#خطأ_طبي «عقاب الاماني»
بقلــم : نورمين 🦋🖤
...
عقاب: شنو؟ شعندك وياها
قسورة: اريد اشوفها حتى احس صدك هاليوم بي حظ
عقاب: انت يمكن تخبلت
قسورة: لا بالعكس، صرت اعقل واهدئ من قبل
بسخرية رديت.
عقاب: هاي منو ليحجي؟!
قسورة: عقاب خليني الغي لتظل تقاطعني وتحشش ابو حلك، ليسمعك يكول وضعك احسن مني وتقلد، شو حظك طايح ويه الدكتورة وكل يوم متعاركين وگابة بينكم للستار
عقاب: ليش متدري شنو اخر المستجدات؟
قسورة: شكو يا ستار
عقاب: جبتلها تلفون وحرجعها للدوام هم
قسورة: هسة منو المخبل بيناتنا؟ لك غبي شلون هيج تسوي!! نسيت الاتفاق وخطتنا!؟
عقاب: قسورة اني تنازلت عن العقاب..
بهت بوجهي بصدمة.
قسورة: ما اصدك!
تنهدت، باوعت لكدام وحجيت.
عقاب: اني هم ما مصدك نفسي الصراحة
قسورة: انت متأكد من الي دتحجي؟ لعد والخطة؟ شنو حتكول للحجي!!
عقاب: متأكد من قراري مثلما دا اشوفك كدامي، وبالنسبة للخطة فآني رح ابقيها ع ذمتي منا لمن تنتهي الانتخابات، وبعدها اطلكها وارجعها لحياتها حُرة طليقة، والحجي ما اعتقد عنده مشكلة بالموضوع لان هو اساسًا زوجنيّاها علمود اخذ حقي منها، واني بطلت ماريد شي منها بعد
قسورة: زين ليش؟ شنو سبب هالتحول المفاجئ! انت لحد اول بارحة تصيح اريد حق اختي منها! شصار بهاليومين وتغير رأيك!!
عقاب: بيوم الاربعين، زارتني بيري بالحلم وجانت مهمومة وضايجة من الي دا اسويه بنفسي وبالدكتورة، وكلتلي الدكتورة مالها علاقة لتأذيها لان اني رحت لأبوية وامي قبلّا تسويلي العملية اصلا
قسورة: وانت علمود هالحلم قررت تترك العقاب؟
عقاب: بالضبط، وهم هيج احس نفسي مرتاح اكثر .. تدري جنت اتمنى ميجي يوم تنفيذ الخطة لان احس نفسي ما مستعد اكتلها حتى برغم انو الدكتورة حرمتني من اختي! واذا اكو حق فما يضيع يم الله واني سلمت الموضوع لرب العالمين
قسورة: مادري شكلك صاحبي بس مدام انت مرتاح هيج فـعاشت ايدك
عقاب: وانت العايش حبيب
قسورة: المعيدي ما ينسة سالفته، واني ما انسة سالفتي، اريد ريما
عقاب: ومنين اجيبلك صخيمة؟
قسورة: انت دبرها فدوة
تنهدت ورديت.
عقاب: باجر ورا الدوام اخذ الدكتورة تشتري ملابس لدوامها واخليها تجيب ريما وياها، زين هيج؟
طفر وحجة بسعادة.
قسورة: ولله وكفوووو منك هذا الصديق الزين
ابتسمت.
عقاب: ديلاا لتتلوك
قسورة: اذا حاجتك يم عقاب شتصيحله؟
عقاب: لا يا ساقط **** كوم منا كووم
طردته من السيارة وهو نزل يضحك، شوية واجاني من الجامة اليم مكان كعدتي، دك عالجامة، فتحتها.
عقاب: الله ينطيك عيني
قسورة: اجمعين بس افتحلي باب السيارة تجمدت ولك
عقاب: تستاهل ويطبك مرض هم
قسورة: اوووي عقاب لتصير قاسي
درت وجهي وضحكت، لان نبرة صوته صدك مسخرة، فتحتله الباب، اجة صعد وهو مكيف.
عقاب: احترم روحك لا ادوسك جوة التاير
قسورة: ولله ليث طلع حجيه صح، صاير حساس
عقاب: تنجب لو شلون؟
قسورة: ها اهاا نجبيت
سوة حركة سحابة عود سد حلكه.
عقاب: هيج احسن
سقت والطريق كله يتمتم عود ساد حلكه، ع ما وصلته لن راسي انفخ، معقولة يحب ريما لدرجة تكلب مزاجه ويفرح بهيج يوم يكرهه!!
....
قسورة
هواي منكم مستغرب قصتي اعرف..
بس عادي لتستغربون، هي هاي الدنيا وهذا هو العراق، اكو هواي مثل قصتي ويجوز اتعس بعد!
طول عمري عشت واني افكر باسباب ترك اهلي الي بدار الايتام، وهالشي جان يتعبني لان ماكو اجابة تشفي گلبي.
عشت 27 سنة ذني، واني اتخيل اهلي بالناس الي اشوفها تمشي بالشارع، لان اكو احتمال 1% يكون اكو صلة قرابة بيننا!
دورت ع اهلي بعدما استقريت بالشغل وية الحجي، هذا بعد فترة معاناة طويلة بالشوارع طبعًا، بس ما لكيتلهم اثر!
ممكن ماتوا! وممكن لسة عايشين، بس بالحالتين اني ما مسامحهم وليوم الدين حتبقى بگلبي غصة الاهل ..
من دورت عنهم، مو حبًا بيهم لا، بس لانو اريد اسئلهم ليش!؟ شنو ذنبي طفل انشمرت للشارع بلا اهتمام؟ ليش جبتوني للحياة اذا لهالدرجة محد راغب بوجودي!
المن عفتوني؟ ما كلتوا هذا الطفل باجر عكبة يكبر، ويحتاجنا!
يحتاج اهل وسند، لو هيج جان موضوع تركي بالدار سهل!
بس الف الحمدلله ع كلشي، ومثل مكال عقاب، لولا هاليوم الي تخلوا بي عني، مجان صرت قسورة الي اني عليه بهاللحظة، بكل هالقوة والثقة والشجاعة.
يمكن اني ما تربيت بعائلة تعلمني الصح وين والغلط وين، بس اني الحياة ربتني وانطتني دروس كبرتني سنين عن عمري الحقيقي! وصرت رجال، يعتمد عليه.
وبيـوم الميلاد هذا، الي اكرهه بكل تفاصيله، تمنيتها تكون يمي..!
لأول مرة بحياتي اتمنى شخص يحبني ويتقرب مني، بحيث يشاركني همومي وفرحي، دائما عشت لشغلي وبس، مجنت افضفض غير لعقاب ..
بس هسة، صرت احتاج ريمـا بكد ما افكر بيها وشاغلة كلبي وعقلي..
كمت احس عقاب مو كافي مثل قبل، احتاج حـنيتها واهتمامها بيه وخوفها عليه.
لمـرة وحدة ع الاقل بحياتي، اريد احس انو اني شخص مهم بحياة احد ويخاف عليه!
فـ لما نفخت الشموع، جانت امنيتـي هي!
شلون وليش وشوكت، مادري بس الادري انو اريدها تكون من نصيبي بأي ثمن او طريقة، عفتها يم الله لان رايدها منه وهاي اول مرة اطلب منه شي، ومتأكد مراح يردني خايب.
وكفت كدام المراية، باوعت لنفسي وسألت بشك.
قسورة: ماعرف شنو لمخليني مصدك روحي لهالدرجة، منو يكول تقبل بيه، واني مجرد سايق واشتغل يم الرجال الي عائلتها كلها تكرهه؟!
...
اماني
كلام عقاب عن ثقته بيه، حسسني بالمسؤولية لسبب ما.. وبنفس الوقت كلش فرحت، يعني هو يثق بيه!!
كاعدة ولازمة التلفون بأيدي وابتسم بفرح، عقاب يثق بيه اني! اي ولله هو كلي بلسانه!
فتحت التلفون، حاطلي شريحة بس ماكو نت بالتلفون، يلا من يجي اسئله شكد رمز النت.
دكيت ع ريمـا.
اماني: الو ريري ..
ريما: من يا جار متصلة هسة؟
اماني: تلفوني الخاص بيه هذا، فحفظي رقمي يمج
ريما بدهشة: جذابة!!!
ابتسمت.
اماني: لا هاي الحقيقة، وحزري شنو بعد!!؟
ريما: شنو؟
اماني: رح ارجع للدوام هم!
بنفس نبرتها المتعجبة.
ريما: لا لا لا دتجذبين ممعقولة، وباتمان وين؟ يدري بيج؟
اماني: ههه طبعا يدري غير هو جابلي الفون وكلي حترجعين لشغلج
ريما: مدا اصدك .. وج مون خاف يقشمر عليج هذا؟
اماني: لا ليش هيج تحجين، هاي بدال متفرحيلي!
ريما: وك فرحتلج بس ما سئلتي نفسج ليش هيج فجأة تغير؟ مون هذا الرجال مو طبيعي ديري بالج منه، الي تزوجج بالاجبار ورضى يعيش وياج ببيت واحد رغم هو يعرف انتِ كتلتي اخته، كلشي توقعي منه واخذي حذرج منه
اماني: ترا خوفتيني شبيج، عقاب صح رجال صعب تفهمين طبعه بس مو حقير لهالدرجة، اذا جان يريد يكتلني فهواي فرص اكو خاصة احنه ببيت واحد، يكدر يسوي هالشي ويشمر جثتي ويخلص شغله بكل برود، بس هو مو هيج!
ريما: وانتِ شمعرفج هو مو من هالنوع؟!! هااا احجي!!
سكتت، صدك اني شمعرفني؟! وليش هيج مأمنة بي رغم ماكو شي يخليني مطمئنة اله!
اماني: اعرف وبس، عشت وياه وعرفت طبعه شنو فلا تخافين عليه
ريما: لتزعلين مني بس انتِ وحدة غبية، وج امي رجال تزوجج غصب وحرمج من ابسط الامور، فجاة رجع فتحلج بيبان الحياة الوردية هيج بلا سبب، متحسين اكو شي غريب؟! بعدين انتِ شـعشتي وياه حتى تعرفين طبعه؟! هالكم شهر متخليج تعرفيه صح، لان هو ما خلاج تعرفين غير الشي الي يريدج تعرفيه وبس!
سديته بوجهها، وصفنت بالكاع بحيرة، اني ليش مدا افكر بمنطق مثل ريما؟ ليش اقل تصرف منه يطيرني من الفرح ويخليني اتغاضى عن كلشي ثاني..؟
معقولة حبيتـه؟!
دكات كلبي من اشوفه، هذي حُب مو خوف مثل قبل!
ابتسامتي وسعادتي بتصرفاته الحلوة وياي هذي حُب!
اهتمامي بي وبطلعاته، قلقي ع وضعه هذي حُب!
ضوجتي من ميقات واختها، هاي غيرة جاية من حُب!
رجفة جسمي من يدنالي او يهمسلي بصوته الرجولي هذي حُب!
شعور الامان والدفو، الي حسيت بي وياه بيوم اربعين اخته هذا حُب!
شوكت وكعتي بحُبه اماني؟!
شلون حبيتي اصلًا! وشـحبيتي منه!
كمشت راسي وظليت اباوع ع الفراغ، شسويت بنفسي والمن حبيت اني!
اصلا شنو نهايتي وياه هالرجال؟
تالي الزواج الكاذب هذا شنو؟
وشنو سبب هالتغيير الغريب والمفاجئ بتصرفاته وياي؟
معقولة كلام ريري صحيح وعنده شي ورا هاللطافة المفاجئة؟!
....
عقاب
رجعت للبيت، الدكتورة كاعدة بالصالة وصافنة، وجهها مو طبيعي مو مثلما عفتها قبل شوية، حطيت الاكل ع الطاولة ورحت كعدت كبالها.
عقاب: خير؟
رفعت نظرها باتجاهي وجانت نظراتها حادة، تفاجئت منها شبيها هاي!
اماني: شتريد تسوي بيه؟
عقاب: ما فهمت، شتقصدين؟
اماني: لا بالعكس انت فاهمني كلش زين، شتريد مني ولشنو دتخطط؟! ليش تزوجتني وليش منعتني من الطلعة وهسة رجعت طبيعي، ليش؟
عكدت حواجبي بشك.
عقاب: مصخنة انتِ؟ ممعقولة بوعيج وتحجين هالحجي
اماني: بكامل وعيي اصلا، هسة احجي وريحني، شتريد مني انت ولوين تريد توصل؟
عقاب: بالوقت المناسب تعرفين، بس الي اكدر اكوله الج اطمئني
اماني: شطمئن؟ انت مستوعب شدتكول؟!! معيشني بمتاهة مادري شلون بدت و منين تنتهي، ولا شلون اطلع منها حتى! وبكل بساطة تكلي اطمئني!
عقاب: دكتورة خلينا لننسى نفسنا ونحجي بالمنطقيات ها؟
اماني: لانو مناسية نفسي منو وشسويت، دا اسئلك واريد منك جواب واضح!
عقاب: اجابتي حتشوفيها كأفعال وتفهمين، ما احب احجي هسة لان ممكن تفهميني غلط
كامت من مكانها واجت وكفت كدامي وحجت بحدة.
اماني: انت ششايف نفسك متفهمني!! ع شنو هالغرور! مية مرة كتلك غلطانة اني عاقبني اكتلني واشفي غليلك مني ولا تعاملني بهالبرود والقسوة!
ابتسمت ووكفت مقابيلها، عيوني بعيونها وحجيت بنبرة مستفزة، لأن بكلامها هذا رجعت عقاب القديم للساحة.
عقاب: ولذلك اني استخدمت اسلوب نفسي بحت وياج، لان ادري بي يعذبج اكثر من الضرب والقتل!
اماني: شكد شفت بحياتي بشر، بس مثلك ما شفت، شنو انت! شنو هالحقارة الي بيك!! اكرهك اكرهككككككك!!!
عكدت حواجبي بارتباك، كلمة الكره جانت قوية عليه! بس ما سمحتلها تضعفني.
عقاب: علساس اني الاحبج، مشاعرنا متبادلة دكتورة!
كلت واني صاك ع اسناني بغضب مكتوم.
اماني: انت اقسى ابتلاء من رب العالمين الي..! واني تعبت احاول اتخطى هالابتلاء وانجح بي، تعبت!!
كالتها بقهر وبجت، كلبي رجف من شفت دموعها، تنهدت واستغفرت الله، ما اريد يصير بيناتنا هيج مواقف جدية، لان اني خلص تنازلت عن كلشي جنت مخططله حتى أئذيها، بس هي استفزتني بحجيها الي مدري منين جابته!
حطيت ايدي ع خدها دارت وجهها، كمشتها من خصرها حتى اثبتها بس هي دفعتني وضربت ع صدري بقوة كمحاولة يائسة منها حتى تبعدني، بس اني جنت اقوى من محاولاتها.
ايد ع خصرها مثبتها عليه، وايد ع وجهها، مسحت دموعها برفق ورجعت مررت راحة ايدي ع خدها واني اباوعلها بأسف، ما اريد اشوف دموع بعيونها مهما يكن، لان الدموع بشكل عام تأذيني وكلش اكرهها، ودموعها هي بشكل خاص توجع گلبي.
عقاب: اي اني بلوة ووكعت ع راسج، بس تأكدي انو الجاي رح يمحي آثار هالبلوة المؤلمة بداخلج، وانو الله حيعوضج بالاحسن ويجازيج ع صبرج
حجيت بنبرة غلفها الاهتمام والحرص، عبست بملامحها وزادت بالبجي، خليت راسي ع راسها وغمضت عيوني وهي ظلت تبجي بحرگة گلب، شكد كرهت نفسي لحظتها..!
عقاب: اشششش كافي مو راحت عيونج، بسج يبعد عيوني
حجيت واني امسح دموعها، عيوني حُمر وكوة لازم دمعتي، الي ولأول مرة من فترة طويلة تهدد بأنو تنزل من عيني!
اماني: تعبت ولله ... تعبت لخاطر الله حس بيه!
حضنتها لصدري ولحظتها نزلت دمعة يتيمة ع خدي، بس جنها من نزلت خدشت خدي من كد قوتها!
عقاب: حاس ولله...
كلتها وشديت ع حضنها اكثر، وايدي ع شعرها المموج الحلو تربت عليه بلطف، واهمسلها بـ كافي وبس..
بعد فترة قضيناها هيج، ابتعدت عني وراحت تركض للحمام، ذبيت حسرة شكبرها حسيت شكت بلعومي من قوتها..!
كعدت وخلخلت ايديه بشعري واني افكر والعن الشيطان الي وصلنا لهالمواصيل..
وبنفس الوقت مستغرب روحي، وشلون حضنتها وبجيت، اني الي دمعتي اعز من روحي عندي من كد غلاوتها، نزلت علمودها!
طلعت من الحمام ورادت تروح للغرفة، عرفت تريد تنام فـ صحتلها.
عقاب: تعاي شوية
اجتي ومبين عليها مستحية من الموقف الصار.
عقاب: الاكل عالطاولة، روحي اكلي
اماني: ما اشتهي شكرًا
عقاب: ما طلبت منج تاكلين، دا أأمرج، روحي اكلي
ضيقت نظراتها وحجت بشك.
اماني: رجعنا؟
ضربت ع رجليه وكمت.
عقاب: مشايفة وجهج شلون اصفر؟ ادور بجيتي هواي فـ تحتاجين اكل يرجعلج طاقتج، خو ما اني اعلمج هالحجي دكتورة؟
اخر جملة كلتها بشقة.
اماني: تمام اصلًا ردت ارتاح شوية وارجع اتعشا
عقاب: خوش لعد
راحت تاكل واني توجهت للغرفة، نزعت البلوز وبقيت بالبنطرون، كعدت ع حافة الجرباية وذاكرتي تعيد الموقف بالتتابع عبالك تسجيل ومشغلينه.
فصلني عن افكاري صوت الدكتورة، الي حجت بتوتر.
اماني: لعد انت تكول اكلي وانت متاكل؟
عقاب: اكلت برا، ذني الج
اماني: اهاا تمام شكرًا
عقاب: ادللي يابه
راحت واني تمددت وعيوني عالسكف وافكر ..
...
اماني
كلام ريما شوش عقلي، وخلاني ما اثق بتحسُن معاملة عقاب الي، فأول ما اجة انهديت بي!
مدري غضبي سببه لان عرفت بنفسي احبه، فـ ردت بس اتعارك وياه وافرغ من عصبيتي ع نفسي!
مادري شلون كبت بيناتنا وانتهى بيه النقاش منهارة وابجي بضعف.. كالعادة!
بس الي صدمني، شلون احتواني ومسح دموعي، اما كلامه عن انو الجاي احلى صح فرحني، بس بنفس الوقت ترك علامات استفهام براسي.. شقصده بالجاي؟ وهل حيكون هو موجود لو شنو؟
العجّبني بروحي من حضنني شون زدت بالبجي، عفية حضن يسوي واهس للبجي، بحيث حسيت كلشي قاهرني ومضوجني طلع وراح وصرت خفيفة.
رحت اغسل وصوته يرن بأذني وهو يواسيني ويكولي كافي تبجين، كزبر جسمي وكلبي سوة زفة بنبضاته المجنونة، شديصيرلج اماني!؟
طلعت ووصاني اتعشا، هو اني صح جوعانة بس استحيت اكل كدامه، ادور اني الثولة شجاني كلما اخذني بحضنه انهد بالبواچي مثل الجهال، شيكول عليه هسة افف!
كملت اكل فرشت اسناني ورحت تمددت، ع كولة عقاب فقدت طاقتي من ورا البجي، من طبيت للغرفة جان عقاب كاعد بس صافن، من شافني دار وجهه، تعديته ورحت بمكاني عالكاع.
تمددت ونطيته ظهري، تمنيت يكولي تعاي عالجرباية نامي نفس ذيج المرة بس الظاهر مو كل عيد ثريـد.
تشقلبت بالفراش رايح جاي والنومة ماكو، قافلة متجي لعيني، درت وجهي ع جهة جرباية عقاب، جان كاعد ويباوعلي، نصدمت ومعرفت شسوي، درت وجهي بعجلة ودكات كلبي ردت تنبض بخبصة، ادري شجاك يگلبي ملكيت غير هالرجال حتى تحبه!
....
عقاب
نامت بالكاع وعيوني عليها، اريد اكولها نامي هنا عالجرباية بس اكو شي يمنعني.. ماعرف شنو.
صافن عليها وهي تتحرك بالفراش، الظاهر مدا يجيها نوم مثلي هه، اندارت فجأة واني ملحكت ادير وجهي بعد، ظليت اباوعلها وبنظراتي اسف عالسويته بيها، دارت وجهها وغطت راسها بالبطانية، نمت ع ظهري ورجعت اصفن بالسكف منا لما تجي النعسة.
ثاني يوم الصبح، كعدت من وكت تمغطت بالفراش بتعب، بعد محتاج كم ساعة نوم، احس روحي ما مصحصح بس لازم اروح للشغل.
كمت اغسل وابدل، لكيت الدكتورة شامرة البطانية، تقربت جريتها من جوة رجلها وغطيتها ووخرت.
وكفت ع صفحة، اباوعلها وهي نايمة، شكد ملامحها حلوة وتنطي احساس بالطمأنينة.. انجب عقاب وولي لشغلك كال طمأنينة كال.
حتى كهوتي عفتها، ركض بدلت وطلعت لان اذا ابقى هنا ما اضمن روحي شسوي!
بالمكتب، كاعد وقسورة يلح ع راسي.
قسورة: عقاب بربك حاجيت الدكتورة لو لا؟
عقاب: ميحتاج كتلك، نكمل ونولي
قسورة: مو خاف ريما مموجودة، غير تتفق وياها شبيك
عقاب: لا اله الا الله
زفرت بنفاذ صبر.
قسورة: يلا خابرها بداعة حبنا
عقاب: افتهمنا كافي سد حلكك
قسورة: ها اهااا
سد حلكه بأيده، جريت التلفون اتصلت عالدكتورة وفتحت مكبر صوت.
عقاب: الو
اماني: هلاو عقاب
استغفر الله يا ربي منين اتلكاها اني، من هالمطي الاكل گلبي لو من هالمايعة هاي
عقاب: الظهر اخذج تشترين ملابس للدوام، جيبي اختج وياج اذا تريدين
قسورة رفسني لان كلت اذا تريدين.
اماني: ماله داعي وجودها، اني اختار
قسورة عوزه بس يبجي هنا، اشرلي بتصرف!
عقاب: يابة دجيبيها وياج هسة انتِ شخسرانة، متكيفين تشوفين اختج وتطلعين وياها؟
باستغراب ردت.
اماني: تمام بس ليش معصب؟
عقاب: ما معصب، صوتي هيج طبيعته
اماني: هاا تمام
سديته بوجهها، مية مرة كايللها لتكولين هاا، اجاني قسورة دنك عليه لان كاعد عالكرسي وشبكني.
قسورة: اخوي الجابته الدنيا
عقاب: تدلل
وخر عني وسألني.
قسورة: شرأيك بملابسي اليوم؟ شلون طالع حلو لو لا؟
عقاب: تلعب النفس، بحيث اذا شافتك البنية تشرد وترجع لبيتهم
قسورة: عقاب احجي الصدك مو وكت شقاك الجايف
عقاب: ماكو جايف غيرك، جمالة يسأل حلو! يابه دطيرر!!!
قسورة: هو مو صوجك، صوجي اني اسأل عديم ذوق مثلك شمعرفك بالموضة والستايل انت، لازكلي بالقوط السود والرمادية جنك قاضي
عقاب: ع الاقل مرتب مو مثلك
قسورة: هه علساس تلحكني بالترتيب انت، رايح لليث هو يعرف بهالسوالف وعود اخذ رأيه
عقاب: متولي منو لازمك
قسورة: رايح بس خ اكلك شغلة، مو دبرتلي طلعة وية الحُب عبالك تظل تغلط عليه وتمنني ترا ..
قاطعته: شتسوي؟
قسورة: اشك ..
قاطعته: منو؟
قسورة: حلكه لليث حبيبي مو وياك الحجي
عقاب: عبالي
ابتسمت بغرور وهو راح، كوة لازم روحه عني وميغلط لان رگبته بأيدي هههه.
...
انتهى!
لا تنسوا التصويت 🖤
#الكاتبة نورمين 🖤