#خطأ_طبي «عقاب الاماني»
بقلــم : نورمين 🦋🖤
...
اماني
اليوم صار 40 يوم ع غلطتي، الي دفعت ثمنها انسانة بريئة، عقاب وزع ثواب ع روحها بس استغربت ليش محد اجة من كرايبه، بس الولد جماعته ونبهني ما ادنالهم، اني هم ما اكدر اراوي وجهي اصلا، تمنيت الكاع تنشك وتبلعني من كمية الالم والفشلة.
صديقه قسورة سألني ع اهلي وع اخواني، عبالك بتحقيق كاعدة، جاوبته لان معدنه شي والكل يعرفنا.
لليل، جنت كاعدة ارتب بالملابس وعقاب طالع، كلش ضايجة هنا ومشتاقة لشغلي وحياتي، وكلما اصفن اكول يربي ليش خليتني ارتكب هيج غلطة رغم نيتي جانت خير!
واظل اعتب ع نفسي و ع حظي، الصار ميتغير بعد، بس اني اظل الوم بروحي، مع انو كلام دكتورة تيا يرن ببالي، من كلتلي ' بالحالتين جانت حتموت، السويتي انو عجلتي بموتها كم دقيقة وبس' ..
فزيت من صفنتي ع صوت عقاب المعصب.
عقاب: طلعي منا
ظليت صافنة، شبي هذا متنگ للاخير!
اماني: ليش؟
عقاب: بدون ليش، طلعي برررا!!
نتر بيه وعيونه تذب شرار، عفت كلشي وكمت، من وصلت لباب الغرفة انداريت عليه لكيته معصب كلش ونظراته حتاكلني، وخرت بساع لان هم حقه، يعني الله يعينه مكابل الكتلت اخته حتى بهيج يوم.
علكت تلفزيون وتمددت عالقنفة اباوع فلم، الفلم ممل والوضعية مملة ومادري شسوي، كمت جبت جبس وحطيته ع قناة اغاني، جان طالع كاظم الساهر، ابتسمت ورحت ويه صوته والكلام مال الاغنية بغير عالم، كلش احب كاظم واغانيه وشخصيته وكلشي كلشي بي، هالرجال لازم يستنسخون منه فد 20 نسخة ويوزعوها ع كل بلد عربي، بلكت الله يتعلمون الزلم البقية منه.
ورة ساعتين ونص ضبط من طردني، رحت للغرفة اريد انام بس لكيتها مقفولة، ظليت مصدومة والدمعة واكفة بطرف عيني.
اخذت نفس ووخرت، عادي يابة واذا طردني، واذا قفل غرفته حتى ما اطبله، كلش عادي اصلا استاهل.
كعدت بالكاع، لميت رجليه لصدري، ودفنت راسي بينهن وكمت ابجي بحرگة، من غير شي اني مخنوكة، وادور تصرفات عقاب كلما جالها تزيد سوء، وماعرف ليش دا اتأذة كلش من يعاملني بجفاء، رغم اني تعودت عليه وما المفروض احلم بشي غير هيج اصلا!
كلبي يوجعني ومتألمة، وعذاب الضمير هذا قصته لوحدها تكفي، ماعرف شسوي وعقاب يرتاح ويغفرلي، شوفته وهو حاقد عليه ومعصب مني بدت تقهرني!!
...
عقاب
الدنيا ربيع والهوا حلو، هستوني راجع من المكتب وسمعت صوت الاغاني ترن من البيت.
وكفت بمكاني ممصدك، معقولة بيري رجعت؟ لعد اليوم مو جان اربعينها؟!
مشيت بخطوات ثكيلة وبيني وبين نفسي ادعي تكون فعلا موجودة بحياتي وما ماتت، دكات كلبي تسابق عيوني بالترقُب والرغبة بالتأكد.
فتحت الباب وطبيت، جانت بيري كاعدة ع القنفة وضايجة، الاغاني التحبها معلوكة ليش متركص عليهن؟ وشبيها هيج مقهورة ووجهها ميتفسر!!
هالامور شغلتني عن التفكير بأنو هي كاعدة كبالي!!
رحت يمها والدموع متجمعة بعيني، وكفت كدامها باوعتلي بقهر وكالت.
بيري: ليش هيج دتسوي عقاب؟
عقاب: اني؟!
هزت راسها، رجعت حجيت بقهر.
عقاب: شمسوي اني؟ مو انتِ العفتيني ورحتي!
بيري: ماما وبابا دزوا عليه
عقاب: ليش بس انتِ، ما اخذتيني وياج!
حطت ايدها ع حلكي وسككتني وكالت بحزن.
بيري: انت بعد عندك حياة حلوة تعيشها هنا، ليش هيج تبجي ومقهور؟ ترا اني فرحانة كلش هنا، بس من اجي اشوفك هيج كلش اضوج واتأذى!
عقاب: بيري انتِ متتي ضحية خطأ طبي! رحتي من ايدي بسبب غباء وعدم كفاءة الدكتورة!!! شلون تريدين ما انقهر ولج انتِ كل اهلي مو بس اختي!
بيري: لا عقاب لا، الدكتورة مالها علاقة خطية لتأذيها
عقاب: ولج كتلتج وتكولين خطيةةةةةة!!!!!!
بيري: ما كتلتني ولله، اصلا اني صعدت وية ماما وبابا للسما قبل لتبلش بعمليتي اصلا!
ظليت ساكت واسمع وعقلي مدا يستوعب كلامها!
عقاب: شنو قصدج؟
بيري: اني متت قبل لتسويلي العملية اصلا، كافي تعذبها عليك بداعتي عندك عوفها خطية
عقاب: شدتحجين انتِ!!!!!!
شبكتني وبجت.
بيري: دير بالك ع روحك اخويه الحلو القوي، لتخلي بالنا يمك وتتعبنا، احنه بخير هناك
حطيت ايدية ع جتفها، وفجأة اختفت من كدامي وظليت صافن بالفراغ، احاول استوعب كلامها مدري استوعب انو شفتها كدامي حليانة ومبينة مرتاحة بس حزنها جان بسببي..
فزيت من الحلم عركان وعيوني محتدة، كلبي يدك سريع ومحاوطتني رهبة غريبة، تذكرت شصار بالحلم، واجة كلام قسورة ببالي، من كال بيري تتعذب بكبرها كلما تعذب روحك علمودها..
ما لحكت افكر بالحلم وبكلام بيري زين، لان تهادى لسمعي صوت انين وشهكات..
كمت من مكاني مرتعب، لان بس الدكتورة هنا واخاف صارلها شي!!
فتحت باب الغرفة، الي قفلتها قبل شوية حتى ابقى وحدي والظاهر نسيتها ونمت.
شفت الدكتورة كاعدة بالكاع، ضامة وجهها وتبجي بحركة، تخبلت من شفتها هيج وغضبي منها اختفى، حل محله الخوف عليها!
ركضت عليها، حاوطتها بايدية وسألتها بقلق.
عقاب: شبيجج!! اماني باعيلي شو..
وهاي جانت اول مرة اصيحلها بأسمها!
رفعت راسها وشفت حالتها، انكسر كلبي عليها ولعنت نفسي الف مرة لان اني سبب حالتها هاي!
دموعها محتلة وجهها، عيونها ذابلة والحزن تارس ملامحها، باوعتلي متاسفة وكالت.
اماني: كُلش اسفة ولله
جريت نفس بصعوبة واخذتها لصدري حضنتها، هي هم ما صدتني، بالعكس حسيتها هي حابة هالشي، مسحت ع راسها ببطئ وهي تشهك بضعف، عيوني استسلمت ونزلت منها دموع، بس السؤال الي مدوخني، منو مفروض يواسي منو؟ مو كأن الادوار انكلبت!
حطيت ايدي جوة رجليها وشلتها، حاوطت ركبتي بايديها وهي مستمرة تبجي وتتنفس بصعوبة، حطيتها ع الجرباية وكعدت بصفها، بحيث بعدها نايمة ع صدري ..
دكات كلبي هنا مدا اعرف شبيهم، صاروا مثل الطبل واكو فد احساس غريب وحلو بداخلي، لانها بحضني!
عقاب: بسچ بجي يابة مو فتيتـي كلبي
عضت شفتها السفلية حتى تكتم صوت بجيها، مديت ايدي ع شفايفها حررتهن، ومررت اصابعي عليها ببطء، سكتت وظلت تباوعلي بضياع..
ما انكر اكو رغبة قوية بداخلي انو اكل شفايفها هسة بس ما اكدر!
حطيت اصابعي ع خدها ومررتهن بلطف، بشرتها ناعمة جنها حرير، لدرجة احس اصابعي الخشنة رح تخدشها من كد الترافة البيها ..!
عقاب: ليش جنتِ تبجين؟
دنكت راسها وكالت .
اماني: ماعرف ع شنو بالضبط، بس هي تراكمات كلشي صعب صارلي هالفترة
عقاب: من ضمنهن اني؟
باوعتلي بنظرة خاطفة، مستغربة هالسؤال ورجعت دنكت ومحجت شي، وصلني جوابها.
هزيت راسي وتنهدت.
عقاب: وصل الجواب
اماني: بس اني عاذرتك رغم كلشي، يعني مو سهل الي دتعيشه
عقاب: انتِ من شنو مخلوقة؟!
رفرفت برموشها بعدم فهم، ماعرف منين اجتني الجرأة بحيث مديت ايديه وتلمست رموشها ع كيف وكلت بصوت ناصي.
عقاب: رموشج طويلة وكثيفة
بارتباك ردت.
اماني: وراثة من بابا
ابتسمت بخفة.
عقاب: شي حلو..
اماني: ها؟
عقاب: لتكولين ها
اماني: ليش؟ وشنو اكول لعد؟
عقاب: اهوو بدت تتسأل، نامي
وخرت راسها عن صدري ورادت تكوم لمكانها بالكاع، رجعتها بحركة سريعة هي انصدمت وحجت بتعجب.
اماني: خلي اكوم لمكاني لو سمحت!
غمضت عيوني وشديت ع لزمتي الها وكلت.
عقاب: خليج هنا اليوم
اماني: بس ليش؟
عقاب: بدون اسألة دكتورة
سكنت بمكانها، حسيت براحة نوعًا ما وكلام بيري يدور بعقلي ويفتر يمين ويسار، اكيد بيري قصدها انو موتها مكتوب اليوم وانو الدكتورة ممتعمدة وندمانة، اي اني اعرف هالكلام شنو الجديد مدا افتهم؟!
زين ليش نيمتها يمي وبفراشي، لا وعلى صدري! رغم قبل شوية طردتها وقفلت الباب ع نفسي، لان ما ردت اسمع حسها او المحها حتى! ليش ما هان عليه اتركها وهي متحطمة وفاحطة بجي، ليش؟!
ثاني يوم كعدت جانت نايمة بحضني وكلش قريبة عليه، اتوقع بسبب النوم ممنتبهة لنفسها دخلت مساحتي الخاصة!
صفنت بيها، شكد الله تعبان بيها حتى تطلع بكل هالجمال والفتنة، ملامحها هادئة وحلوة، رموشها الي من كد جمالهن ماخذات تفكيري بكل رمشة!
شفايفها الحلوة ورسمة حلكها المميزة بشكلها، شغلات تخلي كلبي يدك بسرعة، معقولة حبيتها؟!!
لا يابة حُب ايش، جمالها جذبني بس.
كمت بدلت وعيوني عليها، مدري شجاني عبالك مشايف، استغفر الله.
اخذت تلفوني والسويچ وطلعت، بوجهي للمكتب واحس مزاجي زين نوعًا ما.
بالطريق، دك عليه قسورة.
عقاب: الو ها يابة
قسورة: صباح النور، زين انت شلونك
عقاب: بلا رسميات، اختصر شعندك من الصبح
قسورة: قحطان دزلي تهديد
عقاب: شلون وشوكت؟
قسورة: جنت راجع من يمك، طبيت اريد انام شو الباب اندكت، طلعت اشوف وجان الكة ظرف بي طلقة.
عقاب: شلون عرفت من قحطان لعد؟
قسورة: مكتوب عالظرف قحطان يسلم عليك
عقاب: زين انت وين هسة؟
قسورة: يم بيت الحجي
عقاب: زين، خليها بالمكتب نحاجي الحجي بالسالفة
قسورة: تمام بس دير بالك ع نفسك انت
عقاب: الله الحافظ
قسورة: ونعم بالله
سديته منه وكملت سياقة، ورة شوية دا افوت بشارع ترابي، لان الرئيسي مزدحم بهيج وقت بسبب الدوامات، كسرت عليه سيارة.
طلعت راسي من الجامة وصحت عليهم واني ادك هورن.
عقاب: طاحظ الانطاك سيارة، وخرررر!
ماكو احد يرد، نزلت دكيت ع البنيد وكلت بصوت عالي.
عقاب: اطلع لك اثول!
نزلوا تلث زلم من السيارة، عرفت الرنة شنو.
واحد منهم كلي وهو يبتسم بشماتة.
- استاذ قحطان يبلغك سلامه
ابتسمت وكتله.
عقاب: خرا عليك وعليه سوا
تخبلوا من كلت هيج، طفروا عليه كلهم واني بلشت بيهم دك بوكسات ورفس، بس اخير شي كمشوني اثنين والثالث ضربني بوكسات ودفرني ببطني.
فلتت نفسي منهم ورجعت كسرتهم تكسر، اخذت سيارتي ومن الجامة باوعتلهم وكلت باستفزاز.
عقاب: لا يابة استاذ قحطان هه، طيروا يابة!
طلعت للمكتب، تلكوني الولد مصدومين.
ضرغام: هاي شكو شصاير عقاب؟
ليث: شبي وجهك ويامن تكاتلت من الصباحيات؟
عقاب: دجيبولي مي خ الغي
راح شاهين يجيب مي، رجع انطانياه، شربت وغسلت.
شاهين: سولف
عقاب: زلم قحطان تلكوني بالشارع، عود يهددون وصايرين زلم براسي، فــانطيتهم المقسوم وهايهيه
ضرغام: ليش شعندهم وياك؟
عقاب: سالفة طويلة
فات قسورة شافني، اجة وسألني بقلق.
قسورة: قحطان الكلب مو؟!!
عقاب: اي
قسورة: بسيطة الظاهر ما تربى من ذيج المرة
عقاب: اي بعده جلده يحكه
ليث: شدتحجون انتو؟
ضرغام: انتوا الاثنين مسوين شي مندري بي؟
شاهين: شكو تسأل، اصلا واضحة
قسورة: مو وكت هالحجي، عقاب تعال الحجي ينتظرنا
عقاب: يلا جاي
رحت وياه وهو يسألني.
قسورة: خو ما تأذيت؟
بسخرية جاوبته.
عقاب: شلك بيهن ذني، شنو جديدة الكلة ع احمد راضي؟!
قسورة: مو صوجك ولله، صوج الغبي الي يسأل عليك
حاوطت جتفه وكتله بضحك.
عقاب: اوووي سندوستي لتزعلين جنت اشاقيج
ضربني ع جتفي، تجعدت ملامحي لان ماكلي دفرات هنا.
قسورة: ها يوجعنك؟
عقاب: استمر ولا يهمك
ابتسمنا وطبينا للحجي، الي هم اخذني حاصل فاصل بالسؤال ع وجهي وشصاير، بعدها حجيتله شسوينه اني وقسورة وليش تعرضولنا اليوم.
الحجي: يابة طلع شعر بلساني واني اكولكم لتردون بالمثل، لتجيبون المشاكل لنفسكم، شنو عبالكم ما اكدر اروح للملهى مالته، واحط طلقة بنص راسه؟! لو بس انتوا سباع وتكدرون
عقاب: مو هيج يابة، بس هذا من نوع اذا تسكتله يستقوي ويشوف روحه فد شي
قسورة: صحيح وبعدين السالفة صارلها بالشهرين، ستوه تذكر!
الحجي: مو جان مسجون وطلع
قسورة: ع شنو سجنوه؟
الحجي: اتجار بالمخدرات بالملهى
ربطت مغزى الحجي بالكلام شنو.
عقاب: اوووووبااا
الحجي: تفكر بألي دا افكر بي؟!
عقاب: افاا عليك يابه شون لعد!
قسورة بتذمر: شكو فهموني بعدني لسة ما استلمت!
ابتسمت للحجي، هزلي راسه بسولفله، اشرتله بعيوني بـ تمام وحجيت لقسورة، الي ابتسم ابتسامة خبيثة وكال.
قسورة: أيـا ملعون!
ابتسمت بعرض وملامحي تشع منها الغرور..انت جبتها لنفسك قحطان افندي!
...
اماني
كعدت الصبح متاخرة، فوك العشرة ونص، فزيت مخترعة من روحي، شعندي نايمة لسة اليوم!
من كمت، صارت عيني ع الجرباية، وتذكرت احداث البارحة، وسعت عيوني بصدمة وشوية شوية الابتسامة بدت تحتل وجهي.
شبيه اني اتمضحك مثل الخبلة!
بس اكو فراشات بمعدتي، دا احسها تطير كلبي وتخلي يدك بقوة، مزاجي حلو واحس بطاقة!
كمت غسلت وتريكت واني ساعة اتذكر وابتسم، وساعة اندب حظي واستحي من روحي لان نمت بحضنه.
بس مدري شصارلي تخدرت عبالك، عقلي كام يخربط وكلبي حسيته حيوكف، بس للامانة حسيت بشعور حلو بحضنه، عمري كله محاسة بهيج احساس!
هالعقاب ساعة تلكاه بركان اعصاب وغضب، وساعة تلكاه احن منه ماكو، كلما اتذكر شلون شبكني وشالني، نيمني بفراشه وحطني ع صدره وحاجاني بنبرة لطيفة، الابتسامة تنرسم ع وجهي وكلبي يخفق بجنون!
لملمت البيت عالسريع، واخذت منشفة حتى اطب اسبح، ووراها اسوي غدة.
كملت سبح، طلعت بالخاولي اتمختر، يربي شجاني شديصير وياي!!
وكفت اطلعلي ملابس وما احس الا عقاب بوجهي!
بلعت ريكي وتبسمرت بمكاني من الخجل، وهو ع وكفته وبعيونه نظرات عجزت افسرها، لهناك وانتبهت وجهه بي علامات ضرب!
عفت كلشي ونسيت شعور الخجل والفشلة، ركضت عليه وحجيت بقلق.
اماني: شبيك عقاب منو مسوي بيك هيجج!!!
عقاب: عادي ماكو شي مهم
اماني: شلون مو مهم شوف وجهك شلون مزورك!!
عقاب: عوفج منه، هاي شنو؟!
كال وغمزلي وهو يباوع ع جسمي، وسعت عيوني بصدمة وحطيت ايدي ع جسمي اضم نفسي.
اماني: ج..جنت اسبح
عقاب: متأكدة اسبحين لو تريدين ترديلي سالفة الفرة بالخاولي؟
حجيت بحدة.
اماني: شدتحجي انت!! اكيد لا!
ابتسم وكال بسخرية.
عقاب: وشبيج منفعلة، ريلاكس يمه
اماني: شكد خبيث!
ضيقت عيوني وحجيتها، فرد عليه وهو مبتسم بغرور.
عقاب: شهادة اعتز بيها هاي
اماني: من رخصتك شويه بس ابدل
عقاب: هاي غرفتي، مالج حق اطلعيني منا
اماني: خوش لعد، ظل بيها واني طالعة
عقاب: بكيفج دكتورة
دنكت اخذت تراكي، لان وكع من ايدي من شفته متعور، وهو كال بصوت عالي.
عقاب: يحصان الحمزه.. جدي انسمط!! اشتعلت صفحتك دكتور ع هالحطة هاي ..
انداريت علي، يعني عادي المنشفة طويلة مو كصيرة حتى يحجي هشكل!
اماني: شنو كلت؟
عقاب: ميخصج
اماني: تحجي عليه وتكول ميخصج، يخص منو لعد بلا؟
عقاب: ميخصج
كالها بتحدي، لدرجة استفزني!
اماني: انت شنو مشكلتك ممكن تفهمني؟
عقاب: انتِ
اخذت نفس مهزوز، متوقعت اجابته هيج!
عقاب: وين راح لسانج الطويل؟
رديت بتوتر..
اماني: ه..هـاا؟
عقاب: وسطعش لهدا يالفاهية، اني طالع وانتِ فظيها بدلي اريد اجي اشتغل هنا
هزيت راسي بتوتر ممزوج بالخجل، طول الوقت نظراته اكلتني!
....
عقاب
رجعت للبيت من وكت، حطيت العلاكة الجبتها وياي عالطاولة ورحت للغرفة، شفتلك الدكتورة بالخاولي وشعرها ينكط مي، بشرتها حنطية ممزوجة ببياض منطيتها فد لون مميز خاص بيها هي بس!
الخجل السيطر عليها من شافتني، خلاني ازيد من قوة نظراتي الها، لان اريد ابقى اشوف الخجل اللطيف بيها، ولو اني عيوني من وحدهن اكلنها اكل ومكدرت اشيلهن عنها اصلا.
ادور من دنكت، لعنت جدها العشرين، بت الاوادم لو متعمدة تجلطني، لو ماكو غبي معلمها انو ميصير تدنك كدام رجال بهالطريقة!!
زين اني زوجها مو اي رجال، شبيه هيج ضايج!
كعدت بالصالة انتظرها لما تجي، شوية واجت باوعتلها وضحكت، لان لابسة بجامة التراك بالمكلوب، ههههه همزين ما حطتها براسها من السرعة والخجل.
اماني: خير اكو بيه شي يضحك؟
عقاب: نجبي وتعاي كعدي
كعدت وهي مبرطمة بضوجة، دفعتلها العلاكة واشرتلها فتحيها.
اماني: شنو هاي؟
عقاب: فتحيها وتعرفين
فتحتها، طلعت علبة التلفون وابتسمت بسعادة، لسبب ما انعديت منها وابتسمت اني هم!
اماني: جبتلي تلفون!
عقاب: اي
اماني: صدك يعني!!!! واخييييرًا عقاب!
عقاب: حزري الاقوى منها شنو ؟
اماني: شنو؟
عقاب: حترجعين للدوام
كلتها وابتسمت.
..
انتهى!
-لا تنسوا التصويت 🖤
-الى اللقاء قريبًا..
#الكاتبة نورمين