#خطأ_طبي «عقاب الاماني»
بقلــم : نورمين 🦋🖤
...
حطيتله الاكل، هزلي راسه كأنو ديكول شكرًا!
وخرت عنه هم شبعت وهم استحي اكعد يمه وهو نص مصلخ.
كعدت بالصالة وفتحت التلفزيون، اكلب بشكل عشوائي، احاول الهي نفسي بشي.
شوية واندكت الباب، التفتت شفته راح فتح الباب وطب ولد من جماعته تسالموا ومدري شكله وضحك، عقاب ضربه وطببه.
بلعت ريكي بتوتر ممزوج بالخجل، هسه هذا مو عباله بيننا شي!! ديلاا هي خربت شيريد يفكر خ يفكر.
عقاب
جنت راجع اخذ كم ملف من البيت ونطلع اني والولد نخلص شغلة كلفنا بيها الحجي، وانصدمت من شفت سيارات وزلم بالباب، عرفت هذا رياض!
عفت قسورة وشاهين وليث وضرغام يخلصون شغلهم وي الزلم واني طبيت لجوة، شفته صدك هو!
وبعد نقاش طويل، خلصت منه وطلبت من الولد يروحون، ورحت اسبح.
طلعت اجيب علبة غسول جسم جديدة لان ذيج مخلصة، شميت ريحة اكل طيب ورئسن عرفت هذا طبخ بيري، كلبي انعصر واني اشوف الدكتورة دتاكل منه!
كملت وطلعت، كلتلها تصبلي لان مالي حيل اكوم بعد.
شوية واندكت الباب، فتحتها جان قسورة.
قسورة: نسينا الملفات يول
عقاب: اي ولك نسيتهن!
ضربت ع كصتي خفيف.
قسورة: حقك تنسى، احممم شمسوي اعترف
يحجي بخبث ويأشر بعيونه عليه وعالدكتورة، عرفت نيته تبن مثله.
كفخته ع راسه وكتله.
عقاب: نجب سرسري
قسورة: انت نجب، منو السرسري اني لو انت بهالحالة؟
عقاب: انت غبي لو تستغبي؟ مو تعرف بأصل الموضوع بعد شكو؟
قسورة: اي ولهالسبب مستغرب، يعني عادي عندك تطلع كدامها هيج؟
عقاب: اي عادي، بيتي واني حر
قسورة: كيفك بس اني حذرتك مو تكول مكلت
عقاب: دنجب نجب واوكف يمك، هسه اجيبهن الك
رحت جبتله الملفات نطيتهيا وراح، رجعت اكل وافكر بكلامه، ع شنو يحذرني هو شكو! قسورة اكيد تخبل ونسى غايتي وخطتنا شنو!
اني وقاتلة اختي مستحيل ننجمع، لو السما تنزل عالكاع هم متصير هالشغلة!
...
دكتور رياض
بهاي اليومين حرت شسوي حتى اكدر احمي بنتي، اني علاقتي بأخواني مو زينة، من زمان كلش تركتهم وانتقلت لبغداد لان ما اريد ادوخ راسي بمشاكلهم وهم ردت ابني نفسي وسمعتي بنفسي بعيدًا عنهم.
زوجتي سما من رجعت من شغلها وعرفت بالصار انصدمت وكلبت البيت كلاب وصار عدها اغماء، متت يلا سكتتها واهدئ بيها واكولها حترجع اماني.
بالصالة كاعد افكر واولادي يمي قلقين ع اختهم.
ريما: بابا اريد اختي الله يخليك سوي شي
ريان: بابا معقولة بمكانتك هاي متكدر تسوي شي وتخلص اماني منهم؟ انطيهم فلوس صخام اي شي!
رياض: دا احاول وان شاء الله اختكم ترجع يمكم بسلامة
ريما: بابا مااريد بس حجي اريد اختي!! صارلك يومين تكول احاول، شمنتظر يعني الا يأذوها!؟؟؟
خزرتها ورديت بعصبية: ما كاعد وساكت ترا، الي دا اكدرله اسوي بس اختكم تزوجته! صعبت السالفة عليه كلش بهالشغلة وهم معاندة مترجع ولا تنطي بي، شسوي اني بهالحالة؟!!
انصدموا لان محد بيهم يدري بأنو تزوجت عقاب اخو البنية الماتت.
ريان: ش..شنوو؟!! تزوجته!!! يابة شدتحجي الله يخليك!
رياض: مثلما سمعتوا، اختكم تزوجت عقاب وما اكدر ارجعها لهالسبب
ريما: بابا اكيد جبروها وهددوها بينا، اختي واعرفها مستحيل تتزوج وتخطي هيج خطوة!
رياض: لعد اني ما ادري؟ ادري بس ما بيدي شي اسوي غير احاول ويه الحجي
ريما ببكاء: الله ياخذه دمر حياتنا وحياة اختي
حضنها ريان ويهمسلها حتى يطمنها.
ريان: اشش لتبجين اماني زينة ورح ترجع بيناتنا
ريما: متسمع بابا شيكول؟! متزوجة ومهدديها بينا اكيد متكدر تعوفه وحتظل هناك تتعذب علمودنا
ريان: اكيد اكو حل ريري لا تقفلين عاد
ريما: ياريت ياريت ..
اختنكت واني اشوف اولادي متعذبين ع اختهم، وهي حالها مو احسن منهم، يا رب فدوة لاسمك احميهم الي، عائلتي معندي غيرهم بالدنيا!
الحل الوحيد الي بين ايدية هو الحجي! لازم اسوي كلشي ممكن حتى أأثر عليه واخلي ينهي زواج اماني بزلمته عقاب.
...
عقاب
نمت ورة مخلصت اكل ماحسيت الا ساعة 9 بالليل، كمت متكسر وراسي مسطور، هي هاي نومة الظهر العوجة.
شربت مي وغسلت وجهي، لكيت الدكتورة متلفلفة بجاكيتها ونايمة ع القنفة، تنهدت بحيرة ..
اكعدها؟ لو اعوفها؟
واني شكو مهتم، خليها مثل ما هي.
بدلت وطلعت، خابرت قسورة يجي للمنتزه الي دائما نكعد بي.
وصلت لهناك واني انفث جكاير بخبال، احس ع ساعة يوكف كلبي من كد النار الي تلسع بي ومخليته يخفق بجنون.
قسورة: بسك جكاير يمعود
محجيت شي، اباوع لكدام وعاكد حواجبي بضيق.
قسورة: اني مو كتلك اذا مجنت كد الخطة لتنفذها؟ جان كلت للحجي ما اكدر وفضيتها
عقاب: شاكيلك اني؟
قسورة: بلسانك لا بس بتصرفاتك ونظراتك اي وكلش واضح هم
ابتسمت وباوعتله، اخذت نفس من جكارتي وكلت.
عقاب: شتحجي تصرفاتي بلا بروفيسور قسورة؟
قسورة: اولا لتقلد، ثانيا لتستهزء بشنو البروفيسور احسن مني؟!
عقاب: لا ابد، جوة نعالك اصلا
قسورة: اي عبالي
ضحكت عليه ورجعت ادخن.
قسورة: شوفتها كدامك تتحرك وعايشة تحرك كلبك مو؟
هزيت راسي وكلت بصوت حزين.
عقاب: تمرد كلبي مرد مو بس تحركه.. قسورة احس روحي تطلع من اتذكر اختي جوة التراب وهي عايشة ولا كأن صار شي!
قسورة: ولله حقك .. لعد اني ليش كتلك عوفها وارفض فكرة الحجي، ادري بيك رح تتوجع.
عقاب: اخخخ الي بالگلب خلي بالگلب مضموم، همزين الوجع و النار الي بصدري متنشاف، جان حركت كلمن وكعت عينه عليها..
قسورة: منو كلك متنشاف؟ اني شايفها بوضوح بعيونك وبحجيك
عقاب: اشوة لعد، اكو واحد حاس بيه
قسورة: مو بس حاس، ديتوجع وياك هم..
باوعتله وشفت بعيونه نظرة شخص صدك محروك كلبه علية!
قسورة: عقاب انت مو بس صاحبي الله يشهد معزتك اكثر من هيج بهواي، ولو اني معندي اخوة وماعرف شنو يعني كلمة اخو، بس انت خليتني اعرف معنى السند والاخ
عقاب: ليش اني منو الي غيرك ظهر انتچي عليه ولك؟! تچايتي وحبلي الشوكي وهيبتي انت
قسورة: احوووي رفيق دربي وحويصلة گلبي، كبدي وما حوله انت
عقاب: امعائي وملحقاتها ..
ضحكنا وحطيت ايدي ع جتفه، قسورة اول اسم رح يخطر ببالي لو جنت فرحان او ضايج، اول بشر صادقته، اكبر مستودع لاسراري واقوى ظهر وسند الي ..
بهالدنيا ما صفالي بس هو والحجي والولد اعيش علمودهم.
من بعد وقت طويل خلصناه نسولف وندخن ونضحك، رجعت للبيت واستوقفتني شغلة لفتت نظري!
البيت الي بصفنا بي ضوة!
هذا متروك ومحد ساكن بي، لعد منين هالضوة ومنو اكو جوة؟ يصير رياض لو زلمه!! اي وليش لعد تطلع منهم.
نزلت اتمشى ع كيف واتختل حتى لحد يشوفني او يحس عليه. تقربت اكثر لحد ما شفت بنات اثنين ومرة جبيرة وياهن ديشيلن غراض من يم الباب ويطببنها لجوة..
عكدت حواجبي بتساؤل، منو ذني؟ وليش عمي ابو قائد وافق يكعدن هنا!!!
تحمحمت وتقدمت يمهن، فزن عبالك شبح.
عقاب: العفو انتوا مستأجرين جدد هنا؟
البنات ختلن لورا وامهن ردت.
-اي عيني اليوم انتقلنا
عقاب: هااا اهلا وسهلا بيكم، اني عقاب ساكن بالبيت الي بصفكم، هذاك
اشرت ع بيتي وعرفتهم عن نفسي.
-تشرفنا اني اسمي عذراء وهذولة بناتي ميقات وجنات
عقاب: اهلا وسهلا بيكم
ابتسمتلي بودية، بعدين استأذنت منها ورجعت لبيتي، وكفت بالباب واتصلت ع ابو قائد حتى اتاكد.
عقاب: شلونك عمي شلون كيفك
ابو قائد: بخير انت شلونك وليدي خو ما محتاج شي
عقاب: لا عمي مستورة والحمدلله بس رايد شغلة
ابو قائد: الحمدلله، كول شمحتاج وليدي
عقاب: ردت اعرف هاي المرة الجديدة الساكنة هنا هي وبناتها شنو منو؟ تعرف بحكم شغلي لازم اكون مأمن من جيراني
ابو قائد: هااا اي اي، ليظل بالك حبيبي هاي المرة بضمانتي، هي من كرايبي، بيني وبينك هي من طوزخرماتو، المرة زوجها متوفي من سنين ومالها احد، وهي معلمة عايشة هي وبناتها ومالها اذية ع بشر، وذاك الاسبوع صار تفجير كبال بيتهم فخافت وخابرتني حتى ادبرلهم مكان ببغداد لان بعد متأمن العيشة هناك والوضع متوتر
عقاب: اهااا، هيج الحجي، خير ان شاء الله
ابو قائد: اي يابة فأريد اوصيك عليهن لان تدري اني بعيد بحكم شغلي، دير بالك عليهن واحسبهن اخياتك
عقاب: بدون متكول عمي بعيوني اشيلهن
ابو قائد: سالمة عيونك بوية
ودعته وسديته، فتحت الباب وطبيت، الهدوء مسيطر عالجو، وهم ممهتم اشوف وينها او شدتسوي، نزعت جاكيتي وطبيت للمطبخ احضر كهوتي.
شوية وفارت، صبيتها وكعدت بالصالة فتحت التلفزيون، حسيت ع الدكتورة دتمشي يعني اجت، غلست وسويت نفسي ممنتبه.
اجت كعدت كبالي وحسيت عندها حجي، تباوعلي وتريد تحجي وتسكت.
اني ماباوعلها بس هيج ابوك نظرات بلا متدري.
اخيرًا حجت.
اماني: ممكن احجي وياك بموضوع؟
اخذت رشفة من كهوتي ونظري لكدام، جاوبتها.
عقاب: حسب الموضوع
اماني: اريد ارجع لدوامي صارلي يومين مرايحة
باستهزاء ابتسمت وكلت.
عقاب: مشتاقة تكتلين كم شخص بعد؟
بهتت وكوة حجت بضعف.
اماني: ع فكرة، مو بس انت الشخص الوحيد الحزين هنا ع الي صار
كعدت ع حيلي، باوعتلها بنظرات شرارية وكلت واني صاك ع اسناني بغضب.
عقاب: هه! لا صدك، بسلا انتِ هم حزينة؟!
مكالت شي، ساكتة وعيونها تلمع بدموع
عقاب: لو تحتركين مية مرة وتموتين وترجعين تعيشين متوصلين لربع الوجع الي دا احسه! انتِ اي ممكن تكونين ضايجة ع مريضتج الي راحت من ايدج سهوًا، بس اني متت واندفنت بالحياة بسبب سهوتج هاي، فقدت اختي ووحيدتي والفرد الوحيد الباقي من اهلي! تيتمت بفضلج دكتورة
دموعها نزلت وحجت بنبرة متأسفة.
اماني: اني اسف...
قاطعتها: لا تتأسفين وتتعبين نفسج، لا اسفج ولا اعتذاراتج تصلح الي انكسر ولا ترجع الي راحوا
اماني: لعد كولي شسوي حتى ترتاح؟
عقاب: لتسوين شي حاليًا ومسحي دموعج، ترا اني من حجيت هالحجي ما قصدي اثير حزنج او مشاعرج، لا ابد وهذا كله نقطة ببحر احساسي بس حبيت اوضحلج الفرق بين الي انتِ تحسيه وبين الي اني احسه، لان الوجعة ما توجع بس صاحبها والحِمل ما يشيله بس اهله دكتورة
غصت بدموعها اكثر، يا طلابة دموعها يا ربي...
عفتها وطلعت للحديقة ادخن، دنيا باردة ثلج بس ليش مدا احس بالبرودة؟ كلش عادي عندي الجو، مدري لان روحي تحترك ميـمض بيها برد ولا حر ولا غيره..
...
اماني
ورا ما راح عقاب، بجيت بكل قوتي، ع نفسي وع السويته وع الوضع الي وصلتله، جبت كل حزن عشته بهالفترة وبجيت عليه كله بحيث كمت اختنك والنفس كوة اجره، يربي فدوة لاسمك برد كلبه لعقاب لان الظاهر اني صدك محاسة بي..
كمت غسلت ورحت للغرفة، اريد اسبح بس احتاج ملابس، واني قطعة لبس وحدة معندي هنا، فضولي اخذني لغرفة اخته، فتحتها وطبيت وانصدمت، اثاثها ابيض كله وكل الغراض مرتبة برفوف، ريحة الغرفة طيبة ومعبالك متروكة، كلبي عصرني واني اتخيلها هنا جانت تنام وهنا غراضها..
يربي شكد صعب يروح البشر ويظلن ذكرياته واشيائه تلچم بگلوب اليحبوه من بعده، اوووف لو ممسوية العملية بذيج الساعة.. جانت حتعيش؟!
ولو هي بكل الاحوال جانت حتموت لان خطية التهاب الزائدة عندها وصل حد عالي فـانفجر، وتسمم دمها..
هالشي اني اعرفه كلش زين، بس ابقه احمل نفسي المسؤولية، اني الي قطعت شريان بالغلط وتسببت بموتها قبل موعدها حتلو بدقايق!
حسيت روحي اختنكت، سديتها وطلعت، رحت للحمام.
قفلت الباب علية وطبيت، شفت المي دافي ذبيت ملابسي وصرت جوة الدوش، ظليت واكفة جواه لفترة طويلة بلا حركة، كأنو اريد اغسل نفسي من كل اخطاءها واخلصها من همومها، ابتعدت عنه ورحت البس ملابسي، الصدمة لمن شفتهن مبللات!
اني غبية شون ملاحظت انو معلكتهن بمكان قريب عالدوش، اخذت برنص اسود معلك هناك وطلعت ودكات كلبي تقرة الف، يرب يطلع عقاب بعده مرجع.
سويت الممر خطوتين حتى اوصل لغرفته، كلت اخذلي تراك منه، والصدمة الثانية الي من شفته كبالي!
قطرة دم مبقة بجسمي وتيبست بمكاني، اريد افلت مدري اريد اوضح ليش اني لابسة ملابسه؟ مادري تاهت عليه.
ادور هو جان يدخن، عاف جكارته وتركزت نظراته عليه، نظراته المتفحصة خلتني استغرب وبنفس الوقت خجلتني، بلعت ريكي وكلت بصوت ناصي.
اماني: ا.. اسفة بس تبللوا ملابسي ومعندي غيره...
قاطعني وكال : شكد تتأسفين لخاطر الله
معرفت شحجي، ادور دمعتي وصلت بطرف عيني من الفشلة والخوف، نظراته خوفتني هواي، حسيته رح يغتصبني بعد شوية!
دار وجهه ومدري شحجة بصوت ناصي مسمعته، ادور راح لكنتوره طلع تراك وانطانياه.
اخذته واني متبنجة من الصدمة، او بالاصح من الموقف كله.
طلع من الغرفة وعافها الي، سوة هيج حتى ابدل براحتي اكيد!
ابتسمت .. بعز هالضيم والمأساة العايشتها وياه، دا احس عنده جانب لطيف مضموم!
ومن كلامه قبل شوية، حسيت هو عايش حياة مو سهلة ومتعذب هواي .. لذلك طاغية ع شخصيته القوة والجبروت واللسان السليط، عبالك قناع يلبسه حتى ليبين لاحد شكد هو متأذي ومجروح من الدنيا..!
هزيت راسي ونفضت افكاري، اني بيا حال وافكر بغيري، خ انقهر ع روحي احسن، مادري شنو تاليتي.
....
عقاب
رجعت للبيت، سمعت صوت الدوش مال الحمام، عرفت دتسبح، رحت للغرفة بدلت ملابسي ودخنتلي جكارة، شو هاي طبت بالبرنص، الشعر ينكط مي والسيقان كلها طالعة لان البرنص قصير، وسواده وي لون بشرتها الابيض كام ينطي فد تركيبة رهيبة، صفنت بيها غصبن عني.
فزيت من صفنتي من حجت وكامت تتأسف لان ماخذة برنصي، شكد تتاسف جزعتني ومحمد حتى كلمة اسفة كرهتها ع كد متكولها.
درت وجهي اخذت نفس، وهمست بيني وبين نفسي ومسحت وجهي بقوة.
عقاب: فلك طرك حجي باع الضيم الحطيتني بنصه، اني عايز طياح حظ!!
اخذتلي تراك عريض نطيتهيا، وعفتها تبدل وطلعت.
كعدت بالصالة واني اتنفس ببطء، ما ينلام قسورة من يشمرلي بسامير، لا واني صاير نچر واسكته وعلساس ما اتأثر.
دفعت افكاري السخيفة واخذت جكارة لخ ادخنها، واني اذكر نفسي بسبب وجودها هنا وبمصيرها شنو..!
ورة نص ساعة رجعت، لكيتها نايمة بالكاع ومطيتني ظهرها وتتكلب، الكاع باردة ونومتها تكسر تكسر، تنهدت ولعنت طيبة گلبي الف مرة ع الي رح اسوي.
اخذت التلفون وطلعت خابرت ع قسورة.
قسورة: ها يابة حلمان بيه؟
عقاب: لتلغي لغوة زايدة، جيبلي فراش اسفنج فد اثنين بس كون مريحات وعاليات واستعجل
قسورة بضحك: هنيالج اماني
نترت بي: قسورة!!
قسورة: سكتنا، يلا دقايق واكون يمك
سديته مغتاض، شو ساعة ينكسر كلبي عليها وساعة اتحامل عليها بودي اخنكها..!
صدك ما طول دقايق وجابهن، اني وبيري مجنة نستخدمهن، وبيتنا مبي غير الشغلات الي نستخدمها، لذلك وصيت قسورة.
اخذتهن وطردته لان هم يظل يبسمر ويخليني اضرب اخماس بأسداس، واني منظر قبل شوية لسة مخليني متبعثر.
وديتهن للغرفة، كامت ع حيلها مفزوعة لان جنت شايلهن ودفعت الباب بيهن حيل، باوعت عالتراك، جاي زين عليها يعني صح بي كبر بس ماشي حاله.
ذبيتهن يمها ودرت وجهي، ورحت لجربايتي.
ظلت واكفة تباوعلي وبعيونها نظرة ممتنة.
اماني: شكرا عقاب
محجيت شي، درت وجهي للجهة الثانية، بالي مخربط ومدري شجاني، هاي شتذبلي من تعويذة من تكول اسمي!
استغفرك الهي، ذكرت نفسي بالخطة ورجعت اطرد افكاري ومشاعري المهتاجة، نهايتي وياها مرسومة من اول يوم اخذتها بي، لذلك ماريدها تتأمل ولا اريد اني اتعلق واتأمل بشي مراح يصير، ليش اخلي نفسي بموضع خسارة، يكفي الراح مني.
وبين زحمة افكاري، دخت ونمت.
....
اماني
لبست التراك واخذتلي نظرة ع نفسي بالمراية، شكلي يضحك بي بس شنسوي احسن من ماكو، اخذت البرنص وحطيته بسلة الملابس الوصخة، كلت باجر اغسله اله وارجعه لمكانه قبلا اكلي رزالة منه، خلي الله هادي شوية.
باوعت للمطبخ، جوعانه بس مالي خلك اسوي اكل، ديلا مظل شي للصبح عود اتريك زين.
رجعت للغرفة مستغربة، شو اني رحت ورديت وما حس عليه، بس مبين صافن مو يمي اساسًا، اي الله اليعلم بمنو تفكر استاذ عقاب، تتهنى الماخذة عقلك.
اييي واني شكو بي، شسورت شعري ونشفته من المي وظليت اروح وارجع بالغرفة، من الفشلة مال قبل شوية احس حتى النوم طار من عيوني، ولو هو يا نوم يلفي لعيوني بهيج حالة ..
دا احس هذا قدري وبعد ما الي منه مهرب، خاصة من شفت بابا بكل قوته مكدر يسوي شي، معقولة استعجلت بقرار زواجي منه؟!
اوووف مادري مادري، اني تخبلت من كلي اكتل اختج، عقل مظل براسي مو ادور اكعد افكر وأتأنى بقراري.
انرسم ببالي شكله، ملامح قاسية صوت حاد نظرات شرارية وطلة سوداوية، اوي يمة يخمش الگلب من الخوف.
رحت اتمدد بمكاني عالكاع، اخخخ باردة الدنيا والكاع مثلجة واني منا هستوني سابحة، اجتج طايرة المرضة اماني.
ورة وقت، ما حسيت الا ع باب الغرفة انركعت، كمزت كلت اجاج الموت اماني، باوعت شو عقاب شايل فراشات اسفنج!
توترت اكثر وكمت العب بشعري من لاحظت نظراته للتراك، حسيته مستحسفه بيه، قابل اني كتلك انطينياه، بعدين لو عندي لبس اعتاز لتراكك قابل!!
اجة حطهن يمي وراح لجربايته بسكوت، يمة هالرجال شكد سكوتي، بس اذا حجة ينفجر، جنه بركان اذا خمدت حممه يظل هادئ، واذا هاجت محد يسلم من انفجاره وحممه البركانية النارية.
ظليت اباوعله مصدومة، هذا جابلي فراش!
شكد شي بسيط وبنظر البعض تافه بس شكبره عندي!
من اكو شخص يحتقرك هواي وبوده يدفنك اليوم قبل باجر، وبكل فرصة ممكنة يأنبك ويذكرك بأفعالك السيئة، توصل لدرجة يصير كل موقف او كلمة او تصرف بسيط منه يثير انتباهك!!
ابتسمت وظليت اباوعله بأمتنان، ماعرف شوصف احساسي بس لو جنت بنفس موقفه، مراح اكون هيج لطيفة وية قاتلة اختي!
شكرته، ما عبرني و دار وجهه، هذا شبي؟
عجزت افهمه، لا هو لطيف ع وجه ولا عصبي وحقود ع وجه، حيرني طبعه ..!
....
عقاب
مر اسبوع ونص والوضع ع حاله، واليوم الصبح طلعت مستعجل لان قسورة خابرني ع شغلة مهمة.
ع ما خلصناها، صاير قريب الظهر رحت للمكتب، سلمت عالحجي وسولفنه شوية.
الحجي: شلونك ما لونك
عقاب: برحمة الله
الحجي: والدكتورة؟
عقاب: شبيها؟
الحجي: يعني وضعها امورها
عقاب: عادي ماكو شي
الحجي: زين، انت واثق منها من تتركها ببيتك وتطلع؟
لعب گلبي، شيقصد الحجي عود؟!
عقاب: شلون يابة مفهمت؟
الحجي: اقصد مأمن من ترجع تلكاها بنفس مكانها، خو ما تخابر احد منا منا وتشكيله؟ تعرف اذا صار هيج تنفتح علينا باب ونروح بمشكلة
عقاب: من هالناحية أمن يابة، ضامنها
الحجي: كلش زين بس دير بالك من ابوها
عقاب: ليش يابة اكو شي؟!
الحجي: هو ماكو بس..
عقاب: احجي يابة شصاير؟
الحجي: هذا رياض النهار كله يتصل ويحجي ويتوسل، اخير شي قبل شوية كلي انت جبرتني اختار طريقة متعجبك، فآني خايف عليك
عقاب: لا يابة لتخاف هو شكو، شيريد يسوي خ يسوي
الحجي: ماكو هيج حجي، تاخذ ثنين من الولد وياك يظلون يمك هالفترة خاف يصير ميصير
عقاب: يابة ولله ماكو داعي!
الحجي: هاي من شوكت تحجي شي عكب حجايتي؟
نزلت راسي وكلت: العفو، يجرالك لتريده يابة
طبطب ع جتفي وطلع، راح هو وقسورة يشوفون الشغل شلوت ماشي واني طلعت للبيت.
وكفوني ضرغام وشاهين بالباب.
شاهين: الحجي بلغنا نحرس بيتك لفترة
ضرغام: اي عقاب خو ماكو شي؟
عقاب: لا هيج اجراء احترازي
شاهين: تمام لعد بس نكمل دوامنا نلحكك
عقاب: لا يابة شدعوة، ارتاحوا اليوم وباجر تعالوا
ضرغام: اوامر الحجي بعد
عقاب: ميخالف، اني دا اكوللكم ارتاحوا اليوم، من الصبح لسة ع فد وكفة وتردون ترجعون تحرسون بيتي! شطلعتوا متكلولي
ضرغام: تستاهل انت حتلو تعبانين هم نرابط ببابك
شاهين: اي ولله ويخسة التعب يعطلنا عنك
ابتسمت: تچايتي انتوا متقصرون يابة، بس مثل مكلتلكم
ضرغام: هاهيه براحتك لعد
عقاب: يلا في امان الله
ضرغام & شاهين: الله وياك
رجعت للبيت، شفت جيراننا ام جنات وميقات هستوها راجعة من الدوام، سلمت عليها وطبيت.
كفختني ريحة طيبة صار كومة ما شامها!
نزعت جاكيتي وغسلت، جانت اماني دتكلي كباب بيت والريحة تارسة البيت ترس، اتذكر اخر مرة اكلت هالاكلة من ايد امي الله يرحمها...
اماني: الله يساعدك
محجيت شي، هذا طبعي من يوم عرفتها، تحجي وتحاول تتقربلي بس اني اكطع السالفة من يمي قبل لتبدي اصلا، كعدت بالصالة وفتحت التلفزيون.
شوية وكالت.
اماني: عقاب تتغدى؟
فركت وجهي، يا طلابة اسمي!
كمت يمها وكعدت ع الطاولة، خليتها تاكل من كلشي محطوط يلا اكلت.
اماني: لتخاف ما اسممك، اذا ردت فـ اسمم نفسي احسن واهون، ع الاقل ارتاح واريح الناس مني
كلبي انعصر من كلامها، وحتى من حجت جانت نبرة صوتها كلش عادي، يعني لشنو من مرحلة واصلة هاي!!
زين ليش هيج ضجت عليها؟ مو موتها هو الاريده!؟
عفت الاكل حسيت نفسي انسدت، رحت تمددت وكلامها يدك ببالي ... 'انت ليش هيج' 'ماريد ابقى هنا' 'اسفة ولله مو قصدي الصار' 'لتخاف ما اسممك' 'شكرًا ' 'عقاب لا فدوة'...!
عقلي مخبوص بالتفكير والتحليل وكلبي تعبان، الهي شنو الحل واتخلص من هالعذاب مو ولله حيل ما ظل عندي..!
للعصر، جنت نايم وما حسيت الا ع صوت اماني وهي تصرخ.
اماني: عقااااااب
....
-انتهى!
- لا تنسون التصويت والتعليق لُطفًا 🖤.
-ضيفوا حسابي الانستا وتعالوا هناك ننزل فعاليات وتغشوشات عن القصة. هذا noormin13
-الى اللقاء قريبًا...
#الكاتبة نورمين 🖤