عتگ بالي و صوركم هنه هنه....
سارة
ضحكت وكتلة شنو هالنصـيحة حسـين؟ البارحة تكلي لاتمشين وياهة شنو من شفتها تغيير الحجي ؟كال
وهوة يعدل بساعته لا موبـاعي جنت غلطان مبينة خوش بنية هية كلتي شسمها، هزيت راسي وكتلة نازك
نازك اسمها هز راسة ومشة شمالة هذا الولد راح يخبلني وين الله ويكوم يحبها وينسئ فديكة ام
السحورة طبعا هية متسوي سحورة بس اني احب اسميها هيج , رحت للقاعة وبدأت المحاظرة لحد مخلصت كمت طلعت للنادي طلبت عصير برتقال طبيعي وكيكة
كلبي محترك اخخ دزيت رسالة لريحانة وكتبتلها ماكتيلي منو الي دزلي البارحة رسالة موكلتي حشوف
باسل لو غلستي ام راس المرابع، شوية ودزتلي وكاتبة نجبي ماغلست بس شو شاف الرقم وضل بس يضحك
صفنت علئ الرسالة وكتبتلها امداج وسديت المبايل والله يالله خلي اكل كيك احسلي .
بعد مرور ايام
ريحانة
سارررررة وين خليتي الكريم مالتي؟ جاوبتها سارة وهية تبرم بشعرها شبيج هوة رجعته
بجنطة المكياج رجعت ادور ولكيته لو مالاكيته جان هلسته لشعرها، طبعا اليوم خطبة محمد
ومكلوبة الدنيا كلاب خطار كومة جوة احنا جنا نساعد ماما كملنا وصعدنا ومريم مكملة قبلنا
فهية نزلت يم الناس، واكفة امكيج، ولابسة فستاني يصير مخصر من يم الصدر وبعدين
نازل منفوش وبطني بارزة من عنده ولونه وردي فاتح حييل وسارة كملت واجت برمتلي
شعري ملبست كعب لبست حذاء فلات اكرمكم الله لين ميصير البس كعب ضهـري يضـل
يأذيني، رشيت عطر باوعت لنفسي ابتسمت طلعت حلوة خليت سارة تاخذلي كم صورة
ودزيتهم لباسل ونزلت مشغلات الديجي ويركصن ابتسمت ووكفت اصفك وياهم
وفرحانة وماما تحير شتسوي من كد مافرحانة ،لابسة قفطان مغربي ماروني وشعرها
مسرحته وهوة قصير صاير يموت عليها وومكيجة وبطنها بارزة وطالعة فدشي دخلي
يشوفها بابا اليوم يضمها بقوطية، ارتفعت الهلاهل من نزل محمد من الغرفة كما تبدل
ووياه حسين، محمد لابس قـاط لـون نـيلي، وحسـين لابس دشداشة ولاف غترة يمة فديت
اخواني اني فديتهم،وذبن كم هوسة لمحمد،وماما تهوسلة وهوة خجلان بس يبتسم
ويمسح بكصته ،وشوية وطلعوا ورجعت اركص وية البنات علئ كيفي وماما تخزر بية
وترجع ليورا، لحد ما دك مبايلي نازك، جاوبتها بساع كتلها ها وصلتي؟ كالت اي عفية اطلعيلي
استحي انزل هوسة برة كتلها تمام تمام جايتج انزلي ،اخذت شال وطلعت ووكفت بباب
المطبخ مااكدر اطلع واباوع دخل حسين اكو كم ولد من كرايبنا بالكراج صاحهم كلهم ياولد
يردوكم هناك روحوا بساع شيلوا وياهم الكراسي طلعهم، وراح وشوية ودخلت نازك
وهوة يمشي وراهة وهية ترفع راسها تشوفني وتمشي علئ السريع وهوة يمشي وماعاجبة
الوضع ضحكت ومن وصلت يمي شبكتها، وسلمت عليها وحسين من شافها دخلت طلع،
بوستها وكلت ها ولج شبيج ترجفين، كالت وهية تعدل شالها عفية متتت من الخجل والله
ومنا اخوية عاند من شافها كلها ملتمة يكلي خلي نرجع شلون تنزلين؟ ولاف يريد
يرجع ،وطب اجة اخوج حسين اشرلة واخوي نزل سلم عليه عبالي ميعرفه تالي شو اخوي
يكلي هذا حسين صاحبي من ايام الجامعة وعافوني بالسيارة ونزلوا يسولفون نوب اخوج
حس ونزلني الة اخوية ماعندة احساس عافني مشتولة بالسيارة ضحكت وكتلها ادخلي ادخلي،
صعدنا كبل فوك وكلت لوحدة من البنات تصيح سارة ومريم سديت الباب ونزعت العباية لابسة
بنطرون اسود وقميص اصفر مفتوح من الزنود ونزعت الشال شعرها طويل ماشاء الله اسود
ومسويته ضفيرة حفر ومكياج خفيف وطالعة تموووت كتلها واني اكرص بخدودها ادبسز
ض
ض شطالعة تخبلين ضحكت وكالت وعلي موبجمال شني تموتين وانفتح الباب ودخلت
مريم وسارة طبعا مريم تعرفها لين مسولفين الها عليها سلمت عليها وسارة وكفت تتغزل بيها
وتكلها صدك طالعة نازك خرب يومج ،بعدين نزلنا ونازك لازمة ايدي ولازكة بية تستحي
وماما تلكتها وسلمت عليها وكالت الها اللهم صل علئ محمد وال محمد تخبلين حبيبتي
يحفظج الله وهية صارت زركة من الخجل علئ كولة سارة وخليناها شوية تركص ويانة لحد
ماكالوا تحضروا راح يرحون لبيت العروس، صعدنا بساع لبسنا العبي وعدلنا مكياجنا ونزلنا
لكيناهم ديطلعون حتئ يصعدون بالسيارات، طلعنا الكوستر مقبط والسيارات الباقيات هم
اباوع علئ سيارة بابا بابا يسوق والشيخ بالصدر ومحمد وامي ورة، من بعيد وحسين
اشر النا تعالوا مشينا بساع فتح سيارته ومريم صعدت بالصدر، واني وسارة ونازك ورة، وهوة
مشغل اغاني ويضحك ومندمج وية مريم ونازك حاصرة روحها يم الجامة تستحي متريده
يشوفها، واني اضحك عليها وكالساع تخزرني، لحد ماوصلنا لبيت عمو ونزلنا دخلنا وهوسات
وهلاهل وفدوة لله وداد شطالعة قمر، لابسة بدلة لونها وردي فاتح نفس بدلتي وتسريحة
والمكياج ومبين عليها الخجل تقربت سلمت عليها وباركت الها وهية همست الي عفية
اوكفي يمي كلهم عايفيني متت من الخجل ابتسمت وكتلها تمام هياتني يمج وكفت يمها
واصفك والبنات بالنص لحد ماكالوا راح يعقدون الهم اخذوهم بغير غرفة عقدوا الهم
وبعدين رجعت كعدت ودخل محمد .
وداد
دخل محمد واني احس كلبي راح يطلع من مكانه رفعت راسي لمحته ابتسمت وكبل دنكت
تقرب باسني براسي وكعد واول مااكعد سحب ايدي وباسها وهمس مبروك علينا حبيبي رجفت
وهمست واني بالكوة احجي الله يبارك بيك يروحي، ابتسم وكال شبيج مرتبكة؟ كتلة واني
اعدل بالبدلة مادري محمد مادري ضحك وضغط علئ ايدي وكال هاهية اهدأي ورجع
باس ايدي وكال واخيرا راح تصيرين بأسمي صار سنين انتظر والحمدالله،ومبتسم وعيونة
تلمع لا اردايا همست شكد طالع حلو انتَ؟تنهد وكال حلو بس مااوصل يمج شني شجـاب الثوم
علئ الحلقوم ضحكت وكتلة واني اضغط علئ ايدة موثوم انتَ كيك عيني كيك ضحك وبعدين
لبسني الذهب واكلنا كيك وعصير والضحكة مرسومة علئ وجوهنا وبعدين وكفنا وقربني
لصدره وايدة انمدت علئ كتافي محتضني ويطكون النا صور والهلاهل ارتفعت وعمة
جوري تهلهل وتصلي علئ النبي، اخذنا كم لقطة وبعدين خلونا نركص سوية، ويفرني منا
ويجبيني منا واني ميتة من الضحك وبعدين مانحس الة سارة وكفت يمنا وكالت لمحمد شنو
رايك اهوس واكول جان صاحبها وخذاها وجان صاحبها كلها وهوة يضحك موهيج بعد
اخوج موهيج وضلينا نضحك ومتونسين وبعدين من راد يطلع باسني براسي حيل
وهمس احبج حيـل همست بحب واني اباوع بعيـونة امـوت عليك ابتسم وطلع ورجعت
كعدت ومبتسمة واحس روحي طايرة من الفرح .
حسين
طلع محمد ضحكت وكتلة امداك هـاي عود انتَ الكبير موصار ساعة يدزون عليك يردونك تطلع
شني لزكت تقرب ودك علئ جتفي وكال بعد روحي تريد امدك هنا بالنص كدام العالم
ماعندي مانع كتلة واني اسوي روحي اعدل بياخة القاط مالتة لا بعد اخوك اشاقة شوصاير
ماتتحمل شقة بعدين اني كتلهم عوفوا يمعودين علئ راحتة شومت مايطلع خلي يطلع
بس تدري الضروف قاتلة يااخي ضحك وكال جارة متصيرلك امشي ،وين ابوي؟ كتلة واني
اعدل بالغترة عوف ابوك هسة دشوف اخوك شلون طالع حلو بالغترة مع احتراماتي لليلبسون
دشداشات بوية عزلوا اني لبستها روحوا لبسوا كواني وضحكنا واباوعلة فرحان وطاير كتلة
بابتسامة ياب دوم لو ندري هيج تفرح من زمان نجيبلك دودة علمود تداويك ضربني علئ كتفي
وكال اسمها وداد ،دودة بعينك كون هزيت راسي باسئ وكتلة هاي عود بعدنا بالبداية
وبعتني بعد كم يوم الله يعلم شتسوي بية امدة الخوة اي والله امداها تنهد وكال اي والله
امداك ضحكت وعفته ومشيت وهوة يصيح وراي ويضحك وانطكيت بواحد اباوع هذا ابوي
كال وهوة خازرني وينك ملعون صار ساعة ادور عليك ابو الكوستر وين راح خابرة خلي
يجي العالم تريد ترجع لبيوتها كتلة واني اقلده من يخزر وشمدريني بابو الكوستر تقرب وهمس
حسين امدك هنا والحسين تروح تخابر ابو الكوستر لين رقمه عندك ولا اكلك جيبة اني
اخابرة وبالبيت احاسبك بعد ابوك كتلة واني اضحك لا علئ بختك بوية هسة اجيبة الك
مجتف بعد شتريد ضحك وكال يمعود بس خابرة لا تجيبة مجتف ضليت اضحك ودكيت
علئ ابو الكوستر طلع صاير عنده بنجر ورايح يسوي كال فد ربع ساعة واجي كلت لابوي
ورجعت انتجيت علئ سيارتي وعشت اللحظة وطلعت باكيت جكاير ابوي خلاه يمي طكيتلي
جكارة اخ الله بالنعناع خوش طالب خوش مختار نوعية تسحن الروح الة اكل لامي اكلها
تخلي الواحد يحب من جديد ويعيش شبابه واخليها تعاركك وضحكت كلت بوية غير
يسحلني اباوع عليه من بعيد ومحمد واكف يمه ويسولف ويضحك هوة والجماعة الواكفين
والفرحة مبينة عليه ولابس القاط الاسود ومزين والساعة والمناضر ،طكوا عمي اليوم
نخلي امي تشتعل من الغيرة ضحكت علئ سوالفي هسة اني عايف الناس كلها وواكف
اخطط وافكر واضحك ببحدي الحمدالله والشكر ،واجة ابو الكوستر واخيرا وبدت كلها
تطلع وتصعد دكت علية ريحانة كتلها واكف بالباب اطلعن قدمت سيارتي وهنة طلعن وامي
هالمرة وياهم صعدت بالصدر، واني فتحت باب السيارة الورة وكلت لريحانة اصعدي يلا
وصعدت وراها سارة وصعدت مريم وخليت وطبكت الباب واجاني صوت وحدة تكول اني
بعدني مصاعدة درت وجهي وشفتها صديقتهم نازك بلعت ريكي وفتحت الباب بسرعة وكتلها
العفوا يابة ماانتبهت اصعدي وخرت وهي صعدت وصارن وحدة بحظن الثانية،سديت
الباب ورجعت صعدت وبديت اسوق عدلت المراية اجت عيني بعينها كبل هية دنكت واني
رجعت اسوق مااهتميت، لحد ماوصلنا للبيت وكفت السيارة بالباب ونزلوا دخلوا للبيت واني حركت السيارة ووكفتها بمكانها ونزلت .
ريحانة
دخلنا للبيت والناس خفت كلها بدت تروح كبل بدلنا ونازك وكفت تمسح بالمكياج ودك مبايلها
جاوبت ونوب غلقت الخط وكالت بنات اجة اخوية منو بس تطلع وياي توصلني للباب كتلها
امشي يعمري اني وياج نزلنا وهية ودعت البنات وامي كلش حبتها بوستها وكالت عود هم
تعالي النا حبيبتي وهية كالت الها ان شاء الله خليت شال علئ راسي وطلعت وياهة بالكراج
ودخل حسين اشر وصحت حسين بس شوف النا اخو نازك وين واكف لين اجاها، كال وينها
هذا منتظرها خلي تجي بوستها وطلعت وحسين كدامها، جاي ادخل ودخل باسل يمشي
هوة وبابا ابتسمت ولوحت اله بايدي ابتسم وبابا راح يخابر وهوة اجاني تقدمت بسته بخده
وهوة باسني وكال هلا بروحي شبكت ايدة وكلت هلا يكلبي ودخلنا للاستقبال كعد واني
لزكت يمة وهوة محاوطني بايده ويبوس براسي ويطمن علية ويسالني شربتي الدوة
شلونج تحسين بوجع بس لا تعبتي روحج خليت راسي علئ صدرة وكتلة والله مبية شي
وداعتك ابتسم وكال خرب يومج شكد احبج ضحكت وكتلة خرب المانيا شكد احبك ضحك
وضلينا نسولف لحد مادخل بابا وتجمع حسين ومحمد وضلوا يحجون علئ الخطبة واني كمت
اسوي جاي وهمة صوت ضحكهم يرن رن كملت الجاي وقدمته الهم ورحت اساعد البنات
بالتنضيف لكيت ماما واكفة تغسل بالاماعين وخرتها ووكفت اني اغسل لحد ماكملتهم ومريم
وسارة يركضن منا ومنا لحد ما كملنا تنضيف دخلت للاستقبال بابا ماكو وحسين متمدد علئ
القنفة ومحمد وباسل كاعدين بالكاع ويلعبون دومنة كعدت يمهم واباوع شلون يلعبون وباسل
مندمج يلعب واني سرحانة بيه رفع راسه شافني ابتسم وكرصني من خدي ورجع يلعب
لحد ماكملوا باوع للساعة وكال السـاعة بـ11 تاخرنا يلا كومي ترحين؟ كتلة واني اكوم تمام
بس دقايق طلعت صعدت لميت اغراضي بالجنطة وسارة تساعدني ومريم نايمة اليوم
هم تبات يم اهلي ،بوستها وبوست سارة ونزلنا وهية شايلة الية الجنطة مقبلت اشيلها وسلمت
علئ ماما جانت كاعدة تقرا قران، وهم كامت سلمت علئ باسل لحد ماكمنا طلعنا وبابا جان
طالع كلت لسارة تبوسلي ياه وتسلملي عليه ركبت بالسيارة وباسل بدأ يسوق انتجيت علئ
الكشن وكتلة باسل كـال عيـونة كتلة واني اشبك ايدي بايدة اريد كيكة كال كيكة وبهـل
وقت موزين عليج خليها باجر اجيبلج ياهة كتلة لا عفية شبيك والله اشتهيتها بقت بنفسي
اليوم مااكلت، لاف بالسيارة وكال كيكة شنو تريدها كتلة واني مغمضة عيوني بالككو وهيج
كون من اكل منها يسيح ككو وهية عبرة عن ككو الله ضحك وكال هسة اجيبلج اصبري
ابتسمت وكتلة يموي فديتك وهوة يضحك علية وكف كدام محل معجنات ونزل يجيبلي
شوية وطلع من المحل شايل بيده علاكة وصل يم السيارة فتح الباب وصعد وخلة العلاكة
بحضني وبيها كارتونة فتحت الكارتونة وانسحنت روحي يموي جايبلي كيكة كاملة
وكلها ككو بستة بخد وكتلة خرب المانيا احبك ضحك وكال اموت عليج ورجع يسوق واني
منتظرة نوصل حتئ اكل من الكيكة وصلنا نزلنا وهوة شايل الي الجنطة واني شايلة الكيكة
البيت هدوء عمو وعمة هيج وكت ينامون صعدت خليت الكيكة بالثلاجة ودخلت سبحت
وبدلت وطلعت انشف بشعري وهوة دخل سبح وراي ، مشطت عري ورشيت عطر وابتسمت
مولابسة برمودة وفانيلة وبطني بارزة وكبرانة ،مشيت فتحت الثلاجة واخذت الكيكة
ونزلت بالمطبخ طلعت مواعين اثنين وقسمت الكيكة وساح الككو وسحت وياه هههههههه كصيت قطعتين لباسل والية وضميتها بالثلاجة
وطلعت عصير برتقال صبيت النا كلاصين وفزيت من حضني باسل من ورة ضحكت وكتلة
يمة خوفتني ابتسم وباسني براسي وكال شكاعد تسوين كتلة كصيت النا كيكة اني وياك
سحب كرسي كعد وكعدني بحضنة وبدينا ناكل اني وياه ونسولف ونضحك .
طالب
دخلت للغرفة، بوية متت من التعب بس اريد اتمدد وارتاح ،اجت عيني علئ المصلاية شفت
جوري نايمة وهية لابسة الحرام ابتسمت اكيد غفت وهية تصلي تقربت وكعدت بالكاع
ومسدت بهدوء علئ وجها وهمست جوريتي ماكعدت بستها بخدها وكلت رويحتي فتحت
عيونها بهدوء وابتسمت لا ارادياً ضميتهت لحضني مشتاقلها اليوم ماشايفها هـواي بستها
براسها وكلت تعبانة حبيبتي هزت راسها كومتها علئ كيف نزعتها حرام الصلاة ومشيتها
كعدتها علئ الجرباية وتمددت وضميتها لحضني وامسد عل راسها وهية حاضنتني
وساكتة تذكرت شكلها اليوم شكد طالعة حلوة وشلون سحنت روحي كتلها بهدوء شطالعة
اليوم؟ تكولين للكمر يوليي كوم خلي اكعد بدالك ضحكت واني ابتسمت اروح فدوة لهل
ضحكة وصاحبتها كالت وهية تحضني بقوة موبجمالك والله شنية عبالك العريس مو ابو
العريس ضحكت وكتلها شنو تغارين مسدت علئ لحيتي بهدوء وكالت كلش واخاف عليك
هم ابتسمت وبستها براسها وهية ضلت تسولفلي علئ اجواء الخطبة وشلون فرحانة
بمحمد واني استمع الها ومبتسم لحد ما غفينا ثنينا من التعب .
سارة
اباوع مريم نايمة وكلها نامت بس اني جني سحير الليل باقية كاعدة وجسمي يوجعني
منكد ماركصت اخ الله هاي اذا اركص كل يوم جسمي يترتب واصير احلئ من جورجينا بالله
اني سويرة واكفة امشط بشعري السبري دمره اني صوجي رشيت وهسة غسلته وداخلي اله
سيروم. وسويته كباية وخليت ماسك لوجهي لين المكياج خلة بشرتي مدري
شلون تصير عاد هسة ارطبها وترجع طبيعية شوية وغسلت الماسك وتمددت علئ الجرباية
ووفتحت مبايلي لكيت نازك متصل بالانترنت راسلتها جاوبتني كتلها شعندج كاعدة لحد هسة
روحي نامي ماعدنا بنات يسهرن كالت لعد شعندج كاعدة كتلها اني بنوتة موبنية ضحكت
وضلينا نسولف باحداث الخطبة وشلون تونسنا وشكد ضحكنا وشلون وداد طالعة تخبل
وياصالون رايحة ووو لحد ماتعبنا من الحجي وهية نامت واني سحير بعدني كاعدة ،طب
اجتني رسالة من رقم غريب دخلت دازلي شعنـدج كاعدة لحد هسة؟ ،موزين علئ عيونج
الحلوات، يمة غير كلبي اجة يطلع من مكانه عزا العزا هذا منو كاليومية واحد مراسلني،
بلعت ريكي وكتبت اله المرة الجاية من تراسلني انطي رقمك لخطيبي بالمكافحة واخلي
هوة يتصرف وياك ،شو شاف الرسالة كبل دز يـابة يروحلج فدوة خطـيبج ،شو هلايام ما
تراقبين من الشباك؟
يتبع ...
التنزيل بين يوم ويوم، لاتنسون التفاعل ، بخصوص طول البارت اتمنئ محد يكلي قصير وهـيج شي لين اساسا هالفترة مااكدر اكتب اكثر مـن 2000 كلمة او اركز اكثر بسبب التهاب العين، فداحاول البارتات الاخير تكون طويلة ومرضيةاكثر، كل الحب❤️
الكاتبة رودة