما خاب
عقاب: لعد الخطة الحطيتها شنو؟
الحجي: ههههه هاي كلاوات جانت، حطيتها حتى اضمن ان تلزم اعصابك لفترة
عقاب: مو علمود تضغط ع ابوها للدكتورة يعني؟
الحجي: لا، وترا لو انت مفكر شوية جان عرفت، انو من كتلك تطلكها وتكتلها ورة ما تنتهي الانتخابات، معناها اكو شي غلط بالسالفة
كملت عنه بتعجب.
عقاب: خاصة انو ابوها رح يتثبت بحزبنا بعد كم يوم وميكدر ينسحب بعد! وماله داعي انتظر شهور على ما تخلص الانتخابات!! لان اكدر اسوي الي ببالي!
صفك الحجي وكال: بالضبط
عقاب: يابة اسمحلي بس انت داهية!
الحجي: ههههه كله تكتيك هذا
عقاب: عاش!
جنت مصدوم وبنفس الوقت فرحان، لان الحجي واثق بيه ويعرف اطباعي مليون بالمية!
عقاب: يابه نريد نروح اني وقسورة بشغلة فد شوية، خو ما تحتاجه؟
الحجي: لا بوية روحوا بس خو ما ادبرون شي من وراي؟ تعرف سالفه قحطان لسة تدك ببالي
عقاب: لا اطمئن مو يم هالسوالف ابد
الحجي: خوش لعد
طلعت من يمه، لكيت قسورة واكفلي.
عقاب: شبيك تلوب جنك وحدة حامل
قسورة: شعندك يم الحجي؟
كعدت بمكاني وكلت.
عقاب: كتله انو تنازلت عن الخطة
قسورة بانفعال: وشكلك؟
رجعت راسي لورا وتجيت ايديه ع الكرسي وكلت بابتسامة.
عقاب: كلي جنت ادري بيك رح تتنازل عن كلشي!
قسورة بصدمة: ش..شنو؟!
ابتسمت وحجيتله، ظل صافن مثل الضايج.
عقاب: شبيك انت اللاخ؟
قسورة: معقولة الحجي يعرفك اكثر مني! اوكف هاي يرادلها دقيقة صمت ..
عقاب: ليش شكو ودقيقة صمت منو ماتلك!!
قسورة: انت مدا تستوعب، لك غبي اني صديق عمرك، ومن كل عقلي جنت مصدك حتكتلها!!!
عقاب: هاا، اي وشكو ضايج اذا اني جنت مصدك روحي اكتلها انت شلون؟
قسورة: مادري بس مو خوش سالفة ولله، لازم نعيد النظر بسالفة احنه بيست فريندز
عقاب: كمت تخرط
قسورة: اي وديني لريما حتى اصحصح
عقاب: كوم نروح مدام خلصنا شغل
قسورة: والحجي منو يوصله؟
عقاب: نوصي واحد من الولد يوصله، واني حاجيته كتله عدنه شغلة اني وياك كال براحتكم
بسعادة صاح
قسورة: اخويه الزوووووودددد
ابتسمت ع خباله وطلعنا للبيت بسيارتي، بعدما وصيت شاهين يرجع الحجي وقسورة انطاه سويج السيارة.
بالطريق، جان قسورة يهز برجله وعينه عالطريق، اول مرة اشوفه مرتبك هيج.
عقاب: هوووب يمعود اركد شبيك
قسورة: ها مادري
عقاب: لا انت صدك منتهي، واكع ع وجهك!
قسورة: بين قوسين طامس
عقاب: الله يهديك
باوعلي بضوجة ودار وجهه، ابتسمت وسقت للبيت، وصلنا نزلت وهو لكيته غالبني واصل للباب، شبساع وصل مو جان بصفي هستوه؟!
دكيت الباب، فتحته ريما سلمت عليها هزت راسها وطبيت، قسورة وكف يمها وكال بضوجة.
قسورة: هم انتِ!!!
قلدته.
ريما: هم انتَ!!!
قسورة: للاسف اي، شلونج؟
ريما: من شفتك صرت مو زينه
قسورة: يا سبحان الله، نفسي!!
خزرته وراحت وهو مبتسم، واني واماني واكفين نباوعلهم.
اماني: تتغدى مو؟
عقاب: اي وحسبي حساب قسورة وياج
اماني: تمام
باوعتلها من فوك لجوة، ضيقت نظراتي من شفتها شلابسة!
عقاب: تعاي وراي
اماني: وين دا اگلي!
عقاب: خلي اختج يمهن وتعاي
هزت راسها وصاحت لاختها.
اماني: ريري عينج عالطاوة هسة ارجع
ريما: تمام روحي
مشيت وهي وراي، طبيت وهي وراي طبت للغرفة.
عقاب: سدي الباب وتعاي
سدته ومبينة مفاهمة شكو.
اماني: شبيك عقاب؟ اختي بيها شي ليش ردتها تجي ويانه؟
وكفت كبالها واحتدت نظراتي ورديت.
عقاب: عوفج منها، شلابسة انتِ!؟
باوعت ع روحها شلابسة ورجعت باوعتلي.
اماني: شبي لبسي؟
مديت ايدي ع خصرها قربتها عليه، وهمست بأذنها.
عقاب: شنو هالبنطرون الفضيحة هذا؟ كلشي بيج مبين ذاك وينه
وسعت عيونه بصدمة ودفعتني.
اماني: يااااا وخر شكد فاسد!!
ابتسمت باستهزاء.
عقاب: بدلي بسرعة وديربالج اشوفج تلبسي بعد ترا احرگه
اماني: اوامر ثانية جنابك؟
عقاب: اذا تردين لبسي بس بالبيت من اني وياج وحدنه، غيرها لا
اماني: مو جنك صدكت روحك ورحت زايد بدور الزوج الغيور؟
قربتها عليه لدرجة اختلطت انفاسنا وكلت.
عقاب: حجايتي وحدة ما اثنيها، صيري حبابه ونفذي
دارت وجهها بغير رضى، كمشت حنجها درتها عليه وحطيت عيوني بعيونها.
عقاب: صار واضح كلامي؟
خزرتني وردت.
اماني: افففف تمام افتهمنا وخر عاد
هديتها وكعدت مبتسم، شفتها راحت للكنتور تطلع ملابس وعيوني صلفة تتابعها بجرأة.
اخذتلها بنطرون ورادت تطلع تبدل بالحمام، صحت بيها.
عقاب: هوووب هووب وين رايحه
اماني: اريد ابدل لو هم عندك اعتراض؟
عقاب: بدلي هنا، ترا اختج برا خلي اذكرج خاف ناسية
اماني: مناسية حتى تذكرني
عقاب: لعد بدلي هنا واسكتي
اماني: اطلع انت
عقاب: عفوًا؟
بسخرية كلت.
اماني: اطلع خلي ابدل شنو عفوًا!؟
عقاب: ما اطلع
مدري شجاني حسيت روحي زعطوط ديعاند امه.
اماني: عقاب لتسوي هيج!
كمت يمها وملامحي الساخرة تبدلت للجدية.
عقاب: طالع
...
قسورة
لكيتها خوش فرصة، عقاب والدكتورة بالغرفة، خلي اختلي بريمتي!!
جانت واكفة يم الطباخ تگلي، رحت يمها ولكيتها تكلي كبة، يبوو لهنا لاحكتني هالاكلة!!
قسورة: هم كبة! بربج معدكم شي ثاني
باوعتلي بعدم اهتمام ورجعت تباوع عالطاوة.
مديت راسي كدامها.
قسورة: الووو انطرشتي مو داحجي وياج؟!!
ريما: احترم نفسك زين لو لا؟
قسورة بتحدي: لا
خزرتني وكالت وهي تهز راسها بيأس، واني مبتسم.
ريما: الله يهديك
قسورة: ويهدي الجميع، هسة عدكم غير شي نتزقنبه لو لا؟
ريما: شهالالفاظ السوقية هاي شبيك انت ؟
قسورة: اوووي عيني سوقية هههههههه
ضحكت عليها وهي ضاجت.
قسورة: العفو نسيت انتِ بت دكتور، اقوة شي سامعته بحياتج كلمة انجب
ريما: لا بلااا، ترا اعرف اكل تبن هم
حجت معترضة واني هنا فحطت، كل عقلها هاي!
قسورة: خ اعلمج الانحراف، كولي اكل خ*ا همين
ريما: اعرفها ترا
قسورة: ها يعني انتِ هم طلعتي سوقية؟
حجيت بسخرية وهي تباوعلي معاجبها، ادري اني شجاني استلمتها بهالسوالف الماصخة، غير احاجيها حجي حلو حتى تحبني!! شو بديت بالخ*ا !!!
غلست عني واني واكف اباوعلها ومبتسم، طلع عقاب خزرني حتى اوخر، تنهدت واريد اروح اكعد يمه، بس شفتها تريد تشيل الكبة من الطاوة بالخاشوكة، صدك يعنيي!!!!
رحت عليها، واخذت ملقط مال اكل معلك لفوك يم ادوات الطبخ، حتى اشيل بي الكبة، لان الظاهر الحجية هنا كلشي متعرف.
ريما: وخر اني اطلعهن لتدخل بسوالف النسوان
قسورة: صمي حلكج اكو واحد يطلع كبة بالخاشوكة؟ دشوفي شون صارت ثريد هلكد ما تزرفت بخاشوكتج
ريما: لعد بيمن تطلعوها؟
قسورة: بشيب الخلفني
ريما: احجي عدل
قسورة: هيج
شلت وحدة، نفظتها من الزيت زين وحطيتها بالماعون، باوعتلها وكلت.
قسورة: هسة منو الي لازم ميدخل بسوالف النسوان؟
من الفشلة محجت شي، تعديتها واني مبتسم وعقاب هم جان يضحك، كعدت يمه.
قسورة: هاي بسلا الدكتورة هم هيج كلشي متعرف؟
عقاب: خليها سكتة يخوي
قسورة: لا هايهيه ربحنا
...
عقاب
جنت اسولف وية قسورة، وشفت الدكتورة طلعت لابسة بنطرون جينز، يعني هذا هم يلفت نظر بس ارحم من ذاك الجلد مفصل جسمها تفصل، لا والثولة مكيفة تكلي شبي.
هزيتلها راسي وباوعتلها بعفية، برطمت بضوجة وراحت يم اختها.
قسورة صاح.
قسورة: دكتورة فدوة معدكم شي غير الكبة ما احبها، وهاي اختج متتحاجة اسئلها تغلس
ريما: ولله جذاب!!!
اماني: ممسوية شي غيرها، عادي طماطة وبيض؟
قسورة: اي ولله ياريت، بس كثري بيض وقللي طماطة
اماني: بعيني بس اخلص الي بأيدي
قسورة: عليمن اختج تسويها احسن مما واكفة هيج
حجاها بتحدي والدكتورة باوعت لاختها الضايجة، قسورة يحاول يغيض ريما، فهي ردت عليه.
ريما: اي تدلل
قسورة: تسلمين يابه
كالها بغرور، واني مصدوم شبي هالولد.
عقاب: هي هاي سوالفك؟ كتلت روحك حتى تشوفها علمود تتناكر انت وياها ؟
قسورة: عقاب ولله مو بيدي، الحجي وحده يطلع وهي تستفزني متشوفها مبوزة و حجايتها واكفة
عقاب: متشوف روحك شون مستلمها اكس مربع، اهدئ شويه
قسورة: يلا هاهيه
كملت الدكتورة، كعدنا بالمطبخ عالطاولة وريما دتكلي بالطماطة.
اماني: ريري كعدي اني اكملها
قسورة: لا خلي من ايدها احسن
خزرته وباوعت لاختها وكالت.
ريما: لا مون مظل شي، بس اطك بيضة فوكها واجيبها
اماني: تمام
دلتها اماني بمكان البيض بالثلاجة، جابت العلبة حطتها عالكاونتر واخذتلها بيضة.
قسورة: لتطكيها عالطباخ باوعي زين
اندارت عليه.
ريما: انت بس اسكت ومعليك
قسورة بأبتسامة: صايرين
طكت البيضة عالكاع، نصدمنه وقسورة طكها ضحكة من كل گلبه، ضحكت ع ضحكته والدكتورة كوة لازمة نفسها حتى لتضحك وتضوج اختها، الي عوزها تبجي من الفشلة.
قسورة: يابة احنه متفقين توكلوني طماطة وبيض، مو كاع وبيض هههههههه
صدك ضحكني واماني انفجرت تضحك، وريما كامت تطي الوان من الفشلة، كلت خلي ادارك الوضع خطيه رح تبجي وذوله فاصلين بس يضحكون.
عقاب: كعدي يابة كعدي
ريما: اريد اروح لبيتنا
قسورة: بسلا اجيبين امج علينا ههههههه
ريما: انت بالذات اسكت، كله من وراك خبصتني خبص
قسورة: الما يعرف يركص شيكول؟ الكاع عوجة، يابه انتِ فاهية هي كوة هههههه!!
دفعتها ع كيف وخزرت قسورة.
عقاب: معليج بي اكعدي فضيني
كعدت وقسورة ما بطل يصنف ويرجع لورا، والدكتورة عيونها دمعت من الضحك وكامشة خواصرها.
مسحت الكاع وطكيتلي بيضة ع الطاوة وحطيتها كدام قسورة.
عقاب: هاك اتزوهر ابو حلك
باوع للدكتورة وكال.
قسورة: ها مرة اخويه تقبليها رجلج يحاجيني هيج؟
عقاب: قسورة كافي انجب عاد
قسورة: صار حُب
خزرته سكت، كعدنا ناكل بس الجو مدري شلونه، قسورة كوة ساد حلكه وضام الضحكة، الدكتورة تدز نظرات متأسفة لاختها الي ضاجت منها لان ضحكت عليها، واني اباوعلهم وساكت.
كملنا اخيرًا اطول غدة مر عليه بكل حياتي، طلعنه بسيارتي للمول، قسورة جان بصفي والدكتورة واختها لورا.
قسورة: مش عم تزبط معيييييي اعشق غيرك لا ولله، مش عم تزبط معيييي اشكي لغيرك قول الاااااه
عقاب: وسطعش لهدا تنام بصماخك، سده دوختني!!
قسورة: اووي شكد نحيس
طفاه ودار وجهه عالبنات.
قسورة: اي يابة فقرة طلبات المستمعين، شتحبن تسمعن اغنية؟
ريما: اريد اغنية لتشينسموكرز
قسورة: شنو هذا ينوكل ينشرب؟
ضحكت وجنت اباوعلهم من المراية الامامية، صارت عيني ع الدكتورة، جانت هي همين دتضحك ابتسمتلها دارت وجهها ضاحكة.
ريما: حقك متعوفه اذا ذوقك سوقي
قسورة: اوه لـلى..
كالها بسخرية ويضحك حتى يستفزها، خصمتها وسألت الدكتورة حتى اسكتهم.
عقاب: شتريدين تسمعين دكتورة؟
باوعتلي بنظرة صدمة، ممتوقعة اسألها.
اماني: اا.. اي شي للقيصر حلو
عقاب: صار، شغل قسورة
غمزلي بخباثة، درت وجهي عنه، بحث عنهن وكال.
قسورة: ياهية منهن تريدين دكتورة؟
اماني: ماكو فرق، كلهن حلوات
عقاب: شغل انا وليلى
اماني: اي كُلش احبها
باوعتلها بالمراية، ابتسمت ودرت وجهي عالطريق، وكلمات الاغنية جانت دتذكرني بالدكتورة ودخولها لحياتي بطريقة ما، خاصة من يكول :
عامانِ ما رف لي لحنٌ على وترٍ..
ولا استفاقت على نورٍ سماواتي..!
واكو مقطع ثاني اثر بقسورة وصاح عليه ''اي ولله ..!''
يكول بي:
لو كُنت ذا ترفٍ، ما كنتِ رافضة حبي..
ولكن عسر الحال، فقر الحال، ضعف الحال مأساتي..!
وصلنا، مشينا اني وقسورة سوة وهن ورانه.
عقاب: لو تمشن كدامنه لو ويانه، لتظلن لورا
ريما: انتو تمشون سريع، منلحك بيكم واحنه عيوننا عالمحلات شي اكيد نصير وراكم
قسورة: نبطأ سرعتنا لخاطرجن صدك جذب
ضحكت ع حجايته، وصدك كمنا نمشي بطيئ علمودهن، اني ممتعود هيج امشي طكت روحي، طبينا لمحل وراحن يفترن هن واني وقسورة واكفين يم الكاشير.
قسورة: نامن ذني وين صارن!
عقاب: عوفهن ع راحتهن ديختارن
قسورة: اكلك ترا اني مشبعت منها، شنو معناها تطمس بالمحلات وتعوفني!!
عقاب: دنجب ليسمعك يكول مشرمها، مخلصها عرك وية البنية اكيد كرهتك
قسورة: عود يعني صدك تكوم تكرهني؟
عقاب: لعد شتريد اذا انت بس تغلط وتصنف عليها؟
قسورة: مو يكولون من حبك لاشاك، هذا مبدأي
عقاب: عوفه ع صفحه هالمبدأ ترا يوكلك تبن
قسورة: هيج رأيك؟
عقاب: اي
قسورة: خوش لعد ادور كله اتغزل انكلب عليها صادق طلال
عقاب: يعني انت لو طخة لو طشر مخة، ما عندك حل وسط؟
قسورة: اي حبيبي لو ابيض لو اسود
عقاب: غلط، صير رمادي
قسورة بسخرية: هه مثلك يعني!!
عقاب: شو معاجبك؟
قسورة: لا بس يعني
عقاب: ماكو شي بالدنيا ابيض تماما او اسود تماما، كلشي بالدنيا لازم تعامله بوسطية، مثل ميكولون تكمش العصا من المنتصف
قسورة: ايبااه الظاهر هرمون كاظم الساهر صعد يمك واشتغل شغله لان شغلناه قبل شوية
عقاب: ظل بهالعقلية عبالك الضحك كلشي
قسورة: خايب الدنيا خلصانة وكلنا فانين، اضحك اضحك خربيومك شكد نكدي
عقاب: نجب نجب
اجن محملات كم قطعة، حطتهن يم الكاشير طلعهن وبلش يحسب السعر، وصل لتنورة قصيرة اني هنا عيوني نطت.
عقاب: جيبها هاي عيني منريدها خلي نرجعها
كتله واخذتها.
اماني: ليش ترا حلوة!
عقاب: عليج الله صدك؟!
باستهزاء كلت، ورجعت حجيت بجدية.
عقاب: رديها منين ما جبتيها، قصير ممنوع
اماني: بس انت مالك حـ..
قاطعتها وهمست.
عقاب: دير بالج تحجيها
خزرتني وراحت ترجعها.
ريما: شدعوة عليك ترا عادي كله لبسنا هيج اني واختي
عقاب: شي خاص بيننا اني ومرتي، لتدخلين
قسورة: زينة الج هاي؟ شكد تدخلين!
حجالهيا بضحك.
ريما: انت هم معليك لتدخل
قسورة: اوووبا هجمة مرتدة
خزرته وراحت لاختها، التفتلي قسورة غمز وكال بخباثة.
قسورة: كالوا القصير ممنوع، تدري لو لا؟
عقاب: احترم روحك لا البسكياها
قسورة: الله بلكت تنعجب بيه ريري
عقاب: الله يهديك
قسورة: شعدكم اليوم كلها تدعيلي انهدي، احد كللكم عليه كافر لو يهودي؟
عقاب: اشششش دوختني سودة بوجهه ليطلعك بعد
اجن، حاسبت وطلعنا لغير طابق، طبينا لمحل ووصيتها بهمس.
عقاب: ديربالج تجيبين شي قصير لو ضيگ
نفخت بضجر وراحت هي واختها، وكالعادة احنه واكفين ع صفحة ننتظر.
هالمحل مو جبير ومبي اقسام مثل ذاك، فدا اشوفهن شيسون من مكاني.
جانت يمهن بنية من المحل تساعدهن بالاختيار، فجأة اجة واحد مبين عطواني ومايع من شكله، كام يدنالهن ويحجي، لو يتمضحك، اخير شي اخذ قطعة لبس حطها ع جسم ريما هنا اني وصلت حدها، قسورة لكيته واصل قبلي ليمهم.
قسورة: شيل ايدك عنها ساقط
كالها وجره من ياخته.
-وانت منو
قسورة: عزرائيلك
-روح منا حبيبي مالي شغل وياك
اجيت من ورا، حطيت ايدي ع جتفه وكلت.
عقاب: شلون تحب البيض؟
-العفو؟
عقاب: نص ستاو لو ستاو كامل
اماني: عقاب عوفه بلا مشاكل فدوة
ريما: انت هم هده قسورة، اصلا جنه حنطلع بطلنة منريد منهم شي
قسورة: ميخالف بس خ انطي المقسوم
ريما: لااا عفيه
باوعتله بنظرة خلته يموع، هده ودفعه لورا وكع بالكاع، ابتسمت واخذناهن وطلعنا، هالحجي ابو المحل جان واكف فوك روسنا ويصيح هدوا النفوس.
قسورة: لو مخليتني اخذلي منه كم بوكسي افوخ گلبي بي
عقاب: ظلت حسرة بگلبي، معرفت شون يحب البيض
اماني: عود شنو معناه هالحجي؟
عقاب: يعني يحب ادكه عالخفيف لو لحد ما تتنعنع ضلوعه
اماني: يمةةة وانت عادي عندك هيج تضرب؟
عقاب: ليش لعد؟ وخاصة اذا جان يستاهل مثل هالطرن
اماني: حتلو مو حلو العنف
ريما: اتفق
عقاب: صحيح مو حلو بس اله حالات لازم يحضر بيها
قسورة: ولله يا صاحبي لو العنف لو متحلى العركات
طلعنا من المول هذا، رحنه لغير واحد، بالطابق الاول لكينة محل نسائي، طبينا بيه بس هالمرة رحنه وياهن مخليناهن وحدهن.
جانت تختار وتسأل ريما، القطعة المتعجبني ااشرلها براسي انو محلوة، وحتلو ريما تكولها حلوة هم متمشي بحجيها.
ادور ريما تعبت، اخذها قسورة وراحوا بالكافيه الي بصف المول كلنالهم نكمل ونجي.
طبينا لمحل احذية، اخذت بوت وحذاء ابيض رياضي، حاسبته وطلعنا.
اماني: ارجعلك الفلوس كلهن بس ارجع للدوام
بغضب رديت.
عقاب: كايلج ع فلوس اني؟
ردت بتوتر
اماني: لاا بس انت ممجبور تصرف عليه
عقاب: مجبور مدامج مرتي
اماني: بس زواجنا مجرد شكليات
عقاب: حتلو يبقى اسمج مرتي
اماني: بعدين نحجي مو هنا
عقاب: لا بعدين ولا بغير وكت، انتهى الكلام
اماني: مو شوكت ميعجبك تنهي الحجي وتدير وجهك، اني هم الي راي
عقاب: احتفظي بي لنفسج
اماني: عقااب!!
عقاب: امشي وسكتي ترا تعبت
كلتها ودرت وجهي، جنت شايل العلاليك كلهن عنها.
اماني: اطيني اشيل وياك
عقاب: ميحتاج بس ياريت لو تمشين بساع وتبطلين فهاوة
اماني: ولله مو صوجك
عقاب: ادري
نفخت بضجر ومشينا، طلعنا نريد نروح للكافيه لان خلصنا، صار كدامنا مركز تجميل وصالون ....
اماني: بس ربع ساعة واجي
عقاب: ليش شعدج؟
اماني: شغلة مهمة
عقاب: شغلة ايش بالصالون؟
اماني: اريد اكص شعري
حجيت بحدة خليتها تستغرب
عقاب: حتى راسج اكصه اذا تكصي!!
.....
انتهى!
لا تنسوا التصويت 🖤
#الكاتبة نورمين 🖤